رواية لست خائنه الفصل الرابع والعشرون 24 بقلم انين الليل

//////////🌹💔🌹///////

علي 

لمن ما خابرني سلام قبل شهر ونص ورحت وسولفلي انو تزوج رضوى لان طاهر جان يريدها الابنه ولان 

الورث مال فواز كله صار الرضوى وهو بالاساس شريك فواز بكل شي وهذا الي احنه نعرفه من خلال 

تواصلنه القليل وياهم  

حسيت انو سلام ورضوى ضامين عليه شي وهم شفت رضوى تتمنى يكون الها سند واخ 

صحيح احنا ما عشنا ولا تعايشنا ويه بنات عمنا لان عمي جاسم بطبيعه حاله جان مبتعد عنه امي تكول 

هو حتى قبل لا يتزوج هو مبتعد بس اتذكر انو ابو سلام من انخطبت رقيه المقداد كال صحيح مربيها 

بس لازم نخطبها من عمها واتذكر اجو الابوي الله يرحمه وكلوله 

مانتخطاك ابو شاكر تبقى عمهن وبمثابة ابوهن 

وبعدها ابوسلام كال 

ابو شاكر رضوى النا اريدها من تكبر الابني 

ابوي ساله /:وليش رضوى بالذات خو اخذله من بنات عمه 

ابو سلام /:لان رضوى ربيناها انا وام فواز على ايدنا ام فواز هي سمتها واول ما صارت شالتها احنا صحيح 

عدنا بنات اثنين بس اختك ام فواز تحب رضوى يمكن اكثر من روحها وهي بنيتنا نعرفها وتعرفنا وام فواز ما تفك 

عينها الا كون رضوى بوجها 

ابوي /:ابو فواز هنه بناتكم مثل ما بناتنا وما ننسى كثر الله خيركم ربيتوهن وتعبتو عليهن ونعم التربيه 

ابو سلام /:احنه اهل خويه

وبعدين انقطعو عنه ما شفناهن الا بوفاة ابوي التهينا بشغلنا وشاكر عزل وانا اتحملت مسؤولية البيت صحيح ابوي

عنده تقاعد خلينا الامي لان دوم مريضه 

وره شكم سنه سمعنا برضوى متزوجه فواز ومن سمعنا بفواز اتوفى كلت الشاكر يروح وياي هو ماقبل كال من 

اتزوجت محد شارنا ولا جنا ولد عمها 

انا جاوبته/:همه من اجو يخطبون رقيه خطبو رضوى السلام اتذكر مو الفواز

وانا اجيت للفاتحه ودزيت على رقيه وسلمت عليها 

من خابرني سلام انا ما اتاخرت كلت اروح واشوف شيريد وفهموني على شغلة الورث واستلمت المعرض 

مال السيارات جنت اشوف سلام دائما ضايج ومهموم ما حبيت اساله لان عرفت احرجه وهو وعدني يكلي كل شي 

بالوقت المناسب 

بقيت مستلم معرض السيارات وجنت اتحاسب ويه سلام احيانا كل يوم واحيانا كل اسبوع انا ويا اصدقاء فد يوم كتله

- - سلام راح ابقى انام بالمعرض 

::وليش علاوي 

- - والله اخجل من فارس اريده ياخذ راحته 

- - وانت شمسوي ابو حسين بالعكس راد الوحشه علي 

::لا والله سلام ما يصير 

هو شنو الما يصير اصلا فارس لكاله بيت وجاي يجهز بي عل مود يتزوج يعني اول وتالي هاي الشقه من نصيبك

 بس ها اذا واحد متعارك ويه مرته لو مرته طاردته يجي يمك

وتمينا نضحك واتوطدت علاقتي ابهاء وفارس وصرنا نطلع ساعات وساعات بهاء باخذنا البيتهم وتجي امه هاي الانسانه الطيبه ودوم من تشوفني تكلي //بس يعرس فارس انوب انعرسلك نريد نفرح بيك 

بقيت اقل الشهرين وانا لازم معرض السيارات فد يوم الظهر كاعد واجاني مقطع فديو من رقم غريب فتحته انصدمت 

من الي شفته صدكوني الي شفته يبجي ويتمنى الواحد يموت الف مره ولا ينحط بهيج موقف

شفت بت عمي رضوى بغرفتها وهي حاضنه ولد غريب وتضحك ضحك مخزي 

انا من شفت الصوره راسا ركبت السياره وطرت بيها وما اعرف

شلي صار بيه دخلت للبيت بدون ما ادك الباب وبنفس اللحظه دخل

وراي سلام انا حتى ما انتظرت ركضت كبل دخلت من باب المطبخ

وشفت سلام راح للغرفه يمكن مالته بس انا دخلت للغرفة الثانيه 

رغم ما ادري بيها هاي غرفتها بس مره كالت السلام لمن راحو للمحكمه للمكاتبه 

انت لازم تصعد انت وهاي -تقصد كوثر-فوك شنو غرفتك بصف غرفتي 

واتذكر هو يضحك ويغمزلي ويكول 

::اتعلم علاوي الياخذ اثنين لو سلطان لو شيطان 

عرفت هاي غرفتها دخلت شفتها نايمه ع الجربايه انا بلحظه عتيتها وضربتها راشدي هي فتحت عيونها جانت 

