رواية لست خائنه الفصل الثاني 2 بقلم انين الليل

رضوى 

 الثلاثاء بالليل جنا كاعدين نتعشى خالي صبار كال

باجر الصبح أن شالله نروح للزياره منو يروح ويانه 

الكل سكت كلي انا وعطاء ردينا

- - لا خالو عدنا امتحان ما نكدر نروح إلا ع أسبوع الجاي 

وانت صاحب 

سهير //صدك صاحب رووح ويا ابو فواز 

صاحب //جنت اتمنى بس عدي حمل بالميناء هسه راح اطلع على مود ألزم سره ليش ما تاخذ طاهر ومرته 

الكل دار وجهه خالي صاحب سأل // شنو ابو فواز ما سمعتني 

خالي // لا سمعتك بس هاي صبيحه الدرب كله لو تسولف لو تاكل لو تتناكر شنو نسيت 

فواز // ولازم تاخذ الها اثنيين تلاثه من جربزتها 

خالي باوع الفواز وسلام //وانتم فواز وسلام ما ترحون 

فواز //لا بويه شغل الفوك راسي ما اكدر اعوفه بكيفه سلام اذا يحب يروح 

سلام //بابا الخميس زواج عصام صديقي ولازم أكون ويا زحمه 

صبار //خايبين تولوا انتم نمونه نروح انا ومريتي ها ام الفوز شتكولين 

عمه وسيله //اي نروح شعدنا خليهم بكيفهم قابل ايدلونه 

فواز // اي عيني روح انت وامي رجعو ايام الشباب 

صبار //طاح حظك فواز جا استحييت البنات كاعدات 

صاحب //شنو صبار قابل فواز مچذب 

صبار/:خو انت اتعس منه وهو طالع عليك

وصارو يضحكون جمعنه المواعين واجت سهيرشالت الجاي وراحت تكعد يمهم وخالي ابو فواز

 يضوج من يشوف سهير تجي يمهم وهي ما شاء الله لبسها مطلع كل مفاتن جسمها وخاله الشال على راسها 

ونص شعرها طالع لذلك يدنك والولد هم يدنكون اسمع دائما خالي يكل العمتي // وسيله احچي ويه مرت صاحب 

خليها تعدل من لبسها 

وسيله // والله ابو فواز دووم الفت نظرها وتكلي ايي وصار 

صبار يتحسر // كله من صاحب راخيلها الحبل 

- - مي خالف تكبر وتفتهم بعدهي جاهله والخاطر صاحب لا تحجي 

صبار /:وسيله شغلة حلال وحرام واحنا عدنا ولد شباب وبنات 

عمه /:شتكول صحيح بس شنسوي بلكي يلم نفسه ويشتريله بيت 

صبار يهز بيده وينفخ /:من كل وعقلج صاحب يلم نفسه من ياصرف من يابذخ بعدين انا اخلي صاحب

 يطلع بيها شمالني اله تخبلت

بليلتها خالي صاحب راح للميناء وكل السهير 

اذا اتاخر لا ترحين الاهلج منو يبقى يم البنات 

هي كالت //اذا تتاخر اروح عصريه اشوفهم وارجع

بعدين اخذت الجهال الي جان فواز يلعب وياهم وصعدت 

وخالي صبار هو وعمه وسيله راحو ينامون على مود يطلعون غبشه وانا وعطاءءبقينا بالمطبخ انوب

 عطاء راحت الصاله وانا بقيت اجلف بالسنك سمعت واحد يشاورني انا نزيت 

::تره مو على مود عصام وزواجه مارحت 

انا درت لكيت سلام وراي كتله وانا أبتسم ومدنكه 

=اذا مو على مود زواج عصام ليش ما تروح وياهم المن باقي 

:: باقي على مودك يا حلو 

عوجت حلگي =من يمته 

::ها رضوى شبيج سلامات 

انا ضربت الجلافه بالسنك وباوعتله 

=شبيه مو كوثر كل ساع واجت وصديقاتي يكللي ابن عمج حات وانت تسمع وفرحان 

سلام ::يعني شتردين اكول مو حلو انا مثلا 

=اي اقهر بيه سلام والا اكلك عليمن احجي انا كلي بت عمتك وكوثر بت عمك يعني هي أولى 

سلام ::ولج أولى بيمن انتي غبيه 

/اصير اكبر غبيه لو فكرت بيك تشوف عطاء احسن مني صحيح فواز ما اعرف شبي هالايام متنك عليها

