رواية علي حافة الثأر الفصل الثاني بقلم زينب ماجد
شوان : كذاب اني متأكد هم مكانوا بأربيل واني متأكد من معلوماتي .... قاطعته
فيان وهي تحجي ويا عباس : شكراً عباس تكدر تاخذ راحتك.
انداريت عليها اشرتلي براسها امشي
مديت ايدي بجيبي وطلعتلها الباقي من الورقة ، اتعدتني وما اخذتهن مني وابوها يتصايح وياها والثاني يحاول يعترضها.
بقيت واكف
ما اعرف ليش واكف خفت ياذوها او يكتلوها
وهم ما اعرف ليش خفت ، شلي علاقة بيها تستاهل راجعة لاهلها وجه الفجر ويا حارسها الشخصي حقهم يحاسبونها بلكت تنرد شوية .. بس مع هذا بقيت واكف وهي مكاعد ترد على احد تحاول تدخل للبيت بدون ما تتعارك او تتجادل ويا احد منهم .
لزمها شوان سحب ايدها
وكفت وخزرته وهي تكله : نزل ايدك فوراً
وابوها يكللها : شنو جنتي تسوين بأربيل وليش متردين علينا .. اوكفي دا احجي وياج
اندارتلي وهي تخزرني لان واكف استمع لمشاكلهم الشخصية .. نزلت راسي وطلعت من البيت بسرعة .
فيان : كان عندي عمل داخل اربيل وساءت حالتي اضطريت ارجع بغداد لاسباب شخصية ونسائية ، يحتاج انطيكم تقرير بحالتي الصحية كأمرأة وتدخلون بأمور من المعيب احد يتدخل بيها.
- بأي مستشفى نزلتي ؟
- تصبح على خير بابا
- فيان انت كاعد تحفرين كبرج بأيدج
شوان : محد حيصبح على خير قبل ما تنطينا اسم المكان اللي نزلتي بيه بأربيل وحجز الطيران اللي اجيتي بيه .
- معلوماتي اللي راح انطيكياها مو ادق من معلوماتك استاذ شوان ، ابتعد من كدامي لو سمحت تعبانة جداً وحابة ارتاح .
حاول يسحبها جرت نفسها ودخلت البيت كبل.. دخلوا وراها .. فاتت وهي تندار وترفع ايدها وتأشر بأصبعها تحذرهم : ما مسموح لكائن من يكون والكلام يشمل حتى بابا .. ان يتجاوز عليه لو يهزئني كدام العاملين عدنا ، ولا اني مضطرة اقدم قائمة باعمالي واشغالي .. ووين اروح ووين اجي
شوان : اني زوجج والي كل الحق احاسبج انت مرتي وغصبا ما عليج تنطيني علم بأي شي تسوي مو تتجاهليني من الصبح لليل ما تردين عليا
- اللي بيني وبينك مجرد عقد فقط ما ارتقى لان يكون زواج ، واطمئنك بإن هالعقد تكدر تعتبره منتهي .
شوان : اني الاقرر شوكت ينتهي وشوكت يبدي واذا ما ارتقى لزواج لهسه فهذا بس لإن اني احترم عمو دلشاد وما احاول اتعداه والا والله اني امتلى گلبي منج ومن تصرفاتج المخزية والعبثية .
دلشاد : اسمعي يا فيان لا تخليني اوصل وياج لمرحلة ما تسر مثل ما وصلنا سابقا ، احترمي وخليني لين بتعاملي وياج والا والله افعل ما يخليج تعيشين طول عمرج بندامة ..
- اني كلت العندي فاذا كملتوا تهديداتكم اني اترخص من حضراتكم اصعد ارتاح ، ورايا شغل .. تصبحون على خير.
كام شوان يحاول يصيح وراها ، لزمه ابوها : اتركها خل نشوف وين تريد توصل .. اصبر
- اني ما اكدر انتظر اكثر عمو ، السالفة طولت واني ضيعت نص عمري انتظرها ما اعتقد اكو انسان يتحمل ١٠ سنوات خطوبة وما يتزوج ومنتظر موافقتها .. اني هم من حقي استقر وتصيرلي عائلة .
-راح نحل هذا الموضوع باقرب وقت، ثق بيه واتركلي الموضوع .
ڤيان : صعدت لغرفتي .. شمرت الجنطة من ايدي وطلعت تليفوني حطيته ع الشحن، وكفت كدام المرايا .. وجهي كلش تعبان وجسمي نحلان .. مديت ايدي لشعر سحبت الكتر نزل شعري .. كمت افرك براسي مأذيني لان شعري مشدود من البارحة ..
دخلت للحمام .. وكفت جوا المي الحار لقرابة الربع ساعة بدون ما اتحرك بس عقلي يفور بافكاره ..
اندك باب الغرفة ، طفيت دوش المي ..وسحبت البرنص لبسته ولفيت الخاولي على شعري ورفعته .. طلعت من الحمام .. بابا داخل للغرفة بدون استأذان بمجرد ما شافني بملابس الحمام طلع من الغرفة وسد الباب بسرعة .. وحجه : بدلي خلي نحجي
مجاوبته
لزمت المنشفة وكعدت انشف بشعري وشغلت الشسوار .. وهو يكولي : فيان اتركي الشسوار وخلي نحجي
مشطت شعري ولبست بيجامة وكيمونة ستن ، دا ارش عطر رجع فات للغرفة دست دكمة الاضوية وطفيت كل شي .. فتح : ممنوع النوم قبل لا نحجي
- تعبانة بابا مراح اكدر احجي
- والتعبان يسوي اللي سويتي
- اني لهسه ما سويت اللي اريد اسوي فما بالك لو سويت ؟
حجيتها وفتحت غطى فراشي وكعدت بسريري
حجه بصيغة تهديد : اسمعي بابا تعرفين ما عندي اغلى منج ومن اخوج بهالدنيا كلها بس لما توكفون بطريق نجاحي وتسوون الامور اللي ما اقبل بيها وتخالفوني مصيركم ما راح يختلف عن اللي قبلكم ، وزواجج من شوان راح يكون هذا الشهر ولو حاولتي تخالفيني صدكيني راح اندمج.
- تمام بابا اطفي الضوا وراك اذا طلعت .
اندارلي بغضب لما حجيتها ..
جريت الغطى واتلفلفت كام يصيح : انتم صايرين بلا اخلاااااق .. انتم فقدتوا معنى التربييييية مو صوجكم صوج امكم هي اللي اتوزكم عليه وتخليكم ما تحترموني .. كل هذا تخطيطها وعبثيتها لكن سهلة اعلمكم واعلمها يا قليلييييييييين الادب.
حجاها وضرب على دكمت الضوا .. وسد الباب بقوة.
مديت ايدي من الغطا وفتحت الجرارة ، طلعت كمامة العين لبستها وحطيتها على عيوني ونمت .
....
عباس : طلعت منهم الانفلاونزا داكتني دك كوة اتنفس .. امشي امشي والساعة تقريبا ٥ ونص الفجر ..
الفلوس مالتها بقن بجيبي وما بقى عندي غيرهن
ردت اصرف منهن واخذ تكسي وكلت لا ارجعهن للسكرتير هو ينطيهن الها .. بس ما كاعد اقاوم البرد من كاعد امشي احس سجاجين صارت بخشمي كصني كص ..
