رواية أرض الخناجر الفصل السبعون بقلم ايلول
لا تسولفلي على جدك لا ترض بگلبي رض
ولا تگلي يسدله فيه ببيته ماسد الغرض
زلمه چان يگوم گوه من الخبث دگه المرض
يغفه گبل العركه جدك لا سحبها ولا فرض
من كونه انمر لم اخوانه.
══━━━━✥◈✥━━━━══
مــاسه::ارواحنا راحت نتصايح وراهم وماكو الا امي صرخت يله رد عليها وهـــب كضها من وجها يحاجيها وصيهد بالساحة يصيح عليه، ووهب محتار بأمي المتسودنه جلبت بأيده بخوف وتصرخ
-ييييمه يييمه وين رايحين يمه تردون تمووتوني.
جر ايدها يبوسها يتوسل بيها ماتخاف ويحجي بساع بس يريد يلحك يركض الصيهد الگلب الدنيا بالصياح عليه
وهـــب:: ماكو شي يممه ماكو شي فازعين لأولاد سيد عباس
جر السلاح من الگاع وركض وره صــيهد، وكلشي ما فهمنه منه سيد عباس ببغداد شلون تفزعولهم بسلاحكم شيوصلكم؟ يا سيطرة تعبركم؟ وشصاير عدهم حتى تفزعولهم، ضلينه نودي ونجيب وابوي طلع يخابر عليهم وماكو امي انتهت من الخوف كلساع تتخربط وهمه ولا واحد منهم يرد علينه
ابوي وعمي شاكر گلبوا وجوهم ومشوا يشوفونهم وين راحوا.
واحنا بالحوش نفتر وگلوبنه نار، الغروب وي الاذان الكهرباء طفت والجو يخنك مابيه هبة هوه، امي كاعده على حيلها ايدها على خدها وجده بباب الهول تسبح ساعة تدعي للولد ساعة تتحسب عليهم لان كلساع كاضين سلاحهم وراكضين.
شويه واجت رنـــه جايبها حسين وجها اصفر وكفت بباب الحوش تطكطك بأصابعها خايفه على اخوتها وتسأل بلكن واحد رد علينه گالتلها امي
-عبود وسجاد وياهم؟
رنـــه :: اي عمه وياهم واخابر محد يرد عليه جا وين راحوا؟
دكت امي على رجليها بخوف كالتلها
ايمان:: يكلي لأولاد سيد عباس، جا غير كو واحد منهم يرد ويبرررد گـــلبي.
مسحت وجها بالشيله أديها يرجفن وجده تنگ فوك راسها
حسين:: اشغللكم المولد؟
يحجي بقهر ويعاين الامي وجده من يمها نترت تصيح عليه وتغلط
-انچب وولك وين تعرف تعطلها النوب.
جرته رنـــه من ايده ودارت وجها ترد لبيتهم سدوا باب الحوش وراهم، للتسعه بالليل يله اجو مــيثم وسلطان جايبين بس السلاح چلبنه بيهم نفهم منهم گال سلطان
سلطان:: عشيرة بيت سيد عباس عدها عركة وثار قديمة وي وادم هنآه بالمدينة، وضاله معلگه بلا حل، وهمه الوادم لا بيها لا عليها بس واحد مايخاف الله داري بقاسم وجعفر ولد سيد عباس جايين من بغداد علينه، ومخابر على الوادم واصفلهم سيارتهم ومنين يمرون ومخلينهم مسبگيلهم ورامينهم كاتلين قاسم، من الله يعثرهم شاب شااب ماشايف من حياته شي الله أكبر عليهم.
صفگ ايد بأيد ميت من آلقهر، شاب مثل الوردة انكتل بلا ذنب العركة حتى مو وي اهله مجرد من نفس العشيرة اصحاب الثار ما گدرو ياخذون ثارهم من المطلوب إجوا كتلوا ابن سيد عباس، وراها بساعة اجوا ولدنه مخبوصين، بس صــيهد وكهلان ما اجوا، الولد اخذولهم وياهم هدوم وفلوس ومشوا البغداد كلهم ضلوا يمنه بس عبود وسجاد.
ومرتضى ابن عمي شاكر
ضليت يم اهلي لمن اجت ميلاد وضلت تخوزر بماريا وماريا تخزر بيها كمت لبست عبايتي وحاجيت امي
-يمه انه رايحه البيتي
-ماتضلين تباتين هناه؟
-لا يمه البنات مايرتاحن لا ماريا ولا حور هم تتنحس تريد فراشها.
دنگت ابوسنها واوصي البنات عليها وهيه ما راضيه خايفه نبات وحدنا كالتلها رغد
-انه رايحه اباتن يمهن يمه لا تخافين
بــدور:: يمه اروحن وياهن؟
هزت راسها امي ساكته، اخذتهن ومشيت للبيت ماريا مكيفه ما مهتمه الشي فرحانه لان بــدور اجت يمها اخذتها ومشت الغرفتها متوالمات چيه اعمارهن متقاربه قفلنه البيبان وكعدنا انه ورغد بالهول نسولف ربع ساعة واندك الباب گمنه اثنينا ووحده مچلبه بالثانية مدري شمالنه من زلمنا كلهم يطلعون من القرية يكتلنا الخوف، فتحنا باب الهول صاحت رغد
-هاا؟ ياهو
عبود:: انا خويه ما محتاجات شي ؟
-ها عبود، لا والله تسلم.
-اذا ردتن شي خابرن على رنـــه .
سدينه الباب ورجعنه
-خطيه يجوز البنات ودنه.
رغد:: اكلج هم حاجيه وي جــويريه شني ما ناويه ترجع؟
-لا ما ترضى، بس رغد تردين الصدك هسه انه اموتن على صــيهد ودوم ما انطي بيه ولو شما سوه اگولن صح، بس هالمره طولها، اروح واكعد وي مرتي واصالحها ورد البيتك شني حامل ومريضة وعايفها يم بيت عمي شامل؟ ادري شني طــروادة أبتلى؟
وجويريه شذنبها بهيج ايام رجلها مو يمها؟
تحسرت بحيره حاطه ايدها على خدها
رغد:: والله انه البارحت ردّت اروحن احاجيها جــويريه وصيهد اذا مو اثنينهم يتنازلون ما يضلون سوه لازم واحد ينطي من روحه للثاني، هوه كون يبطل يغلط على اهلها ناس ميته وحقها ما ترضى، وهيه كون هم تتعلم ليمت تحاجيه وليمت تسكت، حتى زحمه يوميه متعاركين والنوب على اشياء تافهه.
رفعت اجتافي ما ادري، يحيرون اثنينهم، ماده رجليَّه وحاطه حور عليهن أهزها حتى تنام، ونسمع ضحك ماريا وبدور بصوت عالي صاحت عليهن رغد يله نصن صوتهن ، دنگت تعصر خدود حور وتبوسها
رغد:: شني خاااله شني انتِ ما تنامين.
باستها وحور تضحكلها ابتسمت بفرح احب من اخواني يشاقون بنتيّ ويحبونها، عافت حور وگامت توضت صلت وقرت قرآن لأبن سيد عباس.
رغد أكثر وحده ما تعودت على وفاة عفراء ولو كلنا ما متعودين بس ضمينا كلشي بگلبنا وكملنا حياتنا راضين بقضائنا وقدرنا، اعاينلها وهيه كاعده على السجادة وتقرأ بصوت ناصي غفت حور على رجليَّه، وماريا وبدور اجن يمي كعدن درت عيوني الماريا تراقب رغد وكل شوي تمسح على زنودها مكزبر جلدها لمن رغد كضت قرآن ولمت السجادة گالتلها
ماريا:: بتمنى صير متلك.
ابتسمت رغد حطت السجادة بمچانها واجت كعدت يمها كرصتها من خدها تسأل
رغد:: شلون مثلي؟
-هيك متلك، بحس كإنك لوحة بيضا خصوصي لما كنتِ بتصلي.
ضحكت رغد تريد تحاجيها ومترددة خاف ماريا تضوج.
