رواية عشك فلاح الفصل السابع 7 بقلم ورود الخالدي

احبتي الرواية الجديدة التي تحمل عنوان عشك فﻻح هي..رواية عراقية..في سطورها خليط من اللهجة البغدادية..والريفية ..تتمحور احداثها..حول فتاة بغدادية جميلة تضطر..للهرب مع والدتها..من مدينتها..الى اقرباء..والدتها..في الريف..وبطلنا هو فﻻح اصيل من الريف..بشخصية فذه...تعرض..لصدمة..في حياته جعلته شخصا..ﻻيثق بأحد وخصوصا...النساء..كيف ستجمعهم الرواية..وكيف ستكون العﻻقة بين شخصين مختلفين..في اﻻفكار..

#البارت7

علي::

وراجن العنبات..والتينات..وطلعنا انه واخواني ونسوانهم وخواتي نحوش عنب وتين..حتى انزله للسوك ابيعه..انه ما احوش العنب والتين..كله اخلي جم هرش بيهن..مرات عيالنه تشتهي..منه..لو يضيفنا خطار..واترسله قفص صوغة لعياله..المهم ملتهين..نحوش بالعنب.والتين وشفتها اجت..يمنه:

شدتسوون..

حسين رد عليها:

نحوش عنب..راج العنب وصار حلو يكتل كتل

مرته رأسا استلمت:

حسيون..بطل لواكة..ﻻ اركعك بالمسحاة..اليمي..

بويه ..هسه انه شكلت كلت العنب راج

دبطل..بطل..هالسولف..والتفت على شغلك..

اني ضحكت::

جنة تعاي يمي..هنا..ترة ذوله يضلون يتناكرون..ومايخلصون شغل..

اجت كعدت بالفي تشوف البنات يحوشن..وياكلن عنب وتين..هي..كامت شلعت تينه باوعت عليها..وذبتها بالقفص..يمكن..بيها تراب ما اكلتها..اوووف نازوكية بت الكلب..صحت ع محمد:

بووويه محمد ماتجيبلي اميه باردة انكطع كلبي من العطش..

اي..بويه..وراح محمد يركض جابلي دولكة ماي..انه شلعت عنكود..زغير وجم تينه خليتهن بالماي البارد..كتله:

بويه محمد..روح..اطيهن لعمتك..جنة خلها تاكل..

راح انطاها..الدولكة..اخذتها..باوعتلي:

شكرا..علي..

اكلي..بت عمتي..شوفي..زرعنا..شلون طيب

هيه كعدت على الصناديك الفارغة..تاكل..

للعصر..خلصنا حوي..واخذت الزرعات بعتهن..ورديت..

كاعدين..بالهول كلنا وابوي ويانه...

طلعت امي ادردم:

ولج حميدة..هو هذا خياط..شني..شو الدشداشه مبزنكة..ماينعرف ساسها من راسها..عود صار..اسبوع من وديتيها للخياطة..ما اريدها روحي ذبيها عليها..

ابوي حجة..يبسمر امي:

والله..عمي مو الدشداشه مبزنكة انتي ماخذه بالعرض صايرة هايشة فريزية

هاااا...انه هايشة فريزيه مشكور..ابوعلي..

جا بس انه تكولين علي بريعصي مكمط..

وضحكنا..اشوفها هم تضحك...اويلي شلون شفايف ناعمات..شلون سنون حب..ليلو..عيني عليها..ما اكدر انزلها..نعلت والديه بهالضحكة التكتل..

سمعت عمتي تكول:

ﻻ ابو علي تره خياط الدشداشه يلعب النفس..لتحجي على ام علي..والله لو اكو مكينه بالبيت جان..جنة خيطتلهن احلى خياط

امي كالت:

شني جنه تعرف تخيط!

اي بنتي خياطة..هو احنا بيش جنا عايشين غير بفلوس خياطها..ابوها ...جان كاضي فلوسه على سوالفة المكسرة...زايدتنه وناقصتنه كولها من خياط جنه..

هي استحت وكالت:

ﻻ ماما..لتبالغين..طلعتيني معيشتكم..

شنو ابالغ يوم..غير هذا الصدك قابل اني مجذبة

ابوي صفن وكال:

والله خالي جنه طلعتي حوك...بس سهلة اشتريلج مكينه..قابل المكينه شني مندلة وخيطي لمرت خالج وللبنات..احسن ما يرحن يخيطن بره..

