رواية بنات سهر الفصل الثلاثون بقلم فراقد حسن علي
÷
لأم تبقى كما هي،
في حياتها وبعد موتها،
وفي صغرها وكبرها،
فهي عطر يفوح شذاه،
وعبير يسمو في علاه،
وزهر يشمّ رائحته الأبناء،
وأريج يتلألأ في وجوه الآباء،
ودفء وحنان وجمال وأمان،
ومحبّة ومودّة،
رحمة وألفة،
أعجوبة ومدرسة،
شخصيّة ذات قيم ومبادئ،
وعلو وهمم........................
===========///
(( على أتفاقنا مووو 😁 مو تركزون بالسحك هسه خلصت الكتابة ونشرت الحلقه بدون مراجعة قلبي ماينطيني أخليكم تنتظرون على باجر 💐💐))
مسرة//
بيوم ساهرة كالت / حلمت حلم وقلبي مقبوض منه
وخايفه على منتصر بس لا يصير شي بشغله ما حجت الحلم بس طلعت صدقه وانطتها للفقره .....
ما عدا على حلمها يومين وجنا نايمين وهستوه مشعشع وكت الفجر ومانسمع بس عياط تبارك رج البيت رج منتصر فز مخروع من نومه وطلع يركض بس بالداخليات
واني ادور على شي يسترني لكفت عباتي وركضت وراه
واشوف طارق وهمام مخلين تبارك بيناتهم مسوينها طوبه من الكتل
واحد يشمرها على الثاني
يمه من يمي خفت وكمت ارجف
من شفت طارق أدروش عليها
وعض لسانه ويمشع بشعرها
ويضربها كل راشدي ولا الثاني
همام ادروش عليها ركض جابلها الماسحه يريد يكتلها بيها
منتصر يفزعلها ويوخرها عنهم
وهنا صعدت ساهرة تركض
وراها خالتي يردون يفكونها من ايد طارق ما يكدروله
سوار واكفه باب غرفتها وشايه مشارق وتبجي واني ولا تقربت اخاف تجيني كفخة
خالتي وساهرة دفعن طارق عنها
ومنتصر شكك فانيله عليه من التعتعت فقد وكعلها دك كتل ، كتلها كتله موت
وهمام يصيح أطلعي لو هسه اعدمج ؟؟؟
هي تبجي وتعيط بخوف وترجف
وحالتها من الكتل تبجي اليهودي
وخالته وره ساهرة وتكله / والله ماعندي شي جنت نايمه وانتم بجيتوا باب الغرفة عليه
طارق اطفر عليها وسحلها من وره ساهره
-
وهنا منتصر كام يكفخ بي لان ادروش عليها
-
طارق كال المنتصر/ بدل ما تكفخني راشديات
شوف بنتك ويامن نايمه بالتلفون
-
راح دفع سوار ودخلها الغرفتهم
وطبك الباب بقوه
منتصر صاح بتبارك/ طلعي التلفون لو اشمرج من السطح
هي تحلف بالحسين وبالعباس ماعدها تلفون
همام كاللها / انا اعرف بيج ضامته بصدرج
طلعي لو انا هسه اعرينج كدام ابوج واطلعه
هي بقت تبجي وتحلف ماعدها شي
وجانت نايمه وطارق وهمام فاتوا عليها
ومنتصر بعد تخبل وين يسمع وين يشوف
منتصر عنده كلشي ولا سالفه الشرف
يكتل وينكتل عليه
-
الزمها من فتحته دشداشتها وشكها عليها
هنا ساهرة دفعته عنها وسترتها
كالتله / وخر انا اطلع التلفون منها
والله العظيم كتلني القهر عليها
شكلها يكسر الخاطر
كامت تلم بروحها من ابوها وعمها
ساهرة كالتلها /طلعي التلفون وانا اضمج بغرفتي
واخذيها مني كلمه امان
محد بعد اله شغله بيج
هي مدت ايدها وطلعت التلفون
وانطته الساهره،
هنا منتصر صاح/ بنت الكلب الف مره حلفتج
والف مره طبيتي على القرآن كدامي
الف مره امنع طارق وهمام عن كتلتج
الف مره احلف بدل عنج واكلهم انتم متوهمين
ماعدها تلفون ليش انا مااسمعها تخابر بليل
ليش بس انتم تسمعوها
كاله همام /حتى تصدكني من أكلك بنتك تخابر
وتواعد بعد من تروح يم امها
من كامت تحف حواجبها
وتخلي حمره من تطلع غسلت ايدي منها
من أمر من غرفتها بليل وأسمعها
تون وتنوص مراه ونايمه بحضن رجلها
الف مره أكلك منتصر بنتك وكح وصلفه
وشيطانه تسمع فتحت باب غرفتك
لو مشيت شحاطتك وتخلس
تكلي عندي ثقه بيها ماعدها هاي سوالف
صح وكحه بس ما عدها شي
بس انا الف مره سامعها واكلك تكلي ماكو شي
هسه سمعتها وخابرت طارق وكعدته من نومه
حتى يسمعها ويايه وبعد لا تجذبني
واذا تريد اخذها للطبيب شوفها بعدها بنيه لو لا
حاتم يكول عليها مشيتها خربانه .....
