رواية ناديه الفصل الثامن والستون 68 بقلم انين الليل

سراج 

من حچيت هالشكل الكل اتفاجأ واولهم ناديه 

حنين رادت تحجي بس انا خزرتها وسكتت 

جميله گالت // صلوات على محمد وآل محمد ايي يمه من زمان وسويها 

قيس گال// بيها الخير تستاهل سراج

كرم //شنو انت سراج بكيفك تخطب وتريد تعقد واحنه ما ندري 

:: اي اخطب واعقد لان بكل بساطه هي بالغه واصلا بالاساس انا ولي امرها لو نسيتو

كرم // بس هم مو بكيفك احنه موجودين 

ناديه وگفت وتاشر باصبعها ... وانتوا منوا حتى تردون تعرفون صار شهرين ما تدرون بينه وين احنه 

تتقولون اشكال والوان هسه حلينه بعيونكم

مرتضى باوعلي // ليش بعد تحچي علينه سراج انت امبيت النيه وراح تكون الكيكه الك ابحدك 

ضحكت باستهزاء::هههههه هذا الكلام ما ارد بي عليك مي خالف خلي ابوك هو الي يرد عليك لان ما فاضي 

ارد على زعاطيط انا اجيت انطيكم علم حتى ما تتقولون وتؤلوون الكلام  

وگفت وگلت :: ياالله بابا 

رغم المفاجأه لكن ناديه ثبتت انها قويه باوعت المرتضى وگالت

... ... ها مرتضى وانت عمار ليش ما تنهون عليه خو انا عندي ما شاء الله مليارات (هزت ايدها )

شگد عيب باالله ما استحيتو زلم مشوربه وما عدكم كلمه كل همكم الفلوس تره للعلم انتو مو احسن 

من مياده لا بالعكس مياده كتلت عباس بس حتى تاخذ صاحبها لكن انتو يوميه تكتلون عباس وتاجرون 

بدمه بعتو واشتريتو بينه ( اتقربت يم هادي )اخذت فلوسنه وصحتنه وخليتونه خدامات عمرنا ما سمعنا 

منك كلمة عمو

(باوعت الكرم ) دستو علينه وهنتو كرامتنا كله هذا السويتو واذا سالكم قيس او عمه شمس او حتى بيبي جميله

 تگولون لان احنه بنات مياده ومره لا لان تردون تحافظون على حلال عباس حلال عباس الي عشرين سنه 

وانت متنعم بي يا هادي وانت كرم السياره ومحلات الغذائيه لو نسيتهن بس اريد افهم 

انتو ما شبعتوما عيب عليكم تدرون راح اترحم على مياده لان كتلت عباس تدرون ليش لان عرفتني معدنكم 

ولان عرفتنا شگد انتم مو خوش ناس

كرم //كثر الله خيرج صرنا مو خوش ناس 

اجيت يمها ولزمت ايدها وگتلها ::كافي ناديه ياالله امشي 

باوعتلي ... ... اي بس دقيقه 

اتقربت يم قيس الي چان گاعد يسمع وگالت ... ... عمي قيس عندي يمك طلب واتمنى ما تردني 

باوعلي //اي بابا اتفضلي 

... ... لا عمو بالبدايه اوعدني 

الي تردينه بابا

   ... ... بس لا تزعل عليه ولان اعرفك گدها راح اطلب بس بالاول الزم شاربك 

  قيس // افه هيچ صار الحجي يا بت اخوي 

... ... مو گتلك لا تزعل عليه اريدك تلزم شاربك 

قيس لزم شاربه //. ها عمي هاي انا لزمت شاربي سولفي والي تردينه اعتبري صار 

... ... عمو من گتلك الزم شاربك لان اعرفك من تحجي كلمه ما تتراجع عنها وانت مره لزمتلي شاربك 

وطلعت گد كلمتك وهالمره انا جايه اطلب منك طلب

قيس // كولي بابا والله لو ترديني اذبح واحد من ولدي ما اقصر 

 هي اتقربت من قيس وحاچته بترجي ... ... عمي الله يخليك رجع ام ياسر لو ترجعها البيتها لو تخليها يمك 

بس كافي عاقبتها انا هذا طلبي واذا فشلتني بعد كل شي ينتهي ابيناتنا لاانت عمي ولا اعرفك

هو باوعلها ودنك وهي اتقربت علي وگالتله ... ... عمي قيس انا احبك واحترمك وعمري كله ما طلبت منك شي 

 تدري ليش انا احبك واحترمك لان اعرف انت دومك ينكسر خاطرك علينه وتوصي اختك وتهددها 

حتى تدير بالها علينه بس هي ......

قيس //ايي هي شيطان رجيم والموت قليل بحقها.

ناديه ... ... مي خالف عمي الخاطري هالمره وهذا راح يكون اول طلب واخر طلب 

باوع المحيي الي اتفاجأ حاله حال الباقيين //حتى بعد كل الي سوته بيج ليش 

هي ابتسمت بحزن ... ... لان انت خوش انسان وانت الوحيد الي ما دورت طمع وياي عجيبه شلون 

اختك افراح 

قيس هز راسه // والهذا السبب ما راح اخلي افراح لاتشوف بناتها ولاترجع ويانه افراح تبقى بذاك المكان الشفتي الى 

ان اتعفن وتموت 

بقوا ساكتين ناديه گالت ...... عمو 

قيس سالها// ها عمو ؟

... ... من انا زغيره وانا اسمع بت مياده راح تطلع على امها راح تجيبلنه كسرة وجه عليمن يطلعن على امهن 

امهن ام المراكز هادي يكول هي محكومه بالاعدام وهي بعدهي ما مكسوره عينها تتمضحك ومن شرطي الشرطي 

والثانيه تگول // ليش تنكسر عينها الي تسوي هيج شي وتصاحب زلم وهذني منو ياخذهن منو ايگلبهن لو اخوانها

كاتلينها ولا مسلمينها للشرطه وهواي كلام وافراح عدها بنات وعدها ولد والناس ما ترحم

