رواية جذبني فمك البني الفصل التاسع والستون 69 بقلم عبير إدريس

فؤادي بين أضلاعي غريب

يُنادي مَن يُحبُّ فلا يُجيبُ( قيس) 

ادهم 💫سيلين

____ 

ضي : فهددددد فهددددد الحك ايفين.. 

 اريد اكوم ماكدر رجلي ماتت عيني صارت على فهد جانت الجكاره بحلكه طلعها ومردها بيده وكمز يركض صعد الدرج بدون ميسأل ضي شبيها ايفين،

 ماعرف منين اجاني الحيل ومنين اجتني القوه كمت اركض ماحسيت بنفسي اله اني يمهم بالغرفه باوعت الكاع كلها اشرطه فارغه مفرغه الكبسول منهن ، تخبلت يعني شنو منتحره بدون وعي كمت اضرب على وجهي..

باوعت بخوف لفهد لازمها ويضرب على ظهرها ، هيه بين النايمه والكاعده بعدها مافاقده الوعي ، لزمها من راسها وفتح حلكها دخل اصابعه بيه خلاها تتقيء ذبت من راسها ، وكامت تشهك ، رجع دخل اصابعه مره ثانيه ورجعت تقيأت ...

ضليت باهته ماعرف شسوي يعني ليش انتحرت ليش هيج ايمانها ضعيف ليش هيج سوت ليش ضلت اردد بهاي الكلمات الى ان عاط فهد بصوت عالي...

فهد : ميييييي جيبولها ميييييي.. 

 ركضت ادور بالغرفه كمت كلشي ماشوف عاط من ورايه.. 

فهد : ذاك كبالج على الميز .. 

اخذته ورحت خليته بيده فتح البطل وغسل وجها و شربها مي ، ضلت تخوع لعبانه نفسها ، كعد بالكاع وخلاها بحضنه وخر شعرها من وجها ، يباوعلها ويتنفس بغضب عضلات وجها ترجف .. 

همس بتعب مقهور.... 

فهد : ليش هيج تسوين بيه شفتيني ارتاحيت استكثرتي عليه الراحه ليش حبيبتي ليش هيج تسوين . 

سيلين : عفيه فهد كوم ناخذها للمستشفى كوم الله يخليك اختي ماتت مو . 

يباوعلها ويمسد بوجهه دنك راسه باسها بخدها وكال.. 

فهد : ففتي بطله مابيها شي ان شاءالله عدت بس للأحتياط طلعيلها ملابس اخذها للمستشفى.. 

جريت نفس مسحت دموعي وكمت ايدي ترجف جسمي يرجف خوف عليها الحروف تسطرت بلعومي اريد احجي واسأله خاف تموت واخسرها بس مكدرت احجيها مكدرت طلعت الها ملابس وطلعت اليه عبايه لبستها فوك ملابسي وعدلت الشال شلون مجان ورحت حتى البسها كام فهد شالها و خلاها على الجربايه.. 

فهد : لبسيها على راحتج وانه راح انزع ملابسي واجي..

سيلين : ماشي.. 

باوعت ملابسه متدمره جانت ضي واكفه تباوع خايفه ، حجه وياها فهد .. 

فهد : بله زحمه عليج اذا كدرتي نظفي الكاع واذا مكدرتي انه من ارجع انظفها.. 

ضي : لا على بختك ابو علي هسه اني انظفها. 

فهد : يخليلج ايمن يابه. 

ضي : رحم الله والديك.. 

اخذ ملابسه وطلع واني كملت تبديل لايفين تروح بيدي وتجي عبالك ميته تخبلت عليها كمت اربت بيدي على وجها واحجي وياها ... 

سيلين : حبيبتي افونه ليش هيج سويتي تريدين تموتيني وين تعوفيني منو ضل عندي غيرج منو ؟؟ 

بجيت وحضنتها ضليت ابوس بيها واشتم براسها ...

دخل فهد للغرفه وكال.. 

فهد : تجين ويانه بيج حيل لو اخذ نرمان؟ 

سيلين : لا اني اجي وين اكدر اضل هنا..

فهد : براحتج لعد استعجلي..

شالها وكال 

فهد : يابسم الله ... 

اخذها وطلع نزل ونزلت وراها ، الكل يسأل شكو ميدرون لان جانوا يم ادهم تجاهلنه اسئلتهم وطلعنه ضلت ضي تشرح وتوضح امشي وراهم واشوفه يبوس براسها وماعرف شنو يهمس باذنها ، جان محاوطها بحضنه خايف عليها عبالك بنته ، 

طلعوا ورانه كلهم يسألون شكو ليش هيج صار ليش هيج سوت بنفسها التفتت عليهم لكيت روايه هم واكفه تباوع ، درت وجهي وطلعت سديت الباب وصعدنه بالسياره خلاها بحضني قبل لا يصعد اجه ايمن صعد ، التفت علينه جان مرتبك شكله خايف قبل لا يصعد فهد كال. 

ايمن : ليش هيج سوت ليش ؟ 

سيلين : ماعرف ماعرف جوز متحملت الضغط عليها هيه صارلها كم يوم مو على بعضها وبس تبجي.. 

عيونه جانت خايفه هيج قريتها ، سوه حركه بحلكه متأسف على وضعها... 

صعد فهد وهو التفت كعد عدل . 

الطريق كله اقره ايات عليها كلش خفت اخسرها حسيت روحي بزجاجه ومقفوله عليه من كثر الخنكه الحاستها خفت خفت هواي لا اخسرها ما اتحمل خسارات اكثر والله ما اتحمل تعبت... 

رفعت راسي سندته على الكشن واجتي ابالي هلوسات ، حبيته هوواي وتعلقت بيه معقوله يعوفني بهاي السهوله ويدير وجها ويروح ما اكدر اتخيل حتى بمخيلتي هذا الشي يتحقق ويصير واقع ، اني جنت ميته هو بث بيه الحياه نفخ روحه بداخلي اني صرت نسخه مصغره عن الادهم حبيته بل عشقته لدرجه كمت استخف بالوقت وما احسبه بحسابات عمري لان هو مابيه... 

