رواية دخيل في بيتنا الفصل التاسع بقلم جمانه السعيدي
سعاد....امي من شافت غفران اخذت ابنها وطلعت زعلانه
على زعل اهلها
تخبلت عليه كامت تحجي وتغلط
امي....انت شنو حاسبه نفسج ماكو منج نمونه تردين تهدين حياة اخوج بعنادج
اذا بيت عمج طلكو غفران واخذو الجهال ترتاحين
تردين تهدين بيت اخوج
شبي علي شناقصه مثلا
ولد مودب وحباب يصلي شريف يحبج بعد شتريدين
انتي متعافيه
خلي ابالج اذا علي نهى عليج راح تبقين بدون زواج
محد يكلبج
علي يزوج وانتي تبقين عانس بعد محد يقربلج
لان كله تكول ابن عمها نهى عليه
والي تتبطر على اهلها مابيه خير
سعاد...مااريده هي كوه انت لازم تساعديني مو تكفين ضدي انتي اكثر وحده شفتي ضلم الزواج غصب
امي...هي هاي حياتنا البنات مالهن رائي البنيه الحبابه لازم تسمع كلام اهلها
شنو راح يتقدملج واحد احسن من علي
شوفي اني مراح اخليج تهدين حياة اخوج فهمتي لولا
محمود كان واكف على الدرج ويسمع وعيونه تلمع من الحزن
جمانه السعيدي
صعد فوك كتبتي رساله
محمود...اني حزين وبعمري ماحسيت نفسي ضعيف هلكد
معقوله لمن لكيت الانسانه الي تناسبني
مااكدر اساعدها
ولا اكدر اكول اني احبها
إلى متى راح اتحمل كلبي راح يطك من القهر
شلون اكدر اساعدج
اني حاس بيج اعرف انتي جاي تحاربين اهلج
وتوكفين بوجهم حتى هذا الحب يدوم
اسف حبيبتي مجاي اكدر اسندج
خاف احجي وتتازم الأمور اكثر واكثر
خاف ادخل حتى اساعدج واضرج بلزايد
سامحيني حبيبتي اني اسف
انتي جاي تحاربين بهاي الجبهه وحدج
واني جاي اشوف بعيني ومااكدر اساعدج
هذا أصعب امتحان النا احنا الاثنيين
سعاد... قريت الرساله وكمت ابجي فعلا هذا أصعب امتحان
مستحيل راح اكدر اقاوم اكثر وخاصه اذا غفران عندت ماترجع اله اني أوافق على زواجي من علي
امي ماكدرت تتحمل ماتشوف ابن حسن هذا اول حفيد
ومتعلقه بي كلش
ثاني يوم راحت تشوفه
امي ...دخلت وكان السلام من خالتي وعمي مو ذاك السلام
والوجوه مكلبه
كعدت وشالت ابن حسن تبوسه
امي....يمه غفران ارجعي للبيت قبل لا يرجع حسن
خالتي....كل مره مالكم عدنا بس يرجع حسن يطلكه
شنو انتم لحم غالي واحنا رخيص
بتكم السفيره عزيزه وبتنا الخدامه
ماكو واحد احسن من واحد
وهمزين عرفناكم على حقيقتكم
مثل مادخلنا بلمعروف نطلع بالمعروف بتكم عدكم
وبتنا عدنا
جمانه السعيدي
امي... مو هيج الحجي خيه حسن وغفران مزوجين عن حب وتراضي
ليش تردين تخربين بيتهم
خالتي.. اني مااريد اخرب بيت احد بس مثل مابتكم عزيزه عليكم وتتشرط احنا بتنا عزيزا عدنا
امي...احنا مامقصرين وياا غفران
خالتي....يااا تحجين صدك وشنو شفتينا راح نقصر وياا بتج شكالولج جوعانيبن عريانيبن
شبينا سمتعنا موزينه كاعدين بلشارع
مثل ماقدرناكم وانطيناكم غفران لازم احنا نحصل نفس التقدير
اني كلت العلي البنات هواي صدكي هسه لو نروح للشيوخ
تتشرف تناسبنا
بس هو اعمى مدري شعاجبه بهاي الزركه
ولله قحط نسوان
امي.. وهسه خيه انعلي الشيطان وخلي غفران ترجع وياي
خالتي.. كلمه وماكو الها ثاني اطلكون غفران وكل وحده بتها عدها
عمي كان كاعد وساكت
امي.. انت خويه ابو علي ترضا بهذا الحجي
عمي...بتج الي كعدت كبالي وكالت مااريد علي هاي البنيه
مامربايه وماتعرف الأصول
وين اكو بنيه هيج بنيه جسره وماتستحي
كبل البنات على شور اهلهن يكولون موتي تموت
عيشي تعيش
اني مااريدها جنه بيتي بس علي رايدها
مثل ماكالت اختج كل وحده عدها بتها
امي...بس حسن وغفران مالهم علاقه وبينهم ولد وحامل
عمي.. شنو قابل نتعاجز منها لو من جهالها هاي الغرفه فرغت تكعد بيها هي وجهاله واني اتكفل بعيشتهم
امي. ياخويه العن الشيطان
عمي...اني لاعن الشيطان واحجي بمالات الله
بس انتم من صار عدكم بيت واحوالكم تغيرت شفتو نفسكم علينا
ترا احنا نفس الاصل والي غناكم اليوم باجر يغنينا
امي كامت اتريد تطلع
عمي صاح وراها
عمي....من بجي حسن خلي يطلك بدون مشاكل
جمانه السعيدي
طبعا هذا الكلام كان خطه بينهم وكدرو يقنعون امي
