رواية سراج السادة الفصل الرابع والعشرون بقلم غسق ادريس
________________
يارب الرِضا العمَيّق ، والطمأنينة الدائِمة ، وقُوّة التوكل بِك ، وجميل البشارات الآتيه مِنك. .
الحمدلله
الحمدلله
الحمدلله
سبحان الله
سبحان الله
سبحان الله
الله اكبر
الله اكبر
الله اكبر
اللهم صلِّ على محمد وآل محمد 🤍.
حساباتي اخر البارت
خلونا ويا السادة.... 🤍
" معراج "
وكفو كل الموجودين مستغربين ومافاهمين شي من كلام ايليا طلع السيد من المصلا يلبس ب شحاطته ويحجي ويا ايليا
_عبد الرؤف:: منو خابرك؟
_ايليا:: دلهب خابرني كال هما بمستشفى *
طلع الكل خلف السيد مانعرف شصار بين جادح وجزام
مشه فقار يجيب سيارته واحنا وكفنا منتظري
التفت السيد على الولد وحجه
_عبد الرؤف:: رجعو انتم انا اروح
_عبد المقتدر:: لا شلون مانروح وياك
_عبد الرؤف:: لاخليني بس انا وفقار معراج انت وايليا هم تعالو وياي
هزينا روسنا انا وايليا
والباقين رجعو للبيت بدون مايناقشون
اتوجهنا لسيارة فقار والسيد عبد الرؤف يستفسر من ايليا
_عبد الرؤف:: متأذين؟
_ايليا:: ماعرف سيد دلهب كال جاي يخيطون بروسهم
هز السيد راسة ساكت
مشه فقار طالع بينه للمستشفى درت راسي اباوع لشارع شنو صار بينهم الي اعرفه جادح وجزام اصدقاء ماتوصل للمشاكل والضرب
وصلنه للمستشفى نزل السيد واحنا نزلنا نمشي خلفه طلع ايليا تلفونه يتصل بدلهب
صاح فقار من مكانه يأشر لبعيد
_فقار:: هذول
التفتنا نباوع للمكان الي يأشر علي فقار
شفنا جادح وجزام يمشون ودلهب بنصهم انتبهت على روسهم ملفوفه
مشينه ب اتجاهم بس شافونا اجو علينه
وكف السيد كدامهم عينه على راسهم
_عبد الرؤف:: سلامتكم ولدي
_جادح:: الله يسلمك سيد
_جزام:: الله يسلمك
باوعلهم السيد ب استغراب وحجه
_عبد الرؤف:: شنو الي وصلكم لهل مرحلة
حجه جزام يأشر على دلهب الي جان مبتسم يباوع للسيد
_جزام:: الاكرع الكدامك الي وصلنه لهل مرحلة
باوع دلهب لجزام رافع حاجبه
_دلهب:: الاكرع الكدامك خال الكرك ب السيارة لاتجبرني ارجع انيمه براسك
_جادح:: وشكو جايبه وياك
_دلهب:: للاحتياط
ضحكت اباوع لدلهب مامهتم لنضرات جزام وجادح الي جانو يخزرون بي
باوع السيد الهم وحجه
_عبد الرؤف:: شنو سبب عركتكم
باوع جزام لجادح مبتسم بغيض
_جزام:: ضاج من الحق
سكت جادح بس ملامحه عاكسه انزعاجه وعصبيته
باوعلهم السيد وسكت
حجه فقار مستغرب يباوع لدلهب
_فقار:: عود صدك انت طاكهم؟
_دلهب:: ترا انا زلمه ماعايل بيهم جاي احفر ب الكبر واشوفلك من بعيد واحد جار الثاني بنص الكبور يتعاركون عفت الكبر ورحتلهم اركض حاولت وياهم يمعودين كافي. كولو يالله. ماتسوا. انتم اصدقاء. انتم حبايب. بسكم كفووو من العرايك. ماكوو وتشوفهم كل واحد شكبره مابيه افاككهم وحدي
جان الكل مركز ويا دلهب حتى جزام وجادح يسمعون اله وهوا يحجي ب انطلاق
_دلهب:: مادري شلون سبحان الله الكرك طلع بيدي جاي ابعده عنهم ومادري شلون اجه براسهم
_فقار:: عجيب
_دلهب:: اي وداعتك وانا لو ماصاحب فزعات وابن خوش ناس جان عفتهم على مادمهم خلص وماتو بس بعد جبتهم للمستشفى
_جزام:: هم لاخلفله عليك
_جادح:: تعبانك ويانا
هز دلهب راسه مبتسم والاثنين صافنين علي
باوع النا جزام وحجه يأشر على دلهب
_جزام:: جاي نحجي مامتعاركين بعدنا مانشوف غير الكرك فوك روسنا
_جادح:: انا حتى مادري شنو السبب طك جزام ورجع طكني
باوعت لدلهب اضحك
_معراج:: عمليه اختيال هاي
_دلهب:: جذابين شبيك
هز السيد راسه محتار مايعرف شيحجي مايعرف صدكهم من جذبهم
رجعنا للبيت والولد ويانا السيد اجبرهم يجون ويانا لان جزام نازف هواي دم
حسيت اكو شي صاير بين جزام وجادح بس ثنينهم محجو وفضلو السكوت حتى السيد مالح عليهم واحنا سكتنا اخذناها ب الشقه والضحك
" شاهيناز "
بعد ماطلع السيد والباقين كعدنا ننتظر رجعتهم متوترين ومستغربين شنو السبب الي دفع جادح وجزام يتعاركون واني الي اعرفه جزام وجادح مقربين لبعض محد يعرف شنو سبب عركتهم والي دفع دلهب يضربهم وينقلهم مستشفى
باوعت لقس كاعدة على القنفه تكلب بتلفونها وعمتي صافنه بس رجلها تهتز
سمعنا صوت غضنفر يتحمحم يريد يدخل عدلنا كعدتنا والعلوية لباب صاحت بي يدخل
دخل مدنك راسه التلفون بيده
كامت العلوية لباب من مكانها تحجي ويا خايفه
_لباب:: ها يمه شبي اخوك
_غضنفر:: مابيهم شي عمه خابرتهم كالو ب الطريق جايين
_لباب:: خو مامتأذي؟
_غضنفر:: لا بس مخيطين راسه اربع خياطات
دكت العلوية لباب على صدرها بقهر
_لباب:: يايمه يا ابو عماد ماعرفتو ليش متعاركين
ضحك غضنفر يهز ب ايدة
_غضنفر:: يشاقون
عكدت العلوية لباب حواجبها وحجت
_لباب:: ولك يمه يا شقه اذا راسه مخيط وب المستشفى
حضن غضنفر العلوية لباب من كتفه ومشه بيها يضحك ويحجي
_غضنفر:: لاتخافين عمه كلشي مابيهم جانو يشاقون ودلهب شاقاهم شوي ب الكرك
سكتت العلوية لباب منزعجه ومقهورة على جادح
عكدت حواجبي اهز ب ايدي عود صدك يشاقون اكو واحد يشاقه هيج
مر الوقت واحنا منتظرين رجعتهم الكل جان كاعد ب الصالة العلويات مقهورات على جادح
وعمتي على صفنتها واني والبنات كاعدات سوا نسولف
ضحكت ملاك مستغربه
_ملاك:: عود صدك الولد يشاقون هيج؟
باوعت قس لملاك وهزت ايده
_قس:: مو بس الولد حتى النسوان اتذكر مره نضال تشاقت ويا عمي ركضت ورا ب الدريل
_عاتكه:: اذته؟
_قس:: لا بس هوا من الخوف طاح ونقلو للمستشفى
ضحكت قدس تباوع لقس
_قدس:: ترا انتِ فتنتي على عمي محمد كلتي لنضال اخذ من فلوس سلفتج وهما تعاركو
دكت قس على صدرها مصدومه تأشر على نفسها
_قس:: انيي؟؟؟ انييي؟؟ جذب مو سوالفي هاي
غمزت لقس اضحك
_شاهيناز:: واحنا نشهد
سكتت قس تباوعلنه صفح واحنا نضحك عليها
سمعنا صوت السيد يحجي ويا الولد طلع غضنفر من الصاله للخارج واحنا بقينا بمكانه
