رواية هشاشة قلب الفصل الثامن 8 بقلم العباديه

أبلغُ عزيزاً في ثنايا القلبِ منزلـةً

إنــي وإنْ كـنـتُ لاألــقــاه ألــقــاهُ

~~~~~~~~~~~~~~~~~~~~~~~~~~

دخلتني لغرفه كلش حلوه .. أخشاب تركيه وع الميز عطورات رجاليه وساعه وجل وترتيب لااخر درجه مثل بقية البيت هاي يمكن غرفة عمهه .

اخذت فستاني فرشته ع الجربايه ونزعت..

اول ماسحبت الفستان وتعريت انفتح الباب !!

ودخل شخص !

إنصدمت صدمة حياتي !!

إستاذ ماهررر !!!!!!

صعقه قويه نزلت على راسي !!

اول مانزعت إنفتح الباب ودخل حاط النقال على إذنه ومبين يخابر من شافني صفن .. آني بهالحاله أحتاريت شأسوي رأساً عطت بسرعه وسحبت الفستان حطيته على صدري .

هوَ مامستوعب صافن والموبايل على إذنه وعيونه متسعه بذهول .. اول ماانتبه طلع وسد الباب وراه رگع !!

ظليت مصفصفه !! الصار كله بثواني بس عبالك صار سنه عليه من الصدمه !! 

خرب حضي الردي يعني من تصلخت يلا دخل وشجابه وشوصله لهنا !

النوب الحماله مالتي أخضر عگروگي فاتح وكل جسمي بارز منهه ..خاف ينگلب عگروگ ابو الزرايل .. صخام بوجهي ولطامه كون ميته ولا هاي السالفه هسه وكتك إبو المخابرات .

لبست بسرعه وطلعت حتى ملابسي النزعتهن ماجبتهن .. ركضت لموج ترگص واسحب بيهه وتگلي بس هاي الردحه واسحبهه 

- موج حاجيييني شبيجج

موج.. عليج الله بس ردحه اوكفي 

- إستاذ ماهر شيصيرلج؟؟؟

- ماهر أخويه !!!!!!

- عزززااااا من شوكت وشلون ويمته؟؟

- اني اكلج من شوكت.. من امي جابتني للدنيا وشلون.. من امي وابوي شسمه . ويمته.. من طلع للدنيا .

- وليش ماادري؟

- وشدراني بيج بس شصاير؟

- ماصاير شي بس هاي غرفة منو الاخذتيني الهه؟؟

- غرفة ماهر !!!!!!

- لا ياالله

- شكو؟

- ماكو شي بس اخوج الحقنه استاذي واني راسبه عنده راحت سمعتي الفخريه

- فخريه لو فخري؟

- شو اسكتي خل استوعب الصار حالياً تحت الصدمه 

- فكري فكري واني رايحه ارگص احسللي .

ظليت اعيد الموقف بذاكرتي واتصفن .. كلما اتذكر الصار اغوص بملابسي على الفشله بعد شلون أشوف وجهه ؟؟

خلصت الحفله وبدلنه ... 

ملابسي فوگ ومحتاره اصعد اجيبهن لو لا؟؟

سألت موج :-

- اكلج اكو احد فوگ اروح اجيب ملابسي؟؟

- لا ماكو أحد اخواني كلهم راحوا يوصلون المعازيم 

- اصعدي وياي اجيب ملابسي

- مااكدر جاي الم بالمعازيم كل وجبه نوصلهه سويه روحي وحدج محد يخطفج

خايفه اصعد والنوب الگاه كدامي .. رحت اركض والخوف يدب بجسمي .

دخلت للغرفه محد بيهه همزين .. رحت لمكان ملابسي مالگيتهن !

يا وين وداهن هذا ابو خاولي .. خاف صدگ اخذهن بمكان الخاولي !

يلا خيولن ولو الفستان جديد اول مره البسه خرب يومك لهل عمله هاي .. طلع بواگ ابو الرزايل .

ردت اطلع وانتبهت ع الميز الصغير ملابس .. رحت تقربت يمهن لكيتهن هنه اي همزين .. بس شنو مصفطات ومگلوبات على وجههن لان اني من نزعت بالمكلوب بعدني حتى مالحگت اگلبهن واضمهن وهوَ دخل واني بسرعه طفحت ف ظلن مگلوبات .

هسه مصفطات ومرتبات .. زين ويعرف بالذوق ابو الرزايل .

اخذت ملابسي وطلعت نزلت لجوه والسيارات واگفاتلنه .

طلعت بالباب لگيت سيارته وسيارة وليد .. اول ماشفت سيارته غيرت إتجاهي لسيارة وليد مااريد اصعد وياه .. تقدمت خطوتين وسمعت صوتي امي تصيحلي

- ولج ثريا تعالي 

إلتفتت واشرتلهه بإيدي بمعنى شكو. صاحتلي تعاي .

رحتلهه هيَ گاعده بالصدر واني وگفت يم الجامه احاچيهه .. هوَ كلساع يباوع بيه ويباوع للطريق ويتأفأف .

كالت امي :-

- هاي مكان فارغ ويانه تعاي اصعدي

- لا مااريد راح اروح وي نهى

