رواية جريمة ضحى الفصل الثالث
لقينا الشخص ده واقع على الارض، قربنا منه بحذر كان واقع على وشه، واللي فكرت في وقتها ان اكيد في حد خلص عليه، لما قربت منه فعلا كان خلصان، كان مبرق ولسانه خارج بره بوقه
وعلى طول بلغنا المعمل الجنائي والنيابه، وفي ظرف ساعه الدنيا اتقلبت وعربيات الشرطه بقت في كل مكان، ووصل رجاله المعمل الجنائي وبدأوا بفحص موقع الحادث عشان نعرف هل في شبهه جنائيه ولا لا؟
بس واضح ان الشخص ده كان بيشرب، من غير تدخل المعمل الجنائي كل حاجه واضحه قدامي، السجاير الملفوفه والسرنجات اللي مرميه على الارض، واضح انه ضريب ومدمن
طبعا كنت متضايق لان ده الشخص اللي كان في ايده مفتاح القضيه وبدل ما نحل القضيه دي، اتعقدت ويا عالم هيبقى في شبهه جنائيه في موته ولا لا؟
لكن في الوقت ده لقيت الرائد اشرف بيقرب مني ومعاه صوره في ايده، فسألته
_ ايه اللي في ايدك يا اشرف؟
= ده يا فندم صوره ممكن تكون بدايه لحل اللغز ده
_ وريني كده
..
بصيت في الصوره كان فيها علي حسنين متصور مع الاستاذ زياد ومعاهم التاكس اللي استخدمه عليه في نقل جثه ضحى لصندوق الزباله
بصيت لاشرف وقولتله
_ اظن كده الامور وضحت شويه، والاقرب ان الست اللي كانت مع علي في التاكس هي عبير مرات الاستاذ زياد
= ده التصور الاقرب يا فندم
_ بس، هل الاب كان عارف ان ده اللي هيحصل، يعني زياد كان مساهم في موت بنته؟
= مش عارف يا فندم
_ مجرد التفكير في الموضوع صعب يا اشرف، هو في اب هيعمل كده في بنته يقتلها وياخد اعضائها
= والله يا فندم بيحصل اصعب من كده دلوقتي، بس المهم حضرتك ناوي تعمل ايه دلوقتي؟
_ هحاول اتكلم مع زياد، جايز اعرف اوقعه المره دي في الكلام ونجيب منه اعتراف نقفل ام القضيه دي
= تمام يا فندم
...
بعد ما رجاله المعمل الجنائي خلصوا شغلهم، اتنقلت الجثه للمشرحه وانا رجعت لمكتبي مره تانية واول ما وصلت لقيت في واحد مستنيني، الاستاذ سيد زوج مدام زينب
طلبت منه يدخل المكتب معايا، وقبل اي حاجه اتكلمت وقولت
_ اتاخرت علينا يا استاذ سيد، نتمنى ما نكونش ازعجناك
= لا يا فندم ولا ازعاج ولا حاجه، انا بس كنت في الشغل خلصت وجيت على طول
_ حضرتك بتشتغل ايه يا استاذ سيد؟
= انا بشتغل تمرجي في المستشفى العام، وبالليل بساعد واحد صاحبي في ورشه تصليح عربيات
_ ما شاء الله عليك، مكافح يا استاذ سيد بصراحه
= اكل العيش يا فندم، هنعمل ايه حضرتك شايف الدنيا بقت عامله ازاي؟
_ تمام تمام نبدأ التحقيق
= هو بس يا فندم في استفسار، تحقيق معايا انا ليه؟.. انا مالي بالموضوع كله
_ مالك ازاي يا استاذ سيد، اللي اتقتلت دي مش بنت مراتك برضو واكيد كنت بتشوفها وبتتعامل معاها
= اكيد، بس يعني مش مسؤول عنها، انا كنت مجرد جوز امها مش اكتر
_ خليني اسالك سؤال، بس حاول انك ما تفقدش اعصابك وده لمصلحتك طبعا
= اكيد يا فندم اتفضل
_ على حسب التحريات، عرفنا ان ضحى قالت لوالدتها انك حاولت تقرب منها وانت فاهم بقى
= حضرتك بتقول ايه يا فندم؟.. ضحى دي انا كنت بعتبرها بنتي ايه الكلام ده، والتحريات دي ازاي؟ انا مش فاهم يعني ايه تحريات اصلا لان ده شغلكم، بس التحريات دي طلعتني كده على اي اساس
_ انا قولتلك حاول تمسك اعصابك، عشان نعرف نستكمل التحقيق، كانت علاقتك ايه بضحى؟
= عادي خالص، هي كانت بتيجي تقعد اسبوع مع والدتها وبعدين بتروح اسبوع لوالدها وبعدين ترجع تاني لوالدتها وهكذا
_ اه، بس انا مش بسالك هي كانت بتقعد عندهم قد ايه وعندكم قد ايه؟.. انا بسالك على علاقتك بالبنت يعني كانت بتتكلم معاك، بتتكلم معاها
= لا خالص، انا برجع البيت على النوم على طول، ما فيش غير يوم الجمعه اللي بروح فيه بدري، وما افتكرش انه حصل حوار بيني وبين ضحى
