رواية بنت الخياط الفصل الثاني بقلم جمانه السعيدي
فاطمه....من طلب ايدي ابو عمار
اجا ابوي حتى ياخذ رائيي
بابا...اليوم اجو على فاطمه خطابه
امي...بس كون خوش ناس ولله هلفاطمه انوكل كلبي عليها كل ساعه جايني احد عليه
بيت ابو أمير اليوم اجو عليها ذوله جيرانه
الولد خريج ويشتغل بمطعم بس اني كتلهم يجي ابوها ويصير خير
وامس بيت ابو محمد الولد خوش ولد بس ابوهم يشرب
اني ادري بيك مراح توافق
بابا. لا هلمره خوش ناس محترمين بيت ابو عمار يردوها
الابنهم الزغير قصي
امي...ياا بيت ابو عمار ذوله بلشارع ورانا
بابا...لا ابو عمار ذيج المره رحنا للعمره اني ويااا
كلش ناس محترمين وخاصه هذا الولد الزغير دره مال الله شوفي فاطمه اذا تقبل حتى يجي الولد تشوفه ويشوفها
امي.. اذا ناس زينين فاطمه ماعدها مانع
بابا.. ميخالف اسئليها
فاطمه اول مااامي فتحت وياي الموضوع احس كلبي انشرح
حسيت اني مطمئنه
رغم اني ماشايفه الولد واول مره اسمع اسمه
فاطمه...اذا بابا يكول خوش ناس ماعندي مانع بس اشوف الولد بلاول
امي... اي ابوج هم هيج كال
فاطمه...حددنا الرؤيه الشرعيه بعد يومين
اني مخيطة ثوب اليه كلش حلو مرتب ومحتشم
ثوب محجبات وعندي شال ويااا
بدلت وخليت مكياج كلش خفيف اني اصلا حلوه بدون مكياج وعطر هادء
اندكت الباب بابا طلع استقبلهم جمانه السعيدي
اجا قصي هو وامه دخلو جوا امي راحت سلمت عليهم
شويه وامي اجت كالت تعاي سلمي عليهم
دخلت ام عمار وكفت وقصي وكف وياها حتى يسلم عليه
سلمت على ام عمار وبستها
التفت علي
فاطمه...مساء الخير
قصي...مساء النور
ابد ابد ماابالغ اذا اكول هاي النضره الاولى البسيطه
خلتني اوكع بحبه
لحد يكول شلون عبالك اعرفه من زمان
اكو تناغم صار بين روحي وروحه
حسيته دخل كلبي وكعد وتربع بي
كعدت كبالهم كنت محرجه على فرحانه على مرتبكه
رفعت راسي لكيته يباوع عليه مو نضره عاديه
لا نضره تعجب وانبهار
وكانما ما مصدك اني هلكد حلوه
بهاي اللحظه ام عمار كانت تحجي بموضوع القسمه والنصيب
ام عمار....كلشي قسمه ونصيب احنا هواي بنات رشحنا
الهاي الزواجه بس اني ابد ما بطلت ادعي رب العالمين
ينطي قصي على نيته
قصي كلبه طيب وحنيين واريد رب العالمين ينطي وحده على كلبه كون مثله حنيينه وبت اصول
هو الحمد لله صار سنتين من تخرج ويشتغل وياا ابو
التفتت على قصي وكالت هااا يمه قصي شنو رائيك
قصي.. كان مركز عليه ما مصدك اني كاعده كباله
رد على امه.. ....هااا شنو
ام عمار....يااا شبيك ووين بالك
فاطمه...اني ابتسمت ودنكت
هو راسا ابتسم
قصي....اعذريني بالي مو يمج سرحت شويه
ام عمار....يمه اني حبيت فاطمه وحبيت اهلها انت شتكول
قصي....مابعد كلامج كلام اني موافق
ام فاطمه....تسلمين عيوني انتي الاحسن رحمله والديج