هنا منتصر كام يدك على راسه
يريد يلكفها من وره ساهرة وخالتي ويكتلها
وهن نامن بركبته حتى لا يكتلها
نزلتها ساهرة جوة وضمتها بغرفتها
طلع الصبح ومنتصر كلساع خشمه يطك دم
راد ياخذه همام للمستشفى ما قبل
بقى يغسل براسه جوة المي البارد
انوب جهال طارق تخبلوا بس يبجون
وهو طارق يرعد ويصيح جوة بغرفته
اجت خالتي طلعت سوار وجالها
وكالتله / احرك نفسك وحدك من طبك مرض
سودنت البنيه والجهال وياك
هذاك الصباح جان صباح اكشر علينا
-
منتصر وطارق وهمام خلوا تبارك بالنص
بس محد ضربها ،
-
خالتي وساهرة يحامنها
-
وهي اعترفت بكلشي
اتحب ابن خالها ، وهو هم يحبها
وامها تدري بعلاقتهم وهي التحف حواجبها
وتعدل بيها ،
وتعرف بيهم من يلتقون بيت جدها
لو يطلعون طلعه عائليه هم يرحون وياهم
سالها منتصر/ صاير بيناتكم شي
-
هي بقت ساكته
هنا كام عليها طارق ودفرها
وكاللها/ أحجي خل نفتهم راسنه من رجلينا
ونشوف الجرو الحبيتي شمسوي وياج
بقت تشهك وتبجي طارق كطع نفسها من دفرها
كالت / ماصاير شي والله
بس كم مره باسني وحظني
همام / كاللها لا تجذبين العصر ناخذج للطبيب
اعترفي بكلشي احسن مااذبحج
كالتله/ والله بعدني أبنيه
هنا منتصر غم كصته وصاح بيها /
الله اكبر عليج وعلى امج
ولج انا مرتي اخذتها ارمله
يعني صاحبة زلمة متوفي ،
ومن عرست عليها ما تعرف هي بنيه لو لا
-
وانتي بت بيت تحجيها وبكل صلافه بوجودي
وبوجود عمامج ،، بعدج بنيه
من اهمده الكبور الما طمني وطمج
عبن ما عرفت اربيج
-
ومن تشوفين امج المتربايه وبنت الاصول
كلها مرت ابويه شريفه وبت بيت وهي أرمله
مو بتها العفيفه الشريفه المستغفلة ابوها وخانت الثقه
طارق فتح تلفونها وبقى يقرأ بالرسائل
وجان يمشر التلفون عليها طشره براسها
كاللها / بنت الكلب من انعل ابوج لابو الرابطيج
ولج الك..... بنات الليل ما يعرفن يحجن هيج حجي
شنو تكليله الفلم ال.... حلو
شنو تكليه الوضع.... حلوة نجربها
هسه لو اعدمج هم ما يرتاح قلبي
ساهرة اخذتها ورجعت ضمتها بغرفتها
طارق خابر على ابو الولد هو خال تبارك
كاله /هسه تجي الك مهله ربع ساعه وانت يمي
ماكو اعتبر دم ابنك الجرو مهدور
منتصر اتخربط وتمدد على القنفه
هو من حادثة طارق شاك بروحه صار بي سكر
،بس يخاف يروح يتاكد
العفو هوايه بليل يروح للحمام
يعطش ودوم حلكه يباس
من ياكل حلا لو شي دهين يدوخ
وبس يجوع يكوم جسمه يرجف
وهو بعد يعرف نفسه مرات من يشاقه ويايه
يكلي ادائي متراجع بس لا لكفني السكر
وانتي الراح تخسرين ،
هنا غده وجهه ليمونه من الصفار
وكام يرجف سويتله عصير كيوي وانطيته
اجوي خوال تبارك ٣ وياهم ولد شباب ٢
بعد السلام طارق لا حجى ولا بد
خله التلفون بيد ابو الولد هو اسمه فراس ،
بقى ابوة يقرة ويبلعم الله واعلم شنو يقرة
كاله طارق/ بيها الخير ابنك فراس
وبنت اختك توته الحلوة عاقدين بيناتهم
واحنا اخر من يعلم
الرجال بقى ساكت
ومنتصر بقى ساكت
عاد خالها ثاني كال/ ان شاء الله نحل الموضوع
فراس ياخذ البنيه وكلشي يكعد بمكانه
اخو فراس الجبير جاي ويه ابوه
كال / امي ماتريد تبارك جنه بيتها
كومه صارتلنا مشاكل علمود هذا الموضوع
كاله طارق / انا ماامشي بحجي النسوان
لو ياخذها ويطم عاره وعارها
لو اخلي الفشك على روسهم تهلهل
همام كاله / حباب انت اتكتر خل الزلم تسولف
مادام تكول امي ما تقبل
عود بليل بول ونام خاف تكتلك ماما الصبح
انوب كبت عرك بين الولد وبين همام
وانت اسكت وانت اسمع
وما انحل الموضوع الا يمكن بعد ساعتين
قرروا بعد شهر فراس ياخذ تبارك وكلشي ينسد
منتصر وضعه كلش اتخربط
ونخاف على قلبه ، بقى النهار كله متمدد
اخذه العصر همام للطبيب يجيك وضعه
ساهرة بقت تصلي وتندعيله بالعافيه
اني حرت بخالتي خطيه سكرها وضغطها مرتفعات
وسوار شكد ما جانت تعاركها تبارك بس ماعافتها
خالتي دزتها عليها تشوفها
لكتها مصخنه ماادري من الخوف ماادري من الكتل
ساعدتها هي وساهرة اخذنها للحمام بردنها
واخذتلها اكل ، تكول /مااكلت شي قليل
وانطنها مسكنات ،
لفت راسها ونامت
الجهال طارق حاير بيهم
هو يحبهم يموت عليهم
بس من يزهك من بجيهم يكوم يعيط عليهم،
وخالتي تبقى تحجي عليه
تكله/ يخترعون لا تصيح بوجهم
انوب يصيح يكلها / شامرات الجهال عليه عوزي بس ارضعهم
خالتي تكله / محد طاكك على ايدك ذبهم بالكاع
هسه امهم تحير بيهم
هو يكلها / حتى يبس قلبهم من البجي
ويبقى شايل ياهو منهم اليبجي ويفتر بي
لليل منتصر رجع من الطبيب
نفس ما توقع ضاربه السكر
مسويله الدكتور تحليل سكر تراكمي
طالعه النسبه كلش عاليه،
بس كلبه مابي شي الحمد لله
احنا من بيتنا محد طش سالفه تبارك وفراس
بس من جهه امها وخالاتها وخوالها
مسوين من يمهم فلم هندي
وعساس طارق مهدد ابو فراس يكتل الولد
ويريد يكتل تبارك
ومتعاركين وياهم من جايين علينا خطار
منتصر ابد ما باوع بوجه تبارك ولا سأل عنها
وهي ابد ما تطلع من غرفة ساهرة
تخاف من ابوها وعمامها ضامة نفسها
شايفين أسم الله هاي الحاله من تصير بيت ناس
ويردون يسون عرس تلزك شلون ما جان
علمود يسدون سالفه خاف لا تكبر
حتى فرحة الواحد ما يحس بيها
اجوي خوال تبارك مشيه عليها
منتصر ما كعد بيها كعد عمو جابر وعمو شامل
وكل رياجيلنا الا منتصر أبوها ما كعد
بيومها سافر لغير محافظة
بحجة عندة شغله ضروريه ما يكدر يأجلها
بس هو خطية سواه هاي السفره حجة
يكول / وجهي صغير كدام اهلي وعمامي
واتفقوا على كلشي من حاضر وغايب
وعقدولهم بنفس اليوم وطارق عمها هو وكيلها
وحتى من رجع منتصر ثاني يوم
لا سلم عليها ولا باركلها
شافها كاعدة يمنا بالصالة
كاللها/ لا تشوفيني خلقتج لحد ما تنقلعين لبيت رباطج
هي راحت ضمت نفسها بغرفه ساهرة وبقت تبجي
حارت بيها لمى وخالتها صغيره
من ترتيب وتجهيزات سوالف الحفله والعرس
منتصر كالي / ممنوع توصلين يمها
اكسر ايدج ورجلج لو وصلتي يمها
حتى لا يكولن مرت ابوها ومرت ابوها ابقي بعيدة عنها
وعدا الشهر علينا برمشة عين
بس على منتصر جان بثكل الجبل
الليل يمر ويعدي وهو ما ينام يبقى يتكلب ،
وكم مره تعاركت وياه الكاه يدخن
ومره شايفته خالتي بليل واكف باب غرفه ساهرة
يباوع على بنته وعيونة مغوركة
ماتدري مقهور عليها
لو مقهور منها لان نزلت راسه ...
