رواية بنت الكهوجي الفصل الخامس والأربعون بقلم احمد
تميم : بقى يحجي وياي علمود اهدئ بالاخير گالي يلا انگلع لبيتك وطمني عليها اول ما توصل گلتلو تمام وطلعت منو توجهت للبيت
ياقوت : من اتصلت على تميم جنت مرعوبة بشكل مو طبيعي وكل شوية اگول هسا يكتشف ان تيلفونو وياي ويجي علي قبل وصول تميم
بين ما وصل تميم احس ما بقى بي دم من الخوف ومن طلعت ختلت وراه واني كاتلني الخوف وزاد خوفي من زيد صار يضربو بوحشية
الموضوع يمكن طبيعي للشاب بهيج موقف بس اني بنت اشوف هالشي هذا لاول مرة گدامي جان شي مرعب الى ابعد الحدود
جنت احس كل ثانية افقد بيها جزء كبير من قوتي اخير شي من شفت تميم يخنگ الولد ما تحملت اكثر وفقدت الوعي
جنت كل ما افتح عيوني يتكرر المشهد گدام عيوني بس احس انو اني دا اختنگ وابقى اصرخ لحد ما ارجع افقد الوعي مرة ثانية
اخير شي جان يتكرر نفس المشهد گدامي وجنت اصرخ من الخوف بس صرت اسمع صوت قران ينقري يمي وبلشت اهدئ
مر تقريبا نص ساعة واني اسمع القران وهديت بس لزمتني الشهگة وماگدرت اسكت عن البجي بعدني خايفة من الموقف
جانت يمي الحجية وحاطة راسي بحضنها وتقرا قران ويمها اية والدكتورة النفسية بس اية مبين عليها انها خايفة بسبب صراخي
صارن يحجن وياي ويطمنني اني خلصت منهم وماراح يگدرون يوصلوني وخصوصا الدكتورة النفسية جانت هواي تشجعني
جان عقلي شبه قافل تخيلو انتو تعب الامتحانات ووراه مباشرة تعب العرس واجتني هاي المشكلة الي ما توقعتها
تمددت بفراشي وحضنت نفسي مثل الجهال الي ببطن امو واستمريت بالبجي والشهگة احسها تسحب گلبي وياها من تطلع
ماعرف ايمتى عافني وراحن بس الي اعرفو بقيت لحالي وبعدها اجت اية تمددت بفراشها وماعرف اذا نامت ولا لا
مرت نص ساعة تقريبا واجى تميم فتح الباب وباوع علي وانتبه انو دا ابجي واجى گعد يمي عالسرير وصار يمسح على راسي
جان يحاول يحجي وياي بس ما الي خلگ اجاوب واحس انهد حيلي من البجي بس مو گادرة اسكت ولا اگدر انام نهائيا
مسك ايدي يريد يفتحها وحاولت امنعو بس هو جان اقوى مني وفتحها وحط ايدو تحت راسي وسحب راسي على حضنو وحاوطني بايديه
رغم الي سواه غلط وحرام بس لا اني جنت بموقف اگدر افكر بيه وهو كذلك وجان كل همو ان اسكت شوية وما ابقى ابجي
من صار راسي بحضنو جنت احاول ابعدو بس ما جان ينطيني فرصة لان محاوطني بايديه وماگدر ابتعد عنو وصار يحجي وياي
تميم : اشششششش كافي يا روح تميم والي خلق عيونج الحلوات الا اندمهم على كل دمعها نزلت من عيونج ما اكون رجال اذا ما اخذت حقج منهم
اعرف جنت سبب بالي صارلج بس والله الا اندمهم اخليهم مرة ثانية يخافون من اسمج واخليهم عبرة لكل الناس
اسكتي ولا تحرگين گلبي بدموعج بدون كلشي گلبي جمر لا تزيديها علي
