رواية جذبني فمك البني الفصل التاسع والثلاثون 39 بقلم عبير إدريس

صليتلج وادريج عكس القبلة..

ودعيت وادري الخالقج ميقبلة..

ودعتج موادع جلاد القرآن..

بستج وحارووا ياهو بينه الزعلان..

كالتلي روحه بلايه رده.. ورديت..

والماكدر عالفركه يرجع فشلان..

واحتاريت جن ملحد من يمر بضيج..

يتمنه يدعي لله ويرد خجلان..

كتلها سهلة وهي أبد مو سهلة..

اليرضى بفراكج رضى بموت اهله..

وانطيت مهلة لكلبي يكدر ينساج..

بس جانت حد ما اموت المهلة

_____

المهم عاذرهم وكل البقن سهلات  

انه الجرف اليسامح روج شاطيه ..!

حتى من انجرح مادام همه بخير  

انه بخير يعني وكلشي مابيه ..

__

رحت بس آنه ماراضيلك تروح

ضعف موقف وگفتك ردت احسمه

حَـرت من وادعتني اتشاهد اشتاگ

 بحروف الموادع چانت أزمه 

_____

وصلنه صف سامر السيارة وكال.. 

سامر : هذا ادهم 

سيلين : اي ضل باله لان مبلغتهم راح اتأخر 

سامر : شعجب غير تنطيهم خبر.. 

سيلين : راح من بالي. 

سامر : يلا نزلي 

سيلين : تنزل لو تروح 

سامر : طبعا انزل اسلم عليه واروح 

سيلين : ماشي.. 

نزلنه وصلنه يمه ( هنا راح اوصفلكم احاسيسه وبشنو جان يفكر حسب ما سولفلي بعدين ) 

يكول جنت اباوع بحركه ودمي يغلي لو بيدي اكسره بس اخاف عليج يروح يأذيج واعرفه راح يعاند وميتركج لان مبين متمسك بيج وحقه اللي يرتبط بهيج ترافه شلون يتركها اله اذا جان مجنون ... 

وصل يمه سامر مد ايده عمو هم تسالم وياه بس من وره خشمه ، دقايق وراح سامر.. 

دخلت للطرمه انسدت الباب التفتت عمو واكف يباوعلي اعرف نضراته هاي عتب بس ميريد ينزل نفسه ويجي يحجي ويايه اذا عفته وغلست راح يضل يغلي ويحرك بروحه واذا حجيت وياه راح اتأذه بالكلام بس فضلت راحته لهذا قررت اصعد واحجي وياه فوك لان هنا كلشي ينسمع وفهد غفل يطلع واخاف منه... 

صعدت فوك وهو هم صعد رحت بدلت ورجعت للحمام توضيت وفتت للغرفه صليت الظهر والعصر لميت السجاده وكعدت سولفنه شويه اني وايفين بعدين عفتها ورحت لغرفه المكتب اعرف بيه يكعد هناك خصوصا من يضوج اول ما دخلت جريت نفس قوي شجعت نفسي وفتت .. 

سيلين : عمو ممكن نحجي .. 

جان مدنك رفع راسه باوعلي وضل ساكت.. 

سيلين : اعرف اكو بكلبك حجي وصدرك متروس عتاب احجي برد كلبك حتى لو كلام جارح اتقبل... 

ضل ساكت مجاوبني بعدين همس .. 

ادهم : انتي ليش صايره متحترمين .. 

سيلين :و انت ليش هيج فسرتها... 

عكد حاجبه وباوعلي مغضب ...

ادهم : شلون ترديني افسرها ..

سيلين : يعني نسيت راح من بالي مو متقصده وروح بابا اصلا مالي واهس اطلع وتعبانه بس سامر اصر عليه اروح ورحت.. 

ادهم : اساسا انتي تريدين توصليلي رساله مبطنه معناها شيل ايدك عني هسه انه بذمه رجال وهو مسؤول عني انت خلص وكتك.. 

ضربت رجلي بالكاع حيل محتجه على كلامه.

سيلين : والله لا لا لا ليش تخليني احلف .. 

ادهم : من يمته وجاي تسوين شي وانه ما ادري لو تخطين خطوه وادهم ماعنده علم هيج صارت سيلين .. 

سيلين : عمو افهمني تره كلبي تعب وكارهة روحي صدكني انت اعز انسان على كلبي اعز من امي وحتى من سامر خاف عبالك اعزه اكثر منك غلطان ابد وحتى اذا حبيته مستحيل يتقارن بيك ... 

جر نفس قوي وضل يدك باصابعه على الميز نقرات تنرفز وتزرف الدماغ زرف.. 

سيلين : ليش ضايج ومعصب غير افهم اذا على الطلعه بعد ما اطلع واذا علمود ما بلغتك اني اسفه واعتذر ومره ثانيه ابلغك يلا اطلع..

نتر بيه 

ادهم : ممعصب شايفتني كسرت صيحت شسويت وجلبتي معصب ما معصب كتلج ضل بالنه وانتي امانه يمي وخلص..

سيلين : ماكو داعي للتوتر اني كتلك وفهمتك وجهة نضري والمفروض تتقبلها حتى وان جنت تحبني فعلا او يمكن تحب تشوف عمه بيه وهذا التوقع الارجح.... 

