رواية اغفري لي الفصل الثالث والخمسون بقلم أوتار حزينة
غاده
اني سمعته شحجه صحت
«،،ولييش يسلم روحه هوو ماقتله
«،،ولكم شلووون بلوه سوده وطاحت علينا
بيبي صاحت كعدت تضرب على رجلها جهاز
جعفر دك جاوب
«،،ها عم مهدي لا مابينا شي لاتجي
الوضع مو تمام ظل بيتك ولا احد يطلع وبلغ
عمي صالح وابويه وشوف
الولد وين خلي لايرجعون
منا الما تفض
هاي السالفه لا حمزه رااح يسلم روحه
مشيت من يمه رحت ادور على جهازي
سمعته دك جان على الجربايه
اخذته بسرعه من هو متصل
جاوبته بشهكه
«،،حمزه لاتجي لهنا راح يقتلوك
«،،،،انتي بيج شي علي
«««لااا مابينا شي انت لاتجي روح لاي
مكان ابعد حمزه رااح يقتلوك
ويحرگون گلبي
«،،ماراح اروح لاي مكان لان انه مو مسوي
شي ولاچاتل عزيز وطالع هسه
ورايح اسلم روحي
لاقرب مركز
«،،،لييش
صحت بي وكملت
«،،ليش تسلم رووحك ليش حمزه وانت
مو مسوي شي
««،لان اذا شردت راح اثبت التهمه عليه
بعد اكثر
كمت ابجي بصوت قوي كمل
«،،اذكري الله وادعي تفض على خير
«،،حمزه خايفه عليك
جاوبته بشهكه
«««لاتخافين الكاتبه الله اشوفه
ماردت الومه لان هدده كال
«،اروحن مهيب كاعد يتصل عليه
مهيب
اني بالدوام كاعد راسي يوجعني كلش
بالي مو يم الشغل يم ذيج
اي دمرتني وخلتني
لا ليلي ليل ولا
نهاري نهار
جهازي دك جان جعفر جاوبت
«،،هلا جعفر
«،،،مهيب الحك حمزه ولك راح يروح من ايدينا
فزيت وصحت
«،،،،شنوو ولك شصاير
«،،مصيبه وطاحت علينا ولك انتهم بچتله
واحد من الربع الي يمنا جان مچاتل ويا
وهددده بالقتل
«،،هووو وينه
«،،راح يسلم نفسه
«،،بيا مركز
«،،مااعرف مهيب مااعرف
«،«رووح اني هسه اخابره
سديت الخط اتصلت علي جاوب
صحت
«««انت وين
«،،،،رايح للمركز حتى اسلم روحي
«،،،يامركز
انطاني العنوان سالت
«،،حمزه انت تعرف المقتول
«،،اي
حجالي المشكله الصارت بينهم وشلون
هدده بالقتل وكال اني
مو قاتله
«،،لاتحجي شي الما اجي
«««تمام
سديت الخط سلمت مكاني لولد وطلعت علي
وصلت جانو يحققون ويا
ظليت واكف بره
هسه مااكدر اسويله شي لان المنطقه مو
من ضمن صلاحيتي وما اكدر ادخل
بيها
وره مشوار طلع الكلبجه بايده ولازمي
اثنين عرفت لان هدد راح
يحجزوا احتياطي
«،،فد لحظه
حجيت وي الحرس وطبيت على ضابط
التحقيق شاف الرتبه كام اخذلي تحيه
عرفت على نفسي
كال
«،،تفضل سيدي
كعدت سالته
«،،حمزه علي هادي يصير ابن خالتي
ممكن تفرج عنه واني اضمن الكم مايروح
لاي مكان
«،،انت تعرف هالشي مااكدر اسوي ولازم ناخذ
الاجرائات القانونيه بحقه
جاوبني وكمل
«،المتهم علي بلاغ بقتل شخص لكوه بالبستان
الي يرجع اله وجان متعارك ويا ومهدده
بالقتل وعلي شهود هوايه
«،،هو مستحيل يسوي هالشي
«،،التحقيق راح يثبت اذا هو بريئ او لاا
جنت اعرف هالاجرائات وماكدرت اسويله
شي
ترخصت وطلعت رحت علي كلت
««حمزه انت هسه راح تنحبس احتياطي من يرجعون يحققون مره ثانيه وياك ظل على نفس
كلامك واني هسه راح اشوفلك احسن محامي
حتى يستلم قضيتك
«،،مهيب روح لاهلي ذوله بيت متعب دكوهم
وخايف لايرجعون عليهم ويأذوهم
««،،لاتخاف اجتي دوريات ووكفو حمايه الهم
«،،طلعوهم مناك لاتخلوهم بالبيت
منا الما تفض
«،،سيدي لازم ناخذه
المتسب حجه جاوبته
«،،تمام
كال
«،،مهيب خلي ام علي تروح لاهلها واخذ
حبوبه وجدي يمك
«،،،،اي حمزه
اخذو من يمي،، طلعت بسرعه ورحت
على بيتهم وصلت جانت كم دوريه
واكفه حمايه الهم
نزلت اجه ضابط شاف الرتبه اخذلي
تحيه سالت
«،،احد تعرض الهم مره الخ
«،،لا سيدي
«،،ظلوا هنا لاتعوفون المكان منا الما اطلع اهله
«،،تمام سيدي
جعفر طلع رحت علي كتله
بسرعه طلع اهل حمزة والحجي والحجيه
وخلي ناخذهم منا
«،،حمزه وينه
«،،سلم روحه
«،،هو ماجتله
«،،اعرف جعفر هسه تحرك بسرعه خلي ناخذ
ام علي لاهلها والاهل يجون يمي
«،،تمام
غاده
كلشي صار بلحظه سمعت ذاك انقتل واهله
تهموا حمزه بي واجوي ضربونا من سمعت هو راح سلم روحه
روحي فرفحت عليه وعيوني مابطلت بجي
اروح واجي ماثبتت بمكان اشوف
بيبي تبجي وتدعي
اله وصارت فد مرة هي وجدو
الدنيا انگلبت يمنا والشرطه اجت طوقت بيتنا
والبستان لا نكدر نطلع ولا اي
احد كدر يجينا
وره كم ساعه مهيب اجه وعرفنا منا حمزه اعتقلوا
وخلوه بالسجن تهسترت
وكمت اصيح
«،،شلوون يخلو بالسجن وهوو مامسوي شي
«،،هاي اجرائات ولازم تصير وهسه لازم
تطلعون من البيت وماظلون
بي
«،،انه مااطلع من بيتي والي يريد يصير خل يصير
جدو رد بيبي هم كالت
««اي انه هم مااروحن منا ظاله بمچاني منا
الما يجي وليدي
