رواية جذبني فمك البني الفصل السابع والستون بقلم عبير إدريس
اتسامحني يا حبيبي عن خطأي ؟
اتكف عن لومي كلما رأيتني ؟
اتحن يوماً لي ؟
كيف لي ان اكفر عن ذنب اقترفته عنوةً عنك !!!!
كيف لي با اعادتك الى احضاني!!!!
كيف يعود الروج البني يأثر بك
لدرجه ارى ثغرك يرتجف
انفاسك تلتهب ؟؟؟
ماذا افعل لكي تسامحني على حماقاتي ؟؟؟
متى تستبدل نظرات كرهك لي بالحب العارم الذي اغمرتني بهُ!!!!
متى نعود كما كنا ؟
متى عيناك تلتقط لي صورآ لتحتفظ بها في ذاكرتك من جديد فتفول لي ، عند رحلتي الى عملي الشاق والمتعب ، استرجع صوركِ في ذاكرتي لاستعيد نشاطي واعمل بجهد وثبات ...
لو كان بيدي الامر لعدتُ لتلك اللحظة التي تركت يدك فيها
انا غدرتك واخجلتك سامحني ...
تمر علينا لحظات تكون عابرة حينها لكن عندما تمضي بنا عجله الزمن مسرعة نتمنى ان تتوقف وتعود بنا الى المحطة السابقة من العمر ..
______
مرت الدقايق عليه عبالك سنه ماعرف شسوي وشنو افكر وين الصح ومنو الصح وين الغلط ومنو الغلط ، القهره البكلبي نزلت لمعدتي صارت حركه بيها...
اباوع بالوجوه كلها منتظره كلمه مني ..
ادهم وخزرته محذر يعني احجي كل حركاته ونضراته تدل ما راح يسامحني اذا سكتت...
فهد نضراته متوسله بيه يعني ها سيلين وين الوعد وعد الحر دين سيلين ابني ابني شفته لتغدرين بيه..
درت عيني وباوعت لعلي تعرفنه بالنضرات ، ها زوجه عمي راح تسجنين ابويه يقبل ضميرج انحرم منه من جديد وماعرف شوكت نلتقي من جديد ....
رجفت ايدي كلبي يرجف خوف حلكي يبس وكفت الكلمات بحنجرتي رافضه تطلع ، من حيرتي وقله حيلتي التفتت على ايمن وعيوني متروسه دموع بقله حيله همستله..
سيلين : ايمن شكول ساعدني شسوي موقف صعب شسوي احجي...
باوعلي وخله ايده على لحيته تنهد تنهيده طويله وكال..
ايمن : احجي اليمليه ضمريج..
سيلين : ايمن شلون بيه انت كلي شنو احجي.....
هز راسه رافض الموقف كله حاير مثل حيرتي واكثر....
صوت الضابط خلاني التفت عليهم من رجع سألني.
_ مدام اكرر سؤالي ال_______ فهد يوسف عمران خطفج وتعرضتي لترهيب وعذاب نفسي مثل ما ادعى زوجج الدكتور ادهم يوسف عمران..
الهي ساعدني كون تنتهي السالفه بدون خسائر تمتمت كلمات دعيت ربي بيها غمضت عيني وكلت اللهم اني استعين بك فقوني الهي الهي ساعدني ...
فركت وجهي ورفعت عيني صارت بعين ادهم خازرني محذرني اخالفه ..
بين الوعد الوعدته لفهد وبين سعادتي وعشقي لزوجي اخذت نفس قوي وقررت قرار جنت متيقنه يقين اذا حجيت راح اوجهم كلهم للطريق الصحيح رغم الخاسر الاول والاكبر هيه اني مافكرت مثل تفكير ادهم وماحسبت حساب كلمتي ممكن راح تهدمه وتفشله بنص عشيرته الجايين وياه...
بين عذاب الضمير وخوف الفقد اختاريت صوت الضمير ونطقت كلمتي الحاسمه للموقف وياريتني ما نطقتها ياريتني...
سيلين : لا ما خطفني...
الضابط عكد حاجبه التفت على ادهم الصافن عليه مستغرب الوضع او بالاصح ما مصدك السمعه عينه عليه وحجه ويه الضابط..
ادهم : سيدي عيد عليها السؤال لان زوجتي مريضه وتاخذ علاجات وتنسى هواي..
رجع التفت عليه الضابط وعاد السؤال عليه مأكد سالفه الخطف ورجعت جاوبت نفس الجواب..
الصار الكل الجان ويه ادهم ضد فهد انعكست السالفه والكل صار ويه فهد ضد ادهم...
ضجت الاصوات معاتبه ادهم شلون هيج حجيت وشلون تهمت اخوك وطلعت زوجتك متعاونه وياه...
سكت وصفن عليه هز راسه ما راضي تنفس بغضب بس ماحجه شي ضل ساكت وثابت بمكانه نزل ايمن من السياره راح وكف يمه ، الضابط حجه ويه فهد واعتذر منه وراحوا عمامه و ولد عمامه باركوا لفهد وتحاضنوا ...
ادهم باوعلهم عكد حاجبه فرك وجها بغضب بعدين عاط بعلو صوته..
ادهم : وين صعب صعببببببببببب ..
ايمن : ماعرف يمكن راح لان سيارتك ماكو.
ادهم : خابره خلي يجيني بسررعه..
ايمن : على كيفك يابه على كيفك..
ادهم : خابره وهاي اخذها مثل ما وصيتك..
ايمن : مو اتفقنه نروح سوه.
ادهم : قبل قبل اتفقنه مو هسه اخذها انت ماريد اشوفها...
حجاها وراح مشى مدنك ما اله عين يخليها بعيون اقاربه صغرته كدامهم صغرته اني شسويت هسه يلا حسيت بغلطتي حسيت بفضاعه السويته...
فتحت باب السياره ردت انزل فاتت سيارات حكوميه سدت الشارع رجعت كعدت وسديت الباب ، وكفت السيارات ونزلوا الذبايح وبلشت المزايق تدك ، كأنما تدك بكلبي تدك على خسارتي على تحطيمي على جراحاتي السببها اني....
وجعتني نضرات العتب والملامه من اقاربهم تجاه ادهم من نصفت فهد...
باوعت الشارع انترس رتب التموا يم فهد هذا اليحضنه وهذا اليشيله وهذا يجر راسه يبوس بيه ، واني عيني تدور على ذاك الغريب بنصهم ، غريب اني رجعته غريب بالنسبه اليه ولاقاربه صار غريب اخ ربي شلون موقف صعب..
اجه ايمن فتح الباب وكال..
ايمن: لفي وجهج بالعبا ونزلي..
سيلين : ادهم وين راح.
ايمن: ويه صعب نزلي هسه مادامهم ملتهين ويه فهد..
نزلت ومشيت ويه ايمن دخلنه للبيت والمزايق تدك .
فتت للبيت كعدت بالهول نزلت دموعي افرفح بعد ماكدر انتهيت..
ايمن : على كيفج تنحل ادهم عاقل ويفكر صح لتخافين ..
سيلين : خسرته والله خسرته..
حجيتها وضربت على رجلي فرفحت روحي اشهك وابجي..
ايمن: هسه انتي شنو فهمتي وهيج حكمتي لا حجه وياج الرجال ولا سوه شي مجرد انسحب وراح.
سيلين : نضرته ايمن نضرته تكفي ما شايفتها ابد مافديوم باوعلي بهيج نضره نضراته حنينه مو هيج مو هيج اني كسرته اعرف كسرته.
