رواية عروس منحوسه الفصل الثالث بقلم جمانه السعيدي
امنيه.....نسيت كلشي راح وكل الالم
والضيم والتنمر
اني اليوم انسانه جديده
حتى اهلي مااروح عليهم شسوي رايحه مااريد اي شي يذكرني بيهم
امي مرات تجي تسئل عني
اني هسه عايشه بلجنه
عندي صديقه وحيده تدرس بلحوزه هم تركت المدرسه مثلي من ثالث متوسط ازوجت وصار عدها اطفال ثنيين
بعدين رجعت تدرس بلحوزه
هاي الوحيده الي احجيلها عن وضعي
تعرف كلشي يخصني وكل الضروف الي مريت بيها سابقا
كانت تحذرني احجي اي شي عن حياتي الخاصه الاحد
خاصه الاقارب
اني اثق بيها واعتبرها اختي الحقيقيه
جمانه السعيدي
اني كطعت كل علاقاتي وياا الاقارب
من قبل لا ازوج من كنت اسمع منهن كلام مثل السم
من شافن مصطفى بلعرس
ماتن قهر يحسدني عيني عينك
همهن شلون عرفتي وشلون حصلتي ماهمهن العمر الي راح وحجيهن وضحكهن عليه
المهم اني هسه اعتبر القدر ضحكلي وكدرت اعيش حالي حال الناس
مصطفى انسان راقي ما يتعوض ابد
يعاملني وكانما يحبني صار سنيين مو عبالك صار شهرين
من عرفني هو تعارف هو خطبه هو زواج
من يجي من بره متلهف عليه
يريد بس يسولف ويضحك ويتشقى
اي شي اطلبه يجيبه وحتى الاشياء الي مااطلبه
مرات اكول يمكن اني احلم معقوله هذا واقع اني امنيه
الي جنت منسيه ومحد يعرف اني وين
حالي اتغير هيج
بعد شهرين وعشر ايام من زواجنا اكتشف اني حامل
جبت اختبار حمل بلبيت وطلعت حامل
حبيت اتأكد قبل لا اوصل الخبر المصطفى
رحت الصبح للمستوصف حللت مره ثانيه طلعت فعلا حامل
مااعرف شلون رجعت للبيت
ماامشي على الكاع طايره
حضرت الغده وبدلت وتعطرت وبقيت منتضرته
كل شويه اتصل علي يمته ترجع
مصطفى....شكو صاير شي ليش تلحين اليوم
امنيه...ماكو شي بس اشتاقيتلك
مصطفى....بس
امنيه...حضرتلك مفاجئه حلوه
مصطفى....شنو المفاجئه
امنيه.....هلو وشلون تصير مفاجئه اذا انت عرفت بيها
مصطفى....خلاص خمس دقايق واكون يمج
دخل من الباب واني الابتسامه شاكه الوجه
مصطفى....يالله شنو هلجمال مبينه مفاجئه حلوه على هذا الترتيب
امنيه....اكيد حلوه
مصطفى....يله كولي ماعندي صبر
امنيه...اني حامل انت راح تصير اب واحلى اب بلدنيا
مصطفى....صدك تحجين صدك
امنيه...اي هذا التحليل الصبح رحت حللت
مصطفى...الحمد لله والشكر الف الحمد لله والشكر
مبروك حبيبت كلبي اني اليوم اسعد واحد بلدنيا
حضني وباسني اني راح اصير اب واخيرا
امنيه....لا تخاف راح اسويهم عشره
مصطفى....لا ١١ فريق طوبه
امنيه....حتلو تريد عشرين هم اسويهم عشرين بقوة رب العالمين
مصطفى...يابعد روحي انتي انتي كلشي حلو صار بحياتي
انتي نعمة الله جمانه السعيدي
انتي اهلي وكل ناسي انتي العمر كله
امنيه...شكد جان يعاملني حلو بأيام الحمل زاد التعامل اكثر حلاوه
عبالك طفله زغيره طاير بيه
بلشهر الرابع عرفت اني حامل ببنيه
من رجعت اتصلت علي
امنيه...مبروك راح اصير عندك بنيه
مصطفى...الف الحمد لله الشكر كانت امنيتي اصير عندي بنيه اني اريد اسميها دره
وراح افتح مشروع بااسمها
امنيه.. هيج كبل مشروع باسمها اني اغار
مصطفى...انتي الأصل حبيبتي و دره جزء منج
لو ما انتي ماصارت دره
امنيه....يله رضيت بس ممنوع تحبها اكثر مني
مصطفى....انتي الحب الحقيقي ماكو حب بعدج
بعدها بفتره كال اني فتحت مشروع بااسم دره اني وولد شريك وياي
كل ارباح هذا المشروع راح تنزل بحساب خاص بيها بلمصرف
امنيه...ياعيني ياعيني بعد شتريد هذا الحب كله وهي بعدها ماطالعه للدنيا من تطلع شراح تسوي بينا
مصطفى....اوووف منتضر هذا اليوم بفارغ الصبر
يمتى تجي واشيلها وابوسها الله راح تصير عندي بنيه
وصلت للشهر السابع بلحمل
وهنا وضع مصطفى بدا يتغير يدخل مهموم ويطلع ضايج
اكعد بليل الكا كاعد ما نايم بعده
ماعنده واهس مثل قبل لا يسولف لا يضحك وياي
امنيه....حبيبي ممكن اعرف شبيك صار اكثر من اسبوع وانت حالك كله متغير
