رواية صدمة تليها ضمادة الفصل الثالث بقلم هاجر نور الدين
_ فوقي يا سيرين، فوقي أرجوكِ بقى!
فوقت فعلًا على صوت أختي وهي بتعيط،
قاعدة جنبي على سرير مستشفى وبتقولي أفوق.
إي اللي حصل؟
كانت أختي قامت تنادي للدكتور وأنا في الدقيقة دي كنت بسترجع كل اللي فات.
ولكن مش زي كل مرة كنت بعيط بهدوء لأ،
أنا جاتلي حالة هيسترية وفضلت أصرخ وأنا بخبط على السرير بألم ووجع سواء من جسمي أو من كل اللي بمر بيه من أكتر شخص حبيتهُ.
فضلت في الحالة دي شوية والدكاترة بيحاولوا يوقفوني وبابا وأختي واقفين بيبكوا على الحالة اللي وصلتلها.
كل اللي كنت شايفاه في الحالة دي المواقف والذكريات اللي بيني وبين عمر لحد اللحظة دي.
لحد كل كلمة وجعتني قالهالي،
لحد ما بقيت مطلقة من قبل ما أبقى عروسة.
وفي الأخر دكتور من الدكاترة إداني حقنة منوم وغيبت تاني.
فضلت في المستشفى يومين، مش بتكلم ولا بنطق،
برغم محاولات أختي وبابا ولكن مش قادرة أتكلم لساني تقل.
كانت أختي بتساعدني أكل وأشرب،
كنت في اليومين دول بصحى أفضل متنحة في السقف وأحيانًا بدمع من عذاب قلبي اللي حاسة بيه.
بعدها الدكتور قال إني أقدر أخرج صحيًا كويسة،
خرجت فعلًا وعلى وعد من بابا للدكتور إنهُ هيودوني لدكتور نفسي أتابع معاه عشان لساني اللي تقل وحالتي النفسية.
بعد ما وصلنا البيت بابا قال بإبتسامة وهو بيحاول يخرجني من اللي أنا فيه:
_ تحبي إي طيب هعملهولك يا حبيبتي، تحبي تسافري عند عمتك تغيري جو؟
كنت باصة في الأرض، أول ما قال كدا بصيتلهُ وإحلوت في عيني الفكرة.
عمتي ساكنة في مرسى مطروح،
وأنا فعلًا محتاجة البحر ومكان بعيد أوي كدا عن القاهرة.
هزيت راسي بمعنى "أيوا."
إتكلم بحماس بإني إستجابت لحاجة وقال بعيون لامعة وإبتسامة:
_ يا حبيبتي أحجزلك تذكرة وتروحي من بكرا لو تحبي المهم تحسي إنك كويسة وبخير.
حاولت أبتسم إبتسامة خفيفة وبعدين دخلت نمت لإني كنت تعبانة.
تاني يوم صحيت لما بابا كان بيصحيني وقال:
_ قومي يا حبيبتي عشان حجزتلك أول رحلة قطر رايحة مرسى مطروح وهتتحرك الساعة 3 قومي عشان تلحقي تجهزي نفسك.
قومت فعلًا وكان وقتها الساعة 11 الصبح،
أختي حضرتلنا فطار وقعدنا فطرنا وقالت وإحنا بناكل:
_ أنا عرفتهم في الشغل إنك بتمري بأزمة صحية الفترة دي ومش هتعرفي تيجي وياريت كان ينفع آجي معاكِ أنا وبابا والله بس الشغل بتاعنا رفض أجازة طويلة.
ومأت براسي وسكتت وبابا كما كلام وقال:
= المهم إنتِ تريحي أعصابك وترتاحي ولما تحسي إنك كويسة كلميني وهجيلك وهكلمك كل يوم وهسأل عمتك عليكِ.
إبتسمت بهدوء وسكتت، كان نفسي أقدر أتكلم عشان أسألهم مين الناس اللي ضربوني وضربوني ليه ومين اللي باعتهم.
حتى لو عارفة الإجابة بس عايزة أعرف عرفوهم عملوا معاهم إي.
قررت هبعت لأختي لما أسافر وأحس إني نفسيًا أحسن واسألها لإني الفترة دي مش حِمل آي حاجة تتقالي توجعني.