وقبل بيوم من حنتها اخذ حسين وسافر للشمال
شكد رادت خالتي منه يبقى وهو قفل
كاللها/ مااكدر اشوف فراس النذل
مطلعها من بيتي وغصبن عليه
لان يعرفوني مااطيقهم بعيشه الله
ويعتبر طلعتها كسرة خشم اليه
اخلي العرجة تفشك على روسهم
وهي تبارك شبعت بجي بيوم حنتها
هنا اجتها امها وخالاتها واقرباء امها
وسولها هذيج الحفله
وعماتها سهى ونهى ولمى وكل النسوان اقربائنا
موجودات هم ما قصرن وياها
-
وهنا اول مره اشوف مرت منتصر السابقة بالوجة
امانة الله حلوة صح جسمها مليان
بس حلوة وصاحبة السان
وقويه اخذت النسوان تصول وتجول بيهن
مكيفه وفرحانه بعرس بتها وابن اخوها
ولا باوعتلي بطرف عينها
جنها ولا تشوفني ولا مهتمة
أني وأساور وسوار ماخذات جهه وكاعدات
بس نتفرج مالنا دخل
أساور تموت على فقار والصراحه تستخطي
لان رجليه عوجه والنسوان حسبالك ما شايفات
جاهل رجليه مقوسه وبي عيب خلقي
كلساع وحده تسأل/ هذا شبي خطيه ليش كاعدين عنه ما تراجعون بي
واحنا نجاوب / والله نراجع بي
بس الطبيب يكول جسمه ناعم
وزنه قليل مايتحمل بنج لهيج عمليه يريده شويه يكبر وينشنش
من خلصت الحفلة مازن صاح على أساور ماقبل تبات يمنه ،
خالتي صاحت عليه /
شو تعال ليه اريدن اعاتبك
-
هو دخل وسلم على الجميع
-
وخالتي كالته / موزين ليش ما تخلي البنيه تبات عدنا
شنو تخاف نكرب عليها لو نكص منها وذره
هو ضحك وكاللها / عمه وروح أبويه متعلم عليها
مااعرف انام بدونها
وبيتي موحش بدون سوادينها
شافها شايله فقار كاللها / شنو شايلته
انطي لأمه يمعودة ما صدكت الله التفت عليه
هي غمزتله رادت بس بعد هو جطها
النسوان افتهمن السالفه واحنا ما ردنا نحجي
والله نخاف من الحسد والعين
هي هستوها حبلت ماصارلها شهر
كلهن كامن يسألن/ بالعافيه حبله
هو جاوبهن /الحمدلله الله رزقني باأنعام مو نعمه
الحمد لله نيتي صافيه وابو خيمه الزركة رزقني من اوسع ابوابه
خالتي كالتله/ امشي بدون مطرود
اخذ مريتك وروح لبويتك
الله يستر عليكم ويكفيكم شر العيون ألما تصلي على النبي.
وبيوم العرس طارق حجي ويه تبارك
كاللها / ترى الاخلاق والأدب شمرة مو تعلوم
وانتي من يوم يومج برعه وصلفه
اليوم اطلعج بستر من باب هذا البيت
ممنوع تردين عليه بس بحالتين
لو خطار لو جنازة
غيرهن اطكج جيله واشمرج باأقرب حاويه
خطيه خلاها تشبع بجي
وصدك بساعة الزفة
عمو جابر سلمها لخالها ابو فراس
يعني أبو رجلها وكاله / انطاها أبو حسين الك موش الفراس
طلعت تبارك من البيت بستر وعافيه
بس بقوا همام وطارق بقوا كاعدين على نار
اني وسوار ما رحنا وياهم بالزفه ما يقبلون
-
ساهرة مكسوره على امها هم ما راحت
-
بس خالتي راحت وياها
وطارق كلساع وكال لسوار/ خابري على امي
خل أتبرد قلبي لا هذا النذل يدك الناقصه
ويطعن بيها وينزل روسنه
وهي تتصل على خالتي تخاف منه
وخالتي تكلها /بعده العريس ما طلع علينا
همام تخبل كال /هذا ناقص قلبي لاعب منه
بقينا كاعدين على نار يمكن للفجر
يلا اتصلت خالتي وكالت /خل الولد يرتاحون
رايتهم بيضه
طلع العريس مكشر ويضحك .
