رواية جذبني فمك البني الفصل الخمسون 50 بقلم عبير إدريس

يحبها بطريقة ابويه اكثر من كونه مجرد حبيب

يرتعد قلبه خوفآ حين تتألم او تستمع لأغنية حزينة 

انه الادهم 🤎جذبني 💋 البني

سيلين

جنه كاعدين بالغرفه وادهم قدملي ورقه وقلم ..

طلب مني اكتب رساله اوصف بيها حالتي او شنو اتذكر وبشنو احس باوعت عليه ابتسمت اخذت الورقه والقلم وبلشت اكتب...

متعبه من كل شيء 

فقدت كل شيء 

تائهة واقفه على ابواب الرحيل

غاب عقلي عن الوعي 

استيقظت في غرفه مليئة بالاجواء العلاجية هواها يخنق ونوافذها معتمه...

قضيت ايام واسابيع التهم المهدئات وحبوب المنومه غذائي عن طريق الوريد ، اتجرع الألم وداخلي يصرخ بصخب ، يداي ترتجف وذاكرتي بائسه لا اتذكر منها سوى شيء قليل ، كل لحظه تزورني هلوسات بصريه سمعيه هنا ضحكت وهنا بكيت وهنا تألمت وهنا غدرت وهنا قتلت .

السؤال بأي ذنب اقتل كل يوم ؟؟؟؟

ثقل روحي وجسدي متعب 

ارغب بالبكاء الشديد خجلآ وخوفآ ...

ممرضات وكرسي متحرك وجهاز الاوكسجين والمغذي الذي اصبح رفيق رحلتي ..

صفعه قدر تلتها ايام معتمه ...

صوت بداخلي يخترق مسامعي ويقول الى متى هذا العناء ...

احتاج الى حب حقيقي الى اناس حقيقيين الى جرعه من الامل ....

بدمعه منك وضحكه وتلاوه سوره من المصحف فقط لاتذكر من انا ومن انتم ...

اعاني من ألم يهشم دواخلي جعلني اذبل واغيب عن الوعي ....

كتبتها وخليتها بيده قراها ابتسم ابتسامه مصحوبه بحزن طوى الورقه اربع طويات مدنك على الورقه همس بصوت متشحرج...

ادهم : ان شاء الرحمن الرحيم يوكفلج ويرجعلج عقلج وصحتج وصدكيني لو اعرف احرك روحي وعمري وارجعلج ضحكتج مثل قبل صدكيني ما اتردد لحظة ولا راح اقصر وياج..

فز وبهت من كتله..

سيلين : بمقابل ؟؟؟؟

عكد حاجبه وكال..

ادهم : لاااااااا

سيلين : لعد ؟ 

ادهم : رجفتي كلبي ليش هيج تحجين ؟؟

سيلين : ليش تساعدني شفقة عليه لو تريد مقابل مثل ما وعدتني؟؟

ادهم : اعتبريها هديه من صديق جان بيوم من الايام الاقرب لقلبج..

ابتسمت ودنكت العب بالكانونه البيدي.

سيلين : اخر هداياك اخذتها قبل سنه او اقل وعاشت ايدك

عكد حاجيه مستغرب ضيق عينه وكال..

ادهم : شنو قصدج احجي بوضوح ..

سيلين : افهم اللي يعجبك ميهم ..

ادهم : شنو قصدج ميهم ؟

سكت منتظر مني جواب وساد الهدوء بالمكان ...

رفعت راسي لكيته خازرني..

سيلين : ليش هيج تباوع ؟؟

جاوبني بأبتسامه حنينه وايمائه براسه ..

ادهم : منو انتِ ؟؟؟

سيلين : بنت يتيمه الموت اخذ منها اعز ثنين ابوها وعمتها تركوني للدنيا وعشت وجعها بشكل موجع جدا لا العقل يتقبله ولا النفس تهواه.

ادهم : بس تجاوزنه هاي الاحداث ليش رجعتي تتذكريها ..

سيلين : التخلي والحزن والوحده والفقد كل هاي الاشياء تركت اثر بنفسي وبثت اليأس بداخلي بالمختصر وبكل بساطه اترجمها الك مرض نفسي روحي هشه محطمه خاليه من التمني لهذا يادكتور اني متجاوزت اي حدث من الاحداث المرت بحياتي.

ادهم : وعلاجي الج وتعبي بالسنوات الراحت وتعبج انتي والسهر وين راح مو صرتي زينه بفتره من الفترات.

سيلين: ورجعت حطمتني .

ادهم : انه.

سيلين : بلي انت .

ادهم : كافي بعدين نحجي لتعبين قلبج اكثر واريدج تنامين وتنسين كلشي صار وياج..

سيلين : متحب احجيلك شنو صار ويايه بسببك.

ادهم : ليش بسببي غير افهم.

سيلين : معقوله دكتور متعرف شنو سويت؟؟

ادهم : والله ما اعرف عن شنو تحجين.

سيلين : ما اصدكك.

ادهم : براحتج بس راح تتندمين اذا حكمتي عليه حكم مسبق وبغير حق.

مجاوبته مددت وجان بصفي الكومدي عليه حبوب المهدئات اخذت وحده وسكبت مي من السراحيه وشربته غمضت عيني علمود يشوفني نمت و يطلع..

همس بكلمات ممزوجه بقهر مني ...

ادهم : مرات نضيع متعه الحياه بسبب تفكير ذهني مصحوب بأفكار باليه ، للأسف نسمح لهاي الافكار تقود حياتنه وتاخذنه بعيد عن جمال الحياه واناقتها...

اختنك بعبرته سكت لحظات ورجع استرسل..

