رواية هدية الشيخ هشام الفصل الرابع 4 بقلم التميمية

هشام صار متأكد مية بالمية اخوه راح بعد ميرجع ونصب عزاءه بكلبه قبل عيونه...ويتمنى ويندعي يرجع ومابي شي...

الكل منتظر خبر يبرد كلبهم.. اجاهم الخبر الي نزل صاعقة على الكل...

هشام من سمع كلمة اخوك استشهد لزم كلبه بألم وصاح...لا مو صدك عزززاااام خويه..........

انفجع هشام بموت عزام وماصدك ابد وصار شخص ثاني بعزاءه وكله ساكت ميرد على احد وميحاجي احد...

حتى من يكلوله عظم الله اجرك والبقية بحياتك والله يرحمه... مايستوعب الكلمة وليش يكولوها اله ويتسلل الكلام لدماغه انو اخوه توفه وبعد مايشوفه...ويجي الفقدان على شكل سجاجين تكطع بروحه وكلبه....

ابوه ينحب نحيب على ابنه الفقده وهسة ماعنده غير هشام...وجهاله الباقين الي تيتمو من بعد ابوهم...

بعد ايام العزاء والطم والبجي وهشام فقد كلبه مو اخوه وحيده ماعنده غيره كسرت واهسه الدنيا وكلبه مفجوع ويحس بالانكسار حزام ظهره راح...

يحس الدنيا كلها مسدودة بوجهه من بعد وفات عزام..ومو مصدك مرت اسابيع على استشهاده ومشايفة...

مشتاقله اكثر من اي شي بهالكون مايشوف غير طيفه كدامه وكل يوم يحاجي بأحلامه وكوابيسه وبواقعه...

كام من فراشه وهو حزين وشعوره مينوصف..راح لبس ملابسه ولبس شماغه وعكاله وطلع صبح على امه وابوه...

امه بصوت مبحوح من كثر البجي والنوح على ابنها:رايح لأم كرار يمه

هشام:اي يمه رايح اشوفها شلون حالته

امه:والله صعبانة عليه حالتها هاي..الله يعاين لحالها وحال ابنها المسكين اشوفه ذبلان من دخلت المستشفى

هشام:الله كريم..ماشي تردين شي يمه

امه:سلامتك يمه دير بالك فدوة لكلبك..بعدين انه اخلي كرار ياخذني الها....

طلع هشام وصعد سيارته وباوع لسيارة اخوه والحسرة كلت كلبه تنهد بحزن...ومنا دخلت ام كرار للمستشفى بسبب حالتها الي ساءت اخر فترة كلش....

هشام:الله يرحمك ياخوي..خذيت روحي ورحت ياعزام..من الحزن البيه اتمنى اجي عندك خويه....

شغل سيارته وهو يفكر يبيع سيارة اخوه مايكدر يشوفها كباله..اتجه للمستشفى لأن فرات صارلها ايام بيها نايمة وحالها كلش تعبانة كلش...

اما ايمان بيت عمها حالياً حتى تخلص عدتها وهمزين ماعدها ولد عم كبار كلهم بنات اكثر شي ولد ثنين صغار كد جهالها...

جانت حزينة وبجت وناحت على عزام..بس هسة عادي تقبلت الأمر..اصلاً مرات تحس انها صارت حرة هسة تكدر

تعيش حياتها من جديد...

اكو هواي نسوان هيج ماعدهم احاسيس ومشاعر وكل همها نفسها وانانيتها حشه الزينات...

عايشة على اعصابها بيت عمها هي وبكوة متحملة مرت عمها هي وياها عرايك وجهال عمها يتعاركون ويه جهالها وهي تعارك امهم...

يجي عمها ويشبعها رزايل وحجي وماتصدك تخلص العدة حتى تتحرر وتروح ترجع بيت عمها ابو هشام هناك لا حساب ولا كتاب ودلال وشنو تريد يصيرلها...

حتى من توفه عزام هسة هشام ممقصر ويه جهال اخوه وكل متطلباتهم تجيهم....

نروح المستشفى نشوف ام كرار...

اول مادخل هشام شاف دكاترة بالغرفة الي بيها فرات وماتوقع هيج خبر يجي ويصدمه صدمة ثانية...

الدكتور طلعله وكله البقية بحياتك زوجتك توفت....

ماصدك الخبر السمعه ويكول لا يمكن انه بعدني بالبيت واحلم وحتى عزام يمكن انه احلم بكابوس طويل...ورجع بذاكرته وره قبل لا يطلع من البيت....