حجت هالكلام وكامت تبجي بقوه
مهيب رد
«،،حجي الوضع خطير وذوله ماراح يعوفكم
بحالكم الشغله بيها قتل وانت
تعرف هسه العقل غاب
والسلاح صار
يحجي بداله
«،،شيريدون يسون خلي يسون خلي يجتلوني
بمجان حمزه
رد علي القهر تارس ملامحه حجه وياي
«،«ام علي كومي وياي حمزه كال اخذها لاهلها
«،،اني مااطلع منا هذا بيتي وذوله اهلي
جاوبت بدموع
««،يبنت الناس حمزة كال لاتخليها هينه
«،،مهيب مااروح كتلك هذا بيتي وذوله
اهلي الي يصير عليهم يصير عليه وروحي
مو اغلى من روحه
حجيت وانهاريت بالبجي كمت وطلعت من
يمهم اشهك بصوت قوي رحت لغرفتي
كعدت هناك حالي حال
ابني يمي نايم مااعرف شراح يصير بحمزة
وبينا اهلي سمعوا وماما خابرتني
جنت متخبله ونزلت ذيج
النزله على معاذ وزهره
لان هم سبب دماره
بيت متعب من سمعوا حمزه سلم روحه بعد
ماتعرضوا النا جدو راد يكعد وياهم
ماقبلوا وخلوها بأيد الدوله
بابا وماما ومريم اجوي عليه ورادوني
اروح وياهم ماقبلت ورفضت اعوف بيتي
وهم ذبيت اللوم براس اخويه وهاي الي ماغزر بيها زين حمزه
وره كم يوم اني كاعده بغرفتي وحدي
ابجي بخنگه جهازي دك شفته
رقم غريب گلبي
كال هذا هو
بسرعه فتحت الخط كلت
«،،،،حمزه
«،،،شلونج يبعد حمزه
شهكت بالبجي وجاوبته
«،،اني مو زينة
«،،ولا اني فراكج انتي وعلي تعب گلبي
سأل
«،،شلون جدي وحبوبه
«،،تعبانين من وراك
سكت بعدين رد
«،،ديربالج عليهم لان شغلتي راح اطول
تمالكت نفسي بصعوبه من حسيت صوته تعبان ومخنوك وقويت روحي واني اريده
هو يقويني كلت
«،،،انت ماراح تظل هناك راح تطلع
وترجع لبيتك وحظني
اختنكت باخر كلمه رد
««ان شاء الله غاده لان انه ماجتلته لعزيز
«««اي وهسه يلزمون القاتله ويعوفك لان انت
ماسويت هالشي
«،،والله ماسويتها لان مو طبعي الغدر وهو
عرفت بي مضروب بحديده
براسه من ورة
«،،،اعرف والله اعرف انت مو هيج
سكت بعدين كال
«،،غاده ديربالج على روحج انتي وعلي
وشتريدين جعفر يمج انه
وصيته عليكم
«،،مااريد اي شي اريدك انت تجي يمي
والله تعبت وراح اموت
من فراكك
«««ولج گويني تره ردت اسمع صوتج حتى
مااظلن الوب من قهري وقهر
فراكج
سكتت كمل
««انه لازم اروح وادعيلي غاده وخلي حبوبه تدعي اليه هي وجدي
«،،ليش حمزه تروح ظل
«،مااكدر الولد سوه فضل عليه لان مهيب
وصاه وخلاني اتصل
كمت ابجي كال
«««لاتبجين تحرگيني بعد اكثر
«،،يله حمزه
سمعت صوت رجال رد علي
«،،،اي
حجه وياي
«،،،،انه رايح
«،،،ودعتك بأيد الله
سكت بعدين رد
«««وانه هم ودعتج بأيد الله انتي وعلي
«،،الله وياك ياگلبي
سد الخط خليت الجهازي بحظني وكمت
اشهك بالبجي
جان كل اسبوع يتصل مره احجي ويا
اني وحبوبه وجدو وعمه رقيه
الي اجت وظلت يمنا من وره وضعي
لان كمت مااكدر وصرت فد مره وهم من وره
رانيه لان قربت ولادتها
ويوم جر يوم والايام
وقضيته صارت طويله جنت يوميا
اكول باجر راح يطلع بس لان هو هدده بالقتل وكدام هوايه ناس ولكوه
بالبستان مالته شغلته صارت
صعبه
جان بس جعفر يركض اله وويا عمو مهدي
وموسى عمامه الباقين وولدهم سحبو روحهم من عدنا وذبو الملامه براسه لان هدد وهو تعارك ويا من وره قاسم
سمعت هالكلام اكثر من مره وسكتت
بس اخر مره بليل من سمعت
عمه صالح كال
«،،،الصوج منه شكو هدده
طبيت وجاوبته
«،،لاا الصوج مو منه من قااسم
اشرت علي وكملت بغضب
«،،،،الصوج منك انت الي رحت تعاركت
وخليته يهدد عزيز
«،،وانه كتله روح اچتله
رد عليه جدو صاح بي
«،،سد حلكك ولك شتريد انت تثبت علي
هالتهمه
«،،حمزه ماااقتله كول انت الي سويتها
وذبيتها براسه
صحت بي فز يخزر بيه ابوه رد
«،،،ولج شتريدين تبلين ابني بهل السالفه
«،،مو جاااي يبلي رجلي سمعتني اليه وماسمعت اله
قاسم هد عليه جعفر وكف بوجهه هو
وعمو مهدي وموسى كام
يصيج
«،،وولج اكص لسانج اذا بعد صيحتي على
ابويه
«،،ام علي روحي منا
جدو حجه جاوبته بدموع
«،،جدو حمزه راااح يروح من ايدينا
نزل راسه وصار دم كملت اخزر بقاسم
«،گله منك انت وحسبي الله ونعم الوكيل عليك
«،،سمعتها بويه تدعي على ابني
فاضل حجه مشيت من يمهم ابجي بصوت
قوي عشت ايام سوده وفراگه
تعبني وكام مايتصل
عرفن من مهيب
الولد الي جان يساعده نقلوه لغير
مركز
جان هذا الاتصال مصبرني وصوته ينطيني
القوه حتى اظل واكفه على رجليه وهالشي
تعبني وصرت فد مره لا كمت اكدر انام ولا اشتهي
اخلي لگمه بحلگي اخر شي
تخربطت
عمه رقيه وجعفر اخذوني للدكتوره وتأكدت
من روحي اني حامل
رجعت ابجي وهي وياي ومن سمعت
بيبي كالت بدموع وقهر
«،،،وينك يبعد عيوني حتى تسمع