ادهم: اكو لحظات حلوة ممكن نعيشها بتفاصيلها البسيطه ونكون سعيدين بس بفكرنه وانانيتنه راح نسرق هاي الفرحه من حياتنه ومن تمر عجله الزمن وتمشي بينه لمحطه بعيده راح ندرك مدى غبائنه لان راح نعيش بجحيم الماضي وماراح نتحرر منه اعتذر منج اذا اذيتج بدون سبب ، فعلا مصدوم بكلامج بس شسوي هذا حضي العاثر ما يوم نصفني وياج..

سمعته دفع الكرسي وطلع فتحت عيني فارغه الغرفه رجعت غمضت بلكت اكدر انام بس للأسف المهدئات او حبوب المنوم الكاعد اخذها تسطرني بس متنيمني احس واسمع احس ثكل بأجفاني وايدي ورجلي تنمل ..

ماعرف شكد مر وقت غفيت للعصر كعدت راسي يموتني والدنيا تفتر بيه فتحت عيني لكيت نرمان كاعده بالمرجوحه كبالي وبيدها كتاب تقره شافتني نزعت نظارتها الطبيه ابتسمتلي وسدت الكتاب اجتي كعدت على الكرسي كبالي..

بوجه مبتسم سألتني مستفسره عن حالي..

نرمان : شلونج اليوم احسن ؟

سيلين : الحمدلله.

نرمان : الحمدلله اكدر احجي وياج بموضوع لو ممتهيئه..

دنكت راسي عرفت بخصوص ادهم..

سيلين : اسمعج..

نرمان : باعي لتفهميني غلط بس حبيت اكلج ادهم حيل متأذي وعفته راسه يوجعه شنو حجيتو وهيج انكلبت احواله.

جريت نفس قوي وكتلها.

سيلين : حجيت وياه بصراحه ليش ضاج هو مو كال راح اعالجج بمقابل واني ذكرته بهذا الشي.. ..

نرمان : انتي تعرفين شصار بيه وشلون تعب وتعذب من تمرضتي..

سيلين : لا ما اتذكر بس شغلات قليله.

نرمان : شنو تتذكرين بالضبط..

سيلين : اتذكر صوته اكثر شي من يقره قران فوك راسي ومرات اتخايل لو صدك مادري بعد اتخيل نايمه بحضنه صح او غلط مادري.

نرمان : لا ماكو هيج شي هذا تخيل لتخلين ابالج ..

سيلين : اعرف عمو ميسويها...

صفنت بوجهي و انرسمت على وجها ابتسامه غريبه تعقيب على كلامي كالت..

نرمان : لحظة اجيبلج الصور لان موبايلي مليان لقطات الكم وشوفي شنو سوه ادهم...

راحت جابت موبايلها ودخلت على ملف بيه صوري كلها بفتره مرضي بيهن فوك ال ٣٠٠ صوره وكاتبه عليها عزيزه حبيبي ..

ابتسمت وسألتها.

سيلين : ليش مسميه الملف بهذا الاسم ..

نرمان : لان انتي عزيزه ادهم وهو حبيبي ..

ابتسمت وبديت اتصفح بالصور بالتواريخ اركز وعيوني تريد تطلع من مكانها اني هيج صاير بيه هااي شنو شكد تعبانه وشكلي يخوف باقي الصور لادهم ،

 صوره نايم بالكاع ولازم ايدي وصوره يبجي ولازم عينه واني اتلوى من الالم واضح من ملامحي بالصوره ، 

صوره يوكلني ومبتسم وصوره يسولف ويايه وصوره واكفين يم الشجره ونضحك ثنينه وكأنما عقلي طبيعي وبمكانه ، صوره يعلمني شلون اغسل ايدي وافرش اسناني ووووو هواي كلش..

جريت نفس ومديت ايدي نطيتها الموبايل.

نرمان : ما ابالغ اذا كتلج باب الشارع مطلع وعافج غير طلعاته المحسوبه علمود يجبيلج العلاج او يراجع بيج اطباء وكم مره تخربطتي واخذج للمستشفى اني من كاعد احجيلج ما اريد تنقهرين عليه او تشفقين على حالته لان اخويه اكبر من هيج شي الاريده منج لتقابلين تعبه بنكران...

دنكت راسي وهمست..

سيلين : مو قصه نكران بس الصارلي شي جبير وبسببه تواطأ ويه عقله واتفق يدمرني في سبيل ميفقدني ويرجعني اله وفعلا رجعني وخرب حياتي واستقراري..

نرمان : غير افهم شنو سوه عندج دليل عل صحه كلامج.

سيلين : لتهتمين هاي هلوسات احتمال اتخايل ..

نرمان : اني هم هيج كتله بس والله متأذي على كيفج وياه ..

سيلين : ماشي 

نرمان : صدكيني ادهم بداخله طفل صغير مستحيل يكدر يأذي احد عنده قلب ما اعتقد اكو بشر يملك ربع طيبته واقل موقف يصير كدامه كفيل يخليه يبجي وتنزل دموعه انسانيته عاليه وانتي مره سولفتيلي شلون نزل للبنيه التبيع ورد واثنى رجله وكعد بمستواها ، هذا ادهم فنان بالانسانيه ومعطاء بدون مقابل.

سيلين : اعرف ..

نرمان : شاركج بهاي الغرفه مده تسع شهور الحمدلله صارت ذكريات ودفنيها بملف بذاكرتج وابد لترجعين تفتحيه بيوم من الايام.

ابتسمت وكتلها.

سيلين : ماشي دكتوره.

نرمان : هسه متحجيلي شنو سوالج ادهم وضايجه منه.

سيلين : كتلج هلوسات ..

ابتسمت وكالت.

نرمان : ماشي راح ابشره بس الله عليج لتقهريه بعد.

سيلين : ماشي تدللي انتي وياه.

نرمان : عاشت ايدج

سيلين : وايدج.