رغد:: وانتِ شبيج؟ يجوز احسن من عندي بألف مره، واذا على الصلاة سهله نعلمج، شعجب ما تعرفينها؟ ماشايفه عالم تصلي؟
ماريا:: مش إني ما بعرف، بس ولا مره صليت ما كان هيدا الشي اساسي بحياتنا، غير انُ انا عشت بتخبط بين روسيا والبنان شي مابيشبه شي.
تحسرت مدنكه وكملت كلامها بالروسي
-Вот почему в моей жизни все не
так.
تحجي بقهر ومدنگه ورغد طكتها صحتها من قهرها گالتلها
-ترطنين علينه شفهمت هسه انه؟
ضحكت تمسح على أيدها
ماريا:: عطيني وقت بترجملك، قلت لهيدا آلسبب كلشي بحياتي ماشي غلط.
ضحكنا وهيه تشلع بگلب رغد تحجي روسي ورغد جنها صــيهد تشيط لان ما تفهمها گتلها
-هاي كلنه بيت وليد ننقهر من بيت خليل بسبب حجيهم الروسي انه اول ما تزوجت حتى الصيهد اشتكيت على مــيثم چيه يحجي روسي .
بــدور:: تعاي ماري تعاي احجي وياي روسي عمي انه ارضى.
سانده ظهرها على القنفة وفاتحة ايدها الماريا ضحكت وراحت يمها وحده حاضنه الثانية ماريا گالتلها
-Ты милая
بــدور:: غششيني الحل شنو؟
ماريا::ههههههه يعني انتِ كتير مهضومه.
يضحكن علينه وكامتلهن رغد تريد تكتلهن شردن للغرفة كمت جبت فراشات واجيت للهول يم رغد فرشت تمددنا وخابرت على جــويريه ردت عليه تعبانه صوتها رايح
-شكو جوري شبيج؟
-ماكو شي جانت لعبانه نفسي
درت عيوني الرغد اغمزلها حتى تحاجيها هيه هم بلكن الله يهديها وتقتنع، حجت وياها وتعبت وهي قافله شويه وسديت المكالمة.
ريـــمه:: من يمنه انقهرنا على بيت سيد عباس، شايفينهم چم مره جايين علينه وحيل تقهر سالفتهم جايين على ولدنا يتونسون تالي انفجعت گلوبهم.
مرتضى بالليل اجه علينه مايدري عبود وسجاد هناه فتحله الباب سجاد طب ينتر ويغلط علي
مرتضى:: انتِ شني ما تگولين امي مره چبيره وينها وين شغل البيت ماتعرفين تجيلج ساعة باليوم تعاونينها؟؟
واكف بباب الحوش ويشمر بالحجي وانه كاضه باب الهول واعاينله كوه واكفه من بطني ضحك سجاد يهزّ بأيده گاله
سجاد:: ما تشوف بطنها واصل لحلگها بيها حيل تشتغل هيه؟ جا خويه كونك هيج حنين على امك جيب مرتك تعاونها، من عزلتوا لليوم سادين بابكم وما تتراوون حتى فروخكم ما يوصلون.
وعبالك مو حاجاه ذب عليه نفط گب بوجهه متسودن يريد يطكه وسجاد يتسودن ما يخليه يطكه رغم مره سلطان طكه وچم مره ســليم مد ايده عليه حتى مايزعل منهم بس ابد ما يرضى مرتضى يطكه، عبود كوه ساكت عود مايريد يتدخل بين الاخوان تالي طكت روحه طرد مرتضى وجر سجاد للدوانيه ومرتضى من بره ويهدد
مرتضى:: لو ما كتلتكم اثنينكم معتب.
كاموا اثنينهم يردون يطلعوله كضينه باب الحوش انه ورنه ما نخليهم يطلعون اتوسل بسجاد يسكت وبالشافعات سكتوا وكلمن مشاله، طبينه جوه يم جــويريه
مسنحه رايحه روحها وشمس تلعب فوگ راسها جرتها رنـــه الحضنها من اركز برنه وتصرفاتها انتبهه ما تفارك شمس حتى ربع ساعة وحتى لو شمس نايمه تضل كلساع تروح تعاين عليها وترجع.
عفتهن بالغرفة ومشيت الغرفتي تمددت افكر بأمي وسوالفها جياتها للبيت من كهلان موجود وضحكتها بوجهي وجنها تگلي انطقي وشوفيني شسوي واضل مثل بلاع الموس أعاين بوجها ساكته مناه لمن تطلع كهلان يتسودن شكو شي هيه جايبته يذبه بالتنور.
فززني من صفنتي صوت تلفوني جريته اجاوبه
-الو.
-الو ها يابه شلونكم؟
-هلا بيك الحمدلله انتَ شلونك؟
اسمع يمه صوت بعيد گال
-من مساع ردت اخابرج وما گدرت چانت هوسه توني يله گدرت الوذن على صفحة واحاجيج.
-الولد وصلوكم؟
-ماصارلهم ربع ساعة من وصلوا.
-خطيه، اكلك كهلان ليمت تجون؟
تحسر محتار
-والله يا ريـــمه ما ادري ولدنا باجر يجون وانا وصيهد اظن العگب باجر يله نجي مو مال نعوف سيد عباس هسه زحمه.
سكتت وهوه مدري ياهو صاح عليه گال
-يله ريـــمه ديربالج على روحج وعليهم ما اوصيج حبيبتي صيري سباعية.
-ماكو شي لا يضل بالك يمنه، الله وياك.
سديت التلفون منه وگوه غفيت الصلاة الفجر كعدت وطلعت للحوش أريد اتوضى واصلي لگيت عبود كاعد بالگاع يم باب الحوش ساند ظهره على الحايط ومدنك حاط اديه على راسه.
تلفتت مناه ومناه ادور سجاد لان ادري ما يتفارگون، ما لگيته، عدلت حجابي وطلعت من باب الهول حاجيته
-عبود.
شال راسه فاز وبس لمحني تغيرت ملامحه عاينلي بحقد خازرني
-شبيك ليش كاعد هناه؟
احاجيه بخوف مستغربه وكف على حيله ومشه للحوض غسل اديه ووجهه وذب ماي على راسه
-عبود شبيك احد محاجيك؟
دار وجهه علي حط أيده على حلگه
-اششش يا حيف وحسافة شگد چنت مقدرج واحترمج.
دك گـــلبي مرتبكه اعاين بعيونه وهو شايطه روحه ويتلفت ألباب الدوانيه خاف سجاد يفز
-ووولج بيا عين طابه البيتنااا؟
نتر يتراجف وانه من الهبطة، بطني مغصتني مسحت وجهي احاجيه
-شبيك عبود؟
ضحك مستهزئ
-شبيه؟ اضحكي علينه سوي روحج البريئة الطيبه الماكو منها يلوگلج والله غاشتنا كلنه، هسه احنا ننغش خوش، اخووي شلون گدرتي تضحكين عليه ؟؟
ووولج شلون تعاينين لعيونه وانتِ كتالة اهله؟
هزيت راسي لا دموعي يجرن وهو شوي شوي صوته يعلى وده يگدر يطكني، عاين لباب الهول من طلعت رنـــه النوم بعيونها وما فاهمه شي بس من شافت دموعي وحرگت گلب عبود وكفت مستغربه وعبود دار وجهه ساكت
يمسح على گلبه درت الرنه مختنگه اريد احاجيها كوه صوتي يطلع
-فهم غلط عبود فهم غلط.
طك بأيده على رجله وهزها بحيره يريد يحجي ومايريد رنـــه تسمع عباله ماتدري بس يعاينلي بخزر وهيه تتصفن مافاهمه شي گالها ويأشر عليَّ
-هاي المأمنين بيها وحاسبينها اختنا، تكرهنا وتغار على امي منعندنا شربت امي أعشاب تمرضها الحد ما موتتها، وولج حتى گراب خنجر ابوي هيه بايكته وكل سوايتها بس لان ماتريد امي تحب آحد بكثرها
ركضت رنـــه شالت روحها على اطراف اصابعها سدت حلكه وهوه فتح عينه مصدوم لان شاف رنـــه ما مصدومه جرته من ايده تريده يروح وياها لوره البيت وانه الوجع ذبحني امسح عيوني بأيدي الترجف ورنه تتوسل بعبود يسكت ويسمع منها مشه وياها مصدوم يريد بس يفهم هيه شلون تدري وساكته.
