رواية جذبني فمك البني الفصل الثالث والستون 63 بقلم عبير إدريس

أنني احبكِ رغم انف قبيلتي ومدينتي وسلاسل العادات. 

ادهم.. 

عن اي حب تتكلم الذي اطفئ نصف سنيني

سيلين 

__________ 

سيلين : فهدددد 

ابتسم واشرلي بأيده بمعنى تفضلي كعدي.. 

ضليت صافنه بوجها بعدين التفتت ورايه ادور نسرين وينها بذهول وشرود ذهن عيوني تفتر على الناس الكاعده.. 

بدون كلام رجعت ليوره وسرعت خطواتي مغادره المكان طلعت وهو يصيحني بصوت مسموع سيلين لحظه سيلين واني مستمره اريد انهزم منه ماريد اشوفه ولا اسمع صوته هو السبب بدماري واذيتي هو... 

وكفت بالشارع راسي افتر الصدمه نستني اني جايه بسيارتي وكفت على شارع العام اريد اوكف تكسي انسحبت من ساعدي التفتت عليه خزرته جريت ايدي ونترت بيه.. 

سيلين : انت شنو وتلزمني ولي من وجهي.. 

فهد : احاجيج ماريد منج شي. 

سيلين : ماريد احجي وياك ولا اسمعك انت انسان قذر ولئيم واناني وحتى مريض.. 

فهد : شتحجين احجي المهم جايج بشغله مهمه اسمعيني. 

كمت اصيح بصوت عالي. .. 

سيلين : ماريد اسمعك ماريد اتنفس الهوه الانت تتنفسه لان محيطك ملوث عوفني ... 

فهد : منا العالم سكتي بس احجي وياج ماعندي شي.. 

سيلين : وينها ؟ 

عكد حاجبه وكال... 

فهد : منو؟ 

سيلين: تعرفها شريكتك.. 

فهد : انتي شكاعد تحجين.. 

سيلين : لتغشم روحك انت منو منهم محمد رامي وشدخلك بحياتي.. 

فهد : شاءت الاقدار ايتها الهاربه ان التقي بك من دون ادنى تخطيط. 

حجاها مستهزء يضحك... 

سيلين : ولي من وجهي قذر ... 

مشيت سريع لفحتني نسمات الهواء العليل وكأنها تزيح الهم عن كاهلي ، امشي واردد بصوت مسموع الهي تعبت الهي ابعده عن طريقي مشيت بدون هدف ماعرف وين رايحه سحبني من جنطتي وكفت غصب عني لان ردت اوكع ، جنه واكفين بشارع فارغ التفتت عليه وكلبي نار.. 

سيلين : شبيك انت شبيك عوفني منين طلعتلي من الله لا يوفقك .. 

فهد : احجي وياج اذا ماعجبج الحجي روحي. 

سيلين : وشلون تريدني أأمن بيك بعد ما غدرتني. 

فهد : من احجي وياج راح اقنعج وتأمنين بيه.. 

سيلين: هههههه اي هاي طريقتك بالاقناع تجيدها وبأحترافية... 

فهد : اعرف اذيتج واعرف تعبتي هواي بس صدكيني مضطر.. 

سيلين : مضطر خليت الدنيا كلها تبيعني والكل من حولي يهجرني واعيش وحيده ومريضه واعيش ألم الفقد والغربه ليش ليش شسويتلك اني خليتني بنظر زوجي واهله والناس وحده خاينه وحقيره وباعت زوجها برخص.. 

فهد : امانه الله لتبجين جيت اساعدج.. 

سيلين : انت وياهم مو انت نفسك الساعدتني ولكيت شغل انت نفسك ابو التخاطر انت محمد مو احجي..... 

وسكتت خليت ايدي على حلكي وشهكت.. 

سيلين : يعني العشته والحسيته والسمعته كله انت مسويه؟ 

فهد : على شنو تحجين شبيج انتي انه اول يوم اتصادف وياج. 

ضحكت مستهزئه.. 

سيلين : تتصادف دكول والله. 

فهد : صدكيني انه تعبان ازيد منج ومتندم والله بس اسمعيني وماعرف عن منو تحجين وشنو قصدج صدكيني صدفه لاكيتج.. 

مشيت ورجع لزم كف ايدي جرني بأتجاها.. 

التفتت عليه وعطت. 

سيلين : لك انت شكد وقح لك لتلزمني لتنكس ايدي ولي مني عوفني راح الم الناس عليك. 

فهد : تضطريني اكللهم زوجتي واشيلج واروح اسكتي وخلينه نتفاهم.. 

سيلين : ههههههه لا وتحجيها بثقه.. 

ضيق عينه وكال 

فهد : كلي ثقه .. 

سيلين : هسه نشوف شلون تكول اني زوجتك. 

فهد : اوديج لادهم .. 

هزيت راسي ب لا ما مصدكته ولا اكدر أأمن بيه... 

ماعرف منين اجتني القوه وكمت اركض بكل سرعتي والتفت ورايه لكيته يمشي سريع وصلت للشارع العام جانو ناس واكفين تقربت وكفت يمهم ، من شافني صدك راح اسويها واعيط ابتعد او بالاصح ضل واكف بمكانه ، 

مشيت سريع بأتجاه سيارتي شبعدها صارت شكد ماشيه ومادري بروحي وصلت للسياره صعدت قفلت الابواب حتى ما ارتاحيت حركت السياره ومشيت سريع وصلت للعماره صفيت السياره ونزلت مشيت بخطوات تعبانه ومتثاقله بأتجاه الشقه طلعت مفاتيحي فتحت الباب بأيد ترجف ودخلت كبل لغرفه النوم شمرت نفسي ..... 

تسائلت بصوت مغلف بالبكاء ... 

فعلا راد يوديني لادهم لو هاي لعبه جديده ليش متحملت فكره انجمع بيه من شنو خفت منه لو خفت اشوف رده فعله واشوف كرهة ورفضه اليه لالا اضل بعيده افضل اعيش بحبه القديم ولا يتغير عليه ويأذيني ، 

نمت اني وذكرياتي لا املك شيئا الا البكاء ، ادهم حرمتني حتى من صوتك حرمت قلبي من الاطمئنان عليك وعلى وضعك ، متجاهل اتصالاتي ومحاولاتي بالاقتراب منك.. 

