رواية سراج السادة الفصل السابع والعشرون بقلم غسق ادريس
" شاهيناز "
وكفنا كلنا مصدومين شنو فقار مات؟
محد جان مستوعب كلام مرت عمي رقية جانت تصرخ وتضرب على وجهه كاعدة بنص الصالة
نزلت الدرج خلف عاتكة الي ركضت على امها مامستوعبة شي
كعدت كدام امها تحجي بهمس وخوف
_عاتكة:: شبي فقار ماما شبي فقارررر
_رقية:: يمههه ابني راح من ايدييييي
باوعت للولد كلهم متجمدين واحد يباوع بوجه الثاني
نزل غضنفر من الدرج يركض يعدل بملابسة
باوع للولد وصاح بيها يريد يطلع
_غضنفر:: امشوووو مشواق وفقار ب المستشفى
محد ناقش ولا سأل طلعو يركضون خلف غضنفر واحنا على كعدتنا ب الصالة كلنا نتراجف خايفين مافاهمين شي ولانعرف شصاير
بس عمتي رقية ماسكتت من البجي والصريخ ب اسم فقار
والعلوية لباب الي سمعت اسم مشواق ابنها ويا فقار ب المستشفى خافت وشاركت عمتي ام عاتكة ب البجي
ثنينهن يصيحن ب اسم فقار ومشواق
نريد ناخذ منهن سالفة ابد مايحجن بس يبجن
طلعت عمتي من الغرفة التلفون بيدها عاكدة حواجبها بعصبية تباوع لعمتي رقية تريد تفترسهاا بعيونها
دارت العلوية زهراء على عمتي وحجت بخوف عيونها مدمعه
_زهراء:: شبيهم الولد يمههه
_جهاد:: مابيهم شي يمه متعاركين بس
_لباب:: يمهههه ويامن متعاركينن
باوعت عمتي على العلويات وهزت راسها بتعب
_جهاد:: فقار ومشواق متعاركين ويا مجموعة شباب وذولاك مدري 8 ماعرف اكثر
باوعت العمتي تحجي وتهز ب ايدها
درت اباوع لعمة رقية والعلوية لباب صارن وحدة تباوع بوجه الثانيه
عضت العلوية لباب على ايديها وصاحت
_لباب:: ولككك اني اعلمك يا مشواق بس تعال اذا ما اشلع اذاناتك
حصرتني الضحكه ماعرف شجاني خليت ايدي على حلكي ماريد اضحك بهذا الجو المؤسف باوعت على ملاك تعض على اصبعها متوتره وخايفه
دارت العلوية لباب على عمة رقية وصاحت بيها
_لباب:: ولج لعد انتِ من تصيحين ماتو وتخليني ادك وانوح شجاج
_رقية:: علوية مادري اني سمعت غضنفر يحجي بالتلفون الي يحجي ويا يكله فقار ب المستشفى تعال شوفه سبح بدمه ومات
سكت الكل بس عمتي رقية ماوكفت بجي وخوف على ابنها حقها احنا مانعرف شصار بيهم!!
" معراج "
طلعنه من البيت وتوجهنا كلنا للمستشفى
صعدنا بسيارة غضنفر وطلع بينه
عدلت نظارتي وحجيت ب استغراب
_معراج:: شصاير ترا كلشي مامفتهم
_غضنفر:: يمعود ما صاير شي بس فقار واخوك مشواق متعاركين ورايحين للمستشفى
_معراج:: متأذين؟
_جادح:: لا مابيهم شي راحو للمستشفى يتأكدون جهاز الاوكسجين مخلص غاز لو بعد
باوعت لجادح وحجيت ب انزعاج
_معراج:: شبيك غير افتهم شبيهم
_غضنفر:: دلهب انطاني علم ماعرف شبيهم
_معراج:: لعد العلوية رقية ليش تكول مات فقار
هز عضنفر ايده وحجه
_غضنفر:: جاي اشاقة ويا دلهب كلي ب المستشفى كتله ماتوو مادري بيها موجودة وتسمع
اتحسرت وهزيت راسي ساكت
قبل لا نوصل للمستشفى اتصل غضنفر على دلهب ينطي علم بوصلونا
وصلنه قبل الباقين للمستشفى نزلنه من السيارة نركض للمستشفى
شفت دلهب واكف بباب المستشفى
اتسلامنه ودخلنا نمشي خلفه
حجه جادح موجه كلامه لدلهب
_جادح:: شبيهم خو ما متأذين؟
_دلهب:: لا مابيهم شي جم خياط بس
_غضنفر:: يلا خياطات ولا غيرها
شفنا فقار ومشواق كاعدين واحد بصف الثاني والدكتور يخيط ب ايديهم
انتبهت على فقار حاجبه مخيط و ملابسة كلها دم وهوا مامهتم يضحك ويا مشواق
ركضنا عليهم انا والولد مصدومين بحالتهم والي صاير بيهم
دارو ب اتجاهنا باوعو النا يضحكون
_غضنفر:: ولكمممم عليمن تضحكون عفت امهاتكم ب البيت يبجن حتى قراية سون عبالهن استشهدتو
ضحك فقار يباوع لمشواق
باوعلهم جادح وصاح بيهم
_جادح:: عليمن تضحكون يعني احنا جاينن نركض عبالنا بيكم شي وانتم تضحكون
_معراج:: يمعودين شصاير شنوو هذا الدم شجاكم ماتحجون؟
باوعلي فقار وحجة
_فقار:: اخوك تعارك وفزعت اله
_جادح:: فزعة زرب"" " هاي اذا ثنينكم مكتولين
_مشواق:: ماتسكت انت غير احنا ثنينن وهما تسعه
بعدنا ماحاجين ودخل السيد عبد الرؤف والسادة يركضون من شافو فقار ومشواق
