رواية هدية الشيخ هشام الفصل الثالث عشر بقلم التميمية
بقت حوراء وحدها بالغرفة والخوف مسيطر عليها لا اصلاً مرعوبه حيل..ودموعها مابطلت...
شافت الباب انفتح وعيونها كلها دموع ماشافت غير زلمة طول وشماغ وعكال...
كامت وكفت ودموعها تنزل وماتشوف الي دخل عدل بسببهن...حطت ايدها على حلكها والخوف مشه بكل جسمها...ورجفة بشفايفها...
هشام تفاجئ بالبنية بالأبيض الي كباله..حييل صغيرة..وشافها تبجي وجسمها يهتز من البجي والشهكات...
مشه خطوتين وهي تراجعت ليورى وتكله ببجي لاء لا تجي...
وكف مكانه وماتحرك وبقه واكف ومنزل ايدينه ويتفرج لدموعها الي تنزل ولعمرها الي مبين مايتجاوز العشرين ابداً....هشام كسر صمت الكلام وقرب عليها شوي:لحظة لحظة بويه اهدي وليش البجي..تراني مو وحش..بس سؤال يدور ابالي..انتي شكد عمرج
حوراء ما جاوبت وباوعتله وهي دموعها تنزل وخايفة وترجف..فجأة لاحظته ورجعت لذاكرتها وظلت تفتر بيها الدنيا..وظلت تردد بعقلها...انه احلم..اي بحلم وهذا نفسه الشيخ هشام الملاك الي نقذني...
كلبها صار يدك حييل وشعور غريب اجتاحها..يبدي من نبضات كلبها ويتسلل لكل نقطة قطرة دم بشرايينها..وظلت صافنه بوجهه ومو مصدكه...
حتى دموعها وكفن وهو مستغربها وصفنتها وفجأة سكتت عن البجي وماسمع جوابها على سؤاله...
اقترب منها اكثر ورفع ايده وهي صحت على نفسها بسرعة وفهمته غلط ورجعت ليورى وحضنت نفسها حييل وصاحت لااااااااء...
هشام مايذكرها لأن ماركز بملامحها من نقذها وحتى لو مركز متغيرة ملامحها عليه صايرة مختلفة...
هشام:اهدي بويه..شكلج خايفة وشكلج زغيرة حييل..يابويه ماتوقعت هيج..اهدي وكليلي شكد عمرج انتي
حوراء بعدها حاضنة نفسها وماجاوبت وتتراجع كل شوي خطوة..
هشام تنهد:استغفر الله صبرك ياربي..بويه جاي احاجيج اهدي..واذا خايفة مني..وحق علي ماجبرج عليه بس اهدي ولتخافين..احجيلي شكلج مجبورة جاية
حوراء نطقت وبرجفة:بابا اريد بابا
هشام هنا ابتسم:اعتبريني بابا..وكعدي خلي افتهم منج..يالله باباتي لتخافين مني..تراني مو وحش ولاني مراهق واذيج بشي
حوراء حست بحنية صوته وكلامه:اكيد ماتسويلي شي
هشام:وحق روح اخوي الشهيد..مو رجال اذا اسويلج شي وما راضية بيه
كلبها يدك حيل وبعدها مو مصدكه هذا نفسه الي نقذها..وتكول اكيد كابوس وراح اصحه هسة على صياح امي لو كفخات آيوووو...حوراء جمعت قوتها شوي:اريد امي..الله يخليك اريدها
هشام بأبتسامة خلت كلبها يدك حيل:مو كتلج انه اصيرلج امج وابوج..تعالي كعدي..وراد يلزمها ويكعدها ماقبلت وصاحت لاااء...
كلها مو مشكلة لا تكعدين بس كليلي شكد عمرج انتي..وهو ينزع شماغه وعكاله...
