رواية دار الايتام الجزء الثالث (اللقاء المنتظر) الفصل السادس عشر
وصيه واجبه و أمانه واجب ان تُصان👌👌👌
............
ايام بتعدي من غير اي أحداث
الكل منتظر لقاء جديد يجمعهم.
دياب أستلم الشغل في الداخليه. البنات عملوا شات عالواتس وكل شويه يتكلموامع بعض.
روكا بتسابق الوقت عشان تقدر تجهز كل التصاميم وتطلع بأكبر عرض عملته من بدايه ما أشتغلت في المجال ده.. كل واحد مركز في شغله.. قبل العرض بيومين 👇👇👇
................
خلصت سيلا شغلها كانت الساعه خمسه. قررت تروح تبص علي روكا.
ركبت سيلا العربيه ومشيت في طريقها لروكا شغلت الاغاني ومشيت تدندن معاها.
يعاملني بطيبة وإحساس يدلعني قدام الناس
بيعرف إني رومانسية بيلعب
ع الوتر الحساس
يدوب روحي يدوبني في كل زيارة بيعجبني
ونظرات عينه خلتني أضرب أخماس في أسداس..
فضلت سيلا تدندن مع الاغنيه بسعاده وفجأه لقت العربيه وقفت قبل ما توصل لروكا بمسافه مش كبيره اوي كان فاضل حوالي ربع ساعه او تلت ساعه وتوصل في مكان شغلها.
سيلا....انتي وقفتي ليه😭
فضلت سيلا تحاول تدور العربيه لكن مكانش في أي فايده وقفت خالص ومش عارفه تتصرف أزاي
اول حاجه عملتها أتصلت علي بدر.
بدر...ايوه يا حبيبي وصلتي.
سيلا...الحقني يا بدر😭
قام بدر وقف مع الكرسي بفزع 😳😳في ايه يا سيلا.
سيلا....العربيه وقفت ومش راضيه تدور😭
بدر....بتنهيده جز علي سنانه بغيظ يا سيلا حرام عليكي انا قولت حاجه حصلت.
سيلا....اعمل ايه انا الوقت بقي🤨
بدر...طيب وقفت ليه في صوت فيها غريب او اي حاجه
سيلا....لا كانت ماشيه كويس وفجأه وقفت دورتها كتير مش راضيه تشتغل.🥺
بدر....طيب مفيش اي حد جمبك يساعدك او حتي ميكانيكي.
سيلا....لا انا واقفه عالطريق فوق الكوبري
بدر....يا الله.... طيب انتي فين بالظبط قربتي من روكا.
سيلا...لسه شويه بس انا مش بعيد عنها هعمل ايه انا الوقت.
بدر....المشكله اني حاليا مستحيل اقدر اسيب الشغل ومهاب كمان عشان عندنا إجتماع مع اللواء بعد ربع ساعه.
سيلا....طيب اعمل ايه؟
بدر...بتفكير مفيش غير روكا🤔
سيلا....لا روكا ايه دي مسحوله في شغلها وهي اصلا متعرفش اني ريحالها انا كنت هفجأها😔
بدر....ياستي انتي مش بتقولي قريبه منها مفيش غيرها هي اللي هتقدر تساعك.
سيلا....انا مش هعرف اقولها بصراحه هتحرج انا عارفه انها هتسيب اللي في أيدها و هتيجي
وانا مش عايزه اعطلها.
بدر...اديكي بتقولي اهو هتسيب اللي في ايدها و تجيلك يعني مفيش غيرها وبعدين انا عارف ان روكا هتعرف تتصرف.
سيلا....بس انا كنت عملالها مفجأه كده هتبوظ🤔
بدر....بغضب😡😡وده وقت مفجأه عربيتك عطلت وواقفه لوحدك عالطريق وتقولي مفجأه متعصبنيش عليكي ياسيلا وكلميها
سيلا...انت بتزعق ليه هو انا اللي عطلت العربيه😭 وبعدين انا مش مكلماها ويلا اقفل بقي انا غلطانه اني كلمتك.
بدر....سيلا متعصبنيش عليكي😡
سيلا...عايز ايه🥺
بدر...كلميها يلا كان زمانك كلمتيها.
سيلا....طيب كلمها انت🙄
بدر...بغيظ😡😡 أقفلي يا سيلا اقفلي عشان متغباش عليكي انا هكلمها.
قفلت سيلا وهي بتضحك علي بدر.
اما بدر قفل معاها واتصل علي روكا اول مره فصل من غير رد تاني مره ردت.
بدر...ايوه يا روكا عامله ايه.
روكا.....اهلا يا سياده العقيد طلعان عيني والله في التصاميم وحقك عليا الموديل كانت معايا بظبط معاها التصميم معرفتش ارد.
بدر...ولا يهمك يا حبيبتي ربنا معاكي يارب.
روكا....يارب يابدر البت سيلا عامله ايه.
بدر...سيلا يا ستي كانت عملالك مفجأه وجيالك في الطريق.
روكا...بفرحه بجد دي وحشاني اوي من يوم ما كنا عندكم مشوفتهاش هي فين.
بدر...عربيتها عطلت ياروكا علي الكوبري هي قريبه منك🙄
روكا....عطلت ازاي😳
بدر...والله ما عارف ياروكا بتقولي وقفت مره واحده.
روكا...طيب هي كويسه.
بدر...اطمني هي بخير المهم انا عندي مشكله أكبر الوقت.
سيلا...خير في ايه.
بدر...انا عندي إجتماع انا ومهاب بعد ربع ساعه مع اللواء ومش هعرف اروحلها ولا هلحق وهي عالطريق لوحدها وانتي عارفه سيلا في الحجات اللي زي دي لخمه🥴
روكا....انت هتقولي عارفه طبعاً بس قولي انا مش فاهمه انت عايز ايه.
بدر...😎عايزك تروحيلها ومن قبل ما تقلي أدبك انا عارف انك مسحوله في شغلك وطلعان عينك بس انا مش فاضي وبعدين انا مالي هي مش صاحبتك اتحملي بقي😒
روكا....احيه هو انت شمتان فيا عشان هي صاحبتي🤔
بدر....ايوه مش بتدافعي عنها علي طول اشربي بقي انتي عارفه لو قعدت سنه عالطريق مش هتعرف تعمل حاجه وانا خايف حد يقف ويضايقها علي الطريق والنبي ياروكا حلي المشكله دي..
روكا...وهي بتبرطم و بتلم حاجتها من علي المكتب تحطها في شنطتها...😡هو يوم مهبب علي دماغكم انا عارفه ايه عملته في دنيتي يارب عشان أتبلي بيكم
واحد يكلمني ويقولي والنبي ياروكا ريم ما بتردش وواحد يقولي روحي مع سما و صليها للدكتور وانت تقولي سيلا عربيتها عطلت.😡
بدر...كان ساكت وميت من الضحك.
روكا....معرفه سوده جايه عليا بخساره هو انا كنت شغاله عندكم وانا معرفش.
بدر...ده انتي ست الستات ده احنا من غيرك يا روكا منعرفش نتصرف🙄
روكا....ايوه يا اخويا أضحك عليا بكلمتين😡
بدر...تعرفي عني كده 😂احنا منقدرش نستغني عنك يا ابو الركاريك😂😂
روكا...أستغنوا والنبي لا تستغنوا والله يابدر لو روحتلها ولقيت العربيه فيها حاجه عبيطه لا هيبقي يومك مش فايت.
بدر....المهم روحي بسرعه بقي بلاش رغي دي واقفه لوحدها وخايفه.