رغم حروفك القاسيه المعاتبه من اغلط بس جانت احلى من العسل على قلبي ارجع عاتبني وازعل عليه بس لتتجاهلني ولا تكرهني... 

رغم كلشي صار اني اشتاقيتلك شلون اوصلك تعبت وكلبي تعب ، انهاريت بنوبه بكاء هستيريه كمت ما اسيطر على دموعي منين تنزل.... 

كمت لزمت موبايلي اتصلت على نسرين كله مغلق عرفتها النذله وياه.... 

ايفين. 

جنت كاعده بغرفتي انيم بحمودي واندكت الباب جانت الساعه ١١ ونص بليل صحت منو اجاني صوت نرمان .. 

ايفين : تعاي حبي.. 

فتحت الباب وفاتت مبتسمه . 

نرمان : شلونه حبيب عمتو. 

ايفين : ههههه زين 

نرمان : يله ولك شوكت تكبر ونلعب اني وياك ونطلع سويه وتخبصني حتى اشتريلك العاب. 

ابتسمت.. 

ايفين : والله راح تفسدوه انتي وابوه ... 

نرمان : عيني هذا حمودي يتدلل بكيفه.. 

ايفين : لو تشوفين ابوه شلون طاير بيه ولج ينام بصفه ميقبل انيمه بمكانه . 

نرمان : اوي عيوني يعوض بيه فراك علاوي. 

جريت حسره شكبرها.. 

ايفين : لو تدرين شصار بيه يله نسيته وخليته يتخله عن فكره الانتقام.. 

نرمان : تدرين يعجبني اسمع شلون هيج احتويتيه وكدرتي تغيريه هذا فهد الصعب وحتى نصيحله مكار شلون هيج صار هادئ وسيطرتي على اعصابه وانفعالاته. 

تربعت كبالها وكعدت اخذت حمودي خلته بحضنها وارتاجت على الجربايه واني كبالها. 

ايفين : سمعي صارت هواي شغلات بينه وتقريبا زواجي منه جان غصب .. 

نرمان : شلون غصب اريد افهم هاي النقطه انتي جنتي تحبين ايمن شجابج على فهد.. 

ايفين : عوفج من هذا الموضوع هسه خليني احجيلج عن علاقتنه وبس. 

نرمان : ليش اكو شي جبير بينكم وتخافين تحجيه 

ايفين : اخوج يموتني اذا حجيت ميقبل اذا تريدين سأليه هو يحجيلج. 

نرمان : هلكد تخافين منه. 

بلعت دموعي الرادت تخوني وتنزل .. 

ايفين : اذا حجيتلج حياتي تتهدم. 

نرمان : لهدرجه ؟؟ 

ايفين : واكثر بعد.. 

نرمان : احجيلي جوز اكدر اساعدج. 

قاطعتها بضيق.. 

ايفين : اعتذر ما اكدر.. 

جاوبتني بصدمه.. 

نرمان : ليش احس مسوين جريمه. 

تنهدت بعمق وتجاهلت اسئلتها وكمت احجيلها عن حياتي احتاجيت احجي احتاجيت اعبر عن الاحساس البداخلي واوصف العشته بدون محد يسألني عن السبب ... 

ايفين : اخوج تزوجني على مصلحه وتحت تهديد وكل كلمه يحجيها وراها الف تحذير وتترك الف غصه بكلبي ويكول ايفين غصب عنج او برضاتج تطاوعيني ، 

كل يوم يلزم عليه لزمه اكبر من القبلها وكله مسجل عنده وكل ما اكول راح اطلع واخلص نفسي الكه روحي غركانه اكثر وطامسه بالوحل ، اخوج عصبي ويرعد رعد مجرد يخزرني اني ارجف اذا شفايفه لفضت حروف اسمي كامله تغيب الابتسامه عن وجهي لان اعرف صايره مصيبه او ضايج مني. 

نرمان : ولو اقاطعج بس شغله حيرتني من حجيت وياه ذاك اليوم حبيت اسمع عن حياتج بس لتعتبريه فضول اذا متحبين لتحجين . 

ايفين : شنو كلج ؟ 

نرمان : كال الوحيده بيكم كدرت تحتضني كدرت تستوعبني تمتص غضبي احتوتني رغم صغر سنها ورغم فارق العمر بينه ورغم صعوبتي ونحوسيتي بأشد ضوجتي وعصبيتي تكدر تضحكني.. 

ايفين : بس تدرين ولا مره كال هذا الحجي كدامي جوز حجاه كحجي عابر بس ابد ميمدحني او يثني عليه تخيلي ولا مره كالي احبج .. 

جريت نفس قوي واسترسلت .. 

ايفين : اخوج جان هواي يسهر واغلب الاحيان يشغل اغاني بصوت عالي علمود يدوخ وينام مرات اشوفه يبجي ومرات يغمض عينه وهو بقمه العصبيه اذا تحركت مره مرتين الثالثه يعيط ويكلب الدنيا عليه .. 

نرمان : صح نعرفه من يوم الهجرته زوجته وتركته هيج صار بيه خصوصا على ابنه. 

ايفين : شسويت اني وغيرته... 

نرمان : ههههه شسويتي. 

ايفين : يوميه كمت اركصله وهو يباوع معاجبه. 

نرمان : زين ههه. 

ايفين : يوم يومين كام يشاركني بالركص وصرنه نعلكها للصبح وابوج يلطم.. 

نرمان : ههههه خرب.. 

ايفين : حاولت اتقرب منه ونكون علاقه زوجيه جان يرفضني رفض قاطع وجانت كلش صعبه عليه تخيلي اتمالك نفسي بصعوبه كدامه علمود لا اضعف وابجي بس شنو داخلي يرجف قهر ومرات خوف من ردات فعله ، مجرد يطلع من الغرفه تنجرف دموعي وحدها بدون شعور ابجي ابجي الى ان اتعب وانام. 