تبعتهم كوه امشي وكفوا وره البيت يعاينلها بصدمة وهي گالتله
-گلي منين جبت هالحجي لان مابيه صدك هاي ميلاد جاي تلعب علينه وولك.
هز راسه لا يمسح بوجهه
- رحت اجيبن هاسكي من يم بيت عمي شاكر وسمعت ميلاد تسولف وي مرتضى،رنـــه كل الحجي سمعتتته.
رنـــه:: كله جذب، هاسكي انه البارحه رابطته شوداه يم بيت شاكر؟
دار وجهه ميت من القهر ورد عاينلها گالها
-ما ادري جنت نايم وخابرني مرتضى يغلط كال اخذ جلب اخوك يفتر يمنه.
صفنت رنـــه كاضته من ايده ودارت علي متحسفه كالتله
-بالعباس حجوا هيج حتى يخلونك تسمع تعال اكعد خلني اسولفلك كلشي.
جرته من ايده تكعده يمها على الصبه وكفت على صغحة امسح بعيوني شدعي عليج يمه يوميه ملوعتني وعاله گـــلبي عيشتيني برعب، دنگ عبود كاض راسه دايخ ورنه تحجيله الحقيقة رغم انه مو بريئة بيها وبالوكت نفسه مو مذنبة.
وعبود ابد ما اقتنع مسح وجهه يگلها
-وهسه انتِ شني بررتي؟ بكل الاحوال ريـــمه دمرت اهلنا.
-مالها غرض ريـــمه، هيه منعدنا وحالها حالنه چانت امي تعدها وحده من بناتها واهلها لعبوا بعقلها وسحروها ودمروا حياتها، عبود امي وابوي وعفره كلهم چانوا يدرون ويدافعولها لان يعرفون الصار مو بأيدها ومالها ذنب چانت مسحوره وجاهل، انتَ شني افهم من اهلي وجاي تلومها؟
شال راسه خزرها ورد دنك يمسح وجهه ويحط ايده على گلبه وانه مالي وجهه ابرر بكلمة عافنه وكام طب للدوانيه كعدت على حيلي روحـــي طالعه ادري شتريد اكثر من السوته شني التريده بعد، كومتني رنـــه تحجي على عبود
-كومي ريـــمه مالج غرض احنا هاي طكتنه بيت شامل بالبداية ننصدم والنوب نضل نفكر بينا وبين نفسنا ونقتنع من وحدنا هسه الباجر عبود يفهم ويرد كلشي مثل ماهوه.
غسلت وجهي وهيه تعاينلي بقلق وخوف
- رنه ما ترتاح امي، ولا راح تعوفني بحالي هسه بس يجي كهلان هم تسويلها لعبه شلون هسه قنعوا عبود على اساس ما يدرون بيه يسولفلون بينهم وسمعهم.
-لا ما يحجون الطرواده يخافون.
ابتسمت من بين دموعي اهز راسي لا
-ما يخافون، ابوي يحط كلشي براس امي ويطلع روحه من السالفة وامي تحط عينها بعينه وتگله اي سحرتها شتسوي سوي وساعتها شوفي المصايب الراح تصير بين كهلان واخواني، رنـــه والله التفكير اكل عقلي وتعبت .
تحسرت محتارة مثلي، وضلت مكابلتني وكاعده، محد منعدنا نامت لمن كعدوا كلهم وكامت رنـــه تسوي ريوك وشمس تمشي وراها وتسأل على خالها متنحسه شالتها رنـــه تبوسها وتگلها
-راح يجيبلج لعابه بعد شوي يجي.
حطت راسها على صدر رنـــه بزعل ما راضيه، حسين صاح على عبود
-تعال اخذها جا انتَ مو خالها؟
اجه عبود من الدوانيه مايعاين الصفحتي صبح على جــويريه ومشه للمطبخ مد اديه الشمس شمرت روحها الحضنه اخذها يبوس خدودها ويحاجيها، وهي قافله تريد كهلان.
اخذها وراح للدوانيه ورنه ودت ريوكهم بأيد حسين وسوتلنه ريوك كوه على روحـــي اكلت معدتي اوجعتني گد ما تصرفات امي قهرتني، وبس كضينه ريوك عبود وسجاد اخذوا شمس وزهره يشترولهن، ورنه طبت للحمام تسبح جريت عبايتي اعاين شفت جــويريه بالغرفة تعاين بتلفونها طلعت بسرعة من بيتنا البيت آهلي.
دفعت باب الحوش وطبيت لفيت عبايتي بأيدي امشي للبيت واسمع صوتها مدري عليمن تغلط توني اوصل باب المطبخ واشوفنها كاضه هاجر من اذنها تعت بيها وتغلط وتطكها على وجها شهگت مصدومة بمنظر هاجر والدم اليجري من خشمها مشيتلها بساع وهي بس شافتني دارت عليَّ جن شايفه عدوتها جريت هاجر من ايدها ارجف
-ليششش تطكينهاا؟
صيحت بوجها واضم بهاجر وره ظهري وهيه ميته من الحرگه وبساع مدت أيدها بحقد جرت شعري بقوه وبأيدها الثانيه كضت وجهي صاحت بصوت عالي
-عليييمن جاااي تصيحين ووولج ريـــمه عليمن تصيحييين.
دفعت أيدها من وجهي بس اريدها تهد شعري وهاجر بلا صوت تجر بيها من عدي طكتها وردت علي تريد تطيحني وتسحلني دفعتها
-وخرررري.
وهي بحرگه تلفتت تريد تلگه شي تطگني بيه گومت هاجر من الگاع وهيه جرت واير مال خلاط من گد ما محترگ گلبها گطعته من الخلاط وطبگته بأيدها. تريد تطگنه فاتحه عيونها بخزر متسودنه وتتراجف
-تصيحن علييييَّ ولجن؟ انا تصيحين عليَّ؟؟؟
جريت هاجر لوره ظهري اختي ما تحمل الطكه انه متعلمه، شلت ايدي بوجها اصيح بنفس صوتها العالي
-وليش حتى ما اصيح عليج حاااسبه روحج أم؟؟؟
شالت الوايد تطكني على رجليَّه حطيت ايدي احمي روحـــي واكض الواير ما گدرت لاحتني وشاطت روحـــي كضيت الواير بين اصابيعي ما اهده حتى لا ترجع تطكني بهوستنا وصياحنا طبوا ســليم وسلطان توهم رادين من بغداد صيح ســليم متسودن واجه يركض جر الواير منها وجر هاجر من وره ظهري تخبل من شاف وجها كله دم.
وسلطان يتعارك وياها بصياح طب وراهم ابوي وامي ما تنطيهم مجال حتى يحجون تتعارك وياهم وتغلط وتمد ايدها تطگهم، ســليم حار بهاجر يغسل بوجها وسلطان حاير بيه عباله متعوره عيني بعين ابوي وهو يعاين بخزر الامي ونتر بوجها
-اسكتيي يله ليش تطكين هاجر؟
ميلاد:: بناااتي بنااتي بكيفي اطكهن اموتهن بكيفي بت الماتسمع حجايتي احفر واطمها.
ســليم مسح وجهه هاجر ودار الامي يحجي مگطوع نفسه
-كون الله خالقنا ايتام مثل اولاد بيت عمي شامل ولا بالينه بأهل بلوه مثلكم.
بلحظتها ابوي طكه راشدي بكل حيله وهوه ما مهتم يمسح بوجهه هاجر الضلت تبجي وتعاين لعيونه ويعدل بشعرها المگطع وسلطان صاير بيني وبين امي الذبت شيلتها بالگاع وجرت دشداشتها من صدرها وبكل حيلها تشهگ وتدعي علينا وتغم ببطنها
ميلاد:: كون ميتين ببطني ولا مخلفه چلاب مثلكم.
