رواية أرض الخناجر الفصل السابع والسبعون بقلم ايلول
بنص هوا الله ومَا تِطب بريتي نسَمه
انه بروحِي وَجع مَا جاي افهمَه .
══━━━━✥◈✥━━━━══
مــاسه:: اعاينلها وگلبي يدك بخوف ساده أيدها بقوة على السجينة والدم تارس چفها، التلفون على أذنها ودموعها تجري
عاينتلي تشهك شنرت السجينة والتلفون من اديها وكعدت على اركبها تبچي بخبال وتشهگ بس اريد تجر نفس اعاين باهته ما ادري شسوي رهيه اختنگت شهگته تگطع النفس .
بساع كعدت يمها وكضيتها من وجها احاجيها بخوف
-ماريا... شبيج ولج شبيج يييمه.
دكيت على ظهرها اريدنها تتنفس وهيه تبجي وتشهگ بگطعة نفس رايحه روحها .
اتلفتت بحيره ايديي رجفن ما ادري شسوي جريتها من أيدها اگومها
-تعاااي تعااي نطلع بره.
تمي بأيدي بلا روح بط صوت شهگتها اليمرد الگلب يدك بأذني طلعتها للحوي يم الحديقة عفتها وركضت اجسين ماي، رديت كاتلني الخوف كعدت يمها غسلت وجها احاجيها
-بس تنفسي ماريا ولج شسوي حاجيني اخابر مــيثم ؟؟
درت وجهي اريد اركض اخابره كضتني من ايدي ضمت روحها بحضني تبجي بصوت وتضم روحها الصدري اكثر عبالك تحتمي بيه من شي ما اعرفنه، لميتها على گـــلبي شابگتها بكل حيلي
-ماريا...يابعد روحـــي شبيج حاجيني حاجيني؟
ترجف وتبجي مفجوع گلبها ايدها كلها دم بستها براسها رايحه روحـــي من الخوف
-بس كليلي ياهو وياج ماريا بس حاجيني وداعت امي اخلي مــيثم يكسر ظهره.
تهز راسها لا ودموعها يجرن ضليت لامتها بحضني مناه لمن بدت تسكت وخرته من صدري جريت دولكة الماي صبيت على أيدها غسلتها من الدم اصبعها الأبهام بنفس المچان اكثر من جرح عفتها وگمت عاينت الحور نايمه اخذت لفاف ومعقم ورديت كعدت يم ماريا گـــلبي يدك بخوف منظرها وهيه تبجي والدم تارس ايدها ينعاد براسي وصوتها بعده بأذني
عقمت ايدها ولفيتها شلت راسي اعاينلها سانده راسها على حافة الحايط وتعاين للحديقة عيونها الحلوه صار بياضهن احمر والبؤبؤ يلمع بنصهن چنه خرزه شما اعاينلهن احس داخلهن اعمق، دموعها يجرن على خدها بهدوء عايفه ايدها بأيدي ما مهتمه لميتهن اثنينهن بين ايديي عاينت بوجها اسأل بهدوء
-ويامن حجيتي؟ ياهو الچان يخابرج؟
عاينتلي ورجفت شفايفها ردت تبجي وتحجي بصوت مبحوح
ماريا:: أمي.
-ليش تواصلتي وياها ؟ مــيثم من جابلج تلفون مو گالج كلشي بالماضي عوفيه بالماضي؟
هزت راسها لا تبجي وگوه تحجي
ماريا::فتحت الاكاونت تبعي قامت هي بعتتلي فكرتها بتعتذر..عطيتها رقم الوتساب..هههه
ردت تبجي بقهر وتجر نفس تمسح على گلبها تدنيت يمها امسح دموعها
-حاجيني شگالتلج؟
-عم تهددني.
بس نظقتها غصت من البجي وانه فهيت گـــلبي موجوع ما فاهمه شلون هددتها وليش، حجيت مرتبكه
-شتريد عليمن تهددج ما فهمت.
وهيه من بين دموعها تشهك وتحجي
ماريا:: بدها ترجعني لعندا، كرما المصاري.. ما كانت تعرف بييٍّ في بحسابه مصاري ومتجمدين ما بيعطوهن إلا بحضوري.. لو كانت عارفة من الاول ما كانت رمتني هون.
اعاينلها بچت بحرگه وتفرك باطن ايدها بأصابعها، مستغربه وبعدني ما فاهمه ليش هلكد اهتمت الحجيها، جريت اديها احاجيها
-خل تحجي وحدها احضريها ليش تخلينها تقهرج؟
حجت بحرگه تجر بهدومها من گلبها
-ولك امي عمّ تهددني .
-بيمن تهددج شسالفة ماريا فهميني ترى انسطرت وألله العظيم.
عاينت بعيوني تجر نفس بشهگه وخوف مسحت عيونها بأديها اليرجفن مركزه وي عيوني هنست بصرت مخنوك
- ما بتكرهيني؟
سكتت خايفه شمسويه وتحجي هيج؟ هزيت راسي لا
-بتخبري اخواتي؟
-لاا والله بس احجي گـــلبي راح يوكف ولج.
كعدتها كضت ايدي بأثنين اديها خايفه حيل وترجف تعاين لعيوني وتبجي تريد تحجي ما تگدر
ماريا:: انا.. انا قبل لا اجي لهون.
-اي.
مالت برأسها متوسله ودموعها تجري
ماريا:: قتلت شب.
حجتها ودنگت تبجي بحرگه وانه بعدني ما مستوعبه شكاعد تحجي فاره ما تكتل شجابها على الكتل شبيها هاي، رفعت وجها من حضني احاجيها
-ماريا شبيج؟ شهالحجي سولفيلي الصدك والله ما احجي الاحد بس خليني اعرف امج بيمن تهددج حتى افهم يحقلج تخافين منها لو لا
ماريا:: اسمعي الحكايه كلّا
من لما كنت صغيره كانوا ماما وبيي يتركوني لحالي، عايشين حياتن وانا منسيّة. بيي كان بيضلّ معي اوقات أكتر من ماما، وبعدين صار يسافر ويتركني مع المربيات. وبعد ما انقتل بيي ماما صارت.
مرّة بتاخدني عروسيا، مرّة بتتركني بلبنان تشتّت وتعبت كتير. بعدين هي كمان ملت مني تركتني بلبنان فترة طويلة، كنت دقّلا عالتلفون بدياها تجي تشوفني، ما كانت تقبل.
بهالفترة كان في شب حواليّي، كنت بعدني صغيرة، جسمي ما كان باين عليه ولا شي من الأنوثة، بس هو متل الحيوان، تحرّش فيي أكتر من مرّة. حكيت لماما وهي ما اهتمت. كل همّي كانت تجي وتاخدني من هون، بس ما قبلت.
وبعد خمس شهور وقبل عيد ميلادي قالتلي رح تجي. فرحت، ونطرتا بلهفة بس هي اتأخرت وأنا تعبت ونعست تركتلا الباب مفتوح ورحت نام ويا ريت ما عملت هيك أوّل ما غفّيت، سمعت صوت باب الاوضة فتحت عيوني لقيت مفس الشب يلي بيتحرش فييّ بالاوضة ، حدّي عالتخت وقتها تجنّيت.
أنا كنت دايماً حاطة سكين تحت المخدّة بسببو ومن خوفي. مسكتها وضربتو. والله ما كان قصدي إقتلو. بس كنت عم دافع عن حالي وحياة الله ما كان قصددي اقتلوا بس دافعت عن حااالي
مــاسه:: فاتحه عيوني مصدومة وگلبي مو يدك ينعصر عصر وماريا تبجي بحرگة وتعصر ايديي بين اديها وبلا ما احجي كلمة جريتها الصدري شابگتها بكل حيلي واضمها الحضني اكثر ابجي البچيها وادعي عليهم بگلبي ما كفاهم السووه ببريا وميثم لوعوا حتى بنتهم المن تخلفون اذا انتم مو گدها ليش عذبتوهم
مسحت عيوني وماريا فقدت من البچي وخرتها من صدري لامه وجها بين ايديي تناشغ وصوتها آنتهى
- وعبالج اخوانج لو دروا راح يكرهونج؟
ترجف تهز راسها لا
-لا تحكي لا تحكي امي قالت لو عرفوا انتِ قاتلة شبّ ومطلوبة للعدالة بتهمة قتل يتبروا منك دغري.