گعدت بالكاع مقابل قيس وهي تگله ... ... انا اتوسلك مو الخاطر احد لا عمي الخاطر نفسك وعمي محيي 

والخاطر ياسر ياسر الي هاجر وهو مقهور

قيس باعلها وهو ضام شفايفه وعيونه مليانات دموع لكن يكابر هي باوعتله وصارت تبچي وهي تگول 

... ... عمي قيس اريد اروح وانا مرتاحه الله يخليك 

وگف قيس وانطا ايده الناديه الي وگفت قيس باسها براسها واتقرب يم هادي وگال

//طول عمرك انت ومرتك تگولون هذني بنات حرام مو بنات عباس وانفرضن عليك 

شوف البنات الي عذبتوهن شوفهن شنو سوون ولك هادي لو تطم روحك احسنلك

باوع الكرم // وانت كرم ما عرفتك هيج نفسك دنيه والله ما ادري من وره الطمع لو من وره ابنك لو سواية افراح 

اسمعوني انتم اثنينكم هادي وكرم تره ناديه واختها تحقكم بحلال ابوها 

ناديه ... ... لا عمي مو احنه الي انطالب بشي ابونا نطا لكن على. كولتك مع الاسف على النفوس الي تتبدل بين يوم 

وليله بس اتمنى ما تردني

قيس //شوف هادي گدام الكل ارجع افراح بس بشرط تبيع بيتك وتشيل الابعد محافظه تره انا ومحيي نحقك لان 

افراح من سوت سوايتها عدك وبيتك اسمعني تاخذونها وتشيلون بعيد بعيد صدگني لو بس نلمح خيالها انا او محيي 

او ازغر طفل عدنا نكتلها ونكتلك خلاص افتهمت انت ما جاني نسوان جاني استغفر الله (باوع العمار) وانت 

ولك اعمير بيك خير اتشطر على امك واخواتك ضبهن لان هادي طلي رخى الحبل وهاي تاليها

عمار // تره خالي ناديه ما اتنازلت عن امي ابلاش اخذت المحل ابمكان تنازلها 

قيس // انچب حمار انت مربوط من اذانك ناديه ما خذت اله حقها ،

عمار // شنو حقها هذا المحل ابمكانه بيت بيبي الي ضحك عليها سراج وخلاها تسجله باسمها 

ردت احچي ناديه باوعتلي وگالت ... ... لا عمار غلطان انا اخذت محل ابوي لان حقي وبيت بيبيتك مثل ما تگول 

اشتريته ودفعت افلوسه الابوك

عمار // هاا وشلون ويمته 

ناديه ... ... احسبها حضرة المحامي ايراد المحل ثمنطعش سنه يجيب بيتين من غير الاجارات لو ناسي 

قيس //هادي الزم ابنك وخلي ينجب ويخلي انعال بحلگه ما شايف واحد عينه صلفه مثله 

وانتي بابا ناديه اسمعيني 

تره هادي مشى عليه هواي ناس ومن ضمنهم كرم وانا ما قدرتهم لكن انا قدرتج انتي تعرفين ليش 

لان انتي واختج نطفة رحمن ولا تصدگين الله يضيع حقج ولا يضيع كل دمعه وحسره وجوعه مرت بيچن 

وبعد وبعد الله يطلع حوبتج انتي واختج

الكل سكت هي باوعتلي ولزمتني من ايدي 

... ياالله سراج 

حسيت بايدها ترجف وهي لازمتني اجينه نطلع هي رجعت على جميله وگالت الها ... ... بيبي لا تزعلين عليه 

جميله مسحت دموعها // لا والله ما ازعل كافي الشفتي والمريتي بي لو صخر چان اتفتت روحي بيبي مهنايه بس 

لا تگطعين اذا ما تجيني خابريني

... ... بيبي انتي من ريحة منيره شلون اگطع بيج 

شمس //الحمد لله والشكر ناديه تستاهلين كل خير 

ام مرتضى مسحت دموعها // الله يمهل ولا يهمل احنه ابختج خاله

هنه بوسنها وهنه يبچن وسط سكوت وذهول الكل وطلعنه حنين ساكته وناديه گوه تمشي حنين راحت 

ركبت ويه رضا واهله وناديه وانا رحنا بسيارتنا بقينا ساكتين وناديه بس فاتحه عيونها وهي تتنفس قوي 

ما گدرت احچي وياها لان اعرف بيها شگد مجروحه اخذت جگاره ودخنت والدخان نفخته على وجهها 

هي باوعتلي وخزرتني انا ابتسمت گالت ... ... نزلني اهنا

عكفت حواجبي ::وين انزلج 

... ... اهنا ما اريد ابقى 

::اهدي وخلي نتفاهم 

... ... ماكو اي تفاهم اگلك نزلني 

صرت اسوق سريع وانا ساكت وهي تباوعلي الى ان وصلنه الشط العرب ع الكورنيش وگفت السياره ورحت 

فتحت الباب الها وانطيتها ايدي وانا اگلها

:: ناديه انزلي خلي نحچي 

هي باوعتلي انا هزيت راسي هي نزلت بدون ما تلزم ايدي 

اجينه گعدنا على مصطبه وطلعت موبايلاتي خليتهن صامت وحاچيتها 

::ناد... ... 