روكا....كان بتسربعني لا بقولك ايه يا نحنوح انت وهي لو مش عاجبك روح انت😡😡
بدر....بضحك لا خلاص براحتك انا هسكت خلاص😂😂
روكا.....اقفل اقفل يا بدر انا لطيقاك ولا طيقاها ولا طايقه نفسي😡😡
بدر...وانا مالي طيب مش قادره علي صحبتك بتقدري عليا هي اصلا أتحرجت تكلمك عشان شغلك 😂😂
روكا....لا حسيسه اوي يا اخويا 😒 انت عارف دي غلطتي اه والله زي ما بقولك غلطتي اني رديت عليك اصلا😒😒
بدر...بضحك خلاص بقي حقك عليا ياستي اقولك ليكي عليا هخرجك خروجه جامده أحتفالا بالعرض بتاعك ونجاحه😎
روكا....نجاحه؟! والنبي طول ما انا اعرفك ما هشوف نجاح اقفل يابدر بدل ما اقفل في وشك.😒
بدر...والله هي قنبله في عربيتك والواحد يرتاح من لسانك😒
روكا...😳😳احيه كمان بقولك ايه انا هعمل بأصلي واروحلها بس بعد المشوار ده هعملكم بلوك كلكم
يلا اقفل انا في العربيه.
بدر....بضحك مش هنهون عليكي
روكا...بضحك ماهو قلبي ده يا اخويا اللي موديني في داهيه.😒
بدر...بابتسامه ربنا يخليكي لينا يا اجدع روكا في الدنيا❣️
روكا...بحب ويخليكوا ليا❣️ بس بردو هعملكم بلوك😒
بدر....طيب نتكلم بعدين في حوار البلوك ده😂😂 هروح اطمنها ومعلش اخر طلب ابقوا ابعتولي مسدچ عالواتس عرفوني عملتوا ايه عشان اطمن واما اخلص اجتماع هكلمكم😎
روكا...ماشي يلا باي😡
بدر...باي😂😂
.........
قفل بدر معاها واتصل بسيلا بطمنها انها رايحلها.
وبعدين كلمتها روكا تعرف مكانها بالظبط بعد ما فضلت تشتم فيها وقفلت.
بعد وقت مش طويل اوي وصلت روكا علي الكوبري ولمحت عربيه سيلا من بعيد وهي قاعده علي العرييه من قدام وواضح انها بتتصور🙈🙈
بصت روكا بصدمه😳. ركنت عربيتها ورا عربيه سيلا ونزلت قربت منها.
روكا....انتي بتهببي ايه😳
سيلا...روكا حبيبتي وحشتيني تعالي اتصوري معايا بسرعه شكل الغروب يجنن تعالي ناخد سيلفي.
روكا....الله يخربيتك علي بيت معرفتك علي اليوم المهبب اللي عرفني بيكم كلكم
سيلا...في ايه بس دي صوره ياست الفاشونيستا.😒
روكا....صوره في عينك انتي ايه يابت البرود اللي انتي فيه ده🤨
والتاني يقولي واقفه لوحدها علي الطريق وخايفه وانتي عارفه سيلا لخمه وقعد يهول في الموضوع حسيت اني هاجي الاقيكي منهاره.
سيلا...بدر قال عليا لخمه🤔
روكا...بغيظ قربت منها تنزلها من فوق العربيه انزلي يابت انزلي هو ده اللي همك ياللي تنشكي جيباني علي ملا وشي وقاعده علي كبوت العربيه تتصورى سيلڤي و مسكالى عصير في ايدك
ده انا مدوقتش لقمه من صباحيه ربنا.
سيلا....صلحي العربيه وانا أعزمك عالغدا وناكل سوا😎
روكا....انتي يابت بتساوميني😡
سيلا...علي فكره بقي انا مكلمتكيش بدر اللي كلمك😒
اتفضلي امشي وانا هقعد هنا الجو جميل وانا بحب وقت الغروب اصلا🙄
روكا...انتي جايه تستجمي😡 بت والله العظيم هروح فيكي في داهيه اخلصي قوليلي العربيه فيها ايه بدل ما احدفك من فوق الكوبري😡
سيلا....بضحك طب خلاص خلاص 😂😂 أهدي
هدي نفسك يا رقيييييه😎
روكا...ايه 😳 انتي قولتي ايه روقيه في عينك وقبل ما تمسكها
جريت سيلا حوالين العربيه وهي بتضحك
وروكا وراها والله ما هسيبك
سيلا...خلاص والله بهزر بهزر ياروكاااا.
روكا...بتعب وقفت تنهج وسندت علي العربيه.
منك لله يا سيلا انتي وبدر منكم لله كلكم مش قادره اتنفس
قربت منها سيلا وهي بتضحك وخايفه تيجي قدامها
سيلا...طب خلاص والله هبقي مؤدبه اهدي بقي😂😂
روكا....اخلصي دوري الزفته وافتحي الكبوت ده😡
سيلا....انا مش فاهمه انتي عملتي ايه يعني جيالي لوحدك عامله فيها ميكانيكي😂😂
روكا....عدي يومك ياسيلا 😒 و احمدي ربنا اني سيبت شغلي و جيتلك😡 هنعمل محاوله لو اشتغلت تمام مشتغلتش هتسيبها متلقحه هنا وتيجي معايا😡
سيلا...نعممممم لا انا مسبش عربيتي لوحدها في الطريق🙄
روكا....نعم يا اختي متسبيش عربيتك لوحدها ليه سايبه بنت اختك الصغيره بقولك ايه انا هشوف العربيه😒 أشتغلت كان بها مشتغلتش تركبي من سكات مركبتيش هسيبك واقفه هنا زي الكلبه 😡 وهمشي. والنحنوح بتاعك يبقي يتصرف
سيلا....علي فكره بقي ده مش اسلوب😒
روكا...هو ده اللي عندي ويلا دوري😡😡😡😡
سيلا...طيب براحه متزعقيش كده😒😒😒
ركبت سيلا وفتحت الكبوت بتاع العربيه و دورت وفضلت روكا تلعب في كذا حاجه مكانتش بتدور. وفجأه رفعت حاجبها و بصت لسيلا من ورا الزجاج
سيلا....😁😁خير يا أسطي.
روكا...بصوت واطي.اسطي في عينك 😭منكم لله. راحت عليها ونزلتها وهي بتشدها من هدومها.
سيلا....ما براحه😡
بصتلها روكا بطرف عينها😒
بسرعه سيلا ضحكت 😁
وبدأت روكا تدور في العربيه وتركز في الصوت🧐🧐🧐
وفجأه😳 بصت روكا علي تانك البنزين لقت المؤشر علي زيرو🙈
روكا...الله يخربيتك وبيت سنينك
سيلا....ايه هتنفجر😳
روكا...تنفجر في دماغك يا بعيده العربيه مفيهاش بنزين انتي امته اخر مره حطيتي
سيلا...🙄 مش فاكره
روكا....ومخدتيش بالك انها وقفت بسبب البنزين قبل ما تشحطتي امي😭😭
سيلا....بضحك لا والله انا قولت باظت اول مره اصلا في حياتي عربيه تقف مني بنزين اغلب الوقت بروح البنزينه وهي علي الاخر بس موصلتش للمرحله دي🤔🤔🤔
روكا...امشي من قدامي يا مستفزه
سيلا...طيب هعمل ايه اقرب بنزينه بعد نزله الكوبري بشويه.
روكا ...مش عارفه منك لله يا سيلا😭
سيلا...بقولك ايه مفيش حل غير انك تربطي العربيه وتجريني😁
روكا....نعم اجرك عشان ابص الاقيكي لابسه في عربيتي واحنا نازلين من علي الكوبري ده علي جثتي😡
سيلا...خلاص يبقي تسوقي انتي ياست الحريفه عربيتي وانا اسوق عربيتك.
