رواية أزمة ثقه الفصل الخامس بقلم جمانه السعيدي
عشتار...ماكدرت اتحمل كلامه ولا كدرت اتحمل الموقف
ما مصدكه باعني بهلسهوله
وعاف العشره والتضحية الي بينا
طلعت من البيت امشي بسرعه
دموعي تجري مجاي اشوف طريقي زين
امشي وامسح بدموعي اجرت تكسي
صعدت وطبكت الباب
السايق ...وووين
اربع مرات عاد عليه السؤال واني صافنه بوجها
مجاي اكدر اركز
صدك وووين ووين اروح لا عندي أهل ولا عندي مكان اروح علي
رجع سئلني وهو يباوع بوجهي وووين
مسحت دموعي وكتله اطلع
رجعت للبيت اول مادخلت كمت اعيط بصوت عالي اريد هاي الحركه تطلع من كلبي
مامصدكه الشي الي جاي يصير وياي
بعد كل هاي المعاناة والصبر والتضحية باعني بلرخيص
لو جاي وحاجي وياي لو سألني اقبل لو لا
لو كايل اني صبري خلص اريد اطفال
اريد ازوج بس حتى يصير عندي طفل ولو طفل واحد
جان ساعته انطيته العذر
بس ياخذني غدر ياخذ كلشي مني ويشمرني
شنو يعني ابقى هنا وانتضر يوم يجيني واني ادري بي عايش وياها
ليش خلاني اضحي وأقدم كلشي عندي يله فكر يزوج
اني مستحيل اكدر اكعد ويااا
مااكدر اتحمل هذا الوضع ابد
وووين اروح اذا حتى اخوي الوحيد تعاركت ويااا
وجبرته يبيع البيت وأخذت الفلوس وانطيتهن الجواد
عبالي انسان محترم
عبالي ادمي ويحفظ العشره
جمانه السعيدي
شلت التليفون واتصلت على نجوى
بس سمتعها كالت اللوووووو
انفجرت بلبجي
نجوى...هااا خير ليش تبجين
عشتار....اهييي اهييي ازوج
نجوى...منو ازوج وانتي ليش تبجين
عشتار...جواد ازوج يكول اريد اطفال انتي ما تخلفين
نجوى...الله يستر شلون ازوج
عشتار...اليوم كشفته مزوج
نجوى...اهدءي اهدءي راح يوكف كلبج
عشتار....اريد اموت من القهر النوب يكول مااطلكها اريد اطفال
اذا تردين ابقي بيتج واجيج يوم واحد بلاسبوع وباقي الايام يمها
شمرني شمرت الجلبه
نجوى....شلون عرفتي هو اجا وكالج اريد ازوج
عشتار...لا وحده تتردد علي بشغلة البيع والشرا
اني شكيت من شفتها كل يوم جايه وهو طالع وياها اليوم مشيت وراهم
شفتهم دخلو بيت كلت خل اسئل خاف صدك عدها بضاعه وجابته يشوفها
ليش اسوي مشكله واخرب علي نفسي
سئلت الجوارين كالو مزوجه صار شهرين شهرين واني نايمه بلعسل
ولج اموته نفسي علموده
ارجع من الدوام كبل للمجمع سلمني المجمع كله
كمت مااندل راسي من رجليه
اكول ميخالف المن كلشي بالاخير النا خل اشتغل واساعده
تالي رايح مزوج دبريني وين اروح وشسوي
نجوى...طالبي بلفلوس الي اخذهن على الاقل يرجعلج فلوسج
عشتار...طالبته بلفلوس يكول كلشي مالج يمي
شتريدين اسوين سوي
اني مااخذت علي اي ضمان
نجوى...شكد ثوله الخاطر الله شلون تسلمين الفلوس بدون صمان جمانه السعيدي
عشتار....مافكرت هيج هو زوجي وعايشين سوا
امنت بي كلت هو صابر عليه ومايريد اطفال واني رايحه
ادور علي ضمان
طلع حرامي ضحك عليه واخذ كلشي وهسه يريد يشمرني
نجوى...حسبي الله ونعم الوكيل علي
عشتار...مااكدر ابقى هنا مااكدر اتحمل ابقى وحدي
اموت من القهر شلون بيه شسويت بنفسي ضيعت نفسي
نجوى...لا اطلعين من البيت طالبي بحقج
عشتار...متاكده كلشي مراح احصل منه
نجوى....شوفي بلكت تحصلين ولو قسم من فلوسج
واذا ماحصلتي شي تعاي هنا بيتي عيشي وياي
اخليج بعيوني
عشتار....اني شكد غبيه المفروض من البدايه اعوفه
غبيه حبيته وتمسكت بي عبالي يحفظ العشره
نجوى...يمتى ما تجين هله بيج بيتي هو بيتج
عشتار. من حجيت وياا نجوى حسيت اطمنت اكثر
صدك الاهل سند وعزوه
اتمنى علاقتي زينه ويااا علاوي جان راح هسه وكلب الدنيا علي اني ماافتهم بدلت الغالي بلرخيص