عبالك سكرانه اجه سلام وهو رافع المسدس يريد يرميها هي باوعت وصارت وراي وانا اتقربت من سلام 

واخذت منه المسدس بعد ما تلاوينا انا ويا كلي 

::انت باي حق تدخل للغرفه بدون استئذان 

جاوبته - - هاي عرضي وانا مسؤول عنها 

::بس هي (وضم ايده وظل يضرب ع الميز)لازم اكتلها اموتها 

رضوى وراي انا كتله /:سلام اللحم الك والعظم النه بتنا احنا نتباصر بيها انت ما الك دخل نكتلها ونغسل عارنا 

ونفصلك بس بالاول اعرف غريمي وبعدين يصير خير 

سلام وهو يدفع بيه ::اخذها هسه تطلع لا انت وهي هسه اخليكم جنازه 

رديت //الك حق الك حق 

وصار سلام يدفعني وانا لازمها بايدي وهي ولا يم الموضوع وطلعها بالدشداشه بدون عباة انا باوعت شفت عبايه

 اسلاميه ردت اخذها بس سلام ما قبل كال لوبيدي اطلعها مصلخه 

اخذتها وطلعت وهي حافيه والدشداشه ما اوصفهاودخلتها بالسياره وهي مو واعيه ركبت وانا الدمعه بعيني ما 

اعرف شسوي واشوف شعرها منكوش واثار بركبتها ردت ذيج اللحظه ارميها نزعت قميصي وانطيته الها تلبسه 

وانا ظليت بالفانيلا وانا اغلي ودي اكتلها بس اريد اعرف منو قشمرها وجان وياها انتبهت الها ما تسيطر تلبس القميص 

ركنت السياره على صفحه واخذت القميص ولبسته الها وهي تضحك باوعت بالشارع شفت مره واكفه يم بيت منتظره ابنها الزغير دزته للدكان نزلت وره ما قفلت السياره 

سلمت علبيها 

اشلونج خاله 

هي تجبجبت خصوصا من شافتني بالفانيلا الداخليه /:هلا خاله اهلا وسهلا 

انا بخجل وتوتر /:خاله بلا زحمه انا داخل على الله وعليج شوفي ذيج سيارتي ورجل اختي الجلب كتلها وخابرني

 وطلعها بطرك الدشداشه النص اريد منج حجاب وعبايه وبيش ما يصيرن هسه انا نزعت قميصي وانطيته الها 

وطلعت فلوس من جيبي هي باوعتلي وشافتني ابجي ومقهور كالت 😭😭😭

- - خاله تانيني لا تروح 

دخلت للبيت وشويه وطلعت جايبه حجاب وعبايه وكالت 

— -هاك خاله واذا تريد انزل انت وياها وارتاحو الدنيا بعدها بخير 

انا مديت ايدي على جيبي وطلعت فلوس هي كالت 

- - افه عليك يمه شسويت هي هم مثل بتي رووح يمه الله وياكم 

انا رحت واخذت القميص ولبستها العبايه والحجاب واشوفها ما منتبهه لبست القميص وقررت اخذها الكربلا 

وهناك اجمع اخوتي واكتلها اي لازم اكتلها للحقيره مشيت بالسياره شويه وهي كامت تكول اخ اخ وك ف ال س 

بعدين صارت تتقيا بس القئ زباد يطلع من حلكها وهي فقدت انا شفتها شلون تقيات قررت اخذها للمستشفى 

وبعدين اخذها البيتنا 

وصلنا للطوارئ نيمتها ع السديه لان ما تسيطر لا توكف ولا تمشي 

اجه الطبيب كلي 

شبيها 

كتله /:ما اعرف هي داخت وطلع الزباد من حلكها

الدكتور باوعلي /:وراح شافها بعدين اخذوها وسووا اللازم ظليت منتظر طلب تحليل دم همه اخذو عينه وره 

شويه جنت بره الغرفه لان المريضات كلهن نساء والي وياهن هم

طلع الدكتور ورحت ورا كلي

- شتعودلك المريضه

كتله// اختي 

هو سالني كلي //اختك متزوجه مو 

- - اي دكتور متزوجه ليش 

الطبيب /:لا ماكو شي بس اختك حامل وسحبنا منها عينه ثانيه جاي نسويلها تحليل ثاني نعرف سبب الزباد الي 

طلع منها وخصوصا وهي لحد هسه ما منتبهه وبشبه غيبوبه

انا تفاجات وبنفس الوقت اتحيرت ظليت امسح بوجهي واحس بروحي اختنگت طلعت النقال اتصلت بسلام بس راسا 

قطعته صارت كدام عيني ام بهاء اتصلت ابهاء رد 

- - هلا ابو حسين 

- - هلا بيك بهاءءاسمعني تجيب امك وتجي كبل للمستشفى ال،،،،وارجوك لا انت ولا خالتي تبلغون اي احد حتى

 سلام ما اريده يعرف مسالة حياة او موت ويصير بيها كاتل ومكتول 

بهاء /:شبيك علي شصاير كلي 

علي /:بهاء بداعة امك وروح ابوك تعال ولاتتصل باحد

وسديته وبقيت كاعد وانا ما اعرف شسوي نص ساعه تقريبا واجت ام بهاء وصلو يمي بهاءءتسالم وياي كلولي شصاير 

