رواية بنات الحجي السعيد الفصل الرابع والعشرون بقلم شمس العراقية
ليال ـ گملت شغلي وأني مطفيه على الأخير وميته نعس من يوم عقدنا وراح الدوام يضل سهران يحجي وياي وكال من ينزل نروح نعقد بالمحكمه .
طلعت من الحمام لگيته حارك الدنيا شگد ما عنده صبر جاوبته ها ليث .
ليث ـ ها روحي وينج ساعه صارلي أتصل
ليال ـ جنت أشتغل ما أدري هسه اجيت .
ـ راح أوصل
ـ ليش رجعت مو گلت بعد يومين
ـ لا خلص دوامي
ـ هو ليش هيج صار دوامك مو جنت ما أداوم كل الأسبوع
ـ بس هل الشهر وهذا هم حظي من أنجمعت بيج تغيير حتى بهاي عكست وياي .
ـ لا ما تعكس وياك أن شاء الله
ـ شطابخه غده
ـ دولمه
ـ أويلي أريد منها حسبتي حسابي
ـ حتى لو ما حاسبه تعال أخذ الجدر گله
ـ أحبج
ـ وأني هم ، يله من تجي ادزلك ماعون
ـ لا دزيلي أني أجي أخذ وأشوفج
ـ تمام ورجعت عالسريع رتبت نفسي وطلعت وسمعت صوته شبسرعه وصل ، رحت المطبخ طلعت خبز ودخل
ـ عوفي صدگتي جاي على الدولمه أني جاي عليج .
ـ لا اصبها علمود تبرد تقرب سحب أيدي وباسها وصافن بوجهي وأني مستحيه من قربه
ـ شتاقيتلج
ـ أخاف جواهر تجي لان سمعت من جديتي اليوم تجي
ـ عوفي الخوف وباوعيلي أريد أشوف نفسي بعيونج الاحبهن ونظراتج المليانه حنينه وبرائه وخجل وكلشي يحبه گلبي موجود بيج .
ـ باوعتله والرجفه بيه گبل حضني ويبوس بشعري حضنته بإمان أحس شكو تعب بيه تلاشى بحضنه باسني من كصتي وحاضني مثل الطفله .
ـ يله أني اروح البيت ومنتظر الدولمه مالتج .
ـ تمام راح ورجعت لازمه گلبي ومبتسمه وصبيت الدولمه واجتي عمتي عمه اروح اودي لبيت عمي وارجع اخاف جديتي تسأل عليه .
نجاح ـ لا جاي تصلي روحي حبيبتي .
ليال ـ عدلت شالي وصلت وطلعلتي ياقوت
ياقوت ـ خير .
ـ عمتي وين
ـ ما موجوده شتردين منها .
ـ ردت أحجي وأجه ليث أبتسملي وأخذ الماعون من أيدي
ليث ـ ياقوت أصعدي على نغم .
ليال ـ صعدت وهو صافن عليه يله أني أروح
ـ وين هسه أجيتي ، كعدي تغدي وياي لأن ماكو أحد أمي وأبويه رايحيين فاتحه من كرايبنا
ـ أخاف أبويه يسأل عليه
ـ لا ما عليج ، تتغدين وياي .
ـ لا خليني أرجع احسن عود غير مره
ـ براحتج حبيبي خليني اشوف طعمها وأنطيج رأي
ـ أكل منها ها طيبه
ـ عاشت أيدج أكيد طبخج بعد شلون مو طيبه
ـ بالعافيه تقرب عدل شالي وباسني من خدي وأني أبتعدت بسرعه بس ارجف وموتره يله أني اروح مشيت ولزم أيدي منعني
ـ ليال ليش تخافين
ـ مو أخاف بس ما أدري أتمنى تفهمني
ـ فاهمج بس أحس هالخوف مني بس
ـ لا مو منك والله
ـ متأكده يعني ما خايفه مني أحسج بعدج ما مأمنه بيه ، وبعدج مقهوره وزعلانه مني .
ـ ليش سويته بيه قليل
ـ أدري والله أدري وياريت يرجع الزمن
ـ بعدين نحجي بهذا الموضوع
ـ من تجين يمي نحجي بي لوحدنا .
ـ تمام طلعت من يمه وهو ضل يباوعلي بنظرات مليانه اسئله ادري بي جاي يحاول ينسيني بس اكو جروح ما تنسي بسهوله .
للظهر بعد ما راسلته ولعصر كعدت لگيته دازلي رساله
ليث ـ بالليل نطلع نتعشى أني وياج لازم نحجي
ليال ـ بشنو نحجي
ـ باللي مخوفج مني ومخليج تبتعدين عني صارلنا أيام من عقدنا وأحس بإحساس مخوفني .
ـ بس أني ما خايفه منك
ـ لا خايفه والخوف واضح عليج خايفه لا أعوفج
ـ لا ، ليش أبالك تعوفني مره ثانيه
ـ عفتج مره وما أعوفج بعد بس دايخ بيج
ـ بشنو دايخ
ـ ليش تخافين مني
ـ عبالك ما مأمنه بيك مو
ـ أي
ـ لا مو هيج ليث
ـ لعد شنو يا روح ليث
ـ الخوف البيه مو معناها ما مأمنه بيك ، بالعكس أنت أكثر شخص أمن بي بغض النظر عن اللي سويته بس شعور الأمان الوياك ما فقدته حتى من أنفصلنا ضل مثل ما هو .
ـ هسه فهمتج يا روحي أنتِ
ـ شعجب ما فهمتني من الأول
ـ ربطت الماضي بالحاضر وأعرف بنفسي مذنب لهل السبب كلت يجوز ما مأمنه بيه بس هسه وصلت ولاتخافين أني أعرف طبيعيتج وأحترمها وهذا الشيء مقدس عندي .
ـ ماشي بالليل بيش ساعه علمود أتحضر
ـ نطلع من وگت
ـ ماشي راح ولليل تجهزت ولبست فضافض ولبس مرتب لأن اعرف طبيعته يعلق من الأول البس علمود لا يطلع الطلعه من خشمي وهنا ساعتين زمان خلصانات ما تسوى الزعل .
طلعت وهو بلغ أبويه واكفين باب الحوش وهو يضحك شبيك .
ليث ـ أمي ، يمه شسالفه .
ليال ـ باوع وضحك عمتي تباوعلنا من ورى الباب وتضحك وأجتي باوستني
سلوى ـ والله من فرحتي بيكم والله ما مصدگه عيوني أنت وياها تمشون سوى ، ربي يحرسكم ويدوم حبكم
ليال ـ أمين يارب ويحفظج النا عيوني عمه
سلوى ـ فدوه لهل الوجه الحمدلله رب العالمين ما فشلني وصرتي من نصيبه ولو هو ما يستاهل بس يله سامحي عمه سامحي خطيه لخاطري .
ليال ـ تحجي وتباوعله وهو صافن عليه سامحته عمه لخاطرج ولخاطره هو هم .
سلوى ـ تسمع زين يله يمه دير بالك عليها على كيفك بالسواقه ونسها وتدللها وعوضها ما اوصيك بعد عليها هاي ليالي فتحه الگلب .
ليال ـ طلعنا وهو تباوعلنا وفرحانه يربي شگد أحبها وتقرب لزم أيدي وأحلى لحظات العمر اني وياه بسياره وايدي بإيده وتعشينا وأفترينا وما عاف أيدي ولا لحظه
وأحنه نمشي ليث .
ليث ـ ها روحي
ـ الزلم
ـ وينهم
ـ خليني أكمل كلامي
ـ شمدريني عبالي أكو زلم يباوعون
ـ لا وأنت خايف لا أحد يباوع
ـ أي والله أي گملي شبيهم الزلم .
ـ أقصد الزلم مو كلهم من يطلعون يلزمون أيد نسوانهم وأصلاً بيهم يستحون عود ليش وأكو بيهم لا
ـ كلمن وطبيعته وأذا ما يلزم إيدها مو معناها ما يحبها لا هذا مو مقياس بس هاي طبيعه كل شخص وأني طبيعتي وياج تختلف لان أنتِ مو بس زوجتي أنتِ گلشي بحياتي لو بيدي أحطج بگلبي مو بس الزم إيدج وهسه خل نمشي ما أتحمل بعد المكان صار أزدحام غيرتي عليج فولت ، أمشي .
ـ سحبني ونمشي سريع ومن احد يعبر من يمي يسحبني عليه ويباوع عليه بنظراته وصلنا السياره وتنفس طبيعي لان جان متشنج طلع جكاره ودخنها مو وكتها هسه .
ـ ليش تضوجين منها
ـ لا أحبك من ادخن بس مو وگتها ، گبل طفاها وذبها
وطلعنا للبيت ويسوق ورفع أيدي يبوس بيها وأني صافن عليه ياربي حبه وحنيته شلون فرط بيهن شلون گدر يعوفني وهو هيج يحبني وحبه اليه ما ينوصف
وصلنا ودخل السياره للبيت ونزلنا وياقوت شايله نغم واكفه هو باوعلها وحسيته أنزعج .
ياقوت ـ بس تبجي ما سگتت تريدك .
ليث ـ هيج وگت هي نايمه ليش اليوم ما نومتيها
ـ هي ما نامت بس تبجي
ـ تعالي بابا شبيج
سلوى ـ أمشي أخذيها نوميها .
ليث ـ لا عوفيها يمي .
ليال ـ حسيت ياقوت متعمده لان نظراتها تشرح گلشي يله أني اروح تصبحون على خير .
ليث ـ وين بعد وگت أمشي نكعد وأعرفج على نغم مو بابا يله تعالي .
ليال ـ مد أيده وسحبني ودخلنا الأستقبال وياقوت تباوعلنا دخلنا كعدت بصفه وبنته بحضنه مبين عليها نعسانه گبل حضنته واسمع صوت عمتي عصبيه .
ليث ـ شو نمتي بابا ، ما تعارفتوا .
ليال ـ بعدين نتعارف لزمت إيديها وبوستها هلاو نغم أني ليال تباوعلي ومبتسمه فدوه اروحلج يعمري أسولف وياها هو يباوعلي وخليتها بحضني وساكته زين ما أستغربت مني .
ليث ـ لا زينه وين يصح الها هيج حضن بفلوس أشتري
ليال ـ ما جاوبته لان خجلني واجتي عمتي جابتلنا جاي وكيك وماعون فواكهه وكرزات مشكله شنو هالزحمه عيوني عمه تعبتي نفسج .
سلوى ـ لا يعيون عمتج تعبج راحه شجايبه الج قابل جيبيها أخذها أنومها تعالي جده .
ليال ـ أخذتها وراحت وردت الباب وراها وضلينا بس أني وياه متت من الخوف وكشرت تفاح وتقدم هو أكلها من ايدي وباسها وسحبني قربني لحضنه راسي على صدره رغم الخوف والرجفه بس أمان الدنيا كله لكيته عنده صافن بوجهي ويمسح على وجهي هواي تباوعلي .
ـ صارلي عمر أباوعلج ليش يا يوم ما باوعتلج
ـ أي صح حتى وأنت متزوج تباوعلي .
ـ ولا يوم ما باوعتلج فكرة ما اشوفج ما تخليني عايش
ـ ماطول هيج تحبني ليش عفتني
ً ـ غبي جان عبالي
ـ شُنو عبالك
ـ هيج عوفي الموضوع بعدين نحجي بي خلينا هسه عايشين اللحظات الحلوه ما أريد أفرط بيها وأزعلج مني وأني هواي زعلتج .
ـ باسني من كصتي ، يله لازم اروح تأخرت الوقت ابتعدت من حضنه وتوترت وأنخبصت وهو مبتسم على حركاتي ومخلي ايده على كصته ويضحك .
ـ يله گومي أوصلج بس تعالي أحضنج يله أخليج تروحين
ـ حضني بقوه وصلني لداخل البيت تصبح على خير .
ـ بس أغير ملابسي وأشوف نغم وأخابرج
ـ تمام ، دخلت البيت نايمين وغرفة جواهر فارغه ما اعرف ليش هلگد طولت يم أهلها يمكن زعلانه وتريد أحد أو أبويه يراضيها يله اجتي بوكتها لا تخرب فرحتي وكلش مرتاحه محد يتحكم بيه وگلشي براحتي وما يهمني بعد دام الله عوضني وملگت الأنسان الأحبه .
نحجي كاميرا مخلي رأسه عالمخده ويباوعلي بغرفتك فوك مو
ليث ـ لا نايم بغرفتنا
ليال ـ أبتسمت وتذكرت ذكريات من الماضي
ـ غرفتنا الجوه جنت ناوي نتزوج بيها وهسه نايم بيها بس ناقصتج يله ما ضل شيء وأجيبج يمي .
ـ من يحجي شيء يخص الماضي يختنك حتى نبرته تختلف حيل مبين عليه مقهور ودائماً يعترف بنفسه هو المذنب وهذا الشيء كبر بعيني توقعت يكول السبب منج هم بس حمل الذنب بس عليه وهو فعلاً مذنب
وضلينا نحجي ونعست وهو بعده گوه قنعته وراح وگبل نمت والصبح كعدت على صوت جواهر خوما بلبل أكعد على صوتج أستغفر الله هاي شجابها من الصباحيات جنت خلصانه يربي رجعنا .
جواهر ـ بس أني عبالي مثل كل مره يسافر ويغيير جو وفتره ويرجع شُنو هسه يحاجيني يگولي يمه ما أرجع بعد لاتتنظريني لــــا نائــــل ما يعوفني ما يعوف أمه ولك يمــــــه نائــــــــل شلــــــــــون تعوفنــــــــي وبعد ما ترجعلي ولك نائـــــل كسرتلي ظهري يمــــه
يمــــــه نار فراگك شابه بگلبي يمــــــه نائـل حبيبي
الحجيه حليمه ـ ولج يمه گافي راح تموتين نفسج
جواهر ـ هو أني أمــــوت ولا أبقى عايشه وأبني مو يمي أبني مو بحضني عمه أشتاگيتله أشتاگيت لريحته الطيبه ولصوته وطوله الحلو وسوالفه وعصبيته أشتاگيت لگلشي حلو بإبني أريد أبني عمه أريد أبني
ولك يمــــــه نائـــــل ولك يمه گلبي راح يوگف وراك
ليال ـ وكعت يم رجلين أبويه تبوس بيهن وتتوسل بي
جواهر ـ گلشي مـــا أريــــد منك بس رجعلي أبني رجعلي نائـــــل لحضني عليك الله سعيد أحجي وياه وقنعه خل يرجع أني أموت وره أبني هذا أبني وليدي نائل وشتريد أني حاضره أنطيك عيوني بس رجعلي نائـــــل أني أموت وراه شُنو يگولي ما أرجع بعد!!
ومنو يدير باله عليه منو يغسل ملابسه منو يطبخله هذا أبني سعيد أبني وحيدي شحصلت من هالدنيا بس هو وكلشي ما أريد بس ترجعولي أبني نائـــــل لحضني
ولك نائـــــل يمــــــه نائـــــل كسرتلي ظهري يمــــه
سعيد ـ شسويله ما يقنع حجيت الا بزعت وأني بحاجته وكاسرلي ظهري أكثر منج بس ما يقبـــل معاند أبنج أنتِ خسرتي من أفعالج وأذيتج بحقه أنتِ السبب دمرتي بإيدج كله منج وأثنينا خسرنا أبننا ونائل بعد ما يرجع .
جواهر ـ يمــــــه سوده بوجهي طين برأسي يمــــــه نائـــــل عمت عيوني الما يشوفنك يمــــــه نائـــــل
يمــــــه المن عايشه شسوي بالدنيا وأنت مو يمي يمــــــه نائـــــل عيوني أنت يعافيتي يحيلي يمه هان عليك گلب أمك يمه هنت عليك وعفت أمك يمه ، يمه راح زعلان مني يمــــــه سوده بوجهج جواهر الله يأخذج جواهر طين برأسج جواهر موت الأخذج جواهر المن عايشه المن يمــــــه نائـــــل مو يمي يمــــــه بعد ما يرجع ، نائـــــل عيوني يا يمه .
ليال ـ تصرخ وتضرب بوجهه ومخلت نفسها وگعت وأنتهت وجديتي تسگت بيها وهي فقدت وتضرب بنفسها قوي والليل كله تصرخ وصوتها راح من كثر ما صرخت وملخت نفسها بحيث كعدت الصبح وجهه كله مورم والدم نازل منه وعيونها لونهن بنفسجي من كثر ما لطمت عليهن وعزلت نفسها بهل الغرفه بس تبجي وتنعي يإسمه شبه تخبلت وفقدت وساعه ساعه تسمع صوت الباب وتفز وتصييح نائـــــل رجعلي وتذكرت حركة گلبي أمي على جنات شلون هيج أنقهرت وأحترك گلبها وأمي ماتت وهي عيونها عالباب تتنظر جنات سبحان الله گلشي دين ورب العالمين حاشاه يظلم عباده رجعلها الدين مضاعف وذاقت نفس اللوعه الي عيشتها لأمي
" وأبداً ما أنقهرت عليها تستاهل گله من أيديها هواي طغت وظلمت وأكبر عقاب الها جان أبنها وحيدها وهي خسرته بسبب أفعالها ما خلته وجه يقابل اخوه أو يباوعلنا وهو يعرف بنفسه هو ظلمنا بسبب أمه ويعرف سوالف أمه بحقنا فه صعب عليه الله يعينه والله يدري شگد جاي يتأذى وخلاه يتأخذ هالقرار وأبتعد وبعد ما يرجع الله يسعدك وين ما تكون يا خويه ويجبر بخاطرك المكسور .
مرت أشهر والتغيير الصار بحياتي جان هو العوض من بعد معاناة عشتها اذتني ونزلتني لصفر واجه الفرح من بعد حزن طويل واللي مأذينا تأذى وأعتكف على روحه .
ومن يوم ما نائـــــل بلغها بإتصال بعد ما يرجع العراق ويعيش بالخارج وحيد هي تدمرت واحس نكسرت عينها وصارت جواهر وحده ثانيه أعتكفت وعزلت نفسها حتى ما تدخل بيه ولا تسألني وين تروحين وين تجين على گد ما تكمل شغلها وتأكل وتدخل غرفتها طول الوقت بهل الغرفه
" صدفه عبرت من باب غرفتها وشفتها تكلب بصوره وتحجي وياه وتعاتبه وتبجي ويه الصور وجانت صوره من بعده صغير وبشبابه ومن جان يدرس ومن تزوج بيداء وتلمست صورتها وتحجي وياها .