ايمن : فعلا انكسر ادهم اليوم وما يستاهل..
سيلين : ايمن الله عليك لتجاملني لو انت بدالي شنو تسوي.
ايمن : انتي تعرفين موقفي من فهد كلش زين صح.
سيلين : صح..
ايمن : يمكن على موقف اليوم والصار كدامي وهذا الكم من المشاعر الشفناها جان نصفت فهد رغم انه ضده وضد افعاله وتعرفيني.
سيلين : هو جان انحبس لو اني شاهده عليه مو ؟
ايمن: لا بس يخسر منصبه ويدخل للمصح اجبار بعلم الدوله وممكن يتعرض لمحاكمه عسكريه وهاي لو يموت اهون اله من الاهانه الراح يتعرض الها بس انتي نقذتي فهد ماخليتيه يصير وحش من جديد..
سيلين : وادهم شلون فهمني ادهم شلون.
ايمن : انه احجي وياه لتخافين..
سيلين : شتحجي ادهم ميقنع اعرفه..
ايمن : كولي ياالله تفائلي خير والله كريم.
مسحت عيوني وكتله..
سيلين : ادهم وينه..
ايمن : مو كتلج راح ويه صعب.
سيلين : مادري نسيت شوكت تخلص الهوسه البره راح اطك اريد اطلع اريد احجي وياه عفيه ايمن خابره شوفه وين كله سيلين تريد تحجي وياك ضروري وتفهمك يله تحكم عليها.
ايمن : يابه عوفيه هسه عصبي بعدين نحجي وياه ..
سيلين : مادري مادري ماعندي صبر هسه شيكول عليه غدرتني طعنتني بنص اهلي ولك ايمن فشلته والله شلون بيه..
ايمن : بس الصار هو الصح حتى وان كان بيه اذيه لادهم ، لان فهد ما راح يسكت ويرجع يمثل تعالج ويطلع يأذيكم اضعاف والله من فكرت بيها وانه كاعد يمج بالسياره كلت السويتيه هو الصح ولو انه بمكانج هم هيج اسوي لان الحرب ما تنتهي اله هيج لازم يصير تنازل و واحد بيهم ينسحب..
سيلين : واني هذا رأيي وهذا الفكرت بيه كلت فهد من يشوفنه وكفنه وياه وسندناه راح يكف اذيته عنه وهم يتعالج من صدك واضافه لهذا ابنه والله دمرتني نضراته شلون يباوع عليه منتظر جوابي والله صعبه عليه اشهد ضدهم يا ايمن صعبه وانت لو سامع قصه فهد تموت قهر يحجيلي ويبجي هواي اثر بيه وبنفسيتي ماكدرت اغدره ماكدرت..
ايمن : سامعها شلون ما سامعها والله حيره تجين من يم فهد وتشوفين لهفته على ابنه تتمنين كل الصار ماصار ويعيش ويه ابنه براحه ويربيه على ايده وبحضنه تجين على ادهم هواي خسر والسبب رعونيه فهد علمود يحصل ابنه تخبل ميعرف شنو يسوي وادهم هواي خسر سيلين كلش هواي..
سيلين : شخسر احجي ايمن لتخوفني شبيه ادهم ..
ايمن: ليش انتي متدرين شصار بيه وراج؟
سيلين : لا ما ادري.
ايمن : يمعوده غير انجلط ٨ اشهر لا يمشي ولا يكدر ياكل وبس ساكت ومن طبيب لطبيب بألف ياالله كام على حيله جنت اروح واجي عليهم الصار لادهم لا يسر عدو ولا صديق..
سيلين : سوده بوجهي ياحبيبي ولك ايمن راح امووووووت شلون بيه شلووووووون...
كمت اصيح وادك والطم على وجهي انهاريت لا عندي قوه اكدر اوكف على رجلي ولا عندي قابليه اسمع اكثر سديت اذني وكعدت بالكاع اعيط ....
الظاهر على صوتي جايين الولد الجانوا بالطرمه وايمن حاجي وياهم لان صارت هوسه يمي بعدين صار هدوء وبس صوتي اسمعه وره دقايق سمعت صوت فهد يحجي قريب مني..
فهد : سيلين باعي سيلين سمعيني احجي وياج دقيقه..
فتحت عيني وباوعتله جان مكنبص قريب مني نضراته بيها هواي حجي ومبين مقهور من الصار ماعرف اني كمت احس الناس كلها مقهوره عليه وعلى الصار لادهم..
حجيت بصوت يرجف ...
سيلين : ابو علي صار الوكت توفي دينك شفت الصارلي والصار لأخوك شلون تكلي مابيه شي وراج شلون تكذب عليه وهو مجلوط..
فهد : ما كتلج حتى لا تنهارين وانه بعازتج جنت والله مو قصدي شي..
سيلين : ماعليه بقصدك شنو الاريده توكفلي وترجع حق ادهم اني شسويت بيه شفت شسويت غدرته اليوم غدرته وفشلته ماراح يسامحني ادهم ما ينسى اني طعنته دمرته حياتنه تدمرت ..
فهد : كومي وراح ارجع اعتبارج واعتبار زوجج كدام الكل بس اهم شي ما شهدتي ضدي كدام الشرطه متعرفين يا سيلين لو شاهده جان شصار بيه وشلون انذليت والله يدمروني وانه شكد لازم قضايا وشكد صاكر ناس نذله ويتمنون الزله عليه انتي لو شاهده جان صرت مضحكه لليسوى والمايسوى جان انهاريت وممكن ما اتحمل وانهي حياتي اني كتلج راح اتعالج واروح برجلي بس مو بهيج طريقه ادهم غلط من اشتكى عليه.
سيلين : لعد انت ما غلطت من خطفتني بعز النهار شتريد شيسويلك يجي يحضنك ويربت على ظهرك يكلك عاشت ايدك عيشتني برعب على زوجتي شوف اني ما شهدت لخاطرك لا لخاطر ابنك ونضراته التتوسلني لا لخاطر رتبتك ولا لخاطرك لو ما ابنك والله والله ما انطي بزوجي بكد شعرايه..
فهد : شوفي شلون راح ارد اعتباركم كدام العشيره كلها وكولي فهد ماكال.
سيلين : شتفيدني العشيره اذا ادهم راح مني وكرهني شتفيدني..
فهد : انه احجي وياه معليج انتي واكله هددتها وضغطت عليها ب ايفين وخافت مني وشهدت ضدك.
سيلين : منو يكول يصدك بيك.
فهد : يصدك معليج انه عندي شغلات اشوفها اله اخليه يصدك..
سيلين : ماعرف بس استعجل لا يتأذه الله يوفقك..
فهد : يجرالج يابه والله السويتيه لو اشيلج على راسي واخذج لمكه ما جازيج.
سيلين : ماريد بس ترجعلي ادهم كلشي ماريد منك..
فهد : لتبجين لخاطر كل عزيز على كلبج والله تدمرت..
جريت نفس قوي وزفرته...
دخل علاوي التفت عليه ابوه وكله.
فهد : تعال يابه هاي زوجه عمك اسمها سيلينه سلم عليها..
علي : شلونج سيلينه ...
حجاها مبتسم..
سيلين : زينه حمدلله على سلامتك جنت اتمنى اتعرف عليك بغير ظرف واحسن من هذا ..
علي : انه اشكرج هواي السويتيه شي جبير بالنسبه اليه وان شاءالله عمي يتفهم وكلنا راح نحجي وياه الصار لعمي صعب وموقف ابويه اصعب انتي بطله والله ..