ام بهاء /:خاله علي بروح ابوك شصاير 

انا باوعت الها وكلت /:خاله رايدج بشغله ابيناتنا 

باوعت البهاء كتله /:بهاء من رخصتك شويه وارجع لك وافهمك 

بهاء /؛علي علي شصاير كلي 

- - راح افهمك بس رايد خالتي 

واخذتها على صفحه وراويتها المقطع وسولفت الها كل شي هي ظلت تخرط بخدها اشرت البهاء وهو اجه يركض علينه 

بهاء بخوف /:علي شكو شصاير 

ام بهاء /:يمه صخام بوجهنا مصيبه وطاحت على هذا المسكين (واتاشر عليه)

بهاء /؛فهموني ياجماعه شكو 

علي /:مثل ما كالت مصيبه بهاء والمصيبه الاكبر رضوى حامل

انا دزيت عليكم على مود تتذكرون هذا اليوم والوكت الي

جبت رضوى للمستشفى وطلعت حامل 

ام بهاء /:يبوووي يمه يارضوى الله يساعدج شتتحملين يا مسكينه 

علي /:شبيها خاله كولي الله يساعدني انا 

بهاء /:هسه غير تفهموني انا مثل الاطرش بالزفه وسلام وينه وليش رضوى وياك وبهذا الوكت 

وطلع الدكتور وصاحلي ورحنا تلاثتنا دخلنه وسد الباب وكال 

- - انت اخوها 

:اي دكتور 

||والحجيه امها 

- - اي خاله ليش 

||زوجها وين 

ام بهاء //خاله زوجها طلكها بس الله يخليك شبيها بنيتي 

الطبيب //انا راح اكون صريح وياكم هم عدكم علم بتكم شاربه حبوب مخدره وهلوسه 

وهي هسه مغمي عليها لان هالمره الجرعه جانت جبيره جا موتتها بس لان اتقيات لحكنا عليها وهي هسه

 بغيبووبه وانا لازم انطي بوضعها علم للشرطه لان الظاهر بتكم تتعاطى من زمان

لازم نعرف منين تجيب الحبوب 

علي باوع البهاء /:دكتور الله يخليك بس خليها تصحى واحنا حاضرين 

الدكتور /:بس هاي جنايه لازم نعرف منين تجيب الحبوب انتم اهلها ما عدكم علم 

بهاء/:دكتور تره الحبوب تنباع بالشوارع 

الدكتور /:انا هذا العندي 

بعدين بهاء طلع النقال وخابر /:هلا دكتور 

محتاجك تجيني هسه انا بمستشفى ال،،،،، 

لا ماكو شي بس رايدك هسه 

انا باوعت البهاء وكلي /:علي هذا ابن عمي طبيب وهسه يجي ويتدخل لازم نلكى حل 

وراحت ام بهاء يم رضوى الي جانت غايبه عن الوعي واجه ابن عم بهاء وسلم علينه وحجوله الي صار وراح 

الدكتور وحجى وياهم وبلغنا انو لازم نعرضها على مختص وكتب النه اسم طبيب مختص 

انا قررت اطلعها من المستشفى واعرضها للطبيب واشوفه شيكول وام بهاء كالت خاله خلي ناخذها البيتنا انا 

ما قبلت وكتلهم مشكورين وحلفتهم الي صار لحد ياخذ بي خبر وطلعت رضوى وهي بس فاتحه عيونها واخذتها 

للطبيب الي دلاني علي ابن عم بهاء طلب عينه من الدم بعد ان شرحتله حالتها وفحصها وسوينه التحليل وهي شبه

نايمه وما منتبهه الدكتور كلي شنو شفتو عليها

انا فهمته هي عد زوجها انو جانت طبيعيه مره جنت يمهم جانت تشكي من وجع راسها ولمن ما تشرب كهوة شويه ترتاح 

الطبيب كلي هو متاكد انو الحبوب جانت تاخذها عن طريق الكهوه 

ولازم تدخل مصحه تتعالج والا راح تبقى تتعاطى ويتاذى الطفل اذا ما فقدته وهو كتبلي على مصحه ابغداد ومصحه 

بعدة محافظات المشكله الي عندي هي اوراقها الثبوتيه ما عرفت شسوي الا اصارح الطبيب واكله دكتور شلون اذا 

زوجها رفض ينطينا اوراقها 

الطبيب كلي كل الي اكدر اساعدك بي اني انطيها علاج مهدئ يخليها هادئه ونايمه بس اهم شي تستعجل بان 

تخليها بالمصحه 

رجعتها البيت ام بهاء بعد ما خابرت بهاء وشرحتله الوضع وهمه الناس رحبو وصلت الهم ونزلناها وهي 

ما تدري بشي وبغير عالم خابرت سلام بالبدايه ما رد بعدين جاوبني 

::تفضل 

- السلام عليكم 

::عليكم تفضل 

-مشكور بس رايد جنسية بت عمي وشهادتها 

::ما عندي اي جنسيه 

-اعرف هنا بغرفتها 

::ليش هو الي يريد يغسل عاره يريد جنسيتها شنو تريد تقبض بيها كميه

تستمر القصة أدناه

وسد التلفون بوجهي رادت ام بهاء تروح بس انا ما قبلت خابرت المحامي

وكتله رابد اتطلعلي جنسيه الرضوى لان جنسيتها ما موجوده وهي عدنا بكربلا ما تكدر تجي 