خطيه منتصر من الصبح أتصل عليه
صوته مال واحد باجي
كالي /الحجيه شلونها بالي يمها
راحت ويه تبارك مو ؟؟
انا وصيتها تروح وياها
عرفته يستحي يسإل عليها
كتله / خالتي زينه وراحت وياها ما عافتها وحدها
وهي تبارك بخير الحمد لله أمورها زينه
وبشرتنا خالتي صارت مرت فراس
ان شاء الله يوم تصير جد وتفرح بجهالها
هو كالي/ من ترجع الحجيه خل تتصل عليه
وصدك يمكن اسبوع يلا رجع منتصر من السفر
وحسين محمل اشكال الوان هدوم وملاعيب
لجهال طارق يموت عليهم ،
يتوسل بطارق يكله /بس انطيني وحده من بناتك اسجلها بااسمي ومن نكبر اتزوجها
طارق يكله/ ابد هذن خواتك يتربن وياك
اذبحك اذا تباوعلهن بغير نظره
والحمد لله عدت الايام ومشت الاشهر
وعدت السنه ، اوضاعنا كلها خير وعافية
أساور جابت بنيه من حشى خلقه الله زركة وشعرها سيم مواعين تلعب ستين نفس
سمتها ((قطوف ))
ومازن عنده احلى من زليخة
يشمها شم ويصبح افيشششش
هسه حسيت بهواء الدنيا
لمى خطيه مبين الحزن بعيونها علمود الخلفه
بس ولا بينت دارت اساور لان جابت عمليه
وتركض إلها ولبتها الزركة
وفرحانه لفرحة مازن
وعافت بيتها وسكنت يمهم
وحيدر بالشقه يشتكي لخالتي / يكلها الله يرضى
من وره الذبانه الزركة مرتي اتعوفني
شلون بلا أبوكها من بيت اخوي واجيبها بيتي
بلكت مريتي تعقل وتركد يمي
وخالتي خطية بكل صلاة تدعي اللمى والحيدر
الله يرزقهم بالذريه ويفرح قلبهم
وخوات مازن وفاء وشهلاء
ابد ماوصلن ولا باركن ولا ادخلن
ولا جن اخوهن الله فرح قلبه ورزقه وهو مازن الصراحة قلبه شايل عليهن شهرن بااساور لحد ماكالتلهن ملائكة السماء بسجن كافي .
وأني بعد ثلاث سنوات من زواجي
تعبت بين ركضت الاطباء والأعشاب
أركض علمود الحمل
عاد كعدت وسكتت كمت كلشي مااخذ
عدا عود القسط الهندي .وسلمت امري لله
وبهاي السنة صادفت خطوبة همام
خطب فاتن بت عمه شامل أخت مهند
الحمد لله من نحلت عقدة فاتن وتمت خطوبتهم
خطيه همام يحبها من أيام طفولتهم
بس هي جانت ما تريده تكول حاسبته أخويه
بس من نهو عليها تكول غيرت تفكيري تجاهه
وعدنا هوسه وخطار والناس يمنه
اشتغل واركض وأحس الكاع تفتر بيه وكلش تعبانه
واريد بس انام
ورحم الله والديه الينطيني تمر لو كونيه اكلها ،
صار أكلي وشربي عباره عن تمر
اكله هيج رطب
لو اسوي حلاوه شعث
واسوي عصير
ابد ما نكرت على روحي اني حامل
لو واحد انتبه عليه ،
لان من طرحت العفو الدوره تخربطت عندي
وشكد اسوي تحاليل ويطلع كلشي ماكو وادخل بخيبة أمل جديده
لحد ما منتصر هو أنتبه عليه
كالي /جسمج متغير
وهوايه تنامين
واكلج للتمر مو طبيعي
العصر اخذج للتحليل
كتله / مااروح مثل كل مره وكلشي ماكو
وعدت ثلاث أشهر والدوره ماكو
عندي عادي مره بقت ٥ أشهر يلا شرفت
بس هنا اني كمت اصدك روحي حامل من الاعراض العندي
انام هواايه ،
اتشهى اكل كلشي اشوفه اريد اكل من عنده
حامض حلو حار ماصخ المهم شي ينوكل
بطني صارت شويه تبين
وياهي التكلي صاير عندج كرش
اكلها من اكل التمن
وكمت أكل بليل متاخرة
لحد ما يوم نايمه بحظن منتصر
كلش ضايقني دفعته اختنكت
وبطني صارت بيها نغزات حسيتها مو طبيعيه
-
كتله /مااعرف شبيه اختنكت وبطني تنغزني
-
كالي / والعباس حبله جسمج متغير
ولون جسمج مختلف ،
ليش ما تخليني اخذج للدكتوره
ونتأكد مخسرانين شي
ثاني يوم رحت اني وساهرة للدكتوره
والف الحمد لله طلعت صدك حبله
وحملي تام ثلاث اشهر وداخله بشهر الرابع
وكالتلي متاكدة بيج بنيه
يمه فرحة خالتي ما اوصفه
وزعت حلال المشاكل
وزعت خبزت العباس
وزعت زرده
ومنتصر بس يشوفني افتر بالبيت
يكلي /اكعدي شويه شبيج تركضين الشغل ما يخلص
خلي البطنج يثبت شويه
وحسين بس يسمع شايله جهال طارق
صاح / شكو شايله هذوله الوسخين
خلي يولون واحدهم معصعص جنهم رجل دجاجه
لا تباوعين هوايه بوجهم اخاف اختي نطلع تشبهم
هنا خالتي تستلمه وتبقى ادافع للجهال
ما تقبل نحجي عليهم
وساهرة كل ما تصلي تقرالي قران على كلاص مي وتنطيناه اشربه علمود صحه الجاهل
يجي معافى من الامراض
ساهرة وجودها بالبيت بمكانة خالتي
الكل يحترمها والكل يسمع كلمتها
ودوم الولد يستشيروها
وصدك هي ومنتصر استغفر الله اخوان
بس كدام العالم هم مرتبطين بااسم المتزوجين
ساهرة مااعرف شنو طينتها
مراه قويه ، صلبه ، شجاعه
عقلها جبير ، عدها مخافه الله
نفسها عزيزة ،
كل اليهمها بس تزرع خير بهاي الدنيا
عدها إيمان كلش قوي برب العالمين
من صدك حجيه وتخاف الله
ونفسها مليانه خير وعينها شبعانه
من الأخير متنازله عن الدنيا لليريدها .
وما شاء الله همام ما طول شهرين وعرس
هو كلشي مجهز ماعنده شي ناقص
على كولته عريس جاهز ناقصه بس العروسة
وفاتن استغفر الله من ذنبها
ولا تكولون مهند ألخير أخوها
بعدها عروس وسوتلنا مشكله على تنظيف البيت ،
اني نظفت
وانتي اشتغلتي ،
وانتي نمتي ،
وانتي كعدتي
والله جنت بس اني افتر بالبيت
وتساعدني سوار على نومة جهالها
نكف البيت ماعدنا احد يوسخ
وساهرة وخالتي على الطبخ ، العجين الخبز
يعني متراهمات على كلشي ما عدنا مشاكل
بس هي سوتلها سالفه على شي ما يسوه
خالتي ست اشهر وكالت المنتصر /
مااتحمل مشاكل مرت همام طلعها من بيتي
شرانيه ونسيت هي من نسوان ال الحسن .