ادهم : النوب.. 

سيلين : شنو حجيت غلط.. 

سكت مجاوبني .... 

سيلين : عمو الى متى اضل عاله عليك وتصرف عليه فهمني اول وتالي اني راح اتزوج واروح منا اذا سامر او غيره..

من حجيت هيج اندار عليه وخزرني تحول كتله غضب وكام يصيح بسرعه سديت الباب ورجعت لمكاني وكفت وانهال عليه بالكلام فقد ميعرف شنو يحجي اعصابه تلفت من ضمن الكلام الاتذكره هذا ...

ادهم : شنو هالحجي منو كلج انتي عاله على كلبي ومنو كلج انه متعاجز من عدكم ليش تغثيني بالحجي سيلين ليشششششش احسج صايره تتقصدين تحركين بدمي.. 

سيلين : بس هاي الحقيقه انت رجال غريب وخلف الله عليك تحملتنه وربيتنه وصرفت علينه .. 

ادهم : هسه صرت غريب ؟؟ 

حجاها و يريد ينفجر.

سيلين : عمو انت من اول غريب بس الماعدهم غيره شمرونه عليك وراحو من امي وعمامي وشيل ايدك... 

حجه بصوت ضعيف كلش.. 

ادهم : عوفج من هالحجي كليلي شلون هيج تفكرين بيه. 

سيلين : من يا ناحيه. 

ادهم : تكولين انه رايدج لان تشبهين ياسه.

سيلين : انت تريدني لان اشبه عمتي وتريد تشوفها بيه مبينه ... 

صفن بوجهي وكال 

ادهم : لا ااااا مو هيج ابد مو هيج..

حجاها بصوت ضعيف ومتوسل..

سيلين : لا اني اكلك تريد تشوف عمه بيه واني مستحيل اقبل بهذا الشي واصلا ما افكر ولا مفكره اخذ مكانها بيوم من الايام لا بيتك ولا بكلبك خصوصا بعد ماعرفت عندك مشاعر اليه مستحيل اضل هنا بعد... 

اشتد النقاش بينه بس من حجيت اخر شي.. 

رجف حلكه راد يحجي مكدر 

سيلين : فهمني شحبيت مني هو اني وحده مخبله وانسانه مليانه هموم وذكريات سيئه .... 

مجاوبني اشرلي اطلع طلعت... 

لكيت ايفين وكافه تتسنط خزرتها ورحت لغرفتي تغطيت ونمت اجتي ايفين هداده شالت الغطه وخازرتني ... 

ايفين 

واكفه اسمع تخبلت على عمو شلون يرجف اول مره هيج يصير عصبي شكد يستفزوه بالكلام وشكد صارت مواقف اعصابه ابرد من الثلج بس من يوم سيلين انخطبت انكلب وتغير صار انسان ثاني حتى اهله مستغربين حالته بس محد يتدخل ... 

وين متروح سيلين عيونه تلاحكها واني ما اكدر اكللها خاف تاخذ موقف وتكوم تتحسسس من عمو بس اني حاسه بحبه الها وشلون متأذي ويتعذب هو يخاف يكول الها بطلي علمود لا يخسرها واني اخاف احجي وياها ، سيلين زرعت الخوف بكلبنه لان منعرف رده فعلها شنو بس بعد السمعته كلبي تفتت كلت اله احجي وياها عسما تملخني ما اسكت بعد واشوف عمو يتدمر كدامي كل يوم..

ايفين : كومي احاجيج.. 

سيلين : شكو انتي الثانيه تره تعبانه ولعبانه نفسي 

ايفين : يطبج مرض كومي كتلج.. 

سيلين : شكو شكووووو اذا بخصوص السمعتيه سدي حلكج ...

ايفين : ليش متقبلين بيه شنو ناقصه ومنو مثله فهميني . 

سيلين : لتدخلين بشي ميخصج...

ايفين : لا يخصني مادام شي انتي وعمو بيه يعني يخصني. 

سيلين : ياربي دخيلك عدي اليوم على خير ، لج بابه افهمي اني وعمج مستتتتتتتتتتتتحيل نتراهم مستحيل ماكدر شنو هيه غصب .. 

ايفين : بس انتي دمرتيه 

سيلين : والله مكتله يحبني ويتعلق بيه واني مبدر مني اي تصرف يخليه يحبني جنت اعامله بكل احترام لا لبست لبس يغريه ولا تصرفت تصرفات طايح حضها علمود تلوميني هسه والاهم اني واضحه وياه مغشيته. 

ايفين : معليه بهذا الحجي كله عمو رايدج ويحبج اقبلي بيه وانجبي عاد عوفي غرورج سيلين   

سيلين : ياغرور ياغرور انتي شتحجين ... 

ايفين : اعرفج اني كلش زين 

دنكت لزمت راسي احسه يريد ينفجر محد يفهمني محد ... 

سيلين : ولي من وجهي. 

ايفين : اذا استمريتي ويه سامر اكله عمو يحبها واخليه يبطل . 

كمت وكفت يمها وجريتها من ايديها حيل.. 

سيلين : جربي وشوفي شسوي بيج رعنه لتدخلين بحياتي والتهي بحياتج ودراستج معليج مني.. 