حوراء بصوت بكوة ينسمع:17
هشام تفاجأ:ياالهي حتى اصغر من كرار ابني..اويييلي يابه طفلة انتي..واسمج حوراء حلو
حوراء ماتحب كلمة طفلة كلش من تسمعها من ابوها تتعقد:اي..الله يخليك اريد ماما
هشام:شلون بينه اليوم نجيب ماما تنام يمنه
حوراء هزت راسها:اي اي فدوة يخليلك امك وابوك
هشام:راح اطلع من الغرفة حتى تهدين..واشرلها للباب..اطللع شتكولين..هااا اخليج بحدج وتبدلين
حوراء سكتت وتستحي تكله لا تطلع وتستحي هم تكله اطلع..وظلت ساكته واديها على صدرها حاضنته..وعيونها كلها دموع...ومكياجها مو ذاك المكياج القوي خفيف واغلبيته بيجي وشوية جوزي فوك عيونها...
هشام ضحك حتى يطمنها:السكوت علامة الرضا...اخخخ بويه شكلي انطردت من الغرفة..هههههه يالله اصيحلج امج..انه طالع....
وطلع وهي تراقبه يطلع..وتحس وجهها اشتعل نار من الخجل منه وشلون هيج طلع...ومو مصدكه هو نفسه الي ساعدها..وباوعت لنفسها بالفستان ومزند....
كالت خل ابدل بسرعة قبل مايجي..وظلت تطلع الكلينس الي داخل صدرها...
وشافته دخل وكف كلبها...ابتسم واجه اخذ شماغه وعكاله وكلها نسيتهن..اخذي راحتج...وراح طلع...
وامه اجته:هشام يمه هاي ليش طلعت صار شي..شنو مالحكت دخلت طلعت..شنو اخذتها بالهسرعة
هشام:على كيفج حجية..انطيني مجال..ماكو شي بس البنية خايفة..ماكتولي هل كثر زغيرة شني طفلة يمه..خلي امها تروح يمها..انه رايح يم الزلم
ام هشام:يمه عادي مابيها شي انته تربيها على ايدك احسن ماتطلعلك وحدة مسمومة ولسانها بطولها واتعبك..هيج انته تعلمها شتريد..وهي مبينه فقيرة يمه
هشام تنهد:الله كريم..ربي هو المعين..يالله اخذي امها الها يمه وانه يم الزلم..عود خابريلي من رقية لو ردتي شي...
وراح دنك ويريد يطلع من باب المطبخ لأن البنات كاعدات وماليات الصالة والغرف والمطبخ مابي غير نسوان عمامه وخواته..سلم وطلع للديوان....
دخل وسلم..وراح كعد يم حازم وابنه كرار وكلهم يكلوله شو عايف عروستك ياشيخ وطالع وانته عريس...
وهو ضحك وكلهم شنو مضايقكم وجودي مو مشكلة ارجع للعروسة...
كرار يمه كلش:خاف طلعت تشبه الشيخ ابو حمزة وشردت ياشيخ هههههههههههههه
هشام ضحك:ولك والله عليك سوالف..لا تحجي على شيخ حسين ولك
كرار:ههههههه شوف صار نسيبه مايقبل عليه وشكايل انه.. يابه خاف هنوب طلعت تشبه عمو حازم وخرعتك ههههههههههههه اخ بويه تخيلتها شواربها مثل عمو حازم وطويلة ههههههههههه
حازم ضربه براسه:ولا كأني عمه اكبر منه..هشام شني ابنك الكتله مأثرة على دماغه هل ايام
كرار ضحك وغمز لأبوه:لا بويه الجفاف مأثر عليه..شفتو حالتي مكسر..كسرو كلبي مو بس رجليه هههههه
حازم ضحك:اثكل بعد عمك..لا انوب ينكسر بيك شي ثاني...
وظل كرار يضحك ويحشش على ابوه...هو علمه على هالميانة ولا كأنه ابنه وكأنه صديقه...
حازم لاحظ هشام مو وياهم وشكله يصفن كل شوي...
هو شاغلة باله حوراء ماتوقعها بهالعمر ابداً شلون راح يتصرف وياها ويكول مستحيل اقرب ناحيتها هسة وهي توه رادت تموت من الرعب مني...
رجال اكبر منها بهواي واضخم منها وحتى ابنه اكبر منها...امها راحت يمها وحاجتها هي وام هشام..وهي بقت مصرة على خوفها وشما يحجون وياها تكول لا تعوفوني بحدي...
