رواية جذبني فمك البني الفصل الخامس والأربعون 45 بقلم عبير إدريس

يا ونيس الروح

ياسلوة عشكها

ادهم 

________

فهد : اليوم مرت اخي هنا 

سيلين : هاي شبيك بابا 

فهد : مابيه ماما ههههههههه بس والله الدكتور مستفاد بكل الاحوال 

سيلين : يعني بنص بيته ويعالجك و تحجي عليه .. 

فهد : مو صلف . 

سيلين : شلون قابليه ... 

فهد : تره ما احجي عليه هذا يسموه مداهر حبايب بالمناسبه ففه تسلم عليج.. 

سيلين : ففه منو؟ 

فهد : فيفو ففتي F76

سيلين : شبيك انت مو صاحي احلف عليك.

فهد : يابه كايل انه صاحي هاج جايب دفتري وجاي اريد اتعالج... 

سيلين : اكص ايدي اذا تعالجت انت جاي تخبلنه.. 

فهد : المهم بالنهايه نكون متساووين ابد ما احب التفرقه. 

سيلين : مريض.. 

فهد : ولا عليه حرج. 

ردت اجاوبه اجه عمو ... .

ادهم : ها شعجب اليوم جاي... 

فهد : والله جنت ضايج ماعندي شي اسوي كلت اروح اتعالج.... 

ادهم : هههههه اله اليوم مدتشوف مثبور بالشيله والبيت بعده ما مرتب ولا انه مستقر.. 

فهد : استقرار نفسي عاطفي حدد.. 

مجاوبه عمو ، فات للهول وهو نزع حذائه وطب كعد رفع بنطرونه وحك خشمه فرك ايده بحماس وكال.. 

فهد : انه هم وقتي ضيق اريد استغل الوكت واتعالج بسرعه... 

ادهم : وشنو هذا الدفتر. 

دنك على الدفتر باوع عليه وكال..

فهد : اريد ادون كلشي تحجيه علمود اعالج روحي من انت ماكو...

عمو صفن عليه وهو هم بادله بالنضرات حرب بالعيون واضحه ، حرب نضرات بحيث وصلت النه احاسيسهم وتوعدهم واحد للثاني بدون كلام.. 

عمو يتوعد يعالجه وميخليه يستمر بأذيته لنفسه و النه ولعائلته وهو يتوعد يضوكهم من نفس الكاس اللي هو ضاكه.. 

ادهم : راح ابلش وياك شغلات خفيفه اليوم لان تعبان. 

فهد : يلا بس شنو كدامهم لو وحدنه. 

ادهم : بكيفك . 

فهد : شنو بس انه ماعندي خصوصيه احترام المريض حتى بهاي حضي ماكاعد.. 

ادهم : ههههههه يابه بكيفك هسه انه شكلت تريد هنا تريد وحدنه براحتك وبعدين ماكو داعي تحجي اسرارك لان كلها اعرفها. 

ضيق عينه فهد وكال.. 

فهد : اجيبلك مي خاف عطشت.. 

ادهم : لا بس اكعد كلشي ماريد.. 

فهد : دخل اجيب .. 

ادهم : فهد اكعد كافي... 

رفع رجله وتربع على القنفه.. 

فهد : كعدت يلا بلش شلونها الكعده خوما تدل على الشعور بالفشل الشديد والخيبه.. 

ادهم : لتباوع هيج ولتستهزء.. 

فهد : اغمض يلا غمضت . 

ادهم : هههههه لا ياربي تتذكر من جنه صغار ونلعب لعبه الاشاره وانت جنت تغمض علمود اغششك بصوت عالي من يوم يومك جنت اتكالي عليه واساعدك وانه الممنون. ... 

حجاها وتنهد .... 

فهد وجها تغير وعمو دنك راسه حسيته مقهور وره شويه تحمحم وكال.. 

فهد : احم يلا نرجع ... 

بلش عمو بحركه الاكس اللي سواها ويايه من كالي استذكري المشهد اللي مضوجج وضربي على كتفج علمود يتشتت الموقف وينحذف من البال... 

فهد : ادري ماكو غير هاي الحركه هاي الحركه شايفها من امي جانت تاخذني للفواتح و النسوان من تلطم تسويها ودك على صدورهن اللي يشوفهن يكول الميت راح يرجع يعيش.. .. 

ادهم : فهد كافي يرحم اهلك مو كرهتني بمهنتي.. 

فهد : لا جديات يعني اذا لطمت اصير زين لعد بالمصح شبيهم من جنت الطم يضربوني... 

ادهم : استغفر الله فهد كافي ... 

فهد : يلا سكتت بس بربك حركات مقنعه اريد.. 

ادهم : يعني اضربك جلاليق مثلا.. 

فهد : اي اذا بيها علاج شكو منها... 

ادهم : ليش احسك كاعد تستهزء.... 

فهد : انه ابد اصلا مركز ...