مروه.. تعاي ثريا شبيج عوفي البنيه وي خطيبهه

- لا مااريد اروح وياهم 

تقوى همستلي من وره كرسي امي

تقوى.. ولج لزگتي اصعدي 

اخيراً نطق ابو الهول گال :-

- تره نهى ووليد رايحين للمول مارايحين لااهلج .

كلت بفهاوه 

- ها؟؟

تقوى تعضعضلي بشافيفهه وتگلي اصعدي بهمس وهذا قصفني انجبرت أصعد ووين وراه يحظي .

تقوى وره امي ومروه بالوسط واني وراه .

دنگت راسي وواتمنى اطم روحي على الموقف اليخجل .. كل موقف بايخ انحط بيه مقابيله .

طول الطريق يباوعلي بالمرايه الجانبيه لان اني اباوع من الجامه بيه سوله .

إرتبكت ودنگت ظليت اباوع بحضني حتى من هاي منعني .. نظراته ماانشالت لحظه من عندي وبس يتصفن يمكن عديته ع الصفنات .

كال لاامي :-

- حجيه تردون اخذكم لمكان اونسكم؟

امي ردت عليه

- لا يمه لا مانريد نتعبك اخذنه لبيتنه

- لا مابيهه تعب بس خلينه نروح للمول افركم شويه ونرجع

أمي إلتفتتلنه كالت :-

- ها بنات تروحن؟

تقوى ومروه كيفن كالن 

- اي 

وهوَ مكيف كال :-

- تدللون 

آني على عناده كلت لاامي :-

- ماما اني مااريد اروح لأي مكان رجعوني لأأهلي وانتو إطلعوا 

مروه تگرص بيه وتدنس تريدني اسكت وامي كالتلي

- ليش شبيج؟

- تعبانه اريد ارجع 

هوَ رأساً إلتفت عليه وگال :-

- شنو شبيج تعبانه تحتاجين مستشفى؟؟

ياا هذا شبيه شنو مستشفى هذا تخبل اكيد لو لاحه خيط خبال من عندي .

إمي كالتله :-

لا لا ماكو داعي بس هيَ تعبت إشتغلت هواي وركضت 

گالهه :-

- ليش شنو شعدكم ونظفت؟

- تعرف ترتيبات وأشياء خاصه بالبنات

هوَ أفتهم هز راسه وگال بونين :-

- هااا گولي هيج 

هوَ كال ويباوعلي بالمرايه بس اني مدنگه :-

- ثُرىٰ إذا هسه أخذكم ترتاح نفسيتج ويتغير عليج الجو 

- لا مااگدر بعد طلعه روحوا إنتم معليكم بيه

إمي گالت :-

- لا إذا مو إنتِ وياًنه مانروح

- لا والله روحوا ماعليكم بيه 

- لا اذا اطلع اظل افكر بيج 

- بكيفكم 

كالتله :-

- رجعنه للبيت بلا زحمه عليك

- صار 

اني الآمر الناهي إلي التأثير الاقوى طبعاً خربت الطلعه علمودي ..

خزرني بالمرايه خزره .. گلبي راد يطلع من مكانه.

كأنما بنظراته يگلي .. هسه ارتاحيتي من خربتيهه؟

ظليت رافعه راسسي بإنتصار وكأنما اگله بكيفي .

وصلنه للبيت اول مانزلنه من السياره شخطهه وبس الگباره مال التراب وراه ظلت .. عابت عود معصب هوَ ابو الكعك ..

دخلنا للبيت والبنات يدردمن على راسي

مروه.. شكولج مال مول إنتِ .. خب كلش كافي عليج اوصلج لباب الحمامات وارجعج

- خفه ويهج ولي عني بيه حيل رجليه مكسره من التعب وانتِ بطرانه

باوعت بيه وتستهزأ :-

- هاي عود بالكليه هم تكولين خفه ويهج؟؟

- اي عادي

- امداج كتلج وارجع اكول شكلج مال اوصلج للحمامات وارجعج لااهلج .. كليه وهله هله وتكول خفه ويهج معيديه

- دروحي اصلاً هاي الكلمه اعشقهه نايمه ومعشعشه على لساني الله يحفظها الي وللعلم علمت نرجس عليهه وهسه إثنينه نگولهه

- گومي عني گومي لاانتحر بيج

ظليت اضحك عليهه ورحت بدلت وطلعت فستاني البقه بغرفته ظليت اشمشم بيه بلكي راشلي بيه عطير منا منا .

شگد نازك يربي ماكدر يقاوم الاحساس البداخله ويخليه مگلوب ..

النوب مو هنا المشكله .. المشكله علگت الفستان وظليت أتأمل بيه واتخيل شكل القاسي . اشتاقيت لرزايله 

لليل إجت نهى فرحانه وتسولفلنه عن وليد ..گعدت وياهن وسولفتلهن الصار ظلن وحده تباوع بوجه الثانيه مصدومات ويتصفنن ..

نهى.. معقوله نفسه ماهر هذا ماهر

- اي ولج نفسه انتِ مطفيه لو بيج خير عرفتي وليد من قسمه مال الصيدله من تقدملج