هالخبر واشوف الفرحه بوجهك
مشيت من يمها دمعتي،على خدي اسمع
جدو يوصيهم عليه ويدعي
بالفرج لحمزه
ويوم وره يوم اني اطفى وصرت جسد بلا روح يوميا بليل ااحاجي واعتب علي لان
اخذته الغيره على
بشر مايسوه
جعفر راح علي هو وعمو مهدي كالو اله
اني حامل بنفس اليوم بليل اجاني اتصال
من رقم غريب بسرعه فتحته
وحجيت بلهفه
«،،،حمزه
«،،ردت الروح اليه من سمعت صوتج
دموعي نزلت كلت
«،،واني روحي يمك شوكت ترجعها
«،،اوف يابويه ولج الفراك شجاي يسوي بيه
سكت حسيته اختنك حجه
««اجاني الخبر ونساني همي والمكان الي انه
بي
«،،ويوما تطلع وافرح بيك الفرحه
الجبيره
جاوبته بخنكه دموعي على خدي
«««ديربالج على نفسج ولاتظلين تقهرين
بروحج صاروا بركبتج اثنين وانه اعرفج
من تشيلين تتعبين ويهبط ضغطج
«،،عوفك مني انت شلونك اكلك شلونه صحتك
زينة
«،،انه مابيه شي
حجه وكمل
«،،غاده لازم اروح والله انطيت فلوس يله
خلوني اتصل عليج
«،يعني شنو بعد مااسمع صوتك
«،،،مااعرف حسب الوضع يله بويه اروحن
الزلمه ياشر
«،،ودعتك بأيد الله
«،،ودعتكم كلكم بأيد الله
حجه هيج وسد الخط وهاي اخر مره
سمعت صوته ردت اروح اشوفه بس هو جان
مايقبل اجي علي والاخبار الي جنا نسمعها
ماطمن وحسيت بي راح يروح من
ايدي
كمنا ننطي فلوس حتى بس نسهل قضيته
اسحب من الخزنه وانطي لجعفر
وماكو فايده
اخر شي المحامي كال اكعدو وي اهل عزيز
وفضوها بفلوس لان التهمه
لابسته
جدو دز ناس كبار عليهم راد يفضها بفلوس بس ماقبلو هم كالوا القانون ياخذ حق ابنهم
رانيه بهل الفتره جابت ولد سمته حسين مرت
اشهر هو بالسجن عرفت بروحي بيه ولد
ومن صرت بالسابع صعد محكمه بذاك اليوم ماخلوني اروح هو ماقبل اجي علي عمامه راحوا علي وولدهم وجدو وياهم اني اروح واجي بالصاله ماما يمي تدعي اله هي وبيبي وخاله نعمه وعمه رقيه ورانيه ليلى كل مشوار
تتصل
«،،راح يطلع اي هو ماقتله
اردد وي روحي واقنع نفسي هو هسه راح
يطب عليه واكحل عيوني بشوفته
مرت ساعه اتصلت على
جعفر مارد كلت
«،،،مايجاوب
«،،،بعد يمه تاخذ وقت المحكمه
خاله نعمه جاوبت ماما كالت
«،،ولج تعالي اكعدي وجهج صار كركم
هسه تتخربطين علينا
«،،ماما راح يطلع موو
حجيت بتوسل وكمت ابجي اجت
ليمي لزمتني من ايدي وردت
بعيون مغوركه
«،،اي غاده بأذن الله راح يطلع
«،،يارب اريده منك طلع اليه وليدي واحفظه
من كل شر
بيبي دعت اله كلنا امين
بس هو ماطلع لان وره ساعه الخ رانيه
اتصلت على جعفر من رد رحت
عليها بسرعه
««ها جعفر بشر شصار على حمزه
فكت عيونها وصرخت
«،،،،لاااا
«،،،ولج شنو شصاار
بيبي عاطت اني اخذت الجهاز بسرعه
حجيت
««،جعفر شصاار حمزه وينه ماراح يجي
وياكم
سمعته كام يبجي صحت بي
««،جعفرر ااحجي گلي شصار علي
«،،ولج انحكم 15سنه
اني سمعت شحجه روحي راحت ومااشوف
غير واكعه من طولي وفاقده
الوعي
حمزه
شفت نتيجه تسرعي شسوت بيه انذبيت
بالسجن من وره كلام كلته بحال
غضب ومافكرت شراح
يصير بعدين
والصار عزيز انقتل واني لبست هالتهمه لان
جنت مهدده بالقتل وسمعوني هواي
اوادم وصاروا عليه شهود
بس جان عندي امل الشرطه راح تعرف منو القاتل
الحقيقي وتگضه بس الايام مشت وصارت
طويل وهالشي ماصار
وانه الي دفعت ثمن هالشي كاعد
بالسجن وصافن بالي كله يم غاده واهلي
و لان اخبارها جاي توصلني من جعفر
وعرفت هي مو بخير وانه
هم جنت نفس حالها
هي وولدي وجدي وحبوبه
الي جانو كاسرين ظهري وافكر
بيهم ادعي من الله من اصعد محكمه
اطلع برائه بس جنت اعرف
هالشي مستحيل
لان شغلتي صعبه كلش وصعدت محكمه
واكف اسمع المرافعه وادعي الله وانخي ال
البيت يطلعوني من هالشده
بس ماطلعت واكلت صدمه عمري من انحكمت 15سنه وانه لا ذنب ولا صوج صحت
ااانه ماجتلته ولكم والله اانه بريئ
انهاريت وشفت جدي ووكع عمي مهدي كام يبجي
ويا جعفر وموسى بس عمامي
الباقين وولدهم ما
شفت دمعه
بعيونهم
عرفت بذيج اللحظه انه ضيعت روحي من
وره بشر مايسوه وكلام غاده
جان صح
تخبلت وكمت اصيح
«،،،ولكم اانه بريئ والله ماسويتله شي
ماظل عقل براسي وفقدت انفض بروحي
اصيح
«،،اانه بريئ ولكم ماااجتلت عزيز
الشرطه التمت عليه وكضوني بقوه اخذوني
للسجن خلوني بي اصيح
بجنون واضرب
بالباب
«،،ولكم طلعوووني اانه ماجتلته ولكم
اانه بريئ ياربي ليش هيج
بس بعد كلشي مايفيد انحكمت وانرفض
الاستئناف وحولني على سجن الرصافه
وعرفت اهل عزيز هدروا دمي
يعني من اطلع من
السجن ياخذون حگ ابنهم مني
بلحظه تسرع كلشي ضاع مني عمري وغاده
وولدي والموت راح ينتظرني بس