دنكت راسي باوعت على ايفين وجها شاحب عيونها داخله بنكره واجفانها عباره عن لون احمر مائل للأزرق حسيتها تحتضر بس عقلي رافض هيج فكره رافض يفكر بأختي بشي موزين ثارت مني كلمات ضايعه خلت فهد يضرب بريك رجنه رج من القوه مالته.. 

سيلين: لا مستحيل يعني متي لالا ربي،،،

ولج ادعيلج وربي راح يستجاب وين تروحين وتعوفيني وحدي وين ولج بعدج بعيوني ذيج الصغيره التنامين واجي اغطيج كل شويه اخاف عليج من البرد شلون تروحين وحدج بالمقبره ولج هناك بارده تبردين والله تبردين .

ماحسيت اله الباب نفتح وصعد فهد بصفي يكلب بيها ويدور على نبضها مثل المجنون خله اذنه على صدرها سمعها تتنفس غمض عينه وكال. 

فهد : الحمدلله يارب الحمدلله ... 

ايمن : شبيج يابه خبلتينه ... 

سيلين : ليش شكو ..

باوعلي فهد هز ايده ونزل من يمنه طلب من ايمن يسوق وهو صعد بمكانه صعد وكام يدردم بكلمات مسموعه.. 

فهد : خبلتني خاف انه عايز استغفر الله ربي.. 

نزلت عيني على اختي وكمت امسد براسها وادعي.. 

سيلين : الهي دخيلك امنحها حياه اجمل من حياتي وعوضها عن كل شيء سيء مرت بيه والله هيه طيبه بس طايشه ومتعرف تتصرف الهي جنت ما اتحمل يصير بيها فلاونزه عاد تموت ياربي هيه ضعيفه ومريضه ارحمها برحمتك الواسعه... 

رفعت راسي باوعت ليكدام لكيت ايمن يباوعلي بالمرايا ماعرفت افسر نضراته مقهور مستغرب المهم بيها حجي هواي ماعرفته.. 

وصلنه للمستشفى والحمد لله طمنونه مابيها شي بس سوولها اجراءات خاصه بحالتها استفسروا من الحاله حجالهم فهد شلون حاولت تنتحر وهو خلاها تتقيء اثنى الدكتور على تصرفه وشلوت هوخلصها من التسمم المحتمل حدوثه لو تاركين الحبوب بمعدتها بين ما ناقليها للمستشفى...

دخل الدكتور يمها واني كعدت مابيه حيل اوكف ، فهد واكف يم الباب مال غرفه ايفين وايمن كعد يمي خيم الصمت علينه وبدت علامات التعب تنرسم على وجوهنا ، وره ساعه تقريبا .. 

بلغونه بحالتها استقرت ومابيها اي شي يخوف ونكدر نطلعها بأي وقت نريد دخل فهد واحنه ضلينه بره ردت افوت سد الباب.. 

ايمن : بعدين فوتي خليه يمها.. 

رحت كعدت يمه دنكت راسي سمعته كال. 

ايمن: شكثر جنت احبها متتصورين وشكثر اذتني رغم هذا خفت عليها اليوم ماردتها تنهي حياتها وتروح حتى لو غدرتني واخويه غدرني بس تمنيت ينسعدون بحياتهم ممكن جانت كلماتي قاسيه عليها وممكن انه الي ايد بالحاله الوصلتلها هسه بس من هاي اللحظه بعد ابد ما أأذيها واضل معتبرها اختي وسند الها وكت الشده ... 

سيلين : ادعيلهم الله يلم شملهم وينسعدون مهما كانوا سيئين احنه نكدر نغيرهم ونرجعهم للطريق الصحيح افضل ما ننبذهم ويتحولون لناس سيئه ويحركون كل واحد يمر بطريقهم او يختلف وياهم بسبب حقدهم وغضبهم. 

ايمن : صح صح .. 

حجاها وتنهد... 

ايفين... 

فتحت عيني ورجعت سديتها تنفست وحجيت بصوت خافت. 

ايفين : حمودي وين حمودي.. 

اجاني صوته وجنت مستبعدته مستبعده اسمعه كلت راح مني واختار حياته ويه ابنه وزوجته وترتبت حياتهم واني خسرت كلشي كونت فلم بمخيلتي..

فهد : اطلبي يابه اي شي يجيج حمودي هسه اجيبه شنو تريدين بعد كولي .. 

التفتت عليه جان حلكي يابس عطشانه همست بضعف..

ايفين : اريد مي فهد عطشانه شفتي يابسه. 

ضحك وباوعلي بمكر تقرب باسني بقوه من شفتي بدون مقدمات.. 

جانت بوسه حنينه عكس كل مره احسه يصب جام غضبه بيه وقهره يترجمه بالعلاقه.. 

رفع راسه وباوعلي بحنيه وكال.. 

فهد : انطيني وعد رجال ففه تستردين عافيتج وترجعيلي ولج انتي مو بس زوجتي لا انتي الصديقه انتي أمي تعرفين شعوري بأتجاهج كأنما انه ابنج ، علمتيني وبختيني سهرتي عليه حننتي كلبي عليج غصب عني حبيتج وين عايفتني ورايحه غير اموت غير اتخبل ليش هيج تسوين بيه ياعمري ليش.. 

ابتسمت بتعب. 

ايفين : اول مره تكول عمري. 

فهد : وحبيبتي وكلشي حلو بحياتي انتي ، يانوبات خبالي وجنوني ولهفتي انتي الحبيبه الحقيقيه انتي الصمت الرهيب البداخلي انتي صخب الحياه وجنونها انتي سيده عمري.. 

ايفين : هههههه مابيه حيل اضحك والله. 

فهد : ليش ولج صارلي اسبوع اتعلم من دفتر ادهم بكته هو ونايم جان يكتبهن لسيلين كلت احفظهن واسولفهن الج بليل بس صارت هنا ادري بيه نافسهن عينه وره كلماته ماتهنيت وشعرتلج بليل .. 

ايفين : هههههه مو اكول انت وينك وين الصخب والله ضحكتني .. 

فهد : صدك هو شنو معناه.. 

ايفين : شنو؟ 

فهد : الصخب شنو يعني . 

ايفين : هههههه لعد انت كاعد تتغزل غير تعرف المعنى مالته شنو بله غلطه . 