بعد شوية كنت خلصت ووصلوني للقطر،
حضنتهم وأنا بعيط وحقيقي هفتقدهم الفترة دي لإني مبقدرش أعيش من غيرهم.
عمتي برضوا وحشاني وبحبها، هي عايشة لوحدها ومتجوزتش،
هي صغيرة عندها تقريبًا 35 سنة ومهتمة بنفسها وشغلها جدًا.
ركبت القطر وطول الطريق حاطة السماعات في وداني وباصة للشباك والطريق من جنبي ودا لحسن حظي إني جنب الطريق.
مكنتش على دراية بآي حد ولا آي حاجة حواليا ولا كنت عايزة.
بعد حوالي 5 ساعات من التوهان والسرحان وصلت أخيرًا،
كان معايا رواية ويعتبر قربت أخلصها من طول الطريق.
كان باقي فيها فصل أخير قولت لما أروق هبقى أكملها.
بعد ما طلعت لقيت عمتي مستنياني وهي مبتسمة بسعادة،
إبتسمت أنا كمان وخدتني بالحضن وهي بصالي بحزن على الكدمات اللي في وشي واللي باينة من جسمي في دراعي أو إيدي.
ولكنها متكلمتش وقالت بسعادة وتنهيدة:
_ وحشتيني جدًا وزعلانة منك عشان مكنتيش بتجيلي.
إبتسمت ورمشت بعيني كذا مرة علامة على "حقك عليا"،
خدتني في حضنها تاني وبعدين مشينا.
شقة عمتي كانت خطيرة بجد، حاجة كدا ترد الروح،
البلكونة كبيرة وواسعة جدًا وبتطُل دايركت على البحر من زاوية روعة.
وقفت قدام البحر في البلكونة وخدت نفس عميق وطويل جدًا وأنا مغمضة عيني.
طبطبت عمتي عليا ففتحت عيني بإبتسامة وقالت:
_ أنا حضرت غدا ناكلهُ سوا وسناكس وحاجات نشربها كتير وإحنا بنتفرج على أفلام الرعب والكوميديا اللي بنحبها، عايزاكِ ترجعي أحسن من الأول بقى عشان أفسحك كتير هنا.
إبتسمت ووافقتها براسي.
عدت بعدها الأيام بشكل طبيعي وهادي،
نفسيتي كانت بتتحسن بشكل ملحوظ.
مكنتش بنزل من البيت الحقيقة،
أنا عندي موهبة الرسم ودي الحاجة اللي كنت بعملها الفترة اللي فاتت في البلكونة قصاد البحر مع الموسيقى.
بقيت بنطق حاجات بسيطة يعني بطريقة متقطعة شوية،
عدا شهر ونص من بعد ما روحت لعمتي لحد الوقت دا.
شهر ونص كانوا قادرين وكافيين يحسنوا نفسيتي،
قررت إني أنزل بقى وأقدم الموضوع شوية مش أكتر.
يعني بدل ما أرسم في البلكونة هقدم وأبقى قدام البحر،
هرسم في النوتة بتاعتي. والبحر قدامي والسماعات في وداني.
تاني يوم زي ما قررت فعلًا صحيت الصبح وعمتي كالعادة كانت نزلت بدري لشغلها.
لبست فستان أبيض وفيه نقوشات زرقا هادية ورقيقة أوي تشبه للبحر.
خدت النوتة وحاجتي ونزلت،
فضلت قاعدة حوالي نص ساعة على البحر برسم.
أفصل دقيقة أبص للبحر وأركز مع الموسيقى وأرجع أكمل،
لحد ما حد شاورلي قدام وشي بإيديه.
بصيت ناحية الإيد وشيلت السماعة وأنا بتلفت للشخص دا وكان نفس الشخص بتاع العربية.