جواهر ـ لو باقيه جان نائـــــل ما عافني أنتِ الوحيده الحبج نفس حبه اليه أنتِ الوحيده اللي خليتي سعيد بس من رحتي وعفتي وهو وراج عافني وراح وضليت وحدي أحاجي الصور راح الما فرحت بي وحرمني من طوله راح العايشه علموده .
البشر من يطغى لازم يجي يوم وينكسر ويتعاقب بإعز شيء عنده ولو بعده حين من جان يگول جواهر هيج يصير بيها وسبحان الله أبداً ما ينقهر گلبي عليها بسبب أذيتها الدمرتنا كلنا ما خلت على حالنا حال واخذت أمي من عدنا وحرمتنا منها الله حرمها من ابنها .
وعقدنا محكمه وصرت بإسمه رسمياً وفرحتنا ما ننطيها لأحد مالكين الدنيا وإثنينا واحد مصدك بالثاني شلون صارت وأنجمعنا بعد كل اللي صار بس هذا قدرنا .
وسوينا حفله خطوبه جانت تخبل بكل تفاصيلها صح ناقصه أهلي بس هو ما خلاني أحزن والكل حضر الحفله والصدمه الاكبر حضور عمتي نجلاء جانت نظراتها كلها شر حتى جواهر اهون منها الوحيده ضلت على نظراتها كلها نحس وحسد وتمنيت ما تحضر بس أجتي بدون عزيمه وليث ما تدخل لان ما راد تصيير مشاكل وهي لسانها مو إلها ومحد حجه ولا هي تدخلت بس أكتفت تباوع وبصفها بناتها .
وجواهر شافتها هي وتماضر اللي حامل وبطنها بارزه وضلت تباوعلها وركزت على بطنها أمها زوجتها وضلت تباوعلها بنظرات مكسوره والدمعه بطارف عينها وتماضر گبل كامت تبجي وتباوع لجواهر لحد الان بعدها تحبه حتى وهي متزوجه ما نست حب نائـــــل حسبي الله عليج يا نجلاء شصار لو عايفتهم بس هذا قدرهم كلمن يعيش بمكان ، ونائـــل عاف الكل وغادر بدون عوده .
الحجيه حليمه ـ نجلاء أمشي أخذي بناتج وأمشي شعندج جايبتها وجاية تقهرين مرت أخوج .
نجلاء ـ وليش أقهرها قابل العيب بنتي وكلمن يأخذ نصيبه اني شعليه وبنتي خوما ابقيها زواج الحمدلله تزوجت والله عوضها وحملت بتؤام .
الحجيه حليمه ـ أمشي طلعي أمشي لا بارك بيج من بنيه .
نجلاء ـ ما أمشي وكل هذا علمود جواهر لاتنقهر شسويلها أني والله ما أمشي وباقيه حالي من حال الكل وأني ما جايه عليها جايه على بنت أخويه وأبن أخويه
الحجيه حليمه ـ أنهجم بيت جذبج من شوگت صارت بنت أخوج بس أني اعلمج هسه امشيها الج بس حسابج عندي وقهرة جواهر الا أطلعها من عيونج قهرتيها وهي مهضومه وگلبها مكسور على أبنها الله يقهرج .
ليث ـ جده عوفيها كافي ما نريد مشاكل وأنتِ عمه رجعنا للمشاكل رجعنا ما كافي عاد .
ليال ـ سگتن وكعدت هي وبناتها عالصفحه بس جديتي گامت تبجي على جواهر وتباوع بحقد على عمتي نجلاء لما خلصت الحفله حاطه أيدي على گلبي لا يتعاركن والحمدلله خلصت وجانت أحلى حفله .
مرت فتره الخطوبه عشنا احلى أيام وعوضنا نفسنا بالحب اللي ما عشناه بكل تفاصيله وزواجنا بعد مـا يطلع باسل من السجن وگال اصبر نفسي الا يطلع باسل ويكون حاضر عرسي منج لان هو جانت أمنيته أصير لـ ليث ونفس الوقت علمود ننجمع كُلنا وترجع لقاء ويسويلي عرس ...
ليث ـ حبيب روحي وينج .
ليال ـ صعدت أجيب الملابس جاي ارتبهن ليش حبيبي
ـ منو يمج
ـ محد وحدي
ـ راج أجيج للغرفه
ـ ليش أنت رجعت
ـ اي بالباب هسه نزلت من السياره
ـ ها وابويه وياك
ـ لا هسه يجي وراي ، أجيتج عندي الج خبر حلو
ـ شُنو هو جاي احجي وياه وسمعت صوته قريب مني وكف باب الغرفه وباوعلي وكال
ـ تعالي بوسيني وأكولج .
ً ـ عفت الموبايل وگمت شُـــنو الخبر عفيه
ـ بوسيني يله
ـ أستحيت لا ليث احجي عفيه
ـ الا تبوسيني
ـ يأشر على خده ويضحك .
ـ يعني الأ ابوسك
ـ أي والله
ـ خليني أخمن لقاء رجعت من الأمارات مو
ـ بوسيني وأسهل عليج يله حبيبي تقربي عليه .
ـ ليث ليش هيج تسوي مو تعرفني ما أكدر .
ـ صارلنا شگد من خطبنا مكظيتها عليه نواشف بس بوسة الخد ومحترم روحي ولازم نفسي عنج ومستكثره عليه بوسة خلص ما أريد .
ـ لزمته من أيده لاتزعل
ـ لا على شُـــنو على بوسه ازعل شبيه
ـ هو يحجي ورفعت نفسي بسته من خده وأنصدم
ـ بستيني
ً ـ أي شبيك ما حسيت
ـ لا حسيت بشفايفج لامست خدي واستشعرت بيها بس ما طولتي ادري بوسة العيد هم أحسن منها .
ـ هسه ما تكولي شُـــنو الخبر
ـ هو الخبر حلو بس الأحلى منه عرسنا صَار قريب واجه الوقت لأخذج يمي وطولج يفتر بغرفتي ونومتج تكون بحضني ومن أرجع من الدوام تستقبليني هلا برجلي هلا بإبو بيتي
ـ ليث لاتكمل تدمع عيوني بهيج كلام نزلت دموعي وأني أباوعله حتى ما أعرف شجاوبه شُـــنو الخبر الحلو فرحني ليث فرح گلبي وگولي .
ـ أخوج باسل طلع من السجن وجاي وراي هو وأبوج .
ـ باســــــل شهگت بفرحه ترست صدري وحضنته قوي گول والله باســــــل طلع من السجن طلع طلع .
ـ أي والله طلع وعيونج
ـ حاضني وحاضنته ورفعني ويفتر بيه وأني اضحك وحاضنته من رقبته وبسته قوي ونزلني وصرت ابوس بي من وجهه على هالخبر الحلو تستاهل أكثر من بوسه فرحت كلبي بخروج أخويه من السجن هذا احلى خبر وينه هسه وينه خابرهم شوفه وين صار .
ـ هسه أوكفي خل أشوفه
ـ شوگت طلع وشلون أحجيلي وليش ما كتلي رايح تجيب اخويه ليش هيج تضم عليه هيج خبر حلو .
ـ مــا أعرف والله لو عندي علم أول الناس أكولج بس المحامي اللي لازمته عصماء هو خابرنا يعني عصماء هي طلعته من السجن الفضل الأول والأخير يرجع الها
ـ عصماء هي طلعت باسل من السجن
ـ أي هي بس والله عمي طلعت سباعيه وأخت زلم عندت وضلت على كلمتها وموقفها وشگد باسل گال الها سحبي إيدج وعوفي المحامي ضلت على كلمتها والأخير طلع أخوج .
ـ فدوه أروحلها هاي النسوان وسمعنا صوت هلاهل والصوت مو غريب هاي جنات
ـ أمشي أكيد وصل .
ـ طلعنا أني وياه وباسل حاضن جنات وهي تبجي بحضنه وابويه يباوعلهم ويبجي وحيدر جان واكف
جنات ـ ما تدري بغيابك شسوه بينا ، الف الحمدلله على سلامتك يروح أختك اروح فدوه ونذر لعمرك .
ليال ـ تبوس بإيديه وتبجي وهو يسكت بيها وأندارلي ركضت عليه باسـل خويه يا بعد گلبي حضنته قوي خويه وبجيت بحضنه وبجيت على أكتافه والله من دونك ضعت والله نكسر ظهري بغيابك الف الحمدلله على سلامتك والله ما مصدگه عيوني أنت كدامي ما مصدگه يروحي يا خويه ما مصدگه حضني اني وجنات واحنه نبجي بحضنه هاي دموع الفرح فرحانين بطلعة أخونا من السجن .
مسح دموعه ومشه وحضن ليث ويطبطب على اكتافه ورجع باوع علينا ورجع باوع على أبويه
باسل ـ لقاء وينها؟ .
ليث ـ هسه أدخل أرتاح وبعدين نحجي بگلشي .
باسل ـ نحجي بشنو ليش شصاير ليث .
ليث ـ باسل بعدين أحجيلك والله بس هسه أنت طلعت وبعدك تعبان أرتاح ونحجي .
باسل ـ ليث لاتخبلني أحجيلي هسه لقـــــــاء ويـن وعصماء عرفتها يم أهلها هي وبناتي وهاي بعدين احاسبكم عليها .
بس هسه لقاء ويـــن ليش ساكتين لقاء ويــــــن! لـــــو موجوده أول الناس تستقبلني ، ليث حاجيني أختي وين مــو أمنتك عليهن ليش اجي وما الكه بس ليال وجنات حاجوني لقـــــــاء ويـــــنها .
ليال ـ صار عصبي وليث ساكت وأبويه يريد يحجي بس متردد وحيدر باوع اله وتقدم سلم عليه .
حيدر ـ يله أني أروح وأترخص منكم والحمدلله على سلامتك مره ثانيه وأن شاء الله اخر الأحزان .
باسل ـ الله يسلمك حبيبي أبو كرار رحمه الله والديك ما قصرت ممنون منك على گلشي .
ليال ـ سلم عليه وراح وحجه ويه جنات وضلت وباسل كعد عالدرجات طلعت جديتي دنكت تبوس بي وهو ما بادر بإي ردة فعل رجع صاح على ليث .
باسل ـ ليث هسه تحجيلي گلشي لان أريد أمشي لديالى على مرتي وبناتي اللي اعوفهن وأمن عليهن واجي ما الكاهن بعدين أعرف رايحه لاهلها وهسه تحجيلي شلون راحت وليش وأني عفتهن بيت أمي ولقاء وينــها ليش ما موجوده .
ليث ـ لقـــــــاء بالأمارات مسافره يم خالك يحيى
باسل ـ مسافره! وشوداها لـ الأمارات شلون تسافر لوحدها شلون ليث ، ليش تخليها تسافر ما تحجي
ـ لاتصييج أنطيني مجال أحجيلك
ـ لاأصيييح واكلب البيت عليكم ليش لقـــــــاء مسافره وشأخذها على خالي وعصماء ليش يم أهلها ليش مو أهنا ما تحجي يابه ليش ساكت مو أنت ابوهن والمسؤول عليهن مو بناتي حفيداتك ليش أجي ما الكاهن وبنتك شلون تخليها تسافر الأمارات لو ما صدگتوا تخلوني بالسجن وتستفردون بيهن والله گلبي جان حاس ما مرتاحات بغيابي وأنت ليث جنت اسألك تكولي گلشي تمام وين التمام هااا وينه طلعت تجذب عليه .
ـ أمشي داخل لاتصييح أمشي واحجيلك گلشي
ـ مـــا محترك من مكاني ولقاء هسه تجيبها من الأمارات هسه تزرعها كدامي هسه هسه .
ـ وين أجيبها هسه أنطيني مجال نحجيلك وعد أجيبها الك وباجر هم بس أصبر عليه وأني سويت ألّي أكدر عليه وبغيابك نائل!
باسل ـ نائـــــل شبي أنوب وصدك وينه شعجب ما طلع يهلهل عليه لو زعلان لأن طلعت من السجن .
ليث ـ ما بي شيء يله أدخل .
ليال ـ كاعد وعصبي ودمه محترك من القهر ورفع أيده بوجه ليث وصاح بي
باسل ـ مــا أدخل وهنا تحجيلي گلشي بالحرف الواحد ولاحد يگرب صوبي ويگولي الحمدلله على السلامه عدا أخواتي لان مــا شفت منكم سلامه لا بوجودي بينكم ولا بغيابي عنكم حتى وأني بالسجن السلامه لعائلتي ما شفتها اجي وأيدي والجول لا أختي ولا مرتي ولا بناتي .
ليث ـ أمري لله أحجيلك گلشي بس بالأول أريد منك تلزم أعصابك والوضع هسه أختلف عن السابق بس صارت هواي أمور صعبه عالكل ..
باسل ـ ليث أحجيلي لاتضل تماطل وتجرجر بالكلام ترى اعصابي قبطت وصلت لرأسي أحجيلي اريد أولي لديالى
ليال ـ أجه عمي كريم وفارس وفواز وجدي وباسل على كعدته ما گام على أحد وعمي تقرب يسلم عليه رفع ايده ماله خلگ أحد وليث اشرلهم وفهمهم وابتعدوا
وليث كعد بصفه وبدأ يحجي وباسل سحب الباكيت من جيب ليث ودخن جكأره وليث يحجي وباسل يدخن والكل يباوع عليه ويحجي وباسل عيونه يباوعلي أني وجنات وعيونه نترتست دموع وبجيت وليث يحجي وصلني بالكلام وشنو صار وياي بهذاك اليوم وگوه يحجي وباسل من غضبه عصر الجگاره بأيده وهجم على ليث من قميصه ويحجي عليه
باسل ـ وأنتوا شُـــنو شغلكم وشلون تخلونهن لوحدهن بالبيت يباتن بدون رجال شُـــلون سمحت الكم غيرتكم تبقون نسوان وحدهن بالبيت شُـــلون انتوا زلم أنتوا
ليث ـ مو كتلك سويت اللي أكدر عليه وحقك شتحجي حقك واني ما صنت ولا حافظت على أمانتك بس اني لوحدي شگدر نائـــــل هو جان مسيطر على گلشي وأمه وياه هي سوت كل هذا وخلت نائل يتفرعن على مرتك وأخواتك ومن جانن يمي محد يحاجيهن بس من أخذهن بعد ما كدرت وكلما اجي عليهن يطردني من الباب شسوي بعد وعمي سعيد جان بفراش الموت لما ناخذه يمنا ونعالجه جان من زمان دافنينه .
باسل ـ زلم مشوربه بگد الدود تخلون وحده مثل جواهر تحكمكم ونائــــل بس يگدر على النسوان لو بي خير جان طممم السالفه مو فضح روحه بالمراكز كدام الضباط وخلك الله وشهر مرته وفضحها وفضح روحه ولك اني مرتي مهدده واكعه بمصيبه وماتت منتحره اجي افضحها وافضح نفسي لو أعرف اخيس بالسجون ما احجي عنها وعن شرفها بس المن تحجي أذا شواربه بس على النسوان بدال ما يدير باله عليهن بغيابي لا الافندي يگتل بيهن ويهين بمرتي وبناتي .
وأني فضلت السكوت والسجن بس علمود لاحد يجيب طاري مرته مو لعيونه سويت هالشيء لعيونها هي ماتت وهي تريد مني مساعده وأني ما ساعدتها وأستاهل السجن وراضي بعقابي بس مال اطلع والكي لاعبين لعب وراي لا أخواتي مرتاحات هاي مطعون بشرفها وهذيج مسفرينها تخلصون من شرها ليش ما تگولون هي خلصت من شركم وحاسبين نفسكم زلم مسوين عود فد انجاز مسفرينها لو مرتي وبناتي بس گولولي شـــــنو من أهل أنتوا كواويد ما تسوي عملكم .
ليث ـ بعدني ما مكمل كلامي
باسل ـ لاتكمل ولاتحجي حرف ، ليال خويه لبسي عبايتج وأمشي وياي ما أضل بعد دقيقه وحده والبيت والأهل الما داروا بالهم على أخواتي ومرتي بغيابي هذا مو بيتي ولا أهلي بالمختصر أني من ماتت أمي ماتوا كل أهلي هي جانت أهلي وهسه ما ضلي أهل .
" يله ليال يله خويه أمشي لبسي نمشي وجنات خابري رجلج وروحي لبيتج أجيتي شفتيني بارك الله بيج وبرجلج الاصيل بس هو طلع شريف على الاقل أنتِ بخير وسلميلي عليه وهل البيت بعد لاتوصلين إله المن تجين على يا أهل وأذا تردين تجين تعالي لديالى لان بعد ما الي كعده بغداد أني رايح يله ليال خويه شو واكفه مو احاجيج .!!
ليال ـ يحجي ويباوعلي ومشيت وليث منعني .
ليث ـ أوكفي وين رايحه
باسل ـ وأنتَ شعليك تمنعها وخر أيدك .
ليث ـ لا اله الا الله هو أنتَ أنطيتني مجال أكمل كلامي خل أحجيلك يمعود أكلتني حاصل فاصل
باسل ـ شتحجيلي كل هذا الحجيته وبعد تحجيلي ليش هو شضل ما صاير بيهن زين ما متجارين بيهن لان بس هاي ما سويتوهًا .
ليث ـ باســـل كافي عاد خليني انلطم وأحجيلك
باسل ـ أسگتت لاتحجي حتى أنتَ طلعت مثلهم وأني بالسجن مأمن كلت ليث موجود ما أخاف عليهن واطلع والكاها مطعون بشرفها وكل أثنين يحجون ليش مو جنت تحبها وتريدها ليش من شفتني دخلت السجن وسالفتي طامسه أني والأعدام ما جان تگدر تأخذها يمك بساعه وحده تعقد وتأمن عليها لو ما عندك موقف رجولي مشرف بس مع الاسف عليك والله خيبت ظني بيك وأني الجنت عادك أخو ، يله ليال
ليث ـ ليال مــا تمشي .