سيلين : انت الوكفت بعيني نضراتك ما تحملتها بدون وعي حجيت..
علي : انتبهت عليج بس والله موقفج لا يحسد عليه صرتي بين نارين انسانيتج وحبج لزوجج..
ابتسمت وعيوني مليانه دموع التفتت على فهد وكتله..
سيلين : هذا ابنك منين جايبه شنو هالثقافه شنو هالكلام والوعي العنده رهيب..
ابتسم وكال....
فهد : منو عمه نسيتي .
جريت حسره جبيره وكتله..
سيلين : نفس الفكر نفس المنطق عبالك ادهم صغير واكف كدامي..
فهد : ادهم بعمره هيج جان يعجبج بالردود من تحجين وياه يصفنج لهذا جان بكل مناسبه بالمدرسه يختاروه هو الممثل عنها..
سيلين : الله يحفظ ابنك ويحفظ ادهم وين ما جان..
فهد : هسه اريدج تكعدين بالغرفه وتفتحين الباب وسمعي الراح يصير حتى تكونين بالصورة واهم شي ايمن اريدك تصور الحجي كله وتدزه لاخوك خاف مايصدك..
ايمن : يله اصور بس فضونه مو متنه حربكم شوكت تنتهي ..
ضحك فهد ...
فهد : ولك لا باركتلي لا سلمت هيج كلبك اسود عليه..
تقرب ايمن منه وحضنه قوي...
ايمن : ماعرف شكول مبروك لو شنو ههههه المهم فرحتلك وياربي ينتهي خبالك ونخلص.
ضحك فهد وكله..
فهد : شنو مبروك قابل خلفت هههه
ايمن : شمدريني شيكولون المهم فرحتلك..
فهد : شفت عمك الكو***** كايل لعلاوي انه ميت.
جانو متحاضنين ابتعد ايمن وباوع لفهد عاكد حاجبه.
ايمن : صدك تحجي؟
فهد : اي والله..
ايمن : لا يا ناقص ليش هيج سوه..
فهد : يكرهني عبالك ماكل ورثه..
علي : بس يابه انت هواي اذيت امي مو شرط تاكل ورث علمود جدي يحاسبك ..
التفتوا مصدومين بهذا الشبل الكاعد يحجي ..
فهد بهت مكدر يحجي بعد وايمن ضل محتار شنو يكول اخر شي فهد كله..
فهد : انت شنو مفهميك ؟
علي : ماجنت ادري بسوالفك قبل ولا عبالك امي لو جدي حاجين عليك بشي موزين كدامي بالعكس صورتك جانت حلوه بعيوني وخالي صعب جان يسولفلي عليك دائما يكول انت سبع وانت شهم وكل سوالفكم انت وخالي حجاها اليه وجنت اتمنى اشوفك او اشوفلك صوره بس كالو مجان ياخذ صور ...
فهد : وخالك هم كلك انه ميت؟
حجاها بنتره..
علي : لا جنت اسأله يسكت ميجاوبني عبالي مقهور عليك
فهد : ومنو كلك انه مأذي امك انه احبها ودللتها بس اخر فتره تمرضت واذيتها بدون وعي مني.
علي : اعرف يابه اعرف بس كاعد اكلك جدي حقه وامي حقها وانت هم حقك يعني ماعرف المن انطي الحق ..
فهد : ترضه جدك يحرمني منك ١٤ سنه ؟؟
علي : حسب ما فهمت من جدي يوسف وعمي ادهم انه لو باقي يمك وانت بحالتك القديمه جان متت بيدك او نفسيتي تدمرت يابه انت غلطك الوحيد ما ساعدت نفسك علمود يساعدوك ما سعيت وتعالجت حتى امي ترجعلك ونعيش يمك ، جدي يوسف كال خلصوها من ايدك وهيه بطرك النفس يعني انت لو يجي واحد يكسر ايدي شتسويله.
فهد : ما خلي يطلع عليه نهار جديد..
علي : لعد ليش تلوم جدي بالسواه تره امي عاشت حياه قهر بقهر مايوم نامت اذا ما سمعت ونتها تبجي عليك الليل كله...
فهد : شلونها امك شلون عاشت هالسنين ما سألت عليه ماحنت لايامنه ما كالتلك سلميلي على ابوك من تشوفه لو كلبها صخر على ابوها..
علي : انت وياها لتدخلوني بينكم عندك رساله عتب من تشوفها عاتبها وهيه تعاتبك انه العليه اباريكم ثنينكم .
راحله فهد حضنه وبجه اكتافه كامت تهتز حجه بصوت مخنوك ..
فهد : لك يابه منو علمك السباعيه هاي فهمني منو..
علي : جدي امي خالي صعب كلهم الهم فضل عليه بتربيتي..
فهد : والله على تربيتك هاي لا اروح لجدك ابوسه من راسه.
علي : اتمنى يابه اتمنى تنتهي العداوات البجديد تعرفت عليها لخاطري لتضيعني بينكم..
فهد : ولك ايمون كاعد تسمع ابني شلون يحجي ولك رجال رجال..
ايمن : والنعم من تربايه صعب وروايه ...
فهد : اخ لك يابه وين اضمك فهمني لو احطك بنص كلبي هم ما اشبع منك...
علي : المهم هسه عندي موضوع وياك نحجي بيه هسه لو مو وكتها.
فهد : احجي احجي كلشي تكوله وكته...
علي : زين لعد اسمعني يابه اذا تحبني صدك وتريد ارجعلك واعيش يمك وافتخر بيك انت ابويه تعالج واذا سويت العكس متشوفني لان السويته بأمي لو جنت انسان صاحي مو مريض مستحيل اخليك تشوفني صح غلطوا من كلولي انت ميت وعشت يتيم كل هالسنين بس هسه عرفت الفركه صارت اجبار اليه والك ومن عاتبت امي وحجتلي حقدت عليك شمسوي بيها مدمرها واستمريت بالغلط لحد هسه في سبيل تشوفني وهاي جيتك برجلي لان انه هم عاجبني اتعرف عليك واشوف هذا الوحش الكلبه جلد ليش عايف ابنه كل هالسنين بس طلع العكس حارك الدنيا علمود تشوفني ، يابه تعالج وانه وياك لا اعوفك ولا اعوف امي.
فهد : اتعالج بس خليني اشبع منك وانه اروح برجلي لان تعبت اريد ارتاح لك يابه انه ما نايم والله من يوم فركتك والنوم هجر عيني وحتى من انام احلم بيك ، تدري اريد اشوفك شنو اشتريتلك وشنو جبتلك بس راح تضحك من تشوفهن.
علي : ليش اضحك ..
فهد : لان ابالي انت ذاك علاوي الصغير وجنت اشتريلك ملابس ازيد شي لعمر ١٠ سنوات ما انرسم شكلك ابالي انت ورجال ابد ما جنت اتخيلك بهيج ضخامه ولحيه مخططه وجهك وشوارب لك يابه كلبي راح يوكف والله..
رجع حضنه ويبوس بيه ضحك علاوي ولزم وجه ابوه وكله..
علي : ابويه حبيبي هاي شنو تشبهني طالع عليه انت ..
فهد : لك كوا**** هو منو يشبه منو هههههه..
يضحكون وعيونهم مليانه دموع ثنينهم يتسابقون على اللهفه ويكابرون حتى دموعهم متنزل بس خانتهم ونزلت نزلت بغزاره على الموقف بجيت وايمن بجه عليهم وعلى لهفتهم...