قاطعتني وكالت ... سراج لهنا وكافي انتهى دورك 

:: شنو يعني انتهى دوري ؟

وگفت وباوعتلي انا رديت عليها :: فهميني شكو 

... ... شنو شكو تمثيليه رخيصه شنو وين عايشين احنه شنو مسلسل تركي (وصارت تعوج حلكها وتعيب ) 

خطيبتي راح اعقد عليها

فريت ايدي :: اوگفي تسمين خطبتي الچ تمثيليه ورخيصه 

هزت راسها ... ... ايي ورخيصه جدا 

گعدت واشوفها مغمضه عيونها وگالت بهدوء ... ... لهنا انتهى دورك كثر الله خيرك اي احد بالعالم 

ما يسوي الي سويته 

:: ما سويت شي هذا واجبي 

،

بقينا ساكتين بعدها هي وگفت ودارت وجهها اعرف بيها جاي اتداري دمعتها. خليتها فتره بعدها اتقربت يمها 

وحاچيتها :: شبيج ناديه شلي صار 

جاوبت بعبره ... ... ليش خليت نفسك بهذا الموقف انت مو باچر اتريد تخطب 

:: اي وشنو يعني 

هي دارت عليه وحچت بعصبيه ... ... شنو شنو يعني مو گدام الناس گلت

:: انتي گلتيها الناس يعني ما يهمونه بعدين شگلت 

... ... اتصور تعرف كلش زين شنو گلت 

:: وبيش كلامي ضوجج 

ما جاوبت انا درتها صوبي وگتلها:: شنو انتي ما ترديني

هي صار گلبها يدك واتفاجئت من كلامي سالتها :: ردي ليش ساكته 

صارت تباوعلي وهي مذهوله هزيت الها راسي جاوبت ... ... كافي سراج شنو هالحچي 

:: يا حچي هذا جاي اگلج انتي ما ترديني 

... ... شريد منك ناسي انا شنو وضعي ش......

خليت ايدي على حلگها :: اي وضع انتي كل شي ما بيج

هي جرت نفس ... ... هاا تريد تستر عليه وبعدين شهر شهرين وتتركني لا غلطان موانا الي اقبل 

العطف جبت حياتي وانت بس تعطف عليه 

صارت تتنفس قوي وانا اتنفست انفاسها وجاوبتها :: ما اعطف ناديه جبت حياتي وانا احبج 

هي باوعتلي وانا هزيت راسي

:: ليش متفاجئه وتسوين روحچ ما تدرين ليش ما تعرفين بيه احبج من اول ما فتحتي عينج ع الدنيا 

:: ليش ما تدرين انا قبل ابوج وامج بستج وانتي بعدج بدمج 

:: ما تعرفين انا سميتج وخطبتج اول يوم الي صرتي بي 

:: ما تعرفين ما اقبل اي احد من ولد عمج من همه زغار يشيلوج لان انتي خاصتي 

:: ليش ما تتذكرين من شلتج بالمحكمه لو من وديتج المياده وانا ابچي عليج 

:: لو من چنتي عد عمتي منيره شلون اراقبج واوصي عليج المدرسات

قاطعتني ... ... ايي كل كلامك صحيح لكن ابمجرد ما ماتت منيره شمرتنا عد هادي وافراح ورحت وتركتنا 

واتزوجت ومرتك هانتني وانت سكتت 

اتنفست بعمق :: صحيح شمرتج حتى اخذج حتى ما اخليلهم سبب يرفضوني او انتي ترفضيني ادري بيج تحبيني 

بيوم الي عاتبتيني لان اتزوجت سجى مو عبالج طلگتها لان هانتج لا طلگتها لان انتي تردين هذا الشي

هي جاوبتني باستهزاء ... ... صحيح مبين وره ما طلگتها شدريت شنو صار بيه 

:: اعرف كل شي لان بصراحه اجازاتي اخلصها بالبصره 

... ... هاا اشو ما شفناك 

::اراقب من بعيد واشوف كل شي

بقت ساكته اخذتها گعدتها وگتلها :: هم تعرفين انا الي دخلتج دورات بالسادس وانا الي وصيت المدرسين يساعدوج 

باي درس ما فاهمته مقابل فلوس 

فتحت عيونها متفاجئه هريت راسي :: اي ليش متفاجئه الي يفتح دوره ويريد يساعد طالب يساعده بماده بمادتين 

مو بالدروس كلها 

ردت عليه ... ... وبعدها تركتني الهادي وافراح

:: ايي ردتج تعرفين معدن الناس وتكشفيهم حتى من تاخذين حقج ما تتنازلين عنه بسهوله 

... ... ايي فعلا وهذا الدليل افراح سوت الي سوته 

:: ما انكر افراح غلبتني بهاي لان انا اطمنت وچنت بوكتها مقرر بس تنجحين اجي واصارحج لكن الي صار 

القدر اقوى واسرع من عدنا 

هي ردت ... ... والهسه القدر اقوى من عدنا سراج احنه لا يمكن نصير البعض

جاوبتها :: ليش لا تگليلي انتي ما تحبيني 

هي سكتت ودنكت انا دخنت جگاره وكتلها :: ارفعي راسج ندووش انتي اطهر واشرف من هواي هواي ناس اعرفهم 

بقينا ساكتين رجعت گتلها :: ناديه اريد اعرف انتي تحبيني لو لا 

جرت حسره وعضت شفتها وهزت راسها ... ... لا سراج ولا عمري فكرت بيك انت بالنسبه النه انا وحنين قارب 

نجاة ومضة امل فد شي ننسند علي من يكون كل شي ضدنا لكن حب وارتباط مستحييل

بصراحه اتفاجأت بردها :: هذا قرارج لو تحچين هچي عبالج اغير رايي 

جاوبتني ... ... تدري سراج قبل ما نروح البيت كرم شنو چنت مقرره 

::شنو ؟

... ... چنت مقرره مجرد ما تعقد حنين ورضا ويتزوجون انا انتحر اموت نفسي

انا فتحت عيوني ع الاخر هي استردفت ... ... ايي ليش متفاجأ هذا چان قراري لكن من رحت وسمعت الكلام

وشفت الناس شنو هيه لا عدت ترتيب اوراقي صحيح انا انسانه بيه فد خلل 

لكن راح اتعايش ويه واقعي واتجاوز الخلل الي بيه اختي تتزوج وانا اكمل دراسه واسوي شغل خاص بيه 

