رواية أرض الخناجر الفصل الثالث والثمانون بقلم ايلول
كون اقتنع ما اشوفك بعد وانساك
شكثر فاگد لچن محد لچمني هيج
لچمه مسويه خله بگامتي فرگاك
══━━━━✥◈✥━━━━══
مــاسه:: كعدت من الفجر لآن ادري ببريا هنا وادري بيه مشتهي الباچه خليتها على الطباخ گبل الريوك كعدت مــيثم صله وبعد ما رد نام ضل يلوب ما ارتاح الحد ما كعد بريا شبگه يسلم عليه وبريا بعده نعسان واكف ويفرك بعيونه عاينلي يتوسل يريد يرجع ينام وميثم جره من ايده بلهفه
مــيثم:: تعال تعال غسل وخل نتريك سوه.
ضحك بريا مشه غسل وجهه وكعدوا بالهول گدامي فتحت باب الهول مشغلين قرآن ونسمع وياه صوت العصافير التلتم بحديقتنا.
طبيت للمطبخ اسوي ريوك واحجي وياهم گتله
-والله ماردته يكعدك بس اخوك قفل.
ضحكوا اثنينهم وميثم طك بريا على رجله يحجي
مــيثم:: والله طاك گـــلبي عليه وعلى كعداتنا سوه.
بريا:: غير انتَ اخذت ام حور هي من لفت لبيتنا خربت كعداتنا.
ضحكت ومديت راسي بأيدي السجينة ورافعه حاجبي
-من انه لفيت لو من انتَ عشگت رنـــه نسيت اخوك؟
مــيثم:: والله صح النوب الخايس راح يعوفني حتى من البيت يطلع جا هيج هيه؟
يحجي بضحك بس انه ادري بيه شكد مقهور ما جان يتمنى بريا يطلع ببيت وحده وسكت الخاطر رنـــه گال اذا هم هيج يرتاحون هاي هيه.
بريا:: والله ما اعوفنك لا تحجي هيج مــيثم يوجعني گـــلبي، بس مرتي ما تگدر تفارگ شمس وماضل گدامي غير هالحل.
ضحك مــيثم حط ايده على جتفه گاله
-اتشاقه وياك يابه اهم شي انتم ترتاحون شني الاريدنه انا؟
التفتوا اثنينهم على فتحة باب غرفة ماريا طلعت حور تفرك بعيونها وگد ما مشتاقه البريا بس لمحته وكفت بمچانها تعاينله بخزر كام من مچانه يريد يروحلها بچت مشه بساع شالها يبوس بيها ويشبگها وهي تبجي وتضم روحها بحضنه
بريا:: ها عمو ها يا بعد روحـــي ليش تبچين اشش
مشه بيها للمغسله غسل وجها ونشفه رد للهول كعدها بحضنه حطت راسها على صدره وبعدها زعلانه يضحكون عليها هوّه وآبوها ومن تخزرهم يموتون من الضحك
مــيثم:: اي بابا چا ياهو خالج صــيهد خزره شترجى منج.
عاينتله ماعاجبها وردت راسها على صدر بريا وبريا يبوس بيها ويشبگها كل حيله، اخذت الريوك ومشيت يمهم كعدنا بالهول داير ماداير الصينية وحور مشت الغرفة عمتها جابت تلفونها واجت يمي مدته الي تريدني افتحه
-ما اعرف رمزه يمه عوفيه تعاي تريكي.
شالها مــيثم حطها بيني وبينه وبريا شال تلفون ماريا حتى لا ينكسر حطه على الطبلة ودنك يتريك انه آكل واوكل حور وهـــي عينها للتلفون بس تريد تروح تلعب خزرها بريا حتى تركد دنگت تاكل بزعل.
شلت راسي من دك صوت رساله مبتسمه عبالي رنـــه راسلت بريا بس هو التفت للطبله عاين لتلفون ماريا بأيده استكان الچاي توه يريد يشرب، عگد حاجبه ذب الاستكان من ايده وجر التلفون فاتح عينه حييل دار الميثم بصدمة
بريا:: ســليم!!!
دك گـــلبي بخوف ورجليَّ بادن ما فاهمه السالفة وميثم جر التلفون منه يدوسون على الاشعارات حطيت عيني وياهم اشوفن وهم واحد يجر التلفون من الثاني دار علي بريا بحرگه
-افتحيييه
-ما اااعرف الرمز
رد مــيثم جر التلفون من ايده يجرب يفتحه هو مخلي الرمز بس نساه ركض بريا للباب يريد يروح السليم وصاح عليه مــيثم خازره
-تعاال.
درت عيوني لباب غرفتها اطكطك بأصابعي خايفه عليها مشولها سوا گمت وراهم ما ادري شني. الاسويه طبوا للغرفة التلفون بأيد مــيثم وبريا دغها حييل يريدها تگعد وهي من تنام متأخره تشلع الگلب گوه تكعد رد دغها مره الثانية فتحت عيونها بثگل وبس لمحت وجوههم وعصبيتهم كعدت عدل مرتبكه مسحت وجها ومن صدمتها حتى عراقي ما حجت
ماريا:: شو في؟
تعاين بيناتنا بخوف وميثم مدلها التلفون خازرها
-افتحيي.
تغطت عدل ومدّت ايدها تريد تاخذ التلفون منه ما رضى دگت الرمز وهوه بأيده وتحجي بصوت يرجف
-صاير شي؟
وگف بريا بصف مــيثم متجاهلينها ويقرون المحادثة سوه وهي وجها صار اصفر عاينتلي حركت شفايفي احاول اشرحلها بلا مايحسون هزت راسها شكو دار عليها مــيثم بعصبية يراويها التلفون ويصيح
-هاااي شني؟؟؟
باوعت بالتلفون وردت باوعت بوجهه تحلف
ماريا:: ســليم ابن عمو والله العظيم حتى راسله واتأكد بنفسك والله ســليم.
ما حاولت تبرر محادثتها وياه لان معتبرتها شي عادي وما يعترضون، وكل اللي ببالها هم عبالهم تراسل غريب، بريا دار وجهه بحرگه ايده على راسه وميثم بعده خازرها وهي تحلف وتقنع بيه هذا ســليم فززيت من صياحة
مــيثم:: وياهووو گالج تحاجينه؟؟
ردت ليوره بخوف ضامه روحها وتعاين لوجهه تريد تبجي
ماريا:: ســليم والله.
بريا:: خررررب وليش تحجين ووووياه شعندج.
سدت اذنها من صياح بريا بخوف رايحه روحها طبيت للغرفة بساع گـــلبي يدك حييل وگفت گدامها ضامتها بظهري دار مــيثم البريا خازره وحاجه ماريا
مــيثم:: شعنده وياج؟
مسحت دموعها تشهك
-والله ما عنده شي
-ليش تحجين ووياه؟
التفتت عليها وهي تعاينلي من بين دموعها نتر مــيثم بوجها
-احجيي!
فزت تحاجيه بخوف ودموعها يجرن
-والله العظيم ماكو شي وحتى اسألوه يعتبرني مثل اخته خابره خابره اسأله والله ماكو شيي.
نزلت من الچرباية كضت ايد مــيثم تحلف ووتوسل بخوف
-والله.. والله ما ادري ما تقبل خابر ســليم وحاجيه والله ماعنده شي وياي ويحسبني مثل اخته والله... اخذه اخذ التلفون اخذه ولا تزعل من عندي مــيثم حباب.
جر ايده من ايدها داير وجهه منها طلع للهول وصاح على بريا
مــيثم:: تعاال تعال خابر ســليم.
مشيت وراه احاجيه
-مــيثم بس على كيفك ما تدري ما ترضون.
دار عليَّ يحجي
-تدرين بيها تحجي وووياه؟
-لا والله
وبريا يفتر گدامنه خابر ســليم گوه كاض روحه گاله
-تعال للبيت اريدن احاجيك على سالفة.
سد التلفون منه ودار وجهه النه ماريا ميته من البچي كل خوفها اخوانها يزعلون منها وتگلهم
-والله ما عنده شي وياي والله معتبرني اخته هسه يجي واسأله مــيثم والله اسفه والله ما أعيدها.
تبجي بحرگه وخوف وهو ما يحط عيّنه بعينها وبريا كعد مدنك عاض اصبعه بقهر، شويه واندك الباب وكف يمشي للخوش وميثم دار علينه عاين بوجهي يحجي
-طبن جوا.
جريت ماريا من ايدها طبينه الغرفتها گطعت روحها من البچي تفتر بالغرفة گدامي وأيدها على گلبها دموعها على خدها وتدعي
-يارب ما يزعلون، والله ما اعيدها والله
جريتها من ايدها امسح عيونها
-اسكتي ماكو شي لا تخافين هسه تنحل.
