رواية أحزان قمر الفصل الثالث بقلم جمانه السعيدي
من طلعت طبكت الباب وراي حيل واعتقدت انهم فهمو رفضي للموضوع لان هواي اكو اختلاف بيني وبينه
لانفس العمر هو اكبر مني ١٥سنه
لانفس التحصيل الدراسي هو خريج قانون واني مبطله ثاني متوسط
لانفس البيئه اني ويا كل واحد من بيئه مختلفه
اني كلش مامقنعه بلموضوع
ورا فتره دزو خبر انهم مقتنعين ويردوني
ابوي وافق ومرت ابوي ضلت تقنع بيه
وافقي هسه خواته يزوجن ويضل البيت بس الج
خريج وحالتهم زينه وعدا سياره
من عائله زينه لاتضيعين هاي الفرصه ابد اقبلي مايجيج احسن منه
جمانه السعيدي
تحاصرت الكل يقنع بيه
والكل فرحان بهاي الزواجه اله اني
يكولون كثرت الطرق على الحديد يلين
اضطريت اوافق يمكن لو امي موجوده جان ساندتني وحمتني من هاي الزواجه
حددو يوم كطع المهر وابد ما اشترولي بدله جابولي بدلتين مالات بناتهم وحده ماروني قديفه وحده فضي
وجانت حفله بسيطه
حتى ماكلفو نفسهم حفله على الماشي
لان عمري زغير لازم اكو وكيل عني
الشيخ ماقبل ابوي يكون وكيلي عمي صار وكيلي
ابد ماجنت فرحانه
بلعكس جنت كلش خايفه
وما اعرف مصيري شنووو وهاي الزواجه شنو نهايتها
لكن مستسلمه للامر الواقع
عقدنا محكمه
جان يجينا صلاح خطيبي كل جمعه ويبات عدنا
على اساس فترت تعارف بيناتنه
اينام بلاستقبال واني اروح انام يمه على اساس نتعارف وتنشال الحواجز بيناتنه
طبعا هذا الشي بموافقة ابوي
لكن اني ابقه كاعدة على القنفه وما اتقرب منه ابد
خايفه اني أقرب منه خايفه منه هو شخصياااا
جمانه السعيدي
حاول كم مره وياي ان انام بصفه لكن اني جنت خايفه جدا
كلشي عليه صعب
كلشي عليه جديد
ما اعرف اتصرف ابد بهذا الموضوع
كنت دائما اتهرب منه
صلاح ماتجين تنامين
قمر ما انعس
صلاح تعاي اكعدي يمي
قمر لا هنا احسن
صلاح يعني تبقين كاعده هناك للصبح
قمر اي ما اعرف انام يم احد غريب
صلاح بس اني مو غريب اني زوجج
قمر حتلو اذا يتغير مكاني ما اكدر انام
صلاح بكيفج اني راح انام
وفعلا نام واني بقيت كاعده على القنفه للصبح مانمت
احسب ساعه ساعه للصبح يمته يجي
حتى يروح واني انام
بقيت كاعده بمكاني على القنفه للصبح مانمت
انعس بس ما تكدر انام
وفعلا بس طلع الصبح كعد وماحجه وياي اي كلام
غسل وجها وطلع من غير ريوك
واني ركض لفراشي تلفلفت ونمت وبيومها للضهر يله كعدت من النوم
هو زعل عليه بس اكيد هو جبير وفاهم الموقف
بعدها بفتره
حددو وقت الزواج
والحنه صارت ابيت جدي بلحوش لان جبير
لا اغاني ولاهلاهل عبالك كاعدين بعزه
والي تمم الموقف الدنيا مطرت ودخلنا ركض للبيت
اتعس حنه جانت وابد ماتبشر ان الجاي خير ابد
يوم العرس الصبح ابوهم جاب بدلة العرس من الصبح طبعا
ما اخذوني اختار البدله
الصراحه كلشي ما اختاريت بعرسي
كلشي على ذوقهم وبكيفهم
البدله طلعت كلش جبيره عليه
والمصيبه الاكبر غرفة عرسي طلعت غرفة امهم وابوهم وصابغيها
هم حالتهم الماديه كلش زينه
بس مايردون يخسرون شي على العرس
لفلفو تلفلف
لان محد عندي راح سئل او شاف الغراض الي جابوهن اليه
الكل يريد بس يتمم هذا العرس السعيد
كان العرس كلش بسيط ولاكنما حالتهم الماديه زينه
والا كنما هذا ابنهم الوحيد
صارت الزفه ونسد علينا باب واحد
يمكن ماتصدكون اذا كلتلكم
أني كلشي ما اعرف عن الزواج او الحياة الزوجيه
بلاضافه للخوف الي كان مسيطر عليه بليلتها
من كد ما خايفه منه كنت انفذ كلشي يكوله بدون كلام
كان صلاح هو المتحكم بلكشي واني بس انفذ تمت هاي اليله على خير
جانت اصعب ليله مرت عليه بحياتي
بدت حياة جديده عليه كلشي ما اعرف عنها
مثل طالب صف اول ابتدائي كلشي على جديد
جمانه السعيدي
ما اكلكم زوجي مو زين لكن انسان امره مو بيده ابد
امه فارضه سيطرتها التامه على البيت
ما كو نمله تفوت ماتدري بيها كون كلشي بعلمها
عندي حموات اثنيين وحده ثالث مرحله كليه كلش حبابه
والثانيه اول كليه بس مسمومه
من البدايه شدة وياي تغار من كل شي
اني بيضه وشعري سرح
وهي سمره وشعرها عكش
كانت عدوانيه وياي وما حبتني من البدايه ابد
رغم اني جنت مطيعه جدا وما اسوي مشاكل ابد
كلشي تركب براسي شغل البيت كله عليه
حتى من اخلص شغل طلعلي عمتي شغل من جوه الكاع
نضفي البيتونه نضفي المراوح
روحي اغسلي الصحيات
غسل المواعين تلث وجبات عليه
وحتى مابين الوجبات عليه
حسره عليه اكعد بغرفتي حسره ارتاح
تجي تكسر الباب ليش عيوني نايمه الهسه
وفتره جنه انام على السطح اكعد الكاهم كلهم نازلين ومحد شايل فراشه كلهن يوكعن براسي
ساعه يله اخلص لم الفراشات
وياويلي اذا انزل واعوفهن بالسطح
يكون يوم اسود عليه
