رواية هشاشة قلب الفصل التاسع والثلاثون بقلم العباديه
وإنـي أُحبـــكـ פــبـاً شاهـقـاً . .
لا يخـدشهُ الخصـام . . ولا تُـטּـقصـهُ المسـافات
لا يمـسهُ أحـدٌ . . ولا يـ؏ـلـو فوقـهُ حــ♥ـب .
~~~~~~~~~~~~~~~~~~~~~~~~~
ثُرىٰ . . .
أم ماهر ظلت تصيح مفزوعه وركضت على ماهر تسأله .. هوَ يخزرني ونظراته تتوعدني بغضب .. نزل زيودي بالگاع وملامحه تحولت جامده .. عصر عيونه حيل وكاللهه :-
- اي متزوج
ام ماهر.. جذذذذب تريدون تحرگون گلبي مداصدددك لاااااا ياااربي .. زين من شوووكت احجييييي
- صار هواي
ام ماهر.. شكدد يعني شكددددد سنه؟؟؟ سنتين؟؟
- اكثرر
لطمت على راسهه وظلت تنوح
ام ماهر.. صخاااممم بووجهيي واني ماادري وبنت الفگور مكسور خاطرهه عليه وتعيرني اني أتعير ياحيف والله كله من وره ابني ابننيييي الصوووج ابننييي
- يوووم بس خليني افهمج اخذتينه بالصياح
بعده يريد يكمل حچي ومانحس الإ طاحت بالكاع فاقده .. ماهر ركض عليهه وعاط بعلو صوته :-
- مييي جيبييي مييي وعطررر
جسمي يرجف وزيودي يبچي مفزوع من صوت الصياح واني ركضت جبت عطر وماي .. شممهه عطر وشمر عليهه ماي بس ماكو ماتكعد .. صاح بيه اجيبلهه عباية.. لفهه بيهه واخذهه للمستشفى .
ظليت ارجف اذا صار بيهه شي آني السبب شحچاني ياربي .. هيَ استفزتني واني طاقتي خلصت بعد مااتحمل .
أخابره اريد أتطمن ينطيني رفض .. شلت ابني وظليت افتر بيه صعدت لفوگ نومته بالغرفه وغطيته ظليت گاعده يمه اقراله قصة اطفال وهوَ لازم بإيدي يريد يحس بالأمان .. خايف وكلساع يفز لان الأصوات العاليه بقت بباله .
وره ساعه يلا رجعو شاده راسهه وهابط ضغطهه .. جسمهه كله مثلج ولون بشرتهه أصفر .. شدالهه ماهر مغذي اني واكفه يمه ماباوع عليه ابدد ولاچنه يشوفني .. هيَ بس تون وتبجي .. تمددت على چربايتهه واني واگفه بعيدة عنهم خايفه .. كالت :-
- اطلعو بره عوفوني
ماهر دنگ هزر راسه وتوجهه عليه لزمني من زندي ضغط عليه حيل همس :- يله دنطلع
طلعنه وزندي جوه قبضة إيده .. احسه يريد يوصل للعظم يفصخه گدما لزمته قويه .. همست :-
- آي ماهر إيدي تأذيني
- صعدي گدامي بدوون صووت
صعدت وهوَ وراي يمشي بهدوء ومغلف وجهه بملامح جامده .. اعتقد هذا الهدوء يسبق العاصفه .
دخلت للغرفه وهوَ وراي حط عينه بعيني وكتف إيديه ووجهه ملامح غاضبه .
- متقصده تحچين موو؟؟ تريديهه تموت وتخلصين
- ماهر ماشفتهه شسوت بيه والله جزززعت
- شنووو جزززعتي تبقى إمييي من تزوجتج لهسه واگف وياج واگول مرتي فقيرة ماتسوي شي بس امي تكرههه وأمنت بيج حجيتلججج تسوووين هيج ليشش احنه مو متفقين الي بغرفتنه ميطلع بررره لو لاااا
سكتت كالعاده من يعصب اظل ساكته وادنگ راسي عود من يكمل عصبيته ويهدأ اناقشة بهدوء وابرر موقفي .. ظل يضرب بروحه ويعيط بعلو صوته
- انييي صوووجي صوووچييي عفت العالم كلهه اجيت لگـ..... الناصررية !!!
(لاإنتقاص من المحافظه لكن هٰذهِ الجمله نصاً)
رفعت راسي مصدومه وسعت عيونه حيل وخزرته .. ظل يدك على راسه ووجهه يطفر دم عيونه شرار وصوته تجرح من الصياح .. عاط بحرگة :-
- لججج انيي تخزرررييينننيي؟؟ تخزززرريينننييي ؟!!!