اطلع من السجن
طبيت غرفه بيها اكثر من واحد ناس ممده
وناس تسوي اكل شفت مكان يم زوايه
رحت كعدت صافن على حالي ومقهور
وصاير دم العيون صارت عليه غمضت مااريد اشوف احد شفتها الها تلوم بيه
وتبجي رددت بقهر
«،،ولج اخ انكسر ظهري وكسرتج وياي من
مافكرت بيج انتي وعلي وهذا
الي جاي بالطريق ضعت وضيعتج من ايدي وانه السبب
غاده
من وره الخبر الي سمعته
فقدت الوعي وصارت عندي ولاده
مبكره
ابر وادويه واخرو ولادتي واكثر من مره اتخربط
وينقلوني للمستشفى، بس لا علاج يطيب هالكسره
ولا دوة يشيل الوجع من داخلي
صار عدنا عزه بلا ميت اني ادهورت صحتي
وجدو جابوا من يمه صاير فد مره
وضغطه كام يصعد ويتخربط
هوايه
الخبر اخذ عافيتنا كلنا واخذ صحتي وضحكتي ونور عيوني وابو بيتي ابجي اتعب اسكت
وارجع هم للبجي
كلها يمي بس اني جنت اريده اله اريد
اشوفه صارلي اشهر مو شايفته
اتوسل بيهم يودوني علي يكلون حالف مااروح
علي وهو بالسجن ومايكدرون يكسرون
حلفانه وكلامه
ماما يمي بالغرفه مالتي
كالت
«،،ولج ماما كافي تبجين مو زين على الي
بطنج
«،«ماما حمزه راح من ايدي
كامت تبجي ردت
«،،شاحجي والله مو مصدكه لحد هسه الصار
««،شلون ماما اني اريد اشوفه اريد اروح
علي
«،«وين تروحين غاده وانتي هذا وضعج
««،ااريد اشوفه والله گلبي صاير نار علي
ومشتاكه اله
شهكت بصوت قوي
لويه صارت بطني قويه رجعت ليوره اون
«،،ولج شبيج
«،،بطني توجعني
فزت من يمي طلعت بعدين رجعت وياها
بيبي وعمه رقيه سالت
بخوف
«،«شبيج يمه
«،،عمه اريد اشوفه ولكم ودوني علي والله
تعبت من فراكه وراح اموت
بحسره شوفته
حجيت هيج وكمت الوب من الوجع
«،،انطيها الدوه بسرعه
انطوني حبايه وهاي من اشربها انصطر
وانام وجنت اشوفه بالحلم
بس هو صار بعيد
مثله
مهيب
رگضت بقضيه حمزه وطلبت اكثر من مره اعاده
التحقيق ومشيت اني بيها بس ماكدرت
اسويله شي التهمه لبسته
وانضربت براسي
من من صدر
الحكم وانحكم 15سنه انگلب عزه
بيتنا كاعد بيت اهلي
امي تبجي
وتصيح
«،،ولك شلوون صار هالشي شلون مهيب
«««صارت بعد والقاضي حگمه بهل الحكم
ابويه يروح ويجي يردد
«،،يعني شنو الولد ضاع ولك هااي 15 سنه
مو شويه
«،،،ولك يمه سويله شي ابن خالتك بريئ
والله ماقتله لهذا ابن متعب
«،،ليش مااعرف يايمه مااعرفه هو مو طبعه
الغدر بس اخ منه هدد واكو شهود
علي وجثيرين وشهدو علي
هو هدد الولد وهاي
شوفي لبسته
وراح بيها
«،،،اويلي عليك يمه ولج رضيه اكعدي وشوفي
الغالي شصار بي
امي انهارت وكامت تضرب على رجلها
بقوه كمت رحت يمها گضبتها
ابويه كال
«،«اذكري الله حجيه وادعيله بالفرج
كامت وراحت طلعت بره وكغت يمها
ابويه وياي فتحت زيجها
وذبت الفوطه من راسها
تاشر بيها لفوك
صاحت
«،،،،يالله ياسامع الدعاء يامجيب المضطر اذا دعى
اسالك بنور وجهك وجاه نبيك واهل بيت
الاطهار تخلص حمزه من هالشده
ياربي وليدي يتيم ااوكفله
افتح الباب يبو
خيمه الزركه
وفكه من هالضيجه
حجت هيج وانهارت بالبجي
«،،كافي يمه راح يصير بيج شي
«،،،ولك يمه شلون بقهره وقهر هاي مرته الي
راح تجيب وهو بالسجن
سكتت هي ظلت تنوح وتبجي علي
وما نشفت الها دمعه
نسيت روحي وهمي والصار بيه وكمت
اشتغل على قضيته بنفسي بديت اروح واسال بالمنطقه اشوف اذا احد شاف شي
بذيج الليله ورحت لبستانه ادور اي شي يساعدني اگضب خيط يوصلني لدليل يبرئ من هالتهمه
بس مالگيت شي وقضيته عبالك صارت
قفل بس المفتاح شوكت الگي
مااعرف
يمامه
ظليت ايام مريضه ودمعتي بعيوني افكر
بمهيب وشصار بي بعد الي
سمعه والف مرة ردت
اتصل عليه
احجيله قصتي بس اتراجع باخر لحظه لان
اعرفه بس راح يعرف ماراح
يجوز مني
راح يدك رجل وياخذني اذا مو رضى غصب
لان جنت اعرف هو شكد يحبني وميت
عليه
جنت اتمنى هالشي لان اني هم احبه واموت
علي بس الفرق الي بينا جان هو
الي مخليني مااخطو هاي
الخطوه
كلام الناس ماراح يرحمه ولا كلام اهله
واعرف بروحي بس اسمع كلمه من اي احد راح
اكوم اموت واقهر بروحي واقهره
الايام مشت ثكيله عليه وشفت روحي مو مرتاحه
بهذا البيت لان كلهم شباب اذا اطلع يظلون
بس يباوعون عليه وكم واحد ذب
كلمه وهالشي ضوجني وخلاني
ااخاف من وجودي وياهم
وهم خفت على اخويه
لايروح يتعارك
من ورايه ويصير بي شي
كلت ماكو غير نشوف بيت نأجره ونطلع منا
اني عفت كلشي ورايه فلوسي مال الفصل
ظلت يم الحجيه لان ضميتهن يمها والحلقه
ظلت هي وجهازي وغراضي
كلها يم خاله ام ياسين
جان عندي بس السوار والكلاده الي من عنده
عرفت من اخويه هو جامع فلوس
بس قليله سأل
