رواية نقش بارد الفصل الثالث والثلاثون بقلم فدك فاطمه
انا ليلي بلايه واهس ما انامَ
شلون لو صرت انت واهس ليلي !
.
.
.
غنــوة
ضليت الليل كلة گاعدة لحد ما أذن الصبح سحبت أيدي فز فاتح عيونة مصحصح هبطني بس تحركت شوية من شاف وجهي تأكد اني رجع راسة للمخدة
بعدة مـنعس بسرعة غفى رافع الغطة على وجهة گمت توضـيت صلـيت هالـمرة گلبي يرفـرف مـن الفـرحة دعـيت و حـمدت الله شـگد على رجـعتة
ولا جـان أبالـي يطلع بداخـلي خـوف اعيش بدونة سـنوات الحـمدلله اجـة العـفو الي لا عـلى البال
ولا عـلى الخاطر لهـسة بعـدني مبهـوتة من شوفتة
البارحـة لو متلاگين هـيج صدفة وجه بـوجه جان متـت من الصـدمة رجلـية بعدهـا خـدرانة من الصار
رحت للمطبخ نظفتة و رتبت الربيت رشيت معطر
خليت الجاي على النار نقصت جواه كلش على ما اكمل دخلت للحمام غسلت ملابسة فتحت الجنطة
گاعدة بالهول مبسطة گبالهة طلعت صورنة مكيفة
بيهن حلوات هيج وياهن ذكريات استحيت اشوف
خطي لكتبت بيه شلون مخربط گوة مسيطرة عليه
اتسعت أبتسامتي اشوفة حافر بنهاية الصورة أسمي
هيج مشخطهة بأبرة ماعرف شنو من گد ما مكررة
مبين ذاك وينة عرفتة ماكاتلتة غمزة كلة علمودي
اخذتهن دخلت للغرفة اباوع بمكانة مالگيتة صاعد
على الجرباية شايل غمزة مخليهة بحضنة نايمين
فتحـت الجرار خليت الـصور بيه اخذت ملابس الي
طفيت الطـباخ فتت للحمام طلـعتلي جلد جديد
جنت محضـرة كشختي من گبل شهر علمودة
طلعت نشفت شعري مشطت خليتة مفلول سحبت
خصلتين ليورة خليت كماشة صغيرونة رجعت بعدة
نايم الساعة بالسبعة ما گعدتهم اخذت العطر
خليت شوية افتر بالبيت من الفرحة اريد اروح اگعدة
ماينطيني گلبي خابرت غفران ودتلي خبز كلة بفلوس
انطيهة و تخبزلي رغم تاخذ الطحين من عدنة
احت نرجس تركض محد يدري بأهلي دلهم طالع لان
اجو بالليل ماعتقد واحد عرف اخذت منهة الخبز
رجعت لبيتهم گتلهة غمزة نايمة تعالي ورة الغدة
دخلت قفلت باب المطبخ سديت البرد خليت الخبز
على الكاونتر غطيتة حتى يضل حار مشيت للغرفة
گعدت بصفة بس رفعت ايدي عطت من طفر بوجهي لازمني عاصر أيدي قوي بسرعة حركهة اجة
يطگ العظم باوعتلة خايفة و گلبي وصل لبلعومي
عافني متفاجئ سحبتها اشوف مكان أصابعة صار أحمر ايدي من العكس توجعني لان عوجها حيل
خلة وجهة بين أديه تنهد شلت غمزة الفزت من صوتي تبجي اخذتهة شايلتهة طلعت برة بعدهة بية الخوفة احرك بأيدي متوجعة حيل سحبها اريد يهدئ الوجع ماكو گامـت تصل وجعتني من حركتها
أجة وراي لزمهة يحرك اصابعة عليهة حجيت بهدوء:مابيهة شي بس صرخت لان تفاجئت بيك
دلهم:راح عن بالي اني بالبيت تعاي نخلي عليهة ثلج
غنوة:مابيهة شي حتى ماتوجعني
دلهم:مو صارت حمرة
اخذ غمزة شالهة دخلني للمطبخ مبين ندمان فتح الثلاجة يطلع ثلج يمررة على أيدي اني من الفرحة
صافنة عليه لا افكر بأيدي ولا يهمني ضالة مفهية
فزيت على صوتة من گال:احجيي وياج غنوة
انتبهت الة رديت مبتسمة:ها
دلهم:حركيها خل اشوفها خاف نفصخت
اخذت غمزة منة ابوسهة حجة يضحك:يمعودة ايدج حركيها
غنوة:شنو كلشي مابيهة ختولي
حضني لامني بثنين أديه يضحك علية حجة يبوس راسي:بعد لا تقربين علية من أنام لحد ما أتعود
غنوة:اخذ الطاوة وياي بس تگمز بوجهي اخبزك
دلهم:منين درب السجن ارجعلة
غنوة: والله اموتك اطلگك بعد ولا ابجي عليك
دنگ يبوس خدي حجة ينزل لرگبتي:هذة عطري
غنوة:امم عطرك
دلهم: شلون صبح يرد الروح
رفعت رجلية بوستة بخدة رديت:أموت عليك
طفرت متوجعة من عضة غمزة بخدي حجيت بضوجة:اشتعلو اهلج شبيج
دلهم:البجي كلة رياء طلعتلي تشتمين بية صبح وليل
انتبهت عليه حجيت اغير الموضوع:سويت ريوك روح غسل حتى تتريك
دلهم:جنتي تشتمينهة
غنوة:هذة شعرك اذا اخليلة زيت الحية يطول
دلهم: لا تعبين روحج خلي زيتاتج الج
غنوة:شقصدك اني حية
باوعلي صفح راح شغل النار جوة القوري طلعت اضحك غيرت لغمزة و بدلتلهة طلعنة يمة امشيهة
هي لازمة أيدي گوة تتحرك خطوتين و تطيح
فتح أديه دلهم من شافهة وصلتهة الة ذبت روحهة
عليه حضنها لصدرة يشمهة فتحت الثلاجة طلعت الريوگ كعدت اصبلهم أكل وهي كاعدة على رجلة
غنوة: منو لأشتاقيتلهة أكثر
دلهم:بالنهار هي بالليل انتِ
باوعتلة صفح ضحك دنگ يشاورني:اشتاقيتلج أنتِ
غنوة:جا ليش تشاورني
دلهم:خاف بنتي تزعل
غنوة:تريگ گبل لا اخنگك
دلهم:شحلات الموتة بيدج
غنوة:دلهمم
رد يگرص خدي:يروحي
بس خلصنة ريوگ و كعدت شوية يمة نسكرت من النعاس متمددة بالهول هو يمي مرتكي على الحايط
بيدة موبايلة يريد يشوف شبي مابيه كل هاي المدة
طفرت متذكرة اخذتة من أيدة حجيت اضمة:ما صدگنة نشوفك ملتهي بالموبايل
دلهم:غير انتي تغفين مطفية من النعاس
غنوة:لا مامنعسة كلشي مابية سولف وياي
دلهم:بالله جيبي بس اسجل دخول للحساب
غنوة:ما
دلهم:شعدج شنو مفينة
دفعت الموبايل بعيد عنة مد ايدة جراني من رجلية
لفلف ثوبي جواي التهيت انزلة مدد فوك مني لاح الجهاز لزمت ايدة ماكدر أسحبة من بين أصابعة
غنوة:ترة عيب عليك
