رواية لست خائنه الفصل السادس عشر 16 بقلم انين الليل

/////////////////////////////

رضوى 

من جابو خبر فواز ما اعرف شنو كان احساسي وانا اشوف الناس تبچي على فواز 

فواز الي جان الي سد منيع جان قوتي بلحظة ضعفي فواز الي جان اخوي الي بجاله مدللا وراسي عالي الي 

يكول رضوى اختي وانا اخوها عن مية رجال لكن بذيج الليله المشؤومه راح كل شي وطاحت صورة فواز الاخ 

والعضيد بقت صورة فواز النذل الي نفسه دنيه على خطيبة اخو

تدرون كرهته واتمنيت اكتله مووت جنت من اشوفه اكره نفسي واحقد علي 

اشلون الك نفس وانت تكلي رضوى انتي اختي 

بقيت ست اشهر وانا انتقم من نفسي مره بالانتحار ومره بالبجي ومره لا بالتحدي خصوصا 

من صبيحه وبتها وسهير لمن اتمادن علي 

بذاك اليوم من وكفت استعطف سلام بنظره ان يدافع عني وهو ساكت بس من اجه فواز وسكت

الكل وكال بيتي وبيت مرتي والي يدخل يحترم راعية البيت صحيح حسيت بالامان والشماته

من كوثر وامها لكن كل هذا ما شفع الفواز ولا غير نظرة الحقد والكره اله

اتذكر لمن كطعت شريان ايدي واخذوني للمستشفى وعرفت من خاله ام بهاء انو سلام هو اتصل 

بيها لان هو اجه يسوق بالسياره ويه فواز عبالهم متت 

اجاني فواز ثاني يووم للمستشفى واتذكرت حنيته من جنا زغار وخوفه عليه باوعلي وكلي بعتب

1

- - رضوى بعدج تحبينه حتى من صرتي مرتي 

جاوبته بعصبيه = لا تكول مرتي العقد باطل والله وانت تعرف العقد باطل 

فواز عض على شفته //ادري رضوى وهسه امر واقع شتردين 

صرت ابجي واكله =فواز اريد الحقيقه اريد اتبرأني وتبيض صفحتي حرام عليك الله يخليك اتوسلك انت مو تكول

 انا اختك اريد الصدك محتاجه احافظ على احترامي گدام نفسي وگدام الناس 

فواز رد بهدوء //؛اشش رضوى لاتبجيين الي تريدي يصير بس انطيني مجال انطيني وكت اصحح 

كل الغلط الي صار 

باوعتله =احلف 

/:وداعتج 

هزيت راسي وانا ابچي =لا كول وداعت رضوى اختي وداعت عطاء 

هو من سمع باسم عطاء جر حسره وكال /:خطيه انظلمت من هي زغيره وانوب انا كملت عليها 

انا بقلة صبر =هسه فواز احلف 

فواز/:وداعت اعز اخت بالدنيا رضوى وداعت عطاء التردينه يصير بس محتاج وكت واريدج تساعديني

بدون ما تسالين

ورجعنا للبيت وصارت هواي اموور انا ما اباوع بوجهه ولا اسولف ويا ولا انزع الحجاب كدامه وهو هم لا يخابر 

ولا يسولف حدا بس يجيب الاكل وما انسى من علمني على الرقم السري مال القاصه وامني على ذهب عطاء 

وبيوم الي يريد يسافر اخر مره اجه وجنت كاعده بالغرفه طلع ملابسه وراح للحمام وطلع مشط وخلا ملابس اله 

بالجنطه وباوعلي وحجى 

::رضوى هاي اخر سفره وبس الله يكتبلي وارجع راح احجي كل شي وراح تعرفون كل شي

وسلام راح يتزوجج بس يبقى شي واحد وهو انتم كلكم راح تكرهوني 

جاوبته =لا فواز انا مو على مود سلام يتزوجني بس انا بنظر الناس ونظر امي واختي خاينه والله يدري

وانت تدري انا مو خاينه 

فواز /: رضوى انتي مكرمه انتي مو خاينه انا الخاين انتي ضحيه وكلهم صارو يكرهونج من وراي