فهد : لج لا هذا ادهم ميغلط. 

ايفين : وانت شلون تاخذ دفتره مو عيب.. 

فهد : صورته بموبايلي ورجعت الدفتر شو شفت جنون وصخب عجبتني السالفه.. 

ايفين : واكووول شايل الموبايل بيدك وتتغزل.. 

حك شعره وغمض تك عين وكال. 

فهد : صعبات ما ينحفظن المهم انه بالكلام ماعرف اعبر بلبيت اعبرلج احسن. 

ايفين : الحمدلله من سمعت منك كلمتين .. 

فهد : هههههه باعي ماكو ادهم كاتب انتي سيدتي العظيمه التي فكرت بالجميع الأ بنفسها انتي طبيبه الناس وانتي عليله وفوكاها يكول اسافر بلياج ولج فد واحد جذاب.. 

ايفين : فهد شعليك بيهم عيب تتطفل على خصوصياتهم.. .. 

فهد : اتخبل من واحد يصلي ويجذب خو كول احبها وجرها احضنها ونام دخيل علي شكد يحب الدراما ..

ايفين : مابيه حيل احجي فهد عوفني بحالي.. 

فهد : حسابج بعدين ففه تعوفيني بنص الطريق مو؟ 

حجاها وخزرني... 

درت وجهي على الجهة الثانيه وهمست..

ايفين : متحملت ترجع الها مجرد فكرت بيها انترست روحي ألم وغضب كلت كل السويتيه ايفين راح هدر ومنا طلاك سيلين ووضعها الصحي ومنا وكعه عمو التمت عليه وما تحملت.. 

فهد : صار ضغط عليج اعرف وانه كايلج قبل ماعرف لا روايه صارت ماضي أليم بالنسبه اليه واليربطني بيها ابني وبس لابد بيوم نلتقي سوه واشوفها بس مو معناها راح احن الها وابدلج بيها مستحيل ..

ايفين : انت مفهمتني ولا حجيت ويايه لهذا كلت خسرت كلشي اختي وزوجي وبيتي وابني لهذا ايست.. 

فهد : حبيتها مال زوجي هههه. 

ايفين : لعد انت شنو ؟ 

فهد : منو جانت تكول اجه العله..

ايفين : هيه مرتين دردمت بيني وبين نفسي وانت سمعتني وتوبتني بوكتها. 

فهد : بس جنتي تستاهلين لسانج طويل ...

ايفين : وانت سوالفك متنجرع فهد. 

فهد : اتغير بس انطيني صبر وهذا الدكتور البارحه ردت افلش وجها كل شويه يصفن بوجهي عبالك ياخذلي صوره والله عينن من جنت امتحن شفهي وام الانكليزي تكلي على معنى وماعرفه نفس الصفنه حسيت بشعورها وحركه كلبها..

ايفين : فهد هم راح تهججه هذا ثاني دكتور تبدله صدك جذب. 

فهد : لج ففه والله همه مخابيل تخيلي يشغل موسيقى ويكلي غمض عينك وتخيل اغمض منا بارده ومنا الصوت يخدرني وماشوف نفسي اله نايم وره شويه يكعدني يكلي ها تمام اكله تمام يكلي يله تعال اسبوع الجاي وهاي صار جلستين انه نايم بيها كلشي ما مفتهم ويكلي وضعك في تحسن جيد هههههه..

ايفين : هههههه عزه بعينك فهد يعني تجذب علينه وتكول داصير زين. 

كرص خشمي وتقرب باسني وكال. 

فهد : انتي علاجي واولادي همه علاجي وبيكم انه راح اتعالج بس اضل اروح علمودكم ولو هو شيسويلي يكلي اكعد سولف وانه كلبي خلصان خو اكعد اكابل هذا الوجه الحلو واكعد اسولفله وهم انه مستفاد شويه احصل بوسه شويه حضنه شويه مغامره هههههه. 

جريت نفس قوي وكتله. 

ايفين : الله يحفظك بس اريد منك شغله. 

أشر على عيونه وكال..

فهد : من هاي كبل هاي طلبي واعتبريه تم. 

ايفين : ترجع علاقه عمو بسيلين وميسافر الا هيه وياه. 

فهد : هاي سهله عندج شي بعد.

ايفين : شو انت مرتاح سامع شي من عمو..

فهد : شبيج عمج مثل الملح من تخليه بالمي يفور بعدين يركد انطي صبر يومين يكوم يحوص عليها كم مره نزلت من فوك لكيته كاعد يم راسها هيه ونايمه. 

ايفين : عزه بعينك وانت شعندك تنزل جوه. 

فهد : هيج مرات اطلع ادخن بره انتو نايمين وحمودي اذا علكت ضوه يفز اسهر بره واصعدلكم الفجر.. 

ايفين : مو رجعلك علاوي كافي سهر.. 

فهد : شوعبالك تعودت مادري .. 

ايفين : الله كريم شوكت نطلع منا اختنكت. 

فهد : هسه نطلع بيج حيل مو . 

ايفين : اي. 

فهد : صايره بروسلي.. 

ايفين : شنو؟ 

فهد : لا هيج تذكرت زي افلام من شفتج فوك والله نفس اللقطه قبل اسبوع امي جانت تشوف مسلسل البطله شمرت روحها من المحجر مال الهول واجه البطل يركض ماعرف شلون حس بيها بس كلبه علمه المهم ركضلها وهيه توكع بالبطيء اخر شي وصل الها وتلكاها باوعت بوجهه ابتسمت وحضنها وعلى حضي هذا المشهد تكرر اليوم وياج بس السويته زوعتج دم هههههه. 

ايفين : فهد كافي تصنف تره ضوجتني .. 

فهد : يله ماحجي بعد خاف هلمره تنتحرين من صدك شيخلصني.. 

ايفين : طلعني الله عليك والله ضجت . 

فهد : لعد شلون تريدين تروحين للكبر عيارات النسوان هههههه جان هناك استلموج دك بالصونده وانتي منا افعالج كلها شينه بعدج ما حاجيه لاختج على البلاوي السويناها والله فشلان منها شلون بله اذا ادهمنا حجه ..

ايفين : الله يستر عبالك سيلين راح تسامحنه بسهوله شوف شنو راح تسوي هاي اذا ما راحت بيها ..