وكفت تكسي وكتله للحرية .. اخذني بخمستالاف كلت ادبرهن هناك وارجعهن للفلوس مو مال امشي بعد ما اكدر ،
وصلت البيت امي واختي نايمات ..
ذبيت روحي بلا فراش ولا حتى تبديل يم راس امي .. كامت هي جابتلي غطى نزعتني حذائي وبطروني وغطتني ومشت اتوضت واجت يم راسي تصلي
سمعت بيه اون من الالم
حجت : اعبيس يمه شمالك اتون يبعد بيتي ؟
- تعبان وجسمي مأذيني يمه كلش تعبان
- يمن كون سودة بوجه امك شجاك يمه شجاري بحالك وين جنت اختك كالتلي مسافر
- سفرة الكشرة يمة سفرة الكشرة
- يا .. دنام يمه نام
حطت ايدها على راسي وكامت تدعي غفيت ساعة .. وكعدت على صوت طبكت الباب شلت راسي : علياء وين راحت ؟
- تتسوك النا ييمه الثلاجة فارغة من اول امس وفريخات اخيتك خطية يتامى هالطلعتهم للمدرسة و طلعت وراهم تتسوك
- ومنيلها تتسوك ؟ بلا تكليلي هم اداينت !؟
- لا من جيبك خذت ٢٥ الف مو مشتغل اني اطيتها من فلوسك
فز من مكانه : يمه صدك تحجين ذني مو فلووووسي فلوووس العاااالم
- يا جا ما اشتغلت امس
- اي يايمة بس ما استلمت راتب ولا راح استلم بطلت
- ياااع بطلت لييييش بطلوووك
- يمممممه لخاطر ربج غير تكليلي هسه بالله شلون اجمعهن ذني .. دسأليني اخذ لا ... يمممممه
كام وهو ينتر ويلعن هالعيشة الفكر العايشها وكوة يدبر الفلس بيها .
كام سبح وامه حضرتله الريوك
طلع وهو يكللها : يمه انت مو مريضة شجاي اتسوين
- اسويلك ريوك ييمه جا تطلع وابطينتك فارغة وانت مريض
- وين اطلع لخاطر الله اني الشغل هذا ما اكدر استمر بيه بعد
- جا مو اطيت فلوس حتى يخلونك تشتغل شني بكيفهم خلي يرجعولك فلوسك
- يمه الفلوس اطيتهن للولد حتى يحط اسمي اشتغل بهالشغلة مو الهم .
- ييمه عيب لو افتهمت حجيك .. جا الفلوس الخذيتهن واطيتهن شلون هيج بولة بشط
- يمه الولد ما جذب وصدك شغلني بس الشغل ما يناسبني
-ايييي يا يمه هم راح تتشرد وتصيح ما يناسبني يا عبيس يا يمه لو ردنا شغل يناسب مزاجنا حرام بعمرنا ما نفلح
- مو هيج يمه ما راح تفتهمين عليه عوفيها اني ادبرها
-اشلون ادبرها وانت كاعد بالبيت
-يمه مو بس اني جا محمد هم ابنج ما تخابرينه
-ثكلت عليكم ييمه
-يا يمه شني ثكلتي علينا هسه هو هذا حجي بس قصدي يساعدني شايل ايده اني شصير المفروض هو الجبير وهو اليتكفل كلشي
- غير عده عويل وجهال وبيت ييمه خطية هو هم شيصير
- واني ما عدي يايمة ، بس يلا الله يدبرها لا اشيلين هم .. ربج ما يخلي عبده حاير
-والله يا يمه ادعيلك بقيامي وقعودي اليوفقك ويفتحلك اوسع ابواب رزقه ويعينك برزقك بجاه كلمن عده جاه ناخية الرسول
- ان شاءالله يمه ان شاءالله .. شمسويه هاي شني
-بيض وطماطة نتريك اني وياك
- يمه متأكدة هاذ بيض وطماطة لو طماطة وبيض يكولون موجود بس ما ينشاف
- فلشك ، دكل اكل ما تبطل سوالفك
- يا سوالف يمه بالحسين ميت من التعب
- اذا ما عدك شغل نام شتسوي بعد اذا مريض
- لا الفلوس ذني مو مالاتي لازم ارجعهن شكد خذتي منهن؟
- ٣٠ اطيت لاختك ٢٥ ومصيرف حدر ايدي جبت بيهن ريوك وضلن عدي ٣ الالف
- واني صارف ٥ هاي ٣٥ الف منين اجيبهن ، بعد ما ادري اروح هناك واكلها باقرب وقت ارجعهن الها شسوي قابل ابوك اصلا جان لازم ينطوني فلوس على البهذلة التبهذلتها ويا الشرفنص مالتهم البارحة حتى اتمرضت من وراها
-يا يمه فلك جاي تشتغل ويا بت
- شلون بت ييمه مصيبة
- لا يمه عيب يسمعون الوادم شيكولون علينا لا لا يمه عوفها
- يمه اشتغل سايق وحماية شمشتغل حتى عيب بس ما تنحمل
- يااا يعني خادم الها غدي شني يمه تشتغل خادم عد مرة لا يمه عوفها عوفها
- هسه غير لو راضية تكول بت فرعون شايلة خشمها محد عاجبها ابد فوكاها تتمنى تحط العرب بفرن وتحركم
- ياااا يمه لا تعمل بحالك شي ولك اعبيس يمه خمشت كلبي فدوة اروحلك يمه بعد لا تروح
- مساعة تكليلي اعبيس جوز من سوالفك واركد بالشغل هسه كلبتي يم اعبيس
- يا يمه انتم عالثنيوين عدي شني لاكيتكم بالشارع ييمه وتحطكم بفرن لا لا عوفها ختولي .
- دخلي اروح اطيها الفلوس واكللها تطلبني من اشتغل اجيبلها الفلوس عود .
- اي بس لا تببطي يمها بروح ابيك اعبيس يمه لا تلچم كلبي
-ما ابطي يمه اروح وارجع .
كمل اكله بسرعة وكام بدل واخذ من امه من الفلوس البقن الفين وعافلها الف وراح لبيت فيان ، وكف بالباب ينتظرها تطلع حتى يحجي وياها .
.........
فيان : ما مرت كم ساعة نوم وانفتح باب غرفتي وصوت امي يدخل لمسامعي : ڤيو .. ما عندج شغل ماما .. الساعة ٨ ونايمة .. اشوووو
شالت الغطا من عندي ..
سحبت كمامة العين من راسي : ماما تعبانة
- لويش حبيبي
مدت ايدها لوجهي : حرارتج زينة ، خابرني ابوج يبرق ويرعد شنو صاير بينكم ؟
كفيت الغطا من جسمي وكتلها : بابا عالم لوحده ومصر يقحمنا لعالمه .. ارام هرب للخارج ديخلص من قيود بابا ومحد واكع بأثمه غيري .
- اني كلتلج اتركي هذا البيت وقاطعي لابوج وتعاي عيشي ويايا .
- اعيش ويا زوجج اللي ما اطيق اشوفه مو حتى اكابله ؟
- وشلج علاقة باكرم .. انت راح تعيشين ويايا ممضطرة تكابلي او تكعدين وياه اسويلج سويت خاص بيج وحتى اذا تقبلين انطيج المشتمل مال البيت .. بس اخلصي من ابوج وجحيمه.