«،،شتريدين تسوين بالفلوس
«،،اريدك تشوفلنا بيت صغير كلش وايجاره
قليل حتى نأجره ونكعد بي
اني وانت
تردد وبعدين كال
«،،وشلون وي الايجار يعني اني هنا ادفع
شي قليل لان وياي الولد
يدفعون
ذبيت سواري وكتله
«،«هاك بيع هذا واجر بيت صغير
كلش لا جبير واني اشوفلي
شغله واساعدك بالعيشه
«،،هذا ذهب
«،،اي
صفن عليه كلت
«،هذا هديه من ابوه وامه
باوع للكلاده سال
«،،هاي هم ذهب
هزيت راسي بقهر ترددت بعدين كتله
«،،هاي منه لان انقذته من الموت اكثر من مره
سكت واني عيوني غوركت ماجنت اريد ابيعها
لان من ريحته كلت
«،«باقرب وقت شوف البيت حتى
ناخذ راحتنا بي
«،اي يمامه بس شكد ادفع ايجار
«،احنا راح نطول هنا وبعد مالنا رجعه
لبغداد ادفع فلوس السوار كله ايجار شوف
كم شهر وانطيهم كلهن
«،،،،تمام
«،«منتضر تره هذا ثگيل كلش وتكمه لاتخليهم يغلبوك بالسعر
«،،راح اخذ دلير وياي هو يعرف بالذهب
وهذا الصار اجرنا بيت كلش صغير ودفعنا
ايجار مال اربع اشهر والحمد لله اخذنا
ماثث اثاث بسيط
اشترينا كم حاجه وكعدنا بي اني واخويه
والايام مشت والحزن جان
بالگلب من وره
فراك مهيب
بهل الاشهر كمت اسوي معجنات كيك فطائر
كب كيك وابيعهن بيج سوه منتضر
اليه بعد مااخذت جهاز
قديم وامورنا مشت
والحمد لله
كل ليله من اتمدد اروح لصفحته بالفيس
والانستا ادور اخباره بس هو جان ماينشر شي
اخر نشر قبل لايصير الصار
اباوع لصوره وضحگته واشوفه بذاك اليوم
شلون تدمر من الي سمعه والعيون
غورگت
اكتم قهري وشهگتي بگلبي واحجي ويا
بداخلي مااريد اخويه يسمع
الي اني بي
«،،اعرف بروحي اذيتك اعرف والله
جرحتك جرح جبير وجنت مااريد هالشي
بس گلبي حبك وانت الي خليتني
احبك
«،واعرف لا انت راح اطيب من هالجرح ولا اني
راح اطيب من حبك ولا راح اكدر
بعد احب واحد غيرك لان
انت صرت اليه اول
واخر حب
غاده
همي وقهري زادو مانقصوا لان وره الحكم مالته
باسبوع سمعت صياح جعفر وعرفت قاسم وعباس واخوته اخذوا محلات حمزه مال الماطورات بالقوه
وكعدو بيها وهو ماكدرلهم
جدو دز على ولده اجوي وصارت عركه جبيره
اسمع عمو مهدي يصيح
«،،،تخبلتو انتو شلون تخلون ولدكم ياخذون
محلات حمزه بالقوه
«،،مااخذوهن هم كعدو بيهن يديرون مصلحته
منا الما يطلع من السجن
جعفر صاح
«،،موو انه كاعد بيهن ووياي موسى وعلي
بعد شكو يجون علينا ويعاركون
بينا لا وفوكاها يطردونا
من عدهن
كمت من فراشي طلعت لازمه ظهري شفت
عمه رقيه تروح وتجي بالصاله رانيه يمها
شافني اجني عليه بسرعه عمه
كالت
«،،،ليش كمتي يمه
مادرت بال رحت طبيت للمجلس العصابه
كلها كاعده عمامه وولدهم تجاهلتهم
وحجيت
«،،جعفر انت المسؤول عن كل املاك حمزه
لان هو راد هالشي ووصى بي
والي طب بالغصب للمحلات
خليطلع منهن
«،،لا بله وهاي بأمر منو
عباس حجه باستهزاء خزرته وجاوبت
«،،بامره هوو
«،،،وهو ماكو طب السجن ومايطلع الا
وره 15سنه
قاسم حجه جاوبته بغضب
«،،اي وگره عينك ،،،هو السجن الك بس
راح بيها لان وكفلك بذاك اليوم الاسود
خزرني ابوه حجه بنتره
،،روحي جوه اانتي مالج شغل بهل السوالف
«،،مو بكيفك ادكلي طبي جوة لان هذا بيتي
وانت كاعد بي
فز هو وولده وياهم فاضل ابو جعفر
واخوته صاح
«،سمعت بويه
«،،،غاده امشي وياي
عمه جرتني من ايدي بيبي ردت
«،،ماحجت الا الحگ هذا بيت حمزه وبيتها
«،،هيج الحجي يمه
«،اي هيج الحجي والمحلات تطلعون منها
وتسلموها لجعفر ومهدي
جدو رد بتعب وكمل بقهر
««بعده الحيد طيب وتريدون تفرهدون خيره
«،«ااحنا خااايفين على فلوسه
صالح صاح بي جدو كام لحيله يسند
على العكاز كله
«،،صوتك جاي يعلى عليه وولدك هم
جاي اشوفهم صايرين مثلك
سكت بي الخلق جانت مگلوبه ويخزرون
بيه كمل وياهم
«،،اسمعو كلكم وانت يامهدي وياك امك
ورقيه هالبيت من زمان هو بأسم
حمزه والبستان ويا
«،،،،واحنا مو راضين هو ياخذ هالبستان
صالح رد عمو مهدي ساله
«،،،ليش بله
«،،لان هذاا البستان هو والبيت
اكبر من كل الي عدنا وهم خيره اكثر
من كل بساتينا
فاضل كمل
«،اي صح ليش ابن علي ياخذ الشي الزين
واحنا ناخذ بساتين بور
بيبي ردت علي
«،،ااي وكع الذيب وكثرت الوايايه وكمتو
تريدون تنهشون خيره وهو بعده طيب
«،،،يمه ااحجي الحگ تره وراج موت
«،،ااانجب ولك
جدو صاح بفاضل هي ردت علي
القهر تارس ملامحها
«،،چا مو انت وراك موت ماتخاف الله انت
وهذا صويلح لا يروح يسالكم شلون
ردتوا تاكلون مال اليتيم
سكت جدو حجه
«،،،ولكم ماغزر بيكم زينه
الكلام ماعجبهم كمل
«،،ماغزرت الفلوس ووكفاته الكم ماغزر ياصويلح
