رواية بيت جدي الفصل التاسع بقلم جمانه السعيدي
علي....زعلت على امي وكمت مااكعد وياهم للاكل
والكلام بينا كلش قليل
هي تكره عمي اني ونرجس شنو علاقتنا
فات شهرين على المشكله بينا
خلال شهرين اني رحت اتلث مرات البيت عمي
اشتريت عكازات العمي حتى يكدر يطلع من البيت
الكعده بلبيت كسرته تكسير
كل مره اروح عليهم تكعد نرجس وياي ونبقى نحجي
نرجس...ليش امك تكرهني هي حتى ما شايفتني
علي...مو تكرهج تكره عمي قبل جان اكو خلافات بينهم
ابوج حتى ضرب امي وخيطو راسها
خلاف من جانو بيت جدي
نرجس...بس اني مالي علاقه اني اصلا ماجنت موجوده من صار الخلاف
علي...اصبري لازم تغير رائيها اني اعرف هي شكد تحبني ومتعلقه بيه
واني كتلها لو نرجس لوماازوج
نرجس...انشاء الله رب العالمين يهديها علينا
علي...انشاء الله
جمانه السعيدي
بيت عمي كمل خلال سبع اشهر بس بناء طابق واحد
اتصلت على عمي يحضرون غراضهم حتى نجيب سيارتنا
ونجي نحمل الغراض بيتهم
عمي عرض بيته للبيع جابله ١٤ مليون
اتصل عليه وحددنا يوم نروح نحمل غراض بيتهم
ولو هي غراض كلها قديمه
بس الأشياء الي معتزين بيها نجيبها
اخذت اني سياره وولد سايق يشتغل عندي سياره
ورحنا حملنا الغراض واجينا
نزلنا الغراض بيتهم
البنات وامهم بدن يرتبن البيت
واني رحت جبت مسواك واجيتهم
بيت عمي عماد وبيت اسعد راحو حتى يساعدوهم
بلبيت الا امي بعدها على زعلها
عمي اسعد جابلهم بلازما هديه
عمي.عماد....جابلهم ثلاجه هديه
اني جبتلهم طباخ وكاونتر
عمتي سهام...جابلتهم غساله هديه
وهيج صار اثاث بيتهم كله جديد والقديم كله
بعنا على ابو العتيك
بعد اسبوعين امي راحت البيت عمو عماد
والحديث كان كله على بيت عمي صلاح شلون زوجته
حبابه وبت اصول وشلون بناته حلوات ومؤدبات
وخاصه نرجس الكل يحجي بشطارتها وجمالها
عمامي يعرفون اني اريد نرجس يعني حاجزها
عمي اسعد خطب نور الابنه اسامه
كل العوائل كامت تحجي بهاي الخطبه
امي صار عدها نوع من الاقتناع من شافت عمي اسعد خطب نور بس بعدها تكابر
امي....اريد ازوجك
علي...نرجس اي اي وحده غيرها لا
امي...اكو خوش بنيه مؤدبه معلمه كلش عاجبتني
علي....شكرا اني مااريد ازوج
امي...انت شعاجبك من ذوله العرب
علي...بيت عمي زينتهم اليه وشينتهم عليه
سكتت امي بس كنت احسها عدها نوع من القناعه
يعني ما متشنجه مثل قبل عدها مرونه
اما اني كل يوم بليل اروح البيت عمي صلاح بعد صارو قريبين علينا
اجتمعنا بيت عمي صلاح اني وعمي اسعد وعمي عماد
علي...اني اريد افتح مشروع العمي صلاح شنو رائيكم
صلاح...اي ولله الله وايدك ضجت من كعدت البيت
ومااريد اصرف فلوس البيت الي بعته بغداد
علي...راح نبني محل هنا بلحديقه واجيلك مسواك حلويات ومنظفات وبقوليات وارصده
اني راح اشرف على بناء المحل من يكمل انجيب
ثلاجه ومجمده نخليهن بلمحل
اسعد.. اي ولله خوش شغله مابيها تعب
عماد...الف رحمه على والديك
جمانه السعيدي
من ثاني يوم طلعت عمال حتى يحفرون الاساس
واني فوك راسهم شهر وكمل المحل من كلشي
حتى الكهربائية طلعت نجار رتب الرفوف
وجبتله بضاعه من كلشي
فرحت عمي صلاح ابد ما تنوصف هم رجع بين اهلها
وهم صار عنده شغل مريح وهم إخوانه راح ياخذون بناته
نرجس تكول ابوي يكعد الفجر يفتح المحل ويرش الباب ماي
شكد فرحان بهاي الشغله
جمانه السعيدي
علي.. تعبت واني انتضر امي توافق على هاي الزواجه
تسع اشهر صار واني منتظره توافق حتى ازوج
قررنا اني وسحر نسوي خطه حتى نجبر امي توافق
امي...وين اخوج ليش ما يجي يتغده
سحر...زعلان يكول مااريد
امي...ليش
سحر...تحدد موعد زواج اسامه وهو منتظرج توافقين
امي...يبقى بلا زواج احسن ماياخذ بت صلاح