روكا...ولا دي كمان مضمنكيش ومركبكيش عربيتي ابدا.
سيلا...بقولك ايه مفيش قدامك حل يا كده يا كده اختاري.
روكا....انا مالي ومال الهم ده يارب😭
سيلا....هعوضك يا روكتي وهعزمك مش كفايه انك بوظتي المفجأه اللي كنت عملهالك😒
روكا....مفجأه مهببه وبعدين انا اللي بوظتها انتي ايه اللي كان جايبك اصلا صدقيني كنت هفرح وكانت هتبقي مفجأه بصحيح لو مكنتيش جيتي😭
سيلا...بقي كده اخص عليكي😭
روكا....بقولك ايه 😡 انا هربط العربيتين و هركب عربيتك عارفه يا سيلا تسوقي بسرعه ولا تهببي حاجه في عربيتي هدغدغ عربيتك😡
سيلا....شوفي بقي سواقه المحترفين😎 هبهرك.
روكا...😒😒😒 مش طيقاكي
راحت روكا فتحت شنطه عربيتها وبدأت تربط الحبل هي وسيلا وبعد توصيات كتير من روكا راحت سيلا ركبت عربيه روكا وبدأت تمشي براحه وروكا ركبت عربيه سيلا وبدأت هي كمان تمشي براحه عشان متخبطش في عربيتها لحد ما نزلوا من الكوبري وراحت البنزينه حطت بنزين وظبطوا الدنيا.
روكا...حطيتي بنزين والعربيه اشتغلت يلا يا ماما عالبيت ما شوفش وشك في المكان هنا تاني😡
سيلا...لا ما انا جايه معاكي😎
روكا...ياستي انا شوفتك خلاص يلا اتكلي علي الله.
اتصل بدر في الوقت ده علي سيلا.
سيلا...ده بدر😂😂
روكا...هاتيه هاتيه عشان انهي علاقتي بيكوا.
فتحت روكا الخط الوووو😡
بدر...ايه ياروكا عملتوا ايه🙄
روكا....بص يا بدر انا جيت وعملت اللي عليا وطلعت جدعه للاخر ومراتك كمان بخير وعربيتها زي الفل اظن كده اقطع علاقتي بيكو وانا ضميري مرتاح😒
بدر...بضحك لبه كده بس يارقييييييه😂😂
روكا...روقيه😡😡 بردو تصدق انكم مستفزين انتوا الجوز
بدر...طب قوليلي بس العربيه كان فيها ايه
روكا...ابدا يا سيدي مراتك تقريبا اخر زياره ليها في البنزينه كانت من سنه العربيه مكانش فيها بنزين😡
بدر....بضحك بتهرجي صح.
روكا....والله العظيم ابدا جرتها بالعربيه وحطينا بنزين وكله تمام.
سيلا...بضحك علي فكره بقي انا اللي جريتك مش انتي😂😂😂😂
بدر...بضحك سلمتلها عربيتك يا روكا دي محصلتش😂😂
روكا....اعمل ايه طيب ما انا مش ضمناها خوفت تلبس فيا😡
بدر....طيب الحمد لله المهم ان كله تمام.
روكا....اه تمام شويه حجات بسيطه ضغط واطي وعالي قولون عصبي بوادر جلطه 😒😒😡
بدر...بضحك ايوه يعني شكليات يا روكا مكبره الموضوع ليه😂😂
روكا....مانا بقول جوز مستفزين ما جمع إلا ما وفق امشي يابدر امشي.
سيلا...بضحك ايوه يابدر😂🙈
بدر....جننتيها وارتاحتي😂
سيلا...والله ما اعرف اعمل ايه طيب😂😂 بس انا هعزمها علي اكله حلوه عشان ترضي عني
روكا...مش عابزه من وشك حاجه
سيلا...خلاص بقي ياروكا بقي مكانتش مساعده مش اخلاق دي علي فكره🙄
بدر...بضحك يابنتي بطلي تستفزيها هتضربك😂😂
روكا....ركبت عربيتها انا ماشيه ماشوفش وشك في الشركه😡
سيلا...هجيب الاكل واجي وراكي.
روكا...طلاق تلاته لو جبتي بيتزا لا هخلي امن الشركه يرموكي بره
سيلا...بضحك والله كنت هجيب بيتزا طيب عايزه تاكلي ايه😂
بدر....بضحك الله يخربيت جنانكم😂😂😂🙈
روكا.....اعزميني علي اكله سمك و جمبري لو عيزاني ارضي عنك😒
سيلا....اشطا هجبلك😂😂
مشيت روكا وركبت سيلا وهي بتكلم بدر..خلاص هتصالحني
بدر...بضحك اتوصي بيها بقي احسن هي علي اخرها يا عيني.
سيلا...بضحك حاضر انت خلصت ولا لا
بدر...لا لسه وشكلي كده هتأخر شويه
سيلا...طيب هروح انا وهنتغدي سوا وابقي كلمني بقي
بدر...ماشي يا حبيبي امشي براحه
سيلا....حاضر يا حبيبي🙈
بدر...بحب سلام يا مجنونه😂
سيلا...باي😂😂
..............
في مكتب روكا.
روكا...الحمد لله.
سيلا...ها كده رضيتى عني ولا لسه شويه🤔
روكا....لا خلاص عفونا عنك.🤨
سيلا...طيب الحمد لله😍 الامل عجبك..
روكا....يجنن تصدقي بالله بقالي يمكن شهرين ولا تلاته مكلتش سمك.
سيلا...اي خدمه عدي الجمايل بقي
روكا....يا اختي إتلهي.
سيلا....تعرفي انا نفسي في ايه اوي اوي اوي🙈
روكا...أيه؟
سيلا....نفسي اروح اسكندريه حتي لو يوم واحد واكل اكله سمك قدام البحر وارجع اخر اليوم
روكا....ده في مكان في أبو قير بيعمل أكله سمك تجنن
سيلا....طب ما نروح والنبي يا روكا
روكا.....اخلص بس من العرض وليكي عليا أفضيلكم نفسي شويه وهنروح سوا
سيلا...وعد🤨
روكا...وعد والله.
سيلا....طب ايه مش هتفرجيني علي التصاميم🙄
روكا...ده بعينك بعد بكره أبقي شوفيها عشان تبقي مفجأه
سيلا....ده انا حبيبتك طيب حتي عشان لو فيها حاجه كده او كده اقولك و تلحقي تغيريها.
ضربتها روكا علي راسها اتنيلي هتعدلي عليا😒
سيلا...ااه ايدك تقيله يا جزمه انا الحق عليا طب وريني هتلبسي ايه
روكا....لا برده🤨🙄 و هاتي السجاير من قدامك
سيلا...مش جايبه قومي خديها انتي😒😒 رخمه
روكا....بضحك اه انا رخمه 🤪
................
عدت الساعات بسرعه روح مهاب علي الڤيلا لمح الاوضه بتاعت المرسم بتاعت سما منوره.
راح مهاب فتح براحه ودخل
اول ما بفتح ابتسمت سما لمهاب بحب.
سما....حمدالله علي السلامه
قرب مهاب باسها من خدها الله يسلمك ايه البهدله اللي في وشك دي 😂
سما....متتريقش عليا هما الرسامين بيبهدلوا نفسهم كده
مهاب....ده عُرف الرسامين🤔
سما....بضحك تقدر تقول كده عايز ايه انت🤨
مهاب....ياستي انا مش عايز انتي لسه مخلصتيش اللوحه دي.