وانسى كل شي مر بيه او اتناسا

باوعت الها :: وانا 

هي اتنفست ... ... انت تتزوج وتبدي حياة جديده 

:: معقوله كل احساسي اتجاهج وحبي الج وانتي جاي ترفضينه 

هزت راسها ... ... لان بصراحه ما اعرف اجامل انا ما احبك ومستحيل ارتبط بيك ارجوك لا تزعل 

مني لان هاي الحقيقه وهذا شعوري اتجاهك 

ما عقبت على كلامها وگفت وگتلها

:: اذا خلصتي كلامج ياالله خلي نمشي 

بقت بمكانها وانا وگفت صرت ادخن رجعت يمها وقبل ما احچي هي باوعتلي وگالت 

... ... سراج ولو انا ثقلت عليك بس ما عرفت شي عن اخوي 

جاوبتها بزعل :: ليش متاكده ممكن اسال عنه 

... ... لان اعرف بيك اي شي اطلبه تحاول تسوي 

اتعجبت من برودة كلامها رديت عليها 

:: قصدج انفذه وانا مغمض 

... ... احسبني ما سالتك

صفنت ورديت عليها :: لاتفكرين ناديه اخوج بيوم الي اخذو ودو اهل سلدار للملجأ وهناك اتوفى 

لان هو بالاساس انولد مريض

هي باوعت متفاجئه وگلتلي ... ... شنو انت شتگول 

:: على كيفج ناديه 

هي بعصبيه ... ... سراج صدك صدك هذا الكلام 

:: ايي ناديه صدك 

... ... منو گلك منين دريت

::انا رحت الكركوك وسألت 

... احلف 

فتحت عيوني متعجب : : اي ناديه هذا الي عرفته من اخو السلدار 

شفتها نزلت دمعتها اتقربت يمها وگلت :: خلي نرجع للبيت هسه منتظرينه 

رحت قبلها ركبت وهي اجت وراي ركبت وسالتني ... ... شگد عمره من اتوفى 

:: ممكن تگلبين صفحه

بقيت اسوق بالسياره وهي متوتره مره تفتح الجامه مال السياره مره تسدها اعرف بيها تريد تحچي وگفت 

السياره وگتلها :: شتردين تگولين 

هي باوعتلي ... ... منين عرفت اريد احچي 

:: اعرف گولي شنو تردين 

... اريد اشوفه 

:: منو هذا ؟

... هو

:: شلون تشوفينه اگلج اتوفه 

... ادري بس انا اقصد صورته 

:: انتي مخبله بعدين ليش تردين تشوفينه 

حچت بعبره ... ... لان هو خطيه حاله حالنه اصلا هو اتعس من عدنا 

::لذلك الله سبحانه رحم بحاله واخذه 

... ... اي احسن بدل ما يگولون ابن حرام

نفخت وباوعت الها سالتها :: چنتي تتمنين تعرفين بي عايش 

هزت راسها ما. جاوبت سالتها :: ليش 

... ... اتمنى يكون عندي اخ حالي حال الناس 

وگفت السياره وباوعت الها :: باعي حتى لو نفرض هو عدل منو يقبل ان تتعرفين علي ناديه 

الاخ هو السند هو الي يدافع الي يحن على اخته هذا لا انتي راح تتقبلينه ولا هو بيوم يتقبلج

هي باوعتلي مستفسره هزيت راسي :: ايي مثل ما سمعتي فرضا الي تگولين عنه اخوج عدل 

وتريدين تشوفينه شتتصورين رضا خطيبها الحنين يقبل او حتى لو انتي متزوجه رجلج يقبل 

هزت راسها ... ... اي شعليهم 

:: لا بابا مو راهمه اول كلمه راح تسمعينها منهم شنو تگولين اخوج هو ابن حرام لو منو يكول هو 

يتقبلج ناسيه انتي السبب باعدام امه وابو ناديه لا تفتحين على نفسج باب مسدود لا گولي مقفول بسلسه 

وقفل قديم ومفتاحه ضايع

... ... بس مبين من كلامك هو موجود 

:: لا ناديه هذا الشي عرفته من عمه اخو سلدار صدگيني هو اكدلي انو بنفس اليوم الي استلمه ودا للملجأ 

وبعد فتره عرف بي انو هو اتوفى 

هي سكتت وانا بقيت اسوق الى ان وصلنه للبيت اتلگونه كلهم وهمه يگولون // هاي وين رحتو

:: چان عدنا شغل 

رضا //. وان شاالله كملتو شغلكم 

هزيت راسي :: ان شاالله

وصلنه للصاله وگعدنا وانا گلت الرضا ::يمته ناوي تعقد 

اتفاجأ من سؤالي // ها بهالسرعه 

:: ايي لان اريد اسافر 

كلهم باوعولي انا حچيت :: اقصد دوامي بالدائره واريد اكمل كل شي قبل ما ارجع البغداد

رضا // اي عمي بكيفك بس چان ابالي اجيب عمامي ويجون ويخطبون 

:: لا بابا احنه اهل ما بيناتنا 

مريم // عمو مو لازم حنين اتاجر بدله وصالون 

هزيت راسي :: كل الي تريده حنين يصير لكن بالاول خلي تعقد وبعدين شنو تريد يجرالها

رضا // ما طول هيج رايك سراج باچر ان شاالله 

باوعت الحنين :: اي هذا هو الصبح روحي انتي واخواتج اشترو شنو تحتاجين والعصر نجيب السيد يعقد 

سكنه // گلللللللوووووووش اي هذا هو واذا ع الحفله نسويها سوا عگب باچر نروح نخطب البنيه 

ونتفق على المهر ونسويها الكم اثنينكم

باوعت الناديه وگتلها :: لا ام رضا ماكو قسمه البنيه ما قبلت 

سكنه جاوبت // خلي تولي تلگه مثلك الف يتمنن اضفرك شنو قحط نسوان 

الكل اتفاجأ لكن رضا وحنين احس بعيونهم سؤال انا جاوبتهم :: اي مثل ما تگولين ام رضا الله كريم 

ياالله تصبحون على خير 

مديت ايدي على جيبي وطلعت فلوس وانطيتهن الحنين ::هاج عمو الزمي روحي باچر اشتري كل شي تردي

ناديه ... ... لا عمو عدنا فلوس ونشتري 

ما باوعت الها :: ادري بس باعتبار انا ولي امرها فلازم انا الي اگوم بواجبها. 