بصيتلهُ بدهشة وقولت بتقطع وتُقل رهيب في لساني:
_ إنت، جيت هنا إزاي؟
كان ملاحظ طريقة كلامي وقال بتساؤل وإطمئنان:
= مالك حصلك حاجة؟
غمضت عيوني وأنا بجاهد وأنا بتكلم وقولت:
_ حادثة كدا، الصدف بيننا كترت صح؟
إبتسم وقال:
= أكدب لو قولت المرة دي صدفة،
الحقيقة أنا المرة دي جاي بقصد،
يعني هو مش بقصد أوي كنت قاعد في الكرسي اللي بعد اللي وراكي في القطر وكنت شايفك لإني كنت جاي هنا في شغل وراجع على طول،
المعم نزلت وشوفتك مشيتي مع قريبتك وأنا قابلت الراجل اللي المفروض جايلهُ في شغل،
وخلصت معاه ووأنا راجع للقاهرة تاني بعدها بـ 4 أيام شوفتك واقفة في البلكونة اللي هناك دي وبترسمي زي الملايكة وقررت إني آجي تاني بعد ما أسلم الشغل ومن وقتها وأنا بقعد كل يوم أتفرج عليكِ وإنتِ بترسمي ودلوقتي تفضلتي علينا ونزلتي.
إبتسامتي وسعت جدًا وحسيت إني نحرجة ومش لاقية كلام يتقال، قولت بنفس التُقل والتقطع بطريقة الدعابة والهزار:
_ إنت معجب بقى؟
ضحك وبص للبحر ثوانٍ بإحراج وبعدين رجع بص ناحيتي وقال:
= بصراحة أيوا ليه هكدب؟
إتصدمت من ردهُ الصريح واللي مكنتش متوقعاه بصراحة وقولت وأنا بقوم من مكاني:
_ طيب أنا لازم أطلع عشان ورايا حاجات هخلصها فوق.
ضحك وقال بتساؤل وهو بيقوم هو كمان:
= إتكسفتي ولا إي، عمومًا زيس ماي تايب.
مقدرتش أمسك إبتسامتي على كلامهُ وطريقتهُ وقولت:
_ لأ عادي بس لازم أطلع فعلًا، باي باي.
سيبتهُ وطلعت للشقة وأنا شِبه بجري الحقيقة،
أول ما طلعت كان قلبي بينبض بسرعة جدًا.
روحت ناحية البلكونة بسرعة عشان أشوفهُ وعشان تكمل الكسفة لقيتهُ لسة واقف ولما شافني ضحك وعملي باي.
إتحرجت وعملتلهُ أنا كمان باي ودخلت بسرعة من الإحراج.
عدا بعدها باقي اليوم وأنا مرتاحة نفسيًا جدًا ومبسوطة كمان،
وكمان عملت كيكة بالفراولة وأنا سعيدة كدا وطلعت تحفة.
بالليل بعد ما كلنا وشربنا وقعدنا كانت الساعة حوالي 9 عمتي إتكلمت بملل وقالت:
_ ما تيجي ننزل دلوقتي البحر بيبقى تحفة بالليل.
وافقتها بصدر رحب ولبسنا ونزلنا وأنا بصراحة بتمنى أشوفهُ.
كنا قاعدين على البحر بنتصور وبنشرب حاجة وبنضحك وفرحانين.
عيني كانت بتيجي وتروح عايزة أشوفهُ ولكن مش شيفاه.
إتكلمت عمتي وقالت عشان تخليني أتحرك وأكلم ناس:
_ قومي هاتيلنا آيس كريم من هناك.
وافقتها وقومت وجبت فعلًا بس وأنا في طريقي للطربيزة بتاعتنا وماسكة الآيس كريم شوفتهُ زي ما كنت عايزة.
بس للأسف مش نفس المشهد اللي كنت عايزاه عشان كان واقف قدامهُ واحدة.
هو أول ما شافني قرب مني بسرعة وقال بإبتسامة وقلق:
_ سيرين، إي منزلك دلوقتي؟
بعيدًا عن عرف إسمي منين،
أنا كنت بيصلهُ بحِدة وببص للبنت.
فهم قصدي والسؤال اللي عايزة اسألهُ ولكن قبل ما يرد جات البنت دي ومسكت إيديه وقالت بنبرة لزجة ومستفزة جدًا وكأنها قاصدة:
= يلا يا حبيبي خلينا نرجع القاهرة ومش هقبل في الرجوع تجيبلي خاتم أحسن من دا.
إتكلمت بصوت متقطع وقولت بتساؤل:
_ مين دي؟
إتكلمت هس بسرعة وقالت وهي بتوريني إيديها والدبلة اللي فيها:
= أنا خطيبتهُ يا حبيبتي إنتِ اللي مين؟
شكرا لزيارتكم عالم روايات سكيرهوم