بس وداعتج وداعت خوتنا يارضوى ما باوعت الج الا مثل اختي ومن اجيت ذيج المره ردت

اجربج كلت اذا تقبل بالوضع انطيها حقها كزوجه بس انتي وين اكو مثلج وفيه وما تخونين 

انا اتدنيت منه وكتله =فواز عفيه سويلي حل الله يخليك 

فواز /:ان شالله اسوي وما يصير خاطرج اله طيب ومن اخابرج او ادز مسج اخاف اريد فلوس 

شي اتصرفي على كد كلامي 

=ان شالله

فواز/:رضوى انتي اختي وتاج راسي واريدج تسامحيني ع الي سويته والي راح تعرفينه ابد لا تكرهيني

تستمر القصة أدناه

= ليش الچذب انا كرهتك واتمنيتلك الموت لكن بعد الي صارفواز انت اخوي كافي السويته وما خليت احد يوصللي 

اتقرب مني وباس راسي وكلي /:بعده ابطن امه الي يمسج بكلمه او يحاول يتقرب عليج الا احسب الله ما خلقه 

وحتى من اموت محد يوصلج 

=جاوبته وگلبي رجف =اسم الله عليك 

هو ضحك وگلي //لا تگولين خايفه عليه ادري بيج تردين تموتين على اسليم الله يساعده اخذ كوثر شلون عايش وياها 

انا ضجت ==منو گلك ارجع له رجال اتزوج عسا بالخير 

هو هزلي راسه ويضحك رغم مبينن علي التعب والحيره ويگلي //والله چذب تردين تموتين من الغيره اختي واعرفچ 

(بعدين باوعلي وگال )مع السلامه اطمني كل شي واله حل 

انا هدئت من كلام فواز الي بث بيه الامل گتله =الله وياك توصل بالسلامه 

باوعلي وگال //ديري بالج على نفسج وما عليج باي شي يصير انتي اهنا ام البيت ومحد لو يتجسر ايسمعج كلمه 

ما اعرف ليش حسيت بيني وبين نفسي بعد ما اشوفه الفواز ما اعرف هيج حسيت 

وفعلا جان احساسي بمكانه من جابو الخبر وانو جانت ويا بنيه بس قبلها هو دزلي مسج 

رضوى طلعي 150 مليون وانطيهن العمي رحمن هسه يجي 

انا طلعت وخليتهن بعلاكه بالكنتور كلت بس يجي رحمن انطيهن لكن بدل ما يجي رحمن جابولي خبر فواز

 من سمعت الدنيا اظلمت بعيني وحسيت بروحي فارغه ما صرخت مثل اخواته لو مثل كوثر لو امها

 لو سهير لا بس دموع وروحي مبهوته وانا اباوع العطاء وشلون تعاتبني بعيومها وتكلي

:انتي السبب بعدتيني عنه وهو يحبني وما خليتيني ارتاح ويا ولا يشوف السعاده وياي

انغمى عليه وامي وخالتي صارن يغسلن وجهي وانا اباوع واسمع كلام النسوان 

- خطيه يجوز حامل الله يساعدها بعدهي زغيره 

- وهاي الي ماتت ويا بالسياره منو هسه مرته شناقصها ويدور سوالف مكسره 

وهواي كلام ولغط بقيت اباوع بعيوني وساكته ومن جابو وخلو ع الجربايه اتدنيت من التابوت وفتحته وانوب 

ميلت القماش عن وجهه شفته ما بي شي عبالك نايم كت الخاله ربيعه خلي يجن اخواته وعطاء انا ردت بس عطاء

 تشوفه وتبري ذمه لان اعرف هو يحبها وهي تحبه ودخلت عطاء واخواته الي ما قصرن بالكلام والمسبه عليه 

وطلعوهن وبقيت انا ويا اتقربت منه وبقيت احجي واعاتب وابجي 

 وبعدها ودعته بيد الله ورشيت علي العطر الي يحبه وبسته بخده ورديت علي القماش وطلعت النزله خليتها من 

اجو الزلم انا كتله 

...الله وياك فواز الله يهوون عليك 

اهنا انا صرخت وطلعت عبرتي 

وطيلة ايام الفاتحه انا كاعده يم النسوان واخواته وصبيحه وكوثر وعطاء وسهير سوون جبهه يذبن حجي انا انطيت الاذن الطرشه خصوصا وانا ما اعرف شنو راح يصير من اهل البنيه 

