رواية لست خائنه الفصل الخامس 5 بقلم انين الليل

رضوى

يلتمن عليه مشتتات البال 

وانفضهن نفض وانهض ولا چني 

وليت وعف ضميري وما كسرت العود 

ولسن شبه الزلم بالعلن سبني 

لازحت الحيا ....لاضيعت معروف 

ولا خنت الوفا وربعي اجفلوا مني 

اضحك بالوجوه بغير راحة بال 

واصبر لو ليالي العسر ضكني 

💔💔💔💔💔💔

سلام 

دخلت للبيت من بيت عمي طاهر شفت البيت فارغ اتذكرت اليوم جمعه واكو معاريس بالبيت 

باوعت الغرفة فواز ردت ادفرها وادخل احركها عليهم بس لزمت نفسي دخلت الغرفتي وطلعت فلوس 

ورحت العمي طاهر وكتله

عمي ذن الكوثر والعرس أريده يوم الإثنين 

طاهر //لا عمي ما يلحكن 

::عمي يلحكن والنقص يكملنه وره الزواج 

طاهر/:خلي اسالهن وانت ليش ما تدخل للبيت شتسوي بالديوان مو عقدت شنو

اول مره تجي البيتنا

ودخلت ويه عمي طاهر وصاحب وانا احس بنفسي مذبوح تلكتنني صبيحه هلهلت وباستني بخدي

طاهر كلها //ام صلاح سلام مستعجل يريدها يوم الإثنين وانا اكله أجلها 

صبيحه //يا طاهر ليش اياجلها اشو كل شي حاضر والنقص يكملونه وره العرس(لزمتني صبيحه من ايدي )

تعال يمه رووح العروستك واليوم العصر اطلع انا وياها واجهزها وانت طاهر دز واحد

من الولد يجيب سمج مشوي ما لحكت اطبخ تلوهت على سلام

ودخلت لكيت كوثر كاعده وهي مبدله من شافتني دنكت انا سلمت وكعدت يمها كوه أجر النفس كتلها

مبروك 

كوثر بخجل /:الله يبارك بيك 

انا سكتت هي بادرت 

كوثر/:سلام صدك العرس الاثنين 

::اي الاثنين 

كوثر/ بس ما الحك جنت حابه اسوي حفله بقاعه وين نلحك نحجز ما نحصل

::ولا يهمج نحصل ما عليج

لا سلام صعبه ما نحصل 

::بالفلوس كل شي نحصل 

ولزمت التلفون وخابرت فارس كتله ::شوف لي حيا الله قاعه وأتفق وياهم على كل شي وشگد ما يردون ادفع 