منتصر استشار همام وطارق
يطلعون همام يسكن ويستقل وحده بيت ساهره
البصف بيت حيدر ومازن واختهم شهلاء
-
بالبدايه همام اعترض
خاف من تحمل المسؤولية وتعب الدنيا ،
-
بس هي فاتن كيفت على الفكرة وقنعت همام
-
والحمد لله طلعوا بيت وحدهم وسكنوا بيت ساهرة
بقينا بس أحنا بالبيت أني ومنتصر
وسوار وطارق وجهالهم
وخالتي ،وساهرة ،وحسين
الحمدلله كلش متفاهمين وكلشي ما عدنه
والصراحه خالتي ما تقبل طارق يطلع بيت وحدة
تخاف يرجع للدرب التعبان
وهم تخاف على سوار وجهالها بعدهم صغار
اني هنا الحمد لله صار عندي بنيه سمتها ساهرة (( ابرار ))
والصراحة اني ما ردت اغثها لساهره
تنكط زينات ويايه ويه خواتي
وهي ابرار اليه اول وتالي
خليتها بحظنها تربيها اليه
ومنتصر ذبح عجل على جيابتي
وجيتها بسلامه
وحسين طاير بيها يبعد جهال طارق عنها
كام يحاصص بينهم وبين اخته
مخلي خالتي كلساع تكب عليه
ما تنطي بجهال طارق لو تثالث الدنيا
تبارك ابد لا باركت ولا سألت ولا شافت أختها
اني هم ما عتبت عليها
لان ما تسوة العتب
ومرت سنه ونص تقريبا على زوجها
وابوها مايحجي وياها
وشكد حاولت تراضي وهو ما يقبل
لحد ما بيوم متخربطة وماخذيها للمستشفى
طلع بيها مصران اعور وسولها عمليه
وهم ما راح عليها يكول/ قلبي مزروف من وراها
عاد أجى ماجد وسمعه تسجيل تلفون
تبجي بالبنج وتذكر بس اسم ابوها
وتصيح عليه/ تعالي بويه اريد اشوفك قبل لا اموت
هنا خالتي وساهرة كالن أله /
كافي زعل وخاف الله بيها ،
تراها هي واليتيمه سويه، لا أم بيها خير وتحتويها
ولا أنت التحن عليها ،
فكرتوا بس بنفسكم من اطلكتوا
وما فكرتوا بجهالكم بعدين شراح يصير بيهم
وبسبب مشاكلكم هي اول ضحيه جانت بيناتكم
ومرت خالها مشوفتها نجوم الظهر
ورجلها ما يحل رجل الدجاجة اذا ما يستشير امه
وما تكدر تجي زعلانه تخاف منك ومن طارق
عاد الحمد لله قلبه شويه لآن
وأخذ ساهرة وراحلها للمستشفى
ومن طلعوها للبيت راح جابها يمنه
اباوعلها مو هذيج تبارك التصهل وتزاكط
أحسها مكسوره جنح ، ومذلوله
وبس تبجي ، انوب ضعفانه مخروطه خرط
اتكول / مااشتهي أكل من وره قهر عمتي
تحسب اللكمة عليه عدهم خير من الله
والنعمة يشمروها بالزباله استغفر الله،
بس مخليتني براسها وتباوعلي
شنو اكلت وشنو شربت
انوب عدها تشحم على المبايض يمنع الحمل
وشاده وياها عمتها على الخلفه
تكول / حتى بنومتي انا ورجلي تدخل
بكلشي تدخل،
حتى ويه هذنيج الجناين
الأثنين هم مصخمه حياتهن
يشكن ويبجن ويلطمن منها
تكول / ولدها خرشاشه بيدها ويسمعون كلامها
هي عمتها برعه وصلفه ما تهاب حتى الرجال
لو وكف بوجهه
خطية بقت يمنا عشره ايام اندريها علمود عمليتها
واشوفها حبت أختها أبرار وتشيلها
وحسين تعامله زين مو مثل قبل ما تهتمله
أحسها شويه كبرت
اجى رجلها واخذها من شالت الخياط
ومن راحت كامت تبجي
كالت لابوها / بويه خلصني وأصيرن خدامة جوة رجليك ،،غلطت وعرفت حجم غلطتي
منتصر يتكطع قلبها عليها
بس كال / احسن اعوفها شويه يم العيال
خل يطلعولها كلب جديد
اذا ما تتعاقب ما تعرف شنو غلطها
وما تكبر وما تفكر تبقى زعطوطه
خلي عمتها شويه تربيها ..........
-
-
-
وعدت الايام ومشت الاشهر والسنين
والحمد لله كلمن عايش حياته
وصدق الذي قال الدنيا دار لهو
يخلص اليوم بين شغل البيت وركضت الجهال
الى هذا يومنا عايشين بيت خالتي فاطمة
اني ورجلي وجهالي ٣
ابرار /بنتي الكبيره
و أدهم /هذا حبيب منتصر
و أيمن/ هذا الصغير شالع قلبي من الوكاحة
اني ومنتصر الف الحمد لله متصافين وعايشين
بتفاهم منتصر عقلة كلش جبير
حجي يخاف الله، وصاحب مبادئ واخلاق
الف الحمد لله من رب العالمين جعلة من قسمتي
÷÷÷÷÷÷÷÷÷÷÷÷
سوار وطارق الحمد لله حياتهم نوعا ما زينه
وهوايه تغير وصار شخص ثاني
وهو امانة الله كطع الشرب والدروب التعبانة
كطع نهائي من يوم ما حلف المنتصر
واعلن التوبه على كولته
وعقله واعي صاحب عقل تجاري
الحمد لله مستقل بشغل وحدة
يخص ادوات سيارات الاحتياطيه وقطع الغيار والاكسسوارات يعني كلشي يخص السيارات
وشغله بي خير وبركة من اوسع ابواب رب السموات
بس دوم يتمشكل هو وسوار علمود سوالف البنات
استغفر الله هذا النت اجى علينا غضب وبلاء
هو ينشر صوره بأي مكان يروحله بسفره لو شغل
وهن الحبايب يعلقن كله/ منور الزين
منور أبو فقوري الوردة
فديتك
واااوي تخبل شهل الأناقه
يالله تنكط رجوله
وهنيال زوجتك عليك
وبالعافية على الماخذها
ومن هذا الحجي الماصخ المنزوع منه الخجل والحياء
وسوار تتعارك وياه تغار عليه
وهو يكلها/ ماعندي شي ويه وحدة ليش تسوين لغوة
-
تكله/ مو شفتك بعيني تحجي وياها بالمراسله
-
يكلها / ماعندي شي وياها وهي شامره روحها
اكضي وياها وكت
-
هي تبقى تبجي تنقهر وتغار عليه
هو يتخبل من يشوفها تبجي
-
يكلها /ليش ماعندج ثقه بيه
-
هي تكله / اني عندي ثقه بيك
بس ماعندي ثقه بيهن
الي تخون ثقه ابوها واخواها شنو اترجى منها
-
وعلى هاي سوالف النت أغلب مشاكلهم
فقار سوله عمليه الرجليه
خطيه مرتين دخل عمليات
والف الحمد لله الدكتور شاطر
صحح عظم الساق عندة
كومه تعب امه وابوه وياه
بس الحمد لله رجليه زينه يعني اليشوفه يمشي
يكول كلشي ما بي
بس خطيه هو هسه جبير بالمدرسه
يستحي يلبس برموده لو شورت مال رياضه
رجليه من الركبه وجوة كلهن اثار واضحة
من عمليه تقويم العظم عنده
وسجلوا بالمدرسه فقار /مشارق /وهج
يلا سوار حبلت
طارق كاللها/ اريد بزره شنو بس ذوله
بعدج صغيره خلفيلي بعد
واذا ما تقبلين تحبلين والعباس ازوج عليج
هي كالأسد أخذتها ساهرة وراحت ذبت اللولب
مرتين جددته خلال ما سجلت جهالها بالمدرسه
والحمد لله هسه عدها /عبد الله /عمره سنه
الحمد لله الحد هسه مابي شي طالع من الامراض
الوراثه الموجودة بالعائله
جهال طارق وسوار حاليا هم
فقار / هذا قلب طارق الينبض
مشارق
وهج
وعبد الله.