هشام بعدم تصديق:دكتور تحجي صدك

الدكتور:اعرف الخبر صعب بس سوينه العلينه هي وصلت المرحلة الاخيرة من المرض

هشام مايعرف شيكول من الفجعة البي:شنو والتوقعات دكتور انته كلت  انها ممكن تعيش لسنوات..دكتور رحمة لأهلك كول صار خطأ بالاسماء او بالغرف اي شي كول المهم ما ماتت

الدكتور:الله يصبركم

هشام:يابويه ياكرار شلون اكلك آ ه ه بويه.....

انصدم هشام بالخبر وماتوقع تجي فجعتين بنفس الوقت..انتشر الخبر وهشام من صعوبة الخبر ظل ساكت وميحجي شي نفس حاله من مات عزام...

كلهم اجو لهشام بالمستشفى وصارت هوسة وناس واهلها اجو واخوانها...بس اخ واحد بالنجف عايش وهم جاي بالطريق...

كرار خطية سمع وصار مثل المخبل واجه يريد يروح الها داخل وبكوة لازمينه شبعو بوكسات منه الولد الي لازمينه يريد يروح الها ويبجي...

كرار يصيح ويبجي وظل مايعرف شيكول:هدوني اريد اشوفها جذب امي ما ماتت..وظل يباوع لأبوه الساكت وحاط ايديه على راسه..هاااا ياهشام هيج مو هامك ويبجذبون عليه بموتها اي انته مشارك بالجذبة تريدها تموت انته

حازم صاح:كرار اسكت هاي قضاءها كول الله يرحمها

كرار دموعه ينزلن:لا أعرف جاي تجذبون عليه..هذا يريدها تموت..ويأشر على ابوه...وشكثر حجه على ابوه وهشام ساكت يدري بي مو بوعييه ويحجي هيج من صدمته...

حازم بصياح:لك كافي سد حلكك...

والولد يهدون بي ويردونه يسكت ماكو يبجي ويريد يفك منهم ويروح وداسهم دوس بالأرض ويصيحون عليه يسكت

ويركد..

يخافون عليه يصيرله شي بهل الحالة الهستريا ومايدري بنفسه شيكول وشيسوي ويخافون يأذي احد...

هشام صاح:خلوه براحته خلي يروح

حازم:بس خاف يصيرله شي وهو بهالخبال

هشام كام على حيله:عوفوه يروح الها

تركوه الولد وراح ركض داخل المستشفى وهو مايدري وين يروح ودموعه تنزل ويردد ما ماتت لا ما ماتت هي واعدتني تبقه وياي...

يريد يدخل الغرفة الي بيها هي ومنعوه الممرضين...

كرار لزم ياخة الممرض:بس اشوفها خلوني...

اجه الدكتور اشرلهم يسمحوله...

دخل وعيونه وكفن دموعهن باوع للمغطاية بالابيض..غمض عيونه حييل وحط ايده على عيونه...

كرار وهو مغمض عيونه وايده عليهن:يمه اوعدج وعد ماباوع لحالج هذا..بس كومي وسمعيني صوتج..مو كتيلي البارحة لا تخاف عليه راح ازفك بنفسي..نزلت دموعه جمر..مو كلتي اشيل بيدي اول حفيد واكحل عيونه بيدي..واعدتيني يمه واعدتيني ماخلفتي بوعد الي فد يوم..وخر ايده عن عيونه وشال الجرجف من عليها..يمه فدوة لكلبج هاي شنو راجعة تخبلين مثل ماعرفتج..وضحك بدموعه..هاي شنو كله علمود الشيخ تره هو جاي ينتظرج بره..ويريد يوقع اوراق طلعتلج من المستشفى بسلامة سمعيني صوتج الحنين..يمه فدوة حاجيني انه وحيدج..واعدتج اجيبلج كومة احفاد..وظل يبجي بصوت..يمه كومي وياي.....

بقه يم امه ويحاجيها ويبجي بحركة وصوت يموت الي يسمعه بجي..باس جبينها ودموعه ماتبطل...اجو طلعوه وهو تهستر...

جانت اصعب لحظات الوداع واصعب واصعب خبر اجاه وحتى على هشام...

كرار ودع امه وهو راح وياهم للمدفن وهو حطاها وياهم بكبرها...ومن رجعو كرار شمر نفسه على ابوه حضنه وبجه واعتذر منه على حجيه عليه...

هشام عاذره ومتفهمه مجان بعقله...طول حياته ماجان غير افضل اب لكرار...

مرت الايام وهمه بحزنهم..هشام انكسر كلبه بثنين بأخوه وبأم ابنه وعشرة عمر وياه...وكرار كذلك ومازال بحزنه على امه...