فجأة صفن موسع عيونه ويتنفس سريع .. مركز وراي التفتت على مكان تركيزه .. انصدمت بزيودي يرعص وعيونه مگلوبة صايره بيض .. دفعني وركض عليه شاله يضرب على خدوده
- باااباا زيوددي باااباا تسمعني
ماكو أي إستجابه بس جسمه ينكث وعيونه مگلوبة .. ظليت ازلغ بخدودي وابچي ميته خووف .. شاله وركض بيه .. اجيت وراه
- ماهرر اروح وياااك
- لجج وين ارجعييي لخاطر الله ارجعيييي
دفعني للغرفه وركض .. ظليت ألوب نزلت وراه ابچي .. اباوعلهم اخذه بالسياره وطار للمستشفى .. ظليت املخ بروحي راح ابني من وراي شصار بيه سوده بوجهي .
خابرت وليد كال رايحين للمستشفى .. وليد هم شالو لبغداد لان ماهر اقل خطوة وليد وياه إيده اليمنى مثل مانگول.
ظليت افتر بالبيت ابجي محتاره وين اروح شأسوي .. اجتني نهى ذبهه وليد يمي وراح .. ظليت أنوح وهيَ تصبر بيه منظره مايروح من بالي ابدد.
للعصر إجانه وليد ركضت عليه
- ولييدد ابني ووين
نزلت دمعته ويرمش بعيونه تخبلت
- وليددد احجيي
وليد.. ثُرىٰ إدعيله
- شأدعي اريدد ابنييي
وليد.. الدكتور گال انتظروا ينگطع النفس وروحو ادفنوه .. ثُرىٰ منتهي
ملخت روحي احس گلبي راح يوكف فرفحت
وليد.. ثُرىٰ لتسوين هيج عمي منهار كاعد بالمستشفى مأيس .. اول مره اشوف دموعه
نهى.. وليدد كافيي تريدهه تتخبل
- ماابقى هنا اخذووني اله
وليد.. عمي ميقبل
- ولك وليدد اخذذننييي اموت بس ابقى هنا
طلع بسرعه علمود ماياخذني .. ظليت اقاوم اريد اروح ونهى لازمتني بكل قوتهه تريد تسيطر عليه ماكدرتلي لما تخربطت .
كعدت على ريحة العطر وماي على وجهي ظليت ابجي بونين اريد ابني سوالفه كلهن مرن كدام عيوني الله لايحرمني منه بس خل يكعد واسمع صوته .
ظليت لليل أون لااكل ولاشرب بس ابجي وماهر ووليد اثنينهم أجهزتهم مغلقه ..
لگفت عباتي اريد اروح للمستشفى ودخلت موج
موج.. ثُرىٰ اصبري مبيه شي لتفاولين الولد
- خلوني اروح اشووفه
وليد خابر نهى وكلنه نباوعلهه خايفين .. نهى ضحكت وعاطت
- الحمد لله
- هاا شنوو بشرري
نهى.. ماخذيه للمستشفى والممرضات ميعرفون شي ف لما اجه الدكتور انطاه كميه قليله بنج مال عمليات كالو فتح عيونه بعدما أيسو منه
غطيت وجهي ابجي اريد اشوفه بس مايخلنّي اطلع .. كالت نهى :-
- ثُرىٰ اصبري للصبح اذا حالته استقرت يرجعون
موج.. اكولج ليش انطوه بنج شنو يخدروه
نهى.. شدراني هوَ الدكتور صايره عنده هاي الحاله وشايفهه الحمد لله بكل الأحوال
ظليت كاعده للصبح منتظرتهم لما صارت الساعة بـ8 دخلوا ماهر شايله نايم على كتفه ووليد وياه .. ركضت عليه ملهوفه .. انطانياه بتعب وجر حسره ملامحه تعبانه وعيونه ذبلانات من السهر
اخذت زيودي حاضنته وابوس بيه گعد يتنحس واني مشتاقتله .. إيده بيهه كانونه ووجهه صاير أصفر وذبلان..حبيبي سوده عليه .
ماهر صعد لفوگ أي كلمه ماحچه خلصهه ساكت .. اني خليت زيودي بحضني تعبانه تعب مو طبيعي .. نهى كالتلي :-
- ثُرىٰ كومي نامي ابنج هم تعبان ارتاحو شويه
هزيت راسي وصعدت للغرفه .. سمعت صوت الماي بالحمام عرفته يسبح .. فرشت فراشين جوه بالگاع ونومت ابني بحضني وتغطينه .
