رواية جذبني فمك البني الفصل التاسع والخمسون 59 بقلم عبير إدريس

ياعينج بس بطلي الدمع

مو حتى طارف كحلتج ساح بحزن 

وانه احب ذاك السطر فوك الجفن من يتخطط بفن واون بنضراتج هاي التايهة..

بقلمي

عبير ادريس

________

انسد باب المطبخ بهدوء التفتت على سيلين والخوف اكل كلبي حجيت بصوت اشبه للهمس.. 

ايفين : ولج بس لا فهد جان موجود وسمعنه. 

سيلين : محجيتي شي بالعكس مدحتيه وانتي خايفه عليه. 

ايفين : شلون محجيت والرموز الكتلج عليها وسالفه .. 

قاطعني صوته من صاح ايفين.. 

ايفين : عزه بعيني يا سيلين عززه شراح اسوي.. 

سيلين : لتسوين شي كلش كلش اخذج يمي ميكدر يسوي شي بعد.. 

جريت نفس قوي مديت ايدي الها.. 

ايفين : كوميني فدوه اروح اشوفه شبيه. 

سيلين : على كيفج لتخافين احجي بثقه انتي ماسويتي شي تريدين اني احجي وياه. 

ايفين : يا الله انتي شبيج اكلها ابتعدي عنه ابتعدي معليج بيه وهسه لو تشوفيه يحرك البيت ويكسرني لتدخلين خليني اني اتصرف.. 

لزمت ايدي كومتني بس ماراضيه عليه وكفت والتفتت الها. 

ايفين : ضلي هنا لتجين ورايه اكعدي.. 

فركت وجهي ورحت للمطبخ لكيته واكف ومرجي ثنين اديه على الميز تقربت منه همست.. 

ايفين : صحتني ؟ 

جان مدنك راسه رفعه باوعلي مخنزر . 

ضليت ساكته ماريد استفز الوحش البداخله اريده هو يحجي.. 

ضليت واكفه واتنفس سريع احاول اهدأ نفسي بس التوتر مبين عليه ... 

فهد : شنو سالفه الرهن ؟؟؟ 

ايفين : يا رهن؟؟ 

دار وجها عني جانن مواعين على السنك غاسلتهن مال الغده شالهن وركعهن بالكاع عاط بعلو صوته. 

فهد : شنو سالفه الرهن يا بر*************** ....

 كومه فشار سطر ... 

ايفين : اول شي انت شنو فهمت. 

فهد : فهمت ههههه ليش طفل كدامج وافهم الحجي مكلوب .. 

تقربت منه ردت الزم وجها نتر ايدي حيل ولزم جفوف ايدي طبكهن سوه وعصرهن بجفوف ايده . 

ايفين: اذيتني فهد شبيك ايدي اخ ايدي .. 

فهد : باعي لا يوكف بعيني طفل ولا حمل ولا نعل تحجين لو اخليج تزحفين زحف ،و اشوفج وجهي الحقيقي.. 

يحجي صاك على اسنانه وخلسني خلس بنضراته.. 

ايفين : باوع والله حجيتها من باب محبه بيك ردت اعالجك وبس. 

فهد : وانتي شنو حتى تعالجيني نسيتي نفسج  

وبعدين ويامن كاعد تحجين عليه ويه سيلين ما لكيتي غيرها..

ايفين : بس لتصيح اني افهمك .. 

فهد : شتفهميني شتفهميني.. 

حجاها ولوه ايدي من الالم افتريت وياها ضهري صار على صدره باوعت سيلين واكفه بعيد وتحجي بالموبايل ، يمكن تخابر عمو وراح تطيح حضي بدون متدري بنفسها.. 

ايفين : فهد افهمك ميحتاج كل هذا صح يمكن غلطت فتحت كلبي وحجيت لسيلين بس والله ماحجيت شي ينزل من قيمتك بالعكس مدحتك هواي والله العظيم. 

فهد : وانه عايز على مدحج سواء مدحتي او ذميتي انتي والنع*** عندي.. 

ايفين : ليش تغلط اني مسويت شي.. 

دارني عليه وشد على ايدي قوي.. 

فهد : وعلي اليوم اخبلج شحجيتي بعد. 

ايفين : انت شنو سمعت. 

فهد : تراهنتي عليه ويه اختج مثل ما هيه تراهنت وياج تهدم رجلها مو صح.. 

حجاها بصوت عالي باوعت على سيلين ارتبكت يمكن عمو سمع لان مشت سريع وعافت المكان. 

مجرد رخت ايده وخرت ودرت ظهري واني ادور عن جواب مقنع يطلعه من حاله الغضب البيها جربت الومه وماحسبت حساب للراح يصير تصرف غبي جان... 

ايفين : ليش هيج حجيت ليش هسه تسبب الها مشكله وبعدين هيه من حجتها جانت مريضه مو بوعيها وهسه عاشت حياتها ويه عمو صح ليش تريد تأذيهم ليش. 

من كلت هيج عافني وشكو شي بالكاونتر طلعه وكسره ماضل شي على حاله اخذ الجفجير وكسر جام المطبخ والجام يوكع على ايده وعلى وجهه والدم كام يقطر ، 

شكله عباره عن فلم رعب شعره منفوش وجها شاحب يكسر ويصرخ بقوه دمراته بارزه..وجها وعيونه انصبغت بلون احمر، خفت منه لابيه اتقرب منه اهديه ولا بيه ابتعد خاف يأذي نفسه ويأذيني.. 

دخت لزمني دوار اريد اوكف ماكدر اتكأت على مسند الكرسي مال بيه وكعت بالكاع هو انتبه على الصوت اجه يمي يركض. 

بصحوه ضمير دامت اقل من الثانيه سألني .. 

فهد : شبيج خوما تأذيتي... 

بعدها رفع راسه شاف سيلين ورجع لنفس الخبال يكسر ويعيط عليها.. 