- شدراني متعين اسماعيل كال متعين ووليد ممتعين واني مخاطر ببالي لان اثنينهم اختفول 

- زين وين تعرفيه؟

- اني عرفتني عليه موج يصير عمهه وهوَ نفسه الساعدني من وليد !

- عزززاااا 

- اي والله ومكسر وليد تكسر مخليه يصحى على نفسه من شارب وشارط عليه يتعين يلا يجي يخطبني وهاي الشهرين هوَ لگاله تعيين بواسطه وجابه خطبني لان اني أجلته وهسه قبلت غصباً عليه .

- ماجاي اصدگ واني اگول نص حچيه بغدادي كله لعد ولعد.. يتبغدد عليه اثاري محبوبي من بغداد ياااي اعشق بغداد اريد اروح هسه 

تقوى.. إثگلي يمه لاتطيرين 

مروه..والله متأمله إنتِ تهي بهي هسه هوَ شايفچ مگلبچ

- إنتِ شبيج تكسرين بواهسي؟؟ غير هاي نهى خطبها وليد وهوَ يصير عمه 

- وليد وحد وماهر وحد .. وليد حبهه لنهى واخذهه 

- اي واني هم يحبني شنو يعني شبيه شناقصني

- بس حچي هذا حبيبتي لاتتعبين نفسج ولاشي

- بس إهتمامه بيه مو مال طالبه وبس

تقوى.. ثريا إنطي لنفسج مجال لان إنتِ هسه عقلج مراهق وماتميزين بين الصح والغلط تره إحنه مو بمسلسل وتتخيلين هالتخيلات خلي ببالج هوَدكتور إنتِ طالبه بكل كلمه تحچيها خلي هالكلمه مقابيل عيونج .. وانتِ خيتي خيالج كلش واسع مااريد اكسر بخاطرج بس اخذي حذر لا ماهر يكسرج .. ف لاترفعين راسج حيل بأحلامج حتى لاتنكسر رقبتج .

نهى.. اكلج ثريا همه من اجوا خطبوني دخلناهم للاستقبال وتعرفين الاستقبال جديده وارتب شي ببيتنه واني كلت اسماعيل اشتره سياره وملابسي كلهه من موج يعني محد يدري بحالتنه ف عمري مو تجفصينهه كدام ماهر .

- نهى تستنكفين انعديتي من مروه شنو؟ 

- لج لا مو شغلة إستنكاف بس اخاف يعيروني بحالتنه واني شويه استحي من هالسالفه ف خاف ماهر شايفج تمشين مشي كليله اخوي يوكف السياره يم مكان بعيد

- لا ليش اجذب يوكفلي اسماعيل بالباب

- اي يعني ياخذج ويوصلج للسياره خاف تمشين فدوه ثريا لاتفشليني 

ضجت حيل من كلامهه واذا ماعدنه شنو الفلوس كلشي بالدنيا ؟ يعني اني هسه انجبر امثل مقابيله ؟؟! 

ضجت ولفلفت راسي بالبطانيه ونمت بچربايتي .. واني اتذكر كلامهن ويگللي لاتتأملين شي انكسر واهسي حيل بس كلامهن كله صح اني تخيلاتي كلشش واسعه واصلاً وين تحلمت ورحت چن گاعدين اني وياه ببيتنه ويمنه إبنه الصغير يلعب يبووو خربن واهسي حتى بالتخيل.. خلني اتخيل هسه شخاسرات خفه هالوجوه .

..

ثاني يوم نهى إتفقت وي وليد تطلع تجهز لان حضرة الأخ كلش مستعجل وبعد شهرين لزواجهم . 

نهى بدلت واني ابدل وياهه هيَ باوعتلي مصدومه وحاطه قبضة إيديها الترفه على خصرها الفاتن .

نهى.. ها ها خير شكو إلمن مبدله؟؟

- شنو إلمن غير اروح وياج

- شنو هاي الثقه ؟ منو كال اخذج وياي ؟

- اني كلت 

- يا .. ثريا شبيج يمه اليوم تخبلتي ولو انتِ مخبله من زمان بس إحتمال اليوم عقلج دعسته تريله حِمل .

- والله ضايجه خل اروح وياج

- اني وخطيبي انتِ شكو؟

- الج الله يالحديقه .. هسه أخذوني بس اشوف الشارع ورجعوني حتى لو تخلوني بالجنطه مال السياره قابله 

خصمت عينهه وباوعتلي بنظرات شك 

نهى.. يمكن انتِ البارحه تتصنتين عليه؟؟

- اني؟؟ لا وابو فاضل 

- يا.. ثريا شنو هاي الحلف خرب يومج منين متعلمتهه هاي؟

- سمعت واحد عربنجي كالهه 

- هم عوزي تجيبيلي حلفان العربنجي النوب هيَ "والله" تحلفين بيهه واني بالگوه متحمله وفوكاهه عودتيني عليهه

- ديلا يلا خل نروح ام عوده

- لا صدك احلفج بعزاز گلبج البارحه سمعتي مكالمتي وي وليد؟

- ياا شبيج احلفلج جذب قابل؟؟

- ها.. يلا امشي 