دار عليها ابوي يتعارك وياها وطگها وهيه متسودنه ســليم عافهن بهوستهم هيه وابوي واخذ هاجر الغرفته ودار علينه گبل لا يطب گال السلطان
-ودي ريـــمه البيت رجلها.. عاينــي ريـــمه لا تجين ليجاي بعد مسودنه انتِ؟ الله فكج وخلصتي من هالبيت وهالاهل المن ترديلهم؟
مسحت عيوني گـــلبي نار وابوي شال العوجيه ومشه يريد يطك ســليم جره سلطان يتعارك وياه مايخليه يطك ســليم وابوي متسودن وامي كعدت على الدرج تغلط وتدعي، طبا رنـــه تركض لابسه عبايتها بلا حجاب واديها يتراجفن، جريت ايدي من ســلطان شلت عبايتي ومشيت يمها وتبعنا سلطان ردينه للبيت رنـــه تغلط علي وتتعارك ماراضيه على جيتي وانه احمد ربي واشكره الف مره لان اجيت.
طبينه للبيت وطب سلطان ورانه غسلت ورجعت يمه بالحوش، اسولفله عليها محترك گـــلبي فرك وجهه الدنيا طالعه من عينه
سلطان:: ماضل حل الا ارد انه ورغد وياهم بس حتى هاجر لا تنطك، لان همه ما يرضون تجي يمي ولا هيه الراضيه.
مسحت عيوني گـــلبي نار
-ما ادري سلطان بس سوي شي الگه حل هيه هاجر بيها حيل تنطگ؟
زفر نفس متحسر عيونه حمر وميت من التعب طالعين من الفجر ومانايمين من امس هز راسه اي ووگف
-الله كريم تنحل، مابيج شي انتِ ما موجوعه آخذج للمستشفى؟
وكفت وياه امسح بدموعي
-لا ماكو شي .
طلع من البيت البيت اهلي، جــويريه ورنه اثنينهن يحجن عليَّ لان رحت لبيت اهلي سكتت گـــلبي احسه يفور من آلقهر كل ما اتذكر شلون كاضه هاجر وهيه خشمها يجري دم افورر وكلبي يوجعني ، وكلساع اخابر على ســليم اسأل على هاجر ضل طول اليوم بالبيت ماطلع.
ثاني يوم ب١٢ الظهر اجوا طــروادة وصيهد من بغداد، بس فتح باب الحوش وطب ركضتله شمس تضحك شالها من الگاع شبگها يبوسها يگلها
-هلااا بريحة عزيزتي هلاا بروح خاالها هلااا ببت روحـــي، شمسي خاالي.
وهيه تصحكله وتدلع لو تشكيله على حسين وزهره حتى لو كلشي يما مسويلها، مشتله رنـــه سلمت عليه باسها وطب للهول انه وجويريه كلمن كاعدتلها بصفحة وكفت هيه وانه مابيه حيل اوكف على رجليَّ، سلم وعگد حاجبه يعاين بوجهي ابتسمتله ما اريد يحس بشي گال الرنه
- اريدن چاي رنـــه .
طبت رنـــه للمطبخ تسويله چاي وجويريه اخذت شمس وطبت للغرفة اجه يمي هز راسه بشك يسأل ومد ايده على وجهي يتلمس خدي
-شبيج؟
-مابيه شي؟
باسني براسي ما مقتنع
-شني تعبانه؟
دنگت اهز راسي اي طب للغرفة وطبيت وراه حط تلفونه على الشحن ودار عليَّ
طــروادة:: ما مرتاحلج چن بيج شي موجوعة؟
ابتسمت اهز راسي لا وكفت گدامه ما اريد احجي اي شي لان ماراح يرضى ويسأل الف سؤال ليش رحتي وشوداج الاهلج وانا شموصيج، مد ايده يمسح على بطني متحسر
-ظهري موجعني وياج
-هههههه، شلك بيها هاي مرتاح انتَ على الحاضر يصير بحضنك طفل والضيم والتعب براسي.
هز راسه مقهور علي
طــروادة:: حقج والله لازم اعاونج
حجاها وحط اديه اثنينهن جوه بطني
-خل اشيلن وياج.
طكيته على ايده اضــحك
-عوفه
-عوفها قصدج.
-ولد
-بنيه.
رفعت حاجبي چنه ناوين ماناخذ سونار لان متراهنين هوه يگول بنيه وانه اگولن ولد بس ما گدرت اصبر بعد گتله
-بهاي المراجعه اخذ سونار واشوفن بعد ما اگدر وهم علمود الهدوم.
ابتسم يعاين بوجهي شال ايده يتلمس خدي متحسر
-والله اتعب من الدنيا كلها وراحتي هالنظرة البعيونج.
-يابعد روحـــي يرحلك فـــدوه عيوني
جرني الصدره يشبگني ويزفر نفس براحة وخر بسرعة من سمع يدة الباب تتحرك وطولت يله انفتحت ضحك من شافها شمس معلگه روحها تعلك وصاعده على المخده بس حتى تفتح الباب كعد بالگاع ساند ظهره على الچرباية وفتحله اديه اجته تدردم وتأشر بأديها وبس انتبه الاديها ضحك وباسهن يحاجيها
-هذا ياهو حاطلج حنه.
وهيه تدردم تدردم وتحجي سريع وتأشر بأديها بحرگه وكل النفهمه من حجيها لنه وخالو، يموووت من الضحك من تحجي. دردمتها بسرعة ويگلها
-اي والله يا خالي حگج والنوب شصار.
وهيه بأثنين اديها تأشر وتحجي تحجيي كعدت بصفه اضــحك عليها أشرت عليَّ وهم تحجي بحرگه جرني من ايدي الحضنه حط راسي على رجليَّه وطكني على زندي ويگلها
-ريـــمه طگتججج اموتهاا اليوم.
وانه عبالي يتشاقى ماراح يسوي شي، اثاريه على سوالف شمس والدردمه مالتها تحمس واخذه الواهس عضني من زندي حييل صررررخت بكل صوتي والم البيت كله عليه حار شلون يسكتني وشمس جابته براشدي وعود تريد توخرني من رجليَّه حتى تحميني حطت ايدها بشعري وجرتني صرررخت من جديد مجلبه بأيدها وخالها مچلب وياي يريد يفرغ شعري منها
وهيه متسودنه عبالها اصرخ من وراه تطگه وتدردم وتسحل بشعري دموعي تجري والضحكه شگت حلكي اصرخ واضحك وكهلان ورنه ميتين من الضحك ماترضى تعوفني وخرت من رجّل كهلان حطيت راسي على رجليها هم معضوضه وهم شعري مملش وهي ماده اديها على خالها وتحجي بعصبية
رنـــه:: صددك كهلان ما تنلام شمس.
اخذ الچاي منها يضحك ويغمزلي گال
-حطي راسج حيل على رجلها.
نزلت راسي بثگل على رجلها صاحت وتدفع بيها منها كعدت اضــحك راحت الرنه تشكيلها تعورت برجلها من الشكاله البشعري ما أدري بيها
-يمممه يممه سوده بوجهي تعااي ابوسج.
-لااا
وشالت ايدها تأشر وتخزر جرها طــروادة گوه عليها باسها ودغدغها وزهره صعدت على اجتافه حتى تفرغها منه حطهن سوه يدغدغهن، ضحكتهن تنسينه كل هم وتترس بيتنا روح .
راح سبح واحنا گمنا يم جويريه بالغرفة رنـــه تگلها
-انتِ حامل بخنفسانه دام خلگج بخشمج .
جــويريه:: اشوف بيج يوم يا رنـــه وعلي اكعدلج من الصبح لليل شماته وخري لعبانه روحـــي لا احطها بخضنج.
رنـــه:: عووع غدي وخرن عني.
وكفت تضحك علينه وجويريه متحلفه بيها، كالتلها
-وين بريا عنج، ينزل لو لا اذا ما اگله استعجل بالعرس رنـــه تريد جهال.
-لا احنا نختلف ما نخلف نشتري.
جــويريه:: طاحظج.
طــروادة:: اشتشترين؟
صاح عليها من الهول ودك باب الغرفة جوري بساع لبست حجابها ولمن إنه فتحتله الباب يله طب يعاين لرنه وهيه تعض بشفتها متفشله گالتله
-طيور، لان طيورنا هجن.
هز راسه خوش وعاين لجوري يحاجيها
-شلونج خويه؟
-الحمدلله بخير.