دخل ايليا للصالة باوع للعلويات وحجه يسد بباب المصلا
_ايليا:: جزام ودلهب ب المصلا. يمه بلا زحمه عليج خاف اتعبج بس رايدين جاي
_رقيه:: تدلل يمه هسه اسوي
_ايليا:: فدوة لعيونج ام عاتكه
طلع ايليا من المصلا وعمتي رقيه كامت تسوي جاي
اتفرق الكل واطشرنا من الصالة
دخلنه اني والبنات للمطبخ نطبخ ونسولف
درت اباوع لقس مركزة وياها والبنات صافنات يسمعن وباي
_عطاء:: صدك تحجين؟
_قس:: اي لعد شعبالجن
_عاتكه:: عود صدك مسوية كروب ب الفيس تعلمين النسوان شلون يكشفن خيانات ازواجهن؟؟؟
رفعت قس حواجبها بغرور وحجت
_قس:: اي وهااا بفلوس مو بلاش
_حميدة:: هاي شلون؟
_قس:: رصيد رصيد
صفنت عليها متعجبه
حجيت
_شاهيناز:: واكو صدك لكفن زلمهن؟
_قس:: هههههههههي ولجن خيرررر من الله الخيانات تخيلين وحدة رجلها عسكري وشاكه بي يخونها دورت ورااا طلع مزوج والي مزوجها ويانا ب الكروب
فتحت حلكي مصدومه ومامصدكه
_ملاك:: جذبببببب
_قس:: وروح ابوي تعالن شوفن
التمينا عليها اني والبنات وهيا فتحت تلفونها ودخلت على المحادثات تسمعنا البصمات والرسائل الموجودة
باوعت لقس عيوني مايرمشن من الصدمة
_شاهيناز:: قس شلون؟؟؟
_قس:: ولجن اني معلي والله بس شوفن ربجن راد يظهر الحقيقه هيا دزت صور رجلها والثانيه موجودة وصارتلجن مكافش وغلط ب الاخير طلع الافندي متزوج الثانيه وكايل الها انا مطلك وعندي جهال ماريد احملج مسؤليتهم واذا مرتي الاولى درت اهلي راح يجبروني ارجعها علمود الجهال وانا ماحبها وماريدها وماريد اكسر كلبج من ترجع وتنقهرين
خليت ايدي على حلكي مامستوعبه الموضوع
_عاتكه:: سبحان الله شلون الله كشفه
_قس:: اي والله وعجايب عجايب بنات ثنين دخللي شاكات ابوهن يخون امهن وصدك دخلت راسلته بحساب وهمي طلع يدور بنات صغار وهوا رجال رجلي مدندلات ب الكبر
باوعت عطاء لقس ب استغراب وحجت
_عطاء:: زين شلون يوثقون بيج وهما ماشايفج حتى؟
_قس:: لا شنو ماشايفيني
_قدس:: قسسسس ادزين صورج؟؟؟؟؟؟
انصدمنا اني والبنات وقس تغم بينه
_قس:: خاب انجبن هاي صور صاحبات عمي محمد يدزن لعمي واني اغمط بيهن
_شاهيناز:: ولجججج حرامممم شلون تاخذين صور النسوان؟
باوعتلي صفح تهز ب ايديها
_قس:: اني شعلي هنا مزوجات ويدورن على زلمهن ويصاحبن يعني هنا مايخافن على رواحتهن واني ماماخذة صورهن بدون سبب ماخذتهن افيد غيري واكشف خيانتهم
_ملاك:: وفلوس ورصايد
رفعت حواجبها مبتسمه واحنا مصدومات نضحك من سوالفها
_عطاء:: الله يساعد رجلج المستقلبي
_قس:: ولا يهمج عطوئه رجلي اختاره بعنايه بس خايفه احبه واتعلق بي انوب يحب غيري وكلبة ياخذه لغيري
عطست قدس مرتين وقس صفنت عليها خاله ايدها على صدرها
_قس:: يمههه بشاهدة يعني صدك يحب غيري؟؟؟
هزيت ايدي وكمت من مكاني اكلب البتيته على الطاوة
_عاتكه:: ولج هيه عطسه
_قس:: لا هاي شهادة على كلامي
_قدس:: ولج اتحسستت حميدة فتحت الفلفل كدامي
ضلت قس مصرة على كلامها واحنا نضحك معارضين كلامها
مر الوقت والكل انسحب ماشفت جادح ابد
صعدت اني والبنات لغرفة البنات
ثاني يوم جان التاسع بمحرم جان يوم القاسم كعدنا اني والبنات من الصبح نحضر للتوزيعات والعلوية لباب والعلوية زهراء ماخلن شي ماجابنه
باوعت قس ب استغراب تحجي وياي
_قس:: انتم ماعدكم توزيعات خاصة ب الاطفال
_شاهيناز:: لا ليش هاي كلها للاطفال
_قس:: يعني نفس الشي؟
_شاهيناز:: اي الي ياخذه الصغير نفسه الي ياخذه الجبير عدنا قانون ثابت
_مهجان:: المساوة المساوة
ضحكت اهز راسي ب اي
خلصنه توزيعات وبدينا ننظف ب البيت متونسه بقس ويانا اول محرم قدس وقس موجودات ويشاركنا
بدت القراية واحنا ب المطبخ نباوع للصواني
دخلت العلوية لباب تباوعلنه
_لباب:: يلا يمه غطن وجهجن وخلن الصينيه فوك روسجن وتعالن دخلن
سوينا مثل ماطلبت العلوية لباب
دخلت اني وعاتكه ومهجان وقس وحميدة وملاك والباقيات شايلات الصواني فوك روسنا والباقين يلطمون ويرددون
" طفوها طفوها شموع العرس طفوها "
وكفنا بنص الصاله والعلوية اشرتلنا نرجع رجعنا دخلنه للمطبخ نرتب التوزيعات
كملنا توزيع الثواب وكعدنا نكمل المجلس
وكفن النسوان كلهن واني والبنات وعمتي ملتمات حول الميدان
جانت واكفه كدامنا واني خلفها بس حجت العلوية لباب هوسنا اني والبنات وعمتي بنص الميدان تدبج واحنا محاوطتها ندبج وياها
رفعت مهجان الراية وهوست بيها ب النص النسوان يلطمن واحنا ندبج
بس خلص المجلس شمرت روحي على القنفه تعبانه البنات ينظفن واني اصيح من وجع ضهري
كمت من مكاني وطلعت اريد امشي لبيتنا ارتاح دام ابوي موجود ب البيت
لبست عباتي وطلعت ماشيه للخارج
استوقفني صوت عمتي وجادح ب الحوش يحجون
جادح معصب يحجي ب صياح وعمتي ساكته تباوعله بهدوء
_جادح:: جهاد السيد اذا عرف تصير مشكله
_جهاد:: محد يعرف غيري وغيرك وغير فقار وجزام منوو ينطي علم. هااا نسيتتتت انت حجاي وجهين تروح تنقل للسيد نسيتتت
مسح جادح على وجهه باوع لعمتي وحجه بهدوء
_جادح:: انجبرت
_جهاد:: ماكو انجبرت ابو عماد كول غدرت اكلك اي مال انجبرت قديمه صارت
_جادح:: ليش ماتفهمين السيد يدري بكلشي بس ساكت
فتحت عمتي ايديها مبتسمه
_جهاد:: وهذا الاريدة اني حتى لا اطلع اتصرف بدون علم ابوي
_جادح:: جهاد كفي
_جهاد:: ما كف بعد الي سمعته من الضابط جزام كفيل يخليني استمر بهل قضيه
هز جادح راسه ساكت باوع لعمتي وحجه
_جادح:: لاتحملين السيد سبب لشي
ابتسمت عمتي عيونها مدمعه
_جهاد:: اني شاكه بشي اذا طلع صح
سكتت ماكملت كلامها مسحت على وجهه وباوعت لجادح
_جهاد:: اريدك صريح وياي بس مره وحده
_جادح:: دوم صريح وياج انا
_جهاد:: صح وغدرتك تشهد
سكت جادح وعمتي كملت كلامها
_جهاد:: من يمتى تعرف؟
_جادح:: شنو اعرف؟
ركزت بكلام عمتي اسمع الها بتمعن
نصدمت ماتوقعت الي راح اسمعها منها!!!