نرمان : شلون صارت العلاقه وشلون كدرتي تنسين حب ايمن. 

ايفين : شوفي نرمان اني اعرف نفسي اذا تطلكت من فهد لو اتعلك من عيني ابوج وامج ما راح يسمحون النه ننجمع ولا ايمن اله نفس بيه عدا رده فعل فهد المامعروفه. 

نرمان : هم صح. 

ايفين : فكرت اني ماعندي احد اختي تزوجت واني غلطت هواي بحياتي وبهاي غلطاتي سلمت ركبتي للفهد .. 

نرمان : اويلي .. 

ايفين : اختليت بنفسي وفكرت هواي اول شي سويته طردت وساوس حب ايمن من داخلي وفكرت بحياتي الواقعيه كلت هذا الانسان اكيد متأذي من اقرب الناس لهذا كاعد يأذيهم ليش ما اني احتويه هم اساعده وهم ابعده عن الاحبهم وبنفس الوقت اعيش براحه. 

نرمان : صح كملي.. 

ايفين : عصبيته مقابل هدوئي رعونيته مقابل دموعي كلامه المؤذي وتعيارته اليه قابلته بأهتمام ومحبه كام يخجل من نفسه يعيرني الى ان صار السند وحايط الصد يتلكه الكلام المسيء عني ويدافع ويحجي في سبيل يسويلي قيمه كدام اهله وفعلا محد كدر يحجي ويايه بعد انتي مجنتي ويانه جنتي بيت عمو ادهم ما شهدتي الحروب الصارت بس ما قنطت من رحمه الله مره جان يبجي كلبه محروك على ابنه كعدت بصفه مديت ايدي بخوف من رده فعله ، مسحت دموعه وحاجيته بهمسات مسموعه . 

ايفين : انت رجال لترضخ لدموعك كل مره حاول تحبسها واستبدل ضعفك بالدعاء والتضرع رب العالمين رحيم ومتأكده راح تنجمع بأبنك.. 

فهد : تدمرت ايفين كضيت محطات عمري كلها تعب وانتظار طفولتي مراهقتي شبابي انه شنو عشت فهميني لا فرحت بزواج لا بوظيفة لا بترقيه الفرحه الوحيده العشتها ابني واخذوه مني ... 

ايفين : اليشوفك من بره يكول هذا شنو من انسان متكبر وشبعان ماديآ ويحقله التباهي عنده عشيره واهل ومن كلها كامل شكل وشخصيه ومكانه اجتماعيه اضافه لرتبتك بالبلد يعني كامل والكمال لله بس اليتقرب منك يلكاك انسان محطم ذاتيآ للأسف بس تعرف شغله اكتشفتها بيك. 

مسح دموعه بطارف كفه والتفت عليه عضلات وجها متشجنه بغضب وعيونه حمر مال بجي.. 

صفك ايد بأبد وكال. 

فهد : شنو اكتشفتي؟ 

ايفين : داخلك طفل بريء وانت حنين ومستحيل تأذي بشر احس عندك شخصيتين والله يافهد وكت الغضب يطلع منك شخص ميشبه هدوئك ولا يشبه كلبك.. 

فهد : ففه كومي نامي وعوفيني بحالي لا اشوفج الطفل شيسوي بيج بهليل. 

ضحكت اني مجنت اعرف شنو يقصد تحديته وكتله. 

ايفين : يمعود انت بس حجي.. 

فتح عينه كلها وضحك.. 

فهد : انه بس حجي ليش انتي مجربتني قبل. 

ايفين : يووو مجربه خبالك وخبالك وخبالك.. 

دار وجها وفركه بيده بعدين التفت عليه شالني ، وتمت علاقتنه ، صح تندم وراها وحسيته ضاج ، بس ما نطق بحرف ويايه.. 

نقاشاته المريضه وهدوئي تغير حاله من حال الى حال..

. 

نرمان : اويلي افونه هاي شلون عشتي ليش هلكد عانيتني وماحجيتي ليش ما فتحتي كلبج النه ليش تحملتي كلشي وحدج. 

ايفين : الخلاني اسكت ورجني على مناطق الضعف عنده عشت ألمه وحسيت بدموعه وحركته عيشني كسره الخاطر والبعد عن الابن واني بعدني ما مجربه شعور الامومه لهذا تعاطفت وياه رغم مساوئه واذيته مرات يتهرب من نضراتي لان عباله اشفق عليه او هيج اعامله لان مقهوره عليه بس هو ميدري كمت احبه رغم اذيته اليه رغم تهديداته رغم مساوئه حبيته ماعرف ليش بس الاعرفه حبيت الطفل البداخله جان يأذيني وميعتذر تخيلي هسه من يضوجني مينام اذا ميبوس راسي ويتعذر ويردد كلماته الحفظتهن على الغيب كل ما يغلط بحقي يعيدهن نفسهن.. 

فهد : سمعيني افونه اعرف قسيت عليج هواي وانه ظلمتج ويايه وظلمت نفسي وحتى تكبرت عليج واعرف عيشتج شعور الخوف وجنتي مجروحه وتكابرين بس صدكيني هاي اخر مره ومتنعاد. 

نرمان : ههههه خرب بعقلك فهد وانتي شتسوين؟ 

ايفين : افتح ايدي احضنه ونام.. 

نرمان : ههههههه ... 

ضلينه نسولف صارت ساعه وحده ونص .. 

نرمان : حيل ولج شوفي الساعه بيش. 

ايفين : نامي يمي حبابه والله اضوج وفهد بغداد .. 

نرمان : اروح افرش اسناني واجي. 

ايفين : واني راح اسوي ممه لحمودي انيمه بين متجين. 

نرمان : ماشي.. 

طلعت نرمان واني سويت ممه لهناك واسمع صوت هز البيت تقربت من الباب فتحته واسمع هذا صوت عمو ادهم يصيح بعلو صوته. 

ادهم : نرمااااااااااااااااان وينج .. 

ضل يكرر اسمها بعصبيه. نزلت نرمان واني اخذت ابني وتبعتها جان واكف بالهول ولازم كلبه ادهم عباره عن كتله غضب .. 

نرمان : خير شكو شصاير ياستار.. 