_ تمام يا استاذ سيد، يوم الحادثه بقى حضرتك كنت في البيت ولا بره؟
= لا كنت في الشغل، ورجعت البيت لقيت امها قلقانه وبتقول ان البنت المفروض جايه ولحد دلوقتي مجتش
حتى يومها انا خرجت ادور معاهم، بس ما كانش ليها اثر
_ تمام يا استاذ سيد، تقدر تروح بس ممكن نستدعيك في اي وقت
= انا تحت امرك يا فندم
*****
_ كملي يا زينب، حصل ايه تاني؟
= زياد جيه وقعد مع اهلي، ووعدهم ان ده مش هيحصل تاني، وان من هنا ورايح عبير ما لهاش دعوه بضحى، بس اهلي المره دي.. ما وافقوش على كلامه بسهوله وهو اتوعد ان لو حصلت اي حاجه تاني، هو هيوافق ان البنت تقعد معايا على طول
بس ما كنتش اعرف ان المره دي هتكون هي اخر مره
_ هو الكلام ده حصل قريب؟
= ايوه، راحت وقعدت الاسبوع عنده وما رجعتش، يا ريتني ما كنت وافقت انا اللي غلطانه، صدقت واحد ملهوش كلمه
انا نفسي اموت، والله العظيم نفسي اموت
_ طيب اهدى يا مدام زينب، ووحدي الله كده وان شاء الله خير
******
ما كنتش مرتاح لسيد ده، كنت حاسس انه متوتر وهو بيتكلم معايا، ووقتها طلبت من الرائد اشرف تحريات مفصله عن سيد، عايز اعرف عنه كل حاجه من يوم ما اتولد لحد دلوقتي
فضلنا مستمرين في التحقيقات والتحريات، وبعد اربع ايام طلع التقرير الطبي الشرعي لعلي حسنين
التقرير وضح ان ما فيش شبه جنائيه في الموضوع، علي حسنين مات بسبب جرعه زايدة من المخدر اللي كان بياخده
وانهم اثناء التشريح، اخدوا منه عينات وبعتوها للمعمل
وكل النتائج بتقول انه كان مدمن من الدرجه الاولى
..
فتحت ملف التحريات عنه واللي كان مكتوب فيها، انه شغال سواق تاكس وكان عليه جنحه سرقه اتحكم عليه فيها وقضى مدته وخرج، وبعدها رجع يشتغل على التاكسي من تاني
كنت مشغول في ملف التحريات بتاعه.. وفي الوقت ده كنت استدعيت الاستاذ زياد عشان نعمل التحقيق معاه بسبب الصوره اللي لقيناها في بيت علي حسنين
وفعلا وصل للاستاذ زياد، وقعد قدامي
وطلعت الصوره واديتهاله
_ تعرف ده يا استاذ زياد؟
= اه طبعا، ده واحد جاري او كان جاري اسمه علي حسنين كان سواق تاكس وكان بيوصلني المشاوير المهمه
_ انت عارف انه مات اوفر دوس من كام يوم؟
= لا مش عارف انه توفى والله، بس انا كنت عارف ان هو بيتعاطى ويمكن ده سبب اساسي اني بعدت عنه
_ انت عارف انه علي، هو اللي رمى بنتك في صندوق الزباله
= حضرتك بتقول ايه؟
_ بس هو ما كانش لوحده، كانت معاه واحده واحنا عاوزين نعرف دلوقتي مين هي الواحده دي
= طيب وانا هعرف منين؟
_ مدام عبير تعرف الراجل ده؟
= لا ما اعتقدش انها تعرفه، بس حضرتك تقصد انه عبير هي اللي كانت معاه
_ انا مش عارف اقول لك ايه بس ده هو التصور الاقرب
= انا باكدلك ان عبير ملهاش علاقه، هي اه مرات ابوها بس مش هي اللي عملت كده
_ هنعرف كل حاجه ان شاء الله، بس اقدر اقولك انها هانت
= باذن الله يا فندم تعرفوا مين اي اللي عمل كده
....
مشي الاستاذ زياد من عندي، وفي الوقت ده لقيت تليفوني بيرن، كان واحد عزيز عليا اسمه شاهر منصور
_ الناس اللي مش بتسأل؟
= غصب عني يا باشا ما انت عارف الدنيا تلاهي
_ يا عم ارفع علينا سماعة التليفون، ولا انت نسيتنا ولا ايه؟
= لا يا باشا هو حد يقدر ينساك.. المهم قبل ما انسى ومش عاوزك تزعل بس انا كنت متصل بيك عشان مصلحه كده، انا كنت عندك في المديريه من يومين وشوفت واحد وفضلت افكر، انا شوفت الراجل ده فين قبل كده؟
لحد ما افتكرت، الراجل ده كان متهم في قضيه سرقه اعضاء بشريه، بس هو قدر يخرج منها ولحد دلوقتي مش عارف هو خرج منها ازاي؟
_ اسمه ايه الراجل ده؟
...
قفلت مع شاهر المكالمه، واتحركت بسرعه من على مكتبي ومعايا الرائد اشرف، طلعنا على النيابه وجبنا اذن القبض على الشخص اللي مدوخني من اول القضيه دي والشخص ده يبقى...