جانت تجي نسوان من الي يحبن القال والقلت يحجن /:يا شبي خاطب وما يكوول اشو مرته تخبل 

ونسوان يكولن /:لا يمعوده هي صاحبته وطالعه ويا بس همه سووها خطيبته على مود يداروون الفضيحه 

انا ما مهتمه لان انطي الفواز العذر ومنو ما جانت هاي البنيه راحت واندفن السر وياها 

يوم الثالث بالليل قررت امسك عده ورحت سبحت ونويت ولبست ودخلت للغرفه الغرفه الي اول مره احس بتانيب 

الضمير ليش ما خليت فواز ينام بيها ليش قسيت علي 

جانت صورته وياي من اكعد من انام من ابجي ابتسامته الحلوة

 (تره انا للموت ابقى احب فواز وما اكرهه احبه مثل اخوي وهو اخوي )

انا من اتوفه فواز ما نمت على الجربايه كله انام بالكاع ما اعرف اتخيله وابجي واحس بي شكد انحرم

تستمر القصة أدناه

ليلة السابعه كملو الختمه وبقن نسوان ع العشا وبعدين سلمن وطلعن وانا دخلت الغرفتي وما احس الا 

الباب انفتح واجت زينب وغدير امي وخاله ام بهاء جانن يمي وهنه يكللي 

زينب /:رضوى بسرعه انطينا مفتاح الغرفه ولمي جوالاتج وطلعي 

انا ما جاوبت بس بقيت متفاجئه ام بهاءءطلعت وامي حجت 

عمه شنو هالحجي رضوى بيا حال وهيج تحجن وياها 

غدير باستهزاء /:اسم الله وشبيها اخونا الراح من فكرنا وهسه بدوون مطرود اطلعي انتي وبتج

وصار حجي هواي جانن ناويات ع الشر واذا ما اطلع يجوز يضربني انا وامي بس سمعت صوت سلام 

وهو يصيح عليهن وشلون لبسهن العبي وطردهن وظل يحجي وانوب كال الامي ورقيه وخالتي يتناوبن 

لان ادري بي يخاف علي من صبيحه وكوثر

ثاني يوم اجت خاله ربيعه وامي واختي وخالتي قسيمه بعد ان كللولهن سلام رايدجن وسولفن

 بالبدايه انا كلت =لا الفصل تشيله العشيره خصوصا وانا اعرف فواز شكد جان يخسر للعشيره 

لكن من سمعت انو ممكن يكتلون سلام والناس تتعطل امورها وسمعت شلون سلام كال ابيع كل شي وافصل 

ولا اخوي ينسب بگبره انا كمت وطلعت الفلوس وانطيتهن الخالته 

بعدها كل شي ما سمعت عن سلام انا بس مقداد احجي ويا ويجي هو ورقيه ويدخل للغرفه باعتباره زوج اختي 

محرم عليه فد يوم انا دزيت على مقداد واجه طلعتله فلوس وكتله 

=ابو احمد رايدتك بخدمه 

مقداد /؛تامرين رضوى كولي 

=اريدك تروح للنجف وهاك هاي الفلوس اريد تبني قبر فواز وتسيجه وتخلي فوكه مثل القبه واريد هذن 

الصور --راويته صور بالنقال -اريدهن تخلوهن بكل جهه واريدهن كبار وشكد يكلف ادفع 

مقداد /:صار رضوى الي تردي بس اخو عمامه 

=انت مالك غرض ولا تجيب طاري الكل احد اتصرف وما عليك 

مقداد/:ان شالله عكب باجر اسافر اتامرين امر 

=شكرا خويه ابو احمد 

انا ما اطلع من غرفتي بس من يجن النسوان للقرايه وعرفت انو خاله ربيعه وامي كايلات السلام على زينب 

وغدير يسمح الهن يجن كدام الناس وصارن يجن ما يحتكن بيه كاعدات يم سهير وصبيحه وبس تخلص القرايه 

والعشا يرحن لاكلمه زايده ولا كلمه ناقصه 

وصار الاربعين وراحو وبقت يمي رقيه ومقداد ورجعو وهمه كلهم حزن انا لاكيت امي وخالتي وانا اشهك 

من البجي واسال بامي /:يمه شلونه فواز 

امي تبجي وتكلي /:يمه هو الجوه التراب شلونه ابو ضحكت الحلوة والعيون الي يخبلن والخد اليلمع كله 