- اني اكول لو تطلعوني من صراعاتكم وكافي كل واحد بيكم يحاولي يجر بيه لصفحته ويرغمني اكون وياه، ماما اني كبرت مو صغيرة اكدر اختار حياتي واسيرها كيف ما اشاء ما احتاجكم افتهموا هالشي .
- معناها قررتي تتركين شوان واخيراً ؟
- وهو بابا تاركلي مجال اقرر !؟ ارحموووني اني تعبت منكم .
عفتها ودخلت للحمام غسلت وجهي وطلعت بدلت ولبست سترة رصاصية وياها بدي ستن ابيض .. شسورت شعري وبرمت اطرافه .. حطيت مكياج خفيف ولبست كلادة ناعمة دايموند .. وتراجي ناعمة .. وساعة فضية .. وكعب رفيع اسود .. رشيت عطر وحطيت الميني عطر مالته بالجنطة والحمرة اللي حطيتها.. فردت شعري واخذت جنطتي وطلعت من الغرفة ، صارت بوجهي ام غيث : صباح الخير داده
- اهلا صباح النور خالة ، باجي اجتي ؟
- لا لا البارحة راحت لبيت عمج
- زين ما اريدها تلتقي بماما وتصير مشاكل ، مالي خلك
- ريوكج جاهز يداده بداعتي عليج اتريكي كبل لتطلعين
- طيب، شكرا خالة دا اتعبج ويايا هواية
- يا عيوني تعبج راحة بعد عمري
نزلت ع الدرج امي كاعدة بالصالة، حجت : وشلون هسه حتبقى المشاكل هشكل وابوج يومية يخابرني عليج ويتعارك
- اني اكول تكومين نتريك ونطلع لشغلنا ونعوف المشاكل ورانا الها رب يحلها ، كومي ماما .
- والنعم بالله بنتي بس ترك المشاكل ميحلها ابوج مصر تتزوجين شوان لتتوقعين بعد كل هالسنين يتنازل ويقبل تتركي .
كعدت كدام الطاولة وماما كابلتني تحجي .. حطيت جنطتي ع الكرسي الثاني وام غيث وكفت تصبلي استكان الجاي ، ابتسمت الها وكلت الها : شكراً .. بلشت جامعة نور لو بعدها ؟
- لا داومت صارلها اسبوع وكلش تشكرج على الملابس اللي دزيتيهم الها .
- تدلل ، عميد الجامعة صديقنا اي شي تحتاجه خلي تروحله وتكوله من طرفنا .. ومراح يقصر وياها .
- الله يسعدج السبع سعادات ويفرحج ويوفقج يا خالة .
- انت عزيزة عليه خالة وبمثابة امي وبناتج هم بمقام خواتي .
امي اتضايقت من الكلام وقاطعتنا : ام غيث اذا كملتي شغلج حبيبتي حابة احجي ويا بنتي بموضوع خاص
- العفو داده ، ما محتاجة شي ثاني احبيبة ؟
- سلامة كلبج خالة ، اخذي راحتج وكملي شغل وارجعي للبيت من وقت ما راح ارجع ع الغدا .
- رحم الله والديج عيوني نور تجي من الجامعة ميتة جوع الحك اسويلها الغدا عيوني .. الله يخليج
حجت امها : اي مو افتهمنا يا ام غيث .
طلعت وفيان تمد ايدها وتاخذ توست وتدهن جبن وتحط عليه عسل .. حجت امها : اسمعي ماما موضوع المشاكل يبقى هيج وناس تعارك ناس مو صحيح .. لازم ينوضع حل فشنو اللي تردي انت حتى احاول اجبر ابوج يرضى باللي تردي بتالي انت بنته لكن مو عبده عنده .. يكفي اتعديناله الاخطاء القديمة واتخطيناها لكن يرجع يظلمج بنفس الطريقة ما راح اسمح بهذا الشي ابداً
- ماما حبيبتي طمني بالج واتركيني اني وبابا مشاكلنا متنحل احنا راهمين على بعضنا هيج ، مراح يتغير من وضعنا شي
- وتالي ؟ هو يخابر يكولي ادخلي وعقليها وانت راكبة راسج يابنتي والحل ؟
- الحل تجربين هذا العسل طبيعي مية بالمية جابولياه من زاخو .. نحلاته يتغذون ع الزهور الطبيعية ، جربي كلش مفيد للصحة والبشرة .
- فيان !
ابتسمت واخذت استكان الجاي شربت بسرعة وكمت من مكاني وكلت الها : اشوفج بخير ماما .
- ممكملين حجينا فيان
- عندي شغل لازم اطلع، الحجي بعمره ما راح يخلص اذا نأجل شغلنا حتى نحجي معناها مراح نشتغل ابداً .. مع السلامة.
اخذت سويج السيارة وطلعت .. لكيت الحارس اللي البارحة راح ويايا لسليمانية واكف ..
اول ما صرت كباله كال : العفو ست ، البارحة خليتي يمي فلوس ورقة صرفت منها وانطيت فلوس التكسي للمطار وبقى ١٠٠ واربعة الاف دينار بس اضطريت اصرف منهن الصبح ٣٥ لان ما جان بجيبي ان شاءالله باسرع وقت ارجعهن الج .
يحجي وهي واكفة كدامه بملامح خالية من التعابير .. وهو يترجاها على الدين تنطي مجال يسدده ، حركت ايدها ورفعت السويج شمرته عليه لزمه بسرعة ، حجت : افتح باب الكراج وطلع السيارة فوراً
- العفو ست ؟
لزمت باب السيارة فتحته واندارت : بعدك واكف !
- العفو بس ما افتهمت يعني
صعدت السيارة وطبكت الباب وراها ، هو انثول معرف شتريد منه يستمر لو يوصلها لو بس يفتحلها الباب .. نزلت الجامة مال السيارة وحجت : رجعت تنسى ضوابط العمل وتكرر الكلام والأسئلة !؟
- العفو ست
من حاجته هيج عرف انطته السويج حتى يستمر بالعمل فركض فتح باب الكراج وطلع السيارة وهي ورا .. نزل قفل الباب ورجع صعد وقاد السيارة لمكان عملها ، لاحظت وهو يسوق يجر بخشمه وعنده انفلاونزا قوية وعيونة من قوة المرض وكوا يتنفس .
وصل للمكان وصف السيارة مقابيل الباب ، نزلت هي وهو رجع اخذ السيارة للكراج ، اتوجهت لمكتبها ، اول ما دخلت دخل وراها هوشيار ، حجه : صباح الخير ست
- صباح النور هوشيار
- كالوا البارحة جنت تعبانة
- انت اللي انطيت معلومات لشوان عن تذكرتي البارحة لمطار اسليمانية !
- حاشى ست والله مو اني
- اسمع اذا تعتقد انت دا تمشي المي من جوايا تكون غلطان واذا تعتقد اني مبقيتك لان مأمنتك فهم غلطان .. صدكني واعيتلك واعرف الغمزة اللي تغمزها من ورايا لكن ساكتة عنك بمزاجي ، اللهم شوكت احطك بمزاجي واعلمك درس ما تنسى بحياتك .. هذه اني اقررها وهسه تكدر تطلع برا تحضرلي قائمة اعمالي فورا ..