باوعت السكنه وگتلها :: ام رضا بلا زحمه انطيني الامانه العندج

سكنه // اي خويه هسه 

راحت ام رضا الغرفتها والكل مترقب اجت وجابت جنطه زغيره وگالت //اتفضل خويه امانة الله 

اخذتها وگلت :: والنعم منج 

باوعت الرضا وگتله ::ابو علي انطيني الخاولي 

جابه من ع القنفه گتله ::افرشه بالكاع 

هو فرشه وانا فتحت الجنطه وخليت كل الي بيها بالخاولي وحچيت

:: ناديه هذا الذهب الج والحنين 

هي باوعتلي انا هزيت راسي وگتلها ::هذا من چنتي انتي واختج عد عمتي منيره وچانت تاخذ اجار البيت وايراد 

المحل وتشتري بي ذهب بالتساوي الج والحنين وتضمه عندي هسه بعد آن الاوان تستلمن اخر حقوقچن يمي

رضا //صدك سراج ضامه من يا سنين 

::اي صدك چنا نروح انا وعمتي ونشتري الذهب وتضمه عندي هذا هو اتقاسمنه بالنص 

حنين//لا عمو ما ناخذه كافي الي انطيتنه ايا لو غيرك واحد ما حافظ على حقنا وسنين وانت حتى 

راتب المحامي تدفعه من جيبك هسه انوب جايب النه ذهب 

ما جاوبتها گلت :: من رخصتكم تعبان

ورحت للديوانيه ولحگني رضا شافني متمدد وخال ايدي على عيوني والثانيه بيها الجگاره هو ما حچى لان حس اكو شي 

بقيت اتگلب على فراشي بقيت للفجر بعدها رحت اتوضيت وصليت وحاولت انام فعلا غفيت ما گعدت اله الساعه 11

رحت غسلت واجه رضا جابلي الريوك گال

- - - انا ما قبلت انگعدك لان البارحه انت ما نمت اله من طلعت الشمس

ما جاوبته صرت اكل وانا ساكت بعدها گمت غسلت ورضا شال الصينيه انا بدلت وطلعت بالسياره 

اسوق وانا ساكت وانا مقهور ما اعرف يمكن متفشل من نفسي لان عبالي ناديه توافق بيه 

اتصلت زهراء جاوبتها 

الو شلونك سراج 

::اهلا ام سفر اشلونج 

الحمد لله الف الف الف مبروك

::الله يبارك بيج بس عليمن 

زهراء // هاي شنو سراج شموسه گلتلي بخطوبتك انت وناديه تستاهل وهي هم تستاهلك 

::الله يبارك بحياتج 

- - اسمع سراج الخطبه صارت بسرعه بسرعه بس العرس نريده غير شكل لان انتو اثنينكم تعبتو

:: ان شالله

زهراء بضحك // سنفوره بس سمعت گابلت المرايه وترگص تگول اتدرب العرس خالو 

::ههههههه خليها براحتها 

- - - سراج دير بالك على ناديه تره الي شافته مو قليل ،

:: ان شالله 

- - - سراج اكو شي اشو مو على بعضك 

:: لا زهراء ماكو شي بس جاي اسوق وازدحامات

زهراء // زين سلملي على ندووش اريد اتصل بيها بس اخاف ما تحچي وياي 

:: ها عادي اتصلي بيها 

مع السلامه 

:: الله وياج سلمي على ابو طلال

سديته وانا اول مره احس بنفسي ضعيف وما اكدر اخذ قرار ركنت السياره على جهه وصرت احچي ويه نفسي 

:: شبيك سراج ليش هلكد ضايج شنو شصار 

:: لان رفضتك ناديه 

:: لازم تتوقع هذا الشي بس ليش هي مو بينت شكد ضايجه لان عرفت بيه راح اخطب

اتنفست بعمق وحچيت بصوت مسموع :: كافي سراج شبيك عبالك مراهق هذا هو البنيه رفضتك وخلص 

:: لا مو خلص هاي روحي شنو عليمن تارك نفسي وعفت كل شي حتى شبابي ما افتهمت منه شي كله على 

مودها تالي ترفضني 

::ناديه ادري بيها تحبني بس ليش ترفضني 

:: مي خالف سراج بعدهي مصدومه 

:: مو قبلتها بكل عيوبها 

سقت السياره وانا اگول :: هذا هو لازم اتقبل كل شي

بقيت اسوق وادخن وعبرت الجهه الثانيه من الشط اقصد الجسر وانا اتذكر شسويت من انخطفت ما خليت مكان ما 

دورت بي تالي هالشكل تجازيني وگفت بمنطقه يسموها التنومه خليت السياره وبقيت واگف يم الشط وانا بس صافن

رن تلفوني بالسياره ما جاوبت ولا شفت منو جاي يتصل مره ثانيه وثالثه رحت باوعت شفت المتصل 

ناديه جاوبتها 

:: الو 

... ... الو سراج هاي وين شگد اتصلت انت وين 

::خير شكو 

... ... احنه كملنه تجي علينه

جاوبتها باستغراب :: شنو كملتو او وين اجي عليكم 

... ... شنو نسيت مو رحنا انا وحنين ومريم نشتريلها ملابس ومناك اخذتها للصالون 

نفخت :: ايي افتهمت لا ما اگدر اجي خابري عمج رضا خلي يجي ياخذجن

وسديت التلفون حتى بدون ما اسمع ردها باوعت للساعه شفتها اربعه اله عشره بقيت كاعد انتبهت للتلفون شفته

رضا يتصل 

:: الو 

هلا سراج وين انت 

::موجود 

اي بس مو هم ياالله تجي 

:: اي فد شويه واجي

اگلك انا راح اجيب البنات 

:: بكيفك ابو علي 

سراج تعال لا تتاخر 

:: جاي يابه جاي

جريت نفس ركبت السياره وصرت احچي ويه نفسي :: ياالله سراج لا تصير اناني روح لا تنسى انت 

مسؤول عن البنات روح وخلي حنين تفرح خطيه وبعدها ارجع الشغلك واطوي صفحة ناديه للابد

صرت ادخن بالطريق وگفت يم محل معجنات واخذت منه قطع كيك واشتريت عصائر وخابرت علي 

المحامي گتله يجي !