صار جوه التراب رحنا كل شي ما حصلنه عمت عيني عمه فواز لا ولد ولا تلد 

انا بجييت كلت بكلبي/: يمكن لو متزوجين جا هسه انا حامل بطفل شايل اسمه ااخ منك متت والسر مات 

وياك عبالي تلحك تبيض صفحتي 

بقيت لازمه عده وشفت شلون خالي طاهر لزم صبيحه وكوثر وكطعهن لان عرف شنو حاجايات بس وره يوم 

اجت كوثر وهي تسمعني عود سلام نام وياها 

انا سلام ما سامعه صوته من ليلة سابعة فواز وعرفت من امي وخالته انو اكثر الايام يبات لو يم فارس لو بالمحل 

وساعات يجي بالليل للديوانيه

الصبح من يطلعون اطلع شويه افتر بالبيت لان الصبح بس سهير تبقى نايمه كوثر وعطاء يداومن وانى صفا سوتلي 

تاجيل لان ماسكه عده 

جنت دائما اقرا قران واصلي الفواز وابجي علي خصوصا من اتذكر كعداتنا سووا انا ويا وسلام وعطاء

فواز الي مات وماتت كومه اسرار ويا 

اجتني رقيه تبات يمي وحجتلي 

رقيه/: امس مقداد مر على سلام للمحل على مود ولد صديقه يريد بضاعه وما جوه ايده فلوس 

=اي وشلي غرض 

رقيه /:على كيفج رضوى مقداد يكول شاف يمه رجال يكول انا محامي المرحوم فواز وعرف انو جاي على 

مود يحصر التركه بينج وبين سلام 

=يا تركه رقيه 

رقيه //شنو يا تركه اموال فواز ورثج من رجلج ناسيه فواز رجلج 

=والله ولا على بالي هذا الشي 

رقيه /:بس هسه خلي يصير على بالج ناسيه فواز شكد عده فلوس 

=اسكتي رقيه مو وكت هذا الكلام 

رقيه /:جا يمته وكته اسمعي رضوى لا تتنازلين عن فلس واحد من حقج مو بس اتكبعتي بالعار والمذله 

انا من سمعت هيج صفنت وصارن عيوني يجرن اجت يمي رقيه وكلتلي 

- - ليش تبجيين 

باوعتلها وانا مبرطمه =ليش ابجي والله يارقيه ما ادري ابجي على حظي لو على فواز الراح محسر وكل شي ما حصل 

رقيه/:رضوى خيه فواز الله ويا بس انتي لازم تنتبهين النفسج 

=اعرف بس هسه مو وكت هذا الحجي فدوه ام احمد كلي المقداد لا يحجي يم كل احد عفيه خليني اخلص العده 

وبعدين يصير خير 

رقيه/:اطمني اصلا مقداد هو كلي لا تجيبن طاري لان يصير بيها حجي وتدخل خصوصا من يشم خبر طاهر وصبيحه 

بقيت صافنه على روحي واحجي ويه نفسي =شنو انا اورث فواز باي حق وشلون اخذ شي مو الي 

بعدين اكول =انا زوجته حتى لو ما ماسني بس كدام الناس انا زوجته 

ويجيني صوت =وكدام الله انتي شنو رضوى 

=اهوو عليج يارقيه انا عايزه همووم وانتي جملتيهن 

=خلي اخلص العده وبعدين يحلها الحلال 

وتمييت بالعده ويتناوبن عليه امي ورقيه وخاله ام بهاء الي احس بيها تعرف نفس الشي الي فواز يعرفه بس 

ساكته ليش ما ادري

تستمر القصة أدناه💛💚💙❤💛💚💚💙❤💔💛💚💙❤💛💚💙❤

سلام 

جنت كاعد بالديوانيه وتوهم طلعو بيت عمي طاهر وطلعت وراهم كوثر على مود تبدل لان هي ماتنام بملابس

 سوود فجانت ترووح للغرفه تغير ملايسها وتجي مجرد ما طلعت راسا رجعت وهي تكلي 

كوثر/:سلام اجه عمي صاحب وسهير 

انا استعدلت بكعدتي لان جنت متمدد دخلو وسلمو وراحت كوثر جابت ماي واجت جانت الساعه تقريبا 