دقايق وأتصل موبايلهه ردت وطلعنا وامي ويانه .. اني طلعت اول وحده اركض واضحك مكيفه اريد اقطهم على واهس نهى ومحد يدري بفكرتي .

تفاجئت من لگيت سيارة ابو الرزايل بالباب !! عززا شجابه هذا ادري حتى بالمرگه يطلعلي ؟؟ الله واكبر على راسج يثُرىٰ .

وگفت عن الركض وگمت امشي خطواب نزيهه بريئه انوثيه عشتو. 

رجعت يم نهى همست :-

- تدرين بيه هوَ جاي؟؟

- اي ماتشوفيني شكيت بيج تتصنتين علينه لان هوَ الي ياخذنه وليد بهذا الوقت بالصيدليه 

- اكلج من نرجع للبيت افحص المرگه اريد اشوف يطلعلي بيهه لو لا ؟

- خوش افحصي براحتج

دخلنا للسياره وسلمنه .. بس كون مايباوع بالمرايه رحت گعدت وره كرسي امي مااريد اصير وره كرسيه ويظل يبحلق بيه .

إلتفت عليه وخزرني اني رأساً درت وجهي ع الجامه سوه نفسه يسأل بنهى عن أحوالهه وذني السوالف المارات عليه يريد يمشيهن عليه مايدري ذني مالاتي .

وصلنا للسوگ والأتعس من هذا يريد ينزل ويانه .. حَدل بَدل يخوي يبو الغيره ماكو لطش فد لطشه الإ ينزل.

نزلنه للسوگ وهوَ يمشي ورانه النوب الازدحام يكتل وهوَ صاير وره ظهري كلش أي جهه اروحلهه يجي وياي .

لا هذا كلش متطوره حالته صاير علچ ابو السهم بطعم الموز .

أحس صدره شويه وينطخ بظهري واني أستحي حييل

وصلنا للمحلات ظلينا نشتري وهوَ يوگف بالباب ووجهه مگلوب گلاب شبيه ماادري .

أمي لگت قطعة ملابس وعجبتها وماكو قياس نهى .. نهى دگت الا هاي القطعه وهيَ ماكو قياسهه كاللهه ابو المحل عدنه بمحلنه الثاني وهيَ كيفت ركضت ركض .. راحن للمحل البصفه ردت اجي وياهن ونهى خزرتني وكالت انتظري هنا .. شبيهه هاي ياا كلهه تخبلت العالم بس اني ظليت صاحيه .. بقيت بس اني بالمحل وابو المحل واگف .

رأساً أبو الرزايل دخل للمحل ووگف يمي .

شبيه هذا ؟

گال ؛-

- شبيج البارحه؟؟

خرب عمي خرب عمي .. يذكرني بأمس شلون ماچان واني اريد امحيه من ذاكرتي عبالك يگلي شفتج مصلخه .

سكتت .

- ماتحجين شبيج؟؟

- مابيه شي بس تعبت شويه من الهوسه 

- هاا 

- اي والله

- ليش تحلفين هواي تره من تكولين إي اصدگ

خجلانه ومتوتره من قربه مني كلش قريب مني .. وابو المحل يباوعله عباله صاحبي .

هوَ يخزر بأبو المحل ويحچي وياي .

گال :-

- إمشي ماكو داعي تبقين هنا

- لا امي كالت انتظري هنا بس يگدرن الثوب ويرجعن

ضغط أسنانه ومبتسم كذب

- امشششييييي 

طلعت وهوَ وراي ظليت واگفه بنص السوگ واتلفت اريد امي وين امي .. عوزي بس تجي تحط الملهي بحلگي .

همس

- ثُرىٰ؟؟ شبيج يابه؟؟ 

- اريد امي

عصر الضحكه بشفته وأشرلي ع المحل الثاني 

- ادخلي هنا امج 

- اي رايحه

رحت ركض وهوَ مبتسم حاصر الضحكه .. دخلت لگيتهن بغرفة تبديل الملابس وانهديت بيهن

- ادري من عفتني لوحدي شكلتن بله؟

نهى وكفت وره امي وغمزتلي

- غير يمج دكتور ماهر 

- اي شأسوي بيه ماهر غير جايه وياجن

- ها ثريا شو صارت ماهر حاف تره هذا دكتورج

إنتبهت لنفسي شكلت وضحكت رغم جنت معصبه والغي وادردم .

نهى صارت بصفي همستلي :+

- لج شسوالج وهيج معصبه عود سحبت امي سويتلكم اجواء ردتكم تبقون وحدكم

تغمزلي وتعض بشفتهه 

- يا ولج انتِ متسوفله كلش علمج وليد

- اكيد شلون مايعملني 

- عزا صخام بويهي خل اشرد يم امي لاتلوثين برائتي

ماتت ضحك 

- تنگطين براءه سوده عليه (وتغمزلي)

كملت تبديل وكل الملابس فيت عليهه هيَ جسمهه مرتب ومصكلك ..

شتلناه شتله من هاي التمام كلما امي تريد تطلع اگلهه لا بعد خل ناخذ شغله . 

مااظن اكو شخص يحب الانتظار وخصوصاً يم مجمع نسوان إكلهه بخاشوگه استاذ ماهر