وما منطيها وجه بس تبقى احسن مني اقلها عدها امل تاخذه مو هو ابن عمها بس انا

واهنا اجه صوت من بره المطبخ جان صوت عمه وسيله 

عمه/:وانتي شنو رضوى خاتون تره حتى الطفل الجاهل يدري بسلام يحبج و يريدج ويوميه انا احجي 

حتى الكل يسمع اكول سلام ياخذ رضوى وفواز ياخذ عطاء بعد شكو تشلعين بكلب الولد 

انا ارتبكت = ها لا والله عمه حتى انا 

عمه /:انتي شني عياره تشوفينه مو بحال الدنيا ويغار عليج من روحه وانتي تعاقبين بي على كوثر 

( هزت ايدها عمتي )عوزي سلام ياخذ بت صبيحه على مود بيومها تفرقلي الولد الي طلعت بيهم من الدنيا

اجه يمي سلام ::ها حبي هسه عرفتي شكد انا احبج 

عمه وسيله لملمت حلكها //أسليم مو انطيتك وجه احترم نفسك ودير بالك ع البنات 

::صار يمه بس مو هم يالله 

عمه //ادري يمه شسوي غير متانيه فواز ما ادري شبي صاير كل ما آكله على عطاء ياجلها ويگلي بعد وكت 

::بعد ما تعرفين فواز 

عمه //انت احجي ويه أخوك اذا ما يريد البنيه خلي يعوفها تمشي بحال سبيلها 

سلام ::يمه ما تعرفين فواز مخبل ما سمعتي من اجو خوال عطاء يخطبونها الابنهم 

شسوه وحتى منعها ما تروح البيت خالها إلا انتي وياها 

عمه //ان شالله بس نجي من الزياره احجي ويا وبالعطله عقد وزواج ما ااجل بعد 

اريد اشوفهن جناين مو بس بنات 

انا خليت ورحت وهي صاحت وراي وهي تفرفر بيدها //بممووي مستحيه ولج عياره غير ميته بس كون تاخذينه

شاله حاله بعيارتج ودلاعتج وانت (باوعت السلام )شويه اثكل

وطلعت شفت فواز لازم الموبايل وعطاء بعيونها دموع انا اشرت الها وصعدنا |

=شبيج عطاء 

عطاء بحركه /:ما بيه شي من هذا الحقير 

=شبي وياج 

عطاء/:تصوري أكله فواز انت ليشءصاير هيج وياي هو يكلي يصير خير يصير خير 

=يجوز تعبان مو تشوفينه يأخذه الليل ويجيبه الليل 

عطاء/:شايفته بس صار فتره فواز متبدل عليه 

=مي خالف عطاء اتحملي عمه كالت بس يجون من الزياره ان شالله إتمم الخطبه وبالعطله عقد وزواج 

عطاء //تدرين رضوى انا ما اتحمل افارك فواز لو أصير الغيره امووت غير 

=بت الاوادم شكد تحبينه 

عطاء //اموت علي مو بس احبه وعلى ساس انتي ما تحبين سلام 

انا بضحكه =لا انا مفضوحه الكل كاشفني بس ما يدرون سلام مو بس حبيبي سلام هو النفس الي اتنفسه 

عطاء/:يا عيني بعد تلوميني

وصلنه الغرفتي ودخلناها 

=وج ما الومج اكلج اعذري جاي يتعب وشايل أكثر الشغل 

عطاء/:وسلام هم جاي يتعب بس اشوفه شلون متخبل عليج 

=مو اكلج احنا مفضوحين حتى البيبان والشبابيج والعصافير والهوى يدرون بينا واحد يحب الثاني 

عطاء/:وانا الي يشوفه بيوم اجه ابن خالي يخطبني وراح هد على بيت جدي ما يشوفه هسه 

وشلون ما اله غرض بيه 

انا/:بالله انتي شلون بيج غير تعذرينه الله اعلم شبي اكلج يالله كومي روحي الغرفتج باجر عدنا دوام 

ولازم نگعد من وكت

الصبح كعدنا لكيت خالي صبار وعمه وسيله رايحين طبعا خالي اجر تكسي من البيت للزياره 

ومن يرجعون هم ياجرون 

وانا وعطاءءسوينه ريوك كعد سلام تريك بس فواز كال تعبان وسلام طلع للشغل مستعجل لان اجا تلفون 

عدهم طلبيه ولازم يجهزوها وانا وعطاء عمه ام فواز الصبح قبل لا تروح شاويه دجاج ومسلفتنه اجينا بس 

حمينا بالاوفن وطلعنا خبز واتغدينا العشا سوينا خفيف 

ثاني يوم الخميس كعدت من الصبح سويت الريوك ورحت كعدت سلام وهو راح كعد فواز صبيت الريوك واجت 