فارس //انت من كل وعقلك تريد لك قاعه يوم الإثنين منو ينطيك حجز 

هسه انت شوف 

اكلك سلام المن 

::الي زواجي الاثنين يالله بعد أخوك 

وك سلام لا تتهور شنو زواجك الاثنين على كيفك ويه روحك فكر زين خاف بعدين وتندم 

--انا حاولت افهمه ما اكدر أرد --

::العصر يمك فارس بس انت لا تقصر

كعدنا اتغدينا كلنا أبيت عمي طاهر إجت عطاء وسهير وعمي صاحب وكعدنا نتغدا سووا كوثر

كعدت بصفي وتتعمد، تمسني عطاء كعدت يم ابوها مبين عليها الحزن والانكسار ابد ما

باوعت بوجهي وبيت عمي طاهر رغم الموقف بس فرحانين خصوصا صبيحه وكوثر انا

ما أكلت قليل لان ما أشتهي شربت جاي وطلعت كتلهم عندي شغل ورحت للشقه واجاني فارس

1

فارس/:شنو سلام شنو قضية القاعه الي تريدها يوم الإثنين 

اي فارس دبرها شلون ما كان 

فارس/:سلام المن 

شبيك فارس كل ساع اعيد الي انا راح أتزوج الاثنين قبل ساعه عقدت على بت عمي 

فارس/:سلام لاتتهور عبالك تنتقم من فواز او ،،بس تره انت جاي تنتقم من نفسك 

سلام متعجب ::فارس انت شتحجي منو كلك 

فارس/:انت سلام البارحه من صرت تشرب وتبجي وتحجي شي صار وشي ما صار وانا 

مو غريب بس اكول انطي نفسك مهله وأسمع من كل الأطراف 

جريت حسره ::فارس يا أطراف شفتهم بعيني اخوي وخطيبتي تعرف شنو 

فارس/:اي اعرف سلام بس هم لازم تعرف شنو السبب وليش 

::بعد ما يفيد راح أتزوج بت عمي وكل من يذكر صاحبه بالخير 

فارس/:اتجذب سلام انت جاي تجذب ولا راح تنسى ولا تتخلى عن ثارك صاحبي واعرفك 

بس اكلك شغله وحده راجع نفسك وأسأل عقلك وكلبك راحو يدلونك

جاوبته بقلة صبر ::فارس كوم رووح احجزلي قاعه أريدها قسمين للنساء والرجال واتفق على العشا انا 

ما أعزم بس الأقارب والأصدقاء يعني ما الحك بس ثاني يوم راح اسوي عزيمه جبيره وانا هم راح اطلع 

اشتري ملابس وقاط لان ما الحك أفصل 

فارس /:ولو اشوفك استعجلت بس صار تدلل سلام 

وطلعنا فارس يدور على قاعه وانا رحت اشتريت ملابس ورحت ع الشط كعدت وانا احس بكلبي خاوي

صدكوني اريد أصرخ واحجي ويه روحي

::ليش تخونيني ليش ولج احبج وانتي بعدج ما مسجله بالمدرسه احبج من جنتي تسوين كصايب

ومن كبرتي وانا وياج واحد ما مفارك الثاني حتى من اوصلج للمدرسه تكليلهن هذا خطيبي 

ليش هيج غدرتي بيه انا الخاطرج بيت عمي طاهر ما شايفه هاي خمس سنوات لان ادري بيج

تضوجين من كوثر وادري بكوثر تكرهج وتغار منج لان احبج وانا اضوج من كوثر على مودج 

تالي راح اخذكوثر واسويلها كل شي حلمنا بي سووا وكدامج

صرت ابجي ابجي من القهر واكول 

بس يا فواز ما انسالك هذا الشئ لو أموت لازم انتقم منك ومن ذيج الحقيره 

صعدت سيارتي والمسجات ما بطلت اعرفها من كوثر فتحتها

أحبك 

اموت عليك 

انت حياتي 

انت جنوني 

انت حلمي 

انت كل شي بيه فرحي وحزني 

انت مليكي وانا الحبيبه الصابره

هاي كانت كلمات كوثر وأكثر وأكثر بس انا روحي خاويه ما أفكر بشئ صرت ابجي لان 

المفروض هذا الكلام تكتبه الي رضوى لا تكولون حرام زوجة أخوك وعلى ذمته بس همه الي بدو 

والبادي اظلم

اجتني رساله من نقال رقيه قريتها 

(سلام انا رضوى والله بريئه انا مو خاينه والأيام تثبتلك بس رد وانا افهمك لا تظلمني سلام )

مسج ثاني (زين روح اسأل فواز حلفه الله عليك سلام الحقيقه عد فواز لا تضيعني وتضيع نفسك )

من قريت الكلام ودي الزمها واشرب من دمها بس ليش تكتب لي من نقال رقيه ليش وين نقالها 

بقيت اسب واشتم وانا بالسياره مختنك ما اعرف شسوي ظليت افتر مره انزل من السياره 

ومره أصعد وامشي بيها ما اعرف وين بعدين قررت ارجع للشقه وصلت تقريبا 

الساعه بالوحده الصبح حدي ضايج لاكاني فارس لزمني بادينه على إجتافي وهو يكول //

سلام كلي وين جنت صار مية مره اتصل وانت ما تجاوبني

انا ما جاوبته دخلت للغرفه وكعدت بالكاع بالزاوية وانا احس بروحي تريد تطلع صرت ابجي اجه فارس 