انصدمو بمنضر الدم والي صاير بيهم
فقار ومشواق سكتو ماضحكو بعد التهو بئسأله السيد وشنو الي وصلهم لهاي المرحلة
بدة فقار ومشواق يحجون الي صار واحنا نسمع الهم
_فقار:: سيد مشواق اتصل يسألني على العلوية لباب يتصل عليها ماترد كتلة نايمة وكعدنا نسولف تالي كتلة ليش ماتجي كلي ماجي كتلة اجيك واجيبك غصبن عليك كام يضحك كمت انا طلعت من البيت ورحت اله للفندق عود
كمل مشواق كلامه
_مشواق:: انا نزلت من الفندق بقيت منتظر فقار لان دريت بي راح يجي جان وانا واكف مرو اربعه يسولفون جان واحد منهم حجه وكفر كعدت انصحهم كتلهم مايجوز هذا الشي وحرام تنطردون من رحمة الله
باوع دلهب على مشواق وحجه ب استهزازء يهز ب ايدة
_دلهب:: خوش طردو الرحمة من وجهك
_غضنفر:: انت وين عقلك من تجي تنصح هيج ناس ؟
باوع مشواق للولد وحجه
_مشواق:: مادري انا
_جادح:: وشصار بعدين
_مشواق:: يمعودد شصار دارو علية اربعتهم واحد رافع ايده يصيح يا معشر الانس سوف نشق واحد من اتباعكم مادري شنو يحجي
_دلهب:: بس صدك شقوك
_مشواق:: يمعودين اربعة على واحد
_معراج:: وبعدين؟
باوع مشواق لفقار وضحك
_مشواق:: يمعودين اجه فقار وكتلو وياي
_فقار:: ناكر المعروف
_مشواق:: لا غير الصدك والله فزع خوش فزعه بس اجو خمسة مادري منين عدهم سجاجين شوفو شسوو بحاجب فقار رادو يطيرون عينة
كمل مشواق كلامه واشر على دلهب
_مشواق:: مادري منين طلع دلهب اجه ب الدراجه والكرك ورا لعب بيهم لعب
_فقار:: صدك انت شدراك
_دلهب:: شميت ريحة السادة واجيت
_ايليا:: واجيب بكرك اريد افهم هذا الكرك شنو سالفتة
_دلهب:: الكرك هذا لو مره تزوجتة بكد ماحبة
سكت الكل يباوع للسيد كاتمين ضحكتنا نضرات السيد لدلهب الي خلتة يدنك راسة ويحك ب اذنه
طلعنا من المستشفى فقار ثلاث خياطات بحاجبه وخمسة ب ايدة ومشواق بزندة وكتفه
هناك وصاح مشواق انا ارجع للفندق
ورفض يرجع لبيت السيد ماعرفت سبب رفضه للبيت شنو اريد اعرف اخوي ليش يتهرب من بيت السيد!!!
ب الجبار والكلام واللحاح قبل يجي لبيت السيد بس جان واضح الرفض علية وعدم القبول
" قس "
وكفت السيارة كدام بيت ابو قادر بيت جدي اهل امي اخر مره اجيت لهذا البيت جنت صغيرة ايام طلاك امي وابوي جنت اجي لبيت جدي اتوسلها ترجع النا
اياممم وذكريات ما اتمنى ترجع جنت اتوسلها اني واخواني بس حتى ترجع النا اشتقنا لوجودها
بس الحب عمى على عيونها صارت ماتشوف غير ابو السمج
باوعت للبيت متغير هواي مجددين البناء
التفتت على عمي محمد من نزل من البيت مشه ب اتجاه الباب طرق الباب ووظل واكف منتظرهم يفتحون الباب
رجع طرق الباب ثاني اباوع لخواتي قسار وقادسية الانزعاج واضح بعيونهم والرفض
عكس قبس الي جانت واكفه بصف عمي ادك الباب ويا
باوعت الهم وصحت بيهم ماشية ب اتجاه السيارة
_قس:: مبين مايردونا امشو نرجع يلا
توني افتح باب السيارة وانفح باب البيت
التفتت اباوع زلمة جبير يجي عمره بنهاية ال 40 لابس دشداشتة السودة ملامحه حادة ممزوجه ب الطف والهدوء اي هذا خالي ابو شهاب
ابتسم ببشاشه يباوعلنا ويباوع لعمي محمد حجه يتسالم ويا عمي محمد ويتباوس
_ابو شهاب:: هلا ب ابو مجتبى تفضلو تفضلو نور البيت بجيتكم
_محمد:: منور ب اهله تعالن بنياتي سلمن على خالجن
التفت علينه خالي ابو شهاب مبتسم باس قبس واجه يبوس بينه بحرارة وشوق
اول ماسلم علي ابتسم بوجهي ومسح على راسي
_ابو شهاب:: يابه هلا ب العزيزة هلا بعزيزتنا
سكتت ومارديت عليه
دخلنه البيت وخالي يهلي ويرحب بينه انفتح باب الصالة الخارجي
طلعت منه مره جبيرة ب العمر العكازة بيدها
وخلفها اولادها الاثنين ابو مقتدى وابو رحاب
تقدمت ب اتجاهنا الابتسامة على وجهه فتحت ايديها واخذت خواتي قسار وقبس بحضنها
_خاجية:: هلا ببنات العزيزة ولجن يمة نورتن البيت
_قبس:: بيبي حبيبتي منور بيج
التفتت على قادسية اخذتها تبوس بيها واني خلف عمي اخزر بيها
التفتت ب اتجاهي وابتسمت
_خاجية:: ها ام السان ماتجين تسلمين على حبوبتج
_قس:: لا
التفت عمي محمد باتجاهي خازرني