- بس العفو ست والله
- بلا كلام امشي نفذ اللي كتلك عليه وبس ما مستعدة اكعد اسمع تبرير
اشرتله يطلع بنتر
بسرعة اعتذر واندار يطلع من المكتب مالها .. فتحت الحاسوب ، واشتغلت عليه ، دخل سليمان شايل الها كهوة وقطعة شوكلاة ومي حطهن كبالها وحجت : الحارس اللي اشتغل ويايه البارحة شنو جان اسمه
- عباس اعتقد جان اسمه ست تحبين اندهله
دخل هوشيار وهو بيده ورقة بيها قائمة اعمالها كالتله : السايق اللي رافقني البارحة مريض اتكفل بموضوعه وانطي اللازم لعلاجه .. وسلمه راتبه مسبقاً
- بس ست العفو هو ما اشتغل حتى يستلم راتب .
كاعد ادقق بالورقة اللي قدمها الها وسمعت كلامه رفعت راسها بملامح استغراب وحجت : هوشيار شنو رأيك تكعد بمكاني وتقرر عني شنو اللي يجوز وشنو اللي ما يجوز !؟
- لا العفو ست بس اني دا احجي هيج من باب سياق العمل المتعارف
دنكت ادقق بالاوراق مرة ثانية وهي تجاوبه : اه والله ! ليكون انت اعرف بالعمل مني ؟
- تأمرين ست راح اسلمه راتبه فورا واتكفل بموضوع علاجه لا تشغلين بالج .
-ممتاز ، مازن وصل ؟
-خابر دقايق ويوصل للقاء حضرتج
-عظيم ، المناقصة الثالثة اطلعت عليها ؟
- نعم وكتبتلج الملاحظات بالملف بامكانج تطلعين عليها ست .
- جيد ، تكدر تتفضل .
- تأمرين ست
راد يطلع ، حجت : منو المسؤل على تنظيف المكتب !؟
- تغريد ..
- كولها تحضر عندي
- امرج ست
طلع وهي بقت تكمل تشتغل ع الحاسوب و تدقق بالاوراق ، اندكت الباب ما ردت انفتحت ودخلت تغريد : العفو ست طالبتني
رفعت راسها وهي تترك الاوراق وتمد ايدها لفنجان الكهوة مالتها ، شربت منه وشافت تغريد كعدت مقابيلها رجعت الفنجان وهي تكولها : كتلج اتفضلي شي حتى تكعدين ؟
فزت تغريد وهي تكللها : العفو ست بس كالولي رايدة تحجين ويايا لهذا كعدت ما... قاطعتها
- شنو شغلج هنا يا ست تغريد
- تنظيف المكاتب ست
مدت ايدها ع الميز وكالتلها : هذا شكل مكتب متنظف ؟
- نظفته الصبح والله
- معناها تنظيفج سيء وبهيج حالة مراح تخدمينا
- لا والله ست نظفته كله والقران نظفته .. كلها
داست على جهاز المنادات اجا هوشيار ، كالتله : طلعلي بالكاميرات شوكت نظفت تغريد المكتب بالضبط وجيبلي الفيديو اللي نظفت بيه
حجه : هي قبل شوية وصلت وبعدها ما منظفة المكتب لان انت حضرتج كلتي مسافرة وما ترجعين بيومين .. فما اجت على وقت
اندارت - طلعتي ممنظف
- ست والله منظفة البارحة
- بيوم اللي اني ما اجي تجون على كيفكم وتسيبون العمل وتلتهون عن الشغل ؟
- لا والله ست هسه انظفه كله تأمرين امر بس الله يخليج ست على كيفج ويايا الله يخليج.
- اذا اريد احاسب فالحساب عليك يا هوشيار عندي ضيف راح يوصل خلال نص ساعة ومكتبي بهالحالة .. شنو هالتسيب ؟
- ست راح يتنظف فورا ، واسف على الخلل
اشرتلهم يطلعون برا .. وسحبت ورقة وكتبت قطع راتب للسكرتير وللمنظفة بسبب التسيب وعدم احترام الية العمل .
وطلعت حطتها على مكتب هوشيار وكالتله : نازلة اتفقد الوضع ربع ساعة بس ارجع الكى المكتب نظيف ومتعطر ومفتوحة الشبابيك ..
تركت الورقة ومشت نزلت ع الدرج شافت الموظفين مخبوصين وواحد يضرب باللاخ .. وكلها داخلة انذار وكفت وصاحت : شنو الموضوع ؟
اندارولها ، وكف عدل من لكوها وراهم : العفو ست بس المدير العام اجا .
- كلمن على مكتبه بسرعة ، بالعجل .
انتشروا كلهم لمكاتبهم وهي وكفت والوارها يتراكضون لتحضير غرفة المدير العام .
باوعت عليهم ، شافت المدير العام اجا .. اندارت ومشت باتجاه الاقسام تتفقد الموظفين ، وكف وراها المدير : فيان
اندارت : اهلا استأذ ، شرفت .
- تعالي هنا
- العفو منك اكمل تفقد الاقسام واكيد راح اجي عند حضرتك .
: فياااان كتلج تعاي هنا
تقربت منه وهي تكوله : بابا اذا جاي تحل مشاكل البيت بمكان العمل فهذا الشي مو صحيح
- وانت تركتيلي حل واحد وين يلكاج حتى يحجي وياج لج مرمرتيني يا بنتي تعبتيني
- تمام استاذ تفضل حضرتك دقايق واني راح اتبعك، سليمان حضر كهوة المدير العام ولا تنسى كهوة تركية سادة .
باوعت لابوها ومشت من عنده ، صاح : فيااان
دخلت القسم اللي على يمينها واتفقدت عمل الموظفين.
اجا هوشيار لعباس اشرله اجاه عباس وهو لازم بالكلينكس ويعاطس : تفضل هذا راتبك كامل هذا الشهر
- راتبي !
- اي وشوف واحد من الولد ياخذك للمستشفى يعالج وضعك باسرع وقت يلا كبل لا تطلع الست انت راجع
- ليش اروح مستشفى
-مو مريض !
-اي افلاونزا مو شي مستاهل هسه حبايتين اصير تمام
-معناها اخذ الحبايتين بسرعة وارجع ، سردار روح وياه
- ما فهمت ليش يروح وياي
- اني اتكفلت موضوعك كدام الست فيان وهي طلبت نسلمك راتبك اليوم ونعالجك عندك اعتراض استاذ
- شبيك خويي هو سؤال
-نفذ شغلك وبس اخذه سردار
مشيت ويا سردار وكتله : هذا شسالفته ؟
- تلكى المديرة غاسلته امشي خوية
- وين نلكى صيدلية مفتحة هسه الدنيا الصبح
- اكو مستوصف قريب تفتح يمه صيدليه امشي ناخذ منه دوا ، بس الله ربك باول يوم انطوك راتبك
- امس جانت تهددني تفصلني وتعلكني فلقة .. اليوم تنطيني راتبي بدون جهد شنو الموضوع !