هو كلي مي خالف بس تاخذ وقت انوب كلي هو عدنا نسخه من جنسيتها وشهادة الجنسيه 

انا كتله زين حضرهن هسه جاي اخذهن وانت امشي بالبدل 

ورحت للمحامي واخذتهن ومن طلعت كتله /:استاذ رضوى تسلم عليك وتكول اي شي يخص املاكها بس انا 

وهي مسؤولين عنه حتى سلام ما اله اي دخل راح تفك الشركه ويا لو هي تشتري لو هو يشتري

رجعت البيت ام بهاء الي لكيتها مقهوره وضايجه هالمره من تصرف سلام انا كتلها /:مي خالف حجيه سهله وهو 

هم حقه اي واحد بمكانه يسوي هيج واكثر 

طلبت من بهاء ان يتصل بابن عمه اكيد عنده عرف بهاي المصحه والرجل ما قصر اتصل بدكتور ابغداد يعرف اطباء بالمصحه على مود بس يوافقون تدخل باوراقها اقصد الجنسيه الاستنساخ 

همه تفهمو وقدرونا الخاطر الدكتور وسلمت على بهاء وامه الي رادت تجي وياي بس انا رفضت وصيتهم

ما اريد احد ياخذ خبر واخذت منهم وعد ما راح يحچون

وطلعنا انا ورضوى البغداد من الصبح هاي الها من امس نايمه او ما منتبهه جنت مقهور وما اعرف شسوي بس 

الي افتهمته ان ما طول الشغله بيها حبوب ومخدرات اذن اكو سر وهذا السر اعرفه لمن ما تطيب رضوى لو تكلي

منو غريمها واكتلهم واغسل عاري 

لكن بالطريق فكرت كلت حتى هي ما عدها شي مستحيل ليش قبلت بسلام عد فلوس واملاك كان 

ممكن كل شي تسوي بدون محد يعرف ليش قبلت تنزل على ضره هي بفترة وجودي ما اشوفها تطلع

 الاي مكان لان الي شفته هي تريد تبقى يم سلام لان هي تحبه

وصلنا وره الظهر البغداد تصدكون حتى ما وكفت جريت نفس رضوى جان انتباهها قليل بسبب العلاج الي كتبه

الطبيب وهناك دخلتها بمصحه خاصه ورحت يم الطبيب الي شرحتله كل شي لان هو راد يعرف كل شي بعد 

ان سولفتله كال اذن هي مو من زمان تتعاطى ان شالله نكدر نسيطر عليها ونسبة شفائها عاليه اذا تساعدنه لكن 

الطبيب كال احتمال تفقد الطفل مو اكيد بس احتمال 

وبقت رضوى بالمصحه وانا رحت اخذتلها ملابس وشغلات ودفعت تامينات والدكتور كلي تكدر تجي كل اسبوع

تطمئن عليها واخذ رقمي 

بتت بالفندق وبهاء كل شويه يتصل واطمنه الصبح رحت للكاظميه زرت وطلبت من 

الامام موسى بن جعفر (عليه السلام )

ان يساعدنا بجاهه عد ربه يساعدنه بالستر وظهور الحق لان مو هينه عليه اشوف عرضي بهيج موقف

رجعت للبصره وقررت استمر بالشغل على ما تطيب رضوى وبعدين اتصرف لان اتذكر شلون سلام كلي

ابقى علي يم رضوى على ما اكشف المؤامره 

(اذن اكو مؤامره ومؤامره چبيره وانا لازم امسك اعصابي على ما تتشافى رضوى )

رجعت للمعرض وصرت انام بي خابرني بهاء كلي //امي رايدتك 

انا خابرتها// سالتني على رضوى انا كتلها بالمستشقى ورجعت حلفتها ما تجيب سيره على الي صار 

رابع يوم العصر اجه فارس للمعرض انا تلكيته تسالمنا وهو سالني 

- - علي ليش ما تجي تبات يمي شعجب 

:لا والله ما كو شي ابو الفوارس انا ساعات اتاخر بالشغل وابات اهنا 

- - الله عليك علي خو ما سامع شي 

:لافارس شلقصه منين اسمع (اشوف بوجه فارس كلام يريد يحجي )

انا بادرت //خير فارس احس عدك حجي 

فارس /:اي والله علي بس ما اعرف منين ابدي 

:منين ما يعجبك 

- - والله علاوي انت عزيز علينه الله شاهد ما شفنا منك الا كل خير 

:الله يخليك اي اسمعك 

- - والله علي دزني سلام يكول علي يعرف هذا حلالي وحقي وانا اريده 

هزيت راسي //اي ان شالله يدلل

فارس /:علي هذا كلامه لازياده ولا نقصان 

:وصل كلامه وانا جوابي نفس ماهو ان شالله 

فارس /:والله علي ما اعرف شلي صاير بيناتكم لاسلام يحجي ولا انت 

:مي خالف فارس لا تضغط علينه 

وراح فارس وبقيت انا ما اعرف شلون اتصرف لو اي احد بمكان سلام جا سووا اكثر اتصلت ابهاء ورحت يمه 