ما اهتمت اله اجتي يمي كومتني وسحبتني للهول اجر برجلي كوه مشيت هم خوف وهم تعب.. 

سيلين : انتي شجابرج تعيشين وياه شنو لازم عليج فهميني. 

ايفين : سكتي سكتي هسه يهدأ ويتندم.. 

سيلين : اسكت لحد ما تموتين عود بوكتها احجي مو ست افونه..

ايفين : متشوفين كاعد يأذي نفسه لو يريد يأذيني يأذيني حتى انتي متوكفين بعينه.. 

دارتني عليها خازرتني. 

سيلين : شنو لازم عليج وهلكد خايفه منه 

ايفين : يا القهر اسكتي اسكتي راح تدمرين نفسج وتدمريني اسكتي لا يسمع سكتي.. 

عفتها ورحت للمطبخ لكيته كاعد بالكاع ويحيط بيه الكزاز من كل جانب..كعدت كباله.. 

سيلين 

عافتني وراحتله راح اتخبل ليش هلكد خاضعه اله رحت وراها لكيتها كاعده بالكاع باوعت شنو هاي حياتهم وضعها مزري.. 

تحيطهم عتمه صمت مريب رائحة الدم تملئ المكان اواني متناثره اثاث محطم زجاج مهشم وصفات طبيه متناثره هنا وهناك 

تقربت اباوع علب دواء مبعثره ضليت اقلب بيهن واقره عباره عن خليط من المسكنات ومضادات للقلق والاكتئاب حبوب منومه ، 

مثل علاجاتي يعني علاج فهد مثلي بس اكيد علاجه قاتل يمكن ياخذهن كلهن سوه فتحت العلب مبين مأخذ منهن ، اني جنت استخدم كل فتره نوعيه وبين نوعيه ونوعيه ارتاح فتره لابأس بيها اسبوعين او اكثر يلا انتقل للنوعيه الثانيه وادهم جان يقسم اليه العلاج واخذه بوقت معين مو بكيفي.. 

ايفين كاعده بالكاع ضامه وجها بيدها واكتافها تهتز بتوتر حسيتها تبجي وترجف خوف ويمكن يأس من حاله فهد. 

عفتهم ورحت للهول كعدت حايره بمصيبتي شلون اقنع ادهم الحجي السمعه مو صحيح او حجيتها بضوجه جريت نفس وكعدت افكر بحل . 

ايفين.. 

رفعت راسي باوعتله منهار وايده تقطر دم مسحت دموعي وكمت جبت شاش ومعقم كعدت يمه ردت اسحب ايده اضمدها اخاف منه ومن رده فعله.. 

همست بصوت ضعيف وخايف.. 

ايفين : انطيني ايدك اضمد جرحك.. 

باوعلي وكال.. 

فهد : ياجرج تضمدين منهن يا ايفين ياجرح .. 

ايفين : ايدك شوف اللحم مفلع اصلا يحتاجله خياط.. 

حجيتها وبجيت من الخوف والمنظر مال ايده مرعب.. 

نزلت دمعته وكال.. 

فهد : ايدي عادي تتضمد وترجع احجيلي عن جرحي من زوجتي العافتني وهانت رجولتي بالمحكمه وكدام الكل تعرفين شنو شهدت ضدي تعرفين شنو كالت ؟ لو جرح ابني الماشايفه صار سنين ولا سامع صوته ولا اعرف شكله شلون صار ، لو الاضبط عالجي جرح كلبي صارله سنين ينزف ماضل واحد ما ضربني بيه.. 

يحجي ويضرب على كلبه هدومه انترست دم.. 

جريت ايده على كيف فتحت المعقم درته على الجرح غمض عينه بألم وهمس.. 

فهد : تعرفين عبالي انتي صديقتي الحقيقية وطلعت بيج من الدنيا كلت هذا هو فهد هاي البنيه راح تنسيك همك وترجعك بني ادم وتحببك بالحياه كافي تعالج وعيش حياتك وارجع لربك اكيد الحياه راح تنصفك بيوم ويرجعلك ابنك بس الصار طلعتي متراهنه عليه يعني ناويه تنتقمين مني مثل ما حرمتج من حياتج الجنتي مخططه تعيشيها بمزاجج. 

اني ابجي وهو يبجي... 

ايفين : تعرف الفرق بيني وبينك شنو؟ 

همس بتعب.. 

فهد : شنو؟ 

ايفين : حياتي انبنت وياك على مجازفات .. 

فهد : شلون يعني .. 

حجاها وعوص عينه ... 

ايفين : اني لحد الان ماعرف داخلك شنو ماعرف حقيقة حياتي وياك على شنو راح تنبني خدعه مصلحه حب تكوين عائله لو مجرد وسيله تحصل ابنك ومرتك من خلالها وتاخذ ابني وتشمرني بعدها لهذا نويت اعالجك ممكن تتغير افكارك ممكن نعيش صح اني منو اليه اذا انت صار بيك شي خصوصا اذا سيلين وعمو سافرو وين اروح تشمرني بالشارع اذا زوجتك رجعتلك هيج ضميرك يرتاح وتعيش سعيد.. 

فهد : ليش انتي شفتي واحد كلبه مات يكدر يعيش من جديد حتى وان رجعولي ماعتقد راح ارجع طبيعي سألي انسان ميت مشاعره ميته كلبه ميت يكدر يعيش ..

مديت ايدي ترجف مسحت عيونه وتقربت منه .. 

ايفين : كافي راح تموت واذا عافتك يعني خلصت الدنيا اذا روايه ماكو انت تموت شدعوه هلكد مقدسها شوف شسوت بيك وين وصلتك ليا حال روايه حطمتك ومتأكده متستاهل ربع حبك الها..

سحب ايدي من وجها ولزمني من ساعدي بقوه... 

فهد : انتي من وين تعرفيها منو حاجيلج عنها.. 

ضحكت مستهزئه والدموع بعيني.. 

