رواية جدى الفصل الثالث بقلم اسماعيل موسي
هو فية ميت بيرجع من قبره غير لو كان صاحب كرامات وولى من أولياء الله الصالحين ؟
على القهوة اقسم بخواجى أنه رأى الحج كامل يؤذن لصلاة الفجر قبل موعدها، وأن الرجل عاد من قبره او هرب منها ولما اعترض محمد شيبه بعدم معقولية عودة ميت من قبرة وان زمن الأولياء ولى وراح..... صرخ بخواجى فسر لى اذآ وجود جثة كامل مدكور عريانه فى أرض على الديب بعد عام من دفنه، الشرطه نفسها لا تعرف السبب !! لو كان الأمر بيدى لاخرجنا جثة كامل مدكور اذا كانت لازالت فى القبر ونبنى لها مقام رغم أنف الحكومه والحمير...
طيب ازاى يا بخواجى يا ابو المفهوميه بتقول اذا كانت الجثه لسه فى القبر؟
دا الشرطه نفسها هى إلى دفنتها النهرده قدام عنينا كلنا والى تمسكه الشرطه لا يمكن يفلت منها حتى لو كان ولى او حتى مارد كان أحمد فزاع اقتحم الحوار الساخن بلا مقدمات..
صرخ بخواجى مره تانيه وهو بيرمى لى الشيشه على الطاوله بغضب، اش فهمك انت يا بغل يا حمار؟
أولياء الله الصالحين مش بيفضلو فى القبر، دول بيطوفو فى الأرض براحتهم وبكره يا غجر لما تظهر جثة الحج كامل مره تانيه تبقو تعرفو ان بخواجى كان على حق وترك بخواجى القهوه ورحل.
وكان ده حال البلد كلها، بلبله ونميمه، فشل الشرطه فى اقناع الناس عمل ارتباك كبير
راجل رجع من قبره بعد سنه دى عجيبه يا اولاد؟
ابويا نفسه كان مهموم وسرحان ومش قادر يصدق ولا ينفى
رؤية ابوه جدى بعد الوقت دا كله جددت الأحزان فى صدره
وجدتى قاعده بتشرب الشاى وشها منور كانها رجعت صغيره
وعماله تغنى فى مووايل قديمه، انا مستنياك يا كامل ذى ما وعدتنى.
فى الليله دى فيه ناس زارت قبر جدى وحلفت انها سمعت صوته جوة القبر بيتكلم
وطلعت اكتر من حكايه غريبه وناس راحت القبر تستبرك بيه
لكن الأكثر غرابه، بعد اسبوع بالكمال اختفى شاب تانى من البلد، القرية كلها ارتجت، دا تانى شاب يختفى ومحدش يعرفله طريق جره، الناس خرجت فتشت الحقول والزراعات
فتشو كل بيت وخرابه ومفيش فايده
الهم ركب ناس البلد مره تانيه، والشرطه عجزت عن كشف سر اختفاء الشاب، الشاب اتبخر ذى إلى قبله، وفى اكتر من بيت كان فيه مناحه الا فى بيتنا
جدتى كان هاين عليها ترقص وكل إلى طالع عليها مستنياك يا كامل
المره دى لا والدى ولا واحد مننا قدر يتكلم مع جدتى او يعارضها، والحزن حط على القريه فى كل ركن
وطلعت قصه ان فيه سفاح بيقتل الشباب وبيبع اعضائهم وان الجن وصل القريه وعاش فيها
وبعد اسبوعين من اختفاء الشاب والناس كلها فى كرب شديد ودربكة ومع اول شروق للشمس ظهر على الديب على الطريق إلى جنب الترعه بيجرى ويصرخ، لقيت جثه فى غيطى