دلهم:غير موبايلي حلوة هاي
غنوة:جنت افضفض بالدردشة مالحگت امسحها
اتسعت ابتسامتة لازمة الموبايل من فوگ اريد اسحبة من بين أصابعة ما يعوفة طگيتة على جتفة
أشرلة وراي يشوف غمزة واكفة وحدها
غنوة:شوف شوف بنتك وگفت
دلهم:فدوة لوگفتهة
مد ايدة عطـت اضم بطـني خـاف يگرصنـي اخذ الموبايل يضحك مخلي ايدة بينة مايخليني اوصل
غنوة:بس شوف الصور لاتقرة الرسايل
دلهم:ليش خادشة للحياء
غنوة:كلمن يرى الناس بعين طبعة
دلهم:قصدج اني مو خوش ولد
غنوة:لا اسم الله أمام جامع ياهو ليوصل لأخلاقك
دلهم:لاتحلفين حبيبتي ادري بروحي مؤدب
ضحـكت اهز بيـدي فتح المـوبايل گـبل دخـل لمحادثتنة طخت أبالي ركضت اريد اخذ موبايلي امسحهن اجة وراي جراني اني و الشاحنة شلعهة
حجة يشيلني :لوتية تريد تمسحهن مناك
غنوة:اگلك جنت افضفض ماكو خصوصية
دلهم:نجبي اقراهن اقراهن لو تموتين روحج
اخذ موبايلي و يقرة بجهازة الضحكة من الاذن للاذن
عيوني عليه متفشلة مامخلية شـي ما كاتبتة يعني
فضفـضة بذمـة و ضمير حتى مشـاعري المعوقة كاتبـتهن كـاض الموبايل و يضـحك و يصنف علية
غنوة:يارب كون يخرب حسابك
دلهم:فدوة الج
غنوة:غثيث و ماتبطل خباثة
حجة يقلدني:اخ دلهم والله مشتاقة لخباثتك
شمـرت المـخدة عليه وجهي صـخن من الفـشلة طلعت مشيت للاستقبال اجة وراي شايل غمزة
على جتفة يقرة بالرسايل صوتة شعلوة يقلد صوتي
لو يمد الحجاية خلاني انگز ترست الدولكة ماي شرد يخاف على الموبايل ركضت وراه و غمزة تضحك
حجة يخليهة بحضنة:بنتج تتنگع
غنوة:تحب الماي عادي دوم نلعب هيج
دلهم:اذا خرب الموبايل هسة شبييج حاصرتني هنا
غنوة:محد گالك تعال جوة الدرج
التفت ايريد يخلي الموبايل فوك تأكدت وخراه شمرت الماي عليه تنگع هو ضام غمزة لايوصلهة
شـمرت الدولكـة ركضت للغـرفة قفلـتها علية
حجة يدك الباب:بنتج تنگعت
غنوة:لاتجذب ماوصلهة الماي
دلهم: غناوي صيري أدمية لا انشر رسايلج
غنوة:اي دزهن الي حتى اشوف التعليقات
فتحت الباب ماينطيني گلبي اعوفة ارتكيت عليه اضحك نزل غمزة نزع فالينتة راحت ضحكتي اشوفة
توني انتبه تقربت منة مخلية ايدي على معدتة
خط طويل صاير لونة اغمق من الجسم شلون العملية تلمستة على طولة تحمحم رفعت راسي الة
يباوعلي عيونة منعسة بلع ريگة يتلمس طرف شفتي
غنوة:شنو هاي ما انتبهت البارحة منين متعور
دلهم:ماكو شي نجرحت و خيوطها
غنوة:حيل نجحرت شلون
دلهم:لا زينة مو عميقة هذة أثر الخياط
غنوة:لاتجذب متعارك هناك متأذي شوفة شلون ضال أثر واضح
دلهم:مايوجع طاب و راح خيولي
عبست ضايجة دفعني بخفة أيدة للحايط رفع وجهي
صارت عيني بعينة تبسم يتلمس خدودي بثنين أديه
ملت براسي على أيدة مغمضة عيني حسيت بي من تقرب يبوسني بادلتة بلهفة اعبر أدية لرگبتة احضنة
ايدة تتلمس وجهي شوية ينزلهة لخصري وظهري
شالني يسد باب الغرفة قفلة ابتعدت الهث اريد هوة
اباوع لغمزة تلعب وحدهة حجيت ارخي لزمتة:خل اطلعلهة العابها
التفت يدور عليهن أشرتلة على الجرار سحبة كلة
فرغهن گبالهة رجع سحب وجهي عليه حضنت وجهة ابوسة گلبي يرجف و لمساتة تخجلني ماكدر
افتح عيوني احس بطني تمغصني و جسمي كلة رخة
بين لحظة و الثانية اباوع لغمزة تلعب منطيتة ظهرهة حجيت حتى تلتف خاف مخلية شي بحلگهة
بس سمعت صوتي اجت للجرباية تزحف تريدني
حجة يلف الغطة علية:حبكت الة هسة نزلت عليج المحنة
رديت بضحكة:غير اشوفها شتسوي خانسة
دلهم:تلعب تستحي تباوعلنة
گرصتة اضحك حجيت ابعد وجهة:صاير فردنوب
دلهم:جايج من السجن مو من هارفارد
غنوة:شنو هاي
دلهم:مطعم للوجبات السريعة
غنوة:تضحك على عقلي
رد يبزز رگبتي بلحيتة:اضحك على عقلج و گلبج
حجيت اضحك:حتى لو راضية
عضيت شفتي عيني بعينة و غمزة تصيح تريد تصعد
تقرب يبوسني يتلمسني بيدة احس بحرارة جفة علة
جلدي غمضت عيوني منعسة يبوس رگبتي و جتفي
رفع غمزة من الگاع خلاهة على بطنة لميت الغطة
علية متقربة يمة حجيت اضحك:راح تضل تبوس بينة شهر
دلهم: خصوصاً انتي
نز يوخر ايدي:لاتگرصين ام شعفة الحمرة
غنوة:شوف شلون تغير توك تگلي غناوي و حبيبتي
دلهم:لا تگرصين يمكن اني صاير حساس
خزرتة لان يذكر الرسائل من اكتب صار اسبوع ابجي
صايرة حساسة كل شوية عايدهة علية تندمت حيل
رفعت روحي نمت على جتفة حضني غفيت منعسة
من سهر البارحة رجعت الصار أبالي تذكرت صفية
اخر شي أجة ابالي سالفتهة و بعدها غفيت ما أدري
لحـد ما گعـدوني هـمة غـمزة تسبـل علـية و دلهم يبوسـني كل شـوية جاريـن شـعري لعبـو بية طوبة فتحـت عيونـي اسـحب شعري من جواهة معـشتة
غنوة:الله اكبر شسالفة
دلهم: صارت بيع ثگل علية
غنوة:گعدوني بهدوء على كيف
دلهم:گومي بنتج جوعانة فريت بيهى قريتكم الگشرة لماشفت الخير من شفتها هم ماسكتت
غنوة:شوف منو ليحجي القرية شعليهة بسوالفك
دلهم:گومي اريد فلوس اشتري جكاير
غنوة:اوي تريد فلوس حبيبي
عبس يرفعني بضوجة ضحكت اخذ اوخر غمزة مني
اخذت هدومي البسهن هو يدور بالجرارات و الخانة
