رواية الفتاة المنحوسه الفصل السابع
قبل اي حاجه تعالوا عشان اقولكوا الحلم اللي حلمت بيه الاول و بعدين نشوف المصيبه بتاعت انهارده
حلمت خير اللهم ما اجعله خير اني لابسه فستان ابيض طويل و فرده شعر الطويل الاسود و كان بيرفرف في الهواء وكنت ماشيه في جنينه و الورد حواليه من كل ناحيه و فجأة شوفت الظابط وللاسف الشديد لسه مش عارفه اسمه لحد دلوقتي اه وربنا المهم اول ما شافني جريت عليه و هو فاتح ايده الاتنين كنت بجري عشان اترمي في حضنه بس للاسف صحيت علي رنه تلفون و هنا بقي
بدايه المصيبه الجديده
تعالوا بقي شوفوا ايه اللي حصلي المهم صحيت علي رنه تلفوني و كانت من "علي" فاكرينه ايوه هو بالظبط المهم اتكلم معايا بطريقه و حشه قالي اول ما رديت
الفلوس لسه معاكي ولا صرفتي منها حاجه
رديت و قولت
لا طبعا لسه موجوده و مصرفتش منها جنيه واحد
قالي
طيب كويس مراتي هتقابلك تاخدها منك
قولت
طيب امته
قالي
هبعتلك المكان و التوقيت في رساله
وقفل السكه في وشي بس انا استغربت جدا ليه هيبعتهم في رساله ما كان قالهم بس مش عارفه ليه المره دي حسيت في حاجه غريبه و كأن في حاجه هتحصلي لا ما انا من كتر المصايب اللي بتحصلي بقيت بحس بيهم من قبل ما تحصل
المهم بعد شويه لقيته بعت رساله فعلا فا قمت دخلت الحمام عشان اخد دش و غير هدومي و بعد كده لبست بنطلون جينز اسود و بلوزه سوده و كاب و خت الفلوس و نزلت روحت نفس المكان و في نفس الوقت اللي قالي عليه و الغريب أن الوقت كان الساعه 10 الصبح و انا طبعا مرحتش المدرسه عشان عارفه هتقولوا ايه المهم روحت و فضلت واقفه هناك وكان المكان غريب و مفيش ناس هناك كنت خايفه مش هضحك عليكوا بس في نفس الوقت قولت عادي يعني ما كنتش مهتمه اووي و بعد حوالي نص ساعه شرفت الهانم طبعا منزلتش من العربيه بس نزلت الازاز اللي ناحيتي و قالتلي
جبتي الفلوس
قولتلها
اه خدي
و دخلتلها الفلوس من شباك العربيه و سبتها و مشيت بس فجأة لقيت البوليس مالي المكان و عربيه الشرطه وقفت قدامي و نزل من الصندوق اتنين مسكوني و دخلوني بالعافيه في البوكس و مسكوا كمان مرات علي و العسكري مسك شنطه الفلوس و كان معاه شنطه تاني اول مره اشوفها و فضلت اتكلم و قاله
انا عايزه اعرف انا عملت ايه و ازاي تاخدني معاك وانا معملتش حاجه هو في ايه
رد عليا العسكري و قالي
اخر*ي بقي والكلام بتاعك ده ابقي قوليه الظابط في القسم يا مجر*ه
الكلمه خرمت ودني هو قالي ايه طب ليه انا عملت ايه عشان بقيت كده و هنا جه في بالي علي طول اطلع التلفون و ارن علي الظابط ما انا مليش غيره و اول ما خرجت التلفون من جيبي مد العسكري ايده وخده مني بسرعه و قالي
ممنوع لحد منوصل و الظابط هو اللي يسمحلك
سكت و حطيت ايدي علي راسي حاسه ان عقلي وقف مش عارفه افكر في اي حاجه ولا اعمل حاجه فضلت ساكته لحد ما وصلنا القسم و نزلنا و العسكري قالي
اقفوا هنا يا اختي انتي و هي لحد مرجع ليكوا تاني
و فعلا فضلنا واقفين و انا بصيت لمرات علي و قولتلها
هو في ايه انتي مين بالظبط و احنا بنعمل ايه هنا
بصتلي بصه غريبه و بعدين راحت بصه الناحيه التانيه و طلع العسكري و قالنا
ادخلي يا اختي انت وهي
و اول ما دخلت لقيت الظابط اللي اعرفه و قاعد معاه ظابط تاني اول مره اشوفه و اول ما شافني قالي باستغراب
هدي
لما شوفته ارتحت شويه و قولتله
الحقني انا مش فاهمه حاجه
الظابط التاني اتكلم وقاله