من هد وفك ابنك من بيت متعب
«،،محد گله تعال وافزع اليه
قاسم رد بنتره جدو كله
«،،فزع لان عنده غيره براسه لجن انتو ماكو
غيره براسكم واگولها جدامكم
كلكم
سكت اشر بعصاه عليهم وكمل
«،،لو رايحين انتو كلكم ولا هو
«،،هيج الحجي بويه
صالح حجه رد
«،،ااي هيج الحجي يبن حرمتك
نغزه وخله وجهه يصير دم كلت
«،والله عيب عليكم تسون بي هيج وانتو
تعرفون شسوه الكم
«،«جااي تعيرنا ولج
صالح صاح بيه نترت
««اااي جاااي اعيركم لان تريدون تاكلون
حگه وحگ ولدي
عباس صاح بيه
«،انجبي ولج ولاتعلين صوتج على ابويه
«،ااحترم روحك ولك
عمو مهدي صاح بي جعفر خزره وكله
«،ولك تمنيت هو واكف جان عرف شلون يردك
عباس مارد طلع وكلهم طلعو وراه ثاني يوم الصبح
برنو ام عباس اجت هي وحسنه ام جعفر هدن
عليه وعلى بيبي من وره
سالفه البارحه
وكامن يغلطن عليه ويفشرن لان عيرتهم بزين
حمزه ولو ما هي وعمه رقيه الجانت
يمنا هي ورانيه جان گتلني
جعفر طب من شاف امه شلون تغلط عليه تخبل وتصايح وياها بيبي وجدو طردوهن طلعن يدعن عليه بالموت اني وولدي
جدو بهل الفتره تعب كلش وجنت اسمعه يبجي علي هو وبيبي وكام ماياگل ولا يكدر يتحرك نام بالفراش واكثر من مره وصه عليه اني
وولدي
المشاكل زادت وذولاك ماعافوا محلات حمزه جلبوا بيها وصارت اكثر من مشكله
بينهم
اخر شي تلازمو والي قهرني هم اخوه جعفر
وكفو وي قاسم وعباس ومدوا
ايدهم علي
اجه ليمنا صاير نار وشاك دشادشته من
قهره كعد يبجي ويتحسر
على حمزه
ثاني يوم الصبح اني بغرفتي سمعت عيطه
بيبي گلبي هبط وكلت جدو مات
وصدك راح الي جنت
اسند علي من بعد الله
وحمزه
وانصب عزاه بالبيت طلعت قهر بصراخ وبجي
علي وعلى حمزه الي اعرفهزبس راح يسمع راح يتخبلزويگتله القهر
وره ايام جعفر وعمو مهدي راحو علي بلغوا
بالخبر اجوي من يمه صايرين فد
مره لان هو تخبل وفقد
وكام يصيح ويبجي
بجيت علي دم لان اعرفه شلون متعلق بي ويحبه
كلش ماجان جده لا ابوه الي
رباه وعوض عن عمي
الي مات وخلاه
وراه
وره ايام صارت عندي ولاده جعفر
اخذني ويا عمه رقيه اردد وابجي
«،،،جيبولي حمزه اريده يمي جعفر روح
جيبه مااريد اولد وهو مو ماكو
جان مابيه حيل اجيب ابني تعبانه وقهره
اخذ عافيتي وتعسرت بالولاده وشفت
الموت بعيوني
بس الله لطف بيه وجبت عمار لان هو كال
من يجي للدنيا سمي هالاسم
وهم نزفت بي وخلو
اليه دم
حمزه
العيون بالسجن لازم ماتغفى لان الغدر ماتعرفه منين يجيك من وره ناس اشكال الوان
الي يشرب مخدرات والي يكبسل والقاتل وغيرهم
وانه جانت عيوني ماتنام من وره
القهر الي ترس صدري افكر بيها للي عفتها
ورايه وبركبتها ابني وحامل بالخ
شحالها هسه وانه اعرف
هي ماتگدر على
فراكي ولا انه اكدر
اشتاگيت الها كلش والشوگ ذبحني وجنت
اريدن اشوفها لجن مااكدر اخليها تجي
اعرف بس راح تشوفني
بهل الوضع راح
تتعب كلش
ويجوز يصير بيها شي
ويوم يجر يوم وشهر وره شهر وانه كمت ايأس
من قضيتي وكلت هاهي انحكم علي
اذا مااموت بالسجن راح
اموتن من اطلع على
ايد بيت متعب
كمت اسال نفسي هي شنو ذنبها بهذا كله
وليش يضيع عمرها وي واحد
انكتب علي الموت
من الاول انه ظلمتها من اخذتها بعار ذيج
ومااريدن اظلمها وياي مره ثانيه
واخليها تتنضر واحد
ميت
جنت من افكر اهدها اكوم اموتن روحي تلوب
واختنك بعد اكثر لان اعرف روحي
معلكه بروحها وماكو واحد
يعوف روحه
انه كاعد الجگاره بأيدي ماوكعت ابد منها
ابو هاجر اجه وخله جاي گبالي
تعرفت علي وارتاحيت اله
جنت اسمعه ينشد
قصايد حسينيه
بصوت حزين
اسمعه والعبره تخنگني واذكر
مصاب ال بيت رسول
اريد اهون عليه مصيبتي ماكدرت
لان راح يضيع من عمري 15سنه وانه بريئ
وانهديت بعد اكثر من سمعت جدي
مات فقدت وكمت اصيح
اانه السبب قهرته وقهري چتله
رجعوني للغرفه ابجي علي لان ماشفته ولا
حضرت جنازته الولد اي وياي
كعدو يمي يهونون عليه
ويحجون وانه مااسمع
طلعت نهده گلبي
بجي قوي
وره ايام بليل انه كاعد على غفله اختنگت وروحي
فرفحت وعدالك واحد عصر گلبي
ابو هاجر سأل
«،،،ابو علي شبيك
«،،مخنوك ومااعرف شبيه
«،،اصيح الحارس
كمت افرگ بصدري اريدن النفس وهو ماكو
««يمعود شبيك شنو اختنگت
مارديت گلبي نغزني حسيت غاده بيها شي
«،،اريدن اخابر اهلي
حجيت ورحت ليم الباب صحت
«،ابو الغيره وينك
«،،حمزه ساعه 2 منو تريده يسمعك منهم
حجه هيج وسال
«،بس گلي شبيك
«««اهلي بيهم شي
صفن عليه كمت اروح واجي والخنگه زادت
مانقصت اردد بصوت مخنوك
«،،يارب سلم يارب ودعتها عندك امانه