-وانتِ تمشين بحجيها ولج والعباس مايتبرون منج .. يا ماريا وانه اگولن سباعيه وذكيه ما تنغش، تالي امج ضاحكه عليج بحجايتين، يعني هسه جاي تهددج تريد ترجع تاخذج علمود الفلوس واذا ما ترضين ترحين وياها تحجي للولد؟
من بين دموعها وشهگاتها هزت راسها اي وانه صافنه بوجهه محتاره شلون امها گدرت تخوفها الهالدرجة من اخوانها
امسح على اديها بحيره واحجي
-الجنسيه والجواز زورتهن امج حتى تجيبج لهنا مو؟
-اي
دنگت اعاين الاديها بين ايديي ساكته اريدها ترتاح واسولف وياها لان هسه گد ما خايفه شنو الاگوله الها تگلي لا.. فتحت عيني مصدومة من تذكرت بعدها حتى ببيتنا تخلي سجينة جوه المخده عاينت بوجهه
-بعدج تخلين سجينة جوه المخده حتى وانتِ يمنه... اكو احد بالقرية جاي يتحرش بيج؟؟
احجي والخوف يدك بگلبي وهيه تعاينلي بضياع ترفع اجتافها ماتدري ودنگت تحجي والغصه خانگتها
ماريا:: ما بعرف مو تحرش بس.. بالنهار وصت ضل لحالي بشوف مرتضى حوالي البيت.. خفت شي يوم يفوّت لعندي.
-ايا ابن الحيوان.. ماريا احجي احجي لا تجذبين محاچيچ مسمعج حچايه بس كليلي والله هسه اخابر صــيهد هسه اخااابره والله
احجي بحرگه گـــلبي مشتعل هزت راسها لا ودموعها يتناثرن على وجناتها
-ما حكه معي بس انا هيك ما بتطمن لنظرتو وبخاف.
وي حچايتها التفتت على صوت دگة باب الحوش، وحده عاينت لوجهه الثانية بخوف مسحت عيونها وتهز راسها لا خايفه چلبت بأيدي تتوسل
-لا تحكي.
-اششش لا تخافين ما احجي
رد الباب اندك عدلت حجاب ومشيت وگفت بصف الباب مرتبكه فتحته على كيف صار بوجهي ســليم مخنزر اعاين بوجهه وهوه عيونه وراي التفتت الماريا لمت روحها وغطت شعرها، مدنگه وتمسح بعيونها تحمحمت مرتبكه
-ها خويه!
احجي وياه وهوه ولا يمي عيونه عليها لمن حرگت الباب عاينلي وحچه بنتر
-غراض بريا مخابرج عليهن؟
هزيت راسي اي
-جيبيهن.
درت وجهي الماريا خفت اطب انه للبيت وتضل هيه يحاجيها ويتعاركون، مشت تجيبيهن وهوه دار وجهه مدري منين محترگ گلبه لمن ردت ماريا تحجي وياي بصوت مبحوح التفت يعاينلها عاگد حاجبه بعصبية
غراض بريا من ايدي جان ناسيهن وگال ودوهن لولد من يلتحق يجيبهن الي، ضل واكف بالباب وعيونه الماريا يحجي وياها بنتر
-ماريا خليل، هذا حسابج بالانستا؟
وماريا تعاينلها بتعب مالها خلك شي هزت راسها اي
-امسحيه
ماريا:: شو خصك؟
ســليم:: تمسحينه !
ضحكت ماريا متنرفزه وانه تمنيت بس رغد تطلع وتجيني عاد تگدر تسكت ســليم، ردت گالتله
ماريا:: هي المراجل تبعك روح طالعهن عغيري انا ما بيهزوا شعرايه من راسي فهمت.
هز راسه خوش وانه اكرص بيها اريدها تستكت گالها
ســليم:: تحملي اليجيج چا
دار وجهه ومشه متحلف وماريا بأثنين اديها غمته وردت تبجي على سالفتها، جريتها من ايدها غسلت وجها واخذتها لغرفتها شلت السجينة والتلفون عفتهن على صفحة ورديت كعدت بصفها على الچرباية.
-عاينــي ماريا امج مخوفتج من شي ما يصير اخوتج ما يتبرون منج لو ما ادري شيصير، وجاي تستغلج تريد تردج للبنان وبس تردين تنسجنين ما ادري هيه شلون فكرت تردج غير يكضونج؟ وحتى الفلوس ما ينطوهن.
دنگت تبجي وتهز راسها
-ما بيهمها.
-ولو ما ترضين عليَّ بس ختولي.. احضريها وترى مــيثم حاضرها من الوتساب فنها الگدرت تخابره وتسولفله وولحسين حتى لو حصلته وسولفتله يجي يبوسج من راسج لان دافعتي عن نفسج ويفتخر بيج.
ماريا:: مش شي بفتخر فيه، مؤذي هالشعور. لما بتكوني قاتلة روح حتى لو ما كان منيح بتتخيّلي كل يوم بنام وببكي؟ وبتحسّيه متل بقعة سودا بنص قلبك وعقلك، ما بتنمحي مهما مرقوا الأيّام.
- مالج غرض ضلي وراي وشوفي وعلي ما يصير شي بس خليج وراي.
- شو بعمل هلق؟
-كلشي لا تسوين واذا تخابرج لا تردين عليها ولا تبچين وتقهرين روحج وعلي هم يصير شي.
احجي وياها وهيه مهضومة ما تگدر ما تبچي حيل مقهوره من امها وحتى اغير الموضوع گتلها
-ســليم شعرفه بحسابج شني متابعته
-لا بس ضفت بريا وميثم.. بتلاقيه طلع حسابي عندو بالاقتراحات.
-اي يجوز،وينه هوه حسابج؟ احضري امج منه.
گامت جابت التلفون وردت كعدت يمي طبت للوتساب حضرت رقم امها وردت للانستا على الرسايل شهگت من طبت لصفحة امها اعاين بصورها مصدومه لبسها نفس الممثلات الأجنبيات مصلخ والشعر مفتوح، حضرتها وردت مشت على منشوراتها عاينت بيهن كلهن بالروسي لو للغروب لو لحديقة لو صورة بزونه بس وحده منهن اظن من جان عمرها عشر سنين هيه وابوها يم البحر مصورتها وناشرتها. تعاينلها بحسره
مسحت على إيدها أصبرها وهيه كل ما تصفن ترد تبجي، گمت جبت حور ورديت يمها اسولف وياها وأغير الموضوع ردتها بس ما تضل تفكر بيه ماكو چلبت شويه وردت تعاين بتلفونها وعگدت حاجبها مستغربه دارت التلفون عليَّ تسأل
-هيدا ســليم؟
عاينت وياها هزيت راسي اي وهيه فتحت محادثته مستغربه موديلها رابط طبت عليه عبالها فيديو مدري شطلعلها ووراها طلعتلها صفحة تسجيل انستا لطمت على رجلها ترجف
-هكر الاكاونت هالحيوان.
وانه اعاين وياها كلشي ما افهم بساع حطت البريد والرمز سجلت دخول اسو هذا گبل طلعها من الانستا وهيه ضلت تلطم متسودنه وردت تسجل دخول بساع ماكو ما يسجل دخول وراها كالها كلمة المرور خطأ.
تسودنت تفتر بحرگة وتغلط عليه وانه كلشي ما اعرف بالحسابات ضليت بس اگللها
-وين راه هسه حسابج؟
-الحيوان ابن ميلاد
تحجي وتفتر ومدري شتسوي بالتلفون رديت گتلها
-هسه وين راح حسابج .
-ابن الزفت ابن الحيوانه
سوت حساب جديد وطبت تدور على حسابها القديم مالگته، خابرت بريا مفرفحة ما حصلته رادت تخابر مــيثم چلبت بيها
-لا خيولي هسه هوه حساب.
ضلت تفتر بحرگه وتغلط على ســليم وعلى ميلاد نساها سالفة امها، ساعة عدت وهيه بعدها تبحوش بالتلفون، ردت بــدور راسلتني من تلفون ندى.
عفت حور يمها ومشيت الاهلي لكيت ندى بالمطبخ واسمع صوت صــيهد ووهب يحجون وي ابوي وهوه يردهم بعصبية هزيت راسي اسأل ندى
-شصاير؟
ندى:: خليت ايدي على حلكي اسكتها، وتقربت يمها
-صــيهد يريد يروح يراضي سيد عباس وياخذ وهـــب وياه وابوج ما يقبل يگلهم خيولي لا ترحون.