÷÷÷÷÷÷÷÷÷÷÷÷÷÷÷÷
همام خطيه لليوم ما صار عندة جاهل
-
مرته حبلت يمكن أربع مرات وطرحت
وما يثبت عدها الحمل عدها خلل برحمها
مو شغله عدها جرثومه
لا تكوين رحمها مو طبيعي
يعني بي تشوه خلقي ما يتحمل ثقل الجاهل
وكم مره كالوله اتزوج ما يقبل
يكول/ بعد هاي كتبت الله اليه ،
وانا راضي بيها
هو خطيه مفرفح قلبه على الجاهل
متعلق بعبد الله ابن طارق لان بعده صغيره
حتى بالشقه كال الطارق/ انا مو اخوك لو تنطيني عبودي ، لو تفعل الخلطه السحريه عندك
بلكت مرتك تحبل بتوم وتنطيني واحد
÷÷÷÷÷÷÷÷÷÷÷÷÷÷
أما أساور ومازن الف الحمد لله متصافين
ما شاء الله صار عدهم ٤ جهال
قطوف / الجبيره زركة وأم دميعه
و نوح /هذا وكح وينكط خباثه
و كرم / هذا حبيب مازن مميز عنده
و جنى / هاي بعمر عبدالله ابن سوار
بس انشط من عنده ومبينه وكحة من هسه
مازن هوايه يغار على أساور مطلع روحها
لابسة بوشيه ومحبوسه بالبيت ومامخلصه من عنده
هي هم ما تعانده شيكول تكله/ صار
واحسن شي تسوي حتى تكسب راحت بالها
ومن يروح للدوام يقفل الباب عليها وعلى جهالها
هي عدها نسخه ثانيه من المفتاح
بس هيج نسخه مالها داعي
لان ممنوع عليها تطلع باب الشارع بدونه
هاي النسخه تستخدمها في حال لا سامح الله
صار شي بالجهال لو عليها شي حتى تطلع من البيت
ومن يجي من الدوام بليل تكول/ يفتش تلفوني
ينبشه نبش ،
وهي هم مو هلكد تعرف للتلفون
حالها من حالي وحال سوار
نستخدمه كد المخابره
ونتابع سينمانا علمود المسلسلات الحديثه
ما نعرف عود نثبت برامج
لو نسوي أميل لو هاي سوالف
التخص البرامج المعروفه هسه
نبقى نتوسل بواحد من الولد يسوي التلفون النا
وصارلنا فتره ثبتنا برنامج الواتباد
لمى عرفتنا عليه
نقرة قصص وكت فراغنا
وهم كبت العركه ويه رجولتنا
والله ملتهيات بالقرايه
وعايفات البيت والجهال
والقران الكريم نقره بوكت نومتهم لو وكت لعبهم
أنوب طلعوا بحجة جديده والله تتأثرن بالتقرنه
والقصص غيرت تفكيرجن
مازن حذف البرنامج من جهاز أساور
-
وطارق هم حذف البرنامج من جهاز سوار
-
اني منتصر مرتين حذفه واكلب خلقتي وازعل
ويرجعه اليه ،
والله راح يخبلوني الرياجيل ليش مخلين عقلهم
ويه برنامج ينشر قصص مكتوبه
وهم برنامج نسائي ومابي اي شي مو زين
من واحدهم يحجي يكول/ لو أنا بحياتج لو البرنامج!!!
يابه نختارك انت وأمرنا لله ..
÷÷÷÷÷÷÷÷÷÷÷÷÷÷÷÷÷
لمى بقت ٨ سنوات بدون جاهل
خطيه ما خلت هي وحيدر طبيب يعتب عليهم
حتى لسوريا سافروا
للهند . للأردن
ماخلوا طبيب ينذكر ما راحوله
-
لمى ما بيها شي نظيفه
بس حيدر خطيه هو بي الخلل
-
واحسبوا كل ما تجيب وحده من عدنا
لمى اداريها وداري الجاهل
خطيه هوايه تحب الجهال تموت عليهم
وتشبع بجي على صدر الجاهل المولود جديد
خطيه تكول / والله مو حسد
بس اريد انخاه بجاه عند الله كون يرزقني
وسمعت بالصدفه من مرأه جارتهم
تكلها / اليعتني للأمام الرضا أبو محمد لأيران
وينخاه بجاه عد ربه ، ما يرده خايب
وهي فرفحت كالت / تعبت من الاطباء والعلاجات
أتعنى للأمام الرضا أنخاه وادخل بخته
واشبع زيارة وأجي
وحتى إسم الطبيب هناك ما أذكره
وصدك سافرت هي ورجلها
وراحت معتنيه للأمام الرضا
ورجعت كلها أمل بشارة ال بيت النبي
والف الحمد لله رب العالمين ما رجعها خايبه وعدتها شهرين ومن حللت وطلعت حبله خطية حيدر اليبجي مو هي
والله فرحتهم ما ألها وصف
ربي يرزقها لكل محروم
وحيدر قام عليها حصار ممنوع تتحرك جابها يمنا حتى لا تتحرك ولا تشتغل وكل الأقرباء يسالون/ هااا شلون اوضاعها ؟؟
والله هي زينه الحمد لله ما بيها شي بس بعد من كثر خوفهم
لحد ما جابت لمى بنية وسمتها (( فاطمة ))حيدر شيب قلبه ،
الله يرزق فرحتهم لكل محروم بحق كل طفل رضيع
حيدر وصار أبو فاطمة تخبل
طاير بيها من الفرحه
هي بنت أنفاس و لبسها تراجي وحجول ذهب وممنوع تبجي ، وممنوع وممنوع .