ادهم : فهد دارس علم النفس صح ؟؟؟ 

فهد : ليش؟ 

ادهم : مبين 

فهد : قصدك مسيطر 

ادهم : لا 

فهد : لعد 

ادهم : كاعد احس سوالفي كاعد تبيعهن عليه ههههه.

فهد : هههههههههههه يعني اصلح اعالجك.. 

ادهم : لا راح تخبلني 

فهد : ممممم هذا اعتراف صريح بضعفك دكتور.... 

ادهمز: لا بالعكس كاعد اجيد بعقليتك ...

فهد : صرنه متساوين صح 

ادهم : بس وين درست وشوكت؟ 

فهد : مو مهم علينه بالنتائج 

ادهم : على شنو ناوي؟؟؟ 

فهد : اخليك بنص الخير

ادهم : ما مصدكك تدري.. 

فهد : ولا انه بس بشنو مامصدك بيه ... 

ادهم : معقوله تريد تتعالج؟؟؟ 

فهد : اذا ترجعلي ابني اي اتعالج.. 

ادهم : واذا كذبت؟ 

فهد : اروح للنار

ادهم : لتستهزء 

فهد : ما مستهزء يمعود... 

عفتهم يتداهرون ورحت للغرفه بدلت ورجت للهول.. 

سيلين : عمو راح اروح.. 

جان يباوع على فهد التفتلي عكد حاجبه وكال. 

ادهم : وين رايحه؟ 

نط فهد من يمه. 

فهد : لبيت بعلها غير.. 

عمو التفت عليه خزره ورجع باوعلي.. 

ادهم : انتضري اصلي واوديج.. 

فهد : كوم وصلها بعدين صلي بيتها راح ينهجم. 

ادهم : انت لشنو كاعد تلمح 

فهد : ما المح انه صريح اذا اعرف شي ابشرك. 

ادهم : تبشرني بخراب البيوت.. 

فهد : بشرفك متكوم وتكعد تدعي تنجمع بيها.. 

سيلين : عمو راح اطلع الضاهر بلش يهذي.. 

فهد : هذيان حقيقي هذا يابه

ادهم : اسكت كافي وكوم روح قبل لا يكعد ايمن وتصير سالفه واذا تريد اعالجك انه اجيك للبيت لو نروح لعياده دكتور صديقي هناك افضل.. 

فهد : اروح وياك للوحه. 

عمو باوعله ودار وجها كام اجه يمي فرك عينه بأصابعه وكال.. 

ادهم : يلا اوصلج بس شوفي نرمان وين حتى تجي ويانه. 

سيلين : نايمه خطيه. 

فهد : لازم تجي وياكم على الاقل واجهة كبال سامر.. 

حجاها وضحك مستهزء. 

سيلين: انت شكو بكلشي متدخل.. 

عمو صار كبالي وسد الرؤيا مخلاني اشوفه يعني قطع كلامي وياه بدون ميسكتني ويحرجني كدامه رفعت عيني باوعتله فتح عينه ورفع حاجبه يعني عوفيه هزيت راسي وطلعت بالطرمه وره شويه طلع عمو ونرمان وتبعهم فهد .. 

نرمان : هذا شنو الدفتر بيدك.. 

وكف يمها فتحه باوعت وياه وكلتله...

نرمان : هههههه شنو هاي شكاتب. 

فهد : كاتب التمرين. 

نرمان: وين اكو تمرين اسمه لطم معاكس ريمكس...

فهد : هذا علاج اخوج غير ناوي يخبلني من جديد تخيلي يكلولي شلون تعالجت اكللهم كابلت اخوي وكمت الطم ....

نرمان : ههههههه لو بس ادري شلون رهمتوها انت وياه ، ادهم يعالجك من عجائب الدنيا السبعه..

فهد : انه ادري شلون بس المهم يعالجني دبريها تدبر.. 

نرمان : واني شكو انتو دبروها. 

ادهم : يلا يمعوده فضيها.. 

فهد : بالتأني سلامه دكتور.. 

سيلين : غير يسكت. 

رفعلي تك حاجب مستهزء.. 

طلعنه صعدت نرمان ليكدام واني ليوره وفهد راح بسيارته شخطها وفحط بنص الشارع وصل يمنه طلع اصابعه الاربع سوه باي وسد الجامه ومشى سريع.. 

ادهم : هذا تخبل بالزايد. 

نرمان : يسوي هيج من حركه كلبه ميعرف شيسوي بعد..

ادهم : خايف منه والله خايف. 

جرت نفس قوي وكالت.. 

نرمان : حقك وفوك الخوف اخذ احتياطك.. 

ادهم : انتي هم شاكه بيه يريد يأذيني صح. 

نرمان : مو شاكه وانما متأكده. 

ادهم : حيره انه ماخايف على نفسي بكد ماخايف عليكم .. 

نرمان : هو ميكدر يأذينه واصلا مو اباله احنه بس انت وايمن متخبل منكم. 