هنوب خواته لهشام هم ادخلن مو شافو امهم وام حوراء دخلت الها..وهم حاجوها وكعدو يقنعون بيها انو ماكو شي يخوف...
نسمة وهي ورقية والبنات كاعدات بالغرفة وكل مجموعة كاعدات يسولفن لوحدهن...
نسمة:شخبار هذا مخلد
رقية:اوووف ذكرتيني بهذا النذل مو جنت فرحانة بعرس هشام وعكرتي مزاجي..نسوم والعباس يجلط فد ادبسزز وجريئ تخيلي كل ما اباوعله احس بنظراته تاكلني اكل..جنت احط شوية مكياج بطلت احطه..وكل الكلية تدري بي يركض وراي..ولو يعرف هشام والله تصير مو حلوة..قبل جم رزلته جبس ماكو فايدة..ولج اليجلطني احر ماعندي ابرد ماعنده..ويكلي هاي لدغة الراء العندج اموتتني مكصصه كلبي وصل وصل
نسمة ضحكت:اوييلي هذا الحب رقوش ولج هذا شكله يحبج
رقية:والله ماصدك بحب التلفون وغيره ولا يعجبني علاقة ولد وبنية بالكلية.. هاي صديقتي سنتين وياها حبيبها وبالآخر كلها امي ماقبلت بيج..شفتي النذالة بالله..المشكلة صاير مديل ماكو كبل ماتحله دراستج..لا والله اهم شي دراستي
نسمة:بس مو كلهم جذابين..هاي كروري فديته واعدني بالزواج وماخلف الي بوعده ولا تخله عني برغم ظروفه ورفض ابوي
رقية:ترا ماقصدي ابسمرج والله..انتي حبيتي مو بيدج وهو حباج وحبكم صادق
نسمة:ولج اعرف لا تبررين..والله عشقته لكرار..شعور يخبل والله رقوش ويحبني حيل ومدللني وكل كلامه غزل..صح مرات يجفص ابطني ويلطش وماناطيني فرصة هههههه فاهمتني ههههه بس احبه
رقية:هههههه عززا راح انحرف من وراكم انتي وياه... فديته لكروري منو مثله..فدوة طالع طيوب وفي على ابوه..وامه جانت رغم مرضها ماقصرت بتربيته..وجانت شكثر تهتم لهشام..الله يرحمها والله موتها صعب على الاثنين وعلينه هم خسرناها وهي عشرة عمر هي ربتني ويه كرير
نسمة بقهر:الله يرحمها..والله انكسر كرار بموتها وهسة احس بشعوره ميته على شوفة امي رقية امي مريضة خايفة تموت وماشوفها ولا اودعها..اخاف مايسمحولي احضر عزاءها والله اموت وراها
رقية:اسم الله عليها ربي يشافيها ويحفظها..افهمج والله..هاي ابوي خطية فقد بصره من وقت وهشام استلم مسؤليتنه وكلشي..هو ابوي علكه بمسؤلية زواج من وقت تكول امي عمره 19 وجاب كرار..وبعدها خمس جهال يصيرون ويتوفون خطية وهواي ينكسر بموتهم..اخر طفل ماشافه تكول امي وتوفه..ومرته مرضت كلش وصار فشل كلوي وبقت تعاني وهشام يتألم وياها وعليها
نسمة:اوووف خطية عمو..سولفلي كرار سالفة اخوانه الماشايفهم..وجان يكلي اتمنى ابوي يزوج ويجيب طفل
رقية:هههههه مايريد ايمانو تصير ام اخوه..يموت منها كرار يبغضها دوم جانت تفتن عليه عند ابوه وعزام اخوي من يسوي شغب ههههه
نسمة:هههههه سكتي يسولفلي عن ايام الشغب والله مشاغب..بس همزين ماشارب جكاير..دكتوري الصاك فديته
رقية:مو ابوه ما شربها بس عزام..اخخخ اتمنه هسة هو هنا ويفرح لهشام..اخخخخ كلبي على اخوي حبيبي ماتستاهله ايمانو الكلبه..وسولفتلج ليش خذاها هشام
نسمة:اي خطية الله يعينه..يالله بلكي تعوضه حوراء والله فقيرة وطيبة وهادئة وحبابه وردة حورو مو اتحمد بيها لان بت عمي..وصراحة تفاجئت من انطاها عمي هدية حيل عزيزة عنده ومايحب يفاركهن كلهن بناته الصغار والكبار هم زوجهن وجان كله يكول ندمان زوجتهن
رقية بحماس:فديتها وفديته..غير جانت نصيب اخوي فديتهم من الفرحة اتمنى باجر تكول انه حامل ههههههه
نسمة ضحكت:هاي شنو شسالفة الا جايبته من بيت عمي هههههههه
رقية:ههههههه اي ليش لاء وهشومي يطلع متحمس ومسويها وره العقد هههههه..عاد لو كرار اصدك يسويها منحرف بس هشام لا مستحيل
نسمة ضحكت:لعد على منو ابنه طالع منحرف على جدي
رقية ضربتها بشقه:حقيرة لتحجين على اخوي وابن اخوي.....ونسمة تضحك....