فهد : الله كريم نشوف شلون نحجي وياها.. 

خليت ايدي على وجهي فركته حيل طلع ودخلت سيلين وتبعها ايمن تحمدولي بالسلامه جانوا ثنينهم خايفين عليه طلعنه للبيت بطريق الرجعه كل شويه فهد ذاب حجايه من حجايات عمو القاريهن بالدفتر ويباوعلي بالمرايا ويضحك.. 

فهد : حمد لله على سلامتج سيدتي العظيمه.. 

لو يكول كأنكِ قطنيه في ملسمكِ ... 

سيلين مستغربه وايمن يضحك واني افور خاف سيلين تقراهن بعدين وتعرف بيه هو قاري بدفتر ادهم وعيب منهم أأشرله اغمز اريده يسكت ماكو مستمر.. 

سيلين : هذا شبيه رجلج اليوم كالب فصحى هههه. 

ايفين : شمدريني.. 

سيلين : شلون صرتي احسن مو. 

ايفين : اي مابيه شي.. 

فهد : ففه انه زوعتج لو باقي بيج جان غسلوا معدتج. 

ايفين : ادري صار خمس مرات عدتها عليه. 

ايمن : ههههه شراح يخلصج بعد ياخذله سنه يضل يعير بيج 

فهد : انت اسكت تره خفت عليها . 

رفع عينه باوع لسيلين بالمرايا وكال..

فهد : عليج الله موخفت عليها احجي ضميرج..

سيلين : اي صح كلنا خفنه عليج حبيبتي تنذكر متنعاد .. 

خليت راسي على كتفها وغمضت اختي هاي امي اوووف شلون اعوضها عن الصار شلون اكفر عن ذنبي شسوي وتسامحني اذا عرفت..

رجعنه للبيت كلهم جانوا قلقين عليه هذا اللي يلوم وهذا اليتحمدلي بالسلامه حتى عمو ادهم هم جان بالهول منتظر جيتنه تحمدلي على السلامه مجرد شاف سيلين دار وجها وراح للأستقبال التفتت عليها شفتها مشخصه عينها عليه من فات للغرفه نزلت دمعتها ... 

تقربت منها اواسيها..

ايفين : ميخالف حبيبتي صبري عليه يتغير والله ميضل هيج. 

سيلين : ماتحمل بعد هجره صعب عقابه صعب ماتحمل هيج يعاملني لو يضربني اهون عليه... 

ايفين : الله يهدي سركم. 

سيلين : روحي صعدي نامي وارتاحي ولتسويها بعد. 

ايفين : ان شاءالله.. 

صعدت واني ضليت كاعده جوه وعيني على الباب مالته اروح احجي وياه لو تتأزم الامور اكثر من ماهيه متأزمه.. 

مرت ٣ ايام على حادثه ايفين باليوم الرابع فاتت نرمان للهول شايله بيدها صينيه تريد توديها لادهم حتى يتغده كمت وكفت وكتلها. 

سيلين : خليني اخذها اله.. 

باوعتلي ابتسمت وكالت 

نرمان : الله يهديه عليج. 

ضحكت لان حسيت الجليد البيني وبينها ذاب اخذتها منها ورحت كلبي يتراقص فرح فتحت الباب ودخلت جان يكلب بالموبايل شافني بهت مجان متوقع افوت .

دخلت وخليت الاكل على الطبله كدامه وكتله. 

سيلين : شلونك اليوم ان شاءالله صرت احسن.. 

مجاوبني ولا رفع عينه عليه لزم موبايله واتصل حجه بهدوء.. 

ادهم : نرمان وين الغده؟ اي وشكايل انه ... 

عكد حاجبه وسد الموبايل مدد وخله ايده على عيونه صح انقهرت بس يستاهل اجرب واحاول لحد ما يقنع ويفهم ابويه هذا ابويه اوووف ياسيلين وحضج اووف. 

اخذت الصينيه وطلعت ، مرت الايام وصار شهر ونص على عمليته واني بجهة وهو بجهة كام يصعد فوك بغرفته ينام مرات يطلع العصر شويه ويرجع وكل ما نتصادف يسوي روحه مشايفني واني بهاي الفتره بس الله يدري بيه شلون مرت عليه وشلون افور ، معدتي نار وكل يوم اغير نوعيه فوار جديده ومتفيد ... 

مره اجتي ايفين كالت راح نطلع وفهد يكول تعاي ويانه... 

اني جنت ضايجه بس بنفس الوقت ماحابه اطلع ، اجتي ابالي فكره اثير غيرته عليه مثل ما سويتها ودزلي مسج ارجعي للبيت لو ميصير خير ههه صعدت فوك بدلت وخليت مكياج علكتها ، اعرف اني بفتره عده بس ردت اثير غيرته لان اعرفه مستحيل يخليني اطلع هيج بدونه لو هو ويايه لو ميقبل.. 

نزلت سألت ايفين عليه كالت بالاستقبال كاعد ، كلت اروح اكله راح اطلع من باب لازم استأذن وكذا واني فعلا لو ناويه اطلع من صدك هم اروح واستأذن منه يله اطلع حتى لو منفصلين اضل احترمه ...

دخلت وكفت كباله باوعلي عكد حاجبه ودنك ، كلت بكلبي صدك جذب حتى البني ماهزك... 

سيلين : راح اطلع ..

مجاوبني. 

سيلين : كلت اكلك ليش بعدين تكول مكالت.. 

تنهد جر نفس طويل وضل ساكت رجله تهتز ، طلعت وصلت باب المطبخ سمعته يصيح بصوت عالي.. 

ادهم : مررررررريم مرررريم 

ضليت واكفه بمكاني عرفته راح يدزها عليه وصدك اجتني شايله بيدها كلينس سويت روحي ضايجه اعرفها كلشي تحجيه لابوها ..

سيلين : هاا مرايم .. 

مريم : هاج . 

سيلين : شنو 

مريم : كلينس بابا يكول مسحي حمرتج يله تطلعين.. 

اخذت منها الكلينس وكتلها. 

سيلين : كليله متمسحها لش من اجتي يمك ما طلبت منها... 