ضحكت بيبتي واجت ب اتجاهي مشيت ب الها ودخلت بحضنها
اخذتني تبوس بيه وتهلي
ابتعدت عنها ووكفت اسلم على خوالي الاجو
جانو يهلون بينه بحب وحنية ولاجنهم نفسهم الي تخلو عنه بيوم من الايام
ولا كانو نفسهم الي طردونا وشمرنا على عمامي
هسه الحنيه منين نزلت ماعرف
دخلنه للمجلس كعدنا كلنا تهت ترحيب الكل
جنت منتظرة اشوفها مهي وينها؟
مو هيه الي طالبت بينه لعد ليش ما اجت ترحب بينه
بعد كعدة طويلة من الحديث والمواضيع العشوائية
كام عمي محمد حتى يرجع للبيت
وكفت اباوعله بحزن اترجاه ياخذنا ما اريد اكعد هنا احس هذا المكان مو مكانة
التفت عمي محمد ب اتجاه بيبتي وحجه
_محمد:: يمة هاي البنات وامانة عندج هنا خليهن بعيونج لان عزيزات عدنا هذن
_خاجية:: عزيزاتك هنا عزيزاتنا لاتخاف يمة هنا مو يم غربه ببيت اهلهن وبيت امهن
ابتسم عمي محمد والتفتت ب اتجاهنا
_محمد:: يلا يابعد عمجن رايح انا دربالجن على نفسجن وشنو تحتاجن انا موجود
_ابو شهاب:: بعد وكت ابو مجتبى ضل على الغدة
مارضو خوالي وبيبتي على طلعة عمي محمد
بس عمي رفض واتعذر الهم بجية ثانيه
ودعنا عمي محمد ورجعنا كعدنا ب المجلس مستحيات ومتوترات اخر مره اجينه قبل سنوات يعني الوضع تغير
خليت رجل على رجل ودرت اباوع لبيبي الي ماخلت سؤال واستفسار ماسألتة
_قس:: اكلج ام امي لعد بتج وين
باوعتلي وابتسمت تضحك
_خاجية:: اخوج تمرض واخذتة تضربة ابره
_قس:: منو اخوي؟
_خاجية:: اخوج حسن
سكتت عاوجة حلكي شبسرعة صار اخوي هوا ابن امي اني شعلي بي لا اعرفه ولا يعرفني
دارت علينه بيبي وحجت تباوعلنه مستغربة
_خاجية:: عود صدك قدس تزوجت
_قبس:: اي بيبي ب كربلاء تزوجت سيد
_خاجية:: ب المبارك عليها. شعجب اصغرجن تزوجت قبلجن
_قادسية:: مابيها شي دام هيه مرتاحة هاي هية
سكتت بيبي واحنا سكتنا وياها
باوعت لاثاث المجلس فخم ومغيرين كلشي وين قبل البيت يخنك
سمعت صوت فتحة باب الشارع وصوت صياح مره ناعم
_:: ولك ماما اكعد لاتتبلل ماي
باوعتلنه بيبي وابتسمت
_خاجية:: اجتج امجن. ولججج فردوسسس تعاي بنياتج اجن
كامن البنات وبيبي بس اني ضليت كاعدة
بداخلي جنت متحمسة اشوفها ومشتاقة الها بس كبريائي مانعي اظهر هذا الاشتياق
شفت خيالها يقترب من الباب بلعت ريكي متوترة من القاء الي راح يصير بينه
مدت راسها مصدومة تباوع لداخل المجلس من شافتنا ابتسمت بفرح ممزوج ب الحزن
دخلت للمجلس والبنات كامن
ركضت قسار ب اتجاههه تبجي وقادسية وقبس خلفها كلهن كامن يبجن شوقهن ولهفهن لامهن نساهن الي سوته بيهن وشلون عافتهن
حظنتهن مبادلتهن دموع الاشتياق والهفه
جانت تبوس بيهن وتشم بحب
جنت كاعدة اباوعلهم وعيوني مدمعه ماريد ابجي ولا اريد اشتاق اني اكثر خواتي حقد عليها ومن الي سوته
التفتت تباوعلي عيونها متروسات دموع
عافت خواتي واجت ب اتجاهي
دنكت راسي اسيطر على دموعي ماريد اضعف كدامها ماريد
اخذتني بحضنها تبجي وتبوس بيه
ضميت راسي بركبتها ماريد واحد يشوف دموعي الي طاحن
باستني بوجهي وبعدت تباوعلي ب ابتسامة فرح وحب
_فردوس:: كبرتي قس صرتي جبيرة. يمه يمه باعي قس شكد تشبهني
ابتسمت بيبتي تهز راسها ب اي وامي تحضن بيه واتبوسني بوجهي
حسيت بشعور حلو من الداخل شعور الامان والدفو
بعد هاي السنوات كلها رجع هذا الشعور تجدد بداخلي بعد ما انمحى ويا روحتها
كمنا ودخلنا للصالة امي لازمتني من ايد ولازمه قبس من ايد وكل شوي تلتفت على قسار وقادسية تصيحهن يدخلن وراها
دخلنه للصالة جان اكو بنيه شابة كدامها ثلاث جهال ثنين بنات وولد من دخلنة التفتت تباوع علينة
كامت شابكة ايديها بتوتر وخجل
باوعتلها امي وصاحت بيها بضحك تأشر علينة
_فردوس:: تعاي سحر تعاي سلمي على البنات
اجت ب اتجاهنا البنيه الي اسمها سحر بس جانت خجلانة تبتسم بوجهنا بلطف
وكفت كدامنا اول ماسلمت على قبس وبعدين عليه وكملت للقسار وقادسية
_سحر:: هلا بيجن عمري منوراتنا
_قبس:: حبيبتي نورج هذا
ابتسمت بوجه قبس ودارت تباوعلي
باوعتلها رافعة حواجبي شبهت عليها بس ماعرف وين وجهه مو غريب علية!