باسل ـ تمشي وغصباً على رأسك يله تحرگيييي مو أحاجيج .
ليث ـ لاتصييح عليها وليال زوجتي مــا تمشي وياك
ليال ـ باوعلي مصدوم ونزلت رأسي مستحيه منه وضليت بين نارين أخويه وموقفه الصعب وليث موقفه أصعب لا ينطي مجال يحجي ويبررله ولا باسل يتفهمه
باسل ـ زوجتك! من شوگت صار هالحجي وليش أني ما عندي علم وشلون لعد أنطعن بشرفها ليكون تزوجتها علمود تستر عليها وتخلصها من حجي العالم احجي ولك زواجك منها علمود تستر عليها حاجينييي ليث
ليث ـ لا مو هيج والله وتعرفني بدون ما احجيلك بس خل أفهمك لان اذا حجيتلك هسه وأنت بهذا وضعك وعصبيتك ما راح تتفهمني بس أهدأ هسه .
باسل ـ أذا علمود تسترها سويت فضل عليها وحميتها بغيابي بس هسه مشكور بس هسه اني طلعت وسوي عليه افضال وطلگها وخليني اخذها وياي وأمشي لان ما عندي طاقه أبقى اكثر وسمعت بما فيه الكفايه خلص طفح گلبي منكم ومن سوالفكم الناقصه يله طلكها دامكم بعدكم بس مخطوبين .
ليث ـ ما اطلگها وهذا مو حل تحجي وتعصب وأنت ما سامع كل الكلام وتريد تمشي أمشي الله وياك بس ليال ما تمشي وياك ليال صارت على ذمتي
باسل ـ والله وگت صرتوا عليهم زلم بغيابي .
ليال ـ حجه وضحك وهز رأسه وليث عصب وتخبل من حركته وكلامه
ليث ـ باسل أحترم نفسك هواي سکتت الك ومقدر وضعك بس بالأول اسمعني وبعدها شتسوي سوي
باسل ـ ليال تحرگي كدامي .
ليث ـ ليال مــا تمشي وين مأخذها اختك مرتي مو بكيفك تأخذها وياك .
باسل ـ من أنعل ابوك لأبو اختي وياك وخر عن وجهي لا افلش وجهك وأنتِ تحركي صارلي ساعه احجي وياج لو تردين تبقين اذا تبقين تنسين عندج أخ ووجهي بعد ما تشوفينه والله لان هالمله حرامات ابقي وحده منجن عدهم .
ليال ـ لاااا أمشي وياك حجيت وليث باوعلي مكسور ومشيت سريع وراد يجي وراي بس باسل منعها وتعاركوا .
باسل ـ رجلك أكسرها اذا تمشي وراها خليك أصلي وأوكف بمكانك وحتى لو رجلها أختي تجي وياي ما ابقيها أهنا وموضوعك بعدين نحجي بي من يصفى بالي بس هسه امشي وخر من وجهي .
كريم ـ أبني باسل ما يصيير هيج ما تنطي مجال لأحد يحجيلك وحتى أبوك ماله ذنب الرجال جان مريض ومن صحى ما قصر ويه مرتك وبناتك وما تصدك اسأل عصماء بس على كيفك أبوك مريض .
باسل ـ عمي ما تسگت فدوه لعينك هو من جان صاحي شسوه النا عاد من تمرض وماطول هيج وما عايفهن مثل ما تگول ما جان يروح يجيب عصماء من أهلها هي وبناتي ويلم بناته ويكعدهن بالبيت ويكعد وياهن شبي مو تكول صحى شكو هاي عايفها مكفخه بيد جواهر وشامرها على ليث بحجة يستر عليها وهذيج مسفرها لو ما يكدر على فراك جواهر ما تسكتون ليش تخلوني احجي الما ينحجي مو سوالفكم هواي وما ينحجن يله ليال نمتي .
ليال ـ أي أجيت ، هزلي رأسه ومشيت وليث يباوع وراي وراد يتدخل ويمنعني بس عمي كريم منعه وجلب بي وصك على سنونه وحجه وياه بصوت ناصي
كريم ـ عوفها خل تمشي ويه أخوها ما تشوفه شلون صاير نار وتلهب علينا خليها هسه وبعدين من تبرد أعصابه نروحله ونكعد وياه ونحجيله ونفهمه كلشي بس هسه موقفه صعب تحمله واصبر عليه الله يعينه
ليث ـ بس يابه ليال مرتي وين مأخذها وياه
كريم ـ ندري مرتك وين مأخذها قابل ترى أخوها
باسل ـ جنات أمشي اوصلج لبيت رجلج .
جنات ـ اي عيني عادي أروح وياكم اشوف عصماء والبنات
باسل ـ وين موليه وياي أمشي اوصلج لبيت رجلج يله أمشن .
ليال ـ طلعنا وأبويه خطيه أبداً ما حجه ولا برر موقفه بس نظراته جانت تحجي كلشي ونزل رأسه مخذول ومكسور وقبلها نائل مشه وعافه وهسه باسل انعاد عليه الموقف وخسرهم إثنينهم حسيته أنكسر وتقرب عليه عمي كريم وبعدها مشينا ورى باسل وصلنا بيتنا وگف باسل باوع على الباب مضروب سنجيل وقفل وهز رأسه مقهور ومشينا وحسيت ليث واكف ورانا أنداريت لكيته واكف يم الباب يدخن وعيونه عليه .
وصلنا بيت جنات وطلع النا أمجد سلم على باسل ويم الباب باسل حجه ويه حيدر وامجد حسيته فرحان أكثر من عدنا بطلوع باسل من السجن ويباوعله وهو مبتسم .
حيدر ـ خلي أوصلكم لعد أذا ما تكعدون .
باسل ـ لا رحمه والديك هسه اخذ تكسي للكراج ونطلع
ليال ـ سلم عليهم وحيدر حاول وياه باسل ما قبل وطلعنا اخذنا تكسي ومن الكراج صعدنا بسياره وطلعنا وهو طول الطريق صافن وأني نظراته ما تفاركني شكد حاول يحجي لباسل ويفهمه ما انطاه مجال يله بلكي بعدين لان هسه باسل التمن عليه وموقفه صعب خل يرتاح وياخذ وقته ويجي يحجيله ، خوما صُدك يطلگني وأعوفه يمه گلبي وهو شلون أعوفه يموت وراي والله لا باسل ما يسويها بينا ويكسرنا بس هسه موقفه صعب
باوعلي وگال
باسل ـ أنطيني موبايلج
ليال ـ أي هسه فتحت الجنطه أدور عليه وموبايلي ماكو خرب يمكن نسيته من حجيت ويه ليث شمرته ،باسل ناسيه موبايلي
باسل ـ يا حبيبي گملت على رأسك باسل خاف عايز
ليال ـ رجعت دورت عليه ماكو خرب شلون نسيته هسه ليث يتخبل وراي ،ورجع اخذ موبايل السايق وأتصل
باسل ـ أني باسل وين أنتِ ، أني اجييت راح أوصل أي شبيج مو وگته هسه تسألين شمدريني غير أدليني ووين صايره هاي أي أي
ماشي من أوصل أتصل عليج حضري الكروه لان مفلس
ليال ـ قطع الخط ومن كثر مزعوج حتى أني خفت منه وعلى الأتصال وياها دخلنا الافرع
باسل ـ شنو لون الباب شمدريني مية الف باب أكو طلعي خل أشوفج حتى لو يطلعن البنات وين أعرفهن صايرات نسوان هسه ، هاا وينج أي دخلت الفرع الگلتي عليه يا مقطوره اي شفتها ، طلعتي لو بعدج اي دطلعي أي شفتج وصلنا ، مشكور حبيبي رحمه الله والديك بس هسه أجيبلك الكروه طالع من السجن وما شايل بجيبي .
ـ لا خويه تدلل شصار قابل الناس لناس والف الحمدلله على سلامتك والله خليها بمناسة طلعتك من السجن
ـ لا والله ما يصير
ـ يمعود اني أخوك الله عليك خليهن عليه
ـ الف رحمه الله والديك يا خويه بس ما أقبلها واني الممنون منك .
ليال ـ نزلنا وشفت عصماء أجتي وأبتسمتلي وبأيدها الفلوس وصلت باسل وايديها يرجفون اخذهن منها وراح عالسايق وحضنتها شلونج شخبارج مشتاقتلج .
عصماء ـ الحمدلله عيوني روحي بعدين خل اشوف اخوج طاك گلبي عليه وأنوب الطريق كله عصبي شبي بس يصييح .
ليال ـ سگتي وخليها سالفه طويله بعدين أحجيلج واجه والبنات طلعن ثلاثتهن شعرهن منفوش توهن كاعدات من النوم يالله شگد كبرانات وگفن يم الباب وباسل وگف يباوعلهن ونظراته وهو يباوعن الهن تبجي كأنما يحاجيهن كبرتن وأني مو يمجن .
باسل ـ صايرات نسوان بناتي
عصماء ـ غنى جنى هدوشه تعالي ماما تعالن على بابا
باسل ـ وين يعرفني حقجن بابا ما تجن عليه حقجن
عصماء ـ لا شلون ما يعرفنك بس تصنمن شو تعالن عليه غنى تعالي ماما تعالن على بابا
ليال ـ عصماء گامت تحجي عليهن وهو ما تحمل تقرب حضنهن ويبوس بيهن وضل حاضنهن واني ابجي على لقاءه بناته كعد بالكاع يبوس بيهن وهيفاء على اسم أمي تباوعله ما تعرفه نهائي
أخذها من عصماء وگامت تبجي وأدفع بي باسها كوه ما تقبل وهو حيل ضاج ومنا أهلي وسوالفهم خفت عليه لايصيرله شيء گوه گام وشال غنى يبوس بيها
وجنى هم جلبت بي ورجع يبوس بيها .
باسل ـ يابه نسواني يابه بناتي يابه يابعد روح ابوجن
عصماء ـ يله اتفضلوا أتفضلوا .
ليال ـ عصماء تباوعله وعيونها مليانات دموع الفرح تريد بس يباوعلها وهو ملتهي بالبنات .
عصماء ـ خرب طگ گلبي أريد احضنه
ليال ـ أحضني شبيج مستحيه مني قابل الشوك ما بي مستحى
عصماء ـ لا عصبي أخاف يعيط بيه ويفشلني عود بعدين من يهدأ اشبع من حضنه هاي اذا شبعت سوده عليه .
ليال ـ الله يساعده ودخلنا واجتي امها سلمت عليه وشافها باسل دنگ رأسه مثل الفشلان منها .
غنيه ـ ليش منزل رأسك وليدي ، أرفع رأسك يمه
ليال ـ تقرب حضنها وهي حاضنته تبجي .
غنيه ـ والله يمه وگفتك ما انساها الك ما قبلت تحجي على بيداء وفضلت السجن على سمعتها واللي مثلك قليلين يا يمه .
ليال ـ ما حجه شيء دخلنا وابوها خطيه بس يأشر تقرب باسل حضنه والحجي كام يبجي .
باسل ـ وگفتك ما أنساها عمي ودموعك عزيزه عليه لاتبجي عمي لاتبجي .
ليال ـ ما يحجي خطيه وحسيت باسل أستغرب واني كذلك مو جان يحجي شبي خطيه وكعدنا وعصماء جابت ماي لازمه وإيديها ترجف شبيج لازمتج الرجفه .
عصماء ـ سگتي وخليها غير گلبي يريد يفرع صدري ويطلع كوه واكفه على حيلي .
ليال ـ أنقهرت عليها وقدملته ماي وباوع الها وعاگد الحاجب وجابت الجاي وشربنا وصاح البنات خلاهن بحضنه ويسولف وياهن وعفته وكمت لحكت عصماء لكيتها واكفه يا الكاونتر فاتحه الخانه تخلي عطر شافتني وفزت انيي ليال .
عصماء ـ وگعتي گلبي عبالي هو ، خرب جاي اعدل جهرتي خابرني عالسريع بس ركضت كبيت ماي على جسمي وهسه اجيت اخط عيني بقلم كحل واخلي عطر شوفي ريحته طيبه .
ليال ـ اي يجنن هادئ ، اباوع الخانه مليانه قراصات البنات ومشط وعطورات مرتبتها ها كملتي .
عصماء ـ اي عيني ليش محتاجه شيء .
ليال ـ نسيت موبايلي عادي أخذ موبايلج أطمن ليث لان صارت هوسه بعدين احجيلج .
عصماء ـ اي صدك ليث خطيه گومه أتصل يسأل عليج وصلتوا لو بعد نسيت اكولج هاج عيني خابري واني اروح على أخوج
ليال ـ روحي عيني روحي ، راحت وسجلت رقمه وأتصلت عليه وأجاني صوته يحجي عالسريع
ليث ـ الو عصماء ليال وصلت اذا يمج انطيناها .
ليال ـ وياك ليال واجاني صوته ملهوف .
ـ يا روحي يا گلبي إشسويتي بيه من رحتي أول مره تفاركيني حتى من أني تزوجت ما فارگتيني حسيت روحي مخنوك وكلشي بلياج يخنك .
ـ خوما ضجت وراي لاتزعل حبيبي .
ـ يا ما ضجت غير كلبت الدنيا وراج رجعت عليهم فرغت قهري بجواهر وما رضوا مقهورين عليها لان نائل عافها بس ما مقهورين عليه ونار گلبي وباسل اخذ ليالي مني وخلاني شايط وراها .
ـ يحجي مقهور مسألة وقت
ـ يا وقت تحجين عنه وأني أعد الساعات تجمعني بيج وتالي تطلعين من بغداد وعايفتني شگو ضال لاحكج لديالى والله وما أعوفج لازم احجي وياه وأفهمه وأرجعج عمي ما اكدر مخنوك ومسطور اني اذا ما اشوف طولج شيصبرني ولج أني من تزوجت من أنانيتي مگابل الشباك بس علمود ارضي نفسي بشوفة طولج شتحجين أنتِ .
ـ لهل الدرجه ليث
ـ وأكثر واللة .
ـ لعد شلون تأقلمت بحياتك ويه أيناس .
ـ أيناس وحد وأنتِ وحد أيناس بالواقع حقيقيه أما أنتِ دافنج بگلبي عايش وياج بخيالي بس ما مخليج تأثرين على واقعي ويه إيناس لان ما الها ذنب ولا خليتها تحس ولا اني قصرت وياها بشيء بس من اشتاكلج أرجع اعيش بخيالي واحلم بيج ووياج .
ـ وهسه صار العكس مو
ـ لا مو العكس بس تضل زوجتي وأم بنتي ما أنكر عيشتني أيام حلوه وياها الله يرحمها تستاهل مني الرحمه وكل الخير أيناس أني ما عندي حظ ومـا حويتها أني ما أستاهلها بس قدرنا وقدرها الله كاتبه هيج .
ـ الله يرحمها
ـ خوما تزعلين
ـ لا والله ليش ازعل بالعكس والله ويمكن لو باقيه جان أنتَ نسيتني وتعايشت مع حياتك لان اخر فتره قبل لاتموت أنت ابتعدت وحسيت بيك متعمد هالبعد .
ـ أي صح
ـ الله يرحمها .
ـ أمين ، وهسه شلون ليال
ـ شلون أكعد وأسكت وأنتظره لما يهدأ
ـ شو عبالك بردت مشاعرج
ـ بشنو
ـ ما ادري اخاف لان حجيتلج
ـ لا شدخل لا لاتفكر بس بالي يمه الله يساعده وسمعته يكح يله باي
ـ وين باي تعالي
ـ باي سديت الخط وشفت عبر راح الحمام وعصماء اجتي عليه ها وين راح .
عصماء ـ أمي قنعته يگوم يسبح بس ما عنده ملابس شلون وجنطته وينها لان اني اخر مره دزيتهن اله لسجن
ليال ـ ما جاب گلشي وياه بطرك روحه وشفته بس غسل ورجع الاستقبال .
عصماء ـ خرب هم رجع الأستقبال وأني الي الله حتى ما كالي شلونج .
ليال ـ ما حجيتوا أبداً .
عصماء ـ أبداً ولا شايفني وأمي تكول اعذري وأصبري
شعذر منه لوما عيب أكوم ابوسه شلونك شلون صحتك
ليال ـ خرب بيومج ما عرفتج .
عصماء ـ الشوك ليال الشوك قاتل صاحبه وأخوج قتلني بروده لو بس كايلي شلونج هم نعمه كريم بس مو هيج ناشف يله نصبر عليه المهم طلع من السجن وشافته عيوني كلشي ما اريد ، يله اروح أشبع عيوني شوف منه .
ليال ـ روحي وانوب صاير حلو
عصماء ـ اي صاير يفلش ما تشوفيني أستخفيت وازحف على ركبي عليه .
ليال ـ راحت وأنقهرت عليها خطيه والله تستاهل كل الخير شگد صبرت وتحملت وهي طلعته من السجن
وتذكرته وتذكرت كلامه وشفت موبايل عصماء ولكيت منه رساله
ليث ـ بس لو أعرف أني عفتيني موبايلج ليش عفتي ضربتين على رأسي مو هواي .
ليال ـ منو گالك أعوفك بس أصبر هسه يا عيني گبل أتصل وجاوبته ها ليث
ليث ـ تگولين أصبر شصبر ما أكدر حتى بالدوام من أروح مو هيج عبالك اخذوج مني بعد ما يرجعونج لان من اروح الدوام اضمن من ارجع الكاع هسه شلون واخوج معاند لا ما بيها مجال باجر اجي بس اليوم اعوفه شيصبرني اني
ـ شبيك تريد تبجي
ـ اي تقشمري عليه تقشمري حقج ما تحبيني مثل ما اني احبج ومحترك بنار وراج
ـ لا شفتك هواي تحبني شو ما لحكتني بالسياره مثل الافلام ومنعتني ضليت واكف يم الباب وأدخن جكاير ما حركت نفسك وعرضت خداماتك علينا على الاقل جان وصلتنا بسيارتك وباسل كروه ما شايل لا والله تستاهل هسه تذكرت وانقهرت على باسل .
ـ خرب بيومج گامت تصلي مثل الرشاش نفس أخوها ليش مو گدامج ما انطاني مجال أحجي شيء .
