رواية بنات الحجي السعيد الفصل الخامس والعشرون بقلم شمس العراقية
ما بيننا... خُطوتان ، مشيتُ لكَ بواحدةٍ ونصف روح
فهل تمشي نصفك الباقي ، أم نترك الحكاية تُزهر في الغياب وتُنسى.. قبل أن تُروى ؟ ونبقى قصةً عجزت عن الاكتمال بنصف خُطوة ....
جنات ـ تحملت بحياة ومسؤوليات أكبر من عمري لهذا أني كبرت ونضج عقلي بفضل حيدر وبمساعدته اللي ما أعتبره فقط زوج أشوفه الأب والأخ والصديق والزواج المثالي والحنون ...
وهل الحياة مع حيدر كانت الرزق والعوض بعد كل المعاناة العشتها بسبب جواهر وبسبب نفسي ما حكمتها وسيطرت على قلبي وعقلي لما خطأت أخطاء ما تنغفر والاكبر منها زعل أمي اللي لحد هاي اللحظه غصه بصدري تمنيت لو سامعه راضاها عني بس أكو امور ما تصير وتضل بحلقه ناقصه ونصف روح ...
بعد ما عقدوا رجعت البيت وأني وحيدر متزاعلين لان ردت أبقى هو ما يخليني لهل السبب زعلت وهو عادي عنده أصلاً يضحك ويسولف ولا كأنما اني زعلانه منه ويرجع يحاجيني طبيعي كأنما يگولي أنتِ الزعلانه اني ما زعلان وهاي مشكلتج مو مشكلتي أني كلمتي ما تنكسر وهي التمشي وهذا طبعه مو جديد عليه .
جنت أتمنى أشارك أختي فرحتها وبوجود البنات بس نسيت أني متزوجه وعندي مسؤوليات أكبر من هالأمور
دخلت أغير ملابسي وخليت فاطمه بالمطبخ وياه علمود العشه حتى بهيج يوم عزايم ، البس واني مزعوجه وانفتح الباب صديت وجهي .
حيدر ـ عيني الزعلان أمشي سويلنا العشه فاطمه بكبرها دايخه بالمطبخ وأني ما اريد أحد يطبخ غيرج
جنات ـ هسه أجي مو تشوفني جاي اغير ملابسي .
ـ اي جاي أشوف بس الوقت مو مناسب تخلص العزيمه ونتفاهم ونرضيج ونرضي خاطرج الزعلان من عندي .
ـ تخليني ابات يم أهلي
ـ هاي مـا متفقين عليها ولا نتفق عليها ، يله تعالي
ـ لبست شالي وطلعت وراه وكابلت فاطمه وغسلنا اللحم وشلته وخليت البهارات وعالنار وهو وأمجد قدموا الضيافه لا مو بهاي الصياني .
حيدر ـ شمدريني فاطمه طلعتهن .
جنات ـ اني أشتريت مال خطار أوكف طلعتهن ورتبت الضيافه وهو صافن عليه شبيك .
ـ بيه أنتِ ، ضحكي لاتضلين مطنكره ما متعلم عليج
ـ أبتسمت وشال الضيافه وراح ورجعت گملت العشه وحضرت المقبلات وفاطمه راحت البيتها وتأخرت واني ظهري طگ من الوجع، كملت وحضرت المواعين وصبينا العشه وسويت الجاي بس الوجع زاد عليه وأجتي فاطمه استلمت الجاي وأني وگفت عالسنك أغسل المواعين واجه هو ما رضى كام يحجي .
حيدر ـ عوفيهن من أيدج وأمجد أنت صب الجاي وفاطمه گومي غسلي بمكانها تعبت .
فاطمه ـ أي حقها تتعب لعد وگت عزايم هسه مو تشوفنا مخبوصين والبيت مليان واني بيتي مكلوب شلحك جان اجلتها هسه الا اليوم
حيدر ـ فضينا عاد .
جنات ـ أنزعج منها ومشه وما كامت ضليت اغسل وكملت تنظيف المطبخ وهي راحت تصلي وأني أمجد جاب الأستكانات وسمعت أصواتهم يمكن كاموا .
شلتهن ردت اغسلهن بس ما ضلت عندي طاقه لزمت بطني موجوعه ورحت الحمام لان حسيت شيء وكع عليه ، دخلت وشفت دم تخبلت لا يمه وليدي حبيبي غسلت وطلعت على فاطمه والوجع زاد فاطمه لحكيلي
فاطمه ـ شگو شبيج جنات
جنات ـ حجيت الها ولطمت على وجهه وكامت تحجي
عليه وعلى حيدر صوتج فدوه لايسمعج .
فاطمه ـ اي طبعاً من الشغل والعزايم وين يضل طفل بطنج هذاك ابنه وكعج وموتته وهذا الأب وانت حلكج حلك الفطيمه ما تحجين تكولين ما بيه شگو مخليته يتحكم بيج لو لكاج على كد ايده خرب بحظج أي والله
جنات ـ اخذتني الغرفه وفحصتني وبس تحجي ما سگتت فاطمه دخيلج صوتج
فاطمه ـ خايفه من صوتي ليش الحباله بالسوالف اني لحد الان گلبي يوجعني من هذاك الطفل ٨ اشهر وراح وتعبج منو يعوضج لو ما تفكرين بس شايله هم لحيدر لايسمع ويزعل وخل يزعل لعد هيج احسن خل اشوفه وين نمشي نوديج نتلاحك الج منو يكول ما مات .
جنات ـ طلعت وأسمعها تحجي عليه ودفع الباب ودخل يباوعلي بقلق وفتح الكنتور وطلع عبايتي لبسني سريع وخايف وفاطمه تحجي
فاطمه ـ يابه اذا صار شيء لطفل محد يخلص من لساني هيج أحسن الك بس لو ادري وكت عزايم هسه
أمجد ـ فاطمه دسگتيي هسه
فاطمه ـ اي اسگت وانتوا مستغلينها لان فقيره خرب بحظج اني صوجي زوجتك شلت خطية بنات العالم وياك
جنات ـ طلعنا وامجد شغل السياره وهو كعد بالصدر وفاطمه بصفي تحجي سگتي فدوه لاتضوجينه قابل هو متعمد .
فاطمه ـ شايله هم لا حيدر يضوج ما شايله لطفل البطنج ميت لو عايش شكد على نياتج ، ولج تعبج يالمكروده لما هذاك الاسبوع الدكتوره توصي بيج
وأنتِ بس تركضين منو يكولج عفيه ما تسكتين .
أمجد ـ أستغفر الله فاطمه دسگتيي عاد ويجوز لان ركصت تعبت هسه نوصل وأن شاء الله ما بيها شيء .
فاطمه ـ والركص شعلي وين ركصت ليش تجذب بس ادافع لأخوك عبالك ما ادري بيك بس لا هذا الضيم من العزايم والركض وراكم لأهلها ما تخلونها تروح ترتاح .
جنات ـ أندار وباوعلي خايف ، لاتخاف ما بيه شيء
حيدر ـ ان شاء الله .
فاطمه ـ الله يعديها عالخير .
جنات ـ وصلنا وفاطمه دخلت وياي وفحوصات واني اباوعلهن خايفه ابني عايش مو .
الدكتوره ـ اي ماما عايش بس النزيف من الجاره نازله يحتاج الج ترتاحين وأنتِ رحمج ما يتحمّل شلون حملتي تراجعين دكتوره كم طفل عندج .
جنات ـ فاطمه كعدت تحجيلها واني لازمه بطني الحمدلله ماما حبيبي ما بيك شيء ، وضلينا للصبح وفاطمه يمي وتوصيات من الدكتوره وفاطمه تهز براسها وتتوعدلي
فاطمه ـ ما اوصييج أهملي نفسج وطفلج وضلي أركضي ورى حيدر ولج اذا صارلج شيء منو يفيدج
جنات ـ لا الله الحافظ بس فدوه هسه من يجي حيدر لاتلومينه وتضوجينه هزت رأسها وكفختني على راسي
فاطمه ـ حيدر مأخذ عقلج بس تفكرين بي لايضوج شكد فطيره ولج أني من حركة كلبي احجي ليش أنتِ رخيصه عليه والحمدلله البنيه ما بيها شيء الله يسهل الج .
جنات ـ بنيه ليش مو الدكتوره رسل كالت بيج ولد
فاطمه ـ شمدريني هاي كالت ولد هنا كل وحده تحجي شكل المهم تولدين يالسلامه ولد بنيه مهم السلامه
جنات ـ الف الحمدلله حيدر جان يريد بنيه وحيل فرحت ودخل باوعلي ملهوف وخايف وحجيتله لاتخاف الحمدلله بخير ما بيها شيء .
حيدر ـ الف الحمدلله .
جنات ـ تقرب لزم إيدي بحنيه بيه بنيه من سوتلي سونار وفحوصات بينت بنيه مو ولد
ـ مو مهم عندي بنيه او ولد المهم أنتِ تكومين بالسلامه خوفتيني عليج وحقج عليه
ـ لا ولا يهمك وسلامتي هي راحتك وسعادتك عندي أبتسم وضغط على أيدي وفاطمه تباوعلنا وتهز برأسها وضحكت بس حيدر ما باوعلها حسيته حيل منزعج منها يله بعدين يرضون هو گلبه طيب ما يزعل من أحد .
ضلينا بالمُستشفى وأجو عليه أهلي أبويه وباسل وأخواتي ليال ولقاء خايفين وتقربن عليه يبوسن بيه لاتخافن ما بيه شيء والله لايضل بالكم ، بابا حبيبي تقرب عليه باسني وخايف وباسل واكف ويه حيدر باوعلي وابتسم
باسل ـ سباعيه جناتي ، ما بيج غير العافيه خويه .
ليال ـ خوفتينا عليج وحملج شلونه خوما بي شيء .
لقاء ـ مو گلنا الج لاتركصين اكيد تعبتي وأثر عليج
جنات ـ لا الحمدلله عدت سلامات عادي تصيير .
ليال ـ لا مو عادي ومنا وهيج أنتبهي لنفسج والبطنج روح شُنو ذنبه وأنتِ قبل مسقطه وحملج مخطر داري نفسج وطفلج حبيبتي .
جنات ـ أن شاء الله لعد بنات باسل وين خليتوهن
لقاء ـ أخذهن لأمهن وأجيينا عليج هسه شلونج زينه
جنات ـ الحمدلله لزمت ايدي وأبويه يباوعلنا بحب وضلوا يمي وبعدها راحوا بس ليال وفاطمه وحيدر ضلوا يمي وأمجد رجع وياهم وصرنا أهل الف الحمدلله على تمام افراحنا .
ورجعنا البيت وليال وياي وليث حرك الدنيا عليها يتصل ويريد يجي يأخذها بس وصلنا هو دك الباب طلع اله حيدر وهي وكفت تعدل شالها هذا شبي عليج ابقي العصر روحي فدوه .
ليال ـ ولج تخبل لان جان بالدوام وأني ما گتله عليج بالمستشفى وهسه نازل ورايح البيت وما لاكيني ورجع يحجي عليه شلون اني ما ادري بيج وهسه شيفضها عليه وعبالي اغسل ملابسج انظفلج غرفتج شو گبل اجه .
ـ يغــار هذا يتعبج إذا يضل هيج .
ـ لا اذا يضل هيج زين بس اذا ازود لا والله يدمرني مو بس يتعبني ، خل اشوف حيدر شو طلع بعد ما رجع .
ـ طلعت وأجتي ها
ـ ماكو بس حيدر جاي يشتغل بالسياره استحيت أسئله وليث اراسله ميجاوب طنگر عليه .
ـ وهسه شتسوين ، خابري وروحي لاتصيرلج مشكله بسببي ، عادي هسه أخابر فاطمه تجيني .
ـ لا يمعوده شسويله ، يله امشي ادخلج اسبحي واكوم انظف الج البيت واطبخ الغده .
ـ ماشي عيني دخلت سبحت وحيدر راح السوك وهي غسلت البيت كله نظفته ما خلت حتى ملابسي غسلتهن وطبخت الغده واجه حيدر وامجد جان يم فاطمه ادري بي حيدر كاله لاتجي علمود ليال تاخذ راحتها خطيه ما قصرت .
ليال ـ يله عيني اني أروح باسل راح يجي عليه .
جنات ـ ضلي تغدي وروحي
ـ لا دخيلج خليني اروح هاي لقاء طابخه وحارگه التمن شايط وباسل متخبل تعالي البيت مهجوم ولازم قبل
لا تتزوج اعلمها عالطبخ لان اذا هيج امجد يموت جوع المسكين
ـ إذا البيت مهجوم ليش ما يرجع عصماء خوما يضل معتمد عليجن باجر عكبه تتزوجن شيسمونها عايفها عيب عليه هالتصرفات صالح الكل وهي لحد الأن والمفروض ما يزعلها ما كافي هي طلعته من السجن
ـ شمدريني والله ، أبويه يوميه يگوله ما يحجي مبين ساكت ولا هي تحجي ، اليوم بالليل نروحلها ونشوفها
ـ عود سلميلي عليها .
ـ الله يسلمج يله حبيبتي تضل عندج العافيه .
ـ راحت وأتصلت على عصماء ما جاوبتني راسلتها ما فاتحه شصارلكم جنتوا تخبلون ينضرب بيكم المثل بحبكم وعلاقتكم لو هذا هم حظج يا عصماء الله
يصلح حالكم .
مرت فتره والحمدلله وضعي احسن بس دايره بالي وحيدر أخذ اجازه ضل بالبيت وفاطمه تكولي لاتشتغلين وتضلين تركضين وراه واني بس حنية عليه كافي شلون ما اشتغل واخدمه وادير بالي عليه .
واكفه يم رأسه وبيدي عدة التصليح السياره وهو مدهن ويصلح بيها ، حيدر ليش ما توديها المصلح مو أحسن
حيدر ـ يخربها وما يعرف علتها خليني اني اكمل شغلتي بإبدي ، ناوشيني سبانه وروحي أ، كعدي..
ـ لا ما عندي شيء احب اشتغل وياك
ـ تعبتي
ـ لا والتعب يخبل وياك رفع رأسه وابتسم وكرصني من خدي ودهن وجهي
ـ هيج احسن
ـ اي احسن عادي هسه اغسل
ـ فدوه لوجهج اني أكمل واغسلج بإيدي
ـ تمام ورجع يصلح وكملنا وصبيت الغده وتغدينا وامجد ملتهي جاي يدور على بيت قريب بالفرع ما يلكي بيت زين ويعجبه ، واحنه ما عارضنا هو يريد يستقر بيت لوحده وهيج أفضل وهم ياخذون راحتهم .
كاعد يتصفح وأني بصفه أباوع وياه وصافنه عليه وعلى بطني وتذكرت الماضي مالتي اللي مجرد ما أذكره اكره نفسي عود جان حب أبد مو حب ، الحب الوحيد هو حيدر هو العوض والرزق وگلشي بحياتي رغم ما عدهم أحد بس من طلبت أكمل أخر سنه اليه وافق وسندني وكان وياي بكل الظروف المرت عليه والحمدلله گملت وتخرجت وشهادتي بيدي وبعدها صارلي الحمل يعني الفتره اللي دكتوره منعت الحمل عني أني كملت بيها دراستي وما قصرت بمسؤولياتي مو لان أني اجتهدت لا لان حيدر سندني تحملني وصبر عليه والحمدلله خلصت ومنتظره بنتي .
واكفه جاي أطبخ وفاطمه تساعدني لان عزمت أهل عصماء جوارين بيت أمجد اللي لكاه قريب منهم وحيدر كال نعزمهم عالغده وكلش فرحت هم أشوف عصماء لان هالفتره حيدر كلش مشدد عليه ما اطلع ودايره بالي والا جان رحتلها وعرفت سبب زعلهم هي وباسل .
گملت الغده ودخلت رتبت نفسي وسمعت صوتهم يمكن اجو ها فاطمه .
فاطمه ـ اجوو وين رحتي تعالي نسلم عليهن .
جنات ـ طلعت أني وفاطمه ودخلوا باسل شايل هيفاء ويضحك هو وحيدر وعصماء أخر شيء لازم أيد غنى وأمها وابوها سلمنا عليهم وعرفت باسل جايبهم بسيارته! دام هيج ليش ما يرجعها بس سالفتك سالفه ادوخ يا باسل ، دخلو كلهم الأستقبال وكعدت بصف عصماء شلونج شخبارج عمي مشتاقيين من رجعتي ما شفناج شنو من زعل هذا .
عصماء ـ أعذريني وحقج عليه وخابرت البنات وگالوا اليه
ما بيج غير العافيه الله يسهل الج .
جنات ـ تسلمين عيني ، تحجي وباسل صاير مقابلنا يباوع بس ما يخليها تلاحظ ، وگمت صبيت الغده وهي وأمها بالغرفه اني وفاطمه كعدنا وياهن والزلم لوحدهم وكملنا الغده وفاطمه تحجي هي وامها واني بصف عصماء تبقون هيج وضعهم يمتى ترجعين ترى طالت حيــل ما يصيير وبينكم بناتكم يضلن بينكم متعذبات يوم يمج يوم يمه .
عصماء ـ والله ياعيني گولي هالكلام لأخوج أني شعليه شو هو لحاله زعل وعافني يم أهلي حتى سلام ما سلم عليه ،وأذا يريد خلي يطلگ كاعده بيت وبناته عنده وأني أهلي الحمدلله عايشين وعلى رأسي .
غنيه ـ عصماء يمه شهل الحجي تفلي من حلگج أنوب طلاك ما الج شغل هو مبين عليه هسه من نرجع يرجعج أصبري عليه .
جنات ـ أي يجوز نفسيته تعبانه ما يريد يتعبج فوك تعبج يرتاح فترة ويرجعج ياعيني لاتحكمين عليه وتظلمينه ولا تستعجلين بقراراج وموضوع الطلاق شيلي من رأسج الله لايگولها .
عصماء ـ أظلمه! خلف الله عليج جنات .
جنات ـ والله مو قصدي بس أني علمودكم ما أريد تخرب علاقتكم مو خاله .
غنيه ـ أي والله يخاله ويوميه أحجي وياها وأن شاء الله هسه من نرجع يرجعج وياه .
جنات ـ أي وسالفة الطلاق مو حل لمشكلتكم وهو جان بالسجن التمسي اله العذر أني الصراحه ما رضيت على تصرفاته بس هسه من شفته جابكم ونظراته وهو يباوعلج يعني ما بي شيء وباسل نفسه باسل ومثل ما گالت خالتي هسه من ترجعون يرجعج .
عصماء ـ الله كريم .
جنات ـ تندمت لان تدخلت حسيتها ضاجت ما ردت أخشن گلبها وهي مقهوره منه وگمت وشفته برى يخابر وطلعت عليه خلص أتصال وباوعلي باسل أريد أحجي وياك .
باسل ـ بشنو .
ـ أنت وعصماء
ـ شبينا أني وعصماء
ـ ما أدري اسأل نفسك يعني عاجبك وضعكم هيج هي يم أهلها وأنت لوحدك وبناتكم بينكم ما يصير ياعيني هيج تجازيها خطيه ركضت وتعبت كل هذا بس علمود أطلعك من السجن .
ـ مشاكل بينا ياريت محد يتدخل
ـ أحنه صار شگد ما متدخلين بس الوضع طال تضلون هيج
ـ گتلج بيني وبينها .
ـ عافني ودخل الأستقبال وشويه وگاموا وباسل حسيته أنزعج يربي بس لاعباله هي شگلتي والله ما الها ذنب عود وگفت وياك بس طلعت ما تستاهل وهي المسكينه ظلمتها على شنو ما أدري .
راحوا وبلكي من يوصل الها برجعها وياه والله يهدي عليها ويصلح حالهم ، ورجعت گملت تنظيف وفاطمه راحت وأني انظف سمعت صوت مو غريب هذا كرار!
أمجد ـ أدخل سلم على جنات .
كرار ـ خليني ما أسلم أني أجيت أشوف جدي .
جنات ـ باوعت شفته دخل الاستقبال وضليت بالمطبخ تالي رجعت الغرفه وأجه حيدر تمدد كرار راح لو بعده .
حيدر ـ لا بعده العصر أمجد يودي .