ايفين : حرام عليج ميستاهل هيج تسوين بيه.. 

سيلين : لج انتي شتحجين اكلها يشوف عمه بيه تفتهمين يعني شنوو لج مجرد افكر بالموضوع انقرف لسه حجايتها تدك بكلبي من تكول شلون اذا وحده اجتي اخذته مني واخذت بيتي وبنتي ماكدر نفسيا ما اتقبله انتو شبيكم شنو غصب ... 

ايفين : انتي مكبره السالفه انطيه فرصه ليش هيج قافله على نفسج وكاطعه اي تواصل بينكم بتطوير هاي العلاقه جربي جوز تتقبليه. 

سيلين : اني مو ايفين افتهمي اني وحد وانتي وحد اذا عندج عادي تاخذين رجل عمتج اللي انتي جنتي شاهده على حبهم وتعلقهم وزواجهم وبعدين شهدتي مرضها والمها وقهرها وحسرتها على فراك زوجها ذاك الوكت تعاي حاجيني انتي شمدريج جنتي ملتهيه بروحج واني اخدم بيج هسه صارت سيلين انانيه وخبيثه وطايحه حظ كلكم تفكيركم محدود سواء انتى او هو تفكرون بنفسكم وبس انتي تفكرين شلون اذا عفتج وحدج هنا وهو يفكر بروحه شلون يضل يعاني بس اني محد يفكر بيه.

ايفين : مخبله. 

سيلين : اي ولا على المجنون حرج عوفوني معليكم بيه..

ايفين : يطبج مرض تجين بيوم عاضه اصابعج ندم على عمو وساعتها والله والله اضل اضحك عليج..

سيلين : تسويها والله ما استغرب كلشي منج .. 

طلعت واني رجعت نمت ودمي يغلي هلمره توترت العلاقه وصارت اتعس بينه.. 

صار الليل كمت سويت عشا صبيت لعمو وحد واحنه وحد، اجتي ايفين اخذت الصينيه وراحت رجعت جابتها.. 

ايفين : يكول ما اريد ..

سيلين : هو اصلا ميتعشى.. 

ضلينه ساكتين .... 

مشت الايام وعلاقتي بسامر قوت نوعا ما تعرفت عليه وهو هم ارتاحلي يعني علاقه مبدئيا اكدر اكول عنها متكافئه .. 

وبيوم خابرني كال 

سامر : حبيبتي اريد اجيج للبيت اشوفج ونحجي براحتنه كلشي مكاعد افتهم منج بالدوام 

سيلين : انتضر ابلغ عمو وارجعلك خبر 

سامر : ليش يمانع 

سيلين : مو قصه يمانع بس اني كاعده بيتهم لازم انطيهم خبر...

سامر : هم صحيح كليله ورجعيلي خبر 

سيلين : ماشي 

سامر: منتظرج 

سيلين : تمام باي 

سامر: باي 

سديت الموبايل ولبست حجابي وطلعت حايره شلون اكله احسها صعبه يجي لبيتهم وهمه غربه دكيت الباب ماكو صوت فتحته لكيته نايم على القنفه بغرفه المكتب ، طلعت جبت غطه ودخلت غطيته عالك السبلت وبارده الغرفه ثلج ..... 

انداريت اطلع همس.. 

ادهم : شلون صرتي ...

وكفت بمكاني التفتت وجاوبته .. 

سيلين : شمدريك مريضه.. 

ادهم : كحتج الليل كله مخلتني انام..

سيلين : اسفه مو بيدي ازعجك بس تدري مريضه ماسيطر عليها ... 

ادهم : لا مو هيج بس ضل بالي يمج وجيت يم الباب وكفت ردت احاجيج بعدين تذكرت احنه على خلاف وخاف بعدج زعلانه عليه.. 

سيلين : اني ماعندي وياك اي خلاف وحجيتلك البكلبي مثل ما انت حجيتلي البكلبك بس انت اخذت موقف..

عيونه نعسانه ماعرف ذبلانه من السهر لو وجع راسه المهم تاهت عليه بس بعدين عرفت هو جان يسهر خصوصا من اخابر يكول مجنت اكدر انام مو بيدي احس نار تحرك بيه واغار عليج منه... 

ادهم : جبتلج علاج دتاخذين منه ..

سيلين : اي عاشت ايدك. 

ادهم : ردتي شي وجيتي ؟ 

سيلين : لا جيت اشوفك وهذا هو.. 

ابتسملي رديتله الابتسامه وطلعت مكدرت اكله سامر يريد يجي للبيت اعرف دمه راح يحترك ،

 الدكتور ادهم رجع طفل هيج كاعد احسه صار طفل يتحسس مني اقل تصرف اقل حركه ياخذها بغير قصد صرت اتجنب اسوي اي شي يضوجه مني حتى بالدوام كمت ما اصعد فوك ابد اذا راد سامر يشوفني نلتقي بنادي الكليه.... 

وبيوم خابرني سامر من بعد الكلام كال..

سامر : شنو السالفه سيلين شو طولتيها 

سيلين : هيه شنيه الطولتها. 

سامر : مو كلتي عيب من اهل ادهم لتجي وكتلج تعاي يمي بيتنه وكلتي افكر وارجعلك خبر وهاي صار عشر ايام.. 