مشت الايام ومر شهر كامل علاج مكثف تشاركو بعلاجي ادهم ونرمان كدرت اوكف على حيلي وبديت اطلع من طور العزله وشويه شويه بديت ارجع لحياتي بس ما اكدر اجزم رجعت طبيعيه لان مرات عقلي يشطح ويتخيل شغلات مصاير او يتصور كل هاي الناس تكمن بداخلها عداء اليه لهذا صرت حذره من الكل..

تحولت سيلين من انسانه عفويه الى متصنعه ومن مسامحه الى صلبه القلب ومن طيبه الى قاسيه...

اتصنع الابتسامه الكاذبه مسامحتي مزيفه طيبتي مصحوبه بقساوه بمعنى شعاري الجديد نفسي اولا ومن ثم يأتي الجميع ...

غرور عالي بنفسي مع تطبع بالامبالاه شخصيه وتركيبه جديده غريبه عجيبه..

شبهتها بالسايكو مثل ما عمو وصف شخصيه فهد ..

بس مجنت متأكده اني سايكو فعلا او عندي ملامح من هاي الشخصيه..

اضحك وابجي بنفس الوقت...

هاي الصفات للأسف حتى دكتوري ما اكتشفها صرت اخدعهم بالعلم التعلمته منه وبسبب قرائتي واطلاعي عن لغه الجسد صرت اسيطر عليهم داخو بيه هل اني فعلا صرت زينه او لا امثل الشفاء ..

بس اكيد دكتوري صاحب الذكاء الحاد ما تخفى عليه خافيه ومستحيل يتطمن قلبه ويأمن لحالتي اذا ما يدخلني بعده اختبارات هاي الاختبارات اني ما اكدر امثل عليه بيها لان جديده ..

صار اذكى مني كام يطرح اساليب جديده ما معلمني عليها او ما ماره عليه قبل لهذا كدر يكتشف جزء من شخصيتي الجديده بس احتفظ بيها لنفسه ما صارحني لو ما اسمع حديثهم هو ونرمان ، اذكر الكم موقف من المواقف او بالاصح اختبار من هذه الاختبارات المريت بيها...

جنت متمدده بفراشي ساعه سته الصبح دك الباب وطلب يدخل لبست شالي وكتله..

سيلين: ادخل..

فتح الباب مبتسم الخاولي على كتفه وايده على مقبض الباب والايد الثانيه متكئ بيها على الحائط.

ادهم : صباح الخير

سيلين : صباح النور.

ادهم : اليوم عندي محاضره بجامعه اهليه واريد تجين ويايه

سيلين : بس اني تعبانه

ادهم: لا كلشي مابيج بدلي والحكيني للمطبخ نسوي ريوك سويه ونطلع.

بعد الاصرار والثباث على موقفه كدر يقنعني..

سيلين : ماشي.

كمت من فراشي رحت للحمام غسلت وفرشت اسناني ورجعت للغرفه بدلت ورحت للمطبخ لكيته يصب بالجاي ومحضر ريوك جان مبدل لابس قميص نيلي وبنطرون قماش رصاصي..

سيلين : كل عام وانت بالف خير..

 رفع عينه باوعلي مبتسم رجع دنك يصب وكال.

ادهم : شلون تذكرتي اليوم عيد ميلادي.

سيلين : شلون انسى المهم صرت ٣٦ سنه ياربي العمر كله..

خله القوري على الميز وجر كرسي كعد واشرلي اكعد كال.

ادهم : شكرا يلا كعدي تريكني حتى منتأخر.

كعدت قدملي صمونه وقرب الصحون يمي.

سيلين : قريبات تره..

ادهم : ميخالف ..

اكلنه بهدوء وطلعنه قبل لنروح فتح باب غرفه ايمن وحجه وياه ..

ادهم : ايمن اخذ مريم وديها لبيت اهلي بس اليوم عندي محاضره وباجر انه اخذها

ايمن : شنو رجعت للدوام ؟

ادهم : لالا بس عندي محاضرات بجامعه _ هذا الاسبوع كله اكملهن واكعد.

ايمن : هاا موفق دكتور.

ادهم: تسلم حبيبي يلا رايح.

ايمن : الله وياك.

طلعنه وصلنه للجامعه ودخلنه للمحاضره يشرح وعينه عليه وكل شويه يجي يسألني خاف تعبت واكله لا مابيه شي..

لهناك وماعرف ليش انتابني شعور قوي علمود افشله بس والله مو بيدي يعني ماعرف ليش هيج تصرفت ..

سيلين : دكتور اختصر هواي شرحت عن هاي الحاله اعتقد درسك اليوم ما مركز بيه بصوره صحيحه.

عكد حاجبه سد القلم ونزل من الستيج تقرب من الستول الجنت كاعده عليه قدملي القلم ودنك عليه همس.

ادهم : تفضلي شرحي النه الدرس ست.

باوعتله وحجيت بصوت مسموع.

سيلين : انت الدكتور واني ضيفه هنا ما مجبره اخذ درسك ولا الك حق تطلب مني اشارك ههههه.

ابتسم بحيره عدل وكفته وكمل شرح ، بس بينت على ملامحه وتصرفاته الضوجه..

بعدين كال بصوت مسموع...

ادهم : سيلين باجر عليج المحاضره والمواضيع الكتبتها على السبوره انتي تشرحيها كامله..

صفنت عليه عكدت حاجبي ، ابتسم وطلب من الطلاب ياخذون راحتهم طلعو كلهم فرغت القاعه تماما من الطلاب اجه اقترب مني كنبص كبالي حنى ركبته باتجاه كتفه الايمن همس..

ادهم : مستعده تقدمين الدرس باجر..