اول ماطلعت من المحل شفت شكله واگف مقابيل المحل وحاط إيده على خصره وعاگد حواجبه ووجهه صاير احمر .

مادري ليش حصرتني الضحكه وطگيتهه بوجهه .. خزرني ورفع حاجبه .

مشينا ونفس الازدحام هذا شارع الحبوبي دوم مزدحم .. يمشي وراي وهمسه إجت بإذني :-

- ليش ضحكتي ؟

سكتت وتوترت ماعبالي يسألني گلت هسه يغلس .

ظلينا نفرفر وهو ويانه بس شنو وجهه صار احمر دم والحواجب متشابگه والعيون مخنزره لو بيده يفترسنا .

كملنه الساعه بـ12 الظهر ورجعنا لمكان السياره دگ مشي واني رجليه صارت خيوط .

همست لاأمي بس يمكن صوتي عالي ولو اني العلع تلعلع .

- اخ يمه التوبه بعد إذا إجيت وياجن 

نهى.. چا شگلت اني ادري بيج تتعايرين 

- ولج رجليه صارت خيوط مااحس بيهن

شافني أسحل بروحي سحل ووجهي يبجي عبالك مجديه .

كال :-

- تردون نأجر تكسي؟

امي كالتله :-

- لا عليمن هسه نوصل

- بس البنات تعبن 

- لا لا يتحملن

خرب حظي امي دوم تسويهه بيه وتدري اني ميته تعب . لماذا ياأُماه لماذا ؟

وصلنا للسياره اول مادخلت ذبيت روحي وغمضت عيوني وغفيت .

وصلنا لااهلي وكعدتني نهى فتحت نص عيني اشوفهم كلهم يضحكون عليه حتى هوَ يباوعلي بالمرايه ويضحك بس مامنتبهه لنفسي شأكول من التعب 

نهى.. ولج ثريا شصار بحالج كومي 

- عوفيني نايمه شويه 

- ههههه ولج ثريا كومي

- ثُرىٰ إسمي ثُرىٰ 

گرصتني نهى حيل فزيت يا شگلت اني تصخم وجهي . يمكن سكرت من شوفته .

فتحت الباب ركض وذبيت دقله رأساً لبيت اهلي متفشله وهمه يضحكون كلهم صخام الوجه ولطامه انفضحت .

دخلت للبيت وبعد التوبه اذا رحت للسوگ لو وصلتله .. بعد لااعرفه ولا يعرفني اتبرأ منه ليوم الدين.

.

.

.

مرت عطلة نصف السنه ركض ركض وبلشنا بالدوامات .

اول يوم كل المواد تملعب الا ابو الرزايل دخل شرحلنا ماده واخذهه وكتبنه فلك اسود عليك ابو راس خل نستراح غير اول يوم .

إستاذ قاسم عدنه چبير بالعمر گالن البنات طالبني بالاداره .. رحت واني خايفه النوب شو شمسويه واني ماادري .

دخلت للاداره فارغه محد بيهه .. ظليت ادردم واحچي وي نفسي وصدى الصوت مسموع بالإداره

إبنل إبنل تقشمر عليه .. ظليت اسوي بصوتي مثل بياع الخضره وثخنته

- إستاذ قاسم .. إستااااذ قاسم 

- ياربي .. بليز جاوبني إستاذ قاااسم وينك 

مليت ردت اروح شويه وانمد عليه الراس أنصدمت ابو الرزايل .

كال :-

- ها ثُرىٰ شبيج عليمن تدورين؟؟

توترت واني توني جنت متقبسه دور البياع هسه اصير انثى واگفه هاي . كتله بصوت ناصي :-

- على إستاذ قاسم

ضحك وضحكته شاقه ثغرة .. إنطاني جهة إذنه وكال بصوت ناصي :-

- هااا؟؟

- آءء .. على إستاذ قاسم 

- دكتور قاسم طلع 

- ها ماشي

ردت اروح صاح وراي :-

- شنو شتردين منه؟

- هوَ صاحني مااعرف شيريد

- هااا

- اي 

إبتسمت ورحت للقاعه .

گالوا راح يوزعون النتائج .. يمه متت من الخوف .. كلساع يگولون اجه العميد اجه وبإيده النتائج وماكو ..لعبوا بأعصابنه لعب متنه من الحرگه .

اخر شي إجه العميد والإ هوَ يوزعهن طبعاً قوانينهم تختلف عن قوانين كلية نهى وتقوى من اسولفلهم يتفاجئن . أشك هاي القوانين ابو الرزايل مسويهه لان تأثيره قوي بالكليه

ظل يوزع نتائج وصل لاإسمي وآني رجليه تتطاگگ من الخوف .. مااتمنى اروح اجيب النتيجه بس مجبوره اروح .

رحت بخطوات بطيئه گوه أمشي وارجف .

وصلت يمه إنطاني النتيجه ووجهه مغندب يمه العميد شكله مايبشر بالخير اببدددد .

اخذت النتيجه من إيده وإنصدمت بالنتيجه !!!!!

مامتوقعه هالشي ابددد .. رأساً نزلت دمعتي .

وغرامُـكِ أَحـلـى مـعـركـةً 

خـُضـتُ رحاها فَـهزمتينـي..