سما....خلاص اهي بتخلص ايه رأيك فيها.
مهاب....تجنن والله كأنها حقيقيه
سما....بجد ولا مجامله.
مهاب...لا والله العظيم شكلها يجنن وألوانها حلوه بجد.بس مش كنا خدنا حاجه تانيه واحنا رايحين بدل التعب ده بقالك اربع ايام بترسمي فيها.
سما....يا حبيبي في حاجه أسمها فن أختيار الهدايه وده راجل بيحب الخيل من كلامه وبعدين المزرعه بيقول انها لسه جديده يعني دي هديه مناسبه جدا وبيتهيألي هتفرحه وبعدين كفايه اني عملاها بأيدي وتعبت فيها😡
مهاب...بضحك طب انا مالي طيب بتتخانقي معايا ليه تسلم ايدك يا قلبي.
سما...بأبتسامه أيوه كده😎
مهاب....طبعا هيما وتيم ناموا
سما....اه تيم نام من ساعه ونص كده وطلع وراه علي طول هيما.
مهاب...طبعا ما حبيبه نام هيقعد ليه.
سما....طيب أطلع خد شاور هخلص اخر حاجه خلاص وهحضر العشاء ناكل سوا انا مستنياك
مهاب...اه والنبي احسن انا جعان اوي... بس قوليلي انتي هتاكلي كده 🤨
سما....بضحك لا طبعا هاخد شاور سريع انا كمان وبعدين ناكل.
مهاب...ماشي يا ستي وانا هستناكي وننزل نحضر سوا
سما...اتفقنا و بالمره تعالي نلعب دور طاوله هيما علمني انهارده كتير.
مهاب....بضحك اه عابزه تجربي فيا من الاخر😂😂
سما....بالظبط كده واياك تكسبني يا مهاب
مهاب....كمان عايزه تكسبي بالاجبار.
سما...عاجبك ولا لا😂😂
مهاب...لا عاجبني وابعدي الفرشه ده احسن تبهدليني😂
سما...طيب يلا اطلع وهاجي وراك علي طول .
مهاب....اوك يا قلبي باسها من خدها وخرج
وفضلت سما تكمل اللمسات الاخيره للوحه.
.......................
في صباح يوم جديد قبل معاد العرض بيوم.
خرج نوح ونور قبل ما يروحوا علي الشركه كانت نور عايزه تزور قبر حاج محمد عشان كان عيد ميلاده وكانت حاسه انه و احشها اوي.
وصل نوح وركن العربيه ونزلوا مع بعض قابل المسؤول عن المدافن الخاصه بعائله السيوفي فتحلهم الباب ووقف يشرب الزرع.
حط نوح الورد اللي كان ماسكه.
ووقف يقرأ الفاتحه هو ونور و يدعوله كتير.
بعد ما خلصت نور قربت اكتر من المدفن و سابها نوح مع نفسها شويه وخرج مع الشخص ده يشوف لو في حاجه محتاجها
و يديله فلوس.
نور....بحزن نزلت دموعها وحشتني اوي يا بابا كل سنه وانت في مكان احسن يا حبيبي عيدك في الجنه أجمل زي انهارده كان زماني مستنياك في البيت بعملك الاكل اللي بتحبه و جيبالك تورته عشان احتفل بعيد ميلادك
واديك العديه بتاعتك.
اليوم من غيرك بقي وحش اوي يا حبيبي اه حواليا ناس بحبهم و بيحبوني وعملوا معايا كل حاجه حلوه ووقفوا جمبي بيعملوا كل حاجه عشان يملوا وقتي بس بردو انا لسه جوايا فراغ اهم حاجه ناقصه يمكن انا عايشه و بتعامل و بضحك و بخرج و بلعب مع تاليا وبعمل كل حاجه لكن اخر اليوم بحس اني مفتقداك بجد.. انت ارتاحت بس انا اللي تعبانه من غيرك اليوم بيعدي بسرعه بس اول ما الليل يجي بيبقي طويل اوي.. متزعلش مني اني كنت مقصره في زيارتي ليك الفتره اللي فاتت بس انت اكيد حاسس بيا وعارف انه غصب عني يا حبيبي.. ابقي زورتي في الحلم يا بابا وحشتني نفسي اشوفك واسمع صوتك حتي لو كان حلم
انا بقرألك كل اليوم الفاتحه وبفضل افتكر كل ذكرياتي معاك عشان انام وانا بفكر فيك واشوفك في الحلم بس انت بقالك فتره مش بتجيلي..هستناك تزورني زي ما زورتك هستني اشوفك يا حبيبي.
دخل نوح تاني و مسحت نور دموعها بسرعه و لبست النضاره
نوح....يلا يا نور
هزت نور راسها بهدوء وقامت وقفت. ألقوا عليه التحيه وخرجوا
بصت نور علي الباب شويه وبعد كده ركبت وراحوا علي الشركه
علي قد حزنها ووجعها وهي ماشيه وسيباه لكن جواها حاجه فرحتها وكأنها بتزوره وحاسه بيه بجد.💔
............
اليوم كان طويل علي الكل والشغل كتير جداً كل واحد وواحده فيهم مشغولين و بيحاولوا يخلصوا اكبر قدر من الشغل اللي عليهم.
بعد ساعات من الشغل خدوا بريك
عشان يتغدوا.
في الوقت ده كانت ريم قاعده زهقانه أستردت كتير من صحتها ومش قادره تنكر ان الشغاله و البيبي سيتر ريحوها كتير اوي ويمكن هما كانوا سبب انها تتحسن بصوره اسرع لكن كانت حاسه بملل روكا وسيلا في شغلهم سما في بيتها يوسف في شغله مفيش حاجه تعملها.قررت تدخل ترخم عليهم في جروب الواتس شويه وتطلع زهقها عليهم🙈
.....................................
💃💃 Crazy Girl🤯
ريم ....مسا مسا.😍
يابنات
يابنات
يابنات
في حد هنا انتوا فين😭 انا زهقانه.
الوووووووووو
لمار : مسا مسا❣️
ريم : يالومييييي عامله ايه.😍
لمار : مسحوله والله ياريم
ريم : ايه ناقصك حاجه لسه.
لمار : اه طبعا يعتبر اغلب الحاجه خلاص أخترناها والمفروض انها هتتسلم علي اول الاسبوع بس في رفايع بقي وحجات زي دي
ريم : طب ايه مش عايزه مساعده بجد والله اهو عالاقل بدل الزهق ده ولا كارمن بتساعدك.
لمار : هي بتساعدني بس ياريت والله لو فاضيه تعالي مش هقولك لا😂😂
ريم : طيب خلاص شوفي امته وعرفيني قبلها
لمار : بصي هو انا انهارده كده خلاص مش هنزل وبكره طبعا مش هعرف اروح اي مكان عشان العرض بتاع روكا وبعده برده مش هينفع عشان التجمع بتاع الجمعه خلينا السبت هروح اجيب أكسسوري لاوضه زين وعايزه اجيب حجات للمطبخ
ريم : خلاص هاجي معاكي و هوديكي مكان حلو اوي للاكسسوري بتاع اوض الاطفال
لما : ياريت يا ريم انا بقيت بلف حوالين نفسي بصراحه موضوع النقل وتجهيز البيت ده صعب ومرهق جداً.
ريم : اكيد طبعا بس أن شاء الله يطلع زي ما انتي عايزه.😍
لمار : يارب يا ريمو. بتعملي ايه؟
ريم : ولا حاجه قاعده زهقانه قولت ادخل اضايقكم شويه 😂
روحي شوفي اللي وراكي عشان معطلكيش.
