رواية لست خائنه الفصل الرابع عشر 14 بقلم انين الليل

وصريخهن يوصل العاشر جار جرم بيهن 

:: يستاهلن الحقيرات 

ام بهاء/:هنه من ناحية يستاهلن يستاهلن بس يمه سلام اسمعني وافهمني انا خالتك مثل امك 

وادري شنو شايل بكلبك من ضيم وقهر بس ابد لا تفكر هسه تطلك كوثر 

انا جاوبتها بدون تردد::لا لا خاله لكمه واجت للحلك شلون ما اطلكها 

ربيعه /:يمه صبيحه ما تنظف تخبلك وما تخليك تطلك بتها ما شفتها شلون وكفت الك وتكلك

اسهل منها ماكو لكيته ويه مرت اخو يعني ما عدها مانع تروح العمام رضوى وتكلهم طلك بتي 

جي شفته ويه بتكم ويجون يذبحون البت صير ذكي صبيحه مو هينه سحرت طاهر بين يوم وليله 

لاتعم على روحك وعلى هالمسكينه رضوى 

جاوبتها باستغراب ::خاله رضوى شجابها بالنص ؟

ربيعه/:خاله هو عمك من خابرك بالبدايه شكلك 

:: گلي ليش ما تجي للبيت وتسال على مرتك 

ام بهاء // بس هذا الكلام 

باوعت الها :: شقصدج خاله 

  — بروح ابوك بس هذا الكلام گاله 

جريت نفس :: خاله گلي اذا خلالك الجو طلك بتي 

ربيعه/:يعني شنو قصده 

::اعرف بيها هاي افلام صبيحه 

ربيعه /:وما طول تعرف بيها خاله لا تتهور اريدك تسمعني دير بالك منهن هذني كل شي

يسون انا چنت هناك واجه طاهر وسألهن وهنه نكرن بعدين من حلف عطاء بالقران هي كالتله 

وانوب صاح على اديان وكتلها كتله وهي كل شي حجت 

وهو لزمهن وكطعهن نريد نفكه ماكو حتى انا حصلتلي دفعه وانوب لزم كوثر من شعرها وسح البيتهم 

::اي خاله يستاهلن 

ربيعه /:ادري يمه بس شتتصور صبيحه تسكت لا والله هاي انا الي اعرفها وطاهر شويه ويفش

لان صبيحه عاميته وكلمتها هي التمشي وانت سلام رگبه وحده وشوف اخوك بيمن وصاك

وشكلك شغل اخوك وفلوسه وتعبه ابني فكر ولا عبالك طاهر من گلك طلك وتطلك بته راح يسكت 

  لا وداعتك يصير ضدك ويصير عدوك وهنه موخوش يمه انا الاعرفهن

::خاله ما اطيقها اكرهها من انا زغير لان اعرف بيها خبيثه

ربيعه/:ادري والله بس لازم تتحمل على ما تشوفلك چاره 

نفخت وسالتها ::يعني شسوي ؟

ربيعه/:يمه صير اذكى منهن لا تنطي صبيحه مجال تتمشغل بيك مثل ما يكول ابو المثل 

اتغدى كبل لا يتعشون 

::شلون خاله ؟

ربيعه/:هسه انا افهمك هسه تخابر عمك وتكله عمي انا كوثر مرتي وما ابدلها بنسوان الدنيا هي غلطت لان تغار 

عليه وانا مسامحها ما الكى وحده مثلها اتحملتني عمي هسه انا جاي واخذ مرتي وانت عمي هم وصيها 

خلي تتحملني وتدير بالها عليه 

وبعدين يمه انتبه مو الا تاكل لو تشرب حتى من تجيبلك جاي سوي روحك تشربه اطلع 

للحديقه يم السنك وذبه

انا اخاف عليك وهسه ما طول رضوى لازمه عده عذرك وياك تكعد بالديوانيه 

:: ها خاله يعني تعرفين بصبيحه مو تمام 

— كلنه ندري بيها السان وجسره وانا اخاف عليك منهن 

::خاله انتي شتحچين اگلج انا ما اطيقها ولا اريدها غلطه عمري ودفعت ثمنها 

ربيعه بنتر /:خايب ادري واكبر غلطه غلطتها 

   ردت اگللها كل هذا الي صار ابن اختج ورضوى هو السبب بي 

خالتي كسرت سكوتي // خاله لازم تتحمل الخاطير نفسك والخاطير اخوك وهو بكبره

وهاي المسكينه رضوى والخاطير عطاء اتحمل ياوليدي وهسه يالله خابره وروح امرك لله 

تره يمه سلام حاسه بيك وبعذابك بس لا تنسى يا سلام انت اختاريت حتى ما استشاريت احد عبالك عدك