اي خالو..اخيطلهن شكو بيها:

بويه علي..اخذ..بت عمتك باجر..للوﻻية..وخليها تشتري المكينة البخاطرها...

رف كلبي من كالي اخذ بت عمتك..كتلة:

اي بويه صار..باجر اخذها..

الصبح..اخذتها..وياي كاعدة يمي بس ساكته:

طلعتي خياطة..

اي من جنت طفلة جنت احب الخياط اخيط بدﻻت لعاباتي..ومن كبرت تعلمت اخيط..والجوارين كامن يخيطن يمي؟

ها تحبين الخياط..وبعد شتحبين؟؟

شنو؟!

ﻻ..هيج..ماكو شي..

كاعدة يمي..تضوي..تضوي بت..الكلب شهالحسن..الشايلته..

وصلنا للسوك اشترينة المكينه..هي كالت:

علي..اني جايبة ويايه فلوس اخذت من امي..ممكن نروح ﻻي مجمع نسائي عندي كم شغلة اريد اشتريهن الي..

تبسمت:

جا..ليش موممكن انروح..وانه..اشتريلج.البخاطرج

فتنة للمجمع اكو اثنين شباب واكفين يم المجمع من فتنا..صفنو علينا..انه خزرتهم..وفتت..وياها شفتها تكلب مﻻبس داخلية..استحيت طلعت ..برة همه الولد ملتفتين.على سيارتي ماشافوني..واكف.وراهم.اسمع..

واحد يكل للاخر:

شفته..هذا العربي..صاعد فﻻونزة..ويمة بنينه تملخ..تخبل ..خو..مومثل حضي ستوته ما اكدر اشتري..

لك همه العربان..ميصرفون يشترون سيارات وكيعان

لك والبنيه الوياه..شفتها..

اي شفتها..تموت..

انه كلبي كام يفور بودي..اخلصهم خﻻص بس هيه جوة بالمجمع اخاف اضربهم وتلتم الوادم وادري بيها تخاف..وبساع تبجي..تانيتها من طلعت..صعدتها السيارة..وقفلت السيارة عليها ورديت الهم..لزمتهم من كفاشتهم..طكيت راس براس..وتوليتهم دفرات وجﻻليق..وين التوجعهم التمت الوادم عليه خلصتهم من ايدي....ضلو يهدون..بيه..رديت للسيارة شفتها ترجف عوزها شويه واطكها..بجيه..

حركت..ومشيت...هي ساكته بس خطيه اديها يرجفن..

من طلعنا من السوك..كالت:

شبيك..علي ليش..ليش..ضربهم هيج جان ماتو..بايدك.. لو ما الناس تخلصهم..

ولج..سكتي ماعليج انتي..

شنو معليه همه شمسوين؟وهيج هجمت عليهم؟

كتلج اسكتي..اليجيب طاريج..وعلي..ادفنه وهو عدل!

يجبيب طاريي..ليش همه شكالو عني

وكفت السيارة زمخت بيها:

كتلج..اسكتي..وماعليج شكالو..لاتخليني ارد عليهم عيونهم اشلعها ..

شفتها خافت مني..وعيونها لمعن..بس صفنت بوجهي..شفتها ..الجوة..رجفت وكالت:             

علي..خوفتني منك..                       

اشتعلو اهلي تكلي خوفتني شلون تباوع بعيوني..كلش قريبة مني..شفت روحي..بفص عينها..دخت..غركت..بعيونها..ماكدرت اسكت:

جنة ..عليج..الحسين..من تحجين ﻻتباوعين بعيوني هيج..؟

ضحكت::

هههه..لعد شلون احجي..يعني..اغمض..واحجي..وياك..؟؟

النوب..ضحكت..استلم ابومحمد:

..ولج ﻻتضحكين..مو تنعلين اهل اهلي..من تضحكين؟؟

شنو هاي..ذاك اليوم تكولي لتبجين هسه لتضحكين..شنو شتريدني اسوي يعني؟

جريتلي حسرة وحركت..ومشيت:

كلشي ﻻتسوين...خليها سكته..بروح الحسين..