-ما محتاجه شي؟
-سلامتك
-واحد محاجيج مضوجج مناه مناه خاف ريـــمه رنـــه. يسمعنج حجايه بس كليلي.
ضحكت تهزة راسها لا وانه ورنه متخوصراتله ضحك وجر رنـــه منّ ايدها جوه جتفه گال لجويريه
-ترى رجلج يوميه يگلي اريدن مرتي وانا ماجاي ارضى
دنگت ساكته رد گالها
-انا ما رايدج تطلكين ولا يخرب بيتج بس ما اريدج تردين هيج ببساطة وتالي يصير زعلج يمه سهل ومايهتمله.
جــويريه:: هاي هيه خويه التشوفه صح سويه.
هز راسه خوش وطلع من الغرفة مشيت وراه احاجيه
-كهلان، ترى حامل وبهالوكت تحتاج زوجها يمها حاول تصلح الأمور بينهم.
هز راسه لا
-صــيهد اخوي واعرفنه يريد يموت على فراگها بس ما يتنازل وهالشي يخليهم دوم بمشاكل خل يتعلم ينزل من روحه الخاطرها وهيه هم لازم تلين وياه، خلي اشوفن صــيهد وين توصل وياه وتالي احاجيها على أغلاطها هيه.
-والله ما ادري بكيفك بعد اختك وانتَ اعرف بمصلحتها.
ابتسم مد أيده يكرص خشمي، شويه ومشه للگاع يريد البستان يكضي حتى يبدي الحراثة.
راسلت سليم اسأل على هاجر صورها الي بالغرفة فوگ كاعد ترسم على لوحات مو ورق كاتبلي
-وياج الأميره الرسامه هاجر ورئيس الحراس ســليم اغه.
-ههههههه فـــدوه شكاعد ترسم راووني
-وين انتِ؟
-بالحوش يم الباب.
-عاينــي راح اراويج من الشباچ.
وكفت على حيلي اعاين لبيت اهلي وخر البرده وفتح الشباچ هاجر أشرتلي بأيدها تسلم علي وسليم شايل اللوحه طلعها من الشباج يراويني، عباره عن بستان نخل ووكت الغروب من الشمس لونها برتقالي صفگتلها أأشر عفيه عفيه طبب الوحة وسد الشباچ كتب
-اكلج شو مناه بيت عمي شامل كله ينشاف هم جنتِ تحاجين طــروادة من الشباج؟
-شلك غرض بعد صار رجلي محاجيته من الشباج محاجيته من وره الحايط عمي ياهي مالتك الله اكبر غير ررررجلي.
-طاحظج وحظ رجلج يا خايسه ام الشبابيچ.
-تسلم عليك ماريا.
شافها ومارد دقيقة وودالي صورة لمن فتحتها طلعت نعاله ضحكت ومارديت عليه، گمت من طب عبود سندت ايدي على الحايط عاينلي ودار وجهه طب للبيت وانه امشي على كيفي اعاين بالحوش. عوزه كنس ورش، رنـــه ماجاي تلحك لوحدها وانه صايره حركتي ثگيله ماتخليني اشتغل.
اجتني رنـــه تركض خايفه كتلها
-ها ها شبيج؟
-اندري عبود يگلي امشي شوفيها چنها متخربطه.
-لا والله مابيه شي.
هزت ايدها تحجي على عبود، طبينه للبيت بس كعدنا خابرها بريا وانه وجويريه اثنينا حاطين أذنه وياها نسمع وكل ما تريد تگوم نچلب بيها وهوه لوتي يبديها شلونج شخبارج ويحجي على الدوام النوب يرگعها بمشتاقتلج يخلّي البنيه تصب عرك وبس تتحمحم
بريا:: متّت البارحة والله تمنيت لو يخلوني انزل بس يوم واحد اشوفنج وارد.
-هاه احم.
-اي، اكلج رنـــه جا انتِ ما تشتاقيلي شو كاضيتها احم واحم؟
-احم.
-وشحط شني؟
-الشحطك شو صاير تغلط شني عبالك تزوجتني بعد صرت تغلط عليَّ عادي واسكت ترى ما أرضى اردلك رنـــه ام السياج والله.
ضحك من كل گلبه واحنا نكرص بيها ونعض بأصابعنا حتى تسكت وماتحجي هيج بس شيسكتها
بريا:: عبالي عقلتي.
-عاقله من يوم يومي.
-هم صح.
-بربر
-اااخ گـــلبي .
حجت بدلع وانه وجويريه نسحل بيها نتصنت ونهز راسنا اي هيح احجي صيري خوش بنيه خلتنه نندمج وياها وگالتله
-جــويريه وريمه كاضاتني يسمعن وياي مايخلني اگوم.
طكتها جــويريه حييل وانه عضيت اصبعي متفشلات وخرت التلفون من اذنها شغلت السماعة وهو نزل دوسه ونص
-هاي شمالها هاي نجمة السلف صوج الكديش صــيهد، وهاي الثانية بت شاكر بويه باليتني بلوه انتِ؟ ما تكفن شرچن عني طاحظ رجولتجن.
جــويريه غطت راسها بالبطانيه ورنه كامت مكيفه تريد تروح لغرفة اهلها تحجي وياه كضتها شمس وهيه تموت على التلفون والمخابره اخذته منها وضلت ترطن على بريا وشوي وسدته بوجهه ورنه تضحك عليها.
بالليل كهلان راح لشغله اكثر شغل اكرهه الحراسات يتعبه حيل عيونه يضلن يوجعنه، على اساس يرجع بالسته بس انصدمت من كعدت الساعة بالخمسة ولگيته بالحوش كاعد جوه الشجره ظهره علي يدخن ويقرأ بصوته الخانگته العبره
طــروادة:: گلبي هايم بطرواك
عفت اربع جروح بكلبي تنزف دم
جر نفس طويل من الجكاره متحسر وطفاها يكمل قرايه بصوت مهضوم
جرح ضيم الوكت والثاني جرح الهم
والثالث جرح مسراك
بعد رابع جرح لايبرى لا يلتم
يمحبوبي جرح فركاك.
مشيت يمه متردده اعاين الايده فاتح التلفون ويعاين بصور عفراء والغصه تصعد وتنزل ببلعومه كعدت بصفه متحسره ادري بروحي ماراح اگدر اوسيه وابجي على صوته، يتلمس صورتها ويقرأ بخنگه سند راسه على جتفي وسكت صوت حسرته وجرت نفسه تمرد گـــلبي اثنينا نعاين الصورتها البتلفونه وبس حركت ايدي اريد يرفع راسه حتى احاجيه شهگ وضم وجهه بجتفي گـــلبي مرده
-كهلان
-اااخ يا بويه يا عزيزة روحـــي يا عفره يا خويه.
بچيت گـــلبي متگطع ما اگدر الومه ولا اگدر اصبره حط التلفون يم وجهه يبوسه ويحجي وياها روحه رايحه
-ساعة... ساعة ما ترحين من بالي مهدود حييلي ووولج بالعباس مهدود حيلي، طك گـــلبي عليج خووويه طك گـــلبي، يا روحـــي .
نمرد گـــلبي وگابلته ابچي بصوت بدل ما اوسيه عاين لعيوني دموعه يجرن ودكّ على گلبه بحرگه
- نار بگلبي نار بگلبي ما تطفى عزيزة روحـــي هااايه عزيزة روحـــي ام شمس اخيتيي.
وعلى صوتنا طلعوا سجاد وعبود، كومني طــروادة ساندني عيونه حمر بس غسل وطب للغرفة نام، كعدت جــويريه لعبانه روحها ومالها خلك لوره الريوك طلعنه كعدنا بالحوش وبس سمعت صوت صــيهد ركضت طبت للغرفة
جــويريه:: امداه الگلبي اليحن حتى الصوته، طبيت للغرفة احجي وي روحـــي بعدني بالأشهر الاولى وصرت احس روحـــي ثگيله الله يساعد ريـــمه، جريت تلفوني احاجي ندى گالت
-عمتي زعلانه منج.
-وديلها التلفون خلّي احاجيها
ودته الها بس گالتلي الو گتلها
-ها ايمانو ليش زعلانه.
-ها ولج بت نضال خايبه عاينــي لو ما زوجته شوفيني وولج ما تردين.
