رواية بنت الخياط الفصل الثامن بقلم جمانه السعيدي
فاطمه....كل الاهل والأقارب اجو ورانا للمستشفى
حتى امي وابوي
بس شفتهم انفجرت بلبجي
خاصتا اهلي احسهم اكثر ناس يعرفون اني شكد احب قصي
اني ما مصدكه قصي مات
اتاخرت الاجراءات بلمستشفى والشرطه اجت تحقق
منو الي كان يحمل سلاح بلعرس
بدو يحققون وياهم واخذو اربعه منهم للتحقيق
بلتشريح كدرو يعرفون نوع السلاح من الطلقه الي طلعوها
من رأس قصي
النذل ضاربه براسه وكانما متعمد يقتله
بس ولا واحد منهم كان يحمل سلاح الجريمه المسدس الي انقتل بي قصي ماكان موجود وياا الاسلحه الي تصادرت
الشرطه صادرت الاسلحه كلها حتى الاسلحه الي كانت موجوده بيت العريس
بقا قصي هذا اليوم لليل بلمستشفى متحفظين على الجثه
الحد ما يكمل التحقيق
خالتي نقلناها للطوارء كل شويه تفقد من الصدمه
امي حايره بجهالي يبجون وخايفين
واني حتى مااكدر اوكف على حيلي
اريد اموت ليش قصي عافني ولله تونا تونا ازوجنا
تونا عرفنا واحد الثاني
اذا هو ناوي يعفوني ليش خلاني اتعلق بي
ووين اروح اني وجهالي
منو النا من بعد عينه بهاي الدنيا تعبت تعبت من البعد
وهو بعدا بلمستشفى شلون لو اخذو يدفنونه
جمانه السعيدي
ثاني يوم بعد ما سجنو كل واحد يحمل سلاح بلعرس
اخذو قصي حتى يدفنونه
عمار ما قبل اني وخالتي نروح وياهم
رجعنا وياا وليد ويانا ابوي وامي
وصلت للبيت هذا البيت الي شهد على حبنا اني وقصي
رجعتله وحدي
قصي عافني وعاف جهاله وراح
مااريد اكعد بهذا البيت اريد اروح مكان مابي ذكرى من قصي اريد احس هو مسافر وراح يرجعلي
فاطمه....مااريد ابقى هنا اريد اروح بيت اهلي
مااكدر اتحمل اكعد هنا طلعوني منا مااكدر
امي....شلون تعوفين خالتج وحدها وترحين ما تشوفين حالتها شلون تاخذين جهال قصي منها
اكعدي على الاقل خل تخلص الفاتحه
خلي خالتج اصير احسن
فاطمه... محد يحس بيه اني جاي اتهدم على فراك قصي
مااكدر اتحمل
روحي مشتعله نار ياناس اني فاركت روحي
شلون راح اكمل بدون روحي مااكدر
منا لمن خلصت الفاتحه كل يوم اموت الف مره
واني اسمع صوت العياط بلبيت
ابد ماصعدت الغرفتي مااكدر ادخل بيها
شلون ادخل الغرفه وحدي وقصي ماكوووو
امي كانت تبات وياي بيت عمي حتى تصبرني على الفراك
وحتى أدير بالها على جهالي
بلكوه بقيت الحد السبعه
جمانه السعيدي
عمار جان ملتهي بلقضيه كل يوم يستدعونه الشرطه
كل المتهمين الشرطه طلعتهم
لان ولا واحد منهم يحمل السلاح الي انقتل بي قصي
وأهل العريس جابو مشيه واجو علينا
يردون ياخذون عطوه ويفصلونا
عمار ماقبل بلفصل لان ما متعمدين يقتلو قصي انقتل
بلغلط والشرطه ما حددت القاتل ليش يتحملون المسؤليه هم مالهم دخل بقتل قصي
بعدين هما اهلنا وزوحمه يدفعون فصل
على هيج شغله صارت بلعلط
عمار خلص الكعده بالتراضي بين كل الاطراف
وسحب الدعوه من الشرطه
القضيه اتقيدت ضد مجهول
ضاع دم قصي محد عرف منو قتله
فاطمه....من شفت كل هاي الاحداث اخذت جهالي ورحت بيت اهلي
