رواية بيت خالي الفصل الرابع عشر بقلم جمانه السعيدي
رحمه...ماكدرت انام همام هيج كل المواجع عليه
اتصلت بخالتي وكتله اريدج تجين ضروري
خالتي....على باجر باجر عطله واجيج وابقى يمج طول النهار واطبخلج دولمه غدا
رحمه...مو تتأخرين عليه
بليل كاعده انضف وارتب اريد اشغل نفسي وماافكر بي
بس ولله اروح اجيب حاجه من المطبخ ومن اوصل انسى اني على شنو اجيت
لو رايحه اطلع الملابس من الغساله
ومالكيتهن اصلا بعدهن بمكانه ماخليتهن بلغساله
يعني حركه بلا فائده
جنت متصوره اني أقوى من هيج وجاوزت كل الحزن
بس همام يختلف هذا حب الطفوله
الحب الاول بحياتي
سمعت اجاني مسج
...هلو رحمه اني همام اسف لان ازعجتج اليوم
بس مااكدر اطلعج من عقلي
طبعا من حقج ترفضين ترجعيلي اني الي سويته وياج مو شويه
بس تعرفين كلامج اليوم وعاني على نفسي
كل الكلام الي كلتي عني صحيح
اني اناني وفكرت بس بنفسي ونسيت انتي زوجتي
وأمانه من ابوي الله يرحمه
يمكن لازم اعيد حساباتي من جديد
بس بلاخير اني بشر وكل بشر يخطئ
يمكن اني غلطتي جبيره حيل
وجرحتج جرح قوي
بس ولله صدكيني على غفله صار الي صار
امي تلح من جهه ابن اكرم راح تاخذه وتروح ازوجه حتى تربطه هنا وتحافظ على ابن اخوك
ومروه الخبيثه جانت تضغط هواي على امي
كلما اروح الكه امي ضغطها صاعد
الله يلعنه هلمروه دمرت حياتنا تدمير
اني هسه مااكلج ارجعيلي بس اريدج تسامحيني ايجوز حوبتج تعثرني اكثر واكثر
سامحيني الخاطر ابوي اذا اله معزه بكلبج
اذا تذكرينه وتذكرين حنيته عليج
سامحيني رحمه اعرف كلبج جبير وماكو مثلج ابد
جمانه السعيدي
رحمه...قريت الرساله وما رديت علي
وماكدرت احضره
يمكن حابه اسمع منه اكثر وانطي النفسي فرصه افكر بكلامه
ويمكن اني مانسيته بس اكابر
الي تغير شي واحد اني صرت قويه مو مثل قبل
يعني اكدر اتحكم بنفسي ومشاعري
احس نفسي تعبانه ونعسانه بس مااكدر انام
اخذت مهدء ونمت
ماكعدت اله خالتي تتصل عليه
خالتي...هاااي وينج كسرت الباب افتحي
كمت لكيت الساعه عشره الصبح هاي الحبايه خلتني نمت
وماادري بنفسي
فتحته الباب حضنته لان حيل مشتاقتله
صار اسبوع ماشايفته
خالتي تعاي جبتلج كيمر يخبل
وهذا جدر دولمه للغدا
رحمه...تعرفين مااكل كيمر اله انتي اجببيلي
خالتي الف عافيه
يله خلي القوري على النار وهذا صمون حار
غسلت وجهي وخدرت جاي وكعدنا نسولف
جمانه السعيدي
خالتي... شكووو صاير شي احجي
رحمه...همام اجا اعتذر مني ويريد نرجع
خالتي...بكيفج انت اكثر وحده عاشرتي همام وتعرف هو يستاهل هاي الفرصه لولا
رحمه...مااعرف كلش متردده
خالتي....اذا تحبي ارجعي لا اضلين تفكرين بس بلموزينات
همام ساعدج هواي بلدارسه
وجان كلبه طيب وحنيبن عليج
بعز الازمه الي عشتي بيه بعد وفات اهلج هو طلع من هاي الكئابه وجان قريب عليج