اكو شي اكدر اساعدك بشي
مصطفى...لا ماكو شي مجرد ضغوطات عمل
امنيه....اي احجيلي فضفض شويه يمكن ترتاح
مصطفى...شغلات تخص العمل انتي ما تعرفيها
امنيه...احسك ضايج ما مرتاح
مصطفى...لا تشغلين بالج ازمه وتعدي
جمانه السعيدي
امنيه....شهر كامل وهو وضعه ابد مو تمام
كل يوم حالته بلنازل اكثر
كطع الاكل صار ضعيف وشاحب ما يحجي من يدخل للبيت
مرات حتى مايرجع للبيت
يقفل تليفونه ويبات برا البيت
كنت متأكده صاير وياا شي موزين بس مااعرف شنو هذا الشي وهو مايقبل يحجيلي عنه
دخلنا بلشهر الثاني اتمرض بلزايد
جسمه صار نحيف وبطل يحجي نهائيا
على كد يسئلني شنو اجيب مسواك
امنيه....ترا ولله وضعك مو طبيعي ممكن اعرف شنو صار وياك
عاط بيه بصوت عالي مابيه شي انتي ليش تلحين
مو كلنا ماكو شي
اول مره يحجي وياي بهاي الطريقه من يوم ازوجنا لليوم
طلع من البيت واني كعدت ابجي
حسيت راح افقد مصطفى مو هذا حبيبي
هذا واحد ثاني واحد مااعرفه
ليش اتغير شنو الي صار ويااا ليش ما يقبل يحجي
بيومها رجع متاخر الساعه ثنتين بليل
من شفته دخل كنت زعلانه منه سويت نفسي نايمه
كنت مقرره ابقى زعلانه منا لمن اعرف شنو صار ويااا
ليش هيج اتغير
ماغير ملابسه صعد على الجربايه وحضني
مصطفى...اعرف انتي كاعده اني اسف ماكدرت اسيطر على اعصابي
امنيه...كمت ابجي
مصطفى...ليش تبجين
امنيه...اني مالي احد غيرك بهاي الدنيا وانت متغير عليه
ومااعرف ليش
مصطفى....حبيبتي ضروف بلشغل اووووف أستغفر الله العظيم
امنيه...اي اني مو شريكة حياتك ليش مااعرف هاي الضروف
مصطفى...انتي حامل وعلى وجه ولاده
مااريدج اضوجين انشاء الله ازمه وراح تعدي
اوعدج راح اعوضج عن كل هاي الايام
امنيه ....مااريد شي بس اريد ترجع مثل قبل
مصطفى...انشاء الله
حضني ونام الصبح كعدت اريد ابعد ايده عني واكوم
كان حاضني ونايم
لزمت ايده بارده قربت علي ما يتنفس
عدلت كعدتي وحاولت اكعده من النوم لان مستحيل يكون مات
امنيه ....مصطفى مصطفى هزيته حيل مصطفى
خليت اذني يم حلكه حتى اشوفه يتنفس
بس ماكو نفس مصطفى تحول جثه بارده
عطت بصوت عالي وهزيته حيل مصطفى مصطفى
احجي وياي مصطفى
كمت اعيط واهز بي ما مصدكه مصطفى عافني
امنيه. مصطفى لاتكون متت وعفتني عفت بتك مصطفى منو راح يشيله
منو الي راح يفرح بيها
مصطفى على بختك توني عرفت الفرح وياك
توني عرفت اني انسانه من تعرفت عليك
ليش عفتني الله واكبر ليش عفتني مصطفى حاجيني
لبست ملابسي وطلعت اعيط بلشارع
اريد الناس تتجمع بلكت الناس احسن مني
بلكت يعرفون يخلون مصطفى يرجع يحجي وياي
اجمعت الناس ونقلو للمستشفى
مااكدر امشي بطني كدامي ومهبوطه وتعبانه
النسوان لازماتني منا ومنا
مااشوف من البجي
الدكتور اكد الوفاة بسبب توقف عضلة القلب
كلب مصطفى وكف وكف كلبه وهو حاضني ويكول اني احبج وراح اعوضج
شلون وكف كلبك وما حسيت بي
شلون اني هيج قريبه عليك وعفتك تموت
ليش ماكتلي هاي اليله الاخيره حتى ابقى كاعده اشبع منك
هاي البنيه شنو ذنبها تنولد يتيمه
وشراح اكللها وين ابوج
ابوج مات واني بصفه وماادري بي
ابوج جان يحبج ويحلم بليوم الي تجين بي للدنيا
حتى يشيلج ويلعب وياج
ليش هيج مصطفى المن عفتني منو اليه انت جنت معوضني عن الناس كلها
حتى امي كمت مااروح واشوفها
لان انتي صرت امي وابوي واهلي
وين اروح جنت بطرك عمري والناس ماتريدني
وين اروح هسه واني وياي بنيه منو راح يتحملني
بعدني ماشبعت منك اني الي لازم اموت مو انت
اني اني صدك منحوسه مثل ماكالت امي
لو بيه حظ جان حافظت عليك
هاي هي قررت تعوفني بنص الطريق وتروح
منو كال اني اكدر اكمل من دونك
ليش هيج هو هذا الحب تعرف مالي احد غيرك شلون عفتني
امنيه بقيت لازمه جثته واحجي وياااا
بلكت كلبه يحن عليه بلكت اكسر خاطره ويكعد
اريد يرجع مااكدر اعيش من دونه