على صوته طلعوا ابوه وامه والتمينه داير مدايره. 

ادهم : احجولي كلشي راح اتخبل .. 

يوسف : شصاير غير نفهم وانت شجابك بهليل مو جنت بغداد. 

ادهم : اجيت اريد افهم سالفه اخويه شلون يلعب عليه وشنو علاقته بمرتي وليش يندل مكانها ويواعدها وانه ماعندي علم ويدري هيه وين وماكايل شنو نوع علاقتهم راح اتخبل لا هو من شافها اتفاجئ ولاهيه وحتى رده فعلها كأنما زعلانه عليه وتدلل .. 

لزم راسه وكعد يستغفر ويصيح . 

ادهم : راح اتخبل يعني صارلي خمس اشهر اراقب اريد اشوووووف واتأكد من شكوكي الزرعتوها بعقلي مرتك انهزمت منك مرتك خانتك مرتك مرتك ردت اشوف واتأكد ويامن خمس اشهر ماعدها شي ماعدها بس ما امنت ردت اتأكد لكيتها عايشه حياتها فاتحه بيت وعدها شغل وسياره وراجعه للدوام تلبس وتتأنق وتطلع مطاعم وانه بين الحياه والموووووووت وتالي تطلع عدها علاقه بفهد اريد افهم شنو بينهم ضليت واكف شنو اسوي هذا اخويه عزيز كلبي وهاي مرتي حبيبتي ردت اتأكد واجي اسألكم استشيركم شسووي الشيطان ركب عقلي بس ما متأكد مجررد شك ماردت اتسرع و اغلط لان اعرفها هيه شنو واعرف ماعدها شي وقبل لتشوفه جانت يم دكتورها النفسي ودزتلي رساله تعتذر وتتأسف وراها تفر سيارتها متواعده ويه اخويه يعني شنو خيانه اتفاق مافهمت تروح ويركض وراها يلزم ايدها بأريحيه كأنما عنده ميانه سابقه وياها... 

نرمان : اكيد اكو شي غلط افضل شي سويته اجيت انتظر وريح بالك ونفتهم منهم بس فهمني شغله انت تعرف مكان سيلين كل هالمده وماحجيت وياها ليش جان واجهتها وفهمت منها ليش ضليت بعيد. 

ادهم : ماكدرت ماعدت اصدك بيها ماعرف المن اصدك فقدت الثقه بيهم بيها وبأخويه وحتى بنفسي ردت اتأكدت من كلشي يله اقترب.. 

نرمان : تعال ويايه نحجي بهدوء . 

يوسف : احجي هنا وين رايحه. 

نرمان : بابا ادهم مريض مو حمل حجي هواي خليني افهم منه وبعدين نتصرف. 

هز ايده وفات نرمان تقربت من عمو لزمته من ايده كام وياها ومشوا سويه للاستقبال فاتوا و عافو الباب مفتوح خليت ابني يم عمتي ورحت وراهم كعدت على صفحه استمع ردت اتخبل شنو من خبر هذا عقلي يرفض يصدك اريد اصرخ انهارت قوايه بس مع ذلك كلت انتظر اسمع كلشي يله احكم.. 

نرمان : اشرب مي واحجيلي شلون لكيتها وشنو صار وياك حتى اكدر اساعدك جوز اشوف بين كلماتك الحقيقه الانت تجهلها او غمضت عينك عنها ماشفتها بسبب عصبيتك و نار الشك .. 

اخذ المي شرب شويه وخلاه على الطبله. 

ادهم : من صرت زين ماخليت مكان مارحت سألت عنها مراكز مستشفيات مصحات ، ما الها اثر اخر شي تذكرت امها ورحت عليها سألت عنهم ووصلت الهم عن طريق شغل زوجها رحت وكعدت وياها وسألت عنها كالت ماعندي خبر ولا اعرف بيها وين ما وين كتلها اذا عرفتي مكانها دليني يرحم اهلج كالت ميخالف بعدها رحت لبيت عمامها طردوني وهوبزو وانت كذا وانت وانت سكتت ماحجيت صعدت سيارتي توني احرك صعد زاكروز ابن عمها .. 

زاكروز : يعني وين راحت ماعندها صديقات احد نسأل عليها.. 

ادهم : ماعدها بس صديقه وحده بالجامعه وما اعتقد علاقتها قويه بيها بحيث تنطيها سرها.. 

زاكروز : معليك انت اني اسأل عنها ونشوف بلكت عدها خبر انطيني اسم صديقتها بالكامل واروح اسأل. 

ادهم : تخرجت هسه وين تلكاها. 

زاكروز : اكيد عدها رقم بالجامعه ونكدر نتواصل وياها من خلاله.. 

ادهم : والله ما ادري.. 

زاكروز : نروح ونسأل هناك ونشوف شنو رأيك .. 

ادهم : يعني تجي وياي تبات 

زاكروز : اجي ماعندي شي.. 

ادهم : ممنون منك يابه. 

زاكروز : تدلل اني هواي ندمان ضيعت البنات وتأذو بسببنه بس اهلي موخوش اوادم .. 

ادهم : اعرف لتكمل ، قبل لانرجع لبغداد مادام جيت عندي شغله تدك بكلبي من زمان اريد اسويها. 

زاكروز : شنو ؟ 

ادهم : بعدين تعرف .. 

رحنه للمركز اشتكيت على غزوان زوج امها بتهمه الابتزاز وخطف وقتل وقدمت الادله العندي، وتركنه رقمنه يمهم رجعنه لبغداد ثاني يوم خابروني لازميه وطلعت عنده ملفات سوده قيامه ... 

هاي اول شغله بردت كلبي بيها جانت تاكل وتشرب وياي.. 

رحنه للجامعه سألنه على الرقم مال صديقتها للأسف ماجان بفايلها اي رقم خليت خبر يم جماعتي ورجعت مأيس.. 