11 وربع عمي صاحب كال الكوثر //عشتي يابت اخوي الورده بس عمج اليوم مشتهي شي من جوه

اديج الحلوى 

كوثر بقلة صبر //كول عمي شنو مشتهي 

صاحب /:كوثر انتي تسوين كيك حلو وانا حتى ما اتعشيت كلت اجي وكوكا اتسويلي 

كوثر /:تدلل عمي باجر من عيوني اسويلك هسه الساعه 12 

صاحب /:اكلها ما متعشي تكلي باجر دكومي كومي 

انا اشرت الكوثر بعيوني يعني كومي سهير كالت /:روحي كوثر للمطبخ وانا جايه وراج بس اخلي الجهال يم ابوهم 

وراحت كوثر وهي مزعوجه وعمي صاحب ولا يمها من طلعت كامت سهير وباوعت وراها واشرت 

العمي يعني راحت عمي باوعلي وهو شبه مبتسم 

- - تره سلام انا ما احب الكيك ومتعشي بس ردت احجي وياك وكوثر ما موجوده يعني الحجي بيناتنا

::عمي خيير شصاير 

صاحب /:كل خيير بابا اريد احجي بخصوص اخووك الله يرحمه 

::الله يرحمه شنو عمي وضح 

صاحب /:تعرف ياسلام انا فلوسي خسرتهن وحتى لو بقى عندي شويه ما يجيبن غرفه بهذا الغلا 

::اعرف عمي بس انت غلطان 

صاحب /:هسه الصار صار ما يفيد العتب 

::صدك مثل ما تكول شنو مطلوب مني 

صاحب /:سلام عمي انت مو كلت اشوفلك حل تره عمي مو هينه عليه انفضح تالي عمري واطلع بايع حصة 

ابوي وحتى غرفه ملك ما عدي لو باجر رضوى تطردني 

:انت شتحجي ابو انمار رضوى تطردك شنو بكيفها هذا بيتك وانت تكعد وياي 

صاحب /:لا والله عمي اطلع من البصره كلها ولا اكعد وياك مو بيك شي لا بس يم طاهر وصبيحه بالرايحه 

والنازله كاعد بحلال بتنا من ترجع للصدك رضوى ارحم منهم 

انا ابتسمت من جاب طاري صبيحه وطاهر كتله 

   :: لا والله تكعد انت ومرتك وجهالك معزز مكرم وابن امه الي يفك حلكه اله اعتبر امه ما جايبته 

صاحب بقهر يحجي /؛عمي لو تردلي بس انا سهله انام بالتريله متعلم وحتى انمار واخو تاخذهم سهير 

الاهلها بس انا افكر بهاي المسكينه بعطاء الي كل عمرها ما شافت راحه عاشت يتيمه وهي امها وابوها موجودين 

گلت تاخذ فواز وترتاح شويه بس الله ما راد الها الراحه 

انا تقربت منه لان حسيت شكد هو مقهور بسته براسه وكتله 

::عمي لا تضوج ولا تنقهر باجر اشوف المحامي وما يصير خاطرك اله طيب 

صاحب/:عمي المحامي يتعامل بورق ومستندات وهو نفسه رافت المحامي الي سووا سند البيع الفواز 

 هزيت راسي // مي خالف احاول واشوف ويصير خير انت بس لا تضوج 

سهير/:تدري بعمك لا ياكل ولا يشرب يكول المصيبه من يدري طاهر شيسوي وشراح يحچي 

:محد راح يدري انا احلها 

صاحب /:اكلك سلام انا باجر ارووح احجي ويه رضوى 

:ها شتحجي شتكلها وهي بعدهي ما تعرف شي 

صاحب /:هي بعد اسبوعين وتكمل العده وكل شي ينكشف انا خلي ارووح اشوف شنو مايها 

    :: شلون عمي شتكلها 

صاحب /:عمي انت مو كلت من اجاك المحامي جان مقداد موجود وحجى كدامه وانت ما خليته يكمل اكيد هسه

مقداد كللها بالي سمعه خلي اشوف شنو حجيها 

:بكيفك عمي بس لا تطول وياها خلي كلامك كلام عابر 

سهير اتقربت عليه وگالت /:اكلك خاله سلام انت ليش ما تتزوج رضوى 

انا كانما صافن وانضربت راشدي رفعت راسي ::شنو ام انمار انتي شتحجين 

سهير وكفت وراحت يم الباب ومدت راسها ورجعت /:سلام هذا هو الكلام الي لازم ينحجي شنو نسيت 