ـ أذا يريد يبقى خلي
ـ لا خلي يروح وهو هم تعود عند خواله مراهق مالي خلك مشاكله .
ـ براحتك عيني بس اني علمودك
ـ تسلم عينج أدري بيج بس خلي هيج أحسن من بعد اللي صار مستحيل بعد يسكن بالبيت .
ـ تمام وسحبني لحضنه وحسيته ضايج مهما يكون أبنه وأني مرته موقفه صعب وضل العصر راح وضل كل فتره يجي الصبح ويرجع العصر بس من حيدر موجود وما يحجي وياي وفاطمه كالت بلكي من تصير أخته يحن عليها وعليج ويبطل غيره منج ، الله يهدي ويصلح حاله
وتمر الأيام وملتهين بتجهيزات عرس أمجد وأنتقل بيته كمل الترتيبات وتجهيز الاثاث والغرفه وكلشي واني وفاطمه رتبنا كلشي بالبيت حتى ملابسها دزتهن اني رتبتهن الها الف الحمدلله من انجمعوا وفرحتنا بعرسهم
كل شخص واله قدره وحياته مقدره ومكتوبه يعيش الحزن والفرح ويخطأ ويتعلم من كل أخطائه مثل ما صار وياي والله عوضني بحيدر كبرلي عقلي من معاملته الحلوه وتعليمه اليه بهواي أمور بالحياة ، ومساندته اليه
حيدر شخص قيادي متفهم وواعي وهذا السبب خله علاقتنا تنجح وتكون أجمل علاقه بكل حب ، الله يحفظه ويخلي اليه ويحفظ النا بناتي نور و حور عوضي الجميل وأجمل أرزاقي ..
دمتم سالمين كانت معكم جنات الى اللقاء ♡ .
_____
عصماء ـ الأيام تمر وكل شيء ساكن ، اني بيت أهلي وهو بيت أهله والبنات ضالات بينا بالنهار عنده وبالليل عندي ما أعرف الى يمتى يستمر هذا الوضع وهو عادي عايش حياته طبيعي وأني اخر همه والمشكله ماكو مشكله تستوجب هالعقاب منه إليّه .
" بس أتضح الأمر بسبب أختي عاقبني على أخطائها أو يمكن يحملني ذنبها لان ما ساعدتها ورفضت أساعدتها وطردها وهي أنتحرت كأنما يوضحلي گلشي صار إلنّــا ودخولي السجن أنتِ السبب بي وفعلاً أني السبب وموت أختي وذنبها برقبتي لان ما ساعدتها ورفضت مساعدتها علموده وبالأخير خسرت الأثنين خسرتها من ماتت وخسرته هو هم
هذا اللي يضحي بإعزاز قلبه بالأخير هو الخسران الوحيد علمود بيتي وعائلتي وسعادتي وياه ولاتصيرلي مشاكل بسببها خسرت أختي وخسرته .
غنيه ـ ولج يمه تبقين هيج كاعده وإيدج على خدح وصافنه وهذا حالج وحال بنياتج مشلوع گلبهم خطيه
عصماء ـ شسويلهن من إيد أبوهن شو جايه عليه ما تروحين على نسيبج حبيب گلبج ما تنطين بي .
ـ ولج ليش أنطي بي هذا رجلج وابو بناتج موزين من عنده اجه وگابلنا وكعدنه بيت
ـ أنتِ هذا الهامج كعدج بيت
ـ لعد شسوي يا بنتي وأني وأبوج مريض ويه أنطي وجهي .
ـ لاتسوين شيء بس لاترجعين عليه ترى گلبي خلصان
ـ حقج يمه والله حقج بس سوي حل لروحج ومن يجي طلعي عليه أحجي وياه وافهمي منه ما يصير كلما يجي تنهزمين بالغرفه وموبايلج قافلته منين يحجي وياج .
ـ لا أطلع ولا أشوفه ولا يشوفني ولا أفتح موبايلي خلينا هيج دام عاجبه الوضع هاي هي مو هو جان يكول محد يموت ورى أحد اني عرفت وشكيت من رحتله السجن اول مره گوه يحجي وياي بس ما عبالي يطلع واحد ثاني ما عبالي باسل يتغيير .
ـ هذا هو بنيتي على راحتج .
ـ راحت وفتحت موبايلي ولگيته دزالي رساله
ـ ليش غالقه موبايلج كلما أتصل مغلق لعد شگو شايلته ذبي مو لازمج أذا هيج .
ـ ما جاوبته رجع دزلي
ـ راح أجيب البنات .
ـ ما جاوبته وقفلت موبايلي وأنتظرتهن وما جابهن وتأخر الوقت وهنأ ماكو وأصلاً تأخر الوقت رجعت نمت وما اعرف شگد مر الوقت أندك الباب باوعت الساعه بالوحده اكيد هو ، گمت كعدت أمي طلعت عليه ودخلن ثلاثتهن نعسانات وكومه باجيات أخذتهن بحضني وأمي دخلت ادردم وتحجي لاتحجين عليه هيج مقهوره عليهن احجي وياه مو هو جابهن أني شگو تحجين عليه .
غنيه ـ ما جان تطلعين أنتِ طبعاً يتخبل عليج إذا ما تطلعين عليه ولابسته وموبايلج قافلته شيسويلج .
عصماء ـ ما جاوبتها أخذتهن ونومتهن بحضني ومر كم يوم ونفس الوضع وكام يخليهن يمي ومرات يبقيهن يمه وعلى هالحال ما أعرف لشوگت..
جنت أغسل الحوش وأنفتح الباب من السيم ودخل هو وانطيته ظهري ومشيت سريع البس شالي والتفت بس البنات وين راح ، بابا وين .
غنى ـ راح المحل .
عصماء ـ طلعت باوعت ماكو رايح وباوعت على الجنطه فتحتها مشتري الهن ملابس جديده كلهن وقراصات وهالسوالف ومخلي فلوس بظرف أنقهرت حسيت هاي هي دام كام يدزلي فلوس يعني هذا مصرفج!!
دخلت معصبه ردت اراسله لگيته حاظرني! مستحيل باسل مستحيل هذا شبي ليش هيج يسوي بيه!!
حيل أنقهرت من تصرفه وما اجه أخذهن الثاني يوم
يله اجه ودزيت الظرف بيد بناته بس هيفاء ضلت يمي لان نفسيتها تعبانه بس تبجي گمت ما أدزها ومرت فتره ولقاء أنخطبت وما حضرت والعتب على أخوها
ولو حتى بعد لو يرجعني ما أرجعله أني مو رخيصه كرامه أرجع على مزاجه .
" دخلت الأنستغرام سويته بالجديد وتابعت البنات لان نشرهن كله على الانستغرام وشفت ليال ناشره ستوري ومسويه تاك ليث دخلت على حسابه جان عام وناشر ستوريات ردت اشوف حساب باسل لان ما متابعته وشفت الستوريات هو وباسل بالجم! ومصوىرين مقطع يضحكون طبيعي عايش حياته .
"دخلت على حسابه عام وستورياته كلهن صور إله ومغير سيارته ومهتم بشكله وأناقته راجع باسل القديم راجع لحياته السابقه بس حياة ما بيها عصماء! ورجعت شفت مقاطع اله بالجم يلعب ويستعيد عضلاته .
وكاتب عباره نرجع العضلات! حتى عضلاتك رجعتهن وعصماء ما رجعتها .
تجاهلته وحذفت الانستغرام وقررت بعد نهائي ما أراقبه
ومثل ما طلعني من حياته وعايش من دوني اني هم اطلعه واعيش من دونه .
عزمتنا جنات وكعدت تجهزت والبنات عنده بس هيفاء يمي وكملت وسمعت صوته ليكون هو يوصلنا وأمي طلعت عليه وشويه وأجتني
غنيه ـ يله عصماء أمشي تأخرنا وباسل اجه يروح ويانا .
عصماء ـ ترى نندل الطريق هو شگو رايح ويانا .
ـ شُنو هو شگو شبيج عصماء .
ـ روحوا اني بطلت ما أروح وهاج هيفاء أنطيها اله
ـ لاتسويلنا مشكله أمشي يله المره عازمتنا عيب وتخربطت نامت مستشفى وما رحنه الها على أقل لخاطر حماتج مو لخاطره هو ، شو جيبيها ولحگيني
مو ما تجين .
ـ راحت وضليت دايخه تالي شلت جنطتي وطلعت كلهم صاعدين بالسيارة بس أني باقيه صعدت وراه وهو نزل قفل باب الحوش وأجه كاشخ ولابس المناظر اي شكو عليك تكشخ ليش لا عزابي ومن حقك تلمع بنفسك
صعد والعطر مالته دوخني ردت أبجي والله بس كوه لزمت نفسي تستلذذ بتعذيبي باسل لان تعرفني أحبك ومشتاقتلك بس يا شوك بعد هالأذيه الشفتها منك .
وصلنا وتغدينا وجنات عاتبتني وأني گلبي خلصان وتوقعت على كلامها گلت دام راح ويانا وكاشخ أحتمال يرجعني وميخالف والله أرجعله وأعذره بس من وصلنا گال لبناته .
باسل ـ نزلن بابا وبالليل اجي أخذجن .
عصماء ـ عبالك ضربني سجين بنص گلبي وأعصابي فولت من القهر والعصبيه وقفلت عليه بعد لوتصير روحي بيك يا باسل ما أرجعلك نزلت عصبيه وعفتهن وراي وجابتهن أمي وما حجت شيء حسيتها مثل المصدومه احجي شعجب سگتي .
غنيّه ـ والله ما ادري شحجي توقعت يرجعج وياه شو كال لبناته نزلن حتى ابوج ضل يباوعلي مصدوم مثلي .
عصماء ـ أني هم راح أصدمكم ليش بس هو
ـ ولج شتصدمين من عدنا شبيج يمه عصماء
ـ لعد عاجبج وضعي عاجبج شمرني مثل ما يشمر خذائه بعد كلشي سويته وياه عايف عليه البنات وعايش حياته ومسوي عليه فضل وأستحسان يدزلي مصرفي بظرف هم ما ينطيهن بايده كلف على نفسه هواي وأني أعرف ليش جابنه وخلانا بهل البيت ومأثثه كامل وين اكو رجال يسوي معروف لله بس اذا جانت أكو نيه برأسه بس خلص هالنيه وضحت وبينت وباسل بعد ما يريدني من بعد اللي صار ومحملني الذنب بموت بيداء ودخوله السجن وهذا عقابج يا عصماء كعدي بيت اهلج وبناتي أنتِ ربيهن واني عايش حياتي من دونج .
ـ لا يمه لاهيج تكولين باسل ما يسويها
ـ ليش ما يسويها شنو فرقه عن الزلم والله اشترالج بيت ملك واثثه الج وكعدج بي ترى سوالج كل هذا علمود يسگتج لاتعاتبيه عليه وتطلبين منه يرجعني بس ميخالف نعوفله البيت وگلشي ونرجع منين ما اجيينا والدرب الجابنه يرجعنا .
ك
ـ لا يمه عصماء أستهدي بالرحمٰن وهسه ادز عليه وأكعدي واحجي وياه وحلوا مشلكتكم بالتفاهم .
ـ ادزين عليه تردين ترخصيني كدامه شايفتني گاتله نفسي علما ارجعله وبعدين يعييرني أنتِ دزيتي عليه ارجعج شبيج يمه مستحيل اسويها وهسه نعوف بغداد ونمشي ما نضل بهل البيت ولا دقيقه .
ـ وين نمشي تخبلتي أنتِ
ـ أي تخبلت لعد تردين ابقى تحت رحمته لا والله
ـ رجلج ولج رجلج
ـ وينه رجلي وينه سويت كلشي علموده شسوالي ما تسكتين يمه ولاتضلين ادافعين اله ويله امشي حضري ملابسج أنتِ وأبويه نرجع لديالى ما نضل بعد
وين ترديني امشي وياج واسحل بإبوج رجال مريض ما صدكت كعدت وأستقريت وخلصت من الايجارات انوب ارجع لشلعان الگلب كعدي وأسكتي هو يصفى باله ويرجعج لو ادزين عليه وتحجين وياه بس مال نمشي لا أنتِ تخبلتي .
ـ يعني ما تمشين وياي عاجبج انذل
ـ منو ذالج شو كاعده ومدلله أنتِ وبناتج ومصرفج يوصلج ومسواكنا وعيشتنا كلها عليه وتكولين انذل
هو الرجال لا يمج لا حواليج لا حاجي لا فاتح حلگه
بس أنتِ ثاكبه من يمج وتهلهلين عليه .
ـ ماشي يمه يصير خير
ـ ولج عصماء كعدي على عقلح لاتتخبلين وتشلعين كلبي يولي والله تعبانه وما بيه لخاطري بنيتي .
ـ لا يمه هذا هو ، عفتها ودخلت جمعت كل ملابسهن بالجنطه وملابسي وجنطتي واتصلت على ليال وردت
الو ليال أخوج بالبيت مو .
ليال ـ أي موجود بغرفته ليش عيني صاير شيء
عصماء ـ لا عيني ما صاير شيء قطعت الخط وشلت جنطتهن وهيفاء يله امشن وشافتني امي وكفت بطريقي .
غنيّه ـ وين مأخذه البنات ورايحه
ـ راجعه لبيتي مو هذا التردينه رايحه وأخلصج من همي ومشاكلي ويه باسل ليش ضاله هم على كلبج وبس اقهر بيج .
ـ لا ولج يمه على بختج أني من قهري عليج احجي لاتزعلين مني وأدري بيج صعبه عليج ترجعين برجليج خلص أرجعي واني اخابره واحجي وياه وافهم من عنده شبي .
ـ لا يمه ما يحتاج أنتِ ما ناقصه البيج كافي عليج يله امشن ، طلعت وأمي تبجي وراي وتمشينا وصلت بابهم ودگيت الجرس وطلعت اليه لقاء سلمت عليها دخلت .
لقاء ـ عصماء شجابج بهل الظهريه صاير شيء عيني
عصماء ـ جابتني رجليه أخوج نايم
ـ لا ما اعتقد قبل لاتجين بشويه صعد ما لحك ينام يله دخلي دخلي هلا بيج تعالن حبيباتي .
ـ دخلنا والبنات مجلبات بثوبي وهو نزل من الدرج متفاجئ ويباوعلي وساكت سحبتهن وياي وصلت العنده وخليت هيفاء بحضنه استلم بناتك مالي شغل بيهن أنت ابوهن وأنت المسؤول عليهن خليتهن بصف ابوهن وجنطة ملابسهن ومشيت وصاح عليه
باسل ـ وين موليه .
عصماء ـ راجعه منين ما أجيت والدرب الجابني يرجعني وعايفتلك البيت تستحسن بي عليه وعلى أهلي أني گلشي ولا واحد يذلني وفتحت الباب وطلعت وليال ولقاء يحجن على اخوهن
باسل ـ أوكفي وين رايحه عصماء .
عصماء ـ مشيت سريع وصلت بيت أهلي ودخلت واخذت جنطتي وملابسي وامي تباوعلي بخوف مو ما تمشين وياي اني ماشيه لوحدي وأنت ابقي شلج بيه اضل اسحل بيكم .
غنيّه ـ ولج عصماء تخبلتي وين تمشين وين عايشين احنه هالعرامه هاي ما اخلص منها مو طيحتن حظنا گبل أختج وهسه أنتِ شو امشي دخلي لا اكسر راسج .
عصماء ـ تكسر رأسي من زمان صار اشهر يهين بيه وأنتِ ساكته وأدافعين اله كافي تحملت وطگ گلبي من هالعيشه كلها مذله خليني وين امشي أمشي ما الج شغل بيه ومخلصتج من همي وقهري ضلي أنتِ وابويه شلكم بينا ما ورانا بس القهر عوفيني وخليني اولي جلبت بيه دفعتها وطلعت وهي تصيح وراي وحافيه .
غنيّه ـ ولج عصماء رجعي وين تمشين وين عايشين أحنه لاتفضحينه هو احنه مفضوحين رجعي سليمه من غضب الله يومج
عصماء ـ گتلج بس أمشي وياي ما مشيتي هاي أني ماشيه لوحدي عوفيني
غنيّه ـ ولج اوكفي بس البس عبايتي واجي وياج شتكول علينا العالم بهل الظهاري تمشين لوحدج .
عصماء ـ مشيت وكفت تكسي وصعدت وأمي وراي حافيه وتمسح بدموعها واتصلت على عمي حازم رد عليه عمي شلونك .
حازم ـ هلا بنيتي هلا عصماء الحمدلله أنتِ شلونج
عصماء ـ موزينه عمي وين أنت
ـ بغداد والله عندي ليش عمي شصاير وياج .
ـ عمي أريد اجي يمك بس مو بيت جدي اني ضاكت بيه الدنيا وما الي غيرك تستقبلني .
ـ هلا بيج عمي بس شصاير وياج
ـ عمي أشوفك واحجيلك ما ترهم عالموبايل
ـ ماشي عمي وين أنتِ
ـ بالتكسي تجي تأخذني .
ـ انطيني ابو التكسي يوصفلي العنوان وهسه اجي اخذج وافهم منج شبيج .
ـ اخذ العنوان بالتفصيل ورجع باسل يتصل رفضته رجع يتصل اكثر من مره وأرفض اخر شيء دزلي رساله
ـ خبله وين موليه بهل الظهريه لوحدج تخبلتي أنت والله بس الزمج الا أكسر راسج على عالتصرفات مال مزعطه دماغ زز ، رجعي البيت بسرعه رجعي .
ـ ما جاوبته وقفلت موبايلي وصلت المكان ونزلت وعمي انطاه الكروه وصعدت بسيارته وهو يسالني شبيه
ـ عصماء بنتي أحجي شبيج شصاير وياج ابوج بي شيء مو سمعت رجلج طلع من السجن واخذ اهلج يمه وأرتاحينا وسلينا همكم شصار انوب لاتخوفيني عليج .
ـ جاوبته وأني أبجي عمي طلعني من بغداد وديني لاي مكان بس لاتبقيني اهنا طگت روحي ما اريد ابقى بعد نذليت وتعبت مو عيشه زقنبوت كل يوم حلو عشته دفعت ثمنه ليكدام من عمري .
ـ غير أفهم منج شبيج يا عمي يجوز المشكله ما تستوجب لان باسل خوش باسل شصارلكم أحجيلي .
ـ حجبتله كل اللي صار والله عمي من ما ساعدتها ما جنت متقصده ولا عبالي راح تسويها وتقتل نفسها كدامي وسويت كل هذا باالاخير يطلع وهيج يجازيني هسه لو يگولي بعد ما اريدج واطلگج ميخالف راضيه بس مو هيج واني كلشي ولا انذل وأمي ما تمشي وأبوي تعبان موت بيداء اخذ عافيته وما لكيت نفسي غير اتصل عليك ما ضلي احد عداك عمي .
ـ أتدخل وأحجي وياه وأفهم منه شبي وشنو طلباته وأذا صدك يريد يطلگج ما ابقيج يمه والله تعالي يمنا وبيت جدج مفتوح حتى لو اهلج ما يجون وياج ما عليج من أمج أهلج عايشين وبيت جدج مفتوح الج .
ـ لا عمي عوفه لاتحجي وياه بس خل نمشي بس ما اروح وياك بيت جدي لان راح يجي ويدور عليه أهناك
ـ وأخذتج وياي وبعدين عمي شلون
ـ أخذني هسه وبعدين نحجي بهل الموضوع بس هسسه تعبانه بس أريد اطلع منا مخنوگه خنك عمي
ـ ماشي عمي راح اوديج يم عمتج هاله بشهربان ونشوف شلون تصفى تاليتها .
ـ أخذني وطلعنا من بغداد وموبايله يتصل وباوعلي
ـ هذا باسل والله يعمي راح تخليني بموقف شگوله
ـ فتح الخط ويحجي وياه ويباوعلي وأني أتوسل بي بنظراتي لاتگوله عمي لاتگوله .
ـ لا أبني ما خابرتني ماشي تدلل من تخابرني افهم منها واكولك اي ان شاء الله أي اي الله وياك .
ـ ها عمي
ـ دمه محترك صاير نار يعمي ويسأل عليج وخليتني اجذب عليه ، خل نمشي ونوصل وأكعد وياج ونحجي
ـ وصفنت هسه دمك أحترك عليه لعد وحركة دمي صارلي سنين وأشهر وأحترك عليك ما اهتميتلي هسه يله .