ومرت اﻻيام..يوم عن يوم..هالبت تنكع بكلبي ازود وازود..احسها صارت اعز من الهوه..عندي..اكعد الصبح اتصابح بعيونها ابسمتها..الحلوة..اطلع وارد الضهر..الكاها لو كاعدة تخيط..لو تسولف هي والبنات..من افوت تكلي:

الله يساعدك                                 

اي والله الله يساعدني شكثر ضام بكلبي وساكت..عشكتها..اي والله عشكتها..قابل..اجذب على روحي..عاشكها..واهيس عشكها..عايش بروحي..وبكلبي وبعقلي وبجسمي..ما اكدر..انكر..هي موبس حلوة..وتدوخ..ﻻ..كلها هيج.....

مثل الجكليته منين من تنوكل حلوة..حسها..يموع الروح تتنغوص من تحجي..نازوكية..تضحك للهوة..والمشكلة بساع تبجي..هم..دموعها يجرن..على اقل شي..شحجي شكول..شوصف منها..خلت اهلي كلهم يحبونها..حتى نسوان اخواني اليغارن منها جبرتهن بحجاياتها الحلوة يكعدن يمها ويسولفن ويضحكن..ابوي ..كل ما..يفوت للحوش ينشد عليها..امي ماتبطل بس تسولف بيها..اوووف شسوي..كل..يوم احبها ..كل..يوم يزيد عشكي..كمت اكعد وي ابوي اضربلي صفنه مرات اروح يم جماعتي..هم تجي ابالي..واخذلي صفنه..خلصت الوكت صفنات من وراها..احجي وياها اهيم بعيونها ..اغرك والخيال..ياخذني بعيد..وصارت..كلشي..الي..اهيس روحها بروحي..واخر ايام كمت احلم بيها بس شلون احﻻم..تفشل ماتنحجي..اكعد من الصبح اركض اسبح..واكول استغفر..الله..هاي شلون ورطة شحطلها واطيب روحي..كل هذا العشك والعذاب وهي وﻻجنها وﻻ فد يوم كلمة حلوة سمعتها منها.... اطفي نار..كلبي ملتهيه عني وﻻ جني يمها..اوووف ما اكدر..انه الحوك..ما اكدراكلها احبج اخاف تكسر كلبي وتكلي مثل ذيج المرة اكرهك..وانت ماتهمني..بوووويه غير اموت..اذا سمعت..هالحجايات من عدها ردود..

وبيوم من الصبح فزيت على حس جيلة...شني هاي من يثور من الصبح..طلعت ماكو شي سكته..كلت شو ياهو..مشتري سﻻح ويجربه من الصبح..انعل والديهم..طيروا نومة عيني....محمد هم فز..كام من يمي طلع من الغرفة كبل ع البايسكل..24ساعة يفتر..ﻻيعجز وﻻيمل يوصل للبزل ويرد من الصبح..طلعت غسلت وجهي ورديت اتريك..بعدني مامخلي لكمة بحلكي واجاني محمد..يناشغ.:

ها..بويه شبيك مفرفح:

يحجي ويبجي:

بويه..حمود..ابن عاجل رمه بكوع...وكتله شفته ميت يم البزل:

طفرت..بكوع جلبنا مربينه من جان جرو زغير مخلي...

بالبكشة..ينطر.كلش انقهرت..من شفت محمد يناشغ خطيه جلبه وهو مربي ويوديلة عظام..وسمج..كمت رحت للبزل شفته صدك مضروب جيلة..ومدد..روحي طلعت بس..سكتت..اشوف محمد ..يبجي:

افه...بويه ﻻتبجي اجيبلك غيرة بس اسكت ﻻتكل الجدك ترة يسويلنه طﻻبه ويه بيت عاجل...

عافني وراح للحوش انه هم مالي كلب ادفن الجلب..عفته وركبت سيارتي وطلعت رديت للحوش..لكيت ابوي صاير..نار..كالب الدنيا كﻻب تكول واحد من اوﻻدة مكتول ورايح لبيت..عاجل مكاومهم..

كتله بويه حيوان..مايسوة تكاومهم:

شني ولك انت تسودنت شني مايسوه تسوي روحك غشيم..ولك جلب الفلح..بزلمة..

بويه شني بزلمة شني نريدهم يفصلون..قابل؟

انت ﻻتغشم روحك..تدري الجلب بزلمة

ادري..بويه..بس هو عاجل شعدة ويفصل..هو حافي..يلك..التفله..

اذا حافي شعندة مخلي سﻻح بيد افروخة..والله اله.... انعل والديهم..