وهي ولا ببالها غير زعلهم درت اعاين من فتحة الباب ميثم كاعد على القنفة وطب ســليم مبتسم سلم واجه لميثم ماد ايده بس من مــيثم ضل كاعد، بساع وخر ايده وعاين بينه وبين بريا عاگد حاجبه وچن فهمهم بس ركز بعيونهم نزل عينه وكف مــيثم گدامه يحاجيه وتلفون ماريا بأيده
مــيثم:: ترضى ابن عمك يراسل اختك؟
وسليم مدنك ساكت دفعه بريا من جتفه بحرگه يحاجيه
بريا:: ما تحجييي؟
شال راسه خازر بريا وميثم وخر بريا من يمه ما راضي عليه ورد گاله
مــيثم:: ليش تحاجيها ســليم؟ ليش تحجي وياااها؟
جرتني ماريا من ايدي مختنگه وتأشر على صدرها
-ولج عبالهم بينا علاااقة؟؟
دارت وجها جرت الشال تريد تطلع جلبت بأيدها مالحكت عليها طلعت بسرعة ومن بين دموعها وشهگاتها گالتله
-احجي الصددك كولهم ماعندي شي وياااها وحاسبها اااختي.
وبريا بساع اجه عليها بحرگه دفعته واكفه بينها وبينه وسليم يعاين علينه گاله
ســليم:: ما مسويه شي البنيه ولا عبالها ما يصير تحجي وياي، انا البديت راسلتها وفهمتها عادي تحجي وياي لان ابن عمها وحسبة اخوها، لمن جنت اضل كاعد يم سجاد اضيع وكت وأسولف وياها .
رد بريا عليه فاير من الحرگه كضه مــيثم ودار السليم بهدوء يحاجيه
مــيثم:: لا راح اطگك ولا اشكيك للاكبر منك، انتَ ارخص بشر عرفته خسيس وما براسك ذرة غيره تضيع وكتك براس بنيه؟ اطلع بره مناه وانتهت.
گـــلبي اوجعني وسليم يعاين بوجهم ميت من القهر هز راسه خوش مختنك گاله
ســليم:: حگك شما تحجي، بس وروح عمي شامل البنيه مالها غرض ما سوت شي انا الغشيتها.
اخر حجايه حجاها وجره بريا طكه ودفعه بره يريد يتعارك وياه وميثم تسودن طك بريا ودفعه للبيت مايريد صوتهم يطلع سكته وطرد ســليم
رد على بريا يصيح محترك گلبه
مــيثم:: ليشش تطگه؟؟
بريا:: يكلك اضيع ووكت يضيع وكت براس اختي؟؟؟
صيح متخبل وميثم خازره حط ايده على حلگه
-اشش نصيي صووتك ... لو معلمين لازم كلها تسمع وتدرري؟
كعد بريا ينفض غضب وماريا بعدها تبجي وعيونها عليهم كل الهامها يعاينولها ومايزعلون مشت الميثم تبجي تريد تحاجيه شال أيده بوجها ما يريدها تجيه عاين بوجهي والحجي الها
مــيثم:: تلفون بعد ماكو،امشي الغرفتج .
ماريا:: مــيثم .. والله.
-اشش روحـــي.
دار وجهه منها وهيه ميته من البجي جريتها من إيدها للغرفة صمت روحها بفراشها تبجي وانه اعاينلها ساكته ساعة الومها ساعة الوم روحـــي كله مني لو منبهتها لو منتبهه التلفونها.
ضلت تبجي وحور تفتر عليها تمشي للهول تطك ابوها وترجع لماريا ترطن عود تگلها كتلتهم عفتهن وطلعت بريا رد الغرفته وميثم طلع وي صــيهد للگاع... گام بس بأيام العطل يروح للگاع يشتغل ويساعدهم.
كملت الغده ورديت الماريا راجعه نايمه وحور تفتر وراي تريد تگعدها
-عوفيها يمه المن تكعد للبچي عوفيها.
للساعة بالعشرة خابرتني ريـــمه كعدت بالهول رديت عليها
-الو... هلا ريـــمه
-هلا خيه شلونج شخبارج؟
-الحمدلله والله بخير انتم شلونكم البنات؟
سكتت شويه وردت گالت
-مــاسه صاير شي؟
-ليش شكو؟
-ما ادري شو مساع تونا طالعين من البيت نريد ناخذ علاوي للمستشفى وتلاگه ويانه ســليم راد من يمكم وجهه احمر، ومحترك گلبه خفت خاف متعارك وي الولد.
سكتت متحسره ومحتاره احجي لو لا، بس اذكرت حجابة مــيثم من گال الا كلها تدري، گتلها
-لا ماكو شي يجوز هوه وبريا ما ادري.
-هاه؟
-اي، اكلج شني شلونه علاوي؟
-أذنه ملتهبه والله بهذلني ما ينحمل صاير وكح كلساع افتر ما الگاه يسچ عود نقفل باب الحوش يحط دبه ويصعد يفتحة.
-يااا هاي مثل حور ومن اكضها تكلي اروح الشمس واكضها واعضها.
-والله عضيت وما فاد عاد گمت بس اشوفنه يم باب الحوش اصيح الشمس عليه وهو لو شافها اجته يشرد ويصررخ.
-هههههه مسويه بيه خوفه.
-اي من الراشديات بس والله هيه ما تطك الا يعيل بيها لو يتعارك وياها على ألعابها لو يجر شعرها جا شتسوي تعاينله؟ تطكه وتخليه يتيه دربه.
-هههههه لا خطيه ريـــمه شو مكيفه انتِ علميها بدون طك.
-خيه ابني وكح وبس ما تطكه وتخوفه يشلع گلبها خليها وياه مأدبته الي والله.
-هههههه اكلج مــيثم جايبلها بدله تخبل وأنسى اوديها
-وديها وديها لو تردين تضمينها الحور؟
-ياا؟ امداج جا شمس وحد عن حور اثنينهن عزيزات وعلي.
ضحكت وعلاوي اسمعه يبجي يمها وشمس اخذت التلفون منها كالت
-الو
-هلااا بشمسنا
-حور
-لا انه خاله مــاسه.
-هههه وين حور
-هاي هاچ احجي وياها
انطيت التلفون الحور وهي تربعت چنها امي
-الوو..شموسه.
گمت من يمها اشوفن الطباخ واسمع سوالفها تگوم من مچان المچان تقلدني من اخابر وتحجي وتشكي الشمس عليَّ لان ما اخليها تروح يمهم ضحكت صافنه بيها والله وكبرت بنتي وصارن عدها صاحبات تخابرهن وتشكيلهن، اعاينلها ومدري شمالني عيوني دمعن صافنه بيها شويه وركزت بسوالفها والگاها تحجيلها على ماريا صح مو السالفة بالضبط وتجيب مناه ومناه بس ذيج هيه مبينه صحت عليها
-ووولج حور.
عاينتلي وگالت الشمس
-باي باي شموسه
سدت التلفون منها وضلت ترطن ما راضيه .
ردت للغرفة يم ماريا غلست منها شويه وكعد بريا غسل وجهه واجه يمي للمطبخ بعده مقهور گال
-مــاسه ســليم من يجي ليجاي ياخذ من غراضي انتِ موجوده لو بس ماريا؟
غسلت ايدي والتفتت عليه
-لا ما يجي الا انه موجوده وياخذ الغرض ويمشي من الباب ما يوم طب للبيت.
هز راسه خوش وطلع كعد بالصاله رد راسه ليوره وغمض عينه ضايج، التفتت لغرفة ماريا من فتحت الباب وطلعت عيونها حمر ومورمات مشت بخطوات متردده وانه اعاينلها واحلف بيني وبين نفسي اذا فشلها، الا اگلب البيت عليهم، كعدت يمه مختنگه تريد تحاجيه وشفايفها يرجفن وبس همست
-والله ما أعيدها
دموعها جرن.
عاين بوجها متحسر ومد ايده يمسح عيونها
بريا:: ما چنتِ تدرين احنا ما نرضى وهالشي ما يصير وعاذرج، بس بعد لا تنعاد خوش؟
هزت راسها اي تبجي جرها الحضنه لمها بين اديه حيل باس راسها متحسر ويعاينلي ابتسمت مكيفه، لان ادري بيها تتخبل من يزعلون منها تخاف بشكل مو طبيعي، ركضتلهم حور صعدت على الطبله وشمرت روحها عليهم كضها بريا يدغدغها ويلعب وياها.
بريا تقبل بس مــيثم صعب وما يرضى بسرعة خاصه اذا الموضوع يقهره، حتى على الغده ما اجه وماريا تلوب تفتر مقهوره بس تريده يصالحها، وهـــب العصر اجانه يريد ياخذ بريا وسليم يطلعون وتسودن من لا بريا يرضى ولا ســليم وضل يصيح
-شصاااير؟ تسولفون لو شلون؟
بريا:: ماكو شي هيج انا ما عاجبني اطلع وياه.
ووهب يعاينله ما مقتنع تالي طلعوا بس همه لان ســليم گال الوهب سجاد تعبان ما اريدن اعوفنه واطلع.
وي العشه يله مــيثم اجه ماريا تعاينله من بعيد مقهوره لا اكلت ولا شربت بس تبجي ما تريده يضل زعلان منها، اعاينله غسل وصله وماضل كاعد بالهول طب للغرفة دارتلي تبجي
ماريا:: بعد ما يحاچيني.