-هاه جا ووهب تراضى وي بــدور؟
ندى:: هزيت راسي لا
-هيه فوك ما نزلت وهوه وي صــيهد خلي يصفون ونشوف تاليها.
هزت راسها اي ورجعت البيتها شارده من سمعتها هوسه
شويه واجوا يمي للمطبخ صــيهد گال الوهب
صــيهد:: الفجر نطلع البغداد
وهـــب:: اخذ كهلان وروح انا ما اروحن.
التفت عليه عاگد حاجبه
-وليش ما تروح؟
-تعبان وضايج من جعفر بس اروح اطكه.
يحجي بهدوء بس صــيهد يعاينله بعصبيه شويه وهز راسه خوش
صــيهد:: هاي هيه براحتك.
طلع من المطبخ ووهب كعد يمي درت احاجيه
-وهـــب
مسح وجهه عرفني على شنو اريد احجي،اجه رضا كعد بحضنه يحجي وياه يلهي روحه حتى لا احاجيه
-وهـــب والله البنيه ما الها اي نيه فضول كلنا عدنا هيج فضول لنفرض هسه اني اذا عبالهم بتكم مو زوجتك واجه احد خطبني يصير عندي فضول اشوف صورته.
شال راسه خازرني ضحكت بوجهه
-فـــدوه الهالعيون.
مسحهن متحسر يريد يضحك بس قهره من سالفة بــدور يلزمه
غسلت الزلاطه وخليتها گدامه وانطيته ماي بجدر
-غسل اديك واثرملي الزلاطه.
وخر رضا من حضنه غسل اديه وكعد يثرن صاحت عمتي
-يمه نداوي اجيج اعاونج؟
-لا يمه ماعندي شي وهـــب يساعدني
وابوه من الهول صاح
-كونه بيه خير جا ماساعدج.
ووهب يأشرلي غلسي وعمه صاحت عليه
-وليد جا شني نسيت من چنت تكنس الغرفة السعاد حتى تلبسلك الاحمر.
درت وجهي اضــحك خنك وهوه تخبل ينكر ويبرر ويصيح بصوت عالي حتى يبين هوه صح وكلنا غلط.
وهـــب يضحك بصوت عالي ويگله
-كافي رضا بابا كاافي
كملت العشه وعمه خابرت جــويريه گالتلها تعالوا تعشوا هناه شويه ودخلوا علينا هوه شايل كرار والضحكه تارسه وجهه، وجويريه وراه بأيدها طاوة الطماطة اتشتش
ضحك صــيهد يگله
-يكربون عليك؟
وهـــب:: گتلك خويه انقذني مرتي ما راحمتني.
جــويريه:: هنه زلاطات نمونه جا لو تشوّف آخوك كل يوم البيت ينكنس وينغسل وهوه يطبغ الغده ولازم شي يعجبني.
دار عليها صــيهد فاتح حلگه وهيه تركصله بحواجبها كلنه مصدومين رجع باوع الوهب گاله
صــيهد:: عدها سوادين الامومه.
اخذ كرار ودخل يم عمتي وجويريه تضحك ووهب عاف الزلاطه وشرد وره صــيهد
جــويريه:: سوده علي كل شوي اضوج صــيهد.
-ليش؟
رفعت اكتافها ما ادري تريد تبجي
-صاير شي؟
-لا بس احس يريد يتزوج عليَّ.
-شو تمسلتين جوري شبيج؟
جرتلها حسره مقهوره اخذت استكاين الچاي ودتهن بالغرفة يم عنه واجه وهـــب شال الصينية وصيهد يحجي شلون وي العشه زلاطه وچاي شلون رهمتوها گالتله عمه
-كلمن ياكل اليعجبه.
وعمو كاعد بالهول يباوع اخبار صاحت عليه عمه
-ما تجي تتعشه.
نتر بصياح
-ما اريدن
-خاف حنيت الطبخ سعاد؟ سوده عليه السلف چان يحجي بطبخها.
وليد:: انتِ شني بويه ترديني اطلگج؟ شو ناصبه علينه من امس لليوم شتردين؟
-نذر عليه لو طلكت الا اذبح خروف.. اودي صــيهد يبوگلي من خرفانك اذبحه واطبخه اوكلك منه.
الولد مدنگين يضمون ضحكتهم وهوه اجانه للغرفة سووله الولد مچان بيناتهم كعد باوع لجويريه صاح عليها
-صبيلي چااي.
عمه جرت الصينية يمها صبتله چاي ومدته اله اخذه من ايدها بنتر تلفت صــيهد باوع ورجع گال
صــيهد:: بــدور وين؟
ايمان:: اظنها نايمه خلها تتعشى تالي.
صــيهد:: لا يابه غير ويانه.. رضا عمو گوم صيح البدور.
باوعت العنه مرتبكه گمت اني
-اني اصيحلها رضا يشلع گلبها.
صعدت بسرعه دكيت الباب عليها هستوها يله صلت لمت السجادة گتلها
-تعالي انزلي تعشي صــيهد وجويريه يمنه وصيهد يريديج.
-يييمه وهـــب حجاله؟
جريتها من ياختها اسحل بيها
-خيبه يريدج تتعشين ليش تفضحين برووحج.
مسحت وجها خايفه ونزلت وياي سلمت على صــيهد وگعدت بصف عمتي ورضا يتعاند وياها الا يكعد بالمكان الهي كاعده بيه شلع گلبي لمن خلته بحضنها تاكل وتوكله لا وهـــب يباوعلها ولا هي تباوع الوهب.
وره العشه شلنا المواعين وكفت جوري تغسلهن واني رجعت اسويلهم چاي وبدور كنست وشردت فوك وكفنا بالمطبخ نسولف انه وجويريه واجه صــيهد مستعجل يريد يروح الكهلان گال الجوري
-تضلين هناه لمن اجي
جــويريه:: شويه وامشي لان عندي دراسه.
هز راسه خوش طلع وهيه تباوع وراه مكسور خاطرها ضحكت اهز بأيدي
-شبيج؟
-حباب صــيهد
-هاه؟؟
-والله.
-من شوكت هالحجي؟
ضحكت ورجعت تغسل مواعين وتسولفلي على خبالاتها گتلها
-كل يوم يجي العمه يگلها يمه مووتني بس كليلي شوكت تخلص سوادين الامومه، وعمه تتعارك وياه وتگله مره مسويه عمليه وطالبه واول طفل الها حقها تتعب اصبر عليها
-جذابة؟ سوده بوجهي يشكي من عندي؟
-اي والله هذا السمعته
رادت تگول بعد مره سوده بوجهي وتذكرت ام قلم گالت
-شهرين ما تحملني وام قلم سنتين متحملها.
ضحكت بصوت عالي وهيه تغم بيه الحد ما خلصت مواعين اخذنا الچاي ومشينا الغرفة عمتي مخليه كرار بحضنها تناغيه ورضا ساند اديه على رجليهها ويباوع بوجهه كرار يضحكله ابتسم لسوالفهم وجوري تگله
-بوسه بوسه هذا ابن عمك.
نضحك متونسين واصبلهم چاي الحد ما عمو صاح
وليد:: منين اجاه ابن عمه؟ عمي بالحسين هالسنة لو ما صار عد وهـــب ولد الا ازوجنه.
عاينت بوجهه وهـــب ساكته وعمه تضحك وتهز بأيدها دفعت صينية الچاي گدام وهـــب تمنيت حجايه منه حجايه تسكت ابوه وتبرد گـــلبي ، شال استكان الچاي خلاه گدام ابوه وحجه بهدوء
وهـــب:: اشرب يابه اشرب چايك وبسك من هالحجي انا ما اخذ على مرتي ورضا ابني .
وعبالك داس على گلبه حار شنو يغلط وشنو يحجي واحنا كلنا ساكتين، الحد ما مل وسكت، حجه وهـــب وي عمتي بضحك علمود كرار، ورضا وكف يضحك بأيده دب ويسوي حراكات يلعب ويباوع بوجهه كرار عود يلاعبه ركض ومايدري ضرب استكان عمو وهو بسرعه سحبه من ايده وضربه راشدي بقوة شهگت مصدومة وگلبي اوجعني ورضا صررخ بكل صوته.