 سباق نسيت امك الله يرحمها شجانت تكول على صبيحه وبتها وشوصتك

ظليت صافن ومحتار واعض بشفتي واضرب ايد بالثانيه خالتي كالت

- - يمه سلام كل شي بالهدوء ينحل والعصبيه تجني على صاحبها ما تتذكر فواز الله يرحمه شلون 

جان ياخذ الامور بضحك وشقى وهدوء بس من احد يدوسله على طرف يعرف يمته وشلون 

ياخذ حقه وكلها تهابه عمت عيني عليك خاله

انا جريت حسره وخابرت عمي طاهر الي ما قبل يرجعها وكلي

- - لا عمي لا تغلط غلطتي هاي تشلع كلبك 

وانا كتله ::مي خالف اتحملها الخاطرك عمي انت مثل ايوي وهي وصيها خلي تحترمني

وطلعت من بيت خالتي اخذت تكسي ما قبلت بهاء يوصلني دخلت للبيت وبوجهي للديوانبه انا لكيت كوثر 

وعمي متانيني

طاهر/:تره وجهي اسود منك سلام واله منو يصدك بتي المهندسه المثقفه هيج تسوي هذا كله تعلووم امها بس

هاي هي تسمعني بعد اذا وصلت يم امها لو امها اجت يمها اثنينهن اموتهن موت وما الها غرض

بمرت فواز تخلص العده ويصير خير

انا ساكت وهي بس تبجي بدون صوت ما باوعت بوجهه راح عمي وطلعت ورا هو باسني براسي وكلي 

طاهر/:احسبها عليه بابا سلام 

::لا عمي ولا يهمك انت عمي بمثابة ابوي 

طاهر/:الله يرضى عليك ويبرد كلبك

ورجعت للديوانيه شفتها الكوثر طبعا عباره عن قطعه زركه يعني عمي كافر بيها وجهه عبالك مصارع خسران 

عمي مسوي خريطه ازرك على اخضر على احمر الخشم مورم العين وحده تريد تطلع والثانيه حمره يعني بعد تفكر

الف مره كبل لا تدنه يم رضوى 

ما اعرف ليش دائما اجيب اسمها الرضوى ليش هي تروح من بالي انا اتمددت ع القنفه بدون 

ما احجي وياها وخليت ايدي على عيوني هي اتدنت عليه جان صوتها كوه يطلع وهي تبجي وتكول

كوثر/:سلام فدوه سامحني والله لان احبك هيج اسوي سامحني بعد ما اعيدها 

گعدت وجريت نفس ::وانا لو ما احبج ما خليت عمي يرجعج 

كوثر/:صدك سلام 

هزيت راسي ::طبعا انتي حبيبتي الي وكفتي وياي وتحملتيني وانا عذبتج هواي

انا اسف كوثر سامحيني

هي حظنتني وبقت تعتذر وانا اسفه وبعد ما اعيدها سامحني وصارت تبجي وتعتذر 

انا ما لمستها وهي بقت نايمه يمي بالديون انا سويت كل الكالته الي خالتي ام بهاء بس ما اتقربت الها

 كوثر واحنا زغار اشوفها بت عمي المكروهه الحاقده الي كل شي تريده تاخذه وذا ما تكدر تاخذه لازم تخربه

كوثر الي تكره رضوى وما تشوفها الا عدوه الها

اتذكر رضوى من چنا زغار تسميها بت الساحره الشريره انا ابتسمت لان اتذكر من اسالها ليش بت الساحره تكلي 