عفتهم ودخلت للغرفه انعى روحي جريت نفس طويل مليان بالهم ، يعني خلصت الحرب وارتاح الكل ضلت حرب المحبين حربي ويه ادهم توها ابتدت شوكت راح تنتهي وشلون راح تنتهي....
سمعت اصوات رياجيل دخلوا للأستقبال وره شويه اجه فهد حاجاني من الباب ابتسم وعيونه مليانه دموع يمسح بيها بكف ايده ويحجي.
فهد : ارجعلج حقج سمعي الراح احجيه ماشي..
هزيت راسي ب اي..
فهد : والله ما اخليج بهيج موقف مره ثانيه عذريني يابه..
سيلين : معذور بس رجعلي ادهم ورجعله كرامته ...
فهد: ابيض وجها وراح اشيل كلشي...
سيلين : انتظر..
ابتسم وطلع...
اجه ايمن وكف يم الباب شايل الموبايل بيده يصور التفت عليه ابتسم وغمض عينه مطمني جر نفس قوي واندار عليهم نطاني ظهره...
فهد : عمامي ولد عمامي ابناء عشيرتي انه شاكر وكفتكم وياي و ويه ابو مريم ، اجيتوا بسبب زوجه ادهم حتى تحاسبوني وتغيرت ارائكم بسببها من شهدت ويايه بس يابه انه جنت ضاغط عليها هددتها متحجي خافت على اختها مني انه سويت المايتسولف في سبيل احصل ابني وارجعه..
كلكم تكولون فهد مخبل فهد بنص عقل دائما هذا حجيكم من انه مراهق اسمعه منكم لحد ما كبرت وعفتكم عشت وحدي ، وماخصلت من طشار كلامكم المهم ابو نص عقل وصلت بيه مرحله فقد عقله كله وسويت شغلات ما تخطر على بالكم ولا بال شيطان في سبيل ابرد كلبي وارجع ابني اليه..
سكت وره شويه كمل..
فهد : اذيت ادهم هوواي خسرته وظيفته وخسرته صحته وانه هججت زوجته وعدتها نطلع بيت ونكعد وياها انه واختها بس الصار غدرت بيها وكتلها انتي طلعتي من وحدج وهددتها بأختها اذا حجت ،
بس مع هذا ضليت عيني عليها واراقبها خفت تسوي شي بنفسها جانت مريضه وعقلها تعبان وكل يوم اكل بروحي واتندم ازيد من اليوم القبله لان اذيتها بس الصار ردت اعيش ادهم العشته ردت احسسه شلون زوجته بالعراق وميكدر يوصلها شيصير بيه وانتو كلكم شفتوه شلون نهار وخسر صحته ،
انه ابني وحبيبتي سنين مادري بيهم وين ناس تكلي تزوجت ونستك وابنك تسجل بأسم رجال غريب ويصيحله يابه انه خسرت عقلي مو بس صحتي ، عشت على المهدئات عشت بأعصاب تعبانه ، واخر حل جان عندي اخذها يمي واساوم ادهم عليها علمود اضغط عليه وهيج يله رجعلي ابني....
صورت كلشي حتى تشوفون شلون انه ما وصلت يمها ولا دنست شرف اخويه ، عاملتها مثل اختي وهيه بحجابها ومحترمه نفسها وانه بمكاني..
كمت وكفت بالباب باوعت شغل الهم التصوير مال كامرات ..
شلون كاعدين بلبيت واغلب الفديوات اني اتعارك وياه بيهن وافرفح علمود يرجعني بس غير شي ما عرضه يعني من جنه نسولف ونضحك ما مصوره او احتمال مصور بس ما شوفهم ، الشافوه بس من اني ابجي واتوسل بيه علمود يرجعني وتصوير من هو يكسر بالبيت ...
فهد : هاي حالتي كل يوم انه اكسر واهد البيت واهد كلشي من حركه كلبي على ابني ، اعترف انه مجنون مو عاقل وبعت الدين والدينا في سبيل احصل ابني وحصلته وهسه الحكم الكم شنو تحكمون انه راضي بس لا تنسون اريد اتعالج وانتوا ولا مره وكفتوا ويايه طول عمركم جنتوا ضدي وجنتوا سجينه بخاصرتي هلمره اريدكم توكفون ويايه وبنفس الوقت ويه ادهم لا تتخلون عنه واريد ترجعون مي وجها ...
رجع التفت على ايمن وكله..
فهد : ايمن ارجع للعماره الجانت بيها سيلين واطلب منهم تصوير الكامرات بيوم الاخذت سيلين وجيبه لعمامك حتى يشوفون مو هيه اجتي برجلها انه ماخذها جانت فاقده الوعي لان ضربتها على راسها، وعلى هاي فعلتي شنو تسوون بيه مستعد لان اعرف بنفسي غلطان..
ايمن : منو يكول ينطوني التصوير اذا رحت..
فهد : ادز وياك واحد من الولد بالمكافحه وينطوك لتشيل هم.
ايمن : ماشي..
سمعت عمامهم يحجون واولاد عمامهم صح حجوا على فهد بس جانت عاطفتهم تغلب غضبهم بالكلام ، عرف شلون يأثر على عواطفهم ويخليهم بموقف محايد بينه وبين ادهم ، خصم الكلام الكل نطوه الحق وبنفس الوقت نطو الحق لادهم ، خصوصا من كالوا.
_ لو احنه بموقفك نحرك الدنيا علمود اولادنه ولو صرنه بموقف ادهم هم نحرك الدنيا علمود شرفنه واحنه وياكم ثنينكم الله يصفي النفوس ويهدي سركم ويبرد كلوبكم ، نرجع لمحافظتنه ونجتمع بيت حجي يوسف ونبيض وجه دكتور ادهم وانت هم تكعد تبري زوجته..
فهد : مستعد اسوي اي شي تطلبوه مني..
انتهى الكلام بطلعتهم من البيت رجعوا للمحافظه ضلينه بس احنه ...
فهد : يله ايمن استعجل علمود نلحك نرجع ..
ايمن : ليش ما تجي انت ويايه.
فهد : هههههه وين صايره مجرم يرجع لمكان الجريمه ويطلب دليل يدينه شبيك ايمون عقلك انضرب..
ايمن: انت واخوك خليتوا براسي عقل ..
فهد : يله روح وجيب غراض سيلين لتخلي شي هناك.
ايمن : اي ادهم هم وصاني قبلك وراد غراضه بالشقه ..
فهد : تندلها العماره؟
ايمن : ادهم دلاني المنطقه والباقي سيلين وياي هيه تدليني.
فهد : شقه ادهم على ايدك اليمنه اول ما تصعد الدرج اكو لوفه اول باب هيه.
ايمن: هههههه خرب بيومك كاعدلهم جنت صدك مخبل.
فهد : لك والله جنت بالي يمها خفت عليها عايشه وحدها وانه السبب بطلعتها ضليت اكل بروحي.
ايمن : حقك تخاف لو صاير بيها شي ونعرف انت السبب جان اكلناك اكل.
فهد : صارت بعد يله روح علمود نرجع قبل الليل.
ايمن : زين زين هسه رايح.
التفت عليه ايمن وكال.
ايمن: ها يابه نروح شتكولين ؟
هزيت راسي ساكته..
لبست العبايه وطلعنه بالطريق حجينه على الصار..
ايمن: شايل هم لادهم والله..
جريت نفس وسندت راسي على الجامه اباوع على الطريق بنضرات ضايعه...