شني بويه تالي عمرنا اندور فصول ومخونات؟

اله أأدبهم..ولك انه تالي عمري..حمود ابن عاجل ابو الكمل...يفوت..لبستاني ويكتل جلبي..هين انه اعلمهم..

بويه بس زحمة من الوادم تكاومهم وجيب الشيخ ودني الشيخ ..ع مود حيوان...هسه الوادم شتكول ابو علي يدور فلوس وفصول

بعد ابوك انه ما اخذ فصل شني هو الفصل برد حيله..يعمر بيوت..لو يطول شارب بس انه اريد اكعدهم للحك..واهينهم جدام الوادم حتى بعد ﻻيتعدون على كاعنه..

بكيفك..بوية..

العصر طلعت من غرفتي على حس امي ادردم..انه فكيت باب الغرفة شافتني سكتت..بس..مخليه راس محمد على رجلها..هذا بعده يبجي على جلبه..بس امي ..تسكت بيه..

باوعت شفت زهيرة..هاي زهيرة ماتضم حجايه..بس..... من اكو شي ﻻن امي جانت ادردم شافتني وسكتت..اشرتلي اجت وراي..للعرفة          

زهيرة شبيها امي من شافتني سكتت..

ياااا..غير مرت عاجل..جانت عدنا كبل شوي..

اي وشعدهه

كعدت يم امي وتتعذر..والدموع عشرة عشرة..تكول والله بايتين بلاش نتغده مانتعشة والسﻻح مو النه البيت جاسب جان ضامه عد حمود وهذا حمود..خبل..ماندري بيه يطلع من الصبح يتعلم..يرمي بالجلب..خطيه.. بس امي ماسكتت الها تشوف محمد..يبجي على بكوع..وهي زفتها ذيج الزفه وكالتها الحجي مو بدينه بيد الزلم..المرة خلت وكامت وامي ضلت ادردم وراهه..

هاااهيج..

طلعت زهيرة ابوي مطيهم عطوة يومين.من اجت المشيه كلت ﻻبوي..

بويه فضها بساع..تره ماتسوه والناس..مشو..

كالي: بويه انت احجي بمجاني والله روحي فايرة..خطيه محمد صار 3 ايام يبجي مرد كلبي مرد..انت فضها..

حجه..الشيخ اول مره فرض فصل مال زلمة بس همه جايبين سادة ع اساس يطيحون من الفصل..انه كلتلهم..:

بالنيابة عن ابوي الفصل طايح هالمرة..لخاطر جيه السادة..بس اذا رجل حمود جزت..حد للبستان بعد تره مايصير خير

كلها..الوادم.كامت تحبحب ببوي وتحبحب بيه وخلصت المشية حب عمك..حب خالك..ومشت الوادم..

فتنا جوة..امي هم ادردم :

ليش علي فضها بساع..ليش ما كسر خشومهم..وخﻻهم يحبون نعاله!

ومن هالحجي عفتها وطلعت..كلت عصبيه مقهورة على محمد عدها روحها من الدنيا مايخالف..تحجي وتسكت

طلعت برة شفت مرت حسين تخبز..ويمها جنة..تصفط... بالخبزات.. هنه ماشافني وجوهن للتنور..ردت ارد افوت جوة..واسمع جنة تكل لحميدة:

هي ليش عمه ام علي ضايجة هالكد اصﻻ موقف علي كولش حلو..يعني خطية شفتيها المرية فقيرةجتي تبجي..تكول معدنا شي...

خيه..مو عمتي..ماتفكر هيج ؟

لعد شلون تفكر.ﻻزم تفرح بتصرف علي..ﻻن تصرف..حلو..اصﻻ المفروض تبوسه بحلكة وتكوله عفيه ماما..تصرفك..حلو

هههههه....عمتي تكله شنهي؟عفيه ماما..وتحبه بحلكة

وليش متكوله عفيه وتبوسه يعني لو اني بمكانها ابوسه وافتخر بيه..

خيه والله حجيج يضحك..عمتي..اذا سمعتج..تفطس من القهر..

انه اسمعهن..واضحك..بكلبي..ههه شكد حلوة حجاية جنة...تكول لو انه بمكانها ابوسه بحلكة..اووووف حلم اوصل لحلكها..عمي..كفيلكم الله...يمكن اذا الكف شفايفها الحلوات..اسوي بيهن جريمة♥♥♥♥♥

الفصل الثامن من هنا 

شكرا لزيارتكم عالم روايات سكيرهوم