~~~~~~~~~~~~~~~~~~~~~~~~~

إنصدمت بالنتيجه !!

ناجحه ! يربي ناجحه مااصدگ !! ظليت ابجي من الفرح مامصدگه روحي ابد .

زين اني مو زينه بمادته شلون نجحت يربي !! يلا مو مهم المهم نجحت وبس .. النوب انهديت بالبچي يريدن يسكتني ماكو تأثرت بالمسلسلات .

ظليت أكمز من الفرحه مامصدگه وعيوني تتلألئ.. من الفرحه تلمع ببريق .

فرحت حيل ونرجس هم ناجحه .. 

نرجس.. بس ولج ادري انهديتي هذا هم ماهر وتبجين كدامه ودموعج تكسر خاطره (وتغمزلي )

- ولج مامصدگه نجحني مامصدگه 

- صدگي صدگي

- اريد اروحله

- عززااا شتسوين؟؟

- أتشكر منه چا شأسوي؟؟

- اگعدي لايفشلج 

- ياا ليش يفشلني ؟

- ثريا اكعدي واسكتي

- لا والله رايحتله 

رحت اركض لمكتبه ومكيفه اريد اتشكره لان صدگ ماحاله ولا حتى درجة نجاح اوصل بس منجحني . وهم استفسر منه غير گاللي راسبه .. وصلت لمكتبه دكيت الباب ودخلت بعد سماحه إلي طبعاً ..

لگيته گاعد ومقابيله أوراق هواي مدري شيسوي بيهن ولابس نظاره سوده يمه غير يچتل النوب صفنت عليه اريد اتذكر عليمن جايه ماادري..

عقلي تذكر لاتفشلني رحمه لااهلك .

هوَ يمكن إنتبه مركزه عليه رأساً رفع راسه عليه لگفني وهزلي راسي گال :-

- ها ثُرىٰ ؟؟

فهيت ومحتاره شأگول هذا ابو الرزايل صاير مايتقاوم .

أردف ويأشر بإيده مثل الينبهني

- ثُرىٰ وياي؟؟ خيرج يابه؟؟

ركزت ومتت من الفشله إبتسمت ببلاهه وگتله :-

- آآءء.. إستاذ أنتَ مو گتلي راسبه شلون نجحتني؟؟

بهدوء غمض عيونه حيل مثل اليصبر نفسه او متوقع هيج سؤال

- اي وشنو المطلوب هسه ترديني ارسبج؟؟

إنتفضت

- لا لا لا ترسبني شنو 

- كل واحد حسب إجابته لا منجح ولا مرسب درجه مامنطي من جيبي تمام عيوني؟

يممممه متتت صار بيهه عيوني فديت عيونك انا.. كون هسه اروح وامطگهن ببوسه .

- ها بس اني ممجاوبه 

زفر أنفاسه بعصبيه ونتر :-

- ثُرىٰ من الأخير تردين ارسبج؟؟ 

- لا لا آسفه آسفه بس شكراً

- ماكو داعي للشكر كل واحد درجته

- اي ميخالف شكراً

تأفأف بعصبيه ونتر من وره خشمه :-

- العفو 

طلعت من يمه واني ارگص من الفرح .. الگاع ماشايلتني .. تفاجئت بإسماعيل واگفلي اليوم وراكب بسياره ! 

- شنو إسماعيل منين هاي السياره ؟

- مال صديقي

- وليش جايني بيهه

- كسرتي خاطري خاف رجليج تعبن وهم صديقي فارغ وانطانياهه مامحتاجهه هالأيام لگاله شغله

ماصدگت بيه لان نهى مچذبه واكيد سايرهه وهوَ مايكسر بخاطرهه .

غلست وگتله ؛-

- ديلا ماطلبتهه من زمان تصعدني بيهه احسن من الفورتات سكراب

خزرني 

- ثرريا 

- ها شنو شحچيت؟؟

- لاتحچين هيج گولي الحمد لله

- هسه اني شگايله يخوي 

- اصعدي إصعدي انتِ النقاش وياج عقيم .

- ومايجيب اطفال هم

صعدت واضحك عليه إبتسم وگال :-

- ان شاء الله راح اشتغل واجمع لو انجبر اسوي سلفه

- هلو هلو راح تتزوج ايباا راح نركص وشلون ردح العماره

- ياعماره هاي اريد اعالجج اكيد عقلج ضارب 

- ياااا شبيه اسم الله

- خيط خبال اشوف شيسوون ويشيلون هذا الخيط طلع محد يلومني من كتلهم مااوديج كليه ادري بعقلج زعطوطي

- ييمه اسم الله عليه وعلى عقلي

ظل يضحك واني اسولف وياه ثولته ثول . 

وصلنه للبيت وتغدينه .. نهى گضتهه بس مخابرات واني افتر وراهه واصيح "إلك الله يالحديقه" وهيَ تضحك عليه .

أمي فرحتلي بنجاحي وكالت راح اطش عليج چكليت . فرحت حيل عبالك كالتلي راح اصبلج تمثال ذهب .

دزت چيس چكليت ابو الألف واني رحت لبست حرام مال الصلاه لونه أبيض سويته مثل الساري وسويت شعري ضفيره هنديه وطلعت 

من طلعت كلهم صفنوا عليه 

إسماعيل.. شنو هاي ولج؟

- غير اليطشون عليه جكليت لازم لابس ابيض 

- معرس شنو؟

- لاا يابه هسه انتم من يطهروكم غير تلبسون ابيض؟

كلهم حصرتهم الضحكه والبنات يخزرن بيه 

إسماعيل...شبيج انتِ تخبلتي؟

- دحجي تلبس ابيض لو لا؟

- اي 

- اي اني هم مثلكم 

نهى..ولج شجاب هاي على هاي

- ماعليكم اني اريد من يطشون عليه جكليت لابسه ابيض يلا اسكتوا

ساعتين منتظرين الچيس مال الچكليت وحسن يفرفر بالمحلات محد عنده بس كيلوات.