غنوة: مو هنا لاتعب روحك ضامتهن وية الحفاظات
دلهم:حگهة الفلوس ماتضل عدنة ذالتهن ذل
غنوة: والله مايخلصن بسرعة
فرغ الحفاظات طلعهن اخـذ ألف شمر الباقي علية
بقـن مطـشرات على المـيز بعد ما أهتم مادام اجة
صحت وراه : جبس وياك
أشر بيدة يعني سمعني گمت قفلت الباب وراه على ما سبحـت مدري شلون كـلاوات من وراهـة تبجي شلتهة جـوعانة خـطية نشلع گلبهة لازمتلي الباب
باوعت للساعة بالوحدة على ما نومتها گمت صليت
گعدت بصفة بالاستقبال اخذت الجبس خليتة ببينة
رفع ايدة دخلت بحضنة فرحانة عصر خدودي سوة
حجة يرفع راسي: شعدج البارحة تهبدين بالشوارع بنص الليل
رديت اوكلة:ياهي أني
دلهم:جا أبوي
غنوة:ها البارحة خل اتذكر اوگف
دلهم:اتذكري على راحتح
غنوة:امم خوش
گرصني طفرت اطگ بيه افرك بصفحتي متوجعة:ليش والله توجع
دلهم:ويين مولية بنص الليل جنج مجدية عباتج تسحل وراج
غنوة:خل ابلع الحبسايات و اگلك
دلهم:خاب شو جيبي
اخذهن يريد يمردهن سحبت الجيس نشگ تطشر
بحضني باوعتلة بضوجة اهز بيدي ترسنة جبس
غنوة:ماعندك صبر
دلهم:لا ماعندي
غنوة:جنت بوجهي لمعارض أربيل
دلهم:اعمي عينج براشدي
غنوة:جا بس انتة حلال عليك
دلهم:ادبسزز هاي اخلاقج من جايبتهة
رديت اضحك:من الشارع
دلهم:شكد فاهية
غنوة:غثيث ،اني اگلك ماكو هاي صفية تزوجت سالم
دلهم:العب
غنوة:اي وصايرة مكافش بعدين عرفت هي مسويتلة سحر يعني هي تسوي للناس سحورة
دلهم:رايحتلهة تعلمج
غنوة: لا شسالفة بس شفتها ورة بيتنة مدري شنو دفنت طلعت اريد اشوفة من الفضول
دلهم: طالعة بنص الليل بالله لزمج واحد
غنوة: غير انتة اجيت
دلهم:اعمي عينج هسة، وصلت لاگتني خالتي تگول البنية ماكو مدري وين ولت
غنوة:شدراك اني هناك
دلهم:رحت لبيت اهلج شفتج لابدة بسد الحايط
غنوة:يا عزة ولا انتبهت عليك بالي يم علوان
دلهم:حتى من يكتلج ما ادافع عنج تستاهلين
غنوة:لو بايعة دموعي لبجيتهن عليك جا هسة اني اغنى وحدة بالعراق
دلهم:العراق عايف النفط و حاير بدموعج يشتريهن
غنوة:كلشي بي نسوان ينباع
هز أيدة گام جلـبت بيدة و گـمت وياه حاضـنة زندة
طلعنة للـحوش باوع للحـديقة و المتسـلق لمغطي نص الحـوش صايـر مثل الـسقيفة حلو بس يتعب يطيح ورق و يتـرس الحـوش كل شوية رايحة اكنس
غنوة:حلو اني سويتة
دلهم:لعدة مرة مثلج يلف راسة و ينام مرتاح
ضحكت امـشي وياه فرحانة وگفـنة يم الحايط الورة
أشرلة على المـكان ضليت اباوع هو طلـع طول يالله
وصل صوفرتلة التفـت يخزر بية وديتلة بوسة بأيدي
حجة يقرب للحايط:ادبسزز عدج خبرة بالتصجيم
غنوة: هسة شنو تجي لا
دلهم:وين أجي
غنوة:لبيتي
دلهم:اي اجي هسة
طگيتة من ورة الحايط حجيت اخوزر:شو كيفت ماصدگت وحدة تصيحك گبل گلت اي
دلهم:ولجج طايحة الحظ شلون تصوفرين لزلمة من ورة الحايط
غنوة:عود تفرهة علية ترة جنت اختبرك طلعت صدك ماتستحي بسرعة توافق
دلهم:نجبي تريد تبعد عن روحها الشبهات
غنوة:هسة امشي شوف السحر شنو سالفتة
دلهم:نوب سحر علينة
غنوة:هذولة الفگر من يتزوجون
دنگ يدور حجارة يشمرهة علية ضحكت انزل صدك
سواهة شمرهة حجة :امشي روحي لبنتج
غنوة:بس شوفة كتلني الفضول
رفعت راسي هو مدنگ اني ادلي بيه على المكان لحد
ما حفرة عدة عصا حفر بيهة طلعة خلاه بينة گبالي
غنوة:مو تلزمة بيدك و نوب شيفضنة
دلهم:منين لگيتي هاي الكلاوات واذا لزمتة
غنوة:دخل يسطرونك بواحد گول كلاوات
حجة يدنفس بيه يفتحة:هذة بي شعفتج الحمرة
غنوة:لاتجذب
دلهم:اشاقة عظام ورق هذة شعر اسود خاف مال اخوج الطلي
غنوة:دلهممم
دلهم:وسم تتمضيگين شبيج
غنوة:لاتغلط على اخوي ما أرضى
فشر علية التفتت ادور شي اشمرة عليه ما لگيت نزلت اباوع لغمزة من الشباك بعدهة غافية رجعت لگيتة مرجعة لمكانة مثل ما جان يدفن بيه برجلة
غنوة:يااا المن رجعتة
دلهم:شعلينة بي خيولي
غنوة: يجوز النة
دلهم: لو النة ما لگيناه اعرف حضنة
ضحكت نكت أديه اجة برجلة حرك بلوكة برة خلاهة بصف الحـايط صعد صـرنة وجه بوجـه مد ايـدة يتلمـس خـدي ابتسـمت امـيل علـى جـفة ابوسة
دلهم:بسرعة سحتي لازم جانت هاي احلامج من جنتي بيتج اهلج يجيج الحب من الحايط تترامسون
غنوة:اي مو اني مثلك مگلبة السوالف كلهن
دلهم:جا شبيج كيفتي
غنوة:مامكيفة يالله تعال
دلهم: نطيني بوسة منا
غنوة: والله انتة لمكيف دتعال لا يشوفونة يگولون هاي رجلهة مسجون و تتمعشگ وراه
دلهم:ياهو الگايل عليج هيج
غنوة:محد يالله تعال
نزلت انكت بملابسي انتظرتة واكفة يم الباب بس شفت رجليه من جوة فتحتة مبتسمة دخل يبادلني
الابتسامة حـضنت خصرة ارفع روحـي ابوسة علة شفتة حضن راسي بجفة يقربني و يشيلني يدخلني
دلهم:غناوي
غنوة:امم
دلهم:لو اكدر افك صدري واخليج بصف گلبي
غنوة :اني هم اريد اضمك من كلشي حتى ماتروح
دلهم:مسيطرة علية
غنوة:اذا يرجع بيك الزمن تزوجني
دلهم:دسكتي يمعودة مانعول نوصل ليجاي نوب يرجع بينة ياهو الة خلق يعيش مرتين
غنوة:ولا تسوي واهس
دلهم:اني واهسي يختلف عن واهسج
غنوة:اهوو گام يحجي حجي مو حلو خل اروح اسوي عشة صارت دنيا العصر