سيلين : لا 

ادهم : ليش ؟ 

سيلين : ما اكدر

ادهم : تكدرين

سيلين : يضحكون عليه ويفشلوني.

رفع حواجبه الاثنين وكال.

ادهم : مثل ما حاولتي تفشليني قبل شويه.

دنكت راسي ونزلت دمعه من عيني مصحوبه بحسره.

سيلين : اسفه مجان قصدي بس ماعرف اكو حاله بداخلي صارت ماعرف شلون اوصفها او افسرها الك المهم حبيت افشلك ليش ماعرف وكلش تندمت.

ادهم : اي اريد اعرف هاي الحاله ليش صارت وياج وجانت فجائيه لو خططتي الها قبل وقت .

سيلين : يعني قصدك الصبح.

ادهم : الصبح او من جنه بالسياره لو هسه ..

سيلين : من انت تشرح انرسمت هيج فكره ابالي.

ادهم : جيد ..

سيلين: زعلت مني مو .

ادهم : كلشي اتقبل منج.

سيلين : كلشي كلشي.

هز راسه بهدوء وكال

ادهم : اتقبل كلشي كلشي وبكل ممنونيه.

ضحكت وقررت ما اضوجه ولا أأذيه وحتى خراب زواجي والصار بسببه ما راح احجيه لا اله ولا لاي شخص قررت ادفن الماضي وابدي من جديد بشرط اعيش لنفسي وبس...

كملنه المحاضره ورجعنه للبيت لكيت ايفين جايه 

بهاي الفتره هواي اجتي ايفين وجانت تبوس بيه وتسولف ويايه هواي بس جنت اسكت واضل اباوع عليها بدون ما اشاركها الحديث لحد متروح مرات تضوج وتعاتبني ومرات تتقبل وتسكت..

 ثاني يوم هم رحنه للجامعه 

قبل بيوم

 درست الموضوع الكال عليه ادهم وحسيت نفسي مستعده وبنفس الوقت مهزوزه..

جنه نمشي بالممر المؤدي للقاعات الدراسيه وكفت فجأة وهو جان متقدم عليه بخطوتين من اختفى صوت خطواتي التفت عليه عكد حاجبه واتقرب وكف بصفي وكال.

ادهم : ليش وكفتي ؟

سيلين : ما مستعده عفيه..

خله ايده بجيبه وكال.

ادهم : زين ليش ؟

سيلين : صدكني كلهم يكرهوني وراح يقلدون عليه.

صفن بوجهي بجيت و مسحت دموعي وضحكت بنفس الوقت...

سيلين : لا اني كدها هسه تشوف..

حسيته ضاج وعكد حاجبه ضل يباوعلي ونضرات عيونه تتوزع على ملامح وجهي مسغرب تصرفاتي لو كاعد يدرس الحاله ماعرف يعني شنو مره اريد ومره ماريد...

ادهم : يلا اذا مستعده ..

سيلين : لحظه بس خايفه.

ادهم: اخذي نفس قوي 

اخذت نفس عميق...

ادهم : عفيه هسه ازفريه ، بعد كرريها هسه تمام يلا .

كررتها اكثر من عشر مرات ، ودخلنه للقاعه عرفني عليهم بشكل سريع ، الحلو بالموضوع مو نفس الطلاب مال البارحه لا دخلنه لمرحله ثانيه همست جان واكف يمي..

سيلين : ليش اجينه هنا مو نفس المرحله مال البارحه.

ضحك وكال.

ادهم : علمود ليفشلوج مثل ما فشلتيني لان يحبوني وعدهم دكتور ادهم خط احمر لهذا كلهم مستعدين يضوجوج اليوم...

ختم كلامه بضحكه وراح كعد على الستول واني وكفت اشرح الغريب اكو رجفه قويه بيده واطراف رجلي وحسيت الكل ينتقدني بنضراته واسمع غيبه ونميمه مع العلم القاعه هدوء والكل ساكت بس ماعرف ليش هيج كاعد يصر ويايه باوعت على عمو مركز ويايه ويكتب بدفتر كل حركه وكل فعل مني اخر شي متحملت استأذنت و طلعت من القاعه لحكني وصاحني بصوت عالي.

ادهم : نرمان نرمان ..

عقجت وجهي والتفتتله.

سيلين : شنو نرمان ..

بهت بوجهي.

ادهم : نرمان ؟؟؟ ما كلت هيج ..

سيلين : لا بلي كلت نرمان نرمان مرتين عدتها.

ادهم : انه كلت متأكده.

سيلين : اي متأكده.

ادهم : يلا انه غلطت بأسمج وكلت نرمان اسف.

بس هو ما غلط بالاسم عقلي صورلي هذا الشي..

ضجت كلش مشيت سريع ورحت كعدت بمكان بعيد عن الطلاب اجه كعد يمي ...

ادهم : شنو تحسين ؟؟

فركت ايدي بقلق وكتله.

سيلين : مخنوكه واحس بعدني مريضه احتاج علاج وفتره ارتاح بيها يلا اختلط بالناس ..

همس.

ادهم : وبعد؟

سيلين : خدر بأيدي وراسي وحتى اطراف رجلي..

ادهم : بعد ؟

سيلين : وجع غريب بجسمي ما حاسه بيه قبل ...

ادهم : ماشي نرجع للبيت شتكولين.

سيلين : بكيفك لان تعبت .

ادهم : يلا نرجع..

رجعنه الطريق ازدحام ودخت كلش نفسي كلبت طلبت منه يوكف السياره علمود انزل ، بالكوه كدر يتخلص من الازدحام وصف السياره بفرع نزلت وتقيئت على الرصيف ناوشني كلينس مسحت حلكي وكمت وكفت.

باوعلي بقلق وهمس ..