ايفين : انت ياحبيبي انت يوميه تحجيلي عنها تتغزل وتبجي وتنحب وتتأمل وتحلم محد حجالي غيرك انت حجيت .. 

سيلين 

جنت كاعده وسمعتهم يحجون رحت وكفت باب المطبخ بلكت اسمع طرف خيط يوصلني لحقيقه علاقتهم وشنو السر البينهم ، حجيهم جان عباره عن عتب وكلام جارح ، شويه شويه تصاعدت نبرات الغضب وكل كلمه يحجوها عباره عن صفعه غضب واحد يضرب الثاني بيها ، كام فهد وكف بوكفته دخل ادهم من باب المطبخ باوع على الوضع صار نار اول ما فات عاط بفهد. 

ادهم : تخبلتتتتت انت شنو مره توصلك لهذا الحال مو عيب لك انت رجااال . 

ضحك فهد جاوبه مستهزء.. 

فهد : هذا منو يحجي الله يرحم شبسرعه نسيت وبعدين انت مو ابوي حتى تحاسبني وتحجي قابل خلفتني ونسيت اخذ زوجتك وتيسر.. 

ادهم : صح انه مو ابوك بس انوب عنه وهاي جيتي حتى اساعدك مو ازيد الخلاف .. 

فهد : مشكور قبل ساعدتني هواي مايحتاج تساعد هسه. 

ادهم يمشي على الكزاز ويستغفر.. 

ادهم : شنو هاي الهوسه شنو هذا الوضع ليش هيج ليش.. 

فهد : بيتي ومن حقي كلشي اسوي بيه ومن تجيني خطار تتقبل كلشي موجود وانه ما مجبور ابررلك كل فعل اسويه ومن شنو ضايج وليش هيج تصرفت.. 

ادهم : لتبرر تعال وياي اعالج ايدك يراد الها خياط..

. 

فهد : عوفها تنسد من وحدها. 

ادهم : شوف الكاع انتسرت دم شبيك انت. 

فهد : لتصيح وتزيد خبالي اخذ مرتك واطلع منا.. 

ادهم : خليني اساعدك .. 

فهد : ردت منك شغله وكلفتك بيها صار سنين ما سويتها ارجع اطلب منك من جديد ليش.. 

ادهم : كلتلك وارجع اكلك كاعد اسعى بيها ما ناسيك.. 

فهد : لشوكت انتظر لشوكت والله خلص الصبر وماضل شي وعقلي يطير هاك شوف علاجي باوع شلون عايش ..

كام يشيل بعلب الدوة يفتح القبغ ويفرغ العلاج بالكاع.. 

ادهم : بس خلي ايدك بيدي والله اعالجك والله يافهد بس اسمعني ارجع ابنك عن طريق المحكمه وغصبن عليهم يخلوك تشوفه ، تدري ليش ما اكدر اسوي شي هسه غير بس اترجه عمك يسمحلك تشوفه لان عدهم امر من المحكمه انت غير مؤهل لتربيه ابنك وبسبب ضربك وتهديداتك لزوجتك انحكم عليك متشوفه اذا متجيب تقارير كامله تأكد علاجك ذاك الوكت نكدر ناخذ حكم.. 

فهد : والله مابيه شي انه زين يا ادهم وهاي ايفين اسألها.. 

التفت على ايفين يباوعلها متوسل.. 

فهد : انه زين وياج لو لا احجي ضميرج.. 

سكتت ودنكت راسها.. 

فهد : احجي لج انه زين وياج لو لااااااااا.. 

ادهم : لتصيح فهد انت شوف الفوضى السويتها واحكم على نفسك صرت زين او لا ليش نحكم على الحجي لو على التصرفات .. 

فهد : ردت اتعالج ونويت بس بسببها بطلت.. 

ادهم : بسبب منو ؟ 

فهد : ففه 

ضحك ادهم.. 

ادهم : شعليها ففه .. 

فهد : تراهنت عليه ويه مرتك. 

التفت علينه ادهم عاكد حاجبه.. 

ادهم : شنو سالفه الرهن ممكن تفهمونه ... 

فركت كفوف ايدي بتوتر باوعلي ادهم وكال.. 

ادهم : ها سيلين . 

سيلين : ها ادهم. 

ادهم : احجي شنو سالفه الرهن بينكم .. 

سيلين : ماكو رهن ماكو هيه كالت تراهنت ويه نفسي اعالجه وبس.

ادهم : وليش مرتبكه وخايفه؟ 

حجاها عبالك يحقق ويايه. 

فهد صافن عليه مضيق عينه ، حجيت مرتبكه وخايفه اخر شي فهد حجه.. 

فهد : انتي شكد كذابه. 

سيلين : اني ؟ 

فهد : اي انتي.. 

ادهم : فهد ما اسمحلك تتجاوز عليها. 

فهد : مو كاعد تكذب عليك عينك عينك شوفها.. 

سيلين : ماكذبت هذا الصار. 

فهد : منو كال اتزوج ادهم واهدمه.. 

ادهم عكد حاجبه مستغرب السمعه مشى اتجاهي لزم كف ايدي دخلنه للأستقبال سد الباب وكعدنه.. 

ادهم : احجيلي كلشي ماريد اسمع من غيرج شنو سالفه الرهن انتي متراهنه عليه تهدميني ؟ 

سيلين : لا والله لا .. 

ادهم : لعد ليش ارتبكتي وخفتي.. 

سيلين : مو قصه ارتباك بس ما اريد اخسرك ولا اريد تكرهني ولا اريد يصير بكلبك خدش صغير ناحيتي..

ادهم : احجيلي كلشي حتى اسكتهم كلهم .. 

سيلين : من خطبتني جنت توني متعالجه وكتلك اجرلي اريد اعيش بمكان بعيد عنك واشتغل وانت ما سمحتلي ، جنت عصبيه وايفين ضلت تقنع بيه كتلها اذا قبلت بيه راح اندمه كالت شلون كتلها اهدمه بس والله يا ادهم حجيتها بوقت جنت ماريدك وماريد ارتبط بيك هسه كلشي اختلف وتغير وحاولت اشرحلك قبل شويه بالموبايل بس انت مانطيتني مجال افهمك وسديته.. 