لمار : لا انا فاضيه زين نايم وكارمن عند مامتها وانا قاعده مصدقت حد فيكم بعت
هما فين البنات صحيح.
ريم : معرفش غطسانين فين اكيد عشق والبنات في الشركه وروكا طبعا مسحوله في الشركه وسيلا في الجريده وسما اكيد بتطبخ😂
سمسمه🥰 : عايزه مني ايه يا جزمه.
ريم : اهي جات عالسيره
لما : اهي قفشتك 😂😂
سمسمه🥰 : جايبه في سيرتي ليه🤔
ريم : والله ابدا انا بقول للمار اكيد بتطبخي😂🙈
سمسمه🥰 فعلا انا في المطبخ😂😂😂
لمار : يعني مكدبتش اهي.😂
سمسمه🥰 : اذيك يا لمار عامله ايه.
لمار : الحمد لله كله تمام. بتعملي ايه في المطبخ🙈
سمسمه🥰 : لقيت نفسي انا كمان زهقانه وتيم نايم شويه قولت اعمل كوكيز بالنوتيلا كده واخترع
ريم: انا عايزه😔
سمسمه🥰 : بعينك مش بتتريقي🤔
ريم : انا محصلش انا اقدر🙈
لمار: جابت ورا😂😂
سمسمه🥰 : عادتها ولا هتشتريها
تيمو💘 : بترغوا في ايه😍😍😍😍😍😍😍😍😍
لمار : اهلا اهلا يا تيمو بنرغي
ريم : تمارا عامله ايه غطسانين فين.
تيمو💘 : شغل والله لسه مخلصين من شويه وخدنا بريك وبنتغدي.
ريم : بتاكلي ايه 😂😂
سمسمه 🥰 : حشريه 😂😂
تيمو💘 : بناكل بيتزا
ريم : فينك يا سيلا😂😂
سمسمه 🥰 : بس احسن روكا تدخل تشتمنا😂😂
تيمو 💘 : لبه هي البيتزا وحشه 🧐🧐🧐
سمسمه🥰 : لا اصل سيلا بتحبها بطريقه أوڤر لو سألتيها في اي خروجه تاكلي أيه تقولك بيتزا فا روكا بتبهدلها😂😂
تيمو💘 : انا بحبها بس مش علي طول بردو يعني هي تغير مش اكتر. بس اللي بتحبها او البت زهره.
عشق🤍 : انتي هتكدبي بقي زهره بتحب اي اكل😉
لمار : اهلا بأحلي عشق.
عشق 🤍: لوما القمر ❣️
ريم : ايوه كده هلوا هلوا💃💃
سمسمه 🥰: ارقصي اوي أرتاحتي لما جبتينا أذيك يا عشق😘😘
عشق 🤍 : الحمد لله يا سما انتي عامله ايه حبيبتي عاملين ايه كلكم وحشتوني معادا تمارا طبعا🙄
تيمو💘: اتلمي يا عشق😒
ريم : أقطع دراعي إن ما كانوا بيتخانقوا وهما قدام بعض😂😂
عشق🤍 : اه والله فعلا😂😂
نور : مسا مسا تعالوا كلوا بيتزا🍕
لمار: بالف هنا يا قلبي عامله ايه
نور : الحمد لله وحشتوني كلكم من امبارح 😂😂
سمسمه🥰: ايه الرغي بتاع امبارح ده كله صحيت لقيت مسدچات كتير.
تيمو💘: براحتنا🧐
ريم : حشريه اوي مرغتيش معانا يبقي متتحشريش🙄
لمار : 😂😂اتفقوا عليكي
سمسمه🥰 : بقت كده يعني🤔
عشق🤍 : معلش امسحيها فيا انا عيال وغلطوا.
زيزو 🌷: بترغوا في ايه.
لمار : 😂😂 ولا حاجه زي ما قولتي رغي غير هادف.
ريم : اهلا بيكي يا ست زهره 🧐
زيزو🌷 : اهلا اهلا بالمتحدث الرسمي بتاع الشات😂
عشق🤍 : والله لو شفتوا منظرها وهي بتاكل هتفطسوا من الضحك😂😂😂
زيزو 🌷: أستري عليا😂
سمسمه🥰: بصوا الكوكيز طلع🙈 🍪 ايه رايكم
لمار : اوبااااااا😍 يجنن
تيمو💘: طبق بقي عالشركه عشان نحلي بعد البيتزا🧐
نور : انا عايزه ادوق😂😂
سمسمه🥰: عيوني ليكم😍
زيزو 🌷: تسلم ايدك😘
ريم : يارب بطنك توجعك لو مبعتليش🙄
عشق🤍 : تبارك الله تسلم ايدك بألف هنا
لمار: حرام عليكي🙈🙈
سمسمه🥰 : شايفه الكلام الحلو مش دبش😒
دخلت روكا بعصبيتها كالعاده🙈
الكبيره💃 : يا ختي انتي وهي ملكوش راجل يلمكم معندكوش حاجه تتشغلوا فيها 😡
عشق🤍: اهي روكا جاتلكم😂😂
زيزو🌷 : انا بقول نمشي بسرعه🏃🏃🏃
ريم : مالك يا بت داخله بزرابينك كده ليه.
لمار : ياروكا طمنيني عليكي.
نور : بتفكرني بتمارا بتدخل متعصبه علي طول😂😂
سمسمه🥰: والله يا روكتي البت ريم هي اللي دخلت اتكلمت وفضلت ترغي ومن بدري اقولها كفايه رغي عشان روكا وهي ابدا حتي أسألي البنات
تيمو💘 : حصل🧐
نور : حصل😎
لمار : علي يدي😂😂
زيزو : بقولك ايه روقي وتعالي كلي بيتزا.
عشق🤍: معلش ياروحي امسحيها فيا انا دول وحشين كلهم❣️
الكبيره 💃: يا اختي ده ايه النسوان دي موارهمش غير الرغي 😡😡 قاعده شغاله والموبايل تن تن تن تن ايه بتجيلوا الرغي ده كله منين😒
لمار : احيه 😂😂🙈 احنا نسوان.
عشق 🤍 : معلش يا لومي امسحيها فيا الست مضغوطه برده😂😂😂
ريم : نهار اسود انتوا بتبيعوني للكبيره😂😂
الكبيره💃 : عشق كل اللي يقول حاجه تقوله امسحها فيا بتاخدنا علي قد عقلنا🤨
عشق 🤍 : الحق عليا بريحكم😂😂
الكبيره 💃: والتانيه دي كمان اللي بتقولي تعالي كولي بيتزا انا لو حد فيكم جابلي سيره البيتزا هزعله😡
سمسمه🥰: مش قولتلكم متعصبوهاش بقي😂
لمار : خلصتي ولا لا الشغل يا روكا
الكبيره💃 : المفروض اني خلصت خلاص الحمد لله كنت بحط بس اللمسات الاخيره والمفروض الفساتين هتتكوي وتتكيس والصبح تروح علي الفندق.
ريم : اللمسات الاخيره عامله فيها فاشونيستا😂😂
عشق 🤍 : متجريش شكلها بقي
تيمو💘 : انا لو مكانك يا روكا مسكتلهاش🧐
زيزو🌷: بس يا بوتجاز هي ناقصه تسخين هي داخله مولعه😂😂😂
الكبيره💃: مش هرد عليها سيبوها 😒 سيلا هانم بتسجل ڤويس اهي
لمار : سيلا يا قمر فينك
نور : اهلا يا سيلا فاتك شويه رغي أورجانيك😂😂
بعتت سيلا الڤويس
سيلا⭐ : ازيكم يا حلوييين واحشني كلكم اكلوني معاكم بيتزااااااا😂😂 روكتي وحشتيني يا كبيره.