بهتت بس فاتحة عيني وهـــب بسرعة وگف جر رضا شاله
-شسالفة يابه شسااالفة؟؟
-انجب انجب خايس تحاسبني اطكه وأطيح حظة ما تشوفه يحوم فوك روسنا جنّه الشمر؟
ووهب دار وجهه اخذ رضا وطلع وابوه غلط وسب وعمه ترده گـــلبي ممرود وهم صوتهم شما جاله يعلى اجت بــدور تركض من سمعت صوت امها وكفت بصفها تباوع الابوها ساكته، وهو طلع من البيت جل غلطه ومسبته عليَّ.
لميت الاستكاين وعمه ميته من القهر كل شويه وگالت
-اعذريني يمه ندى.
-لا عمه شعليج انتِ قابل ضاربته.. الله كريم.
گمت للمطبخ گـــلبي نار ردت بس اصير وحدي وابجي رجعت يم البنات جــويريه ضلجت بقت ساعة ، من كرار نام اخذته وراحت، وعمه تباوعلي بقهر بقيت كاعده يمها. اخاف لا اروح للغرفة وتضوج.
من بــدور صعدت فوگ گتلها
-عمه محتاجه شي راح اروح الغرفتي.
-لا يمه.. بس كونج ما تنقهرين.
-لا يجوز انام.
هزت راسها خوش، طفيت الضوه وطلعت غسلت ودخلت للغرفة سديت الباب وكعدت بالگاع ابجي واخنگ بصوتي، يوميه اتسمم بالحچي واسكت واتحمل يوميه كل ما يشوفني يغمني ويغلط ويحلف يزوج وهـــب وهسه رجع على رضا يضربه، هاي الجانت عايزه وهسه كملت.
بجيت بحرگه وتعب ووين يله گمت غسلت ورجعت للغرفة جريت تلفوني راست وهـــب اسأل
-رضا بعده يبچي؟
فتح الرسالة وما رد وره دقيتين دزالي صورة كاعدين بدوانية بيت عمو شامل رضا يم حسين يباوعون بالتلفون والولد ملتمين يسولفون وكل واحد گدامه استكان چاي، كتبتله
-خاف نعسان وديه الي بأيد حسين.
-لا عوفيه من ينعس انا اجيبنه.
قريتها وسكتت تمددت بفراشي بس دموعي تجري وكل فكري برضا شلون لو كبر وبدأ يفهم ويسمعه يحجي هيج عليه من صغره راح ينقهر وراح يحس روحه منبوذ بينهم.
افكر بيه وميته من القهر لهدعش انفتح باب الغرفة ودخل وهـــب رضا نايم بأيده ما تحركت من فراشي هو خلاه بفراشه غطاه وباوع بالغرفة ظلمة ما يدري بيه كاعده لو نايمه.
قفل باب الغرفة واجه اتمدد بصفي متحسر منطيته ظهري ومغمضه عيني ما اريد احجي شي كل الحجي يوجع گـــلبي .
حسيت بسه من اتقرب جرني من زندي الحضنه دار وجهي عليه وحضني على صدره دموعي تجري بلا صوت باسني براسي معتذر
-اعتذر والله اعتذر، ندى يروحي.
-ضربه حيييل
غطيت وجهي بأيدي اشهك وهو حاير ما يدري شيسوي
-وعلي لو ما امي وبدور يستاحشن جا ردينا للمشتمل.
-هوه يكره رضا لان اني ماصار عندي اطفال يريد يزوجك روح اتزوج اتزوج بس لا يأذون ابني يوجعني گـــلبي والله يوجعني گـــلبي من ينضرب.
-اشش شلج بهالحجي والله لو اموتن ما اخذ عليج مره لو مو ابوي.
سكتت مختنگه بس اريد دموعي يبطلن ينزلن ماكو، وهو سكت فترة عدت بالساعة يمسد على شعري ومت شافني هدأت گال
-ما يوجعج گلبج من اتزوج؟
-اموت.
-جا شلون تكليلي روح اتزوج ضوجتيني.
شلت راسي من صدره اباوع بوجهه اهز راسي لا
-ما اقبل والله ما اقبل بس وهـــب گـــلبي يوجعني ما اريد رضا ينضرب ما اريد يحس روحه منبوذ.
شال ايده يبعد شعري عن وجهي ودنك راسي يبوسني
-والله لو واحد غير ابوي طاگه ما اسكت، فـــدوه اروحنلج اعذريني شسوي ابوي أغلط عليه؟
هزيت راسي لا رجعت الصدره اخذله شويه وگال
-تردين للمشتمل؟
-وعمه؟
- امي شني التريده انا اجي اسوي الها وأساعدها حتى طبخ اطبخلها.
-لا، عمه تنقهر ما تحب تبقى وحدها، اصلاً تتمنى بيت صــيهد ويانا يعيشون بفد بيت مو النوب احنا هم نطلع، وبدور هم تنقتر.
-جا لا تضلين مقهوره وتحيريني.
سكتت احاول انام اخذله شويه ودغني بخاصرتي نزيت فازه
-شبيك
-اتحرش.
-وخر عني مو تشوفني جنت ابجي؟
-جا خلصتي بچي شني بعد.
-وخر وهـــب وخر روح نام يم ابوك.
-النوب يتخيلني سعاد
-ههههههه، كون نرجعها اله يلتهي وياها والله واحنا نرتاح.
-اسكتي لا تسمعج امي تكضج وتكتلج ما صدكت الله فكها تردين تردينها على گلبها؟
-ههههه والله خوش حل باجر اقرأ براس عنه واقنعها.
-والله تكتلج، وهسه انا اكتلج گبلها.
جرني عليه يعضني من زندي شهگت اريد اصرخ مالحكت عضني ويشاورني
-اشش اشش رضا يفز.
دفرته منطحنه طحن من العضه ضحك رجع يبوس بمكانها دفعت ايده من حلكي
-وخر رضا لا يفز.
-اوديه؟
-وين؟
سكت محتار كل مره يوديه يم بــدور حك شعره گال
-يم امي؟
-لا خطيه يفززها وين بيها حيل.
شمر روحه على مخدته ويسب ببيت غانم تمددت على صدره اتلمس بلحيته
-وهب
-همم
-صالح بــدور.
-لا عوفيني بطه
- ما تسوى زعل والله وخطيه من العصر الهسه بس تبجي
-تعاين بصور الزلمه عاجبها الخايسه.
-مابيها شي واذا عاجبها اني مو لگيتك مربط بالصحراء وعجبتني.
وخرني من صدره ودار وجهه زعلان دفرت رجليَّه واني هم درت وجهي منه. غفيت وحسيت بيه من دك تلفونه حجه ورجع كعدني
-بطه.. ندى.
-همم.
-راح اروحن البغداد وي صــيهد كهلان ما يگدر يمشي وصيهد مايرضى يروح وحده.
-اممم.
مغمضه عيوني كوه احاجيه عافني وطلع قنعت روحـــي گوه كعدت حضرت ملابسه وسويتله چاي بين ما دخل يسبح نزلت يمي بــدور
-شعندج كاعده؟
بــدور:: فركت عيوني أشرتلها على الكتاب بأيدي
-ما دارسه امتحاني عدل كعدت اراجع، انتِ ليش كاعده؟
-اسوي ريوك الوهب راح يرحون البغداد هوه وصيهد.
بلعت ريك مرتبكه گالت
-اذا تردين حاجي وهـــب هسه اعتذري منه زين مو اعصاب اليوم.
-اخاف هم يطردني.
-واذا طردج؟ عادي غير اخوج ويحبج وزعل من عندج مابيها شي.
بــدور:: زفرت نفس محتاره كعدت يمها بالمطبخ سوتلي لفة جبن وصبتلي چاي اكلت واحجي وياها صاح عليها وهـــب مشت يمه بسرعة واني اكل وافكر بيه شلت راسي على باب الهول اللگمه بحلكي طب صــيهد عاينلي وعگد حاجبه
- شعدج كاعده؟
حركت حلكي بس اريد ابلع اللگمه واحاجيه دكيت على صدري اتحمحم وشلت الكتاب اراويه
-عندي امتحان وكعدت اراجع.
هز راسه خوش ما راضي ورد يسأل
-وهـــب كعد؟
-اي وسبح هسه جا يبدل.
-خوش.
دار وجهه وطلع ردت ندى يمي للمطبخ گالت
-كومي كومي بسرعة روحـــي احجي وياه سألني عليج واشوفه بيه مجال.
-الله عليج؟ خاف يغلط عليَّ.
-لا والله تعاي وياي نطب سوه.