مشت امي ب اتجاه الاطفال الاثنين جانن بنات صغار اعمارهن اقل الاربع سنوات عرفت هذن زهره وزهراء تؤم
الولد حسن
جابت امي البنات انطتهن النا تضحك
_فردوس:: هذن زهورات خواتجن الاصغار
_قبس:: اويييي ماما يخبلننن يشبهنج حيل
باوعت للبنات ما استغربن من عدنا عكس حسن ابتعد ضام روحه خلف امي
مشت. امي ب اتجاه الغرفه وصاحتنا وراها
مشينة وراها اتلفت ب البيت معقولة محد موجود نسوان خوالي وعيالهم؟
دخلنه لغرفة جبيرة جانو اكو ثلاث ولد صغار نايمين على الجرباية باوعتلنه امي واشرت عليه
_فردوس:: هذا كرار وحيدر وعلي
_قس:: ولدج هم مو
_فردوس:: اي خوانجن
همست بيني وبين نفسي
_قس:: ادري بزون شكد تخلفين
باوعتلي قبس بخزرة واني رديت الها الخزرة ادري قابل مجذبة؟
كعدنا ب الغرفة شمرت شالي وانسدحت بصف الجهال
كعدت امي والبنات يسولفن
واني غمضت عيوني فاصلة عنهن
رحت ب النوم غافية مامهتمه لوجودهم.....
" ملاك "
بيوم النزلت وسمعت العلوية رقية تصرخ وتصيح فقار مات كلبي طاح من مكانة
ضليت صافنة عليها مامستوعبة شي
اباوعلها شلون تبجي وتشهك وتصيح ب اسم فقار
لا ارادي عيوني دمعت
خليت صبعي بحلكي اعض بصبعي
خوف توتر ضياع كلشي زارني بهاي الحظة
عزلت نفسي اباوعلهم بخوف
جنت ادعي بداخلي مايصير بي شي
تضارب قوي صار بداخلي
احساس يكلي ملاك انتِ شعليج ليش هيج مهتمه وخايفة وجزء يكلي ملاك حضج مصخم بس حلى بعينج هيج صار
بعد كلام عمتي حسيت ب الراحة
وهم وخوف انشال مني
باوعت للعلوية رقية وبداخلي الوم بيها
ليش هيج سويتي بية علوية مو حتى كلبي طاح ورجلي مايعينني بعد
بقيت منتظرة وياهم رجعة الولد اريد اشوف فقار
التفتت الكل على جميلة الي جانت واكفة على الدرج شامرة شالها شعرها
عيونها كوا فاتحتهن جانت نايمة وكعدت على اثر الصريخ
شكد ماكول جميلة. جميلة قليل بحقها جمالها يجذب يخلي المقابل كوا يصفن بيها رغم تصرفاتها القبيحة بس هية تجنن
اكول شلون جادح فرط بيها هيج وطلقها؟ رغم ماعرف السبب بس اشوفها متمسكة بجادح عكسه
وبعد الي سمعتة من جادح ومشاعرة لشاهيناز
صرت منتظرة يمتى يطلك جميلة وياخذ شاهيناز
مو حقارة بس شاهيناز ترهم لجادح احسن من هل جميلة
هزت جميلة ايديها وحجت ب انزعاج
_جميلة:: يعني صدك جذب هسه شهل صريخ مو يكلولج مابي شي بعد شكو تصرخين مو حتى طيرتي النوم من عيونة
الكل التفت على جميلة مصدوم بكلامها
جانت تحجي موجهه كلامها للعلوية رقية بسبب صريخها وبجيها
باوعتلها العلوية رقية ودنكت راسها بحزن
_رقية:؛ عذريني ام عماد بس ابني هذا
_جميلة:: ادري ياعيني هسه واذا ابنج مو اني ابني بين الحياة والموت ماسويت سوايتج
فرفحت تفرفح من كلامها الادبسزز هاي كلها جانت ساكتة باوعت لعمتي جهاد شلون سكتت الها
شفت عمتي تباوع لجميلة بتركيز نضراتها غريبة جانت هادئه وماحجت شي
رجعت جميلة حجت ب انزعاج
_جميلة:: هسه حتلو مابي شي وماميت على صريخج هذا تموتي
طفرت من مكاني وباوعتلها بغل وعصبية
_ملاك:: يومج قبل يومه ان شاءالله بيش طالبتة. عبالج كلها مثلج ابنج بين الحياة والموت وانتِ كاعدة هنا تشوخرين
نزلت الدرج تباوعلي بعصبية تريد تتعارك وياي وكفن العلويات بوجهه مانعاتها تتقدم
مشيت الها مسهله الوصل بس العلوية شريفة وكفت مانعتني
رفعت ايديها وصرخت تباوعلي
_جميلة:: لج انتِ شكد تحبين تحشرين روحج منو شامرلج عظام انتِ وتنبحين
_ملاك:: لج العتوي مو كلها ساكتة قبل شوي وانتِ واكفة تعوين فوك روسنا
كامت عاتكة وشاهيناز وكفن بصفي
واني اريد بس الكف هل جميلة اذا ما طلع الها جلد ثاني
هزت بروحها تصيح وتصرخ
_جميلة:: اوييي ملاك ام الفزعات تضوج اذا ماتنهان كل يوم
_ملاك:: اويييييييييي جميلة المسحولة تضوج اذا ماتنهان وتنكتل يومية
كامت العلوية لباب تصيح بينة وتبعد وحده عن الثانية
بعدت ورجعت كاعدة بمكاني اهز رجلي بعصبية
جميلة صعدت لغرفتها ضلت عدنا فتون خانم تعوج بحلكها وتباوع صفح
سكتت كاعدة على اعصابي انافخ كلها انزعجت وضاجت من تصرف جميلة بس محد يحجي مشكلة هنا حقهم ينوخذ ب السكتة يخجلون يردون الاذية ب الاذية