ام هشام خابرت هشام من وحدة من خواته وكلتله يمه تعال ارجع..شنو يكولون عفت البنية وطلعت راح يكولون شنو بيها وطلعت...
كام وكلها سويلي درب وجايج هسة..واستأذن منهم...وكرار يكله ديري بالك على عمي ابو حمزة يابه😂😂😂😂...
هشام عافه بدون رد وراح امه تلكته بباب الصالة وكلتله كلهم راحو والبنات بالغرف...وراح لغرفته ودك الباب لان امه كلتله امها يمها..وسمع امها تكول تفضل.. وفتح الباب بهدوء والف فكرة وفكرة براسه وميعرف شيسوي....
دخل وبيده شماغه وعكاله..وفزعت من مكانها كاعدة بالارض ويمها امها..دنك راسه وسلم وراد يدخل الحمام لأن بالغرفة حمام...
كامت ام حوراء:ياشيخ دير بالك على بنيتي..عن اذنك..ورادت تطلع تمسكت بيها حوراء..
هشام:ولو بعيوني بت الشيخ
ولزم ضحكته عليها ويكول صدك طفلة شلون راح اتعامل وياها واولها تكلي اريد بابا واريد ماما..لا شكلي راح اربيها ويه جهال عزام...
ام حوراء همست بذانها وراحت طلعت...وهي رجعت لمكانها بالأرض يم الكنتور وهي تراقب هشام دخل الحمام...
وهي لابسة تراك ماقبلت تلبس غيره وامها صيحت عليها ام هشام ضحكت وكالت انطيها فرصة مستحية البنية...
طلع من الحمام وبيده المنشفة وينشف وجهه..وخرها وحطاها على ميز الي يم السرير..وكعد عليها..وهو مبتسم ويباوعلها وهو ساكت...
وهي كطعت ايديها تفرك بيهن ورفعت راسها وباوعتله وهو مبتسم ويباوعلها..دنكت بسرعة وكلبها يريد يطلع من بلعومها من دكاته وخجلها...
باوعلها هي صح 17 سنة كل معالم الانوثة كاملة بيها بس مايعرف ليش عنده طفلة بالنسبة اله بنته...
استغفر ربه ويكول شنو بنتي وهي مرتي صارت...
هشام:شنو راح تبقين بمكانج..كومي بويه نامي عالجورباية وانه راح انام جوى بالأرض..لو هم ماترديني بالغرفة ههههه مو مشكلة اطلع بس محد راح ينحجي عليه غيرج
حوراء بخوف:الله يخليك حلفت انته واعدتني ماتل...واستحت تكمل هالكلمة...
هشام كام:بويه بداعت هالشارب مالمسج بدون رضاج..بعد بشنو احلفلج حتى تأمنين
حوراء بخجل:انام بالأرض انه
هشام:لا بويه نامي عالجورباية..شافها تغيرت ملامحها..ههههه تره كلت راح انام بالأرض مانام يمج
كام يريد يروح بأتجاها هي كاعدة يم الكنتور.. خافت وكامت وهي مفزوعة...