-يحاچيچ عوفيه هسه بعده ضايج عود خل يبرد واعتذري وكليله ما ادري هاي هيه.
وابد ما تتقبل زعله تفرفح من البجي طبت الغرفتها تكح، سويت العشه واخذته للغرفة اكل ساكت لا انه احاجيه ولا هو يحاجيني عاين لحور تسوي لفة گالها
-ما تاكلينها هاي بويه عوفيها انا اسويلج صغيرة.
حور:: لعمه..ما..ماريا.
تحجي بدلع وتجر الحجايه جر وتعاين بطرف عينها سكت ابوها يعاين الاديها تجيب وتحط بالخبزه رادت تلفها ما گدرت لفاها هو اخذتها من ايده وطلعت.
شلت الصينية من يمه غسلت المواعين، اخذت الچاي وكعدت يمه يعاين بتلفونه ويشرب ساكت
-صالح ماريا ترى ما ببالها شي بنيه اربعه وعشرين ساعة كاعده بالبيت لا طالعه لا ماشيه وكاضيتها على التلفون حجت وي ســليم كل ظنها عادي.
ما حاجاني ضل مدنك زعلان.
-مــيثم مو احاچيك.
شال راسه يعاين بوجهي مقهور
-ما مقصر وياها بشي جبتلها تلفون ورضيت بكل برنامج هيه تحبه تروح تراسل ليشش؟ وفوگها الخايس ســليم.
-غلطت شني ما تصير؟
سكت گام من يمي يريد يطلع مديت ايدي اكضه من زنده حتى احاجيه ما بنيتي شي بس صارت چني جارته بنتر عاينلي عاگد حاجبه وبدل ما اوضح زدتها من گتله
-يعني هسه ما تصالحها؟
-شبيج؟
يحاجيني مستغرب وخرت ايدي منه.
-احجي وي البنيه راحن عيونها من الصبح الهسه تبجي.
-خليها من اصالحها بساع تتعلم ما تخاف من الغلط دام ضامنه العقاب سهل.
-لا والله؟ هذا انتَ هيج تحجي مــيثم صدك عود؟ اكلك البنيه ما تدري مايصير تحجي وي ابن عمها تكلي عقاب؟ يعني هسه انتم ما غلطتوا ما حجيتوا وي بنات عمكم گبل وتدرونا يصير ومحد يرضى؟ لو من يمكم غفور رحيم ومن يمنا شديد العقاب.
احجي بصوت محترك گـــلبي منه مد ايده على حلكي حيل يسد حلكي خازرني
-لا تدخليين!
فتحت عيني بوجهه حيل مصدومة منه ومن اسلوبه عافني وطلع وانه ميته من الحرگه هذا الزلمه شماله؟ شجاه حسدته وتسودن من امداني اي والله وامده عبريتي .
طلعت من الغرفة ماريا فاتحة باب غرفتها كاعده بالگاع بعدها تبجي وحور كاضه اللفه وتتوسل بيها تاكل طبيت يمهن احاجيهن
-روحـــي ضميها حور بعد شوي تاكلين انتِ وياها حطيها بجدر الخبز.
اخذت اللفه وطلعت عاينت الماريا مستغربه كلنه ننقهر من زعل اخوانا بس هي. قهرها وخوفها مو عادي ترجف وتنهبط تضل ما تعرف شتسوي واول حجايه تجي بالسانها يعوفوني
-كاافي ماريا هاي هيه وضحنه انتِ ما قصدج بسي عود باجر اعتذري منه وفضت راحت لا تضلين تبجين.
بس شيقنعها تهز راسها لا ودموعها عشرة عشرة كامت لجربايتها تغطت واسمع بس مناشغها، طلعت من يمها محتاره راسلت بريا اسأل
-وين انتَ؟
-بالگهوه، شكو؟
-اخوك ما يرضى يحجي وي اختك واختك بس تبجي .
قراها ونارد وره ربع ساعة كتبلي
-هسه اجي.
واقل الربع ساعة اجه هز راسه يسأل على مــيثم گتله
-طلع ما ادري وين راح
-شبيها ماريا؟
تحسرت بحيره مدري شلون اشرحله
-عاين يعني هسه انه من يزعل صــيهد هم ابجي وانقهر وبس احاول اصالحه بس مو مثّل ماريا گطعت روحها من البجي وحيل حيييل تخاف من زعل مــيثم ما ادري اگول لآن البنيه مالها غيركم تخاف من زعلكم غير كون مــيثم يقتنع ويحاجيها.
مسح وجهه محتار كعد على القنفة وحور راحتله هم تشكي من ابوها لان بچه ماريا
بريا:: ادري بيه انقهر من حچاية ســليم وحگه
-بس ماريا خطيه، عرفت غلطها واعتذرت.
-خل يجي واحاجيه
وي حجايته التفتت على غرفتها سمعتها تكح وراها اسمعها تشهك چن بشر مختنك ركض بريا گبلي فتح الباب وطب متسودن كاعده بالگاع على اركبها وتجر نفس بشهگه تريد تگدر تتنفس ماكو روحها رراحت تسودنت اركض اجيبن وماي وارد عليها وبريا يغسل وجها ايده ترجف يابه روحـــي راحت وهي وجها صار احمر وعيونها فاتحتهن على وسعهن بس تريد تتنفس گام بريا يركض وصاح
-لبسيهاا عبايه وتعالي بساع.
تعصر ايدي بأيدها حيل تريد تحجي ما تگدر متت من الخوف وحور تبجي مرعوبه اركض بينها وبين ماريا، ردلي بريا يركض كومها من أيدها جريت حور وطلعت وراه للسيارة، شغلها بساع وبس وصلنه يم بيت عمي شامل گتله
-اوووكف اووكف بس انزل حور.
نزل اخذ حور ومشالهم يركض دك الباب حييل حط حور بأيد حسين واجه للسيارة يركض وماريا بأيدي رايحه روحها وشما جالها ينگطع نفسها اكثر ماضل بيه حيل ارجف من الخوف، تونه طلعنه من شارع القرية وتلاكه ويانه مــيثم وكهلان وسلطان رادين من الگيعان عبرهم بريا طاير وهم يخابرون عليه ولا رد على واحد ما يشوف دربه.
لمن وصلنه للطوارئ بساع حطولها اوكسيجين وانطوها ابره كعدت بالگاع يم السديه مهدود حيلي وبريا كابلها رايحه روحه شسوت بينه.
ومن حجيتلهم عن حالتها سوولها تخطيط قلب وقاسوا الضغط عندها هبوط بس گلبها گالوا مابيه شي حطولها مغذي وانطوها ابره، ردت الدكتورة تسأل
-عندكم مشاكل وضغوطات بالبيت؟
عاينت بوجها ساكته بريا گالها
-اي.
وراها بعشر دقايق طبوا الولد مــيثم وكهلان وسلطان عاينتله مقهوره منه وهو ما يشوف دربه بس يريد يندلها وين والطوارئ هوسه صايره ناس تترادم بناس
عاينلها ممدده على السديه مغمضة عيونها تلفت بينها وبين المغذي ومد ايده يعدل الحجاب على راسها ويهمس بصوت مخنوك
-ماريا بويه؟
فتحت عيونها الذبلانه عاينت بوجهه ودموعها يطيحن مناه ومناه مد ايده الايدها يمسح فوگ الكانونه بلا ما يحجي دار وجهه منها ما يحط عينه بعينها والولد بس سألوا بريا عنها تطمنوا ومشوا رادين للقرية، الدكتورة كتبت علاج وانطته البريا راح اشتراه كالتله حبايه باليوم عاينلها مــيثم ما مقتنع اخذ شريط الحبوب من بريا خلاه بجيبة بين ما كضه المغذي وردنا نطلع كضوها ساندينها كل واحد من صفحة. طلعنه من الطوارئ امشي وراهم وهم ملتهين بيها ما مركزين بغير شي شلت راسي اتأكد الولد راحوا لو بعدهم
رديت عاينت لبريا وميثم من صعدوا ماريا بالسيارة دك گـــلبي حيل احس عيوني وهمني شفت ســليم لو غلطانه رديت شلت راسي ملتفته والمحه واكف بصف السيارات ويعاين علينه ضوه من المحل الگباله صاير بوجهه، دك گـــلبي بخوف وهو بس لمحني اعاينله دار وجهه ومشه لوره المحل بعد ما شفته فززني بريا من گال
-يله خوويه.
افتريت صعدت يم ماريا وفكري كله بسليم، بريا يسوق ساكت وميثم بصفه محد منهم حجه اعاين الميثم كاض شريط الحبوب بأيد وتلفونه بأيد مدري شيكتب ويدور وراها مدري عليمن خابر بس سلم وگال
-ها؟ مشكور رحم الله والديك .