بطريقة تمثيلهم العبقريه
لان يعرفون هي الوحيده الي تكدر تمشي كلامها عليه
اجت امي عصبيه ومتخبله من كلامهم
عيونها بكصتها
امي...ولج سعيده ام المصايب عمج يكول انطلك غفران
تردين تحرميني من جهال حسن
تموتين تعيشين تاخذين علي
سعاد...سكتت ماكدرت ارد عليه امي تفكر بس بسعادة حسن اما اني طز شنو يعني ازوج واحد مااريده
رغم امي لازم تكون أكثر وحده حاسه بيا
لان هي سابقا مرت بهيج تجربه ضالمه
ثاني يوم نزل حسن بس دخل الغرفته ومالكه غفران ولا ابنه طلع مستغرب
حسن...وين غفران ووين علاوي
امي...بيت اهله
حسن...بيت اهله شسوي هي تعرف اني اليوم انزل
شلون راحت بيت اهله
امي...اسبح وتغدا ورتاح وبعدين روح جيبه
حسن...اني اروح اجيبه ليش هي ماترجع اليوم
امي...غفران زعلانه
حسن...زعلانه منو زعله
امي...ابوها وامها اجو على سعاد وكالتلهم مااريد علي
طلعو زعلانين وهي زعلت على زعل اهله
محد مزعلها ولا مار بيها
حسن....وليش حضرت سعاد ماتقبل بعلي احنا من وعينا للدنيا واني اليه غفران وسعاد العلي
يعني مو شغله جديده عليه هي تعرف من زمان هي محجوزه العلي
امي...اني حجيت وياها ماادري شبيها متخبله علينا
حسن....وينها ست سعاد سعاد سعاد
سعاد...اجيت بس كلش خايفه اذا امي وحسن تحالفو عليه
مراح اكدرلهم
سعاد...نعم
حسن...نعمله عليج شنو جنابج ماتردين علي
سعاد...سكتت
حسن...اني رايح اجيب غفران واتفق وياا عمي على يوم الخطبه ونفس مااسمع منج فهمتي لو لا
سعاد....شنو ماتسمع نفس انت اختاريت غفران باراتك
تحبه وتريدها هاي حياتك محد ادخل بيه
واني هم اربد اختار حياتي اني مااريد علي هي كوه
بلغصب يعني مااريده
حسن...ولله والسانج يلعلع اشوف بلغصب ومو بكيغج
تاخذي وانتي الممنونه
سعاد...حرام عليك ليش تريد تدمر حياتي
طفر حسن من مكانه وفتح حزام البنطرون بوكته حزام عسكري اسمه نطاق وكام يضربني من الجهه الي بيها الحديده
بس ضربني عطت بصوت عالي
على صوتي نزل محمود من فوك بسرعه
وكف بيني وبينه اكثر الضربات وكعن بمحمود
جمانه السعيدي
محمود...كافي ليش تضربها حرام عليك ترا كلشي بلضرب
إلى الزواج لازم يكون بلاتفاق
حسن...معليك انت لا تدخل هاي طالعه عينها ومحتاجه تربيه من جديد عوفني اني اربيها
بقا يحاول يضربني ويسحبني من شعري
وكف اخوي الزغير وامي ومحمود كوه يله سكت
باوعت ايدي مجروحه من الضرب
ومحمود وجها مجروح ويجيري دم
لزم خاصرته يمكن حسن ضربا بيها
من هدء حسن شويه
محمود...انت ليش عصبي
حسن...شوفها شلون واكفه وترادد
محمود...ماتريده ليش انت مكبر الموضوع ماتريده
ترا موغصب
حسن...رجاء انت لاتدخل الموضوع مايخصك احنا عائله
بينا ونتفاهم
انت خطار لا تدخل بخصوصياتنه
محمود...شكرا هذا تقديري بعينك جنت اضن اني اخوك
راسا محمود صعد فوك وبعد مانزل
حسن دخل سبح وطلع البيت عمي حتى ماتغدا
دخل عليهم لكاعمي كاعد بلغرفه
وخالتي انطت أوامر الغفران ماتطلع حتى يبحكون الخطه زين ويطيرون عقل حسن
سلم حسن وكعد
حسن...وين غفران اربد اشوف علاوي
عمي....بعد غفران انساها
حسن...ليش
عمي....اختك عدك وبتي عدي مثل مادخلنا بلمعروف
نطلع بلمعروف طلك غفران بدون مشاكل
اني مااريد أخذها للمحمكه وارفع عليك قضيه عيب
كدام العالم تبقى انت نسيبي وابن اخوي
حسن...ليش عمي اني قصرت وياها بشي
عمي....انتم ماتتشرفون بنسبنا وماتقبلون سعاد تاخذ علي
احنا نريد نخلصكم من هذا النسب
وكلمن يروح بحاله
حسن....منو كال مانتشرف بنسبكم
عمي...اختك كعدت كدامي وكالت مااريد علي
بروح ابوك علي شبي شنو ناقصه
حسن....علي اخوي واتشرف بي شوف يايوم بناسبك
تجون بي خطابه
اني اخلي سعاد تعتذر وتجي تحب ايدك
شنو سعاد بكيفها ولله افصم راسها عن جسمها
احنا أهل وماتفرقنا النسوان انشاء الله
عمي... هااا كون عرفتم غلطكم خليه الخطبه بوم الخميس والخميس الي ورا العرس
كون عدكم طلبات بعد عمك ترا انت تعرف الوضع
انتم جهزوها واني هم مااقصر وياكم
ترا بت اخوي يعني بتي