هيه شالت صينية الريوك وانه امشي وياها كاضه الكتاب خايفه لا همّ يطردني فتحت الباب واكف يم الميز يمشط بشعره طبت ندى حظت الصينية بنص الغرفة وهوه عاينلي ورد عاين بالمراية ضليت واكفه بالباب محتاره شلون احاجيه همست مختنگه
-وهـــب.. بعد ما اعيدنها.
ما عاينلي ضل يمشط وانه گـــلبي ينمرد رجفن شفايفي اريد اكض دموعي ما اگدر
-وعلي ما اعيدنهااا.
جرني من ايدي گدامه كض وجهي بين اديه وانه مدري شجاني عبالك البچي اول طيحته
-عيب تصرفج.
-اي
-ووجعيه جا دام اي ليش تسوينه.
-بعد ما اعيدنها.
-ما تفكرين بيه ولا تحطين الزواج براسج خلي كل تفكيرج بدراستج خوش؟
-اي التوبه.
-اكيد
-اي
مسحت عيوني واهز براسي بس اريدن يصالحني گال
وهـــب:: مدي اصبعج خل نتصاحب.
ابتسمت مت بسن دموعي مديتله ايدي لوه اصبعي بأصبعه جا كسره وانه ساكته خاف اصيح خاف ما يصاحب. صفگت ندى على كيف وتعاين الرضا خاف يفز
عفتهم وصعدت فوك جريت نفس براحة وكرهت روحـــي من عقلي غصب عني يفكر بمراد هوه يجي التفكيري غصباً عليَّ، مشيت للمدرسة وكل ما اطلع گـــلبي يدك حيل واعاين مناه ومناه ما اشوفنه.
رديت للبيت ضالين بس نسوان حتى ابوي ما ادري بسه وين اجت رغد يمنى من ملشي تلعب روحها وساعه تمد رجليها ساعة تشد راسها صارت جنها عجوز.
وجويريه تضحك عليها للغروب وي الصلاة اجوا اخواني طبوا للغرفة وكلمن يحجيله امي نشدتهم على السادة ماحجوا سويت روحـــي طلعت وكفت يم الحمام واسمعلهم كالها
صــيهد:: رحب بينه بس وجهه ثگيل وره الغده حاجيته وحاجيت جعفر كوه كاض روحـــي منه كلساع اريد امده واكتله الخايس.
-هااه هاااه ساده.
صــيهد:: اهاه رحم الله والديج ذكرتيني هاي واحد مت الاسباب ليش ما انطي للساده؟ ما اگدر اسبهم واغلط.
وهـــب:: مده ويسكتون شبيك.
ايمان:: هاي هيه دام رحتوا وطيبتوا خاطرهم بعد ما عليكم الضل سهل تهون .
وهمه يحاجونها مقهورين من حسيتهم راح يطلعون طبيت للحمام وعلى حضي المصخم اجه وهـــب
-ياهو هناه؟
-انه؟
-فضيها اريدن اسبح.
بس حسيته طب الغرفته طلعت رزكضت صعدت فوك بس ولا نزلت ومدري شبيه اضــحك حسيت روحـــي الملكة جودا، سيد عباس يزعل علمودي؟ ضحكت غطيت وجهي ونمت وهالنومه نومه لتلاثة الفجر عبالك ميته لا واحد مكعدني لا واحد گايل خاف نامت جوعانه خطيه، لگيت رضا يمي اي هاي هيه استاذ وهـــب بس بهاي فالح حتى يشبگ مرته يشمر رضا يمي ما يكول خطيه اختي نايمه جوعانه.
نزلت سويتلي ريوك اكلت وصعدت درست مناه لمن اهلي كعدوا بدلت ومشيت للمدرسة عده اسبوع سالفتهم انسدت وحتى البنات بطلن يكللي صاحبة السيد وانه هم بديت ما أفكر بيه وحطيت تركيزي ويَ الدراسه الحد يوم الخميس كضه الدوام طلعت من المدرسة انجث بعبايتي ونزلت من الدرج مشيت على الرصيف ما مركزه هواي بنات واكفات متانيات السوق وأنه امشي وعيوني ليگدام ادور السايق.
حسيت على ايد كضتني
-بــدور
التفتت عليها عبالي وحده من بنات صفي والگاها اخته بساع اتلفتت ادوره ماشفته رديت اعاين بوجها مرتبكه وگلبي دك حيل وهيه مبتسمه ومضيگه عيونها من الشمس حجت بصوت ناصي
-شلونج حبيبتي؟
-الحمدلله.. اخم شتسوين هناه؟
-اجيت أشوفج
رديت اعاين للشارع اركز ماشفته وهيه شايله بأيدها علاكه مالّ هداية كضتني من أيدي
-ناوين اني وامي واخواتي نجيلكم والله امي كلش بخاطرها تتعرف على امج.
-هلا بيها حبيبتي
احاجيها مرتبكه وخايفه مدري شتصرف اعوفنها واروح لو لازم احجي وياها بأدب.
حطت ايدها بأيدي ومشت وياي سوه تسأل
-شلونها دراستج؟
-الحمدلله.
-تونسي والله المدرسة حتى احلى من الجامعة.
-انتِ جامعة؟
-اي
-ما مبين عبالي هم بالمدرسة.
ابتسمت نتمشى لمحت سيارته واكفه شوي بعيد بس هو ما نازل ضال بالسيارة وكفنا يم سيارة الخط مالتي فتحت الباب احاجيها
-تتفضلون ويانا؟
-حبيبتي تسلمين
مدت ايدها الايدي
-تفضلي هاي هدية من امي
عاينت الايدها وهزيت راسي لا جرت ايدي تحط خيوط العلاكه بين اصابعي جريت ايدي منها
-لا والله ما يصير
-هدية والهديه ما تنرفض.
-لا والله اعذريني وعلي امي ما ترضى.
-كليلها من العلويه ام سجاد تقبل.
هزيت راسي لا منحررجة السايق دك هورن مل صعدت هستوني اسد الباب شمرتها وياي بالسيارة هيه وورقة وحجت بسرعة
-حمامة السيد الهديه ما تنرفض.
سدت الباب دارت وجها وراحت وانه اعاين وراها بهتانه ووجهي صخن والسايق بس يستغفر يريد يطلع من بين السيارات اعاين وراها صعدت گدام يم اخوها، وضلت سيارتهم واكفه الحد ما السايق طلع من بين السيارات ومشه بالشارع فتنا عى سيارتهم بمجرد صرت مقابيله التفت عاينلي درت وجهي اطكطك احس عيون وهـــب بكل مچان وتشوفني .
ايديي يرجفن شلت العلاكه خليتها بصفي رشلت الورقة مرتبكه وخايفه من الساق غطيت ايدي بعبايتي وفتحتها صوت دگة گـــلبي عالي ، الورقة صغيره ومبينه مكتوبه بأستعجال سطرين مكتوب بيهن
انتِ بعدج صغيرة وانا صبري طويل.
اذا الله راد وانتِ تقبلين.. املل اهلج لحد ما يقبلون مرت السيد تصيرين.
شلت راسي بصدمة عاينت للسايق من الجامة البلوسط وهوه ملتهي يسب ويغلط على الوادم البالشارع، گـــلبي گمت اسمع صوت دگته، جعصت الورقة بأيدي حيييل خايفه اشمرها بالشارع ويسريها حضي تطير لحد ما تصير بأيد صــيهد ويسويها حضي يعرفه خط مراد علمدار ويجيني.
وره نا جعصتها گطعتها صطع صغااار وهم ما ارتاح گلبي فتحت بطل الماي مالتي عبيت الورق بالبطل وهزيته اخلطه الحد ما انجعصت صارن جنهن عجين يله جريت نفس وبعدني خايفه واحجي وي روحـــي
هسه يجوز اكو كامرات مراقبه وراح يشوفوني صخام بوجهي صخام بعيني، لا لا يمه شيوصلني الامي واحجيلها.
بس نزلت مت السيارة مشيت بساع مستعجله فتحت باب الحوش ونردمت بصيهد مدري شمرجعه من الكليه هيج وكت شلت راسي اعاين بوجهه خايفه وهوه يعدل بهدومه ويحجي
-داگج الجوع ما تعاينين گدامج.
تحركت من گدامه مدنگه اريد امشي واغطي علاكة العباية بأيدي طلع وهـــب من المطبخ صرت بينهم اثنينهم اذا اضمها وراي يشوفها صــيهد اذا اضمها گدامي يشوفها وهـــب وكفت بالنص أعاين بيناتهم والخوف اكلني كاشفه روحـــي بروحي ولا يحتاج يحققون هاي انه ملامحي الخايسه تصيح الامها وابوها مسويه مصيبة تعالوا عضوني
صــيهد:: شنهذا البيدج ؟
12
عاينت بوجهه اجه علي ووهب هم اجاني يصيح
-كيك ؟بالنص بــدور.