_جهاد:: من يمتى تعرف ابوي عنده تواصل ويا قاتل عون.!!!
" مهره "
بعد زواجي من مسلم دخلت بدوامة مامنها طلعه حسيت نفسي كبرت فوك عمري صرت اعيش انواع الضرب والاهانات والشتم صرت اتجرد من حقوقي وماكدر ارفض واعارض
جنت اشوف امي واخوي بوجهي مثل السيف جانو ويا مسلم عليه
حاولت اتقبل مسلم بكل الطرق بس ماكدرت تصرفاته جانت تمنعني اشوفه انسان صالح وجيد
من يجي اليل اخاف من ساعه النوم اعرف الي راح يصير راح يأذيني من الداخل والخارج
كل يوم جنت اعيش نفس الاذيه نفس الوجع والقهر
طلعت من الحمام امسح بدموعي ايدي على بطني ابجي بوجع شمرت المنشفه ب الكاع ومشيت ب اتجاه الجربايه اخذت تلفوني من الميز دخلت على اليوتيوب كتبت باسم الكربلائي
اول ماطاحت عيني على قصيدة باسم الكربلائي "خطار اجاني"
دخلت على القصيدة وشمرت التلفون على الجربايه
وكعدت ب الارض ضهري على الجربايه
بدت القصيدة وبدت دموعي تصب واني مركزة ويا كلمات القصيدة
طلعت كل قهري وحزني شايلته بكلبي بهاي القصيدة
جنت ابجي بحركه كلب ووجع
خليت راسي على الجربايه اردد ويا كلمات القصيدة
" خطار اجاني يا هلا بجيته "
"محلى الابو لو مر على بنيته"
مديت رجلي اشهك عيوني على الزراك الي برجلي والكدمات
_مهره:: يابه تعال شوف شسوو بيه
مسحت دموعي ابجي بهضمه
_مهره:: يابه ابنك باعني ماكال هاي اختي ووصيه ابوي ماكال هاي اختي ماعدها احد غيري
بجيت بصوت اباوع لايدي شلون محروكه
_مهره:: كتله مسلم حركني ب الخاشوكه يكلي انا معلي انتِ ورجلج لعد انت مو اخوي اذا ماشكي للك المن اشكي؟
دكيت على رجلي بقهر
_مهره:: امي تكلي لا كل شوي جايتني مابيه حيل مشاكلج
بلعت ريك وحجيت بحسرة
_مهره:: المن اشكي بعد بوية تعبت
نمت ب الكاع على ايدي احجي ويا نفسي
_مهره:: شسوي بعد ما اكدر اتحمل اني صغيرة على هاي الاذيه كلها
صفنت على السقف وابتسمت بحزن
_مهره:: البارحه حلمت ب سيد مفرقد
كبرت ابتسامتي رغم دموعي الي تجري على خدي
_مهره:: جان يباوعلي وساكت
ضحكت بصوت امسح بدموعي
_مهره:: اول مره يباوعلي هيج
سكتت مبتسمه توني جنت ابجي بس تذكرت السيد مفرقد ابتسمت
غمضت عيوني اتحسر اريد اطرده من راسي ماكدر شكد حاولت انسى ماكدرت رغم المدة القصيرة الي عرفته بيها بس ابد ماكدرت اتخطى ولايوم مر اذا ماشفته بحلم ماعرف سبب تعلقي السريع بي
بس احسه نظيف اشوفه مثل الورقه البيضه مابي خش مابي اذيه
اتحسرت بقوة وفتحت عيوني كمت من مكاني امسح على وجهي اخذت التلفون من الجربايه طفيت التلفون وشمرته
مشيت ب اتجاه الكنتور ايدي على بطني متوجعه حيل بكل مره مسلم يقرب مني تجيني هل اوجاع
فتحت باب الكنتور اخذت الدشداشة السودة وسديت الكنتور نزعت الروب ووكفت كدام المرايه اباوع لجسمي
كدامات الضرب والزراك بكل مكان
تحسرت ادعي على مسلم مو بشر لا حشر ولاجنه انسان عبالك وحش
لبست الدشداشة واخذت المشط امشط شعري كاعدة على الجربايه
طاحت الدمعه من عيني من تذكرت الي صار البارحه
من رحت لبيت اهلي ابجي من الي صار
فتحت باب الغرفه ودخلت شفت امي كاعدة على السجادة تسبح صافنه من شافتني دخلت عكدت حواجبها
ركضت عليها ابجي واشهك مقهورة ومتاذية حيل
حضنتها ابجي بصوت وهيه ساكته ماطلع منها غير كلمه
_جنان:: شبيج
رفعت راسي وحجيت من بين دموعي
_مهره:: يمه مسلم كتلني
اتحسرت مزعوجه تباوعلي
_جنان:: شسويتي
باوعتلها وزدت ب البجي
_مهره:: ماسويت يمه والله ماسويت
بعدت عنها اضرب على وجهي واصرخ صاحت بيه بصوت تسكتني
_جنان:: كافي سكتيييي اخوج نايم توا اجه تعبان
باوعتله وصحت بوجها ابجي
_مهره:: اخوي؟؟ هامج اخوي لايسمعني ابجي حتى لا يكعد واني جايه اشكيلج وابجي كدامج وعادي عندج
_جنان:: يعني شسوي مهره شسوي انتِ ورجلج اني شبيدي
خرمشت وجهي ب ايدي اصرخ
_مهره:: يمهههه جاي ياذيني جاي يموتني كتل كل يوم جاي يهين بيه تكللييي شسويييييي
دارت وجها مامهتمه تكمل تسبيح واني كدامها ابجي واخرمش بوجهي
رفعت وجهي للسمه وحجيت بصياح وقهر
_مهره:: حسبي الله ونعم الوكيل بيك محمد يا ابن امي وابوي عساك تشوفها بحضك ماتتهنى بحق شهر الحزن وبحق ابا عبد الله تتلكاه بعافيتك كون يامحمد
بعدني مامكمله كلامي واجتني ضربه على وجهي خلتني اصرخ واطفر من مكاني متوجعه خليت ايدي على وجهي ابجي بوجع ماكدر افتح عيوني بس اسمع صوت امي تصرخ وتضرب بيه ب السبحه
_جنان:: كون بحضج وبختج انتِ عساج لاتوفقتي يا مهره فوك الضيم ضيمين كون ادعين على اختج بت الجلب
ضربتني على ايدي ب السبحه بقوة واني اطفر متوجعه ماكدر افتح عيوني الضربه اجت بعيني بس البجي يجي مني
_جنان:: ولجججج مهره ادعين على اخوج ربي لاتروايها الراحة التدعي على اخوها وغضيدها هاي وحدة بت شوارع و "" "
ضليت ساكته ومارديت رغم الكلام الي الي اجاني منها بس دموعي جانت تحجي الي جنت امر بي وقتها واني اشوف امي مفرفحه على ابنها واني بتها وجاية من بطنها مانقهرت عليه ولا رف كلبها عليه