سيلين : باجر اردلك خبر غير على فراغي واني ماعندي فراغ.

سامر : يلا منتضرج... 

سيلين : تمام.. 

ضلينه نسولف وراح ... 

رحت للمطبخ حتى اسوي غده جان يوم جمعه تفاجأت من عمو ومريم اجوي كعدو يمي بالمطبخ فرشت كتبها على الميز وهو كعد يمها يقريها ، صار شهر كامل لا يكعد يمنه ولا يفوت للمكان الاني بيه فرحت كلت بلكت تقبل الوضع ... 

اشتغل واسمعهم شلون يدرسها وهيه تناقشه ويستمع الها تكمل يلا يحجي... 

مريم : بابا المعلمه تكول القصص والتلوين اشتروها من باب التسليه هيج كالت...

ادهم : كليلها بابا يكول التسليه بالعلم اجمل من نقره ونتثقف نصير احلا روحيآ ...

حبيت اشاركهم الحديث ...

سيلين : همه اطفال و مرات يصير مللل وتشبع عدهم من الدراسه لهذا لازم تغييرلهم جوو المعلمه فكرتها صحيحه.. 

رفعه عينه باوعلي وابتسم جر نفس قوي كأنما ذكرته بذيج الايام الجنه نتناقش بيها وحوار يتداخل بحوار الى ان يصبح حبكه و موضوع شائك وصعب حله وبالتالي نكوم نفرض فرضيات وننطي براهين وبالاخير واحد من عدنه يقتنع ،،، اعشق عقله واعشق الحوارات وياه واتمنى مابيناتنه شي ونرجع نتناقش ونتحاور مثل قبل جان يكلي الوحيده انتي تنافسيني بالذكاء وجنت اضحك.. ... 

ادهم : اذا نضرنه من زاويه مختلفه راح نحب هذا الشي .. 

سيلين : شلون يعني ..

ادهم : التعلم من الصغر كالنقش على الحجر ، بمعنى بدل ما اخليهم يلتهون بسوالف التلوين والقصص وقت طويل احجيلهم شي يخص الفلك او معلومات تخص اعضاء جسم الانسان بس بطريقه حلوة مو تدريس وانما تسليه تكون برسومات مثلا ترسم الهم اي جهاز بجسم الانسان وتخليهم يرسموه من يدرسون الاحياء راح يشوفون الرسومات شكد سهله ومبسطه ومن يوصلون لهاي المرحله عدهم كم هائل من المعلومات تأهلهم يناقشون اي شخص يسألهم بهاي الامور .. 

سيلين : بس هم راح يصير ملل 

ادهم : وجهة نظر لا اكدر اجبرج تتقبليها ولا انتي تكدرين تجبريني اتقبل وجهة نضرج... 

حسيته بسمار اليه سكتت.. 

مريم : بابا شلوووون عفيه شنو اقره انسه شسوي حباب.. 

جان يباوعلي من حجت مريم التفت الها وكال. 

ادهم : ممممم حتى متنسين اعتبري نفسج بحوار تلفزيوني وطالعه كدام ناس هوواي وسألوج سؤال بنفس الموضوع الكاعده تقرين بيه راح تشوفين نفسج لا اراديا تشرحين الموضوع بكل سلاسه علمود لتنحرجين كدام الناس وبهيج راح يطبع بدماغج وللأبد ومستحيل تنسيه.. 

سيلين : بس الورقه والقلم اضبط.. 

ادهم : مو لعمرها بعمرها الحفظ بهيج طريقه افضل  

سيلين : قنعتني 

ادهم : هاي الطريقه علميا مو بكيفي احجي.. 

سيلين : اي اعرف . 

جر نفس ورجع يدرس مريم واني كملت الطبخ ونصيت النار رحت توضيت وصليت بعدين رجعت لكيتهم بعدهم على كعدتهم..

سيلين : اذا تعبت اني اقريها. 

جاوبني بدون ما يرفع راسه 

ادهم : اتعبلها تستاهل التعب بنتي هاي .. 

عرفته بسمار ثاني سكتت حضرت الزلاطه وصبيت الغده صحت ايفين وصعد ايمن .. 

سيلين : تعال تغده صبيت. 

ايمن: ايييييي وعاشووو...

سيلين : ههههههه ديلا تعال .. 

ايمن: طبعا اجي 

سيلين : ههههه 

رحت للمطبخ كعدنه ناكل وصرت اراقب حركات ايمن وايفين والتوتر ، باوعت على عمو هم نفس الشي وبهيج اجتمعت الخباثه مالتنه اني وياه ، هو هم حس بيه كاعد اراقبهم غمزلي وضحك بعدين كال.. 

ادهم : سيلين. 

فد فرحت من كال اسمي كلش كيفت احس الروح ردتلي. 

ابتسمت وكتله. 

سيلين : نعم عمو 

ادهم :الابتسامه والنظرات.. 

ضحكت جاوبته... 

سيلين : ومن ثم التقاء النظرات المتواصله ورد الابتسامه. 

ادهم : قوام مستقيم.. 

ضحكت 

سيلين : ههههه عرض راحة يديها وكفيها. 

ادهم : الوقوف والصدر منتفخ الى الامام والاكتاف الى الخلف..