عفتها وسديت باب المطبخ طلعت لفهد وايفين كتلهم ماروح ادهم مقبل اجي فهد راد ينزل يحجي وياه كتله لا راحوا واني رجعت للبيت شافتني امهم كالت. 

فردوس : ها شو رجعتي ؟ 

سيلين : ما حابه اروح. 

فردوس : كيفج. 

صعدت بدلت ورتبت شعري كلت الولد ماكو اليوم اله احرك كلبه اشوفه شلون ميهتززز ، نزلت سويت ماعون فواكه ودخلت يمه بالاستقبال ، شافني انصدم عباله رحت.. 

كعدت كباله وخليت رجل على رجل اكل واراقب بحركاته متحمل طلع من الغرفه.. 

ومره تصادفنه اني وياه هو ديطلع من الحمام واني ردت افوت باوعلي صفن بوجهي ودنك تعداني همست..

سيلين : ياقسوتك ..

سمعته استغفر وراح... 

بيوم طكت روحي متحملت بعد هو فوك نايم واني جوه والليل طويل ويجر عتاب انين يصدر مني وانفاسي مكتومه اخاف يسمعون شهكاتي ، 

مسحت وجهي وكمت دخلت لغرفه نرمان جانت نايمه غيرت ملابسي ورتبت وجهي وطلعت رجلي اخذتي لغرفته بدون ما ادك الباب فتت وكلت شيصير خلي يصير لو تحترك الدنيا اليوم احسمها وياه.، 

الغرفه ظلمه بس ضوه خفيف داخل من الشباك مال حديقه ، لكيته نايم فتحت اللحاف ومددت بصفه بس بينه مسافه ، حس عليه لان نفسه تغير ضل ساكت مبدرت منه اي رده فعل حجيت بهدوء... 

سيلين : متصورتك كلبك قاسي على سيلينتك لهدرجه تعرف اني ماكدرت انام ولايوم واذا نمت معناها التعب غلبني مو نعاس ابد مو نعاس اليخليني انام التعب ، اعرف خسارتك جبيره واعرف جرحك اكبر واذيتك هواي بس مو عن قصد والله واني ماخنتك ادهمي شلون هيج تفكر بيه شلون فهمني كل عقلك اني اخونك ويامن ويه اخوك صدك تحجي يعني اني كل الحب الاحبه الك اروح ابدلك برجال ثاني.. 

من هيج حجيت انتفض غضب و التفت عليه بعصبيه وكال ... 

ادهم : لج شنو هالحجي انتي شدتخربطين .. 

جابوته بهدوء وبغصه خانكتني..

سيلين : ليش مو هذا كلامك وبسبب هذا تفكيرك طلكتني.. 

ادهم : وانتي هيج فسرتي كلامي.. 

سيلين : لعد شنو تفسيره 

ادهم : انه لو اعرف بيكم تخونوني بعلاقه اخليكم عايشين وتشمون الهوه براحه غير اضيق الدنيا عليكم وانفيكم منها طلقه براسج وبراسه. 

سيلين : ليش تصيح اني كاعد اعاتبك واذا مفتهمه خطأ انت فهمني اني هيج فهمت قصدك بوقتها من كلت خنتوني ثنينكم. 

ادهم : وارجع واعيدها انتوا الاثنين خنتوني شتسمين الاتفاقيه بينج وبين فهد خيانه لو لا .. 

سيلين : والله ماكو اي اتفاقيه بشنو تريد احلفلك وبعدين انت من سألك فهد شاك بينه ضحكت وكتله شاك شنو ولي منا احسلك ورجعت كتله ليش خايف عليها وترجف يعني شنو معناها ادهم كلش شايله بكلبي عليك. 

الضوه عاكس ملامحه الغضبانه بنتره كال. ...

ادهم: اي استهزئت بيه لان كلامه يضحك لو شاك بيكم انتظر منكم تبرير شلون عقول انتو صدك اغبياء..

سيلين : ميخالف اغبياء لعد فهمني انت شنو تقصد تكله خايف عليها وخاف خسرتها قبل ومتندم. 

ادهم : هو جان محاربج قبل لو لا ؟ 

سيلين : اي 

ادهم : منو جان يوكف بوجها ويدافعلج دائما ويرد الاسائه عنج. 

سيلين : انت..

ادهم : بعد شكو حقي استغرب تغييره المفاجئ لو لا وفوكاها يكلي انه اجرت الها وكلفت واحد يراقبها وانه صنت مرتك ما خنتك شتحجين وياه هذا. 

اندار ونام على ظهره غمض عينه وكال.. 

ادهم : انه تقصدت كتله خاف تندمت لان خسرتها قبل لان جان عينه عليج مو غبي انه اعرفه جان معجب بيج واكثر من مره لمحلي عليكم وماجنت انطيه عين وبسبب ملحته ابوي وامي اجوي يزنون على راسي حتى ازوجج وانتي بسبب الملحه مالتهم قبلتي بسامر وهسه صار فهد خوش وتلزمين ظهره وتوكفين وياه ضدي..

سيلين : والله ردت انهي هاي الحرب والله ردت اخلصك من الهم ونرتاح كلنه. 

ادهم : انه ردت اعالجه حتى من اشتكيت عليه صح ضايج منه ومتخبل بس سألت على مراكز علاجيه على حسابنه الخاص و ردت يتعالج بعلم الدوله لان هذا اذا ضل يروح برجله للدكاتره يوميه يغير واحد وانه متابع حالته عن طريق صعب وهاي ثاني دكتور يبدله.. 

سيلين : والله مابيه شي اصلا طبيعي اكعد وياه وشوفه شلون يحجي ورزن.. 

ادهم : سألي اختج عنه وتحجيلج قابل يطلع سوالفه كبالج شمدريج انتي بالسنه العشت هنا جنت مريض كل يوم تعيط اختج وهو يسكتها كم مره تنزل تبجي وتنام بالاستقبال ومن اسألها متقبل تحجي جنت ماكدر اصعد رجلي ما تسعفني واصعدله اطيح حضه..

سيلين : هسه عوفك منهم كلبك ماحن عليه ادهم شنو هالبرود العندك يعني بوجهي متباوع صدك تحجي.. 

ادهم : سيلينه طلعي بره اريد انام..