ادهم : دختي ؟؟

سيلين : اي

ادهم : ترتاحين بعد لو نرجع للبيت.

سيلين : لا نرجع اريد انام تعبت.

ادهم : صعدي على كيفج.

صعدت وهو هم صعد رجعنه للبيت العصر جنت نايمه كعدت وحبيت اطلع يمهم وصلت للمطبخ وكفت من سمعتهم يتهامسون بينهم بخصوص حالتي المرضيه.

نرمان : شلون شخصتها سايكو ؟؟

ادهم : افعالها كلها تدل على هذا الشي رغم تحاول تخفي وتتصنع لكن كشفتها..

نرمان : شلون كشفتها ؟؟

ادهم : اختبرتها بعده اختبارات وعرفت..

نرمان : مممم زين شنو راح تسوي 

ادهم : انطيها ثقه وبس .

نرمان : يعني تأمنها قصدك.

ادهم: بالضبط.

نرمان : وشلون راح تعالجها.

ادهم : تتعالج لان متعرف بحالتها سايكو لهذا ما راح تكدر تخدعني مثل ما سوه فهد..

نرمان : فهد مثل على الجميع الشفاء لان جان يعرف بحالته مو صح ؟

ادهم : بالضبط بس سيلين متعرف لهذا اكدر اعالجها بسهوله وتره حالتها مو كلش قويه .

نرمان : شكد نسبه السايكو عدها اذا نريد نقارنها ويه فهد.

ادهم : ٢٥ بالميه ..

نرمان : بس هم هوواي

ادهم : هوواي وممكن تتفاقم عدها اذا ما عالجتها.

نرمان : الله يساعدك هاي شنو والله تعبت من يمي ادهم لتزعل مني رجعها لاهلها تره طالت وهيه كصيره وروح سافر سويت العليك وزياده.

ادهم : اذا ردت اسافر اسافر ويه سيلين ما اتخيل حياتي تكمل بدونها.

عفتهم ورجعت لغرفتي وهنا تأكدت علاجه اليه يريد مني مقابل بس كلت انتظر هو يطلب و اعرف شلون اتصرف وياه وارده بوقتها..

العصر اندك الجرس كالو اجوي فهد وايفين طلعت من الغرفه ورحت يمهم بالهول اول مشافني فهد ضحك وكال.

فهد: معوده حمدلله على سلامتج سبيتينه سبي متكليلي شسويتي بينه.

سيلين : الله يسلمك..

حجيتها ورحت كعدت. التفت على ادهم راح بوسه وكال..

فهد :شلون صارت بنتك ...

ويغمزله ادهم عصب وباوع على ايفين فهد هم باوع عليها وضحك..

فهد : لا ففه مسولفتلي لتظلمها.

ايفين: عمو والله هو مدري شلون يبوك لساني واني جنت متعاطفه ويه حاله سييلن وابجي وهو من يسألني يتقصد يسحب حجي ...

فهد : ايا * شبعان حضن كون تدعيله لسامر بشرفك مو عيشك شهر عسل....

ادهم : ماكو هيج حجي لتضل تلوص ..

غمزله وكله .

فهد : علينه سيدي شفتنه سود عبالك هنود يولي انه فهد ابو الفهاديد يعني متعبر عليه مسكنتك ...

كعدو وادهم لزم موبايله يتصفح بيه مجاوبه ....

فهد: تدري رحت استشرعت شرعيا كالو عادي سوالف اخوك...

ادهم : منو صخم وجهك وطلب منك تستفسر..

فهد : ههههههه اعرفك تدور حلال وحرام بس شوكت ينور الطفل ان شاءللله ...

ادهم : لا يا ادبسز ...

فهد : ليش ادبسز والله كالو شبعت دفو ذيج الشتويه.

نرمان : كافي فهد زودتها تره.

فهد : المهم جبت هديه بسيطه مني لابن اخويه المنتظر..

طلع للطرمه دخل شتيل بيده هديه شكبرها مغلفها خلاها بالكاع و صاح على ايفين.

فهد: ففه مكص ...

كامت نرمان جابتله مكص خلته بيده فتح الغلاف من نباوع جايب كريكوت مال طفل ( مهد ) ... نرمان وفهد دار بينهم حديث معين بدون ما نسمعهم...

نرمان : هاي شنو؟؟

فهد: هديه شنو ؟؟

نرمان : هههههههه صدك تحجي جايب كريكوت.

فهد : هاي شبيج سنه ساكن الغرفه شجان يسوي يصلي.

نرمان : لك فهد اكعد راحه واسكت ليسمعك واخذ هديتك طلعها بره.

فهد : تره حرت وياكم اصير زين تحجون عليه وميعجبكم اصير موزين كلكم تكلبون عليه.

نرمان : اي بس عيب الكاعد تسويه حبيبي انت.

فهد : هاي شبيج انتضري شهر اخوج يعرس..

نرمان : وانت شكو حارك دمك ..

فهد : بالعكس اصلا فرحان ونيتي سليمه حتى جايب هديتي وياي ..

حجاها بصوت عالي يسمع ادهم..

ادهم : على شنو كلفت نفسك وجبتها وبعدين هاي هم هديه شتسوي بيها سيلين 

فهد : هو كلت هديه وحده قابل يوميه مشتري اختصرت المناسبتين...

ضحك ادهم وهز راسه ..

فهد : اذا معجبتك اجيب جهاز طفل كامل حتى خرخاشات.

ادهم : هههههه الله يشافيك.

فهد : اي اضحك لتصير نفسيه.

ادهم : اكعد متعبت من الوكفه.

فهد : تعبكم راحه شعندي غيركم ، صدك ايمن وين ماشفته.

حجاها ويتلفت منا ومنا وعينه على الغرف...

نرمان : طالع

فهد : وين هذا هم صاير ابو دروب ما ينلزم..