مر الوقت واحنا على كعدتنا منتظرينهم يرجعون
رفعت راسي اباوع لحميدة واكفة بباب المطبخ التلفون بيدها تخابر
شوي وحجت التلفون على اذنها
_حميدة:: ها فقار شلونك..... الحمدلله على سلامتك..... وينكم مو قلقتونا...... ب الطرق؟.... تمام تمام منتظريكم كلها كاعدة... الله وياك
باوعتلها خازرتها حميدة من طلعتيلي صفح
كعدت هيه بس جانت خايفة وقلقة بزيادة كل شوي تباوع للساعه
معقولة هاي كله علمود فقار؟
ضحكت اباوعلها
درت عيوني ورجعت اهز رجلي
مرت ربع ساعة سمعنا صوت السادة جاي من الخارج طلعن العلويات يركضن للخارج واحنا خلفهن
عيوني سبقتني تركض ادور على فقار
طاحت عيني علي شفتة دخل للبيت يضحك ويا الولد ركبتة ملطخه ب الدم وايدي ملفوفة غير الدم المبعثر على جسمة وملابسة
ركضت العلوية رقية على فقار تبجي وعاتكة خلفها
باوعلهن وابتسم اخذهن ب الاحضان يبوس براسهن والعلوية كل شوي تجر بوجهه وتبوسه
انتبهت على دخلة شخص شايفتة قبل هذا مشواق؟ ابن العلوية لباب مره وحده شفتة ب كربلاء وبعدها اختفى
العلوية لباب من شافتة والبنات ركضن علية خايفات
كلها تجمعت حول فقار ومشواق خايفين عليهم وعلى حالتهم وشنو صاير بيهم
باوعت لفقار جانت حميدة واكفة كدامه تتحمد اله على السلامة وهوا يرد الها ب امتنان
دنكت راسي ب انزعاج ودخلت للصالة
كعدت على القنفة اهز رجلي ماعرف شبية ماعرف
بدو يدخلون للصالة واني كاعدة بمكاني مسوية نفسي مامهتمة بس اني من الداخل لا كلش مهتمة اريد اكوم اتحمد الة على السلامة بس اكو شي مانعني
دخل فقار حاظن عاتكة ويهمس ب اذنها وهيه تبجي وتهز راسها ب اي
رفع راسه يدور بعيونة بين الكل
صارت عيونة ب اتجاهي باوعلي واني دنكت راسي
بديت اهز رجلي ب انزعاج
صارت هوسه ب الصالة ولا كأنو قبل كم ساعة كلها جانت نايمة هسه كلها كعدت صار عدهم صبح
كعد سيد معراج على القنفه كدامي دنك راسه ونزع نظارتة يمسح على عيونة بتعب باوعلي ابتسم ودنك راسة رجع رفع راسة حسيته يريد يطلب مني شي بس متردد
باوعتلة وحجيت بهدوء
_ملاك:: سيد محتاج شي
_معراج:: اي والله بس خجلان اطلبج
_ملاك:: لا سيد تفضل شنو محتاج
_معراج:: رايد ملح ضغطي مأذيني
_ملاك:: اي هسه
كمت من مكاني مشيت ب اتجاه المطبخ اخذت ملح وكاسة ماي وطلعت من المطبخ
مشيت ب اتجاه معراج شفت فقار كاعد بصفة هوا ومشواق
وكفت كدام معراج انطيتة الملح وكاسة الماي ابتسم بوجهي وحجة ب امتنان
_معراج:: اشكرج علوية
ابتسمت وهزيت راسي
التفت على مشواق وفقار شفت فقار مدنك راسه
باوعت لمشواق وحجيت
_ملاك:: الحمدلله على السلامة
_مشواق:: الله يسلمج
ابتعدت عنهم ومشيت وكفت على صفحة
رجعو يكملون كلامهم عادي
صعدت اني للغرفة شمرت ربطتي ونمت ضاربة الكل كتم
كعدت يوم ثاني البنات كلهن نايمات بعدهن بس اني كاعدة حاولت ارجع انام ماكدرت اتكلب بمكاني
كمت اخذت ربطتي ونزلت
هل جم يوم صالي اكعد من وكت قبل الكل
ماحب هيج نوم احب اكعد ويا الكل
نزلت للصالة شفت الاضوية مطفية محد كاعد
دخلت للمطبخ فارغ بس باب الحديقة مفتوح توقعت عمتي جهاد لو السيد عبد الرؤف كاعد لان هذا وقت كعدتهم
مشيت غسلت وجهي لفيت ربطتي عدل وطلعت للحديقة طليت اباوع محد موجود
دخلت اكثر باوعت للجهه الثانية شفت فقار واكف بنص الحديقة القرأن بيدة كاعد على الحشيش يقره
رفع راسه باوعلي دنك راسة اتصدق وباوعلي
_فقار:: اهلاً علوية
_ملاك:: ها هلا صباح الخير
_فقار:: صباح النور
_ملاك:: عبالي عمتي لو السيد عبد الرؤف هنا مادري انتِ اعتذر كمل قرأة
حجيتها والتفت ادخل
استوقفني ب كلامه
_فقار:: علوية
التفتت عليه ب استغراب
_ملاك:: هاا؟.
_فقار:: اذا تحبين تكعدين واكوم انا؟
_ملاك:: لالا ليش اكعد كمل شعليه اني
_فقار:: اي لعد تفضلي كعدي
_ملاك:: اكعد؟
_فقار:: اي تفضلي عمتي كاعدة ب المصلا هسة تجي اذا تحبين تكعدين كعدي
باوعت للكاع مفروش فوك الحشيش
هزيت راسي ب اي وكعدت بعيد عنه رجع دنك راسة يقره قرأن بصوت عالي يجود
واني اسمع اله صوتة رهيب رهيب!!!