- ست فيان شكد ما شديدة بس حبابة ، حتى ابوها المدير العام زين عكس هوشيار وشوان ذولة تكول الله مسلطهم ع البشرية .. وكل ذولة اللي بالدائرة يشتغلون لواكة لهوشيار وهوشيار لوكي اول عند شوان
- وهو شوان منو ؟
- نسيب المدير العام زوج المديرة فيان .. بس ما متزوجين رسميا فقط خطوبة بس صارلهم ١١ سنة مخطوبين مدري عشرة
- يا علي ١١ سنة مخطوبين
- ابوها وابو شوان اقارب ومستفادين من بعض .. بس هي شكلها ما متقبلته وماشي الموضوع بينهم مصلحة عائلية
- زين هم شو عوائل هاي مو دائرة حكومية
- اي بس من حصة الاقليم .. وابوها بامر من حكومة كردستان صار مدير عام ببغداد قبل سنتين تقريبا ما ادري تلاثة .. بس ابوها صاحب شركة استثمار باربيل وتاجر من قبل ليصير مدير عام ، وبنته نائب عنه بالدائرة وماخذه دوره بالادارة ، حاليا هو مرشح على انتخابات فتكدر تعتبرها هي الكل بالكل.
- ثكيلة يعني !
- تكدر تكول هيج
- وامس اني ما خليت على حالها حال نزلت بيها حدرة ونص خرب انه اليوم تشعل امي فوك ابوي .
- ليش شسويت
- مدري يمعود شوفلنا الصيدلية خليني اصحصح راسي اندار
مشينا للصيدلية اخذت حبوب شربتهن يمهم ورجعنا للدائرة بسرعة، اول ما وصلت كالولي : بوجهك لغرفة المدير العام بسرعة.
- شكو !؟
- رايدك بسرعة
رحت ركض امشي لغرفة المدير العام وكفت بالباب حتى يبلغونه مرت المديرة من الممر باوعتلي واتعدتني ومشت .. وراها اثنين يمشون .. طلبني دخلت : السلام عليكم
- وعليكم السلام تفضل
كعدت .. ابوها اللي الصبح واكف كاعد بقاط ورباط وكالي : شنو اسمك انت ما شايفك من قبل ؟
حجه المساعد : استاذ باشر البارحة
- اسمي عباس حسن استاذ
عقد حاجبه اندار للمساعد : وحاطين حارس شخصي جديد وما نعرفه لفيان !؟
- استاذ كفله سردار يعرفه من طرفه
- وان يكن ، المفروض تحطوه تحت عيونكم تتأكدون من وضعه قبل لتخلوه حارس الها
- بس استاذ انت طلبت حارس شخصي بدل ريبر وواصريت باسرع وقت .
شوان : استلمت راتبك الصبح
عباس : نعم استاذ استلمت
دلشاد : ليش مو البارحة باشر شلون استلم اليوم !
شوان : اوامر الست فيان بما انو شفعلها وجذب بمكانها لازم تكافئه .
- العفو استاذ اني مو جذاب واني سويت شغلي وبس حسب المطلوب مني .
- هي طلبت منك تجذب
- هي ما طلبت مني شي ..
- التذاكر اللي رحتوا بيها سليمانية مو اربيل انت دا تضحك علينا لك .
- العفو استاذ اني ما ضاحك عليكم بس هي حجزت سليمانية لان ما لكت لمطار اربيل واتوجهنا من مطار سليمانية لاربيل وهناك اتمرضت واضطريت ادخل بيها مستشفى ..
شوان : شنو اسم المستشفى ؟ الدكتور.. انكر وكول ما اعرف
- استاذ الاسماء والكلام والكتابات كلها جانت كردي واني ما اعرف كردي لهذا ما حفظت غير اسم الممرض اللي اجا شدلها المغذي اسمه محمد .. هذا كل العرفته .
- مضمد ! انت لوتي لو دا تستلوت علينا
- استاذ اذا شايفني لوتي وكاعد اقشمركم امري بديكم وتكدرون تاخذون الاجراء المناسب وتفصلوني اما عني فكاعد احجيلكم الاعرفه بس اذا رايدني اكول غير شي كولي شنو تريد احجي واني خادم
- اريدك تصير عيني واذني ويا فيان اي خطوة تخطيها تبلغ شوان بيها افتهمت
- تأمر استاذ
- اتفضل اخذ راحتك ولا تنسى اي تغافل او تهاون او تنحي عن المسؤلية وما تبلغ باللي انأمرت بيه حسابك راح يكون عسير .
- تأمر
طلعت من المكان ورحت بالاستعلامات .
فيان : دخلت المكتب لكيت الاستاذ مازن كاعد ، كام بمجرد ما شافني ومد ايده للسلام سلمت عليه : اهلا وسهلا بالأستاذ مازن المحترم
- اهلا بست فيان الجميلة والرقيقة
- اهلا بيك تفضل
كعد واني كعدت مقابيله، حجه : يبدو ان شوان خاسر الجولة امامج ايضا .. شفته واني ادخله ووجهه ما يسر ابداً
ابتسمت ابتسامة مصطنعة : شوان هذا طبعه دائما ما يكون عكر المزاج وغير متفاهم مع المحيط
دخل هوشيار قطعت السالفة واني اكوله : شتشرب حضرتك
- جاي وثكيل عدنا سوالف كثيرة مع الست الجميلة بما انو حظينا بقعدة ثمينة مع حضرتج
- يا اهلا وسهلا ، بلغ سليمان اثنين جاي .
وقطعت عليه السوالف وكبل دخلت بالعمل وكتله : اي شخبار المناقصة .. شسويت عليها
- من بداية السوالف نحجي بامور العمل اللي متخلص
- اني انسانة عملية ودا تشوف موقفة حياتي كلها لاجل العمل وظروفة الإنسان الناجح لابد له من المثابرة والجهد
- انت جميلة وناجحة بكل شي يا ست فيان
- شكرا لاطرائك ، السيد المدير العام موجود مريت عليه
- نمر عليه سويةً لما نكمل حديثنا .
-يصير
بقيت اقطع عليه السوالف ، وهو يحاول يتهرب من موضوع العمل ويغاز باسلوب مزعج .. على الرغم هو متزوج وعنده اولاد بس عينة فارغة ورخيص .
كملت كل اللي اريده من الجلسة وكدرت اطلع بامور مثمرة بالتنسيق مع الوزارة ، وقاطعته حتى نروح نشوف الوالد .. وخابرت فوراً قبل لا اسمع موافقته بقى بموقف محرج ما يكدر يرفض
دقيقتين ورجع خابرني سكرتير الوالد
دست على دكمة الجهاز ولزمت تليفوني وسويت روحي اتصل دخل هوشيار كتله : هوشيار رافق الاستاذ مازن لمكتب المدير العام دقايق واني الحكم بس اكمل اتصال مهم .
وطلعت ببلكون المكتب .. طلعوا رجعت خابرت سليمان ع الارضي وكتله : كهوة مرة بسرعة دخت .
- تأمرين ست .
رجعلي هوشيار كتله : شنو الوضع
- السيد المدير العام اطلع على اخر الاحداثيات ومنتظر حضورج عنده حتى يناقشج بامور الادارة
- شفت الحارس اللي جان البارحة شنو جان اسمه
- عباس
- نعم عباس دخل يم السيد الوالد
- طلبه بامر اداري يخص عمله
ارفع بالاوراق وادقق واحجي بدون ما اباوعله : متأكد اداري ؟
- هذا اللي عرفته ست ما جنت حاضر بينهم .
