رواية الهاويه الفصل الثامن بقلم جمانه السعيدي
نور....بدا خالد يهجرني ويتركني اشهر وحدي
جبت بنتي وحدي مجان موجود وياي
اتصل علي يكول مشغول مو فارغلج
بقيت اسئل وادور علي لان وضعا مو طبيعي
غيابات متكرره وهجر وبعد بدون اسباب
الحد ماعرفت
مااجر شقه ويجيب بيها بنات ويشرب وماكو شغله مابيه حظ مايسويه
واني ابد مايسئل عني ولا بحالي
محد جان يذكرني بهاي الفتره بس ابوي
بس اني مااحجيله عن المشاكل الي بينا ابد خطيه ينقهر عليه
كام يغيب عني خمس اشهر وسته
وبيوم اجيت من الدوام ولكيت نص غراض بيتي ماكووو
تخبلت عبالي حرامي داخل وماخذهن
لمن طلعت حتى اسئل الجوارين
اذا شافو شي لان اني جنت بلدوام
أغرب جواب سمعته منهم
زوجج اجا وحمل الغراض اخذ غراض بيتنا حتى يبيعهن
ويصرفهن على البنات والشرب
واني وبنته مايعرف عنا اي شي ولا بحالنا
شفت الضيم كله
ادفع ايجار ومسواك وشايله كل المسوليه وحدي
بعد كم شهر بين عليه وقررت اعاتبه
جمانه السعيدي
نور...ليش هيج ليش تبيع غراضنا شلون نعيش وندبر نفسنا اني وبنتك مافكرت بينا
خالد...اس مااسمع صوتج محتاج فلوس ترديني ابوك
نومه الغراض يله جيبي شعندج من فلوس
نور...منيين اجيبلك عايفنا هاي الفتره كله وهسه جاي تريد فلوس
خالد. .خلصيني انطيني شعندج
طبعا اذا ماانطي يضربني ويغلط عليه ويبقى يدور بلبيت منا لمن يلكا الفلوس وياخذهن
الأصعب من هذا كله اجاني خبر ابوي مات
ضربته جلطه ومات
بعد زواجي بست سنوات مات العزيز الغالي
محد جان يذكرني ويفكدني غيره
انهاريت من صدك هلمره هو سندي بعد رب العالمين
هو الي يفكدني ويجيبني ويسئل عني
كنت احس نفسي كلش قويه بوجوده هسه من صدك ضعت ومحد اليه
انهاريت من صدك ليل نهار بس ابجي مامصدكه عافني الحنيين وراح
منو اليه بعد ووين اروح
ابوي جان موجود وخالد لا عب بيه لعب هسه شلون
البنيه من دون ابوها تنكسر وضيع
جمانه السعيدي
صرت منعزله وانطوائيه ومااحب اطلع ولا اشوف اي احد
كل النهار حابسه نفسي
ومااالتقي باي احد
صرت عبالك عجوز كارها الدنيا وكارها روحي
من كد الضيم الي شفته
بتي صار عمرها ٣ سنوات والبنيه ماتريد اي احد لازمتني
وتبجي واذا شافت اي احد غريب تكوم تبجي
على طول خايفه وتكمز من اي شي
كل الناس والجوارين وحتى المدرسات الي وياي متعجبين مني
شلون هيج صامده ومافكرت امشي بطريق غلط
زوجها عايفه وهي بعدها زغيره وحلوه
لو وحده غيرها جان ماخلت درب مامشت بي
عايشه وحدها لا حسيب ولا رقيب ومافكرت تغلط ابد
شكد قويه وصبوره
جمانه السعيدي
خفت حيل على بنتي وضعها ابد مو طبيعي كل الوقت تبجي وخايفه
كل الي يشوفها يكول لان وحدها ليش ماتسويله اخ
لان محبوسه بلبيت وماتطلع
ابدال مااحاول اطلع نفسي من هاي المصيبه لا فكرت اسوي اخ البنتي
يمكن جان تفكير غبي مني
بس ولله ماعندي احد اني بعد ماعندي سند غير رب العالمين ووين اروح
فكرت اسوي عائله اي اريد اطفال بلكت همه العوض من رب العالمين بلكت استند عليهم
ايجوز يعوضوني الحرمان الي عشته بيت اهلي
قررت هلمره من يجي خالد لازم يصير عندي حمل
رغم اسلوبه الزفت وياي وخياناته الي ماتنتهي
بس كنت اكول ازمه وتعدي
اجا خالد طبعا هو من يجي يبقى بومين اتلاثه اكثر شي
اسبوع ويختفي كم شهر حسب مزاجه
حاولت هلمره بس ماصار حمل
قررت استعد بلمره الجايه لازم يصير عندي حمل
المهم رحت للدكتوره ورتبت نفسي اخذت علاج
وحتى ابر تفجيريه
وكنت ادعي يصير حمل هلمره
بقا خالد اسبوع عدنا كان منتضر الراتب حتى ياخذه ويروح
بعد ماخلص الاسبوع اخذ الفلوس وراح
اربع اشهر واني ماشايفه خلقته اتصل علي ومايرد
الحد ماعرفت اني حامل وهلمره بيه ولد