انو كل هاي الماليه انت شريك بيها مو انت جنت تشتغل حالك حال فواز لا والله اكثر اقلها فواز يسافر

 ويتونس وحتى من مات ماتت ويا وحده ما نعرف منو وشنو وضعها 

::ام انمار اذكرو محاسن موتاكم 

سهير تكسرت العبره بصدرها وبجت /:الله يرحمه فواز بس مو حق رضوى تاكل تعبك وهي بقت ويا يومين 

خلصتها بالمستشفى يوميه منتحره وحتى مو حامل شنو باعت اشترت فواز خلصها ركضه وشغل وانت نفس 

الشي خاله سلام انت من تاخذ رضوى تحافظ حتى على اسم اخوك ليش تاخذ واحد غريب وياخذ حلال فواز 

خو انت اولى بهذا الحلال 

صاحب /:والله سلام كلام سهير بمكانه شنو عبالك رضوى ما تتزوج ثق بس تاخذ ورث فواز الف واحد يخطبها 

على فلوسها 

سهير /:مو بس فلوسها لا هي بنيه وشابه وحلوه وراح يصير عدها خير صدگني ما تبقى والله يمكن ما تدور 

سنة فواز الا هي متزوجه وتلعب بتعبك وتعب فواز هي والي تاخذه 

( بعدين سهير باوعت للباب وباعتلي وگالت كأنما تذكرني -)

  - - بعدين سلام ندري كلش زين انت جنت تحبها وصار الي صار حرامات حلالك وحلال اخوك يصير فال الغربه 

صاحب/:سلام الحجي ابيناتنا ذاك اليوم صبيحه تكل السهير بس رضوى تخلص عده تاخذها الصلاح انا ما 

صدكت اشو بس شافني طاهر عاد نفس حجاية مرته

تستمر القصة أدناه

انا من سمعت هذا الكلام صار كلبي يرجف واحچي ويه نفسي وانا اهز براسي 

    :: من هيج كوثر جاره عدل هي وامها وابوها انا الكم 

اسمع عمي صاحب يكلي //سلام سلام هسه شكلت 

    :: هاا عمي يصير خير كل شي بوكته حلو 

صاحب /:ماشي عمي انا احاول باجر او عكبه احجي وياها واشوف

   هزيت راسي :: احجي وشوف وانا باجر هم اروح اشوف المحامي 

وراحت سهير يم كوثر اثاري هي كل شويه تباوع تخاف تجي كوثر وتسمع الحجي من طلعت سهير 

حجيت ويه عمي /:عمي انت مالي ايدك من مرتك 

هو باستغراب //شلون يعني ؟

   :: يعني ام انمار ما تحجي الصبيحه لو الكوثر 

صاحب /:لا ما تحجي لان سهير هم محتاره مثلي اذا تروح الاهلها منو يحملها لو يحمل جهالها 

جاوبته //عمي انت شتحجي هذا بيتك لو اعرف انطيك حصتي وانا اطلع شنو انت من كل وعقلك 

اعوفك تطلع ابيت اجار لو تجهول بتك وجهالك 

صاحب /؛الله يرضى عليك عمي سلام الله يرضى عليك ويسامح اخووك 

انا كتله ::العفومنك عمي بس اخوي ما كلك شارك ناجي وانت تعرفه كلش زين واحد لا ذمه ولا ضمير 

صاحب /:لا عمي تره ناجي خسر حاله من حالي 

انا باستهزاء ::متاكد 

صاحب //اي طبعا متاكد 

::عمي الخسران ما يبدل سيارته وياخذ ابدالها سياره اخر موديل 

صاحب يطلع اعذار النسيبه //لا عمي سلام هو كلي سيارته متعبته انطاها ال ابو المعرض صاحبه قصد 

علي الفلوس الباقيات 

انا اعرف بيها جذب بس ما حبيت احرج عمي خصوصا وانا اعرف علاقة عمي باهل مرته كتله 

:: مفهوم عمي ما طول هيج الله يوفقه 

وتمينا كاعدين واجت كوثر وسهير كوثر ابدها تلزم اي واحد كدامها تموته هي جابت الكيكه وسهير الجاي قدمن 