عطاء كعدت يم فواز كلتله

عطاء /:شلونك اليوم 

فواز بدون ما يباوعلها/:زين الحمد لله 

عطاء//مو أمس ما شفتك 

فواز/:بعد شسوي حتى وانا مريض لازم اباشر الشغل --فواز باوع السلام وكله --

سلام روح اسبقني للمحلات عندي شكم شغله ضروريه اخلصها وبطريقي أمر 

ع المزرعه انت دير بالك واتصرف من يمك مو كل ساع متصل بيه 

سلام //صار--واشرلي سلام يعني اطلعي --

طلعت واجه وراي كلي ::راح اشتاقلج 

=وانا هم بعد انت العصر تروح العرس صاحبك 

سلام ::اروح أبارك وارجع خو ما ابات 

=شنو قصدك 

سلام ::والله شريف بس كلت اليوم نسهر انا وياج للصبح 

=بالمطبخ مو مكان ثاني 

اتدنى علي //ليش ولج مو امي كالت بس يجون ننخطب 

=اي عود خلي ننخطب وبعدين نسهر بالصاله مو بالمطبخ 

سلام ::امداج عود حبيت نسوي جو رومانسي 

باوعتله بدلال =حبوبي من تصير شغله رسميه نصير نسهر براحتنا -)بعدين باوعت وكانما اتذكرت شي وسالته) -

صدك سلام شبي فواز هالايام ويه عطاء 

سلام ::ما أدري ما تشوفين اشرتلج بلكي يكعدون شويه يحجون كلام حب غزل --(وغمزلي وضحك--)

=عابت صاير وكيح 

سلام ::خلي تصير الخطبه وانا اراويج الوكاحه على اصولها

بالمطبخ فواز وعطاء فواز ينفخ وعطاء بعيونها دموع 

عطاء /انت ما تريدني مو 

فواز يجر حسره ويسحب بجكارته //منو هذا ألما يريدج 

عطاء //انت فواز 

فواز باوعلها //بالله يافهيمه شلون استنتجتي هذا الشئ الخطيير والرهيب 

عطاء تحاول ما ينزلن دموعها //مبين مو انت فواز ذاك الكاتل روحه علي متغير هواي 

وكفت تريد تطلع للحديقه تنتظر الخط صار كدامها باوعلها وحظنها كلها //يا روح فواز انا مو ما اريدج 

انا اعشقج بس هالايام تعبان كلش ومتخربطه اموري ارجوج اتحمليني 

عطاء //اروح لك فدوه 

فواز وهو يضحك //بس ارجعي بالخط مو بتكسي لان اخاف عليج 

عطاء //عابت بس يحشش 

فواز باوع العطاء //عطاء انتي روحي وقطعه من گلبي ولو شنو ما يصير اعذريني واوكفي وياي 

عطاء //شبيك فواز خوفتني شصاير 

فواز //حبيبتي المره الزينه هي الي توكف وتتحمل زوجها وتتحمل مساوئه واخطاءه 

عطاء //تدري بيه فواز افديك بروحي 

فواز /:فدوه المرتي وام بيتي وتاج راسي --(اتقرب يريد يبوسها بس هي فلتت وكالت 

اجه الخط اشوفك بعدين 

فواز وهو يسوي باصابعه كانما يسب //نعيله على ذاك ال 

عطاء /:ها راح تسب ابوي والله ازعل 

فواز /:علوا تزعلين على مود ارضيج بطريقتي 

عطاء صار وجهها احمر من الخجل

واجه الخط ورحنا للكليه والظهر رجعنا لكينا سلام طالع رايح العرس صاحبه وفواز بعده ما جاي صعدنه

 نبدل لان عمه سهير اليوم طابخه ونزلنه اتغدينه وغسلنه المواعين وانوب صعدنه نرتاح ع الدرج

سالت عطاء =اكلج عطاء انتي شبعتي 

عطاء //وج اشبعت حشى نعمة الله لعبت نفسي هو هذا هم طبخ 

=لا لا عطاء لا تحجين على طبخ سهير هو صدك مزيج من حموضه وبهار وزيت وماي بس

ينوكل الجوع يخليج تصمين خشمج وتغمضين عيونج وتاكلينه بدون ما تلوجينه يعني بلع

همزين اكو ليمون انا ويه كل لكمه اخلي شيف ليمون بس ها الجذب حرام يظل اكو

واحد معجب بطبخها ولو تنطي الجدر كله يكول هل من مزيد الي هو ابووج المحترم

عطاء //هو بس بطبخها معجب كولي متعجب بيها

وصلنه الغرفنه لكينه سهير اباب غرفتها إجت علينه 

كملتن المطبخ 

=اي عمه كملنا 

زين أدخلن الغرفجن وياريت تقفلنهن عليجن لان اريد انيم الجهال تره إلا كعدو كل وحده انطيها