وصلنا شهربان ودخلنا قريه كلها بساتين الصراحه أني ما واصله بيت عمتي بس المكان كلش حلو وگفنا يم الباب وطلعت النا عمتي هاله وزوجها وابنها يوسف تذكرته لو امي مزوجه اله بيداء جان هسه عايشه مرتاحه وياه وبهذا بيتهم الحلو وبساتينهم لـو القدر اله رأي أخر؟
" سلمنا عليهم وعمتي بس شافتني گامت تبجي وأخذتني بحضني وشبعت بجي ودخلتني لغرفتها وجابتلي ماي وصينية اكل وتفتر عليه تحير شتجيبلي عمه بس اكعدي كلشي ما اريد والله .
هاله ـ ولج عمه گلبي خلصان من القهر عليجن قبل أختج وهسه أنتِ وعمج حجالي عن وضعكم وارتاحيت گلت همزين رجلها خوش زلمه واخذكم يمه والله زين قليل اللي يسوي زين بهل الوگت بس هسه تفأجات
عصماء ـ الحمدلله على كل حال .
ـ وبناتج شلون خطيه يمه
ـ خطيتهن بركبة ابوهن
ـ لا عمه هذا مو حجي البنات ما الهن غير امهن ما شفتي امج خطيه شصار بحالها زوجتجن الأخوان عبالها ترتاح تالي اختج الله يرحمها ويغفرلها أشسوت بنفسها وبيكم وتجين أنتِ تكملينها على اهلج ليش طلعتي من البيت وركبتي الحق عليج .
ـ بس عمه الحق وياي أني تعبت وأذا غلطت بحقه خلي يجي يعاتبني .
ـ ما عندج حق تدرين ليش لان هسه مية الف حجاية تنكال عليج لان طلعتي لوحدج والدنيا ظهر وحجي العالم ما يرحم يا بنتي حتى لو الحق وياج لو كاتلج ويصلخ جلدج الطلعه من البيت مو حل بس تجيبين حجايه لنفسج ولاهلج ورجلج وحتى بناتج لو ادري حازم جايبج فلا اخلي جان اني اجيت وفهمت من رجلج شبي وتوصلنا لحل .
ـ عمه لأتلوميني وتزيدينها عليه .
ـ لا عمه الومج واكسر راسج هم لان طلعتج بهل الظهريه لوحدج غلط يا عمه غلط وعيب تردين تصيرين مثل اختج ليش ما تخليني ساكته .
ـ گامت مقهوره مني وضليت كاعده وأسمعها تحجي ويه عمي ومنفعله ولليل اجتي يمي واني ابجي .
ـ سكتيي لا تبجين واني من حجيت لصالحج وعندج بنيات خطيه شنو ذنبهم واكعدي هاليومين أرتاحي وصفي بالج وفكرج وخابري زلمتج يجي ياخذج ما الج غيره تحملي وين تولين ترجعين بيت جدج كم يوم تضلين كاعده عدهم لو امج وابوج تعبانين ما دايمين الج رجعي ولمي بناتج ويريد يضل زعلان خلي بزعله ما الج شغل بي عليج بنفسج وبناتج شتسوين يا عمه جناحج مكسور وبيداء كسرتكم وطيحت حظكم .
ـ گامت وخلتني وخلص هاليوم واني ما نايمه وصدري يذب حليب لهيفاء طگ گلبي من القهر عليها وعلى أخواتها اني شلون عفتهن وبدون ما افكر بيهن ومشيت وخليتهن وراي اكيد هسه يبجن يردني وهنا متعلقات بيه كلش سوده بوجهي يمه بنياتي .
والصبح أني كاعده وأجه عمي .
حازم ـ باسل أجه للبيت وسأل عليج وضل كاعد ينتظرج والله يعمي متخبل وكاعد ، أني أكول لو ترجعين وتحجين وياه وأني سكتت لان أنتِ عزيزه عليه وأعرفج واعرف تربيتج وأخلاقج وما اريد اكسر بيج وتكولين عمي يريد يخلص مني .
هاله ـ ترجع ترجع ما عليك خليها يمي باجر عود تخابره يجي يأخذها بس اليوم عوفها يمي أني أحجي وياها بس اليوم أتحملوا خباله .
حازم ـ خير أن شاء الله .
عصماء ـ راح وباوعت لعمتي عمه
هاله ـ لاتحجين شوفي عمه عصماء اني ما متعاجزه منج بس كم يوم تردين تكعدين عندي ومحد يضم لسانه العالم مية سؤال باليوم يسألون وأكدر ادزج يم عمج بس أنتِ ما تردين ورجلج هناك ينتظرج وجاي يدور عليج مثل المخبل وهسه مية فكره تنطح براسه عليج واهلج تعبانين خطيه تعذبوا وتجين أنت تزودينها عليهم
هم ما اريد افشل حازم كالي خليها ترتاح كم يوم بس وتالي وبعدين عمه واني اشوف ما الج غير رجلج وبيتج وبناتج بعدهن صغار وحمواتج اثنينهن مخطوبات هم يردن يفرحن خطيه أنتِ لاتفكرين بس بنفسج فكري باللي يحبونج ويردونج ماشي عميمه معصومه وأنتِ ام عقل الجبير الواعيه والفاهمه .
ـ هزيت رأسي هذا هو عمه مثل ما تردين .
ـ اي فدوه لوجهج وهسه هم كلت للبنات يسون شيره واحفلج وارتبج واكشخج وتلمعي إلّه وباجر الصبح خابري وخلي يجي ياخذج خطيه هو هم انشلع گلبه الله يعينه لعد هينه سجن سنتين ظلم راحن من شبابه وانحرم من بناته وطلع وهنا كبار وما وعن عليه هينه يا عمه .
ـ هزيت رأسي بس بداخلي نار صعب من تكون عايش بمجتمع محد يفهمك ويفهم من شنو تعاني وكلها ضدك وهو الصح وأنت الغلط وسگتت وحفتلي ورتبتني وكشختني واني الغصه بصدري تخنك بيه وسبحت والدنيا مغرب وتذكرت بناتي عمه راح اخابره هسه يجي
ـ هسه حنيتي بهل المغربيه مو كلنا على باجر الصبح وهسه دنيا مغرب وين يجي من بغداد لهنا بعيده واخاف عليه لاعوفي عالصبح خابري صبري طلعتي ما مصدكه حفينا الج .
ـ تضحك وناصبه عليه ورجعت كعدت واجه عمي يسال عليه وطلعت ها عمي .
ـ عمي عصماء أمج اجتي علينا تبجي دم واللة زرفت گلبي وبناتج حال الضيم حالهن هاي الصغيره فدمره صايره عليج لا اكل ولا شرب عمي خابري زلمتج خل يجي ياخذج لا بنتج اطك وتموت شتسوالج عمي ، اني اتصلت عليه بس ما جاوبني ردت اكوله تعال اخذها بس ما يجاوبني اتصلي أنتِ بلكي يجاوبج .
ـ يمه بنيتي يمه سوده بوجهج عصماء ركضت ادور على موبايلي وفتحته واني ابجي لكيت من عنده گومة رسائل ومكالمات واتصلت عليه كبل جاوبني
باسل ـ عصماء وينج .
عصماء ـ تعال أخذني
ـ وين أنتِ وين مكبوره اجي اخذج وانعل والديج واليوم الصرتي بي على سوالفج يا عار .
ـ يم بيت عمتي بشهربان خابر على عمي حازم هو يدليك لان اني ما اندل
ـ ما تندلين! لعد شلون وصلتي لعمتج هاا شلـــــون منـــو اخذج الها وشووداج لشهربان عصمـــــاء .
ـ عاط بيه وكمزت من الخوف لساني أنعكد .
ـ ما تحجين بلعتي لسانج بس كدامي لسانج يهلهل .
ويامن رحتي على عمتج
ـ ويه عمي خابرت عمي هو أجه اخذني وجابني لبيت عمتي .
ـ أني اعلمج أنتِ وعمج الكواد وكدامه محترك بدمي وهو مأخذج والله عمي لا عتب على البنات وصلافتهن أذا الاهل والعمام وياهن حقجن عمي تنجلبن على أهلجن حقجن بس مو هسه حسابي مو هسه من أجيبج يمي نتحاسب عصماء سهله اصبري عليه اذا ما ربيتج من جديد اني مو أبن هيفاء اني ابن شارع والله اذا ما كعدت الج گلب من حديد اصبريلي عصماء .
ـ قطع الخط وكعدت خايفه منه أول مره أشوف هالجانب منه أول مره ، هذا مو باسل الحبيته ، كمت لبست عبايتي وشالي وحضرت جنطتي وموبايلي وتأخر الوقت وعمي يفتر وعمتي سألته .
هاله ـ خوما خابرتوا هسه يجي بهل الليل
حازم ـ اي
هاله ـ صدك تحجي حازم وبهل الليل هم أنت الغلطان جبتها من بيت رجلها لهنا وهسه تجيب رجلها بهل الليل بله انخطف صارله شيء ابن الناس اهله جايزين منه والله ما اعرف شلون تفكرون بس الصوج مو الك الصوج لهاي العرمه الكاعده تعوف البيت وتطلع وتخلي رجلها واهلها محتركين عليها بس العرج دساس اختها منو .
عصماء ـ ضلت تحجي وأني انقهرت وأستاهل لان فعلا اني غلطت المفروض ما اتسرع واطلع من البيت بس لحظة عصبيه وهذا مو عذر لا والله مو عذر .
ضليت أنتظره وخايفه منه وعليه وطلع عمي عليه لان ما يندل واني گلبي يدك بكل سرعته من الخوف وسمعت صوته لو عبالك ملك الموت قبض روحي عمه اجه .
هاله ـ اي أجه ويسوى رأسج حرامات بيجن هيج زلم هذاك اخوه تگول جبل واختج شسوتله وأنتِ الثانيه ما اعرف شكول امجن ما عرفت تربيجن لو ابوجن لو انتن من كاعجن صلفات ما ادري الصوج بيمن ما ادري امشي كومي وهاي اخر مره تسوينها كعدي بيتج ولمي بناتج
عصماء ـ طلعت وهي شالت جنطتي واني وراها وهو واكف يم السياره لوحده ويدخن شافني وباوعلي بغضب وجفص الجگاره وسحگها برجله وصعدت وگبل شغل وطلع سريع حتى جنطة ملابسي بيد عمتي ضلت ما انطاها مجال ويسوق بسرعه باوعتله وعاط بيه
باسل ـ والج عين تباوعيلي ولو صلفه ما عليج العتب مشيتي لا فكرتي بأهلج بإبوج المريض لو بإمج المتعوبه ولا بناتج ولا بيه عمي اني طبني مرض بس فكري بناتج وبسمعتج يالسكط هو بدون شيء سمعتنا بالطين شــنو نسيتي سوالف اختج نسيتي ست عصماء اذا عبالج تنسين الناس ما تنسى ومنتظره الغلط وبهاي مشيتج فتحتي دفاتر وتاريخ اسود ومصخم مثل وجهج من الله يصخم وجهج وجهي على هالسالفه هاي تنهزم بالظهريه والله عمي اخذني من انعل ابوج لابو عمج لابو اهلي وقسمتي الكشره
الجابتج عليه هذا الناقصني تنهزمين ادبسزز تنهزمين وين منهزمه هــا ويــن مــا تحجين .
ـ ما جاوبته
ـ ابقي لاتحجين ابقي لان اذا حجيتي ما اضمن على نفسي افتح باب السياره واشمرج واخلص منج .
ـ يحجي وصاير نار وموبايله اتصل وجاوب
ـ هلا عمه أي جبتها اي جانت يم عمتها هاله بشهربان ماشي عمه .
ـ رجع باوعلي صديت وجهي منه مرعوبه ولما وصلنا وهو يتأفف ويدخن صار جمر ويلهب وكف السياره باب البيت باوعت عليه وديني لأهلي .
ـ اوديج لاهلج خوش دروب عندج ليش اوديج لاهلج لا اجيبج يمي وكبالي مو سويتي هاي السالفه كلها علمود ارجعج كمتي تموتين شلون باسل ما رجعني سويتلج خوش فيلم وهسه الفيلم انتهى وباسل رجعج للبيت وتحقق مبتغاتج وبردت دودتج يله هسه نزلي يله .
ـ يابه شگد قهرني وجرحني بكلامه ، عاط بيه وجاوبته ما أنزل وديني لاهلي أني ما كاتله نفسي علمود ارجعلك وأخر همي أنتَ .
ـ لاتنزلين طبج مرض .
ـ صعد وشغل السياره ودك هورن ولقاء فتحت الباب ودخل السياره والبنات واكفات شافني وضحكن بس طبك السياره فتح الباب وسحبني من ايدي عوفني ما أمشي وياك باسل عوفني .
ـ حلفت الا اكسرج من البارحه لليوم اهل اهلي اشتعلوا شياطين الدنيا كلها تربعت برأسي وتردين أعوفج
لقاء ـ باســـل على كيفك وياها انطيها مجال واكعدوا واحجوا ولا كدام البنات تسحب بيها خطيه باســـل .
ـ سحبني ودخلني البيت ولقاء تحجي وياه وصاح بيها.
ـ لقاء ولا صوت امشي اخذي البنات نوميهن يله .
ـ عاط بيها وسحبني ملخ ايدي وصعدني الغرفه دفعني
وقفل الباب ونزع الحزام لا باســـل ما تسويها لاتضربني والله خابرت عمي رحت وياه كبل لبيت عمتي قابل أنتَ ما تعرفني فدوه لاتضربني
ـ بحياتي مـا ماد أيدي على مره بس صلافتج ورأسج الكوي ينراد اله تكسير علمود تعرفين بنفسج غلطتي وتحجمين ثمن غلطتج أدبسزز وين عايشين أحنه والله ما عاجبج الوضع تشيلين رأسج وتنهزمين وتعال باسل احضني وراضيني مو هذا تردينه ميخالف من عيني .
ـ تقرب ضربني حزام واحد قوي لميت ايدي احمي نفسي والثاني بطل شمره بالكاع وكفخني يإيده قوي على رأسي وصاح بيه .
ـ لو رجال غيري يكسرج والله بس راح اخليج وتكعدين على بناتج وتنجبين مو تردين ترجعين خلص رجعتج طفت نارج ، ادبسزز حيوان اني الصوج مني سربتج وديحتج وأستجلبتي على أهلج وعليه خوش دروب تطلعين وحدج عصماء وحدج .
ـ والله ويه عمي والله
ـ ولج من الله يأخذج ويأخذ عمج الكرن ، لو شريف ويعرف الأصول جان گالج لا عمي ما يصير من دون علم رجلج رجعي بيتج وتفاهمي وياه كدام أعلج وما عدنا نسوان تمشي هيج بس الكواده لعمج واني الصوج بيه كله مني عبالي أدمي وأكول عليج العاقله والواعيه وخوش مره وتفتهمين طلعت غلطان طلعتي انكس من اختج بيداء وخوش درب وحده تنتحر والثانيه تنهزم والله عشنا وشفنا نسوان اخر وكت ما تتحملن يابه تعالي واني شسويتلج تشيلين راسج وتمشين بهل الظهاري كل هذا لان ما رجعتج ما جان تجين عليه وتعذرين على نترج وصياحج بوجهي .
ـ ما صيحت بوجهك بس أنت طلعت متحمل عليه واني انقهرت منك وعصبت ما جنت متقصده والله
ـ ولج لعد اطلع من السجن كاره الدنيا كلها وحضرتج أستكثرتي على نفسج تتحمليني كم يوم وكدام أمج واختي لسانج متر عليه أحترام ما أحترمتيني كتلج لا تتدخلين اني احل مشاكلي ويه أهلي صمي حلكج وانتِ حجايه الج حجايه اليه ما سكتي لسانج بطول النعال وحضرتج زعلانه والله باسل ما سلم عليه هذا الكاتلج
من القهر ما سلمت عليج من طاح حظج وحظ تفكيرج يا أرعنه .
ـ بجيت لان كلامه حيل جرحني وقسى عليه وهو عصب ودولكه ماي شمرها وكسرها وفتح الباب وطلع وبعد ما صعد ومسحت دموعي وشلت جنطتي ونزلت وراه لكيت ليال ولقاء والبنات اجني عليه حضنتهن وابوس بيهن واخذت هيفاء بحضني
ليال ـ خوما ضربج
لقاء ـ شصار احجيلنا والله متتنا من الخوف عليج
عصماء ـ ما صار شيء بس راح اخذ البنات واروح لبيت اهلي يله ماما أمشن
ليال ـ وين تمشين فدوه اكعدي لاتسوين مشاكل والله يتخبل اذا اجه وما لكاج ما كافي البارحه تسممم عليج
لقاء ـ عصماء حقج مقهوره منه بس هذا مو حل لازم واحد منكم يتنازل للثاني وتعوذي الشيطان وصعدي الغرفه وهو من يجي يهدأ وتحجون وتتفاهمون .
عصماء ـ لا ما يحتاج بعد أني ما ارجعله وكلشي انتهى ننفصل أحسن ومو اول إثنين ينفصلون مع السلامه
اخذت بناتي وطلعت اتمشى وصلت بيت اهلي ودگيت الباب وامي فتحتلي الباب وتفأجات بيه .
غنيه ـ عصماء يمه شجابج
عصماء ـ أجيت عليج تطرديني
ـ لا يمه هلا بيج اتفضلي يمه والله حركتي كلبي عليج ليش هيج سويتي بيه وباسل وينه شسوا حجه وياج خوما ضربج هاا احجي يمه .
ـ ما بيه بعدين نحجي دخلت البيت والبنات يباوعن عليه واني تعبانه بس اريد اكعد لوحدي ابجي اني اشسويت وهيج يجازيني أشسويت لك يابه كلامه يدك بگلبي .
ـ عصماء بنيتي بيج شيء يمه لاتخوفيني عليج
ـ لا يمه بس ديري بالج على البنات ، عفتها ودخلت الغرفه بيها قنفه وحده وبلازما كعدت عالقنفه وخليت راسي بين رجليه وبجيت وضليت بالغرفه اجمع بالاحداث كلها وابجي وتذكرت بيداء وابجي واخر شيء هو ...
مر وقت وأمي حاولت وياي مو بعيني كلشي شيء بداخلي أنكسر تالي اخذت البنات نومتهن وأسمع هيفاء تبجي وسمعت صوته هو يسكت بيها .
باسل ـ لا بابا لا حبيبي .
عصماء ـ مر الوقت وسگتت وأسمع صوت أمي تتوسل بي
غنيّه ـ باسل يمه أنت مثل وليدي لخاطري لاتضربها ادري مقهور منها لان عافت البيت واجتي علينا بس من اجتي لحد الان هي بالغرفه تبجي وهواي مقهوره وأني وخايفه عليها لايصيرلها شيء ما عندي غيرها أموت
اذا صارلها شيء ما صدكت رجعت وشفتها .
باسل ـ لا عمه ما اضربها بس أحجي وياها .
عصماء ـ وحسيت بي دخل وسمعت صوت الباب أنقفل الى ان وصل يمي وكعد بصفي ورث جگارته ودخنها وهو ساكت وحجه بهدوء بس أعصابه واضحه على رجفة ايده احسه كوه متمالك نفسه عني . .
باسل ـ ليش رجعتي كسرتي كلمتي وطلعتي ليش هيج صايره عصماء ، عناد ورأسج يابس وكلمتج وحده واللي برأسج تسوينه وتمشين من دون علمي وعادي عندج تطلعين لوحدج من محافظه لمحافظه .
ـ مــا كسرت كلمتك بس ما ردت أبقى وأنت تكولي سويتي هالسالفه علمود ترجعني وما طلعت من محافظة لمحافظه لوحدي عمي أخذني بس من طلعت بيت اهلك اي لوحدي لان أنجبرت .
ـ ما جايب طاري أني احاجيج على سالفتج المصخمه
ومن هاي مقهوره وعفتي البيت ورجعتي بيت أهلج
ـ تعرف بنفسك أشسويت بيه ماله داعي أحجيلك
ـ أي اعرف بس أنتِ هم مذنبه لاتنسين بنفسج إشسويتي وصلت بيه اذا الكاج اذبحج طلعتج والدنيا الظهر ما جاي أهضمها ثكيله حيل ثكيله عرامتج فول بس ما اعتب عليج الظاهر بيجن هالعرامه بس حيـل مصدوم بيج
ـ أنت وصلتني وجبرتني .