نرمان : مو تدري لازم شغل ادهم شبيك نسيت.

فهد : هااا بيها الخير

حجاها واندار على ايفين ..

فهد : يلا ففه نروح.

ايفين : بعدني مشفت سيلين زين.

فهد : لبسي نظاره هههههه.

ايفين : تره متضحك..

خزرها تغيرت ملامح وجها وبسرعه كامت ، شنو من نضره باوع لاختي وخلاها هيج ترجف استغربت صراحه...

راحو ومر اليوم عادي وطبيعي وره يومين رحنه للدكتور علمود موعد مال رنين مغناطيسي لراسي ادهم حاجزلي يمه ، اخذت الرنين وكالو باجر تطلع النتيجه ، طلعت ثاني يوم وجابها ادهم دماغي واعصابي سليمه بس عندي خدر براسي الدكتور كال هذا نتيجه الادمان لازم يترك مخلفات صحيه نفسيه ومن ضمن هاي المخلفات صار عندي التهاب بالقالون واي اكله اكها اتأذه.

رجعنه للبيت ومرت الايام عاديه ، وره اسبوعين ضبط كعدت الصبح ساعه سبعه ونص باوعت فراش نرمان فارغ عرفتها راحت للدوام غيرت ملابسي بدشداشه لبست شالي ورحت للمطبخ لكيت ادهم كدامي فاتح الثلاجه باوعتله مبدل ملابس دوام...

سيلين : وين رايح؟؟

التفت عليه بهدوء ابتسم وكال.

ادهم : صباح الخير عبالي نايمه.

سيلين : صباح النور توني كعدت .

ادهم : نتريك شنو رأيج..

سيلين : تريد اسويلك.

ادهم : ياريت تكدرين بين ما اوصل مريم لبيت اهلي وارجع حتى اجيب صمون بدربي.

سيلين : ماشي بس وين راح تروح.

ادهم : عندي ندوه ويه مجموعه دكاتره بعلم النفس..

سيلين : هاا الله يوفقك.

ادهم : شكرا راح اروح اودي مريم ..

سيلين : ماشي.

طلع واني كليت بيض تعاجزت اسوي جاي جديد وعبالك نعست ردت ارجع انام علكت النار نصيتها على اقل شي وخليت السبايه جوه القوري وره شويه اجه ادهم خله الصمون على الميز وكعد صبيتله الجاي ورحت اطلع الجبن من الثلاجه..

 شرب شويه من الجاي ولعبت نفسه صاح..

ادهم : هذا شنو ؟

التفتت لكيته معكنش وجها..

سيلين : شنو؟

ادهم : الجاي ؟

سيلين : شبيه؟

ادهم : عبالك عصير بارد فوكاها مابيه شكر..

سيلين : لا بربك يمعود جان يفور على النار..

ادهم : يفور والشكر وينه مر علكم ..

سيلين : اصلا الجاي حار وبيه شكر ...

ادهم : الجاي جديد لو مال بارحه احجي الصدك؟؟

سيلين : جديد توني سويته..

حجيتها بثقه وهو صافن عليه المشكله يعرف بيه من اكذب رفع تك حاجب و جر اصبعي خلاه بالكوب وباوع بعيني.. ...

ادهم : يلا شو ما نجويتي لو حار جان كمزتي ..

سيلين : ايدي اتركها شبيك..

باوع على لزمته لايدي ورجع باوعلي سحب ايده وكال..

ادهم : العفو نسيت ..

سيلين : ماصار شي اسويلك واحد جديد.

ادهم : لا لا مستعجل ..

استغربت من شفته شرب الجاي كله حتى مضافله شكر ...

سيلين : مو بارد ومابيه شكر.

ابتسم بمكر وكال.

ادهم : اصلا حلاته كلش قويه .

سيلين : اهاا هسه جان مر علكم وماينشرب شلون صار حلو..

ادهم : انتي شعليج المهم طيب وشربته.

سيلين : بالعافيه محتاج شي لو ارجع انام

ادهم : لا نامي راح اطلع ..

سيلين : الله وياك..

رجعت نمت ، وره اربع ايام جنت كاعده اجه يمي العصر ...

ادهم : مو كافي سيلين.

سيلين : شنو ؟؟

ادهم : سكوت.

سيلين : شسوي يعني ..

ادهم : احجيلي بشنو مريتي وليش هيج سوه سامر..

سيلين : راح احجيلك الحاله العشتها بس بدون ما اذكر الدوافع والاسباب..

ادهم : زين ليش؟

سيلين : بكل بساطه ما اريد اتذكرها وما اريد اخليك بدائرة التبرير..

ادهم : شلج دخل انه عاجبني ابرر اذا غلطان راح ادافع عن نفسي واذا ماغلطان يتوضح كلشي.

سيلين : اذا يعجبك تسمع اسمع الاريد اكوله وبس.

صفن بوجهي دقايق بعدين كال.

ادهم : يله احجي اليعجبج..

سيلين : ماشي اسمعني ولتقاطعني ابد.

ادهم : ما اقاطعج..

سيلين : سافر للشمال من كتلك راح عنده ندوه ...

ادهم : اي

سيلين : من رايح هناك سأل من ناس لناس واندل بيت امي ومن خلالها واصل لبيت جدي ، المهم عارف المخفي كله رجع حاربني نفسيا كل يوم مشكله كل يوم عركه وشلون كذبتي وليش ماصارحتيني وخليتيني بمقام المغفل وانضحك عليه اني هنا ضليت اتعذر منه ومرات اتوسل بيه ينسى علمود اكمل حياتي براحه...

بس هو ما نسى ولا غفرلي كذبتي صار يتنمر عليه ويأذيني بالكلام يجرحني الصبح ويداويني العصر هيج حياتي وياه ...