ـ حتى لو موقفه صعب الله يساعده جان لحگتنا بسيارتك لو صدك تحبني
ـ ولج تعالي أني بإخوج ما خلصان منين طلع الج هاللسان وجنتي اهنا يم جواهر خانسه هسه طلع اخوج تسبعتي وگمتي ترعدين عليه .
ـ اي لعد شعبالك هذا أخوي حزام ظهري .
ـ أها والله على هاي قوتج وتسبعتي بإخوج ما أستغرب إذا طلب الطلاك توافقين وطلگيني وانضرب بوري معدل هم صدمة باسل وهم صدمتي بيج
ـ لاتستغرب حبيبي كلشي اتوقع
ـ اها حلو حبيبي حلو أي هاي هي الحمدلله مشكور محمود ربي هاي تاليتها هم سوء الظن بيه وهم الفقره ينجلبون علينا .
ـ غير تستاهل محد يتعاقب بدون ذنب شترزع تحصد
ـ حلو حبيبي حلو
ـ يحلي أيامك حبيبي
ـ ولج ليال أني أعلمج بس الزمج وين تروحين مني ترى بعدج مرتي خاف عبالج أخوج طلع وتسبعتي بي هسه أكدر اجي أخذج بس مقدر وضع أخوج فه لاتخليني أتخبل عليج وعلى أخوج خوش
ـ خوش
ـ لاتنجلبين عليه رجعي ليال الاعرفها
ـ ما تحبون الوكح بس تحبون الفقره على كد الايد مو
ـ لا مو هيج بس ما متعلم عليج وأني ما استاهل منج ومشكلتي ويه اخوج اطبگي عالصفحه لاتتدخلين خوش
ـ بس هذا أخويه
ـ وأني رجلج خاف ما تدرين لا يبوي شفتي أخوج شتسوين برجلج بعد ما تعترفين بيه اني بيش كيلو
ـ حسيته يريد ينفجر ريلاكس حبيبي
ـ ليال
ـ ها روح ليال ها عمري گول
ـ مشتاقلج
ـ وأني هم بس أصبر ياعيني
ـ لاتعصبيني بعد
ـ تمام
ـ ولاتضوجيني منج بهاي سوالفج
ـ تمام
ـ ولاتحبين أخوج أكثر مني حبيني بس أني
ـ لا اخوي محد يأخذ محبته
ـ واني الله يأخذني على هالقهر هذا امشي ولي واذا اتصلتي احظرج
ـ اوك ما اتصل باي حبيبي
ـ باي حبيبي .
ـ ضحكت وسديت الخط خرب يغار فدوه لحبك ورجعت كعدت يمهم وباسل نايم وعصماء ترضع هيفاء ها نام
عصماء ـ اي گال تعبان وترخص ونام أمشي بالمطبخ احجيلي شصار وليش هيج مقهور وحتى ما حجه شيء ضل بالي عليه .
ليال ـ كمنا بالمطبخ وحجيت الها گلشي وانقهرت وياي
عصماء ـ وليث شعليه خطيه جان أنتِ حجيتي ودافعتي عليه وهو ما قصر ويانا شيسوي الرجال ولاتنسين نائل هو جان مسيطر على گلشي وامه حاكمه حتى الزلم واذا عمامه ما حجوا هو يحجي خرب قهرتيني راجع عليه وفوك هذا كله اخذج وخلاه شايط وراج زين ما جلطتوا
ـ لا يمه أسم الله عليه وهسه يهدأ ويجي يحجي وياه وقهرته عليه لان ليث حجاله اللي صار بالحرف
ـ الله يساعده ، شلون تفض ما ادري ولقاء ما عرفتي من ليث شوگت يرجعها
ـ لا والله عود اخابره واساله
ـ تمام يله أكوم أصب الغده واشوفه بلگي يكعد .
ـ ماشي راحت وصبت وساعدتها وراحتله ما كعد انطانه ظهره ونام وعصماء جابتله غطه غطته وفرغت الاستقبال وعافته
ـ والله التسوي هوسه أبتلي بيها ما أريد صوت ابوجن نايم خوش
ـ عوفيهن فقره والله كعدن وتغدينا ومر أسبوع وباسل بعده مزعوج وساكت وليث كلما احاجي عصبي ويريد يحجي ويه باسل وباسل معاند ما يحجي ويه أحد ما ندري شلون تفض تاليتها .
____________________
عصماء ـ فرحتي ما الها وصف ولا تعبير ولهفتي لشوفته ونار كلبي وشوكي اله ولرجوعه لحياتي واني تعبت من غيابه حيل تعبت سنين أعاني وأتمنى اسمع منه كلمه تطيب خاطري الحمدلله من رجعلي ورجع لبناته .
من سمعت صوته وبلغني راح يجي ملگت الدنيا ومن شفت طوله وعيوني تكحلت بشوفته طرت من الفرحه بس صدمني بروده ما توقعت منه هالبرود واني منتظرته عالنار ومنتظره يسلم عليه حتى استكثر عليه كلمة شلونج بس غصيت بيها وسكتت وكلت يجوز لان طلع وأنصدم باللي عرفه من أهله وحقه ما الومه وعاذرته على گلشي ويكفي طلع من السجن وعلى رأسي ورأس بناته .
بحجي وأني أباوعله أنتظر منه نظره ويحن گلبه عليه يباوعلي بس مو ملهوف بارد ، گلت ميخالف حقه
واجييت هو نايم غطيته وايدي لامست كتفه تمنيت ما أبعد ايدي عنه مشتاقتلك وأريد ارمي نفسي على أكتافك تعبت من دونك الدنيا تعبتني بغيابك عشت أحزاني لوحدي فراق أختي والسجن وگلشي من بعدك كسرني بس بقيت مقاومه وأنتظرك .
ضليت احجي بگلبي وتالي نزلت دمعتي وغطيته ومشيت عفته على راحته ، للعصر كعد من النوم وصاح على أخته وكامت عليه وما صاحني وامي كاعده تباوع عليه يمه معقوله بسبب بيداء هيج بارد وياي .
غنيّه ـ لا يمه وأنتِ شعليج مو جنتي تروحين عليه السجن گلشي ما بي يحاجيج وما عاتبج أبداً بعد شگو
ـ بس مو نفس باسل قبل لايدخل السجن
ـ أي لعد يمه تردينه يطلع مثل ما يدخل أكيد يتغيير وهذا سجن لا يوم ولا يومين سنتين واشهر كلهن من عمره اصبري عليه وأنطي الوقت لاتضلين تفكرين ما بي شيء هو يصيحلج .
ـ يمه خايفه أخاف ما يريدني بعد .
ـ وليش ما يريدج شبيج أنتِ .
ـ ما أدري خايفه
ـ ولج يمه بنيتي ترى جان بالسجن مو بالزياره الله يدري شلون نفسيته هسه وهو أبن عز ودلال ما ذايك التعب ومن طلع وأنصدم بإهله والاتنسين مصيبة أختج مو هينه ، أصبري يمه اصبري
ـ ما جاوبتها وأجتي ليال ها شيريد أذا يسبح وصيت أمي جابتله ملابس حضرتله الحمام .
ـ لا حجه وياي علمود ليث گالي هم أتصل
ـ اي شكلتي اله
ـ جذبت عليه استحي خوما اكوله حجيت وياه روحي أنتِ عليه وافهمي منه .
ـ تمام وينه هو
ـ دخل بالغرفه .
ـ تمام هاج هيفاء عفتهن ورحت عليه لگيته واكف يم الشباك يدخن وصافن وصلت يمه وما حس بوجودي الحمدلله على سلامتك ، باوعلي وصفن بوجهي نزلت رأسي واريد ابجي من كثر ما مخنوگه وخايفه من بروده
ـ الله يسلمج شبيج مدخنه
ـ أني لا ما بيه شيء رجع يباوع من الشباك تقربت لزمت ايده بارده ، وصيت أمي جابت الك ملابس داخليه وحضرت الك دشداشه أبويه اذا تريد تسبح حجه بدون ما يباوع .
ـ وصيلي على مكينة حلاقه الحق لحيتي مالي خلك اروح الحلاق .
ـ تمام هسه اوصيلك تريد شيء بعد
ـ لا
ـ عفت ايده ورجع لزم ايدي ورجع عافها صفنت عليه نفس وگفته عفته وطلعت من يمه لازمه گلبي عصماء ميخالف عذرته وصيت على مكينة حلاقه وانطيته وكف عالمغسله وحلق لحيته بقى فقط الشوراب وازادت وسامته وسلب گلبي فوك حنيني إله وفراقه الأخذ من عمري عمر وسلب عافيتي وحيلي بغيابه عني .
دخل سبح وطلع بالداخليات ولحگته بدشداشه أبويه أخذها مني لبسها وانطيته عطر ما رش بس من مشه تلمس خدي بسرعه وراح الاستقبال وتلمست خدي ومشيت باوعتله صافن على بناته يلعبن گباله وباوعلي شافني صافنه عليه ونزل رأسه ، دخلت المطبخ ساعدت أمي بالعشه وتعشينا هو ما تعشى ويانا
لليل طلع وصاحلي .
باسل ـ عصماء
عصماء ـ أي رحتله ها عيني .
ـ أنطيني فلوس اريد اطلع اجيب جكاير .
ـ أي هسه رحت جبتله وراح وضليت أنتظره رجع بس ضل كاعد بالحديقه ما دخل البيت وخلص باگيت كامل وبلش بالثاني وتالي رحت نومت بناتي وفرشتله ونمت بصفهن وهو ما أجه واجتني أمي
غنيه ـ گومي روحي على رجلج شگو عايفته لوحده ومكابله بناتج .
ـ شسويله يمه هو ضايج من أهله اني شگو عوفيني ما اروح وهو مو بس معصب على اهله وعليه معصب الدنيا كلها ما تشوفينه بس يدخن وعيونه بكصته .
ـ حقه ولج حقه ليش قليل اللي صار بي شال دم أختج سنتين بركبته بس علمود لايطعن بشرفها وبسمعتها ويگولون عليها منتحره بس گولي منو مثله يسوي سوايته وأنتِ عايفته وتردين هو يجي عليج لا هاي العايزه شو كومي عليه .
ـ أستغفر الله
ـ عصماء لاتشلعين گلبي ما ناقصه
ـ ماشي يمه رايحه بس صوتج لايجي ويسمعنا شيگول
ـ يگول مرتي أبرد من الثلج
ـ راحت ونفضت الغطا وطلعت عليه وهو نفس كعدته وجگارته كعدت بصفه أجيبلك شيء أسويلك عشه
ـ لا ما أريد شيء .
ـ محتاج تحجي .
ـ لا محتاج أبقى لوحدي
ـ يعني أروح ما رد عليه وكمت ورجعت بفراشي ونمت وعفته وضليت ما أجاني النوم وحسيت بي أجه سويت روحي نايمه وفتحت نص عيني شفته بعد الغطا ونام بصف بناته وخله ايده على راسه وگبل نام وأني هم نمت ومر كم يوم وهو نفس وضعه وليث يتصل قصص وروايات عراقية كرار صلاح على موبايلي وليال تحجي وياه وتالي تعارك وياها وباسل سمعها تحجي وياه اجه سحب الموبايل منها وصاح بيها
باسل ـ أني مو حجيت وگلت ما تحجون وياه واذا يتصل محد يجاوبه اشوف كلمتي ما ألها أهميه وتحجين وياه
وهاي أنتِ العاقله واوصي بيج .
عصماء ـ بس ليث ما عليه والرجال ما قصر سوه اللي عليه وأكثر ليش عايفهم وترجع تحاسبه وتلوم بي وصار خطيبها شيء أكيد تجاوبه
باسل ـ أنتِ لاتتدخلين أطبكي عالصفحه محد طالب رأيج وموبايلج جيبي يمي وأشوف منين يتصل وأذا أحد يوصل أطرده .
عصماء ـ باسل ما يصير هيج أنتَ جاي تغلط مهما يكون هذا أبن عمك
باسل ـ أني شحجيت مو گلت لاتتدخلين
ـ وليش ما أتدخل ليش مو من العائله كل شويه گايل لاتتدخلين
ـ دسگتيي هواي أعتبروج من العائله وانطردتي أنتِ وبناتج أكو رجال شريف لحگج لو اجه وسأل عليج وعلى بناتج شتأكلين شتربين ولا شريف وصلج ، لهذا أحترمي نفسج وصمي حلگج واذا سمعت الج صوت أهينج خليني بضيمي واشوف شغلي عدل .
ـ أصم حلگي محسسني غريبه عنك وعن أخواتك ما أتدخل بمشاكلكم وأنت أول واحد ما شايفني من العائله
ـ منو جايب طاريج ليش گوه تريدين تنهانين
ـ گام يصييح عليه وأنگلب واحد ثاني ليش تصييح عليه اني شحجيت كبل كبيت بيه
ـ عمه سكتيها رحمه لأهلج سگتيها ترى البيني مكفيني ما ناقصها ووصيها لاتتدخل .
ـ ليش ما اتدخل .
ـ عمه سگتييها .
غنيه ـ سگتتي غضب على يومج شجاج ثكبتي شو امشي من كدامه وعوفي هو وأهله شگوو تدخلين
زايده منج .
عصماء ـ أخذتني الغرفه واجتي ليال واني صرت نار وأعصابي فولت عليه وأنقهرت من كلامه
ليال ـ ليش رديتي عليه شجاج أنتِ مو هيج ومو كتلج عوفي أعصاب ونفسيته تعبانه هيج احسن رجع عليج .
عصماء ـ هو متحمل عليه لكاها حجه ورجع عليه
ً ليال ـ أي متحمل عوفي لما تهدأ أعصابه ونشوف تاليها وهو قاهرته سالفتي وسفرة لقاء وأنتِ رجع ما لكاج هم الله يساعده صارله سنتين بالسجن قابل جان بزياره أصبري وتحملي يا عيني وأنتِ گلبج جبير وهو بهيج وضع تكونين وياه وتساندي لو تصيرين ضده طبعاً يرجع عليج وكالج لاتتدخلين كوليله اي هذا هو
ومن يهدأ روحي عليه وأعتذر منه يولي والله خطيه انقهرت عليه شلون يباوع لبناته والف حسبه أباله
ـ الله كريم وينه هو هسه خوما طلع .
ـ لا كاعد بالأستقبال يگلب بموبايلج صُدك حذفتي محادثات بيني وبين ليث ما جاي أذكر اخاف ضلن شكد عيب .
ـ لا حذفتهن لايضل بالج ، راحت وضليت ما طلعت لليل أمي صبت العشه وتعشوا اني ما تعشيت .
غنيه ـ گومي تعشي رجلج عينه عالباب عوفي الزعل وگومي
عصماء ـ يمه فدوه لعينج عوفيني ترى اني هم شفت ضيم خاف هو جان مسجون أني نركعت بالدنيا من كل صوب ويحققون وياي كل عيطه منهم ينشف دمي عشت وشف خوف يا أبو خوف لو من جنت أطلع مثل الحراميه والخوف ياكل ويشرب وياي لانائل يشوفني لا جواهر تسويلي سالفه انهزم هزيم بس علمود الزم محامي وأطلعه لو من اجيتكم شحجيلج يمه وبالأخير يطلع هيج يجازيني يحجي ويصييح عليه كدامكم .
غنيه ـ ميخالف يمه ميخالف رجلج تحملي لعد الرجال منو يتحمله لو امه لو مرته وامه الله يرحمها ومن قهره على اخواته يتيمات يمه وهذن أمانة امه هم خطيه طلع لكاهن هذا حالهن وهو اخوهن الوحيد ويحبن ويعزهن ما شفتي اخيته ما رضت عليج يضل اخوها وتمرمرن وراه موزين طلع من السجن مو جنتي تكولين اعيش على خبز وبصله بس يطلع وعلى رأسي ورأس بناتي شو هسه كلبتي .
ـ ما كلبت بس مقهوره منه سلام ما سلم عليه بس اعرفه ما مقهور بس من أهله لا مقهور من سالفة بيداء ويجوز بعد ما يريدني بعد وكرهني .
ـ هم رجعت وتالي وياج تردين تخسرين رجلج
ـ يمه عوفيني
ـ عايفتج دضلي .
ـ راحت وبجيت والغصه بصدري وكملوا وشفته أجه كبل مسحت دموعي ونزلت رأسي ودخل قفل الباب .
ـ صغيره أنتِ تزعلين على الأكل واني شحجيت وياج گبل زعلتي وطنكرتي
ـ مـا جاوبته
ـ بطلي هالتصرفات وكومي تعشي البنات ما أكلن لأن أنتِ ما موجوده .
ـ شايل هم البنات مو همي ، گمت وفتحت الباب وطلعت وعفته لكيتهن كاعدات بالمطبخ كعدت عشيتهن وهو بعد ما شفته لثاني يوم نمت بالغرفه يم امي وليال وهو وأبويه بالأستقبال ولعصر جنت مسبحتهن كاعد أمشطلهن واجه هو وليال كبل طلعت
ـ شگد عندج فلوس .
ـ عندي
ـ شگد عندج
ـ ما حاسبتهن بس عندي فلوس ذهب البنات وذهبي وذهب أخواتك بعته كله وانطيته اتعاب المحامي وبعد يطلبني قسم .
ـ ورقم المحامي وين أني اروحله وأنطي .
ـ موجود بموبايلي أسمه المحامي سراج .
ـ وشگد يضل عندج
ـ ما أعرف ما حاسبتهن ليش محتاج فلوس
ـ أي فد ٧٠٠ الف .
ـ گمت طلعت الفلوس وهو فوك رأسي وشاف ذهب خالتي تلمسه وصفن
ـ هذا مو ذهب أمي
ـ أي من طلعت من البيت البنات أنطني ذهبهن وذهب خالتي واني بعت الذهب كله حتى ذهبي وذهب بناتي بس ذهب خالتي گلبي ما أنطاني أبيعه بقيته .
ـ ماشي
ـ انطيته مليون ورجع الباقي وطلع ما عرفت شيسوي بالفلوس ولليل رجع جايب موبايل وخط وملابس تراكسود وداخليات ومحلق يم الحلاق ومشتري للبنات حلويات وكعد يسوي بموبايله ودزلي موبايلي بيد غنى
فتحته لكيته واصلني طلب صداقه فتحته هو لان مخلي صورة البنات ثلاثتهن باب الاستقبال وافقت عليه .