طلع هوَ من الحمام سمعته تنهد وفتح الكنتور بدل وراح للچربايه ينام .
••
كعدت على صوت الآذان كمت توضيت واجيت صليت .. هوَ ماسمع ظل بنومته اذا تعبان مايحس على نفسه .. باوعتله بنظرة وداع ونزلت الجنطه ماناسية كلمته تحز بگلبي هسه طلعت مو زينه .
لميت ملابسي وملابس ابني ورحت سويت ريوگ علما گعد زيودي رأساً ريگته وبدلتله .
راح يم ابوه يضرب بإيديه الصغار على وجهه ويگعّد بيه تذمر .
- لك بابا خليني انام
- ادعد (إگعد)
گعد شاله خلاه على صدره إستغرب من منظر الجنط .. باوعلي بإستغراب سألني :-
- شنو هاي الجنط؟؟!
- نريد نروح
- وين؟
- لاأهلي
فهم السالفه دنگ وهز راسه .. اخذت زيودي منه وراح غسل وصبيتله ريوگ .. كعد يتريك بدون أي كلمه .
كمل غسل إيديه بهدوء وراح تمدد .. اني بقيت ألملم إحتياجاتي الناسيتهن منا للعصر احنه أي كلمه ماحچينه .
بدلت اني ولزيودي ووكفنه ننتظره يبدل ... باوعلنه تنهد وبدل .. كمل شال جنطه وزيودي ونزل.
اني نزلت وراهم للسيارة .. مشينه للناصرية الطريق طويل وتعبت .. نمت باالسيارة اني وزيودي نص الطريق استراحينه وكملنه .
وصلنه لااهلي المغرب حاولو وياه يظل للصبح ويطلع ماقبل قافل .. رجع لبغداد واحنه ظلينه .. كتلهم زعلانه وسولفت المشكله بس ماگلت على الصار بيناتنه اني وياه .
••
مر إسبوع اني عند اهلي زيودي بلش يتذمر ويبچي مشتاق لاابوه بس انطيه الآيباد يظل يبجي عود يريد إبوه لان جانو يلعبون سويه .. خبلني .
امي حچت وياي :-
- ثريا شناويه انتِ شنو ببالج
اوكل بزيودي وكلت ببرود
- اتطلگ !!
- عزززززه بعيننججج شنو تتطلگين
- لو يسويلي حل لو اتطلگ ولان ادري بيه مايعوف امه ف اتطلگ احسن
- كل عقلج تحجين
- اي كل عقلي مليت صار تلث سنين صابره ومتحمله اكول يجي يوم وتتغير بس ماكو نتيجة جبتهه بكل الوسائل ماكووو
- وابنج
- وياي
- ماهر مايخليه عندج
- قابل وين رايح عند ابوه
- صخاام براسج ولججج تعوفين طير من ذهب يتشتت بيناتكم
- مليت اني ملييتت تعرفون شنو ملييت راح اموت من القهر لما اموت وترتاحون
- ظلي بكيفج
خلتني وحدي واني اباوع لزيودي مستحيل انطيهياه هذا هيج بس حچي .
ثاني يوم اندك الباب اني مااهتميت .. امي انخبصت لان طلعت ام ماهر وابو وليد جاي يرجعوني !
اجت صاحتني تريد اطلع واني ركبت راسي مااريد اشوفهه بعدني مافاركتهه .. امي صارت عصبيه انجبرت اطلع اسلم .
رحت يمهم بوستني بس خليت خدي لابست ولاتحركت .. وخرت عنهه وظلو يحجون ويقنعون بيه ارجع ومشاكل عائليه تصير وبكثره ومن هالحچي.
ماقبلت ارجع وابو وليد كال :-
- لاتخلينه نرجع فارغين ابو زيودي مشتاقلكم
- مشتاقه لااهلي خليني ارتاح فترة ويصير خير جيتكم على راسي بس اريد اشوف اهلي
- هاهيه براحتج من تشبعين شوف بأهلج خابرينه نجي ناخذج
- ان شاء الله
طلعو واني ميتة قهر ماكلف نفسه إجه وأعتذر ابدد شنو لهالدرجه معزتي قليلة عنده ومايجيني !
إسماعيل صار عنده ولد بنفس السنه هوَ وزيودي فرق كم شهر .. انطبگو سويه ولعبو لعب ماخلو شغله بالبيت ماكسروهه
- ولكم هذا مو ابني زيودي عاقل وهادئ
إسماعيل.. واني هم هذا مو إبني
- هههههه عود باجر تقوى تريد تجي خل ينطبگون وي ابنهه حتى يصيرون حزب
مروة عدهه بنيه وولد ونهى بس حسوني تريده يكبر يله تسوي جهال ..