ادهم : يعني شبيدي عليه هيه ما رادته توسلت حتى يعتقها وابوج واخوج مجلبين بيها عمج اقترح اقتراح بالكعده تتذكرين كال ارجعها اله بشرط يتعالج ،

اجه فهد كعد يمي وكال شتكول ادهم كتله هذا الصح تعالج ترجعلك وانه بهذا الحجي جنت ما شايف روايه توني راجع من السفر ماصارلي يومين راح فهد يتعالج وره يومين خابرني عمي تعال رحت واتفاجئ بالشفته كاسر ايدها مزوركها داك وشم بأماكن بجسمها نفسيتها متدمره وبس تصفن عمي كال هاي لو اختك شتسوي بدون تفكير كتله اطلكها منه كال لعد اشهد ويانه بتفريقهم اذا صدك انت رجال وصاحب نخوه كتله وياك هذا هو.. 

نرمان : هو انت لو مشاهد جان معاداك فهد ومجان وصل لهذا الحال هو فكر انتو غدرتوه وكلكم تراهنتو عليه لهذا توحش.. 

ادهم : شلون فهميني لا بيه أاذيه اخويه هذا وقطعه من كلبي تخيلي لو يحتاج بعلاجه اصرف حالي ومالي والله ماقصر لو اعرف اكعد على الحديده ونزوجه من جديد ويستقر لا هو اول واحد انفصل عن زوجته ولا اخر واحد.. 

نرمان : ولتنسه حقد عليك بالزايد من رجع لكاك متزوج كال شلون اله نفس طلك زوجتي مني وبعدها عني وراح تزوج واسس عائله.. 

ادهم : شسويله يعني الاطباء كالو يتأخر ٣ سنوات علاجه يطول شو اقل ال ٣ اشهر طلع .. 

نرمان : صارت بيه خوف لا تنعاد عليه فتره علاجه القديمه مو رجعلنه مخبل ويصيح ..

ادهم : شسوي هسه فهميني. 

نرمان : شتسوي شمدريني .. 

ادهم : حجزت يم دكتور نفسي جبير بالعمر وعنده خبره قديمه واريدج انتي هم تجين وخابرت دكتور ثاني نجتمع بالعياده وبلكت نوصل لحل معين ونعرف حالته شنو ونشخصيها صحيح ونعالجه.. 

نرمان : الله كريم.. 

وصلنه للبيت صف السياره وباوعلي بالمرايا معاتبني بنضرته يعني ليش هيج سويتي بينه ليش راح تروحين مني واني مشبعان منج وفعلا طلع احساسي بتفسير نضرته صحيح شكد تعاتبنه اني وياه بعدين ،،،

نخلص الليل كله عتاب واكثر شي هو يحجي واني استمعله.. 

جريت نفس سلمت عليهم ونزلت..... 

نرمان.. 

وره منزلت سيلين ادهم خله ايده على الستيرن وخله راسه تنهد ونفسه تسارع مديت ايدي على ضهره مسدتله خفيف.. 

نرمان : تعبت.. 

رفع راسه رجع الكشن ليوره وتمدد...

ادهم : كاعد اتعب تره هذا انتقام بيدي اجيبها اله بعد ما اتحمل شنو من اختبار هذا يا الله... 

نرمان : من شفت سوالفكم اليوم كلت تعودت وتقبلت.. 

التفت عليه عاكد حاجبه. 

ادهم : ماكدر ازعل عليها ولا اكدر اعاديها خليني ابوها ولا تعوفني ما اتحمل من يوم الراحت لهذا يومج انه مانايم مثل البشر الليل يمر سم عليه خصوصا من اتخايل هسه بحضنه لو يداعبها لو يتغزل بيها ، نرمان كاعد اموووت بس موتي بطيء ...

نرمان : اياك ادهم والقنوط من رحمه الله ،، حبيبي انت علمتنه على الصبر وعلى القناعه اصبر واقنع بحياتك..

ادهم : منين اجيب الصبر وانه بوسط خشوعي بس اغمض تتراوالي صورتها وتفزز شكو جروح غافيه بيه وارجع استغفر واقتل كل وسواس يذكرني بيها ومجرد اسجد تنهال دموعي كأنما انسان مغيب كلبت حياتي كلها من دخلت بيها ومن طلعت دمرتني ....

نرمان : من وجهة نضري اشوف هذا الصار من مصلحتكم رب ضاره نافعه احتمال تتأذه اذا صارت الك او بالعكس هيه تتأذه.. 

باوعلي جان مكسور الخاطر وعيونه غارقه بالدموع ومتقبل تنزل....

ادهم : من جانت مخطوبه جنت اضل يم بابها الوب اروح وارجع مرات اريد افوت اكسر الموبايل واخليها تنهي كلشي وارجع واكول الزم اعصابك لتخسرها جنت اكضي الليل اناجيها بأحتياجي الها اريد اسند راسي على كتفها وافهمها صدق مشاعري شكد تمنيت تبادلني المشاعر ولو يوم واحد حتى لو ساعه وحده قابل بس كلبها قاسي ماجنت اتصورها هيج عنيده.. 