ـ يله هسه ماله داعي الحساب امشي خل نرجع البيت
ـ لا نتحاسب هسه احسن وما ارجع وياك بعد
ـ لاترجعين مو على كيفج أمشي يله
ـ باســـل عوفني كلتها وكمت وسحبني من أيدي عوفني ما اريدك .
ـ غصباً عليج ترديني يله امشي نولي البيت
ـ ما امشي والله تريد تروح روح وحدك وأنت حتى ما جاي تراضيني
ـ أراضيج شراضي منج ليش تنطين مجال ، أعوفج وارجع الكاج عايفه البيت وماشيه لاهلج وكلمتي شنو ست! بس أنتِ استجلبتي عليه وتردين مني اراضيج بهل السهوله فد مره اخذيلج حضن بابا اني رجال هيج سوالف مـا تنهضم بسوالف مزعطه وين عايشه أنتِ بإوروبا ترى بالعراق بالعراق .
ـ ماشي هذا هو أني الغلطانه بس روح ما أريدك
ـ لاتريدني طبج ستين مرض بس كتلتي نفسج علما باسل تعال رجعني وبالاخير ما اريدك عساج لاترديني اي والله لو باقي بالسجن خايس ولا مكابلج أنتِ ونترج وصياحج هو هيج الزوجه تستقبل زوجها بهذا لسانها وتصرفاتها ما تكدرين تصبرين عليه .
ـ شصبر عليك وأنت ولا ابالك واصلاً عصماء أخر همك وأهتمامك
ـ منو گالج بكيفج تحللين ، أنتِ تدرين بنفسيتي شبيها تدرين داخلي متحطم شمدريج بس تردين باسل ما تردين داخله شبي ومن شنو يعاني بس هاي هي الحمدلله قابل أول مره انصدم قبلج شابع صدمات
ـ رجع كعد عالقنفه ورث جگارته ودخنها وكعدت بس بعيده وضلينا كاعدين ماكو أي كلام بينا والوقت تأخر
أكوم اجيبلك فراش تنام تأخر الوقت ما جاوبني گمت جبلته
ـ انطمري أنتِ ، ما انام ما يجيني نوم من يوم انهزمتي طــار النوم من عيني بهذاك الليل الساعه صارت يوم كامل والرعب العيشتي بناتج ولو شيهمج لو صدك أنتِ أم جان ما مشيتي وعفتيهن علمود ابوهن زعلان مني .
ـ مـا جاوبته ونمت وخليته كاعد ، ضل كاعد لصبح واني اغفى وافز الكاه عالكعدته ، گعدت وهو ماكو يمه باسل وينه .
غنيّه ـ راح يفتح المحل ويرجع يأخذج تحضري .
عصماء ـ گمت غسلت ولكيته يتصل جاوبته ها
باسل ـ تحضري أنتِ والبنات راح اوصل
عصماء ـ ما يحتاج خليني بيت أهلي .
ـ راح اجي واشوف منو الما تمشي وياي .
ـ قطع الأتصال وتحضرنا واجه طلعنا للبيت وصلت ليال ولقاء بعدهن نايمات صعدت نومت بناتي وهو دخل تمدد ونام واني بقيت يم السرير هيفاء تالي نامت وگمت نزلت جوه طبخت الغده ولقاء طلعت لدوام راجعه لدوامها كلشي راجع مثل قبل الا احنه كل واحد لوحده
وضلينه يومين نفس حالنه وهو الزعلان مني مقهور من طلعتي ما جاي يهضمها ومصدوم بيه .
كملت شغلي وعفت البنات يم ليال وصعدت نظفت الغرفه وسبحت ورتبت نفسي ولو ما يباوعلي بس مطلوب مني .
دخل وباوعلي وركز عليه وتهربت منه .
باسل ـ المن كاشخه .
عصماء ـ المن قابل أكيد إلك گلتها وهو يتقربلي وين لاتجي ولاتوصل
ـ ها متأكده من كلامج
ـ أي متأكده
ـ فوك ما غلطانه وهم تردين اني اجي اراضيج
ـ ما اريد ولا اريدك أصلاً مشيت ومنعني وحضني حاولت اسحب نفسي قيدني عوفني باسل ما اريدك هسه جايني .
ـ بس اني أريدج والله اريدج ومستحيّل أستغني عنج
ـ حضني وسحبني على صدره وادفع بي باسل
ـ روحه لباسل
ـ قربني لوجه عوفني
ـ مـا أعوفج واضربي احجي سوي كلشي تردينه ميخالف راضي ومتقبل كلشي وحقج عليه اني طوختها وياج وتعبتي من فراكي كمتي تتصرفين تصرفات مو لعقلج فراكي وبعدي عنج هو التعبج وخلاج تصيرين أرعنه .
ـ رفعت راسي وباوعتله لا غلطان مسح على وجهي
ـ لا ما غلطان لان أنتِ روحج بيه وأني مو بس روحي بيج أتنفسج بس جنت محتاج وقت ارتاح شويه ونفسيتي تتعدل واجيج ما جنت اريد أجي واني تعبان وازود عليج تعبج كافي الشفتي وعانيتي منه بسببي وبسبب أهلي واختج واللي صار أنتِ تاذيني حتى اكثر من عندي اني بالسجن وأنت لوحدج لاعبالج ما ادري كلهن يمي واني اكثر واحد حاس بيج ومقهور عليج
ـ يحجي وأني عبرتي بصدري وبجيت باسل ليش هيج سويت بيه گبل حضني لصدره بقوه ويمسح على شعري
ـ أسف والله اسف ما عبالي الامور توصل لهل الحال بس أنتِ هم ما سكتتي قهرتيني منج حيل بس كلبي ما يزعل منج لان يحبج فاهمه أحبج أنتِ معصومة گلبي شلون تطلبين الطلاك شلون سهله عندج تعوفيني
ـ صافن بوجهي ويحجي أنتَ وصلتنا لهل الحال
ـ يله ما صار شيء نتصالح ونرجع نغيير الحال
ـ باسنيي وكل جسمي رجف اله وبقينا باالغرفه ومنومني عالصدره وساكتين وهدوء يعم للمكان بس انفاسنا ونبضات قلوبنا السريعه سحب ايدي وباسها بحنيه .
ـ احبج
ـ بعدني مقهوره منك
ـ حقج بس اني هم حقي
ـ لا مو حقك
ـ ومشيتج لوحدج والدنيا ظهر للبيت عمتج هم مو حقي
ـ أي حقك بس مو هواي
ـ ماشي
ـ ليش من اجيت تضربني وكفت
ـ ما كدرت لان احبج وما يهون عليه اضربج حتى لو غلطتي اعاقبج بغير شيء مو بالضرب أنتِ مو حيوان
ـ باسني من كصتي ولمني لحضنه لازم ننزل البنات وحدهن
ـ خلينا هيج حاب أبقى وياج لوحدنا مرتاح وياج وأنتِ بحضني من زمان مفتقد حبج وحنيتج عليه .
ـ بقيت بحضنه ونمننا وكعدنا على صوت موبايله سحبه وفصل الاتصال منو
ـ ليث الخبيث
ـ خاف يريد منك شيء
ـ لا متفقين نروح سوه لـ الجم بس اليوم ما اروح اليوم الج وبس أني وياج .
ـ حضنته من وجهه صاير تروح جم وكذا ما عرفتك شنو هالسر
ـ ماكو سر بس ليث سجل بقاعه وگالي نروح سوه وهم من جنت بالسجن سمنت وجسمي خربان وگلت أرتب نفسي وعضلاتي وأجيج .
ـ أنت حتى عضلاتك رجعتهن واني ما رجعتني .
ـ غير اجيج مرتب وكاشخ يا حبيبي والله اليوم الطنكرتي بس اني متحضر ومتحلف الج ارجعج بس خربتيها علينا
ـ لازم اصدكك
ـ غصباً عليج ليش عندج شك بحبي الج
ـ لا ما عندي بس ليش هيج سويت بيه
ـ جنت تعبان .
ـ وهسه بعدك تعبان ، أنت دكولي تعبان شسوي بيك
ـ لا وكل تعبي راح بحضنج وهسه سگتي خليني مرتاح لاتضلين تفتحين مواضيع وتزعليني منج وعليج خوش شو تعالي خل نتفاهم .
ـ سحبني بقوه وضحگت لا الظاهر ماكو تفاهم
ـ هو الأحسن أنتِ مو مال تفاهم صايره وكحه .
ـ أنت هم صاير وكح أصلاً حيل متغيير
ـ ما متغيير بس أنتِ المتغيّره وصايره تعاندين طبعج خربان ما جنتي هيج ، تغيّرج هو الخلاني أعصب عليج رجعي عصماء الأعرفها والعرفتها وشوفي منو اليتغيّر عليج .
ـ تمام
ـ رضيتي
ـ شلون ما أرضى ليش بهون عليه أضل زعلانه منك أني ما صدكت طلعت من السجن وفرحانه بطلعتك بس أنت خربت لهفة اللقاء .
ـ أسف والله جنت مالي خلك حتى لنفسي .
ـ يله عاذرتك
ـ فدوه الكلبج الحنين أبو المحنه
ـ ضحك ويبوس بيه ونمت بحضنه مرتاحه بعد الزعل طويل الحمدلله من رجعنا مثل قبل رغم كل الظروف والمشاكل ما أفترقنا واستمرت حياتنا طبيعيه وهو بالمحل واني أطبخ الغده وأتصل عليه هلا حبيبي .
ـ گليبي تحضري نتغدا ونطلع
ـ وين
ـ لـ الشمال حاب نبتعد كم يوم نغير جو ونتونس
ـ والبنات نأخذهن ويانا
ـ لا بس هيفاء لان ما تفارگج وجهزي ملابس حدود ثلاثة أيام .
ـ تمام وشكراً
ـ على شنو حبيبي
ـ على گلشي
ـ واجبي هذا ، المهم عندي أسعدج وأعوضج
ـ ما تقصر
ـ أحبج
ـ وأني هم روحي بيك وبحبك
ـ يله گملي شغلي وأصعدي
ـ تمام ، وكملت شغلي وجهزت ملابسنا وأغراضنا وأجه وتغدينا ودعنا البنات وعمي وليال ولقاء يتغامزن عليه وبناتي غنى وجنى يبجون يردون يجون بس باسل قنعن وضلن يم عمي وعمامتهن وطلعنا لـ الشمال وبالطريق ليث أتصل عليه .
ليث ـ شگو عليك تطلع سفره بالجذب ما گتلي والصبح كله اني مكابلك ما فتحت موضوع ، صدك رحت .
باسل ـ أي والله صارت عالسريع أجتي على بالي بدون تخطيط .
ـ أي شگو بيها بس جان گتلي أروح وياك أني وليال أنوس أختك خطيه هم تشوف الدنيا شبيها ما بيها
ـ وأنت شگو رايح وياي وين تروح أنت وليال شُنو ناسي نفسك بعدك خاطب وها ما أوصيك طلعات ما أريد
ـ لما دوامي جان من زمان سويت عرس بس عرس عليه هالدوام وبكيفك ماكو طلعات لعد أنت متونس وحارمنا خاب دتطير ، أصلاً اليوم مأخذها نتعشى وأريد واحد يخابرني ويمنعني خوش .
ـ ههههه خوش بس لاتتأخرون على كد العشى ورجعها
ـ بكيفي بعد ما الك شغل أختك مرتي
ـ ليا أدبسزز
ـ ديله أتونس حبيبي وخليينا ننتفس براحتنا من دونك
عصماء ـ ضحگوا وقطع الاتصال وباوعلي ولزم أيدي وهيفاء گبل نامت وفتح موبايله وانطاه اليه شنو حبيبي .
باسل ـ صوري
عصماء ـ تمام وأخذت صور لأيدينا ومقاطع فيديو وبعدها وصلنا وحجزنا فندق ارتاحينا بالليل طلعنا اتعشينا وافترينا أماكن حلوه ومولات وأشترينا ملابس وهدايا وضلينا ثلاثة أيام ونسه من العمر نسيت بيها نفسي وعشت وياه بكل تفاصيل السعاده بوجوده .
رجعنا البيت وبناتنا زعلانات من عدنا وباسل راضهن واخذهن عالمطعم بس هو وياهن وتأخروا يله اجو طلع مفررهن مدينة العاب ومشتري الهم ملابس ومثل ما فررني ونسي هنا كذلك .
مرت أشهر وصرت حامل وحملي صار فجأه ما عبالي يصير لان ارضع هيفاء وأمي گالت عالرضاعه ما يصير حمل بس صار وباسل فرحان طاير عبالك ما عنده أطفال وكال أذا ولد أسمي على أسم أخويه نائل ما عارضت لان من حقه ونائل أنظلم وهاجر وعاف أهله وبعد ما يرجع وحب يسمي أسم أبنه على أسم أخوه ما بيها شيء
" وفترة المرت ملتهيه ويه لقاء ورحت جهزتلها وكملنا كلشي ودزينا ملابسها جنات وفاطمه رتبوا ملابسها واغراضها لان بيتها لوحدها وفرحانين بيها وعرسها راح يصيير قبل عرس ليال لان ليث خطيه علمود دوامه هالفتره متغيير وما عنده مجال لما يستقر دوامه ويسون عرس ونفرح بيهم .
" كاعدين نتجهز لان باجر حنتها ولقاء كالت .
لقاء ـ أكولجن اجتي ابالي فكره هي أبالي من زمان بس هسه صار وقتها وبما احنه راح نتزوج وتضل بس عصماء وكافي عليها بناتها ثلاثه وباسل ومنا حامل والبيت شتلحك عليهم .
ليال ـ أطربينا بهل الفكره أختصري نريد الزبده
لقاء ـ نزوج أبويه وهو كل الوقت يمنا ليش نخلي جواهر تأخذه بس إلها وتستحسن عليه بهل غسلة الملابس والكوي ليش ما نزوجه ومن حقه يتزوج شگو بيها قابل شتگولن ، ليال شو صفنتي شبيج .
ليال ـ لا مو مال زواج يمعوده شيلي الفكره من بالج أنتِ أفكارج مدري شلونها وهم تزوجينه وترجع جواهر وسحورتها علينا وأدمر أبويه وأدمرنا وياه دعوفي وخلينا مرتاحين شلج بهل السالفه دكعدي راحه .
لقاء ـ لا الأ ازوجه خل أتزوج وبعدين أفكر بيها وأدورله على مره وأزوجه وگولن لقاء ما گالت أذا ما زوجته اصبرلي .
عصماء ـ والله لقاء شعندج أفكار وضحگنا عليها وعلى فكرتها لان مستحيل عمي يتزوج وما بيها شيء نوعاً ما أقتنعت يالفكره وحجيت لباسل وطلع اضرب من لقاء وموافق يا حبيبي أتفقوا شلون اثنين تؤام مو مثلهم
وثاني يوم الحنه تمت على احسن شيء وسوتها بقاعه وعزمنا الكل وفرحنا بيها وعرسها كذلك وتزوجت الله يسعدها ويهنيها ...
والى هنا أنتهت مسيرة قصتنا بكل أحداثها وأنتصر حبنا رغم كل الظروف الصعبه الواجهتنا والحمدلله على كل شيء والله يرحمج يا أختي وذكراج على بالي وتحز بخاطري وقلبي ما ساعدتج وغصه بروحي عليج وكلما نائل يتصل يحجي ويه أخوه وأخواته تصيرين كدامي أنتِ وياه بس وينكم أنتِ رحتي وهو سافر وما عاد يرجع وانتهت حياتكم واحد مات والثاني عاش بنصف روح .
كانت معكم عصماء أم لثلاث بنات وولد أسمه نائل .
______
لقاء ـ أحلى شيء من تعيش أفراحك بعد معاناة كثيره من أسحار وخوف ورعب وفقد وطعن ومشاكل وظروف صعبه ما كنا راح تمر بس مرت ورجعنا لبيتنا مثل قبل وأحلى ورجعوا عصماء وباسل بلابل الحب وأنتصر حبهم على زعلهم وأجتمعوا والله يدوم حبنا وجمعتنا بكل حب
اليوم حنتي وفرحتي ما تنوصف وأني ملك لحبيبي اللي رغم كل الظروف ما تنازل عني وعن حبه اليه .
نركص ونغني أني وياه وهو صافن عليه واني عايشه فرحتي بوجوده هو وحبه اليه بس ما كنت ادري أكو شخص نفسه بيه وأنصدمت لمن عرفت وضليت أقرا بالرسائل أريد أستوعب كلامه .
سجاد ـ ما تمنيت يجي هذا اليوم غيري يتملكج وأني مربطه أيديه لعد بنت عمي غيري يأخذها وأني روحي بيها .
لقاء ـ شتحجي سجاد لا مستحيل تكون أنت سجاد الأعرفه اني وياك مثل الأصدقاء لاهيج تحجي عفيه
ـ أني مو اخوج ولا صديقج أني أبن عمح وبس ومن زمان أحبج! بس جنت أعاند نفسي واكول لا اني وياها مختلفين ما نتشابه وجنت اضحك على عقلي بتشبيهات علمود گلبي ما يوكع بحبج بس طلعت اكبر غبي من فوتت فرصه تجمعني بيج وبحبي الج ورحتي وطرتي من أيد سجاد بس مع ذلك راح اضل احبج ومـا انســاج والله لايوفقه الأخذج مني عساها بحظه وبخته ونفسي بيج لما يأخذني الموت ، احبج حتى وأنتِ متزوجه ابقى أحبج لاخر يوم من عمري .
ـ أسفه بس راح احظرك سجاد
ـ أحظريني بس أبقى أحبج لقاء
ـ حظرته واني مصدومه بي وحجيت لـ ليال وما أنصدمت يعني جنتي تدرين بي يحبني!
ليال ـ لا بس من الأول ما رضيت تحجين وياه وتأخذين وتنطين بالسوالف حتى لو أبن عمج وربيتوا سوى يضل أسمه رجال غريب عنج هو صح أنتِ حبيتي أمجد بس جان المفروض ما تحجين ويه سجاد بحجة الصداقه لان ماكو شيء أسمه صداقه بين الرجال والمره لان مع الوگت تتحول الصداقه للحب من خلال كلمه وأسلوب خلاه يحبج ويتعلق بيج وهذا اللي صار ويه سجاد الغلط منج المفروض من الأول تخلين حاجز بعلاقاتج حتى بين ولد عمامج فهمتي عليه وهسه حظرتي وبعد لاتفتحين عنه الحظر وحاولي تنسين كلامه والله يعوضه ويجبر خاطره وينسي وعوفي گلشي وأنسي وباجر عرسج لاتخلين الافكار تخرب فرحتج يحجي اليحجي ومن حركة كلبه بس مع الوكت يتعايش ويحب وينسى .
لقاء ـ أن شاء الله ، وتجاهلته وراسلت أمجد ومخبوص حبيبي وينك من خلصت الحفله بعد ما شفتك
أمجد ـ موجود حبيبي بس مشغول ويمنا كرايبنا والهوسه گابه لستار دك أغاني وركص .
ـ حبيبي أخذ راحتك والله يدوم أفراحكم .
ـ ماشي حبيبتي بعدين اراسلج
ـ اوك حبيبي وراح ورجعت اني وليال وتحضر فستانها وتصور وادزه ليث شطلعت هاي هذا يطلع روحج لما يتزوجح ومن تتزوجون شلون هم هيج .
ليال ـ شسويله وأحنه أفترقنا بسبب غيرته عوفي خلي يغار .
لقاء ـ لا واضح أنتِ حابه غيرته عليج
ـ كلش واحبه هو وغيرته وخبالاته ، عجبه ما يدري افتريت المحلات كلهن علموده .
ـ همزين عجبه واقترحت عليهن فكرة زواج أبويه ويضحكن عليه بس خليتها براسي خل يخلص عرسي وأفتح الموضوع ويه أبويه ويصيير خير يا جواهر صح أستفقرتي ومبتعده وما عليج بينا بس ما انساهن الج
" والصبح تحضرنا نروح الصالون وهو وجنات أجو علينا وطلعنا وجنات كاعده بالصدر وهو يضحك علينا نزلي
جنات ـ ما انزل واني الجنه الجبيره وأنتِ الصغيره شنو نسيتي مأخذه حمايه يله صعدي يله .