اخر شي جايبيلي هذا ابو عشره بربع بس بألف .. وطشته أمي على راسي احسه تزرف من گد ما الچكليته يابسه ومخزونه صارلهه سنه

- ولكم ماريد چكليتكم خلولي راسي سالم عليكم الله 

النوب يلمون من الگاع ويشمرون عليه وميتين ضحك صارت الچكليته مثل الحصوه حطيت ايديه على راسي وافلت اخوي عامر 

~~~~~~~~~~

ثاني يوم داومت وإستمر روتين يومي ابو الرزايل نفسيته مامتغير هوَ هوَ وكلما اصفن يفززني من صفنتي وصاير يخربط بإسمي هواي بحيث كل بنات القاعه صار إسمهن "ثُرىٰ"

ياهي يگومهه يگللهه ثُرىٰ واني اطفر عبالي عليه .

إجه إمتحان الشهر الاول واني خايفه لا يسوي بيه مثل بداية السنه .

الحمد لله إمتحنه وعدت على خير واسئلته صايره أصعب مو أسهل .. بس اني قاريه زين وكلهه جاوبتهه وتقريباً عرفت نمط أسئلته وهذا الشي الي يميزني.. امتحن شهر واحد عند المدرسين اعرف نمط اسئلتهم بعد .. بس هالمره مصره آخذ الهديه اكون أو لااگون .

ثاني يوم جاب الاوراق مصححهن كالعاده .. ظل يصيح بالأسماء اني إسمي قبل ساره .. صاح بإسمي گمت اخذت ورقتي وأنصدمت !!

النتيجه درجه كامله صح مجاوبه كله صح بس ماتوقعت يحطلي درجه كامله گلت هسه ينقصني على كلمه على حرف .

والله وطگيتي ياثُرىٰ واخذتي عند ابو خاولي درجه كامله 

بس الصدمه ماكو هديه !!! ظليت لازمه الورقه ومنتظره اريد الهديه !

صاح الإسم البعدي واجت اخذت ورقتهه واني واگفه مصفصفه .. باوعلي بإستغراب كال :-

- ها ليش واگفه هنا؟؟

- شنو ليش واگفه غير ماخذه درجه كامله 

- اي وشنو؟

- غير تكرمني

- اها .. نسيت اعذريني عود هسه ألقي كلمة تكريمج 

خلص الاوراق واني مشتوله وواگفه يمه ساعتين لما خلص والنوب يمطمط تمطمط .. يجر الكلمه جر وكل طالب ياخذ ورقته يظل يسولف وياه .. طبعاً هذا متعمد يغثني .

انطه الورقه لساره والصدمه راسبه .. يبوي غير لزمتني الضحكه اريد اسكت ماكو .. النوب اگرص بروحي اريد اسكت .. اضحك بس مدنگه راسي حيل محد يشوفني بس صوت القهقه مسموع .

إلتفت عليه نتر بصوت ممسموع :-

- إرفعي راسج 

رفعت راسي كلت :-

- ها وياي؟

نتر بيه :-

- لاتضحكين قبل كم يوم چنتي مثلهه ضحكت عليج؟

- ماجاي اضحك عليهه اني .. اكو سالفه تذكرتهه وضحكت 

- السوالف عوفيهم بالبيت مو هنا تتذكرين وتتمضحكين !

وانتَ شعليك ابنل ابنل اضحك مااضحك انتَ شكو؟؟؟

كمل الاوراق ومحد ماخذ درجه كامله غيري .. غير طرت من الفرح وردت احط جناحات عباس ابن فرناس واطير بس اخاف اچلب بالواير وانتل واتكربح وشيخلصني بعد .

إلتفت عليه وظل يلغي كلمات بالفصيح والنوب شصعباتهن بحيث ولا كلمه فهمت عبالك كاعدلي بعصر الجاهليه ومنتقي الكلمات انتقاء مضبوط .

كمل تقديم واني منتظره الهديه .. دار وجهه ع الميز عبالي راح يجيب الهديه بس الصدمه ماكو شي ع الميز .. كلت يمكن صغيره وضامهه بجيب سترته مثلاً محبس حلقه شو شني .

بس راح وكال :-

- راح اجمع الاوراق

اني واگفه بمكاني بعدني اباوع عليه وادور بعيوني ع الهديه .

كال :-

- ليش واگفه هنا؟ ماترجعين؟

- هاا .. مو ردت اجمع الاوراق من الطلاب

- لا معليج انتِ همه يجون قابل مكسرين

يمه لااول مره بحياتي الگفهه وهيَ طايره واطلع نفسي من فشله جبيره .. منين اجاني هذا العذر ايباا .. والله وتطورتي يثُرىٰ .

رجعت لمكاني واني اتذكر الهديه ماانطانياهه والله ظليت اغلي من الحرگه واتمنى هسه اكوم اشبعه جلاليق . رغم اني متحمسه اشوف ذوقه بالهدايا ابو الرزايل .

ساره ظلت تبجي وتذكرت من رسبت يبوو الله لايعيد ذيج الايام .

راحت يمه وبإيدهه ورقتهه دنكت ع الميز وظلت تسولف وياه فسرت كلامهه من يمي انو تكله هذا صح وهوَ يهز براسه ويأشرلهه ع الورقه عود خطأ .. ظلت تبجي وهوَ ولا إهتز .