ضحكت صفنت بوجها ملامحه لانت. 

سيلين : مادام كلت سيلينه معناها بعدك تحبني مو ؟ 

ادهم : كومي نامي نعسان. 

سيلين : شتسوي هسه اذا نمت بحضنك وانت تدور حلال وحرام.. 

ادهم : يصير ارجعج على ذمتي مادام العده ما خلصانه. 

سيلين : يعني يصير .. 

ضحك.. 

فتت بحضنه وضليت ابوس بيه هو سكت يريد يبعدني وبنفس الوقت يريدني حسيته يحارب نفسه بخفه ايد جردني من ملابسي ، تقرب من اذني وهمس ....

ادهم : رجعتُ بزوجتي ..

( بمعني تراجعت عن الطلاق ) 

مد ايده علك ضوه التيبلام ،وبلشت حرب المحبين حلمي الجامح امام رغباته المجنونه اقترب مني بعدها احتواني بين ذراعيه ، بين الذهول ممصدكه وبين حيرتي بجيت اني بخيال لو حلم لان مامعقوله هذا واقع ، خمدت نيران الاشواق احتواني بحضنه وضل يهدأ من روعتي شد راسي بأتجاه قلبه وطبع قبلات حانيه على شعري وكال ... 

ادهم : حبيبتي الشجاعه متبجي اعرفها قويه...

شفتي ترجف وعيوني متقبل تسكت ودموعي تنزل .. 

نزلت عينه على شفتي وهمس بصوت بيه بحه..

ادهم : الشفايف حمره اليوم وتتراجف وعيون مفعمه بالحب النضرات يابويه ياويل حالك ادهم .. 

حجاها وابتسم.. 

سيلين : كم مره خليتلك البني وانت ولا يهمك ولا انهزيت. 

ادهم : شمدريج انتي جنت اكل بروحي وساكت بس حلو الاحمر عليج هاي شوكت خليتيه شوكت تحضرتي جنتي ناويتها مو قبل لتصعديلي.. 

ضحكت ومسحت دموعي.. 

سيلين : ماعرف اجتي لحضات وصابني ضرب من الجنون كلت اخلي احمر هلمره بلكت اكدر أأثر بيك بس جنت قافل عليه استغربت من صالحتني انت تحبني تحبني اعترف ومتكدر تعيش بدوني. 

باوعلي بنضرات حنينه وكال...

ادهم : يايوم بطلت احبج بيه بس انتي خليتيني عاجز عن فهمج وماعرف شنو يدور براسج خبلتيني دكتور بعلم النفس فريتيه فررر بسوالفج.

سيلين : والله واضحه وياك وعمري ما تلونت كل افعالي وكلامي وياك حقيقي.. 

ادهم : اريدج تسمعين كلامي وممنوع تخالفيني بأي شي لان انه اعرف مصلحتج وين واي شي تسويه عندي علم لا علاج ينأخذ من ورايه ولا اتفاقيات تنحاك وره ظهري سيلين هلمره عديتها الج مره ثانيه والله العظيم وجهي متشوفيه. 

سيلين : ابد والله التوبه بعد اذا اعطس اكلك..

ضحك وجر راسي حضني اني منا منايمه صارلي كومه ومنا مشتاقتله وحضنه دافي نمت والنومه نومه للصبح حسيت عليه يريد يكوم فتحت عيني لكيته يباوعلي مغضب حاجبه. 

سيلين : هاا خير رجعت زعلت.. 

ضحك بس مبين متوجع.. 

ادهم : لج الليل كله نايمه على مكان العمليه وكلبي ما نطاني ابعدج خاف تفزين.. 

سيلين : سوده عليه وتحملت الوجع الليل كله ليش جان كعدتني.. 

ادهم : هذا الوجع عندي احله من العسل هذا الوجع لا شيء بالنسبه للأيام البعدتي بيها عني شحجيلج سيلين شحجيلج.. 

سيلين : لتحجي هسه الله عليك خليني فرحانه وناسيه.. 

ادهم : كومي ننزل جوه هسه يسألون عليج ويضل بالهم. 

سيلين : هم صدك هسه ايفين تتخبل ههههه. 

ادهم : هيه مخبله من كاعها... 

سيلين : ههههه الله يساعدها على اخوك.. 

ابتسم وتحضانه وطلعنه هو فات يسبح فوك واني نزلت جوه ياهو اليشوفني يضحك شكو مادري رحت للحمام الجوه فتت سبحت نشفت شعري بالمنشفه لبست حجاب وطلعت صارت عيني على المرايا يااا وجهي بيه اثار واني اكول ليش يضحكون من نزلت عبالي محد يدري عبالهم نايمه فوك وعبرت عليهم شلون فشله هسه شيخلصني من لسانهم والله ولا يسكتون . 

انتضرت بالحمام سمعت صوت ادهم نزل كلبي كام يتراقص فرح طلعت من الحمام لكيته واكف خال ايده بجيوبه حبيبي اووووف كلبي راح يوكف من الفرحه رحت وكفت يمه شافني مدلي ايده وجرني من خصري حضني خليت ايدي وره ضهره ،

 الكل جان كاعد ،

 باركولنه وابوهم ضل يحجي ويانه هواي واكثر الحجي وجهة لولده ادهم وفهد وايمن ، همه يهزون براسهم ساكتين ..

 مر اليوم عادي وطبيعي ثاني يوم البنات من الصبح هجموا على غرفتي جنت نايمه غاطه بنومتي ، فتحت عيني لكيتهم فوك راسي نرمان ايفين ضي . 

فاتحه تك عيني واحجي وياهن. 

سيلين : شكووو خير ؟؟ 

نرمان: كومي ويانه بدون حجي.. 

سيلين : شكو غير افهم. 

ايفين : مره وحده سوي شي بدون متفهمين. 

سيلين : امشي ولي لج انتي ورجلج مو أمان ابتعدو عني . 

ايفين : ههههه حقج بس كومي الله عليج. 

كمت بالكوه .. 

سيلين : ولكم راسي يوجعني. 

ححيتها بتذمر.. 

نرمان : شلون وياج يمعوده فضينه ... 

كمت وياهم سبحت حسب توجيهاتهم بدلي بدلت نزلي نزلت وطلعنه بالسياره ويه فهد وين مندري بالطريق كتله. 

