رواية دخيل في بيتنا الفصل الرابع بقلم جمانه السعيدي
بعد ما نهوو ولد عمهن واخذوهن بلغصب
خالتي الزغيره عادي تقبلت الموضوع وعاشت وياا عمي
وصار عدها ١٠ اطفال من عمي
٢ بنات ٨ ولد
وخالتي الجبيره عدها ثمانيه ثنيبن بنات وست ولد
اما امي ابد ماكدرت تتقبل ابوي كانت تكرها وماطيق وجوده بلبيت
اغلب الوقت مشاكل بينهم
امي شخصيته قويه وعصبيه بنفس الوقت
وابوي عنيد ويتصرف بدون وعي
يمكن لو محسن اسلوبه وياا امي جان كدر يشيل الحواجز بينهم لان هو من ازوجه كان عمرها ١٣ سنه بعدها طفله
وهو عمرا تقريبا عشرين سنه
ومثل ماتوقعت امي شغل ابوي كد الاكل اليوم واحد
اما باقي الأشياء الضروريه للحياة ماكووو
اضطرت امي تغزل الصوف وتبيعه مثل قبل حتى تساعد بلمعيشه
منا لمن صار انقلاب بلدوله وسقط النضام الاقطاعي
وتولى عبد الكريم قاسم الحكم
هنا انتهت العبوديه والناس كانت تنتضر حياة جديد بعد السنيين الي مرت
سنيين من الجوع والضلم والاضطهاد
عبد الكريم وزع كل الأراضي على المواطنيين بس ابوي وعمي ماحصلو غير قطعة ارض زغيره
يعني المحصول منها مايكفي معيشت عائلتين
وخاصه خالتي الزغيره كل سنه حامل وكل سنه جايبه
كان الحمل مستمر بلنسبه الها
يعني اجيب واحد وراسا تحمل بلثاني
بدون مراجعة دكتوره او تحليل حمل حتى ملابس ماكو للطفل من يصير تلفه بااي ثوب قديم
والطفل مشمور بلكاع طول النهار لان هي تشتغل
كلهم كبرو صحة وقوه وسلامه
مو مثل هذا الوقت الي يزوجون يصرفون دم كلبهم يله يصير الطفل عبالك مشترينه
وبعدين كلما يتمرض يركضون للطبيب
قبل الطفل يتمرض ويطيب وحده
اكيد اكو رحمه الاهيه بلموضوع ولا الطفل شلون يكبر
ويصير وهو مايحصل اي نوع عنايه
الفقر كان مسيطر على اكثر العوائل
وكان بذاك الوقت كثرت الإنجاب يعتبر جائزه
تكول خالتي اذا حبلت وحده بلشارع كلنا نغار منه لازم نحبل واحسن وحده هي الي عدها هواي اطفال
بس ماكانو يفكرون بلفقر والحياة الصعبه
اهم شي يكون عدهم هواي اطفال
جمانه السعيدي
شوفو هاي المفارقه اللطيفه جيرانه سيد كان مزوج ثنيين نسوان وكل وحده تحبل واجيب خاف ضرتها اجيب
اكثر منها منا لمن السيد كام مايعرف شكد عندا اطفال
ولله العظيم من يوكف بلباب ويجي واحد منهم يدخل للبيت
يسئله عمي انت ابن منو
يرد على الطفل ابنك اني ابنك
شكد جانو قبل متخلفين
المهم هاي قطعة الارض ماكانت تكفي مصاريف العائلتين
وخصوصا العدد كبر وكل واحد منهم صار عندا اطفال
وجدي وبيبي
بدو يدورون شغل احسن لان اذا بقو على هاي قطعة الارض راح يكتلهم الجوع
سمعو اكو بلولايه معامل طابوك والشغل بيها بااجور يوميه
وحسب ماسمعو الشغل بيه زين
احسن من وارد الكاع الي مايكفي المعيشه
قرر جدي ابو ابوي يروح ويشوف الشغل بنفسه
اخذ ابوي وراح وتأكد الشغل زين
بقا لازم ينتقلون يعيشون هناك
محتاجين قطعة أرض يبنون عليه بيتهم
باعو قطعة الارض الي انطتهم الحكومه وبيتهم وكدرو يشترون قطعة أرض هناك
بقا يبنون بيها بناء بسيط ويسكنون
بيت جدي اهل ابوي ماكنو يحبون امي
بسبب علاقته بابوي وكثرت المشاكل بينهم
وامي كانت شخصيته قويه وماتسكت ابد
جمانه السعيدي
قررو يقسمون القطعه ويبنون بيتين كل واحد اله بيت مستقل
وجدي وبيبي اهل ابوي يسكنون وياا خالتي الزغيره
وامي تسكن بيته وحدها
كانو كارهينها بشكل من ليلة زفافه وعناده ورفضه الزواج من ابوي كرهوها
وبعد الزواج تصرفات امي وياهم وويا ابوي
خلتهم يكرهونها اكثر من قبل
لذلك قررو هي وابوي يسكنون وحدهم
وخالتي وزوجها واطفاله يسكنون وياهم
بقت مشكله بيبي شلون راح تبقى هنا وبناته واهلها بنتقلون للولايه ويعوفونها وحدها
قررت تبيع بيته وهي مجمعه ذهب من شغلها طول هاي الفتره وتشتري قطعة ارض بصف القطعه الي اشتروها
بيت حماها وتروح تسكن قريبه عليهم
لان ماتكدر تفارك بناتها
كدرو يبنون بناء بسيط غرف بلوك وبيبي هم بنت غرفه ومطبخ بلوك ونتقلو للولايه
