رواية أحزان قمر الفصل الثاني بقلم جمانه السعيدي
خلصت الفاتحه وفرغ بيتنا من الناس الغريبه
لكن ارواحنا اني واخواني صارت غريبه على هذا البيت امي تركت فراغ جبير
رغم الكل يحاول يهتم بينا بس امي ماموجوده
اهتمامهم جنه تمثيل
الكل بليل ياخذ اطفاله بحضنه وينام يسدون باب الغرفه وكلمن يحضن امه
واحنا نبقى واحد يباوع للثاني
وانتحسر
جمانه السعيدي
تكعد امهاتهم بليل مرتين وتلاثه اتغطيهم وتجيبلهم ماي
واحنا انام يم جدي وبيبيتي الي بس يخلون راسهم على المخده يرحون بسابع نومه
حسيت بلمسوليه اتجاه اخوي واختي حسيت كبرت ميت سنه
ليليه احضنهم وابجي واعاتب امي ليش عافتنا
ابوي حتى من يجي بلاجازه ماينام يمنا صحيح ينطينا فلوس نشتري بس ابد مامحسسنه بحنانه
مرت اربع اشهر على وفاة امي وبدن بيبيتي وعمتي يدورن مره الابوي
كلساع موصفيلهن وحده ويرحن عليها بس ماتصير
اكو بيهن مايرضن لان عندا اطفال
بقن فتره وهن وين مايوصفولهن وحده يرحن يشوفنها
تقريبا فات على وفاة امي تسع اشهر وصفولنه ابنيه معلمه تقريبا عمرها ٣٢سنه ومامزوجه
وقررن يروحن يشوفنها وفعلا راحن واخذني وياهن
رحنا شفناها خوش بنيه وحلو شكلها
فاتحناها بلموضوع وكالت اني ارجعلكم خبر
وفعلا ورا اسبوع تقريبا رجعت الخبر موافقه على الزواج
جمانه السعيدي
اجا ابوي اجازه وفرح من عرف لكيناله عروسه
والنوب معلمه يعني مثقفه
ومآ سابق الها الزواج هاي اول مره
ورحنا خطبنا وكطعو مهر وتفقو تحضر نفسها للاجازه الثانيه يكون الزواج
وفعلا حضرو كلشي طبعا عرس كلش بسيط
صحيح هي كلش حبابه لكن ماكدرت تعوض مكان امي ابد
الام محد يملي مكانه
جمانه السعيدي
ازوج بابا وكان فرحان كلش
ما متوقعه هيج راح بتغير بسرعه
والمصيبه الاكبر جنت اشوف ابوي يعاملها احسن معامله
وهو الي جان يكعد امي يضربها ويكومها يضربها من غير الغلط والعصبيه على اتفه الاسباب
هذا الشي جان يحز بنفسي حيل
جنت احس امي ماماتت منتوله ماتت من القهر بسبب ابوي وتصرفاته
كملت الابتدائيه واخوي صف رابع واختي بلثاني
مرت ابوي جان اخوها كاعد ابيتهم هو وامه اجا عمل خارج المحافظه واخذ عائلته وطلع
بقت امها وحدها بلبيت
كدرت سهام زوجة ابوي اتقنع ابوي انروح انعيش ويه امها بلبيت بما ان البيت صار فارغ بس امها بي
طبعا عروسه جديده ومآ يكدر يرفضها طلب
وفعلا انتقلنا كلنا البيت اهلها نسكن بي
بعد فتره حبلت
صار عدها ولد يخبل اني كلش حبيته وتعلقة بي واغلب وقتي جنت اخلصه ويا
نجحت للثاني متوسط واخير السنه وكعت بلرياضيات
كل المواد سهله وبسيطه الا الرياضيات عندي عقده منها
وهنا قرر ابوي ان اترك المدرسه وبعد ماكو دوام
بقيت بلبيت كل الشغل على راسي
لان سهام زوجة ابوي اداوم وكومه يجينا خطار
فا كل البيت تركب على راسي
صار عمري ١٤سنة شكل كلش حلو وجسمي مليان وبيضه
كام كل الي يشوفني يجي يخطبني
اجت عمتي الجبيره تخطبني لكن ابوي رفض
لان جان على خلاف وياها
جمانه السعيدي
وراها بفتره اجت مره جوارينا تخطبني وكعدت بلاستقبال
واجتني سهام تقنعني اطلع الها تشوفني وتحجي وياي
واني ماقبلت اطلع
بقت كاعده واجتني للمطبخ تشوفني
اني راسا طلعت برا
صرت عصبيه من اصرارها اي ماطلعتلج يعني ما اريد
اجت وراي زوجت ابوي
...والج قمر عيب من المره
...شنو عيب ما اريد ازوج هو غصب بعدني ازغيره
...هسه شكول للمره
...كلليلها ماتقبل تتزوج بعدها ازغيره واذا تلحون عليه زياده اشمر نفسي بلنهر
...ولله عيب شجاج اليوم تخبلتي
ورجعت الها وعتذرت منها والمره طلعت من بيتنا فشلانه
وراها بفتره اخت زوجة ابوي اجت علينا طبعا اني اصيحلها خاله
سمعتها تحجي ويه سهام على واحد يدور مره وحيد اهله وحالته الماديه كلش زينه
خريج قانون وعندا سياره
جمانه السعيدي
سهام....ولله خوش فرصه بس كون تقتنع
...ليش ماتقتنع عيوني وين تجيها هيج فرصه احسن زواجه
حاولي تقنعيها
...ولله احاول
مايدرن اني سمعت الحجي كله
ورا كم يوم ودولنا خبر يجي يشوفني هو واهله
سهام خابرت ابوي وقنعته وقبل يجون يشوفوني
وفعلا اجو هو وامه واخته واخت زوجة ابوي وياهم
حضرنا العصير واني لبست جبه رصاصي مخصره
وتقفنا اقدم العصير واكعد ويشوفني واشوفه
اني جنت كلش مامقنعه بفكرت الزواج نهائيا
احس نفسي بعدني زغيره
مو وكت زواج ابد
دخلت وقدمت العصير وكعدت شكله عادي كلش وناعم وابد ابد ماعجبني
ضليت كاعده وبيدي كلنسه انتف بيها من الانزعاج الي حسيت بي
ابد ماعجبني ولاقتنعت بي
كمت طلعت وطبكت الباب وراي حيل
حتى يفتهمون اني ما قابله بهاي الزواجه ابد