سيلين : تحريك شعرها بأصابعها واللعب به ، بس تره لابسه حجاب لهذا ممتوفر. 

ادهم : هههههه تسويه ربطه العنق وترتيب الجواريب.. 

دنكت راسي باوعت لايمن من جوه الميز لكيته لابس جواريب. 

سيلين : ههههه عمو لابس جواريب بس مسوه هاي الحركه. 

ادهم : الثقه بالنفس. 

سيلين : تصلب قدميها ثم الفك هههههه وهاي صارت تره. 

نحجي ونضحك وايمن وايفين صافنين علينه اخر شي ايمن زهك وكال. 

ايمن : شنو هالالغاز متحجون شكو.. 

ادهم : مو وياك عدنه محاضره باجر وهذا موضوعها وكاعد نراجع شتكولين سيلين ..

سيلين : وياك شتكول صح. 

ابتسم..

ايمن : تراجعون صدكت ، التفت عليه وكال ، وانتي شكو تباوعين على رجليه. 

سيلين : ههههههه عمو راح انكتل.. 

ادهم : شحده خلي يجرب ويشوف. 

ايمن : لو تفهموني لو تصير موزينه تره. 

ادهم : ماكو شي اكل. 

ايمن : اتفقتو علينه مو بسيطه.. 

سيلين : شبيك اني اكلك ، هاي اشارات بينك وبين ايفين اذا صارت وحده لو ثنين لو كلهن يعني بينكم اعجاب.. 

ايمن : اعجاب حلتها وانتي مو تدرين عدينه هاي المرحله. 

ادهم : ايمن شو صارت علني السالفه ..

ايمن : لعد شنو انت مو تدري اريدها والدنيا كلها تدري بعد شكو.. 

ادهم : مضل شي وتكمل امتحانات اصبر. 

ايمن : يعني ليش اريد افهم هو تضل بنفس البيت لا تروح بغير مكان وتعاشر ناس جدد علمود تستحي ومتقره ، هيه هاي وين تستحي اذا رادت تقره حتى الي تطردني من الغرفه. 

ايفين : تره ساكتتلكم لان كاعد اكل بس صبرولي اكمل وشوفو شسوي ...

سيلين : ههههههه خوفتينه افونه.. 

ضلينه نسولف وكامو كلمن راح بمكان..

وهم مرت الايام ومشى اسبوع ورجع سامر خابر عصبي ومتنرفز لان كتله استحي اطلب من عمو اجي لبيتكم شيكول عليه وهو نزل عليه وعلى عمو تخبل اخر شي قررت بعد مابيها مجال اروح واحجي ويه عمو.. 

دكيت باب الغرفه صاح تعاي فتت جان مدنك على الحاسبه يشتغل.. 

سيلين : عمو اريد اكلك على شغله اذا ماعندك شي. 

ادهم : كولي. 

سيلين : سامر يريد يجي علمود اروح وياه لبيتهم ..

عكد حاجبه بعدين عدل ملامح وجها حتى ميبين هو غيران .. 

ادهم : لا 

سيلين : ليش ؟

ادهم : ميصير 

سيلين: بس هو ديلح. 

ادهم : كليله ادهم ميقبل. 

سيلين : عمو شنو السالفه غير يصنفني اذا هيج كتله. 

ادهم : براحتج شنو تردين تكليله كليله بس متروحين لبيتهم

سيلين : لعد شنو اكله انطيني سبب مقنع علمود اقنعه.

ادهم : كليله عمووو يغار عليه كلبه مينطيه انت تلزمني لو تشم ريحتي كليله تدمر واحتركت اعصابه . 

سكتت عفته وطلعت ثاني يوم من داومنه اصر اروح وياه واني جنت رافضه بس هواي لح عليه ورحت بالطريق دزيتله رساله كتبت بيها.

سيلين : ليظل بالك اني ويه سامر. 

قراها ودز. 

ادهم : وين رايحين ؟ 

سيلين : لبيتهم 

مجاوبني.. 

رحنه كعدت ويه امه مبينه حبابه وفقيره وخواته هم مبينات زينات عنده ٢ بس صغار يطلعن اعداديه واخوه هم صغير ... 

ضليت اسولف وياهم وتغدينه سوه بعدين طلب مني اصعد فوك اشوف الغرفه مالتنه صعدت اول مادخلت الغرفه حضني بادلته المشاعر..

بعدين مد ايده نزعني الشال ، وانطلق يطبع قبلات على وجهي وشفتي نزولا لركبتي ... 

اكذب اذا كلت متأثرت لان حسيت بديت اميل اله او ممكن بلشت احبه .... 

بعدين كعدنه ضلينه نسولف وبلشت ايفين اتصالات تدك واسده وترجع تدك اخر شي دزت.. 

ارجعي عمج راح يصير بيه شي من خرب بيج يا *** 

وضلت تغلط عليه اخر شي كتبت ، راسه راح ينفجر من تف عليج... 

سامر : منو هاي ؟؟ 

حجاها وخر شعري من على وجهي جان نازل 

همست 

سيلين : ايفين 

سامر : شبيها 

سيلين : تكول تأخرتي رجعي كافي. 

سامر : اذا تردين ارجعج عادي. 

سيلين : ياريت 

سامر : لبسي واني نازل قبلج .. 