فتحت عيوني ببطىء شفتها تكعد ب الارض
شمرت حيلها على الحايط وحجت فحطانه من الصياح والضرب
_جنان:: اللهي مثل مافرفحت كلبي فرفحلها كلبها
وفعلا تحققت دعوتها بنفس اليوم
بس رجعت لبيت عمي تعاركت ويا مسلم وكتلني ووصلت لمرحلة الاغماء من شدة الضرب
بس ماشكيت ولا حجيت الامي خفت تشمت بيه وتكول حوبتي ضليت ساكته وبالعتها
كمزت من مكاني مخترعه من اندفع باب الغرفه
دخل مسلم ايده على راسه عيونه حمر باوعلي مخنزر يريد بس حجه حتى يمد ايدة
سكتت ماحجيت شي مابيه حيل بعد جسمي يأذيني من الضرب
دخل للغرفه ينافخ
درت عيوني منه وكملت تمشيط شعري متجاهله وجوده
صاح من مكانه بقوه عيونه على المنشفه الي شمرتها ب الكاع
_مسلم:: ليش شامرتهااااا ب الكاع مو اريد اسبح شلون اسبح
_مهره:: ليش انت تسبح ب المنشفه؟
شمر المنشفه بوجهي بقوة
_مسلم:: لججج ادبسززز المنشفه وصخه
_مهره:: الكاع نظيفه
_مسلم:: انا ماستنظف بيهاااا
هزيت راسي ساكته كمت من مكاني اخذت المنشفه ومشيت ب اتجاه الكنتور
فتحت باب الكنتور طلعت منشفه ثانيه مديتها اله
_مهره:: هاي جديدة
سحبها من ايدي بقوه ومشه ب اتجاه الحمام
هزيت ايدي اريد اغمه بس اخاف يشوفني حتى وهوا منطيني ظهره خاف تطلع عنده عيون بظهره
لفيت شعري كصيبه اخذت الشال وطلعت من الغرفه اركض اخاف يطلع ويسوي مشكله وانكتل والله تعبت جسمي يريد ياخذ استراحه
نزلت جوا عمتي كاعدة على القنفه تباوع لتلفزون بس نزلت باوعتلي بعدم اهتمام وحجت
_كوثر:: وين جنتي البنات وحدهن ب المطبخ
_مهره:: جنت اسبح
_كوثر:: يلا عيني ام اسبيحه كل شوي سابحه شطلعت
سكتت عنها مغلسه تغار مني لان نظيفه ادري بيها
دخلت للمطبخ شفت البنات ملتمات ملك مرت حماي اخو مسلم الصغير ساهر وروان مرت حماي الجبير جاسم ومسرة ورشا خوات مسلم
من دخلت باوعلي ماعاجبهن يخزرن بيه
ديلا اتلاكها منجن من مسلم من امي من اخوي
شمرت رشا الخضره من ايدها تزمخ
_رشا:: ست مهره تجين اخر شي من نخلص حتى لاتعبين روحج
_مهره:: عليمن لاتعب روحي هوا انتن شمسويات مركه عدس وتمن بعد وين التعب
صاحت الثانيه من مكانها
_روان:: شوف السانهااااا لعد اذا بيج خير جان اجيتي من مساع مو هسه
_مهره:: ليش وانتِ الصبح وين جنتي من سويت الريوك اجيتي انتِ وجهالج على الحاظر اتزغنبتي
شمرت جفجير التمن من ايدها واجت ب اتجاهي وكفت مسره بوجها مانعتها تتقدم وهيا تصيح
_روان:: هسه طلع السانج لعد من مسلم يمسح بيج الكاع ماتعرفين تحجين
_مهره:: وهسه انتِ هاي خالتها بكلبج لعد تذكرين قبل لا ازوج من ساهر طلكج كعدتي تتوسلين انتِ وامج بس رجعوني اخدم جهالي ماتحمل فراكهم
باوعتلي مصدومه والبنات مصدومات
دفعت مسره واجت ركضت ب اتجاهي اجذب اذا ماكو خفت لا والله خفت روان اكبر مني واضخم
بس اني رافعه ريشاتي منا والدرب
وكفن البنات مسره وملك منعاتها تتقدم وهيه تحلف تكتلني
_روان:: على الاقل ساهر محترمني ويحبني مو 24 ساعه حاطني وكاتلني كدام اليسوا والمايسوا
_مهره:: اي والله المايسوا امثالج
عاطت روان ب البنات تريدهن يبعدن وهنا يخزرن بيه يردني اسكت
دخلت عمتي كوثر للمطبخ مستغربه الصياح والغلط واني واكفه بعيد عنهن حتى الحك اطفر
زمخت عمتي كوثر ب روان تباوعلي وتباوعلها
_كوثر:: وسمممم وهرش كون شبيجنننن
_روان:: عمه هاي مهره تعير بيه شلون ساهر طلكني
_مهره:: جذابه هيه تعير بيه شلون مسلم يكتلني
باوعتلنه تهز ب ايدها كاشه بوجهنا
_كوثر:: يعني هسه ساهر احسن من مسلم لو مسلم احسن من ساهر شو الزر/اب اخو الب/ول
سكتت اني ماجاوبت بس روان بقت تنافر وتصيح كل شوي شامره حجايه
زمخت عمتي كوثر مره ثانيه ب روان خازرتها
_كوثر:: كافي روان لصمي حلكج
_روان:: لا والله شلون تعيرني هاي
_كوثر:: كتلج كافي ترا راسي يأذيني مالي خلكجن وانتِ مهره لاتضلين تشمرين ترا انتِ مو احسن منها خلينه ساكتين مانريد نحجي
سكتت ماحجيت شي وروان هم سكتت
طلعت عمتي من المطبخ واني مشيت ب اتجاه السنك اغسل المواعين الموجودة حتى لايكولون ماسوت شي واجت على الحاضر محضر
كلنا سكتنا وروان تنافخ ادري بيها محروك كلبها من كتلها طلكج بس هيه عبالها قهرتني من عيرتني ب مسلم ماتدري مايهمني صح انقهر من يمد ايده عليه كدامهم بس شسوي مابيدي شي ولاعندي الي يدافع الي ويحجي ويا ضاله بالعه موس وساكته
صبينا الغدة وكلها التمت صحت لمسلم كال شبعان
عاد اني ماهتميت اتربعت وكعدت اكل شعليه بي ياكل ماياكل المهم بطني
خلصنه الغده وشلنا السفرة طفرت روان ورشا بقيت اني ومسرة غسلت عزلت ملك الجدورة والصحونه وطلعت من المطبخ واني كعدت اغسل المواعين
درتها بس حجه حتى ماصعد للغرفه واشوف مسلم
باوعت لمسرة ترتب ب الصحونه الي اغسلهن حجيت وياها اجلف ب الجدر
_مهره:: مسرة عمي ماكال يمتى نروح لزيارة
_مسرة:: يكول هسه هوسة صايرة مابيج تزورين
_مهره:: مشتاقة ازور النجف
خلت الصحن ب الميز وضحكت تباوعلي
_مسرة:: مسلم حالف ماتشوفين النجف بعد
عكدت حواجبي اباوعلها ب استغراب