جاهل بس قبلها اشبعهم كتل واخليهم يبجون وانتن تحتارن بيهن  

انا//لاعمه صار ولا يهمج احنا اصلا تعبانات ونريد انام

دخلنه الغرفنه ونمنا كعدنا قريب المغرب لكينا كوثر وعمه صبيحه كاعدات يشربن 

جاي ويه سهير سلمنا 

عمه صبيحه //جا جريتنها للعشا قد نوب 

انا =عمه كل شي كملنا غسلنا المواعين ونظفنا المطبخ وصعدنا نمنا وهسه راح انبلش نسوي عشا 

صبيحه //ديالله كومن سون عشا خلي نتعشى وياكم 

--اهنا عطاء باوعتلي --

عطاء //رضوى من يمج طلعي 3 بتيتات وطماطيتين 😈😈😈😈

سهير باوعت //المن ذن 

عطاء //النا عمه ام فواز هي كالتلي توها خابرتني وكالت ما طول فواز اجه متغدي وعمجن مرته ضمتله 

من طبخها وسلام يتعشى بعرس صاحبه طلعن تلث بتيتات وطماطيتين وكللنهن كافي عليجن  

صبيحه تهز بايدها //والله خوش وسيله مناك وتحكم 

سهير //اشايفه وشايفه

انا بخبث =عمه سهير 

سهير بنتر /:وعمه كولي ام أنمار 

=صار ام أنمار ما طول عمه صبيحه وكوثر اهنا كومي اطبخيلنه اكله من اديج الحلوة 

سهير //انجبي تقلدين 

=لا عمه --وباوعت على صبيحه= وداعتج عمه ام صلاح --ذاك اليوم سوت ألنه مركه ناكل ونكول صبيلنه 

خو سلام وفواز حتى راحو للجدر فرغو

صبيحه /تكومي سهير ما طول هيج سويلنه جا احنا وحد 

كوثر //اي عمه عفيه كومي سويلنه مركه 

سهير/:شنو المركه بالليل باجر اسويها 

انا =لا عمه هسه سويلنه عفيه 

سهير //ولو ما بيه حيل بس تستاهلين ام صلاح 

صبيحه //اكلج هي مركتيش

انا وعطاء //مركة شجر 😆😆😆😆😆

المهم هنه شويه وانسحبن كمنا سوينا عشا واتعشينا واجه سلام جايب حب وعصير وبقلاوة 

راحت عطاء كعدت فواز وكعدنا بالصاله شويه بعدنا تونا جبنا المواعين وهجم علينه الجيش 

المغولي بقيادة هولاكو اقصد عمي طاهر ومساعديه صبيحه وكوثر وأولادهم والبيت صار

عباره عن طلاب يتعاركون ع الحانوت الشاطر يحصله بقلاوايه لو بطل عصير وكوثر كاعده

تسبل عيونها السلام رحت وگفت اباب المطبخ وانا عباره عن بركان سلام باوعلي كح فزت كوثر من مكانها 

تريد تأخذ ماي من البراد انا باوعتله خلييت أصابعي برگبتي يعني اخنكك اذا تشرب من ايدها هو شافني 

جابتله كوثر هو كلها

لا شكرا ما أشرب ماي إلا بجكايه 

دارت لكتني شايله جكايه زغيره وابتسم اخذها مني وكلي ::شكرا 

انا بدلال وانا ارمش بسرعه =بالعافيه

كوثر صارت تباوعلي بغضب وعمه صبيحه كاعده بس تبسمر وكل شويه تخزنا انا وعطاء 

عاد خلينه وصعدنا لان كنالهم تعبانات

صبيحه //منين تعبانات تحشن تحصدن اشو كاعدات وساكتات 

انا جاوبتها =لا عمه متوهمه نداوم ونشتغل خو مو مثل غيرنا كاظياتها تسايير 

صبيحه //عود عليمن 

عطاء //عمه اكو بنات هنه وامهاتهن عبيهن على راسهن ويخورن كولي عفيه رجلين ما يوجعنهن 

فواز/:وج مو رجلين تاير اخر موديل 

انا/:لا فواز منين اخر موديل اشو كله تراب من كثر الكرف 

عطاء //تدرون متعجبه ع الرياجيل الي ما يكولولهن وين رايحات ومنين جايات 

فواز بضحك // منين رياجيل دگولي مسوياتهم طلياان ميييع

صرنا نضحك واحنا نتخيل المنظر 

صبيحه/:دا كافي كافي اصعدن مو تكولن تعبانات 

صعدنا وهمه بقو ما راحو إلا الساعه 12 او أكثر وانا وعطاء كاعدات لأزمات النقالات وندز رسائل ع الواتساب