=لان صبيحه هي الساحره الي تركب ع المكناسه 

اسالها ::رضوى منو المكناسه 

هي تسكت انا اكلها ::بداعتي رضوى منو المكناسه 

تتقرب عليه وتشاورني =بس مو تكول عفيه 

انا اضحك ::والله ما اكول منو المكناسه التصعد علي صبيحه 

رضوى =خالي طاهر

ضحكت بسري 

انا من اتزوجت كوثر جان بنيتي ابدي اول خطوه للانتقام من رضوى وردت كوثر تساعدني بس هي

ما قبلت تحتويني بالعكس صارت تمشي ورا كلام امها 

الصبح طلعت رحت للمحل من وصلت كتبت الها مسج

::حبيبتي انتي ارتاحي انا ارجع بالليل احبج

بقيت بالمحل واتصلت بيه خالتي وفهمتها انو انا ما قابل ع السويته وعمي بنفسه كلي طلك خالتي باستهزاء كلتلي

- - لا تستعجل وابقى هيج يجوز تحب مرتك 

   :: خاله شتحچين انا ما اتصور بيوم من الايام احب كوثر لو هي تتبدل 

خالتي /:جا شتريد سلام انت تحبمن گول 

::اح خاله انا سمعت كلامج لان اريد اوگف على صورة حل 

- - الله كريم مثل ما وصيتك دير بالك 

::اي خاله اليوم منو بايته يم مرت فواز 

- - اليوم اجت عليه تبقى يمها 

::خيير ان شاء الله

بالليل اتعشيت بالمحل واخذت وياي اربع بواكيت بقلاوة ومريت ع الصيدليه اخذت شيت حبوب ورجعت 

دخلت للديوانيه تلكتني كوثر وحظنتني كعدت ع القنفه واجت كعدت بالكاع وخلت راسها على رجليه انا صرت 

العب بشعرها كتلها وانا اجر نفس 

::اخذي هذن بواكيت البقلاوه واحد الاهلج اوواحد البيت عمي صاحب وانطي واحد العمتي عليه وهذا النه 

هي من سمعت باسم عليه امتعضت بس ما حجت خافت اخذتهن وراحت بعدين رجعت جايبه وياها ماعونين وبطلين 

ماي وهي جاي تخلي بالبقلاوة سمعت صوت عمي طاهر وهو يكول 

يالله يالله 

انا كتله ::هله عمي اتفضل 

دخل جايب ويا صبيحه والعائله كلها تذكرت من كالت خالتي ربيعه طاهر شويه ويفش انا كمت سلمت على عمي 

والولد واجت صبيحه وبس شافتني حضنتني وباست خدي وتبجي وتكول

- - يمه سلام انت وليدي وانا جان محترك كلبي وهيج حجيت لاتزعل مني وهاي كوثر مو بس

مرتك خدامه الك 

جاوبتها ::لا خاله كوثر ام بيتي وتاج راسي وانا بس تكمل مرت فواز عدتها نتبايع ع البيت واعزل بمرتي اريد 

راحتي وكوثر ما قصرت اتحملتني 

طاهر //عفيه ابني اعرفك خوش ولد وهالطيتك بتي 

انا ويه روحي ::علواه ترجعها عدك عبالي رجال طلعت طلي،،، 🐑

كعدو ما شاء الله قضوا ع البقلاوه تذكرت بليلة وفاة اهلي لمن اجو وما خلو لا حب ولا بقلاوة ورضوى وعطاء

بليلتها شبعن قهر وصعدن وانوب نزلت رضوى وهي ابدها تنتحر بيه جي كاعد واضحك انا صافن واجت عمه 

عليه دكت الباب سلمت وصلت يم طاهر گالت 

— اشلونك خويه ابو صلاح 

هو رد عليها من وره خشمه // هلا هلا 

اتقربت يمي // شلونك يمه سلام 

::هلا عمه شلونج 

عليه/ الحمد لله بخير اجيت اسلم عليك واتشكرك ع البقلاوه والله ما الها داعي احنه ماناكل لا انا 

ولا اختك وكوثر خطيه جابتهن النه (باوعت الكوثر)هاج حبيبتي اخذي الماعون لاينكسر انا فرغتهن 