قصي...انت فاطمه موافقه
فاطمه.. خجلت من سؤاله هذا شبي هيج يسئلني كدام ابوي
راسا كمت وطلعت برا
ابوي... اتشرفنا بيكم نسئل البنيه ونرجعلكم خبر
قصي....من رخصتك عمي ممكن تسئلها هسه
ابوي...ليش مستعجل مثل ما كالت خالتك كلشي قسمه ونصيب
قصي...يعني مابيها مجال تسئلوها هسه لان مااكدر انتضر
ابوي ضحك ورد علي بضحك
ابوي.. .عمي روح اليه كلام وياا ابوك انت شنو تريد تأخذها وياك هسه
قصي.. ياريت
الكل كام يضحك امي وابوي وخاله ام عمار واني هم ضحكت لان كنت اسمع كلامهم برا
ابوي ودعهم ابوي طلع وياهم راح الشغله
وامي دخلت عليه تضحك جمانه السعيدي
هذا الولد شبي اتهستر يكل الابوج اخذها هسه
فاطمه.....ضحكت ودخلت غرفتي
الصراحه حبيته وحبيت طريقته بلكلام واسلوبه
يمكن هو هذا الحب من أول نضره
ورا المغرب رجع ابوي للبيت تعشينا وكاعدين نشرب جاي رن تليفون ابوي
ابوي.. هله هله ابو عمار شلونك
ابو عمار....تسلم الله يحفظك انت شلونك
ابوي...تمام الحمد لله
ابو عمار علمود موضوع الخطبه ترا قصي ثبرني ثبيره
من رجع الهسه يلح عليه
انشاء الله ماعدكم مانع
ابوي....بعدني ما سئلت فاطمه اسئلها وارجعلكم خبر
ابو عمار...يصير خير انشاء الله
بس لا تتأخرون علينا لان احنا مجهزين كلشي
بس تصير الموافقه انشاء الله ازوجهم ثنيبنهم
هو وعمار بنفس اليوم
ابوي....لا ما نتأخر عليكم
ابو عمار... اسمع اسمع قصي شيكول مايصير تسئلها هسه
هذا الولد ملكوف مدري شبي ماعنده صبر
ابوي.. لا باجر ارجعلكم خبر
ابو عمار.. في امان الله
ابوي. الله وياك
قاطمه كنت سعيده بردت فعل قصي والحاحه عليه وكانما متمسك بيه ويخاف يفقدني
ابوي....هاا بابا شنو رائيج
فاطمه....انت تعرف أكثر مني اذا تعرفهم خوش ناس ماعندي مانع
امي.. اني حبيتهم حتى امهم مبينه خوش مره
ابوي. خلاص على خيرة الله باجر ارجعلهم الخبر
قصي...يارب يوافقون هاي البنيه سحرتني بشكلها
عمار...اثكل شويه فوك ما فكر متمسك بيها وراح يذبح نفسه عليها
قصي.. حقك ما شفتها شكد حلوه
عمار... وشراح تسوي بجمالها افهم هاي راح ترجعك ليوره تخلص فلوسك
اخذ وحده تستثمر حياتك وياها عينها مليانه
تنطيك مو تاخذ منك
قصي...ترا هما مو فكر بيتهم يخبل وحالتهم الماديه
زينه والبنيه محتشمه وحلوه
عمار.. انت ماتفتهم هي كوه يولي اطفر
شوفلك وحده ثانيه اهلها شباعنيين اهلها تجار
عينهم مليانه
قصي.. اهووو انت شنو دخلك اني عاجبتني واريدها
اني احبها
عمار. .... هههههه يحبها كعد بيتهم ربع ساعه يكول احبها طبعا انت حتى بلجمال ماتعرف
تلكيها تشبهك روح بابا نشوف منو الي راح يفوز بلاخير
قصي....يارب خلي هاي البنيه من قسمتي ونصيبي
اني حبيتها وتعلقت بيها