وصبتلي سهير انا كتلها 

::لا ام انمار ما اشرب جاي اريد انام وراي شغل 

سهير /:ها سلام كابله وبزه بعينه رحم الله من زار وخفف 

كوثر //اي والله عمه حدنا تعبانين وباجر دوام 

سهير ردت بعصبيه //على كيفج عيني صاحب اجه يشوف ابن اخو ضاكت عينج شحال لو ما اهلج يوميه 

الهيج وكت وهمه بعدهم گاعدين يشربون جاي وانتي ما تحجين صحيح الصبح تداومين بس الظهر كاظيتها

بس نوم للغروب وساعات لليل گبل ما يجي سلام تگعدين 

كوثر /؛يا عمه انا شكلت وانتي زعلتي اسفه والله مو قصدي 

جاوبتها ::لا ام انمار تره كوثر ما تقصد شي لا تاخذين ابالج 

جهالهم جانو يلعبون يمنا هي باوعت الكوثر وكالت الها بخبث /:شنو ما ناويين تجيبولنا ابن عم النموري 

كوثر اتحسرت وجاوبت بخبث اكثر منها /:الله كريم يصير ان شالله بعد وكت 

صاحب /:يا بعد وكت لا عمي سلام مو زغير ويرادله جاهل 

سهير /؛اسكت صاحب كله من ابن اخوك هذا الي تشوفه 

اباوع الكوثر اتبدل لونها وجهه ينطي الوان 

صاحب /:شبي ابن اخوي 

سهير /:عليك الله صاحب هم يصير واحد ينطي المرته بيدهحبوب منع الحمل بحجة اكون نفسي وبعد 

وكت اليوم اجتني صبيحه وكوثر وكالتلي كلي الصاحب خلي يحجي ويه سلام وانا نسيت هسه توني اتذكرت 

صاحب باوعلي /:صدك سلام ليش عمي 

رديت وانا اخزر بكوثر ::بعده وكت ابو انماار بعده وكت يصيرون ان شاالله 

صاحب /:لا عمي شنو بعده وكت لازم يصيرون عندك جهال وعزوه انا ما اقبل انت وحيد ومو زغير شد حيلك

اتحسرت ::ان شالله عمي يصير خير 

صاحب /:ياالله سهير خلي نصعد عطاء ابحدها 

سهير /:هم صدك ياالله (وگفت سهير ) تصبحون على خير 

صاحب /:تصبحون على خير ومشكوره كوثر ع الكيكه كلش طيبه 

كوثر ما جاوبت وانا وكفت كتلهم ::وانتم من اهل الخير

1

تستمر القصة أدناه

من طلعو كوثر شالت الصينيه ورجعت تدردم وهي تحجي 

- - جايني صاحب نص الليل يتامر يريد كيك عبالك خدم عنده ما ياامر مرته يخاف منها لو بته انا شكو

هي باوعتلي شافتني بيدي الموبايل والسويج تريد تحجي انا اشرت باصبعي 

::اششش ما اسمع نفس حقيره ما توبين ياكلبه اشلون اامن يصير عندي طفل منج وانتي سالفه خاصه بينا ما 

كدرتي تضمينها كل ما اكول استعدلت اطلع غلطان 

كوثر بنتر //عليمن غلطان حقي يصير عندي جاهل حالي حال كل مره وهذا العذر مالت اريد اكون نفسي 

واريد اطلع وما اعرف شنو يفيدك اصلا انا اريد يصير عندي طفل 

جاوبتها وانا اجر نفس ::صار وحقج ومن باجر اكطعي الحبوب لان راح اطلكج واتزوجي واحد غيري وجيبي 

منه عشره انا تحلمين بعد اووصل يمج 

كوثر صارت ترجف مو من الخوف لان عدها كلام تريد تحجي /:طلك سلام مردك الي مو عبالك تاخذ رضوى

لان ابوي قرر يزوجها الصلاح 

انا رغم جنت اتمنى الزم كوثر واطك راسها بالحايط بس لزمت نفسي /:بالعافيه على اخوج وابوج وامج بس هم 

ما ارجعج لو شيصير الا اللهم امج ام السحوره تسويلي سحر وترجعني بس افتهمي يا بت الناس انا اكرهج 