وكعد مقابيلي كلي //ليش سلام ليش هيج تسوي بروحك تره انت جاي تنتحر انتحار بطئ 

انا بس باوعت وما حجيت 

فارس //إلى متى ياصاحبي اذا هلكد تحبها ليش ما سمعتها خليها تدافع عن نفسها 

جاوبته بحرگه ::لا شنو تدافع عن نفسها ولك شفتهم لا فارس رضوى وفواز أعدائي ولازم انتقم منهم 

فارس/:منين تنتقم من أخوك وبت عمتك سلام لاتفكر شلون تنتقم فكر ليش همه هيج سوو

بقيت أفكر بكلام فارس ونسيت حتى نقالي بقى بالسياره بقيت استرجع ذكرياتي ويه اخوي وحبيبتي قصدي

 زوجة اخوي الي خانتني بدء شريط الذكريات انا أتذكر ما بيوم هي باوعت الفواز

غير مثل اخوها لو هو الي جان يكتل بولد عمي طاهر لمن يكولون ندافع لأختنا قصدهم 

كوثر وهو يضرب بيهم 

لو من وكفهم بالشمس وما خلاهم يدخلون لمن ما اجه ابوي ولكاهم

محموسين بالشمس وهو يبجي وابوي يسأله ليش بابا طارد ولد عمك وموكفهم بالشمس وتبجي

فواز //بابا ابجي على اختي على رضوى يعني لو ما انا اخوها هذوله شيسوون بيها بس

إله اموت اي واحد يوصلها اموته خلاص

  :: يمكن حباها لان نصب نفسه أخ عليها زين هي ليش قشمرتني ليش وهمتني بالحب 

   :: اذا تحبه ليش تضوج من تشوف كوثر لو تباوعلي بنظره اووف منج ياحقيره قشمرتيني اله انتقم منج 

وبقيت هاي حالتي يمكن للصبح 

نمت كعدت الساعه عشره وربع رحت سبحت ولبست ملابسي وطلعت ما باوعت النقال ظليت امشي بالسياره 

شفت روحي طلعت ع السريع وقررت اروح للنجف والنقال يرن وانا حتى ما اشوف منو يتصل وصلت تقريبا

 العصر كلش رحت للفندق اخذت حمام انا ابد كل شي ما مأكل من لمن اتغديت أبيت عمي طلعت رحت للأمام

 زرت وصليت وقريت قرآن واستغفر وانا احس بروحي فارغه ما اعرف شريد او شطلب حتى من وصلت

 يم الشباك الشريف بقيت ساكت وبس دموع ينزلن مني واحجي ويه نفسي

::معقوله ما عندي شي أطلبه من الله بجاه الإمام معقوله كل مشاكلي محلوله

خنكتني العبره وكلت 

::يا علي بجاهك عد ربك يا أمير المؤمنبين انا تعبان ومحتار مقهور وما اعرف شسوي وأريد 

المساعده منك سيدي انا تايه ساعدني دليني

بقيت تقريبا النص الليل وانا أصلي واقرأ قرآن احس بنفسي هدأت لكن بعدني مقهور دخلت مطعم أكلت شويه 

ما أشتهي وبعدين رحت للفندق وشفت النقال الي يمكن ما باقي احد ما متصل دزيت رساله العمي طاهر والفارس

 كتلهم بالزيارة الفجر كعدت صليت وطلعت للمقبره بالطريق اخذت ماي ورد وبخور وصلت يم قبر امي وابوي 

قريت الفاتحه ونزلت كتاب الله القرآن العظيم قريت سورة يس بعدين غسلت القبور وشعلت بخور وكعدت يمهم 

وانا مكسور خاطري من الي سووا وياي اخوي كعدت اسولف ويه ابوي وأكله

::شفت بويه شنو سووا وياي اخوي وعضيدي مو دوم تكلي انت حزام ظهر أخوك انت الزغير بس أريدك تدير 

بالك على فواز شفت بويه فواز غدرني وكسرني وخاني بأغلى شخص بحياتي يأبه فواز أخذ مني روحي أخذ

 رضوى صدك بابا لو مواخوي جا كتلته خلاص بس انا هسه مشبك بحديد والشابكني اخوي .