_مهره:: ليش شنو يريد يحرمني من زيارة الامام علي
_مسرة:: يمعودة اخر موقف سويتي ب النجف من رحتي دخيلة عند السادة لهسه يسولف بي
اتحسرت اهز راسي بقهر
_مهره:: اني تندمت من رحت الهم توقعت يحموني بس ابد مابدر منهم شي
سكتت مسرة ماحجت شي واني كملت اغسل المواعين صدك تندمت بيوم الرحت الهم توقعت يطلع منهم شي بس ابد خاب ضني بيهم
صح مابيدهم شي وهما مامجبورين اني اهلي امي واخوي مافكرو يحموني اطلبها من الغريب
كسرت صفنتي من مسرة حجت
_مسرة:: اليوم ب 9 اكو قراية عند ابو اثير حاجي مسلم بلكت يقبل ترحين
_مهره:: صدك اكو قراية؟
_مسرة:: اي لسيدة رقيه
هزيت راسي فرحانة اريد اطلع للقراية من بدة محرم لهذا اليوم ابد ماطلعت لمجلس راح تنتهي العشرة الثانيه واني كاعدة حابسه على نفسي
كلت ادك اليتيمه لمسلم بلكت يرضى ولو ادري بي نقمه وملل كلشي عنده لا بس كلت احاول
خلصت غسل المواعين وطلعت من المطبخ ركض للغرفه خاف عمتي ترجع تصخرني اسويلي شغله ثانيه واني مابيه هل فترة حيل تعبانه وبسرعه ادوخ واتعب
فتحت باب الغرفه ودخلت شفت مسلم منتجي على تاج الجرباية تلفونه بيدة يكلب من دخلت باوعلي بطرف عينه ماعاجبه
شمرت الشال على الميز ومشيت ب اتجاه الكنتور اغير دشداشتي بعدني ماواصله لباب الكنتور وكفت بمكاني ايدي على حلكي لعبانه نفسي
بعدت ايدي اتنفس حسيت بمرورة بحلكي
ركضت ب اتجاه الحمام فتحت الباب وركضت على المغسله اتقيىء لعبانه نفسي
رفعت راسي روحي رايحه احس اريد اتقيىء بعد بس ماكدر
بقيت واكفه اجر النفس حلكي مر
باوعت لباب الحمام ابد ماحس على نفسه ولا كال اكوم اشوفها شبيها مابيها ولاجني مرته ابد مايهتم
فتحت ماي الحنفيه امضمض حلكي واغسل وجهي
مسحت على ركبتي واتنفست بصعوبه
طلعت من الحمام مختنكه اباوع لمسلم على كعدته مبتسم يباوع للتلفون
باوعت للمراية الي ب التاج جانت صورة بنيه مصلخه جسمها تركص
اتحسرت مقهورة انسان من الداخل والخارج مستحيل ينصلح هذا البشر
تمشيت للكنتور طلعتلي دشداشة اخذتها ودخلت للحمام لبست الدشداشة وطلعت
تمشيت ب اتجاه الجرباية كعدت على الجربايه قريب منه اتنفست ب انزعاج مسحت على وجهي اهدي بنفسي
حجيت بهدوء اباوع لمسلم
_مهره:: مسلم
_مسلم:: هممم
_مهره:: مسلم ب 9 اكو قراية بيت ابو اثير خل اروح وياوالبنات وعمتي
مارد علي جان مركز ب التلفون مبتسم
_مهره:: هاااا شكلت؟
_مسلم:: شنووو
_مهره:: اريد اروح للقراية ويا عمتي والبنات
_مسلم:: كعدي وسكتي ماكو قرايات
اتحسرت اباوعله بحزن
_مهره:: مسلم والله مختنكه خل اروح عد بيت ابو اثير جوارينا قريب فدوة الله يخليك
_مسلم:: لااا كافي لاتحلين
_مهره:: الله يخليك مسلم والله ضايجه ويا البنات
باوعلي ب انزعاج عيوني مدمعه
_مسلم:: روحي خلصيني بس
_مهره:: عليك الله صدك
سكت ماجاوبني واني ابتسمت فرحانه رفعت ايدي بفرح اضحك
_مهره:: روح يا مسلم كون الله يهديك ويفتحها بوجهك
باوعلي بطرف عينه ساكت واني اضحك فرحانه توقعته يرفض بس وين ادري بي رادني بس اسكت حتى يركز ويا صور البنات عادي مو مهم خليني بس اطلع من الحجره هاي
طلعت من الغرفه انطيت خبر لمسرة اروح حتى ينتظرني نروح سوا
رجعت دخلت للغرفه شفته على كعدته مبتسم يباوع للتلفون
ركضت لجربايه انام من حسيت الدوخه اجتني
غمضت عيوني ونمت جنت ناسيه اوقت التلفون وادري بمسلم يدك بيه الناقصه ومايكعدني بس الحمدلله كعدت ب 8 وربع
فتحت عيوني توقعت راحت القراية عليه بس لاا طلع بعد وكت كمت من مكاني صليت المغرب والعشه وكعدت اسبح بس شفتها صارت ب 8:40 دقيقه ركضت ابدل
لبست الشال وجواريبي وفوك الملابس العبايه طلعت من الغرفه مسلم ماهو الحمدلله خاف يغير رأيه ويكلي ماترحين نزلت اركض شفتهن توهن ملتمات يردن يطلعن
باوعتلي عمتي وحجت
_كوثر:: مسلم يدري بيج راح ترحين
_مهره:: اي عمه
هزت راسها ساكته
طلعنا من البيت ايدي ب ايد مسرة جانت حبابه وياي قبل لا اتزوج اخوها هيه زينه وياي عكس خواتها الباقيات مسرة احسن وحدة بيهن
دخلنا لبيت ابو اثير شفنا النسوان موجودات بس الملاية ماكو كعدنا والنسوان جابن الماي والنومي
بقينا ننتظر الملاية واني محضرة دموعي جاية للمجلس ابجي واشكي اذيتي بلكت ارتاح ويخف الي بداخلي
اجت الملاية وبدت تقره واني بعدنا ب الطم ودموعي بدت تطيح على ماخلص المجلس اني ماسكت عن البجي هواي شكيت للامام وشكيت لسيدة فاطمه الزهراء والسيدة زينب الملاية كالت حاظرات ب المجلس
حلفتهن ب عزيز كلبهن الامام الحسين يباوعن لحالي اريد الله يهدي مسلم عليه ويصير خوش انسان لان ادري اني دخلت بقفص ماكو امل اطلع منه
رجعت للبيت بيدي شمعتين وتربه اخذتهن مراد من المجلس ركضت للغرفه فتحت باب الغرفه شفت مسلم كاعد على الجربايه عاكد حواجبه بيده التلفون
من دخلت باوعلي حسيته منتظرني بس يريدني اجي
قبل لا يحجي هوا مديتله الجيس بيدي من توزيعات المجلس
_مهره:: مسلم هاي جبتهن الك وهاي الشمعه الك والي و..
