رواية أحزان قمر الفصل التاسع بقلم جمانه السعيدي
اتفقنا ورا يومين نعقد بلمحكمه وفعلا اجاني بلعشره الصبح ورحنا عقدنا
وراها بعشر ايام حددنا الزواج بهاي الفتره طلعنا مره اتعشينا برا
ومره اخذني البيتهم شفت الغرفه حيل مرتبه عجبتني
والفرشه والتحفيات كلش حلوات
ضلينا نسولف واتفرج على الغراض وتاخرت ١٢ ومن رجعت بابا كام يحجي عليه
بيوم العرس رحت للصالون الساعه تسعه الصبح طبعا جنت حاجزه مسبقا
بيومها اني العروسه الوحيده بلصالون مكيجتني ام الصالون مكياج حلو ومرتب ولبست بدله بيضه منفوشه وتخبل وبيها نثر فضي وحذاء فضي
ومسكه ورد ابيض وتاج ليلو ابيض يخبل
راحن وياي للصالون بنات خالي اثنيينهم فطومه وزينب
بعدين اجه ياخذني علي
طلعتله ضحك وكال
يابويه هاي شطالعه ولج ما اكدر اباوع عيوني انعمن خرب ابليسج تخبلين
جمانه السعيدي
صعدني بلسياره وهو يسوق وبنات خالي كعدن ورا
وشغل اغاني بصوت عالي ويسوق ويركص ياهو الي نفوت من يما يضل يباوع علينا لان صوت الاغاني عالي وهو يركص رحنا للاستديو وكصينا صور
بعدين رجعني البيتنا وساعه واجت الزفه
هلمره صدك حسيت نفسي عروسه
موبس فرحانه طايرا من الفرح
وصلنا البيتهم لكيناهم مشغلين اغاني وكلها تركص صدك احلى عرس واحلى ليله بعمري جانت
شهرين ورا العرس عشت بيهن احلى ايام حياتي
وراها حسيت عدي اعراض حمل اخذتني خالتي ام علي حللت وطلعت حامل
لكن صارت بعض المشاكل بلبيت المشاكل الي تصير بكل بيت وخاصه بين نسوان الحموين
اني جنت اداوم ورجلي طاير بيه اشتغلت الغيره والخباثه
ماتحملنا قررنا نطلع بيت وحدنا عمي شجعنا وعمتي ما قبلت
لكينا بيت بسيط على كد حالنا وايجاره قليل بس كلش تعبان
بهاي الفتره خسر علي شغله وصارت حالتنا تعبانه وراتبي مايكفي بديت ابيع ذهبي شويه شويه ونمشي امورنا
كام علي يشتغل عماله حتى نكدر ندبر العيشه
لحد مادخلت بشهري البيت بلمطر يخر علينا جاي امشي وزلكت طحت على بطني ونكسر كاحلي
بقيت امدده ساعتين واصرخ ما اكدر اكوم اجيب التليفون
والوجع ذبحني
الحد مااجت جارتي معلمه من الدوام وسمعت صوتي وطفرت رجلها فتح الباب جابولي تليفوني خابرت على رجلي وابوي واجوني نقلوني للمستشفى
لكو رجلي مكسوره من الكاحل والطفل بي نبض قليل صبو رجلي وكالو لازم ماتتحركين ابد لمن يخلص شهرج
شفت الضيم يله كملت شهري
رحت للدكتوره كالت لازم انجيبج هسه او تبقين على مسوليتج
فحصوني لكو دمي نازل قررو ينقلولي دم
اجت الممرضه شكلت الدم واني مدري شنو ضربني على راسي واحس كليتين اشنجن واغمى عليه
كعدت ورا ساعتين الله لطف بيه كتلهم اشصار
كالو طلع الدم مامطابق ويه دمج
جمانه السعيدي
لازم ننقلج الغير مستشفى وفعلا سولي ورقة اخلاء ونقلوني المستسفى ابن غزوان بلبصره وصلت وجيبوني طبيعي
بس طلع الولد ازرك وكوه يتنفس خلوله صوندا بخشمه
وبقه تحت المراقبه يومين صار احسن وطلعنا من المستشفى
صار عمر ابني ست اشهر وبيت جده ما جايين شايفينا
زعلانيين لان عزلنه منهم
وبيوم اخذته ورحت الهم حماي لاكانه ورحب بينا اخذه حماي البيبته شافته
يمه ياهو هذا فدوه وباسته
كالها هذا ابن علي ورجعت علاقتنا بيهم احسن من قبل
صار عمر حسن سنه وحبلت وجبت ابنيه تخبل سميتها جنه
علي لكه شغل بشركه خارج البصره واجرلنا شقه ورتبها
واجا اخذنا اني والجهال الحمد لله وضعنا مستقر وامورنا الماديه كلش زينه عمر حسوني اربع سنوات وجنه سنتين
بس ابد مانسيت جهالي ذولاك بيوم من الايام دائما ادعيلهم
بلصلا الله يوفقهم ويحفضهم ويجبر خاطري والتقي بيهم بيوم من الايام دائما اسمع اخبارهم من بعيد
العبره من هاي القصه ان الانسان لازم يكون قوي وما يياس من رحمة الله ابد مهما مر بضروف صعبه لازم يتماسك ويكون قوي
رب العالمين ماينسى النمله ابطن الارض فكيف ينسى عبد من عباده
شكرا لصاحبة القصه الي شاركتنا تجربته وعلمتنا درس الصبر والقوه
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