وصلت للبيت نزلت العلاليك سكنه اتلگتني بالطارمه كالت // شنو هاي خويه كل شي جبنا وحضرنا

ما جاوبتها رحت للديوانيه شفت رضا مبدل ومبين علي الفرح سلمت وكعدت احاول اكون طبيعي لكن ما اگدر 

بصراحه حاس بالخذلان اندك الباب واجه علي ورا بدقايق اجه رضا وهو جايب السيد الي طلب يشوف البنيه 

ورحت السكنه گتلها خلي تگعد بالغرفه واختها وياها

ورحنا انا والسيد ورضا وتم العقد بعد ان سمع موافقتها وطلع السيد وبارك اتمام العقد 

وسكنه هلهلت رجعت يم حنين شفتها

 مدنگه وبعدها لابسه البرنص اتقربت منها وبستها براسها وگتلها :: مبروك بابا

طلعت وانا ما باوعت الناديه رحت للديوان وراها بدقايق اندك الباب الداخلي طلعت شفت ناديه وهي لابسه كوستم 

تفاحي وشال خالته على شعرها الي مبين مسويته تسريحه وخاله مكياج وعطر باوعت الها وهي انطتني صينية الكيك 

وكالت ... ... هذا الكيك وبعد العصير

اخذته منها بدون ما اجاوبها خليته ع الطبله ورجعت لگيتها بيدها صينية العصير 

اخذته وقدمته راح السيد وصرنا نسمع صوت غنا وهلاهل رضا گال للمحامي 

من رخصتك ابو حسين نروح نبارك انا وسراج ونرجعلك 

باوعتله هو لزمني من ايدي وهو يگلي // شنو رفضتك اتولي الدنيا ما انتهت

انا اتفاجئت من كلامه هو دك باب الصاله واجت مريم وراحت بعدها فتحت الباب دخل رضا وهو يطگ اصبع

 ويهوس هو ومريم واشوف سكنه صارت على صفحه وصل يم حنين باس راسها وهو يگول 

- - اه يا حياله بساع نصبتي ع الولد واخذتي

حنين باوعتله بعتب وباس رضا ولزمه من ايده ويهوسله والدمعه بعينه ادري بي يتمنى يكون رضا ابنه 

صار يهوسون ورضا گوم حنين وراح الامه جابها وصار يهوسون ويصفگون وياهم مريم وانا وناديه 

واگفين متقابلين واحد يباوع للثاني

اجاني رضا ولزم ايدي وانا واگف وابتسم وحنين اجت على ناديه الي صارت تضحك وهي تصفك 

گعدنا وطلبت من مريم تنصي صوت ال دي جي وگلت :: مبروك موفقين الله يتمم الكم بخير 

رضا // شكرا عمي يوم ال الك 

باوعت الناديه بتحدي وگلت :: عن قريب ان شالله رضا ما اوصيك على حنين تره حنين ورقه بيضه 

نسمه هادئه ذهب صااافي كللش اتاذت واتعذبت وانت الي راح تثبتلها انك الانسان الي فعلا تستحقها 

لان راح تنسيها كل المرار الي مرت بي

جاوبني // عمي اطمن حنين بوسط گلبي 

رضا // هاا سكنه سمعتي يامن تعب يامن شگى يامن على الحاضر لگى ذباج وذب مريم وذباني 

وخله حنينه بوسط گلبه 

سكنه //شريد منهم الله يهنيهم ويحفظهم 

باوعتله ::وانت ليش تغار روح اتزوج وخلي مرتك ابوسط گلبك

رضا بحسره //غير متانيك ياخوي على مود اثنينه سوا 

:: زين ما طول هيج اتحضر اسبوع الجاي 

(باوعت الرضا وگتله ) عمي رضا تره حنين الشي الي حبته بيكم روح الاسره يعني وجود امك 

واختك وعمك هو هذا احد الاسباب الي خلتها توافق

اتقرب عليه رضا وگلي //شلك بيها هاي سراج گول عشگته واخذته بعد تلمع عليش 

ما تشوفهم مو بحالنه 

::الله يهنيهم هسه البسن حاجابتچن عدل لان استاذ علي المحامي راح يجي 

ناديه ... ... ليش شكو 

جاوبت بدون ما اباوع الها :: ماكو شي انا دزيت علي بلا زحمه عليك ابو علي بلكي تصيحه

اي صار هسه بس خلي البنات يلبسن حجاباتهن

ناديه راحت للغرفه وجابت عبايه اسلاميه وانطتها الحنين وهي دخلت للغرفه وطلعت معدله شالها 

ولابسه عبايه اسلاميه 

دخل استاذ علي وسلم وبارك الرضا وحنين وگعد انا گتله :: الله بالخير 

هو رد باوعت الناديه ورجعت باوعت الحنين وكتله 

:: استاذ علي بما انه انت محامي البنات فاانا اريد منك شيئين 

علي // اي اتفضل استاذ سراج

:: الشي الاول اهنا حنين عقدت الله يتمم الها بخير وراح تتزوج وناديه ما شاء الله اول وتالي راح تتخرج وتصير 

مهندسه يعني الحمد لله مو بحاجة احد ان يكون وصي عليهن لذلك اريدك اتشيل الوصايه عنهن يعني اعتبارا 

من هاللحظه انا مو وصي عليهن

حنين رادت تحچي رفعت ايدي گلت :: بس قبلها انا ما اتعودت اخلي شغلي ناقص فاول شي اريدك تسوي انو 