ياقوت : من صار يحجي وياي واني بحضنو اجاني شعور امان مو طبيعي لا وعي مني مسكت ملابسو مثل الطفلة وتغلغل بصدري عطرو
شايفين من تكون اكو نار ويطفوها بطفاية حريق اني جنت مثل الموقف رغم بجيي الهواي بس مجرد دخل عطرو لرئتي فورا بلشت اسكت
بس بقت لازمتني الشهگة وبقيت بحضنو الى اخذتني الغفوة واني احس بامان مو طبيعي يمو وكأن روحي تعرف اذا هذا الشخص هو الامان الوحيد الي
من جنت نايمة جنت احس بوجودو يمي صحيح نايمة بس جنت اعرف بوجودو ولهذا السبب گدرت انام بدون لا كوابيس ولا شي
والي ساعدني عالنوم هو تعب هاليومين اخير شي حسيتو اختفى وفتحت عيوني فورا جان دا يطلع من الغرفة بس جانت الدنيا نهار
باوعت لفراش اية مو موجودة الساعة تقريبا 9 الصبح يعني بقى يمي كل هالوقت رجعت غمضت عيوني وشوية ورجعت غفيت مرة ثانية
حلمت اني گاعدة بالغرفة مالت بيتنا اني وبابا عند اهل تميم وجان بابا حاضني مثل تميم بالضبط وهم جنت ماسكة ملابسو مثل الطفلة
ادم : ياقوتتي الحلوة ما اريدج تعوفين حقج هيج اريد بنيتي تصير قوية اريدج مثل الجبل ما يهزج ريح واعتبري هاي المشاكل مثل الريح
اعرف تأذيتي واعرف انكسرتي وشفتي اشياء المفروض الي بعمرج ما تشوفهن بس اعرفج قوية وراح تبقين قوية دائما
اني خليتج امانة مو بس عند تميم لا خليتج امانة عند نفسج هم ما اريدج تخونين الامانة وتضعفين ما اريد اشوف بنتي تبجي لاجل هيج واحد تافه
رفع راسي ومسكو بايديه .. من اليوم شكو واحد جان سبب باذيتج وبجيج اخذي حقج منو مهما كان واني واثق بيج انو تگدرين
ياقوت : بس بابا انت مو موجود علمود تساعدني
- اني موجود هنا دائما .. وحط ايدو على گلبي
- بدموع .. اني اريدك وياي اريدك تحتويني بحضنك من اخاف
- مثل ما گلتلج اني وياج دائما وكل ما تريدين تحجين وياي حطي ايدج على گلبج واحجي وراح يوصلني كلامج
- تمام
- يلا وگفي دموعج لا تخربين الاتفاق من البداية .. ومسحهن باصابعو
- تمام
- اوعديني ما تبجين
- ماگدر اوعدك
- اوعديني ما تبجين على شي ما يسوا
- اوعدك
باسني على گصتي ورجعني ورجعت اشم عطرو وفزيت من النوم لگيت نفسي ماسكة البطانية بس اگدر احلف بالله انو عطرو جان بخشمي
جنت اريد ابجي لان جان هذا حلم بس تذكرت الوعد وسكتت وگمت اخذت ملابس ودخلت للحمام وگفت تحت الماي واني اتذكر كلام بابا
جان عقلي يفكر بكلام بابا وينطيني قوة وگلبي يتذكر موقف البارحة وينطيني ضعف بس هالمرة عقلي صار اقوى من گلبي
خلصت سبح ومشطت شعري ونزلت تحت جانو الحجية واية وتميم بالصالة وجان تميم هسا گاعد وحاطتلو اية غدا عالنار
اني من نزلت من الدرج توجهت فورا عالمطبخ فتحت الجدر الي عالطباخ جانو مسوين تمن ومرگ فاصوليا للغدا وما اشتهيتها
رجعت للثلاجة طلعت خبزة وجبن وحميت الخبزة وحطيت عليها جبن وسكر ولفيتها ودا اكلها واجت اية علمود تطمن علي