سد التلفون واعاين الايده فرغ الحبوب من الشريط شمرهن من الجامه وشمر الشريط وراهن ومحد من عدنا گاله ليش ؟ لمن وصلنه للبيت نزلت ماريا طبت الغرفتها
عفتها وطلعت للمطبخ اسويلها شي تاكله بريا مشه يجيب حور وميثم لمحته مشه الغرفتها مشيت وراه اسمعها تبجي فتحت الباب اعاينله شابگها يبوسها ويگلها
-قهرتيني والله العظيم قهرتيني، خليتيه يوكف بوجهي ويگلي احاجيها اضيع وكت شلون ما ترديني ازعل عليج.
وهي تضم روحها بحضنه تبجي وتحلف
-ما أعيدها والله ما أعيدها
باسها براسها ومسح عيونها
-هاي هيه بس التلفون ماكو بعد
-اي خيولي خيولي ما اريده بس انتَ لا تزعل... لا تزعل فـــدوه لا تزعل.
رد لمها على گلبه متحسر
مــيثم:: ما ازعل يا بعد روح اخوج.
رديت للمطبخ اكمل عشاها وفكري بسليم جيته للمستشفى خلتني اقتنع ما حاسبها اخته واكبر جذاب اخذت العشه ومشيت يمهم للغرفة كالها مــيثم
-شوفي ام حور شسوتلج.
يحاجيها مبتسم رفعتله حاجبي ودرت وجهي اطلع من يمهم زعلانه منه، غسلت ايدي ودك تلفوني بس شفته بريا عرفت السالفة
-الو.
-خاب هاي بنتج ما ترضى تجي تريد تبات يم شمس
-ختولي جيبها بريا غصباً عليها.
-ما ترضى وعلي فشلتني ضلت تبجي وكهلان ما يرضى اجيبنها گوه عليها.
-بريا تتعلم والله شيلها وجيبها بس وصلها الايدي خل اتوبها من هالسالفة.
احجي وياه وسمعت صوت رنـــه يمه أخذت التلفون وبلا سلام گالت
رنـــه:: شبيج هيوو؟ شني وين بايته بذاك الصوب؟ غير يمنه شصار عليج
-خيبه رنـــه تتعلم.
-لا ما تتعلم عود إحنا نطردها النوب.
-وعلي تشلع گلبكم هويشه اعرفها.
-ولي مــاسه خليها يم شموسه
-يله بكيفج مو تشلع گلبج وتدعين عليَّ.
-هههه خوش.
سديت التلفون منها متحلفه بحور دوم تسويها بيه وتعاند وتالي تاخذلها شويه ومن تريد تنام تبجي، ردن البنات كلساع وحده مخابرتني تسأل على ماريا وأطمنها، شويه واجه بريا طارده كهلان، طبوا للغرفة يم ماريا يحاجونها ويغيرون نفسيتها، عفتهم ومشيت للغرفة ادرس صايره اكسل من صــيهد
ساعتين واجه مــيثم عاينلي گال
-ها جاي تقرين؟
كضيت كتبي ودرت من عنده حطيتهن گدامي منطيته ظهري صاح
-اهووه زعل صــيهد.
ما حاجيته اسوي روحـــي اقرأ وانه تركيزي كله صار وياه كعد على طرف الچرباية بصفي شلت راسي أعاين بوجهه
-ما سويتلج شي والله انتِ زعلتي.
-هوه انتَ ليمت معترف بغلطك؟
-لا ليش؟ دون اغلط واكول انا غلطان مثل مساع جان حجيج صح وانا الغلط.
درت عليه متربعه
-يعني تعترف؟
عاين بوجهي يهز راسه اي
-بعد من اكلك على شي اسمع من عندي.
زفر نفس متحسر وتمدد بمچانه ايده جوه راسه، لميت ملازمي طفيت الضوه وتمددت بحضنه گال
-ما ظنيتها من ســليم والله گد ما مصدوم منه گـــلبي اليوم كلّه يوجعني شلون صلف يوكف بوجهي ويگلي اضيع وكت هل اراسلها.
-عوفه اذا هاي احجي الرغد اخليها تسولف السلطان حتى يحاسبه.
-لا جا شني انا ما اگدر اطكه واحاسبه؟ بس ما اريدن توصل هيج .
سكتت محتاره اگله شفته من جنه بالمستشفى لو اسكت خفت اذا احجي ازيدها وتكبر السالفة گال
-يومين ثلاثة واردلها تلفونها.
-اي عفيه هي كاضيه وكتها بالتلفون .
سكت حازه بخاطره حييل ومقهور من ســليم، عفته ونمت للساعة بثلاثة وفززنا صوت التلفون بس عاين بالاسم كعد عدل مستغرب
-كهلان؟؟
بعده ما راد عليه وانه عرفتها بهذلتهم بس فتحت باب الغرفة سمعت صوتها بباب الحوش تبجي لحكني مــيثم بساع طلع للحوش كهلان واكف وحور بأيده ميته من البجي جابها منه مــيثم يگله
-ندري بيها تضل تبجي وما تتوب من سوالفها.
طــروادة:: جانن شحلاتهن متصاحبات ونامن سوه اشو اخذتلها شويه وصاحت اريدن امي.
ضحك مــيثم وحور حطت راسها على صدره تشكر من كهلان وطب اخذت حور منه متحلفه بيها بلكن الصبح ما انسى واحاسبها طبيت الغرفة ماريا نومتها بفراشها ورديت لغرفتي احجي عليها واشكي الميثم والمحه غافي انه هم لفيت راسي ونمت للصبح كعدت اركض مناه ومناه
مــيثم وصه بريا ما يطلع ويعوف ماريا خاف لا تتخربط تريكنا بساع وطلعنه نريد نروح للكليه صاروا بوجهنا ريـــمه وكهلان هو طالع ماشي للگيعان وهي تصيح وراه ما انتبهلها لمن مــيثم دگله هورن رد التفت وريمه اشرتله ناسي تلفونه مــيثم نزل الجامه صاح عليه
-وين بالك چنك عاشگ؟
ريـــمه:: شحددده!!
ضحكوا كلهم وهو سلم علينه ومشه ياخد تلفونه من ريـــمه عاينتلها مبتسمه اشرتلها
-شلونج
-هلا بيج ها شلونها حور؟
-زينه الخايسه عفتها نايمه.
ريـــمه:: ضحكت مــاسه وميثم ما احترمنا جاي نسولف مشه وكهلان يصيح عليه
-روح روح تبدي اول محاضره وهنه ما كاضيات سوالف.
عاينت لوجهه
-النهار كله مسولفين هسه احنا؟
طــروادة:: مقصرة؟؟ غير من اريدن انامن اجي يمج حتى تسطريني واغفى بلا ما احس.
-انه؟؟
ابتسم ماد ايده يكرص خدي اخذ تلفونه ومشه للگيعان ووهب اجه على حسين وزهره اخذهم وي رضا للمدرسة، رديت للبيت رنـــه وشمس وعلاوي بعدّهم نايمين تانيت لمن كعدوا ريگتهم وطبخت الغده گلت الرنه.
-راح اروحن اشوف اخواني واجي.
عاينتلي ساكته
-ما ابطي.
رنـــه:: ما ارتاح من ترحين اخافن عليج.
-لا تخافين ما ابطي والله وهم ســليم موجود مايصير شي.
هزت راسها خوش، لبست عبايتي وطلعت جنت بأثنين صرت بثلاثه جان فكري بس بسجاد وهاجر هسه طبك وياهم ســليم اللي من امس لليوم مدري شبيه، طبيت للبيت امي توها كاعده واكفه بالمطبخ وگدامها صينية ريوك بس شافتني خزرتني ونترت
ميلاد::تعااي حاچيه خل ياكل.
ابتسمت
-ليش ما رضى ياكل من ايدج؟
ضحكت تعاين بوجهي
ميلاد:: اذا ما كسرت شوكتج انه مو بت امي.
هزيت راسي خوش اخذت الصينية منها وطبيت للغرفة ســليم نايم يمه فارش بالگاع وهجوره تمسح على راسه حطيت الصينية بالگاع ودنگت ابوسه
-ها سجاد خويه شلونك؟
زفر نفس ساكت جريته من ايده كومته يغسل احجي وياه
-ردت اجيبلك علاوي وياي بس گلت مالك خلك هسه تتريك ونروح سوه تشوفه.
احجي بلكن شوي ينسى واخفف عنه بس هو ابد ما يرد وباله مو يمي غسل وردينه للغرفة ريگناه انه وهاجر وبس غسل رد لفراشه اكل مكافاة شر حتى يخلص من ملحتنا.
غسلت المواعين ورديت السليم دغيته بأيده فتح عيونه عاين بوجهي وجر الغطا فوگ راسه
-گوم ســليم اريدن احجي وياك.