انا =اي سلام افندي أخذ راحتك ادري بيك مرتاح سولف سولف ويه عمك وبت عمك هي وأمها يمسحن عليك 

لو بيدي أقترف جريمه اي أضحك عبالك ما ادري 

سلام ::احبج يا مخبله لو بيج خير بدل ما تقترفين جريمه تعاي اطرديهم 

=شوف سلام بس خلي يجون أمك وأبوك إلا عكب باجر ألبس حلقه وبس تجي كويثر اكعد بحضنك 

سلام ::رضوى هسه أخابر صاحبي صايغ يجيب حلقتين ويجي ما طول بيها كعده بالحضن 

=عابت ما تستحي 

سلام ::انوب انا ما استحي مو انتي تكولين اكعد بحضنك 

=هسه اشلون 

سلام ::لا تنامين خبالو يرحون وارمش عليج نزلي ونكعد للصبح تتدللين الخبله احببببج

انا =اي اكل بعقلي حلاوة 

سلام ::شوف هاي اكول خبله تكلي اكل بعقلي وج انتي عندج عقل انا اريد اكل الحلاوه من غير مكان 

انا=اي ما تستحي شكلك

بالغرفه الثانيه جانت عطاء تراسل بفواز 

عطاء //ها فواز ما راحو 

- - يعني اذا راحو اكعد اراسلج اكيد اروح انخمد

عطاء // فواز شبيك يعني أكفر احجي وياك 

فواز//لا مو تكفرين انا ضايج من صبيحه ومزعطتها لو هاي كوثر تسبل عيونها السلام 

عطاء //وانت شعليك شنو تريدها تسبلك ما عليك بسلام 

فواز/:وج انا ما عليه بسلام عليه برضوى ما أريدها تنقهر ومنين من وحده مثل كوثر 

عطاء //هنيالها رضوى شكد عدها بخت وياك 

- - انجبي عطاء تدرين بيها أكثر من اختي لان ما عدها اخ ولا عم افتهمتي اكلج 

هذا الحجر الموجود فوك الركبه خلي شويه يفكر لو ماكو اجيب جاكوج وأظل ادك ادك 

على ما اطحنه الج 

عطاء //نعم الله عليك خوش غزل 

فواز/:مو انتي فهيمة تراسليني على مود تنرفزييني 

عطاء/:بعد ولا إراسلك ولا احاجيك انت ما ادري شبيك عليه حسره احچي وياك 

فواز/:كل شي ما بيه مو كل ساع تكليلي شبيك متبدل متغير لا تملليني 

عطاء/:لان انا غبيه غبيه مو حجر فوك ركبتي خلص اطحنه وارتاح 

فواز/:علوا اطحنه علمود تصيرين مخبله وتطلعين وما تعرفين احد واهلي يدورون

عليج عاد انا اشبع كل ساع شايلج ومدخلج للغرفه واحضن وابوس 

عطاء/:ايا ما تستحي 

فواز/:اي بمالت ما استحي ما استحي غير انتي مريتي 

عطاء/:صدك فواز 

فواز/:اي صدك عطوه ياروحي احبج واموت عليج بس كبري عقلج خلي مقاس 42

طبعا يكتبون ويضحكون ويشاركون بحديث بيت عمهم 

فواز //عطاء لا تزعلين والله تعبان هسه يطلعون ونزلي يا روحي انتي وعشقي وانفاسي 

عطاء/:شنزل راح الف راسي وانام عقلي خليته مقاس حذاء خلف الله عليك 

فواز/:اي عقلج مو كلبج كلبج بس الي 

عطاء/:فواز انا كلي الك 

فواز /:ادري وهسه تنزلين 

عطاء /:قفلت فواز ما اگدر افك عيوني وذوله كاعدين 

فواز /:نامي حبيبتي اخذي راحتج

قريب الساعه بالوحده راسل سلام رضوى ونزلت للصاله شافت الهوسه الي مخلينها بيت خالها طاهر

كعدت يم سلام بالصاله وصارو يباوعون ع التلفزيون وهي تهز برجلها وهو يباوع الها حاجاها