يخلي المقابل كوا يسمع اله
وصل لاية من القرأن وكف قرأة طلع تربة من جوا خلاها ب الارض ودنك سجد عليها
رجع رفع راسه وكعد كمل قرأئة
جان هذا سؤال دوم يدور ببالي كل ماريد اسأل انسى
باوعت لفقار وحجيت
_ملاك:: شلون عرفتها سجدة واجبة؟
كمل قرأة متجاهل كلامي
استحيت وخجلت لان تجاهلني الغلط مني شلون اسأله وهوا يقره بس دوم يتردد هذا السؤال وماردت انسى
كمل قرأئة الصفحة واتصدق حط القرأن بحظنة وباوعلي
_فقار:: شنو سؤالج؟
_ملاك:: اني من اقره قرأن واشوف السجدة ماعرف هية واجب لو مستحب
_فقار:: اكو سجدة واجب واكو مستحب
" علامة السجدة ب القرأن الكريم توجد مثل الدائر مشارة فوق وتحت الاية خط طويل ودوم تنذكر بصغية /اسجدو /سجدو/ ساجدين/ الخ.. "
_فقار:: ب القران الكريم هواي سور موجودة السجدة بس شلون تعرفين السجدة واجبة؟
_ملاك:: شلون
_فقار:: حفظي هاي العبارة
( فصلتُ سجادة وعلقتها على النجمة)
_سورة: فصلت
_سورة: السجدة
_سورة: العلق
_سورة: النجم
_فقار:: هاي السور الي السجدة واجبة بيهن ولازم تسجدين بس تشوفيهن السور البقية لا مستحبة وتكدرين ماتسجدين وتكدرين تسجدين
وقت تقرين القرأن وتسجدين على هاي الاية وتتمنين امنية تتحق ب اذن الله
هزيت راسي ب اي ممتنة اله باوعتلة وحجيت بمزح
_ملاك:: يعني توك من سجدت واتمنيت راح تتحق
_فقار:: بعد بيد الله سبحان وتعالى
سكتت اباوع للحديقة الجو بي برودة ومنظر الحديقة يجنن
_فقار:: علوية
_ملاك:: ها
باوعتلة اسمع اله
جان مدنك راسة عيونة على القران
رفع راسة باوعلي وكسر عيونة
_فقار:: علوية اذا اتقدم الج توافقين؟
_ملاك:: ها
حجيتها مصدومة بكلامه
دنكت راسي وخليت ايدي على خدي مامستوعبة رجعت اباوعله بصدمة وهوا احسة مصدوم اكثر مني ومامستوعب
مسح على وجهه وحجه
_فقار:: يابة اريد افاتح السيد واهلي علمود اخطبج توافقين؟
ضليت مصدومة حلكي نبلع شلون احجي لا ماعرف نسيت
باوعتلة وحجيت عاكدة حواجبي
_ملاك:: مو عيب
رفع راسه باوعلي بصدمة يرمش بوجهي
حجة بدهشه مافاهم
_فقار': هااا ليش عيب؟
_ملاك:: ماعرف بس عيبب خجلتني
اختفت الصدمة من عيونة دنك راسة وحجه
_فقار:: لايابة مو عيب انا رجال شاريج ورايدج على سنة على ورسوله ماقبل بهيج
_ملاك:: بشنو ماتقبل؟
اتحسر ورفع راسة يباوعلي
_فقار:: ماقبل عيوني تلحكج وين ماترحين وضال اقهر بروحي شلون تحجين ويا فلان وتضحكين ويا علان وانا رجال اغار بس اسكت لان مايربطني بيج شي علوية من الاخير انا شاريج اي لو لا؟
حسيت الصدمات بتدت تنزل علية وجهي راح يطك من الخجل التفتت اباوع عمتي جهاد واكفة قريب علينة تباوعله صفح مكتفة ايديها بس الابتسامة بوجهه
حجه فقار عيونة على عمتي
_فقار:: والقرأن الكريم الي بيدي وكلام الله المنزل على حبيبة محمد وعمتي شاهدة وانا خال القرأن وعمتي شهيدين على كلامي عمري وحياتي ماباوعتلج بنضرة حرام اباوعلج مثل ماباوع لاختي عاتكة حتى لا انتِ ولا انا ندخل ب الحرام وانا هسه اكلج توافقين يابت الناس اخطبج حتى كلشي يصير رسمي وحلال ؟
ماكدرت احجي ولا كدرت استوعب
كمت من مكاني ومشيت اريد اطلع من الحديقة باوعت لعمتي ابتسمت بوجهي واني دنكت راسي
طلعت من الحديقة دخلت للمطبخ وجهي راح يطك من الخجل شجاي يصير
فقار طلبني قبل شوي؟؟؟ ييمهههه
طلعت من المطبخ اركض صعدت الدرج رجلي كوا شايلتني
فتحت باب الغرفة دخلت اطفر باوعت لشاهيناز نايمة بعمق نمت بصفها وحضنتها
رجعت تذكرت كلامه عضيت شاهيناز بيدها بقوة وهيه اطك على راسي عيونها مغمضة
ضحكت وغطيت راسي ااااا اني موافقه...!!!!!
" قس "
بدت الايام تمشي واني وخواتي ببيت جدي عند امي عرفت امي اطلكت من ابو السمج فرحت اي؟ تشمت هم اي يعني عافتنا علمودة تالي عافها
طلعت من الغرفة اضحك
ركنننضت على الجهال باوعتلم وضحكت فتحت الهم ايدي
_قس:: نطوني يلا
_حسن:: بس مووو تكولين لامي حسن وتخليها تكتلني
_قس:: نجب ولك اني اختك مانطي بيك يلا انطيني
اخذت الجراقي من ايدة (مفرقعات او العاب نارية) جان لونهن احمر صغار بالطول
ركضت ب اتجاه المطبخ اخذت الجداحة شغلت الجراقي وشمرته ب المطبخ وركضت اني والجهال
خليت صريخهن يسمعه الاول والتالي
طلعن من المطبخ يركضن كل وحدة شايلة جفجير وصحن بيها
_سلمى:: شنووو طك ولجن
_سعاد:: خاف القنينه
_سلمى:: خايبة نجبي طكت القنينة وطلعتي تركضين
دارن يباوعلي واكفة وراهن اضحك
بس باوعن للجهال كلهم كامو يصرخون ويأشرون علية ويصيحون هاي قس هية الشمرت الجراقي
باوعلي بغيض يردن يعاركن بس مايكدرن
مشن لغرفة بيبي يشكلها مني
غميتهن اني الجن ولجن اني تشدن حرب علية؟
حسيت بشخص كمشني من الخلف
التفتت اباوعله صحت بي وجريت نفسي
_قس:: جم مرة كتلك لاتلزمني حرامممممممم
_الياس:: يمتى تبطلين حركاتج بلقيس
_قس:: معليك خلي امك تضب روحها هيه وخالتك
هز راسة ب اسف يباوعلي
باوعتله صفح ومشيت
_قس:: اطلع الهن كلب ثاني وداعتك
_الياس:: بعدددد شتسوينننن غير هذا كله
_قس:: رجعونا لبيت عمي اذا انزعجتو
هز ايده ومشه طالع من الصالة اعرفك هذا الياس ابن خالي الوسطاني عنده اخوه اسمه ياسين
كاعدين بنفس البيت الي احنا كاعدين بي
امه سعاد اخ ياسعاد اول يوم اجينة شدت حرب ويانا بس تشوفنا نتنفس شالت صدرها وركضت لخالي تعال شوف بنات فردوس
تريد الزلة علينه وعلى امي هسه على امي عادي بس احنا شكو؟؟
مر اسبوعين سعاد مشوفتنا الويل واحنا مشوفيها الويل امي ماتحجي تتونس علينة هيه وخاجية عكس خوالي بدة الانزعاج يبين عليهم وهذا الي اريدة!!!