زوجي مات ودمه ضاع واني اتفرج لا حول ولا قوه
اهلي محتارين بيه اني وجهالي
خطيه ابوي مخبوص بينا خبص اني والجهال
من جان قصي موجود اني مااجي الاهلي وابقى نهار عدهم
لان خطيه خالتي تبقى وحدها بلبيت
قصي جان يجيبني بليل ابقه يمهم ساعه وارجع
ابد ما شبعانيين من جهالي
هسه ابوي فرحان بيهم وحاير شيجيبلهم
وامي توكل وتلبس وتغسل
بيتهم جان فارغ وخاصه اني وخواتي كلنا ازوجنا وطلعنا من البيت ينتضرون اي وحده ازورهم حتى البيت يصير بي حس
عشت ايام سود مجاي اكدر اتخطى
مجاي اكدر اعيش طبيعيه مثل قبل معقوله
هاي هيه حياتي وياا قصي
خلصت خلاص شكد عمر حبنا كصير
شبسرعه صار الوداع شبسرعه خلصت العشره
شلون راح اكدر اكمل حياتي من دونه
كل يوم ابقى ابجي لمن ينفجر راسي من البجي
واسكت ياريت الدمع يرجع الاحباب هيج هاي الدموع بس حركت كلب
الجهال ابوي كل يومين ياخذهم اتشوفهم خالتي ويرجعهم
اليه ولله ولا هاين عليه اعوفها وحدها بلبيت
وخاصه بناتها بعد السبعه كلمن رجعت البيتها
بس مااكدر اعيش بذاك البيت بعد
كلشي بي يذكرني بقصي
كل يوم اتصل على خالتي ونبقى نبجي اني وياها
خطيه خالتي بعد سنه من وفاة عمي فقدت ابنها شكد هاي الدنيا قاسيه عليها
عمار جابله عامله تنضف وتطبخ لان بعد خالتي ماتكدر
مثل قبل الضيم دكه دك
بعد خمس اشهر من وفاة قصي اتصلت عليه خالتي كالت اني اليوم كلش مريضه اريد اشوف الجهال جيبيهم وتعاي
طبعا كل هاي الفتره اني ما طالبت باي مصرف للجهال
ابوي يصرف عليهم مدللهم دلال مو طبيعي
عمار كلشي مادز الهم بس الله يسلم ابوي يصرف عليهم مامخلي ناقصهم شي
رحنا اني والجهال اخذني ابوي عليهم
بس دست عتبت الباب شميت ريحة قصي بلبيت
هنا جنت اوكف انتضره من يرجع من الشغل
هنا جنا نضحك ونسولف ازاحمت الذكريات بعقلي ونزلن دموعي بس رمشن عيوني
دخلت بس شافتني خالتي فتحت اديها وحضنتني
الجهال كل واحد حاضنها من رجل
دنكت تبوس بيهم وتمسح بدموعها
كعدنا اني وياها نسولف ونتذكر كل الايام الحلوه
صعدت الغرفتي مثل ماهيه
ملابس قصي بعدهن معلكات احس كل ذكريات الفرح مخزونه هنا بهاي الغرفه
حتى أنفاس قصي بعدهن هنا موجودات
طلعت قميص من قمصانه وحضنته وكمت اشم بي
ياحبيبي لو تعرف اني شكد اشتاقيتلك
صعدو الجهال وراي تمددنا كلنا على الجربايه
حمودي يذكر ابو بس دخل للغرفه كال ماما وين بابا
فاطمه....بابا راح وعافنا الله يرحمه استعجل
يمكن مايحبنا بكد مااحنا نحبه جمانه السعيدي
ليش عافنا بهلسرعه
نزلنا جوا كعدنا يم خالتي اجا عمار
مااعرف ليش من اشوفه اضوج واحس نفسي تنسد
عمار...هلووو اليوم الغالين عدنا
هلو حبايبي شلونكم دنك بأس الجهال
شلونج فاطمه
فاطمه.. الحمد لله
عمار... اي توه البيت نور شكد مشتاق للجهال
فاطمه....يمتى ماتحبون تعالو اخذوهم
عمار...وانتي ماتجين وياهم ترا انتي شمعة البيت
فاطمه... البيت هذا شمعته قصي
من يوم راح قصي انطفا هذا الييت
عمار...اي ولله صدك