دخل سبح وطلع يباوعلي تجاهلته وعبرته مقهوره منه
ما تحملت ملابسه يضلن دخلت اغسلهن وشميتهن وبجيت شگد صاير قاسي ولا عبالك باسل الأعرفه هذا شخص ثاني ، غسلتهن وطلعت لگيته يخابر وعصبي
ليال شگو شبي ويامن يحجي .
ليال ـ جاي يحجي ويه ليث هسه جنات أتصلت عليج وجاوبتها گالت لقاء راجعه من الأمارات وهو سمعني احجي وياها وسحب الموبايل وعرف ورجع خابر ليث .
عصماء ـ والله بالعصبيه ما تنحل الأمور ولقاء هسه تجي لا
ليال ـ ما أدري جنات گالت ليث ما يقبل يجيبها
عصماء ـ باوعتله يحجي بعصبيه
باسل ـ صار ساعه أحجي وياك أجنبي لقاء هسه تجيبها
مشگلتك والله أنت سفرتها وأنت ترجعها شنو تساومني على أخواتي شنو أنطيني ليال وأنطيك لقاء أكيد شارب أنت ، أخواتي يمي وأنت ما الك شيء أي هذا أخر كلام ولقاء هسه تجيبها لا أني اجي بنفسي أخذها .
عصماء ـ قطع الأتصال وباوعلي راد يحجي بس سگت وليال أتصلت على جنات
ليال ـ أكولج خابري على لقاء خل تشوفلي موبايلي بغرفة عمتي نسيته لان أتصل عليها ما تجاوبني خل تجيبه وياها يله أنتظرج .
عصماء ـ كعدت يمها ولقاء أتصلت
ليال ـ ها لقاء شلونج شلون الاجواء يمج تجين مو
لقاء ـ صايره حرب هذا ليث مجلب بيه ما انطيج الا
أخوج ينطيني ليال خطيه ليش هيج هو شعليه .
ليال ـ أي محمله الذنب حتى حظر رقمه من موبايل عصماء وما يقبل احجي وياه شابعه قهر عليه وهو هم زعلان مني
لقاء ـ منو الزعلان ليث .
ـ أي تعاركنا فدوه جييلي موبايلي
ـ موبايلج يم ليث هسه راح نجي وأجيبه وياي
ـ تجون وباسل شلون
ـ يحجي وياه بلكي يقنعه الوضع هسه أختلف عن قبل وليث ما اله ذنب هو شعليه قابل ولي أمرنا
ـ تمام عيني .
عصماء ـ روحي أحجي وياه وضحيله گلشي قبل لايجي ليث بلكي يتفهم .
ليال ـ لا يمه ما أكدر هسه تجي لقاء وتحجي وياه هو يسمع منها أروح اغير دشداشتي هسه يجي ليث .
عصماء ـ ماشي عيني راحت وخطيه انقهرت عليها فوك معاناتها وأنجمعت بي طلع الها باسل وطناكيره علينا
گمت غسلت البنات وغيرتلهن وكشخن وراحن كعدن يمه ومن يوم طلع هنا مگابلته ما يطلعن من يمه
ومر الوقت وأندك الباب وأمي گامت فتحت الباب ودخلوا ليث وجنات ولقاء وباسل وكف باب الاستقبال واجتي لقاء ركضت عليه وهو فتح حضنه وحضنها قوي
لقاء ـ باســـل يا بعد روحي وأخيراً طلعت الف الحمدلله على سلامتك شلونك اخبارك .
باسل ـ زين الحمدلله شمأخذج لـ الأمارات
لقاء ـ قصه طويله اسولفها الك
باسل ـ گوليله خل بمشي أحسن ما تصيير مشكله
لقاء ـ بس باســـل هو ما عليه
باسل ـ لقاء لاتناقشيني خلي يروح جنات شجابج
جنات ـ أجييت أشوفكم ومشتاقه للبنات .
عصماء ـ أستغفر الله هذا شبي خطيه جنات ضلت حايره وأجتي يمي سلمت عليها وليال أنحصرت بالمطبخ تريد تطلع بس تستحي من أخوها .
لقاء ـ اسفه مــا سلمت عليج .
عصماء ـ لا عادي عيني معذوه هي ضلت عليج گبل باوعلي تجاهلته وسلمت عليها وليث واكف يحجي هو وأمي وباسل اشر لـ لقاء .
باسل ـ لاتنسين
لقاء ـ ماشي بس أسمعه بالأول والله زواجه من ليال
باسل ـ لقاء لاتناقشيني .
عصماء ـ دخل الاستقبال وليال مدت رأسها تباوع
ليال ـ ها راح .
لقاء ـ واكف خطيه والله شنو هاي قهرتوني عليه
ليال ـ سگتي يمعوده مو بگدي موبايلي وين جبتي
لقاء ـ يم ليث هسه أجيبه كتله كال أني انطي الها
ليال ـ خرب مشتاقتله شو وخري خل اشوفه
جنات ـ باســـل اجه
ليال ـ لا بربج
عصماء ـ خرب خطيه رجعت للغرفه ميته خوف وباسل طلع عليه وشگله عصبي وبمشي سريع بس لا يتعارك وياه لقاء روحي عليهم .
لقاء ـ ما يصيير هيج شو رجلج عايف جواهر وأبويه وعمامي كلهم وجدي وجديتي وملاحك ليث لو لان عرف بي خاطب ليال يريد يشلع گلبه وگلب ليال .
عصماء ـ شمدريني والله ، وگف حجه وياه وليث بسرعه مشه بدون ما يحجي شيء أكولج موبايل ليال خطيه .
لقاء ـ وين أكدر أجيبه مو تشوفينه شلون وأكف ويباوعلنا هذا مو باسل أخاف مبدلينه ، صدك شلون جان لقاءكم
عصماء ـ لوز يخبل لقاء روميو وجولييت
لقاء ـ لا واضحه الأمور .
عصماء ـ دخلنا البيت وليث راح وليال كاعده بالغرفه ها
ليال ـ ليث راح
لقاء ـ أي هسه راح
جنات ـ راح وما شفتي
ليال ـ وين أشوفه ولقاء موبايلي جبتي من عنده
لقاء ـ لا والله باسل هو طلع عليه وأني ما لحگت
ليال ـ خرب بعقلج هسه شلون أنطيني موبايلج أخابره
عصماء ـ أخذت موبايل لقاء وأتصلت عليه ما يجاوبها ها
ليال ـ ما يجاوبني أكيد زعل هسه شلون لقاء .
لقاء ـ أني أحجي وياه وأفهمه على گلشي لازم يتفهم الامر والوضع هسه أختلف هو منو ضل بس أبويه وتعبان والله فد أنقهرت عليه يكسر الخاطر وگال لـ ليث گوله خل يرجع للبيت هو ومرته وبناته ويجمع أخواته وأني أمشي وأعوفله گلشي بجاني والله يعني هو صح غلط بسگوته وخله جواهر تتمادى ويه الكل بس نائل أخذ روحه وكسره وحتى جواهر نكسرت بعد سفر نائـــــل مو بس كسرها والله أني بس دخلت الفرع أختنگت خنك لان هو ما موجود وهو أخويه مو عاد هو أب وأبنه الجبير وباسل حقه محد يلومه بس يضل أب والأب ما يتحاسب
عصماء ـ تحجي وتبجي وثلاثتهن بجن على نائـــــل واضح عليهن حـــيل مقهورات على سفر أخوهن بس أخ باسل لو ينطي مجال ويسمع من أحد وما يظلم أحد وياه .
لليل كاعدات ثلاثتهن جنات تحجي ويه حيدر وليال تتصل على ليث ما يجاوبها ولقاء تگلب بالموبايل وصافنه وطلعت هو صافن وباوعتله وحس بيه گبل مشيت ورحت أخذت بناتي من يمه ونومتهن بالغرفه
وفرشتله ويباوعلي بس اني متجاهلته ونمت وأني مخنوكه وبصدري عبره منه .
ومر شهر كامل ونفس الحال ما تغيير شيء ولقاء حجت وياه ضل ساكت ما حجه شيء وجنات ضلت أسبوع وأجه أمجد أخذها لان حيدر بالدوام وراحت الله وياها .
وبيوم أندك الباب وأني جنت أغسل الحوش ردت أمشي افتح الباب صاح بيه
باسل ـ رجعي أني أفتح .
عصماء ـ عود يغار
ـ عيدي شگلتي .
ـ هيج ما گلت شيء عفته ومشيت ودخلوا عمي
كريم ورشيد وفارس وسجاد بس أستغربت ليث مو وياهم خطيه يمكن أنقهر وزعل وطلعت ليال باوعت
ليال ـ ما اجه مو
عصماء ـ لا
ليال ـ أي زعلان يله هسه بلكي يحجون وياه وبعدين بس أرجع هو يرضى .
عصماء ـ أن شاء الله عيني ، راحت واجتي امي
غنيه ـ حضري مي وسويلهم جاي ، غنى جنى تعالن يمي جده
عصماء ـ كعدت والبنات يمها وحضرت ماي وخليت الجاي عالنار واجه هو أنطيته الماي بدون ما أباوعله وشويه ورجع
باسل ـ صبي الجاي صبي
ـ بعدني هسه أصبه
ـ لاتنترين
ـ ما منتره مو كدامك جاي احضر الأستگانات
ـ جاوب لاتردين بوجهي لا أكوم الأستكانات برأسج وخلصي هسه أرجع أخذه
ـ مشه مزعوج وأني طگ گلبي منه وأمي گامت تحجي عليه أي خبلي عليه خاف هو ما متخبل ناقصتج أني
غنيه ـ أي أخبله ليش هو متخبل لو أنتِ .
عصماء ـ أني خلف الله عليج يمه رجعتي عليه
ـ أي أرجع عليج لان كدامي شفتج تنترين وأني كاعده ما أحترمتي تستاهلين
ًـ وين منتره شبيج يمه
ـ مو شفتج تجذبين عيني ، يله صبي الجاي ولاتضلين گالبه خلقتج بوجه .
ً ـ أنتِ ضلي طابگه وياه ضلي
ـ أي ليش ما أطبك وياه شمسويلج
ـ ما أوصيج لعد هم أخسريني مثل ما خسرتي بيداء
ـ ليش تردين تنتحرين مثل أختج تهدديني بالموت حضرتج خلف الله عليج يمه ضلت بس عليج وگلبي شابع لجمات .
ـ أنهضمت وگامت گوه تمشي وأني تندمت وأجه باسل شافها ورجع صاح بيه
ـ شبيه أمج شحجيتي وياها
ـ ما بيها شيء أني وياها .
ـ صبي الجاي صبي بعدين يصير خير .
ـ گملته وأخذه وضل بالي يم أمي طلعت أدور عليها لگيتها ورة البيت تبجي أني شجاني هيج حجيت وياها وقهرتها ورحت عليها وحضنتها أسفه يمه حقج عليه بس والله من الضغط اللي صار عليه وتغيير باسل ما أعرف گمت أخربط والله من نار گلبي ، فدوه لعينج لاتزعلين وتنقهرين مني وأني من الي وضلي غيركم .
ـ أحنه منو ضل إلنا غيرج مو أنتِ يمه ولاتوجعين گلبي وتحاجيني بالموت ترى گلبي خلصان وموت أخيتج هدلي حيلي كسرلي ظهري خاف ما تدرين لا عبالج هينه عليه بعز شبابها وماتت منتحره ما شافت شيء من حياتها وأني هضمتها وصوتها يأكل ويشرب وياي لاتوجعين گلبي والله ما ناقصه خليني أشبع منج ومن بناتج لما يجي يومي والحك أخوج وأختج ماتوا وهما عاشوا شبابهم ما شافوا شيء من حياتهم .
ـ وكعت يم رجليها أبوس بيهن رحتلج فدوه يمه لاهيج تحجين ينكص لساني فدوه سامحيني يمه وأرضي عليه
ـ ما زعلانه منج والله يرضى عليج دنيا وأخره بس علمودج يمه ما الج الا رجلج وهذا الطبع النترر والشمر ما يحبه الرجال وكتلج أصبري عليه ولج يمه عندج من عنده ثلاث بنيات ما تخافين على ساعه يطگ كلبه ويفقد أعصابه يهج ويعوفج شتسوالج ومنو يفيدج بس گوليلي ومنو دايم الج أني لو ابوج اللي من ماتت أختج انعگد لسانه باوعي على حالنا وديري بالج على زلمتج وحسني أسلوبج وصبري على مره ميخالف تحملي يمه .
ـ أن شاء الله عيني أنتِ يمه يله گومي وياي لان شافج ضايجه وسألني عليج وتحلفلي .
ـ أي شفتي حتى عليه ما يرضى وين أكو هيج رجال والله يمه ماكو ولاتنسين اللي صارله وصار لأخواته بسبب أختج اللي هي بنتي وكل هذا عاف اهله وكاعد ومگابلنا حمدي ربج وشكري على هيج نعمه عندج .
ـ أن شاء الله گامت وياي وباستني ومشينا وهي راحت المطبخ وأني رجعت يم البنات كاعدات ها شصار ما عرفتن
ليال ـ لا والله أحنه نسألج ما سمعتي شيء
عصماء ـ لا والله ما خليت بالي يمهم يله هسه تبين
وطلعت لقاء وشويه وأجتي
لقاء ـ ليال أذا عمي كريم طلب ترجعين وياه لان سمعت أسمج بالسالفه ترجعين
ليال ـ الصراحه
لقاء ـ أي طبعاً
ليال ـ أي أرجع أني من ماتت أمي تمرمرت بحياتي ما شفت يوم حلو وهواي عانيت وتعذبت وهل كم شهر عشت بسعاده وفرح من خطبني ليث وكلجن تدرن بيه أحبه ولا يوم كدرت أنساه وهو أقوى مني شلون ما أرجع وهو مشيت وضل وراي شايط ومتلوع .
لقاء ـ أدري أني الأدري وفدوه لحبكم شگد حلو والله يفضها عالخير وتنجعمون ونفرح بيكم .
عصماء ـ أن شاء الله يارب ودخل باسل ورجع باوع لأخواته وگال .
باسل ـ راح نرجع للبيت بس هسه أنتن تروحن وياهم قبلي تنظفن البيت وأني أرتب أموري وأخلص شغلي والحگجن .
لقاء ـ أن شاء الله عيني يله ليال گومي .
عصماء ـ أشرت لـ ليال وطلعن وردن الباب وراهن وأني گمت ومنعني ضغط على أيدي قوي وحجه بعصبيه
باسل ـ أبقي هيج أبقي بس خلي أخلص شغلي ويصفى بالي وأتفرغلج أذا ما كسرتج أني مو باسـل .
عصماء ـ عافني وفتح الباب وركعه وراه الا فزيت ورفعت ثوبي شفت طبع أظافره وبجيت ليش هيج صاير وياي أشسويتلك أني مو تفركس گلبي بغيابك هيج تجازيني باســل ، دخلن الباب ومسحت دموعي
لقاء ـ ها شصار خوما تعارگتوا .
ليال ـ تضلون هيج ، على كيفج وياه ياعيني أنتِ هم ليني وهسه المشكله البينه وبين أهلي أنحلت
عصماء ـ لا ماكو شيء من رخصتجن أروح أشوف البنات عفتهن وطلعت لگيت جايب الاستكانات غسلتهن والبنات تحضرن وگاموا ودعتهن وراحن الله وياهن وضل هو حتى گام ما يباوعلي وأني من كثر ما مهضومه منه المكان الكاعد كمت ما أتواجد بي عزلت نفسي وأمي بس تباوعلي ما حجت شيء .
ثاني يوم الصبح كاعده بالغرفه وأجتني أمي
غنيه ـ يمه عصماء باسل حجه ويانا وگال تمشون وياي ما تبقون أهنا مأخذلنا بيت قريب من بيتكم وگال تسكنون بي يعني حتى هو راجع لبيته وأهله يفكر بينا وما يعوفنا لوحدنا أني وأبوج وأنتِ عازله نفسج بهل الغرفه وهو يفكر بإهلج وشايل همهم أكثر من نفسه
عصماء ـ ما أستغربت لان أدري بي گلبه طيب وفرحت لان أهلي قربين مني وجنت شايله هم اذا رحنا وين يضلون وهما كبار بالعمر بس طلع مفكر بيهم قبلي وخطيه وأمي فرحانه وتبوس بناتي
غنيه ـ گالي تحضروا يجي فارس يأخذنا گومي جمعي ملابسج وملابس رجلج وبناتج يله بنيتي يله يمه گومي وكولي يالله هو يجيج ويراضيج .
عصماء ـ أي يمه عفتها تجمع ملابسها هي وأبويه وذكريات والبوم صور لـ أخويه سجاد وبيداء شالتهن وضمتهن وگمت جمعت ملابسنه وأغراضنا تحضرنا
وأجو فارس وسجاد وسجاد جايب سيارة باسل ودخلوا سلموا وفارس أخذ أمي وأبويه وسجاد وراحوا وضلينا بس أني وياه وبناتنا .
أجه عبرني شال الجنط خلاهن بالسياره ومشيت وراه صعدت بالصدر وهنا ليورى فرحانات بسيارة أبوهن
وهو طلع يحجي ويه المأجر وأجه شغل السياره بدون
ما يباوعلي . وطلعنا راجعين لـ بغداد ولبيتنا .
طول الطريق ساكتين والبنات نامن وصار هدوء لحد ما وصلنا نفس المنطقه بس الفرع الثاني طبگ يم باب بيت عرفت هذا البيت مأخذه لأهلي .
باسل ـ نزلي ساعدي أهلج برتيب البيت .
عصماء ـ ما جاوبته ونزلت يله ماما نزلن
باسل ـ لا عوفيهن يروحن وياي .