تعرض بيت عباس للبيع وانا عرفت انو ما شاء الله هو بمنطقه تجاريه وبفلوسه تشتري بيتين واحد يتسجل باسم 

حنين والثاني باسم اختها بس اريدهن بيتين متساويات بالمساحه والبناء

هز راسه // اي استاذ ممكن نشوف بيت كبير ونشتري ونقسمه بالتساوي كل قسم باسم وحده من البنات 

وگفت وگلت :: تمام بقى المحلات لازم كل وحده يصير الها محل لكن خلي الفت نظرجن المحل الي 

چان عد هادي اكبر وبي بضاعه اكثر فالي تاخذه لازم تدفع للثانيه الفرق 

حنين // عمو ليش كل هذا هو حلالنا واحد انا واختي

:: لا بابا احسن كل وحده تاخذ حقها 

باوعت للمحامي :: من باچر ابو حسين باشر شغلك 

علي // تدلل استاذ سراج ياالله اسمحولي فيمان الله ومبروكين مره ثاني 

:: الله وياك شرفتنا 

طلعت ويا بره گتله :: علي اهم شي تبيع البيت وتشتري بي بيتين للبنات 

صار وتدلل

راح علي وانا رجعت دخلت للديوانيه واجه رضا لگاني احضر بجنطتي گلي وهو مستغرب 

وين سراج 

جاوبت بدون ما اباوع له ::مسافر 

وين 

:: البغداد 

تحچي صدك 

:: ايي خلصت اجازتي وباچر الصبح لازم اني بالدائره

رضا // زين ابقى والفجر سافر 

:: لا ابو علي هسه اروح حتى اوصل براحتي 

- - اتعشى سراج وروح وحتى انا اروح وياك 

:: ما اشتهي شبعان انت ابقى شكم يوم وبعدين تعال يجوز المحامي يحتاج شي ياالله فيمان الله 

- - - شنو ما تسلم ع البنات

ابتسمت :: مو سلمت خلي حنين فرحانه مو كل شويه اروح ياالله مع السلامه 

طلعت بره للسياره ورضا وياي ركبت هو لزم الباب وگال // من اگول عليك مسودن والعشگ خبلك 

محد يصدگني هيج بهالسهوله انهزيت انت ذاك النچر فرخه هلكدها (اياشر بايده ) هيج تسوي بيك 

نفخت :: رضا كافي ماكو داعي الهذا الكلام فيمان الله

سقت السياره وانا نفسي فارغه صرت اسوق وانا شريط الذكريات ابين عيوني اسمع الموبايل ما بطل 

رن بس صدگوني حتى ما الي خلك اشوف منو الي يتصل بيه ربطت رنة الموبايل لمن خابرتني 

وهي مختنگه وتگلي ...... عمو سراج بيبي منيره ماتت 

وبعدها تكلي ......سراج تعال محتاجتك 

لو لمن اجيت ولكيتها ما مداومه واجيت الوي اذاناتها وخلت ايدها عليهن وانا اشوفها وهي محجبه 

لو من رحت اعتذر عن كلام سجى وصارت تبچي وما قبلت اعتذاري وراحت هي واختها وتگول 

......... لاتخافون محد يقترب منه لا احنا طاعون نعدي

سقت بلا توقف نفس وضعي من خابرتني عمتي تبلغني باختفاء عباس لو من خابرتني تگلي بوفاة عمتي 

لو من اجيتها من سمعت بيها اندعمت ما اتوقفت ولا استراحيت وكل ساع اردد نفس الجمله 

:: معقوله ناديه كل هذا الشي ما صار بعينج حتى ما جاملتيني راسا رفضتيني 

:: ما اتذكرتي تعبي عيوني الي وين ما ترحين يتحركن وياج 

گلبي الي يرجف عليج 

كل التعب وياج نسيتي

هزيت راسي :: لا ما نسته كل ما بالامر انو البنيه اصلا ما تفكر بيه وما رادت اتغشني

وصلت تقريبا الساعه وحده ونص نزعت حذائي واتمددت ع الچربايه بملابسي ولان متعب من السياقه وبسبب 

طول الطريق نمت گعدت الضحى وانا اشوف نفسي نايم بملابسي نهضت من الفراش ورحت للحمام سبحت 

وبعدها اتريگت وبوكتها قررت

انو كل الي صار انسا او اتناسا انا هواي قصرت بحق نفسي ونسيتها آن الاوان انتبه النفسي 

هذا هو الانسان مبدأ واخلاق وانا مبدأي واخلاقي حتم عليه هيج اسوي وياهن لان انا اعز عباس 

ولان هو صاحب فضل عليه بعد لهنا وكافي اطمنت على حنين ويه رضا وناديه اختارت طريقها 

وانا هم راح اختار طريقي

كملت ريوك ودخنت جگاره واخذت الريمونت وصرت ادور بقنوات التلفزيون لكن ابد خيالها 

ما يروح من بالي وانا اعاتب نفسي

:: المفروض بس لگيتها وعرفت الي سوا بيها اثير اكتلها 

:: انا صوجي بس طلكت سجى چان لازم اتزوجها 

:: انا الي ضيعتها كله من عندي ما سمعت كلام ابوي واخذتها من هي بالاعداديه 

:: اي ابوي چان يدري بيه احبها بس اويلي مني ضيعتها 

::لو من لكيتها وجبتها للگاع مالت رضا المفروض اتزوجها بدون ما اخذ رايها 

:: معقوله سراج تتزوج وحده ما تحبك 

:: مو مهم تحبني المهم اني احبها

صار نفسي عالي الباب يندگ مره بالجرس ومره بالايد ودگ قوي بعدها صار الدگ على باب الصاله 

الداخلي انتبهت انا حتى موبايلي بالسياره شصاير ياستار رحت فتحت الباب وشفت ............... 