سيلين : متت يا ايمن متت نضراته متروح من بالي كرهني والله..
ايمن : مستحيل ادهم يكرهج احتمال ضاج اكلج اي بس يكرهج غلطانه.
سيلين : برأيك يسامحني ؟
ايمن : ان شاءالله كلنا نوكف وياج والعشيره من يجتمعون ويبرأوج كدامه راح يمتصون غضبه ويسامحج حتى لو طول زعله شويه بس يسامح الادهم كلبه جبير كلب والد يتحمل ...
سيلين : كلبه يوجعه مو احجي الله عليك لان شفته من راح لزم كلبه ويمشي..
ايمن: هو كلش متأذي خصوصا بالجيه الطريق كله حلكه يابس كل شويه انطيه مي يشرب جان يرجف عليج حاير ميعرف شيسوي والمن يروح حتى يرجعج حرك الدنيا حرك عليج..
سيلين : اوووف ياربي اووف والله فهد غسل دماغي ماحسيت بنفسي اله وناطيته وعد اساعده وانت شفت بعينك شلون أثر على عمامك والزلم الواكفه وصار الحق اله ولادهم ما نطه لزمه لا عليه ولا على ادهم.
ايمن : هذا فهد مكار من يومه مينطي عليه لزمه حتى لو جان غلطان يصير الحق اله...
سيلين : وتريدوني اني اتغلب على دهائه.
ايمن : حقج يابه هو انه رجال وجنت ناوي اكله بسنوني بس اشوفه ومن شفته اثر بيه وماكدرت انطي بيه ابد ضليت مثل الحايط الواكف لا بيه اصير ويه هذا ولا بيه انطي بهذا..
سيلين : انتو غلطتوا بحقه وانتو السبب الرئيسي وصل لهذا الحال عدا ادهم هواي حاول وياه بس هو ما استجاب اله ومن سألته ليش يكلي جنت كل ما اشوفه اتذكر هو السبب بحرماني من ابني ومرتي وماجنت اتحمل اسمع صوته واريد بس أأذيه واعيشه العشته..
ايمن : وفعلا سواها وعيشنه كلنا العاشه هو،،
بس لتنسين الصار من ايده ماقبل يتعالج شكد ركضنه وراه ويكول انه مابيه شي انتو مرضه وانه صاحي ..
سيلين: يريد ابنه ويعرف اذا راح للمصح ما يتعالج.
ايمن : ليش ادهم مو اخذه وراحوا اطباء على حسابه الخاص ويكلوله بابه كلشي مابيه اصحى مني ومنك..
سيلين : صح ومره نرمان هم كالت حضرنه اني وادهم اجتماع مال اطباء وعرضنه حالته ومحد عرف يشخصها صحيح يعني ادهم ماقصر وياه.
ايمن : لا مقصر وحتى السواه قبل اي واحد ابداله عنده رجوله يسويه يعني روايه طلعتها من جوه ايده جانت بطرك النفس والله متعرفيها زركه صايره وايدها تروح وتجي بالهوة كاسرها وهيه ناعمه خلص عليها لو ما انه الله جابني باللحظه الاخيره وخلصتها منه وهم حقد عليه..
سيلين : يابه نكول مريض ولا على المريض حرج اني سامحته بس خلي يكفه بلائه عنا ويعوف ادهم بحاله..
ايمن : الله كريم هسه منين افوت ..
سيلين : بهذا الشارع بعدين اخذ يسره ..
ايمن : ماشي..
وصلنه للعماره رجفت رجلي خفت انزل ، التفت ايمن عليه وكال .
ايمن : يله ننزل شبيج..
سيلين : شلون راح انزل والله خجلانه من الجوارين..
ايمن : نزلي شمسويه قابل ..
سيلين : زين الولد الدزه فهد وينه.
ايمن : هو كال يجي ينطيهم خبر ويروح احتمال جاي قبلنه.
سيلين : هااا زين لعد..
نزلنه توجهنا للعماره اول ما وصلت طلع ابو عبد من المحل مالته شافني ملامحه عكنشت بقهر ..
ابوعبد : حمد لله على سلامتج بنيتي العماره محلوه بلياج ظلمه والله ظلمه وين يوميه هوستج وسيارتج وعمو عفيه اريد مسواك عمو عفيه الايجار يتأخر عمو المولده والنت جدد الاشتراك شصار بينه عليج عبالك بنيتنه وخطفوها..
ردت اجاوبه قاطعني ايمن من سلم عليه..
ايمن : السلام عليكم حجي..
التفت عليه ابو عبد مبتسم مد ايده صافحه وكال ..
ابو عبد : وعليكم السلام يابه اعذرني بنيتنه اخذت عقلي والله بالي يمها جان ..
ايمن : معذور حجي انه حماها اخو دكتور ادهم اكيد عرفته جان ساكن يمكم بالعماره.
ابوعبد : ايابه دكتور ادهم النسمه الهادئه طلع زوجج والله من عرفت شكد تمنيت التقي بيكم سويه يعني شنو من انسان الله يحفظه لشبابه شكد ساعدني وساعد ابني الله يوفقه ويحفظه شكد ما احجي عنه ما اوفي حقه.
ايمن : ممنونين منك حجي هسه جيت اريد اخذ غراض اختي واخويه تسمحلي لا..
ابو عبد : العماره واصحابها كلها كدامك..
ايمن: والتصوير عندك خبر عنه..
ابو عبد : اي تصوير..
ايمن: مال كامرات بيوم الحادث نريده ..
ابوعبد : والله ماعندي صلاحيه انطيك اي تصوير لان مشددين علينه بأمر من دكتور ادهم والضابط الوياه..
ايمن : زين اذا كتلك دكتور ادهم يريده.
ابوعبد : ماكدر صدكني..
ايمن : ماشي هسه خلينه نصعد بعدين نتفاهم على هذا الموضوع.
ابوعبد : براحتك يابه بس لا تزعل عليه دكتور ادهم خاطره جبير عندي وماكدرت ارفضله اي طلب..
ايمن : عاشت ايدك ..
ربت على كتفه ودخلنه للعماره صعدت وصعد ايمن ورايه جاب المفاتيح مال الشقق..
ايمن: وين ندخل اول شقتج لو شقه ادهم.
سيلين : ادهم..
ايمن : يله..
رحنه للشقه حسب وصف فهد وكفت كبالها وكلبي يدك يعني انت جنت عايش هنا واني بحسرتك وبحسره شوفتك ليش هيج سويت بيه ليش هلكد عفتني..
تذكرت لهفتي عليه وحركه كلبي بفراكه نزلت دموعي ...
فتح الباب ايمن دخلت مثل ترتيب شقتي هول وبعدين تجي غرفه النوم والمطبخ وباقي الملحقات ..
سيلين : ايمن ..
ايمن : نعم
سيلين : اريد ادخل غرفته وحدي واجمع ملابسه...
ايمن : يله براحتج راح اشرب جكاره بين متكملين..
هزيت راسي ودخلت للغرفه علكت الضوه باوعت فراشه مخربط اول تالي رحت كعدت عليه اخذت المخده شميتها ريحته بيها ، كمت فتحت الكنتور ملابسه معلكه طلعتهن قطعه قطعه ابوسها واصفطها بحنيه على السرير غسلتهن بدموعي ، قطعه من القطع بيها ريحته حضنتها وشميتها بجيت فرفحت روحي...
فرغت اول خانه رحت للثانيه والكه بيها قطع من ملابسي ضحكت يا حبيبي بعدك نفس سوالفك واكول ذني القطع وين يختفن عبالي من اشرهم بالبالكون يطيرن طلع ادهمي ماخذهم...