عصماء ـ ماشي ، نزلت وفتحت الباب ودخلت وهو اخذهن وراح ودخلت البيت صغير ومرتب وأبويه كاعد بالحديقه شافني وأبتسم تقربت بسته من رأسه
ودخلت على أمي لكيتها تعزل البيت بي أثاث واجهزه كهربائيّة وكعدت انظف وأرتب أني وأمي فرحانه خطيه والبيت حتى غرفة نوم بي وجربايه الهم اوادم كبار فرحتلهم وأرتاح گلبي عليهم
غنيه ـ باسل بيش أجازي ما أوفي حقه الله يرضى عليه
عصماء ـ ما حجيت ولليل تأخر الوقت هو ما أجه وعيوني عالباب وعلى الموبايل ماكو ولا وصلني شيء والبنات ما سألن عليه بس عادي عماتهن موجودات تعودن عليهن معقوله هاي هي لهنا وأني أنتهي من حياته أمن عليه وعلى أهلي وقربيين من عنده وهو أخذه بناته وأخواته وراح بعد ما سأل عني معقوله تسويها باسل وتعوفني وبعد ما تريدني .
غنيه ـ ها يمه شو رجلج ما أجه
عصماء ـ ما أعتقد يجي بعد
ـ لا أسم الله ليش ، خابري شوفي وينه
ـ ما يحتاج أخابره لو يريد يجي جان أجه حتى الوقت تأخر
ـ يجوز ملتهي وترتيبات وصارلكم شگد عايفين البيت هسه گومه يريد من عنده شغل وبناته هسه دوخنه ميخالف يمه هو يجي وأنتِ هم خابري وشوفي وين صار .
ـ هسه ، عافتني وراحت نامت ما تدري من كثرما مقهوره حتى موبايلي قافلته ضليت كاعده أنتظره كل عقلي يجي وما أجه تالي لگيت أمي فارشتلي تمددت والأفكار أدك برأسي مية الف فكره تخوف سكنت عقلي يمكن هاي هي لهنا وأنتهيتي عصماء وهو بطريق وأنتِ بطريق دخل باسل السجن وطلع باسل شخص ثاني وصفيتي وحيده وبعد كل هذاك التعب والمعاناة هيج أتجازه .
__________________________
لقاء ـ بعد ما سافرت لـ الأمارات كل ظني حياتي خلص لهنا وتوقفت وهذه النهايه وباب قلبي قفلته على حبه
وعشت حياتي بالأمارات بس ما كدرت أتأقلم نهائي ؏ الرغم دوله حلوه وكل أساليب الراحه متوفره بس ما گدرت أنتمي ولا أعيش وأتاقلم مثل بيت خالي شگد حاولوا وياي ونطلع ونفتر وشغل ولهيت نفسي وحاولت بس مثل العراق وناسي وأهلي وأحبابي ما لكيت ضليت أحن وأشتاق وروحي ترفف عليهم بالأخص هو يوم عن يوم هالحنين يتضاعف .
بس بقيت ثابته على موقفي ما تنازلت ونهايتنا جانت من طرفي بس المراقبه مستمره مني وأعرف هو كذلك لان أحساسي ما يخيب بي وبحبه اليه ومتأكده ينتظرني أرجع العراق ومنتظر فرصه تجمعنا مره ثانيه
والأكدلي وثبتلي هالشيء رسالته أجتي بوقت خلتني مصدومه ومذهوله بهل الخبر .
أمجد ـ مبروك عليكم أخوج باسل طلع من السجن
لقاء ـ جاوبته وأكتب وأني ابجي على فرحه وشوك حنين
وصدمتي بهل الخبر ، صدك هالخبر
ـ أي صُدك
ـ منين عرفت منو گالك ، شافها وما رد عليه رجعت أتصلت على جنات ما جاوبتني وعدت الأتصال عليهم كلهم ماكو رد ، رجعت دزيتله بس أريد اتأكد
ـ ليش ما متأكده من كلامي كيفج لاتصدكين
ـ لا مو هيج بس مصدومه ما جنت متوقعه شافها وما رد عليه عود شيسمونها ما تجاوب على رسالتي
ـ أجاوبج بشنو
ـ أي شيء وجاي أسألك على الخبر أذا ما تريد تجاوبني ليش بلغتني .
ـ ليش بلغتج
ـ أي
ـ هيج ما بيها ليش والظاهر أنتِ ما مصدگه مشكلتج بعد
ـ ترة من حقي اتأكد
ـ اي هذا هو براحتج .
ـ ضوجني وشمرت موبايلي وبعدين ليث أتصل عليه وبلغني وأهنا طرت من الفرحه وخلال أسبوع رتبت اوضاعي وتشكرت من خالي وعلى وگفته وياي بهيج وضع والحمدلله تفهمني وبعدها رجعت العراق وأني ملهوفه ومشتاقه لكل ناسي واولهم هو رغم بروده بالرد بس ميخالف
وصلنا المنطقه والشوراع وحنيني لهذاك الشارع وعبرنا من بابهم وعيني تباوع للباب بكل تركيز وليث باوعلي دنك رأسي على دشبول خبيث .
ليث ـ شويه أستحي مني گولي أبن عمي .
لقاء ـ وشمسويه .
ليث ـ لا خطيه
لقاء ـ ضحك وصلنا ولكيت گلشي متغيير وأولهم جواهر أنصدمت بتغييرها مصيبه هاي شغييرها أخاف اخذت طقس من الراحه وبعدين تعاود بكل قوه وتركع الكل بسحر سادسي الأبعاد تخلي طشار العائله ماله والي ولو بكل الحالات ماكو والي هي الحاكم الأول المتسلط بحضور السحر وغيابه الظالم يضل ظالم .
والصدمه جانت يم باسل بس مع ذلك عاذرته المهم طلع من السجن الباقي كله يهون المهم سلامته وأنحمعنا مره ثانيه ورجعنا بيتنا وبالطريق ليال أخذت موبايلي وأني أنتظرها تخلص عيني بلابل الحب نريد نشوف الدنيا وناسها .
ليال ـ صوتج فضحتينا هاج .
لقاء ـ ضحكت عليها وعمي يحجي ويه فارس
كريم ـ گملتوا البيت الگال عليه باسل
فارس ـ اي يابه جهز
كريم ـ والاثاث لاتخلون نقص
فارس ـ أن شاء الله
لقاء ـ يا بيت احاجيج يا بيت
ليال ـ شمدريني والله بعدين اسأل ليث
لقاء ـ أخذت موبايلي كلبت بي وشفت رساله من ليث .
ليث ـ وين صرتوا ترى ديالى بصفنا ادري تمشون على بيض لو ادري هيج اني جاي مأخذكم ، بله منو يسوق
لقاء ـ هاج دزلج أخذته وجاوبته
ليال ـ فارس يسوق بس عمي كريم ما يقبل واكف على رأسه
ليث ـ حلو وشوگت تفض على رأسي
ـ ما ضل شيء هسه نوصل .
ـ تعالي لبيتنا مو تروحين للبيت جدج لان وراج متعارك ويه الكل محد يحجي وياي .
ـ عزه شمسويه وراي
ـ لعد شعبالج أخليهم هيج وأني محترك بناري عليج وأخوج عالنها حرب عليه لما أكب عليهم ما يتحرگون يردون باسل هو يجي ويتنازل هو يلام بيهم عاشت ايده بس اخ لما سالفته وياي عاقبني من اخذج وحرك گلبي أخ لو الزمه أفرغ قهري بي .
ـ لا ليث
ـ والله بس لخاطرج راح أعوفه .
ـ يسلم خاطرج عادي طلع حركة گلبه بيه مو بإخويه لان أني هم أنجلبت عليك مثل ما تكول عليه الفقره انجلبوا علينا .
ـ أني أطلع حرگتي بيج مو بالحيف أنتِ بس تعالي خليني أشوفج گلشي ما أريد والله وراج صرت يتيم
وعادي أنجلبي عليه أتحملج أنتِ وجلابتج ميخالف
ـ أحبك
ـ مو بگدي وين صرتوا
ـ وصلنا عود الزم نفسك مو تحضني كدامهم عيب
ـ أنعل ابو العيب يبعدني عنج خل تفض خلال هالأسبوع اخذج حتى حنه ماكو گبل عرس ما اتحمل بعد أريدج يمي وأجاني أخوج جان هسه أنتِ يمي .
ـ عزه مو هيج ليث
ـ لا هيج وأكثر .
لقاء ـ ضحكت عليهم أرحموا بحالي أني سنگل
ليال ـ هاج حبيبي مشكوره ويوم الج .
لقاء ـ أخذت موبايلي ودخلت على محادثته ماكو منه شيء وفاتح أنترنت ودخلنا المنطقه عبرنا من شارعهم وسيارته يم الباب وليال ندهتني بكتفي باوعت وشفته طلع ما منتبه وفارس دك هورن وسلم عليه وهو رفع ايده ونظراته ناحيتنا ومشينا وصلتني رساله .
أمجد ـ يابه هلا هسه نور شارعنا .
لقاء ـ النور نورك .
ـ رجعتوا
ـ أي الحمدلله
ـ الحمدلله على السلامه
ـ الله يسلمك
ـ أخذي راحتج
ـ تمام وصلنا وفارس بخباثه دك هورن شال البيت وعمي صاح بي
كريم ـ شعندك ثولتننا .
فارس ـ علمود أبنك وفينا بوعدنا وجبنه اله مرته
كريم ـ هو أخوك خبل أنتَ هم تتخبل مثله
لقاء ـ ضحگنا وطلع ليث وفتح الباب ودخلنا وضرب أيد عمي وتصافكوا هو وعمي يضحك عليه .
كريم ـ جبتها الك هم گول أبويه ما دايرلي بال
ليث ـ كفو ينطح كفو وين أكو منك عمي .
لقاء ـ نزلنا وسلمت عليه هلاو ليث شلونك
ليث ـ زين شو وخري هسه اريد اشوف حبيبي
عيني ما تنزلين .
ليال ـ على كيفك وياي رجلي متشنجه .
ليث ـ يابه شبيها رجلج شو نزلي بس على كيفج
ليال ـ ليث وخر عيب واكفين شسالفه اني انزل
ليث ـ مو مال دلال لا والله .
لقاء ـ ضحگنا عليه وهي نزلت باوعتله وضحگت وتقدمت سلمت على عمتي ودخلنا الاستقبال وكعد مقابلنا دك نظرات وهي مستحيه ، وكعدنا وعمتي تسألنا على باسل والبنات ودخل سجاد سلم علينا وباوعلي گبل نزلت رأسي تهربت ما أعرف ليش حسيته
متغيير ونظراته من زمان أني اشك بيهن بس غلست عنه وهسه تأكدت لان يباوعلي بلهفه وأبتسامه .
ليث ـ وين جنت لعد
سجاد ـ كاعد يم عمي سعيد صُدك سأل عليجن .
ليال ـ يله لقاء گومي .
لقاء ـ أي يله شلت جنطتي وهو بعده واكف يم الباب ما يوخر وعبرت من كدامه كلش وانخبصت وليال ما اعرف وين راحت خرب ليث لزمها هاي وين راحت ليال التفت وادور عليها وفزيت على صوته حجه بهدوء
سجاد ـ راحت الصاله هسه تجي .
لقاء ـ أي هزيت رأسي ضليت أنتظرها وهو واكف ويباوعلي بنظراته يتمعن بيهن وما شال عيونه أرتبگت منه وصحت ليال وين صرتي ليـــال .
ليال ـ أجيت رحت جبت موبايلي يله نمشي .
لقاء ـ مشينا وهو على وگفته ونظراته ، ودخلنا البيت وعصبت عليها وين رحتي وعفتيني هسه وگتج
ليال ـ شگو شبيج وين عفتج قابل بيت غريب
ـ شفتي سجاد ونظراته اليه خرب هذا شبي مفضوح أكلني اكل وفصلني تفصال ما عرفته مستحيل هذا سجاد .
ـ سگتي وخليها هسه ليث گالي سجاد واكع على وجه
ـ خرب لاتگولينها فدوه
ـ أي والله وليث مقهور عليه وگالي لقاء تكسر گلبه لا محال لان واضح يدري بيج تحبين أمجد .
ـ اي ليث وباسل ما تفوتهم بسرعه يكشوفننه
امشي بعدين نحجي خرب حظي منين طلعلي
" دخلنا وأبويه كاعد هو وجديتي وسلمنا عليهم وفرح بينا وأجتي جواهر بس سلمت وكعدت .
جواهر ـ السلام عليكم .
لقاء ـ وعليكم السلام رديت السلام بدون وعي اني شبيه والله سجاد ما ناقصتك هسه رجعت لاتخرب فرحتي ياربي ويحجون ويسألون على باسل وأني عقلي مو وياهم دخت دوخه لدرجه رأسي أنفخ من القلق .
لليل تعشينا وطلعنا للبيت مالتنا بعد معاناة خلص راح نرجع بيتنا اللي ربينا وعشنا بي اجمل ايامنا الحلوه والحزينه وهواي مواقف صارت بهذا البيت يكفي بي ريحة أمي ...
" ويانا عمتي نجاح وصلنا والباب مفتوح والماي موجود وأصواتهم واصله للباب منو بالبيت .
ليال ـ ليث وسجاد وأبويه يسون الكهربائيات أكو كلوبات ما تشتغل جاي يسونها يله خل ندخل ونبلش تنظيف لان باسل وعائلته باجر يرحون يجيبونهم يله نلحك نخلص
لقاء ـ دخلنا وسجاد عالدرج يخلي الگلوب وگبل باوعلي صديت وجهي عنه تهربت منه لازم ابين اله ما أريد أشوف وجهه علمود يكطع نفسه أني گلبي مو اله گلبي لأمجد .
عفت ليال وعمتي ينظفن الطابق الجوه وأني أنهزمت فوك وبلشت بغرفة باسل لـ ١٢ بالليل أني فوك كله تراب والاخشاب لمعتها وشگو ومكياجات وعطورات شمرتها كلها أكسابير واخر شيء غسلت وصعدوا
هو وابويه .
سعيد ـ ها بابا لقاء خلصتي
لقاء ـ أي بابا خلصت ، وعفتهم دخلت نظفت المغاسل وجلفتها وغسلت ونزلت وهو يم الدرج عبرته وگال
سجاد ـ شلونج .
لقاء ـ تمام نزلت وهو ضل يباوعلي وصادفني ليث
ليث ـ ها گملتي تنظيف الفوك
لقاء ـ أي ليال وينها .
ليث ـ بالغرفه هي وعمتي ، شبيج؟ .
لقاء ـ بعدين أحجي وياك عفته ورحت يمهن وليال نايمه ها تعبتي .
ليال ـ أي وما خلصنا باجر لازم نكعد من الصبح گملتي الفوك .
لقاء ـ أي والصبح هم ارجع اغسله مره ثانيه .
ليال ـ تمام أني راح انام طفيت
لقاء ـ ليش نبقى اهنا
نجاح ـ أي عمه وأبوج ينام بغرفة أمج الله يرحمها وأني هم اضل يمجن تردني لو اروح
لقاء ـ بعد روحي عمه واحلى من يبقى يمنا حضنتها وضلت يمنا نامت على سرير جنات واني بقيت كاعده واجه ليث باوع على ليال وعمتي نايمات .
ليث ـ ليالي شوگت نامت
لقاء ـ من نص ساعه تقريباً
ليث ـ أي أشتغلت هواي وتعبت يله تصبحين على خير .
لقاء ـ أوكف أريد احجي وياك طلعت وشفت سجاد وسگتت لا بعدين .
ليث ـ گولي شنو .
لقاء ـ لا عود بعدين .
ليث ـ ماشي تعالي قفلي الباب ورانا لان عمي سعيد عفته فوك يسوي باب البيتونه .
لقاء ـ أي طلعوا وأني وراهم وسجاد مشه وأندار وباوعلي نظراته نظرات واحد عاشق قديم مو يوم ويومين ، قفلت الباب ورجعت لفراشي ولكيت
رساله من عنده
سجاد ـ الحمدلله على سلامتج ردت أكولها الج بس
ما صح الوقت المناسب .
لقاء ـ ردت أتجاهله بس گلت لا وجاوبته الله يسلمك ضلعي شكراً .
ـ بس عالموبايل نگدر نسولف بالواقع نختلف
ـ لا عادي شسالفه
ـ لا مو عادي أذا عندج عادي يمي مو عادي .
ـ خرب حظي أي والله شجاوبه كتبت اله أي أحنه أخوان عادي نحشش ونضحك بينا تصير ولا يهمك
ـ أخوان! العفو من شوگت صرت أخوج
ـ خرب هذا شحجي وياه جاوبته ليش سجاد شبيك أنت من زمان صديقي الحباب .
ـ أني مو أخ ولا صديق حباب لأحد مو عاد الج
ـ يمه صخام سجاد لاتزعلني منك شبيك اليوم
ـ أي ازعلي طبج مرض بس مال تعديني أخوج وصديقج الحباب لا ما اقبلها أني ابن عمج اي .
ـ وكيفك لاتقبلها شعليه بيك
ـ جدحت الوكحه
ـ وأنت شگو أصلاً الصوج مني جاوبتك
ـ ليش شمسويلج أنتِ من تحجين وياي تنطلقين بس بالواقع تنخسلين هذا المدوخني بيج .
ـ دوخ بكيفك مشكلتك يله باي
ـ هو أنتِ بحد ذاتج مشكله ومشكله أدوخ ويله روحي نامي لان تعبتي أشتغلتي شغل خوش نسوان معدله
هم وكحات وهم أمهات بيوت ، يله باي لقاء جداحه
ـ خرب شگد غثيث عفته وصلتني رساله من أمجدي
أمجد ـ كاعده
لقاء ـ جاوبته بلهفه أي حبيبي كاعده
ـ حبيبج
ـ أي
ـ وحبيبج تعوفينه وتسافرين
ـ ليش هيج تحجي وأنتَ أكثر واحد تعرف ظروفي
ـ أعرف گلشي مو بس ظروفج بس أنتِ بسرعه استسلمتي وقفلتيها بوجهي ومع ذلك بقيت أنتظرج لان أني ما أستسلم بسهوله والأحبه أقفل عليه لو هو لو ما أحب من الأساس وأكو ويه الحب تضيحه بس أنتِ إشسويتي .
ـ يعني شُــنو أمجد
ـ شــنو
ـ ما أدري أني اسألك
ـ ماكو گلشي بس مشتاقلج
ـ تشتاقلي ما تعاتبني
ـ وحرگة گلبي بغيابج وين أوديها
ـ بعدك تحبني
ـ بعدني أحبج وحبج زاد ما نقص
ـ وأني هم بعدني
ـ گوليها ليش مستحيه
ـ أحبك
ـ شوكت يرجع أخوج
ـ باجر ليش
ـ أريد اجي أخطبج منه ما أتحمل فراك بعد
گافي سفرتج للامارات أخذت نص حيلي .