- جيد اطلبلي عباس .. وخليها اثنين كهوة بدل الوحدة
- تمام ست تأمرين بشي ثاني
- تكدر تتفضل
طلع واني بقيت ادقق بالاوراق واختم .. اندك الباب دخل عباس .. رفعت ايدي واشرتله يكعد بدون ما ارفع راسي واباوعله ، كعد حسيته متوتر ويتنفس سريع ويباوع بارجاء المكتب ، اندك الباب ودخل سليمان وحط فنجان كهوة كدامي ، واشرت يحط مقابيل عباس ، حط كباله وكال : تأمرين بشي ثاني ست
- شكرا بس سد باب البلكونة مال المكتب ديدخل هوى بارد .
- تأمرين ست
سداها وطلع بقيت اشرب كهوتي بدون ما احجي لمدة ربع ساعة .. توتر اكثر وعرك كام يذب حسرات ..
رفعت راسي : بعدك مريض !؟
- لا ست الحمدلله صرت احسن
- جيد ، استلمت راتبك مو ؟
- اي والفضل لحضرتج .
حجيت واني اشتغل ع الحاسبة : شنو جان اسم حضرتي البارحة شلنفص ! مو لو اني غلطانة
كام يحك بكصته : اني اس... قاطعته
- اسمع يا عباس ... اسمك عباس مو
- اي عباس
- اذا تعتقد الكلام والاسلوب الفظ اللي استخدمته ويايا البارحة يمر مرور الكرام فأنت غلطان
راد يحجي قاطعته وهي تكوله : لكن اني انسان ما ينسى اللي يسويله خير وما ينكر معروف بسسس بنفس الوقت احب اقابل المعروف بمعروف .. لهذا تثمينا لنباهتك وسرعة البداهة اللي عالجت الموقف الحرج اللي جنت بيه الفجر .. شفعتلك .. اني احب الأنسان الذكي ويسعدني العمل مع الأذكياء
بسسسسس
وهذه البس حط تحتها خطين حمر
ما انسى اللي يسيء لي ولو بحرف ، وانت البارحة طالت اساءتك حروف اللغة العربية والكردية واتعديت كل حدود الأدب .. فشتشوف عقوبتك .
- الست اني اعرف غلطان بس البارحة صرت بموقف صعب المكان الجنه بيه جان مهجور وانت اتخربطتي واني للامانة ما جان بجيبي فلوس كافية للسفر والبرد ما احجيلج ربما انتم الاكراد متعلمين ع البرد بس احنا اجسادنا متعلمة ع الحر اكثر من البرد ففلتت اعصابي واني كلش خجلان منج .
- كلام فارغ يا عباس ، مع هذا اشرب قهوتك بردت
اخذت فنجان القهوة وكتله : اني رجعتك للعمل لكن راح انطيك فرصة النجاة .. لو حبيت رجع الراتب واسلم بنفسك ولو كلت لا اني مستعد اكمل فتتحمل لكل ما يجرالك .
- اللي تأمرين بيه ست اذا تريديني ابقى واذا حابة اروح بكيفج
- اني دا انطيك فرصة والاختيار الك
- اني محتاج الشغل ست
- البارحة كتلي اتحملج وكانت النتيجة عكس اللي كلته فهل يا ترى كل مرة حتخالف كلامك وما تخلي عندك كلمة واحدة كرجل !
ما جاوب
، حجت : طيب بما انو انت مريض ولازم ترتاح ..
بس للاسف معاقب فماكو نزول للبيت لمدة اسبوع كامل ... تاكل وتشرب وتنام بالسيارة
حطت اديها اثنينهم ع المكتب وباوعتله : مفهوم ؟
بقى يباوع بوجهه ما جاوب ..
رفعت نفسها من المكتب ولزمت الاوراق تكلب بيهن : اي وهسه تكولي يا عباس على شنو دز عليك المدير العام ؟
رفع نظره للكاميرا اللي وراها وباوع بعيونها ، حجه : ست الاستاذ راد يستفسر عن الحقيقة ، واني حجيتله الحقيقة الصارت لا اكثر
اخذ الفنجان من كدامه ، وهي عقدت حاجبها : وشكلت ؟
- الحقيقة وبس !
ضلت تباوع عيونه بترقب ، وكف من مكانه وكاللها : الاستاذ شوان مطلع تذاكرنا لسليمانية وشاك احنا كاعد نجذب عليهم بس اني رجال مالي علاقة بخلافاتكم الشخصية اكمل شغلي وارجع ، كتيلي نروح مطار اسليمانية رحت ، كتيلي اخذلي تكسي لاربيل اخذت .. اتخربطتي بالطريق وقمت بالواجب عالجتج ورجعتج للبيت سالمة وهذا واجبي غيره اني ما مسؤل بشي
باوعلها : مطلوب مني شي اخر ؟
ضلت تباوع عليه ، انطاها ظهره ومشى باتجاه الشباك بزاوية ما تلقطها كاميرة المراقبة اللي وراها ، ووكف يشرب كهوته ، اخذت فنجانها وكامت من مكانها ووكفت بصفه وهي تباوع للشباك ، وهمست : ذكائك يشفعلك.
-قصدج يطيح حظي ؟
دارت وجهه اله : ليش ؟
اندارلها وباوع بعيونها لحظات وهو يطيل النظر .. التفت وهو يبعد نظره عنها ويكولها : انتظرج بالسيارة ست ومشكورة ع الكهوة .. كلش طيبة .
اندار حطها ع الطاولة
هي اندارت تباوع عليه شلون يطلع
تنهدت ولزمت الفنجان باثنين اديها .. بقت تباوع بالكاع بتفكر ..
طب سليمان كاللها : اجددلج الكهوة ست
مجاوبته
رد صاح : ست
فزت وباوعت بوجهه : شنو ؟
- العفو بس دا اسألج اجددلج الكهوة
مدت ايدها وهي تناوله الفنجان : لا لا لازم اطلع مستعجلة .
- بس السيد الوالد طالبج
مجاوبته مشت لتليفونها اخذته وحطته بالجنطة ووكفت كدام المرايا نثرت شعرها منا ومنا .. وسحبت التليفون الارضي وداست صفر ، رد هوشيار كالتله : تعال فورا
كام ودخل للمكتب بسرعة وهي دا تاخذ المني عطر ترش على ركبتها وشعرها وجسمها : اقفل المكتب اني طالعة
- والسيد المدير
- لتنسى رتب اوراقي وحضرلي المناقصة الثالثة اليوم الاحد القادم حتى نباشر بيها .
- تأمرين ست .
مشت لغرفة المدير العام كالتله : العفو استاذ التقرير كامل حطيته بين اديك اذا عندك ملاحظات ياريت تكتبلياها حتى اراجعها وادققها .
- اكعدي نحجي
- اعتذر من حضرتك مضطرة اطلع فورا
- فيان
- بابا حبيبي اللي تريده يصير وتأمرني امر اني مفد يوم خالفتك ولا حتى عفتك عكس ما الكل سوا .. اذا تحملت ١١ سنة حتى ارضيك ما راح اخالفك بالنهاية حتى لو هالشي على حساب تعاستي و حزني مو مهم المهم انت مرتاح .