كلنه نجيب ولد على گولة ام ماهر تجيبن ولد مثل امجن هـه .
~~
ظل ماهر يوميه يدز لو فرد من العائلة يرجعوني بس اني مااقبل .. صار 5 أشهر واني منتظرته يجي هوَ برجله ويعتذر يله افكر ارجع.
مخلصهه وي زيودي اتصالات فيديو وهذا كلما يتصل بيه يظل يبجي يريده .. كل هاي المدة مامأثره بيه ولاسأل عني ولاحتى گال اريد اخابرهه لو مشتاقلهه ابدد. شهالقساوة العنده ؟! ليش هالتغيير ؟! رغم كلمته تدك بإذني لهسه بس مشتاقتله واكابر وهوَ ؟؟ مشتاقلي لو لا ؟؟

•••
اليوم أتصل موبايلي شفت إسمه رجفت طاح الموبايل مني وكلبي ظل يدگ سريع .. عدلت كعدتي وجليت صوتي رديت بس داخلي يرجف
- الوو
إجه صوته بهمس ومبين بيه التعب :-
- مشتاقلج !!
رجفت ومشاعري تخربطت .. ظليت ساكته مااعرف شأرد بس دكات گلبي تركص عبالك حفلة صارت بأحشائي ..
- لتسمعيني صوتج عاقبيني اي اي استاهل اني استااهل
- آسف !!
رأساً نزلت دمعتي من گالهه دوم يكول لو اموت مااعتذر لشخص وكبريائه مايسمحله بس گالهه !
- سويت كل الطرق مناوية ترجعين؟؟ ثُرىٰ إشتريت بيت جديد بس إلنه خلاص خابرت ابوي كتله يجون يعيشون سويه ويبطل سوالفه وامي وافقت مكيفه لان مطلك نسوانه وهسه فرحانه بأبوي
- ثُرىٰ باجر جايكم لتحجين ميخالف نتشاوف باجر
ثاني يوم اجه الصبح إبو وليد كال لااسماعيل هاي هيه ازعل عليكم اذا مارجعت ماخليتولي تقدير واحترام كل مره تردوني .. اسماعيل تعذر منه واجاني حجه وياي
اسماعيل.. ثريا ماي وجهي خلص ارجعي اجه رجلج وعازللج صار 5 اشهر ماكافي خطيه مشتاق لاابنه ومشتاقلكم تعالي شوفي زيودي شلون لازك بحضنه ويبوس بيه مايعوفه لاتحرمينه من ابوه
هزيت راسي ولميت ملابسنه .. بدلت وطلعت لبره لگيته واكفه بكشخته وزيودي على متنه .. يباوعلي بحنيه ويضحك .. مشيت للسيارة فتحلي الباب وحط زيودي بحضني .
وصلنه لبغداد مو نفس طريق بيتنه غير طريق .. وكف السيارة يم بيت بابة طلاگتين وجبير .. باوعتله بإستغراب رفع حواجبه وكال :-
- بيتنه
نزلنه ودخلت اباوع على اركان البيت بيه 3 غرف وصالة ومطبخ بناءه حديث وكله سقف ثانوي والجدران مغلفه بزخرفات حلوة .. ماهر يباوعلي مبتسم ويلاحظ الفرحه تلمع بعيوني .
زيودي يگمز وهوَ عيونه تترقبني .. سحب إيديه حسيت بحرارة إيده سحبني لحضنه رأساً واني بعدني جامده همس بإذني :-
- ثُرىٰ ياعمري ياروحي آسف على كلشي بعد ماكو مشاكل نرتاح لوحدنه كلنه غلطنه وتحاسبنه .. انسب حل خلينه نعيش ببيتنه مرتاحين انسي كلشي كاافي
بچيت بحضنه وبادلته فرحانه ببيتي بمملكتي راح اخلص عمري بيهه ..
صارت عندي بنيه سمسمه (سهى) .. عمتي ام ماهر ماتدخلت بيهه بس بالمناسبات نلتقي وماتحجي مثل قبل فرحانه برجلهه .. موج حامل بعد فترة عانت بيهه لان مايصير عدهه والحمد لله الله عوضهه بتؤام .. حسن تخرج وتزوج بنيه وياه بالكليه واخواني البقية يدرسون .
صرت انتبه لتصرفاتي لان عندي عائلة ولازم احافظ عليهه .. ماهر ماينقص حبه إلي يوم بعد يوم يزيد حبه ودلاله إلي وهالشي مخليني اتمسك بيه اكثر وأكثر ..
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