هشام ضحك: هاي شبيج...شلون انام على الزولية..اريد اطلع فراش انام عليه هههه
وخرت بعيد عن الكنتور..وطلعله مخدة واللحاف حاطته رقية بالكنتور يتغطون بي ويوخرون فراش الجورباية لأن ماينام عليه...
هشام حط مخدته ونام على الارض وتغطه:يالله انتي هم نامي ارتاحي اليوم جان متعب عليج اكيد
حوراء ظلت مصنمة مكانها وتحجي بصوت كوة ينسمع:والضوى
هشام:شبي الضوى
حوراء بهدوء:اخاف من الظلمة انه
هشام:استلم ياشيخ رُسل على شكل بنية شوي جبيرة...هههههه بويه خلي تيب لمبة مشعول..وباوعلها ولا تحركت خطوة....
هشام:هاااا شكو بعد ليش باقية مكانج..تردين تحطين سياج مكهرب بيني وبينج ههههه.. وهااا حتى دشداشتي راح انام بيها حتى ماتخافين
حوراء خجلت وحست بنفسها طوختها وياه شكثر خايفة منه وهو لو رجال غيره ينعل والديها وياخذها غصبن عليها بس مو بيدها هاي خوفها مو بيدها ويبقه رجال ماتعرفه وماشافته غير هسة....
والي شافته من ولد عمها العارات مو شويه خصوص ايمن اعدم البراءة البيها وقضى على كل حلم وردي عدها...
بس مافهمت من كال استلم رُسل على شكل جبيرة وتكول منو رُسل وليش هيج يكول عني...
اخيراً تحركت وراحت رفعت غطه الجورباية وكله زخرفات وماعرف شنو... جلب شعرها بترجيتها وكات اخخ واستحت وتغطت ولحفت حتى راسها...
هشام:هااا مزعج غطاج..تردين اللحاف الي عندي
حوراء من جوى اللحاف:لا مابي شي....
هشام سكت عنها بعد.. وكام راح طفه الضوى وهي مشغلة تيب لمبة...ورجع لمكانه وتأخر الوقت يالله نام لأن يحس بيها تحوس ومانايمة وشكلها ما مرتاحة...وهو يفكر شلون راح تكون حياته وياها وشلون يعاملها ويكول ماترهم نص عمري هي...
فزت الصبح على الضوى..وهي مانامت غير قبل ساعة تعبت وهي كاعدة لأن خايفة..وغفت وماتدري...وهشام كام صلى ماحست بي من التعب....
شافت هشام جاي يشكل كبكات بصمة الدشداشة ولابسها بيضة وشلون طالع هيبة بعكاله وشماغه...بدت دكات كلبها تتسارع وبعدها مو مصدكه الي نقذها هذا هو...
هشام التفت عليها:اخيراً كعدتي..صباح الخير
حوراء بخجل:صباح الخير
هشام:زعجتج بالضوى مو..بس لازم احاجيج..سمعي بويه..الي صار البارحة يبقه بيناتنه ومحد يعرف..حتى امي ولا حتى خواتي..والي تكلج وين بياضج كولي الشيخ مايقبل واحد يشوفه..صار بويه فهمتيني
حوراء هزت راسها بأي:صار
هشام:لعيناج انتي..بالنسبة الي صارلي 20 سنة مزوج وابني بطولي..ماريد يحجون عليج بويه والسر لا اطلعينه..خصوص ايمان..هاي راح تعرفيها ودير بالج منها..مو اسمع السالفة بحلكها
حوراء بخجل:صار ياشيخ..واستغربت منو ايمان هاي...
هشام ابتسم:حلوة منج كلمة ياشيخ
حوراء كلها هيج لو راسها افتر وكلبها طلع من مكانه وابتسامته تضيع البصير وتجيب الأعمى للطريق...
هشام ضحك:اخخخ بويه وشكلج فاهية شوي..يالله بويه كومي بدلي وطلعي يم النسوان
حوراء تضوج من كلمة فاهية ومن يكلولها طفلة تموت من هالكلمة تموووت...كامت بسرعة وراحت فتحت الكنتور وشافته طلع...