كام على حيله عاين لسجاد وطلع بره مشيت وراه امي تلكته تحجي وتغلط عاينتلها تلبس بعبايتها ومن الباب مرتضى صاح عليه طلعت وياه ما ادري وين رايحه، وكفت اسوي ريوك السليم وهو طلع كعد بالحوش اخذت صينية الريوك ولحگته
-الناس تشرب ماي اول ما تگعد انتَ تدخن؟
عاينلي مضيك عيونه مدري شماله ضايج طفه الجكاره حطيت الصينية يمه كوه ياكل
-شكو ســليم شصاير؟
-ماكو شي
دنك شال الصينية وداها للمطبخ ورد كعد يمي
-وعلي اكو شي احجي شصاير؟
عاين بوجهي وفرك وجهه بأثنين اديه مديت ايدي جريتهن من وجهه
-لا تخوفني احجي شكو ســليم؟
-ولج عوفيني بهمي شحجي؟
رد ليوره ساند ظهره على الحايط وجر باكيت الجكاير مديت ايدي بساع اخذتهن من عنده
-ريـــمه وخري عني رحمه العمج العزيز وخرري عني.
-وروح عمي ما اعوفنك لو ماتحجي شني القاهرك.
دار وجهه من عندي ميت من القهر ورد عاين لعيوني گـــلبي انگطع بس اريدنه يحجي نزل عيونه وحجه بقهر
-مــيثم وبريا شافوا محادثتي وي ماري.
صفنت بوجهه عاگده حاجبي
-وين شافوها هناه هناه شكد صارلها؟
هز راسه لا ودار وجهه گوه على روحه يحجيها
-جديدة وره ما تعاركنه ردينه نسولف.
-ياااا
-امم والولد شافوها والبنيه البارحة ماخذينها للمستشفى وهي والله العظيم ما سوت شي شلون المعتبره هالشي عادي واخوانها ما يعترضون عليه بس انا انا كله من ايدي حاضرها وفاضها شلّي بهالسالفه
عاينت بوجهه ساكته وايدي على گـــلبي ما عرفت شحجي وهو يمسح وجهه وويهز راسه مقهور
-شعجب ضليت تحجي وياها ســليم وانتَ المآ ترضى بهالسالفه؟
عاين لوجهي عينه بعيني هز راسه متحسف ودنك دك گـــلبي مرتبكه عبالك بباله شي مديت ايدي اكض ايده
-ســليم.
ابد ما التفتلي ضل مدنك تدنيت اصيرن گدامه ومديت ايدي اكض وجهه
-لا تقهر روحك اعتذر من الولد واذا تريد سولف الكهلان هوه يحاجيهم ويصلح الموضوع.
عاين بوجهي توه يحجي والتفت على امي من ردت طبت لمحتني يمه صاحت
-بعدج هناه وولج.
ســليم:: من يصير البيت بأسمج اطرديها.
تفلت علينه اثنينا وطبت جوه كتله
-ميخالف چنه ما سمعنا ولا شفنه خل نحسبها باستنا وگالت ها يمه بعدكم تسولفون.
ابتسم بوجهي يهز بأيده ضحكت
-والله چا شنسوي.
-لا الحمدلله والشكر.
رديت گتله
-مثل ما كتلك حاجي كهلان وامشوا سوا اعتذر من الولد وفهمهم انتَ غلطت وما تنعاد والبنيه مثل اختك.
وهو مدنك ضحك بقهر يهز راسه لا
-يرضون والله لا تكبرها ســليم.
شال راسه عاين بوجهي بدون اي ابتسامة وانه صافنه بوجهه متانيه شني اليريد يحجيه جر نفس بغمج وهمس بصوت مخنوك
ســليم:: ماريا لا اختي ولا مثل اختي.
عاينت بين عيونه ساكته وهو عيونه تحجي تحمحمت مبتسمه
-اي ندري بت عمك بس مثل اختك.
هز راسه لا عگدت حاجبي
-ســليم؟
دنك متحسر
ســليم:: بس ردت اشيلنها من راسي ما گدرت.
-عزا بعيني .
دنك حاط ايده على كصته وانه ضليت بس ألطم على رجليَّ لا احجي ولا شي لمن شال راسه خازرني يله بطلت لطم ورديت گتله
-شجاك جا مو گلت انا ما احبن وما اطيحن وتضحك على الولد؟
سند راسه على الحايط صافن عيونه ذبلت ويحجي ضايعه اعلومه.
ســليم:: عيونها ساعة الاشوفنهن ما اندل دربي منين
-سوده بوجهي
-تعبـــت ولج الله يعين گلب سلطان انه صارلي أربعة اشهر ليلي يكضي بالحسره واقوي روحـــي بأخوي كلساع وگلت مثل ما هو صير سنين انا اصبر وما احجي
- اخوتها ما اظن يرضون ســليم البنيه صغيره ولا تنسى لو تنگلب الدنيا ما تصير والسبب امي.
كعد عدل يعاين بوجهي ويحجي بتحدي
ســليم:: اخذها لو مو امج لو بيت شعلان كلهم يوكفون بوجهي.
سكتت صافنه بعيونه بساع صار اعصاب رديت گتله
-وهيه تريدك؟
هز راسه لا
ســليم:: لا بس ميخالف انا اخليها تريدني من اخطبها.
-خطب ابن ميلاد خطب عمي على كيفك صلي على محمد.
ابتسم يعاينلي مسح وجهه يحجي
-وربج اخذها اخذها.
- لو هيه هم تريدك جا بيها مجال واحد يحاول وي اخوانها ويقنعهم، بس البنيه بعدها صغيره وما تحبك ولا رايدتك.
-المهم انا حابها هي ميخالف لا تحبني.
-ســليم تسودنت.
-اي.
عاينتله ساكته وهو رد يحجي بقهر
ســليم:: أدري صغيره وما حجيت وياها ولا حجايه بسوالف الحب ولا گتلها رايدج ولا جبت طاري يم أخوانها بس اذا نرجع للعمر جا بريا من عشگ رنـــه مو بعمرها؟
-لا تقارن فـــدوه اروحنلك وعلى كيفك خليها سكته مناه لمن يصير عمرها ١٩ گبل اخطبها من اخوتها وان شاءالله تصير.
هز راسه اي
ســليم:: بس لا تحجين يم احد انتِ ما اريدنها تدري وتصيرلها مشاكل وي اخوانها لو تتعلعل خليها هيج مناه لمن كلش اريدن اخطبها يله، وحتى رنـــه مو تگليلها ســليم يريد ماريا النوب تروح تحطها بحلك بريا.
توني ابتسم اريد اگله لا ما احجي وفزيت على صياح امي كمت متعثرة عبالي سجاد صار بيه شي وهي شكت دشداشتها وتلطم.
ميلاد:: اوووع بووويه انا تريد تجيبلي بت الروسيه.
عاينتلها مصدومة وهي تصرخ وتلطم كل حيلها ركضلها ســليم يسد حلكها دفعته وطكته تصيح
-لووو تموت ووولك لو تموووت بت خليل ما تاخذهاا ســليم سمعتني لو لااا.
وهو فرفحت روحه بس يريدها تسكت طب سلطان على صوتنا واثنينهم كاضينها بس يردون يطببونها للبيت حتى لا واحد يسمع صوتها ولا رضت، تصيح وتدك على روحها دار السلطان طكته على صدرها تتراجف صاحت بوجهه
-ولك لووو يموت لو يموت ادفنه وما اخذله بت خليل ييييمه ييمه النوب فوك ضيم رغيده تجيلي بت الروسيه.
وسليم تسودن
ســليم:: صوووتج صووووتج بس اسكتي.
سلطان واكف بيته وبينها وهي مدت ايدها جرته من قميصه وطكته مملخته تطك وتغلط وتحلف
-علي الحسين لووو تموت يا ســليم لوو تمووت ما تاخذها، عاشگهاا ووولك عاشگها لعبت عليك الدايحه المصلخة.
مات من آلقهر يريد يسد حلگها وسلطان يدفعه ويجرها للبيت بس يريدها تسكت وما يريد ســليم يتطاول وياها جلبت بسليم اجره وهي تسودنت طكت سلطان ورت عليّّ تطكني وتصيح
-انتِ الحطيتيها بررراسه انتِ التخلينها يمج وتودين عليييه.
سجاد:: صووتج.
التفتت لباب المطبخ واكف ساند ايده على الحايط وهاجر بصفة يعاين الامي بخزر وسليم مات من آلقهر كوه سلطان كاضه كلساع يرجع ايده بالحايط
مسحت وجها تحاجي سجاد وترجف من الحرگه
-ها يمه ليش طلعت.
سجاد:: صووتج.
رد حجاها ومسح وجهه يعاين لسليم
سجاد:: تعال يمي.
مشه ســليم يمه يريد يرد ياخذه للغرفه عاين الامي
سجاد:: اكرهج واكرهه صوتج ما اريدن اسمعه.
فتحت عينها حييل بوجهه وسلطان وسليم اثنينهم حاچوه ما راضين، رد للغرفة وهيه عينها وراه دمعه طاحت من عيونها مسحتها بساع ودارت السلطان بحرگه
ميلاد:: گل الميثم خل يكض الادبسز اخته وتكف من ســليم لا اموتها وما اخلي بيها عظم صاحي.
سلطان:: فاضحتنا دومج عليمن؟ ولشوكت تضلين بهاي سوالفج؟
بأثنين اديها طكته على صدره وخر منها على صفحة وهي ردت طبت الغرفتها مسح وجهه ودار علي يسأل ما فهم كلشي حجيتله السالفة كاتلني الخوف على ســليم نمرد گلبه من آلقهر
سلطان:: ياهو اليدري بهالحجي
-محد هو بس انه وياه جاي نسولف وسمعتنا.