نزلت من رجليه سحبني يحضن خصري مدنگ لطولي حجة:لو احضنج منا لباجر هم ما أشبع
غنوة:جا اني شنو اريد ماريدك تشبع
دلهم: الله عليج اذا سحر لاتبطلينة
ضحكت احضن رگبتة :لا مو سحر بس رب العالمين كاتبك من نصيبي و تحبني واني فرحانة بوجودك بحياتي لو يرجع بـية الزمن اخـتارك هم كل بيت دخلنالة اكـو ذكرى حـلوة احبـها كلـش أحـبك احلى شي بحـياتي من انـتظرك ترجع و نگعـد نسولف أحـب اعيـش ويـاك امـوت عليـك دلهـم
حضن وجـهي بثنين أديه يبـوس شـفتي بوسات صـغيرة وحدة ورة الثانية بهدوء و خفة حضـني اديه على ظهري يقربني الة
دلهم:ما ندمان على الايام المابيهة انتِ بگد ما ندمت على الاوقات لجنة بيهة سوة ما حبيتج بيها
و فرحتج اول ما شفتج الايام لوراهة كلهن خسارة وضيعتهن اذا يرجع الوكت اروح لهلج و اخطفج
رديت بضحكة:الله كون يرجع
دلهم:تجين وياي
غنوة:اي والله اجي بس اوگفلي يم البستان اجيك اركض
دلهم: بالحرام
غنوة:لا عيني لو حلال لو ما أرضى
دلهم:اضحك عليج و ارجعج لهلج حامل
شهگت ادفعة اريد ادغة بخاصرتة ضحك يوخر يلف
أدية ورة ظهري صار وراي دنگ عض خدي يدغدغ بية بلحيتة يدنگ لرگبتي يحرك شفتة عليهة
غنوة: انتة مو مال ثقة وخر عني
دلهم: حبيبتي غناوي بوسة وحدة اسطرج حتى نعالج تنسينهة تجيني حافية
غنوة:ولا أجيك حتى اضحك عليك ماحبك
دلهم:لاا لاا
يحجي ويدغدغ بية ضحكت اوخرة گوة بعدنة عني
سمع صوت غمزة گعدت عالفني راحلهة يدولبهة
خلصنة اليوم كـلة نـتشاقة ولا سكتة دلـهم صاير يحجي هواي مـا متعودة عليه هـيج كل ما أسـكت يطلع سالفة يفتح موضوع جديد سولفتلة كلشي
مرن يومين خلص الشهر انتظرنة الراتب سوينة عشة
عزمنة بيت صفوان و عزمنة بيت خالتي صادف يوم
خميس من لا جارة دلهم عزم علوان لان شافة
گعدت من الصبح وحدي كلشي علية دبرتهة سويت
العشة العصر اجونة بالبداية صفوان و رفا طلعلهم
دلهم نشفت أدية دخلت بوستهة اضحك على شكلهة
داخلة السابع بس بطنها شگدهة صـليت على النبي هـي تباوعلي بخزرة مديت اديـة من بعيد اضحك
غنوة:ما اوصلج
رفا:شگد شخيفة
غنوة:شنو توم بطنج داخلة بشهرها
رفا:غير ابوه صفوان شيطلع عجل شگدة و شكبرة
خربت ضحك عليهة هي التفت خاف سمعهة رجعت
يني بوستهة راحت تتمدد بالغرفة كلهة مورمة رجليه
و اديهة حملهة متعب يختلف عني كلش
كملت الي بيدي حضرت الماي اجة دلهم اخذة راح
عفتهم مشيت للغرفة يمهة مددة تلاعب بغمزة
غنوة:صدك ليش هيج منفوخة
رفا:طالعة على أمي هم هيج
غنوة: امم ترة عزمتها ما أجت
رفا:ادري گالتلي تريد تروح لكربلاء
غنوة:ذكرتيني حتى نروح
رفا:خوش فتحت باب لرجلج
ضحكت اخلي أيدي على بطنها احس بحركة الطفل:اگلج جنة توم مو واحد
رفا:نجبي لاتگوليلييي تووم وين انطي وجهي
غنوة: والله احسة يختلف مبين مو واحد امشي للدكتورة شنو منتظرة
رفا:مااا
غنوة:خطية شراح يصير بحالج
اخذت لعابتة غمزة شمرتهة علية حجت:لاتخوفيني
اني ما أدبرهة لا رجلي
غنوة:عادي اني ورجلي دبرناهة نمونة تربية الطفل
رفا:انتِ متوعدة على الجهال و رجلج يساعدج ولج صفوان گشر البرتقال مايشيلة من الگاع
غنوة:جا وين نصايحج وصيري وصيري
رفا:اسكتي لاتفشليني اني متفشلة من سوالفي
غنوة:وتعلمين و ترجعين ليورة
رفا:ولا وحدة فادت وياه
ضحكت عليهة مقهورة و تتشكى من صفوان گمت
اسمع صوت وتين تصيح اخوها من برة هم يصيح
وتين:هاي شنو مددات الحبايب
رفا:اهوو اجت ضرتي
وتين:خفة شكلج ذاك اليوم شلون تحضريني
رفا:حتى تتأدبين
تحجي ويتهة شايلة غمزة تبوسهة اشرتلهة بأيدي: هلو لا سلام ولا كلام
وتين:ها هلو شلونج امي تسلم عليج ماتگدر تجي رايحة لكربلاء
باوعت لرفا ردت بدون اهتمام:راحن سوة انتي البگعة ترة امي حاطة عينها عليج تريد تخطبج
تقربت منة وتين حجت مدنگة فوك منها:لا صدك يمتة تجون
غمزة:وأبن عمج
وتين:خيولي طلع عدة علاقات حرام جزت روحي منة هذة المايخاف الله لعب نفسي
رفا:هاي هي تجي امي احنة يمكم
غمزة:صدك لو تتشاقن
وتين:لا صدك طگت روحي راح اطب التلاثين واني منتظرة فهد يخطبني طلع لاعب لعب بالخارج ولج ناشرين صورة وية وحدة تخزي تخزي
غنوة:اوگفن خل اشوف التمن و ارجع لاتحجن اي شي
رفا:شو ما تباوستن تحاضنتن
غنوة:عليمن
گمت قللت النار شفت التمن رجعت يمهة اسأل:منو الاجة بعد منكم
وتين:علاوي و رائد
رفا:احنة صفوان و صفاء
غنوة:وية دلهم و علوان يصيرون ستة انتن عادي تأكل بمواعين البيت
رفا:لا شنو ماكو احترامات
وتين:سوينة هيج دليمية بالصينية فوكهة تمن اويلي
غنوة:يعني ماكو امواعين
وتين:لا يمعودة عليمن
رفا:ترة تحجي هيج لان تدري راح يطيحن براسهة هي تغسلهن گالت عليمن أكثرهن
ضحكت گومتها وياي رفا تحنص بينة لان گاعدة رغم
مبين عليهة هواي تعبانة گوة تمشي كملنة العشة
حضرنة كلشي على ما صلينة صبيت اجة دلهم وعلي
يشيلون بالصياني شاف غمزة هي اجتة تزحف مكيفة ودة الصينية رجعلهة يضحك ماترضى تعوفة
تعشينة يـم باب الاستـقبال نتسمع لسوالفهم شنو