سلام ::حبيبتي كافي لا تهزين برجلج تره حولتيني 

شلت المسند مال القنفه وشمرته عليه =جا ست الحسن كوكا ما نظفت الصاله قبل لا تطلع 

سلام ::حبيبتي من تشوفينها كليلها انا ما احجي وياها 

=اي تخاف عل مشاعرها 

سلام ::لا والله اخاف من مرتي مخبله وتغار عليه من الهوى 

=اي الي يسمعك يكول صدك 

سلام ::اكلج رضوى نازله تتعاركين 

=ها سلام كلي اصعدي 

وخليت وصعدت هو لزم أيدي وكلي 

سلام ::مخبله احبج شبيج 

=مخبله اي انا مخبله واتخبل من اشوف كوثر تباوعلك وتحجي وياك 

سلام ::وج ياكوثر يابليسج انتي وبس خليها تباوعلي وج هاي --أشر على عينه --ما تشوف 

بس انتي وهذا --أشر على كلبه--ما يحب إلا هاي الخبله الي اسمها رضوى 

وسحبني صار حاضني انا وخرت عنه كتله وانا ارجف 

=سلام عوفني 

سلام ::ولج شمسوي غير خطيبتي وبعد شهرين تصيرين مرتي 

=اي عود أصير او ،،

سلام ::او شنو كولي يممه امووت ع اليستحي

وكعدنا بالصاله سولفنا شويه وانوب لميت انا ويا بقايا اثار الغزو صعدت وانا رحت الغرفتي لان بصراحه 

ضايجين من جية بيت خالي طاهر ثقلاء همه وبناتهم او ولدهم بس نستحي خو ما نطردهم ظلينه نتراسل 

ع الواتساب ما حسينه بالوكت عطشت رحت الثلاجه الي بالصاله الفوك مخلص الماي لازم انزل اشرب 

من البراد نزلت الدرج بعد ما واصله

البايه الاخيره طفت الكهرباء هندس كل شي ما اشوف بس انا لازمه المحجر خليت رجلي ع آخر بايه الي 

صار انو خطف من يمي خيال ضرب بيه انا صحت وجمدت بمكاني بس حسيت بركضه ع البايات واحد صعد

 فوك وعطر ملأ المكان من صحت طلع سلام من غرفته وبيده النقال يضوي لكاني واكفه جامده انوب إجت 

الكهرباء انا باقيه مصكوكه

سلام يهزني من جتفي ::شبيج رضوى اسم الله شبيج 

انا بخوف =س سلا م ش شب شبح 

سلام ::لا يتراوالج كل شي ماكو 

=أن انا حسيت بي صعد يركض للسطح بعد اخاف ما اصعد

اهنا اجه فواز من بره جان بالحديقه شافني 

فواز/:سلام شبيها رضوى 

سلام ::تكول شافت شبح لا ومن مسها خاف وركض صعد البايات فوك 

فواز //هههه شنو يعني خاف منج 

انا بخوف شويه هديت =اي انتم ليش ما تصدكون أصلا حتى العطر الي خاله شميته

فواز وسلام صارو يضحكون سلام ::والله جني معدل ونظيف يحط عطر ما عرفتينه اسمه علمود

نشتري منه 

=اي اضحكو أصلا هو عطر نسائي 

فواز //شوف هاي ام شبح ما ادري جني تلكينها لو سهير لو عطاء نزلن يشربن ماي 

سلام ::انتي ليش نزلتي 

=اشرب ماي لان الثلاجه الفوك محد مخلي بيها 

سلام ::اي طبعا لو وسيله تذكرجن لو محد إلا شغل 

=لا عيني بس من اجو الغزو المغولي ما خلو شي 

فواز //روحي خويه اشربي ماي وصعدي نامي 

=اخاف ما اصعد 

فواز //لا تخافين بس تشوفينه الشبح كليله راح اصيح عليك أاخوي فواز يعرف شغله وياك 

سلام ::يالله حبي -استحه ما كملها-فواز كله 

كملها بعد أخوك ليش بلعتها شنو يعني ما ادري بيك تحب رضوى ههي بهي (وهز ايده )

شربت ماي وصعدت وهمه يباعولي ويضحكون اتغطيت بالبطانيه وانا خايفه بس نمت 

ما حسيت الا على صياح وصريخ نزلت لكيت سلام يضرب رأسه بالحايط وفواز شاك التيشيرت 

ويصرخ وعمي طاهر وصبيحه يبجون وصلت يم عطاء هي هم توها كاعده بس شفتها تبجي

سألتها شلي صار

عطاء بصوت مخنوك //خابرو ع فواز كلوله عمي وعمتي مسوين حادث

انا ظليت أصرخ عمه وسيله الحبيبه ام كلب الطيب لو خالي صبار الخيمه الي بجاله محد يوصلنا