حتى يشتغلون بمعامل الطابوك
جمانه السعيدي
هنا حالتهم الماديه تحسنت اكثر لان كلهم يشتغلون
بلمعامل
اما خالتي زهره كانت تجينا زياره بلسنه مره ومااجيب وياها جهاله بس الي يرضع على صدرها
كانت حماتها ترفض تخليه اجيب أطفاله وياها
حسب كلامه تكول اخاف عليهم يتمرضون
بس بلواقع هي كانت تخاف نشوفهم ونتعلق بيهم وهمه هم يتعلقون بينا وزهره تكوم كل يوم اريد اروح الاهلي
بس الأطفال اذا بقو يم عمتهم زهره راح ترجع بسرعه
وتكوم تفكر الف مره اذا رادت تروح تشوف اهلها
لان شلون راح تعوف جهاله
وكلما كان يكثر عددهم خالتي أطول اكثر ماتجينا نشوفها
المهم نرجع للموضوع الاهم
الموضوع الي قررت بسببه احجي قصتي
من اني زغيره كانو يكولون سعاد العلي وعلي السعاد
واخوي حسن الغفران وغفران الحسن
اني كنت طفله وابد مااعرف أبعاد هاي الكلمه
كنا نلعب طول النهار سوا احنا وبيت عمي
وكنا دائما نتعارك بس نرجع نتصالح مره ثانيه
كنت حاسبتهم اخواني مو ولد عمي
لان احنا جيران طول النهار لو احنا عدهم لو هما عدنا
عادي ناكل ببتهم وياكلون بيتنا
بس الي اني ماكنت متوقعته علي تعلق بكلمة سعاد العلي
وكان يحس اني ملكه
وحسن اخوي كان يحب غفران بت عمي غفران كانت حلوه بشكل مو معقول تشبه خالتي زهره
حسن كان طول النهار بيت عمي مكابل غفران وكاعد
من هو زغير وهو يحبها
وحتى مايقبل تطلع تلعب بلشارع وياا الجهال
بس تطلع ؤتعارك وياها ويرجعه للبيت
جمانه السعيدي
اني كنت اكثر الوقت اروح يم بيبي اساعدها
لان بعد كبرت وماتكدر مثل قبل
الحد مآ طلع ابوي يوم للشغل ورا ساعه رجعو شايلينه
ابوي كان دائما يشكي من مفاصله
والضاهر المرض الي قتل جدي روماتيزم المفاصل
ابوي كان يعاني منه
مرض وراثي ينتقل بلعائله
ونعادت قصة بيبي لمن وكع جدي وهي الي شالت المسوليه
على امي ابوي مايكدر يطلع ولا يشتغل
وهنا وكعت المسوليه على امي
بس الفرق احنا أخذنا ابوي للمستشفى وعرفنا العله شنو
جدي مات وماعرف علته شنو
بس ابوي كدرنا نشخص المرض وجبناله علاج
كانت بيبي تردد مكروده يازينب على امي تقصد
حضج مثل حظ امج
هسه يموت وضلين شايله المسوليه وحدج
فعلا امي كانت تعوف البيت عليه واني عمري خمس سنوات
وتروح المعمل الطابوك تشتغل
حتى تكدر ادبر معيشتنا
كانت ترجع هلكانه من التعب
همزين احنا مو عائله جبيره همزين امي جان عدها خلاف وياا ابوي
جان احنا هسه عشره وشلون نعيش مااعرف
المهم مرض ابوي خلق مسؤليات جديده
امي وحسن يطلعون للشغل بمعمل الطابوك
واني عليه شغل البيت كله
من بدت المدارس امي صممت تسجل حسن بلمدرسه
تريده يقرأ ويكتب
تريده يصير انسان ناجح
بس اني ماقبلت امي ادخل مدرسه كانت محتاجتني بلبيت
اذا اروح للمدرسه منو يبقى بلبيت وياا خواني الزغار
ومنو ينتبه للبيت
بقيت بلبيت واني اباوع للبنات تروح للمدرسه واتحسر
منا لمن انفتح محو الاميه
اني جنت ذكيه وشاطره واقرا وياا حسن من يقرا
يعني اعرف الأحرف واعرف احسب
البنات الي بعمري وصلن ثالث ابتدائي
قررت اخلي بيبي تدخل بلموضوع بيبي كانت حيل تحبني لان اني اكثر وقتي بيتها اساعدها
رحت البيبي
سعاد. بيبي اريد اروح للمدرسه
بيبي...شلون
سعاد. اسجل لمحو الاميه وامي ماتقبل فدوه انتي احجي وباها اني اعرف أقرا واكتب بس اريد شهاده
بيبي...ميخالف
سعاد. واني من اخلص دراسه اشتغل كل الشغل بلبيت
فدوه بس خليه تقبل اروح للمدرسه
بيبي...مالج شغل اني احجي وياها
من رجعت امي بيبي اجت علينا
بيبي.. اكلج زينب خلي سعاد تسجل بمحو الاميه
خليه تقرأ وتكتب حتلو تتعلم بس تكتب اسمها
امي.. ومنويبقى يم خوانها والبيت
بيبي. اني كل يوم من تروح سعاد اجي اكعد بيتج يم الجهال واني اطبخلكم
بس خليه تروح تدرس الخاطري
امي كانت رافضه بس على إلحاح بيبي وافقت
رجعت بيبي اخذت الموافقه من ابوي
واخيرا راح اروح ادرس مثل البنات