چانت ناديه وهي تبچي بمجرد ما فتحت الباب هي حضنتني وهي تگول 

... ... ليش هيج تعاقبني ليش ما ترد على مكالماتي

انا بقيت متسمر بمكاني زين شنو الي جابها او ويامن اجت هي حاضنتني وتگلي 

... ... سراج انا مو بس احبك لا انا اموت عليك 

... ... يمكن بذيج اللحظه الي فتحت عيني للحياة وباوعتلك انت صرت كل حياتي 

جريت نفس :: شلون اجيتي ويامن ؟

... ... ويه عمي رضا انا طلبت منه يجيبني 

:: ابحدكم ؟

... ... لا هو طلب من خاله سكنه تجي ويانه 

::وينهم؟

... ... وصلوني وراحو

دخلتها للصاله وانا اباوع الها وهي واگفه وترجف صرت اخزرها وگلبي يدگ ما عرفت شنو اسوي 

مجموعة من العواطف الي ما اگدر اوصفها هي گلتلي وهي تبرطم ... ... رفضتك لان احبك 

:: تحبيني 

... ... ايي من حقك تاخذ وحده كا......

قاطعتها وجرييت نفس وقاطعني اتصال على نقالها هي جاوبت

... ... اي عمو انا بالبيت 

... ...اي هذا هو يمي 

... ... اي عمو عدل كل شي مابي 

انطتني التلفون رضا گلي //عود مره ثانيه من اگول مخبل لا تزعل اگلك وين تلفونك الف وعشرمية مكالمه

باوعت للطبله بعدها رحت للغرفه وانا اگله صدگني :: ما اعرف وينه خلي اشوفه بالسياره 

رضا // هههي ههي بروح ابوك السويته بينه علي فصل 

:: اي تدلل 

رضا // شبيك سراج شو معت خايب طلعت تموت عليك تسودنت على ما جبناها او وصلتلك 

ياالله بعد اخوك انا العصر اجيكم 

:: ان شالله 

المهم 

انا وناديه اتزوجنا وصار عدنا عباس ما اسولف الكم على معاناتي وياها اول ايام زواجنا بسبب الي 

مرت بي اثناء اختطافها حاولت بكد ما اكدر اساعدها تتجاوز محنتها وبمرور الايام صارت زوجتي 

لا شنو زوجتي صارت روحي الي اعيش بيها

احبها بجنون وهي اكثر تحبني مرات تسميني عمو ومرات بابا وانا ابتسم الهاي الكلمات تجيني تحضني 

وتكلي ذني كلهن انت واكثرهن معزه الكلبي

كملت كليه واتخرجت واحنه عايشين بين بغداددوالبصره 

بيت عباس انباع واشترى المحامي بيت باسم حنين اما البيت الثاني فناديه قررت اتسوي حسينيه وقف البيبيتها وابوها 

ومن محصول المحل دائما تساهم للايتام باسم ابوها ودزت الهم حجه اثنيناتهم وانطت عنهم هواي عبادات

حنين سكنت ابيتها لان انقبلت بالبصره كلية فنون جميله قسم رسم اما اخوي وصديقي رضا فنفس ما هو رحال 

دائما صار يروح يشوف سكنه ومريم 

سكنه هم ابيتها ورضا ابنها ابد ما تركها لان هي ما قبلت تعيش بالبصره لكن تجي تبقى عدهم شهر ومرات اكثر

هادي شال من البصره المحافظه بعيده طلع تقاعد وانقطعت اخبارهم لكن ياسر. انا وهوه على تواصل 

ويا استقر بالخارج واتزوج اجنبيه وحصل على الجنسيه من احد البلدان الغربيه

كرم بيناتنا بس سلام واجه وحاول ايبرر الي صار وراوانا الفديو الي وگال كله هذا من تدبير افراح بقت علاقتنا 

بي شفافه وناديه متواصله ويه جميله الي كبرت لكن بعدهي بروحها المرحه ومحبتها 

ناديه دائما تسأل على زهراء وشمس وحتى ويه ام مرتضى ما قطعت العلاقه 

مرتضى اتزوج بنيه ويا بالمستشفى وعزل بيت ابحده

ناديه هي كل حياتي ما اگدر اعيش بدونها متندم لان ما اتزوجتها وهي بصف الثالث المتوسط يمكن ما چان شافت 

الذل والعذاب الي عيشته الها افراح وهادي 

هي تحبني لكن يمكن تحب عباس اكثر فساعات اغار لكن هي تتقرب مني وتگلي 

لا تضوج لان احنه اثنينه جهالك 

اتمنولنه السعاده

///////////////////////////// ///////////انتهى 

احبابي 

انتهت قصة ناديه الي هي الان موجوده وعايشه حياتها بدون ان تحس بالنقص 

الي ردت اوصله من هاي القصه 

انو احنه بشر وعايشين على هاي الارض لا احنه ملائكه ولا عايشين بالجنه 

كل واحد بهاي الحياة فقير غني زغير چبير اله قصه بحياته وهاي القصه هي الي ما تخلي مرتاح

مياده خطىئت خطأ فادح والخطأ اله اسبابه واخذت جزاىئها لكن المجتمع 

لا رحم بناتها ولارحم اهلها ولا رحمها 

سلدار خطئه ما يقل عن خطأ مياده 

افراح نصبت نفسها قاضي تحكم جزافا مع العلم هي مذنبه

الي اريد اوصله خلي نسأل امهاتنا خالاتنا جداتنا شلون عاشن وشنو اتحملن وخلي نحاسب نفسنا 

قبل ان نخطأ لازم نعرف ورانا 

اهل واطفال راح يبقون متلبسين بالعار لو شنو ما صارو او وين ما وصلو

يمكن ناديه عدها ضربة حظ وگف الها سراج 

لكن مو كل واحد عنده احد مثل سراج 

صدگوني سمعت قصص وشفت اشخاص اتعس بالف مره من قصة ناديه نابذهم المجتمع وهمه 

كل شي ما مسوين بس جريمتهم عدهم ام ...............ومجتمع ما يرحم 

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم