رواية هشاشة قلب الفصل السابع والثلاثون بقلم العباديه
همس أحـدهـم في إذنـي :-
"انتِ لستِ قويةً بِـما يكفي لتحمل العاصفـة"
اليوم همست فـي أذنــهُ :-
"أنــــــا الـعـاصــفــة"
~~~~~~~~~~~~~~~~~~~~~~~~~
ثُرىٰ . . .
تقرب عليه يريد ياكل بعقلي حلاوة عباله مااعرف سوالفه المشيطنه
- شو دشوف بطنج صايرتلج بطن صغيرونه .
نترت :-
- طبعاً تصيرلي غير حامل .. ومو هسه تصير .. منا فد شهرين تلاثه
- تتعالي دشوفهه
- مااريد
بحركه سريعه لزمني من أكتافي ورجعني على الكنتور ..إبتسم بخبث ورفع حاجبه
- ليش هيَ بكيفج مثلاً
ظليت أددفع بيه ماناسيه سالفته
- وخررر عنيي وخرر
قرّب وجهه يم وجهي ريحة عطره لفحت بوجهي .. أنفاسه الدافيه صارت يم شفتي دگات گلبه المتسارعه ولهفته من يريد يتقرب خلاني اذوب .. تذكرت شسوه بيه رأساً دفعته بس مايتحرك صايره يمه بگد الفصمه .. احس روحي اختنگت.
- مااهرر وخرر عنيي ريحتك مو طيبه
عبالك إنصدم رأساً رفع جسمه واستقام ظل يعكمش بأرنبة أنفه ولازم طرف القميص من يم صدره يشم بروحه عاگد حواجبه باوعلي كال :-
- ريحتي؟؟ هستوني سابح ومعطر منين اجت ؟
صفن شويه وضحك .. غمزلي ورفع حاجبه بخبث
- ههه سولفيهن على غيري ثراوي
إجه عليه يريد يكمل عند النقطه التوقف بيهه. تقرب واني انتفضت
- لا لا وخرر عني راح اتقيئ .. وخرر شوويه
دفعته برفق و ركضت سريع هوَ هم وخر مسويلي مجال يخاف على كشخته عشتو .. طفرت للحمام لعبانه نفسي من عطره المخليه .. طلعت لكيته واگف يباوعلي بقلق .. اجه عليه بسرعه :-
- شبيج
- يعني التتنسه شبيهه
- عود صدك تلعب نفسج مني؟
- اي والله
ظل صافن بوجهي متفاجئ عباله نسيت البارحه شسوه .. وين جان هسه تذكر شنو .. غندب وجهه وعفس ملامحه ظل وجهه مايگصه الطبر .. اني ردت ارجعهه إله بس هوَ يحرگ گلبي.
لفيت شالي ولبست عباية ونزلت جوه موج تروح ويانه بس ام ماهر ماتريد تروح .
صعدت بالسياره وريحة الكشن مااگدر اشمهه سحبت كلنسه من يمه وطخيت بكتفه عود ماادري خزرني بإستهزاء . مااهتميت خليت الكلنسه على خشمي وهوَ يباوعلي مقوّس حواجبه عود ماعاجبه الوضع . . هز إيده وحرك السياره .. وصلنه لااهلي وهوَ خبصني بالتوصيات :-
- غطي وجهج لاتطلعين بس عيونج ..وديربالج تركصين انتِ حامل
- اي اي فهمت
نزلنه اني وموج تلگتنه صوت الأغاني والتطربگ .. سلمت على النسوان وعلى مروه لكيتهه جايه من الصالون باركتلهه وظليت كاعده اتفرج اريد اركص بس شيفكني اذا صار شي بالطفل اگعد واسكت احسللي.
خلصت الحفله وبقينه منتظرين ماهر لما يصيحنه يلا نطلع .
خطيب مروه غريب مانعرفه بس الولد سألو عليه ومادحين بيهم .. مهندس ومتعين وشكله مقبول.
طلعت من الغرفه وكعدت يم البنات بقينه بس احنه .. شويه ودخلو الولد واحنه كلنه متجمعين سلمت عليهم وباركو لمروه واخذنه صور جماعيه .. وكفنا ناخذ الصوره وحسن يمي همس بإذني :-
حسن.. هاي حماتج كلش حلوة
التفت عليه بخزره ورفعتله حواجبي أنفي تفكيره
- لاتفكر مجرد تفكير
حسن.. شبيج هسه شگلت آني
- اصلاً لاتگول هم .. مدلله واهلهه ماينطوهه لاتتعذب ولا تتعب نفسك اكعد وإسكت
حسن.. اي اي فهمت ماكلت شي بس مدحت جمالهه وخلقة الله تره
- اي ادري خلقة الله بس خليك بعيد
حسن.. اهوو راح تسويهه سالفه ياكلمة رجعي لمكانج سدي الموضوع
دار وجهه وكملنه ناخذ صور .. شويه ودز علينه ماهر رجعنه للبيت بعده وجهه مغندب وملامحه عصبية .. النوب توه مرشرش رويحته عطر واني أتخبل من ريحة العطر .
سديت خشمي ونترت :-
- ماهرر شلقضييه والله تلعب نفسي
عاط بيه معصب .. عرفته يريد يتعارك وحط عطر حتى يحچيني .
- يعني تلعب نفسج مني؟
- اي كلشي ماگدر اشم اتقيء رأساً
نتر بعصبيه وضرب الستيرن بإيده
- اكلج تره مو وضع هذا كل شويه وگلتي تلعب نفسي منك شكالولج عليه وصخ
- تلعب نفسي من ريحة عطرك
- هسه صار عطري مايعجب
- يعني انتَ ماتعرف التتنسه تلعب روحهه من أي شي
- اي اي كافييي فهمناااا
سكتت ماجادلته بعد وكلما يتذكر يظل يشيل بروحه ويدگهه ويحجي عليه واني ساكته .
وصلنه للبيت صلينه وام ماهر كالتلي اسوي العشه واني محتاره شلون اسوي تلعب روحي من ريحة الطبخ والصابون والعطورات حتى الملابس كلهه مااگدر اشمهه .
رحت للمطبخ اريد اگلي اول ما طلعت ريحة الطبخ وشميتهه ماتحملت ركضت للحمام .. هيَ لعبت لعب سوتلي زفه شكبرهه .. لان ماكدر اكمل ظلت موج تحچي وياهه وهيَ قافله .
موج.. يوم اني اسوي البنيه حامل تتنسه
ام ماهر.. ماكو هيَ تسووويه لعد شنو شغلهه
- موج عوفيه اني اسوي
صعدت فوگ ادور بالجرارات على كمامه فد شي احطه على خشمي .. ماهر كاعد ع الجربايه من شافني ادور سألني :-
- على شنو تدورين
- ماعدنه كمامه فد شي اخليه واطبخ
- ليش؟
- مااگدر اشتم ريحة الاكل
- خلي موج تسوي
- ماتقبل عمتي الا اني
- شنو السالفه متعرف بيج تتنسين
- ماادري بس عدنه لو لا
- عدنه. بس لحظه اني نازل
نزل جوه سمعته يحچي وياهه وهيَ كله تحچي بصياح ومعصبه
ام ماهر..اي دزتك عليه دزتك خو تجي تكول مااكدر بعد ليش تدزك تريد تخرب بيناتنه
ماهر.. قابل اني امشي بكيف احددد .
اني بكيفييي ااتتصرررف محد يحاجيني
اني ماتحملت نزلت وكتلهه :-
- عمه مو اني دزيته بس تدرين بيه اتنسه رغم هذا كتلج مستعده أسوي عشه
ام ماهر.. لعد مسويتي لو الا تصعدين
ماهر.. كاااافي مطلع عشه هذا .. يابة اني رايح اجيب جاهز بس خلصصوني واسسكتووو
أشرلي أصعد لفوگ خاف تريد مشكله .. صعد وهوَ صعد وراي اخذ محفظته والسويج ونزل .. ورة نص ساعه رجع جاب العشه صعدلنه لفوگ وهنه انطاهن وحدهن .
- كومي حضري إلنه ولتنزلين جوه سويه بهذا المطبخ
اخذت العشه رتبته بالمطبخ مالتنه هوَ اكو مطبخ بس احنه مانستخدمه لان اكلنه جوه .. اني مااكلت بس بقيت يمه خاف يضوج
ماهر.. متاكلين
- مااشتهي
- ليش هيج حتضعفين وشلون يتغذه الطفل
- بس آكل افرغه ف ماآكل احسن
- اكلي يابه شسالفه تبقين هيج اطإلىٰ متىٰ
كام يلف لفات وينطيني آكلهن .
كملنه وكمت غسلت المواعين ورحت للغرفه حاجيته
- ماهر خل ننزل جوه مااكدر اصعد وانزل تعبت
- اي عادي باجر شوفي الغرفه الترتاحين بيهه وننزل
- الغرفه البصف مال موج
- هاي صغيره منرتاح بيهه .. ناخذ غرفة أمي القديمه
- خاف ماتقبل
- لا شنو متقبل غير اخذت غيرهه المن باقيه فارغه ع الأقل متتأذين
- خوش
لـ11 طفه الگلوبات وتمدد .. اني اباوع ع التلفزيون مغلسه اريده يغفه يلا اروح أنام .. أحس عيونه تترقبني وحركاته الهادئه ربكتني .. كل شويه يرفع راسه يباوعني ويرجع يتوسد المخده .. ماإله نيه ينام واني نعست .
ماهر.. متنامين اليوم؟
- لا انام ليش
- لعد متجين تنامين
- اريد اباوع
- تره نعست
- جا ماتنام
- غير منتظرج
- لا نام لاتنتظرني
اخذ مخاد الجربايه اثنينهن والديباج نزلهن بالكاع حطهن وحده بصف الثانيه وفرش فراش قريب عليه وتمدد .. نام وسحبني من إيدي
باوع بعيني وهمس بهدوء :-
- نامي
- ماانعس
- مشتاقلج
- مـاا
- ثُرىٰ بس تعالي بحضني مرايد شي
فتح إيده مسويلي مجال بحضنه ويباوعلي .
باوعت عليه نظراته المتوسله وهمسة صوته الخشن إضافه لاإشتياقي إله وحلاة حضنه خلاني إنصاعله ورحت نمت على إيده .. اول ماصرت بحضنه إحتضنني حيل وعصرني بحضنه .. ظل يشم بريحتي ويستنشق ركبتي مرتاح .
يبوس بشحمة إذني ويعضهه خفيف
.. يهمس بإذني بلهفه. - اخ يابه مشتاق لهالريحه حتموتيني شسويتي بيه .. نزل ببوساته على ركبتي واني ذايبه بين إيديه .
من شاف إستسلامي ورخاوة جسمي ظل يتماده ببوساته لما يختم الليله بطريقته الخاصه .
(تفضلو يابه تفضلو)
,,الفجر صلينا واني ظليت كاعده عيني ماتاخذ نوم اظل احوس واتگلب لما أمل واگوم . شويه ومااحسلك الا الباب يندفر بقوة وعصبيه ويندگ مال واحد يريد يكسره .. اني ركضت فتحته لان ماهر نايم ووراه دوام .. بس اكيد هسه فز .
لكيتهه ام ماهر اول ماشافتني عاطت بيه
ام ماهر.. من دخلتي للحمامات شفتيهن لووو لا ؟
- شبيهن؟
ام ماهر.. شفتيهنننن لو لا ؟
- اي شفتهن البارحه منظفتهن
ام ماهر.. لعد منظفتي هسه شنو شغلج فهميني
- عمه شويه صوتج ماهر نايم باجر وراه دوام
ام ماهر.. اي اي حقه ينام اذا عنده سهره للصبح شلون مينام
رديت بنفاذ صبر
- چؤؤؤ هسه شنو
ام ماهر.. فووتي نزلي نظففي يلاا بسرعه
- عمه تره اني مو خدامه لاتصيحين عليه بهالطريقه
ام ماهر.. يلا يلا لعد المن جايبيج نفصل على طولج
غمضت عيوني بنفاذ صبر ونزلت نظفت البيت كله بس كون تسكت وماتسويلي سالفه .. حتى ماهر مل من المشاكل كلما يجي تسوي مشكله . سويت الريوك وركبت الغده بس هيَ تكمله .
صعدت حضرت لماهر ملابسه وكعدته .. كعد بدل ونزل تريكنه وراح .
حاچاهه علمود ننتقل للغرفه الجوه بالاول رفضت وبعدين اقتنعت لان بكيف ماهر .
حضرت كم غرض ونزلناهن اني وموج لجوه وبقيت منتظره ماهر يلا نستقر بالغرفه الجوه .. هيَ تكمل الغده هالأيام .. أتصل ماهر كال اليوم مااجي لاتنتظروني ..
اني بالغرفه ماكتلهن اجت يمي موج وظلينه نسولف .. صارت الساعه بـ12 ونص سمعت صوتهه ع الدرج تصيح موج ع الغده .. موج كالتلهه هسه ننزل اني وثُرىٰ تگلهه لاتنزل لااخليهه تاكل سم هيَ تطبخ وتاكل لعد المن مخليلهه مطبخ فوگ .
سكتت ومااهتميت نزلت موج بعدمـا حاولت وياي ومستحيه من موقف امهه بس اني ماقبلت انزل بقيت جوعانه ولااتنازل ولااكل .. حتى ماطلعت بقيت بالغرفه .
ماهر تأخر حيل اجه الليل وصارت الساعه بـ11 وهوَ ماكو .. إتصلت عليه مغلق ..
ظليت ألوب اتصل وماكو .
بقيت كاعده منتظرته صارت الساعه بالـ2 خابرني ظليت ابجي خلاني بقلق فضضيييع .. بقه يهدأ بيه ويعتذر .. طلع رايح لبغداد علمود يشوف البيت لان يريد ننتقل بس اجيب .. كال الصبح هم مايكدر يجي لما يكمل شغل يله يرجع .. خابرني يلا كدرت أنام .
ثاني يـوم گعدت الصبح سويت الريوگ وبقيت كاعده ع الكراسي إختنكت شويه طلعت بره كعدت .. جبت طابوگه من الحديقه وحطيتهه يم الشجره وكعدت مقابيل الشمس والهوىٰ الدافي يريح أعصابي .. هيَ كعدت من النوم راحت تغسل شافتني كاعده .. رفعت إيديهه لفوك مثل اليدعي وظلت تصيح "الحمد لله ربي على نعمة العقل ألف الحمد لله"
عود قصدهه اني مخبله لان گاعده هنا .. هزت إيدهه وراحت عاوجه حلگهه وتضحك عليه ماجاي يصدگون بيه ولا عبالك شايفه النساوة وماره بيهه .
ظليت كاعده انتظرتهه لما خلصت ريوك يلا رحت غسلت المواعين ونظفت البيت .. من كعدت موج الظهر ظلت تتعذر مني
موج.. والله ردت اجيبلج غده بصينيه بس ماكتيلي
- ههههه اكلج؟؟ زين احنه من ندز أكل لبيت ابو احمد همه يگلولنه لو احنه ندز لوحدنه؟
موج.. لا ميگولون احنه ندز
- جا تريدين اني اگلج؟ .. لو هيج حنينه عليه چان انتِ جبتي لوحدج .. بس يلا ماصار شي اصلاً اني مااگدر اكل لان افرغه
سكتت وراحت .. احنه دوم ندز لبيت ابو احمد جيرانه حالتهم فقيره ف همه متكفلين بيهم الغده والعشه كله عليهم دوم ماهر لو السايق يشترونه ويدزوه الهم .
ثاني يوم نزلت بالغرفه الجوه وبقيت كاعده بيهه .. هنه هم تغدن لوحدهن وماصاحنّي .. شويه وجابتلي موج صينيه بيهه غده ورجعت تتغده .. رحت فتحت باب الغرفه وخليتهه ع الميز حتى مايگولن اكلت .. مامحتاجه لااكلهه .. طلعت فواكه عندي واكلتهن .
هاي ماهر غاب يوم هيج سوت . عود لان حامل ومااطبخ تعاقبني تخليني بدون أكل .
العصر اجت موج وانطيتهه الصينيه بحطتهه حتى ماشفت شبيهه .
المغرب يلا اجه ماهر تعبان سلم عليه وظل يطگگ بجسمه وصوت العظام تتطگگ بتعب
ماهر.. آخ آخ خرب
- شبيك
- جسمي كله يأذيني آخخ
- راح اجيب زيت وادلكلك
جبت زيت ودهنتله جسمه لان متشنج كوه يتحرك تعبان من السياقه .. ارتاح من دهنت جسمه وغفه .. آني هم من شفته نعست وتمددت يمه .
كعدنه بالـ10 طلعت گليت كبه وبورك متنگبه خاف اشم ريحة الگلي .. وسويت زلاطه .. طلعت إم ماهر راحت للغرفه سلمت عليه واجت يمي تباوعلي بخبث .
ام ماهر.. وتگولين مااگدر اطبخ لعد هذا منو گلاه
- تنگبت
ام ماهر.. اممم يمه يالعياره بنت الفگور تتعاير
سكتت عنهه بس داخلي يفوور مليت من البسامير كل كلمة تگولهه اظل اطحن كبدي واسكت اريد اشوف شوكت يخلص صبري.
رحت صحته وظلينه نتعشه .. خلصنه عشه ولميت المطبخ ع السريع رحت للغرفه حاچيت ماهر گتله بس تخلص نساوتي نعزل أكلنه فوگ خزرني وهز راسه ينفي
- لا ماكو عزلة
- بس اكلنه
- هوَ إحنه نجتمع بس ع الاكل تريدين تخربين هاي اللمه
- ماهر والله تعبت
خزرني ونتر
- لااااا سدي الموضوع نهائياً
سكتت ماحچيت شي بس بينت زعلي بملامح وجهي .. طگت روحي ليل ونهار رزايل وبسامير وتصرفات تقلل من قيمتي هيَ من البداية مارايدتني .
من نمنه ماگدرت أكتم عبرتي .. ظليت ابچي بهدوء بدون مااطلع صوت جاي أكتم بگلبي أكتم لما انفجر سوالفهه خبلتني .
هوَ حس عليه تقرب مني بس اني منطيته ظهري حط إيده على خصري يريد يدورني عليه ثبتت روحي حيل وماانداريت .. لزمني بقوة من إيدي ودارني لناحيته .. دنگت عيوني وظليت اشهگ لزمني من فكي برفق ورفع راسي .. همس بصوت رجولي بيه بحة :-
- شبيج تبجين
- ماهر بس احاجيك
عصر عيونه وعگد حواجبه متململ
- اهووو ثُررىٰ حترجعين لنفس الموضوع
- خل احجي واذا ماعجبك بعد مااحجي أي كلمه
- ثُرىٰ اني كلمتي متصير إثنين وممتعود واحد يكسرلي حچايه
- لا مااكسرلك حچايتك انتَ رجلي وتاج راسي وكلمتك نفسهه تبقه محد يكسرهه بس انطيك رأيي اذا عجبك نسويه واذا مايعجبك بعد ماافتح الموضوع نهائياً
باوعلي يفكر وهز راسه همس :-
- احچي
- باوع انتَ من تروح للكليه اني ابقه فوگ اطبخ الغده مال العائله كلهه بس فوگ ووننزّل حصة عمتي وموج وإحنه ناكل هنا واليوم كله نخلصه جوه بس أوقات النوم .
والعصر مثل كل يوم نسوي كيك لو معجنات وناكلهن بالحديقه العصر ولمة الليل نعوضهه وره العشا ننزل نشوف فلم لو نلعب لعبه ونجتمع كلنه بقت بس لمة الريوك احنه مانلتم لان كل واحد دوام لو نايمين .. هذا رأيي المقتنعه وانتَ بكيفك
صفن شويه .. حك أرنبة أنفه وحاجبه .. هز راسه وكال :-
- تمام خوش فكره
- نسويهه يعني
- اي
- ههههه شكررراً
حضنته من الفرح .. أريد استقل احس نفسي عايشه بذله جوه .. الصبح كعدت متحمسه حيل كمت على المطبخ فرشته فرشة شتائية وطلعت المواعين والگدورة رتبتهن على الكاونتر والكراسي طلعتهن بس الطاوله من يرجع ماهر يشدهه .. رتبت الصاله سويتهه تخبل وحطيت ورد ولوحات مناظر طبيعية .. هواي شغلات مال زواجنه ضاميهن بالمخزن لان مانستخدم الفوگ بس هسه كلهن طلعتهن فادنّي ورتبت بيهن صار بيتي بعد .اللللله شكد حلوة هالكلمه
••
خلصت نساوتي بصعوبه وصار أكلنه فوگ كلش مرتاحه واريد اطير .. اطبخ بكيفي وألبس بكيفي محد يحاسبني ولا يسمعني حچايه بالرايحه وبالجايه .. مااطبخلهم همه يطبخون لوحدهم لان حامل وين اگدر .. مرات عمتي ام ماهر تطبخ ومرات يجيبون جاهز .
امتحنت امتحاناتي بدون مااداوم بس بيوم الإمتحان ياخذني ماهر ويرجعني .. استلمت النتيجه مال نصف السنه ناجحه .. وبقه بس شهرين امتحنت شهر وبعد شهر .
اليوم مركبه مركة سبيناغ وفلفليه .. ماهر يحبهه .. إجه من الدوام دخل للمطبخ واني واكفه اشطف المواعين اريد اصب .. حسيت بإيديه حاوطت خصري وتلمست بطني سحبني برقه على جسمه وغمر راسه برگبتي .همس
- اليوم اكو غده لو اتغده بيج
- لا لا طابخه ومكمله
- حررراماات
- هههه
تتغده اصب
- خل ابدل واجي
- راح اصب علما يبرد الأكل
- يله صبي
راح بدل وكمل اجه وظلينه نتغده . . عيونه تتأملني بفرح يباوعني مبتسم ونظراته حلوه .. أباوعله وأدنگ آكل وهوَ يضحك من ادنگ .
كملنه .. لميت المواعين وصبيت الچاي يشرب ويباوع براحه سألني
- مرتاحه هنا
جاوبت بفرح
- اييييي كلش مرتاحه
- داشوف الفرحه تلمع بعيونج لو أدري من زمان عازلين
- هههه بعد صارت هسه ومرتاحه حييل
- الله يديمهه
- ان شاء الله
دخل للغرفه واني يمه .. طلّع الاوراق
- ثُرىٰ قلم من يمج
طفرت جبتله القلم وبقه يصحح .. اني طلعت على المطبخ سويت كنافة بالجبن للعصر .. توني احط الطبقه الثانيه وسمعت صوته يصيح بأسمي
- ثُرررررىٰ
.. ثُرررررررىٰ وينجججج
فتحت الباب ودخلت .. يهز برجله وعاگد حواجبه عصبي
- هــاا
أشرلي على مكان يمه رحت وكعدت بيه .. باوعلي بخزره ونتر :-
- شنو هذا؟؟
- شنوو؟؟
- باعي ثُرىٰ باااعي هذا حل طالبة هذذااا
يأشر على الورقه بعصبيه ويضرب بيهه بالقلم سألته بإستغراب :-
- شنو شبييه؟
- لتسألينيي شبيييه بس باعيله وانتِ تعرفين ششبييه
باوعت للحل مالتي وباوعتله يخزرني بغضب وعيونه شرار .. صفنت بيه بنظرة حنان وهمست بهدوء :-
- شبيك عصبي
- حتخبلينيي هسسه شأسوي بهذا الحل بس فهمينيي
- اني قريت والله
- ثُرىٰ تدرين بيه مااحب الواسطات ومااحب اساعد احد انتِ هسه حالج حال طلابي وهاي ورقتج اصححهه حسب الحل الصحيح
أردف
- ولو ماكو شي صحيح بس انطيج درجه على اسمج
- مااهر حباااب غير تعبانه وحامل .. من وره ابنك ماركزت زين
- ايبااه ابني شعليه تطلعين حجتج بيه
- غير هوَ متعبني ومنا انتَ وياه
- ماكووو حجج ها أهــا هاي ورقتج بس 3 درجات
أشر على ورقتي وكتب الدرجه ووقع .. انتفضت
- ييحح والله فشله زوجة دكتور ماهر هيج تاخذ حبااب ماهر فددوه بس هالمره وبعد التوبة يزنوبه
- چؤؤ چؤؤ عود اقري زين بالشهر اللخ
-لا والله ماگايل شي
- اني ادرسج ع الشهر الجاي
- مااريد .. اصلاً بعد ماامتحن هاي هيه بطلت
- اهووو ثُررىٰ لتسوين هيج مااگدر انجحج وانتِ كلشي محالّه حتى حرام عليه
- اي هاي هيه ماكلت شي اني
- صدك عود بعد متداومين؟
- اي صدك قابل جذب
- ثُررىٰ اذا مداومتي بعد تنسين الكليه خل ازيدج من الشعر بيت
- اي ميخالف
- بكيفج قابل اجبرج
- لا شنو تجبرني عليمن
- تمام
وگفت اريد اطلع وهمست بصوت مسموع بس ناصي :-
- هاي عود مرته هــه !
من سويت هيج وگف .. ظل يشيل بروحه من العصبيه ويعيط يأشر بإيديه وشرايينه كلهه برزت
- مرتتيي ؟؟ واذا مرتتييي يعني تضربين ع الوتر الحساس من تسوين هيج كتلج من توصل للكليه انتِ طاالبةةةة افهميهه طااالبةةة يعني الله يقبلهه انطيج درجة نجاح وانتِ كله خطأ وانطي لطالب تعبان وكله صح عنده مثل درجتج
- اي اي فهمت هاي هيه
- ثُرررىٰ رجااءً البيت شي والكليه شي ثاني لتربطين بين الكليه والبيت
- اذا مااربط جا ليش صحتني خو صحح ومن اداوم بالكليه انطيني النتيجه حالك حال الدكاتره
سكت ويخزرني بغضب يزأر عليه زأر وينافخ يريد يفترسني لان ماعنده كلام يحچيه .
عيونه بعيوني ومخنزر اني دنگت لان احس عيونه مدخنه .. دار وجهه عني وضرب الميز برجله .. لم الاوراق بعصبيه عفسهن وضمهن بالجنطه وسداهه شمر القلم حيل وطلع بره .
رحت كملت الكنافه بردتهه ونمت شويه .. للعصر سويت چاي وهوَ بعده ماصاعد شعنده جوه شو طول .
خليت كيك وكنافه بصينيه ونزلت لكيتهم كاعدين بالصاله يسولفون .. رحت للمطبخ صبيت الجاي وقدمت .. هوَ آكل بس من الكنافه وظل كلساع ياخذ منهه مبين عجبه الطعم.. طول مااحنه كاعدين مايباوع عليه ومادايرلي بال .
ظلينه نسولف اني وموج واندمجت نسيته كمت مااباوع عليه .. شفته بطرف عيني يأشرلي بس غلست لما وگف كال :-
- يلا ثُرىٰ كومي دنصعد
- خليني هنا شويه
- كوومي مشايفه موج شنو
- اي والله مشتاقتلهه
- دكوومي يختي اريد اطلع تأخرت
- هاا اي اي جايه
صعدت وهوَ وراي يمشي دخلت للغرفه كال :-
- حضريلي ملابسي
- شنو وين رايح
- طالع ويه اصدقائي
- شأحضر رسمي لو عادي
- كيفج
طلعتله بنطرون وتيشيرت وحذاء رياضي خل اغير من الستايل مالته .. كمل ولبسهن حطيتله العطر ولبسته الساعه مثل كل مره .. يباوع عليه واني مركزه بالاسويه .
تقرب يمي وهمس :-
- هاهيه كافي
ابتعدت عنه وتحمحم .. انطيته السويج والمحفظه ونزل .. عزلت المواعين السويت بيهن ورتبت الغرفه ورحت خابرت اهلي اتطمن عليهم صار هواي مارايحتلهم حضرة الدكتور مايقبل يكلي خليهه فد نوب لما تجيبين مايريد يضيعله يوم الا ويعوضه .
فدك حامل ومهددة بالإسقاط خطيه ومحتارين بيهه .. ظل بالي يمهه اريد اروح بس متفقين اني وماهر يخليني عند اهلي شهرين علمود مااروحلهم بهالفترة كلهه .
للغروب يلا رجع .. بعدني مامقرره شأسوي عشه وبعدنه تونه صلينه سألته مابباله شي .. طلعت كبة برغل تارسه المجمده كل فتره اسوي كمية چبيره واجمدهه .
توني حطيت البصل احمسه وهوَ اجه
- مبقه عندج من الكنافه الاكلناهه العصر شو جعت
- اكو بس تحرمك العشه
- عجبني طعمهه داشتهيهه
- اي هسه اجيبلك
كعد ع الكراسي يراقبني شلون اشتغل .. طلعتهه خليتهه بماعون وانطيتهياه .. ياكل ويطلع اصوات يتلذذ ويمدح بيه .
- ممم علمي موج عليهه خطيه امي جفاف عدهم
- اني من اسوي انزللهم ماعون
- خبيرة بعد على هالاكلات راح اكرش يرادلي اجدد اشتراك بالجيم
- هههه جا انتَ ماتلعب قبل
- لا العب بس من ترتب جسمي تركته وحافظت عليه بس هسه حتخربين جسمي وتنعلين ابو العضلات هههههه
ظلينه نسولف واني استمعله واطبخ هوَ اندمج واني هم نسيت نفسي طفيت الطباخ وكعدت ظلينه نسولف .. تأخر الوقت واحنه مامتعشين بس كاعده يمه .. سمعت صوت موج تصيح بإسمي گمتلهه .
ها موجه
موج.. اگُلچ ثُرىٰ معندج أكل كلش جوعانه وماما معاقبتني
- اكيد عندي هلا بيج تعالي تعالي تفضلي توني كملت طبخ
اجه ماهر مستغرب
- شنو شصاير
موج.. ماما معاقبتني صار من العصر لحد هسه ترزل بيه وعاقبتني مليت والله
غطت وجهه وظلت تبجي وتشهگ اجه ماهر عليهه رفع إيديهه من وجهه
- شنو عليمن معاقبتج ؟
موج.. لان كالتلي فرغي المي مال الثلاجه ونظفيهه من داشيل المي وكع على راسهه وخبلتني ساعه ترزلني ساعه تغمني.. قطعت عليه النت واخذت فوني وهسه متخليني آكل واني جوعانه
- تعالي تعشي واني اتفاهم وياهه
التفت عليه ويحجي بنفاذ صبر
- ثُرىٰ يلا صبي دنشوف شمسويه امييي بعددد
صبيت تلث مواعين وكعدنه ناكل بهدوء وبس صوت شهگة موج ينسمع ماهر طبطب على ظهرهه تنهد وكالهه :-
- كافي لتبجين متسوه تعشي عوفي البچي
كمت جبتلهه كلنس ومسحت وجهه .. هدأت شويه وتعشت .. كملنه وماهر نزل كال لحد تلحكني وتنزل .. حذرنه وراح شويه وگب الصياح لعب لعب وامه تلعلع ولا سكتت سمعنه صوت مدري شنو تكسر .
موج تبجي وترجف لازمتني .. هيَ بس يعصب ماهر تظل ترجف ملاحظتهه كلما يعصب .. تخاف منه حيل رغم هوَ لا يضرب ولا يسوي شي بس يرزل وصوته رعيده من صدگ يخوف.
ورة دقايق صعد عصبي ووجهه احمر بس گال لموج قبل لايدخل للغرفه
- موج انزلي لغرفتج واخذي أي شي جنتي معاقبه بي واشوف شلون تمنعج منه
موج.. خاف مامـ...
- شككلللت انيييييي
موج.. اي اي رااايحه
نزلت ركض واني ظليت بمكاني مادخلت وراه النوب تجيني رزاله تايهه .. خليته شويه يهدأ ركضت عصرت عصير طبيعي وظليت شويه گاعده يله دخلت للغرفه وبإيدي العصير .
جان كاعد على الجربايه ويهز برجله حيل طبيعته من يتوتر .. قدمتله الكلاص رفع راسه عليه ابتسمتله رد الابتسامه وشربه كله .. كال :-
- الله معوضني بيج اني
- شعندي غيرك من هالدنيا انتَ وبس .. تنهدت .. خطيه موج
- امي حتجلطني تصرفاتهه صايره متنطاق اني لو ادري شي يسوه اني اعاقبهه لموج لان اني مربيهه بس متسوه لان اندار عليهه المي خبلتهه للبنيه حتى داخاف عليهه تروح تسوي بنفسهه شي وموج متتحمل
- الله يهديهه عليهه
ابتسم براحه وگعدنّي يمه حط إيده على كتفي وحضنني
- تدرين اكثر شي احبه بيج من اعصب متتقربين يمي وتسكتين
ابتسمت فرحانه
- داتعلق بيج حيل مداكدر اكمل دوامي اريد بس يخلص الدوام حتى ارجع للبيت حركاتج ودلالج ولبسج واهتمامج مداكدر اعوفججج
حطيت راسي على كتفه راضيه عن نفسي
- ماهر هم يجي يوم وتتندم لان تزوجتني
- مستتحيل اني من اخذتج اعرفج شنو .. اني بيه طبيعه من اعاشر الشخص اعرفه واعرف طبيعته بس انتِ حيرتيني مرات شخصيتج مختلفه رغم هذا قفلت عليج واخذتج مو ماهر يعوف حبيبته تروح لغيره
- اممم
- اي وداعت عيونج الي من اشوفهن انسى أمي
- ههههه امك خو ابوك
- ابويه بعيد بس امي قريبه ههههه
ظلينه نطلع فيديوات ونضحك عليهه لو نشوف فلم .. كمت كويت ملابسه مال الدوام حتى الجواريب لازم اطگهن اوتي .. هوَ نام واني بعدني مامكمله تأخرت حيل بالگوه خلصت .. علكت الملابس وحضرت جواريبه وساعته والعطر كلهن على جهه واجيت تمددت يمه .
حضنني ودفن راسه بركبتي يلا نام .. تعودت ماانام الا بحضنه وهوَ هم .
الصبح كمت حضرت الريوگ وانطيته ملابسه ولبسته الساعه والربطه ذني كلهن اني اهتم بيهن حتى حذائه البسهياه .
باسني من راسي وطلع للدوام .
مر كم إسبوع واني يوميه اروح للكليه أمتحن الشهر الثاني .. امتحنت كم إمتحان واستلمت نتائج الشهر الأول كلهن ناجحه بس بدرس ماهر .. باچر إمتحاني بمادته وآني محتارة شلون بيه .
رجعنه اني وياه بالسياره وكتله :-
- ماهر بكل المواد ناجحه بس بمادتك
- انتِ متقرين زين
- لا والله أسئلتك تكسير
- ههه توچ شفتيهه
- شلون إذا رسبت الشهر الثاني
- بس نوصل حدرسج منا لما اخليج تكرزين المادة
- صدددگگگ
- اي وداعتچ
وصلنه للبيت تغدينه ونمنه شويه ولزمني قراية منا لليل. اخر شي طفيت ظليت اباوع بي وهوَ يشرح .. تقرب عضني من خدي بخفه ودحكني بمتني
- ركزززي
دنگت راسي وغمضت .. نزلت كذلتي على عيوني رفعهه وضحك
- لج شبيج
- ماهر نعست
- يله يله كومي نامي خل اخلي الاسئله
- لاااا ماانام خليهه هسه مقابيلي
- ههههه وين لاگيتهه هاي
- مـاا مااگوم
اجيت وگعدت بحضنه .. چلبت إيديه برگبته وظليت اطبع بوسات خفيفه على لحيته وركبته واضحك هوَ وكف بيه واني مچلبه مااريد انزل .. شمرني ع الچربايه لفلفني بالديباج وصوت ضحكه العالي تارس المكان .. خلاني مااندل دربي اريد اشوف وين راس الديباج ماكو .. وخرت الديباج بصعوبة لكيته ماهوَ بالغرفه.
ضحكت ونمت خليه يخلي الاسئله خطيه تأخر الوقت .. بالليل حسيت بحضنه من حضني بادلته ونمت
ثاني يوم كعدت نفس الروتين سويت الريوك وبدلنه .. من طلعنه سألته :-
- شلونهه الاسئله
غمزلي
- قبل لاأخليهه .. انتِ بحضني ويمج الحساب
- هههه اذا بيهه اني يعني تكسسر لان تريدني ارسب
- علىٰ هالقراية اذا مو درجة كاملة ازينچ صفر ههههه
- گورك من گور شعري
- ههههه لان تحبيه اعاقبج بيه
وصلنه للكليه وانصدمت بالاسئله كلش سهله حليت بسهولة وسلمت الورقة يباوعلي يضحك ويغمزلي .. كملنه ورجعنه للبيت .. ظل يصحح الاوراق علما يكمل الغده
- يله ماهر راح اصب اجي الگاك مصحح ورقتي
- ديله اني هم جعت
رحت صبيت وخليته يبرد .. اجيت يمه ضم ورقتي وره ظهره
- توقعي شكدد
- اممم درجة كامله ؟؟
- صحيح ماخذه درجه كامله
ظليت اطفر من الفرح مامصدكه واضحك حضنته حيل
- لجج الطفل الطفلل خرب يومج
- ههههه راح اطير من الفرح
- هههههههه طيري واني ألزمج
ثاني يوم خلصت امتحاناتي هوَ راح للدوام واني بقيت ركبت غده ونزلت لجوه دوم انزل انظفه .. كملت تنظيف الظهر كالعاده بوقت جية ماهر كامت تصيح وتعارك وياي .. ماهر واكف متفاجئ وهيَ تلعلع بعلو صوتهه وترزل بيه .
ام ماهر.. انزلي خنشوفج لتنظفين ولا تكيسين شي بس مخلصتهه فووگ ممليتي من الگعده
- عمه غير يوميه انظف
ام ماهر.. شوكت نظفتي شووكت
سكتت وماهر واگف يباوعلهه وهيَ ترزل بيه رفع حاجبه وعاط
- وتاااااالييييي
ام ماهر.. شنو شبيك
- متلگين وقت تتعاركين بيه غير وقت جيتي من الدوام مو اجي طايح حظظظييي ارييدد ارتااااح مو احل مششاااكل
ام ماهر.. لتعيط عليه اني امك
- اذا امي فكري بمصلحتي وكاافي مشاكل من تزوجت لهسه شاده وياهه بس بوقت جيتي تگبين مو ملليييت
ام ماهر.. اي مخليتك بإيدهه شتگول تمشي وراهه
- كاافيييي
خله ومشه .. صعد ع الدرج وصاح
- يله ثُرىٰ تعالي لتبقين جوه
رحت وراه وهيَ تتحلف بيه بقبضة أصابعهه .. صعدت وراه وهوَ عصبي .. نزع الربطه بعصبيه مايكدر ينزعهه لان معصب .. ظل يملخ بيهه واني ركضت عليه حطيت إيدي على إيده بهدوء وهمست :-
- شويه اني اسويهه
فلتتهه ونزعته سترته وجواريبه .. بدل وكعد يهز برجله هاي حركته بالذات تخليني اعرفه معصب لو لا.
- اصب غده؟
- هوَ بقت شهيه بقه صخام
- ماهر لاتعصب اني تقريباً تعودت وجاي اسكت
- اذا تبقين تسكتين تنفجرين ومااريدج تنفجرين عليه اني هم مليت
سكتت وخليته يهدأ بلكي يتغده بس ماتغده بقه بدون أكل ونام .. اني هم مااكلت بلياه للعصر اجت موج
موج.. ثُرىٰ تعالي نسوي فد شي معجنات مشتاقه لطبخ البيت
- جا ليش ماتاكلون طبخ بيت
موج.. لا ماما كله تدزه جاهز وحتى اذا مشتهيه كيكه فد شي كله جاهز واني مااحب الجاهز
- ابدل واجي نسوي چرك
موج.. انتظرج
دخلت بهدوء امشي على اطراف اصابعي للغرفه اخذت دشداشه ولبستهه فوك التراك طلعت بهدوء بس وقفني صوته :-
- ثُرىٰ حتنزلين جوه
- اي
- مو تتأخرين شوي واصعدي
- اي.. اذا تريد تطلع هاي ملابسك هنا محضرتهن
- تمام
رحت للمطبخ اخذت چكليت وحلقوم للحشو ونزلت .
عجنت وانتظرت العجينه لما تتخمر قطعت الحلقوم على كد الچرك وفليت الجكليت لما اختمرت بلشت اگصه واحشيه بچكليت وحلقوم اجت ام ماهر شافتني هزت ايدهه وراحت .