لقاء ـ والله وگت جنتي مكفخه جوه ايدي شلون صارت وصرت جوه ايدج دارت الدنيا موخوش دوره ، صعدت واني مدخنه منها وأمجد مبتسم على شكلي لاتحاجيني مزعوجه منك ومنها .
أمجد ـ لا عاد ويه جنات ما أقبها هاي الكل بالكل والله من دونها كلنا نضيع ساترنا علينا ومستكثره عليها كعدة الصدر ومو بكيفي ما اكعدها رجلها يوصي بيها
لقاء ـ أي فهمنا فهمنا باوعتلي وضحگت والكل ضحكن عليه لا طنگرت عليها بس بعدين شغلوا الأغاني وتغيير المود وطلعنا ويه طلعتنا صـار سجاد بوجهنا بسيارته وصارت عيونه بعيني كبل صديت وجهي وعبر من يمنا
وصلنا الصالون وراح وبلشت مكياج وتسريحه وانقهرت على عصماء دايخه ويه بناتها وانوب حامل شتلحك يبو
حالها بالضييم بس هي سباعيه ما ينخاف عليها ..
وگملنا ولبست بدلتي وعمتي سلوى لبستني البركع وسترتني فدوه لعينها ما قصرت ويانا ما عافتنا أبداً وكل شوي تباوع على ليال وتصلي على محمد تخاف عليها وتخاف من لسان ليث لايرجع يحجي .
سلوى ـ ليش خليتي من هاي الحمره والله يتسودن بس يشوفج مخليه منها .
لقاء ـ ليش عمه شگو بيها حلوه وهاي حمرتها المفضله وصتها توصيل بس علمود اللون والدرجه وهو عرس خطيه خليها .
سلوى ـ يتخبل من هيج الوان وهو يغار عليها خاف يضل يحجي ويزعلها ما اريدهم يتزاعلون اني ما صدگت بيهم انجمعوا .
لقاء ـ لا ان شاء الله ما يحجي واجتي بصفي ها شكالج
ليال ـ يريد صوره لشفايفي وعاندت ما دزيت يكولي لاتخلين حمره اكص شفايفج اذا شفتج مخليه حمره
حتى أيلانير ما يقبل يكول عيونج كبار ما يحتاج المن مكبرتهن هذا شحجي وياه .
لقاء ـ عزه شيخلصج من لسانه
ليال ـ بلكي عمتي تحجي وياه وتفهمه .
لقاء ـ بلكي وكملنا واخر شيء ضلت عصماء وضلينا نتتظرها خطيه غير باسل ما يلفينا البيت اذا مرته وبناته ما مكملات ، وليث أجه اخذنا وهالمره الصدر ليال واني وجنات ليورى وعصماء وعمتي ويه فارس .
ليال تباوعلي وترجع تباوعله وهو يسوق بس ساكت وأستغربنا من هالسكوت يجوز عمتي خابرته وصته وصلنا وأني نزلت وليث لزمها من أيدي وشال الكلنكس ومسح شفايفها خرب والله عرفت .
ليث ـ المن نافخه شفتج مخليه اكثر لون اكرهه وينه القلم جيبي واذا خليتي منه أحرمج من التوصييل والله
ليال ـ لييث مــا يصير هيج لعد شخلي .
ـ لاتخلين شيء ما يحتاج
ـ بس ليث
ـ لاتناقشيني ليال .
ـ ماشي .
ـ وين بس لا زعلتي ليال رجعي ليال .
لقاء ـ نزلت وطنگرت عليه وهو خله القلم بجيبه خرب تصرفاتهم تضحك ودخلت البيت بوسط الهلاهل وكل أقاربنا موجودات وخالتي هيام ساعدتني وكعدت متوتره من الجو والهوسه وكلها تباوعلي خاله ما الله يهداج وأخذج لأبويه عليج الله أريد ازوج ابويه شگو بيها
هيام ـ لا يمه عزه سگتي سگتي واذا حجيتي بهذا الموضوع أزعل منج والله .
لقاء ـ سگتت وتضحك على أفكاري واجتي ليال مخليه حمره! ها ولج شلون قنعتي وخليتي .
ليال ـ شسويله لعد وخليته يرجعلي القلم ويوافق
لقاء ـ شسويتله خرب
ـ والله بس زعلت وشلت خشمي عليه كام يموت ورجعلي القلم بس مكسور خرب كوه خليت منه عناد بي
ـ حاولي تحجين وياه خلي يخفف ترى الغيره من تزود عن حدها اتعبج واتعبه وياج .
ـ والله ما اتزوجه اذا يضل هيج
ـ خرب لا مو لهل الدرجه
ـ شوفي بعينج ، يله أني اروح اشوفه هسه الكي يلوب
ـ خرب روحي هو أنتِ كمتي تلوبين مو بس هو
ـ شسويله أحبه ما يهون عليه أعوفه زعلان ويضل وراي يدخن لايصير بي شيء خل اروح الحك رجلي .
ـ تمام راح وصلتني رساله من حبيبي
ـ دقايق واني يمج
ـ تمام على راحتك وشلغوا الاغاني وصور ومر الوقت وسمعنا صوت الطبل وهورنات السيارات وصلوا وصلوا وگلبي صار طبل ويدك ويه الطبول ودخل باسل واخذ البركع من عصماء ولبسني وباسني من كصتي وبجيت وهو مثل الاختنك هذا حبيبي هذا أخويه
روحي من الدنيا
باسل ـ ما يحتاج اوصيج ابويه رجلج وعيالج ديري بالج عليهم وبيضي وجه أبوج وأخوج اريد اسمع اخبارج مثل جنات .
لقاء ـ أن شاء الله عيوني أنت
باسل ـ لو لابسه حجاب مو احسن عصماء تعالي ضبطي زين لاتخلين شيء يبين لان كلها راح تدخل .
لقاء ـ اجتي ضبطته رغم ما يبين شيء بس حسيته ما ما راضي وكف ويباوعلي ولازم ايد غنى وشويه وطلع ودخل بس أمجد وفاطمه وجنات وحيدر يم الباب .
وصل حبيبي تقرب لزم ايدي واني خايفه ومتوتره واجه ابويه باسني حبيبي وحضنته وبجيت وهو هم
سعيد ـ الله يسعدج بنيتي الغاليه .
لقاء ـ مشه واني امسح دموعي وباوعلي وضحك لاتضحك .
أمجد ـ شسوي اول مره أشوفج تبجين
لقاء ـ خبيث وضحك وطلعنا وباسل يدخن وعاكد الحواجب ويباوع بحقد على أمجد وعيونه انترست دموع بجيت واني اباوعله شفايفه ترجف وعصماء لزمت ايده
تهون عليه ورفعلي ايده مع السلامه وطلعت وعفتهم وراي يبجون وصعدت الصدر وليال وجنات ساعدوني .
وليال وجنات وبنات باسل راحوا ويه حيدر لان عصماء ما اجتي ادري بيها ضلت يم باسل ومشينا بوسط صوت الطبول والأغاني وإيدي بإيده وقبل للنطلع من الفرع شفت سجاد وصديت وجهي عنه جنت عاقل شجاك .
أمجد ـ حبيبي شبيج .
لقاء ـ ها لا حبيبي ما بيه شيء بس ضجت على باسل وابويه
ـ لاتضوجين حبيبي مو بعيدين عليج اليوم يوم الفرح اليوم عرسنا وأحلى ايام العمر التجمعني بيج .
ـ يروحي أنتَ وضغط عالأيدي وتمشي بينا السياره وعايشين فرحتنا وصلنا القاعه ومن نزلت رجلي التوت وجنات وليال انخبصن بيه واجه هو وعطت بي وين جنت شكو تعوفني .
أمجد ـ هسه اجيت اوكفي لاتحركينها تشنجنت .
لقاء ـ كله من وراك
ـ واني شعليه ، أستغفر الله كبن خبالاتج
ـ اني خبله ماشي امجد
ليال ـ مو وكت تتعاركون لاتفضحونا .
لقاء ـ ونزلت ومشينا وهو لازم أيدي واني اضغط عليها نبتت اظافري بيها وهو عاكد الحواجب ومزعوج .
أمجد ـ اظافرج خرب بيومج اظافرج
ـ تستاهل علمود ما تعوفني
ـ وين عفتج بس نزلت وكفت وياهم عبالي نزلتي .
ـ ودخلنا والاغاني والهوسه والتصوير وباوعلي
ـ ابتسمي مو وكت طناكيرج
ـ أبتسم انت ، ابتسم وضحكلي خرب يومك ودخلنا كعدت عالكوشه وبلشت مراسيم العرس وهو ولا كعد يمي وراح يمهم وبلشوا يركصون وفرحان ويباوعلي ويسوي حركات بالحلقه وياشرلي احبك .
ونأخذ صور أني وأخواتي وصلتني بوكيه ورد طبيعي واستغربنا اخذتها .
جنات ـ منو دازها شوفي لازم اكو كارت .
لقاء ـ شفت الكارت مكتوب بي
ـ الف مبروك أتمنالج السعاده من كل گلبي لان أنتِ تستاهلين تكونين سعيده .
ليال ـ هذا سجاد .
جنات ـ شمدريج هو
ليال ـ مبين هو لعد منو غيره جيبي الورد والكارت لا امجد يلاحظ وتصير مشكله .
جنات ـ عيب عليه شنو معناها هالتصرفات مال جهال ادز ورد وكارت هذا متأثر هواي بالمسلسلات والأفلام
لقاء ـ ما حجيت بس أنقهرت عليه ما تمنيت أخسره كأبن عم وصديق ما تمنيت تكون نهايته حزينه وزعلان عليه وبكلبي اني هم اتمنالك السعاده والله يعوضك .
وليال ما طولت لان البنات تعبنها واجتي ودعتني واجه ليث اخذها وجنات يمي هي وخالتي هيام وعمتي سلوى وبعد وقت طويل وتعب خلصت الحفله وطلعنا للفندق وعمتي وجنات وياي دخلوا الجنط وعمتي علمتني بهواي امور رغم عصماء حجتلي بس عمتي هم اكدتلي وبعدها طلعوا ودخل أمجد وسيطر عليه شعور الخوف والتوتر والرجفه على الرغم الحب البينا بس هالمشاعر مختلفه .
تقرب لعندي ورفع رأسي وباسني من كصتي .
امجد ـ مبروك علينا وأخيراً اني وياج اجتمعنا .
لقاء ـ الله يبارك بيك حبيبي وبعدها صلينا وكمل واندار عليه وباسني وشعور غريب وخوف سيطر عليه وابتعدت عنه امجد
امجد ـ ها حبيبي شبيج خايفه مني
ـ ما اعرف بس خايفه قبل لا اكمل كلامي سگتني واخذني اله واحتواني بين أحضانه بهدوء وحنينه ضمني وملكني وصرت حلاله والحمدلله .
هو دخل الحمام واجه ومبتسم گمت خجلانه من عنده
أمجد ـ أبوس الخجلان .
لقاء ـ دخلت سبحت ولكيته محضر العشه وكعدنا تعشينا وضلينا سهرانين وبقينا ثلاثة ايام وبعدها
رجعنا البيت وغدانا بيت حيدر وجنات وعازمين اهلي باسل وعائلته وليال وابويه وتغدينا وكعدنا نسولف وجنات السخيفه تسأل بيه بس ليال مستحيه ما سالتني .
والعصر رحنا بيتنا الحلو بكل تفاصيله ودخلنا غرفتنا واجه حضني
أمجد ـ نورتي بيتج يا أم بيتي .
لقاء ـ منور بوجودك حبيبي واخذني لـ احضانه وعشنا حياتنا بيتنا بكل حب وعلاقتنا الحمدلله ناجحه صح مرات نتعارك بس عادي تعودنا وهو يوصلني الدوام والعصر كذلك الصيدليه ومنع عني السواقه هو تكفل وما عارضت لان هو ما مقصر وأهم الشيء التفاهم بإساس كل علاقه والحمدلله متفاهميّن .
والى هنا وتتنهي قصتنا بكل حب كونوا اقوياء مو بس لنفسكم أقوياء لأهلكم وأخوانكم وأخواتكم أني حاربت كل اللي تسببوا بالأذيه لاهلي ، بالاخير الله عوضني على كد تعبي وأذيتي وشفت جواهر وكسرتها وصح محد كشفها وعاقبها وحاسبها وضلت عايشه بالبيت وست البيت بس كسرتها بقلبها بإبنها راح من حضنها وضلت عايشه بس بالأسم جواهر وبس اما هذلك الحقد والشر تلاشى وانتهى من بعد سفر نائل جواهر أنتهت ونائل ما شفناه ولا رجع فقط نتواصل عالموبايل واستقر وعايش حياته بالخارج الله يسعدك يا نائل ...
كانت معكم لقاء الى اللقاء .
_______
ليال ـ بالقاعه وهو يتصل ومنا البنات ضاجن من الهوسه اصبر يا عمه انطني مجال جاوبته ها ليث
ـ وين أنتِ ما كافي عاد
ـ اليسمعك يگول داخله ملهى مو بقاعه وبعرس أختي
ـ يله تعالي أنتظرج .
ـ سالمين! وين هسه بدأت الحفله عيب شعندي من هسه رايحه
ـ أنعل أبو العيب زين لو لا وأني شگو بالعرس عم أبن خال ترى ماخذين أختج وغريب أنتِ شعندج رايحه للعرس ووافقت مشيتي وياها ميخالف ساعه زمان بس مال تضلين لما تخلص الحفله هاي ما تمشي عندي ليال فضيني وطلعي .
ـ الله يصبرني على ما بلاني .
ـ تعالي وأني أعلمج على هذا الدعاء .
ـ هسه اجي .
ـ تعالي عاد ، والأ أكولج لا اني راح اجي
ـ لااا شتجي أني راح أطلع إلكَ أصبر
ـ ليش ما اجي! هاا شگو بالعرس وتخافين أشوفه
ـ شگو قابل بس أني راح اطلع ليش اتعب نفسك
ـ لا اني أريد اتعب نفسي ودام ما ترديني اجي الا اجي واشوف شكو بالعرس واكيد اكو زلم بكد الدود وكلهم شافوج وعاندتيني خليتي من الحمره مو ، أي اعرفج عناد اللي برأسج تسوينه بس هسه راح أجي
ـ تعال
ـ أي اجييت بس ما اضمن الج خبالاتي اذا طلعن عليج شسوي
ـ أستغفرالله
ـ اي أستغفري أستغفري
ـ قطع الخط بوجهي ورحت على لقاء هذا راح يجي خبلني وياه والله راح اروح يله حبيبتي مع السلامه جنات ديري بالج عليها .
جنات ـ لا يضل بالج عيني .
ليال ـ لزمت ايديهن ومشيت وموبايلي يتصل ليث جاوبته ها ليث .
ليث ـ أمشي من مكانج شو وكفتي مو وراج واكفين .
ـ أنداريت منو
ـ خرب ليال ليش تباعين شبيج أنتِ متعمده
ـ وين أنت .
ـ كبالج طبعاً ما تشوفيني .
ـ وينك
ـ گبــالج
ـ ماكو مو جاي أباوع
ـ كبالج يالاسلام باعي زين بس لاتباوعين وراج أني كدامج بس ركزي يا محمد باعي كدامج . .
ـ باوعت وركزت وشفته ومشيت وصلته مو كتلك هسه اجي ما صبرت الا دخلت .
ـ أي أريد أشوف شكو بالعرس وبعدين شعدهم هلگد عازمين زلم! شُــنو حفل زواج جماعي
ـ أستغفر الله ليث شبيك غير اقاربهم ومعزومين ومنو بحالي ويباوعلي قحط بنات بس أني .
ـ أحسن ديله امشي أنتِ وبناتج شگو جابيتهن وياج
ـ باسل دزهن وياي حمايه .
ـ منو شُنو حمايه ليكون مني أنتِ هم خبيثه مثل أخوج رحمتك ربي الاخ والاخت نسخ ولصق ، ددمشي أنتِ وفستانج لا اشگه عليج .
ـ مو عبالك طوختها وياي بالأخص اليوم طلعت العرس من عيني .
ـ امشي هسه .
ـ والله ما اسويها مشكله واخابر باسل هو يجي يأخذني
ـ أمشي مو وگت خبالاتج خليهن غير وگت لايطبگن ويه خبالاتي لا نحرك الاوادم محد جايز من روحه .
ـ تتقشمر
ـ لا والله حشاج بس خل نمشي منا .
ـ مشينا وطلعنا بالسياره ويسوق والبنات نامن وباوعلهن ورجع باوعلي صديت وجهي عنه
ـ ليش زعلتي أني شحجيت وياج
ـ ليث جاي اتعبني أني من حقي اطلع والبس وأعيش حياتي بدون تحكم زايد اكثر من الازم يعني أيناس هم هيج جنت وياها لا والله بس وياي تشلع گلبي .
ـ وضايجه من هالشيء
ـ ما ضايجه بس غار بحدود مو بگلشي ياعيني .
ـ ماشي مره الثانيه أحاول الزم نفسي
ـ نشوف وسگتنا وكعدت غنى وعبرت خليتها بحضني وهو يباوعلها بحقد أسم الله أحسه حتى منها يغار .
ـ والله لما هنا ويانا الا أخذج وأنهزم بيج
ـ لا شتنهزم ليش بعدنا مخطوبين لاتتهور
ـ هو شگلي راح اتهور بس البنات وين اوديهن جاي افكر بحل أتخلص منهم وأستفرد بيج .
ـ خرب شهل التفكير البلويسي بديت أخاف منك ها
ـ خافي خافي لعد الله الاسلام يراضاها صار اشهر من عقدت عليج وأختج وراج واليوم تزوجت وأني وجه اليتيم
مكابل أخوج حارمني من شوفتج كلما اجي الكاه بالبيت
ـ يحجي ويريد يبجي وأخويه شعليه غير من ورى دوامك ما عندك مجال عادي نتزوج وثاني يوم روح الدوام! باوع لي بنص عين
ـ ما تسكتيين ولـو أنتِ شهامج عادي عندج المحروك والمشتعل گلبه بس ليث .
ـ سگتت ، وغنى تلعب وفتحت الجگمجه ووكع قلم الحمره! هو گبل رجعها وسدها سريع ولزمت ايده اوكف لحظه لحظه .
ـ عوفيها متشوفينها طشرت الأغراض وأكو أوراق مهمه لاتضيعهن .
ـ كمل سياقتك لاتكلبنا وما عليك وخرت ايده وفتحتها وشفت القلم الحمره اللي أختفى فجأه! وتذكرته هذا أنت بايگه! باوعلي بنص عين ورجع يسوق جان يمك
ما رد عليه وسحبه مني جيبه
ـ شتسوين بي .
ـ ليش أخذته
ـ بكيفي .
ـ اخذه ما اعرف وين ضمه وصفنت عليه وضحكت غريب هالرجال غريب يعني صار سنين محتفظ بي واليوم صار كدامي وكشفته لعد شگد يحبني لزمت ايده وسحبها
شنو زعلان مني .
ـ لا جاي أسوق .
ـ مــا أدري ليش حسيته زعل من كشفت القلم عنده يمكن ذكرى وحاب يحتفظ بيها أو ما يريدني اعرف عمق حبه وغيرته عليه بس خلص كشفته هو بايك القلم حمره وبايك قلبي ، دخلت على اسمه بالموبايل وكتب عليه حرامي قلبي وحمرتي وضحكت على التسميه بس تلوك اله يستاهل .
وصلنا ونزلن يركضن ما تتفضل .
ليث ـ واخوج يضل يخزر بيه عبالك ناهب مالية أبوه
ليال ـ هسه أنت ليش ضايج تقرب ونزل رأسه قريب لوجهي وحجه بلهفه
ـ أريــدج يمي .
ـ رجف گلبي وتوترت منه يله أني ادخل
ـ أدخلي أحسن ما تبقين گبالي وأشبع قهر .