بعدني مامكمله كلامي واجاني راشدي على وجهي كمزني من مكاني
خليت ايدي على وجهي مصدومه بساعتها طاحت دمعتي من عيني
باوعتله وحجيت بقهر ابجي
_مهره:: ليش؟
جرني من ايدي ضاغط على معصم ايدي بقوه
_مسلم:: مو كتلج اكوي دشداشتي عندي طلعه
_مهره:: لا والله ماكتلي
جابني براشدي ثاني على وجهي يصيح بقوه لازم دشداشته بيده
_مسلم:: ولجججج الدايحة بس ردتي اطلعين تخورين ب الشوارع
_مهره:: رحتتتتت لقراية الامام الحسين
_مسلم:: شالج الامام الحسين
دفعني من صدري وطلع من الغرفه الدشداشه بيده
باوعت لشموع ب الكاع والتربه بعدها ب ايدي بجيت بصوت اشهك
ادري بي مو خوش انسان بس اني احاول اصير خوش ويا بلكت يمشي صح
كلت بلكت اذا تقبلته اعيش ويا احسن من عيشتي ويا اهلي بلكت يعوضني بس ابد مسلم مستحيل انسان مو صالح للعيش
مر يومين واني ابد مو زينه العبان نفس ماعافني كل ماشكي لعمتي تكلي مابيج شي ماشكيت لمسلم ولاحجيت ويا بعد
جنت كاعده ويا البنات ب المطبخ شامره حيلي على الحايط اجر النفس بصعوبه توني طالعه من الحمام بعد ماتقيئت وطلعت روحي
دخلت عمتي للمطبخ بيدها علاكه عليها على صيدلية شمرتها عليه
باوعت للعلاكه معقولة رئفت بحالي وانقهرت وجابتلي علاج لمرضي
فتحت العلاكه عكدت حواجبي وباوعت لعمتي
_مهره:: عمه هاي شنو؟
_كوثر:: اختبار حمل كومي شوفي شاكه بيج حامل
باوعتلها صافنه
بلعت ريك احاول استوعب كلامها لا مستحيل حتى مامر شهر على زواجنا يمتى لحكت احمل
جنت رافعضه اسوي الاختبار واتحججت ب اني مريضه من الشغل والدوخه بس عمتي رفضت واصرت اسوي الاختبار
دخلت للحمام ابلع ريك واضرب صفنات حتى ماتذكر يمتى اخر مره اجتني الدورة
سويت الاختبار وجانت الصدمه والي ماجنت متوقعته ولا راسمه ومفكره بي
اني حامل!!!!!
" قس "
كضينا ببيت السادة احلى ثلاث ايام محرم عدهم مو مثل محرم عدنا شهر محرم عدهم مثل الفاتحة الحزن يخيم على وجههم اكثر من مره سمعت السيد عبد الرؤف يقره للامام الحسين ويبجي بحزن واذية
وكفت كدام المراية اعدل شالي وقدس خلفي تريد تبجي ماتريدنا نروح بس خلص هواي طولنا
بكل مره نريد نرجع لاهلنا السادة يمنعون والسيد يحلف يزعل على عمي اذا راح وعمي من خجله يكعد ويسكت رغم حتى عمي جان متونس على بيت السادة وسالفهم واجوائهم
صفنت راجعه بذاكرتي لاول يوم اجينه لبيت السادة
اتذكر بيوم الطبخ طلعت من الحمام الخارجي اعدل بملابسي
وكفت كدام المراية خاف شعراية مني طالعه هنا هواي يقدسون الشعر والستر
باوعت لشالي مرتب مابي شي عفيه عليج قس خوش مستورة اي هيج ستري روحج ولو انتِ مستورة من كاعج صدقه لهل خلقه الحلوة
دزيت الروحي بوسة اباوع للمراية واغمز لنفسي والله عمي حلوة اني شو جني كمر بس جيب اليقدس جمالي
باوعت من المراية شفت السيد معراج يطلع من المصلا بيدة التلفون مشه مامنتبه كدامه بس اني مركزة اباوعله ب المراية والخطواته
جان كدامه جدر جبير وهوا يمشي عيونه ب التلفون مارفعهن ابد
كمزت من مكاني من عثر ب الجدر طايح على وجهه والتلفون طفر من ايدة
صحت من مكاني بدون قصد اباوعله ايدي على راسي
_قس:: الله الله الزهره تحرسك
ماجان منتبه الي ولا يدري بيه موجودة من حجيت عدل نضراتة يباوعلي مستغرب
باوعلي بنضره سريعه وكسر عيونه
باوعتله ماريد اضحك على طيحته انوب لايشور بيه
_قس:: ها سيد اصيحلك واحد خاف مابيك تكوم
ابتسم وهز راسه بلا يكوم من مكانه
_معراج:: لا لا مابيه شي
باوعتله ساكته وهوا كام ينكت بدشداشتة باوع التلفونه دنك ياخذه بعده ماواصل اله وطاحت النضارة من عينه
توقعته مايشوف بدون نظارته لان دوم بعيونه اي حقه دكتور تلكو مخلص عمره يدرس وعيونه ناطه على الكتب اكيد نظره على كده
دنكت اخذ النظارة من الارض لان جانت قريبه على رجلي توني الكفها من الكاع وصارت ايده فوك ايدي
بعده ماواصل لايدي بعدت عنه بسرعه
اخذ النظارة من الكاع مصغر عيونه مسح النظارة وخلاها بعيونه
دنك على تلفونه اخذه من الكاع يباوعله
خاف منكسر
صفنت اباوعله ماعرف شجاني حسيت موقف طيحته نعاد براسي شلون جفت على الجدر وقوس ضهره
عضيت شفايفي ماريد اضحك قس بلا خفه عيببب
قس كافي يلا بعدين ضحكي مو هسه خليت ايدي على حلكي اباوع للسمه شكد حلوة لونها ازرك فاتح
باوعتله ماهتم رجع يكمل طريقه بس هل مره ماكدرت اسيطر على نفسي من عثر بنفس الجدر ملطوم على وجهه
هنا ماكدرت ضحكت بقوه اباوعله شلون انبطح كدامي
خليت ايدي على حلكي اريد اسكت ماكدر وهوا مصدوم يباوعلي
مسحت على عيوني اهدي بنفسي واحجي بضحك
_قس:: الله الله
بعدت ايدي عن وجهي باوعتله يباوع للجدر مصدوم من شفته نضراته جنه يعاتب الجدر
رجعت اضحك علي
اباوعله كام من مكانه ينكت التراب من ملابسه ساكت من شفته هادء استحيت على نفسي وسكتت
تحمحمت اباوعله بخجل
_قس:: الله سيد خو ما تأذيت
هز راسه بلا بدون مايباوعلي
_معراج:: لا لا مابيه شي
_قس:: احمم ترا والله مو قصدي اضحك
ابتسم بدون مايباوعلي هز راسه وحجه يضحك
_معراج:: لا عادي.