ظليت على هذا الحال للصبح هو بصعوبه وبعد توسل منه دبر
اليه جهاز بعد ماانطيت فلوس
اتصلت عليها ماردت ومره الخ ماكو
خابرت جعفر مايرد مارد رجعت دكيت علي
هم مارد صحت بغضب
«،،ووولك ماجاوب
«،،فضها
الحارس نتر بيه كلت
«،،هسه يجاوب
اتصلت علي مره ومره ثانيه رد
«،،هلا حمزه
صوته جان مو طبيعي سالت بسرعه
«،،جعفر ام علي بيها شي
«««لا اطمن هي البارحه صارت عدها
ولاده وولدت
«،،هي وضعها زين
«،،اي الحمد لله هي وابنك زينين
«،،اكدر احجي وياها
سكت گلب نغزني رد
«،،لا حمزه هي شويه تعبت
اجه بالي من ولدت علي وصار عدها نزيف وفقدت
الوعي سالت بخوف
««،بداعه ابنك گلي شبيها
سالته سمعت صوت عمي مهدي
«،،شلونك وليدي
«،،عم حرمتي بيها شي
««لا بويه مابيها شي ولدت ومبروك
ماجاك وسمينا مثل ماردت عمار
«،،،هي فقدت الوعي
سالت بخوف
«،،لااا
احساسي خلاني اسال
«،«احتاجت دم
«،،اي احتاجت دم وخلينا الها
عبالك واحد دفعني ليوره ابو هاجر گضني
«،«عم خاف ضامين عليه شي
«،،لا ورح ابوك ام علي بخير هي
وضناك
«««چا ودي الجهاز اله خليني اسمع
صوتها واطمن
««نايمه لان تعبت كلش
«،،كله منهم لذوله الجلاب
اذني لگطت صوت جعفر يحجي بغضب
صارت حجي ماافتهمته سالت
«،،عم شصاير
«،،ماصاير شي
«،،خلص وقتك
الحارس حجه وجر الجهاز من ايدي
وسد الخط
«،،انطيك بعد فلوس بس خليني اطمن
على حرمتي
اشر لاا وحجه وي ابو هاجر
«،،هاي اخر مره اسويها الك وبعد لاتجي
وتطلب هالشي
تخبلت عقل ماظل براسي صحت بي
«،«وولك اانطيك فلوس بس خليني بعد احجي
وياهم
صاح بي
«،،منو ولك موو اجي اطيح حظك
نترت بي بأعصاب
«،،ااانت زلمه مد ايدك عليه
«،،ابو علي مو هيج ابو الغيره احسبها عليه
واعذره حرمته مو زينة
سكت بعدين كال
«،،،اخذه وطب لجوه
ابو هاجر گضني نفضت روحي منه طبيت
صحت
«،«اااخ يااابويه
عرفت ذولاك مسوين شي ردت اعرف
الصاير لان شكيت هم ضامين
عليه شي
كمت الوب اروح واجي بين اربع حياطين
الي كمت اشوفها صارت اليه گبر روحي محتركه
ونار شبت بيه وصعدت
لراسي
اريد اشرد منا اريدن اروحن اشوفها اعرفها
هي هسه بحاجتي وانه وهم والله
بحاجتها
حسيت خطواتي كامت ادك براسي بصدى
قوي كعدت وگضيت راسي اسمع ابو هاجر
يحجي للولد الي ويانا على
الصار
«،،ووولكم ااريدن اطلع اااريدن اشوفن اااهلي
صحت من گل گلبي ابو هاجر اجه عليه
هو وجم واحد كال
«،،ابو علي كول الله
«،ياالله ياارب
حجيت بخنگه رجال جبير نصيحه عم محمد
كمل
«،وليدي ماتضيج الا وتفرج
«،،وين الفرج حجي ضعت وضيعت اهلي وياي
ردت اتصل اطمأن عليها بس ماكو محد قبل
ينطيني جهاز حتى اعرف شصار
بيها
لا كدرت اكل ولا عيوني غفت ثاني يوم
الباب انفتح حارس طب كال
«،كوم عندك زياره
گلبي مات وفزيت من مچاني
كلت غاده صارلها شي لان مو وكت زيارتي سالته
«،،صاير شي لاهلي
«،،مااعرف امشي وياي وانت تعرف
مشيت ويا بسرعه احس حيلي راح وريگي
يبس اخذني لغرفه طبيت شفت
مهيب وجعفر سالت
بسرعه
«،،ام علي بيها شي
«««لا لاتخاف وضعها صار زين واخذنها للبيت
جعفر جاوبني واجه حظني وكمل
«««مبروك مااجاك
وخر مني اشوف وجهه مطعون والعيون غاديات
جمر مهيب هم حظني وبارك اليه
سالت
««جعفر عليك بداعه ابنك ام علي زينة
««اي والله وابنك هم وضعه زين
مهيب كال
«،،تعال اكعد
ذوله ولد عمك شمسوين
سالت وگربت من جعفر كملت
«،،انه سمعتك شحجيت احجيلي شكاعد
يصير من ورايه
دار وجهه مني نترت بي
«،،ماتحجي ولك
راح كعد وگض راسه مهيب صفن علي سأله
«،،جعفر صاير شي
«،،ولكم اااخ
صاح بصوت مخنوك وكمل
«،،ولك ليييش سويت بروحك هيج ليييش
حمزه هديتنا وسلمتنا للذيابه
سكت من اختنگ وكمل
«،،ولكم المثل يكول اانه وابن عمي على
الغريب وانه واخويه على ابن
عمي وواخوتي ااانه
صاح وكمل
«،،صاروا عليه وي ولد عمي واااخ من
القهر الي بگلبي اااخ
كام يضرب على گلبه رحت گضيته انه ومهيب
سالت
«،ولك ااحجي شصاير
«،الصاار ضيم وقهر مااايسولف يخوويه
جاوبني وكمل
«،،ولك محلاتك نهبوها قاسم وعباس بالگوه
ولك نهبو خيرك هم واخوتي الجلاب
وصرنا مذابح ويوميا عالكه بيني وبينهم
فكيت عيوني وكلت
«،،ولك انت شجاي تحجي
«،،الي سمعته وزادو من
سكت كض راسه كمل
«،شاحجي وانت تعرفهم هم شنو وشلون
يكرهون حرمتك
عاين عليه وكال
«،،ولك حمزه حرمتك ماراح تسلم منهم
ولا انه راح اكدر احميها
لميت ايدي بقوه وكمت ارجف من غضبي
سالت جاز على سنوني
احد مد ايده عليها
«،،لااا لجن راح يصير هالشي واانه والله
خايف من روحي لا اروحن اجتله
لو اجتل واحد من اخوتي