وغسلت الماعون 

انا باوعت الكوثر وعرفت انها ما موديه الباكيت 

انا باوعت العمتي وحجيت ::عمه تعاي كعدي اريد اشوفج 

كامت صبيحه ولزمتها من ايدها وجابتها وهي تكلها //يا خيه عليه شلقصه دا اكعدي يم ابن اخوج

من زمان ما شايفج

كعدت عمتي وهي ساكته ومبينه متاثره ومقهوره شويه وكامت وهمه بقوا يسولفون ويضحكون وصبيحه 

سيدة الموقف من طلعو انا ما سالت كوثر ليش خلت بماعون البقلاوة لان ادري بيها تكره رضوى ولو بيدها

 ترش سم وتقدمه اتقربت منها وانااجر نفس ولزمتها من حنجها وكتلها

::حبيبتي كوكوا تدرين انتي بعد الج مرحله وتكملين الكليه وما اريد شي يشغلج عن دراستج وانا لازم

اوكف على رجليه واوسع شغلي لذلك ياعمري لاتزعلين يوميه بايدي اشربج حباية مانع لان ادري بيج مثل 

عمتي صبيحه اذا حملتي باول واحد بعدج ما جايبته تحملين بالثاني 

كوثر //يا سلام شبيك بس تحجي على امي 

::ما احجي ياروحي بس تدرين من اتزوجنا الهسه ما ارتاحينا وانا كوثر اريد ارتاح وانتي زوجتي ريحيني

اخذت الحبايه وخليتها بحلكها وشربتها ماي وكتلها 

::كوثر هذا الشي مو يطلع بيناتننا ومثل ما كتلج بس تخلص مرت فواز عده ما تبقى كل من ياخذ حقه وتروح الامها

 العمامها ما يهمني

هي حسيت بيها فرحت وكامت وحضنتني ونمنا كاي زوج وزوجته ولازم امثل عليها الصبح كعدتني وهي تبوس 

بيه ولكيتها محضرتلي الحمام الخارجي وهي راحت تسبح بغرفتها يعني ما يصير نمت وياها وما تخلي رضوى

 وعمتي يعرفن تطلع مو كوثر سبحت واجت يمي حضنتني وكالت

- - يالله تعال اتريك 

::لا يمعوده متاخر خابروني العمال اكو حمل من البارحه وانا ناسي اليوم خاف اتاخر لا يظل

بالج وانتي داومي واليسالج ع الزراك الي بوجهج كولي عثرت وكعت من الدرج 

كوثر/:اي راح البس نظاره

بستها واخذت سويج السياره والموبايل وطلعت وانا اضحك على روحي من الي جاي اسوي 

واحجي ويه روحي ::شنو خالتي تعرف شي وضامته علي اي اكيد تعرف

وبقيت على هالمنوال اروح بالليل للديوانيه واطلع من الصبح وكوثر ما تفاركني خانكتني همزين

اجي بس بالليل 

فد يوم انا بالمحل واجه رجال نزل من السياره شايل جنطه بايده لاكا واحد من العمال كله اريد استاذ سلام انا

 كت للعامل خلي يتفضل دخل كان رجل عمره اكثر من اربعين سنه اتسالم وياي وكعد 

انا صحت على عزوز جاب جاي باوعلي ونزع نظارته وكلي

- - اقدم لك نفسي انا المحامي رافت حميد 

::اهلا وسهلا اتفضل استاذءبيش اكدر اخدمك 

بهاي الاثناء اجه مقداد ابن عمتي اجاني ودخل سلم عليه وعلى استاذ رافت الي عرفته بي 

كال المحامي //استاذ سلام عندي موضوع مهم ويه حضرتك ياريت اتكلم بي بيناتنا لان عندي شغل 

انا ::اي استاذ مقداد ابن عمتي مثل اخوي مو غريب تفضل بيش اخدمك 

- - لا العفو بس انا محامي اخوك المرحوم فواز واكو هواي امور يرادلها حل ويه زوجته المدعوة رضوى 

انا باهتمام ::اي استاذ اسمعك 

- - بالحقيقه المرحوم عنده املاك وفلوس ويطلب ناس واحنه لازم نحصر التركه وانت وزوجة اخوك

لازم كل واحد ياخذ حقه وانا بما اني المحامي للمرحوم ارتايت ان اجي واتكلم وياك قبل ان