ضل زاكروز يسأل ويدور وانه اسأل وادور بغير مكان وفهد هم ويانه يسأل ومحروك كلبه ويخابر على جماعته وانه مصدك بيه بس ما مأمن لان وكفته ويايه من انه ومريض مستحيل تخليني اشك بيه لو لهفته على معرفه مكان زوجتي يسبقني من يجيني اتصال عنها ونطلع سوه نتسابق ياهو يوصلها اول بس رغم هذا مامرتاح وكلبي يلعب 

بيوم اجاني اتصال من الجامعه رجعني للحياه كالوا دكتور تعال سيلين وضاح داومت.. 

بحلم بعلم انه ماصدكت ، جان فهد يمي كال 

فهد : هاا منو؟ 

ادهم : واحد من جماعتي ماكو شي. 

فهد : خير ان شاءالله. 

كعدت على نار انتضرته يطلع وره طلعته بنص ساعه طلعت صعدت سيارتي ورحت عليها اسوق مثل المخبل شلون راح يكون اللقاء شلون عايشه حياتها بدوني شلون كدرت ترجع تداوم وتدرس وانه بعيد عنها وماتدري شصار بحالي بعدها وهيج التمت عليه التساؤلات والشكوك اكلت كلبي اكل. 

وصلت واشوفها اخ يانرمان شصار بيه هدت حيلي هد بنتي الربيتها حبيبتي هياتها كبالي بس ماكدرت اروح واحاجيها عندي شك بكلبي خفت اروح وماعرف شنو ضامه عليه راقبتها من بعيد لبعيد بدون ما تحس بيه ، صعدت سيارتها تبعتها اول شي اندليته شقتها صفت سيارتها ونزلت وانه نزلت صفيت سيارتي بالجهة البعيده نزلت وتبعتها واندليت شقتها ومكان سكنها يانرمان كلبي شكبره صار وبنفس الوقت خايف منها ويه منو عايشه معقوله تخوني هيه ماعدها هيج جرأه تشتري سياره وتأجر شقه وتداوم زين منين تصرف منو يصرف عليها ضليت اضرب على راسي ساكت ماعرف الافكار التجي بعقلي كلها سوده كلت اصبر ادهم وتأكد يله وساعتها اوكف الساعه عليها واخليها متمشي ... 

حقدت يانرمان بكد اشتياقي وخوفي عليهة حقدت صار صراع بين عقلي وكلبي واحد يكلي اذيها والثاني يكول لا دير بالك عليها احتويها .... 

شافني الحارس مال عماره وكال 

ابو عبد : انت منين يابه. 

ادهم : شلونك حجي شلون صحتك. 

ابو عبد : اهلا بيك تفضل اكدر اخدمك بشي اني حارس هنا اسمي ابو عبد.. 

ادهم : خادم ربك حجي تشرفت بيك سألت وكالو اكو شقه للأيجار هنا واريد أأجر عجبني المكان وبنفس الوقت قريب على عملي 

ابو عبد : عدنه شقتين فارغات اذا تحب تشوف وحده هسه اشوفك . 

ادهم : ياريت والله اكون ممنون. 

ابوعبد : تعال ورايه .. 

تبعته واني عيني على باب شقتها وعلى بوتها النازعته بالباب اريد افوت اريد احضنها واكسرهة بيدي من اشتياقي الها .. 

التفت عليه ابو عبد شافني واكف وعيني على شقتها.. 

ابوعبد : هاي الشقه مأجرتها بنيه حبابه وطيبه ماخيرها عليك.. 

ادهم : هااا شعجب ماعدها اب ام عم زوج. 

ابوعبد : والله هاي سالفتها سالفه مانعرف عنها اي شي كالت مقطوعه من شجره ابويه وامي ميتين واني الوحيده ومريضه وهاي اوراقي جنت اتعالج وصفيت وحدي من مات والدي ماعندي مكان اروحله الدلال اترجاني احجي ويه ابو الملك وابو الملك رجال خير وحباب من عرف بحالتها ووضعها حن كلبه عليها واجر الها بنص السعر ، سحبت الها خط كهرباء ورادت انترنيت اجه ولد شدلها وهاي عايشه وحدها ضلت عشر اشهر لا تطلع ولا نشوفها بس بعدين ام عبد شافتلهة شغله واشتغلت.. 

ادهم : هااا مو استغربت يعني شلون تأجر وحدها قصتها غريبه شويه. 

ابو عبد : فعلا غريبه الله يستر عليها بس ماشفنه شي منها حبابه وتمشي بدربها. 

هزيت راسي ساكت.. 

شوفني الشقق وحده جانت قريبه عليها والثانيه باللوفه اجرت الثانيه حتى اذا طلعت او رجعت متشوفني ، .. 

اشتريت كم شغله واثثتها اثاث بسيط تعرفت على ابنه اسمه عبد الله كلش خوش ولد وحباب جان عنده بحث مال تخرج ساعدته بيه علمود يساعدني واكدر اجر منه معلومات وحجي اكثر.. 

استقريت وبلشت اراقبها اريد اشوفها شلون عايشه بدوني ومنو يساعدها لان زاد شكي من شفت لبسها ووضعيتها ما مهتمه وعايشه حياتها طول بعرض كلت اكيد دخل حياتها شخص نساها ادهم .. 

بيوم راحت للدوام ورجعت للشقه ضليت بره ما دخلت انتضرت بالسياره طلعت العصر ساعه ٣ ونص باوعت الها اخر كشخه وانه لحيتي وهدومي شحالني وحتى شعري

مالي خلك ازينه البس كبوس مال بلوزي وافوت .. 

رحت وراها واشوفها تشتغل ب ___________ تخبلت صح مكان بيه بنات ومحترم بس صعبت عليه زوجتي تشتغل هنا وتضل لثمانيه ويتأمر عليها اليسوه والمايسوه 

هاي سيلينتي المدللة الاخاف عليها من الهوى تشتغل بهيج مكان ، 

اشتريت شغله وطلعت افور وداخلي يغلي شلون ارجعها لحضني بدون ما اجرح كرامتي شلون اتأكد ماعدها شي شلون اموت الشكوك البداخلي انتضرتها لحد ما كملت رجعت وانه وراها ، 

من صعدت للعماره انتضرت شويه وصعدت ردت احاجيها بيني وبينها مترين بس ضليت افكر اروحلها لا ، جانت مدنكه تدور بجنطتها المفتاح حست عليه او شكت بشي قبل لا تلتفت نزلت الدرج .... 