-خاله ما ارجع ابنج مايريدني
-البارحه نايم على رجلي يون عليج
-خاله فـــدوه لا تكعدين تشكين حاله يمي وتخليني الين عوفيني قوية وما متنازله
-جبح حالج يلقويه
ضحكت اسأل على صحتها ورديت گتلها
-صدك البارحه نايم يمج شبيه شنو مريض؟
-لا گال روحـــي رديها.
-ها وانتِ شگلتي
-گتله انتَ الزعلتها انتَ الردها بس عاينــي خيبه جــويريه يكونه يجي عليج وما تردين وياه الا اغبش من الصباحيات اطر السلف واتخطبله.
-ههههههه والله اخطبيله اشهره والقران ياهي التخطبينها اله اروحلها اگلها مسودن بس يتزوجج يحبسج بالكنتور ويدك على راسج بسامير بجاكوج
-دهر صابج يملفوكه
-هههههه اكلج خاله بــدور وين
-تعاي خايبه بــدور حاجي هاي مرة اخوج.
وبدور بس كضت التلفون سوت روحها تبجي
بــدور:: يهون عليج كل ما اشوفن صــيهد انقهر لان زعلكم من وراي، ارجعي هسه وباجر ازعلي حتى انه ما انقهر وألوم بروحي.
-معليج انتِ نجبي اكلج بــدور اريد منج شي
-كولي كون مو صعب
-روحـــي الغرفتي اريد دشاديش كشمير أربعه خليهن يمج وانه اودي عليهن زهره
-خوش وبعد
-بس هنه.
احجي وياها وسمعت صوت مــاسه يمها صاحت ياهي هاي واخذت التلفون منها تتعارك
مــاسه:: تخابرين بس بــدور وندى وماتخابريني.
-خيبه خابرت علمود يودلي دشاديش شمالج.
-يا دشاديش انه اجيبهن.
-هنه السود جا يا دشاديش.
-ههههه اكلج ما تجين شويه يم اهلي
-لا
-امداج روحـــي يله يجوز بالليل اجيج.
سديت التلفون منها مبتسمه نص ساعة وخابرتني من تلفونها
-ها مــاسه.
-اكلج جوري اعذريني رديت البيتي وماجبت دشاديشج وامي طكت بــدور وزعلت.
-ياا ليش شبيها؟
-خيه تتعارك وي رضا بله رضا بگدها؟
-تتشاقه وياه وترى تحبه.
-لا خيه ندى ما ترضى وتسودنت من بــدور طكته امي كضت بــدور وكتلتها.
-شوف حظي
-المهم خيه اعذريني وبدور خبثت بعد حلفت ما تجيبهن.
-يله عوفيهن بلكن باجر بــدور تجيبهن.
-جا اكلج هوه صــيهد گبل شويه رد البغداد اجوا عليه شيخ حيدر وشيخ رياض اخذوه وراحوا السيد عباس تعاي انتِ اخذي غراضج.
-ها اكلج هو البارحة اجه شنو يميه رايح البغداد؟
-فاتحة فاتحة لا تخافين مارايح ياخذ مره.
-ههههه مايهمني
-أكبر جذابه، يله روحـــي اخذي هدومج ولا تضلين بمنية بــدور .
-يله ولي سلمي على ماريا.
سديت التلفون منها وكمت لبست حجابي وعبايتي گلت الريمه ومشيت، وياي حسين وصلني الباب الحوش گال
-انا راح اكعد هناه حتى لا جده تحاجيني كملي وتعاي
هزيت راسي خوش كعد على بلوكه بأيده تلفون عبود يكنك بيه، طبيت للحوش باب المطبخ مال اهله مسدود مشيت بسرعه ما اريد جده تشوفني طبيت للمشتمل شغلت الضوه اعاين البنات ماعايفاته يتوصخ دوم ينظفنه مشيت للغرفة دخلت اباوعلها بس غطه الچرباية مخربط.
فتحت الكنتور طلعت ملابسي، اختار واخلي على الچرباية اخر دشداشة طلعتها وسديت الكنتور التفتت لباب الغرفة وفزيت مخروعة من لگيته واكف بالباب مضيك عيونه، گـــلبي دك حيل مرتبكه دنگت اشيل ملابسي واحجي متلعثمة
-بس اجيت اخذ ملابسي.
دخل للغرفة وسد الباب وكفت اباوع الايده قفله وشال المفتاح رجعت ملابسي على طرف الچرباية وشلت راسي اباوع بوجهه
-أفتح الباب صــيهد
-واذا ما فتحته؟
حجه وحط المفتاح والسبحه على الميز واجه وگف گدامي حاط اديه وره ظهره، باوعت بوجهه ساكته نزل عينه من وجهي لبطني مد ايده يريد يتلمسها رجعت ليوره باوعلي بخزر
-وخرر.
مد أيده الزندي يجرني النفس المكان انسند ظهري على الكنتور ومد ايده غصب يتلمس بطني بعدت ايدي عايفته يسوي اليريده.
-مو گتلج.
باوعتله عاگده حاجبي شال عينه العيني يحجي بقهر عبالك مسويه فد جريمة إبتسم مستهزئ
-جنت ادري بيج بس اگلج البيت الج تسندين ظهرج وترحين.
ضحكت مصدومه دفعت أيده من بطني حييل
-هذا الفهمته؟ صارلي اشهر زعلانه وكاعده يم كهلان لان عرفت بيت ابويه الي وصار عندي ظهر وبعد ما اريدك؟ هيج فهمت انتَ؟ لو هامني البيت ماجان بقيت كاعده يم بيت كهلان ميته من الخجل لان مزيده هموم الرجال، لو هاامني البيت جان رحت ومابقيت بالقرررية.
بجيت احجي بحرگه وهو وخر من گدامي بعصبية
-صوووتج.
-تفهم كلشي مثل ما تريد انتَ شلون ما يعجبك تفهم.
-اسكتي .
-اسكتي ماعندك حل غيرها من كلامي ما يعجبك لازم اسكت مووو.
هز راسه اي واحه بسرعه حط ايد وره راسي وايد على حلكي يسكتني صررخت مچلبه بأيده وابجي وهو لازمني بقوة ويحجي بحرگه
-يوميه تديرين ظهرج وترحين وادوس على روحـــي واجيج اتعذر وارضيج شني الشفته منج؟ شي واحد ما سويتيه گتلج بس اسكتي من انا مغضوب علي ومشتعل اسكتي عووفيني لا تحاجيني تدوسين ببطني والا تحجين وتحطين روحج گوه گوووه تخليني اغلط حتى ترحين.
دفعت ايده من حلكي ابجي وخر من يمي محترك گلبه ويحجي بغضب
-مشيت وياج شلون ما تردين واغير بروحي وباطباعي بس حتى ارضيج، وكل الردته بهالوكت ما تحاااجيني، شيصير لو ساااكته ربع ساعة ررربع ساعة ما تگدرين تسكتين الا تعانديني يله ترتاااحين.
-ما عاااندت كتلك اخواتك هيج يخافن منك حجيت علمودك وعلمودهن.
-مووو وكتهااا مو وكتهاا تحجين.
كعدت بالگاع بين الكنتور والچرباية ميته من البجي وهو واكف يم الميز يحجي ويدك على الميز عفته يحجي وحتى من يسكت ويريدني احجي ما ارد اباوعله وامسح بدموعي الحد ما سكت حط ايده على عيونه متحسر شال راسه يباوعلي حاجيته بهدوء
-اتمنى الطفل يموت ببطني ولا يجي يعيش بهيج مشاكل.
فتح عينه بصدمة واجه بسرعة كعد گدامي مد أيده يلزم وجهي
-تتقصدين تحرگين گـــلبي .
هزيت راسي لا
-شني التردينه؟ گليلي هاي چم مره تديريلي ظهرج وترحين هسه بكلهن انا الغلطان آمنا بالله بس مو بكل مره ترحين وچنچ ما مصدگه لگيتيلج حجه حتى تعوفيني ولا چن مستعزه بيه ولا مهتمه بأي فرصة تجيج شردتي.
-تسب بأهلي صــيهد وتريد ابقى ؟ تحررك بگلبي انتَ.