ووي حجايتي التفتت لباب الحوش دفعته رنـــه تعاين بخوف وبس لمحتني گالت
-تعاي يله.
هزيت راسي اي طبيت اخذت عبايتي وطلعت لكيتها واكفتلي بالباب مشينه سوه وهي تسأل
-تعاركتن؟ سمعتها تصيح.
-لا مو وياي وي ســليم.
هزت راسها خوش طبينه للبيت بالي كله يمهم وخفت حييييل حاسه السالفة ماراح تعدي ويصير شي ما ارتاحيت، لمن أجه كهلان بهدعش ضل يشتغل بالحديقة يرتب بيها ويعدل الما مزروع سويتله چاي وطلعنه يمه كلنه عاين الرنه گالها
-هذا صخيم شفتيه حاجيتيه؟
رنـــه:: ياهو صخيم؟
-رجلج البارحة طردته حجيتي وياه خافنه زعل.
ضحكت رنـــه تعاينله
-لا تكول عليه صخيم، وخل يزعل فـــدوه الك واذا زعل.
وكف عدل يهز بأيده ويگلي
-ترضي الطرفين اتحداج تغلبينها هم تدافعله وهم تريح گـــلبي.
-غير انتَ تحطها بين نارين شتسوي جا
راحتله شمس تضحك وتكله
-خالو خالو عاين
عاين عليها وهيه تحط الورده يم وجها وتسوي حركات وتتخوصر شالها يبوسها
-انتِ وردتي وشمسي واعز بشر على گـــلبي .
وهي تسودنه بدلعها تتغنج وتضم روحها بحضنه تضحك عاينله علاوي بزعل ماد اديه ويصيح عليه
علي:: بابا.
شمس:: شيله خطيه لا يبجي.
تحجي وتشمر بشعرها مناه ومناه واحنا نضحك عليها نزلها وشال علي بوسه وشبگه وشمس كعدت بحضن رنـــه تعاين بطرف عينها وتهزّ بأيدها
كهلان:: علوشيتي بويه حبيبي
وضم وجهه برگبته يبوسه صاحت شمس
-هااه خالو.
ضحك يعاينلها
كهلان:: هاه؟
شمس:: كاافي.
راد ينزل علاوي جلب بركبته ما يرضى مو يدري بشمس تضوج يتعاند وياها ضل كهلان شايله وشمس بالختله تسويله بأيدها اكضك وهوه يگلب عيونه ما مهتم ويشبگ بأبوه ضلينه كاعدين بالحوش ومن اجوا حسين وزهره طبينه جوه علاوي وشمس بعدهم يتعاندون. على كهلان وكل واحد كاعد بحضنه من جهه لمن زهره كضت صلاة واجتهم هزّت ايدها
زهرة:: والله يا الله ماخذينه فلاحة ملاچة.
سحلت شمس دفعتها لبعيد ودفعت علاوي كعدت هي بحضنه وتمد لسانها الهم تحرك بگلبهم
زهره:: كهلاني هوه ما يحبكم يحبني.
شمس:: والله يحبني.. تحبني خالو؟
كهلان:: اموتن عليج خالي.
شمس:: جا وخر زهره.. هيه حتى زهره هيه مو حلوه وخررها
تحجي وماده اديها وزهره تشبگه حيل تضحك وتكلها
زهره:: يموووت علي يحبني.
شبگها يضحك وشمس متسودنه وتخزر بيه امه حسين يمهم صف وياهم وسحل زهره من رجلها ومشه هوه يريد يكعد بحضن كهلان بعده ما واصله ودفعته رنـــه ذبت روحها بحضن كهلان شبگها وشمس تكلها
شمس:: شبيج جبيرة انتِ شكدج...خالو جبيرة
-ميخالف خالي انتِ اعقل منها، خطيه هاي تضل تبجي
عبالهم يضحكون عليها لو يبجونها هزت ايدها ودارت وجها الي تحجي
-روحـــي روحـــي حتى انتِ، كلكم كلكم روحوا.
تفحطنه من الضحك من تضل تحجي وتشمر كل حجايه اكبر من الثانية للعصر كاعدين بالحوش انه ورنه ندرس حسين وزهره طب كهلان جان ماخذ علي وشمس يشتريلهم كعدوا يمنه وفزينه على صوت امي بس سمعت صياحها عرفت السالفة
بساع جريت عبايتي وطلعت اركض البيت عمي خليل وصوتها شما جاله يعلى والگاها ملاخ هي وماريا وماسه بباب الحوش صرت بيناتهم والتموا الولد على صياحنه تسودنوا مــيثم وبريا جروا البنات وسلطان جر امي وسليم اجه يركض يسدّ بحلكها وهيه تتراجف تدفعه وتصيح على مــيثم
-كضهاااا كض اختك وحش رجليهاا عاشگه ابني وولج ولج تردين تحطين روحج بررراسه.
تصايحوا الولد متسودنين وسليم ما يدري شني اليسويه وبريا هد يريد يطگها متخبل دفعه ســليم ورد عليه تمالخوا بيناتهم كضوهم صــيهد وكهلان روحـــي طلعت من صياحهم وهي ما تسكت وتذب حجي جذب على ماريا
ميلاد:: مصاحبته مصاحبته تريد تحط روحها بررراسه بت الروسية كضتهاا غاد تتفتل مصلخة وهسه اجتني تريد تصير مره بررراسي ولك كض عرضك مــيثم كض عررضك كونك زلمه .
مــيثم:: مسودنه ما عليج عتب، العتب على الزلم الواكفه وما مسكتج.
واخواني ميتين من الحرگه يسدون حلكها ويجرونها للبيت تملخهم تفشر على ماريا وتغلط تلطم وتصيح
-عمن عيووونج كون عمن عيووونج كون منين لفيتي على ابني لعبتي براسه وعشگج، ما تاخذينه لوو تموتين ما تاخذينه.
التفت عليها صــيهد بحرگه ومد ايده من بين ســليم وصيهد جرها من صدر العبايه زانگها بغضب يصيح
-سددي حلگج.
دفعه ســليم حييل متسودن ويصيح
-وخررر.
بريا:: سكتهااا سكت امك.
جرها ســليم بغضب سد حلگها وهي باثنين اديها تطگه جرها للبيت والولد ضلوا يحجون وسلطان يتعذر ويبرر بس بريا وميثم متسودنين وماريا اعاينلها بالحوش خدها احمر وخايفه
مشت وره ســليم بساع من رد صوتهم عله لگيت مرتضى متلاكي وياه وجره يطكه شلون ساد حلگها رديت اركض اصيح السلطان، وهي اسمعها تصيح على مرتضى
-حديدة حديدة وكسرلي رجليهم خل يكعدون يمي مگرمين ولا اخليه ياخذ هالچلبه هاااي.
وبس وصلهم سلطان متحمل على مرتضى جره بكل حيله طكه ماضلت بيه روح تمالخوا والولد ما تعرفين ياهو اليحيز بينهم وياهم اليتعارك ووين يله فكت عركتهم وكلها تسكت الا هيه طبت للبيتنا والغلط والفشار على الكل حتى على اخواني.
ولحد اذان الغروب يله انگطع صوتها.
ركضت للتلفون اخابر مــاسه خايفه على ماريا لا يحاجونها اخوانها بساع ردت عليَّ
-عليج الله خوما الولد حاجوها ؟
-لا والله عليمن يحاجونها شمسويه خيه كاعدين وامج هدت علينه.
-ادري قصدي علمود ســليم.
-لا بس مــيثم خابر سلطان گاله گول السليم اذا حاط هالنيه بباله ويفكر بأختي خل يبطل انا ما انطي اختي ولو تنطبك السما على الگاع ما تلوحها.
تحسرت مقهوره حييل سوده بوجهي
-ليش مــاسه شبيه ســليم؟
-يا خيه شنو شبيه ريـــمه صدك تحجين شني ماريا زايده علينه مانريدها مضحين بيها وبأيدنا نوديها الامج؟
-ها يعني علمود امي مو على ســليم؟
-لا هوه هم اصلاً مايرضون يزوجونها بهالعمر والله.
-انتِ مو اخذتي مــيثم اكبر منها بسنة مدري سنتين وهو ما رايدها هسه ترى مثل ما بريا تانه رنـــه تكبر سليم هم يتاني ماريا تكبر.
-ريـــمه فـــدوه سدي السالفة احنا حتى لو نحجي حجينا ما يفيد.
سكتت محتاره ختمت المكالمة وياها محترك گـــلبي منها بالليل هم ردت صارت هوسه يمهم شويه وسكتوا تريد تجلطهم يله ترتاح.
ثاني يوم الصبح من اول ما كعدت عاينت من باب الحوش لمحت سجاد طلع مبدل هدوم طلعه وتمشى لسيارة سليم السويچ بأيده، دك كلبي بخوف مديت راسي من الباب اصيح عليه
-سجاد
التفت عليَّ عيونه ذبلانه وجواهن سواد وضعف حيييل
-وين رايح؟
-بشغل.