ضليت افكر اواجها لو انتظر انه لحد الان ماعرف منين جابت هاي الفلوس اذا واجهتها راح تكذب وماعرف سبب تركها للبيت بطلعتها تركت الف علامه استفهام وراها. 

ضليت اراقبها من بعيد مره شفتها مصبغه اضافرها وهيه من يوم ما كلت الها ما احبه حرمته على نفسها ، ضليت اضحك بداخلي شنو من واهس عندج وشنو من عدم اهتمام وضاربه الدنيا بعرض الحايط كاعده تصبغ بلشت وياها حرب نفسيه ردت أأذيها احسسها تره انه موجود قريب عليج وبنفس الوقت احرمها مني ومن حناني .. 

اول شي نبهتها على الصبغ الاضافر ضلت تفتر وتباوع منو تارك هاي الرساله وانه كاعد كبالها بالسياره وماشافتني.. 

نرمان : لان غيرتها جوز ما اجه ابالها انت اشتريت سياره جديده.. 

ادهم : انه هم كلت هيج.. 

بعدها صحت عبد الله وحجيت وياه علمود يساعدني شوفته عقد الزواج مالتنه وكتله هاي زوجتي بس مريضه واريد اعالجها هيه تركتني بسبب مرضها ومتريدني اريد اضل قريب يمها بدون متحس اول مره رفض بعدين ضليت احجي وياه شوفته صورنه سويه بالحجاب قنع وقرر يساعدني ، وانه هم هواي وكفتله حتى ماديآ ، اول شي سويته اخذت نسخه من مفاتيح شقتها انتضرتها راحت للدوام ودخلت .... 

جر حسره شكبرها عيونه جانت تدمع من يحجي ... 

ادهم : تجولت بشقتها هنا تكعد هذا كرسها هذا مطبخها فتحت ثلاجتها مابيها ذاك الاكل انعصرت عصر دخلت لغرفتها .... 

وسكت ماكمل.. 

نرمان : زين عوفك من هذا كله عرفت منين جابت فلوس. 

هز راسه ... 

ادهم : عرفت ساحبه من حسابي قبل لا اسافر سويت الماستر كارد على بصمتها وعدها الرمز وتكدر تتصرف براحتها بيه بدون ميبلغوني بس من عرفتها رافعه دعوه تفريق وقفته ، ماعرف حاربتها لو حميتها .. 

نرمان : زين فهد شعليه بهذا كله.. 

ادهم : هذا الراح يخبلني انه قبل لا اخليهم يبطلوها من الشركه الجانت تداوم بيها خطبها واحد وشفتهم اكثر من مره يكعدون سويه من سألت عنه كالو رايدها هيه وراها بفتره بسيطه رفعت دعوه تفريق اجه ابالي عدها علاقه بيه ودخت سامر شنو هذا شنو ماعدت افهم شي... 

نرمان : شلون دوخه هاي الله يساعدك.. 

ادهم : يعني متعرفون شي انتو احجولي كلشي من اول ما سافرت لحد ما انهزمت. 

نرمان : الف مره حجيتلك يا ادهم الف مره وكل مره تكلي عيدي.. 

ادهم : هسه اختلفت الامور احجي جوز افهم جوز فهد وراه سالفه.. 

نرمان : اني مادري عنها جنت اداوم وملتهيه ارجع للبيت اشيل الشغل عنهن ثنينهن سيلين دومها تعبانه ونايمه وايفين حامل بس الشي الغلط السويته وانت متدري مكتلك بيه.. 

عكد حاجبه مستغرب وكال.. 

ادهم : شنو؟ 

نرمان : جنت انطيها مضادات اكتئاب وقلق بين فتره وفتره بدون علمك 

ادهم : صدك تحجين ؟؟؟؟ 

نرمان : والله جانت تتوسل بيه علمود انطيها وجنت انقهر عليها كلت علاجها موجود عندي انطيها مابيها شي اذا قليل ميأثر قريت عنه هواي. 

ضرب على كصته ودنك راسه.. 

ادهم : يعني انه شنووووو كلها تشتغل بضهري وطلعت تفتهم ولجججج انه حتى ايدي باستها ومانطيتها ما نطيتها لان طالعه من ادمان تعرفين شنو ادمان الله اكبر .. 

نرمان : اسفه. 

ادهم : وبعد شضامين عليه احجي. 

ايفين : جانت تاخذ علاج من فهد ومرات تاخذه مرتين باليوم وعلبه تخلص تاخذه الثانيه. 

التفت عليه مغضب .. 

ادهم : وانتي وين عنها عليش ماخابرتي ماحجيتي. 

ايفين : اخذته منها ومنعتها وتعاركت بس هيه جانت متسمع .. 

ادهم : وشلون تاخذ علاج من فهد على اي اساس يشتريلها هو .. 

ايفين : هيه جانت تطلب منه. 

ادهم: سيلين تطلب من فهد ههههه . 

ايفين : عمو انت المتدري بيه علاقتهم كلش قوت بأخر فتره ورادت تساعده علمود ابنه. 

ادهم : اي بله كملي.. 

ايفين : ردت اخابرك هددتني بالشي التعرفه اذا حجيتلك تحجي لفهد. 

ادهم : بشنو هددتج ايفين احجي تره كلبي ما يتحمل صدمات راح اموووووت. 

ايفين : لتصيح والله احجيلك كلشي مادام فهد هيج طلع نذل ومايستاهل واحد يتعبله وهو السبب بطلعه سيلين متأكده والله هو. 

ادهم : شلون عرفتي وليش هسه يله حجيتي. 

ايفين : اني شكيت بيه و واجهته كتله شفت تصوير بالكامره انت مقطع الوقت يعني انت مساعدها بالجنط لان هيه اخذت كلشي من كتله راح حذف كلشي وقبلها عمو يوسف صور المقطع التطلع بيه من البيت بس البعد الشك عن فهد موبايلها والمحادثاث عبالنه فعلا هيه انهزمت وقبلها بكم يوم جانت كل يوميه تكولي ايفين اني اريد اعيش وحدي اريد ابتعد عنكم ما اطيق اسمعلكم صوت هذا كله تجمع نقاط ضدها.. 