للبيت وامه هاي الانسانه الطيبه جابتنا العشا وكعدت وهي تصبر بيه وتكلي //خاله رضوى شريفه وصافيه ابني 

لا تستعجل وتتهور وبعدين نعض اصبعنا ندم  

:لا خاله بس خلي تشفى والي تصرف 

وحجيت البهاء وخالتي على طلب سلام 

هم كلولي هم لا تستعجل وام بهاء كالت //مالك شغل هذا يحچي ابحده من حرگت گلبه الله يعينه بس صدگني يمه 

لو فواز عدل جا كل حلاله وماله انطا الرضوى 

شكد كبرت ام بهاء بعيني لان على الرغم من انو سلام يصير ابن اختها لكن حجت حجاية حق 

💛💚💗💘💙💚💗💘💛💚💗

سلام 

صار اكثر من شهرين وانا ورضوى عايشين فرحانيين صحيح اشوف بعيونها عتب ولوم بس انا اطمنها 

واكلها بس اكشف المؤامره اعلن زواجي وما اخاف من اكبر واحد انا الصراحه جان خوفي على رضوى لان 

اعرف كوثر وامها ولان انا دائما اروح للسيد ويقرا وينطيني ماي اغتسل بي ودائما اسمع قران بس رغم هذا

اشوف رضوى صافنه وتجر حسرات 

انا اكول لان تغار من كوثر وهي ابد من استلمت الورث اللحد هسه ما يوم طالبتني بشي بالعكس الوارد مال

المحلات والمعرض كله يمي 

بالاونه الاخيره اشوف رضوى تدوخ وراسها يوجعها ومن نروح للمزرعه تلعب نفسها انا اكلها 

حبيبتي هذا كله من التفكير 

وهي تكلي =عفيه سلام خلي نرجع للبيت اشرب كهوه

اشوفها مو مثل كبل تتشاقى وياي جانت دوم تسرح وضايجه وبس احجي وياها تصير عصبيه وانا عاذرها 

لان اعرف هي شكد تحبني وتغار من كوثر 

اما كوثر فجانت بهاي الايام هادئه جدا وما جانت تحجي ولا ترادد ولا تعيط 

ولا تسالني ليش ما تجي او اتاخرت فد يوم حاچيتها 

::كوثر اليوم راح اتاخر مو يظل بالج وكل شويه تخابرين 

هي ردت بهدوء /:براحتك سلام 

::شعجب شو مو مثل كبل تعيطين وتحجين هسه كله بكيفك وبراحتك 

هي حظنتني وكالت بدلال /:يعني اذا اكلك تفهم وجهة نظري 

::اكيد كوثر افهم اخبالاتج 

كوثر وهي حاضنتني /:راح تشوفني دووم هيج هادئه ومطيعه 

::وانا اسالج شعجب 

كوثر /:بصراحه سلام جنت اغار من رضوى واخاف ترجع تاخذها بس هسه انا مرتاحه كوثر خطبها صلاح 

اخوي يعني راح تصير مرت اخوي بعد ما كو شي يخليني احجي واغار واتنرفز 

انا جاوبتها باهتمام ::شنو هي ردت الكم خبر موافقه 

كوثر /:مبين سلام موافقه شوفها حتى سكتت ما كالت شيلو غراضكم واصعدو فوك ولا سدت الفتحه بين بيت اهلي 

واهنا مبين سلام تسوي هيج على مود تبيض صفحتها 

::هذا رايج 

كوثر /:اي سلومتي ما تشوفها حتى هي هادئه 

::بيها الخير يستاهل صلاح 

وطلعت وانا كوه ضام ضحكتي واحجي ويه نفسي ::شكد خطيه بيت عمي طاهر عبالهم رضوى موافقه 

قبل الحادث بليله رجعت ودخلت للغرفه راسا بدلت ودرت وجهي ونمت اجت كوثر وحضنتني وكلتلي 

حبيبي سلووم باچر بيت خالي عازمينه اقصد عزمو امي وابوي وامي تكول امشي ويانه انت شتكول 

انا درت عليها كتلها ::ها بكيفج اذا تردين ترحين روحي 

كوثر /:اي والله فدوه سلام من زمان ما شايفتهم ما نتاخر نبقى للعصر ونرجع

::براحتج حبيبتي اصلا انا باجر عندي شغل الفوك راسي اكلج اخذي عطاء خلي تغير جو 

كوثر /:لا باجر عطاء تكول اروح اشوف بيبيتي لان مريضه وخاله سهير تريد تروح الاهلها 

::زين سلميلي على بيت خالج 

كوثر/:الله يسلمك ليش ما تجي ويانه 

::اتمنى بس شغل مو فاضي 

كوثر //بكيفك حبيبي حبيتك تغير جو 

::ع الجايات ان شالله انتي من ترحين بلغيني 

كوثر // ليش سلام 

:: يعني يجوز يصيرلي مجال واجي الظهر اتغده 

بليلتها فكرت انو اذا كوثر واهلها يرحون وعطاء وسهير ما موجودات انا اجي يم رضوى لان هالايام ما اعرف 

شبيها كله ضايجه وراسها يوجعها اتقربت الكوثر لان هي هم زوجتي وهالايام صايره زينه ومبتعده عن رضوى 