ـ مشيت وعفته وحسيت وضعه مو طبيعي أستغفرالله خجلت منه ومن نفسي المفروض متصله على باسل هو مأخذنا لان مهما يكون مخطوبين مـــا أريده يعبر حدوده وياي .
وأني لحد الان ما مخليته فقط بوسة الخد وبالتواسيل ولزمة الايد وهيج احسن من أكون يمه يدلل عليه اما هسه ممنوع وكلشي اله وكته وزمانه بيت اهلي شيء وبيته شيء ثاني ونفس الوقت هو محترمني وما متجاوز حدوده وياي وشحده واصلاً يخاف ما يكدر يعرفني اذا سواها وعبر حدوده ازعل وزعلي ثكيل .
لكيت أبويه وباسل كاعدين وعصماء تسوي العشه هلاو
عصماء ـ هلا حبيبتي غيري ملابسج وتعالي تعشي ويانا .
ليال ـ ماشي عيني دخلت الغرفتي وفارغه من دون لقاء وأختنگت اليوم مو يمي اليوم لوحدي ويجي يوم واني هم اغادرها وبس بالزيارات نجتمع بيها .
سبحت واجيت ولكيته دازلي صور فتحتهن سيت حُمر متكون من ست قطع الوان تخبل رجع دزلي مخطط على أيده كل قلم وللون مالته .
ليث ـ لاتزعلين جبتلج سيت بمكان القلم الكسرته
ـ ليش كسرته ورجعت جبتلي سيت مو ما تقبل
ـ لا اقبل بس الي داخل الغرفه تخلين منها بس بالخارج ما أقبل أبداً .
ـ لعد رجعه
ـ ليش زعلتي
ـ ما زعلت بس أنتَ ما تخليني أخلي حمره وشديت ويه هالقلم وهذا احلى لون وماركه احبها وتلوك اليه شسوي بي اذا من اطلع ما اخلي .
ـ هي لان تلوك الج وما أقبل أفهميني ليالي .
ـ تمام تعشيت
ـ لا والله بعدني محترك عليج
ـ غيرت الحديث اروح اتعشى بعدين نحجي
ـ ماشي .
ـ عفته ورحت تعشيت واني غسلت المواعين ورجعت نمت ولكيته متصل حبيبي نعسانه .
ـ أي نامي
ـ وأنت
ـ شتردين مني باقي كاعد ما يجيني النوم
ـ ليش مو عندك دوام الصبح نام وأرتاح
ـ ما نعسان نامي ما عليج بيه
ـ تمام ، عفته ونمت لان تعبانه من هوسه العرس والصبح كعدت على صوت عمتي سلوى يم رأسي فتحت نص عين عمه شجابج من الصبح .
سلوى ـ والله يا عمه رجلج جابني غير من الفجر نزل عليه أمشي اخذيها وكملي جهازها وخبصنا أني وعمج من الصباحيات وعرس علينا والا الخميس العرس وأحنه متفقين وياه لما يكمل شغله ويحصل نقل من البصره لبغداد يكول لا أريد العرس يوم الخميس!
ليال ـ شــنو العرس الخميس واليوم سبت يعني بعد أسبوع عمه هذا شبي مو كال مو هسه ليش هسه غير رأيه
ـ والله يا عمه شمدريني طبگن عنده
ـ شلون واني ما مجهزه وين الحك وغرفه ما مشترين وبعدنا تعبانين من عرس لقاء لا عفيه عمه أحجي وياه خل يأجله على اقل لنهاية الشهر بس اخذ نفس وأجهز براحتي .
ـ والله حجيت وأبوه حجه وياه وعاند وكال اذا تلحون عليه أخلي العرس يوم الاثنين يعني عكب باجر فه خلينا على الخميس احسن لان اذا يقفل يقفل .
ـ وهسه شنسوي لا خلي اخابره واحجي وياه شسالفه ركض ركض .
ـ شوفي ورديلي خبر اني كاعده يم عصماء تريد ادور مره لـ ابوج هاي لقاء مخليه برأس اخوج تعالوا زوجوا ابويه وينه وين الزواج شخبله لقاء .
ـ أي كالت ماشي عمه طلعت وأتصلت عليه رفضني وين أنت جاوبني أريد أحجي وياك .
ـ يم أخوج كاعد بعدين أخابرج ليش شعندج .
ـ شعندي مو! شهل القرار السريع هذا ، شبيك نمت وكعدت الخميس العرس ودوامك وأني بعدني كلشي ما مسويه .
ـ ليش شعندج هو جهازج يكمل بيوم واحد وذهبج اليوم اجيبه وياي .
ـ منو جايب طاري الذهب بس ما الحك ليث خرب
ـ منو خرب
ـ حظي
ـ شبي
ـ ليث لاتخبلني
ـ ها روح ليث شبيج حبيبتي
ـ عوف العرس هسه خلينا على راحتنا والبارحه عفتك كلشي ما بيك نمت وكعدت تغيرت ليش .
ـ مو كتلج اريدج يمي هذا هو گلت العندي وحددت الموعد وكلت الخميس يعني الخميس أنتهى الكلام
ـ تعال خل نتفاهم
ـ لاتلحين زايد ولما المطرب خابرته يحضر عرسنا جان قدمت العرس بس يله عالخميس .
ـ منو هذا
ـ بالعرس تسمعين الأغاني مالته وتعرفينه .
ـ عوفه المطرب ما أريده لو تجييلي اليسا هم ما اريد بس وتعال خل نتفاهم
ـ منوو جايبلج اليسا والله خوش فكره شتكولين اجيبها
بعرسج وأسويلج عرس ما صار لان حالف اخلي كلهن يحجن بعرسج .
ـ ليث لاتخبلني عوفلي الطرب واطلع من يم باسل أريد احجي وياك
ـ مشغول بعدين
ـ ليث تعال عوفلي الشغل هسه ما شاف رسالتي خرب هذا شبي وين الحك يربي رحت على عمتي وحجيت الها
سلوى ـ مو كتلج معاند ، يله العصر نروح نجهزلج قسم والباجر هم ونلحك ان شاء الله بس گولي الهوسه على رأسي شلون تفض .
عصماء ـ عمه عادي أني اجهزها وأعوف بناتي يم امي ونلحك منا الخميس وأنتِ كملي شغلج اكيد عندج تعزيلات والبيت يريد منج .
سلوى ـ لا يمه شعندي وتعزيلات من ارجع اعزل بس ليالي ما اعوفها يمه صارلي شگد اتمنى واحلم اجهزها بأيدي فدوه لوجهج .
ليال ـ عمتي تحجي وياي واني دايخه دوخني خرب بيومه ثولني وگلبي يدك سريع خرب قرب الموعد يمه من وصلت الصدك گمت اموت لو بإيدي ما اتزوج وهو هم صاير يخوف ، بلعت ريگي وكمت من يمهن لازمه گلبي شيفضها على رأسج ليال .
للعصر هو ماكو راسلته ما فاتح انترنت الخبيث سواها صُدك والخميس العرس لان باسل بلغ أبويه بالموعد
أني اعلمك شتعلمين منه أجاج الخميس شيخلصج
وخابرتني عمتي كالت راح نجي نأخذج وكمت تجهزت ونزلت عصماء مبدله وباسل اخذ البنات يوديهن لجديتهن .
عصماء ـ باسل كول لامي خل تقفل الباب بالمفتاح لان يفتحن السيم اخاف يطلعن اكد عليها
باسل ـ ماشي حبي يله بابا صعدن السياره ليورى بابا غنى جنى ليورى بس هيفاء ليكدام لاتزعلن بابا لان هي الصغيره يله عمي صعدن كلجن أنتن مثل عمتجن لقاء اذا ما صعدت الصدر تعارك طالعات عليها .
ليال ـ اخذهن وراح وضليت أنتظره وعصماء تعدل بشالها وأبويه كاعد يشتغل بالاوراق وحسابات ودك هورن يله عصماء وطلعنا وياقوت هم جايه سلمت وصعدت وأباوعله يتهرب مني أبو المصايب أني
أعلمك تتهرب مني .
وصلنا ونزلنا وگال .
ليث ـ من تكملن خابريني مو تجن بتكسي
ليال ـ الا نجي بتكسي
ـ تعالي وشوفي شسوي
ـ نزلت مزعوجه منه ودخلنا المحلات وعصماء وعمتي وياقوت يختارن ويشوفن الموديلات وصلتني رساله فتحتها
ـ أحبج وأريدج يمي ليش مزعوجه يا عيني .
ـ مزعوجه منك ما أتفقنا هيج والله بعدني تعبانه من عرس لقاء وين الحك
ـ تلحگين حبيبي تلحگين وتجين يمي أنسيج التعب .
ـ روح هسه مو وگت سوالفك
ـ ما شايفه شيء من سوالفي غير لخاطرج مجبور ومحترم نفسي وما احجي بس تعالي يمي ويصير خير
ـ ما جاوبته وگفت أباوع وياهن وأختارينا كم موديل وافترينا هواي وأخذت تقريباً كل الملابس وشغلاتي وثاني يوم الصبح والعصر لليل يله رجعنا وخلال يومين
كملت تجهيزات وضل شيء بسيط نواعم عمصاء جابتهن واجتي جنات وهي وعصماء وحضرن ملابسي بالجنط .
ليث ـ لبسي راح اجيج نروح نختار الغرفه .
ليال ـ شعجب مو تغار عليه
ـ مو اغير رأيي
ـ لا لا خلص هسه ، ولبست وطلعت وياه يعني عكب باجر الحنه والله ما صايره صرت جنازه من التعب .
ـ ليش حبيبي مو كملتي جهازج بعد شگو شعندج
ـ ما عندي شيء .
ـ وصالون حجزتلج شوفي يا يوم مناسب تروحين
ـ الثلاثاء قبل الحنه اروح وصدك حبيبي
ـ ها عمر حبيبج
ـ بالعرس ترى حجاب ، باوعلي وأبتسم ها
ـ هو هيج وأحبج من تفهميني .
ـ ترى مو لان تغار عليه
ـ ادري والله ادري ، شكراً .
ـ العفو وضحك خرب شكد يفرح من امشي على مرامه لو بإيده يخليني بقفص ويقفل عليه .
وصلنا المعرض ودخلنا وتقرب لزم أيدي وشفنا هواي موديلات وعجبني ديكور خشبي بس تصميمه تركي ما احب البيضات حبيبي خلي ناخذ هاي عجبتني كلش
ليث ـ ذوقج يفوز أصلاً هاي احلى وحده بيهن هاي هي نثبت عليها يله امشي .
ليال ـ وثبتنا عليها ورجعنا وافترينا وأخذ ملابس اله واني أختاريت اله ونسقت اله وهو شختار يسحبه منه حبيبي بس جاي اكولك هذا اللون حلو عليك
ليث ـ ميخالف دام عجبج عجبني جيبي .
ليال ـ وكملنا وطلعنا قسم الأحذيه واخذ قاط العرس بس جان متردد ورجع خابر على باسل
ليث ـ اكولك القاط تعال أنت اختارلي شو دخت
باسل ـ وأني شعليه شو ما تستحي
ـ ما تعوفلي المستحى ترة اني ابن عمك والله ثم والله اذا ما وگفت وياي وحضرت عرسي لا اني ابن عمك ولا أعرفك .
ـ ليث خل نتفاهم ولك المأخذها أختي شبيك يابا
ـ واذا أختك ترة اني ابن عمك خاف ما تدري
ـ يله لاتزعل ابن عمي خلي القاط عود بالليل نروح اني وياك وسجاد ونختار الك احلى قاط .
ـ أي عبالي يله .
ليال ـ وطلعنا للبيت وصلني وراح السوك وشوفتهن صور الغرفه كلش عجبتهن حسيتها مميزه وصح جنت منزعجه لان الموعد قريب بس بلشت اعيش اجواء العرس والفرحه وتلاشى التعب وأخواتي لقاء عروستنا اجتي وجنات تسحل بكرشها وعصماء ما قصرت فدوه لعينها وفرحانات اليه .
ورحت الصالون وطبعاً هو أخذنا ما يقبل أحد يوصلنا غيره ومن الرجعنا دنيا مغرب وبابنا مفتوح وعصماء مخبوصه خطيه تسوي عشه لان البنات يمنا ولقاء تخابر بإمجد وعصبيه شگو شبيج .
لقاء ـ يريد يجي يأخذني كتله بس اتعشى وتعال .
جنات ـ على كيفج وياه حيدر هم خابرني بس بالهدوء تعاي وياه وبعده عريس خطيه .
لقاء ـ لا هو مو أهنا مشكلته شلون تروحين وسجاد يفتر وسجاد شعنده جاي بيتنا ترى العرس بيت عمي أحنه شگو .
ليال ـ خوما نطرده هو اجه ويه باسل واكيد باسل عزمه عالعشه حاله من حال ليث مو دورج هو يجي شمعنى هسه تردينه ما يجي وأنتِ تزوجتي شله داعي هالحجي
لقاء ـ أنتِ ما تردين بإمجد وتفكيره وحتى للعرس ما يريدني احضر .
ليال ـ حلي مشكلتج وياه وطلعي سجاد لان الولد ما جاي على حسابج وهو علاقته ويه ليث وباسل مثل التؤام الثلاثي من يوم يومهم متشاركين أفراحهم وكل كعداتهم سوى فهمي أمجد هالشيء .
لقاء ـ فهمته رايحه اخابره ساعدن عصماء خطيه هلگت لوحدها .
ليال ـ راحت وغيرت ملابسي وأجييت ساعدنها وصبينا العشه واجه باسل وسجاد اخذوا الاكل وطلعت لقاء من الغرفه وسجاد صار مقابيلها كبل طفرت الغرفه لان ما لابسه شال خرب شلون موقف محرج .
لقاء ـ أني راح أروح لان كتله ما موجود اذا اجه وشافه يگلب الدنيا على رأسي
ليال ـ وليش جذبتي عليه
لقاء ـ ما يتفاهم عصبي كب بيه .
عصماء ـ تعشي وروحي بعد صبينا يله كعدن .
ليال ـ كعدنا تعشينا وسمعنا صوت جديتي وليث استقبلها هاي جديتي اجتي كومن كمنا ودخلت علينا للمطبخ سلمنه عليها وباستني من خدي
الحجيه حليمه ـ ما طلعتي للغربه عفيه عليك ليث
ومبارك يمه مبارك الله يسعدكم ويهينكم .
ليال ـ الله يبارك بعمرج جده وطلع سجاد شايل الصينه جنات اخذتها منها وسلم عليها
سجاد ـ هلا جده شلونج .
الحجيه ـ سجاد فدوه لطولك جده أنت هنا على ريحة الحبايب جاي اخ يا قهرتك يا جده ما ردتها تطلع للغريب بس شسوي لسعيد وباسل ما سمعوا من أحد وفضلوا عليك الغريب .
سجاد ـ لا جده الله يسعدها الحياة قسمه ونصيب وكلمن ياخذ من نصيبه وهي مو من نصيبي .
ليال ـ حجه ودخل الاستقبال وليث رفعلي حواجبه ولحك سجاد وسجاد بعد ما طلع وكعدت جديتي واجتي عمتي سلوى بس حسيت عدها حجايه لان ملهوفه شبيج عمه
سلوى ـ بعدين جديتج كاعده خل تگوم ونحجي .
ليال ـ تمام وجديتي تلمست بطنها وتقيس بيها وركزت زين وعصماء خايفه شبيج
الحجيه حليمه ـ بعون الله بيج ولد وسمعت باسل يريد يسمي نائل صُدك هالحجي .
ليال ـ أي جده
الحجيه حليمه ـ بيها الخير وينه نائل غرب وعاف بس اسمه أويلي على گلب أمه شلون متلوعه عليه .
ليال ـ ضلت تشكي بحالها وكعدنا وگامت وليث أخذها ولقاء رادت تكوم عمتي سلوى منعتها
سلوى ـ وين رايحه بعد وگت
لقاء ـ لا عمه امجد راح يجي يأخذني
سلوى ـ دكعدي مو جايه وجايبتلجن شلون خبر
لقاء ـ شنو عمه لكيتي مره لابويه
سلوى ـ فلك فلكج شلون عرفتي اي لگيت وشلون مره فقيره وحبابه واهلها خوش ناس بس يردون الستر توالم أبوج واني العليه سويته والباقي عليكم بس لاتجيبن طاري اني لاكيتها لا انوب جديتج تشنقني بس شسوي لكريم مثل باسل يريد يزوج أخوه .
لقاء ـ هذا هو الباقي علينا يله اني اروح عود نتخابر وبلغوني بالتطورات مو ترحون تمشون وما تكولون اليه
سلوى ـ لا مو هسه كلت لعمج كريم كال خل نخلص من عرس ليث وعكبها نزوج سعيد ، انطونا مجال واحد ورا الثاني البنات وابوهن عرسهم فد شهر
لقاء ـ هو هيج احسن يله باي موو تنسسوني .
ليال ـ طلعت وياها وصلتها وليش ما سجاد هم يطلع وعبر من يمنا وأمجد واكف بسيارته ينتظرها وشافه وعبرنا وراح البيتهم خرب هسه وكتك تطلع وباوستها وراحت .
لقاء ـ راح انعلس مو كتلج راح يشوفه خرب بالحظ .
ليال ـ راحت وبالي يمها ودخلت البيت وضلينا كاعدين وتحولنا بالاستقبال يم ابويه وباسل وليث واجه عمي كريم وفارس وعمي بارك لأبويه ويبوس بي وابويه متفاجى ما يدري شكو وعلى شنو المباركه
كريم ـ بالخير عليك خويه تستاهل كل الخير شايف خيرها والله يبعد عنك شرها وسحرها .
سعيد ـ كريم شبيك شارب أنت
ليث ـ لا عمي بس أبويه يريد يزوجك ولاكي الك مره
سعيد ـ منو كال الكم اريد اتزوج سكتوا عمي سگتوا ويني وين الزواج كريم صاير بكيفك تتصرف .
ليال ـ باسل وليث وفارس وعمي كريم نصبوا عليه وكعدوا يقنعونه وهو يحجي عليهم وبعد محاولات ما حجه بس ضحك شكله وافق الحجي سعيد عالزواج .
وتأخر الوقت وخلصت التعلوله وكلهم راحوا بس ليث واكف بالحوش هو وباسل ويباوعلي من الشباك المطبخ ودزلي رساله
ليث ـ لزك خرب بيومه لزك ما ينشلع وكلما اباوع من الشباك يمدلي ظهره دكول حايط هيج خبيث ما شفت مزردملي سوه الخطوبه سم عليه وأني ابن عمه .
ليال ـ ضحكت وباوعتله وباسل يطبطب على اكتافه وطلع وليث عيونه عليه خرب قهرني وطلع وما شافني ولا حجه وياي .
ليث ـ أخوج السافل طلعني وما شفتج عبالي احجي وياج شسوي شلون اطفرج الج من الحايط
ـ لا دير بالك روح البيت گلبي واني هم تعبت اروح انام باجر وراي حنه وتعب .
ـ أنت هم دروحي يله
ـ زعلت شافها وما رد عليه واني تعبانه مالي خلكه وعفته ورحت على عصماء وكعدنا سوينا تنظيف وتقشير وجنات هم ويانا بايته خطيه كوه تمشي حملها متعبها .
ومن الصبح كعدت على صوت الاغاني شايل الفرع بيت عمي كريم محتفلين وبلشت الاحتفالات من اليوم ورحنا الصالون ولقاء هم اجتي وخلصنا سويت تسريحه بس بالحنه ولبست بركع ستىرني وسمعت اصواتهم وصل ودخل الصالون بوسط الاغاني عيونه عليه وصلني باسني من كصتي ولزم ايدي وطلعنا البيت حنتي بالبيت ورتبوا كوشه وهالسوالف وبالسياره وكلشي
ما يبين مني اريد أرفعه ما يخليني ليث أريد اشوف .
ليث ـ شتشوفين حبيبي هسه نوصل .
ليال ـ وصلنا البيت ونزل قبلي وهو نزلني ولفني أختنكت ليث .
ـ وصلنا البيت .