ـ تخطبني
ـ ليش عندج شك
ـ لا أبداً أنت أخو ابو كرار بعد كلمتكم ما تصير أثنين
ـ حيدر بي هون أني اضرب منه اي الخميس مناسب
ـ لا لان هسه بعده نفسيته تعبانه أصبر شوي
ـ صبرت كل هالسنين شصبر وگلبي ما مرتاح كلما أستعجل أحسن النا
ـ شلون يعني
ـ سجاد ما مرتاحله وجان يمكم مو
ـ اي جان يمنا هو وليث
ـ وليش الأ هو ليش مو فارس أو فواز أو حتى زياد ليش الا سجاد معقوله صدفه
ـ لا هو صديق باسل وليث هما علاقتهم قويه ومقربه كلش حتى أسرارهم واحد يعرف الثاني .
ـ لا تقنعيني مستحيل أصدك ، سجاد ما مرتاحله وأبصم على كلامي والخميس اجي
ـ يعني بعد ثلاثة ايام قليل
ـ مو اخليها باجر والله
ـ ضحكت لا هذا هو تعال الخميس بس انطيني وقت ارتب نفسي اتحضر بعدنا ما مستقرين خل نأخذ نفس
ً ـ بس أعقد عليج أسجلج بإسمي وبعدها على رأحتنا
وشبعي نفس بوجودي
ـ فدوه تمام هذا هو ، وحسيته خايف لا أروح منه وأحساسه بسجاد من زمان وبمكانه واني صفنت وصلتني رساله من سجاد
سجاد ـ ليش لهسه كاعده!
لقاء ـ عفواً وأنت شعليك
ـ هاي كلمة شعليك سمعتها منج كم مره بعد ما أريد بعد أسمعها
ـ لا والله ، المشكله هذا الأسلوب بيكم كلكم ولد عمي نفس صيغه الكلام تحجون بي .
ـ أنتِ گلتيها ولد عمامج ليش ضايجه من هالاسلوب ليش ما عاجبج .
ـ عرفت مغزى كلامه گبل سويتله تقييد صوجي رديت عليه رجع أمجد دزلي
أمجد ـ وينج .
لقاء ـ ها حبيبي وياك .
ـ شوفي هسه نزلت گلت لحيدر
ـ هسه رحت كلتله انطي مجال
ـ لا أحسن وگالي يخابر باسل ويبلغه قبل لانجي أخاف تصير معارضه من عمامج وأكيد يقدمون سجـــــاد
ـ ها لا ما أعتقد هو مرتبط أن شاء الله محد يعارض
ـ شمدريج بي مرتبط
ـ كلها تدري
ـ ما مبين عليه الأرتباط اليحب يكتفي باللي عنده مو يضل يباوع أهنا وأهنا
ـ شلون اوضحله مو كلها تحب مثلك صارلك شگد وبقيت تتنظرني جاوبته أي ما اعرف شمعرفني بيهم
ـ اي لاتعرفين أحسن .
ـ يله حبيبي أروح أنام تأخر الوقت الصبح نحجي .
ـ ماشي حبيبتي نوم العافيه .
ـ خليت موبايلي عالشحن وضليت أفكر ومبتسمه والصبح كعدت بكل نشاط وحماس وحب الحياة وبلغت ليال وحضنتني فرحانه وياي .
ً ـ سجاد لاتجاوبي بعد تجاهلي
ـ هو سويتله تقييد ما أجاوبه هسه عوفينا من سجاد خلينا بإمجد
ـ يروحي الف مبروك .
ـ الله يبارك بعمرج أدعيلي فدوه الله يتمم على خير هالمره اذا ما انطوا أني أتدمر أدعيلي أنجمع أني وياه
حضنتني وتبوس بيه
ـ لاتخافين هالمره أني متفائلة خلص گلشي بدأ يستقر وأجه الفرح لان من حقنا نعيش أفراحنه كافي حزن والله تعبنا ، تدرين بكل لحظه حلوه جاي أعيشها أتمنى أمي تكون موجوده ويانا وتشوفنه شكثر سعيدين وفرحانين
ـ وأني هم مثلج ياريتها موجوده بس راحت من وگت الله يرحمج يمه وأرتاحي بقبرج لايضل بالج علينا يروحي
صدك سألتي ليث ما عرفتي باسل المن يريد البيت
ليال ـ بلي عرفت يريده لأهل مرته هو شارط عليهم شروط مقابل يرجع للبيت ويستلم الشغل مثل قبل شرطه يشترون بيت ويتأثث بإثاث وأجهزه كهربائيّة كامله لأن گايل ما أكدر اروح وأعوفهم لوحدهم وعمامي موافقين على كل شروطه والاثاث من بيت عمي كريم وحتى نواعم وأغراض المطبخ عمتي وليث رايحيين السوك مشتريهن گلشي .
لقاء ـ كل هذا من بيت عمي كريم علمودج
ـ لا خطيه هما أهلها يستاهلون فد انقهرت عليها موت بيداء حيـل كاسرهم وأبوها ما يحجي وباسل زين يسوي بهيج شروط لان عصماء كل هالفتره يمهم صح اهلها بس ما عافوا باسل وابوها هو يمشي ويه بنته بگلشي ولاتنسين كعدنا يمهم شهر وأمها شلون شالتنا وطارت بينا أبداً ما قصرت ويانا ، ناس فقره على نياتهم يستاهلون ونفس الوقت قريبين على عصماء وعين باسل عليهم .
ـ أي شگو بيها خطيه يله زين عبالي لباسل يتزوج خفت
على عصماء لان هما متزاعلين .
ـ لا يابه ما يسـويها هو صح زعلان ومطنكر بس ما يلكي مثل عصماء وهسه تراضوا ورانا .
ـ الله يهدي عليها خابرتيها شفتيها وين صاروا
ـ اتصلت موبايلها مغلق وهو أخاف أتصل عليه هسه يجون ، يله امشي نكمل شغلنا وعمتي سلوى هم خابرتني تجي تساعدنا .
ـ هذا ليث دزها والله لان بالليل يباوع عليج وگال تعبت
ـ أي ولج خبصني عوفي لاتشتغلين فدوه لعينه ولحنيته يله امشي يله نلحك وهمزين ماكو غده ما نطبخ جنات كالت لاتطبخن هي ادزلنا
ـ ها اي همزين وبلشنا تنظيف واجتي عمتي سلوى ويانا واجه باسل بس البنات وياه نزلن يمشن هو دخل شايل هيفاء وعصماء مو وياه وأستغربنا ليش ما اجتي
باسل ـ لقاء اخذيهن غيري ملابسهن واذا طابخات الغده غديهن خاف جوعانات .
لقاء ـ أي تعالن اخذتها منه ودخل جنط الملابس ودخلتهن سبحتهن وكملتهن وجنات اجتي منو جابج
جنات ـ اني وأمجد هاج اخذي الجدر لما اجيب الباقي
لقاء ـ أوكفي اجي اساعدج ، باوعت باسل صاعد فوك دخلت الجدر وعدلت شالي وطلعت واكف يحجي وياها وشافني وابتسم واخذت الجدر منها .
جنات ـ كلشي مجهزته والخضروات بالثلاجه هي واللبن وعمي ورى ما يتغده العلاج مالته لاتنساه .
أمجد ـ ماشي بعد اوامر ثانيه
جنات ـ لا سلامتك تكدر تمشي .
أمجد ـ ليا خبيثه دگولي أتفضل
جنات ـ روح هسه حيدر يجي ويعيط بيك وبيه ما يقبل أصلاً كالي انتظري من اجي اني اوديج بس الاكل يبرد
أمجد ـ رايحيين يابه رايحيين ، عافيات على گلبك
لقاء ـ كالها وضحك وصعد السياره ودخلت جنات دفعتني وسدت الباب عوذه منج خليني أشوفه .
جنات ـ خلي يروح يمعوده لا حيدر يشوفه يسويله سالفه ويرجع عليه والله شيخلصني من لسانه يفضحني دصبروا شبيكم ما شايفين حب .
لقاء ـ مشت كدامي هي وكرشها عبالك طوبه انهجم العقل الشايلته وصارت ام بيت والله وگت جنت اكفخ بيج تذكرين باليوم كم مره أسحلج وأبسطج لـو اذكرج
جنات ـ هذا وگت حبيبتي هسه أني زوجة أبو كرار ما اسمحلج ، يله اخذي من أيدي داشوف رجلي وين صار
لقاء ـ رجلي يمه النسوان دجيبي وشوفي رجلج ما عرفتج والله ، فتحت الجدوره فاصوليه ولحم صاير زبد وتمن مهيل يخبل والحشوه الشعريه والمكسرات شنو هالبداعه والطبخ منال العالم ما تلحگج ولج ليالي تعالي شوفي جناني شطابختلنا .
ليال ـ شُنو هالطبخ الشكل يموت خرب صايره أم بيت
لقاء ـ كله شغل ابو كرار دباعي شلون تحجي وياه
ليال ـ والوكفه شوفيها شلون استقامه والله هل حيدر مسويها مره معدله .
لقاء ـ نحجي وهي تحجي ويه حيدر وتتوعد النا وخلصت وكعدنا وليال أتصلت على عصماء مغلق شلون نعرف عصماء وين .
جنات ـ سألي باسل
ليال ـ شنسأل منه ما تسگتين هو جاب البنات وصعد الغرفته بعد ما شفناه اني خايفه عليها لاتعاركوا وگتلها لان هذيج مره تعصب عليها وصلت بي الا شويه يضربها هي هم ما سگتت .
لقاء ـ هم خطيه والله باسل صاير واحد ثاني هي شعليها يمعوده الزلم ما يغزر بيهم زين قهرتيني خرب
وصار وقت الغده وصعدت عليه لگيته توه طالع من الحمام باسل تعال تغده .
باسل ـ هسه اجي البنات تغدن
لقاء ـ أي ونومتهن بس أمهم وين ليش عصماء ما اجتي وينها .
باسل ـ يم اهلها تساعد أمها .
لقاء ـ اها تمام ونزلت والحمدلله طمني ونزل وتغدينا
والعصر اجو عمامي كلهم وأبويه وياهم يمكن يصالحون ابويه وباسل لان ما يتحاجون وبالمطبخ واجه علينا .
باسل ـ ولا وحده تطلع وصي جنات هم .
لقاء ـ جنات راحتت حيدر اجه اخذها .
باسل ـ يله ماشي حضري الجاي .
لقاء ـ حضرت الماي والجاي واجه هو اخذه اكولج ليث اجه وياهم
ليال ـ لا ما اجه
لقاء ـ ليش عود
ـ زعلان من باسل گال غير يوم يجي لوحده هسه خل يتصالح هو وأبويه ونائل يخابر يريد يحجي ويه باسل لما تفض وبعدين ليث يجي .
ـ الله كريم وضلينا بالمطبخ ومرتين حضرنا الجاي والحمدلله ما سمعنا صوت يمكن باسل تفهم الأمر وطلعوا وباوعنا عليهم وباسل يضحك وعمي كريم حاضنه .
كريم ـ ولك أحنه عمامك تزعل من عدنا شلون تريد تعوف الشغل واني عمك تعوفني والسوك مو حلو بلياك يبعد عمك .
رشيد ـ لا جان زعلان وحقك عمي حقك ما الومك والحمدلله عدت على خير والله يدوم محبتنا وأبوك بعد ما يحتاج نوصييك عليه .
باسل ـ بعيوني هذا الغالي بعد أبويه بس عمي كريم گول لأبنك أذا يضل زعلان ليال ما يشوفها .
كريم ـ هاي بينكم بعد أنت وأبن عمك أحنه ما النا شغل
علينا بيك وبإبوك صالحناكم .
لقاء ـ ضحگت وليال فاتحه اتصال خرب شسوين
ليال ـ سگتي .
ليث ـ يعني يريدني أجي اني أعتذر وارضي والله ما اجي
ليال ـ وأني شلون
ـ أخوج غلطان بحقي
ـ بس حقه
ـ ها حقه وأني شُنو مو حقي
ـ ليث لاتصعبها لعد اني ماكو وأنساني والله بعد ما احجي وياك اذا ما تجي تصالحه .
ـ ما اجي والله
ـ أنت مو گلت بعدين اجي ليش هسه غيرت رأيك
ـ ما سمعتي أخوج شيگول
ـ اني صوجي خليتك تسمع والله صوجي .
ـ حتى لو ما سمعت منج أسمع من غيرج وخوش مخليج ويهدد بيه كلمه والثانيه ليال ما يشوفها أخاف ما يدري ترى أنتِ الي شرعاً وقانوناً خاف مو بكيفه يأخذج مني
ـ أبقى هيج أبقى
ـ اي ابقى لان كرامتي مو رخيصه يرجع عليه ويحجي ويهين بيه وأني ساكتله وأنتِ لاتتدخلين بينا
ـ باي
ـ باي .
لقاء ـ خرب ليش تعارگتوا
ليال ـ راح يجلطوني مثل الديوجه واحد أخبل من الثاني
لقاء ـ عوفيهن هما يتراضون والله هسه تلكينهم واحد ميت عالثاني هذول ثنائي ما يفترقون هما مثل تؤام
ليال ـ أي ليش ما أعرفهم بس هذا ليث من كل عقله وأني بعد ولا عليه وأخسر أخويه هما بينهم .
لقاء ـ أي ما عليج ، تعالي عصماء شو ما راح جابها .
ليال ـ يجوز بالليل يروح خل نطلع نشوف أبويه ونائل يريد يحجي أتصال ويه باسل تعالي خل نطلع .
لقاء ـ طلعنا لـ الاستقبال باسل مخلي هيفاء بحضنه ويضحك وياها وغنى وجنى كل وحده من صفحه وأبويه يحجي عالموبايل ها شلونكم ويامن يحجي تنهد وحجه
باسل ـ ويه نائل
لقاء ـ حجيت وياه لو بعدك
باسل ـ لا بعدني هسه أتصل وأبويه جاي يحجي وياه
ليال ـ تحجي وياه مو
باسل ـ أي هو ماله ذنب الذنب ذنب أمه حسبي الله عليها من أم لو اني موجود ما أخلي يسافر .
سعيد ـ أي أبني موجوات ليال ولقاء أي لقاء رجعت من الأمارات وكاعدات هسه كبالي بصف باسل لايضل بالك جنات هم زينه وسألتني عليك أي والبنات هم زينات هسه أخلي لقاء أدزلك صورهن أي ابني كبرانات هسه لقاء هاج الموبايل انطي لـ باسل .
لقاء ـ أخذته وفتحت سماعه وانطيته اله وأجانا صوته مخنوك ومكسور .
نائل ـ باسل خويه شلونك .
باسل ـ هلا نائل هلا خويه بخير الحمدلله وأنتَ شلونك
ـ اني بخير أذا أنتوا بخير ، باسل خويه سامحني حقك عليه أني غلطت بحقكم كلكم وظلمتك خويه .
ـ لا نائل أحنه أخوان ماكو بينا زعل لاتقهر بروحك أبداً ما زعلان منك ومحد ظلم الثاني كلمن ظلم نفسه بنفسه وكلنا اخذنا نصيبنا .
ـ لا باسل أني ظالم اني ظلمتك أنت ومرتك وبناتك وأخواتي حتى بيداء وظلمت هواي ناس وأذيتكم كلكم
ـ لا نائل لا خويه على بختك سد هذا الموضوع واذا تحبنا أرجع العراق شنو ما تجي تباركلي بطلعتي من السجن وتشوف أخواتك .
ـ بهاي أعذرني ما أكدر أرجع بعد
ـ ليش نائل أرجع ما عندي شيء وياك والله
ـ خليني هيج وأهم شيء عندي أنت مرتاح خويه
ـ الحمدلله لايضل بالك عليه .
ـ أخذ راحتك خويه
ـ نائل أرجع
لقاء ـ أختنك وما كمل وفصل الأتصال وأبويه يبجي وباسل هم بجه وطلع برى وبجيت وتذكرت صوته يحجي وصوته يرجف الله يدري شگد متأذي شگول عليج جواهر
من كثر ما أنقهرنا حتى عشه ما تعشينا وباسل ما شفناه بعد اخ نائــــل خليت غصه بصدرنا كلنا بغيابك
بالليل البنات نامن يمنا لان باسل ما جاب عصماء وابويه سأله گاله هسه وهسه ومـا راح وهيفاء ما نامت تريد أمها بالكوه نومتها وكل شوي تفز من نومها ..
جاي أحجي ويه أمجد وصلتني رساله من حساب فتحته وشفتها دازلي صوره هذا نائل جاوبته نائل شلونك
نائل ـ زين وأنتِ شلونج وليال شلونها
لقاء ـ كلنا زينين والله بس ناقصين وجودك بينا
ـ الله يدومكم لا شتسون بيه خلوني بعيد أحسن
ـ لاهيج تحجي نائل والله احنه نحبك وابدا ما زعلانين
ـ ادري عيني ادري ، اكولج اني راسلت جنات وكتلها اذا بعدهم يردونج وكالت يردون يجون يخطبونج هالأسبوع خابرت أبويه وفهمته ما يوكف بقسمتج ويوافق لان اني قبل وكفت بقسمتج وظلمتج .
ـ نائل لاتقهرني فدوه الك والله مو مهم بگدك
ـ الله يرضى عليج سلميلي على ليال
ـ يوصل عيني نائل شافها ودزلي قلب دزيتله طلب وافق وأنقهرت عليه جاي يحاول يصلح اغلاطه اللي امه السبب بيهن .
ثاني يوم كعدنا متأخرين وهم ما طبخنا عمتي سلوى طابخه غده وجابلتنا ومن تغدينا باسل باوعلي حسيت
بي شيء بس لا حيدر خابره ، كملت اول وحده واخذت البنات للغرفه نومتهن واجه عليه .
باسل ـ أكعدي أريد احجي وياج .
لقاء ـ أي عيني ، توترت من وجوده عكس أيام قبل هو شخصيته صايره حديه عن السابق .