سيلين : تمام. 

باسني من شفتي ونزل .. 

وكفت على المرايا لبست حجابي وطلعت سلمت على اهله وصلوني للباب صعدت بالسياره ورجعت للبيت ، ايفين ضلت تحجي واني ساكته مجاوبتها.. 

من بعدها كل ما يريد يجي ياخذني عمو يطلع حجه وبيوم متت ضحك على غيرته شافني مبدله كال.

ادهم : هااا وين ؟

سيلين : راح يجي سامر ونطلع

ادهم : خليها غير يوم.

سيلين: ليش؟

ادهم : عدنه مسواك واريد تجين ويايه نتسوك.

سيلين : كلشي عدنه لو اكو نقص جان كتبته اني.

ادهم : لا عدنه نقوصات هواي ..

سيلين: روح جيبها انت 

ادهم : لا تجين ويايه

سيلين : من يمته وجاي انت تاخذني وياك نتسوك مو جنت متقبل 

ادهم : منا وغاد انتي ويايه يلا امشي نازل قبلج..

نزلت ورحنه تسوكنه حتى الشغلات العدنه كررها اهم شي يضيع وكت وهذا سامر تخبل من كتله ما اكدر مالي خلك وراح انام ...، عمو فرني بغداد كلها صارت ساعه تسعه يلا رجعنه من ردت انزل موبايلي جان جوه المسجل مال سياره وباكيت الجكاير مال عمو يمه ، مدينه ايدنه سوه علمود اخذ موبايلي وهو ياخذ جكايره ، صارت ايده فوك ايده بسرته سحبتها هو جر نفس قوي ونزل...

وره اربع ايام جانت دوره السنه مال عمتي الكل اتفق يروحون وعبالي اني هم من ضمنهم بس من بلغت سامر رفض ورفضه جان قطعي كلت اضل بلبيت وهمه يرحون ، ثاني يوم كعدو اسمع صوتهم يبدلون واني ضليت نايمه بعدين صار هدوء عرفت طلعو وره شويه اندكت باب غرفتي كمت لبست حجابي وفتحت الباب عمو صاير اعصاب. 

ادهم : شنو شو ممبدله بعدج تره راح نطلع. 

سيلين : ما اجي؟

عكد حاجبه وكتف ايده وايد الثانيه رفعها خلاها على حلكه وضيق نضرته.

ادهم : ليش بله . 

سيلين : سامر مقبل 

ادهم : مممم وليش ميقبل الدكتور وين ماخذج انه 

سيلين : ماعرف مقبل واني تعرفني ما احب الح. 

ادهم : يعني شيسوي اذا اخذتج ويايه عندي فضول اعرف ..

سيلين : اكيد تصير مشكله 

ادهم : لعد كومي بدلي اذا هيج. 

سيلين : هههههه صدك تحجي 

ادهم : اي صدك احجي وين رايحين غير لعمتج شو انتي مدري شلونج. 

سيلين : يعني اذا ميقبل شسوي. 

ادهم : مو بكيفه مادام انتي يمي بعدج انه المسؤول الاول عنج .

حجاها واختنك... 

سيلين : صح انت مسؤول عني راح ابدل بس انت تبلغه .. 

ادهم : عليش اكبر راسه دزيله رساله كليله البيت فارغ شلون اضل وحدي هيج ماعندك غيره . 

هو حجاها عصبي بس اني ضحكت مدري ليش 

ادهم : ضحكي ضحكي وانه محروك حرك بدلي ونزلي ورايه دشوف شلون ميخليج تجين.. 

ضليت حايره شلون قهر بله شسوي هسه اني ، رحت بدلت ودزيت رساله لسامر توسلت بيه اخر شي كتله راح اقفل الجهاز واعوفه بلبيت لتزعل مني .... 

نزلت لكيتهم صاعدين بالسيارات فهد وياه امه وابوه وزمن ونرمان 

وبسياره عمو اني وايفين ليوره وهو وايمن ليكدام ، الطريق كله ، يسوق وكل شويه يرفع عينه ويسرق مني نضره ، وصلنه اول شي زرنه عمه بعدين رحنه للأمام زرنه وطلعنه جانو واكفين حسيت بدوخه قويه لان سهر ودراسه انلاصت عليه كعدت على الدجه ، انتبه عمو اجه يمي صار قريب همس. 

ادهم : شبيج سيلين 

رفعت راسي وكتله. 

سيلين : ماعرف دخت ونفسي لعبت..

ادهم : هاي لان طلعتي بدون ريوك ، بيج حيل تمشين نروح ناكل. 

سيلين : ماكدر هسه اكوم جسمي كاعد يرجف. 

كام وصاح ايفين كللها عينج عليها هسه اجي راح وره شويه اجه جايب لفه وعصير خلاهن بيدي وكال . ..

ادهم : اكلي هسه تصيرين زينه 

سيلين : ماريد ما اشتهي. 

ادهم : مو بكيفج اكلي بسرعه. 

اخذت منه الاكل باوعت اهله عينهم علينه وفهد واكف مركز كل حيله وباله ويانه عبالك كاعد يتفرج مسلسل مهم وميريد يضيع منه لقطه.. 

اكلت نص لفه وشربت شويه من الشربت وسديته رجعتهن بالعلاكه..