ـ دخلني البيت وبلشت الهلاهل والأغاني وكعدت عالكوشه وهو بصفي وأبتسمت وأني اباوعله وتحقق حلم حياتي أنجمع اني وياه وباوعلي كأنما عرف بشنو أفكر ولزمني من ايدي وباسها وبعدها فقرات الصور ولبسني الذهب بس شنو انخبص وتوتر أكثر مني كل شوي واكعه الكلاده منه وكمل ودزوا عليه راح بعد ما شفته وبلشت حفله الحنه ورقص بناتنا وعشنا فرحتنا
أجه الليل واني تعبانه وهما سوه حنة ليث بيت عمي وياسل هم راحلهم ليث يفضحه اذا ما حضر واخواتي راحن بس اني ما رحت تعبانه وليث يتصل ها حبيبي
ليث ـ وينج اتصل وأنتِ ماكو وليش ما اجيتي
ليال ـ ما بيه تعبانه ليث وعمتي كالت لاتجين نامي
ـ ماشي نامي وهذا التعب خوما يضل لباجر اقصد بيج شيء
ـ لا بس تعبانه شويه تعرف حفله وهوسه تعبت
ـ تعبانه من شُنو يعني!
ـ ليث شبيك تعب وبس
ـ هــا ،لا ما بيه شيء بس سألت ضل بالي عليج
ـ لا ما بيه شيء حبيبي
ـ ماشي حبيبي نامي لعد .
ـ نمت وكعدت نص الليل أخواتي راجعات ولكيت الشهريه نازله خرب شلون هيج مو موعدها .
لقاء ـ شگو شبيج .
ليال ـ حجيتلها وأني مقهوره خرب حظي ليث الا يتخبل وهو شك لان ضل يسألني شبيج تعبانه .
ـ مو گلتي موعدها بعد شلون نزلت غير تضبطين امورج قبل العرس .
ـ ولج متأكده مو هسه هواي بعدلها بس ما اعرف ليش هيج صار بيه شلون حظ .
ـ يله شتسوين بعد ، لاتكولين اله هسه لايطنكر عليج
ـ لا خطيه أنوب ينصدم ، ماكو حبوب شيء صخام يقطعها يربي رحت غسلت ورجعت نمت والوجع موتني وبعد ما نمت الصبح نفس الشي وسبحت وكلت لعصماء .
عصماء ـ يبوه خطيه شلون حظ هاي من التوتر والخوف والتعب نزلت قبل موعدها عادي تصيير يومين وتروح
يله امشي أرتاحي لاتفكرين عادي .
تمام وضليت نايمه وبعدها أجه اخذنا الصالون وبس يباوعلي طبعاً حسيته شك بيه رغم اني ما حجيت اله وصلنا وراح ولبست حجاب ما طولنا ورجعنا البيت واحه اخذني من بيت اهلي واغاني وركص هو ولد عمامي كلهم يم الباب ذبوا لحم وهو فرحان عبالك أول مره يتزوج .
وطلعنا القاعه وأني وياه يسياره وحاضن ايدي ويضحك وفرحته ما تنوصف والزفه حيل فخمه وتصوير للزفه والاجواء تخبل وصلنا القاعه والحمدلله ما متقيده لان حجاب ولازم ايدي كل قوته عبالك راح اطير منه وكعدت عالكوشه وهو راح واباوع الكل فرحان بعرسنا وباسل وعصماء واحد بصف الثاني يحجون ويضحكون
واجتي عمتي سلوى وتريد تبجي شبيج عمه .
سلوى ـ ليش ما كلتيلي ولج متأكده
ـ من شنو عمه
ـ سليمه نزلت عليج
ـ اي عمه
ـ شلون سالفه سوده عليه وفرحته يا يمه يا ليث يله يستاهل هو خبصنا وعجل العرس وهذا عقاب اله لان فرط بيج من الاول يستاهل لاتنقهرين عادي يله حبيبتي .
ـ باستني واجه هو وكعد بصفي وأبتسمت اله تعبان حبيبي .
ـ تستاهلين التعب انتظر حسام الرسام يجي
ـ صدك والله يحضر
ـ أي ليش ما يحضر هذا عرس ليالي .
ـ يباوعلي متلهف واني صافنه عليه وفزينا على صوت سجاد وكمز وراحلهم وأجه حسام الرسام وليث وباسل تقدموا سلموا عليه واخواتي ياشرولي ويضحكون .
" وبلش حسام الرسام بمقطع من أغنيته
الف الصلاة والسلام عليك يا رسول الله محمد
هم عريس هم نمشي هم ربعه يزفونه هي وياه وتتمناه هو وحبها خيعونه .
حسام يغني وليث يردد وراه هو وسجاد ولد عمامي
حسام ـ صار سنين تبجي العين يكسر كلب اليشوفه وهسه ارتاح والهم راح قصة حبه معروفه .
ليث ـ اي والله حسام اكسر الخاطر والله أنت الوحيد التحس بيه .
ليال َـ يباوعلي وفرحته ما ينطيها لأحد دمعت عيوني ويجيت على فرحته لان صرت اله وانهاريت وعمتي سلوى وعصماء اجو عليه وأني ما اعرف شبيه وهو اجاني كله من وراك انت عفتني مو اني
ليث ـ وهسه شذكرج يا حبيبي صدك جذب وگت بجي هسه لو كلمات الاغنيه اثرت بيج والله الاغنيه كلها تشبهني شسوي .
سلوى ـ خل يغني غير اغنيه اشسويت بيها تذكرت دكاتك الناقصه بيها .
ليث ـ ماشي .
ليال ـ راح وحسام رجع يغني اغاني ثانيه وبلشت الحفله على اصولها وسجاد يركص ركص بدع هو زياد وفارس وفواز وليث واكف بصف باسل ويباعون احس جاي يسون احماء .
وبلشت اغاني الجوبي ودخل ابو غنى وشايل سحبته طبعاً هو احلاهم هذا أخوي بعد روحي فدوه لطولك
وبدع بالجوبي هو قائدهم وليث بصفه ويكول ما يركص أول مره اشوفه يركص خرب انغرمت شهل الجوبي التأخذ العقل .
باسل وليث وفارس وسجاد وزياد وفواز ومن ولد اقاربنا عمام ابويه هم موجودين وعافهم باسل توسطهم هو وليث وحركات هو وياه والمصور يفتر عليهم وسجاد يفر الجوبيه وحسيته يتعمد بحركاته ودگ رجله بالكاع قوي وذب حركته بالركص وكلما يفترون يمل عيونه على لقاء وهي عيونها بالموبايل تراسل أمجد وأنتهبت عافت الموبايل وباوعتلهم وهو عيونه عليها وكامت من مكانها ليش سجاد جنت شحلاتك تعذب بروحك عليمن وهي تزوجت مالها داعي هالنظرات بس تجيب الشك .
واستمروا واجه عمي سليم وتفاجئنا بي وبس شفته تذكرت نائل ياريته كان موجود بينهم بس ما حضر عزموه وباركلي وباركلهم بس تعذر من عدنا ما يكدر يحضر .
وسلم عالكل واجوا عمامي كريم ورشيد وسليم ولزموا الجوبيه رغم كبار مو شباب بس اشهد بالله جوبيهم يخبل بالاخص عمي كريم تحسه قائد عسكري وهو
فعلاً عسكري متقاعد من زمن صدام حسين .
وباسل وليث بالوسط وليث وحركاته اخذت گلبي وغصه بصدري عليه على فرحته بحياتي ما شايفته فرحان هيج حتى عمتي سلوى تبجي عليه .
ومر الوقت وتأخرنا بالقاعه أخذنا الفرح ونسينا نفسنا
وأخذنا صور جماعيه الكل وبحضور جديتي جمعتنا كلنا بس جواهر ما گامت ضلت كاعده لوحدها وكملنا فقرة الصور وصار الوقت نمشي وساعدني وصعدت السياره وهو يحجي وياهم واجه وشغلها وطلعنا .
ليث ـ وأخيراً الف الحمدلله والشكر ربي ما خيبت ظني وجمعتني بيها محمود مشكور ربي على هالعطايا الحلوه .
ليال ـ باسني من أيدي وصلنا الفندق وعمتي وياي
هي وعصماء دخلت الغرفه وجابن الجنط عصماء
عصماء ـ لاتخافين وهو هم تعبان عادي والله .
ليال ـ طلعن ودخل هو وتقرب عليه وانفاسي عاليه وخايفه حيل ومتوتره رفع حنجي وصفن بوجهي .
ليث ـ يالله شگد جنت متمني هذا اليوم أمنية حياتي
ليال ـ حضني ويبوس بيه وحضنته وخايفه احجيله ورجعني وتقرب على شفايفي .
ـ هسه عرس وعرسنا هم ممنوع عليه اتقربلهن
ـ هزيت رأسي وتقرب ولامس شفايفي وشعور غريب وهو حس بخوفي ورجفتي وأبتعد
ـ لاتخافين حبيبتي گلشي برضاج مو لازم والله .
ـ لا بس
ـ بس شُــنو گولي
ـ كعدت وأفرك بإيديه وهو خاف اكثر مني عباله بيه شيء وكعد يم رجليه .
ـ ليالي شبيج لاتخوفيني عليج .
ـ أني
ـ أنتِ شبيج
ـ حجيتله وضرب گصته وكام
ـ خرب والله عبالي بيج شيء هو صحيح انصدمت وضجت هم بس ميخالف المهم ما بيج شيء لان خوفتيني أني واني ، شسالفه حبيبي قابل بإيدج والصوج مني أستعجلت بزواجنا يله ما صار شيء
المهم صرتي الي وملكي واخليج بحضني .
ـ اجه اخذني من أيدي وساعدني بالبدله ويبوس بيه ونومني بحضنه وأني مستحيه منه ميته من الخجل وهو بس يباوعلي ويمتعن بنظراته واغطي بنفسي باللحاف بخجل وين اضم نفسي خرب صارت صدك واني بحضنه وگبالي وكل شوي يبوسني يبوه عليج ليال .
ـ وخري اللحاف خل اشوفج شنو جاي تلعبين وياي فاره والبزون لو خيتلان .
ـ وخرته وغمضت عيوني وضحك وسحبني نومني عالصدره يبوه الخجل غرگني شوي شوي بحنيته وحبه اليه كدرت استجوب بس مو هلگد بعدني .
ـ هاللحظه صارلي عمر كامل انتظرها وأنتِ تخافين مني شسوي بروحي هسه .
ـ أنتحر
ـ أي أنتحر بيج والله .
ـ وفعلاً سواها وبعدها تعشينا وضلينا سهرانين مخليني بحضنه وهو يسولف ويلعب بخصلات شعري وأني صافنه ياربي شگد احبه وأحب سوالفه ومن يحجي ويضل يباوعلي ومركز بيه كأنما بنيته مو بس مرته .
وثاني يوم تنظفت ومثل ما كالت عصماء بسبب الخوف والتوتر والتعب تصير هالحالات ورابع يوم هو عرف بس صابر ومخليني على راحتي .
تعشينا ورجعنا وگبل دخلت سبحت وتعطرت ورتبت نفسي مثل ما وصتني عصماء وطلعت صليت وهو كاعد وكملت وأجه حضني ويبوس من رقبتي الى أن اخذني لحضنه وبعدها تمت هالليله عالخير الحمدلله
مر أسبوع وأحنه بعدنا بالفندق حاجزين ونايمين وأتصل موبايله حبيبي موبايلك .
ليث ـ منو ، هاي أمي
ليال ـ فتح الخط والسماعه وسلمت علينا.
سلوى ـ يمه ليث كافي شوكت تجون عيب العالم جاي تجي تباركلهم وأنتوا ما موجودين كافي ابني جيبها البيت واشبع منها ما تطير منك
ليث ـ وشگو جايين من هسه مستعجلين عالهدايا نجي وخل يجون يباركون النا
ـ يمه شسويلهم قابل اطردهم عيب أبني
ـ يمه فدوه لعينج عوفيلي خطارج خليني عايش حياتي مو تدرين شگد تعذبت عليها .
ـ ادري والله أدري بس هم خطيه أخواتها يشوفنها أهلها يردونها يا ابني خوما انطوها الك بعد هاي هي ما الها اهل .
ـ صارلها شگد يمهم ما شبعوا شوف الأ هسه استكثروا عليه هالأسبوع والله عاد ما اجي .
ـ ولك ابني جيبها وتعال
ـ الله كريم
ـ سلملي عليها .
ـ الله يسلمج .
ـ ها حبيبي نروح
ـ والله لو عليه أخذج وانهزم بيج بعيد لا أهلج ولا اهلي
ـ لا ما يصير خطيه
ـ وأني مو خطيه صارلي سنين اتعذب عليج موخطيه
ـ من أيدك شتسويلك العالم
ـ هم صدك خلف الله عليج
ـ شنو زعلت
ـ لا ما ازعل ولا أزعل على عنادج
ـ باسني ودخل الحمام وطلع واني وراه ولبسنا ورتبنا اغراضنا ورجعنا البيت واستقبلونه بالهلاهل وعمتي تبوس وتحضن بينا سوده عليه حيل فرحانه .
وتغدينا واجو اخواتي وعماتي والبيت انترس كلها اجتي تبارك وهو ولا شفته للعصر يله بيتنا خف واجه كبل أحذني لغرفتنا طبعاً غرفتنا جوه القديمه هي صارت غرفتنا .
ومرت فتره بين الناس تجينا تباركلنا وهو راح الدوامه
وعايشه حياتي الحمدلله مرتاحه وعمتي وعمي حاسبيني بنتهم مو بس جنتهم وفواز ما عايش ويانا حاليا كاعد بيته الي أشتراه لما يتزوج بس ياقوت وفيروز ويانا فيروز زينه بس ياقوت تسمعني كلام بس ساكته
كلما تشوفني اتقرب نغم تعيط وما تخليني ونغم تضل تباوعلي احسها تريديني اتقربلها وهي أساساً فقيره
ياقوت ـ لاتحلمين تصييرين أمها خليج برجلج وبس وبله لواكه عود حنينه عليها أنتِ وسوالفج التعبانه ترة تاريخج كله عندي .
ليال ـ أحترمي نفسج واحجي عدل ويا تاريخ تحجين عنه
ـ والله راجعي تاريخج وتعرفين نفسج شمسويه اني شعليه
ـ شتخربطين ما أسمحلج تجاوزتي حدودج هواي وأني ساكته الج لخاطر عمي وعمتي وليث فه عيب عليج
ـ ليش أنفعلتي اذا ما عندج شيء لاتنفعلين
ـ أنفعلت لان كلامج مسني وما اسمحلج كافي عاد
ـ والله وگت جنتي أستغفر الله وهسه زوجة ليث بس اخويه غبي عافج وهم رجعتي ضحكتي على عقله ورجعلج ونسى تاريخج يله خل يتحمل نتيجه أختياره
ـ عافتني ومشت وضليت مصدومه من كلامها هاي شتححي شتخربط ودخلت غرفتي عقلي يريد يوكف ردت اراسله تالي تراجعت وراسلت لقاء وبلغتها .
لقاء ـ هسه تطلع هي الخربت بينكم ونهت علاقتكم من الدوده والغيره ونقص الشخصيه العدها والله هاي مريضه واكص ايدي ما طلعت هي توصله كلام عنج وشوهت صورتج كدامه وخلته يتخبل وخله شروط مقابل استمرار علاقتكم .
ـ أني متأكده هي لان تحجي بحقد
ـ ختولي تجاهليها مهم بالاخير أنتِ صرتي زوجته رضت والما رضت طبها مرض هسه ما علينا باسل خابرني اليوم يرحون بخطبون لأبويه تروحين ويانا
ـ ما أعرف والله ما گايلته هو هسه جاي يشتغل بالنفط وينه وين اسأله حتى موبايله مغلق .
ـ شوفي شگو بيها روحي ويانا احسن ما تضلين مكابله وجه ياقوت وتسممج بالكلام .
ـ ما ادري خل يكمل شغله گال أني اتصل عليج أي منو ومنو يروح للخطبه
ـ عمي كريم وعمتي سلوى وفارس وسمعت عمي رشيد هم يحضر وها عمي سليم هم هو ومرته وباسل وابويه وعصماء واني وجنات وحيدر وبعد زلم من اقاربنا
ـ وأمجد
ـ عنده دروس بالمعهد ما يكدر
ـ ها تمام وجواهر تدري مو أذا عمي سليم يحضر اكيد تدري
ـ أي تدري وگايله خل يتزوج أني جنت عايشه علمود نائل ونائل وراح طفت عيني من الدنيا عسى ما يتزوج اربعه ما ادري صدك جذب هالحجي بس حسب كلام عمتي أنسام تگول صدك ومن كل گلبها نائل ماخذ روحها بالاخص بعد ما شافت الكل أستقر وعاش حياته ونائل وين وهي وين وشضل الها غير عينها على الباب تتنظر رجوعه بس وين ما اعتقد راسلته مصمم على قراره ما يرجع نهائي وأذا يرجع فه علمود بيداء يشوف قبرها
ـ خطيه والله ما يستاهل
ـ خطيته برگبة أمه ، يله هسه تحضرين
ـ ما ادري خلي اشوفه واردلج خبر راحت وراسلته وين ساعتين يله أتصل هلا حبيبي
ـ هلا گليبي رويحتي أشتاقيت لصوتج لهفتج عليه
ـ ميته عليك ميته ليش هيج أختفيت
ـ عندي شغل والله لو تشوفين شغلي ليل نهار تصلين وتدعين اليه .
ـ لا أسم الله لاتوحع گلبي
ـ أسم على كلبج من الوجع والوجع بگلب رجلج
ـ احبك وأشتاقيت الك هواي هواي
ـ مو بگدي كون هسه احضنج أويلي يابه عالم ثاني
ـ حبيبي
ـ يا روح حبيبج ها ليالي عمري گولي شنو طلبج .
ـ شمعرفك هو طلب
ـ عرفت شلون ما اعرف واني حافظج عالغيب
ـ حجيتله تخليني اروح اذا ما موافق عادي مو لازم
ـ لا حبيبي روحي ما عندي مانع
ـ صدك والله شكراً حبيبي
ـ تدللين بس ما اوصيج
ـ ما يحتاج توصيه أعرفك شتريد وطلابتك أوامر
ـ معدله مريتي .
ـ حيل فرحت وتجهزت وعمتي هم لكيتها تتحضر عدلت شالها وطلعت وياهم وانجمعنا كلنا وصلنا بيت العروس
واستقبلونا أحلى استقبال ورحبوا بينا وكعدنا وعصماء شايفتها أنتِ ياهي منهن .
عصماء ـ ولا وحده
لقاء ـ شنو أسمها
عصماء ـ عفاف وعلى أسمها دين وأخلاق وحشمه والتزام عن نفسي حبيتها هسه تجي وشوفنها
لقاء ـ حلو اسمها حبيته أن شاء الله خير ولو الاسماء ماله دخل هسه أسم جواهر مو على خباثتها وحقارتها
ليال ـ وسگتنا واجتي تبين عمرها بالاربعينات بس زينه تبين حبابه وأجتماعيه وضلت تسولف ويانا اخذتنا السوالف وياها بس كلامها موزون كاعده على عقلها تبين خوش بنيه الله .
وبعدها دزوا عليها الظاهر اتفقوا وعقدوا الهم ورجعنا فرحانين وباركنا اله وخجلان من عدنا ولقاء لطفت الجو
لقاء ـ ليش مستحي من عدنا من حقك تتزوج وتعيش حياتك شگو بيها وما عليك بينا كلنا موافقين وأولهم اني الا اركص بعرسك ركص ما صاير .
ليال ـ ضحكنا وأجتمعنا بيت ابويه وعصماء جابت الضيافه وضلينا نسولف وانعزلنا اني وأخواتي واخذتنا السوالف كلمن تحجي عن حياتها وخلال هالفتره ابويه تزوج وسوينا عرس بسيط لخاطر العروسه خطيه من حقها وسكنت بالبيت ويه عصماء ونروح ونجي عليهم. تبين حبابه وعصماء تمدح منها ورجعت البيت تعبانه
من هوسه العرس وكبل نمت وكعدت على صوت ياقوت تحجي وصوتها واصل لعندي .
ياقوت ـ ليش يابه أسويلها عشه تزقنب ما تكوم هي تطبخ الها ولرجلها لو متزوجها بس لنوم .
سلوى ـ انجبي صوتج ما أريد أسمعه تردين تفضحينا من هسه مشاكل وأذا سويتي عشه خوما مسويه على حسابها وهي اذا رجلها طلب عشه تشلع اله عيونها ما تريد عشاج ومنيتج عليها .