شويه والبيت انملى ناس إجن البنات وامي وخالاتي ورقيه واجن أخوات ام فواز 

امي وزينب بت خالي صبار وأختها وابنها راحو بسيارته وفواز وسلام وخالي طاهر راحو بسياره 

وسهير خابرت خالي صاحب احنا بقينا بس نبجي واجو كل اقاربنا والجيران التمو علينه وسوو الفاتحه 

والملايات انا وعطاء ورقيه وكوثر جنا نشتغل ومن يقرن الملايات نروح نلطم على عمه وسيله لان ربتنا 

وتعبت علينه اجو من الدفنه وصلو الفجر تلكيناهم جانو منهارين ويصرخون خالي صاحب لاحكهم وسلام 

وفواز يصرخون مثل الجهال امي كاتله روحها من وصلو انا وعطاء صرنا نصرخ حيل لان احنا ربينا سووا 

وعايشين وياهم وهمه مدللينه سوولهم جاي وكعدت امي وخالتي قسيمه سالتها

وج خيه عليه اشلون صار الحادث

  امي كالت 

مصلين بالإمام وطالعين بعدهم توهم متحركه السياره ع الشارع العام ملاكيتهم سياره جبيره 

همه انحرفوا وانكلبوا 

انا وعطاء وحده تباوع للثانيه ونبجي وعرفنا انو همه راسا متوفين 

الفاتحه جانت كلش جبيره تعبنا بيها أكثر شي انا وعطاء خلصت السابعه كالولي انا وعطاء

اتفقتن ويه الملايات على مود كل خميس يجن يقرن انا كتلهم 

=اي اتفقنا 

فواز //شوفي رضوى كل خميس اريد مثوبه تتوزع ع النسوان الي يجن للقرايه وع الجوارين

واحنا نسوي للزلم انتي وعطاء تدرن بامي شنو تنطي والمن ما اريد شي 

ينقص كل شي يمشي وكانما هي باقيه  

=صار تامر امر

طلع فواز الي جان مبين علي التعب والحزن وعمتي صبيحه وره ما طلع فواز وسلام كعدت يم زينب وغدير بناتهم

  وصارت تحجي

- - عود شنو يوصي برضوى وعطاء جا مو هاي اخواتهم وانا عمتهم وسهير مرت عمهم 

عطاء بهدوء //عمه ماكو فرق بس لا تنسين تره عمه وسيله ربتنا انا او رضوى واحنا هم

بناتها وعايشات وياهم بالبيت وكل شي نعرف وهالفواز يوصي بينا 

صبيحه /:ها وزينب وغدير طلابات مو بيت ابوهن وامهن 

=عمه زينب وغدوره هنه صاحبات الببيت بس تعرفين مرتبطات هم الله يساعدهن بيت وجهال ومسؤوليه 

وانتي وعمه سهير الخير والبركه 

هزت ايدها وما عجبها الحچي وصارت تتشاور هي وسهير

بعد ما انتهت السابعه وخفت الناس فواز وسلام قرروا يطلعون الشغلهم سلام جان مستلم محلات الاطارات 

وفواز ياخذ مقاولات ومستلم محلات الادوات الاحتياطيه هذا الي نعرفه 

الي اشوفه انو فواز هو الي يمشي الشغل يعني التلفون دائما بإذنه ودائما يخابر ويشتري بضاعه ويحول فلوس 

وكل خميس ثواب نطبخ ونوزع وبعدين نصب للرياجيل الي يجون للمجلس وهم العصر تبدي قرايه للنساء 

فچنا انا وعطاء لو نغيب من الكليه لو نسوي أكثر الأشياء بالليل أقصد على مثوبةليلة 

الجمعه تساعدنارقيه وساعات امي تجي تبات و. تساعدنه اما بنات عمه وسيله احنا ما نقبل نخليهن يشتغلن 

لان خطيه مصيبتهن چيره امهن وابوهن بيوم واحد 

چنا أنا وعطاء نسوي تمر ولبن ونسوي جاي او نومي ونسوي حلاوة او نوصي الولد عل 

فواكه أما العشا فنطبخ تمن دجاج ولحم وكاستر ونظف الخصره بعدين وره العشا والجاي نبلش

بالمواعين والتنظيف تقريبا رابع أسبوع جانت العزيمه جبيره وطبخنا انا وامي وسويت الكاستر

والحشو للتمن 

ورقية وعطاء كلن الدجاج والسمج ونظفنا الخصره جنا من نصب العشا تجي سهير وكوثر

وصبيحه ويكومن يصبن امي انتبهت عاد كامت قفلت باب المطبخ الداخلي واجه سلام وفواز

صرنا نصب فواز سأل امي

عمه اليوم بس انتن شعجب 

امي //عمه كل أسبوع بس احنه نطبخ ونصب والي يغسلن المواعين رضوى وعطاء ورقيه وانا اساعدهم 