-وين؟ ســليم يدري بيك؟
هز راسه لا كوه يحجي
-شويه واجي
-لا توجع گـــلبي .
-وعيون عبود شويه واجي.
عاينت وراه رايحه روحـــي وهو صعد بالسيارة بعده ما مشغلها وطلعله ســليم يركض فتح الباب يحاجيه
-وين ررايح؟
-شويه واجي.
صحت عليه
-روح وياه سليم انتَ سوق هوه مابيه حييل.
دفع سليم ما راضي
سجاد:: لا وحدي، شويه واجي.
ســليم:: اي وهيج انا زوج اصدكك واعوفنك تروح وحدك تنتحر.
سجاد:: لا ما انتحر عبود ما يرضى بس عوفني وعيونه الاموتن عليهن ما انتحر عوفني.
ضل يعاينله ســليم ساكت وهو سد الباب وحرك السيارة بجيت خايفه وما مصدگته وسليم يعاين وراه بقهر خابر سلطان مارضى عليه شلون خلاه يطلع وحده، والولد هم بس دروا ضلوا يحجون.
للساعة ب١٢ ضبط يله رجع نتر بوجهه سلطان يصيح عليه
-وين جنت؟
-بشغل.
شمر السويج على ســليم وطب البيتهم جريت نفس براحه المهم مابيه شي ورد سالم . درت الرنه گالت
-ما ارتاحيت احس اكو شي
-والله ما ادري .
رنـــه:: سكتت اعاينلها حيل خايفه على أخوانها بالاخص وره سالفة ســليم وماريا لان الولد مــيثم وبريا اثنينهم تعاركوا وياه وزعلوا.
طبيت للبيت لكيته مراسلني
-راح تكضي الاجازة وانا ما شايفج.
دخلت للصور ووديتله وحده
-هاك شوفني.
-خل ابوسن عيــونج.
كصيت صورة بس لعيوني ووديتها اله
-هاك.
-هسه ابوسن عيــونج بالصور بس لمن اشوفنج تدرين شراح ابوس؟
-ادري ادري ايدي اليسرى واذا بيها مجال حتى اليمنى.
-هههه حجي يفيدج
ابتسمت من زهره ضلت تغمزلي غميتها وكمت شغلت المبرده انه اشغلها وهي تصيح بعدها بارده وتكوم تطفيها وشمس ساعة تصف وياي ساعة تصف وياها.
وي الغده اجه كهلان گال
-اكضي غده وسبحي شمس ولبسيها لبس حلو اخذها وياي المازن زحمه.
ريـــمه:: منين الاخذها؟
-ما أدري والله
-تروح هسه؟
-كبل هوسة العرس نروح انا والولد بس نسلم ونرد.
عاينت بوجهه ساكته رديت اسأل
-وشمس تضل يمهم؟
-هوه من امس راد ياخذها وما رضيت اليوم اذا گال خليها اخليها يمه جا زحمه.
-وين ام البنين كون بساع يصيرون عنده جهال حتى يلتهي بيهم وينسى شمس.
عاين بوجهي ما راضي
كهلان:: لا تحجين هيج عمها وبعد يومين تكبر وتبدي تفهم وتنقهر من تشوفه ما مهتمّ وناسيها بالعكس ادعي الله دوم يحنن گلبه عليها وما يتغير.
-جا اضوجن من ياخذها وتبات يمهم.
-ما يصير غير عمها ويحبها مثل ما إحنا نحبها
دنگت ساكته وبس كضينه سبحتها وبدلتلها تكيف من تروح العمها ركلساع تكض وجهي وتكلي
-مو تبجين.
-لا هالمره ما ابجي بس لا تبطين انتِ خوش اضلن وحدي.
-زهره تنام بحضنج.
-اي بس اريدنج انتِ هم بحضني
وهيه كاضه وجهي بأثنين اديها تدنت تبوسني
-احبج.
-يييمه ييييمه اموتن عليج وعلي.
ضحكت وركضت للمرايه تريد تشوف بدلتها شالها حسين وفرها گدام المرايا تتفتل وتلعب ببدلتها.
طلعنه للهول متانين طــروادة شويه وطلع من الغرفة بدشداشته السوده والسبحة بأيده ركضتله شمس كضها من أيدها
-اوكف اوكف خل اصوركم.
ركضت جبت تلفوني وكف عدل وانه اصور بيهم كالت ريـــمه
-جا لو رايحين بالحوش ظلمه هناه
طلعنه للحوش الولد يصيحون عليه مستعجلين وانه الا اصور والصور تعجبني ما اخليه يروح اخذت جم صوره يله طلعوا عاينت وراهم كلهم رايحين. ما عدا سليم وسجاد.
وكلهم يعاينون الشمس تركض بيناتهم وتفر ببدلتها وصيهد يصيح عليها
-ما تحترمينه انتِ شو تركضين گبلنه.
دنك شالها من الگاع يبوسها وباعد رجليها حتى لا توصخ دشداشته بحذائها
كهلان:: گليليه خاب ولي.
شمس:: لا عيب عيب.. خالو هوه غير خالو؟
صــيهد :: فـــدوه اروحن التربيتج يا خالي مو ملطلطه مثل خالج البغل وخالتج المسودنه.
وانه والله جنت حبابه وساكته منهم بس همه يعيلون بيه بعدهم بالساحة وركضت الهاسكي هم تلطلط وگام يعض بس طلع وي كهلان تعلم، هديته عليهم الخايس غدرني ركضلهم وضل يلعب وياهم ما عضهم.
غميته لو مربيتلي ديج هم جا فزعلي احسن، لمحني بريا وضحك اشرتله بأيدي وين رايح؟ غير عدوك وتكرهه المن ماشي العرسه يحضي، صعدوا بالسيارات ومشوا.
اقل الساعة وردوا شمس ضاله يمهم مازن يريدها يمه سكتت اقنع روحـــي ميخالف وحقه مثل ما گال كهلان.
طبيت للهول كهلان يحجي وكفت يمهم ما فاهمه شي بس راح درت الريمه اسأل
-شكو؟
ريـــمه:: بيت سيد عباس مو على اساس اتفقوا وي صــيهد على عقد سكتاوي وكالهم بعدين نحدد يوم؟
-اي؟
-مخابر شيخ حيدر گايله خابر سيد عباس گله ما تردون تحجون بسالفة الخطبه مناه الدورة السنة، وره دورة السنة يعقدون والعرس مناه لمن تكضي سادس، سيد عباس راضي، بس كهلان يگول زحمه الزلمه داس بساطنا وراد بس عقد سكته حتى يضمن البنيه الهم صــيهد فشله .
رفعت اجتافي ما ادري ما اعرف الحك وين، سكتنا وبالليل بريا قفل الا يجي وكهلان موجود انحرج گتله
-كهلان هنا استحي.
-هسه اخلي مــيثم ياخذه ويمشون للگيعان.
-ماعنده شي المن يروح؟
-خرب روحج قفلتي شبيج وعلي طك گـــلبي عليج مو انا يتيم ما ينكسر خاطرج عليَّ؟
-لا هاي گبل جنت احسك يتيم.
-والله جنت مدلل بوكتها شسوي وتردين تحسيني يتيم.
-ههههه يله تعال كسرت خاطري
-يتيم مو؟
-اي
ضحك سديت التلفون منه ومشيت الريمه
-گولي الطرواده بريا راح يجي.
ريـــمه:: ولج عادي اصلاً هوه يگول زحمه خل يجي .
-ميخالف كليله.
مشت للغرفه تحاجيه كالها خوش شويه واجه بريا طب للدوانيه وكهلان يمه سويتلهم چاي وطبيت سلمت عليه من بعيد لبعيد ولا چن ذاك اليوم شابگته بس هو يخبث يحرك بگلب كهلان
بريا:: تعاي حبيبي اكعدي هناه.
وطك بأيده على مچان بصفه
طــروادة :: اريدن احترمك بس انتَ ما تخليني
ضحك گاله
-الله اكبر مرتي.
-من تكضي سادس تصير مرتك
-مطوله السالفة.
وانه ضاله اوزع ابتسامات بيناتهم، شويه وطرواده طلع وبريا يضحك
-تعاي يمي وين شارده
گمت من مچاني كعدت يمي جرني من ايدي الصدره يشبگتي ويعصر ضلوعي حيل
-هيج تسلمين عليَّ مو من بعيد.
عاينت لعيونه مبتسمه
-اي بس مو گدام اخواني استحي.
-يله ميخالف حتى لو بيني وبينج.
هزيت راسي اي مبتسمه ضلينه كاعدين نسولف يحرك اصابعه على أصابعي لمن وصلت سالفتنا الماريا تحسر بقهر
-لو ما نحجي بهالسالفة والله انغث.
-مانحجي بس اكلك مو تتعاركون وي ماريا.
-لا يابه مالها شغل سليم چلب.
-ليش
-يحبها.