اية : ياقوت شدا تسوين
- دا اكل
- ليش ما انتظرتي الغدا يحمى وتغديتي ويا تميم
- مو مشتهية فاصوليا
- شدا تاكلين
- بابتسامة .. جبن وسكر
- اي مو انتي طفلة تاكلين جبت وسكر
- لج والله يخبل
- عوافي
- الله يعافيج
- لا تاكلين هواي علمود تتعشين
- لا بس هاي اللفة وهاي هي
- تمام .. تريدين شي معين للعشى
- لا ماكو شي ببالي بصراحة
- تمام
تميم : السلام عليكم
- هلا تميم
- ها بوية شلونج اليوم
- كلش زينة
- عاشت ايدج
- وانت عايش .. شراح نسوي وياهم
- الي يعجبج انتي
- شنو رايك انت
- نشتكي عليهم لان بالفصول معتصم يطلع منها بسهولة
- ايمتى نشتكي
- هالكم يوم إن شاء الله
- ليش مو باجر
- لان ما اريد نشتكي هسا وهذا النغل يستفيد من اثار الضرب الي حصلو مني اني وزيد فمن يخف الاثر نشتكي عليه
- خوش فكرة
- ياقوت متأكدة انتي زينة
- اي ليش انت مستغرب
- لان مو متعود اشوفج هيج
- لا تعود منا ورايح .. گمت اريد اطلع من المطبخ ووگفت يمو وباوعت بعيونو .. لان بنت رجال واعرف ان اكو بظهري رجال وطلعت من المطبخ
تميم : من حجت هيج اقسم بالله حسيت بفخر بحياتي مو حاس بيه كلماتها تبين ثقتها بي واحساسها بالامان يمي
ياقوت : رحت يم الحجية وهم تطمنت اني بخير وبعدها اتصلت عالدكتورة من تيلفون تميم وحجيت وياها وهم طمنتها اني بخير
بس ما حجيت لاحد عن الحلم مال بابا وبالنسبة لاهل تميم فتميم وزيد حجولهم الي صار وياي والحلو بيهم ما رجعو فتحو الموضوع وياي
ومن تصرفت هاي التصرفات حسيت فعلا ان اني قوية كأني مو نفسها ياقوت الضعيفة الي البارحة گضتها صراخ وبجي من الخوف
وجنت مصممة ان اخذ حقي بس لان اثق بتميم اريد هو يساعدني بهالشي وهو يحدد الموعد الانسب للشكوى عليهم
جان الوضع الامني من سيئ الى اسوء وصرنا كلش نخاف عالولد واية من يروحون يمتحنون وما خلصت الامتحانات مالتهم الا احنا كاتلنا الخوف
بعد ما خلصت اية امتحاناتها جنا گاعدات اني والحجية بالصالة واية نايمة فوگ واجى تميم بايدو فايل نزلو گدامنا وجان مكتوب عليه اسمي
الحجية : شنو هذا
تميم : هذا فايل ياقوت تحظرو هاليومين نطلع من الانبار
- وين نطلع شنو هالحجي
- يمة الانبار ساقطة ما بقى بيها امل
- وين نروح والمن نعوف بيتنا
- يمة راح نطلع لبغداد نبقى بيها لحد ما يتحسن الوضع وبعدها نرجع هذا فايل ياقوت واول ما اكمل فايلات اية والولد ادزهن الكم
- شلون تتصرف من يمك غير تاخذ راينا
- يا راي يمة دا اگلج الرمادي ساقطة الناس دا تنقتل وتختفي تريدين يموتون كم واحد مننا بعدها تطلعين
- وابوك شنو رايو
- هسا رايح انطيه خبر انتي وياقوت واية جهزن غراضكن هاليومين
ياقوت : عافنا بصدمتنا وراح يحجي ويا ابوه باوعت للحجية وماعرف شسوي گالت خلي نشوف ابوه شيگول .. جان حوارو مع ابوه كالتالي