وحتى صاير متمسك حيل بنسمه وهي كل يوم تحاجي وتواسي وهو يحس ابواب الدنيا مسدوده بي لأن لا خذه حبيبته وجاي يخليها تخون اهلها كل يوم يمر وهي تحاجي...

وفقد امه وهو جان منتظر تفرح بعرسه وتزفه بنفسها وتصير زينة...لذلك هل ايام متمسك بنسمة حبيبته حييل...

وحتى يكلها اذا اظطريت اتزوجج غصبن على ابوج واخلي كدام الأمر الواقع..وهي تخاف من تفكيره مرات وصاير مجنون من ماتت امه ليهسة...حتى الدراسة هاملها قليل يدرس...

مرت الاشهر وصار سنة على وفاة عزام وفرات وراه ادور سنتها...

طبعا ايمان رجعت بيت هشام بعد ماخلصت العدة...

هشام بعده على حزنه بأخوه الفقده ومو راضي ينساه...اما كرار شوي رجع لحياته الطبيعية ولدراسته...

خل نشوف حوراء ماكو صارلها سنة 😁....

توها طالعة من مدرستها وتتمشه...ماحست الا بيد سحبتها وطاحت عالأرض وشافت نفسها  بقطعة مبنية عالنص قريبة عالمدرسة...

باوعت للشخص الي كبالها الرعب اجتاحها من اطراف راسها لأخماس رجليها...كامت تريد تشرد لزمها قوي:هاي وين..ولج حقيرة تخططين للزواج من اخوي وانه وين رحت هااا مو عاجبج كلبه كح.....مو كتلج ماصيرين لغيري

حوراء ظلت ترجف وظلت تبجي:حقير اتركني شتريد مني..يمته طلعت من السجن انته

ايمن:اليوم طلعت واول ماطلعت كلت اجي اشوف وجهج والله مشتاق لهل الوجه..ونزعها حجابها وهي متمسكة بحجابها وتبجي وتكله اتركني...

جان بهل اللحظة والدقيقة ماشي للمسجد واول مرة يمشي للمسجد بالعادة مايتمشه وبالسيارة دوم يروح بس جان ضايق نفسه وراد يتمشه للمسجد هناك يكعد يم شيخ المسجد ويكعد يسولف وياه شوي يرفع من ضيقة صدره...

وهم يكعد يشكي لربه الي بداخله..وحزنه على اخوه الي سكن روحه ومو راضي يفاركه طيفه ابداً...

سمع صوت بجي بنية وتكول كلام مو مفهوم..اقترب من القطعة وسمعها تكله اتركني وتصرخ عليه...

بسرعة دخل وشاف شاب ينزع بنية حجابها وهي متمسكه بي وتبجي وهو ماهامه....

كال شنو ماكو عالم هنا حجار مايسمعون...ماتحمل هالمنظر وشافها طالبة مدرسة...

راح لزم هذا وسحبه بغضب وبدون شعور ضربه بخشمه اجه محبسه بنص خشمه وظل يصب دم....ودفعه...

هشام:تفووو على شواربك وغيرتك شلون تتعرض للبنية هيج

ايمن بغضب:ومنو حضرتك وشعليك هاااا مسوي بيها رجال براسي..امشي ماعليك..اندمك تضربني شكو انته منو معينك محامي..

وراد يضرب هشام ماكدر دفعه بس عكال هشام طاح وشماغه بالأرض...

حوراء لبست حجابها وتبجي وترجف وصارت وره هشام:عموو ساعدني الله يخليك

هشام:بويه لتخافين مو زلمة الي يخلي هالاشكال صاحي ومايكسرله ظلع...ولزم ايمن ضربه بخشمه مرة ثانية ودفعه وطاح عالأرض وذاك داخ كلش خشمه طك نافورة دم...

هشام:حتى ما تتحارش بأعراض العالم

ايمن يمسح بدم خشمه ودايخ كلش: يا اخي انته شكو هي بت عمي وانه وياها جنه نتناقش

هشام:لعد هنيال امك.. طاح حظ تربيتك وبت عمك عرضك وشرفك هيج تكشف غطاها وسترها..صدك هنيال امك وتربيتها...

كام ايمن هجم على هشام مرة ثانية وضربه بس اجاه بوكس معدل من هشام والمحبس مال هشام حجرته تكسرت يمكن بوجه ايمن...

ايمن لزم وجهه بألم وانسدح بنص التراب ويجر نفس من الألم والدم غرك ملابسه وجهه...

وهشام مسح دم شفته وهو عصبي...

هشام التفت لحوراء لازمة وجها وتبجي وخايفة...

هشام:لتخافين بويه......