الكبيره💃: الله يخربيتك يابت انتي اتولدتي في مطعم بيتزا 😡
سمسمه🥰: سيلا عامله ايه ياروحي فينك كده انتي في الشارع ولا ايه.
عشق🤍 : لو سايقه بلاش تتكلمي عشان الطريق.
ريم : قلب الام 😎
تيمو💘 : انتي فين تعالي يلا كلي بيتزا.
الكبيره 💃 : هتكون فين اكيد في مشرحه مستشفي قسم هي وراها غير المصايب😒
سيلا ⭐ : 😂😂😂والله حصل لسه كنت المشرحه🙈
الكبيره💃: مش بقولكم بومه.
عشق🤍: ياساتر ليه كده يا بنتي😂😂😂
نور: لا وبتقولها عادي ومبسوطه😂😂😂
ريم : دي جاحده
لمار : بس ميبانش عليها خالص
سيلا⭐: انا كيوت والله العيال دي ظالمني خالص بس شغلي اعمل ايه طيب🙈
الكبيره💃 : بقول ايه انتوا ناس فاضيه وانا مش فاضيه يلا انا ماشيه.
ريم: ارجعي يا كبيره البلد دي احسن من غيرها😂
عشق🤍: انا كمان هروح البريك خلص يلا قدامي ياست تمارت انتي ونور وزهره🧐🧐🧐
زيزو🌷: حاضر يا مديره🏃🏃
نور: يلام يا بنات نتكلم بليل🏃🏃🏃
خرج البنات واحده واحده وقفلوا الشات.
...............
بعد يوم طويل اوي روحت روكا وهي مرهقه ومش شايفه قدامها
كان عامر وصل قبلها واشتري عشا من بره عشان عارف ان هي مضغوطه جدا وظبط الدنيا عالاخر.
روكا....مساء الخير يا روحي اسفه اني اتأخرت غصب عني والله كان لازم اطمن علي كل حاجه بنفسي.
عامر....مساء السكر علي احلي روكا عارف يا حبيبي المهم انك رجعتي بالسلامه طمنيني كله تمام.
روكا...اه الحمد لله خلصت كل حاجه وخلصت🙈
عامر....معلش بكره هيعدي علي خير بس وبعد كده ارتاحي شوبه بقي كام يوم
روكا...فعلا هعمل كده انا محتاجه اقضي يومين بعنل فيهم مساچ وسونه عشان اضيع التعب اللي حاسه بيه.
عامر...خلصي بس انتي وهحجزلك في احلي مكان عشان تفوقي.
روكا...ربنا يخليك ليا يا حبيبي
عامر...يلا اطلعي خدي شاور وانا محضرلك حتت عشوه من الاخر😉
روكا...ربنا يخليك ليا يا عامر انا عارفه اني بقالي كام يوم تعباك معايا وسيباك خالص
عامر....لو عالتعب فا انا ياستي مستعد اتعب عشانك العمر كله بس لو علي سيباني 🤨 فا انتي اه سيباني و وحشاني اوي وبس تخلصي بكره علي خير مش هسيبك .
روكا...اخلص بس وهسلملك نفسي بأيدي❣️
عامر....اما نشوف خصوصا ان كان في وعد كده لسه منفذتيهوش🤨
روكا...وعد ايه؟
عامر....وعد ايه احنا هنهرج بقي ترقصيلي😎
روكا بضحكه مايعه...انت لسه فاكر ده انا بحاول انسيك🙈
عامر...لا مش ناسي متقلقيش
روكا...خلاص وانا عند وعدي😘
عامر...بحب طيب يلا اطلعي خدي شاور عشان الاكل ميبردش
روكا....هوااا.
طلعت روكا خدت شاور ونزلت تاني كلوا مع بعض وكانت خلاص علي اخرها من التعب
طلعت هي وعامر اوضتهم
عامر...يلا يا حبيبي نامي وارتاحي عشان تقدري تقفي بكره اليوم طويل.
روكا....حاضر يا حبيبي تصبح علي خير
عامر....وانتي من اهل الخير يا قلبي خدها عامر في حضنه وراحوا في النوم❣️
..................
اخيراً جه يوم العرض.
صحيت روكا من النوم كان عامر
خرج راح علي شغله لكن لمحت جمبها علي السرير بوكس صغير شكله حلو ابتسمت ومسكت الكارت اللي علي البوكس من فوق
عامر....صباح الجمال و الدلع وكل حاجه حلوه طبعا عارف انك كالعاده متوتره وقلقانه فا قولت احاول اخرجك من المود ده شويه علي فكره انا جبتلك الهديه دي امبارح بس خبيتها وطبعا هتلاقي جوه شويه شيكولاته علي ورد علي بلالين ودبدوب الحجات العبيطه اللي بيضحك بيها عليكم دي
ابتسمت روكا وهي بتقرأ وكملت اللي مكتوب.
وهتلاقي في هديه هتعجبك اوي واكيد طبعاً هتكمل شكل الفستان القمر اللي هتلبسيه😉 بحبك❣️
فتحت روكا البوكس وفضلت تطلع الشيكولاته والورد و الدبدوب ولقت علبه فتحتها لقته طقم شيك من الدهب الابيض كوليه وخاتم وأنسيال وحلق فيهم فص باللون الاسود شكله وهم
جحظت روكا عينها بفرحه وبسرعه اتصلت عليه.
عامر....يا صباح السكر ❣️
روكا....بحبك❣️
عامر ..بابتسامه ايوه بقي وانا بموت فيكي عجبتك الهديه.
روكا....عمرك ما جبتلي حاجه ومعجبتنيش يا عامر كل مره بتبهرني بذوقك.
عامر....لما تلبسيه هيبقي احلي عليكي .
روكا...ربنا يخليك ليا.
عامر...ويخليكي ليا يا روكا يلا خدي شاور و افطري قبل ما تخرجي ومش عايز توتر ولا قلقك
انا حبيبتي قدها 😉
روكا...حاضر يا حبيبي بحبك ياعامر.
عامر...بموت فيكي يا روكا❣️
.............. ..........
خرجت روكا بعد بشويه عشان تروح الكوافير. لكن وهي نفسيتها افضل كتير كالعاده بيقدر عامر يحتوي اي موقف بتمر بيه.
........... ...........
اما باقي الشباب كلهم راحوا علي شغلهم عادي.
لكن قضوا نص الوقت في الشغل عشان يرجعوا يجهزوا قيل معاد العرض..
عدي الوقت بسرعه وكل واحده في البنات كانت بتحط اللمسات الاخيره علي الشكل النهائي ليها قبل الخروج.
...........
سما.....مش هينفع يا هيما انا هلبسه بسرعه قبل نا البس وهوديه عند مامي واسيل عشان هيتعبك.
مهاب....سما عندها حق يا بابا تيم هيتعبك
إبراهيم....انتوا مالكم وبعدين ما هو قعد معايا قبل كده كذا مره ونيمته كمان اخرجوا انتوا اتكلوا علي الله وملكوش دعوه بينا.
سما...متأكد يا هيما.
إبراهيم....ايوه وبلاش رغي بقي ويلا اطلعوا البسوا هتتأخروا.
مهاب.....ماشي يلا يا سما متحاوليش مع هيما ادام نشف دماغه.
إبراهيم...اخو قالك اهو اخرجوا اتبسطوا وخليكي مع صحبتك هو اصلا مش متعود عالسهر.