اجا الشفيه لان خلصن فلوسه كلت خل افرحه اني حامل وبيه ولد بلكت يغير اسلوبه وياي
ويكعد يمنا وينتبه الحالنه
جمانه السعيدي
نور.. عندي الك مفاجئه
خالد...شنو خير
نور...اني حامل وبيه ولد
التفت عليه وبكل قسوه جان يكووول
خالد....منيين حامل
نور...شببك خالد هذا ابنك شنو منيبن حامل
خالد...وانتي منو عاتب عليج تحبلين
نور...رزق وجاينا من رب العالمين
بعدها تركني ومارجع للبيت ابد كنت اتصل علي دائما مرات يجاوب ومرات لا حسب مزاجه
بهاي الفتره امي بدت تقرب عليه
وتسئل عني وتتصل وتجي ازورني
كلت يالله ايجوز حست بغلطه
طبعا اختي الجبيره ازوجت وواحد كلش شبعان وبيته وحدها بس ابد ماتسئل عني ولا تذكرني
واذا اشوفه بلصدفه ترد عليه السلام بلكوه
وضعها الحالي خلاها تنغر اكثر وتشوف نفسه علينا اكثر
المهم فرحت امي بدت تقرب عليه وتسئل عني
خصوصا واني جاي احس بلوحده والحزن بهاي الفتره
يارب رحمتك واخيرا امي راح تعوضني عن الحرمان الي شفته منها قبل
واذا بيه تفاجئني اريدج تتنازلين عن حصتج من البيت
واني بهاي الفتره اتغدا مااتعشى
عايشه اسوء ضروف تمر عليه بحياتي
وهي كانت تشوف وضعي بعينه
وعدها فلوس خير من الله بس ابد مافكرت تساعدني
جايه وعينه على حصتي من البيت تريد تأخذها مني
امي...اني اريدج تتنازلين عن البيت اريد اخلي بااسمي
اني بعد كبرت واخاف من الوكت
وخوانج مالهم امان
طبعا اخواني هي جهولتهم وخلتهم يطلكون نسوانهم
تاخذ وجيب كلام وتسوي مشاكل بينهم وبين زوجاتهم
حتى كامو يشربون خمر بسببه دمرت حياتهم تدمير
وبعدها تحجي عليهم
ولله الشاعر ماجذب من كال الام مدرسه
هي الي تعمر وهي الي تخرب
المهم ضلت تلح عليه وتروح وتجي
منا لمن رحت وتنازلت عن حصتي بيت ابوي
واني جنت كاعده ايجار وحال الضيم يالحالي
مثل ماتوقعت بس تنازلت عن حصتي بطلت تسئل
عني وتذكرني ولا اله شغل بيه
وصلت للولاده اتصل على خالد مايرد رحت للمستشفى وحدي جبت ابني واجيت
صار عمر ابني ٨ اشهر وخالد لا جاي ولا ذاكرنا ولا حتى شايف ابنه
بعد ٨ اشهر يله بين عليه
عادي عندا الوضع شكله كله متغير من الخمر والحرام
فلوس ماعندا وجاي يريد فلوس
خلق مشكله وضربني كدام جهالي واخذ الفلوس وراح
بهاي الأثناء الموجر كال لازم تشيلين فرغي البيت اريده
اتصل على خالد ومايرد اريدا يساعدني حتى اشوف
بيت انتقل
بس مايرد عليه ابد
اخذت جهالي وكمت ادور على بيت
شايله ابني واكود بنتي وافتر ادور بيت
منا لمن لكيت بيت قديم وكلش تعبان الحيطان مفطره
الارضيه تعبانه باب البيت ماينسد
بس ايجاره قليل على كد فلوسي
اجرت سياره والجوارين ساعدوني حتى انقل غراضي
للبيت الجديد
اول ليله ابد مانمت البيت تعبان حيل وجبير
واخاف تطلعنا حشرات اخاف على جهالي
بقيت اليل كله ارتب بلغراض جهالي جوعانيين وماعندي
شي اوكلهم الولد ارضع بي وكلبي مقطوع من الجوع
والبنيه سويتله لفت خيار وطماطه
حتى مااعرف اصحاب المحلات واجيب منهم مسواك بلدين
كلما اذكر هاي اليله اموت قهر
المنطقه الي سكنت بيه
بيت اختي الجبيره رزان بيه
كلت خلاص اختي قريبه عليه اكيد من راح تشوف وضعي تحن عليه
رحت دكيت الباب عليه
طلعتلي سلمت عليه ردت عليه من ورا خشمه
نور...اني صرت هنا جيرانج حتى نتواصل اني وياج
رزان... هااا صحيح زين
حتى ماكالت تفضلي ابد
بعدها دزيت على نورهان حتى تجي تساعدني
مرتين اروح ادك الباب على رزان ماتفتحلي كلت ايجوز ماموجوده بلبيت
اجت نورهان حتى تساعدني
اخذت تليفونه حتى اتصل على خالد وانطي العنوان الجديد
حتى يجي ورانا
وهنا شفت شي بتليفون نورهان كلش ضوجني
بقيت اليل كله ابجي ومقهوره
شكرا لزيارتكم عالم روايات سكيرهوم