اشوف ارملة اخوك 

انا ::اي استاذ مثل ما تعرف انو ارملة المرحوم ماسكه عده فالي اشوفه تخلص عدتها ونكعد

انا وهي وعمي ونشوف الي النه والي علينه 

المحامي/:العفو استاذ سلام عمك شدخله بالموضوع

انا تلافيت الموقف لان حسيت راح يصير نقاش وكتله

::اقصد عمامي يكونون حاضرين ويانه لان همه تقريبا عايشين بنفس البيت 

المحامي /:ع العموم استاذ سلام انا اروح وهذا كرتي من تخلص ارملة اخوك العده اتصلو 

بيه وانا بالخدمه الاي استشاره 

::ان شالله استاذ

- - استاذن 

::شرفتنا اهلا وسهلا

وراح المحامي وبقى مقداد سمع كل شي جان جاي ياخذ بضاعه الصديقه والفلوس يتاخرن بس بضمانته انا انطيته

 وراح انا ما اعرف ليش ما مرتاح من جية المحامي خصوصا لمن كلي ياعم هذا 

انا جان قصدي على حصة عمي صاحب بالبيت بس ما حبيت اطول النقاش بشي ما اعرفه راح مقداد بعد ان كتله 

::خلي صاحبك يجي وياخذ البضاعه الي يريدها ما طول بكفالتك 

من راح مقداد انا اتصلت بالمحامي رد عليه 

- الو 

::الو السلام عليكم 

اهلا منو وياي 

:: انا سلام اخو المرحوم فواز 

اهلا بيك استاذ سلام اتفضل 

::استاذ رأفت حاب اشوفك 

كلي //اي اتفضل يمي الساعه بالسبعه بالليل بمكتبي موجود العنوان

بقيت بالمحل وانا افكر بكلامه ورا الصلاة طلعت رحت للمحامي بمكتبه جان كل همي استفسر على حصة عمي 

صاحب بالبيت وليش من كلت يكعد عمي ويانه المحامي ما وافق وصلت بعد ما خابرت كوثر كتلها 

:: جايني حمل راح اجيك علي بالمخازن انتي نامي بغرفتج اذا اكدر اجي اخابرج واذا اتاخر انام بالمحل 

وصلت للمحامي وكعدنا بالمكتب وبادرت بالكلام 

::استاذ رافت انا ما كدرت اطول بالكلام كدام مقداد لان تعرف هاي اسرار خاصه بينا 

المحامي/:اعرف هذا الشي استاذ سلام وانا ردت نسولف ابحدنا .

::استاذ رافت بالحقيقه من كتلك عمي يكعد ويانا جنت اقصد ،،،

ما خلاني اكمل هو بادر //جنت تقصد عمك صاحب وحصته من البيت 

::اهاا طلعت تعرف كل شي 

المحامي/:اي مو انا المحامي مال فواز الله يرحمه وفواز كان اكثر من صديق وانا على معرفه باغلب شغله 

:: ما دام تعرف كل شي اكيد تعرف حصتنا بالبيت 

هز راسه // اي اعرف بس الي انت ما تعرفه انو عمك باع حصته بالبيت على فوازوقبض فلوسه زايدات مو ناقصات

وهذا الشي مصدق بالمحكمه وتكدر تتاكد من عمك فالتركه 

راح تنحصر بينك وبين ارملة اخوك وللامانه السيده رضوى الها الحصه الاكبر 

انا اتفاجئت من كلام المحامي كتله ::ان شالله نجتمع بعد ان تنتهي عدتها 

المحامي/ وانا بالانتظار ومن حق السيده رضوى ان توكل اي احد يدير العمل بدالها يعني

تسوي وكاله عامه 

::ان شالله استاذ نبقى على تواصل 

وسلمت وطلعت من المكتب وانا اريد انفجر من الغضب

يعني ما كفاج يارضوى اخذتي فواز انوب هسه تاخذين تعبه وحلاله 

انتي ينطبق عليج المثل الي يكول ( يامن تعب يامن شكى يامن على الحاضر لكى )

الفصل الخامس عشر من هنا 

شكرا لزيارتكم عالم روايات سكيرهوم