صرت احجي وانا أشهك من البجي بعدين رحت آلامي 

::يمه اكعدي احضنيني يمه مو انا وليدج مو انتي تكليلي انا من اموت مطمنه عليك

لان رضوى راح تعوضك عني وعن حناني مو انتي تكولين ما اريد كوثر لان خبيثه

تخليك تكره اخوك وما تحن علي ابشرج يمه سلام راح ياخذ الخبيثه يمه تره مو كوثر 

الي خلتني أكره اخوي لا حبيبتج الي فضلتيها حتى على بناتج

كسرت خاطري لا يمه مو بس خاطري كسرت كلبي انا اليوم مو بس جاي اشكي

همي جاي اعاتبج اي يمه اعاتبح ليش خليتيني احبها انتي يمه قربتيني متها اكعدي 

اكعدي شوفي شسوت بيه حطمتني يمه 

جريت نفس وهزيت راسي :: بس لا وغلاتج وغلات ابوي الا احطمها واحطمه 

هذا الي تكلولي عضيدي لا تزعلون علي همه اعدائي وانا اطلبهم بثار وثار چبيير اله احطمهم 

اله اخليهم يتمنون الموت وما يلگونه

بقيت كاعد يمهم ملابسي كلها تراب وانا يمكن بعد ما بقى دمع بعيوني كمت رحت من يمهم

بس رجعت درت على قبر امي وحچيت

::جنت اتمنى تكونين حاضره وياي ولو اعرف انتي ما قابله علي لان راح اخذ 

كوثر بس يمه تره حبيبتج وصديقتج وبنيتج خانتج قبل لا تخوني وكسرت كلب 

عطاء قبل لا تكسر كلبي 

:: سامحيني بالي راح اسوي ولا تزعلين عليه 

اتقربت يم القبر بسته ما صبرت صرخت حييل وانا احچي :: يمه ما اگدر اعيش بدون رضوى يمه 

چذب ما اكدر اكرهها يمه مو انا سلام الي تكولين انت وليدي الي الله راضي عليه وانطاك الي ادعيلي 

امووت واتوسدج ادعيلي يمه انا رضوى كتلتني من اخذت فواز وانا كتلت نفسي من اخذت كوثر

رجعت وانا محمل أحزان وقهر وصلت وانا ما رافع التلفون وراد على أحد وصلت للبصره الظهر 

دخلت للشقه وسبحت واجه فارس 

فارس/:سلام شنو الكاميرا الخفيه تختفي وترجع 

::فارس مو كتبت الك انا بالزياره 

بعديش بعد ما نشفت دمي ياالله عمي شكول الزياره مقبوله 

رحت يمه كتله ::فارس انت الأخ الي ما جابته امي 

فارس لزمني من جتفي وكلي //انا أخوك وصاحبك بس يبقى فواز هو أخوك الي لازم 

ما تعوفه لو شما يصير 

::صحيح كلامك بس لازم تعرف الأخ الي يخون ما يتسمى أخ وانا فواز دفنته من اول البارحه (جريت نفس )

   هسه عوفنا شسويت 

فارس/:ما خليت قاعه تعتب علي كلها محجوزه بس تالي لكيت وحده لأغين الحجز لان صايره عدهم حالة وفاة 

:: اي زين واتفقت وياهم 

فارس /:اتفقت على كل شي ولا يهمك سدك امين 

اتصل عمي طاهر انا رديت ::هاء عمي 

  طاهر/:شنو وينك 

     :: هسه توني وصلت 

طاهر/:اي غير تجي 

      :: عمي باجر بالزفه يالله اجي اريد اروح الحلاق وارتاح شويه (ما خليته ايجاوبني )صدك كفت الفلوس 