حجتها وطلعت هو ما كدر يحجي بعد اي شي ولا صاح وراها .. حجه شوان : دا تحجي هيج خافت من عصبيتك ودا تحاول تكسبك
- وشنو المطلوب منها اكثر من هيج
- فيان دا تمشي بامور غلط وزواجنا لازم يتحقق باسرع وقت عمو
- اني ما اقبل تفسخ خطوبتها منك وبنفس الوقت ما اجبرها على ان تطاوعك بزواجي فعلي يعارض نفسها ، اتركها تتقبلك
- قبل ساعة جنت دا تكولي ادبها وغصبا ما عليها تطيعك بكلمتين غيرتك يا عمو
- اي مو اعتذرت وذعنت يا ابني .. صح فيان صعبة بس بنتي مهذبة وما تسوي الغلط .
- الغلط فيان ابالها قتل .. ابالها دم رايدة تنتقم لاختها وطلعاتها الخفية هي لمقبرة المنبوذات وتخطيط محد يعرف شديصير براسها .. دا تزور وحدة عار حبلت من دون زواج انت تعرف الناس لو عرفت قصتنا نصير على كل السان ونخسر حملتنا الانتخابية ونخسر حتى سمعتنا بالسوك ؟
- وشنو المطلوب يا شوان تريد مني اكتلها واحطها بصف اختها ..
- الاريده منك تجبرها نتمم زواجنا .. عمي هذا احسن وكت نسوي بيه حفلة كلش جبيرة ونعم بيها كبار الشخصيات هالشي راح يساعدك بالحملة وتضمن مقعدك من ضمن مجالس المحافظات .
- ولو ما قبلت فيان مو صحيح نغصبها ع الزواج تسويلنا حركة نختزي كدام الجميع.
- لازم بأي طريقة نخليها تضطر تقبل باللي احنا نريده بتالي هي بنتك عمو ولازم تدور مصلحتك .. واذا تحبك فعلا راح تمشي بقرارك واذا ما تحبك فهي ما تستحق منك كل اللي قدمته الها وهي ما تفضل مصالحها الشخصية على مصالحك وحملتك .
- اشوف شلون اتفاهم وياها ، لازم نطلع .
——-
- طلعت من الدائرة هوشيار واثنين من الموظفين وراي .. نادرا على عباس حضر السيارة وجابها كدام الباب ، صعدت ..
هو ديسوق، دك تليفوني رديت واني اباوعله مركز نظره ع الطريق : الو
صديقتي ندى : الووو
- هلاو نداوي ..
- هلا شلونج حبيبتي مشتاقتلج
- اني مشتاقتلج هواية، كولي
- اريد اطلع فدوة ، متكدرين تمرين عليه
- نطلع يعني
- لا مو كتلج جمال يريد يشوفني واتفقت وياه ، نتشاوف ، وما اكدر اطلع وحدي هسه اذا اكله لزوجي اريد اطلع يلزك الا هو ياخذني ويلزمني استفسارات وين رايحة وشعندج ، فاذا تجين اكوله طالعه ويا صديقتي فيان .
- اي ماشي اني اجي اخذج بس وين تلتقين ، بمطعم
- لا يا مطعم عزا يروح يشوفني احد يعرف زوجي كاعدة ويا احد غير ينهجم بيتي ، اتفقت اشوفه ابيته من الحديقة ما اطول، اذا يعجبج تجين ويايا عادي تعاي ترى ما عندي شي وياه بس سوالف .
- تمام وابنج وين راح تخلي ؟
- راح اخلي يم اهلي ، فدوة اتحمليني ما اطول
- مو مشكلة عمري، جايتج
سديت الخط .. وكتله : اطلع لحي الجامعة
-تمام
- ههه غبية
- العفو ست وياي؟
باوعتله ؛-شنو جان قصدك بكلامك الأخير بالمكتب !؟
باوعلي بالمرايا : اي مكتب ست !؟
ضليت اباوع عليه بدون كلام ، حجه : ها يعني لان الوالد كلفني .. اوصله كل اخبارج واي شي تسوي وتحجي .. بالحالتين اني خسران
- وشلون ؟
- الحجيتلا اصير بموقف وياج والما حجيتله مشكلة
- وشقررت
- اني شغلي مؤتمن عليج مو بس على حمايتج وتوصيلج وكلشي يصير وياج فاشوف الأتمان لازم تكون على اسرارج الشخصية شرعا تتسمى فتنة اذا اشتغل وياج بلون وبلون اخر انقل اسرارج
- مثالية زايدة لو تمثيل لو انت صادق فعلا ؟
- ما اعرف الايام تبينلج اني شنو .. يمكن عربي وصدك ما اؤتمن .. ويمكن لا .
- مصر تذكرني بهالموضوع كل ما حاولت اتغاضى عنه !؟
- اسف مراح اذكره مرة ثانية .
ساق لبيت صديقتي وكتله : اوكف يمك ذاك زوجها
من شافني .. رفع ايده نزلت الجامة واتصنعت الإبتسامة ، وكال : كل ما اشوفج اكول شايفها بس ما اتذكر وين
نزلت من السيارة بابتسامة مصطنعة : مرحبا
-يا اهلا وسهلا مراحب اتفضلي
-لا شكراً منتظرة ندى
- يعني هالجمال بس حصة ندى مالنا حصة نشوفه
- شكراً لأطرائك الجميل لكن ما اكدر غير مرة
-كل الهلا بيج بأي وقت .
رجعت صعدت السيارة وطبكتها ، قذر وصخ عمره ما راح ينظف .. ولا عمره راح يتعدل .. لو اشرب من دمه ما اروى
باوعت بالمرايا لكيت الحارس مركز ويايا كتله : ليش دا تباوع ، وخر عينك النكسة دوووور
كلكم مثل بعض متختلفووون
من تشوفون مرة تكطعون ارواحكم لحد ما توصلوها ومن توصلون وتأمنكم وتفديك بكل ما تملك تتركها لو جانت بأمس الحاجة بحجة مو شريفة مثل ما حبتني تحب غيري وهاك يروح ياخذ بت البيوت المحد شايفها وما تطلع .. حتى يأمن تالي بت البيوت هي التخزي .
كلاب نكسييين
طلعت ندى ..
اخذت نفس وفردت شعري ..
اجتي صعدت وصعدت ابنها ابتسمتله : هلو هلو بالحلو .
صعدت وهي تباوع : هالاجلح الحليوة منين جديد
ضحكت باوستني : شلونج شلونج زينة مشتاقتلج يولي
-اني اشوق
شلونه الكتكوت
-يا كتكوت يمعودة بهذلني وذاك كبر اليكبره من الشغل يرجع ينطمر يكعد يطلع يرجع بالليل تعبان وراي دوام ما شايفة شي من خلقته الزفرة ليكرل مرة يهتم بيه يداري اوووي بره ، اي ما عرفتينا منو هالأجلح
- حارس شخصي
- شلونك عيوني
ما جاوبها : يمة انوب شايف روحه غدي خلك حارس ريبر ذاك وين جان يخبل دمع عسل
- سوا حادث
- يا عزا اشوووون
- ما اعرف تدرين لحد هسه ممخابرته ذكرتيني ارجع اتصل بيه واتطمن عليه واشوفه اذا محتاج شي .