ادهم : لحظه قبل كلشي بس سؤال جاوبيني عليه.

سيلين : وهو ؟

ادهم : انتي كلتي من سافر يلا تغير عليج بس قبلها كلتي حاربني وحرمني منكم خصوصا انه وايفين بس هاي الفقره وضحيها و كليلي ليش.

سيلين : لان بكل بساطه اختي حبيبتي دزت رسائل اول يوم العرس واصفه بيها حالتك و شلون متأذي بعدي وتعبان وطلع هو قاريها لهذا كرهك وشد ويايه وحرمني منها ومنك..

ادهم : معقوله ؟؟

سيلين : وليش مو معقوله شو حسيتك مستغرب 

ادهم : من شنو متسغرب ؟

سيلين : مو انت هم دزيت رساله بيوم الزفه مالتي كلها غزل مبطن واغبى واحد يفسرها حب..

ادهم : صوجج انه جنت منهار رجعت للبيت اول ما فتحت موبايلي دازتلي صور وكاتبه شنو رأيك بيه ..

سيلين : اني دازه وين اكو هيج شي..

ادهم : وانه هم ماداز كلشي عدا هاي الرساله نطيتج بيها رأيي على الصور..

سيلين : شوف راح نتعارك واكو هواي امور صارت وانت غلطت بيها لهذا ما اريد احجي ونتعارك عوفهن كرامه للأيام التعبت بيها عليه وماريد اخسرك منا لحد ما اكدر اوكف على حيلي واشتغل وأأجر بيت قريب اكعد بيه.

ادهم : تشتغل وتأجر كل عقلج اخليج.

سيلين : عوف الموضوع هسه لتناقشني بيه.

ادهم : اكيد ما اناقشج لان مرفوض تماما المهم كملي شنو صار وياج.

جريت نفس طويل بحسره...

سيلين : الصار بلش ينطيني مخدرات ومجنت ادري بيه من خلال العصاير او الاكل ماعرف المهم بهيج طريقه ومن جنت اتعب وجسمي يحتاج للمخدرات يكلي لازم تغيرين نظام اكلج..

ضرب ايده وكال.

ادهم : والله عرفت لاعب بنظامج الغذائي.

سيلين : شلون عرفت ؟

ادهم : معليج المهم عرفت كملي.

سيلين : جسمي كام يتعطش للمواد المخدره وكمت اتوسل بيه اريد علاج وعبالي فعلا راح يجيبلي علاج لان صورلي وفهمني حالتي اني مريضه بمرض بالاعصاب وحتى اهله من سألوه اكدلهم اني مريضه ويطب ويطلع يوصي عليه حتى اني مشكيت بشي ...

ومرت الايام وكمت اطلب المزيد منه الى ان طلب مني اروح وياه للمصرف واسحب فلوسي كلها بحجه العلاج..

ادهم : وسحبتيهن كلهن وخليتيهن بيده.

سيلين : هذا الصار بالضبط..

ادهم : لا يانذل كملي كملي ..

حجاها وتأفأف كلش ضاج. .

سيلين : بعدها امني اني كاعد اتعالج وسمحلي اكمل دوامي..

ادهم : زين بس فهميني ليش عاديتيني بالدوام وشنو سبب المشكله صارت.

سيلين : كتلك اترك هاي السالفه ليش تروح وترجع عليها.

ادهم : مو اريد اعرف تره من حقي ..

مجاوبته وكملت كلامي.

سيلين : بعدها امتحنت وكملت كال اريد اطلع من بيت اهلي ونستقر وكذا ابوه منعه لان ماعدهم ولد جبير بس هو واخوه اصغر منه اصر سامر ننتقل ، اجر بيت بمنطقه بعيده عن اهله وعلى اساس نطلع نأثثه سوه بس قبلها كال نسافر وفعلا سافرنه للشمال هناك شوفني الويل ، ..

ادهم : يعني شنو شيسوي..

سيلين : يخلي بوري المي يقطر الليل كله واني معصوبه العينين.

ادهم : شنو السبب ؟

سيلين : شاك بينه اني وياك عدنه علاقه ويريدني اعترف ومن انكر يشوفني الادله العنده ...

ادهم : شنو الادله غير تحجين مو راح اطك.

سيلين : اذا حجيت اترك البيت تقبل ؟؟؟

ادهم : يابيت.

سيلين : بيتك.

ادهم : ليش ؟

سيلين : لان بعد العتب الجارح تنلغي كل صلات القرابه وراح نخلق فجوه ومن ثم حواجز بينه اكثر من هاي الحواجز..

معجبه كلامي بس سكت..

سيلين : يطلب مني شغلات ما اكدر احجيها الك بس دمرني بيها نفسيآ بعدها رجعنه لبغداد للبيت المأجره وهنا لعب لعبته القذره خصصلي غرفتين بهذا البيت وحده بيضه وبيها عازل للصوت ويخليني بيها اربعه وعشرين ساعه يعني يوم كامل، بحيث اريد افقد اعصابي اكوم ما احس ولا اسمع اي شي غير نفسي الاتنفسه ثاني يوديني للغرفه الثانيه ويعلك موسيقى صاخبه ويعلي السماعات وتتكرر نفس الاغنيه لحد ما اعيط ويغمى عليه ، عدا الابر اليضربني بيها وانام ومن اكعد حتى رجله ابوسها علمود ينطيني جرعه ثانيه الى ان جبرني اعترف اني عندي علاقه حب وياك وكل الوصلك حقيقي عاد طلكني شفهيآ وبعدين طلكني محكمه حضرت وياه يوم واحد وخلص كلشي جنت ما اكدر امشي لهذا اخذني بالعربانه..

ادهم : مشافو شكلج محد سألج شبيج ..