ادهم : وموبايلها شلون ضاع وشوكت لكيتوه 

ايفين : موبايلها ضاع قبل يومين من طلعتها ولكيناه وره ماطلعت.. 

ادهم : اي كملي.. 

كمت افرك ايد بأيد بتوتر.. 

ادهم : احجي ايفين شنو ضامه عليه تره اختج راح تروح بيها يعني احتمال تصير جريمه وانه اضيع وهيه وفهد لا عبالج راح اسكت.. 

من شفته هيج عصبي ويحجي صدك خفت وقررت احجي كلشي.. 

ايفين : عمو راح احجيلك بس تفهمني الله عليك ولتكرهني لان والله انجبرت.. 

ادهم : احجي عاد وفضيني. 

ايفين : احجيلك والله وشيصير خل يصير.. 

عاط بعلو صوته. 

ادهم : اكثر من الصارررر شيصير بعد احجي .. 

ايفين : عمو اني تورطت ويه اسامه بعلاقه وجنت ماعرف والله قشمرني ومن متصل بيكم متصل بفهد ومشوفه كلشي وحتى سالفه البوكه من بكت منك فلوس ومن ايمن حاجيله لفهد لان اني حجيت لاسامه جان يزعل مني من سيلين تاخذ مني الموبايل وماكدر اتصل بيه كتله دبرت فلوس وراح اشتري موبايل سألني منيلج كتله اخذت منك ومن ايمن. 

ادهم : كملي. 

ايفين : بيوم جنت راجعه من المعهد شافني فهد راد يوصلني رفضت رجعت للبيت لكيته كبالي انتو جنتوا بالدوام وطلب مني اشياء مو حلوه رفضت من رفضت كال.. 

فهد : اليشوفج يشبع ههههه لو ما انتي لاعبه لعب. 

ايفين : شنو قصدك ؟؟ 

فهد : كالتلي العصفوره ففه ايدها طويله وتبوك وففه عدها سوالف مكسره وحتى مو بنيه. 

ايفين : منو كلك انت واحد جذاب. 

فهد : لالا عيب هيج تكولين عيب هسه اشوفج. 

وطلعلي الفديوات والمحادثات كلها بيني وبين اسامه. 

عاط بيه عمو.. بعلو صوته . 

ادهم : ولج مو كبالي طلب منج شغلات اكبر من المراسلات والكامره يعني ماجان طالب منج قبل . 

ايفين : ماعرف شنو جان يقصد والله ماعرف عمو اني كل عمري جان ١٦ سنه وجنت مريضه وهو استغل ضعفي وجنت اشوف هذا الشي عادي عشت ويه امي وزوجها واشوف كلشي عدها مباح وطبيعي يعني ما علمتني والله. 

ادهم : كملي.. 

حجاها وكز على اسنانه. 

ايفين : بيوم دخلت لغرفته ردت اعرف شنو ضام وليش ميخلينه ندخلها طلع حاط كامرات ومجنت ادري مصورني واني افتش بالغرفه لزمها عليه وكام يهددني.. 

ادهم : بشنو هددج وشنو طلب منج علاقه ؟ 

ايفين : لا شي اكبر. 

ادهم : مثليش. 

ايفين : يدمرك. 

ادهم : يدمرني؟؟ 

حجاها عاقج وجها مستغرب 

ايفين : اي يدمرك. 

ادهم : كملي كملي دشوف.. 

ايفين : بيوم زفه سيلين طلب مني ادزلها رساله اكتب بيها عمو ادهم مات وراج وانعادت عليه ايام عمه ياسه من ماتت. 

ادهم : يارب الصبر ياربي دخيلك ، وانتي شنو سويتي؟ 

جنت ارجف واحجي. 

ايفين : كتله ما اكدر عرض عليه مبلغ من الفلوس كلش هواي عباله راح اطمع لان سرقت منكم فلووس عباله كلشي اسوي مقابلهن.. 

ادهم : اي .. 

ايفين : رفضت كتله ماريد شوفني تصوير الكامره كال شنو رأيج افضحج واكول باكت مني دفتر واخليج تزوعين العافيه .. 

خفت بصراحه وحتى كال اخرب خطوبتج ويه ايمن واكله بحقيقتج اني كلت ادزلها رساله شنو يأثر هيه تقراها لان موبايلها يمها. 

جر نفس قوي ورجله تهتز خازرني ونضراته كلها كره واشمئزاز مني. 

دنكت راسي وكملت.. 

ايفين : وره الزفه اجه يمي بالغرفه وصورني واني اكتب وادزلها الرساله وهذا دليل ثالث ضدي بعدها كام يطلب مني شغلات اكبر اسويها ويهددني .. 

ادهم : منها ؟؟ 

ايفين : دزيتلك من موبايلها صورها واخذت موبايلك دزيتلها مسج انت متدمر عليها وشرحت حالتك شلون تبجي ومن خابرتني سألت عنك وصفتلها حالتك كلها   

ادهم : موبايلي شلون وصلج . 

ايفين : جان عد مريم وانت جنت نايم اخذته من جان على الشحن. 

ادهم : كملي كملي .. 

هز راسها مستحسف . 

ايفين : جنت تجي للبيت وتدخل انت ويه فهد تعالجه واني ادز من موبايلك رسائل الها حب واشتياق وندم وعندك اشعار بالحافظه جنت تخزنهن ادزهن وراها اصورله حتى يتأكد اني دزيت وبسرعه احذفهن حتى سيلين متشوفهن وتكرهك بعدها كمت ادز فديوات من موبايلك هو مصوركم والله مو اني .. 

ادهم : مصورنه ليش احنه شمسوين؟؟ 

ايفين : مره انت وياها كاعدين بالحديقه يمكن وره العقد هيه لازمه وجهك وانت جنت تتوسل بيها تبطل وهيج شي وحجيكم واضح جان .. 

ادهم : ومنين مصورنه؟ 

ايفين: بظهركم شباك الاستقبال منه مصور والصوت واضح كلش... 