بقيت بلبيت لليل مارجع جواد بقيت بلبيت وحدي
ثاني يوم اتصلت على المدرسه وطلبت اجازه
احس نفسي مريضه راسي يوجعني مااكدر اسوي اي شي
مثل التايها
للعصر اتصلت على بلتليفون
رد عليه من ورا خشمه
جواد...الوووو
عشتار...تعال للبيت اريد احجي وياك
جواد...اي كلام بينا ماكوووواكعدي بيتج وانجبي موزين
بقيتج على ذمتي بعد الفضيحه الي سويتيها البارحه
صدك بلا اخلاق
انتي معلمه انتي كلشي ما تفتهمين
عشتار...اول مره تحجي الصدك فعلا اني كلشي ماافتهم
لان امنت بيك وبعت اهلي علمودك وسلمت فلوسي وذهبي
تالي تغدر بيه
جواد....شخبصتيني فلوسي فلوسي شنو فلوسج
هذني الفلوس ثمن الست سنوات الي ضاعت من عمري ويا وحده مثلج ارض بور ما منج فايده
لو واحد غيري جان طلعج وشمرج بلشارع
زين وتحملتج
عشتار...ما طلكت من البدايه تعرف ليش ما طلكت
لان انت حرامي
جنت تخطط شلون تبوكني حرامات صدكت بيك وبقيت عايشه وياك
انت حتى ما تستاهل اباوع بوجهك
جواد....على هذا السانج ودكتج الناقصه امس تمشين وراي
وتحاولين تشهرين بيه
انتي طالك وبعد مااربدج تبقين على ذمتي اطلعي من البيت إذا اجيت بليل ولكيتج موجوده بيتي
اشمرج بلشارع فهمتي لو لا
عشتار...رجع فلوسي وطلعني اني بعد ماريد اعيش وياك
جواد.. تحلمين تحصلين فلس مني روحي اشتكي عليه
اطلعي بكرامتج ليش اجي اطلعج من شعرج واشمرج بلشارع واخلي الجواربن يتفرجون عليج
اطلعي من البيت
واني هسه رايح للشيخ اطلكج
طبك التليفون بوجهي رجعت ابجي ابجي على حالي
اني شسويت بنفسي
شلون امنت بي شلون صدكته
بدلت وطلعت رحت البيت علي اريده يسامحني ويساعدني
اخذ حقي
دكيت بلباب لمن مليت محد فتحلي
الجواربن طلعو كالو مو هنا راحو للزياره يبقون كم يوم يله يرجعون اليوم طلعو
رجعت للبيت اسحل برجليه سحل ياربي وين اروح
شلون بيه
وصلت لكيت واحد يدك بلباب
عشتار...تفضل اخي
....هاي الورقه دزها استاذ جواد
فتحته لكيتها ورقة طلاكي
اخذتها ودخلت كلبي راح يوكف من القهر اني شجاي يصير وياي ليش المصايب نازله ترف على راسي
قابل اني بكيفي مايصير عندي اطفال
هاي حكمت رب العالمين
دخلت للبيت كعدت الدنيا سوده بوجهي ووين اروح ياربي
مالي احد غيرك ووين اروح ووين امطي وجهي
دك التليفون
عشتار...الو
جواد...وصلتج ورقة طلاكج يله اطلعي من البيت بسرعه
اريد ارجع مالكاج بلبيت
فهمتي لو لا
حجا هذا الكلام وطبك التليفون بوجهي
مااعرف شنو السبب ليش اني وصلت الهاي الحاله
سوء اختيار سوء تدبير سوء تقدير
لو كلهن التمن عليه
دخلت غرفتي طلعت الجنط وكمت اجمع ملابسي
كل قطعه اخليها بلجنطه تنزل دمعتي كبلها
جمعت ملابسي بلجنط
وطلعت من البيت عفت كلشي وراي
كل تضحياتي وتعبي لمدت ست سنوات عفتهن وراي وطلعت
اجرت تكسي للكراج ومناك طلعت البغداد
بعد ماكو كدامي غير اختي
مالي مكان اروح علي
جمانه السعيدي
منا البغداد دموعي ماوكفن احس نفسي محبطه
وتعبانه الناس كله تباوع عليه
متعجبين لان طول الطريق ابجي وابد ماسكتت
منا لمن وصلت الكراج النهضه
وأخذت تكسي وطلعت البيت اختي
مابقالي احد غيرها بهاي الدنيا
بس وصلت فتحت الباب الخارجي دخلت عليها
بس شافتني اجت تركض حضنتني وكامت تبجي عليه
اني ابجي وهي تبجي
دخلتني للبيت جوه دخلت الجنط
حاولت تواسيني وتأخذ من خاطري
صعدت جهزتلي غرفه وحدي فوك ورتبت ملابسي بيها
جابتلي اكل ووكلتني بلغصب
صعدت تمددت احاول انام اريد انام حتى انسى كلشي صار وياي
ماكدرت انام طلبت منها حبة منوم
اريد انام يوم يومين اسبوع بس كون اخلص من هذا الكابوس المرعب