ادهم : اكلي كمليها 

سيلين : ما اكدر وداعتك. 

من كلت هاي الكلمه عكد حاجبه ، اخذ مني علاكه اللفه والعصير . 

ادهم : هسه بيج حيل تمشين. 

سيلين : اي صرت احسن 

ادهم : يلا لعد 

مشينه هو يمشي بصفي ومريم من الجهة الثانيه لازمها ..

دخلنه للمطعم طلبو اكل ، وره شويه جابوا انتبهت على عمو اكل الباقي من لفتي وشرب العصير ، من اتذكر هاي الشغله كل يوم اموت ولحد هذا يومي اكثر موقف اثر بيه هو هذا ، لعد شكد جان يحبني ... 

رجعنه للبيت واتصلت على سامر بلغته برجوعي وجها ثكيل بس مشيتها... 

ومرت الايام واجتي امتحانات اخر السنه امتحنت وايفين هم امتحنت ومرايم خلصنه ،

 يابه ايمن اعقد علمود نحدد موعد للعرس مالتي ، 

امه اليوم وباجر وكل يوم تأجل ليش وشنو السبب منعرف بس من ننزل ونحجي على التحضيرات مال عرس ايمن تحجي فرحانه بس من نريد نحدد وقت تغلس ، سامر قفل عليه اله نتزوج خلال هاي الاسبوعين وحدد موعد وحجز كلشي عاتبته كال اذا امشي وراج اضل سنين انتظر واني ماعندي شي بس سالفه امتحاناتج وخلصتي بعد شكو ، رحت كتله لعمو تخبل . 

ادهم : شنو بكيفه يحدد ..

سيلين : شسويله حجيتلك كلشي ويكول ماعندي شي كلشي مكمل. 

ادهم : ماكو هيج شي اذا متزوجت ايفين انتي متتزوجين. 

سيلين : اي لعد استعجلوا ليش كاعد تماطلون 

ادهم : عندي سفره اروح وارجع يلا نحدد موعد العقد مالتهم 

سيلين : عمو اكلك كلشي حجز تكلي اسافر .. 

ادهم : شلون تعوفين اختج وحدها 

سيلين :شكو عليها انت أأمن واحد بينه عليها ومضل شي للعقد مالتهم

ادهم : لا تضلين يم اختج تعقد يلا. 

سيلين : اي باجر خلي يعقدون وعلى كيفهم يسوون الحفله.. 

حجايه مني حجايه منه صارت مشكله طلعت وعفته دزيت رساله لسامر كتله انت احجي ويه عمو اني استحي ابلغه.. 

اتصل عليه وماعرف شنو حاجين وثبت الموعد هذا هوو.. 

بلشنه نطلع نفتر ندور فساتين اني ونرمان وايفين ، بيومهة تأخرنه كلش صارت ساعه عشره وبعدنه مراجعين احترك الموبايل مال نرمان اتصالات من ادهم اسمعها تكله.

نرمان : وليش خايف علينه مو اني دائما اطلع شو متحجي ولا تتصل قابل صغيره يا ادهم ، اي اعرف دنيا ليل بس شنسوي سيلين كوه قنعت بالبدله رادتها بسيطه ونفش قليل، هسه ليش تصيح ادهم شبيك ، يااااا راجعين والله بس صبر ، كلبك راح يوكف ، اي ماله داعي التوتر والعصبيه تدري نتأخر...

سدته وضلت تدردم على ادهم ، رجعنه امه كالت لحد يسوي صوت من تصعدون ادهم راسه وتخربط اجه المضمد قاس ضغطه صاعد وتوه نام... 

تزوهرت حتى سامر مجاوبته شكد اتصل ارفضه واكله يمي البنات ماكدر احجي ضل يدز رسائل واني بنص الضيم هيه مال رومانسيات هسه. 

قبل يوم الحنه رحنه للصالون نرتب نفسنه ، وهم تأخرنه لان احنه اربعه ويانه زمن اللي لحد الان لا تطيقنه ولا احنه نحجي وياها ، بس تخاف تأذينه ادهم محذرها وهيه كلش تخاف منه والاكثر تحترمه ، كملنه ورجعنه لكيناه كاعد بالباب اكو دجه صغيره كاعد عليها ويدخن ايفين نغتني بصبعها. 

ايفين : يولي والله خطيه شوفيه راح يموت.. 

سكتت مجاوبتها دخلت جوه ، بيوم الحنه مالتي رحنه للصالون ايمن وصلنه ومن كملنه اجه علينه طلعت كلش حلوه بيومها بدلتي جان لونها نيلي وعدله وكلها شغل كتف بيه تعلاكه وكتف الثانيه مابيها والمكياج الوان ترابيه بيج على مشمشي المهم طلعت كلش حلوة ، 

دخلت للبيت مصعدت فوك كلت خاف اشوفه وهم تصير مناوشات بينه واصلا اخر فتره هو يحجي واني اسكت ابد ما اجاوبه حتى لو حسيت نفسي اني صح نزعت الجبه والشال ورتبوني البنات ورحت كعدت بالاستقبال ، الموجودين اهل ادهم وكم وحده من الجوارين بعدين اجوي سامر واهله علمود يحنوني ... .