اشهگ بين اديه روحـــي ممروده تقرّب يحضني ويمسح بعيوني
-ما رايد احرگ گلبج والله وداعت امي ما رايد احرك گلبج، انتِ جبرتيني انتِ دستي بگلبي بس ردت تسكتين ماكو موتيني.
-تگلي ما مستعزه بيه، ليش انتَ المستعز مو اول ما ودولك بلاغ المحكمة كيفت واجيت تسأل على الموعد.
-جنت ادري بيه جذب
-حتى لو تدري بيه جذب رضيت بيه وما اهتميت صار كم شهر زعلانه ما اجيت وحاجيتني، حرمتني حتى من فرحة الحمل خلصتها بچي شلون يصير عندي طفل واني بهيج مشاكل وهيج وضع.
-كافي جوري
مسحت عيوني والشهگه خانگتني اريد بس اسكت ماكو بطني بقت توجعني
- تريد تكول عليَّ اني غلطانه كول ميخالف وحقك صح اني ما اسكت وما اسمع كلمتك بس انتَ هم غلطان على كلشي اعصاب وبس احاجيك تسب اهلي وعلى اتفهه سبب كاسر الغرفة،وفوك كل هذا تگول الكهلان ما اطلك الا من تجيب مستعز بطفلك مووو بيه.
هز راسه لا متحسر
-ما رايده انا رايدج.
- مبين متفق وي اخواتك يغشني واجي بس حتى تتلمسه وهوه ببطني.
-سدي حلكج كافي جاي اگلج انتِ سولفتلج على البيت مناه زعلتي مناه وعلى شي جنتِ تگدرين تزعلين وتضلين بالبيت مو ترحين يم كهلان وهوه ما يصدك اجته من الله يشد حزامه وياي، غلطت وياج ازعلي وضلي مكابلتني انا اجيج واعتذر وتنحل مو تديرين ظهرج وترحين محد هامج.
-يروح ويرجع النفس السالفة محد هامج.
شال اديه يمسح عيوني وتقرب يبوسني براسي كوه يحجي
-اعتذر .
باوعت لعيونه امسح دموعي من خدودي
صــيهد:: امشي وياي صح وشوفي ياهو اليحرك گلبج بس لا تعانديني بوكت الانا متعارك وي احد، وعمي لال تسكتين احجي بس لا تعانديني والله مو بأيدي انا ادري بروحي ادوس بالحجي واخرب الاولي والتالي.
هزيت راسي خوش، رجع تقرب يبوسني من راسي وخدودي گمت من يمه خليت عبايتي على راسي وهوه يباوعلي شلت ملابسي خليتهم بجنطه صغيره يباوعلي عاگد حاجبه عباله راح أبقى وكف وياي
-وين؟
-البيت اخوي
-خرررب روحه.
حجه بحرگه شلت المفتاح من الميز فتحت الباب خازرني
-ما اگدر ارجع وهوه ما قابل.
-جعله لا رضى هالخايس
اجه وراي طلعنه للهول سوه يحجي على كهلان ويغلط عليه مسحت عيوني بردن العبايه ساكته طلعت من المشتمل قبله والمح البنات كلهن واكفات بباب المطبخ ومادات روسهن وبس طلعنا شردن سهله مــاسه ام الدكايك.
عفته يسد باب المشتمل ومشيت ما مهتمه صيح
-اصبرررري.
درت عليه وهوه فتح الصونده يغسل اديه
-هذا حسين منتظرني ترى، رايحه وياه.
-فنج التحركتي الا أكسر رجلج.
-شكد متحسن أسلوبك ماشاءالله بلا حسد.
نكث اديه واجه يمشي يمي
صــيهد:: صلي على محمد، كل هذا التحسن علمودج
-الله يحرمنا من هيج تحسنات.
-متعافيه.
طلعنه ومشينا وحسين مندمج وي التلفون ولا انتبهه علينه لمن صــيهد صاح عليه
-حسسين.
شال راسه بس لمح صــيهد صااح
-يا هلااااا بالذذيب.
-انچب امشيي.
ضحك واجه يركض طكه صــيهد يگله
-كض طولك شويه تريد تتسابق وي اخوتك؟
حسين:: اتمرجح بالباب عشر دقايق يوميه اريدن اصير اطول زلمه بقرية لفحة.
يمشي يصف صــيهد وصيهد حاط ايده على جتفه ويجره مناه ويوديه مناه بهذله
صــيهد:: شعدنا قرية العمالقة كلها كلها قرية لفحة آم الخناجر.
حسين:: قرية لفحة شرابة الدم.
عاينله صــيهد عاگد حاجبه وحسين يضحك ويگله
-والله يوميه واحد مكتول.
عفتهم بالباب وطبيت للبيت ركضت خابرت مــاسه ماترد عليَّ خابرت ندى وخاله ولا يردن سهله هاي هيه سهله .
رنـــه وريمه يضحكن علي واني بس ودي الزم ماسه أريد اعضها، الحد الليل گالن البنات صــيهد هناه ختلت ساكته لمن اجه كهلان صاحني وهالمره ماعافني وحدي وياه دخل ويانه للدوانيه وكل ما يحجي كلمه صــيهد يكح لو يشرب ماي الحد ما گاله
-والله اطردك وما اردها وياك.
صــيهد:: ما گلنه شي ترئ ساكتين.
طــروادة:: مرتك هيه مو عدوتك حتى احرك گلبك وتحرك گلبي واحد يوكف وي الثاني وواحد يتعلم على اطباع الثاني ويعرف شلون يتعامل وياها مو كله صياح وغلط، گبل لا تاخذها جنت خابصني اخ يا نجمة السلف واخ يا عشگي الها اشو اخذتها وتسودنت.
خزر كهلان يريد يگومله وكهلان ولا مهتم ويحجي گال
كهلان:: بعد خويه كليلي شني المشكله العندج خل نحلها.
هزيت راسي ماكو شي
-هيه بس عصبي ويغلط على اهلي ويكسر الغرفة بس هذن.
رفعلي حاجبه يسويلي بأيده سهّله بعيني دارله كهلان گاله
-هذن حجينه عليهن انتَ شعندك عليها؟
صــيهد:: ماكو شي .
-جــويريه خويه راضيه ترجعيله.
مسحت وجهي هزيت راسي اي وگمت للهول اجه وراي كهلان
-تعاي خويه احاجيج
وكفت يمه ويم ريـــمه يحجي بهدوء وصوت ناصي
-بعد اخوج اسكتي منه من تشوفينه يتعارك وعصبي لو تحاجينه حجايه حلوه تبرد گلبه لو تغلسين وتسكتين عليمن تجيبين الروحج وجع الراس، ترى وعلي صــيهد يتسودن عليج وعيونه تلاحك ظلج وين مايروح بس هوه هالطبع بيه اعصاب ويفقد على ابسط شي، انتِ وياه تتعاونون تتغيرون علمود حياتكم وطفلكم شويه شويه.
-ان شاءالله
-وعايني يشهد الله ترى انا ما مستثگلج ولو تضلين هناه العمر كله اختي واحطج بعيوني بس اليوم ماكو أخو يرضى بخراب بيت اخته.
-ماقصرت خويه والله ما اعرف شلون أجازيك
احجي مستحيه منه وريمه شاكه حلكها الضحكه مدري عليمن، دخلت للغرفة اخذ اغراضي وهي ورنه يحجن فوك راسي رنـــه ما قابله وريمه عكس حجيها وتوصي هيج تعاملي وهيج سوي جاي اجمع بأغراضي كالت رنـــه
-المفروض يجيب ساده وشيوخ يرجعونج ضحك عليج أجاج وحده
ريـــمه:: اصيح الكهلان رررنه؟
-لا لا جوري صدك خطيه صــيهد يحبج ارجعي ارجعي.
مسحت عيوني اضــحك وهيه ضايجة لان تعودت عليَّ أنام يمها توسلت بيها اخذ شمس وياي ماقبلت، طلعت للحوش صــيهد وكهلان واكفين اخذ الجنطة من عندي وطلعت وياه يهز بأيده
-ماخذه هاكثر هدوم وين رايحه للمريخ؟
-غير اغراضي.