نرمان : نفسيتها مكدرت شكد حجيت وياها الصراحه قنعتني بوجهة نضرها لازم انت تتقبل وتنسه..

ادهم : شنو انسه ضحكتها دلالها هدوئها فرحتي من اصبح بوجها وابتسامتي اللي تطلع من نص كلبي مجرد تضحكلي وحتى اذا مضحكت انه ابتسم لا اراديا ويا ويل ويلي على غمازتها من تضحك شتسوي بيه تزرف كلبي زرف... 

نرمان : الله يعوضك بغيرها.. 

ادهم : لتكوليها ماريد احب غيرها ولا افكر ابدلها بيوم .. 

نرمان : لعد شكد تحبها.. 

جر نفس طوووووويل وتنهد تنهيده تهد جبال.. 

ادهم : تخيلي حبها خلاني استغني عن جميع النساء وحرمتهن على نفسي حتى بالنظر..

نرمان : شلون بده حبك الها او شلون اكتشفت نفسك تحبها شو اني ما ادري...

ابتسم وكال..

ادهم : اذا كتلج متصدكين. 

نرمان : لا اصدك احجيلي. 

ادهم : بيوم عرس ضيغم اكتشفت انه احبها ربي مو شفه كأنما طلقه واستقرت بصدري سامعه يكولون اكو طلقه تضرب الصدر واكو نضره واكو ابتسامه وذني كلهن انجمعن بسيلين ،

جنت واثق تمام الثقه ما امسها بنضره بالحرام بس من يوم اللي شفتها وشفت جمالها غركتني بالحرام كمت اختلس نضرات يابو نضرات ههههه تخيلي تعبان عندي لود كلش قوي بالمحاضرات واروح اخذهم بس علمود اتفرج عليها وتخيلي شصاير بأخوج.. 

نرمان : واكع انت ههههه ...

ادهم : اي .. 

هز راسه على الكشن بثكل وغمض عينه وكام يحجي همس...

ادهم : مرة اجيت من وقت دخلت للبيت جان ماكو احد تصورتها نايمه، دخلت سبحت ورحت للمطبخ ردت اكل شي على السريع لان عندي طلعه بعد ساعه ، احتاجيت شغله من السيارة وطلعت بره ،شميت عطرها خلاني اوكف بمكاني طلعني عن طوري وتفكيري اللي مليان بلعمل من اباوع زين شفتها واكفه حاضنه نفسها 

هاي حركتها المعتاده الاحبها هههههه ، 

كم مره ومره تمنيت احضنها مثل ما تحضن نفسها ، 

تقربت اريد اخذ جرعه من عطرها واعرف حرام اللي كاعد اسويه بس ماسيطرت على نفسي ولا على مشاعري ، 

جانت بوقتها حاطه من العطر اللي جبته الها وانه شلون اموت على هيج عطور...

تنهد وكمل كلام.... 

ادهم : عيوني توزعت على اجزاء جسمها بيومها عيوني اكلتها اكل والله نرمان عيوني هيه صلفه تباوعلها حتى اذا انه ماردت تخيلي عيوني تمردت عليه مو بس كلبي .. 

نرمان : هههههه كمل كمل هاي انت شصاير بيك..

ادهم : اريد احجيلج لان كلبي راح يطك...

نرمان : احجي احجي ... 

تنهد وغمض عينه وبلش يوصفها كأنما يرسمها بكلماته ويلونها بمخيلته....

ادهم : صفنت على جمال قوامها الرشيق كأنما منحوته نحت اريدلي غلطه بيها ماكو جانت ماخذه راحتها باللبس وعبالها انه ما موجود واتأخر لليل يلا ارجع مثل كل يوم ،اخذ عقلي ثوبها القصير جان واصل للركبه وشعرها 

شامرته شلون مجان ورافعه شويه من المقدمه... 

نرمان : ههههههه هاي نضره لو شنو خرب بيومك...

دار راسه وباوعلي جان ذايب من يحجي بيها حسيته خدران حجه بصوت مبحوح...

ادهم : لون بشرتها ويه ثوبها سكرني وانه بعمري ما عايش احساس السكران ولا اعرفه شنو بس من اشوفها اعرف معناها سكرت لحد الخدر.. 

نرمان : ههههههههه ولك كافي خجلتني اسكت ... 

مهتم اليه واسترسل بالكلام...

ادهم : هنا تأكدت انه حبيتها مو مجرد اعجاب مثل اول يوم شفتها بالبني جنت اناقض نفسي واكول هذا مو حب هذا اعجاب انت كرجل انعجبت بقوامها وجمالها الانثوي وراح تنسى مجرد يروح منضرها من بالك... 

بس بيومها حسيت بأنتمائي الها، ضليت مركز عليها لكيتها تبتسم وانه ابتسم لا اراديآ ابتسمت وياها.. 

بيومها التقيت بسامر وجماعتنه وحسيت عيوني مفضوحه والكل عرف بسري الي اخاف ابوح بيه لنفسي ، بيومها سامر عرف بيه شي ضل يسأل ويلح ..

سامر : هااا دك الكلب 

جاوبته 

ادهم : لا بعدني مالاكيها 

ضحك وكال . 

سامر : شوكت تلكاها 

ادهم : من الكاها راح اصير مثل المجنون وبوقتها راح تعرف انه حبيت لان تصرفاتي تدل ع هذا الشي .. 

ابتسم وكال 

سامر : لكيتها تره وكاعد تكابر . 

عكدت حاجبي مستنكر 

ادهم : ماكو هيج شي 

سامر : والله ياخوي مبين عليك صارلك ايام مو على بعضك واليوم تأكدلي هالشي.

ضيقت عيني وكتله. 

ادهم : شلون بله ..

سامر : شوف نفسك لبسك مو متناسق لحيتك ما محددها ، شغلك متراجع اغلاط بيه كومه واني اصحح وراك هاي كلها مؤشرات تدل على عقلك مو يمك سرقوه.. 

سكتت ماعندي جواب لان كلامه كله صحيح... 

ورجع وره فتره هم عاد الحديث عليه نفسه يعني الناس كلها انتبهت عليه احبها اله هيه ما انتبهت... 

جر نفس فرك وجها حرك السياره ومشى... 

اني هم سكتت ماكدر اكله انسه لان كذب اللي يحب يكدر ينسى ولا اكدر اكله اواسيه بأي شي ،بعدها رحنه لبيت اهلي ضلينه ساعه و رجعنه للبيت رحت للمطبخ سويت عشا وسمعت صوتهم ادهم وايمن طفيت الطباخ ورحت.. 

نرمان : يمعودين شكو؟ 

ايمن : شنو جاي فهد هنا يعني هيج محد محسب حساب اليه. 

ادهم : اخوك مريض انت تتعامل وياه على اساس مريض لو صاحي. 

ايمن : ما اريده بعد وما اريد خوته واذا اجه هنا مره ثانيه اطلع واعوفلك البيت وخلي فهد يفيدك... 

نرمان : ايمن شبيك. 

ايمن : شبيه يعني شفتوني ساكت مو معناها انه بخير ومرتاح نار بصدري تاكل تدرون لولا .... 

ادهم فقد كام يصيح ... 

ادهم : كاااافي شبيدي عليكم شسوي انه واكع بين نارين ثنينكم احبكم وثنينكم عزاز بس الفرق ذاك مريض ما اكدر أأذيه لسه ندمان لان ضربته بس صوجه خبلني خلاني ماندل دربي رحموني انه اكثر واحد بيكم تعبان ومتأذي ومحد يحس بيه اله اموت يلا تكولون اخونه خسرناه.. 

فات لغرفته وركع الباب حيل.. 

نرامان : عود انت العاقل وهيج تسوي.. 

ايمن : ليش سوايه اخوج خلت براسي عقل احجو حضكم وبختكم.. 

نرمان : ليش تصيح عليه شعليه اني اوووي ناركم تاكل حطبكم ...

ايمن : اي لتدخلين انتي.. 

عفته ورحت للمطبخ ...... 

سيلين... 

اول مرجعت للبيت لكيت عمتي بالمطبخ سلمت عليها وصعدت فوك بدلت ملابسي ورحت توضيت و وكفت اصلي...كملت وسبحت التسبيحات المعتاده .. 

منها كلمه ( يامطيع ) كل يوم اكولها سبع مرات مده اسبوع ، لتسخير القلوب والمحبه كلت بلكت الله يحنن كلب سامر عليه ويضل هيج زين... 

وعمو علمني على ذكر بعد الصلاه ( يارحمن ) ٢٩٨ هم لزرع المحبه في قلوب الناس... 

جنت ناسيتهن بس من طلعت الدفتر كلبت بيه تذكرت وكمت اسويهن... 

كملت لميت السجاده ورحت خابرت سامر يدك يدك يفصل وميجاوب اخذت موبايلي ونزلت يم عمتي اساعدها بالعشا. 

_ شلونهم اهلج.. 

سيلين : زينين الحمدلله.. 

_ عمج شلونه. 

سيلين : ادهم 

_ اي 

سيلين : زين الحمدلله 

_ الله يجعله اليوم سامر خابر وسأل عليج كتله راحت ضاج.. 

سيلين: ليش ؟ 

_ كال ليش مخابرتني هيه ليش الج كالتلج. 

سيلين : اني شعليه هو كال من اني مو بلبيت امي بمكاني تنوب واي شي تريدين استأذني منها اذا طلعه او اي شي ثاني.. 

_ والله يايمه فهمته بس صار عصبي عود طيبي خاطره انتي..

سيلين: صار ... 

_ الله يبارك بيج ورده انتي . 

سيلين : شكرا 

صبينه العشا وكعدنه ناكل بهدوء كملنه اخذت الصينيه غسلت المواعين ونظفت المطبخ وصعدت فوك طلعت ملازمي كعدت اقره اجاني مسج فتحته من عمو كاتب...

طرقت يومآ باب من ابواب قلوب البشر مرارا وتكرارآ وكان هذا القلب قاسيا لاذ بالفرار مني قلقآ من ان يصاب بمكروه لكنه اصاب قلبي بمرض قاتل ومميت،  

ولكن عند النظر الى صاحبه هذا القلب ذات الجمال الفاحش التي سرقت قلبي ورحلت بلا عوده جعلتني مرعوب من فراقها الابدي مجرد فكره ارعبتني والى الان قلبي رافض تصديقها... 

خربشه مشاعر دكتور ضائع في حب ينتمي الى وطن الضياع ...... 

اني مسويه خاصيه الفايبر غير مرئي يعني اقره الرساله بس تطلع يمهم غير مقروئه وخافيه خاصيه الظهور ، هو دزها مجرد قريتها ثواني وحذفها..... 

شمرت الموبايل وفركت وجهي يعني شسوي يا ادهم شسوي شوكت تقتنع اني تزوجت خلص حياتي استقرت رغم المشاكل اللي ماعرف شنو المسببات الها بس مشت حياتي انت ليش حياتك واكفه ماعرف بس بهذا المسج مالته رجع رسم حدود بيناتنه من جديد .... 

وماعرف شلون راح اتعامل وياه لا اكدر اصده ولا اكدر احجي وياه بطريقه الغريب لان هو اقرب انسان اليه حتى اقرب من نفسي .... 

ثاني يوم طلعت من البيت علمود اروح للدوام مشيت للشارع العام توني اريد أأشر لتكسي وكفت سياره ادهم ، كلبي كام يدك سريع ماعرف لأهتمامه لو خوف من احد يشوفني وياه نزل الجامه باوعت وياه نرمان كاعده ليكدام شويه هدأت سلمت عليهم ثنينهم ابتسمو...

نرمان : صعدي.. 

حجتها وادهم عينه عليه وخال ايده على حلكه منتظر جوابي جان مرتاج بعكسه على التجوه الوسط ... وخرت عيني منه وباوعت على نرمان...

سيلين : لا روحو اني اخذ تكسي. 

نرمان : صدك تحجين تصعدين ويه رجال غريب واحنه متصعدين ويانه وبعدين اني راح اداوم وياكم يعني طريقنه واحد كلنه.. 

ابتسمت وصعدت بهدوء خليت كتبي بصفي وعيوني على الجامه البصفي ... 

مشينه وسألتني نرمان رفعت عيني لكيته يباوعلي بالمرايا نضرات تساؤل يعني يريد يعرف سبب ضوجتي قريت المسج لو ملحكت اقراه...من شافني رفعت عيني هو نزل عينه واستمر يسوق .. 

درت وجهي وجريت نفسي ..

سيلين : شنو كلتي نرمان عيدي السؤال.. 

نرمان : شوكت تبدي امتحاناتكم الكورس الاول.. 

سيلين : بعد اسبوع نبلش.. 

نرمان : يا مضل شي الله يوفقج ويسهلج. 

سيلين : تسلمين.. 

سكتت وصلنه للكليه ونزلنه سويه ودخلنه سألت نرمان.. 

سيلين : شنو انقلتي هنا. 

نرمان : ماكو نقل بس سويت تنسيب يعني احاضر هنا واستلم راتبي من محافظتنه.. 

سيلين : هاا بيها الخير الله يسهل. 

نرمان : شكرا. 

مشيت كدامها سبقتهم بخطوه ورحت للقسم وهمه راحو... 

نرمان : ادهم يلا وين صفنت. 

ادهم : شبيها سيلين 

نرمان : شبيها 

ادهم : ما حسيتيها متغيره. 

نرمان : لا مو حجت ويايه بس انت محجيت لهذا مسولفت وياك. 

ادهم : انتي هيج تكولين. 

نرمان : اي.. 

سكتنه ورحنه للقسم.. 

الحلو بأدهم يفصل بين مشاعره وبين عمله رغم كتله الهموم العنده لكن مسمح لهمومه تأثر على مستواه الاداءي المهني افتر على المراحل والقه عليهم تراحيب الصباح بوجه مبتسم كله حيويه ... 

بعدها دخلنه محاضره اني وياه قدمني الهم بطريقه كلش حلوة بعدين كعد وسمحلي بأن اقدم محاضرته ... 

قدمتها بكل سلاسه لان الادهم بضهري لهذا ما اخاف ولا ارتبك رغم اني جنت ادرس بجامعتي بس هنا لان جديده وطلاب ادهم متعودين على نمطه الشرحي واني مستحيل اتفوق على ادهم بسبب هذا الشي ارتبكت.... 