اريد ارجع للبيت اليوم قبل باجر
بيوم كعدنا من النوم على صياح الولد وخوالي طلعنة كلنا من الغرف مافاهمين شصاير؟
تبين اكو شخص طافر على البيت حرامي
خالي شايفه وهوا راجع من الحمام حاس بصوت تطفر على الدرج توا دخل للغرفة يريد يرجع ينام
من شاك ب السالفه فاتح باب الغرفة وشايف منو؟ شايف الحرامي اي نعم صايرة بينهم نضرات وكذا ماعرف شنو الموضوع
وكف الكل كدام الكامرات يرجعون بيهن يردون يشوفون الحدث بكبرة
اول مابدة يقدم ب الكامرة خليت ايدي على وجهي تخزيتي وشتهرتي ياقس
باوعت للكامرة كلها صافنه تباوع للشاشة
جنت واكفة كدام الكامرة مادة ايدي كدام الكامرة واسب بيهم واحد واحد
باوعت الاظافري متجاهلة نضرات الكل الي
باوعلي شهاب ابن خالي وهز ايدة
رجع قدم ب الكامرة وهم رجعت ضميت وجهي
القطة هاي جنت لابسة عباية خاجية واطفر كدام الكامرة واهز بروحي
باوعتلي امي صفح تهز ب ايديها
لو كلش يدققون بعد اطلع اني الحرامي الباكهم
ب اليوم الثاني جنت صاعدة لغرفتي انام سمعت صوت شهكات وبجي مصحوب ب همسات وتوسل
باوعت لغرفة شهاب ابن خالي مشيت ب اتجاه الغرفة هذا الصوت اعرفه زين.
وكفت كدام باب الغرفه اباوع لداخل الغرفة جانت اختي قبس واكفة وشهاب كدامها واكف جانت تبجي وتتوسل اله والشهكات تطلع منها
باوعتلهم بصدمة هذول شنو جاي يسوون!!
انصدمت من شهاب جر قبس ب اتجاهه وهيه مستسلمة اله!!!!
" شاهيناز "
بمرور هاي الايام بدت حالة عماد تتحسن وطلع من مرحلة الخطر وهذا احسن شي سمعتة بيومها ضليت ابجي من الفرح عماد عزيز عندي من عرفت راح يطلعو من المستشفى حسيت ب الراحة
بهاي الايام بدت جميلة تعاديني من كل النواحي صارت كل همها تجي تتعارك وياي وتضوجني ب الكلام
دوم جنت اسمع تهديد جادح الها ب الطلاك بس ماجنت اهتم لان زوجين وبينهم مو مهم عندي نارهم تاكل حطبهم
بهاي الفترة جنت اشوف اهتمام جادح الي بشكل غريب! جان يهتم من بعيد لبعيد
تصرفاتة هاي جانت تولد بداخلي احساس غريب؟
جنت من اسمع صوتة افز وجودة صار مهم ب النسبة الي ماجنت اعرف الي راح يجيني منه شنو!
بيوم جنت نازلة الدرج التلفون بيدي احجي ويا قس
سمعت صوت جميلة
رفعت راسي شفتها كاعدة على القنفة تباوعلي وتحجي
_شاهيناز:: شكو جميلة؟
_جميلة:: اكلج ان شاءالله مرتاحة؟
باوعتلها ب استغراب مافاهمة كلامها
هزيت راسي ب اي وحجيت
_شاهيناز:: كلش مرتاحة انتِ شلونج مرتاحة لا؟
ابتسمت نص خد وباوعتلي
_جميلة:: اني ارتاح بس مو هسه
استغربت كلامها ونضراتها الي جانت واكفة تباوعلي هيه وسهام
حسيت بنضراتها تهديد مبطن الي بس ماعرفت استوعبة من وكت
" قدس "
هاي الايام كلها جانت عبارة عن اذية الي
اول شي رجعة امي الي اخذت خواتي بيوم وليلة ورجعتهن لحظنها جنت من اسولف وياها ابجي
ماعرف احقد عليها لو اشتاق الها واشتاق لسوالفها
بدت الحرب الصامتة بيني وبين غضنفر
اتحسرت استرجع الماضي قبل اسبوع من هذا اليوم
جنت كاعدة ب الغرفة احجي ويا خواتي
انفتح باب الغرفة دخل غضنفر بس جان مو على بعضة
الانزعاج والعصبية بوجهه
باوعلي وادر مني مشة ب اتجاه كنتور الملابس فتح باب الكنتور يطلع ملابسة
سديت التلفون ومشيت ب اتجاهه
وكفت خلفه وحجيت ب استغراب
_قدس:: شبيك غضنفر ليش ضايج. وخر خليني اطلعلك ملابسك
اجيت اخذ منه الملابس سحبهن مني بقوه وابتعد
باوعتلة بصدمة مافاهمة الي سواه
_قدس:: شكووو شنوو هاي؟
مارد وضل ساكت
ضجت وانزعجت من برودة ماعرف شبي وشجاه البارحه مابينة شي هسه شصار؟
باوعتله وحجيت بهدوء
_قدس:: ضايج على عماد مو. السيد يكول حالتة احسن من قبل يعني اكو ام...