فواز/:اه جا وسهير وكوث

امي ما خلته يكمل //هنا وكت الصب يجن عود شوفونه بس هالمره اعناد بيهن قفلت الباب او كاعدات ويتامرن 

وبس سوالف يم النسوان

سلام وفواز صبو ويانا العشا وبعدين صاحو الولد عمي طاهر ناوشوهم الصواني واحنا صبينه

للنسوان عاد من فتحنا الباب هنه اجن كالن

صبيحه /:يالله خلي نصب للزلم 

امي باوعتلي وكالت 

رضوى اخذي السفره للنسوان وانكلن العشا وحضرن الجاي بسرعه هسه يجووجن ويضلون يصيحون 

عطاء/:عمه كل شي حضرنا

نكلنه عشا النسوان انا كلت الرقيه 

=رقاوي روحي أتعشي خاف يدز عليج رجلج

هي راحت وانا وعطاء بقينا بالمطبخ نكمل بالجاي واجن صياني العشا وانطيت ترامز ا الجاي السلام الي

أخذهم مني وكال

سلام ::الله ينطيج العافيه تعبتي هواي 

=لا سلام ما تعبت همه اهلي لو شما اسوي ما اوفيهم 

::الله يرضى عليج انتي وعطاء

احنا وكفنا علمود نغسل المواعين وبدت الناس تروح اجن كوثر وامها وسهير للمطبخ وكعدن يسولفن وانا 

وعطاء نغسل بالمواعين لمن ما دخل فواز للمطبخ وشافنا صاح على اخواته

فواز بنتر/:غدير زينب تعالن 

سهير //ها فواز رايد شي 

فواز بنفس عصبيته /:اي رايد الخواتين الكاعدات 

اجه سلام ::شبيك فواز 

فواز/:شبيه ما تشوفون هذني من البارحه لليوم على فد وكفه تره وكل أسبوع اشوفهن وحضره

جناب اخواتك كاعدات وهنا --واشر على كوثر وامها وسهير --بس دك سوالف كوم انا وياك خلي 

نساعدهن شنو طاح انتقام عليهن 

عطاء //لا فواز هذا واجبنا امي وسيله تستاهل الواحد يتعبلها

كوثر عوجت حلكها //بعدين شدعوه هنه شسون وانت هيج عوزك بس تاكلنه

فواز //ما طول هيج حطي ايدج اغسلي البيت اغسلي المواعين 

كوثر //صار ابن عمي هسه أكوم للمواعين بس لا تصير عصبي 

انا باوعتلها =احنه خلصنه شكرا بس اذا تردين انتي وعمه سهير اغسلن الجدوره مال 

الطبخ ونظفن الطارمه😈😈😈😈

طبعا انقصفن اجه سلام كلي ::رضوى بس تكملبن تعاي نظفي الديوان 

امي // سلام عطاء ورضوى تعبن خلي يرتاحن وياكلن لكمه ويكملن الشغل لان هنه لامتغديات ولا هسه اتعشن 

سلام //كملي شغل انتي وعطاء وسولنه عشا لان لا انا ولا فواز ماكلين جيبيلنه العشا للديوان 

وتعالن اتعشن ويانه

انا وعطاء بسرعه غسلنه ادينا وطلعت بورك وكباب عروك كليتهن وجاي واخذتها الهم لان ادري 

ما يأكلون دجاج وتمن بالليل وكعدنا نتعشى وجان احلى عشا لان شفت بي كوثر عبالك نفاخه عوزها

بس ابره وتنفجر عاد كل أسبوع صارت كوثر تبقى ويانه بالمطبخ بس انا وعطاء وامي الي نطبخ هي تنظف 

الخضره وتغسل المواعين

وصارت الاربعينيه ورحنا للنجف آخذو سياره جبيره وكلنه رحنا خوالي وامي وخالاتي وأولادهم وسهير وامها

ومرت اخوها 

وصبيحه وبناتها وزينب و غدير وعيالهن وخالات سلام وخواله رحنا زرنا ورحنا للمقبره ورجعنا واحنا الحزن 

مخيم علينه 

بعد ما رجعنا من الاربعينيه بأسبوع بدأت امتحانات نصف السنه جانت بكلبنا انا وعطاء غصه لان كان 

المفروض بعطلةنصف السنه يصير العقد والزواج لكن الله سبحانه ما شاء ولأن كدامنا عذابات وقهر