ادهم : ماحب احجي بمواضيع حساسه بالموبايل لان راح ننفهم خطأ مو مثل هسه كبالج وعرفت كلشي وتفهمت.. 

سيلين : هسه انت ضايج. 

ادهم : اكيد ضايج شوفي حال فهد وين وصل شلون شسوي شسوي.. 

كام يضرب بيده حضن راسه بكفوف ايده ورجع راسه ارتاج على القنفه.. 

سيلين : ادهم .. 

ادهم : هممم.. 

سيلين : اذا انت سافرت وتكررت هاي الحاله مال فهد شلون شنو نتصرف.. 

كعد عدل وضرب ايد بأيد. 

ادهم : ماعرف شسوي فهميني خابرني ضيغم كال شغله دوامك تمت وحددو موعد لازم اروح فهميني شسوي ... 

سيلين : نعيش اني وايفين ونرمان ومريم سوه وفهد يروح يم اهلك. 

ادهم : ماعرف شلون اعوفكم وحدكم ابالي شغله بلكت تصير.. 

سيلين : شنو؟ 

ادهم : اقنع ايمن يجيب زوجته وتعيشون سوه بين ما اسحبكم .. 

سيلين : منو يكول يقبل يعيش ويه ايفين بنفس البيت وانت تعرف ايمن شلون يتحسس منها .. 

ادهم : اعرف وابويه اصعب منه اذا طلبت منه يرجع هو وامي يمكم احتمال شهر وتهجين بالشارع.. 

سيلين : كل الصار بيك بسببي لو ممتزوجين جان انت مسافر ومرتاح وماكو على كلبك هم. 

ادهم : ليش اذا انتي بعيده عني راح ارتاح شبيج انتي؟

حجاها ودار وجها على الجهة البعيده عني ،، سكتت.. 

ضرب ايده على رجلي على كيف وكال.. 

ادهم : كومي نرتب البيت ذوله ثنينهم مابيهم حيل يشتغلون.. 

سيلين : عالج ايده واني وايفين نرتب على كيفنه. 

ادهم : عوفيه براحته هو اعرف بنفسه . 

سيلين : تمام.... 

كمنه رحنه للمطبخ لكيناهم ماكو باوعت على خط الدم بالكاع ممتد من المطبخ للهول وللدرج مبين صاعدين فوك.. 

سيلين : انت شنو راح تسوي.. 

مدنك يلم بالكزاز جاوبني 

ادهم : اشيل هاي الهوسه وانتي رتبي باقي البيت.. 

سيلين : ماشي دير بالك تنجرح. 

ادهم : ليضل بالج .. 

عفته ورحت للأستقبال بلشت بيها اول شي سويته فتحت النوافذ هويتها بلشت انظف ، كل غرفه اكملها اسد بابها اخر شي مسحت البيت كم سطله مي بدلت ومعطرات يلا خفت ريحه الدم خنكتني خنك ، رحت للمطبخ لكيت ادهم سوده عليه يشيل بالكزاز ويرجع ليوره.. 

سيلين : خليني اساعدك. 

ادهم : ميحتاج كملت . 

سيلين : ايدك تأذت  

ادهم : مو شي مهم هسه اغسل واضمدها.. 

سحبت كرسي كعدت عليه ، اباوع عليه يسحب الكزاز بالماسحه من جوه الكاونترات وبعدين يلمه.. 

كمل جاب صونده غسل المطبخ كمت وياه اخذت الماسحه نشفته بعدين طلعنه للطرمه نظفناها . 

ادهم: نروح للبيت صارت ب ١٢.. 

سيلين : خطيه تلكاهم جوعانين اسوي اكل ونصعده الهم شتكول.. 

ادهم : امشي نسوي سويه . 

ابتسمت وحضنته من ظهره باس راسي ومشينه للمطبخ.. 

فتحت الثلاجه والتفتت على ادهم ضحكت. 

ادهم : شبيج.. 

سيلين : فارغه شنو اسوي هسه. 

اجه يمي باوع بالباب مال ثلاجه. 

ادهم : هاي اجبان وسوي جاي وياهن ، لا اوكفي لحظه. 

سيلين : شكو.

مضيق عينه ويقره بعلب الاجبان. 

ادهم : منتهيه صلاحيته هذا . 

حجاها وشمره بالزبل والبقيه يفتح ويشمر لو معفن لو خربان.

ادهم : صدك جذب ذوله شنو ياكلون زين اختج متفتح الثلاجه متشوف شبيها مابيها ...

سيلين: ايفين تلكاها معتمده على فهد وهو معتمد عليها هههه. 

ادهم : شلون ثنين متعجب شلون انجمعوا سوه.. 

سيلين : بس متأكده ايفين راح تحتوي.. 

ادهم : انه هم لاحضت تعرفين لو روايه مسوي بيها فهد مثل ماسوه با ايفين اليوم جان شسوت.. 

سيلين : شسوت بله..

ادهم : تخابر ابوها واخوانها يجون وتعلك بينهم وبين فهد مرات توصل للضرب فهد وهجان وتستمر العداوه اشهر بينهم واحد يتحلف للثاني.. 

سيلين : بس حقها اخوك مرعب.. 

ادهم : انه كايل مو حقها بس جاوبتج من كلتي ايفين راح تحتويه كتلج صح وضربتلج مثل على روايه. 

سيلين : شوفها اخذته وصعدت فوك .. 

ادهم : اصيله ايفين انه احترمها هواي ..

سيلين : ففه طلع بيها بله ههههه. 

ادهم : والله يضحكوني مرات ... 

سيلين : الله يهديهم ويسعدهم.. 