وهل فاطمة الزركة اخذت قلبهم وعقلهم
وهي لمى لحد هسه هم تحاول تسوي جاهل ثاني
تكول / بعد كبرت بلكت الله يرزقني بحمل ثاني
أخ لو أخت لفطوم
المشكله خطيه مو بيها برجلها
بس هم تراجع تكول /حتى لا أقهره
الله يرزقها ويعوضها بخير بالأيام القادمة
÷÷÷÷÷÷÷÷÷÷÷÷÷÷÷÷÷÷÷÷
سهى بقت على جهالها ٤ ما خلفت بعد
وما شاء الله ولدها واحدهم صار ولد شاب
وبناتها صارن بنات حديثات على كولت خالتي
ورجلها (سعيد ) مدرس مادة الفيزياء
وهم فتح اسواق غذائية
الحمدلله عيشتهم زينه
وطلعت من بيت عيالها بيت وحدها
وحتى حموينها كلمن كعد بيت وحدة
عمو جابر أبو سعيد توفي الله يرحمه
ويمكن وره أربع سنوات توفت وراه زوجته
وبيتهم أتقسم ورث على ولدهم .
الله يرحمهم ويسكنهم فسيح جناته
÷÷÷÷÷÷÷÷÷÷÷÷÷÷÷÷÷÷÷÷
ونهى ورجلها وميض
حياتهم هادئة مابيها شي مميز
حالهم حال أغلب الناس
وهم طلعت بيت وحدها من بيت خالها وسبحان صار عدها بس أثنين جهال وكعدت شكد رادت تسوي جاهل ثالث وماكو بعد رزق الله وقسمته عادله على جميع خلقه
÷÷÷÷÷÷÷÷÷÷÷÷÷÷÷÷÷÷÷÷
اما هدى سبحان الله قدمت على القرعه
وطلع أسمها للحج ولازم يروح وياها مِحرم
مهند رجلها راح وياها ،
وهم راحت وياهم حماتها أخت مهند أكبر من عنده
ولان هي من ذوي الشهداء
أبنها خطيه عسكري انقتل بالأنبار
من وره غدر الدواعش
فقدمت على مؤسسه الشهداء وطلع أسمها
وبتاريخ ١١ / ٩ / ٢٠١٥ صادف يوم الجمعة
اذا تذكرون حادثة سقوط آلة رافعة بالحرم المكي
علمود مشروع توسعة المسجد الحرام
جانت هدى ومهند وأخته من ضمن الحجاج
بهذيج السنه رأحوا سويه
وصارت حادثة سقوط الرافعه ،،
فهدى وحماتها جانن من ضمن الجرحى ومهند هم أنصاب
ومن عرفنا بخبر إصابتهم
فرحح قلب منتصر على مهند
مو على اخته هدى ،
وتعرفون بعد الإجراءات بالعراق شلون سريعه
منتصر وهمام وماجد ومحمد أخوان مهند
طلعوا للسعودية عليهم
رجعوا هدى وحماتها أم الشهيد بالتابوت
متوفيات هناك بسبب قوة أصابتهن
وانتقلن الى رحمة الله
الله يغفر ذبهن ويسكنهن بمنزله طيبة
وشكد ما هدى أذتني وشهرت بسمعتي
وسمعة خواتي وماما
بس من شفتها بالتابوت ومكفنه مناك من السعودية
جابوها جاهزة حتى مخليها بكيس طبي
سامحتها وبريتها الذمة وحللتها وواهبتها من قلب والسان
واخذوها لدار حقها دفنوها بكربلاء
هي وحماتها أم الشهيد
ومهند جابوا متكسر تكسر
يمكن اقل الأسبوع بس كفوا الفاتحة طلعوا بي للهند هناك عالجوة
وصارله سنتين من أتزوج
أخذ من اقرباء عماته هناك من اهلنا بالجنوب
بنيه جبيرة بالعمر تطلع بكبر لمى
ما متزوجة وهو هم محتاج مراه إداري لان ولده وبناته شباب كبار
وسبحان الله من شهرها حبلت وجابتله ولد وعلى الأربعين هم حبلت وهسه بحظنها ولد ثاني
÷÷÷÷÷÷÷÷÷÷÷÷÷÷÷÷÷÷÷
وتبارك بقت اربعه سنوات عايشه بيت خالها
مرت خالها سكتها المر ،
شوفتها نجوم الظهر
ورجلها كلشي ماكو لا يحل ولا يربط
منتصر دز على رجلها وحجه وياه
كاله / بنتي ما مستغني عنها ،
تروح تحاجي ابوك من عين باجر تشيل غراضك
وتسكن بشقه بعمارتنا
ومااريد منك إيجار اعتبرها حصه تبارك من ورثها
اسبوع وهو ما مرجع خبر المنتصر
لان أمه ما تقبل على طلعتهم
راح طارق وهمام وعمو حاتم
لان منتصر ما يحجي وياهم
حلو الموضوع واجوي
وراحت لمى وبيداء شيلنها من بيت خالها
ومناك جايه امها مساعدتهن
وسكنت بشقه بعمارة أبوها
وخلصت من ضيم العيال
وهسه عدها بس بنيه أسمها ( ترتيل )
انقلع قلبها يلا صارت عدها
لان عدها تشحم مااعرف دهون على المبايض
وتكيس هذن السوالف تمنع الحمل عدها
الله يرزقها ويخلصها من مراجعة الاطباء والعلاجات
÷÷÷÷÷÷÷÷÷÷÷÷÷÷÷÷÷÷÷
وعمو حاتم بطل هذيج سوالف
وصار رجال متقاعد يمشي ويطفي بدكم الكهرباء ويفتش على القشه لو وكعت بالكاع
وعليه بيته ومرته وجهاله وبس
وين ماكو فاتحة لو عرس لو فصل عشاير
عمو حاتم موجود بي ،
يركض للغريب والاقرباء
صارت روحة بهذن السوالف
يكول/ اضوج من كعدت البيت
وابنه جواد بهذا شهر الخامس عرس أخذ بنت خالته ، وانوب
ازمة كورونا ماعزموا هوايه ناس ، بس احنا الأقرباء واهل الشارع والحمد لله صار عرسه حلو
وكلنا فرحنا لفرحة عمو حاتم وبيداء
÷÷÷÷÷÷÷÷÷÷÷÷÷÷÷÷÷÷÷÷÷
وحسين ما شاء الله هو حاليا شاب وسيم يعرف كلشي بهاي الدنيا
هوايه ذكي وفطن وأبد ماينسى
وما شاء الله سريع الحفظ
اليشوفه مستحيل يكول عليه أعمى
وغار من جواد هم يريد يعرس
وجاي أندورله على مرأه نريد نزوجةوما يريد يخطب اي وحدة جان يريد مواصفات كون بيضه ،
ومربربه وعيونها وسيعه ، ومخلصه مدرسه ، وأهم شي صاحبة جسم مليان
يكول / اريدها دوشك ديباج منفش
الحمد لله ما ناقصة شي صح ما يشوف بعيونه بس كلشي بالدنيا يشوفه أبيض واضح بدماغه وتفكيره ،
وعيشته وعيشت مرته بالمستقبل
الحمد لله دابره عدهم خير من الله .