ادهم : لا اله الا الله نرمان كاعد تسمعين الاسمعه لو انه بحلم احجي تره عقلي راح يوكف. 

نرمان : اسمع اسمع خليها تكمل نشوف وين توصل بيهم النذاله. 

ايفين : احجوا اي شي استاهل بس والله جنت.. 

قاطعني من عاط.. 

ادهم : كااافي تحلفين ولا اريدج تبررين لان ما يعجبني اسمع احجي شنو سويتوا بعد.. 

ايفين : الفديوات جانت تندز لسامر وبعدين رسائل من موبايلك اله علمود يعوفها ويترك .. 

مسد لحيته بطريقه عصبيه وكال.. 

ادهم : كافي لتكملين احجيلي عن سالفه زواجكم شلون تمت.. 

ايفين : هو كال عوفي ايمن راد يأذيكم ثنينكم بيه ، اول شي اخذني علمني على حركات الجسد شلون اسيطر على انفعالاتي وشلون اكدر اتلافه اسئلتك وطلب مني ابد ما احجي كدامك لان راح تكشفني اخذني عقد عليه وطلب مني استمر ويه ايمن بعدين يضرب ضربته راد يعيشكم الشعور العاشه .. 

ادهم : وين جان ياخذج. 

ايفين : بيت وبعدين مكان معزول باطراف بغداد ... 

ادهم : يعني سالفه الاغتصاب وتخربطتي علينه كلها تمثيل وجذب. 

ايفين : اي هو جابلي كبسول يهبط الضغط حتى يبين اني متأذيه وتمشي عليكم. 

ادهم : يعني هاي كلها لعب بلعب. 

ايفين : اي بس بعدها والله تندمت وبجيت دم وردت اغيره علمود ابعده عنكم عمو اني غلطت واعرف غلطي جبير ومستحيل تسامحوني بس .. 

عاط بصوت سكتني من صاح.. 

ادهم : ياااااااابه وينكم حجي يوسف تعال اسمع.. 

تخبل انهارت اعصابه اجه ابوه يريد يلزمه ميكدر مخله شي ما كسره كام يضرب على صدره السمعه صعب وصعب حيل .. 

ادهم : وتكلي مرتك تخونك خانتك بت تماره ولكم لعبتو بيها لعب دمرتوها اختها ياناس اختها من لحمها طعنت بيها وغدرتها ولج انتي مو جانت توكلج بيدها شكد جانت تخاف عليج مو اشتغلت شفتات علمود علاجج الله لا يوفقج وينتقم منج ومن فهد والله لا ادمركم بسيطه.. 

تعب وكعد على القنفه وكف ابوه يمه وضل يهدأ بيه ... 

وره شويه طلع موبايله واتصل ... 

ادهم : ايمن باجر ترجع للعراق وتخابر ولد عمك كلهم اريدهم من الصبح لو احرك الدنيا على روسكم.. 

سيلين 

كعدت الصبح على صوت رنين الجرس ، كمت من الفراش متململة يعني اليوم اجازتي وهم ما ارتاح ، كافي الرعب اللي اكلته ذيج الايام والبارحه انهد حيلي هد ، لبست الروب فوك ملابسي جنت لابسه لبس خفيف مال نوم ، طلعت للهول مشيت للمدخل الخاص بالشقة ، باوعت من العيون السحريه اللي بالباب هذا ابو عبد شجابه من الصبح ، رجعت لفيت شال على راسي وفتحت الباب.. 

سيلين : ها عمو صباح الخير، تره مو وكت الايجار بعدنه بنص الشهر والمولد دفعته .. 

ابو عبد : لا بنيتي يا ايجار يامولد ، نزلي شوفي سيارتج شمكتوب عليها.. 

جاوبته بخوف وتردد.. 

سيلين : سيارتي شبيها ؟؟ 

ابو عبد : مكتوب عليها علامات اكس بصبغ سبري لونه احمر ومكتوب ثار بلون اسود ... 

سيلين : عمو شفتو الكامرات اكيد تبين منو... 

ابو عبد : بلي اكيد شفناهن اني وابني ، شخص لابس اسود ومغطي راسه بكلو البلوز ومنزله على وجها يعني مامبين،، ورسم على السيارة بالسبري بعدين كعد على البنيد شرب جكارة وشمرها بالكاع داسها وراح.. 

سيلين : عمو هذا واحد مشتبه لتخلي ابالك. 

ابو عبد : شلون مشتبه ياعمي وهاي شغله صعبه وانتي بنيه وحدج لا اب لا اخ يسندج وخاف ذوله ولد حرام و يأذوج.. 

سيلين : عمو لتخاف ماكو شي الله موجود.. 

ابو عبد : تنزلين تشوفيها لو ابني يغسلها.. 

سيلين : لا لتغسلوها اريد اصورها كلشي يصير.. 

راح عمو سديت الباب ركضت للغرفه اغير ملابسي ودكات كلبي تقره الف من الرعب والخوف ، كوه تمالكت نفسي كدامه وبينت ماكو شي لان اذا حس بخطر يطلعني من مكاني ، ولازم ادور من جديد على شقه واني هنا مرتاحه الجيران زينين... 

كملت لبس وطلعت عفت الباب مردود كلت هسه اصعد ما اتأخر واني باب العمارة يعني اذا دخل واحد اكيد اشوفه.. 

نزلت ولكيت جارنه ابو قيس وكم ولد واكفين يم السيارة وعمو ابو عبد ، باوعت السياره كلها علامات اكس ، ومكتوب ثار ، ماكو غيره هو انت اللي ابالي انت يافهد يا مخبل .. 

سيلين : عمو غسلوها وادفعلك ويه الايجار.. 

ابوعبد : زين عمي زين.. 

صعدت اركض دخلت للشقه ، سديت الباب برجلي ، التوتر العايشته والرعب مينوصف، وصلت لغرفه النوم حتى اغير ملابسي بملابس بيت ، ما احس اله انشاليت وانضربت بمكان على راسي فقدني الوعي..ومنا بدت الست ايام وسبع ليالي...