- اي لج عيني ذاك عسلاية مو هذا غيري بداعتي اجلح املح حطيلج حارس جمال عيونه خضر ابيض هالاسويد منين جايبته
- بعد
- اكولج فدوة لبيت اهلي بس اوديلهم ابني ولو اتعبج
- انطي عنوانهم
انطته كام يسوق وهي تسولف
اي شصار مصار ما اتزوجتي الى متى تبقين عزابية يولي حتعنسين الكيلج واحد حمش على كولت المصريين ههههه وج الزلم حتخلص لحكي حصلي واحد، الليل اله حوبة .
- الله وايدج اذا عندج زوجيني
- الكالج والله الف واحد يتمناج صدك جذب
يمك يمك .. بس اعرف ابني يم امي واجيج ما اتأخر .
- على راحتج عمري .
نزلت واني نفخت وعدلت شعري وكتله : اطفي التدفئة احتقنت .
داس عليها بنتر طفاه ..
عقدت حاجبي : دا تشمر حضرتك ؟
- اسف ست مو يمج
درت وجهي منه ، رجعت صعدت وضلت ادلينا لحد ما نزلت لبيت ، اوهمتني انو هو هذا اللي فاتت بيه .. بس من فاتت ومشينا طب بالفرع كتله : اوكف وانزل شوفها اذا طلعت بس لتخليها تلاحظك.
ضل يباوع حجيت : نفذ لتصفن
اخذ نفس وزفر .. ونزل من السيارة باوع كال : كاعد تمشي بالفرع
- من تكمل الفرع اتبعها ولتخليها تلاحظك .
صعد وبقى يلاحقها ، لحد ما دكت باب بيت ، وطبت .. وبقى مطلعت ، كتله : انطيني تليفونك
ضل يباوع باستغراب دكيت رقم زوجها ، وكتله : هاك اتصل بزوجها ودليه ع المكان
فتح عيونه حيل : كاعد تهجمين بيتها انت اذا ما تريدينها اطب هنا ليش جبتيها
- شكلك رجعت تنسى نفسك وتنسى الملاحظات اللي كتلك عليها ؟
- العفو ست مو تدخل بس هذا هجمان بيوت !؟
- وليش اللي سووه همه بينا مجان هجمان بيوت ؟
- اني ما اعرف الصاير بيناتكم والا الي ايد ولا احط ايدي .
- انت مفكر الشغلة على مزاجك ؟ نفذ وبلا حجي .
-اسف ست هذي مو من صلاحيات شغلي
- بسيطة
من رقمه كتبت رسالة لزوجها : مرتك فاتت لبيت صاحبها هسه ، ما طالعة ويا صديقتها ، واذا تحب تتأكد تعال ع المكان وشوف بنفسك الدا يصير من وراك .
دزيتها وخابرت رد .. كطعته
ثواني ورجع خابر .. بقى يخابر يخابر انطيت التليفونه اله : تكدر تاخذ تليفونك
-ست ليش تسوين بيه هيج اني عندي اطفال واهل محتاجيني .
- اذا عبالك تجاوزاتك ناسيتها تكون غلطان افتر وارجع .
- لا ست اتعذريني اني لازم احط الوالد بالصورة .
جر التليفون ونزل .. نزلت من السيارة بسرعة كتله : انت دا تهددني !
- اهددج ما اهددج اني مالي علاقة بهالسوالف
- انطيني التليفون
- ما انطي
- دا اكولك انطيني التليفون
- تلاويت وياه لزمني ودفعني ع السيارة وحجه : منا الناس ما اكدر اسويلج اكثر من هيج اعقلي .
دفعته حيل : وشتكدر تسوي اكص ايدك افتهمتتتتت
مديت ايدي ولزمت بيده وهو يدفع بيه بصدره كتله : لتتقرب عليه سافل
- اني لو انت المتقربة عليه بنص الشارع .. اليمر شيكول .. عوفي التليفون
- انت عووووف انطيني
اضطر يتركه .. اخذته بقوة و صعدت السيارة ، وسقتها .. طلعت للشارع ، بيها والتفيت رجعت لكيته كاعد ع الرصيف ومخلي اديه على راسه ، دكيتله هورن .
كام من مكانه ..
واجا فتح باب السيارة اللي من جهتي ، حجه : كالولي الشغل ويا النسوان صعب بس مو هيج .
- اسفة ..
- بعد ما ورطتيني ؟
انطيته تليفونه ، ونزلت من كدام الستيرن . ضل يباوع عليه افتريت وصعدت .. تنهد وصعد كدام الستيرن ..
حجه : انت تعرفين لو طلع الرجال ابن عشاير واتبع رقمي وعرفني شلون اروح بيها ؟ ما راح يحسبني واحد كاعد يطعن بعرض مرته واهجم بيته
- راح يجي ويشوف الحقيقه بنفسه
- لو ما اجاها لو ما لحك عليه ولو لكاها وطلعت ملعبة تعرف شلون تطلع منها وتقنعه الرقم مستهدفه هي اللي تتواعد وتتحايل وتطلع ينخاف عليها تنلزم لو احد يتورط وياها ؟ ست بالقانون سهلة بس بالعشاير هاي تعتبر طعن وتوصل حتى للقتل .
- ما اعرف بامور العشائر متوقعتها تكون هيج .. المهم لتخاف
- ما اخاف !
هذ مو خوف هذا هجمان بيت عائلتي شنو ذنبها
- اووووه طولتها ، لو صار شي ذبها براسي واني اتصرف وهيج تطلع منها اتحرررك .
تنههد وساق السيارة
نزلت وهو دخل االسيارة للكراج ، دخلت اسبح شوية وطلعت .. لكيت دوجها متصل على رقمي
رجف كلبي .. لبست روب فوك ملابسي ... طلعت للسيارة ، هو مرجع كرسي السيارة ومغفي ، ذكيت ع الجامة.
فتح الباب : ها
- زوجها ديتصل.
- عليج !
- اي هياته دا تشوف زوجها رقمه
- اي
- شنو اي ؟
- ست شنو المطلوب مني بعد ؟
- ما اعرف خفت... او... يييي ماكو شي ارجع نام .. ولا اكولك معاقب لتنام .. باي .
مشيت بسرعة وودخلت للمطبخ نزل ، واجا دك باب الششباك فتحت : خير ؟
- لتجاوبي واطلعي منها .
ديحجي .. دك تليفوني : هي دا تتصل
- جيبي
- مو خايف تتورط وعشاير
- دجيبي جيبي هي كورعت راسي وتكلي شو ما تمشط ..
- شنو هالمنطق ، ارجوك
- هشش ، الو ... نعم منو وياي ، العفو الست اافيان حاليا باجتماع مهم ، بس تطلع راح ابلغها تتصل بحضرتج ، اعتذر منج ما اكدر اوصللها من تفرغ ابلغها تخابرج فورا.
مع االسلامة
قفل منها : صلاوات مو بس مغامراتج، حتى الفوراً اتعلمتها .
- شكرا هسه بأمكانك تروح تنام
سديت باب الشباك ، دخلت جوا ..
ما مرت ساعتين ، اندكت الباب وجرسه يرن بنص البيت ، فزيت وكمت للكراج ، نزل عباس من السيارة وفتح الباب وجان يطلع زوجها .. اني هنا وكف گلبي ....
شكرا لزيارتكم عالم روايات سكيرهوم