الصبح طلعت من وكت لان اجتني بضاعه واتريكت بالمحل الساعه 11

اتصلت كوثر وكلتلي رايحين هسه طلعو من البيت وانا چان يمي شكم معميل خلصت الشغل وجاي اريد اخلي واحد

 من العمال ياجرلي سياره تكسي اروح بيها البيتنا اخاف احد يجي لكن تفاجات بجية صلاح ابن عمي 

صلاح /:السلام عليكم اشلونك سلومي 

::هلا هلا شلونك

صلاح /:الله يسلمك جان عندي شغل يم محلك وكلت امر اسلم عليك 

::هلا بيك صلاح محلك 

صلاح /:تسلم حبيبي بس اذا اعطلك اروح 

::يمعود وين تريد تروح 

صلاح /:احنا اليوم ابيت خالي بس مثل ما كتلك عندي شغل ومريت بيك 

::هلا ومرحبا اامر صلاح 

صلاح/؛الله يخليك جايك بموضوع واريد مساعدتك 

::تدلل 

صلاح /:سلام اريدد تحجي ويه علي على مود رضوى 

انا بارتباك ::هاا شنوشحجي 

صلاح /:اريد يستعجل بالرد مو تشوفه صارف نظر 

جاوبته ::الصدك صلاح ما منتبه انا بس مي خالف بس اشوفه راح احجي ويا 

صلاح/:تدري رضوى بت عمتي واحسن ليش تروح للغريب انا اولى

انا ودي اكوم اكسره الحقير هسه كلها رادتها على مود فلوس فواز جاوبته وانا احك بحنچي 

::مفهوم مفهوم احجي ويا واردلك خبر 

وبقى لاطش يمي يسولف وانا اريده بس يروح بعدين اجا تلفون كلي 

صلاح /:الكعده وياك ماتنمل بس خابروني لازم اروح البيت خالي 

بكلبي اكله ::دروح لزكت خو ما لزكت 

طلع صلاح شفت الساعه 12 رحت اتوضيت وصليت واريد اطلع من المحل اتصل رقم علي رفعته كلت 

الو الو الو 

ما جاوب بعدين وصلني من نفس الرقم مقطع فديو فتحته وانا انصدمت 

ما اعرف بس صعدت بالسياره واريد اوصل حتى اخلص على رضوى 

جان الوضع محد يتقبله وما بي اي مجال للتفكير او الشك لان بغرفتها 

وچانت تضحك وهو حاضنها وصلت للبيت قبلي شفت سيارة علي وكبل دخل للبيت وانا ورا دخلت الغرفتي طلعت 

المسدس ورحت يمهم بس هي صارت لا اراديا وره علي الي تلاوينا انا ويا واخذ مني المسدس وكلي 

شرفنا احنا مسؤولين عنه واحنا نغسل عارنا انت اتكتر 

واخذها وطلع جانت لابسه دشداشه نص قصيره وشعرها منكوش من رادو يطلعون شاف عبايه وشال راد ياخذهن 

بس انا كتله 

::لا تطلع بذني وبختها بيك لو لازمها هي وصاحبها جا طلعتها مصلخه 

علي /:حقك حقك 

وراح علي وانا بقيت مثل الطير المذبوح ارجف وابجي واغم بروحي واطك راسي بالحايط 

::ما بيها مجال رضوى خانتني خانتني يعني كل كلامها چذب هي چانت الها علاقه ويه فواز ويجوز هو ما حب 

تصير مرته لان يعرف بيها ااااخ شلون عفتها ما موتتها بايدي شلون 

ظليت متمدد على وجهي بالصاله وكل شويه افتح نقالي واباوع للمقطع واشوف مرتي بحضن واحد وفرحانه 

اجتني ترميشه من علي عبالي يكلي كتلتها بس هو سد التلفون 

بقيت بالبيت ما اكدر اوكف اسيطر على نفسي المغرب اجوبيت طاهر ودخلت كوثر لكتني متمدد بالصاله على 

وجهي وصلت يمي كالت 

كوثر /:ها سلام انت اهنا 

انا ما جاوبتها كامت تكلي //سلام سلام شبيك شصاير 

هم ماحجيت ولا درت وجهي اجت صبيحه بالمطبخ صاحت عليها 

صبيحه /:كوثر راسي يوجعني اريد حباية 

كوثر بخوف /:تعاي ماما تعاي شوفي سلام ما ادري شبي 

اجت صبيحه وهي تكول /:اسم الله ياستار شبي سلام 

كوثر وهي تبچي /:ماما اول ما اجيت لكيته متمدد احچي ويا ما يجاوبني 

صبيحه /:شبيج خوفتيني ام دميعه تبجين كل شي ما بي تعب من الشغل 

واتقربت صبيحه يمي ولزمت جتفي وهي تكلي //عمه سلام اكعد روح ارتاح بغرفتك كوم يمه شبيك 

انا ما رديت كوثر تكل الامها /:ماما صيحي للولد خلي ياخذو للمستشفى اخاف من وكعة ذاك اليوم 

صبيحه //يمه ما تشوفينه نايم ظلي يمه ومن يكعد فرچي رجليناته وشوفي شيريد ما بي بس العافيه انا 

رايحه حتى نسيتيني وين حبوب الراس 

كوثر /:اي بالثلاجه 

- - دا تعاي انطيني وحده راسي موتني 

وراحت كوثر وانا بقيت متمدد ما اكدر ارفع راسي اخاف اكعد واعرف الناس كلها تدري برضوى خانتني وجانت 