من جنتي ادرسين جان يروح ويرجع عليج
من ابو الله يرحمه وصاهم بيج هو دك صدره وكال اني ازوجه ومااعوفه تطلع من هذا البيت
ازوجتو ٣ سنوات خلا ل هاي الفتره مازعلج ابد
حتى من ازوج اني متأكده ازوج علمود الاطفال
راح ازوج من وراج حتى لا تزعلين منه
جان يكدر يوكف بوجهج ويكول اني راح ازوج اريد اطفال وانتي بكيفج تردين تبقين تردين تنفصلين
هو غلط اي غلط من اتسرع وطلكج ومابقه متمسك بيج
بس يايمه كلنا نغلط
منو من عدنا معصوم من الغلط
ابونا ادم يملك الجنه وكل خيره وغلط
موسى كليم الله وغلط وقتل نفس علمود نزاع بسيط
هذا الكون الله خالقه حتى الناس تغلط وتتعلم من غلطه
ترا الإنسان مايتعلم من أخطاء الاخرين
مثل مايتعلم من غلطه هو
لازم يعيش التجربه حتى يعرف الصح من الغلط
جمانه السعيدي
رحمه...بس اني الي كشفت مروه لو ماني جان بقه وياها الهسه
خالتي.. مروه رب العالمين كشفه لان تمشي بطريق الغلط
وتمادت هواي بلمعاصي ورب العالمين انطاها الف فرصه حتى اتوب وماكوو
وهمام انسان محضوض ورب العالمين يحبه
وخلا كشفه عن طريقج قبل لا يفوت الاوان وهذا الطفل ينولد ويتعلق بي همام
رحمه...يمكن اذا ازوجت واحد غيره انسا واصير ام
خالتي.. كلامج..صحيح بس .خل نحسبه وحده وحده
اولا منو يكول راح ترتبطين بإنسان ويطلع زين
ترا الناس ماتنعرف حقيقته اله نعاشره
ثانيا...انتي الف واحد يتمناج بس لان عندج بيت وراتب
يعني احتمال يجي واحد طمعان بيج
ويضيعج بلزايد
ثالثا...من يكول الي راح تزوجي يطلع مو عقيم مثل همام
وتبتلين بي وتنحرمين من هذا الحلم
ترا هاي الاشياء مايعلم بيه بس رب العالمين
رابعا....انتي ماعندج سند واي واحد راح يزوجج راح يستقوي عليج لان يعرف مالج احد يدافع عنج
اني مو اكلج هسه ارجعيليه وهمزين اجا واعتذر منج
لا صممي على رائيج
واشلعي كلبه يله ترجعين اله
وخلي علي شروط تكسر الضهر مو مثل اول ماازوجتي
ماصدكتي همام خطبج وكاتبه الفين دينار مهر حاضر
والفين غايب
لا اكتبي علي مهر قوي واشرطي علي كل الشروط الي ترديه
اريد اكلج شي اخير صح انتي جاي تكابرين
بس انتي بعدج تحبي
لو ماتحبي ماجان قبلتي تسمعينه
ولا دزيتي عليه حتى تحجين بهذا الموضوع ابد
شوفي الحب الاول وحب الطفوله ماينسي ابد
وانتي عشتي تسع سنوات وانتي تحبي
لو ماتحبي ماكلتي الصوج بيه مايصير عندي اطفال
وشلتي هذا السر بكلبج ٣ سنوات
اني هذا الي عندي فكري زين وأخذي وقتج واشلعي كلبه
ولا تقبلين بسهوله
خلي يعرف ان الله حق
اذا شفتي صمد وبقه يلح وتحمل كلشي منج
يعني يحبج صدك وندمان من كل كلبه
جمانه السعيدي
رحمه...الصراحه حيل اقتنعت بكلام خالتي
وقررت انطي النفسي فرصه واخلي باختبار واشوفه يتحمل لو لا
حيل ارتاحيت الكلام خالتي كلامه مقنع واحسه تفهمني حيل
بليل دزلي مسج كاعده
قريت الرساله وماجاوبت