وصلوا يمي اثنينهم عاينت بوجهم اريد ابجي وصيهد يسأل
-عيد ميلادج اليوم؟
هزيت راسي لا اريد اي وحده من البنات تطيح يصير بيها شي بيتنا يحترك حتى يركضولهم ويعوفوني، جر العلاكه وهـــب من ايدي مرسوم عليها عباية عگد حاجبه
-عباية؟
صــيهد:: طالعه وحدج ولج؟
بلعت ريك اهز راسي لا
وهـــب:: منين هاي؟ شني محل گبال المدرسة؟
-لا.
صــيهد:: منين هاي العباية.
-من.. من توزيعات .. هاه توزيعات مال ايتام وانطوني، اجت هاي مؤسسة توزع عبايات.
يعاينون بأستغراب
وهـــب:: جا انتِ يتيمه؟
-لا بس
صــيهد:: ووولج جاي تجذبين؟؟ منين هاااي
جراني وهـــب يضحك وانه اريد اركض الامي گاله
وهـــب:: اووكف بروح عمي، گتيلهم انتِ يتيمه؟
عاينت بوجهه مدري منين اجتني هاي الجذبة هزيت راسي اي ضحك وهـــب وطكاني بس صــيهد يعاين بخزر
صــيهد:: باجر تردينها وانا انطيج فلوس تشترين عيب وحرام تسوين هيج ما يصير.
وهـــب:: بعد ما تعيدها.. روحـــي الامي هسه تكتلج.
دفعني يخلصني مشيت اركض طبيت للبست اريذ الطم گبل الامي حطيت العباية على رجليها ولطمت على خدودي اسولفلها وحتى على الرسالة احجيها وامي تلطم وانه الطم واجت ندى وهم سولفنالها لطمت ويانه
ايمان:: دهر الدهرج يا بــدور شسويتي للزلمه وتسودن.
-والله ما سويتله شي ولا انه حلوه واطيح الطير وبسوم الشافني العب الروح وحال الظيم حالي وعيوني من البجي مورمه ووجهي لا هو املح لا هو اجلح.
ندى:: عمه غير مخليته بحضنهل وتدكدك على خده هل تخبل الولد عليها هههههه.
احجي وارجف وندى ميته من الضحك عليَّ وامي خافت بس صعدت فوك بدلت وصليت نزلت يمها وره الغده گالت الوهب
-اريدن رقم العلويه مرت سيد عباس
وهـــب:: هاه المن؟
-اريدنها بسالسفة ياهي مالتك؟
ما رضى يكلها منين اجيبه الج زعلت امي وهوه يروح ويرجع عليها مناه للعصر كعد يمها وخابر سيد عباس منحرج. ويمسح بكصته گاله
-الوالده تريد تحجي وي علويتكم.. اي والله.. الله يخليك سيد.
سد التلفون منه ما راضي عشر دقايق ودك بتلفونه صوت رساله اخذ تلفون امي دك رقم العلويه بيه وعاينلي بخزر دنگت ادرس ساكته، عاف التلفون عد امي وطلع. گالت
-امشي شوفيه اذا طلع اقفلس باب الهول وباب المطبخ.
گمت اركض قفلتهن ورجعت. يمها ندى كاضه التلفون خابرت وانطته الامي فاتحة السماعة واحنا نتصنت وياها شويه وجاوبتها العلوية ووحده اكلت الثانية بالسلام عبالك يعرفن بعض من سنين. ومن كضن سلامهن امي گالتلها
-علوية يا ريت تودين بنيتج المدرسة بــدور تاخذ العبايه.
-انتِ بنت شيوخ ومو اني الاعلمج ام صــيهد، بس شتكولين الهديه تترجع؟
-لا بس ساعة التصير بيها مو خوش غايه مالها داعي، علويه ترضينها عل بنياتج؟ وانتم ساده وجدكم رسول الله، وليدكم اجه خطب واخوتها مارضوا ليش يكضلها باب آلمدرسة لكفه واحد من اخوتها ما تصير سالفه؟
-بس ابني ما باوعلها ولا حجه وياها رايدها بالحلال وانتم تگولون صغيرة مابيها شي ننتظر كم سنة تردون؟ بس لا تگولون ما ننطيكم واحنا جايين وداكين بابكم، وليدي رايدها نكسر گلبه؟
سكتت امي محتاره وانه آكل بأظافري كالتلها
ايمان:: الكاتبه الله يصير بس فـــدوه علويه لا يجي النوبه والله لو دروا الولد ما تكضي على خير.
-هاي هيه تأمرين ام صــيهد
-بعد گـــلبي .
كضن مكالمتهن جرتني امي تطكني وتتعارك
-شمسويه للزلمه؟
-ما سويت والله ما سويت.
جرتني منها ندى غاصه من الضحك وتگلها
-انسحر من حطته بحضنها.
اخذت كتبي وشردت فوك ، وكل يوم يمر اعيد الرسالة بعقلي كلمة كلمة واوزع ابتسامات للحياطين وجويريه وندى ناصبات عليَّ كل شويه وگالن
جــويريه:: بعدج صغيرة وانا صبري طويل.
ندى:: الله.
جــويريه:: ضحكت صفگت ايدي بأيد ندى وبدور متحلفه بينا، وبس اجه رضا يمنه سكتنه يلكفها ويروح يحجيها يم صــيهد يورطنا، بقيت يمهن للغروب قبل الصلاة رجعت للمشتمل صليت وسويت عشا وكرار كدامي بالكريكوت مالته.
دخل صــيهد للهول وبس باوع الكرار ضحك وهو بالباب يحاجيه
-بويه كرررار.
شال راسه باوعلي مبتسم
-ها ام السوادين.
-ههههه والله اعقل وحده بالقرية.
-ههههههههه
ضحك من كل گلبه غسل ورجع كعد بالهول خله كرار بحضنه لو مدري شيصير مايخليه مكمط اول ما يجي يمه يفتح گماطه، اخذت العشا وكعدت يمه ركع كرار لفراشه تعشينه نسولف على الامتحانات يوصيني اشد حيلي اخذله شويه وگال
صــيهد:: صدك تحسين روحج احسن هاي السوداين راحن.
-مو سوادين صــيهد بس حقي يعني باوع مدري شلون احجيلك بس احس مدري شلون.
دنك ياكل يضم ضحكته، وره العشه طلع وي الولد واني بقييت ادرس الحد ما تعبـــت نومت كرار وتمددت بفراشي اريد انام واتلمس اثر العملية ببطني يقهرني هستوني اغفى ودخل صــيهد
-اكعدي
حجّه بجدية باوعته عاگده حاجبي واحاول اتذكر اطا حاجيه عليه شي لو لا، كعدت على حيلي وهو كعد مقابيلي. يباوع بوجهي
-تتذكرين هذيج المره من غلطتي عليَّ
-اني؟
-اي گلتي خرب اهلك.
هزيت راسي اي
-وتتذكرين من تشمرين عليَّ حجي وانا ساكت.
-شبيك صــيهد؟
-خل نتحاسب.
-شسالفة والله حتى بطني اوجعني
ضحك وجرني من راسي الصدره يبوسني ويدغني
-حيوانه تنگطين خبث
-ااني
جر خشمي يضحك ويهز راسه اي
-كهلان كل ما تجيه بنيه تريده يدرسها يتحجج ويسوي روحه مشغول يخاف منج تصورينه المرته .
ضحكت وهوه يهز راسه
-مو اكلج تنگطين خبث
-فوك ما احاف على زوج صديقتي.
-جا غير اخوج وما تفتنين عليه
-لا هاي مابيها خوه ها خيانه... مثل ام الاقلام.
ضحك حيل ومن يضحك يجيبني تدمغ ساعه يكرصني ساعة يجر خشمي دفعت ايده أفرك بزندي
-دخيل الله اكره شقاااك.
-بعد ما اشاقيج.
-خوش
كام من يمي بدل. ورجع تمدد بصفي عبالي صدك ماراح يشاقيني جر المخده من حوه راسي وخنكني بيها صرررخت وهو كاتم صوتي دفعته بزعل اكثر شي يخوفني الخنك
-شقى هذه بله؟ هسه لو ميته شتسوي.