هواي ماخذ مني اشياء مو بس ملابسي حتى فرشه المكياج واقلام حمره ضحكت وبجيت بنفس الوقت...
كملت جمع ملابسه مسحت دموعي وطلعت لايمن لكيته كاعد كبال ميز عليه تلفزيون واجهزه..
سيلين : هذا شنو؟
ايمن : تسجيلات الكامره ادهم طلب مني اجيبهن..
سيلين : شعجب تسجيلات الكامرات مال عماره بشقه ادهم مو غريب هذا الشي .
ضحك ايمن وكال.
ايمن : ذني تسجيلات الخاصه بشقتج..
سيلين : بشقتي شنو مافهمت..
ايمن : ادهم مركب كامرات بشقتج..
سيلين : مستحيل شلون واني وين ..
ايمن : شنو شلون هو مو جان يفوتلج للشقه.
سيلين : اي صح.
ايمن : اي يعني عنده نسخه وهاي التسجيلات هو طلبها وهو يفهمج على كلشي اني ماعندي صلاحيه احجي بأي شي..
سيلين : ليش انت شنو تعرف حجالك شي ؟؟
ايمن : ههههه اشياء بلاوي اشتغل وياج الرجل الخفي المهم من تكعدون تعاتبو ويحجيلج هو احله..
ضليت صافنه عليه رفع ايده حركها كبال وجهي..
ايمن : وين رحتي يمعوده.
سيلين : مكاعد افهم شي شنو السالفه هسه غير تفهموني شنو كل شويه عارفه شغله بالقطاره تحجون.
ايمن : والله والله الله يساعد كلبج اذا عرفتي الباقي خليج هيج احسن شويه شويه صدمه ومفاجأه لحد ما تدخلين مصح بحيل الله ههههه.
سيلين : ليش اكو شغلات اكبر مضمومه وماعرف بيها.
ايمن : اكو شغلات لو تدرين بيها جان حركتي فهد وما شهدتي وياه هههه.
سيلين : غير يحجي شنو مو حركت دمي..
ايمن : بعدين تعرفين كلشي هسه احجيلج وتوكعين عليه وانه كلبي خلصان جمعتي ملابس ادهم ..
سيلين : اي بس ما لكيت جنطه هسه اجيب من عندي واجمع ملابسه بيهن.
ايمن : يله عيني استعجلي يادوب نرجع ولو صار الليل والطريق مزعج بالرجعه بس اريد ارجع واحجي ويه ادهم بالي يمه ...
سيلين : انت كمل الشغلات الوصاك عليها ادهم واني اجمع اغراضي وملابسي ما اتأخر..
ايمن : استعجلي فدوه لعينج.
سيلين : اي والله ما اتأخر..
طلعت رحت لشقتي لميت ملابسي واشيائي وباقي الاغراض المشتريتها كهربائيات وغيرها عفتهن لام عبد ، كملت كلشي اخذت جنطه فارغه ورجعت لشقه ادهم جمعت ملابسه رحت لايمن بلغته كملت كلشي وهو اخذ الجنط ونزلهن اني استغليت الفرصه ورحت لشقه ام عبد حتى اسلم عليها واودعها دكيت الباب فتحتها شافتني وشهكت ..
سيلين : شلونج خالتي العزيزه.
ام عبد : يا هله بسيلين الورده شنو كلبنه راح عليج شنو انكلبت عليج العماره شنو بجيتي الصغار كبل الكبار عليج ياطيبه يا ورده..
تحجي بلهفه عيونها دمعت مسحتها بفوطتها تقربت حضنتها قوي..
سيلين : ادعيلي خاله ام عبد محتاجه دعائج ادعيلي ربي يحنن كلب الدكتور عليه
ام عبد : يايمه من عرفنه هذا الدكتور زوجج وجاي هنا علمود يعالجج حجالي قصتكم ابني عبد متت بجي عليكم شنو من انسانيه عنده وشلون عنده قوه وصبر بحيث كابلج خمس اشهر بدون ما يقترب علمود بس يعالجج..
سيلين : يعالجني؟
حجيتها مستغربه.
ام عبد : مادري يمه هذا كلام عبدالله هو هيج كال.
سيلين : هااا خير ان شاءالله..
ام عبد : راح تعوفون العماره والله تعودنه عليكم.
سيلين : لازم ارجع ويه زوجي وعفتلج هواي شغلات بالشقه كلشي يخصني صار الج..
ام عبد : ليش امي اخذيهن وياج ما محتاجه الله ناعم عليه والحمدلله ..
سيلين : اعرف وربي يزيدكم من نعيمه بس اني ما احتاجهن عندي منهن بلبيت..
ام عبد : الله يبرد كلبج ويسعدج ياطيبه بس انتظرج تجيني بيوم وتحجيلي باقي قصتج هواي شغلات ماعرفتها عنج..
سيلين : هههه خاله الج خلك تسمعيني ساعات بعد.
ام عبد : والله اسمع ما تنمل سوالفج بنيتي ومنا عرفت الدكتور راجعلج تلهفت اسمع اكثر..
سيلين : ان شاءالله اجيج،، اروح اني ورانه طريق طويل.
ام عبد : ما يهلني تروحين والله.
سيلين : لازم اروح بس ادعيلي استقر و وعد مني اجيج اني والدكتور.
ام عبد : انتظركم ربي يسعدج ويفرحج ..
سيلين : شكرا خاله ام عبد يله مع السلامه ...
ام عبد : الله وياج..
طلعت من العماره مودعه كل دمعه ذرفتها هنا وكل حزن حزنته وحدي ودعت مرضي وكئابتي ودعت وحدتي واهاتي ودعت ألمي وجع كلبي ودعت خوفي وانتظاري ودعت حربي النفسيه طلعت متجهة لحياه جديده وحرب مشاعر جديده واعرف نفسي ضعيفه وما املك الكفائه الكافيه لخوض حرب المشاعر الراح يعلنها ادهم ضدي لان بكل بساطه اني مو بكد ادهم ولا اكدر احارب وياه طاقتي استنزفت ...
الطريق كله افكر شلون راح تكون المواجهة شنو راح اكله شنو ابرر وراح يتقبل مني لو لا...
من بعد حرب فكريه نفسيه بيني وبين نفسي وصلنه جانت تقريبا الساعه اربعه الفجر...
طبكنه باب البيت ونزلنه دخلنه للبيت هدوء الكل نايم فتح الباب الداخلي صارت صوت قوي مال باب الحديد عكنشت وجهي تقرب ايمن مني وهمس.
ايمن : فوتي كبل لغرفتج ونامي نومه عميقه باجر الصبح روحيله واحجوا تمام..
سيلين : شيصبرني ايمن.
ايمن : انه مو علمودج هيج حجيت ..
سيلين : لعد .
ايمن : اريد انام حتى من تصير حرب اكون جاهز انقل الضحايا للمستشفى ..
سيلين : هههههه ولك شمتفاول علينه.
ايمن : ولج باجر يرجع فهد والله يستر يعني راح تعلك هنا..
سيلين : الله يستر والله خفت
ايمن : ليش كتلج غلسي ونامي وباجر ربج يحلها..
سيلين : تمام تصبح على خير.
ايمن : وانتي بألف خير.
صعدنه الدرج هو توجه لغرفته واني حايره وين انام وين اروح ضليت صافنه بيا غرفه افوت وكفت كبال غرفه من الغرف سمعت صوت ايمن التفتت عليه.