يحجيها بقهر وعبالك فد جريمه جريت ايدي من ايده
-وشكو بيها؟
-اسكتي رنـــه.
-ترى اكثر شي اكرهه بالبشر من يحللون على روحهم ويحرمون على غيرهم شسالفة ؟
-ما محرررم عليه جاي تفهميني ؟ اسكتي رنـــه فـــدوه اروحنلج جاي ارتاح يمج مو نتعارك.
هزيت راسي خوش بس بعد اثنينا ضجنه ضل شويه وراح، لفيت راسي ونمت وفزيت من الصبح عبالي صار الظهر وشمس راح تجي طلعت يم ريـــمه وهي كلساع تروح وتجي يم باب الحوش هم شافت سجاد طلع بسيارة سليم وتضل طول اليوم ايدها على گلبها وخايفه
-يجوز صدك عنده شغل ريـــمه لا تقهرين روحج.
ريـــمه:: هزيت راسي اي بس جذب ولا اگدر ما انقهر واخاف روحـــي تروح الحد ما يرد واخذله چم يوم يطلع مناه لمن بيوم منهم الغروب سمعتها صارت هوسه ببيتهم ما گدرت اسكت طلعت مستعجله والخوف يدك بگلبي امي ما موجوده بس الولد وهاجر تبجي عاينت بينهم مرتبكه
-شصاير؟
وسليم يفتر بحرگه ويحجي بصياح يأشر على سجاد
-يريد يسافر العينتين يريد يساااافر.
سلطان:: شيل هالفكرة من راسك سجاد .
يحجون وياه وانه مدري شصار بيه كعدت على حيلي گباله مدنك يهز برجله ويحجي بهدوء
سجاد::حتى لو اعترضوا وحجيتوا راح اروحن لو شما سويتوا
ســليم:: واحناااا؟
سجاد:: المن اضل هناه اتعذب لا اگدر انتحر وارتاح ولا اگدر اشيله من راسي بكل مچان اذكره ماكو شبر بهالقرية ما ماشينه سوه، المدينه شارع شاررع فارينها.
سلطان:: ميخالف ميخالف نأجرلك بيت ببغداد تعيش غاد هاا شتكول ها احسن هيج موو؟
هز راسه لا يعاينلهم عيونه متروسه دموع
-باجر الصبح طالع لو تكسرون رجلي هم اروحن لا تتعبون أرواحكم بحاله وحده ما اسافر اذا ربي يرحم بحالي يموتني گبل ما يصبح عليَّ الصبح.
انفجرت ابجي وي حجايته وين يسافر وانه وكلبي شيصبره تدنى علي يشبكني ضميت روحـــي بحضنه ابجي بحرگه وخوف
-لا ترررح سجاد والله تمووتني .
-اتعذب لو ضليت هناه ما ودكم ارتاح؟
-جذاااب جذاب تنتحر بس ترووح تنتحر.
-وعيون عبود ما انتحر اريدن اسافر حتى انسى لو ردت انتحر هناه مو بعيد حتى تدفنوني بصفه.
-اااخ يمه گـــلبي .
شهگت روحـــي رايحه جرني الصدره مختنك وهاجر من بعيد تعاينله وموعها يجرن التموا الولد محد راضي على سفره بس هو قافل ومكمل كلشي يسافر الدوله عربيه ويقنعنه تخابروني وتراسلوني وكلشي تمام
كضيت الليل ابجي وما ودي يصبح الصبح ورنه مكابلتني ودموعها على خدها، وكهلان كلساع يخابر الولد ميتين مت القهر وكلبوا وجوهم طلعوا من البيت كل واحد بصفة
للصبح الساعة بالسبعة غسلت وجهي وطلعت مهدود حيلي ودموعي يجرن، شفته واكف هو وصيهد وكهلان بباب الحوش يحجون وياه ويوصونه يحلفلهم بغلاة عبود ما ينتحر ولو راد ينتحر جا انتحر يمنه، عاينلي ترخص منهم واجه يمي مد ايده يمسح عيوني وكوه يحجي
سجاد:: صيحيلي رنـــه احاجيها.
التفتت الرنه واكفه بباب الهول عيونها يجرن اجت بصفي دنك. مختنك واعاين لدموعه من يطيحن حاجاها وما يحط عينه بعينها
-ابريني الذمه خويه، انا لو يصيح بيدي ابدل روحـــي بروحه وارده الكم .
ورنه شفايفها يرجفن ودموعها مغركات خدها گالتله
-اتمنى ما تسافر انه ضاله اشوفن عبود بيك لا تروح.
سجاد:: تعبـــت ما اگدر آريد انسى.
حجاها ورد مشه للبيت لبست عبايتي وتبعته اخواتي كلهم عيونهم حمر وولدنا بره الحوش ملتمين، صعدت وراه الغرفة هاجر يحاجيها وهي تبجي كعدت يمها
سجاد:: يمج سلطان ويمج ســليم وريمه ليش بعد تبجين.
هاجر:: محد مثلك انتَ... انتَ عيوني الاشوفن بيهن شلون تروح.
-تعبـــت انا والله تعبـــت بعد ما اگدر.
جراها الحضنه شابگها بكل حيله درت وجهي الباب الغرفة من طبت امي تبجي وكعدت بصفه تريد تجره الحضنها وتتوسل بيه
ميلاد:: ووولك يمه ولك سجيد تعوفني وترررح ولك اتسودن وحك الحسين يكون يضل براسي عقل يااا عود صدك تريد تسافر سجيد يييمه.
وتجر بيه بس تريد تشبگه نتر ايده منها وكام يريد يروح كمت وراه وهيه ضلت بالغرفة مهدود حيلها وتصيح وراه ما التفت ابد شال جنطته وطلع تبعته ابجي. الولد كلهم واكفين سلم عليهم واحد واحد وشبگ كهلان يبجي ويتعذر وكهلان يوصيه
-ديربالك على روحك وكلساع راسلنه.
هز راسه اي سلم على سلطان مختنكين اثنينهم محد منهم حجه وخر منه ورد علي شبگته ابجي روحـــي رايحه. دار وجهه ومشه للسيارة توه يريد يفتح الباب ويصعد وطلعت امي تبجي وتصيح
-يييمه سجيد ووين رايح ولك يييمه.
وبس لمحها فتح الباب وصعد ركضت للسيارة ما لحكت ســليم حرك وهي تبجي وتصرخ وراه مشيت اريدن اكضها دارت علي بحركه طكتني وجرت روحها تركض وره السياره حافي حديدة چبيرة گدامها وقوية مال فدان ومكسورة مدري شلون ما شافتها عثرت بيها وصرخت شهگت گـــلبي . وكف من شفت رجلها العظم جن انلوه وصار ليفوك من النص ركضت وسلطان ركض وياي
درت وجهي ارجف ما گدرت اشوفن رجلها وكلبي انسحن ركض أخذناها للمستشفى ودخلوها للعمليات لان رجلها اكثر من كسر صاير بيها
ضليت كاعده ايدي على خدي اجن عمتي ايمان وجويريه جلبت بعمه ابجي
-راح سجاد عمه ساافر.
جــويريه:: مديت ايدي امسح على ظهرها، يوجعني گـــلبي عليها عمه ضلت يمها واني رجعت وي صــيهد
ميلاد مدري شلون رجلها منثرثة واكثر من كسر صاير بيها الا يحطولها بلاتين كتله
-جا ادري هيه حديدة وعثرت بيها شلون هلكد تكسرت؟
صــيهد:: حديدة مال فدان وهلكدها هيه ما تعاين الدربها.
سكتت منه هم ماله خلك وضايج لان راد يروح يشوف ابوه وابوه ما يرضى ولا يريدهم، طبيت للبيت. وهو مدري وين راح للغروب يله اجه عاف تلفونه على الشحن وطب يسبح شويه ودك تلفونه ومن فضولي عاينت بيه رقم ومسجل اسمه ٢٢ استغربت ليش ما كاتب اسم
شلت راسي من فتح باب الغرفة وبس لمحني اعاين بالتلفون مد ايده گلبه ووكف يم المرايه يمشط
-ياهو هذا؟
-محد
-شو مسجله ٢٢ شني يعني؟
-هيج علمود الشغل.
رفعت حاجبي ساكته وهو غلس نشف شعره وكعد يم كرار يتشاقه ويبوسه ضلت تاكل بگلبي شويه ومشه كعد بالهول والتلفون بأيده اسمع صوت الرسايل وانطحن مدري منين جبت الصبر وضليت ساكته.
تمددت بفراشي شارده للنوم وحسيت بيه من اتمدد وجرني الحضنه يشبگني توني غفيت ورد تلفونه دك ضليت مغمضه عيوني وهو سحب روحه من عندي بسرعة قفل صوت التلفون اخذه وطلع بره گمت وراه گـــلبي يدك حيل امشي على اطراف اصابعي وهو واكف بالمطبخ وكفت اعاينله منطيني ظهره ويحجي بحرگه
-شتررردين چم مره گتلج هيج وكت لا تخابرين ولا تراسلين؟؟