وسمعت بره الهلاهل كامت..راحت بدلت وغسلت بسرعة وشعرها بعده مبروم مال تسريحة البارحة..لبست شال وباوعت للي لابسته حلو ومستور....
نفس هاي 👇
باوعت لنفسها وكالت هسة انه وين طالعة لابسة هيج..
هي تلبس هيج دوم جوى عباية الراس الي تلبسها من تروح بيت عمامها وجدها...
بس هي بالعادة تلبس عباية اسلامية(جبة) وكامت واحتارت تطلع لو شنو وخجلانة ماتعرف احد..بس نسمة وين اطيح بنسمة هسة...
فتحت الباب وطلعت وشافت البنات يرحن ويجن..شافتها وحدة من بنات عم هشام..وباركتلها وسحبتها وكلتلها تعاي....
ودتها يم البنات وطاحلوها تبريكات وسألوها عن بياضها وبكوة جاوبت من الخجل وكالت الشيخ مايقبل احد يشوفه...
وامها ودعتها وراحت وظلت تبجي على امها وكلتلها خل يجي بابا اشوفه...
ايمان جاية من الصبح جايبها عمها لأن متعاركة وياهم..باوعت لحوراء بكل حقد...
كعدت حوراء يم نسمة ورقية وكله ساكته تستحي حتى تحجي وتفكيرها انشغل بالشيخ..وتحس بشعور حلوو من تذكر حنيته وطيبته وياها البارحة ويعاملها مثل ابوها...
وكعدت تسأل نسمة عن احوالها وشكد اشتاقتلها..ونسمة سألتها عن امها كلتلها حوراء ماروح بيت جدي ومادري بيهم...
خطية نسمة ماتت قهر وهم منا شكد سمعت بسامير البارحة يم البنات..بنات عمهم..وحتى الصبح هم سمعت جم حجاية وغلست...
خلص اليوم ومحد بقه بيت الشيخ هشام كلها راحو حتى خواته كلمن رجعت لبيتها...وحوراء كضتها يم البنات وتستحي حيل ورقية كلتلها هاي ايمان مرت اخوي هشام...
حوراء تدري مزوج كلها ابوها وحتى الشيخ كلها عنها بس ماعرفت ايمان هي زوجته..ومن تذكر هشام وابتسامته وحنيته يغطيها شعور حلوو ولا عمرها حست بي....
شلون وهي تحلم بي كل ليلة تقريباً صار شكثر..شلون ماتحس بشعور حلو اول ماشافته مجانت متوقعه ابداً تلتقي بي بعد..بس هو ما اذكرها استغربت....
حبت رقية كلش حبابه وحتى فرحت بنسمة وشوفتها وعمتها ام هشام هم زينة..بس اشتاقت لبيتهم ولخواتها وخصوص لأخوها الزغير...بالرغم مافاركتهم غير امس واليوم...
بالليل اجو هشام وكرار داخل يمهم بعد مابقو نسوان وراحو كلهم..ومن اجه هشام ظلت ساكته..وشافها كرار وظل يغمز لأبوه..وهمس لأبوه يمه..والله طلعت حلوة البنية وصغيرة اششررد...
وهشام يباوعله بنظرة خزرة يعني اسكت وسد حلكك..
حوراء مستحية منهم ثنينهم..وخنكتها دكات كلبها من تباوع على هشام...
وبعد العشه كلمن بغرفته..وايمان كاعدة بغرفتها وكاعدة تبجي بحركة وتكول ياريت مارحت عزام بعدك انه وحيدة من صدك..حتى بيت عمي ماتحملوني...
حوراء بغرفتها راحت فتحت المجرات تدور على شغلاتها ماتدري وين مرتبتهن رقية والبنات...
كعدت عالسرير وفتحت مجر ولكت بي صورة لهشام وياه مرته وطفل صغير بلا ملابس كلش بلا أي شي حتى حفوظة ملابس...
وبالصورة شلون ثنينهم ضاحكين..ابتسمت على ضحكتهم بالصورة..وتكول هاي اكيد ام ابنه كرار....التفتت على صوت فتح الباب ودخل هشام...
هشام باوع للصورة بيدها:شسوين...