تتوسل وهوَ عوج حلگه بمعنى لا او (چؤؤ) .. وسحب الورقه من إيدهه وگام .. عود مثل الدكاتره البقيه اذا يوزعون القاعه تصير هووووسه هسه هذا القاعه هدووووء الابره من تطيح نسمعها ..

گام والورقه بإيده تحرك خطوتين ومانحسلك إلا ساره ساحبته من زنده حيل .. نترته نتر وكالتله (اوووككككف) .. هنا وجهه شصار بيه بوووووويه كلهه مصدومه وهوَ نزل راسه على زنده وإيدهه المحطوطه عليه .

خزرها حيييل وعگد حواجبه هيَ رأساً سحبت إيدهه وخافت .. يمه اني من يمي ظليت ارجف من خزرته الخزرهه بيهه تكول صاروخ مو خزره إخترقتهه إختراق .

ظلت تشهگ وتبچي كسرت خاطري ردت اگوم ونرجس باوعتلي 

- شكو وين رايحه؟

- اگله انطيهه من درجتي خطيه

- عزا العزا يثريا راح تمطسين روحج بمشاكل الهه اول ماالهه تالي اكعدي وانجبي

- ولج خطيه ماتشوفين شلون تبجي؟

- ثررريا ابقي بمكانج لا وعلي اموتج موت

- هوَ صار اقاربنه بعد خل ينجحهه لخاطري 

- اكعدي واسكتي لايرزلج اشو ولاكأنما اقاربج نفسيته هوَ هوَ ماتغيرر النوب تريد تكله على شرشبيله وهيَ توهه لازمه زنده مقابيل الشباب وقللت من قيمته حتى يجلدجن اانتِ وياهه

- خايبه صدگتي اروحله شبيه مخبله اصلاً ولا اروح بعد ولااشوفه لو اموت النوب يفشلني حتى هديه ماانطاني ابو عكرز .

- اي يلا اسكتي لايرزلنه خل نكمل التمثيليه 

اخذ الاوراق وطلع معصب صاير نااار .. وهاي سويران آنه إلهه شلون تلزمه هيج ومنو سمحلهه هوَ آني ثُرىٰ بمقامتي الجليله مالازمته هيج .

.

.

إمتحنه شهر ثاني ودرجتي ناجحه الحمد لله عود رحنا للمكتبه اني ونرجس اريد افصخ ملزمتي اسويهه كل فصل وحده .. اول مادخلنه لگيناه گاعد ع المكتب مال ابو المكتبه ويمه الكابسه .. ومقابيله إستاذ أحمد ابو گزگوزه .

- ولج نرجس هذا ابو گزگوزه شعنده هنا؟

- يا ثريا گزگوزه النوب ولج اسمهه سكسوكه 

- لا ولج اشو سكسوكه كيوت بس گزگوزه إلهه هيبه .

- يلا خوش لقب خل نشوف ابو گزگوزه وابو الخاولي شعدهم وين مانروح يطلعولنه ادري لاطشين بينه لو مسويلنه جهاز تعقُب

.

. گال :-

- اكو شخص بعد ناقص وينه؟

اني مااگعد راحه رأساً كتله

- ها ابو السوس خو كول اسم الشخص (واغمزله)

- شنو هاي ابو السوس ؟؟ والله إذا صحتيلي بيه بعد الا أشرم إذاناتج اليشبهن إذانات الطنطل

- يمه يمه رايحه اصيحهه بس علمود احافظ على إذاني الصغيرونات فدوه رحتلهن

ظلو يضحكون واصلاً همه يحبون تحشيشاتي .. رحت كعدت بيهه ماقبلت ومطنگره 

- ولج فدك كومي تعشي

- الا إسماعيل يجي 

- هلو هلو ربحتي يثُرىٰ ولج انتِ حاطه عينج على اخيي؟؟افگسهه تره والله 

- ولي گلتيهه انتِ اخوج مو حاطه عيني عليج ام گصايب ماخذ الشايب

- اي وام گصيبه ماخذه الشيبه 

- ههههههاي 

- كومي كومي سمعو ميقبل يتعشى الا انتٍ يمه منين طلعتيلنه عمي

- لا خل يتأدب حتى بعد مايرزلني

- شو ماتتگلبين .. قميصج مضبوب وترديه يسكت

- اسكتي لاتذكريني بس روحي كليله ماتشتهي وماعليج هسه هوَ يجي

- امممممم 

- والله تنجح الخطه بس روحي

- خاف شو شتسوين بإخوي ولج

-دروحي شكد لزكه 

- احم منو لازك لااخوي مثل لزكة الفار؟ 

- روحي شبيج 

- رايحه رايحه 

رحت كعدت وإسماعيل يباوع وراي يريد يشوفهه بس خابت ظنونه من تربعت ع السفره وظليت امل وسويت نفسي مندمجه .

صافن عليه مصدوم واني ميته عليه ضحك بگلبي ..

كال 

:- وينها ؟

ظليت أكل باللگمه واسوي نفسي اكل 

- ها منيه؟

- اني وين دزيتج؟

- رحت جبت ماي واجيت

- ثرررررييااا

- ها سوري سوري إستاذ بس فدوك ماتقبل تجي تگول مااشتهي 

دنگ ووجهه إحتقن لاگام ولا راحلهه ههههاي والله كبسه بطعم البتيته .

ظل ياكل بهدوء ووجهه معصب مبين من عگدة حواجبه .

الفصل التاسع من هنا