رفع راسه يباوعلي بخزرة
_قدس:: هاااي شبيك؟؟
رجع سكت وماحجه شي
اتحسرت عيوني دمعت مابية مابية حتى اركز بزعل غضنفر الي جاي يصير بية هسه مايخليني اركز بشي
باوعت للمراية وغمضت عيوني ماريد اتذكر الي صارلي البارحه ماريدد
بدت الكوابيس ترجعلي بديت ارجع اشوف اشخاص يلحكوني خيال اسود يركض وراي دوم
اتحسرت بخوف واني متذكرة اخر موقفين مريت بيهن
جنت نايمة ب الغرفة تعبانة بعد يوم طويل من الشغل والركض سمعت باب الغرفة ينفتح
وصوت هماس ب اسمي
فتحت عيوني بتعب باوعت ب اتجاه الباب جان خيال زلمه واكف والصوت صوت غضنفر
حجيت بتعب كوا فاتحة عيوني
_قدس:: غضنفر يمتى جيت ليش ماكتلي راح تجي
حجيتها وغمضت عيوني
رجعت اسمع صوت اسمي بس بجمع يعني ماجان شخص واحد يحجي اسمي لا مجموعة بدت تكرر جملة
_:: اجيت اخذج اخذج لمكان بعيد
غمضت عيوني فاصلة عن الواقع النوم مسيطر عليه
انسد باب الغرفة
بديت اسمع صوت خطوات يتقرب مني
ونفس الجملة تكرر
_:: اجيت اخذج اخذج وياي
_قدس:: غضنفر...
حسيت ب ايد تمسح على جسمي من وجهي نزولن لبطني جنت مامستوعبة شي بين الواقع وبين الحلم جنت نايمة مابيه امنعه حتى اريد بس انام
حسيت بي لزمني من رجلي ومشه ايده فوك لجسمي
غمضت عيوني ونمت ماصحيت بعد غير اليوم الثاني
ماجنت مركزة ولا مهتمه ب الي صار البارحه توقعت هذا غضنفر بس الصدمة جانت من دخل غضنفر للغرفة الصبح
باوعلي وابتسم اجه اخذني بحضنة باسني من راسي وشمر روحة على الجرباية تعبان
باوعتلة ب استغراب
_قدس:: لعد ليش رجعت انت؟
_غضنفر:: وين رجعت
_قدس:: مو البارحه انت اجيت بليل من المستشفى ليش من كعدت لكيتك ماكو كالو ب المستشفى
باوعلي غضنفر ب استغراب
_غضنفر:: مارجعت المستشفى لان ماجيت للبيت هاي رجعتي من المستشفى مارجعت بليل
هنا جانت صدمة الي لعد البارحه منو جان يمي؟ حلفت غضنفر اكثر من مرة توقعتة يشاقه وياي بس لا فعلا جان مصر هوا مارجع للبيت
ماكتفينه لهنا ب اليوم البعدة جنت نايمة وهم ماحاسة بنفسي من انام تعبانة ماضل اركز واستوعب الواقع
حسيت بغضنفر يحضني من بطني ابتسمت لحضنته وبديت اغير نومتي
التفتت على غضنفر صار وجهي بوجهه
فتحت عيوني بتعب وهنا جانت الصدمة!! الي شفتة مستحيل انساه عمري كلة جان اكو وجهه بوجهي وجه رجال العيون بيضض ووجهه اسود مطعون فاتح حلكة سنونه سود
يباوعلي وجه بوجه
كمزت من مكاني اصرخ مرعوبة ايدي على وجهي ماريد اشوفه حسيت بشخص ينرفع من الجرباية
مافتحت عيوني الى على دخلة عمتي جهاد للغرفة باوعتلي مصدومة بصريخي اول ماشفتها ركضت عليها ابجي بخوف ماجان اكو شخص وياي ب الغرفة لعد وين راح!!!
بدت المواقف تكرر وياي بدت علاقتي تبرد بغضنفر وابتعد عنه مو بيدي مجبورة صرت اشوفه بهيئه ثانية بهيئه مرعبة!!!
ب احد الايام جنا اني وغضنفر نايمين ب الغرفة سمعنا صوت صريخ جميلة
طلعنة من الغرفة نركض اباوع كلها طلعت تركض فقار واخوانة البنات كلها نزلت الدرج تركض على اثر الصريخ
شفنا جميلة ب الصالة تصرخ وتضرب ب شاهيناز الي جانت طايحة ب الارض بدون رد فعل تستقبل الضربات من جميلة
ركضن البنات على جميلة والعلويات يبعدنها عن شاهيناز
دفعت العلوية لباب جميلة وصرخت بيها تريد تضربها
_لباب:: عوفيهاااا كسر ب ايدج
رفعت جميلة ايديها تصرخ وتضرب على وجهه التفتت على السيد وصرخت بي
_جميلة:: سيدددد عبد الرؤف الزممم حفيدتك ام الزلم هايييي حفيدتك ورجلي عدهممممم علاقةة ياناسس تسمعوني علوية السادة والسيد يتواعدون ب ليلللل........
" حدث ب البارت القادم "
_جادح:: اناااا اناااا اخذ العلوية شاهيناز!!!
_عبد الرؤف:: ماكووو ماتاخذهاااا شاهيناز لفقار ماكو الك بنيه عدنااا.....!!!
"