يضحك واني محترك گـــلبي كعدت على حيلي جريت المخده هم اريد اخنگه وهوه متمدد ويگلي
-اخنگي عادي
عباله راح ينكسر خاطري وما اخنكه خليت المخده فوگ وجه وبأثنين ايديي خانگته واسمعه يضحك عباله بس هيج اصبري خل ينگطع نفسك شويه، دقيقة عدت وشمرت روحـــي فوگ المخده خليت صدري وي ايديي واضغط عليها بقوة دفعني مختنك يريد يفلت روحه واتربع على بطنه واخنگه كل حيلي
دفعني منه وجر نفس مختنك
-هيج هيه؟
-جا انتَ هيج خنگتني.
-لا انتِ بعد بيج سوادين تردين تموتيني
-اي خاف على روحك من عندي.
جر باكيت الجكاير يريد يدخن وباوع الكرار سباه وطلع بره دخن ورجع بس فتح باب الغرفة باوع بوجهي ضحكنا اثنينا
"""
ريـــمه:: اريد اعيش مطمئنه بس ما اگدر انه حتى عيون امي من تعاين بوجهي لو الواحد من اخوتي تقلقني .
واكفه بباب الحوش اعاين الجهال مرتضى يلعبون بباب حوشهم مديت ايدي أأشرلهم تعالوا اجوا يركضون كعدت كدامهم ابوسنهم واحاجيهم
-امكم شلونها؟
-زينه.
-سلمولي عليها.
طبيت جبتلهم كيكات ورجعت انطيتهم اخذوهن ومشوا، شويه واجوا عبود وسجاد من الدكتور هالايام گلبه كلش مو زين كهلان حجزله يم دكتور ببغداد بلكين يسويله عمليه ويرتاح تعب ومل من الدكاتره، وسجاد ميت من القهر عليه دخلوا للدوانيه عبود يضحك وسجاد ضايج
-شبيكم؟
عبود:: يگلي اتبرعلك بگلبي
سجاد:: عليج الله بيها شي يضحك؟ انطيه گـــلبي بأعتبار عايشين اثنينا هوه عقل وانه گلب بجسد واحد
طكيته على ايده ماراضيه بحجيه كمت يم البنات رنـــه تقري بزهره وشمس تلعب يمهن
-اجه عبود رنـــه.
لبست حجابها عدل ومشتله سجاد عافه وطلع وهيه كعدت يمه تبوسه وتحاجيه بخوف وهو يضحك ويحلف مابيه شي.
يومين وأخذوه كهلان وسجاد وسلطان البغداد وثاني يوم ردوا وجهه كهلان ما يبشر بخير طبيت وراه للغرفة يعاين بوجهه علاوي متحسر
-ها كهلان.
عاينلي بحيره مسح وجهه
-ما يتحمل عملية.
-جا شلون؟
-يكلي ما عليه شي عوفه على العلاج ولا يتعب
سكتت محتاره وهوه حيره تجيبه وحيره تاخذه، العصر طلعوا هوه وصيهد للدچه مال بيت بريا ورنه يخططون البنيان شلون صار وهيه ماده راسها من باب الحوش وتصيح عليهم
-لا ما اريدنها مناه اريد الغرفه غااد.
وصيهد من يمه يغلط عليها وكهلان يأشر روحـــي. تضحك متحلفه بيه وميثم جابله عمال وبدوا بيه عبود وسجاد يفترون على روسهم، لان كهلان التهى بالزرع وامتحاناته ماضللهن شي .
الصبح من يرحون كلهم للدوان وعبود وسجاد يطلعون يكعدون يم العمال اخابر ماريا من يوم السولفتلي مــاسه عليها وصتني اخابرها كل يوم طولت يله ردت
-ما تجين يمي؟
ماريا:: لا تعي انتِ.
-هههه لا خيه وين اكدر، خونا واحد مضوجج امج هم رجعت خابرتج؟
-لا لا والله.
-اي خوش
-بس ريـــمه لو تخبري خيك يركعلي الأكاونت تبعي بيكون منيح.
-هسه اتعارك وياه علمودج والله.
-تؤبريني.
ضحكت سديته منها وخابرت ســليم
-شلونك اغا
-هلا ام علي شلونج؟
-بعد روحـــي ولو زعلانه منك.
-ليش؟
-ماسح حساب ماريا مدري شني؟
-اهاه
-أي شعليك سليم اخوتها راضين بحسابها
-ياهي مالتي يابه عود خل تسوي جديد
-جا ليش مسحت القديم؟
-احسن
-غير اعرف ليش؟
-امها تراسلها عليه.
سكتت شويه ورديت گتله
-جا ياهي مالتك بيها؟
-يابه ياهي مالتي بيها ما يرجع بعد انا ابن كلب وحذفته خوش؟
-يا شجاك شكتلك.
-خويه لحت والله لحت اول امس رغد حاجتني هم ساعة السوده يوم المسحته.
-يله هاي هيه اخذ راحتك
سديت التلفون وبالليل اجه يصالحني ويعتذر، سكتت وبلغت ماريا نايرجع تحلفت بيه تموتني من الضحك من تكول عليه شرشوح، انحرمت من شوفت هاجر ومن اكول الاخواني جيبوها يكلولي ما ترضى والله ولا انه الگدرت اروحلها
بالأربعين مال جده ابوي وعمي وليد تعاركوا وي اخوالهم بالمگبره وصايره بالحجار وولدنا ما ساكتين هم متعاركين وي ولد اخوان جده لان غالطين عليهم، ردوا وجوهم ما يكصها السيف وواحد يذب اللوم على الثاني.
امي ابد ما تبين وابوي اخذله شهر زين ورد يسوي مشاكل بين الولد من وصلت السالفة للحصاد، كهلان يتخبل يجي من الكليه تعبان يبدل ويركض للگيعان وابوي يفتر وراه حاير شلون يقهره گـــلبي يفرفح وبس شافني واكفه وي كهلان گال
-ياهو الوكفلج بأبنج وطيبه.
-السحر منكم وبيكم ما وكفتولي ردتوني انغش عبالكم ريـــمه القديمة انه.
تفل عليه ومشه للبيت هزيت راسي متحسره الدنيا حاره وكهلان ينگل بالحصاد هوه وسلطان ووياه وولد عمي وليد وميثم نوبات يجي يعاونه تعب حيل ويرد بس يسبح يكض ملزمته ما يريد يرسب هالسنه
ورنه هم كابلت كتبها ومن بدت الامتحانات شخطت فد نوب محد يوصل ينها بس شمس، بس حتى بريا تخلت عنه لا تخابره ولا يخابرها، حسين وزهره كضوا امتحانات وهيه وراهم يله كضت ضل بس كهلان ووي امتحانه صادف رمضان وزراعة الشلب(الرز) انتهى من التعب ينمرد گـــلبي . من يرد من الگيعان شفايفه بيض مست من العطش يتمدد شويه
-لا تكعدوني لمن يصيّر الاذان.
ورنه تفتر عليه تريد تشربه ماي وهوه نايم كوه كاضتها، وي الاذان نكعده وبس يفطر يمشي للگيعان انهد حيله واخواني وولد عمي هم ملتهين بالگيعان وبريا مايرضى ينزل حتى لا يشتغل وياهم سودن رنـــه وكلساع تحضره.
گبل العيد بيوم اجت عمه ايمان والبنات يمنه مخيطتلنا دشاديش، كعدنا نسولف ونضحك وناصبين على بــدور وهيه تحلف
-والله بعد ما اجه انسن شبيچن.
رغد:: ذاك اليوم مخلي ساده يخابرون صــيهد
بــدور:: جذذب؟
-وعلي
بــدور:: الولد حبني شعبالكم ولا يعوفني بعد عمي انطوني اله ليش تعذبونه؟
تحجي وتضحك وجرتها عنه تكتلها ركضت شمس تحميها وتبوس بيها ما راضيه ، ضلن يمنه لهدعش يله راحن ثاني يوم العيد بريا نزل ورنه مطنگره عليه شلعت گلبه يله صالحاه وتندم لان نزل عافوا شغل البيت عليه ولا جنه نزل يرتاح، كل يوم العصر يجي يفتر بالبيت وهوه بعده بلا سكف ورنه تعاينله من الباب وتضحك.
وهوه ما طول لم اغراضه ورجع ألتحق شارد من الشغل .