ايمن : تعاي هاي غرفه ادهم هههه روحي لغرفه نرمان .
سيلين : وين غرفه ايفين؟
ايمن : عوفي ايفين هسه روحي يم نرمان
سيلين : ماشي بس وين غرفتها.
ايمن : ذيج..
اشرلي عليها فتحت الباب على كيفي دخلت وعلكت الضوه فزت على صوت الباب شافتني ابتسمت ابتسامه مجامله مبين ضايجه مني ..
نرمان : هلو سيلين شوكت اجيتي..
سيلين : صباح الخير توني اجيت ..
نرمان : صباح النور تعاي نامي بمكاني واني افرش بالكاع..
سيلين : لا اريد اسبح وبعدين انام.
نرمان : براحتج..
سيلين : ادهم وين ؟
نرمان : احتمال نام تلكيه بغرفته.
سيلين : خليه براحته باجر اروحله ....
اخذت منها منشفه وملابس رحت للحمام سبحت والف فكره تضرب براسي ردت اتخبل اريد ابجي ما اكدر لان البيت هدوء واي صوت يصدر مني ينسمع...
كملت لبست ملابسي ولفيت شعري وطلعت ، رجعت لغرفه نرمان لكيتها فارشه بالكاع وغافيه نمت على الجربايه وضليت كاعده احسب دقيقه دقيقه شوكت يطلع الصبح ، تزاحمت الافكار ابالي ردت انهار اختنكت رحت توضيت فرشت السجاده ضليت بشك هذا اتجاه القبله لو لا ، من اجيت صليت بس جوه هنا افتر راسي فرشتها عليك ياالله وصليت بعدها كعدت على السجاده ودعيت...
مره قريت بكتاب ادعيه اخذته من مكتبه ادهم الدينيه اكو ذكر اليقراه وهو على خصام مع انسان يتبدل خصامهم الى صلح وهو حرز لاصلاح ذات البين وهو...
( ياعزيز المنيع الغالب على أمره فلا شيء يعادله ) اني جنت اردده من تزوجت سامر ومن سألت ادهم عليه كال هذا اذا استمريتي عليه تصيرين عزيزه ومكرمه ومستحيل شخص يعاديج بس اني جنت ما التزم بيه وهسه قررت التزم بيه من اليوم عسى ولعل ربي يحنن كلب ادهم عليه..
كملت وضليت كاعده على السجاده سمعت صوت طفل يبجي ابتسمت هذا اكيد حمودي ابن ايفين شفته بالصور بموبايل فهد يابه شكد متلهفه اشوف اختي وابنها ، طلعت من الغرفه واتبعت الصوت وصلت للغرفه الصادر الصوت منها دكيت الباب اجاني صوت ايفين بعصبيه كالت.
ايفين : منوووو ؟؟؟
ضحكت هسه شتسوي اذا شافتني فتحت الباب لكيتها كاعده على الجربايه وتبدل حفاظه ابنها ...
سيلين : ها لج صرتي ام عوبه..
رفعت راسها شافتني وشهكت كمزت من الجربايه وركضتلي..
ايفين : ولج سيلي
سيلين : افووونه الحلوه اشتاقيتلج ولج صرتي مره وبراسج خير.ههههه
ايفين : وانتي صرتي خاله يالعوبه..
تحاضنه حضن يشرح الفركه والبعد..ضربتها على راسها..
سيلين : اشتاقيتلج نذله شلون تتبرين مني.
ايفين : سكتي يمعوده لتذكريني خليني ناسيه.
حجتها عكدت حاجبها وراحت كعدت يم ابنها كملت اله تبديل..
رحت كعدت يمها..
سيلين : شكو صاير شي مادري بيه.
صفنت بوجهي ونزلت دمعتها مسحتها وكالت..
ايفين : ماكو شي شفتي عمو ادهم حجيتي وياه؟
سيلين : لا مشفته نرمان كالت نايم.
ايفين : يانايم جان يحش جكاير تلكيه بغرفته كاعد شابع قهر..
سيلين : خايفه اواجهة والله
ايفين : روحي احجي وياه بردي كلبه ليصير بيه شي من اجه لسه يحرك بدمه.
سيلين : هسه اروحله ادعيلي افونه.
ايفين : الله يسهلج ويحنن كلبه عليج..
سيلين : قافل مو ؟
هزت راسه وسوت حركه بحلكها تدل على الاسف..
جريت نفس قوي وطلعت من الغرفه توجهت لغرفته ايدي ترجف اريد افتح اليده مال الباب ومتردده امد ايدي وارجع اجرها رفعت راسي ليفوك غمضت عيني بتعب قريت ايات بكلبي وفتحتها اول ما فتحت الباب صارت عيني بعينه التقت نضراتي ويه نضراته الضايعه ....
دخلت رجلي ترجف سديت الباب ورايه ...
باوعتله ورفعت صوتي حجيت برجفه كأنما ثمله بخمر البعد ..
سيلين : ادهمي اشتاقيتلك..
اشاح بوجها للجهه البعيده عني....
عيوني رادت تطلع من مكانها من وجع راسي اريد اسفط كلمتين واحجيهن ماكدرت..
باوعت على غرفته صايره مدخنه بس بجانبه قران وسجاده مبين جان يصلي قبل لا افوت لهذا اطمأنيت بلكت نحجي بدون توتر...
تقدمت حجيت بصوت مترجيه عطفه وحنانه حتى يسامحني رخت اطرافي وذبلت اجفاني حسيت راح افقد الوعي لان بلشت افقد الادراك الحسي والصوري بدت الدنيا تظلم بعيني...
مواجهة صعبه والله اصعب يوم مر بحياتي هذا اليوم واصعب موقف اواجها هو هذا..
الانسان الكدامي ابويه قبل ليكون زوجي ، حضني الدافي بيتي ملجئي اماني...
سيلين : ادهم اسمعني يله تحكم عليه فدوه رحتلك..
رفع عينه باوعلي بنضره غريبه نضره كلها حقد ضيق عينه وعكد حاجبه يستمع ...
انفجرت ابجي تقربت منه اريد الزمه احضنه علمود احجي وياه دار وجهة عني.
سيلين : الله عليك لتباوعلي هيج اروحلك فدوه لتباوعلي هيج اموت والله اموت ادهم ارحمني الله يخليك والله تعبانه ..
غمض عينه بقوه اخذ نفس ارتفع صدره بقوه وهبط بهدوووء ...
فتح عينه باوعلي بغضب وكف واني هم وكفت صار قريب مني وعاط بعلو صوته..
ادهم : انتي شلوووووووووون هيج تسووين بيه ولج ماخفتي مني ماكلتي هذا رجلي شلون هيج افشله كدام عمامه وناسه شلون اصغره شلون اضيع سمعته شلووووون فهميني.
يحجي ويهز بيه حيل...
بجيت كأنما طفله وابوها كاعد يعاقبها على غلط اقترفته وهو محذرها منه...
جاوبت بضعف..
سيلين : ساعدت اخوك وانت هم تحبه ليش تنكر..
ادهم : سااااعدتي الخطفج ساعدتي الوصلج للأدمان ساعدتي الخرب حياتج مرتين ساعدتي الطعنج بشرفج ساعدتي الغدر زوجج وخسره كلشي صحته وماله ومنصبه وشرفه وزوجته هااااا المن ساعدتي المن بس انتي بهذا السويتيه خسرتيني وللأبد ولو تموتين ياسيلين ماحن عليج وراح اخليج بحسره النضره مني و الكلمه..