شويتهن وواگفه يم الفرن .. هيَ دخلت وكفت يمي طلعتهن خليتهن ع الكاونتر يبردن واشيلهن بالماعون .. الچكليت مايع ونازل على الچرك صاير شكله كلش حلو .. هيَ شافته واجت تحرك بيهن بأصابعهه
ام ماهر.. هاي ليش لازگ
- لان الحشو چكليت يموع بس اني ادري بيه مجربته ف مكثره دهن هسه بس يبردن اشيلهن
جابت سچينه وظلت تحاول تشيلهن لما خرب شكل كم وحده لان بعدهن حارات وشلعتهن بقه نص بالصينيه ونص اجه بإيدهه .. اجت عليه تركض ضربتني بخفه على راسي ولازمه الچركه بإيدهه
ام ماهر.. اكووو وحده غبيه هيجج تسوووي اكووو .. هوَ الچكليت يحشون بيه؟؟ انتِ صدُگ غبييةةة تدرين بيه يموع ويلزك ع الصينيه
- عمة اني اعرفلهن كتلج من يبردن اشيلهن ليش لعبتي بيهن
ام ماهر.. اني اعرف احسن منج
- شو شويه هسه شوفي شون راح اشيلهن
بردتهن وشلتهن مالزگن خليتهن بالماعون واني اباوعلهه بنصر
- ها هسه منو اعرف
ام ماهر.. اني اعرف اكيد بس لان الچكليت مايع من وراج
سكتت وسويت الچاي .. نزل ماهر شاف الماعون اخذ وحده وظل ياكل امه كالتله :-
ام ماهر.. ها شنو رأيك بالطعم
ماباوعلهه وكال بجمود :-
- طييب
ام ماهر.. هذا سوته موج الله يحرسهه من العيون *وتباوع عليه
هوَ اخذ لكمه من الچرك الي بإيده وهز راسه متلذذ باوعلي وكال :-
- عاشت إيدج ثُرىٰ كلش طيب
اني إبتسمت وهيَ وجهه صار احمررر من الحرگه .. باوعتله وتنتر
ام ماهر.. داگولك موج سوته مو هيَ
مااهتم وغلس باوعلي :- عندج بعد ام الچكليت
- اي هذني الدائريات ام الچكليت
اخذ وحده وراح .. هيَ بقت بالمطبخ تباوعلي وتزأر عليه .. تقربت مني وعيونهه تجدح وملامح خبيثه مرسومه على وجهه
" يـومٍ بعد يـومٍ أتحمـل الأشيـاء حـولـي بـصـعـوبــة."♡
~~~~~~~~~~~~~~~~~~~~~~~~~
ثُرىٰ
تقربت مني وعيونهه تجدح وملامح خبيثه مرسومه على وجهه
ام ماهر.. لج شمسويه لإبني مديححججي ويااااي
- شمسويتله اني شعليه غير انتم ماتتحاجون على سالفة موج
ام ماهر.. لجج لااا متغير جذررياً گولي شمسويتله امهات السحورة
- يااا امهات السحوره شنو النوب
ام ماهر.. لج والله لو أعرف لهالسوالف واندل واحد الإ اطلعج منا بالليلة ظلمة بس ااخخخ شعرفني بهالسوالف اصلاً اخاف منهه واتقزز بس حرامات خليتهن الج
- عمة شنو هالحچي اني شعرفني بهالسوالف ووين شايفتهن
ام ماهر.. لعد شبيه ماهر هيج يباع بحلكج
- جاي اتعب عليه ابو بيتي شعندي غيره رغم حملي مااشتكي من شي واقوم بواجباته كلهه وأحبه وصايرتله كلهن بوقت واحد
ام ماهر.. مداصدك هيج يحبج لان تهتمين بيه
- عمة اذا صدكتي او لا مايهمني المهم اني اعرف بنفسي شجاي اسوي ف خليج بعيدة واني اريد احافظ على عائلتي لاتسويلي مشاكل رجااءً
ام ماهر.. مستتحيل وربي ماافك منچ ياخه اذا متطلعين مطلگه واجيب جنونه
- يعني تشتتين عائلتي علمود جنونه؟ مو آني حامل بحفيدج
ام ماهر.. اي ناخذه حفيدي منج شعبالج لعد اخليه الج
- استغفر الله ربي واتوب إليه عمة فكري براحة ابنج لتفكرين براحتج انتِ خوش اني مااحجي شي من تسوين هيج لان مااريد مشاكل علمود ماهر اكول خطيه اجي اشكيله ويگول نكديه بس انتِ ماتفكين مني
اجت عليه دفعتني ومشت .. اني طحت بالگاع وصرخت لاارادي .. تأذيت فوك حچيهه ظليت ابچي احس روحي تعبت كلمة وحده وانفجر ملييت .. من شافتني ابجي رجعت عليه خايفه وايدهه رجفت
ام ماهر.. شبيججج
- بطني أذتني
ام ماهر.. اسفه والله آسفه هاج هاج اشربي مي
شربت ماي وعيوني تجري جاي اتعب يوم بعد يوم .. ماحبيت ضعفي مقابيلهه خليت وگمت مااتحمل حچيهه كله سم سسممم .. هالمرة مستعدة كلشي تسوي في سبيل تطلعني من البيت .. شأسوي هسه اني يربي. ماتعوفني بحالي .
•••••
{تسريع الأحداث}
اليوم رجعت من الدكتورة بعدمـا گتلهه تحددلي وقت للعمليه حتى أجيب لان مااگدر اجيب طبيعي كالت ترجعين باجر اشوف وضعج واحددلج يوم لان لكيتهه ازدحام .. كالعاده تلگتني ام ماهر تريدني اجيب طبيعي واني روحي طافره
ام ماهر.. عيني لتتعايرين جيبي طبيعي احسنللج
- اني اعرف شنو الأحسن إليه
ام ماهر.. مامو عملية تجيبين طبيعي
خليتهه ومشيت تعبانة وجسمي نحلان كوه امشي وبطني واصلة لخشمي اريد انفجر فوك ثگل الحمل فوك حجيهه المسمم .. كل حچاية والثانيه تسم بدني بكلمات تخليني اتحرگن .
ثاني يوم رجعت للدكتورة وحددتلي موعد العملية الخوف متغلب عليه وافكر خاف يصير بيه شي وكل الاوهام تخطر على بالي واطردها
••
اليوم ودلاتي .. نايمة ع السدية واحس اطرافي ثلجت من الخوف .. بطني خبطت ومتوترة .. ماهر يمي لازم إيدي ويهدأ بيه .. اهلي جايين وفرحانه بيهم صار هواي ماشايفتهم عيوني عليهم ودخلت السديه لغرفة العمليات وانسد الباب .. خدروني بالبنج وبعد ماحسيت بشي .
••
كعدت بعد مدة ماادري شكد كلهم يمي تحمدولي ع السلامه.. مرت فترة يله جابولي ابني رضعته ملامحه نسخه من ابوه بس عيونه بيهه شبه إليه.
ماتحملت ابقه بالمستشفى 3 أيام وطلعت وام ماهر لازگه اله يخلوني اسبوعين ادري شعندي اريد ارمم المستشفى .
رحت لبيت أهلي أمي تعتني بيه واني وماهر متفقين ابقه شهرين .. خلصتههه كله سهر وتعب وماهر وياي ماعافني يوميه يجي يشوفنه اني وزيودي .. سميناه زياد
إمتحانات أخير السنه اجلتهن ع الدور الثاني مااگدر أمتحن .
خابرني ماهر أتصال فيديو رديت عليه وبحضني زيودي
- الووو
تنهد
- الووو مالكم نية ترجعون
- هههه لا مانرجع
- مو مليت لوحدي البيت وحشه يخنگ
- اي غير انتَ سويت علينه حصار من بداية حمله لهسه ماجاية لااهلي اتحمل بعد مشكلتك
- خرب يومج تحسبين حساب عرب