فاطمه اليله كله صورة قصي كبالي وهو يباوع عليه وردة فعله من شافني
من الصبح رن تليفون امي
امي منو يتصل علينا هسه الساعه تسعه
امي....الووو و
ام عمار.. صباح الخير عيوني ام فاطمه اني ام عمار
امي.. اهلا وسهلا هله ومرحبا جمانه السعيدي صباح العافيه عليكم
ام عمار... اعرف اني حاي اتصل من الصبح بس ولله قصي
اكل راسي
مبدل واكف على راسي مايقبل يطلع للشغل اله اتصل
عليكم واعرف وافقتو
قصي وهو واكف بصف امه خاله صباح الخير
امي.. صباح الخير
قصي ..... خاله فدوه العينج البارحه ما نمت ليش تشلعون كلبي
امي...ههههه ليش مستعجل
قصي....من شفتها تخبلت خاله فدوه هااا موافقين
امي.. اي موافقين اتصلو على ابوها حتى تتفقون على باقي التفاصيل
قصي... الف رحمه على والديج
ام عمار... شكرا ماقصرتو الف شكر
فاطمه....يااا هذا شيبي هههههه
امي...ايكول تخبلت عليها
اتصل ابو عمار وحددو المهر بعد اسبوع واحد
الأربعاء مهر عمار وندى والخميس المهر اني وقصي
دزولي فلوس حسب الاتفاق بين ابوي وابو عمار حتى اشتري ذهب واحجز صالون واشتري فستان للمهر
رحنا اني وامي اشترينا ذهب واشتريت فستان سماكي
فصال السمجه
ضيك وطويل ومن اسفل عريض كتفه مفتوح على شكل
حلك السمجه يعني مو دلع من الصدر
بس الدلع طالع منه الاكتاف
ردن ضيكه وطويله شعري سرحت وعافته مفترح
كذله حلوه مكياج هادء
فعلن طلعت باربي اخبل وياي عرايس ثنيبن بلصالون
اني غطيت عليهن
حتى اني تفاجئت بشكلي
طبعا اني مارحت المهر عمار وندى رغم همه عزموني
بس مارحت
كنت مشغوله اجهز للمهر مالتي
وبعدني ما متعرفه على ندى انحرجت اروح بعد المهر اتعرف عليها لان عزمتها بمهري
عن طريق خاله ام عمار
بيوم المهر اجت ندى وامها وأخوات عمار وكرايبهم
والجوارين البيت انترس ناس
من هذا اليوم عرفت ندى شكد حقيره وانانيه ومغروره
بس سمعت اني حلوه وخالتي تمدح بجمالي كدامها
شمسويه بنفسها لان سامعه من عيالي يكولن عليه حلوه مبالغين بمدح جمالي كدامها جمانه السعيدي
اجت للمهر مالتي حايره شمسويه حتى تبين احلى مني
واغنى مني واحسن مني شكد اني ضاغطتها وهي بعدها ما متعرفه عليه
تريد تبين هي احلى مني
طبعا مو غرور ولا تكبر بس اني طالعه احلى منها هواي
هي نفسها من شافتني كلش صاجت
سلمت عليه من ورا خشمها
ماقريت باسنني اول ماشافتني
ندى....شلونج ماابوسج اخاف على مكياجي
هذا المكياج مكلفين هواي
دارت وجها عني دخلت جوووا
.اني وين اكعود اخاف فستاني يخرب انتم ماتعرفون هذا الفستان شكد غالي
سعرا أغلى من حفلتكم هاي كلها ههههههه
امي...براحتج وين ما ؤهجبج اكعدي البيت بيتج
كعدت ونفخت نفسها نفخ عود شوفوني
فاطمه....اني ماضجت بس استغربت من طريقتها بلكلام
شنو هذا التكبر على شنو شايله نفسها