باسل ـ قبل لا أدخل السجن حيدر حجه وياي وطلبج لأخوه وأني ما جان عندي أي عارض لان ما الكي أحسن منهم بس الوقت جان مو مناسب قصص وروايات عراقية كرار صلاح وصار اللي صار ومن جنت بالسجن هم متقدمين الج مرتين بس نائل وليث رافضين وحيدر زعلان بوكتها وهسه خابرني وحجالي گلشي صار وراي .
لقاء ـ أي صحيح
باسل ـ المهم هسه هم رجع طلبج لأخوه وأني وافقت بدون مـا اسألج لان أخوه حيدر ما ينرفض وشفت جنات شكثر مرتاحه بحياتها ياريت كلهم نفس حيدر رجال سبع وعليه الأعتماد وصاحب مواقف حلوه وصلني عنه شكثر واكف وياجن بغيابي وهذا الشيء جبير عندي وهسه اريد اسمعها منج علمود انطيهم موافقه أكيده وأبلغ عمامي وأبويه هم موافق ونائل كذلك بقيتي بس أنتِ
لقاء ـ هزيت رأسي اللي تشوفه مناسب موافقه .
باسل ـ بيها الخير .
لقاء ـ طلع واجتي ليال تباركلي وفرحانه وياي وافق وافق واخيراً وأخيراً .
ليال ـ الف الحمدلله أمشي سمعته دز على فارس ما اعرف شيريد منه .
لقاء ـ تعالي خل نطلع ،طلعنا وجان يحجي عالموبايل
باسل ـ عمي اليحضر الف هلا بي بس ما أريد مشاكل ومحد يتقدم ويخرب عليها ولا واحد لا سجاد ولا غيره الناس أنطيناهم أي عمي اني وابويه ونائل موافقين
يعني محد يزعل ماشي بلغهم والجمعه العصر المشيه أي هي مشيه هي عقد شيخ ماشي وخوالي هسه أني أخابرهم ماشي عيني عمي .
لقاء ـ أبتسمت فرحانه وباسل خلص الأتصال وتنهد وباوعلي خرب بس لايكشفني بلعت ريگ وگعد بصف أبويه وصاح على ليال .
باسل ـ ليال سويلنا جاي
ليال ـ اي عيني .
لقاء ـ راحت ليال تسوي جاي وجابته الهم واخذ أستكان الجاي ويشرب يحجي ويه جنات .
باسل ـ أذا هيج خو حفله مره وحده لا ليش أعارض من حقكم تفرحون بإبنكم لا گولي لحيدر البنت بنته هو يفصل وأحنه نلبس خلص عليه ماشي خيتي الله وياج
لقاء ـ خلص الأتصال وباوعلي وأرتجى عالتخم ومد ايديه وتنهد وكال لأبويه
باسل ـ ها يابه خوش قسمه مو
سعيد ـ أي أبني خوش ناس ودام أخو حيدر أكيد خوش قسمه أتوكل يابه .
لقاء ـ بلعت ريگي وگمزت ورى ليال لحكتها تهربت من نظراته اكولج نلحك لازم فستان لان كال هي مشيه هي عقد
ليال ـ هسه أفهم من جنات گلشي يمها هو حجه وياها وفهمها خرب تدرين حسيتها هي أختنا الجبيره
لقاء ـ لان رجلها خوش رجال معلمها على گلشي وتحملت بمسؤوليه أكبر منها وهي هم سباعيه
ليال ـ الحمدلله ربي وراح تصيرن بيت واحد وكلمن بيتها وأخيراً لقاء وأخيراً .
لقاء ـ حضنتها الف الحمدلله الله يدوم افراحنا وعصماء شلون خوما ما تحضر خطيه شو باسل ولا أباله يرجعها
لا واضح زعلانين وزعلهم ثكيل .
ليال ـ والله ما أدري شنو سالفتهم
باسل ـ ليــــال
ليال ـ خل أشوفه شيريد اي باسل
لقاء ـ طلعت عليه واجتي ها شيريد منج صاحلج
ليال ـ گالي جهزي هيفاء وأغراضها وملابسها
لقاء ـ ما سألتي على عصماء
ليال ـ لا والله وجه مدخن شسأل خفت منه ، يله اروح أجهزها گالي لاتتأخرين .
لقاء ـ جهزت أغراضها واخذها وراح ورجع وعصماء مو وياه ، أتصلت عليها هم مغلق واجتي ليال اكلج لازم نعرف شصاير بينهم خطيه هي واكفه ويانا بگلشي
وموبايلها مغلق اذن صاير جبير بينهم يا خوفي بعد
ما يريدها من ورى أختها بيداء .
ليال ـ لا عزه هي شعليها لاتگولينها عفيه
لقاء ـ لعد ليش ما يرجعها ومن طلع ما حجه وياها بس ينتر ويصييح بيها وليش اشتره بيت لاهلها وجابهم وقريب منا اذن يكعدها يم اهلها والبنات يروحن ويجن عليه وعلى امهن
ـ قصدج هاي هي ينفصلون اي وبعدين
ـ شمدريني والله لايگولها مجرد احتمالات ان شاء الله ولا واحد كلشي ولا عصماء ما تستاهل الا كل خير واذا سواها بعد فلا احجي وياه .
ـ دوختيني بإحتمالاتج سگتيي يمعوده ، شوفي راح أدز عمتي سلوى عليها وتفهم منها لان احنه ما نكدر نطلع ونروحلها واصلاً منو يقبل .
ـ ماشي وبلغت عمتي وراحتلها ورجعت گايله ماكو شيء أرتاح يم أهلي وعلى أساس ابوها تعبان بس ما صدگنا وليال كالت لأبويه وحجه ويه باسل
سعيد ـ عمتك سلوى اليوم جانت يمها وسألت عصماء صدك ابوها مريض وباقيه يمه وليش ما حجيت صاير شيء بينكم أبني
باسل ـ لا يابه ماكو شيء ومثل ما كالت الكم أبوها مريض وباقيه يمهم
لقاء ـ نفس عذر عصماء بس هم ما صدگنا اكيد صاير شيء بينهم وهي معروفه ما تحجي شيء الله يهدي عليها ويصلح حالهم بالليل البنات شافن أختهن مــــا موجوده وگامن يبجن ويردن أمهم وأخذهن عليها وما رجعن ضلن يمها وتالي وياك باسل تضل هيج ومبهذل بناتك وياك شصارلك ما جنت هيج ونهائي ما تصبر على فراك عصماء شصار بينكم ووصلتوا لهل الحال .
وكاعدين كلنا أني وليال وجنات وبنات عمتي أنسام هدير وغدير وخالاتي هيام ونوره وعمتي نجاح وبلقيس
ونجهز توزيعات الخطوبه مالتي ومشغلين اغاني وهدير وأحنه كاعدين نركص وفرحانين وهدير تصور بينا واني ادزله كل التفاصيل
أمجد ـ شجيب العصر وأملكج وأفوز بحبج
لقاء ـ ما ضل شيء بس كم ساعه حبيبي
ـ يروح وعمر حبيبج .
ـ عمري يفداك أكمل وارجعلك
ـ تمام حبيبتي
ـ ورجعت يمهن وكملنا التوزيعات ونصبنا الكوشه وكملنا التجهيزات وگلشي يخص المشيه ورحنا الصالون والبنات ويانا وأجمل لحظات العمر بوسط ناسك وعايش أفراحك مع شريك عمرك وحبيب روحك .
كملنا واجه ليث أخذنا ويباوع على ليال ومزعوج
ليال ـ شيخلصني اليوم دك عقوبات .
لقاء ـ ضحكت على خوفها وعلى نظراته الها وصلنا وهو نزل وسحبها كدام باسل عالصفحه وباسل راد يتدخل بس خالتي هيام منعته
باسل ـ شو هذا ما يستحي شنو يلزمها من أيدها كدامي وأني مو ما احجي وياه شگو جاي .
هيام ـ باسل الزم نفسك قابل غريب شو أبن عمك وخطيب أختك وشكو بيها اذا لزم ايدها يحجي وياها غير سالفه هاي خلي أخواتك يعيشن فترة الخطوبه براحتهن شنو يوميه متزوجات وبعدين عصماء وين ليش ما موجوده شنو ما تحضر .
باسل ـ لا ما تحضر أبوها تعبان
هيام ـ خير ان شاء الله خلي تخلص خطوبة أختك وأتفرغلك هسه مشغوله ولاتنسى أمك شنو وصتك لاتنسى خوش تذكر زين .
لقاء ـ ما حجه شيء وأتصلت عليها وما جاوبتني رجعت دزتلي رساله يمكن ما تكدر تحجي لو بس اعرف شبيهم
عصماء ـ الف مبروك حبيبتي الله يسعدج ويهينج تستاهلين كل الخير سبع سعادات وجنت اتمنى احضر بس مالي قسمه أن شاء الله عالعرس أحضر عرسكم .
لقاء ـ يا حبيبتي عصماء والله ناقصتج عفيه تعالي
ـ ما أكدر والله غير مره تدللين يله حبيبتي أخذي راحتج
ـ حتى حسيتها ما تريد تطول بالمحادثة بسرعه طلعت
وقلقتني وضل بالي يمها ، وصلتني صور من جنات
خطيه مهوسين يا هاي شصاير بحالكم .
جنات ـ بس تفض عالخير خايفين من سجاد
لقاء ـ لاماكو شيء ان شاء الله وتذكرته دخلت المحادثه المقيده لكيته داز كومة رسائل بحدود ستة رسائل بس كلها محذوفه!! شداز سجاد ليش ما ضليت على عقلك ليش خربتها بالأخير .
" دزيلته رساله ها حبيبي شلونك.
أمجد ـ بعدين أراسلج عندي شغل والله والدنيا مگلوبه على رأسي حيدر عازم العشيره كلها شيوخ وضباط وكلهم رتب ما جايبه وعازمه للمشيه ترسلي الفرع سيارات .
لقاء ـ حيدر بعد تمام أخذ راحتك ، وسمعت هوسه هدير منو اجه
هدير ـ الكل أجه عمتي اسمهان وجنتها وبنتها وعمتي سلوى وبناتها وعمتي نجلاء وبناتها وعمتي جواهر وجديتي واحنه وأمي وعماتي نجاح وبلقيس مقيمين يمكم
لقاء ـ انتوا الحب عمي .
هدير ـ حبيبي الحلو .
لقاء ـ طلعت سلمت عليهن وأول وحده جديتي باستني وباركتلي .
الحجيه حليمه ـ الله يسعدج بنيتي وبسعد أخواتج .
لقاء ـ تسلمين جده ، وكعدت وجواهر باوعتلي بس ما حجت كاعده بصف جديتي ونجلاء تباوعلي وتبتسم وتماضر باوعت على بطنها تذكرت نائل واختنگت .
وخالتي هيام تفتر عالكل وتوزع ضيافه فدوه لطولج خاله تعبناح ويانا .
هيام ـ تعبج راحه حبيبتي إذا الج وبهيج يوم حلو ما أتعب لعد المن أتعب .
لقاء ـ فدوه لگلبج واجتي ليال ها شبيج تقربت شاورتني
ليال ـ سجاد واكف يحجي ويه باسل!.
لقاء ـ خفت وسحبت نفسي ورحت المطبخ باوعت من الشباك شفته واكف يحجي ويه باسل وشافني گبل رجعت خوما يسويها مثل ليث ويخرب لا سجاد عاقل
ليال ـ لا ما يسويها وأني حجيت ويه ليث گال يريدها
وبعد ضلت يم باسل يختار أبن عمه لو الغريب لان ليث يريدج لـ سجاد .
لقاء ـ خبيث شلون سالفه أمشي قبل لايجون وسمعنا هورنات اجو ورجعت لمكاني خايفه ومتوتره مية الف فكره أبالي ودخلن النسوان فاطمه وبناتها وجنات وبنات عمامهم ونسوان اصدقاء حيدر كلهن لبسهن درجه اولى وجنات عيني نفس الشيء هيبه وصدر ديوان شافتني مركزه بيها غمزتلي وضحكنا وكعدنا وعماتي أنسام وبلقيس ونجاح وخالتي هيام وليال ما قصرن بكلشي الا نجلاء تكول خاتون كوه تتنفس وتتفيك كدامهن لعبت نفسي حتى جواهر احسن منها ولا حجت بس لاحظت نظراتها على كل طفل بحضن امه وتباوع البنات يلعبن وتبتسم وتمسح على شعرهن لو مشيتها عدل جان الله جبر خاطرج وخاطر ابنج بس ما رحمتي نفسج بإفعالج .
ومر الوقت ودزوا عليه ولبسني وفاطمه وعمتي انسام ومشيت وياهن وصلت لأجمل لحظات عمري الحلوه وأستبشرت خير يعني سجاد ما خرب الحمدلله وصار كلام الشيخ وهو يحجي واني ارد وراه الى أن تم العقد بين لقاء وأمجد وتم العقد على خير وعقد مُبارك .
وكملنا ورجعت وبلشت الهلاهل وجنات طلعت علبه مليانه ذهب حضرتها والزلم طالعت كعدتهم وصار الوقت هو يجي واجه بوسط الهلاهل وتقرب وباسني من كصتي وصفن بعيوني وطخني براسي وضحكت
أمجد ـ مُبروك حبيب روحي صرتي الي وأخذتج وملكتج
لقاء ـ شعور ما ينوصف ولا اله تعبير الله يبارك بعمرك
ولزم ايدي وشعور خجل وأرتباك وحب وكلشي حلو ..
وقدمتله العلبه ولبسوني الحلقات وقصوهن بشريط وبلشت مراسيم الخطوبه وفقرة الصور واحنا واحد يباوع الثاني وفرحانين واشتغلت الاغاني وفاطمه تهلهل وجنات تفر بكرشها وحركات وتبوس بيه
جنات ـ جبتج يمي
لقاء ـ ههههه أي وأستمرت الحفله وبنات باسل يمي وأختنكت عليهن لان أمهن ما موجوده ومر الوقت وأتصلوا عليه
أمجد ـ أي وين أجي هسه أجييت ماشي جاي يله .
لقاء ـ ها حبيبي
أمجد ـ حيدر يصيحيني يم الزلم بعدين ارجعلج
لقاء ـ وراح وجنات ما رضت على تصرف حيدر وخابرته واجتي ها
جنات ـ لا ماكو شيء بس ضباط يردون يمشون ودز على أمجد يسلم عليهم هسه اجيج أوصل نسوانهم
لقاء ـ گامت وياهن وزعت الهم توزيعات وصلتهن الباب واجتي وفاطمه توصي بيها
فاطمه ـ لاتمشين هواي جنات حملج كوه لايصيرلج شيء حيدر يمشي ويوصيني شيخلصني من لسانه
جنات ـ لا ماكو شيء الحمدلله .
لقاء ـ ورجع كعد شويه وراحوا لان تأخر الوقت وحيدر خابر جنات وانخبصت
جنات ـ عازم الضباط على العشه فاطمه امشي نروح لقاء حبيبي ولله أتفقت وياه ابقى بس رجلي عزايمه ما تخلص عود عالعررس تدللي .
ليال ـ اي خوش هو احنه غير لو نشوفج دروحي .
جنات ـ ما عندي احد والله يله باي تاخرت على حيدر
لقاء ـ لا حبيبتي معذوره روحي الله وياج ، راحت وشغلنا الاغاني وبلشنا الركص وذبينا لحم شكو حزن ذبيناه وعشناه افراحنه بكل محبه والكل شارك ما عدا جواهر ضلت كاعده بصف جديتي ومر الوقت وما حسينا واني وهدير بدعنا خرب رقصات مو مثلنا ليال ما ركصت شوي واستحت مو هلكد تعرف وتخاف من ليث
وخلصت الحفله ومحد راح باسل ما قبل الا يتعشن وغيرت فستاني ودخلنا المطبخ نطبخ وصوا على مشواي وليث الوصى يخاف على ليال ويدري الطبخ يوكع براسها .
وصبينا العشه وتعشوا والزلم بس بيت عمي كريم كلهم ضلوا يمنا بس بيت عمي رشيد على كد ما خلص العقد مشوا كلهم حتى عمتي اسمهان مشت وعرفنا علمود سجاد وهو جان عاقل شجاه بالاخير وكع بحبي مو جان يحب وقافل عليها شصارله هسه لو هذا هم حظنا يله عدت على خير الحمدلله .
واخذتلهم الجاي وباسل طلع شاف ليث واكف برى هذول شوكت يتصالحون زعليش هذا وقدمت ليث جاي واجه باسل اخذ وكال
باسل ـ ليش جايبتله جاي الزعلان لا يتعشى ولا يشرب جاي ما شايف واحد زعلان جاي بدون عزيمه والجاي بدون عزيمه يكعد بدون فراش وانت مطبقها عايف الاستقبال وواكف برى .
لقاء ـ ليث يشرب جاي ويحجي بثكل
ليث ـ ما جاي عليك جاي على بنت عمي واني ابن عمها لازم احضر مشيتها لو عندك مانع
باسل ـ أي عندي مانع وأنت مو أبن عمي رجل اختي وبس وصارت لو اني موجود ما اخليك تشوف اظفرها
ـ اي صارت شتريد هسه .
ـ سلامتك .
ـ يله اني رايح
ـ وين رايح
ـ ليش شعندك اليه وأحنه متزاعلين شگو ضال اروح احسن .
لقاء ـ مشه وباسل منعه من أيده
باسل ـ روح بس تضل زعلان
لقاء ـ سحبه وحضنه وتراضوا وطلع فارس يصور بيهم ونضحك عليهم وباسل يضحك والله يدوم الضحكه علينا ودخلوا الأستقبال وباسل صاح عليه ها باسل
باسل ـ البنات حضريهن بس يرحون اوديهن على أمهن
لقاء ـ ماشي بس يضلن هيج ما حجه عافني ودخل الأستقبال الله يهديك ورجعت فتحت موبايلي وأتصلت على أمجد وأجاني صوتدمدم
أمجد ـ ها حبيبتي بعدين أخابرج .
لقاء ـ ليش وين أنت شنو هالصوت السيارات شنو طالع .
أمجد ـ أي جنات حملها مخطر ونزفت هسه مأخذينها المُسِتشف
شكرا لزيارتكم عالم روايات سكيرهوم