سما...بقله حيله امري لله.
طلعت هي ومهاب جهزوا وبعد وقت بسيط كانوا خرجوا من الڤيلا و سابوا تيم مع إبراهيم.
...... ...... ......
وصل عامر وروكا الفندق اول ناس عشان يكونوا في أنتظار المدعويين.
كانت واقفه روكا بتاخد شويه صور عشان تتحط علي غلاف مجله.. وعملت لقاء صحفي.
عامر كان واقف باصصلها وهو مبتسم وفخور بيها وكل نظراته حب روكا كانت بترد علي اسئله الصحفي وكل شويه عينها تيجي في عينه وتبتسم
عامر من بعيد حرك شفايفه.
بحبك😉
ابتسمت روكا وبصت للصحفي وكملت كلاك لحد ما خلصت وراحتله.
روكا...وانا بموت فيك❣️
عامر....شكلك زي القمر.
روكا...بجد.
عامر...طبعا بجد انتي شايفه غير كده.
روكا...انت كنان شكلك حلو اوي❣️
عامر....بقول ايه ما تيجي نشرب اي حاجه علي بال ما الشباب يجوا.
روكا...يلا بينا.
بعد وقت بسيط وصلت ريم ويوسف و معاهم لمار ودياب كانوا جايين ورا بعض عشان لمار سابت زين مع البيبي سيتر بتاعت كريم بعد ما ريم أقنعتها وطبعا اطمنت لمار لما شافت الشغاله كمان وطمنتها متقلقش عليه.
........
وصلوا سما ومهاب وبدأ ناس كتير توصل
ووصل بدر وسيلا ونوني
واخيرا مربع الرعب والبنات.
الكل كان شكله يجنن البنات شكلهم حلو جدا والشباب كالعاده طالعين حلوين. سلموا علي بعض
وبدأت نوني تبدي إعجابها بفساتينهم وشكلهم
تمارا...بسعاده انا مبسوطه اوي انا اول مره أحضر عرض أزياء.
زهره....قصدك كلنا😂😂
لمار...انا كمان اول مره أحضر وبجد مبسوطه اوي.
نور....انا اخري كنت اشوف العروض دي علي النت او التلفزيون.
روكا....خلاص اعملوا حسابكم مفيش بعد كده عرض هعمله غير لما تحضروا فيه.
تمارا....ده اساسي انا شكلي حبيت الموضوع اوي😂😂
نوني....هو العرض هيبدأ أمته.
روكا...بتوتر كمان ربع ساعه.
سيلا....روكا شكلك يجنن🙈
روكا....بجد والنبي.
سيلا...والله زي القمر.
روكا....انتوا اللي حلوين اوي بجد🥺❣️
سما....مالك يابت متوتره كده ليه هو اول عرض.
ريم....يعني انتي مش عارفه روكا عامله فيها علي طول سبع رجاله بس تيجي وقت العرض تقلب قطه.
روكا...بت انتي اتلمي مش وقتك انا مش نقصاكي😡
عشق...بضحك بس بقي يابنات متوتروهاش 😂
عامر....انتوا واقفين ليه كده ماتيجوا تقعدوا.
روكا...ايوه يلا تعالوا العرض خلاص قرب يبدأ.
راحوا كلهم مع بعض علي تربيزه كبيره مستديره مزينه بالورود
قعدوا مع بعض فضل الكل يبارك لروكا مقدماً.
روكا كانت مبسوطه جدا لكن كان باين عليها التوتر اوي.
بعد وقت بسيط جه شاب من منظمين العرض طلب روكا عشان تجهز وتقول كلمتها.
عامر...بابتسامه يلا يا حبيبي
روكا....بتوتر انا حاسه اني خايفه اوي.
عامر....في ايه يا عبيطه مالك هو اول عرض ليكي ولا ايه يلا اطلعي افردي ضهرك واطلعي بكل ثقه عايز وحش واقف فوق🤨
ابتسمت روكا...ربنا يستر.
راحت روكا مع الشاب واختفت من قدامهم.. بدأت الاضاءه تكون خافته والموسيقي اتغيرت.
ثواني ودخلت روكا وبدأ الجميع يحيوها عامر كان واقف بيصقف بحب واول ما ظهرت فضل يصفر
عشان يديها ثقه في نفسها.
وقفت روكا قدام المايك وهي بتترعش.
روكا...مساء الخير عليكم جميعاً ميرسي بجد ليكم و لقبول الدعوه.
يمكن كل مره بقف فيها في المكان ده بيبقي احساسي هو هو نفس أحساسي اول مره وقفت فيها قدامكم نفس الخوف والتوتر
والقلق بس الحقيقه اول ما العرض بيخلص و بشوف ردود أفعالكم الجميله بحس اني عملت حاجه حلوه وان تعبي خلال تحضير الكوليكشن راح خلاص.
الكوليكشن المرادي مختلف تماماً عن كل مره وكمان في مفجأه جديده و يمكن تكون هي سبب التوتر اللي انا فيه ده بس أتمني انها تعجبكم وانا هعتبرها تجربه
واتمني تكون تجربه ناجحه هسيبكم مع العرض ومره تانيه نورتوني ❣️
صقف الجميع لروكا وبعد ثواني أختفت.ودخلت جوه بدات الموسيقي الحماسيه تشتغل والضوء أتسلط علي دخول العارضات.... وبدأ العرض..
..................
في أسكندريه❣️
أنس....ايه رأيك في المكان
كارمن بأبتسامه حلو اوي انا اول مره اصلا اشوف المكان ده.
أنس....بصراحه وانا كمان شوفي عايش بقالي قد ايه في اسكندريه عمري ما شوفته اصلا انا أكتشفته بالصدفه وعجبني جدا
كارمن....فعلا حلو وعيد عن الدوشه وكمان في ناس واضح اننا احنا اللي فايتنا حجات كتير.
أنس...المهم مبسوطه
كارمن...اه اضايقت شويه عشان الرخمه لمار كانت بتغيظني وهي خارجه بس خلاص🥺
أنس...بضحك هي رخمه هي وجوزها انا عارف بس بردو انتي مخونتيش عليا يرخموا عليكي ويقولوا انهم خارجين و مخرجكيش انتي كمان.
كارمن....بعتلها صور المكان عجبها اوي بتقولي لقيتوه فين ده😂
أنس...قوليلها بعينكم مش هعرفهم مكانه😂😂 اتنهد انس ومسك ايدها باسها كوكي مش عايز اشوفك مضايقه عشان خاطري من يوم ما سافروا وانتي مش زي الاول وانا مش عارف اعمل ايه لان مفيش حاجه في ايدي والله
كارمن....بابتسامه حزينه عارفه يا حبيبي وحقك عليا انا عارفه اني بقالي فتره منكده عليك و مودي مش حلو وانت ملكش ذنب في اي حاجه بس والله كان غصب عني بس اوعدك خلاص مش هضايق تاني وهبقي افضل.
اني...كارمن انا مش عايزك ترجعي عشاني لو عليا انا عارف اصلا انك مش بتحبي النكد و الزعل وان الشعور اللي جواكي ده غصب عنك وعلي فكره انا مقدره جدا لان انا كمان صعبان عليا ان انا ودياب نشوف بعض كل فين وفين
بس دي حاجه مليش يد فيها والله وانا عايزك ترجعي عشانك وعشان لينا حاولي تتأقلمي بسرعه وتفوقي وبعدين انا شايف ان لمار طول الوقت بتكلمك وبتهون عليكي وانتي اكيد بتهوني عليها يعني نستغل بقي ان في كلام واتصال والحجات دي لحد ما ربنا يكرم كده و تيجي الاجازه ونشوف بعض اتفقنا
كارمن ... أتفقنا يا حبيبي❣️
انس...ها يا ستي تحبي تتعشي ايه ولا اطلب انا علي ذوقي😎
كارمن...بضحكه جميله ماشي اطلب انت 🙈😘
.................