بقينا بيت عمي لليل من ردت اطلع
فاطمه...خاله اربد احجي وياج بموضوع بس محرجه
خالتي....يااا ليش محرجه كولي
فاطمه...من مات قصي الله يرحمه لليوم وابوي شايل مسؤلية الجهال
ابد ما مقصر وياهم ولا يوم كال الحمل ثقيل عليه
اني اريد مصرف للجهال منا لمن عمار يصفي كلشي
اريد اعرف راسي من رجليه
هذوله الجهال امانه عندي ومااريد اقصر وياهم بشي
هاي فلوس ابوهم
خل عمار يشوف شلون يحدد حصتهم حتى اكدر
ارتب اموري واشوف شلون اتصرف
خالتي...عمار مجاي ايدز لكم مصرف كل هذا الوقت
تحجين صدك
فاطمه....اي كلشي مايدز للجهال ابوي شايل مسؤليتهم
وما يقبل احجي بهذا الموضوع ابد
يكول عيب تحجين بلفلوس قابل اني مقصر وياكم
خالتي....يااا ليش هذا خير ابوهم وجدهم كله وابوج يصرف عليهم
اني سئلته كال ما ناسيهم
فاطمه....هو الموضوع مو كلش مهم بس جهال قصي
لازم يعيشون بخير ابوهم وجدهم
اني بس اريده يحدد الهم راتب شهري من حصة ابوهم
منا لمن يعزل حصة قصي
اني مو احجي هيج لان ماعندي ثقه بي
بس مااريد اي احد يمن عليهم وهما اصحاب خير
خالتي... اني احجي وياااا اعذريني اني مريضه وحزينه
وما انتبهت الهيج شغلات ابد
يايمه موتت قصي هدت حيلي
فاطمه....الله يساعدج ويصبر كلبج ويصبرني وياج
اتصلت على ابوي اجا رجعنا للبيت
خالتي بقت منتضره عمار لان زعلت علي ليش مايدز مصرف الجهال قصي
بس رجع للبيت لكها كاعده منتضرته
عمار... اليوم كاعده شعجب
خالتي....منتضرتك
عمار...خير انشاء الله
خالتي....ليش كل هذا الوقت مادزيت مصرف الجهال اخوك
عايف الرجال المسكين مكسور ضهره على المكينه يصرف عليهم ليش واحنا عدنا خير من الله
ووين حصة ابوهم
عمار.. منو كالج مجاي ادز مصرف فاطمه
خالتي....حقها فلوس زوجها وابو جهاله صرت بنص هدومي من سمعتها اطالب بمصرف جهالها
عمار....اي اني مادز الهم فلوس لان فاطمه مو امينه عليهم
اني اريد احافظ على فلوسهم الهم منا لمن يكبرون
خالتي....شلون حجي هذا لعد منيين يصرفون
عمار...مشكلتها مو اخذتهم وطلعت من البيت خلي تحير بيهم
بعدين اكو شي محد يعرفه غيري
قصي اتنازل عن حصته اليه وعندي أوراق تثبت هذا الشي قصي ماله شي يمي
خالتي...انت شكاعد تكول شلون اتنازل عن حصته الك ويمتى
عمار....عندي أوراق تثبت هذا الشي قصي كلشي ماله عندي كلشي بااسمي وباوراق قانونيه
بس عندي مقترح اذا تريدني اصرف عليها وعلى جهالها
تزوجني
خالتي...يااا اخوك توا مات وتريد تاخذ مرته
عمار...اني اريد احافظ على جهاله من الضياع اريد اربيهم اني احسن مايربوهم ناس غريبه
فاطمه حلوه وزغيره كم شهر وراح تلكينها مزوجه
وجهال اخوي يعيشون وياا رجال غريب
اني ازوجها واربي جهال اخوي اني المن اريد هذا الخير
كله شوفت عينج لا عندي زوجه ولا اطفال
وندى راح انفصل عنها بأقرب وقت
اني ازوج فاطمه واربي جهالها واذا ما يعجبها هذا الشي
فلس ما تحصل مني خل تحير بزمانها
هذا اخر كلام عندي
شكرا لزيارتكم عالم روايات سكيرهوم