سيلين : وين ماخذنه متكلي. 

فهد : شعليج يجيج الصافي.. 

سيلين : خايفه من الصافي مالتكم. 

فهد : هههههه لا يابه خلصنه بعد ماكو خطط.. 

نرمان : الله يهديكم.. 

جانت نرمان كاعده ليكدام واني وضي وايفين وره.. 

وكفنه كبال صالون نزلنه وكال من تكملون خابروني.. 

دخلت للصالون واني مادري شكو .. 

كعدنه كلنا وكل وحده اشتغلوها مكياج وشعر صارت ساعه ٣ ونص ايفين خابرت فهد اجه اخذنه باوعت سيارته مزروقها شلون مال عرسان نزل لابس قاط ضحكت،،، من صعدنه بعد متحملت حجيت. 

سيلين : شنو سالفتكم عدنه عرس وما ادري. 

فهد : صبري يا امه الاسلام امج من جابتج جانت واكفه خرب بروحج تماره على هالخلفه المستعجله هاي. 

ايفين : لسااااانك فهيدان. 

فهد : خرب بروحج تماره هسه زين.. 

نرمان: فهد هاي شكو سالمين 

فهد : يحجوني كوه هسه غير يصبرن. 

ايفين : عيني ليش تجمع اني شكو ... 

فهد : زحمه احجي عليها وحدها خاف تستوحش. 

ايفين : والله ياربي. 

عاطت نرمان. 

نرمان : كااااافي نكره كافي لخاطر الله شكد تحبون المداهر.. 

فهد : يله عيني دكتوره اعتبرينه طلابج مشاغبين هم هيج تعيطين لو ذيج بيها فلوس تتحملين وانتي الممنونه اذا كلش امشيلج راتب وتحملينه. 

نرمان : يمه من لسانك لسان .. 

سكتت هو كمل. 

فهد : دلالات مو هيج قصدج بس البرستيج مالتج ميخليج تكوليها .. 

ضلوا على المداهر مالتهم لحد ما وصلنه للبيت اباوع الشارع كله سيارات بابنه مفتوح ردت اسألهم فهد عاط بينه. 

فهد : عبيجن على وجوهجن وكبل للبيت لا يمنه ولا يسره.. 

دخلنه الطرمه كلها رياجيل اول ما طبينه للبيت واسمع هلاهل التفتت على البنات مستغربه الكاعد يصير

سيلين : هاي شكو غير نفهم..

نرمان : تفهمين بس صعدي بدلي.. 

صعدت لغفرتنه لكيت فستان لونه زيتوني غامق كلش حلو صدره كيبور والردن تعلاكه ، لبسته ولبست حذاء لونه فضي.. 

وكفت كبال المرايا باوعت على روحي صح هواي ضعفانه بس حلوه شي على شي ... 

انتضرت البنات بالغرفه كالوا نكمل ونجي لتنزلين ، وره شويه اجوي ونزلنه سويه كالو كعدي كعدت ، والنسوان كلها تباركلي وتبارك لايفين شكو مادري.. 

التفتت على ايفين كتلها

سيلين : شكو متحجين مو راح اتخبل على شنو يباركون. 

ايفين : صبري بعدين تفهمين.. 

وره شويه كالوا لبسوا راح يفوت ادهم ، فات والهلاهل تركع كامن يهوسن بطبته ، جان لابس قاط اسود وقميص ابيض ، اجه كعد بصفي باس راسي وحضني.

سيلين : ادهم شكو غير افهم.. 

دنك لمستوايه وشاورني.

ادهم : فهد جمعهم اليوم علمود السالفه الصارت وكال انه وياك تزوجنه بسكوت ومحد يدري ليش عبالهم نسوانه بيهم شي خلي نسوي كعده بسيطه ندز بيها على العمام وهم نسد حلوك انه ما جاوبته بس والدي متفق وياه وفاجئوني ... 

سيلين : ها هيج يعني. 

ادهم: اي وابويه كال ماحضرت المهر مالتك ولا مال فهد اريد اعيده هنا وانه اعرف هاي سوالف فهد دزه علمود يقنعني بس سكتت عبرتها. 

سيلين : جوز فعلا ابوك عاجبه صدك. 

ادهم : ماضن والدي الشغله اذا فاتت ميعير الها اهميه..

سيلين : امك هوواي فرحانه شفتها. 

ادهم : اي شفتها .. 

حجاها وابتسم...

كملت الكعده طلعوا الاقارب وكمت لبست بشت وشال فوك لبسي خاف يدخلون الولد ، وفعلا اجوي ايمن وفهد وابوهم اول مافات فهد حضن ادهم وبجه جسمه كام يهتز ادهم جان منزل ايده بعدين رفعها حضنه وفهد تخبل عليه ضل يحضن بيه ويبجي باسه من راسه ورجع باسه من وجها وحضنه. 

فهد : اسف شكثر اكولها وتسامحني.. 

ادهم : كافي انسه. 

فهد : اكييد.

ادهم : ضلت يم سيلين احجولها كلشي حتى مايضل دين بركبتكم. 

فهد : نحجيلها بس مو اليوم لتخرب فرحتها.. 

ادهم : هاهيه.. 

كلت اسأل ادهم شنو قصده من كال احجو لسيلين بس التهيت من كعدوا يسولفون من ضمن الحجي الضحكني من كالوا. 

يوسف : ادري انت شنو جايب شيخ يعقد المن ؟ 

فهد : غير يعقد لادهم وسيلين . 

ادهم: ولك مو رجعتها شبيك انت .. 

فهد : شمدريني بسوالف الدين مالتكم عبالي من تكللها طالق وانه اشهد هاهيه تتحرم عليك. 

ادهم : صح بس اذا بفتره العده ارجعها عادي .. 

فهد : مدري منين تطلعولنه سوالف عمي ففه انه

 ماطلكج لو تصيحين الغوث مني.. 

ايفين : رجع على ففه دعوفني... 

ضحك وكام كعد يمها حضنها وباسها ...

فهد : شعندي غيرج احبل اجيب..

يوسف : طيح الله حضك هيه هاي حجايه تحجيها كدام البنات. 