دنكت راسه ومشه يريد يطلع من البيت
مسحت على وجهي وابتسمت
رفعت راسي اباوعله بعده ماواصل للباب وعثر بالصبه
بسرعه دار يباوعلي مصدوم
خليت ايدي على حلكي وحجيت كاتمه ضحكتي
_قس:: ماضحكت والله
ضحك هوا يباوع لدشداشتة
_معراج:: لا اكيد الغلط ب الدشداشة
_قس:: لا والله برجليك
_معراج:: ها؟
_قس:: ها؟
عكد حواجبه مافاهم
_معراج:: شنو؟
_قس:: اكلك الدشداشة طويلة تحتاج كفه لهذا جاي تعثر بيها
هز راسه مأيد كلامي يباوع لطول الدشداشة ضحكت بسكته ومشيت ادخل للمطبخ
هذا حيل فطير واستحي اكول فاهي لان سيد واحتمال يشور بيه
توني ادخل للمطبخ اريد اسولف للبنات واضحكهن ماحس غير عاثره ومنجبه على وجهي ب الجدورة اسمع بس صوت البنات يصيحن الله
واني ب الكاع صافنه على الكاشي ارمش بعيوني شبسرعه دارت الدنيا توني اضحك علي
كومني البنات من الكاع واني صافنه صدك والله السادة يشورون بحيث مامرت ثواني ودارت الدنيا بيه وشور بيه هاي لان كلت فاهي
رفعني البنات من الكاع يضحكن واني اخزر بيهن ماراضية شلون يضحكن عليه هوا صح اني توني فاطسه ضحك على السيد معراج بس ترا اني غير واختلف؟؟
_قدس:: اكلج ليش ماتضلين يمي الاربعينيه
كسرت صفنتي من قدس حجت
باوعتلها وحجيت اهز بايدي
_قس:: لا عيني ماتنجبين
_قدس:: شبيج شكد حقيرة
_قس:: انجبي اريد اتعلم اخذ خيرة
باوعتلي قدس صفح عاوجه حلكها
_قدس:: هيه بس هاي ضلت ماسويتها
_قس:: لابعد اكو هواي اريد اتعلم احف واصبغ
هزت ايدها ماراضية غميتها عشتو ماعاجبها العجب بس والله هاي علامات الغيرة حتى الخوات يغارن اني من اكول الناس مايتمنولي الخير اطلعوني جذابة
باوعت لقدس واشرتلها
_قس:: يلا امشي خل ننزل
_قدس:: هسه ماتضلين؟
_قس:: ولج ماضل شبيج انتِ باب رزقي هناك منتظرني اني صالي ثلاث ايام نوم مانام اريد ارجع افتح مشاريعي
تأففت قدس ضايجه ماتريدني ارجع شكد توسلت بيه هيه والبنات بس ضلي بس اني ابد ما ارتاح احس روحي ثكل رغم اعرف السادة مايفكرون هيج بس بعد اشوفه عيب
نزلت اني وقدس جوا شفت العلويات ملتمات حول نضال يقنعها تضل وهيه تتعذر منهن مستحيه
بيومها طلعنا من بيت السادة بعد ماودعت قدس و العلويات والسيد عبد الرؤف حتى واحنا جاي نصعد السيارة ضحك يباوع لعمي
_عبد الرؤف:: باجر عدنا طبخ كلت لو تضلون اليوم نحتاجك ويانا باجر
ضحك عمي محمد يتسالم ويا السيد صعدنا بسيارة غضنفر ياخذنا للكراج رغم غضنفر رفض واصر هوا يوصلنه بس عمي طلع عذر انو صديقه سايق ب الكراج وهوا متفق ويا عمي يوصلنه
وصلنه للكراج وتوادعنا ويا غضنفر
اخذنا سيارة ورجعنا لديوانية خليت راسي على كتف نضال مبتسمه
تذكرت موقف صار ويانا من طلعنا اني ونضال نزور الامام علي
طلعت امشي خلف نضال وهيه خاله ايدها على راسها من الخلف
_نضال:: ماجاي اشوف قس عيوني غوشت
_قس:: تعاي كعدي لاطيحين
سحبتها من ايدها مكعدتها وهيا تغمض بعيونها تعبانه ضغطها فول
باوعت من بعيد السيد غل جاي يمشي ب اتجاهنا جنت مركزة ويا خطواته
وكف كدامنا يباوع لنضال مستغرب
_غل:: سلامات شبيج يمه
حجاها موجه كلامه لنضال من احترامه ولان نضال جبيرة ب العمر يكلها يمه واني بكد زرها اكلها نضليه صدك اختلاف اخلاق لا اكثر ولا اقل
باوعتله اني وحجيت من مكاني
_قس:: ضغطها صاعد
بدون مايباوعلي حجه
_غل:: وين العلويات كومي يمه اوديج مستشفى
_نضال:: لا يمه سيد مشكور هسه اصير زينه مابيه شي
_غل:: كومي حجيه سيارتي قريبه
_نضال:: لا والله مابيه شي
_غل:: ابدد يلا كولي يالله
باوعتلي نضال اشرتلها كومي لان حيل تعبت وهيج تتاذى كامت من مكانها واني عاينتها
مشينه خلف السيد غل وهوا كل شوي يدور يباوعلنه بطرف عين يخاف نضال تطيح
وصلنه لسيارته صعدت اني ونضال وهوا طلع بينه للمستشفى ونضال خاله ايدها على عيونها
وصلنه للمستشفى نزلنه هوا دخل واحنا خلفه دخلنه لردهه النساء اجت الدكتورة شافت نضال
_:: ضغطج صاعد حجيه
_نضال:: اي دريت بي صاعد
_قس:: سودة بوجهك عمي ادري بيج انقهرتي من شفتي يباوع للايرانيه
كرصتني نضال من زندي واني صحت متوجعه
_قس:: اخخخ هااا نضيله هاااا
_نضال:: كفيني شرج
_قس:: ضغط وسكر وخفقان لامتهن لم حقه يدور عليج
شفتها نزلت تاخذ الشحاطه طفرت من مكاني وطلعت من ردهه النساء
جان السيد غل كاعد على الكراسي بيده السبحه يسبح بدون مايرفع عيونه ويباوعلي اشرلي على الكرسي
_غل:: كعدي خوية
باوعت للكرسي فاصل بين كرسيه ثلاث كراسي
كعدت على الكرسي صافنه اهز برجلي رفع راسي يباوع لارجاء للمستشفى واني صافنه اباوعله
عيونه مثل لون عيون جادح بس افتح ومايلات للزراق وهوا اضعف من اخوانه وطويل
حتى بشرته بيضه ارومشه كثيفات لحيته مرتبه
كلشي بي كامل مكمل
واني صافنه اباوعله ومركزة بملامحه دار عيونه يباوعلي
بلعت ريك من صارت عينه بعيني ماعرف ليش توترت لون عيونه الفاتح خلاني اتوتر ماعرفت اركز بعد هوا دنك راسه واني دنكت بقيت افرك ب ايدي متوتره ومستحيه
بس خلص مغذي نضال وصارت احسن رجعنا لبيت السادة واني بعدني افرك ب ايدي كل شوي تصير عيني على غل اباوعله من مرايه السيارة
قبل لاننزل من السيارة رفع عيونه فجأة ورجعت تكررت بينا النضرات رغم هوا جان يكسر عيونه ومايركز بس اني عيوني بدون قصد تاخذني اباوعله واصفن علي
رجعنا لبيتنا واني ركضت للغرفه شمرت روحي لثاني يوم كعدت تعبانه جسمي متكسر من النوم