سحر...يمه انت ليش تعاقبين علي بفعل عمي انت مجاي تعاقبين عمي ترا البنيه حيل حلوه والف واحد يتمناها
وبيت عمي عماد يكولون شاطره ونظيفه
امي.. مااريدها بت صلاح مااريدها
سحر...راح تخسرين علي يهون عليج علاوي زعلان
بعدين هي شنو ذنبها تحكمين عليها
امي...مااريدها لان من ريحة صلاح
سحر ...بكيفج ضلي تعاندين منا لمن تخسرين ابنج
هسه يمل ويروح يزوجها بعيد عنج
وهيج تشمت امة محمد كلها بيج مادام هو مصمم عليها
خلي ياخذها واشرطي عليهم عمي لايدخل بيتنا ولا يوصل
علي...سحر كدرت اتأثر على امي بنسبة ١٠٠/٥٠
بوقت العشى هم مااكلت وياهن طبعا اني اكل برا
واجي للبيت اسوي نفسي كاطع الاكل
اجت امي عليه للغرفه
امي..تعال اتعشى
علي....حجيت بزعل مااريد
عافتني وطلعت ثاني يوم نفس الشي اتغديت برا
واجيت دخلت غرفتي وقفلتها عليه جمانه السعيدي
دكت الباب امي مارديت عليها
امي...يمه علاوي تعال تغده علاوي مو احجي وياك
تعال اتغده
علي..مارديت عليها اريدها تحس بلذنب بلكت تقبل
اربع ايام اجي من برا ادخل واقفل الباب عليه واسوي نفسي زعلان
اليوم الخامس...
امي....علي تعال اكل ويانه اشتاقيتلك هليام مااحجي وياك
علي...مارديت عليها
امي...اني موافقه تسمعني موافقه تزوج نرجس
بس عندي شروط
علي...فتحت الباب شنو شروطج
دخلت امي بغرفتي كعدت على الجربايه
امي....اولا صلاح مايدخل بيتنا ولا اشوفه ولا يشوفني
علي....يييييمه
امي...اسمع لا تقاطعني اكمل كلامي واذا ماعاجبك ابقى زعلان ماكو زواج
علي...اي وبعدين
امي....اهلها كلهم مااريد اشوفهم بيتي لا امها ولا خواتها
اذا تريد تشوفهم تروح الهم للبيت
كلمتي بهذا البيت الاولى والاخيره
اذا عاجبك روح اخطب اخذ عمامك وخواتك يرحن وياك
اني ماادخل بيت صلاح
علي...دنكت بست ايد امي الله يحفظج اليه
اتصلت على عمامي ورحنا اني وياهم اتفقنا على كل التفاصيل
للامانه عمي ماقبل ياخذ مهر يكول انت صرفت هواي على البيت وهاي الفلوس مهر نرجس
بس اني ماقبلت اني عندي خير من الله
واريد نرجس تشتري اي شي يعجبها
حددنا يوم المهر اجن وياي خواتي اتلاثتهن ونسوان عمامي
اعرف هذا اليوم مهم بلنسبه الامي بس ما قبلت تجي وياي
حددنا يوم العرس عرسي كان حلو بشكل مو معقول
عمامي وولد عمي جانو واكفلي وكفه
وعروستي احلى العرايس
طبعا خاله غفران مااجت ويانا بلزفه لان سمعت امي تكول
مااريد احد من اهلها يدخل بيتنا
امي وصلتلهم خبر عن طريق بيت عمي
والناس مااعترضو لان جانو شاريني
نرجس حيل ضاجت كامت تبجي لان امها مااجت وياها
جمانه السعيدي
وصلنا للبيت امي من شافت نرجس تفاجئت بيها
اول مادخلت نرجس حظنت امي وباست ايدها
امي غمزلتي اشرتلي حلوووه
من اول يوم زواج النا ونرجس تحاول ترضي امي بكل طريقه وخاصه بعد ماازوجت سحر
نرجس شالت البيت شيل تركض كل النهار حتى امي ترضا عليها
امي بدت تحب نرجس وتعاملها مثل سحر
تحمد بيها بس مو كدامها من نكعد اني وياها
تكول كلش خوش بنيه نادره وحبابه
طبعا اني اوصللها الكلام أكلها امي معجبه بيج
نرجس....اني هم احبها قبل من تحجيلي عنها اتوقع عصبيه
او صاحبت مشاكل بس ولله كلبها طيب
وحنينه عليه وعلى جهالي
عمي صلاح دوم مادخل بيتنا
بس غفران امي عزمتها هي والبنات على غده
واجت بيتنا مره وحده
اسامه ازوج نور حفلتهم كلش حلوه
ازوجنا سنة ٢٠١٩ الحد هاي اللحظه عمي مايدخل بيتنا
يشتغل بلمحل مالته وأموره الماديه تمام
صار عندي ولد ثنيين والسنه صارت عندي بنيه
حلوه تشبه امها
امي طايره باحفادها ميته عليهم ما تقبل اي احد يقرب عليهم
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