مردت احسسهم اني اقبل من اخويه بالعلم.. 

ومشت الايام .....تقريبا مر شهر 

جنت بالمطبخ اغسل مواعين واجه ادهم بيده الجكاره وكلاص الجاي... 

ادهم : اكو جاي لو خلص. 

التفتت عليه. 

نرمان : راح تموت صدك تحجي بس جاي وجكاير شنو كلشي مماكل من الصبح لسه.. 

ادهم : كتلج معدتي ما اكدر اكل. 

حجاها وكعد على الميز خله ايده على راسه ودخان الجكاره يتطاير على شعره .. 

نرمان: طفيها راح تحرك اصبعك خلصت مكاعد تحس بحرارتها. 

ادهم : انه كلي محروك اصلا .. 

جريت كرسي وكعدت بصفه.

نرمان : شبيك ليش انتكست حالتك من جديد يعني انت لازم تتقبل الوضع ادهم انت دكتور بعلم النفس مو شي قليل لازم تسيطر على مشاعرك واعصابك لعد الناس العاديين شنو تكول.. 

ضرب بيده على الميز بقوه وانسكب الجاي ... 

ادهم : مو لان انه انسان مو عادي و دكتور هيج تأذيت حفظت تفاصيلها حفظت حركاتها حتى نفسها حسبته الها لان دكتور انتبهت على ادق تفاصيلها وانحفرت بذاكرتي هسه انه ماريد شي بس ليش رجعت تتجاهلني ليشششش.. 

نرمان : هيه مو كلتلك زوجها ميقبل تتواصل وياك جوز حذرها منك وهيه مضل الها احد حتى اختها تركتها يعني ضل بس زوجها لهذا شنو تسوي لازم متلومها.. 

خله ايده ونام على الميز كام يكح كمت جبتله مي شربه وكام وكف... 

ادهم : انتي اتصلتي بيها بعد. 

نرمان : اتصلت بس متجاوبني. 

ادهم : حتى للدوام مكاعد تجي خاف بيها شي. 

نرمان : ماعرف والله.. 

ادهم : اوديج باجر روحي سألي عليها ...

نرمان : ميخالف ... 

ادهم : راح انام اذا اجه فهد كعديني علمود نروح للدكتور ...

نرمان : بس انت نسيت احنه متفقين ويه صديقك نروح لدكتور __ علمود نحدد حاله فهد.. 

ادهم : صح نروح العصر عود كعديني بس اريد اغمض تعبت ...

نرمان : ماشي روح نام الله يبرد كلبك.. 

هز راسه وراح كعدته العصر ورحنه للعياده مال دكاتره بعد السلام والاستضافه فتح ادهم موضوع فهد بس مكال الهم هاي الحاله خاصه بأخويه لا هذا نص الكلام مالتهم.. ..... 

ادهم : عندي حاله مدوختني كلش يعني مكاعد اعرف اشخصها صح. 

_ يعني شلون اشرحها النه واحنه نحدد نوعيه الشخصيه شنو.. 

ادهم : يعني هو يحب الاهتمام المبالغ بيه ويحب لغه الانا لهذا رجحت شخصيته نرجسيه بعدين عرفت يعنف زوجته لهذا رجحت شخصيته ساديه ومن يتعرض للضرب ميحس يعني عنده عادي يكول اضربوني انه شخص ميت لهذا كلت ممكن بيه من المازوخيه ، بس كشخصيته من الصغر مغلفه بصفات السايكو لهذا حرت شلون اعرف هو يا شخصيه منهن لان كتوم وما يصارحني.. 

جاوبه الدكتور.. 

_ هو شنو طبيعه عمله او شنو يشتغل ؟ 

ادهم : بالسلك العسكري.. 

_ اذن ارجح الساديه.. 

ادهم : ليش يعني ؟ 

_ ﻭﺫﻟﻚ ﻷﻧﻬﻢ ﻓﻲ ﻭﺿﻊ ﻳﺸﻌﺮﻭﻥ ﺑﺄﻥ ﻟﺪﻳﻬﻢ ﺍﻟﺤﻖ ﻓﻲ ﺍﻟﺴﻴﻄﺮﺓ ﻭﻣﻌﺎﻗﺒﺔ ﻣﺨﺎﻟﻔﻲ ﺍﻟﻘﻮﺍﻋﺪ ﻭﺍﻷﻧﻈﻤﺔ ﺃﻭ ﺍﻟﻘﻮﺍﻧﻴﻦ .ﻧﺎﺩﺭﺍً ﻣﺎ ﻳﻌﺘﺒﺮ ﺍﻟﺴﺎﺩﻱ ﺍﻟﻤﺴﻴﻄﺮ ﻛﺎﻟﺸﺮﻃﻲ ﺃﻭ ﻣﻮﻇﻒ ﺳﺠﻮﻥ ويكونﻏﻴﺮ ﻋﺎﺩﻝ ﻭﻫﺬﺍ ﻣﺎ ﻳﺠﻌﻞ ﻟﺪﻳﻬﻢ ﺣﺮﻳﺔ ﻛﺒﻴﺮﺓ ﻓﻲ ﺍﻟﺴﻴﻄﺮﺓ ﻭﺍﻳﺬﺍﺀ ﺃﻭ ﺗﺪﻣﻴﺮ ﺍﻻﺧﺮﻳﻦ .