كمت من مكاني امسح بعيوني طلعت من الغرفه ونزلت جوا غسلت وجهي وكعدت على القنفه صافنه اباوع لتلفزون اباوع كارتون ويا ابن باسم الصغير علي
طلعت نضال من المطبخ كعدت على القنفه تباوع ويانا طلعت شخصيه ب الكارتون شخص طويل لابس مثل العباية السودة مغطي جسمه ووجه ابيض بيدة فاس
ابن باسم بس شافه كعد يصفك فرحان
باوعلنه واشر على التلفزون
_علي:: هذا يشبه صديقي
_نضال:: ياصديقك ولك
_علي:: عندي صديق محد يشوفه بس انا ينام ب كنتور الملابس وجوا الجربايه
فتحت حلكي متشنجه ملامحي كلها صافنه ماكدر ارمش ونضال صافنه وياي شفايفها ب حلكها
باوعنه لعلي فرحان يباوع لباب الغرفه ولتلفزون يأشر سنحت من الخوف مابيه اعبر عن مشاعر الصدمه الي جاي امر بيها
دنكت نضال تاخذ النعال من رجلها تريد تكوم على حيلها مابيها شالت النعال من رجلها وشمرته بوجه علي ابن باسم
_نضال:: انعل ابوك لابو صديقك كوم من يمي لا اطكع القندرة على راسك انت وصديقك
_قس:: من ردت ابيعه صار عزيز هاج استلمي طلع عنده اصدقاء جوا الجربايه وب الكنتور دخيلك ياربي اذا ماتكفني شر هذا الفرخ موته تصير على ايدي
ما اهتم علي وضل يضحك ويا نفسه
باوع لنضال وحجه بغضب
_علي:: ترا صديقي زعلان منج
خليت ايدي على صدري اريد اكوم من مكاني انوب لايطلع زعلان مني هم
باوعتله نضال صافنه بخوف
_نضال:: ليش زعلان
_قس:: اللهم عدهم الى مساكنهم يارب يارب
اريد اجر نفسي ماكدر من شفت علي يباوع لنضال مخنزر عيونه عرفت السالفه نلاصت الولد شفط ونضال شفطت ويا تصرخ خايفه
_نضال:: يمهههههه بسم الله الرحمن الرحيم
_علي:: سكتييييييي
_نضال:: يبويويييييييي
كمزت من مكاني ازحف على الكربي ونضال تصرخ صاعدة على القنفه
اجو اخواني ونسوانهم يتراضكون وعمي محمد مصدوم من صريخ نضال
صفنو على علي وحركاته الغريبه وشلون يباوع لنضال عيونه حمر
اباوع لعمي محمد جاب علي براشدي طفه عيونه من مكانهن ونضال تلطم على راسها
_نضال:: ولكككك اني شعلي زعلان مني هاي قس مو رادت تبيعك
_قس:: عساج بمرة رجل عيونها زرك وشعرها اشكر يانضال شكو تذكري يجوز الولد ناسي
كمز باسم ومرته على ابنهم من ضل يبجي من وجع الطكه واني واكفه على الدرج مصدومه
الهبطه الاخذتها هسه ماصايرة هذا علي لو ناصب علينه لو الولد تخبل
بيومها نضال مانامت من الخوف ولا اني كل ماتذكر سالفه صديق علي انهبط مانمت على ماطلع الصبح
الخوف احتلني خفت لا الي جان يصير بينه رجع مره ثانيه!!!!
" قدس "
بيوم العاشر من محرم رجعو السادة طلعو الجدورة مره ثانيه لطبخ للامام الحسين بس هل مره داخل البيت ب الحوش ودلهب وجزام ماشاركو ب الطبخ
جنت اشوفهم ملتمين سوا يطبخون ودموعهم تصب على خدهم لمصاب الامام الحسين
جان فقار يقره قصيدة
" يامحلى الوداع بهل مسية "
والباقين يطبخون ويمسحون بدموعهم والعلويات نفس الشي بهذا اليوم الحزن مجتاح الكل واكثر شخص جان حزين هوا السيد عبد الرؤف جان يبجي مثل وكأنو الي ميت شخص من اهله وعزيز على قلبه
جنت كاعده ب المطبخ ايدي اباوع للغضنفر من بعيد يغوط بجدر القيمه رفع راسه صارت عينه بعيني ابتسم بوجهي واني رديتله الابتسامه
باوع حلوه شاف الولد ماموجودين اشرلي ب ايده اجيه
كمت من مكاني ومشيت ب اتجاهه
_قدس:: ها غضنفر
_غضنفر:: تعاي خوطي وياي واخذي مرادج
باوعت للجدر رفعت راسي اباوع لغضنفر
_قدس:: شلون
_غضنفر:: تعاي
سحبني من ايده خله ايدي وخله ايده فوك ايدي وكعد يخوط ب الجدر وهوا يحجي
_غضنفر:: " احنا غير حسين ماعدنا وسليه"
"والذنوب هواي جفتها ثكيله"
"وغدن يبدو لنا سدن منيعى"
"هذه ارأنا فيه جميعا"
"والذنوب هواي جفتها ثكيله"
"احنا غير حسين ماعدنا وسيله"
جنت مبتسمه اسمع لصوت لغضنفر وهوا يحجي
سكت ورفع راسه
_غضنفر:: يا ابا عبدالله اريدك تحفظ مرتي الي وتعافيها من كل داء وتمسح على كلبها ماريد يمسها اذيه بيوم وخليها الي
ابتسمت فرحانه اريد ابجي من كلامه
اخذ ايدي ورفعها
_غضنفر:: يا ابا عبدالله اريد السنه الجايه طفلي بحضن امه ونذر علي لو اجاني ولد اسمي حسين ولو اجتني بنيه اسميها زهراء
درت اباوعله عيوني مدمعه ضربته على صدرة بخفه ابجي
_قدس:: مو كتلك لاتخجلني
ابتسم غضنفر يباوعلي واني فرحانه بكلامه اريد اطير بداخلي اتمنى كلامه يتحقق
دخلت للداخل من دخل جادح بيده ابنه عماد
ابتسمت اباوع لعماد مثل ابو لابس دشداشة سوده وكاعد يساعد وياهم
التهيت اني والبنات ب الطبخ
واذني تسمع لفقار وهوا يقره قصايد
ماعرف شنو اوصف صوته والبحه الي تطلع منها الكلمات لاحظت ببيت السادة كلهم اصواتهم حلوة حتى العلويات
دخلت للمطبخ احجي ويا شاهيناز
_قدس:: شاهيناز وين عمتي جهاد؟
_شاهيناز:: مادري اعتقد ب المصلا
مشيت ب اتجاه المصلا وشاهيناز خلفي
فتحت باب المصلا شفت عمتي جهاد وعاتكه كاعدات ب المصلا واكفات كدام الرفوف من دخلنه دارن يباوعن النا
_قدس:: عمه
_جهاد:: هاا
_قدس:: السيد يكول...
بعدني مامكمله كلامي وسمعنا صوت صريخ جاي من الخارج درت اباوع ب اتجاه المطبخ كلها طلعت تركض للخارج والعلوية لباب تصرخ بقوه
بعدني مامستوعبه الي صار طلعت العلويه جهاد تركض والبنات خلفها واني وراهن ايدي ترجف من سمعت جادح يصرخ
دخلت للمطبخ وركضت للباب الخارجي المربوط ب المطبخ
انصدمت جسمي يرجف ماكدرت اتحرك من صدمتي من شفت عماد طايح ب الارض والجدر الجبير طايح
علي ماخذ نص جسده ب فورانه !!!
شكرا لزيارتكم عالم روايات سكيرهوم