صرت نار مهيب گله
«،،،وليش ماحجيت اليه جان ااني اعرف
شلون اتصرف وياهم
«،،،لااا
صوتي طلع اعاين لجعفر غادي دم والعيون
مغوركه من القهر كملت
«،،،،ماعليك بيهم خلهم ياخذون الي يريدوا
«،،،شلون حمزه هذني تعبك وفلوسك شلون
تخليهن يروحن الهم
مهيب حجه ماجنت اريده يدخل لان اعرف
راح تعلك بعد اكثر والي يدفع الثمن
هو جعفر وغاده
«،،عوفوهم لله هو ياخذ حگي منهم
سكتت وكملت بقهر وگلب ممرود
«،،جعفر من ترد كول لام علي ماتظل بالبيت
تاخذ ولدي وتروح لاهلها
«««ماتقبل حمزه اهلها رادوها يمهم وحجوا وتوسلوا بيها وهي ترفض
سكت وكمل
«،،،انت مو تعرف وتعرفها هي من طبت بيتك
بعد ماراحت الهم ولا وصلت بابهم
جنت اعرف هلكلام واعرف هي ماراح تسمع
كلامي اذا اتصلت منهم وحجيت
وياها
كلت بتعب وقهر
«،،مهيب نهايه هذا الشهر
سوي زياره خاصه وجيبوها عليه هي وعمي مهدي وعمه رقيه
«،،،تمام
غاده
جنت متمدده بغرفتي تعبانه من الولاده
وحسرتي بگلبي ابجي بخنگه
اباوع لعلي نايم بفراشه وعمار يمي اتخيل
حمزه كاعد يمي فرحان بيهم والوجه
يضحك عتبت علي بگلب
محروك وممرود كلت
«،،ليش هيج سويت ليش حمزه ضيعتنا
من وره بشر مايسوه هيج احسن وكعت بيها
انت وخيرك تفرهد
شحصلت اني غير الفراك والعذاب والقهر
ومااعرف بعد شراح يصير بحالي
اني وولدي وي ذوله الذيابه
رانيه طبت حجت بفرح
«،،غاده راح تشوفين حمزه
گلبي فز وصحت بفرح
«،،صددك رانيه
««اي جعفر جان يمه وكله جيبها نهايه هذا
الشهر
«،،ليش نهايه الشهر خليها باجر
«،،لاا خلج الما تگوين شويه وروحي اله انتي هسه
نفسه ومو زين عليج تتحركين وانتي
نازفه هوايه
«،«والله اطيب بس اشوفه
جاوبتها وكمت ابجي بشهكه كعدت يمي
القهر تارس ملامحها ردت
«،،السجن لقاسم مو اله
«،اي بس هو الراح واني الخسرته اني
وولدي الي خسرنا رانيه
«،،كولي يالله وبلكي يتغير شي
«،،شيتغير وهو انحكم بذنب غيره
حجيت هيج وسكتت لان جنت اتعب من
احجي وانتظرت شوفته بلهفه
ورحت للغالي وجنت مشتاكه اشوفه
اروح لحظنه اشم ريحته
كعدت بغرفه يمي مهيب عمو مهدي وجعفر وعمه
رقيه گلبي يدك سريع وعيوني
مغوركه واباوع للباب
اريده يطب
انفتح كمت بفزه من شفته طب
العيون التقت وصحت
بفرح
«،،،حمزه
نسيت الكل نسيت اني بسجن ورحت
علي حظنته بقوه وكمت ابجي
بشهكه سمعت صوت
مهيب حجه
«،،راح ننتضر بره
عمه اجت حظنته وياي تردد
«،،ولكم يمه شسويت بينا
ماردت اعوفه ماردتهم ياخذو مني جلبت
بي اشهك مثل الطفله الي عافها
ابوها
وخر من عدنا جان متغير ضعفان واللحيه
عاليه ريحه الجگاير فايحه منه
والوجه مطعون حسيت
برود باستقباله
اليه عمه
حجت
«،،،شلونك يمه وشلون صحتك
«،،،عگب الي راح من ايدي والي صار بيه
ماظلت لا صحه ولا عافيه
رد بخنكه يباوع عليه كلت بدموع
«،،وانت اخذت عافيتي من بعدت عني
غمض وذب حسره سال
«،،شلون ولدي وحبوبه
«،،بخير ويسلمون عليك
سكت راح كعد عمه راحت
كعدت يمه مشيت ليمه
كلت
«،،حمزه لاتقهر روحك وخلي عندك امل
بالله
باوع عليه بنظرات ماعرفت افسرها بعدين
نزل راسه وكال
««ماظل امل لان انه انتهيت وعمري كله راح اگضي بالسجن
كعدت يمه وجاوبته
«،،لااا حمزه هوايه طلعوا قبل لا تنتهي مده
سجنهم
«،،اي لجن انه اذا اطلع راح الكي الموت ينتظرني
«،،مانظل هنا نسافر اي اخذك ونروح غير
دوله
كام من يمنا كمت عمه وياي كالت
«،،يمه لاتيأس من رحمه الله بلكي يلگون
الي چتل ابن متعب والله يفك
سجنك
اندار صفن عليه بوجه صاير دم تردد
وحسيته انخنك دار
وجهه وكال
««انه بعد ماافيدج روحي لاهلج وشوفي
حياتج وي غيري
فكيت عيوني مذهوله من الي سمعته
جاوبته
«،،حمزه انت شكاعد تحجي شنو اروح
لاهلي واشوف غيرك
«،،ااسمعيني وافهمي الكلام
صاح بصوت عالي عمو مهدي طب ويا الولد
كمل
«،،افهمي اانه صرت انسان محكوم علي بالموت
اذا مامتت هينه راح اموت بره
بس اطلع
«،حمزه لاتحجي هيج انت ماراح يصير بيك
شي واني والله راح انتظرك ومااريد
غيرك انت ابو ولدي وابويه
حجيت اخر الكلام وانهاريت بالبجي
عمو مهدي
سال
«،،شكو شصاير
«،،عم تاخذ ام علي وتوديها لاهلها لاتعكبها للبيتنا
وبعد مااريدها توصله لا هي ولا
ولدي
«،،لييش حمزه لييش هذا بيتي شلون
تريدني اعوفه اني هناك اشوفك
بي وهذا الي مصبرني
على فراكك
«،راح تعوفي غاده
«،،مارااح اعوفه حمزه مااكدر اعوف
المكان الي اشوفك بي
جاوبته بتوسل
«،،،لااا راح تعوفي لان اا
سكت وحسيته كام يرجف صفنت علي
من شفت دموعه نزلت كمل
بصوت مخنوك
«،،،لان انتي طالك
شكرا لزيارتكم عالم روايات سكيرهوم