ادهم : امين يارب ، امشي نروح للبيت وباجر نتسوك الصبح ونجي هسه اذا جاعو واحد ياكل الثاني ههههه. 

سيلين : ههههه صدك ماكو اكل حتى اسوي .. 

حجيتها ورحت للهول لبست عبايتي ولفيت الشال طفيت الضوايات وطلعت... 

سيلين : كملت نطلع .. 

ادهم : يله.. 

طلعنه وسدينه الابواب صعدنه السياره مهدودين هد من التعب واحد يشكي للثاني تعبه بالنفس ... 

وصلنه للبيت دخلنه بوجهنا لغرفتنه سمعنه صوت ايمن ونرمان بالمطبخ يسولفون .. 

ادهم : يمكن مسوين عشا كومي جيبيلنه صينيه رتبيها جوعان. 

سيلين : مابيه حيل كوم انت حباب..

ادهم : لو بيه حيل جان بدلت ملابسي.. 

سيلين : هههههه صدك شلون راح نام هدومنه ويييع. 

ادهم : ههههه كومي كومي نسبح ونتعشى مثل الاوادم .. 

سيلين : يله ... 

اخذت ملابسي ودخلت سبحت على السريع وطلعت رجعت للغرفه لكيته غافي كعدته راح سبح ، لبست حجابي ورحت للمطبخ شافوني ضحكوا . 

سيلين : لحد يحجي ويايه اريد اكل ميته جوع. 

ايمن : ههههه هاي شصاير بيج شنو جنتي بمعركه 

سيلين : هيج مبين عليه لو انت تدري..

ايمن : حجالي ادهم ..

سيلين : شوكت حجالك ادهمي صاير ميضم سالفه ..

ايمن : لا خابرني رادني اجي وياه علمود نهدي الوضع كتله عساهم نارهم تاكل حطبهم انه شكو. 

سيلين : لا خطيه يقهرون والله.. 

ايمن : انقهري على روحج وابتعدي عنهم سيلين .. 

نرمان : شدعوه هيج حاقد ايمن. 

ايمن : كلكم راح تخسرون بالتوالي واولكم ادهم ابو كلب الطيب وتذكروني بالخير بوكتها. 

سيلين : ليش وين راح تروح علمود نذكرك بالخير؟ 

ايمن: اتزوج واخذ مرتي واسافر ادرس بتركيا رتبت اموري هناك حتى شقه اجرت قبل فتره .. 

سيلين : هاي شنو تفاجأت والله.

ايمن : شعندي باقي هنا لا مستقبل لا حياه بيها حظ. 

سيلين :الله يوفقك ويسعدك.. 

ايمن : يسعد الجميع..

ضلينه اني ونرمان وحده تباوع على الثانيه لان اعتقد نرمان تعرف بفكره ادهم علمود ايمن يعيش ويانه بعد سفره..

طلع ادهم من الحمام واجه للمطبخ.. 

ادهم : ميت جوع اريد اكل نرمان شنو مسويه. 

نرمان : اكعد توني بلشت اكلي احنه تعشينه عبالنه تباوتون هناك. 

ادهم : وين ابات متدرين بيه ماعرف انام اذا مو مكاني.

نرمان : اي صح.. 

ادهم : ايمون طلب صغير من اخوك والاخير ان شاءالله. 

ايمن : كول اذا كدرت بعيني ماقصر.. 

ادهم : خجلان منك والله. 

ايمن : كول مابينه تكلفه ابو مريم.. 

ادهم : رحم الله والديك باوع اريد اسافر وراح اعوف البنات وحدهم وكلبي ما مرتاح ما اكدر أأمنهم بس يمك.. 

عكد حاجبه ايمن وكال. 

ايمن :شلون يعني تأمنهم يمي مافهمت ؟ 

ادهم : اريدك تجي تعيش هنا انت وزوجتك بين ما اكمل معامله سيلين حتى اسحبهم ...

ايمن : قبل لا تجي جنت اسولف للبنات ادهم انه اجرت بتركيا شقه واثثتها مجرد اكمل مراسيم الزواج اسافر.. 

ادهم : هاي شنو؟ 

ايمن : اي والله .

ادهم : فاجئتني .. 

ايمن : ماكتلك لان جنت مشغول وعمي بالكوه قنع ماقبل بنته تسافر ..

ادهم : الله يوفقك ويسهلك. 

ايمن : ويوفقك ضلعي.. 

ادهم خله ايده على لحيته مسدها بهدوء هاي حركته من يقلق او يحتار بشي.. 

تعشينه ونمنه... 

ثاني يوم تسوكنه ورحنه لبيت فهد رتبت المسواك وسويتلهم غده ، نصيت النار وصعدت دكيت الباب عليهم بعدهم نايمين جانت الساعه ١٢ ونص ، فتحت الباب ايفين عيونها وارمه .. 

سيلين : صباح الخير . 

ايفين : صباح النور شنو بايته هنا. 

سيلين : لا رحنه واجينه قبل شويه باعي تسوكنه كلشي ورتبت المسواك بالثلاجه وسويت غده راح ارجع ويه ادهم وانتي نزلي جوه خاف تنسين الاكل ويحترك.. 

ايفين : عاشت ايدج تعبتج.. 

سيلين : ماكو تعب شلونه. 

ايفين : فهد 

سيلين : اي.

ايفين : الليل كله يبجي واني ابجي لحد ما نام الفجر وهسه مثل الميت .. 

سيلين : الله يبرد كلبه ويساعدج.. 

ايفين : سيلين لتعوفيني وحدي.. 

سيلين : شلون يعني مافهمت. 

ايفين : هاي الفتره تعالي كل يوم لان تعبت واحس نفسي ضايعه.. 

سيلين : اكيد ماعوفج بدون متحجين.. 

حضنتني قوي ... 

سيلين : كافي ولج احنه خوات.. 

ايفين : شكرا سيلين .. 

سيلين : ماكو داعي تشكريني ديري بالج عليه وعلى نفسج واي شي يصير خابرينه. 