ـ أني ما تطلگت حتى أخدم ست الحسن ليال خاتون
ـ تطلكتي أكعدي احترمي نفسج وسوي اللي عليج محد كايلج أخدمي بس هذا واجبج كبنت عايشه بيت أهلج
ما عليج بـ ليال وخاتون لان أدمي ومحترمها نفسها ليش ضايجه منها بيج خير يا يمه صيري مثلها .
ـ من يوم يومج تحبينها وتدافعين الها وحتى من أني تطلگت من زياد أنتِ مـا أنقهرتي عليه بكثر ما أنقهرتي على ليال لان أبنج عاافها وتزوج إيناس وكسرها وأذكر بهذاك الليل دخلتي الغرفتج تبجين عليها والله راحت ليال من ايدج تمنيت لو باجيه عليه مثل ما بجيتي على ليال وكسرتها .
ـ ليال احبها من يوم صارت وشلتها بحضني وكمطتها هي صارت بنتي وعزيزه مو معناها بس احبها واكرهجن لا يمه لاتخلين الشيطان يلعب بعقلج وتضل بنت عمج ومرت أخوج صفي نيتج ترة تخسرينا وتخسرين أخوج شتسوالج يا بنتي الحقد عمره ما سوى اوادم مو كدامج جواهر وينها .
ـ عليمن تضحكين يمه كولي بس تحبين ليال وخلص
ـ كافي صارلج ساعه تلغين وتحملتج واذا ما تبطلين مشاكل اكول لابوج عليج خلي يرجعج لزياد مو كتلتي نفسج عليه ورأسج والف سيف الا تتزوجينه شلون يخطب ليال وما يخطبني وتالي رجعتي مطلگه واكفه تحاسبيني وتسويلي مشاكل بهل البيت كافي أيناس مررتيها وشلعتي گلبي بمشاكلج وياها أنوب عليه ليال امشي من وجهي لابارك الله بيج فلا تجنين عقل لا والله
ليال ـ طلعت وشافتني أسمعهن
ياقوت ـ تشمتي تشمتي شگو عليج رجال وتزوجتي وحباله وتحلبين كلها كم شهر وتجينا حامل اذا ما طلعتي حامل قبل العرس .
ليال ـ عافتني ومشت واجه ليث ردت احجيله بس سگتت ما ردت تصيير مشاكل .
ليث ـ نغم نايمه
ليال ـ أي نامت .
ـ لعد تحضري نطلع نفتر ونغير جو.
ـ تمام كرصني من خدي وتجهزنا وطلعنا وهي تخبلت راحت كعدت نغم وخلتها تبجي ليث تأفف بس ما حجه وكنسلنه الطلعه ما رحنا .
ومرت أيام وطگ گلبي منها بگلشي مخليه عينها عليه
وتشاركني وشنو ليث يجيبلي لازم يجيب الها وتتدخل الله يرحمج أيناس جانت تشكيلي منها شلون تحمليتها وهسه اني بمكانها الله يعين گلبي .
وكعدت الصبح وهو نايم ونغم بحضنه مصحنه ما الها خلك نومها يمنا خطيه اني جبتها لما تصيير زينه وكمت نظفت البيت وغسلت وكعدت عمتي كبل باستني .
سلوى ـ فدوه لهل الصباح الحلو ليش عفتي نومتج وكمتي عالشغل عوفي يا بنتي اني اشتغلهن أنتِ خليج يم ليث .
ليال ـ لا عمه خوما اضل بس نايمه وأني احب اشتغل واساعدج أنتِ امي ما يهون عليه اشوفج تشتغلين وتتعبين واني كاعده ما اسوي شيء .
ـ الله يرضى عليج يا يمه
ـ بس دعواتها اليه كافي نفس حنية امي عليه وعمي كريم يحبني يمكن أكثر من بناته ، دخلت أريد انظف الاستقبال وسمعتها تحجي عالموبايل .
ياقوت ـ ليش ما تطلگها مو كتلك ما أرجع اذا ما طلگها
بس اني أحبك وما نسيتك ولا ثانيه وحتى من تزوجت
اني ما زعلت منك ، يعني ترحعني ومرتك شلون وين تبقى عند أهلك ها وشعجب امك ترضى ها فقيره واني شبيه ، ماشي شوف ابويه شيگول أي ارجع
ليال ـ فتحت عليها الباب وفزت وقفلت الخط هــا مخابرات سريه وتخطيطات عسكريه خير غمزتلها
ياقوت ـ وأنتِ شعليج شو وخري
ـ مشت وگتلها مو جنتي تكولين عليه عديمه كرامه ورجعتي على فضالة أيناس وأخذتي أرمل وعنده بنيه بعد كل اللي سواه رجعتي سحلتي نفسج على ليث ورجعلج بعد ما هانج وجفص عليج وكرامتي تلطم بالزاويه اذا اني كرامتي تلطم أنتِ كرامتج شتسوي تجدي بالشوراع!
ـ أحترمي نفسج مو أنتِ تحاجيني بالكرامه على الاقل ما هجمت بيوت عامره مثلج .
ـ أني من يومي محترمه نفسي وما هجمت بيت أحد هذا قدر رب العالمين لا بكيفي ولا بكيفج وليث رجعت اله لان هو بعده يحبني وأني احبه وأثنينا انظلمنا بسبب وحده ما تخاف الله وعدها نقص بشخصيتها دخلت بينا وخربت علاقتنا فه اني عمري ما خربت وهجمت حياة غيري بس أنت أي من هسه جنتي تحجين وتطلبين من زياد يطلك زوجته علمود أنتِ ترجعين اله .
ـ الله يأخذج .
ـ عافتني ومشت شگد حقيره ونذله وگلت بعد ما أسكتلها تبيع مثاليات برأسي وهي من جوه ليجوه
ومر كم يوم واجه عمي رشيد وعمتي اسمهان وزياد وعرفت يردون يرجعونها وهي نزلت كاشخه وعطرها يكفخ حتى أخوانها انصدموا بيها حتى ما سألوها ترجعين او لا كبل عقدوا الهم وخلال كم يوم اجه
اخذها وعرفت بيتها لوحدها الحمدلله خلصت .
والعصريات رحنه اني وليث على أهلي معزومين يمهم عالعشه والبيت يلمع وريحته ترد الروح ودشاديش ابويه عالحبل عبالك حليب من نظافه والبياض .
ليث ـ عبالك خالتي هيفاء عايشه ، الله يرحمها
ليال ـ أمين يارب ودخلنا واجتي تهلي وترحب بينا وأستقبلتنا احلى أستقبال
عفاف ـ الف هلا بيكم والله من عصماء گالتلي ليث وليال معزومين عالعشه هلگد فرحت هلا بيكم وهسه جنات وحيدر ولقاء وامجد هم يجون گلت لباسل يعزم أخواته وزلمهن عالعشه .
ليال ـ بالمهلي عيوني خاله وكعدنا واجو اخواتي ونفس الاستقبال والترحيب وتفتر علينا وحبابه وفقيره وگلبها أبيض على نياتها خطيه شگد أحبها .
وفعلاً كلام عصماء مرت سنتين وما سمعنا الها صوت وتجي علينا وتتفقدنا وهدايا وتخابر وتسأل وباسل حيل مرتاح ويمدح منها ومتفاهمات هي وعصماء مثل الأم وبنتها والفضل لعصماء لان تعاشر وتصبر وطيبه والله يدزلها ناس نفس معدنها الف الحمدلله .
واما جواهر عمامي حجوا ويه أبويه لان جديتي زعلانه منه لان هاجر جواهر فه رجعلها وكام يعدل بينهم وكلنا ميخالف بس مهم تبقى بعيده عنا هي وشرها والحمدلله ما متدخله بالعكس قريبه من عصماء وتشتري ملابس والعاب وهدايا وكل هالشيء المن لأبن عصماء صارلها ولد وباسل سماه نائل وجواهر من يوم الصار صارت روحه بي تموت عليه كل ملابسه عليها كأنما شافت روح نائل بي وتجي وتروح ما عليها بأحد فقط يم عصماء وبناتها يحبن جواهر لان هي زينه عليهن بس مع ذلك لقاء تحذر وتمنع تكول ما تطهر ختولي بس نائل يوصي بيها ولخاطره متحملينها ومهما يكون تضل أمه ..
وخلال هالسنتين جنات صارلها بنات أثنين فجر وحوراء
ولقاء ولد اثنين عباس أبنها الجبير عبالك ما مخلفه بس هي مشيخته على الكل وابنها الثاني حمزه وهسه حامل هم بيها ولد وكالت تمسي عبدالله وعصماء بس ثلاث بنات غنى وجنى وهيفاء ولد نائل أمــا اني ما صارلي راجعت هواي دكتورات ماكو شيء ونفسيتي تعبانه وأباوع عالاطفال رغم نغم كل وقتها يمي وتصيحلي ماما وتعلقت بيها بس مو مثل ما من روحك
وهو عادي ما مبين اليه يريد أطفال بس كذب كم يوم يصبر من حقه يصيرله اطفال اخ أو أخت لـ نغم
فزيت على صوت عمتي وگبل مسحت دموعي
سلوى ـ ليش تبجين يمه الله كريم بنيتي مو اليوم باجر وهذا رزق محد يعلم بي شوگت حتى أستبرق جانت محرومه من الأطفال صارلها سنوات من ربج راد يجبر خاطرها وخاطر ابني فارس لا عالبال لا عالخاطر حملت وصارلها ولد أثنين فه لاتكطعين الأمل وأنتِ أنسانه مؤمنه وقويه خلي ايمانج برب العالمين وأن شاء الله ما يخيب املج وظنج ويترس حضنج وتملين علينا البيت بهوسة جهالج
ولاتخافين من ليث مل يسويها ويكسرج بعد أبني وأعرفه هو صارله سنتين من تزوجج ولحد الأن ما شبعان منج وكلما ينزل من الدوام نفس لهفته ونفس حبه ما تغيير أنتِ حبج بگلب أبني بهل الوگت نادر وأرتاحي خلي على گلبج ماي بارد أني امه وأطمنج .
ليال ـ حضنتها وبجيت عمه وتمسح على رأسي وطيب خاطري واجه هو وبحضن عمتي باسني وضحگت .
ليث ـ شبيها مريتي منو مزعلها شبيج ليالي .
سلوى ـ أني أخليكم ألغده عالنار .
ليال ـ طلعت وقفل الباب وأخذني بحضنه يبوس بيه
ليث ـ نفس الموضوع مو كتلج لاتقهرين بروحج گافي
ـ مو بيدي ليث أني أريد منك طفل
ـ بيدج قابل لو بيدي عوفيلي هالموضوع
ـ وأذا ما صارلي
ـ لا يصيرلج بس گولي يالله .
ـ بجيت وسكتني وضليت نفسيتي تعبانه وعيالي حاسين بيه وهو ضايج عليه ما ضايج لان ما يصيرلي اطفال ومن كثر ما أنقهرت تركت العلاجات والدكتورات وكمت ما اراجع وعفت نفسي وهملتها وشبه أيست وقطعت الأمل ومرت أشهر وكلشي ماكو بس بهذا الشهر لاحظت تأخرت عليه كم يوم کلت يجوز خربطه ما خليت على بالي واستمر الوضع ومرت سبعة ايام وگلت
لعمتي شتگولين عمه نسوي تحليل .
سلوى ـ أي نسوي ليش مـا نسوي اني ما كاطعه الأمل واوكفي اجيب فلوس اني هم أريد أسوي تحليلات
ليال ـ مال حمل
ـ لا يا حمل ضل بيه حمل شعندج سوالف
ـ ضحكت عليه وطلعنا حتى نسيت أكوله وناسيه موبايلي وضليت خايفه منه عمه اذا رجعت وعرف شلون
شيخلصني منه .
ـ رجلج وتعرفين أطباعه صارلج سنتين عايشه وياه ما تعلمتي عليه وعلى خبالاته جان دزيتله رساله هاج موبايلي خابري
ـ لا عمه دخيلج ويسمع صوت السيارات يبوه والله يعدمني وأني أول مره اطلع وما أكوله .
ـ لعد سگتي نرجع وتحملي خل يبسطج
ـ ها عمه تقبلينها يبسطني
ـ لا شحده وعمج موجود ما يكدر ما عليج أحنه بظهرج
ـ فديتكم يله وصلنا ونزلنا وسويت تحليل وعمتي هم سوت تحليل واخذتها قستلها ضعطها زين ورحنا السوك تسوكنا بس أمشي وأيدي على گلبي لا ليث يشوفنا ورجعنا شايلين المسواك وإيديه تمخلن وموبايل عمتي يتصل .
ـ ما تشوفيلي هالمهجوم وين صار هاج جنطتي شوفي منو يدك علينا هسه عبالهم انخطفنا .
ـ منو يخطفنا عمه دورته وليث يتصل بلعت ريك والخوف سيطر عليه والموبايل وكع عمه هذا ليث يتصل عليج
ـ أي جاوبي قابل يطلع من الموبايل اويلي يا ليث شمسوي بيج صارعج وهو بس يدخل الغرفه ويلزمج يصير من الليث في الغابه الى ديج هراتي ملاحك دجاجته .
ـ عمه مو وگت الغابه والديج حيري وياي يتصل صار كم مره هسه تخبل والله هاج جاوبي
ـ شجاوبه ولج
ـ أوف عمه جاوبته الو ليث
ليث ـ السياره الأخذتج السوك ترجعج وهسه تنزرعين بغرفتج هسه دقايق الكاج بالبيت .
ـ ليث بس خلي أفهمك
ـ ليال شفهم بس گوليلي شفهم طالعه من البيت بدون عملي وتفررين بالسوك وعبايتج الهو يهفي بيها الما شايف شاف وشبع شوف وفوك هذا القهر كله عايفه موبايلج بالبيت واكيد صامت واذا ليث گالج ليش صامت والله بيد نغم بس هسه راح اوصل وأني اعلمج أنتِ ونغم وأمي وياجن رأس الفتيله هي بس خلي أوصل أني أعلمجن كواد اني كواد .
ـ عاط بيه وفزيت وعمتي تضرب على وجهه وسدت الخط عمه عاالسريع خل نمشي فدوه عالسريع
ـ وين اصبري بس خل نأخذ التحاليل
ـ يا تحاليل عمه ليث متخبل وكاعد أذا وصل البيت قبلي ما أضمن على خبالاته شيسوي .
ـ ما يسوي شيء هسه يشوفج يطبگ الحار عالبارد ويطفى
ـ لا وين يطفى يصيير انفجار عمه دخيلج أمشي حتى المسواك عوفي
ـ اوكفي لاتخبصيني مثل رجلج خل نشوف تحاليل خطيه اشتغلوهن العالم جاي تلعب شو امشي
ـ يا برودج يا عمه ومشينا المختبر وهي وگفت اخذت التحاليل واني ادك برجلي متوتره يله عمه وابو المختبر أنطاها التحاليل وگال الها
ـ مبروك حجيه حامــل
سلوى ـ حامــل ولك يمه منين حبلت! ويني وين الحباله .
ـ بضحك لا حجيه مو أنت الحامل البنيه الوياج ليال سعيد الحامــل .
سلوى ـ حامــل ولك يمه شتگول خاف ناصب علينا شوف تأكد زين يمه هاي ليال جنتي. .
ـ لا يمه متأكد جنتج الحامــل .
ليال ـ يحجي وأني مصدومه وما مصدگه وأنتظر عمتي تتأكد وتأكدت واندارت عليه گبل حضنتني وتبوس بيه عمه حامــل أني حامــل حامــل .
سلوى ـ أي يروح عمتج حامــل فدوه لوجهج بمه كلوكش كلوكش.
ليال ـ گامت تهلهل والكل يباوع الها وسجدت بالكاع سجده شكر وعافتني وأشترت جگليت وتوزع للناس
وأني حاضنه التحليل وأبجي هاي الدموع الفرح الف الحمدلله ربي جبرت خاطري .
رجعنا البيت وعمتي حاضنه أيدي وتبوس بيها وبحضنها جيس الجگليت وصلنا الفرع وطبك باب بيتنا ونزلنا وشفت سسيارته موجود .
عمتي بعدها ما فاتحه الباب وتهلهل وأطش الجكليت واني وراها شايله التحليل بإيدي وهو واكف باب الأستقبال وما أهتم لهلاهل عمتي ولا باوع الها نظراته جانت ناحيتي بس وعمتي تقربت عليه وحضنته وتبوس بي وهو يباوعلي وجگارته بايده .
سلوى ـ مُــــبارك يمه مُــــبارك يروح أمك مريتك الله جبر خاطرها ليالي حامــل يمه حامــل .
ليث ـ حامــل!
ليال ـ عمتي تحجي وياه وهو عيونه عليه أستوعب كلامها واجاني يركض شالني ويفتر بيه وعمتي تصييح عليه .
سلوى ـ ولك لاتوكعها يمه على كيفك يمه الزهره ولك ليث لاتتخبل .
ليال ـ حضني من وجهي وباسني من گصتي ورفعت التحليل بوجهه وشافها وضحك وضحكته من گل كلبه
ليث ـ حامــل ليالي حامــل الف الحمدلله والشكر ربي جانت أمنيتي أخذج وتصيرين الي وتحققت وبعدها صارت أمنيتي يصيرلي منج طفل ينخلق من روحج الاحبها وراح يصيرلي يروحي يا ليالي يروحي .
ليال ـ دخلنا البيت فرحانين وسحبني لغرفتنا ويبوس بيه مو جنت متعصب عليه لان طلعت من البيت بدون ما اكولك
ليث ـ أبنج شفع الج هالمره
ـ تمام
ـ أروحلكم فدوه أنتِ وأبنج .
ـ فوك حبه وحنيته زادت وانتقلنا مرحله ثانيه ليالي حامــل وطول فترة الحمل هو وعمتي خايفين عليه والف الحمدلله الله سهل عليه وجبت بنوته وسميتها قمر وكبرت عائلتي وصرنا عائله صغيرونه وحلوه
ليث ونغم وقمر وليال والى هنا أكتملت حكايتنا
وأكتملت حكايتنا جميعاً كلمن مع عائلتها لكن أكو أشخاص ضلت حياتكم ما أكتملت وبيهم عاشوا بنص روح مثل نائل عاش بالغربه وحيد وسجاد ما تزوج ضل عايش على ذكرى حُب لقاء حسب كلام ليث لحد الأن يحبها لان المقرب منه وحالياً جاي يدرس ماستر بإيران
ملتهي بدراسته الله يعوضه ويوفقه وعمي سليم رجع البيت من زمان وعنده أولاد أربعه واحد منهم ايضاً سماه نائل من كثر ما يحبه سافر وترك غصه بقلوبنا كلنا وحتى محلات السجاد والمفروشات عزلوا الفرع من زمان لان عمي سليم گال ما أكدر أشتغل من دون نائل عزلوا وحصة نائل أنطوها لباسل لان نائل موصيهم كل امواله وشغله لباسل وبناته وعمي دخل شراكه ويه عمي رشيد ويشتغل الحمدلله ، وياقوت بعدها نفسها ما تغيرت وصارلها بنيه ولد وبس مشاكل هي وعيالها رغم بيتها لوحدها بس المشكله بيها مو بعيالها وهدير هم تزوجت وعدها بنات اثنين وتماضر تؤام ولد وبنيه
وعمتي نجلاء نفسها كلها تتغير الا هي ، وجواهر عايشه على أمل رجوع إلها نائل بيوم من الأيام بس شوگت محد يعلم ولا هو يريد يرجع ... النهايه
مع السلامه كانت معكم ليال ..
والى هنا أختم رواياتي بنات الحجي سعيد كانت روايه جميله وحقيقه جداً وتحمل معها الكثير من الشخصيات والأحداث والمواقف والدروس والعبر وأتمنى أن اكون قد اوصلت رسالتي بالصوره الصحيحه والمطلوبه بدون نقصان أو التقصير بالرساله أو بالسرد بشخصيات الروايه والى هنا وأودعكم انا أيضاً مع أبطال رواياتي لا اعلم هل لي فرصه أو عمل جديد أن نعود لا اعلم حالياً
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
شكرا لزيارتكم عالم روايات سكيرهوم