لو ادز الكم 

طاهر/: كفت وزادت وانا اتفقت ويه الطباخ على غدا يوم ثاني 

::طال عمرك ولاتنسى خلي صلاح يحضر سيارتين كبار للناس الي تحب تروح ويانه للقاعه

   طاهر/:صار تدلل اكلك عمي غير تخابر خطيبتك خطيه من أمس ما خلت شي بحلكها بس عينها ع النقال وكل شويه 

         تگلي بابا خابره شوفه وين 

         اتنفست :: ها اي عمي انطيني إياها 

       هاك وياك 

  :: هلا كوثر 

    كوثر/:هلا سلام وينك انت 

      :: مو فهمته العمي رحت للزياره اكلج كملتي

كوثر/:اي كملت والنواقص بعدين بس المهم حجزت قاعه 

::اي حجزت هسه ادز اسمها بمسج وانتي شنو تحتاجين اصرفي ماشي وانتي حجزتي صالون 

كوثر //اي حجزت والبدله هم بس شويه غاليه 

::الغالي يرخصلج اصرفي ولا يهمج 

كوثر/: صار حبيبي 

::يالله ارتاح شويه لان وراي كومه شغل 

كوثر/:بااي حشتاقلك 

::انا هم

صحت على فارس كتله انطيني اسم القاعه والعنوان ودزيته بمسج ورحت للحلاق وفارس كلي لازم 

تنام وترتاح وطبعا عزم أصدقائي الي گالو شنووهاي يمته خطب يمته عقد 

وثاني يوم وره الظهر اجو أصدقائي وصارو يهوسونلي لكن انا ما جنت فرحان

 واباوع وگوه اتصنع الابتسامه بصراحه جنت اتمنى فواز يكون يمي ويهوسلي بعدين نفخت لان اتذكرت 

همه ابيتنا متونسين وهو ما فكر حتى يوضحلي وانا مثل اليتيم لا اب ولا اخ جريت نفس وصعدت سيارتي

 الي زينوها الي أصدقائي وصعد يمي فارس ونزلت تلكاني عمي صاحب وعمي طاهر جان لابس عكال وجفيه 

   وبشت طالع شيخ حضني ودخلنه لكيت كوثر كاعده ويمها امها وبنات خالاتها وبنات خوالها 

  وشفت عطاء تدرون جنت مقهور ما ادري على نفسي ما ادري على عطاء الي مبين الكسره على وجهها 

والخذلان من اعز اثنيين خانوها 

     اما سهير مبدله وفرحانه عبالك هي العروس من گد ما خاله مكياج ومعتنيه بتسريحتها 

كعدت يم كوثر وانا حتى ما باوعت الها عمي كلي //يالله بابا أخذ عروستك واتوكلو الله يهنيكم 

لزمتها من ايدها هي لزمتني حيل ما جانت مرتبكه احسها لازمه ايدي مصره تكول

    - - صرت الي انا حاربت واخذتك وما اعوفك

صعدنا انا وياها بس الطريق كله واحنا ساكتين وصلنه للقاعه وهناك دخلنه انا وياها تعجبت

يمته اختارت الموسيقى والميز والكيكه وهواي أشياء انا بس كعدتها بالكوشه طلعت 

بعدين ما اجيت إلا لمن رادو يزفوني بس قبلها شغلوا موسيقى وخلونه نركص انا وياها شويه

ما تحملت وكعدت بس هي بقت تركص يمكن من وصلنه الحد مازفونه وهي بس تركص 

رحنا للفندق 

جنت ادور بين المدعوين ردت اشوف فواز ومرته بس ما شفتهم ورحنا للفندق أصدقائي

وكرايبي ما قصرو وياي خصوصا اولاد عمي طاهر ولا جنهم اخوان العروس وصلنه للفندق

وصعدنا انا وكوثر وأمها وسهير خلو جنطة ملابسنا وراحو بعد أن اتمنولنه حياة سعيده 

صبيحه تتعمد تحاجي بتها بصوت عالي وتسمعني //

      ماما كوثر عيوني ربيتج وتعبت عليج وكتلج أهم شي الشرف وأن شالله صنتي شرف ابوج واخوانج 