اكرهج من تصرفاتج 

كوثر تهز بايدها //لا انت تكرهني مو بسبب تصرفاتي بسبب الارمله السوداء بس وداعتك اله اخلي صلاح ياخذها 

واطلع حيفي بيها اكرهني سلام مو مشكله اصلا انا ادري بيك تكرهني بس شوف اله اخليك تباوع الها 

وتتندم اله اذلك بيها واخلي صلاح كدامك يكطعها ويصلخها مثل لمن شفتها بحضن اخوك تتذكر اله اخليك 

تصير مثل الطير المذبوح تفرفح وما تكدر توصلها انا الك بس اصطبرلي وتدلل

ما كدرت اسكت اتقربت منها وخنكتها وكتلها /:من يوم يومج حقيره وتربية شوارع 

شمرتها وطلعت هي طلعت وراي تكلي باستهزاء //لا تنسى بعد عشرين يوم معزوم على عرس حبيبة الگلب

وضحكت بعصبيه وشماته انا صعدت بالسياره والصورة ابالي شلون صلاح يتزوج رضوى هاي كوثر

 هي وامها مخططات الكل شي اتذكرت عفاف ومرت ابوها اتصورتها تشبه صبيحه 

وصلت للشقه فتحتها ودخلت الغرفتي شكد متندم لان اخذت كوثر بس لازم اطلكها هالمره لا خالتي ولا عمي

 يلزموني الصبح كعدت رحت للمحل جان عندي شغل الفوك راسي ما كدرت اروح للمحامي ثاني يوم رحت بالليل 

واستفسرت عن هواي امور هو رفض يطلعني عليها الا بحضور رضوى او انها تنطيني وكاله بس انا كتله اريد

اعرف حقي شنو لان قررت ابيعه واهاجر 

المحامي جاوبني //استاذ سلام انا عندي المستندات الي تخصك او الي كاتبهن الك اخوك هسه اجيبهن وتطلع عليهن 

من وكف يريد يطلعهن اجو علي جماعه عدهم قضية حصر ورث لذلك انا كتله

:: استاذ شوف الجماعه وانتظر باچر ان شاء الله منك تلفون 

ورجعت للشقه 

اتمددت ع الفراش واجه فارس سالني //ها شسويت ويه المحامي 

::ما قبل يطلع الاوراق الا بحضور رضوى 

فارس //تحچي صدك والتالي شلون 

ورثت جگاره وگتله //فارس انا تايه ما اعرف شلون اتصرف اتصور بعدهي ما مستلمه ولا فلس وعمي 

طاهر يريد ياخذها الصلاح لا وصبيحه وبتها يردن ياخذنها على مود يذلنها 

فارس/:شبيك سلام شنو يذلنها من كل وعقلك تحجي شنو رضوى زغيره لو ما تفتهم تره انسانه واعيه مثقفه

شنو يذلنها شنو عمك ياخذها الابنه انت وين عايش 

::والله ما ادري فارس انا هم مليت لذلك قررت اصفي اموري واهاجر 

فارس/:قصدك تشرد 

باوعتله وانا عاكف حاجبي ::شنو شتگول منين اشرد 

فارس يهز براسه /: اي سلام تشرد من كوثر وامها ومن رضوى 

هزيت راسي :: مو صحيح فارس بس انا انسان مذبوح وجاي امشي گوه ما اريد احد يتورج علي كله ضامه اهنا 

- - واشرت على كلبي --

فارس باوعلي /:سلام ادري وحاس بيك هسه انت لاتفكر باي شي نام وارتاح وربك يحلها 

::لا فارس قررت وما اتراجع اطلك كوثر واهاجر هذا اخر كلام 

فارس /:نام خويه تبات نار وتصبح رماد 

بقيت افكر وانا ادخن جگاره تخلص اورث الثانيه ما اعرف يمته نمت وشلون وانا افكر بكلام سهير 

من تكلي اخذ رضوى ولا تضيع تعبك وكلام كوثر من تكلي اذلك برضوى من اشوفها عد صلاح وهو 

يضرب بيها وصبيحه وكوثر متهنيات بالحلال والفلوس الصبح صار شي خلاني 

اعيد كل حساباتي من جديد

الفصل السابع عشر من هنا