ادهم : لا هذا مو سبب مقنع.. 

_ ليش 

ادهم : احتمال صح بس مو الكل بالسلك العسكري همه يتصفون بصفه السادي ممكن يكون عميد جامعي او موظف عادي انه بنفسي اشرفت على علاج عميد جامعي متصف بالشخصيه الساديه لهذا العمل ميحدد نوع الشخصيه انه ما مقتنع بهذا الشي.....

_ صح بس اني حسب وصفك لشخصيته ونوعيه وظيفته رجحت هو سادي. 

ادهم : ماعرف انه اكول سايكو.. 

_ لالا السايكو اله عده مسببات وظروف تنجمع بالشخصيه وتظهر بموقف معين وتتشبع الشخصيه بيها.. 

ادهم : صحيح وهذا اللي صار وانه رجحت وايقنت شخصيته سايكو..

_ وهاي من اخطر الشخصيات شلون راح تعالجها دكتور. 

ادهم : اجتماعي اليوم بحضرتكم علمود اوصل لحل ما لان الشخص عزيز عليه جدا.. 

_ للأسف اغلب الحالات اللي انعرضت امامنه فشلنه بعلاجها لان شخصيته تكون ذكيه توهمنه بالعلاج الكاذب..

ادهم : صحيح وانه راح اضل ادرس الحاله بلكت اوصل لحل لازم اكو وانتو بدوركم ساعدوني ومتأكد متقصرون. 

_ اكيد وياك بس لتنسه شغله اذا هو تعاون وياك ممكن يتعالج بس اذا لعب عليك تعبك يروح هدر .. 

ادهم : صح.. 

ختم كلامه وكام تسالم وياهم ورجعنه للبيت وادهم صفنه تجيبه وصفنه توديه وصلنه للبيت لكينه فهد كاعد على بنيد سيارته وبيده الدفتر منتضرنه طبكنه السياره شافنه ابتسم وكمز للكاع اجه فتح الباب لأدهم ... 

فهد : تأخرتو هواي انتضرت.. 

ادهم : جنه بشغله وتوني كملت. 

فهد : اروح اذا تعبان. 

ادهم : لا تعال فوت... 

حاوط ادهم بيده وحضنه حيل ومشو مشيت وراهم وتمنيت ترجع خوتهم مثل قبل وتكون هاي الحضنه حقيقسه من فهد ولو اني حسيته صدك حضنه من كلبه بس بنفس الوقت ميسطير على الوحش البداخله.من يظهر

دخلنه جوه همه راحو للمكتب واني رحت سويتلهم عشا...

تعشينه وبليل اجه ايمن الحمدلله ملحك على فهد جان صارت هوسه.... 

جنت نايمه وكعدت رحت للحمام مريت بغرفه ادهم وسمعته يون فتحت الباب علكت الضوه تقربت منه لكيته عركان صاير مي لزمت راسه مصخن ، حس عليه من خليت ايدي همس بتعب..

ادهم : سيلينه اجيتي حبيبج مريض جيتي تشوفيني..

نرمان : ادهم اني نرمان تسمعني ادهم..

كام يون رحت كعدت ايمن ..

ايمن : شكو شبيج..

نرمان : كوم شوف ادهم..

ايمن : خير شبيه ياستار..

نرمان : مصخن ويهذي بأسم سيلين.

جر نفس قوي وكام كأنما ذكرته بجرحه رحنه للغرفه اني سويت كمادات وايمن فركله راسه لان يون ويصيح راسي ادهم كلش تعب التمت الدنيا على راسه...

وره كم يوم جنه كاعدين اني وادهم بالنادي وفاتت سيلين وياها زوجها كفوفهم متحاضنه ويمشون...

شافتنه دارت وجها وفاتت كبل مسلمت خليت ايدي على ايد ادهم ... 

نرمان : اعصابك زوجها مبين هو مانعها. 

ادهم : لا مو هنا السالفه شفتي وجها.. 

جان يحجي باهت ومصدوم.. 

نرمان : شبيه وجها مركزت.. 

ادهم : جوه عيونها ازرك وشفتهة بيضه هاي ليش هيج معقوله مريضه وهاي الفتره جانت منقطعه عنه لان مريضه.. 

نرمان : كلشي يصير جوز حامل.. 

ادهم : لالا وجها مو مال حمل كأنما مريضه بمرض خطير.. 

الفصل السادس والأربعون من هنا 

شكرا لزيارتكم عالم روايات سكيرهوم