همام. اعرف انتي كاعده بس حبيت اكلج شلونج
هم مارديت علي
همام. امي اليوم تخربطت لان مروه كسبت القضيه
وحضانت علي صارت اله
وراتب كرم هم اله لان تصرف منه على علاوي
امي تبجي تريد تشوف علي وهاي الخبيثه ماتقبل تخليه تشوفه
جاي تنتقم مني بهاي تصرفاته
تعرف امي متعلقه بي وماتكدر تتحمل فراكه
رحمه...اقرا وماارد علي
همام...دقيقه وارجع
اني عفت التليفون ورحت فرجت اسناني وغسلت وجهي
وخليت مرطب الوجهي واديه
ورجعت
لكيته مصور جهاز الضغط ويسألني شكد صاعد
بعدين كاتب راح اخذه للمستشفى
اخذت حبايه ضغط ومانزل ضغطا
اني قفلت التليفون ونمت يحاول ياثر عليه بامه
يعرف اني كلبي مايستحمل
الصبح كعدت مالكيته كاتب اي شي
جمانه السعيدي
طلعت للدوام بس وصلت وخليت جنطتي
شويه واجاني همام لابس تراك وشعره مخربط
همام...صباح الخير
رحمه...استغربت من شكله صباح الخير
همام...ممكن تجين تشوفين امي
رحمه...اسفه مو اختصاصي
همام...هاي شبيج رحمه معقوله صرتي قاسيه الهلدرجه
ترا هاي المره عشتي وياها ابيته وعتبرتج بته
رحمه...اسفه شوف دكتور يفحصه
همام...استغفر الله واتوب اليه
راح يركض واني تندمت مهمه يكون اني عشت بيتهم واكو عشره
رحت ورا شفته اخذ الدكتور الغرفته
رحت وراهم الدكتور فحصه وكتبله ابره تنزل ضغطها
اني اخذت الورقه من الدكتور ورحت جبت الابره
رجعت لكيته كاعد يمه
رحمه...عمه عمه تسمعيني شنو يوجعج
ام همام...مااكدر يمه رحمه مااكدر
رحمه...هسه راح اخلي هاي الابره بلمغذي وتصيرين زينه
خليت الابره بلمحلول وضبطته وطلعت
راسا لحكني همام
همام..شكرا تعبناج
رحمه..ماكو داعي هذا شغلي
عفته ومشيت اخر الدوام سئلت عنهم كالو صارت احسن وطلعو من المستشفى
رجعت للبيت سبحت وتغديت ونمت
بليل اجتني رساله
همام....شكرا رحمه ام كلب الطيب
مارديت علي
همام.. امي صارت احسن ايدج العافيه تعرفين من البارحه لليوم شكد اخذت علاج وماتحسنت
بس انتي بس انطيته الابره صارت زينه
قريت ومارديت علي
ثاني يوم دزلي صباح الخير حبيبتي
اتمنى تسامحيني وترجعين تنورين حياتي
هم مارديت علي فعلا احس نفسي قويه مو مثل قبل
بس ماانكر اني بعدني احبه
بلدوام اجتني باقه ورد وعلبة كاكوو
وياها كارت
صباح الخير على احلى عيون بلدنيا
هذا الككو الي تحبي
فرحت كلش احس نفسي رجعت مراهقه وزغيره
كل يوم الصبح يدزلي ورد وكاكو
ويدز مسج صباح الخير باباتي
وبليل يكتبلي تفاصيل يومه وكم كلمة غزل وياهن
ويطلب مني اسامحه وارجع
بس اني بعد مامقرره يمته ارجع
اخر شي كتبلي العمر جاي يمشي والايام الحلوه تضيع
كل يوم يروح بعد مايرجع
واني ندمان على كل لحظه ضاعت من عمري وانتي مابيه
تعبت رحمه تعبت حيل
وجاي ادفع الثمن غالي سامحيني وارجعي
واني اعوضج كل الحزن الي صار بسببي
اخلي ايامج كله سعاده وفرح
ارجعيلي بنيتي حبيبتي