أدعيله من لبة قلبي
كون الله يرزقه بنت الحلال أليرتاح وياها ويرزقه بالذريه الصالحه والخاليه من الامراض
÷÷÷÷÷÷÷÷÷÷÷÷÷÷÷÷÷÷
ساهرة صارت أمنا التعلمنا وتوجهنا
وبيبي لجهالنا ،
شكد مااسولف عنها قليل بحقها
وبس أكول وجودها بحياتنا نعمة
الله يديمها النا ،
÷÷÷÷÷÷÷÷÷÷÷÷÷÷÷÷÷
وبقت خالتي فاطمة زينه ألنسوان
الف الحمد لله لحد هسه عايشه
الله يرزقها العمر والعافية
صارت مرأه جبيرة خطية
سمعها قليل ومو هلكد تشوف
بس شايله نفسه خطية
العفو تدخل للحمام وحدها ،
تعرف ولدها ، وبناتها
تاكل وتشرب وحدها ،
تصلي فروضها بوكتهن
بس ما تكدر تمشي وحدها لازم نسندها
وما تكدر تسبح لوحدها اني لو سوار نسبحها
تموت علينا اني وسوار ابد ما تنطي بينا
وتموت على جهالنا تفرقهم عن جهال بناتها
واحنا مدارياتها ونحبها بمعزة امنا سهر .......
وهاي سهر الي يعتبروها ال الحسن مراة مو زينه واني وخواتي نشوفها شجرة مثمرة ولهذا يومنا تكرم بثمرها الطيب لليوم نراها أجمل من رأينا ومن كفها طهراً ارتوينا
وبحب الحياة يا نبعنا منك استقينا
لا أحد يشبهك يا أمي، فأنت قمرنا في عتمة الليالي،ونور شمسنا في صباحي،بذكراك العطر نحيا،
وعلي يديك تعلمنا معنى الحب غير المشروط......
الى جنات الخلد وحسن المأوى ...
ألى أبي عدنان ألقاتل بنظر أل الحسن
أقول/ يا من غرّست حُبّ الله في فؤادي،
ورسّخت عقيدة التوحيد في أعماقي
يا من كنت لي أُماً في الحنان،
ومعلماً في الأخلاق،
وأختاً في النصح والإرشاد
نصائحك نورٌ أسير عليها في حياتي،
وابتسامتك عندما أذكرها ثلجٌ يُطفئ خوفي وألمي
بحر قلبي الواسع أنتِ،
وموج عقلي الدافئ أنتِ،
وبياض قلبك بدرٌ في سماء نفسي،
ومهما وصفتك فلن أستطيع أن أكمل ليس تهاوناً،
ولكن شيء أعمق من ذلك وهو أنت أبي ...
صحيح الجنة ماهي تحت أقدامك
ولكن تحتها رأينا الحياة أكرم وأطيب وأطهر
ألى جنات ألخلد وحسن ألمأوى .........
-
مسرة // بلغت بحزني أعالي القمم
واخجلت بالصبر كل الهمم
يحاصرني الخوف من كلّ صوب
ويعزفني الفقر أشجى نغم
وذنبي لعمري أليم
فذنبي أنني غريب يتيم ،،،
أضافة لذنبي أنني أمراة ترملت من صغري
أساور // فيا أمي أينك ؟؟
هل تسمعين نحيب جراحي بصوت السنين
وأعلم أنك لا تسمعين !!
فقد أخرس الصوت فيك الحنين
رحلتي وطفلتك بين العذاب
كحمل تمزّق بين الذئاب
يصيح ويشحذ عطف الوحوش
ولكنّ إحساسهم في غياب جريح
وذنبي لعمري أليم
فذنبي أنني غريب يتيم
وإضافة إلى ذنبي فأنني أحمل ذنب امي للممات
سوار //هنالك طفلة تئن وتتوجع
وتبكي أين أمها،، أبوها وأين أثرهم؟؟
ربما هم ماتوا ،،،،
فهي مشردة وعن السعادة تبحث
يا لها من بائسة متعبة
قد كان والديها لها مثل الغيمتي
يحمونها من لـهيب الشمس وزمهرير البردي
وقفت فى ذهول وسالت دموعها على الخدي
تسيل مثل شلال يجري
جميع الاطفال يرمقوهاا بنظرة استحقاري
هي تسأل الكل ينبذني لربما لا يهمهم أمري
بل هم يتورون عني عندما يجتمعون
و يلعبون ولا يشاركوني
لقد اغتيلت طفولتي
لم أفرح بيوم العيد وأغني
الحزن أصبح جاري
والخوف هو رفيقي
الضياع قريب مني
والهلاك يلازم حياتي
أين أنتم يا أبي وأمي ؟؟؟
لم غادرتم الحياة وتركوني هنا بمفردي
وذنبي لعمري أليم
فذنبي أنني غريب يتيم
وإضافة إلى ذنبي فأنني ولدت بتشوة خلقي
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