ايفين : ان شاءالله 

سيلين : يله رايحه اني مع السلامه. 

ايفين : الله وياج سلميلي على عمو. 

سيلين : يوصل .. 

راحت سيلين واني رجعت للغرفه اباوع على هذا الكائن الغريب ماعرف شنو اتصرف وياه وشلون اكمل حياتي البارحه الليل كله نتعاتب واحد يأذي الثاني ونفس كلامه يريد ينتقم من الكل حتى من نفسه واني اريد اوكفه كافي الصار وهو مصر يأذي اليحبهم ... 

من صعدنه لفيت ايده بأكثر من طبقه شاش يلا شويه انكطع الدم.. 

ايفين : فهد كافي الصار وخلينه نعيش الله يخليك.. 

فهد : انتي ليش هيح سويتي. 

ايفين : شسويت.. 

فهد : ليش ربطتيني بطفل.. 

ايفين : رجعنه فهد رجعنه 

فهد : ايفين ليش هيج سويتي.. 

ايفين : احجي بدون متصيح فهد تره تعبتني.. 

فهد : طفل وراها رهن تريدين تخبليني انتي.. 

ايفين : انت راح تخبلني اني اريدك تعيش حرامات شبابك ضاع وراح يضيع بعد اكثر.. 

عاط بيه بصوت عالي. 

فهد : شعليج بيه انتيييييي وعليش خايفه عليه عليشششش.. 

ايفين : لتخبلني فهد حجينه بهذا الموضوع وانتهينه كافي كل يوم تعيد وتزيد بالحجي. 

فهد : انه اخبلج انه مو . 

ايفين : اي انت كل يوم برأي شكل كل يوم حجي جديد .. 

فهد : انه الجاني والمجني عليه انه المجرم وانتو الضحيه انه كل يوم مسوي خطأ جديد اساسا انه عباره عن خطأ وحياتي غلط اعيشها.. 

ايفين : شتريد تسوي.. 

فهد : اذا استمرت حياتي هيج انهيهه بطلقه واخلص من نفسي واخلصكم مني . 

كمت لزمت وجها وكتله. 

ايفين : مو بكيفك فهد مو بكيفك هيج تسوي اني بمسؤوليتك ابنك بالطريق المن تعوفه المن.. 

فهد : نزلي الطفل وتطلكي وعوفيني وحدي انه ما ينعاش وياي شفتي اليوم ردت اموتج اله شويه .. 

ايفين : انت بكيفك تحجي مانزل الطفل ولا اتراجع ولا اتركك .. 

فهد : عوفيني وعيشي حياتج انه مافيدج.. 

ايفين : بعديش اعيش حياتي ويا حياه اعيشها ، و ويامن اعيش انت تعرف شنو سويت بيه وشلون كرهتني بجنس ادم اني تلوثت بيك واريد ننظف سوه ونعيش سوه كافي خسارات.. 

تقرب راد يبوسني وخرته همس.. 

فهد : ليش 

ايفين : انت تحبني لو رغبه لو علمود الطفل باقي ويايه؟؟ 

فهد : ليش تسألين ؟ 

ايفين : جاوبني.. 

فهد : نامي. 

ايفين : فهد جاوبني لتخبلني.. 

فهد : نامي ولتصيحين لا اتخبل عليج.. 

ايفين : راح اعوفك اذا ماحجيت واروح ويه سيلين. 

فهد : تبقين غصبن عنج.

ايفين : اذا ماعرفت شعورك اتجاهي اعوفك. 

فهد : جربي تسويها وشوفي شلون اطلعج من جوه الكاع.. 

ايفين : فهد فهد فهد.. 

فهد : عيونه. 

ايفين : تعبت. 

فهد : شجابج عليه جنتي بعيده ليش لعبتي بالنار وخليتيني احركج..

ايفين : حضي .. 

فهد : فضولج. 

ايفين : صح.. 

استمرينه بالعتب والمهاترات لحد ما تعب ونام واني ضليت صافنه عليه وابجي ماعرف يمكن حبيته ويمكن شفقه عليه ويمكن عذاب ضمير ماعرف ليش هلكد بجيت بليلتها... 

عفته ونزلت لكيت البيت نظيف يلهث وكلشي مرتب عبالي راح انزل والكه الانقلاب نفسه دخلت للمطبخ ريحه الطبخ طالعه ضميري هزني تذكرت الصار بسيلين وشكو بجي وندم بالدنيا التم عليه ، كعدت على الميز اشهك وابجي لحد ما سمعت صوته نزل من فوك كمت غسلت وجهي على السنك وعدلت شعري فات للمطبخ وكال ...

فهد : صباح الخير. 

ايفين : صباح النور تتريك. 

فهد : اريد جاي راسي موتني راح اطلع للصيدليه بين متسوين.. 

ايفين : ماشي. 

طلع وسد الباب عرفته راح يجيب علاج واحتمال مسكن لايده.. 

مر هذا اليوم بهدوء... 

سيلين.. 

رجعنه للبيت ورحت يم نرمان حضرنه الغده واسمع ادهم وايمن يحجون بموعد العرس .. 

ايمن : قبل سفرك بيومين انه اعرس هههه. 

ادهم : اي لان اذا سافرت بعد صعب ارجع تعرف دوله بعيده لا ساعه ولاثنين. 

ايمن: صحيح وانه حسبت حساب هذا الشي وقدمته ..

ادهم : الله يسهلك حبيبي.. 

ايمن : الله يسلمك.. 

ضلو يسولفون واحنه كملنه الغده صبيناه و صحناهم تغدينه ، 

ثاني يوم رجع ايمن لبيتهم ومشت الايام واقترب موعد عرس ايمن ،

 اشوف ادهم متوتر وشايل هم ما سألت ولا استفسرت كلت اذا عجبه هو يحجي ،

 قبل بيوم من العرس اجوي فهد وايفين يمنه من الصبح ، وطلعنه كلنه سوه بسياره ادهم ،

 هو وفهد ليكدام واني ونرمان وايفين ليوره ، خفت من روحتنه خصوصا ايفين يعني شغله صعبه كلش بس فهد اصر تروح ويانه... 