نايمه ويه واحد بغرفة نومها 

مجرد التفكير يخلي الواحد يكره نفسه شلون وانا شفتها بعيني گمت على حيلي ورحت كبل قفلت غرفتها وخليت

 المفتاح بجيبي ودخلت الغرفتي واخذت حمام وصليت وبعدين اخذت السويج وطلعت شافتني كوثر جانت بالمطبخ 

- - ها حبيبي كعدت 

::اي 

- - زين شنو مشتهي اسويلك عشا 

::ما اشتهي اريد اطلع 

- - وين تطلع مو تعبان 

انا ما جاوبتها وطلعت بالسياره ظليت افتر ما اعرف وين ارووح وصلت يم شط العرب جان ليل والناس 

طالعه والعوائل والاطفال انا وكفت يم الشط وكلبي نار واعاتب بروحي ليش ما كتلتها ليش عفتها تروح ويه 

ابن عمها 

اتصل عليه علي گلت اكيد راح ايكلي كتلتلها الصدك ظليت ارجف فتحت الخط هو كلي 

سلام رايد جنسية وشهادة جنسية رضوى 

انا اتنرفزت ودي الزم علي واشرب من دمه كتله ::ليش انت تريد تغسل عارك لوتقبض كميه 

وسديت التلفون بوجهه وقررت افضح رضوى بعدين اتذكرت انو محد يعرف بيه متزوجها ومن افضحها راح 

تصير هواي امور خلي بالبدايه اشوف ابن عمها شيسوي خصوصا وحلال فواز كله باسمها لازم افكر شلون 

استرجع منها كل شي اخذته من فواز وبعدها افضحها واذا علي ما كتلها انا بايدي راح اكتلها

صرت ادخن وانا ارجف وكلبي نار مقهور مهضوم صرت ابچي ما اعرف شسوي 

ولچ رضوى اول مره اكول چذب وهسه هم چذب 

رجعت للبيت وانا محبط ولكيت كوثر منتظرتني ما باوعت بوجهها اتمددت على فراشي بدون ما احچي واحس بالفراش 

عبالك سجاجين منين ما ادور تذبحني اتقربت مني انا غمضت عيوني كوثر گالت 

حبيبي نايم بملابس الشغل سلام اگعد غير ملابسك 

ما جاوبتها وهي ما لحت وياي بليلتها ما غمضلي جفن ثاني يوم ما رحت للشغل كوثر بس سالتني 

- - شنو سلام اليوم ما تروح للشغل 

انا مغلس ماحجيت بس كتلها ::لا 

هي عافتني وسدت الباب وره ساعه اجت صبيحه وكعدت بالصاله وهي تسال بكوثر 

- - ها يمه شلون صار رجلج 

- - سوده عليه ماما تعبان اليوم حتى ماكدر يروح للشغل 

- - اخابر صلاح يجي ياخذه للطبيب 

- - لا ماما خلي نايم ومرتاح 

- - اندري شبي سلام بس حقه يتعب مخلص وكته بس شغل لا سفر لا ونسه الله يساعده 

كوثر // ماما غير يريد يلحك على هالدنيا 

- - لا يمه سلام همه حقه تعبه وتعب اخو يصير فال رضوى لا تشوفينه ساكت تره كلبه نار على حلال 

اخو بس ما يكدر يحجي وبس يحجي يكلوله اتزوجها تضمن حقها وانت تضمن حلال اخوك ما يروح للغريب 

كوثر // شنو هالحچي هذا ماما اصلا سلام ولا يفكر بيها

صبيحه / /. منو يكول ما يفكر بيها هو من گبل يريدها 

كوثر //لا ماما سلام يحبني ومستحيل يفكر برضوى او يريد يتزوجها هو ما يشوفها غير وحده خاينه شنو 

عبالج سلام نسى من شافها هي واخو بس هو ساكت يريد يحاول ياخذ منها حلال اخو وحلاله 

صبيحه // اي والله خطيه سلام نص تعبه صار الها وانوب جابت ابن عمها يجوز ... 

قطع كلام صبيحه الجرس وراحت كوثر وهي تكول //ها عمه شلونهم اهلج 

سهير //الحمد لله وانتم رحتو البيت خالج 

ودخلت سهير للصاله //ها اهنا ام صلاح شلونج 

- - هلا ام انمار اشلونج واشلون اهلج 

- الحمد لله يسلمون 

- الله يسلمج 

سهير فتحت تلفزبون الصاله وعلته وكوثر كلتلها //لا عمه نصي التلفزيون سلام نايم 

سهير /:يا سلام اهنا شعجب

كوثر /:اشويه تعبان وكال ارتاح اليوم

سهير/:شخيره 

كوثر /:راسه يوجعه 

سهير /:ورضوى وين 

كوثر/:عمه ما شفتها يمكن بغرفتها 

سهير // يعني كوثر اجيتي وما شفتيها 

  صبيحه // لا ما شفناها تلگينها لو نايمه لو رايحه البيت امها 

سهير/:اي هي هم حقها بس كاعده بالبيت لا تطلع لا تمشي هم الله يساعدها 

كوثر/:بس هي كاعده بغرفتها معززه مكرمه 

صبيحه /:هسه ياخذها صلاح ويونسها وترتاح تره هي هم خطيه شبعت ضيم ورادت تموت روحها

سهير /:وانوب مات فواز او ورثته ياضيم الشبعته صبيحه اشو كلنا كاعدين عدها 

كوثر /:يمه عمه سلام نايم على كيفجن 

سهير/:وانتي بالله يمته ناويه تسويبنه طفل 

كوثر /:الله كريم 

سهير /:والنعم بالله بس هم الوكت يمر ومن حقج بطفل وسلام هم لازم يفكر بقى وحيد ويرادله سند 