سيلين : والله من سمعت قصته خلاني اطلع عن نطاق الفكر شفت الاصح اني اساعده واذا ساعدته راح نرتاح كلنا واولهم انت..
ادهم : غبييييه انتي غبيييه.
سيلين : صح غبيه بس انت لو مفكر بيها وما جايب شرطه وياك ومتصرف بسكوت بعيد عن عمامك وحاليها بينكم جان ما صار الموقف هذا كله ونحلت بهدوء..
اني حجيت هيج لو تخبل عليه كام يصيح..
ادهم : ولج ياهدووووووووء لج اسبووووع انه ما نايم ماعرف طعم الراحه شنو افكر هسه هيج سوه بيها هسه اعتده عليها حتى يحرك كلبي لا هسه قتلها الف فكره سيئه اجتي ابالي وبعدين شلون اقاربي ما يدرون مو انه ماخليت باب ما دكيته وانذليت الهم في سبيل يتوسطون عند عمي هاشم ويرجعون علي حتى ارجعج وجبتهم وياي لان الكل عرف انتي عد اخويه يعني شرفي راح سمعتي صارت بالوحل شنو يفكرون من يسمعون اخويه خاطفج عنده بشنو يفكرون ومن اجي اريد اثبت التهمه عليه حتى يتحاسب النذل تجين بكل صلافه وبرووود وتخلين عينج بعيني وتجذبيني وتكولين انه رحت وياه برجلي علمود الوي ذراع زوجي ويرجع ابن حمايه ، ولج لو اموتج هسه ما يبرد كلبي..
عاصر متوني بكل قوته وكاز على اسنانه خازرني ويحجي لويت ركبتي حجيت بضعف ودموعي تنزل..
سيلين : والله مافكرت هيج فكرت اساعدهم وبس والله ياكلبي ماجان عندي قصد اسيء الك.
ادهم : بس اسأتي..
سيلين : ادهم لو شايف فرحه اخوك بأبنه وشلون يريد يتعالج ويتغير صدكني تنسى حقدك كله.
عكد حاجبه وحلكه رجف...
ادهم : انتي شكاعد تحجين منو كلج انه حاقد عليه اليسمعج جنت احفرله واريد أأذيه لج خطف مرتي وضيعها مرتين بالمره الاولى جنت مسافر والمره الثانيه من رجعت ويهددني بيج انتي تعرفين شسويتي بيه شلون صغرتيني بين الناس لج ماعندي عين احجي وياهم ماعندي عين اكول انتي مرتي بعد السويتيه..
سيلين : فهد حجه وياهم من انت طلعت وشرح الصار كله يعني برأني وهو تحمل الذنب وحتى صار الحق ويانه الله يخليك لتحقد عليه والله ما اتحمل..
ادهم : قررت قرار ومامنه رجعه وديري بالج تعترضين.
لزمت راسي غمضت عيني وفتحها اريد استوعب الراح يكوله بلعكت ريكي حلكي يابس ..
سيلين : الله يخليك اذا صعب ويأذيني لتحجيه ابوس ايدك ادهمي اني سيلينتك نسيت ...
تقربت منه اكثر و لزمت وجها بيدي واتوسل بيه نضراته تتفاده نضراتي..
سيلين : انت تحبني صح وماراح تعوفني مو انت ادهمي...
عكد حاجبه وحجه مستنكر سؤالي ...
ادهم :انتي رفعتي دعوه تفريق وانه تمسكت بيج، هسه انه راح ارفع دعوه وانطيج حريتج.
حجاها ورجف حلكه رفع ايده خلاها على عينه وعصرها قوي..
سيلين : تريدني اموت سويها وبعدين وين اروح تعوفني وحدي شلون اعيش بدونك.
ادهم : مثل ماعشتي سنه ونص وطبيتي وطلعتي اشتغلتي ودرستي يعني كملتي حياتج ما محتاجتني والدليل انخطبتي منا رفعتي دعوه تفريق منا.
سيلين : ياالهي والله هذا الخطبني كعدت وياه حتى يعوفني لان لزكلي وكل يوم داز موظفين عليه ، واني من رفعت دعوه تفريق ردتك تسوي شي ردتك تطلع كدامي واحاجيك لان تعبت ادهمي تعبت وانت تلعب بأعصابي...
ادهم : زواجنه من الاول جان غلطه وهواي شغلات ماتت بداخلي اتجاهج ولو تحركين نفسج ما راح تحييها..
سيلين : هذا قرارك الاخير.
ادهم : اي وما اتراجع عنه..
بعدين سمعنه اصوات من بينهن صوت فهد دفعني وطلع من الغرفه طلعت وراه نزل سريع مثل الاسد المجروح اول ماشاف فهد ضربه بوكس بوجها ، فهد ضل واكف يباوع عليه ساكت..
ادهم ضل يصيح بصوت عالي ويفرفح..
ادهم : لك سنين اداري بيها واشيلها على كلبي عالجت وداريت ووكلت وشربت ودرست وعلمت وتجي بأسبوع تفر عقلها عليه وتخليها تشهد ضدي كوو******** نذل..
ورجع ضربه فهد جاوبه بهدوووء
فهد : زوجتك ساعدتني ماسوت شي غلط حتى تاخذ هيج موقف منها..
ادهم : ساعدتك يانذل على حسابي وحساب سمعتي تساعدك.
فهد : ماسوت شي غلط وانه شوفت التصوير لعشيرتك خاف عبالك بس حجي وجبت الك كل التسجيلات بالوقت حتى خاف اكو شك بكلبك تجاهنه تمحيه..
ادهم : لك فهدددددددددد اليوم اموتك والله.
ضل يضرب بيه بوكسات على وجها وفهد مستسلم ..
فهد : اضرب برد كلبك...
ابوهم راد ينجلط يحجي ويفرفح نزل ايمن من فوك ضل صافن عليهم رحت وكفت يمه جسمي يرجف كلبي راد يوكف بصعوبه طلعت مني كلمتين..
سيلين : ايمن فاككهم عفيه.
نزل ايمن قبل لا يوصل الهم ادهم تخربط وكع بالكاع ...
ضربت على وجهي وعطت بعلو صوتي..
سيلين : ادهميييييييييييييي.
عل حب كتلك البي تضحية ايعيش
خذت رأيي وسمعتة وبية ضحيت
وشفت حفل افتتاح اجروحي للناس
وشفتك من بعيد ابروحي كصيت
من شفتك اطش اسنيني والله
لان بيهن حلا حسبالي جكليت
غشيم وكلت ما اساوي اليلمون
عزت نفسي ماخلتني لميت
انة وبلا وعي انطيتك الروح
وعقل ماجان عندي وهسة فزيت
ماجذب واكلك باجر انساك
عفتني وذكريات اهواية خليت
طلاسم نضرتك فكته الاعذر
وبعيونك اشكدالغازحليت
محسوب سري وانت مكيول
وعلى اصغر اعدائك مانضميت
اني ظهري احترف طعنات الاعزاز وكمت
اعرف اديهم لو اندجيت
بلا شوف واكلهم هامنو افلان
بس انت عكسهم ما اتسميت
حتى انساك لازم يلغي اليل
اذا بليل اذكرك جا اسويت
واحتار من اضل ابين راين اذا
عل راي منهن ما استغنيت
بما انك عفتني ابكل الاحوال
ما تفرق نسيتك لواتناسيت
ايهاب المالكي...
شكرا لزيارتكم عالم روايات سكيرهوم