واريد تصونين شرف رجلج وديري بالج علي رجلج تره سلام يستاهل كل خير 

داري واسمعي كلامه وكل شي يكوله تكليله تم

انا من سمعت هيج رحت بستها برأسها وبقيت بس انا وكوثر كعدت يمها بعد أن

نزعت البرنص بقت بس بالبدله هي حلوة مقبوله او يمكن حلوة كلش لان انا ما منتبه 

بس الوحده بحياتي لكن كوثر صارت أمر واقع وذيج صارت حلم لا مو حلم جيثوم على

صدري ما يقبل ينزاح 

اقتربت منها كتلها 

كومي غيري ملابسج انا راح اطلع بره 

هي ردت بهدوء //بس أفتح السحاب

فتحت السحاب وطلعت بره عشر دقائق وانوب رجعت للغرفه لكيتها لابسه بدلة نوم بيضه 

كلها اغراءات هي باوعتلي وكالت انا جوعانه انت ما تريد تأكل 

وكعدنا واكلنا جان فارس موصي ع العشا وحلويات وعصائر عبالك عدنا سفره مدرسيه هي اكلت 

بشهيه ما اعرف ليش تذكرت ذيج الخاينه وهي تضحك وتكلي 

رضوى/:هاي بت عمك يوم عرسهالازم تحضرون اسعاف وفصل 

انا اضحك واكلها ليش بالله 

لان يتراوالي ما مصدكه تتزوج اكيد راح تروح للصالون من السبعه الصبح وبس متريگه واكيد ما تاكل بس شويه 

وكت الغدا لان تبين للناس هي ماتشتهي فمن ايزفوهم ويجيبولهم العشا ما ايكفيها تروح ع العريس تاكل من عنده 

ايد او رجل 

اتخيل سلام يجوونكم الشرطه ولازميها وهي متلذذه بالاكل وهذا المسكين يصرخ 

 بوكتها رديت وانا اضحك :: ولج شبيج شنو هالخيال حتى نفسي لعبتي 

   - - صرت تتخيلها شلون ملغمط حلگها وهي اتگول گعانه يابابا

انا ابتسمت رغم قهري وانا اشوفها گدامي ووهي تعيب على كوثر 

لو من تتخوصر وتهز بايدها وراسها وتعيب على صبيحه 

ا. اباوع الكوثر واشوف رضوى وراها واگفه وتعاتبني ليش اخذتها واكفه ودموعها يجرن على خدها وشفايفها ايرجفن 

صرت احجي ويه نفسي وانا مغمض عيوني 

::اووف ياربي غير تروح صورتها من كدامي هاي شتريد مني مو خانتني مو كسرتني ليش واكفه وتعاتبني

دنكت وهزيت راسي رحت غسلت وهي همه بعدين كعدت بصفها اتدنيت لزمتها من جتفها وحجيت وياها

        :: كوثر انتي تدرين بالي صار يعني كله مكشوف انتي هسه صرتي زوجتي ولازم تحتويني

    وتطلعيني من الشي الي مر بيه لان الي صار مو قليل اريدج تسمعين كلامي

    وما اريد اي شي يصير بيناتنا يطلع الامج او اختج وأول شي --كمت طلعت شيت حبوب --

    كوثر هاي حبوب مانع يوميه تاخذين وحده -هي باوعتلي باستغراب -

     لا تفهميني غلط انا مو ما اريد أطفال لا بالعكس اريد واريد لان انا صفيت وحيد بس ما اريد 

   يصير عدنا أطفال واحنا كاعدين بذاك البيت لازم اطلع بيت ابحدي واستقل بحياتي وتصير عندي 