الطريق كله ساكتين كلمن همه شكل حتى نرمان جانت خايفه وايدها على كلبها لايعرف فهد بعلاقتها ويه هجان ، حسب ما سولفتلي اكو تطور قوي بعلاقتهم.. 

وصلنه صف السياره ادهم ونزلنه كلنا سوه ، بيتهم جبير وحلو احله من بيتهم القديم وحتى منطقتهم ارقه من القديمه.... 

دخلنه للبيت جانت بس امهم سلمنه عليها فرحت بجيه ادهم وفهد كامت تهلهل وتضحك وتبجي فرحانه بيهم بس من شافتنه اني وايفين كلبت خلقتها صاح فهد على ايفين 

فهد : ففه بوسي الغاليه ..

ضحكت ايفين وتقربت من امه باست راسها ودنكت على ايدها باستها هيه سحبتها مقبلت وابتسمت بوجه ايفين تقرب فهد شاور امه ضحكت وكامت تهلهل حضنت ايفين وبعدين حضنت فهد كامت تبجي ،

 رحت سلمت عليها ردتلي السلام احسن من قبل ارتاحيت نوعآ ما ، اول ما دخلنه للبيت فهد كال رايح لابويه ما اتأخر.. 

راح واحنه كعدنه بالاستقبال بعدين رحنه للمطبخ بلشنه نسوي اكل لان كالت راح يجون اقاربهم على عشا ... 

طلعنه قسم من الاكل للغده ، والباقي للعشا لان سوينه كميه كبيره من الاكل حسب العدد الكالت عليه.

للعصر كاموا يجون اقاربهم يسلمون ويدخلون جوه بعدين اجه فهد وابوهم ، الاب جان عصبي وفهد يهدأ بيه ، هيج حسيت بعد ماعرف ، دخل للبيت وكدام الكل ، طلب من ادهم طلب خلانه صافنين.. 

يوسف : هاي كدام الكل احجيها سيلين تضل على ذمتك تنسى ابوك وماريد اشوفها بيتي.. 

ادهم حسيته انحرج كلش لا يكدر يجاوبه ولا يكدر يسكت عينه اجتي عليه ، كام بهدوء تقدم باس راس ابوه وكله.. 

ادهم : على راحتك حجي طالعين ولا يهمك.. 

فهد : حجي انه شحجيت وياك؟ 

يوسف : اسكت انت معليك لو ما مرتك حامل هم الزمها الباب منين جايبيهن وصارن نسوان براسي..

ايمن : يابه ليش هيج تسووي وتكسر فرحتنه. 

يوسف : تعرفون رأيي كلش زين عليش تحطوني امام امر الواقع.. 

تقرب ادهم مني جر ايدي وطلعنه كبل للسياره لحكونه فهد وايمن ، فتح الباب الامامي وصعدني التفت على اخوته . 

ادهم : ما ارجع كتلكم لتلحون.. 

ايمن : تخرب فرحتي ادهم.. 

ادهم : تفرح على حساب كرامتي وكرامه زوجتي شلون ترضاها نضل وهو طردنه كدام الكل. 

فهد : والله حجيت وياه قبل لا نجي وفهمته بس هو معاند تعرفه. 

ادهم : الله يهديه شسويله.. 

حاولو وياه مقبل قفل اله نرجع ، رجعنه والطريق كله مريم تبجي تريد تحضر العرس وابوها على اعصابه كل شويه التفت عليها احجي وياها علمود تسكت وماكو ضلت تبجي الى ان ابوها عاط بيها يلا سكتت.. 

وهاي اول مره يسويها ادهم.. 

وصلنه للبيت ساعه وحده ونص بليل.. 

فات للغرفه سد الباب واني رحت يم مريم نيمتها ونمت يمها لان ضلت تبجي...

 هاي اول مره من تزوجنه انام بره الغرفه والغريب ادهم ما اجه وسأل عليه لعد شكد متأذي من الصار.. 

ساعه خمسه الفجر كمت من يم مريم ورحت لغرفتنه لكيته كاعد يشرب جكاير .. 

تقربت وكعدت يمه...

سيلين : شنو منمت.. 

ادهم : لا 

سيلين : راسك هسه يوجعك . 

ادهم: ميهم... 

سيلين : اسفه. 

باوعلي عاكد حاجبه.. 

ادهم : على شنو تتأسفين. 

سيلين : لان الصار من ورايه.. 

ادهم : شعليج انتي .. 

سكتت وره شويه ردت اغير الموضوع سألته..

سيلين : شوكت تسافر.. 

جر نفس قوي وكال.. 

ادهم : بعد يومين .. 

سيلين : لتشيل هم ان شاءالله كلشي تريده يصير ونرتاح.. 

هز راسه ساكت ويشرب بالجكاره.. 

مرت اليومين على اعصابنه هو ضايج ومتوتر واني ما اقل عنه بالتوتر ، 

اجوي عمال شالوا اغراضنه و نقلناهن بيت ادهم القديم يعني راح نكعد ويه فهد وايفين ، اني ونرمان حزمنه كلشي قبل عرس ايمن لهذا الشيله صارت سهله كلش.. 

خلص عرس ايمن ورجعوا فهد وايفين ونرمان ، التمينه كلنه بالهول وكعد ادهم يحجي ويوصي بينه لان باجر سفرته...

ادهم : فهد انت رجال البيت والبنات بأمانتك بنتي وزوجتي واختي وزوجتك لتخلي بالي عليكم الله يخليك.

جر نفس فهد وكال. 

فهد : راح تسافر ادهم؟ 

ادهم : مو تدري راح اسافر . 

فهد : وابني شلون ، يعني راح تروح وبعد ما اشوفك ابني منو يرجعه اليه. 