انت تعرفها ولا ايه يا طارق باشا
و هنا عرفت اسمه الحمدلله المهم قاله
اه اعرفه و اعرفها كويس جدا
الظابط بصله بسخريه و قاله
طيب بعد ازنك انا بقي عشان حضرتك مشغول مع السلامه يا طارق باشا
و هو خارج بصلي من فوق لتحت و خرج و بعدين طارق نده علي العسكري و قاله
طلعت الست دي بره و سيب البنت و هات كوبايه ليمون
العسكري قاله
تمام يا فندم
و بعدين خرجه و خد مرات علي معاه و مشي و طارق قام من مكانه وجه عندي و حط ايده علي دراعي و قالي
اقعدي هنا
روحت قعت علي الكرسي اللي قدام المكتب و هو قعد قدامي و قالي
احكيلي براحه ايه اللي حصل وانتي ازاي كنت هناك و الست دي تعرفيها ازاي و منين
بدأت اتكلم وانا دموعي نزله مش عارفه اتحكم فيها و قولتلوا كل حاجه طبعا انتوا عارفين الموضوع من أوله المهم بعد ما خلصت و هو بصراحه سمعني للآخر و بعد كده قالي
انتي تعرفي الست دي و جوزها شغالين ايه
قولتله
لا والله معرفش
قالي
دول اكبر تجار المخدرات و بيجيبوا الحاجات دي من بره و يدخلوا بيها هنا و للاسف الشديد مكناش عارفين نمسك علي اي دليل و اخيرا جتلنا معلومات انها هتسلم اكبر كميه مخدرات و بعت العساكر هقبضوا عليها
فضل يتكلم وانا من الصدمه فضلت بص عليه و مش بتكلم ولا كلمه لحد ما قالي
هدي انتي كويسه
اول ما قالي كده ضحكت بصوت عالي اوووي و هو بصلي ورجع ظهره لورا و فضل ساكت لحد ما فجأة عيط و معرفتش اسكت يعني بضحك و بعيط في نفس الوقت ازاي معرفش لحد ما دخل العسكري و ماسك في ايده صنيه عليه كوبيه ليمون و كوبايه مايه المهم مد طارق ايده و مسك الليمون و حطه قدامي و قالي
اشربي ده و اهدي شويه
بصتله و قولتله
مش عايزه اشرب حاجه انا عايزه اعرف انا اي وضعي بالظبط
قالي
مش عارف المشكله ان كان معاكي شنطه الفلوس و المبلغ كبير
قولتله
ده حق العمليه ما انا قولتلك
قالي
انا مصدقك والله بس لازم نسيت الكلام ده او مرات علي دي تعترف انك ملكيش علاقه بالموضوع خالص
قولتله
طيب و لحد ما ده يحصل هيبقي ايه وضعي انا بقي
قالي
للاسف الشديد انتي لازم تفضلي هنا لحد ما نلاقي دليل على كلامك
اول ما قالي كده بصيت لفوق و قولت
يارب انت عالم يارب
و فجأة مد طارق ايده علي ايدي و قالي
متخافيش انا معاكي و مش هسيبك
مش هضحك عليكوا انا فرحت اووي من كلامه و مسكت ايدي المهم ساب ايدي و مسك الليمون و قالي
اشربي و خليكي واثقه في ربنا و فيا
مسكت الكوبايه و بدأت اشرب و هو قاعد يبصلي وانا كنت ببص عليه وانا مكسوفه المهم دخل الظابط التاني ده و قاله
احنا لازم نمشي يا طارق باشا
رد عليه طارق و قاله
حاضر ثواني بس
و بعدين بصلي و قالي
انا همشي وانتي خليكي هنا و متخافيش
رد الظابط التاني قبل ما ارد عليه انا و قاله
جرا ايه يا طارق باشا هي مين دي اللي هتفضل هنا و جودها في مكتبك و هي مشتبه فيها في قضيه كبيره زي دي انت اول واحد هتروح في داهيه بجد
بصله و قاله
جرا ايه يا مجدي باشا انا متاكد انها بريئه
قاله
ماشي فين الدليل
رد طارق و قاله
هجيبه في اسرع وقت أن شاءالله
قاله
و لحد ما ده يحصل لازم تفضل في الزنزانه تحت مش هنا
هو اول ما قال كده انا اترعبت و طبعا انتوا عارفين ايه اللي حصل معايا المره اللي فاتت بس للاسف مكنش في حل تاني و فعلا نزلت الزنزانه بس اللي حصل معايا المره دي كان غريب و مش متوقع خالص خليكوا معايا وانا هقولكوا ايه اللي حصل معايا جوه ...........