ايفين 

صارت سولتي بعمو والاصح روحي بيه عشت عذابه يوم يوم ساعه ساعه وحتى تمرضت من قهرتي عليه ، بيوم الحنه قليل نزلت جوه كاعده فوك اراقب خاف يصير بيه شي وطلبت من ايمن يكعد يمه يلهيه ميعوفه وحده ، من اجوي اهل سامر عمو افتهم سامر وياهم كام يلوب اسمعه يحجي ويغلط على سامر ويرجع يسب بنفسه شلون هيج ديضعف ومكاعد يسيطر على اعصابه اخر شي عاط ب ايمن. 

ادهم : كلهممممم يطفون الاغاني راااااسي راح يطك. 

ايمن : يمعود شبيك غير البنيه عرسها اذا تريد امشي نطلع تخلص الحفله ونرجع. 

سكت مجاوبه ، نزلت شاركت فرحه اختي اللي ما موجوده من الاساس اخذتلها صور بموبايلي وخلصت الحنه صعدت سيلين دخلت كبل للحمام من صعدت جانت لابسه جبتها والشال سبحت وطلعت مددت وغمضت عينها. 

ايفين : طالعه تخبلين. 

جاوبتني هيه ومغمضه 

سيلين : اعرف. 

ايفين: ادزلج الصور. 

سيلين : كيفج دزي.. 

دزيتلها الصور 

بليل اندك الباب فتحته عمو عيونه حمررر كوه فاتحها . 

ايفين : شبيك عمو 

ادهم : راسي شويه اختج نامت .. 

ايفين : يمكن. 

ادهم : عبالي احاجيها لان باجر عندي ايفاد من الصبح اطلع.. 

ايفين : اكعدها الك. 

ادهم : لالا خليها ترتاح تصبحين على خير. 

ايفين: وانت من اهله.. 

منطاني كلبي اعوفه يروح بدون ميودعها رحت كعدتها جانت غافيه. 

ايفين : سيلين كومي . 

سيلين : شكو . 

ايفين : عمو اجه سأل عليج 

سيلين : وينه؟ 

ايفين : راح بغرفته كومي احجي وياه باجر يسافر . 

سيلين : وين يسافر صدك تحجين 

ايفين : اي والله عنده ايفاد 

وخرت الغطا وكمت لبست حجابي ورحت لغرفته دكيت الباب جاوبني بصوت منشول 

ادهم : جيت. 

فتح الباب شافني اندار نطاني ضهره مسح وجها بيده ورجع التفت عليه.

ادهم : احم محتاجه شي. 

سيلين : ايفين كالت اجيت وتريد تحجي ويايه. 

دنك راسه جر نفس وكال. 

ادهم : صحيح. 

سيلين : نحجي بره. 

هز راسه رحت كدامه للأستقبال دخلت وعلكت الضوه هو فات وسد الباب ، كعدت على القنفه وهو ضل واكف وخال ايده بجيوبه 

ادهم : راح احجي بدون متقاطعيني واي كلمه ما اريد اسمع. 

همست.

سيلين : ماشي. 

ادهم : انسي كلشي صار بيني وبينج كل موقف بدر مني وكل كلمه طلعت مني سواء بقصد او بدون واريدج تنتبهين على بيتج وزوجج ديري بالج عليه وراعي الله بيه سامر خوش ولد.. 

حجاها وصوته شحط تحمحم وكال.. 

ادهم : لتضيعين تعبي ويكولون ادهم ماعرف يربي واريدج تخلين شغله ابالج مهما صار بينه من خلافات الحب وحد وحمايتي الج وحد بأي وقت تحتاجيني راح تلكيني نفس الشخص القدملج الحمايه والنصيحه بالفتره الجنتي محتاجتها.... 

واخيرا كدرت اقتنع بتفكيرج هلمره سيلينتي غلبتني وشفت وجهة نضرها صحيحه ... 

جر نفس عميق وزفره كال.. 

ادهم : انه حبيتج لنفسج مو لجمالج لان الجمال موجود بكل مكان بس عتبي على القلب ميشوف الا مايستهويه ويرتاحله وسألتيني ذاك اليوم شنو حبيت بيه راح اجاوبج هسه حبيت فوضويه عقلج بقدر حبي لاناقة عقلي ... 

سكت والف عبره وكسره بصوته عدا عيونه الوحدها قصه ، يحجي كلمه ويدنك لو يرفع عينه ويزيح نضره بغير جهة ويكمل كلام ...اخر جمله حجاها اختنك وطلع من الغرفه . 

ادهم : راح ابقى ذاك الادهم 

ادهمج انتي وبس🤎 

بيومها منمت ولا ارتاحيت وهذا جان اخر يوم اتذوق بيه طعم الراحه .....

ثاني يوم صارت الزفه وهو طلع من البيت بعدين عرفت من ايفين كذب ممسافر من طالعه الزفه مالتي جان كاعد بسيارته براس الفرع ، هو وايمن..

بليل وصلتني رساله من ايفين مكتوب بيها ...

عمو انعاد عليه موت عمه ولج شسويتي بيه راح يروح من ايدنه....

وبعدين اجتني رساله منه مكتوب...

الفصل الأربعون من هنا 

شكرا لزيارتكم عالم روايات سكيرهوم