سيلين : القاضي سأله كله مرض موزين وهيه تريد تتطلك سألني اذا كلامه صحيح او احد جابرني كتله لا كلامه صحيح واني اريد انفصل لان هو يريد يسافر عاد طلكني من بعد ما استفسر مني اذا مجبوره او غاصبني.

ادهم : ماعرف شنو احجي ماعرف عبالك عايشين بغابه كابوس لو مو انتي حقيقيه كدامي وشفت بعيني الصارلج جان كلت كذب ماكو هيج شي.

سيلين : للأسف مو كذب بعدها نهاني بشكل تام لا اتذكر ولا اعرف احد واصلا حتى هو كمت ما اعرفه وبس انام واذا كعدت ماعرف اني وين وشنو اسوي وصارتلي شغلات مقرفه ما احب اذكرها .

ادهم : تتذكرين المده التعذبتي بيها شكد

سيلين : انت احسب من بعد الامتحانات.

ادهم : اي صح.

سيلين : بس اكتشفت شغله بسامر.

ادهم : وهي؟

سيلين : يغار منك ومن نجاحك.

ادهم : شلون ؟

سيلين : هواي جان يحجي عليك كدامي ويحاول يقلل من شأنك وقيمتك عبالي بسبب الادله العنده بس بعدين كمت اسمعه من يخابر جماعتك ويسقط بيك مهنيآ.

ضل ساكت بس ملامحه عصبيه وحيل ضايج ....

سيلين : بعد شنو تريد تعرف؟؟

ادهم : شعرف اكثر من هاي البلاوي الصارت وياج الله يساعدج ماعندي كلام يعبر ويوصف قهرتي ابد.

سيلين : الراح راح معلينه بيه.

ادهم : انه اول ما درست حالتج كلت لنرمان مستحيل سيلين تتذكر كلشي وراح تصير عدها ذاكره عكسيه بس الحمدلله كاعد تتذكر كلشي وطلع تشخيصي لحالتج من هاي الناحيه غلط..

سيلين : اني فعلا ذيج الايام المضت كلشي ما اتذكر غير شغلات قليله كلش ومرات من اعصر دماغي واريد اتذكر شغله اتعب.

ادهم : ماعرف شنو اكول غير الحمدلله على سلامتج.

سيلين : الله يسلمك...

من بعد هذا اليوم بلشنه بالعلاج النفسي علمود يمحي من داخلي الشخصيه السايكو حسب ما وصفها لنرمان..

تعب هواي ويايه واني كل يوم اشكره واثني على تعبه ..

سيلين : شكرا ياعمو بشنو اجازيك ماعرف..

ادهم : لتجازيني بشي غير تديرين بالج على صحتج وبس.

سيلين : الله يوفقك..

 جاوبني بأبتسامه..

وره كم يوم رحنه لمركز للعلاج النفسي وخضعت لعده فحوصات بيومها كلش تعبت من رجعنه اول ما وصلت للبيت مجرد ادهم فتح باب الهول وكعت بعد ماحسيت بشي..

نرمان

جنت كاعده بالهول ساعه وحده ونص الظهر وايمن بغرفته نايم توه راجع من الدوام تعبان انفتح باب الهول دخل ادهم ودخلت سيلين وجها مخطوف لونه اصفر استغربت شكلها لهناك وكعت تخربطت ادهم بحركه سريعه خله ايده جوه راسها وحضنه بيده حماها من الكاع لو ما هو جان راسها تأذه بالحديده مال باب وصارت بخبر كان حجه بوصت عالي ومرعوب...

ادهم : سيلينه لخاطر الله شبيج..

ركضت عليهم ماعرف شنو اسوي رحت كعدت ايمن اساسا هو فز من سمع صوت ادهم جان يريد يطلع من الغرفه واني اريد ادخل تلاكينه بالباب.

ايمن : شكو ؟

نرمان : سيلين تخربطت بيد ادهم .

ايمن : ياستار ياربي.

عافني وركض الهم رحت وراه لكيناه شايلها منيمها بمكانها..عفناهم وطلعنه من بعد ما كعدت سيلين وتطمنه عليها..

سيلين..

من فتحت عيني وشفت خوفه عليه وشلون متأذي حبيت اشكره بأي طريقه واقدمله اي شي يطلبه مني بس مجنت اتوقع هذا الطلب وبهيج سرعه..باوعتله وضحكت همست بتعب...

سيلين : اريد اردلك جميل من جمايلك عليه...

ادهم : سيلين هواي لحيتي تره كافي كتلج اي واحد بمكاني جان سوه السويته واكثر... 

سيلين : لا ميسوي السويته ابد لو امي هم متتحملني هيج وجان بزعت مني واني مصره اجازيك.. 

عكد حاجبه وباوعلي مضيق عينه همس وابتسامه مرسومه على وجها..

ادهم : يعني بشنو تجازيني مثلا.. 

حجاها وخله القلم وره اذنه رفع تك حاجب منتظر جوابي...

سيلين : اي شي ابالك كلي اسويه عاجبني اردلك الجميل صرت هواي تطلبني. 

ادهم : اي شي يعني اي شي متأكده.. 

سيلين : اي والله اي شي تريده وتطلبه اسويه حتى اذا ردت روحي انطياك .. 

سكت وصفن بوجهي بعدين همس..

ادهم : حتى اذا ردتج حبيبتي...

سيلين : شلون يعني مفهمت ؟

ادهم : تشاركيني رحلتي بالحياه وتصيرين زوجتي..

بهتت وفكيت حلكي ...

سيلين : انت من كل عقلك.. 

ادهم : اي من كل عقلي وكلبي هم..

الفصل الواحد والخمسون من هنا 

شكرا لزيارتكم عالم روايات سكيرهوم