نجحوا كلهم حتى كهلان، ماضل غير مرحله وحده ويتخرج يخلص، رنـــه من شهر الثامن بدت تدرس للسادس ومن يخابرها بريا تدفر الكتاب وتتمدد تحجي وياه هوه يگلها ماضل شي وهيه تكله بس هالسنه ومكشره للهوه الحد ما تلكفهم شمس تسد الخط بوجهه بريا.
صحكت ورنه تبجي بالجذب
-حيل وياج ادرسي شمس تريدج تدرسين.
-اي والله هههه.
ضحكت وطبيت للغرفة يلعب وي علاوي عاينلي يطكطك رگبته بوجع
-هاه؟
-مابيه حيل اروحن
-سوده عليه اروح بمچانك؟
ضحك ووكف جرني الصدره شابگني بأثنين اديه
-مو تضلين سهرانه ابطي انه للأربعه اذا اجه واحد من الولد يم المكاين ارد.
-خوش ديربالك على روحك.
حط الچفيه على راسه اخذ اللايت وطلع .
طــروادة:: گبل ما اعبر للگيعان البهذاك الصوب افتريت بالگاع اليم البيوت ما مرتاح كل ما اجيهن واسگي احسن بواحد يفتر بين النخلات انطره وما اشوفن شي بس احسن بيه من يركض بين مدهه ومده.
ضليت شويه وعبرت الگيعاني بهذاك الصوب صليت يمهن لتلاثة تعبـــت طفيت المكاين منهن ورديت للگيعان الي بيتنه راح يكضي سگيهن وصله ضلت كعدت يمها اتانيها ، شلت راسي فاز حسيت ضوه بين النخلات، شعلت اللايت اضوي مناه ومناه ماكو احد وماكو اي صوت بس صوت السعف وصوت البومه
طفيت اللايت ومركز گمت من مجاني امشي ظلمة واتختل. لمن وصلت للنخلات كمت اسمع صوت ركضتها من مچان المچان شغلت الضوه وافتز بين النخل لمحت ورقة ملزومه على النخله تدنيت يمها اضوي عليها وبدون ما اشيلها عاينت للمكتوب بيها
-لا تطلع بدون سلاح يردون يقتلوكم انتَ وصيهد
انتبه.
كزبر جلدي دايخ منين ضويت افتر ماكو احد اخذتها ورديت للبيت محتار
-ريـــمه .. ريـــمه .
ريـــمه:: فزيت افرك بعيوني مشغل الضوه ويعاين بوجهي عاگد حاجبه كعد بصفي ومدلي الورقة اخذتها من ايده شهگت من قريت المكتوب بيها
طــروادة:: اريد تشوفين خط كل بنات عمي وبالاخص بــدور.
يحجي وياي وانه مدري شصار بحالي گـــلبي ضلي يوجعني وايدي رجفت متت من الخوف، اخذها من ايدي الخط كد ماركزت بيه حفظته كام من يمي ميت من القهر لان مايعرف ياهو اليكتب هيج وخاف على صــيهد حييل خابر وهـــب ووصاه مايعوفه يروح للگيعان وحده وياخذون وياهم سلاح كل ما يرحون.
لا انه رديت نمت ولا هوه نام راد يشوف خط كل بناتنا ومالكيت طريقة اشوف بيها خطهن من الخوف ولا شي يجي بعقلي، يومين عدن يمشي وسلاحه وياه وانه اضل كاعده الحد ما يرجع ميته من الخوف.
ننام بنفس الوكت ونكعد سوه وعلاوي متبهذل يفز على صوتنا.
العصر هوه مشه للگاع اعاين وراه من باب الحوش ام وابوي هم صعدوا بالسيارة ومدري وين راحوا ركضت للبيت لبست عبايتي وخابرته
-هاه ناسي شي؟
-لا اكلك رايحه البيت اهلي اشوفن هاجر
-خوش بس ردي گبل لا اهلج يردون
-اي والله.
شلت علي عفته بحضن رنـــه
رنـــه:: شلون بله ما ندرس
-صيري خوش عمه
شالته تبوسه وتضحك طلعت من بيتنا البيت اهلي مبتسمه دخّلت بسرعة سمعت ماي الحمام مفتوح عرفتها جاي تسبح، صعدت الغرفتها گلت افاجئها تفتح الباب تلكاني گدامها دخلت للغرفة مبتسمه حيل مشتاقتلها صار هواي ما شايفتها ما ترضى تجيني حسيتها زعلانه من اخر مره.
شلت المخده من فراشها اريد ارتبه لمحت دفتر رسم وقلم جوه المخده عاينت للباب ودنگت شلت الدفتر فتحته اول صوره رسم شجر عاديه وثاني لوحه شبح يكزبر الجلد ثالث صوره قشعر بدني وانه اشوفها هاجر هاي هاجر.
راسمه روحها وحبال مشدودات على اديها وعلى حلگها.
فركت ايدي ارجف وگلبت الورقة عگدت حاجبي بصدمة وكعدت على حيلي اعاين بالورقة مصدومة كاتبه
هاجر شامل شعلان
ومكرره نفس الاسم على طول الورقة بعشرين خط مختلفات بس ماكو من ضمنهن الخط المكتوبة بيه رسائل كهلان.
طبكت الدفتر عفته بسرعه من سمعت خطواتها على الدرج كعدت عذل فتحت الباب لافه خاولي على شعرها وبأيدها كاضه حذاء رياضي عالي ونصه طين بس لمحتني ضمته وراها ورديت ليوره ذبته واجت الحضني تركض شبگتها حييل والحيره تدك بگلبي
وخرتها من صدري كاضه وجها بين ايديي
-ليش ما تجين يمي.
دنگت ساكته
-امي ما تخليج؟
هزت راسها لا. اعاينلها وعقلي متشوش افكر برسمتها لو افكر بالخط رديت شبگتها ابوسنها حييل، خايفه عليها وابد ما مرتاحه.
وخرت من حضني تأشر وتسأل على علاوي طمنتها عليه
ضليت يمها شويه ورديت للبيت اكل بروحي من التفكير
هاجر اول ما علمتها تكتب جان خطها مايل وحتى بعد سنتين خطها ما جان مضبوط شلون شلون كدرت تكتب اسمها بأجثر من عشرين خط وشي مختلف عن شي كأنما مسويتهن ببرنامج
ما حجيت بس ردت يصيرلي وقت وهيه تجي يمي للبيت اطلع الرسائل واكلها عرفته خطج حتى اشوفن رد فعلها شتسوي وشتحجي اذا تأكدت هيه احجي الكهلان .
وهو شك بيه شي اخذله اسبوع يمه يسأل شبيج شصاير واسكت ماكو شي، رحنه انه وياه وحسين وزهره جبنالهم هدوم للمدارس بالليل الساعة ب١٢ كلهم ناموا بس انه وياه كاعدين اكل واخذ غراضه يمشي للگيعان
-نامي ولا تخافين بهذن الگيعان يمج لو اصيح عليج تسمعيني.
-هههه وين اسمعنك.
ابتسم يتلمس خدي
-نامي ريمي لا تضلين كاعده من السهر حتى خدودج رايحات.
كرص خدي وطلع صحت وراه
-اقرأ آية الكرسي
طــروادة:: تمشيت بدون لايت الدنيا گمره،اجوا يمي الولد سلطان يدري بكل السالفة بس صــيهد ما گذرت احجيله يكض بيكسي على الوادم حتى يخليهم يعترفون ياهو اليكتب هاي الرسايل.
ضلوا يمي ساعة وگاموا يمشون
صــيهد:: اضل اعاونك؟
-لا يابه ماعندي شي، امشي ادرس وراك دور ثاني.
سلطان:: كسلان وعلي مو شكول كليه
مــيثم:: حالف ما يعدي مرحله بدون رسوب.
صــيهد::رسوب خالاتكم.
ضحكنا ومشوا سوه للبيوت، افتريت بالگاع للساعة ب٣ تدنيت يم النخلات چني ادري بيها هالوكت تجي ...
بدون لايت افتريت بين النخلات ادور حاس بيها موجوده بس ما ادري هالمره شني غايتها شغلت ضوه اللايت اعاين على النخله الگدامي ملزوك عليها ورقة بيضة ما مكتوب عليها اي شي
ثواني عدن وحسيت بخطواتها وره ظهري خطوه خطوه تقترب وتدوس على السعف اليابس وهو جوه رجليها ينثرث، وگفت وراي درت عليها بساع والضوه بأيدي
شكرا لزيارتكم عالم روايات سكيرهوم