في القاهره..
بدأ العرض.
وفضلت تدخل عارضه ورا عارضه
ردود الافعال كانت جميله يمكن الفساتين كانت بالنسبه لعشق وتمارا وزهره ونور جريئه جداً
بس متصممه بأحتراف عالي.
فضل العرض شغال لحد ما جه معاد المفجأه وبدأ العارضات يدخلوا بفساتين المحجبات
الكل أنبهر من جمال التصاميم ورقتها والوانها ودخلت عارضه
منهم بفستان ازرق لفت أنتباه ليل
و حس انه عجب عشق كمان قام بهدوء راح للكرسي بتاع عامر ومال علي ودنه.
ليل....عامر بقولك ايه روكا معاها تليفونها ولا لا.
عامر....مش عارف شنطتها هنا لحظه كده.
فتح عامر الشنطه ملقاش الموبايل
عامر...شكله معاها.
ليل...طيب ينفع تتصل بيها
عامر...طبعاً لحظه بس في حاجه ولا ايه.
ليل....ياعم اتصل بقي وبلاش رغي
عامر....حاضر متزوقش🤨
اتصل عامر علي روكا وبسرعه ردت
روكا....ايه يا عامر في ايه
عامر...يابت مالك متوتره كده ليه الدنيا زي الفل والتصاميم تجنن متقلقيش
روكا....امال في ايه.؟
عامر...ليل عايز يكلمك.
روكا...ليل؟! طيب هاته.
عامر...اتفضل.🤨
ليل....ايوه.
روكا....خير في ايه؟!🙈
ليل....الفستان الازرق لو حد خده هاخد جوزك رهينه متفقين🤨
روكا....بضحك ده لعشق ولا ايه
ليل.....ماتخليكي في حالك وكلي عيش🤨
روكا....بضحك الله مش افهم بس😂😂
ليل...بأبتسامه ايوه ياستي لعشق
تمارا....علي فكره بقي انا كنت حاسه انه ممكن يعجبها وبعدين ماشي علي لون عينها😂😂
ليل....بضحك هو فعلا عجبها بس مقالتش المهم لو حد خده انتي عرفتي اللي فيها.
روكا.....لا أطمن خلاص محدش هياخده😂😂
ليل....يلا شوفي بتعملي ايه😎
روكا...اوك باي.
...........
خلصت الفساتين و بدأ كل العارضات يدخلوا من تاني ورا بعض ويلفوا حوالين المكان وبعدين دخلوا كلهم و ثواني وبدأوا يخرجوا من تاني بنفس الترتيب واخر واحده دخلت روكا
وبدأ العارضات يقفوا يمين وشمال
وقفت روكا في وسطهم
كانت لابسه فستان أسود طويل
ضيق علي الجسم كله ومن بعد الركبه منفوش شويه بطريقه شيك الاكمام طويله من الشيفون
شكله شيك جدا.
الكل كان بيصقف و بيشجعها كانت طايره من ردود الافعال ومن تشجيعهم وأخيراً حست روكا أن التعب راح .
خلص العرض بعد تصوير كتير للعارضات و لروكا مع كل صحابها و أغلب المدعوين.
وانتهي اليوم اخيرا والعرض كان ناجح جداً
قرر عامر انه يعزمهم في الفندق علي العشاء كان حاجز في مطعم جوه الفندق اول ما خرج الصبح
ومقلهاش وخلاها مفجأه.
طلعوا مع بعض وطلبوا العشاء وبدأ الكل ياكل كان الجو جميل وكله بهجه خصوصا علي روكا.
روكا...بصوت واطي مقولتليش ليه علي العشاء الحلو ده.
عامر...حبيت أفاجئك 😉
روكا...ربنا يخليك ليا يا احلي عامر بقولك ايه بجد التصاميم كانت حلوه.
عامر....طبعاً كلها تحفه و الوانتها تجنن وبعدين انتي شوفتي بنفسك ردود الافعال وبعدين تقريبا مفيش فستان متحجزش
روكا....ده في ناس كمان طلبت نفس التصاميم بعد ما عرفوا انها أتباعت وفي ناس طلبت تصميم بس بلون مختلف.
عامر....طيب يعني التصاميم كانت حلوه.
نوني....مبروك يا روكااا😍
روكا...الله يبارك فيكي يا نوني عجبتك التصاميم.
نوني...تجنن وبجد انتي فاجئتيني بفساتين المحجبات.
روكا....دي كانت فكرتك يا نوني وبجد انا نفسي اتصدمت من ردود الافعال.
دياب...تستاهليها يا روكا الف مبروك.
روكا...الله يبارك فيك يا دياب و بجد انا مبسوطه اوي انكم جيتوا
جاسر...علي فكره انا جيت عشانك مش عشان حد تاني🤨🙄
عامر...بضحك انا وهي واحد😎
جاسر...وانا جبت سيرتك😒
نوح...بضحك قصف جبهه😂😂
عشق....ميرسي يا روكا عالفستان الحلو ده.
روكا....لا ميرسي دي تقوليها لليل اللي خضني😂😂😂
هو خده علي فكره تحت تهديد السلاح قالي لو حد خده هاخد جوزك رهينه😂😂🙈
عشق...بابتسامه بتهددها🙈😍
ليل....طبعاً عشان اضمن انها متدهوش لاي حد.
روكا....هاخد بس مقاساتك يا عشق وهظبطه وهبعتهولك عالڤيلا.
عشق....ان شاء الله يا روكا وتسلم ايدك مقدماً.
خلص الوقت بينهم بسرعه وخرجوا مع بعض وأكد عليهم ليل ميتأخروش عشان يقضوا اليوم من اوله.
ودعوا بعض ومشيوا .
وخلص اليوم بسعاده علي الجميع❣️❣️❣️❣️❣️
......... .... .........
عشق...بسعاده بابا 🥺 وحشتني اوي.
حاج محمد..انتي كمان وحشتيني اوي يا عشق.
عشق....شكلك حلو اوي🥺
حاج محمد...ده من نعمه ربنا عليا.
عشق...طمني عليك.
حاج محمد....في زحام من النعم يا عشق انا مبسوط اوي يا حبيبي
عشق....حضرتك وحشت نور اوي ووحشتنا كلنا نور كانت نفسها تزورها ليه مروحتلهاش.
حاج محمد....انتوا اللي وحشتوني ونور كمان وحشتني بس انا ديماً معاكم وعارف أنكم بخير لكن انا كان لازم اجيلك انتي.
عشق....خير يا بابا ورايح فين ليه ماشي
حاج محمد....لازم امشي بقي .
عشق...خليك شويه انا ملحقتش اشبع منك 🥺 جيت في ايه وماشي في ايه.
حاج محمد....جيت اوصيكي يا عشق وعارف انك هتكوني قد الوصيه.
عشق....نور في عيني وقلبي يا بابا متوصنيش عليها دي اختي .
حاج محمد...لا يا عشق مش بوصيكي علي نور انا عارف ان نور في امان و مطمن عليها في وسطكم.
عشق....امال تقصد ايه يا بابا توصيني علي ايه انا مش فاهمه؟
حاج محمد...جيالك امانه ياعشق حافظي عليها يا بنتي.
فضل يمشي وهي تحاول تلحقه.
عشق...بابا امانه ابه