  فلوس أكثر من فواز هاي انا وهاي انتي تقبلين احطج على رأسي ما تقبلين شهرين يا كوثر

    اطلكج لان ادري بيج انتي شكد حاولتي على مود تأخذيني وتفوزين بيه ادري واعرف 

    لمن جنا ازغار وتتعاركين وياها لو تخلين اخوتج يضربوها لو من عطلت السادس علمي على

  مود تدرس وانتي بالكليه خفتي خاف تطلع طب او صيدله صرتي يوميه تجين انتي واخوتج

    وتتعاركين وياها او وين ما تروح تودين اخوانج يتحارشون بيها على مود ترسب وسويتي

   اهواي اشياء هسه انا صرت الج وهسه يابت الناس انا كلي الج والي انتي تكرهينها أخذتيني منها 

بجداره وهذا الشي يمج متوقف عليج توافقين على الكلام الي اكوله تمشي حياتنا ما توافقين ما اجبرج 

كل شي يرجع المكانه

كوثر كامت كعدت وراي وحضنتني من ظهري //سلام انت الحلم الي حاربت رضوى على مود 

افوز بيك وما قطعت الأمل جنت مستعده اسوي المستحيل على مود اخذك وهسه انت الي

تدري شنو اتمنى 

:: شنو 

اتمنى تكوم وتضربني على مود أتأكد انت صرت ملكي وشتريد اسوي والي تكوله أمر انت السلطان وانا الجاريه 

::لا انتي اذا سمعتي كلامي راح تصيرين اميرتي 

كوثر /:تدري بيه احبك لا شنو احبك انت جنوني وعلى مود تعرف انا ما اخلف الك كلمه 

هاك بايدك شربني الحبايه يوميه اخاف تكول ما اشربها

بكلامها وطاعتها جبرتني اخذها وصارت كوثر زوجتي من اخذتها كوه حبست دموعي لان اتذكر

ذيج الخاينه والي المفروض تكون مرتي لكن خانتني ويه اعز الناس ويه اخوي وهسه مو بس هي عدوتي 

لا هي واخوي الد اعدائي والي لازم انتقم منهم لو هذا الشي ايكلفني حياتي 

نمنا وكعدنا انا ابد ما غمض الي جفن نار بگلبي تسعر ما اعرف شريد لو شراح اسوي كل 

الي اعرفه انو انا تزوجت عدوة رضوى وهاي اول ضربه الها بس الي قاهرني اكثر فواز ليش ما اجه 

اعرف بي لو مو غلطان ويعرف بزواجي راح يجي وغصبن ع الكل بس ما اعرف 

اكيد هيه ما خلته يجي اي اكيد 

كعدنا سبحت هي قبلي وانا بقيت اباوع النفسي

إجت حضنتني وكالت //يالله حبيبي روح اسبح 

دخلت للحمام فتحت الماي وانا ابدي اصرخ لكن لازم نفسي كوه بس ما لازم دموعي الي اختلطن بماي الدوش

طلعت بدلت واتريكنا وطلعنا للبيت وبعقلي الف سؤال وصلنا شفنا ناس دخلت السياره للكراج

واجو ذبحو على رجلها ذبيحه قبل لا تدخل للبيت رحنا نمشي وانا عيوني تباوع هالمره اريد اشوف فواز 

لكن ما شفته دخلنه من باب المطبخ تلكني أخواتي

زينب وغدير يهلهلن ويبوسن واجن خالاتي وعمتي ام مقداد بس عمتي عليه ما موجوده بيني وبين نفسي 

       :: طبعا ما تجي قابل الها عين تراوي وجهها وره سواية بتها 

      دخلت للمطبخ وقبل لا نوصل للصاله شلتها وهي خاله اديها بركبتي وتضحك 

ودخلنه للصاله جانت جبيره وبيها غرفه الي وغرفتين اخذهن فواز فتحهن على بعض انا شايل كوثر والبنات

 يهلهلن ويشمرن جكليت وانا افتر بيها وكوثر حاضنتني وتضحك بصوت عالي وادور شفت وحده على كرسي

 متحرك وجهه مورم وصاير جدمه زركه ومجبسين ايدها ورجلها وعمتي عليه تدفع بيها 

انا شايل كوثر وعيني بعينها جانت رضوى وهي تباوعلي ما ادري تباوع النفسها