فهد : شلون يخليني اقسملهن هسه ... 

ادهم : كافي شنو السالفه .. 

ضحك فهد مجاوبهم..

التفت ادهم عليه وكال. 

ادهم : نعسان نصعد. 

فهد : اصعد يابه اصعد اليوم يومك يابطل. 

ادهم : انجب. 

فهد : وسفه كاعد اهوسلك. 

ادهم : انجب وسد حلكك. 

فهد : يابه شوفه شلون يغلط عليه هههههه. 

يوسف : اروح انام راح يخبلوني راح اهج من البيت.. 

ضل فهد يصنف ويضحك واحنه صعدنه .. 

اول ما دخلنه لزمني من ايدي وفرني ... 

ادهم : جمالج يابه ياخذ العقل.. 

تقربت منه وحضنته. 

سيلين : وانت هم حبك ياخذ العقل.. 

بين الغزل والحب الغمرني بيه انتهت ليلتنه المجنونه..

 همست بصوت مليان نعاس وذايب بحبه...

سيلين : فراشك دافي مثلك.. 

دخلني لحضنه وغطاني باسني براسي وهمس.. 

ادهم : نامي سيلينتي نامي وتيني..... 

ثاني يوم بعد الغده صاحوني رحت للأستقبال لكيتهم كاعدين وجوهم متبشر بخير.. 

قبل لا اكعد كتلهم. 

سيلين : شكو اذا شي يضوج لتحجوه وتغثوني..

ايفين : عليج الله لتصعبيها علينه تره كوه جمعنه الحجي.. 

باوعت على ادهم كاعد ويباوع عليهم ... 

نضرات ارتباك و خجل ثنينهم ميعرفون شنو يحجون ومنو اليبدي.. 

سيلين : غير تحجون وتفضوني شكو؟ 

تنهد فهد وكال. 

فهد : راح اسولفلج كلشي وانتي حكمي.. 

سيلين : تمام اسمع.. 

قبلها رحت كعدت بصف ادهم وحاوطني بيده عيونه انصبت عليهم ونسمعهم بأنصات.. 

فهد : شوفي يا بنت الناس ايفين دخلتها بلعبه قذره وهيه ما الها دخل هددتها ورعبتها واجتي ايام للصبح متنام من الخوف اخذتها للبيت الاخذتج بيه هناك انواع الترهيب شوفتها حتى فديوات شلون نقلع الاضافر،،،

 شافتها وخطيه جانت تتقيء وحتى تخرب بين ايدي من الخوف واغسل الها واكعدها كبالي وابدي من جديد اعلم بيها ،،

 من سمعت الاريده منها وعرفت بيه اذيتكم حتى رجلي باستها وماهتميت الها من اتذكر السويته بيها اكره روحي ..

بس والله الصار مو بيدي والله مو بيدي جنت مريض ومليان حقد وعقد نفسيه المهم علمتها تكللكم انه مغتصبها وحجتلكم التفاصيل كلها ردت بهذا الفعل اضرب ايمن وبنفس الوقت احسسه بنفس الاحساس الحسيته بيه من انحرمت من ابني وزوجتي ،

 وردت اضرب تفكير ادهم او اضعف تركيزه وجنت اريده يخسر كلشي لهذا ضربتهم بأايفين واستمريت ،

 بعدها خليت سامر يشك عدكم علاقه انتي وادهم وجبرت ايفين تدز مقاطع فديوات وتدز رسائل علمود يحقد على ادهم ويخسره منصبه ، 

من عرفته يحبج ردت اعيشه خسارتج مرتين مره من تزوجتي سامر ومره ثانيه من خليتج تطلعين من البيت ، 

المره الاولى جنت متقصد اعيشه شعوري من روايه طلكها مني واختفت وتزوجت واحد ثاني ردت احسسه بالحركه الانه بيها ومره ثانيه من سمعت بيهم بالعراق تصورته يدري كلت اعيشه العشته اشوفه شلون زوجته بالعراق وميكدر يلكاها ، 

وردت اعرف شعوره بعدين من يعرف اخوه يدري بمرته وين وميكول لهذا سكتت سنه ونص وماكتله اعرف مكانج لان عبالي هو هم يدري بمرتي وابني وميكول لهذا ردت اشوف يتحمل مثلي وشنو يصير بيه... 

جر نفس طول وضرب ايد بأيد وكال.

فهد : بعدين عرفت من صعب ادهم ميدري بأبني وين وطيله السنوات المضت هو يروح لعمي ويتوسله ومن جان مسافر يتصل ويحاول يوصل وياه لحل وعمي جان قافل بسبب حقد قديم بيني وبينه

 ومن جانوا بسليمانيه محد يدري وعمي مشدد عليهم اليحجي يتبره منه..

 هواي حجي وهواي سوالف بس حجيتلج مختصر ، العرفته ادهم هواي دور على ابني وهواي سعى علمود يرجعه اخر شي عمي طلب من ادهم اتعالج ويجيبله الاوراق ونطاه وعد رجال يرجع علي اليه بس انه جنت ما اسمعله بسبب حقدي عليه عيوني جانت معميه.. 

وادهم هواي سعى بعلاجي لكن انه جنت ما اسمعله لان فقدت ثقتي بيه ...

هواي اذيتكم وهواي اذيت روايه وايفين وندمان والله واريد اعيش بنصكم بعد ما لكيتكم اتمنى ما تنفوني مره ثانيه....

 فرحتي بيكم بكد فرحتي بأبني من لكيته ماريد الزعل يطول اكثر كافي راحت من عمرنه ١٤ سنه بين الزعل والحقد وهذا كله انتهى بفضل سيلين وبعدها ايفين لان هيه عالجتني وصبرت عليه ياما وياما اجتي ايام اسكر واكسر واعيط وهيه تتحمل وتضل ساكته اعيرها ومرات اضربها وترجع تصالح وتحتويني هاي الانسانه هيه طبيبي النفسي هيه الساندتني هيه الوصلتني لهذا الهدوء الانه بيه.. 

طولت هواي وخجلان كلش هواي واعرف السويته شي جبير ومستحيل تسامحوني عليه بس اعتبروني مريض وهسه صحيت على نفسي..

شكرا لزيارتكم عالم روايات سكيرهوم