تميم : يابة تحظرو هاليومين نروح لبغداد
- منو يروح
- عيلتك وعيلتي
- على اي اساس
- على اساس تاخذ ولدك قبل ما الموت ياخذهم
- شنو قصدك شصاير
- يابة الرمادي ساقطة الجيش دا يتحظر يهجم عليها علمود يطهرها من التنظيم والتنظيم دا يتحظر علمود يهجم عليها ويسيطر عالمنطقة
منا لفترة قصيرة الرمادي راح تصير منطقة موت وصاروخ خطأ واحد كفيل انو يهد البيت فوگ روسنا ويمحينا من ارض الله
هاليومين تجهزو علمود ننتقل لبغداد ونبقى هناك لحد ما تخلص هالمحنة وبعدها نرجع إن شاء الله
جدي : انتو روحو اني ما اطلع من بيتي
- جدي الموضوع مو موضوع عناد وبيتي وبيتك الموضوع بيه حياة او موت البيت ااذ يروح نبني الف بيت غيرو بس اذا واحد مننا يروح ماراح يرجع
- اني عشت حياتي بهذا البيت وما يهون علي اعوفو
- جدي اني هم عشت طفولتي هنا وتعبت على بيتي لحد ما بنيتو وكملتو بس من يوصل الموضوع لهاي المرحلة اتخلى عنو في سبيل احمي عائلتي
واحنا ماراح نستقر ببغداد نروح فترة لحد ما نشوف شلون يصير الوضع وبعدها نرجع بدال ما نبقى ويصير شي على واحد بينا لا قدر الله
- شنو رايك ابو تميم
- والله يابة رايي من راي تميم بس شراح يصير بدوام اخوانك
- اخواني راح اسويلهم نقل واول ما تخلص عطلة نص السنة يداومون ببغداد هالسنة لان الجامعة راح تنقل الدوام هناك بدال ما تروح هالسنة على الطلاب
- وياقوت شنو وضعها
- ياقوت كملتلها النقل ومن تروحون تشوفولها اقرب مدرسة عليكم وتنقلوها هناك
- تمام راح نكمل شغلنا هاليومين واني ادور بيت ببغداد نگعد بيه بين ما تخلص هالازمة
- تمام وهسا عن اذنكم
- اذنك وياك ابني
ياقوت : شوية ورجع تميم
الحجية : ها شنو گال ابوك
- هاليومين يطلع ومن اليوم يبلش يدور بيت ببغداد
ياقوت : شنو من بيت
- بيت نبقى بيه لحد ما يتحسن الوضع
- بيت بابا موجود
- لا نشوفلنا غير بيت
- علمود ذولاك الشباب
- لا بوية اصلا ناسيهم
- لعد شنو السبب
- ماعرف احس مو راهمة نبقى بيه
- لا راهمة وكلش راهمة روح على ابوك گولو نبقى ببيتنا اصلا اني مشتاقتلو وهم بيه غراض بدال ما ناخذ منا او نشتري ونحتار بيهن من نريد نرجع
- تمام يابة هسا اگولو لبابا استاذة ياقوت
- لا عفوا استاذ تميم اني دكتورة ياقوت
- دكتورة ياقوت لا تنسين اني دكتور جامعي وانتي بعدج طالبة يعني كلمة استاذة ياقوت بعدج ما حصلتيها
- دخليني احلم شبيك تخرب حتى احلامي
- ههههههههه خبيث
- باوعي هالة ترا اگوم اكتل ابنج
الحجية : واني هم احصلي كتلة لو بس ابني
- لا انتي احبج ما اسويلج شي
- لعد اخذي راحتج بنيتي
تميم : ها هالة شو بعتيني
- ابيعك وابيع عشرة مثلك علمود ياقوتتي
ياقوت : يبوووووووووي فديتج انيييييييي
حضنتها وصرت اعيب على تميم بلساني وهو عافني وهو يضحك وراح علمود يحجي لابوه ومن طلع اني اخذت الفايل ورحت للغرفة