رفا:اللهم صل على محمد وآل محمد منين نزلت عليهم الاخلاق شو سوالفهم كلهة بالدين و السحر
وتين:هذة اخوي اكيد أثر عليهم علاوي مؤدب
رفا:احممم مؤدب
غنوة:لا هذة دلهم اليسولف ماتسمعن
رفا:اختنگت من الجذب
ضحكت مخلية أذني يم الباب ما دام يسولفون عن الدين لازم يگولون الشرع حلل اربعة ما يفوتونها
هذة علوان كتل روحة نافش ريشة عود متزوج هو
حجة صفاء بسخرية:هو احنة شاردين من مسؤلية وحدة تجي ثنين
علوان :الزلمة كلشي يدبر ماتصعب عليه
صفوان:صح حجية كلش صح هسة گدامك دلهم مايوم صعبت عليه كلشي يدبر
علي:هو منيلة دلهم اول امس شاف الشمس
صفوان:ادگ رهان وياك يومين تلگاه حتى سيارة عدة هسة اذا نخطبلة يدبر مو بيتين اربعة
دلهم:حجيك على راسي
رد عليه رائد اخو وتين:مرتك علية
دلهم: تسلم ماتقصر
دگيت الباب طفرن علية البنات يلزمني يأشرن على حلگهن حتى أسكت اني لعبانة روحي من جذبهم
وتين:خررب مو جاي نسجل شبييج
غنوة:ماتشوفينة
رفا:اشش اش اريد الزم لزمة امداج
دفعت الماعون ضايجة صاحني مارضيت ارجع أكل
همة خنـسو ضل بـس علـوان يجيب الـسالفة منا يرجعها منا يريد منهم يتفاعلون محد حجة شي بعد
خلـصنة عشة وگـفت أصب بالـجاي و وتين مخلية بحضنها غـمزة حتى تنـومها خلـصت الـصينية اجة دلـهم ينشـف بوجهة خـلة الخـاولي على الشباك مد ايدة ياخـذ الصيـنية اخـوزر بي مـسح على لحـيتة
حجيت بهمس گبل لا اروح:اني اعلمك
دلهم:شسويت
غنوة:روح الجاي برد
تحمحم اخذة و راح التفت يباوعلي رجع باوع لطريقة حجت رفا تضحك:نخلس الزلمة
غنوة:نجبي
وتين:خطية وجهة صوفر
رفا:ترة زلمة معليهم اخوج صاحب الفكرة
ساعدني نظفنة المطبخ گعـدنة نشـرب جاي علي مستـعجل هـو وصفاء كل شـوية يـردون يگـومون مايدرون صفوان يضل يمنة لحد الوحدة متعودين
على الخطار طلع رائد صاح على وتين وگفت بالباب
اسلم عليهة مرتكية على باب المطبخ طلعو وراهم راحو رفا و صفوان وية طلعتهم دلهم برة بالشارع
على ما مشو دخل سد الباب راح للاستقبال جاب الصينية مال الجاي وگف على السنك يغسل بيهن
متخوصرة اباوعلة حجيت رافعة حاجبي:شكد تريد وحدة ثنين
دلهم:لا شربت هواي جكاير ماريد
غنوة:شعحب ما گلتي تسلم ماتقصر
ضحك امتونة تهتز كمل الكوابة سد الماي التفت الي حجة يحك حاجبة:صدگتي نساير اخوج
غنوة:لا والله صدك احجي
دلهم:يمعودة وداعتج نسايرة هي مال زواج
غنوة:جا ما گلت لا ماريد ضليت تتشكر يگول جابولك مرة مگبعة
دلهم:جا شگللهم اطردهم
درت وجهي اجة يمشي وراي لزگ اروح يمنى يروح مثلي التفت الة دفعني اجيت اطيح ليورة حضن خصري رجعني يمة يوازن وگفتي حتى ما أطيح
غنوة:وخر
دلهم:يمة گمت اتراجف خل اوخر
غنوة:ترة ماتضحك
دلهم: محد مضحكج
تقرب يبوس خدي حاضن أدية حتى ما أدفعة حجة يمسح على شعري:عاشت أيدج تعبتي اليوم
غنوة:تعبك راحة حبيبي
دلهم:سبحان مغير الاحوال
غنوة:تريد اضل أنكد
دلهم:لا لا خلينة بالسليم بعد گلبي
رفعت ادية لفيتهن على رگبتة حجيت ببتسامة:العشة طيب
دلهم:طبخج بعد
غنوة:تتذكر جبت راسك بمرگة باميا لزمتني بغرفة الوشم
ضل صافن شوية ضحك حجة يدفعني للحايط:مصدگة حصرتج علمود الغدة هاي حجة
غنوة:اي صدگتك هو انتة مگضيهة طماطمة وبيض
اجتك مرگة على الحاضر تسرسحت
رد يعض شفتة:اخ احلى يوم
غنوة:شگد فاسق تفكيرك وين
دلهم:ردت الزمج بس تعوذت من الشيطان
غنوة:مدري شلون عشت وياك متحرش
دلهم:اني المتحرش لو أنتي تضلين صافنة علية تخليني احتار شسوي
ضحكت أبعد اديه مني كلي ريحة طبخ من العصر افتر دخل راح تمدد يم غمزة يلاعبها يحجيلي شلون
كاتلة روحها عـلى علي ماتـرضى تعـوفة لو يدري
بعلـي أبـن سـالم هم شامرة روحهـا عليـه شيسـوي
دخلت للحمام بعد ما سمعتة شگال على ما خلصت
هو يصيح طلعت مستغربة باوعت من الباب عليه
غنوة:شكو
دلهم:مشت وحدها
غنوة:اي جا وذا
تندمت من حجيت هيج هو مكيف علگت الخاولي
دخلت گعدت بصفة اباوعلهة تمشي خطوتين بس
غنوة:هاي ثاني مرة توگف بس ماتمشي هلكد
اخذها يبوسهة مخليهة بحضنة دغيتة بجتفة التفت
الي رافعة حاجبة يباوعلي من فوك ليجوة ابتسمت
غنوة:شنو مو حلوة
دلهم:اني بس القميص الاسود يفرحني
غنوة:ماريد البس اسود اسم الله
دلهم:دمشي لبسي لا اعمي عينج
غنوة:ما دشوف هذا بيجي و يخبل
دلهم:جنة سيراميك المطبخ نفس اللون
گمت بضوجة من تصنيفة رحت نمت بمكاني ماكو لحظات اجة هو بنتة خنگوني لازم ايدي الهة حتى تعضني عضيتة هي عضتني خلتني انگز من الوجع
غنوة:خلي اصبعك خل تعضك خلي
دلهم:اصبعي خشن يعورهة
غنوة:لكشي عندك حجة
ضحك يقـرب اصـبعة الهة ارتـاح گلـبي من عـضتة ضلـينة نلعب سـوة تعبـناهة لحـد ما گـامت تـغفي نومـتها ادگ علـيهة طلع للمحل يشتـري خلـيتهة بمكانها رحت للمطبخ طلعت فواكه ضالة من العشة
على ما رجع لگاني مجهزة الفلم و الگعدة فرشت بالگاع خليت المخاد نرتكي عليهن ثبتت الموبايل
گعد شمر علية الجبس طلع حلقومة مداهة الي حجة:شفتها تذكرت غمزة من حملتي بيها ردتي حلقوم
ابتسمت اخذهة من ايدة اكلت نص مديت الة الباقي