سكت واني امشي وياه واحس بروحي بعدني زعلانه بس ساكته دخلنه للمشتمل وهوه راح الامه، رتبت اغراضي واحجي وي روحـــي لو عــفراء موجوده ما احتار احاجيها وهي تكلي اي عفيه همزين رجعتي وبسرعه يبرد گـــلبي بس من ابقى وحدي احس روحـــي مضحوك عليَّ.
غيرت الفرشة مال الچرباية واخذت ملابسي دخلت اسبح من طلعت لگيته بالغرفة يشرب چاي ويحجي بالتلفون مدري وي منو وكفت امشط شعري واباوعله بالمراية يحجي ويتلفت عليَّ كل شويه ركزت وياه من عرفته يحجي وي سيد عباس سد التلفون منه ووگفت طلع غسل وغسل كوبه يله رجع وكف وراي يباوع وياي بالمراية
-اجيتي بس بعدج زعلانه!
سكتت اباوع لعيونه گال
-جبتلج شي
-شنو؟
درت عليه والمشط بأيدي مشه للكنتور مالته فتحه وطلع علبه صغيره جابها واجه گدامي فتحها وشال السلسه گلاده وبيها قلب والوصل ضل بالعلبه ابتسمت اباوعلها كال
-مال صلح.
-حلوه.
عبالي راح يصير رومانسي ويلبسها الي، رجعها العلبتها وخله العلبه بأيدي يحك طرف حاجبه ويسأل
-عجبتج؟
-أي حلوه.
هز راسه خوش ومشه كعد على الچربايه مشيت للكنتور اريد اضمها دخلت ايدي ببطن الكنتور وفتحت العلبه اشوف الوصل وشكد سعرها اخاف مغشوش بيها ومالبسني لان سعرها غالي شفت سعرها ميتين وخمسين. زين سعرها ومناسبها جا شبيه مقهور وحتى مالبسها الي.
ضميتها ورجعت يم المرايه امشط وهو كل شوي يباوعلي
-احم، بعدج زعلانه؟
هزيت راسي لا
-جذابه جوري اعرفنج انا عيــونج من يعاينلي بزعل اعرفهن.
دنگت ما اخلي عيني بعينه مو كلش زعلانه بس بعدها حازه بخاطري شلون عافني هلكد وما اهتم ولا حاول يرجعني.
لبس قميصه وطلع من الغرفة كملت شعري وشلت هوستي تمددت بفراشي اباوع بتلفوني وهوه مارجع الحد ما غفيت وفزيت على صوته
-جوري.. جوري.
فتحت عيني يوخر بشعري الوره اذني ويتلمس خدي بهدوء
-اكعدي والله ما اگدر انامن ، يمي وزعلانه
-ما زعلانه.
-اكعدي احجي وياج.
جرني من ايدي كعدني وكعد مقابيلي
-شلون ارضيج.
-هاي هيه مازعلانه وألله.
حجيتها اباوع بوجهه حاير شلون يراضيني وشيسوي ساعة ضل يله اقتنع إنه مازعلانه والسالفة خلصت. تمددت بحضنه لافه ايده علي عضيتها من تذكرت اتفاقه وي مــاسه گال
-خابرني والله هيه ورغد وبدور وامي كالن راح نخليها تجي للبيت تعال حاجيها وانا كيفت اجيت بساع
-ترضى انتَ يغشني؟
-لا ولا ارضى
-مــاسه تستاهل اكتلها مو؟
-اي باجر اكتليها تعاي الحضني هسه تعاي نعلعله.
شلت راسي اباوع بوجهه أريد يكمل غلطته ضحك وكمل
-روحك كهلان.
رجعت ضميت وجهي برگبته مبتسمه.
ثاني يوم من الصبح اخذني الماسه كتلتها ومن طلعنه منها باوعت البيت رغد گال
-تطبين تكتلينها؟
-لا رغد قوية تكتلني عوفها
مشينا الاهله ولزم بــدور يم امه ويگلي
-تعاي عضيها.
واني اضــحك واكله
-عضها انتَ اني مو چلب.
راحت ضحكته واني ما منتبهه النفسي باقيه مكشره بوجهه عاف بــدور وباوع الامه گاله
-نحمده ونشكره على هيج عقول مشيوله ومحطوط بمچانها احجار.
طلع ورگع الباب حيل وخاله جرتني تعض بيه وإني احلف ما ادري، وبس رجع سويت مثله حاجيته طبيعي ولا چن زعلان وهوه عده الموضوع. لان صادفت بيت غانم اجوا خطبوا بــدور ورفض تعاركوا وياه وابوه تعارك وياه التهه بعركتهم ونساني.
ريـــمه:: طبيت بشهري وي عيد اضحيه ما گدرت اروح وياهم گتله اموتن بس اروح، وهوه ضايج لان اهلي وعمي وليد وجده هم كلها تروح علمود جدي، اجن ويانه مــاسه وماريا للطبخ والبنات ما گدرن لان هم عدهم طبخ، وانه كوه امشي وافتر واساعدهن، والفجر مشوا للزيارة ضلن يمي ماريا وماسه.
وانه روحـــي ممروده عليهم ادري من يرحون شيصير بحالهم، ثاني يوم العصر يله اجوا، عيونهم رايحه من البجي ورنه صوتها مبحوح غاد لاكين اهل منذر هم والمايبجي عليهم يبجي على شمس.
رنـــه:: بكل مره اشوفن گبرها احس گـــلبي ينصدع واعاين الشمس واصبر روحـــي بالگوه، وبريا يتصل باله يمي وطول اشهر مانزل شعل روحـــي شعل من الخوف .
كبل المدارس بأيام فزيت على صريخ ريـــمه رحتلها اركض وطرواده توه طاب للبيت عيونها حمر وهي ميته من الوجع وتصرخ كلشي ما اعرف ما ادري شسوي وطرواده ميت من الخوف عليها ركض جاب رغد وسلطان واجوا أخذوها للمستشفى
كل ربع ساعة اخابره كاتلني الخوف وهوه يگلي
-ما ادري رنـــه بعدهن خافن بيها شي
-لا لا ان شاءالله ماكو شي لا تخاف.
واسمع يمه سلطان يحاجيه سديت التلفون الوب نص ساعة ورجعت خابرته اسمع ضحكته وكلبي يدك حيل
-ها كهلان؟
-ها يابعد گـــلبي
-بشرني.
-هسه ساعة ونجيج جايبيلج علي وأمه.
-يا الله الحمدلله على سلامتهم.
سديت التلفون منه ومدري شبيه بچيت الحد مانشفن دموعي وشمس وزهره يعاينلي بزعل حضرت الغرفة فرحانه وعبود وسجاد بساع راحوا جابوا طلي واجوا
كطعوا گـــلبي للأربعه العصر يله اجوا ركضت للحوش طببها كهلان هوه ساندها ورغد شايله الطفل ومغطيته بعبايتها سجاد ذبح الخروف وزهره مجلبه بأيد رغد تريد بس تشوف الطفل وانه اضــحك ودموعي يجرن اريدن اهلي يشوفون اول ابن الابنهم ويفرحون وينهم.
ساعدت ريـــمه تمددت بالفراش المادته الها انه بالگاع وبصفها سله صغيره للطفل. خلته رغد بيها وشمس وزهره مكابلاته وهوه بعده هلكدوته وحتى عيونه مافاتحهن.
الفرحة والضحكة ترست بيتنا والولد يجون مكيفين بس امها وابوها ابد ما اجونه.
من الصبح لليل لو البنات يمنه لو الولد وياهو اليدك الباب يصيح
-بييت ابو علي.
وطرواده يضحك بفرح ويمشي يفتحلهم الباب، طفل بس غير هوواي خلانه كلنه نضحك ونفرح، اول يومين من المدرسة ماداومت علمودها ما گدرت اعوفنها تالي رغد گالت انه اجي يمها يله داومت.
وماصدگت يكضي الدوام حتى ارجع وأشوف علوش اجه عبود اخذني ضايج ومن اسأل شكو مايرد علي لمن وصلنه للبيت طبيت للحوش واسمع ريـــمه
شكرا لزيارتكم عالم روايات سكيرهوم