ادهم : سويت العليه وكلشي كدرت عليه سويته شسوي اكثر.. 

فهد : عاشت ايدك ماقصرت وبالنسبه للبنات لتشيل همهن يمي.. 

ادهم : ماعندي حل ثاني وبس انت عندي اتمنى ما انخذل منك. 

فهد : وسفه انه اخذلك .. 

ادهم : اتمنى تمشي الامور مثل ما احب .. 

حجاها وجر نفس قوي.. 

فهد : لتشيل هم... 

ضل ادهم يوصي بيه هواي وهو يهز راسه ، ايفين كلش كيفت بجيتنه وضلت تضحك كل شويه تحضني عفناهم وحدهم وطلعنه للمطبخ نسوي عشا ... 

ورة شويه اجه فهد للمطبخ صاحني وطلع للحديقه تبعته ..

سيلين : ها فهد خوماكو شي.؟ 

فهد : تعاي احاجيج 

سيلين : شنو كول ضل بالي. 

فهد : تعاي كعدي شبيج. 

سيلين : ادهم وين ؟ 

فهد : فات يسبح. 

سيلين : ها زين.. 

رحت كعدت كباله.. 

فهد : سيلين انتي اختي وصرتي بمسؤوليتي واريدج تتطمنين لتخافين مني ابد تره انه مو سيء والله. 

سيلين : اعرف بس مرات تصرفاتك شويه تخوفني على ايفين..

فهد : صدكيني انه ماجنت هيج انه جنت احب الناس كلهم واساعد الجبير والصغير ، تره ماكو انسان سيء من فراغ وماكو دخان بدون نار انه تكوينتي السيئه جانت من فعل البشر وراح اتعالج وانتي شاهده على علاجي. 

سيلين : هاي شنو اني شعليه ههه. 

فهد : اريدج انتي ويايه تجين للدكتور وتشرفين على مرحله علاجي.. 

سيلين: ومنو كال ادهم يقبل.. 

فهد : يقبل انه حاجيته هسه ورحب بالفكره. 

سيلين : هاا اذا هيج زين. 

فهد : شكرا سيلين.

سيلين : على شنو؟ 

فهد : لان وافقتي. 

سيلين : عفوا ماسويت شي من رخصتك..

فهد : غاليه يابه غاليه. 

عفته ودخلت جوه التمينه على العشا بعدها صعدنه لغرفتنه القديمه بس الجربايه مرتبه الكنتور بعده ما مشدود والملابس بالجنط بس جنط ادهم رتبناهن ملحكت اسوي اي شي.. .. 

تمدد ومددت بصفه ضل يوصي بيه هواي ويحذرني من هواي شغلات جان يحجي والخوف بعيونه .. 

للصبح ضلينه كاعدين ونسولف بس الحزن مخيم على ملامح حديثنه ... 

صار الصبح كمنه هو راح سبح واني نزلت حضرت ريوك نزل والجنط بيده شفتهن غصيت عفت كلشي وركضت حضنته.. 

حضني قوي غركت بحضنه رفع ايده يمسد براسي..

ادهم : سيلينه ماحب الوداع تره كوه لازم نفسي .. 

سيلين : شلون راح اصبر شلون راح اتحمل شلون راح اعيش ماكدر ماكدر والله.. 

ادهم : حبيبتي اريدج قويه ما تنحنين بسهوله .. 

سيلين : يعني ضروري تسافر يا ادهم ضروري تعوفني.. 

ادهم : غيابي هذا مكتوب ولازم نشوفه بس فكري راح نعيش حياه جديده وحلوه نلتقي بأصدقاء جدد نصنع حياه حلوه تختلف عن حياتنه هنا تكملين دراستج هناك تدرسين لغه اسويلج عمل خاص بيج هواي امور اكدر اسويها وناخذ بيها راحتنه.. 

بجيت بهدوووء ... 

رفع وجهي مسح دمعتي بطارف اصبعه باسني بعيوني. 

سيلين : يكولون البوسه من العيون فراك ليش بستني منهن.. 

ابتسم وكال ..

ادهم : هاي خرافات حبيبي انه كل يوم الصبح ابوسج منهن ، وشحده الفراق يدخل بينه غير اموت . 

سيلين : اسم الله عليك تعال تريك. 

ادهم : ما اشتهي راح اشرب جاي وكعديهم اسلم عليهم حتى اروح ومرايم اذا ماكعدت عوفيها لان بوستها الصبح فتحت عينها حضنتني ورجعت نامت عبالها رايح للدوام..

سيلين : اي افضل هسه تكوم تبجي. 

ادهم : اي . 

رحت كعدتهم نزلو سلمو عليه ورافقوه للباب اني مكدرت ضليت واكفه باب المطبخ وهو واكف باب الشارع عينه عليه يريد يروح وكلبه مينطيه رجع فات للبيت حضني وهمس باذني. 

ادهم : وتيني لتبجين اتعب واذا تأذيتي تأذيني انه هم خليني اروح مرتاح ولو متأكد ما راح ارتاح اذا ما جبتج يمي ، امانه ديري بالج على نفسج وعلى مرايم واي خطوه تريدين تخطيها بلغيني قبلها ، وبالنسبه لدوامج اجلت السنه اذا شفت نفسي اكدر اسحبج قبل ست اشهر لترجعين للدوام واذا طولت داومي حتى تلتهين شويه والدوام يهون غيابي عليج.

سيلين : صح. 

ادهم : مع السلامه حبيبتي ديري بالج ماوصيج. 

مسحت دموعي وكتله.. 

سيلين : توصل بالسلامه عود خابرني اول متوصل. 

ادهم : اكيد شلون لعد. 

رجع حضني وطلع دخلت جوه مكدرت اشوفه من يروح فهد اخذه وصله للمطار.. 

وبلشت رحلتي بدونه..

الفصل الستون من هنا 

شكرا لزيارتكم عالم روايات سكيرهوم