دنگ اخذة من ايدي و فتح الكرزات فرغهن بالعلاگة
ارتكة على الكنتور رفع ايدة حضن جتفي حجة :شنو الفلم
غنوة:فلم عن وحدة رجلها تزوج عليها و كتلتة ضمتة بالثلاجة يومية تسوي منة مرگة باميا
دلهم:اني اخاف من الرعب اعذريني راح انام
غنوة:لا والله حلو خل نشوفة
دلهم:ابد ارجف اگوم نفسيتي ماتتحمل حساس
رفعت راسي اضحك عليه هو يسايرني اخذ الجهاز
يگلب بالافلام من كد ما نتابع سوة خاتمين شكد منهن هواي شايفين و حافظينهن مسوين قائمة
دلهم:خو ما تابعتي من وراي افلام خادشة
غنوة:شگالولك علية المنگرش
دلهم: كلشي يصير الشيطان شاطر
غنوة:لاتخاف علية أيماني قوي
دلهم:بالله شسوين بوقت فراغج
غنوة: ابجي عليك
ضحك يحضني يبوس راسي طلع فلم مال سندريلا
ابتسمت اتقرب منة گعدنة الفلم حجة بس احنة نسولف و نصـنف على الممثلـين ركيت راسي على جتـفة اوخر اللـقطات الي ماتعـجبني و مالتـهة
طفة الموبايل عافة بصفة تمدد خلاني فوك صدرة
صافن على السگف حضنتة مغمضة عيوني براحة
دلهم:أحبج غناي
ابتسمت ابوس جتفة:واني أموت عليك
دلهم:بيتي غنوتي
غنوة:الله يخليك النة
دلهم:ماتعبتي مني
غنوة:لا جنت اضوج مرات بس هسة اتمنى اعيش وياك بدل العمر عمرين
دلهم:بعد كل التعب لو ما شايفج احس عمري راح على الخالي بلاش
غنوة: كلشي مكتوب رب العالمين كاتبلك تكمل حياتك و تأسس عائلتك لازم من ينوخذ منة شي يتعوض بشي اكبر و نحبة اكثر
دلهم:ماتفكرين بيوم اخونج كل الحجي جان شقة
انتي بيتي الارتاح بي الة مسودن يالله اهدمة
غنوة:اعرف جنت اشاقة وياك
بوسني براسي حاضني نمت متطمنة بوجودة ماأهتم
لاي شي حتى مادري اذا البيبان مقفولة اذا البيت بي شي مشتغل حسيت كل المسؤوليات طاحت مني
خلصنة شهر دلهم ما يطلع من البيت يگول اني مجاز
منين ماندري هيج بس مدد بالصالة ومخلي غمزة
على صدرة اذا يكلف روحة يطلع يترس ماي و غاز
من دگنـة الـضيم بدة يدور على شغـل رجع بيومها شافني ضـحت اشرتلة شكو ما رد ضل يتـبوسم
ورة الغدة تقرب مني يبوس خدي لو يدلعني ويغازل
نطاني قصص وروايات عراقية كرار صلاح غمزة گالي نوميها لازم تنام اليوم باوعتلة مستغربة اخذتهة للغرفة تلعب من تتعب تجي تنام
طلعت رادة الباب وراي اشرلي اجي يمة گعد گبالة
حجة لازم ادية:غناوي تدرين بية شكد احبج
غنوة: شعدك ما مرتاحتلك ترة حتى ذهب ماعندي
دلهم: لا يمعودة بس اريد اطلب منج طلب توافقين
غنوة:موافقة
دلهم:العب ما اتعبين المحققين
غنوة:يامحققين
حجة ياخذ جنطة من وراه: اسكتي هسة اريد اشتغل
غنوة:شعدك بس لا وشم ما ادگ لو تموت
دلهم:نجبي وافقتي
گمت لزمني يجيبني منا يرجعني منا ماخلة شي ما گالة گعدت أمري لله طلع المكينة و خلة الإبرة بيهة
دلهم:أبرة جديد مخصوص الج
غنوة:جا ذيج وين راحت
رد بضوجة:من احترك البيت دورتها مالگيتهة هي
و گصيبتج الگ***" حرگ گلبي عليهن
غنوة: المهم سلامتنة كلشي يتعوض
دلهم: الحمدلله ، هسة اريد منج شي واحد
غنوة:شنو لا تضل تماطل
دلهم:ممكن تنزعين هاي الوصل العليج
غنوة:قصددك انزع هدومي
دلهم:لا حضي اي هدومج
غنوة:دروح
سحبني يحر بالدشداشة منا لمن نزعتها الة يدك وشم بنهاية ظهري كلشي ما اشوف كل ما اتحرك يدفع راسي يخليني گاعدة بشكل مستقيم
دلهم: راح اعمي عينج ولج ركدي
غنوة:غير اشوف شنو
دلهم: يخلص و شوفي
غنوة:شو ما احس
دلهم:گلبج ميت ، غنوة لا تتحركين تخربين علية
غنوة: والله اذا مو حلو اسوي بيك فلك
سكتني كل شوية يبوس جتفي لو ظهري بطني تصير
فراشات و گلبي يرفرف لحد ما خلص صورهة الي
نطاني الموبايل گعد وراي يأشر يشرحلي اول حرف من أسمج ومن أسمي و أسم غمزة من نهايتهن خط
زخرفة يشبه الغصن يمتدمن النهايتين
ابتسمت اشوفة حلو حروفنة بالنص و من جهتين غصن بي ورق ناعم كل خط رفيع التفت الة اضحك
حضنت خدة ابوسة رجعلي البوسة على جتفي
غنوة:مو باجر عگبة تگلي ادگ لغمزة اموتك
دلهم:لا طبعاً مو لهدرجة
حضن خصري يركي راسة على جتفي حجة ببتسامة:اول مرة وشمت لحاتم ايدي جانت ترجف مامسيطر جرحتة بـس خـلاني اكمل وراهة تـوفة صرت اشـتغل مو مجرد هواية ايدي اخذت ما زليت
بس من وشمتلج اول مرة نفس الرجفة و الحذر صار بية منها حبيت كل نقطة حبر جانت على جتفج
غنوة: يعني من تسوي لغيري مايهمونك
دلهم:امم بس حاتم جنت خايف أذيه وراهة انتِ هم خفت اجرحج لو تصير زلة بالغلط عرفت بيومها الج
مكانة بروحي حتى لو ما اعترفت و نكرتها
غنوة: يمتة حبيتني
دلهم:امس و أول امس يومية اني احبج من جديد
غنوة:شگد لوتي
ضحك وخر عني لم الغراض گمت البس احاول اباوع
ليورة حتى اشوفة حلو بعدة المكان احمر و متهيج
غنوة:دلهم اريد افتح وياك موضوع
دلهم:گولي حبيبتي
غنوة:ماريد اضل هنا مامرتاحة كارهة الگعدة يم گرايبي همة يكرهوني و انقهر منهم اذا تكدر بالايام الجاية نشيل اقبل بأي مكان ثاني حتى مشتمل
دلهم:شسامعة من وراي شمسوين وياج
غنوة:هواي بس ماتفيد و اسولفلك همة هيج عقليتهم شسوي يعني تتعارك شكد مرة مرتين بس ننغث خلينة بعيدين و مرتاحين
تنهد حجة مرتكي على رجلة:نعمان ما يشملة اي عفو الة يتنازل ولي الدم خايف نرجع للصفر
تأففت بضوجة گعدت گبالة :وبعدين
دلهم:وضعنة مو وضع ناس تسافر بس اني قدمت
طلب و اخوان صالح و نعمان انطو تعهد ما يقربولنة
اي شي يصير النة يتحاسبون
غنوة:نضل خايفين منهم
دلهم:الله يسهل خل نشتغل على روحتنة منا
غنوة:الوضع يخوف
رد يحضن خدي: لا حبيبتي همة بالسجن محتاجين منة بس نتنازل يعني سلامتهم مرهونة بسلامتنة
نروح بعيد عنهم لحد ما الله يسهل و اسافر ماضل هنا
غنوة:وين نروح
دلهم:الله كريم نشوف دولة مناسبة لان السفر يكلف
واني ما دارس حتى استغل شهادتي
غنوة:ان شاء الله خير
دلهم: لا تفكرين ماكو خطر علينة
غنوة: يعني مايجبرونك
دلهم:لا ملزومين قانونياً اي زلة منهم اكدر اشتكي همة اول القائمة يصيرون
هزيت راسي بفهم گمت منة اكمل شغلي مرات الايام نفس الروتين دلهم بلش يشتغل رجع لحياتة
على گولتة امشي بصف الحايط واني مصدگتة اكيد
ماعندة خبرة الة بالبانزين دور محطة واشتغل بيها
هي نفسها شغلتة رجعلهة حول الوكالة مال راتب
الرعاية الي جان بأسمي صار بأسمة مايريد يگول راح اعـوفة يستـنكف ياخذ فلـوس هو يـشتغل
گوة مقنعتة گتلة بس نخلص البيت و عوفة وفضنة
گعدني يمة مسوي قرعة خلة الاوراق گالي اختاري ماعرف شنو الفكرة بس مديت ايدي طلعت وحدة
فتحهة حجة: الكوفة ماحبها اختاري غيرهة
غنوة:شسوي
دلهم: ندور محافظة نگعد بيهة
مديت ايدي اخذ الورقة حجة:اربيل بيها معارض ارضين اروح
غنوة:النجف اقربلك
دلهم:هم صدك وين اكو احسن منها
شمرت الورقة عليهة حجيت:گتلك بس نبدل البيت مو نروح لتلفات الدنيا
دلهم:هسة انتي لگيتيني كلش زنگين احيبلج بيت بأربيل
غنوة:اريد الحاضر مالتي وينة اشتري بي بيت
دلهم:لا غنوة احنة شنو اتفقة السالفة سالفة ارقام
غنوة:بس هذة حقي شرعا
دلهم:هسة احرگ روحي يم معمل الشخاط
غنوة:ماعدك كروة تروح للمعمل ولا عدك فلوس تشتري بيهن جداحة اگعد و اسكت
دلهم:تشمتي بعد
غنوة: استغفرالله عدنة شبينة ندگ اليتيمة
دلهم: أندري غير انتي
ضحكت امد ايدي اخذ الموبايل من وراه رجع ليورة
حجة يستهزئ:لا غنوة عيب بنتج كاعدة شبيج
غنوة:اريد اخذ موبايلي ارتاح
دلهم:اخ لمستي بطني
ضحكت اطگ رجلة اخذت الموبايل اشوف بصمة من رفا شغلتها اقربة لأذني هوسة مو واضحة كلش
فجاة عاطت:غنوووة اني بالسياارة اخخ يمة ولج رايحيين يجيبوني توووم توم من فلك فلكني ولج تعاي مو ماتجيني دعيلي دعيلي
رمشت مصدومة هاي تتولد و تدزلي بصمات افتحهن كلهن صريخ و صوت هوسة ناس تحجي فجأة تصرخ بالبصمة وتسولف تشتكي من الوجع
گعدت ادعيلهة اروح و ارجع خطية تعبت حيل بحملهة لحد الوحدة بالليل خابرتها ماكو رد اتصلت
على أمها ردت علية طمنتني هي بخير الحمدلله
بس جايبة توم البنية توفت بقى بس الولد كلش ضجت عليهة هي محضرة متمنية تصير عدها بنت
گعدت صليت ركعتين شكر لرب العالمين لسلامتها
وگفت يم الباب دلهم يخابر عرفتة صفوان يحجي وياه ارتكيت على الباب أشرلة نروح يگلي اصبري
سداه التفت الي:وين ترحين
غنوة:لرفا
دلهم:بهل الليل صدك جذب راح تصير بالثنتين
غنوة: الصبح نروح من ترجع
اشرلي اسكت رجع يخابر بصفوان الماعندة غير دلهم يسولفلة مشاعرة ياريت دلهم يحجي يضل يصنف عليه تمنيت اخذ الموبايل واني اجبر خاطرة
ثاني يوم رحنة لبغداد گعدنة يم بيت خالتة غمزة
نطلقت شافت علي نخبصت تروح هيج وتتگلب
تسمع صوتة من فوك توگف يم الدرج تصيح تدردم
ورة الغـدة رحنة لبيت أهـل رفا خطية ملعوب بيهة طوبـة و مقهورة عـلى التوم الـمات باركتلهة حجيت
وياهة أصبـرهة مامكتوبلة يعيـش الحمدلله واحد
طلـع علـى هذة التـعب التعبتة حقها تنـقهر هيج
بقيت يمهم للعصر كلش ماضليت للعشة اجة دلهم
رجعنة لبيت خالتة بتنة يمهم و الصبح رحنة لبيتنة
اخذ فترة يحاول بهذة البيت بلكي ينباع واحنا مجمعين فوگة لحد ما جاب سعر زين نطانة الرجال
مهلة شهر نفرغ للبيت كلش كافية النة
اخذنة بيت بعيد عن اهلي بهواي نقلنة اغراضنة هم
مدة نروح نظف لو نرتب لحد ما خلص و ضل اشياء
قليلة اخذهة دلهم الصبح واني رحت لهلي اشوف
الجهال جان بوقتها صفية مسقطة جانت حامل
مدري شصار وياهة بساع بساع اخذوها للمستشفى
طلع عدها غرغرينا نصدمت بالمرض اعرفة يصير
بس من تتأذى الأطراف و تنهمل يبقى الجرح مفتوح
بس هي صارت بالرحم ميت الطفل بداخلهة ما رايحة للدكتور محاولة هي تجهضة ماعرف شلون مأذية الرحم و هاملة الأذى الصار بي لحد ما تعفن
غفران تگول هي طاحت مريضة گنالهة روحي ما رضت اخذتلهة اربع أيام انتهت ماتگوم من الفراش تشرب اعشاب مدري شنو من علاجات مسويتهة
اخر شي فاقدة ناقلينهة الدكاترة كاتلين روحهم من شايفين شمسوية بروحها تشرب اعشاب حتى تسقط
ماتروح للطبيب خاف علوان يدري بيهة مسقطة
لحد ما تعفن الجنين بداخلها و الرحم صارت بي بكتيريا و التهابات اخر شي شالوه كلة لان خطر عليهة هذة الحجي صارلة اسبوعين من گبل لا اروح
من اسبوعين هي تعاني شني من صبر عدها عجيب
طلعـوهة أول امس مارحت ولا وصـلت بس هسة
ردت اشـوف نـرجس و البـنات گبل لا اروح منا
دخلت للبيت سلمت عليهن جانن يمهم أهل صفية
و خطار هواي و بيت جدي بس على جدتي سلمت
هي ما باوعلتلهة ولا شفت وجهة كارهتها كلش
طلعت منهم صاعدة بالسيارة شكد احب هذا البيت
بس همة خلو گعدتي بي سم كل حجاية ولا ثانية
التفت الي دلهم يشوفني رجع عينة على الطريق
عدلت گعدتي غمزة بحضني تريد تلوح الجامة
نوب لمحت المدالية بسيارة الرجال كتلت روحها عليهة تمد روحهة من بين الكشنات تريد توصللهة
نزلنة قريب على البيت اخذت الجنطة وگفت على جهة منتظرتة دفع الكروة واجة شالهة و شال غمزة
غنوة:نطيني وحدة منهن
دلهم:اوكفي خل اشوف الثگيلة وينهة
غنوة:تريد اشيلكم تلاثتكم
دلهم:لا حبيبتي ليش تحمين والدنيا حارة
گـرصتة التفت يـخزرني دخلنة للبيـت مو اول مرة اجي حلو و بيـت بسيط طابق واحـد جوة غرفتين
و مطـبخ و حمام و استـقبال خارجـي على گدنة
لليل رتبت كلشي گعدنة نتعشة بالهول سويت تمن
و اشترينة روبة اني و غمزة ناكل وهو دك الة بيض
و طماطمة لعب روحي مارضيت اكل وياه ماحبة
دلهم:ترة البيض نوع من انواع اللحوم
غنوة:جيبنة لحوم خل نضوگهن بعدين نتعرف على انواعهن شني ما شني
دلهم:ليسمعج يگول ما ضايگة لحم بحياتها
غنوة:وين ياحسرة
دلهم:چافرة(كافرة) بالنعمة
غنوة:بس لاتحجي هيج تبدل الحروف
اخذ غمزة يغمسلهة شوية بالطماطمة عجبتها كيف
ضل يوكل بيهة يحنصوني ليشوفهم يگول ياكلون باجة مو بيض و طماطمة
غنوة: الحمدلله على النعمة
دلهم:بعد وكت كفرتي لحد ما مليتي
حجيت بصوت عالي:الحمدد الله
دلهم:وووسم
غنوة:الله يديم الروبة و التمن يبعد عنة البيض
دلهم:غيرج مامحصلة
غنوة:هنيالة
ضحك يشمر الخيارة علية اخذتهة اكلهة گمت الم
بالهوسة مال المطبخ لو اعرف شنو قصتة يوصخ
و يشمر كلشي بمكان ولا عندة ترتيب أبد
خليت الجاي على النار طلعت اباوع من الهم مدنگ
مسوي أديه مثل المرجوحة مخلي غمزة گاعدة عليهن و يهزهة هي تضحك شارة الحلگ سنونها الحلوة طالعة ابدي ابوسهن كل سوالفهة تخيل
ارتكيت على الباب مبتسمة يشوفتهم هيج رفع راسة الي حجة يشيلهة:ها تردين مرجوحة
مديت ادية رديت:لا اريد حضن
دلهم:يخسى الحضن المايلمج
حضنتة ابوس خدة رحت صبيت كوب الجاي طلعت
بالحوش گاعدين على المدة برة خليت كدامة التفت
مبتسم حضن جتفي و غمزة واكفة مستندة بأديها
على ركبة رجليه تطگ عليهن و تلعب لوحدها
غنوة:فد ارتاحيت من أجيت هنا بعيدة و سعيدة
دلهم:بعد اني
قاطعة اسد حلگة:بس لاتحجيلك حجاية مو حلوة
حجة يبعد ايدي:ردت اگول يمتة اصير قريب
و سعيد
غنوة:اقرب من هيج
دلهم:أخيط روحي بروحج
سخب أيدي خلاهة على صدرة حجة :تشوفين گلبي يدك بشوفتج
غنوة:هو يومية يدك غير
رد يشمر ايدي بعيد:لا بس من يخاف يدك امشي منا لا أعمي عينج بگفة ايدي
ضحكت اجر بيدة اريد يرضى زعل لان دوم اخرب عليهة الرومانسيه هو يگلي گوة اسفط الحجي انتي
تجين تسوينها سالفة صدگية و تحققين وياي
بوستة بخدة ادغدغة وخرني شال غمزة دخل جوة
رحت وراه طفرت على ظهرة لزمني گبل لا اطيح
دلهم:عندي زعاطيط
غنوة:ميخالف قابلة اصير صغيرونة يمك
دلهم:تريد ابوسهة بس ماتعرف شلون تفتح الموضوع
باوعتلة اضحك نزل غمزة على الجرباية دنگ يبوس راسي حضنت خدة ارفع روحي ابوسة غمضت عيوني اعبر ادية على رگبتة شوية و ابتعد حضني
الدنيا كل ما تضيق يجي يوم و تفرج او يمكن يكون الفرج يمنة و قريب بس مانحس بي لان نركض ورة شي وهمي مانعرفة شنو
دلهم خلص عمرة ورة انتقام ما يولد غير دم جديد
و أذية بالنهاية گدر يلم شتات نفسة و حضن عائلتة
العائلة احيانا تدمر الانسان مثل ما دمرت غنوة
و دلهم على الرغم من اختلاف المعاناة و شدتها
بس كانت نقطة الاذية من العائلة و انتهت بالعائلة
من تصالحو ويا نفسهم و حبو بعض أسسو بيت
گدروا يحتضنون النقص العدهم ما يخلونة يأثر
المال شي أساسي بس مو دائما ترافقة السعادة ممكن يكون مكمل الهة بس من ترتبط بالقناعة
يتحول البيت البسيط لجنة لان السعادة تنبع من النفس لا من مكملات الحياة و بهرجتها
بالنهــاية وصلنة لأخر حلقة من نقش بارد
نقشت الحياة عليهم معاناة خلت قلوب
البعض باردة و البعض حارة
البرودة نبعت من وحشة الروح
و الحرارة من البحث المستمر
على الحب و العوض
انتهت مو بحياة مثالية خالية من المشاكل
بس وقفنة عد نقطة جانت مليئة بالسعادة
و الرضى عن الاشياء الي نمتلكها ببساطتها
غنوة اكتفت بالاحترام و الاستقرار بدون تجريح
و بدون استنقاص من نفسها و من بساطتها
دلهم اكتفى بحب المرأة لكملت حياتة
و احتضنتة بحب و حنان و تفهم بدون مقابل
تطلبوني تكملة لفقرة رفا بس
وراي طريق سفر رايحة زيارة اليوم نشغلت بالتحضير ماكدرت اكتب البارت كامل
و لا نطاني گلبي اخليكم تنتظرون اكثر من عشر أيام
من ارجع اعوضكم و نسولف بالنهاية
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