كوثر /:ان شالله عمه هو انا هاي اخر مرحله وره امتحانات نصف السنه احمل على مود ما باقي شويه واتخرج

وافضى للحمل والولاده 

سهير /:حبيبتي كوثر تستاهلين الله يرزقج بالولد الصالح 

صبيحه // فدوه العينج ام انمار 

وصعدت سهير وكوثر راحت للمطبخ بس كل شويه تطل عليه الظهر كعدت صليت وجابتلي غدا ما اشتهيت

 اكل بس هي جبرتني اكلت شويه ورجعت اتمددت خليت النقال صامت 

ثاني يوم رغم البيه طلعت رحت للمحل وظليت اشتري بضاعه وابيع واتصلت بفارس هو اجاني وكعدنا كلي 

-شبيك سلام 

::لا تسالني فارس رايدك بخدمه وبدون ما تسال تكدر لو اودي غيرك 

    - شلقصه سلام هيج صار الحچي 

   نفخت بقهر :: فارس اريدك تروح على علي وتكله سلام يكول اريد كل حلال فواز 

فارس /:ايي

::شنو اي تروح تكله سلام يريد حلال فواز 

فارس /:يعني اروح العلي واكله بس هاي الجمله 

::اي فارس 

فارس /:صار باجر اروحله لان اليوم معزوم ابيت عمي رحمن 

    :: مو تنسى فارس باجر تروح 

فارس /:ولو كتلي لا تسال بس تدلل 

     ثاني يوم اجه فارس وكلي بجواب علي ان شالله 

انا اتشكرت من فارس وقررت انا اروح العلي للمعرض 

رحت العصر ولكيته كاعد بالمكتب دخلت سلمت ابرود 

::السلام عليكم 

علي رد بنفس البرود وبقى بكعدته /:عليكم السلام 

كعدت وكتله ::الله بالخير 

هو رد /:الله بالخير 

::علي من الاخير انا جاي اريد حقي وحق اخوي يعني اريد حلاله ودزيت فارس وانت كتله ان شالله 

علي بكل برود //بس انا ما اعرف ياحلال هذا التحجي عنه 

::ها ما تعرف هذا الي انت كاعد بي وباقي الاملاك الي صارن من حصة ... 

علي /:ليش سكتت حصة مرته الي هي هسه مرتك 

::لا هي مو مرتي انا راح اطلكها 

علي// وشمنتظر طلگها 

::والله منتظرك انت تغسل عارك وترجع كرامتك 

- هذا شي راجعلي اغسله ما اغسله بس بمعلومك اذا طلكتها فلس ما الك يمي 

انا بعصبيه ::شنو شتكول 

علي /:مثل ما سمعت استاذ سلام انت الك يمنا تعلن زواجك ونمشي عليك ونفصلك لان بتنا خانتك ابيتك اقصد بيتها 

وهي على ذمتك الك عدنا بس الفصل واي شي غير هذا ماالك 

جاوبته ::ها هيج 

علي /:اي والله هيج كل العليك تعلن زواجك وتراوي التصوير الاهلك والباقي علينه 

جاوبته ::انت شتحجي علي انا ما اعترف لابيك ولا ابت عمك اريد حلالي وبكيفك انت وبت عمك تتباصرون 

تريد تكتلها تريد تلزم عليها جيس 

علي /:مقبوله منك وانا هذا العدي الاملاك باسم رضوى وانا ما كتلتها اريدك تطلكها او تعلن زواجك على مود 

اعرف اتصرف

::مو اكلك الزم جيس احسلك ليش هو الشرف يتاني فلوس واملاك 

علي /:والله احنا هيج كواو،،وشعدك احجي 

وكف علي وانا وكفت وكتله ::شوف ولك اكدر هسه اصيح للعمال واطلعك بالجلاليق لكن كل شي بوكته حلو 

علي /:وانت اذا تگدر هم لا تقصر تريدني اصيحهم وشوف ايطلعون منو انا لو انت 

طلع سلام وهو يتوعد بعلي وركب السياره وخابر عمته عليه 

هي كلتله /:هلا عمه هلا بيك اشل...

هو ما خلاها تكمل حاجاها /:شوفي خابري علي ابن عم بناتج وخلي يجيب لي من بتج الشريفه تنازل لا بالعظيم

 وين ما تكون اذبحها وافضحها واسمعي جية للبيت ما الج لا تخليني اسوي تصرف انتي تندمين علي

سلام سد التلفون بوجه عليه اما علي بقى صافن يفكر شيسوي وهو مقهور من كلام سلام وعليه ظلت محتاره

 تتصل على رضوى ويطلع مغلق

/////////////////////://////////////////://////////////////