رواية نقش بارد (الخاتمه) بقلم فدك فاطمه

#نقش_بارد || باللهجة العراقية 

#الخـــاتمة

#FADK_F27

                                    

                                                    

﷽

نقـــــــش بــــــــارد

التصويت و التعليــق بيــن 

الفقرات لطفاً 

أتمنـــى لكـم قراءة ممتعــة 🌼💛

.

.

ماريد احد غيرج 

اريدج انتِ

لو يحطون الدنيه كلها بـ أدية

اختارج انتِ .

.

رفـــا 

نزلت من السيارة متوجهة لبيت أهلي كل ما اشوف المشتمل الفوك اتحسر هسة لو گاعدين بي أحنة

بس استاذ صفوان مايرضى يگول تسويني گعيدي 

دخلت البيت يصوفر محد بيه بس صفاء نايم جفي

على وجـهة الموبايل بيدة حـركتة برجلي اشوف طافي خارج التغطية ندسـتة مايتحرك خوفني لو ما 

اشوفة يتنفس جان گلت اسم الله ميت هسة تطلع 

أمي مأمنتة على البيت هل مخلية البيبان مفتحة

اخذت موبايلي خابرت صفوان عرفت جَود عندة ما يراسلني من ياخذة الة يخليني ارجع و اعوف الخط 

نوب اطگهة مشي للبيت بالظهرية الة اخنگة بس اوصـل ،دفعت رجل صـفاء متنرفزة فز مخـروع 

مسح وجهة يباوعلي خفت طگيتهة ركضنة اريد بس البس الجركز و اشرد على ما صحصح گدرت افلت 

مالحگ بية عدلت مشيتي بالشارع لبست جنطتي  

وگفت بالـزاوية بسـد البيوت البـس الجركز جان مـگلوب كل رجل لابسه عـكس مالتـهة ،بهتت من شفـتة مر مني طلع راجع يلبـس نعالة اديه بجيوبة 

اشرلي امشي بدون مايباوعلي تحركت رايحة وراه ضامة ضحكتي على شكل رجلة لابس شحاطة امي

البيضة و طالع نص من رجلة جواريبة زرگ يضحك

صورتة دزيت الصورة لوتين حتى تگول أبنة خوش أبن حتى لو اختة متزوجة يوصلها لبيتهة ما يعوفها

امشي و اكتبلهة شلون صفاء جابني و وصلني للبيت

اول ما دخلـت ادور بعيـوني على صفـوان واكـف بالحـوش يريد يسوي البواري مال التانكي مدنگ منطيني ظهرة دخـل صفاء وراي سـد الباب حيل 

حجة صفوان بدون ما يلتفت:القنـــاديل القناديل تضوي القناديل 

عضيت شفتي خجلانة و صفاء يأشرلي اسكت رجع 

صفوان يحجي و يدور على الصبانة بالجنطة ملتهي

صفوان :بجيتج يانور العين تضوي القناديل 

حجة صفاء بصوت عالي:هااا لگ گ***"

فز يباوع مصدوم حجة من استوعب:انعل ابوك لابو منين ماطلعت قندرة المن جايني

شمر عليه الدرنفيس وخرت عنهم اضحك دخلت للبيت مستغربة ماكو صوت لجود بس لا شامرة الحمدلله لگيتة نايم من گد ما اغيب بالدوام تعود على ريحة امي و ريحة ابوه يغفى بحضنهم اكثر مني

گعدت بصفة اشم بمخدتة خاف افززة گوة صبرت ما أبوسة شكد اضوج من اعوفة هيج بس ما اتحمل گعدة البيت متعودة على الدوام هم شايلة مصرف هواي احسن ما اشمر المسؤولية كلهة على صفوان

                                            

                                              

                                                    

رغم هو ماعندة مشـكلة قبلها فتـح وياي موضـوع اتـرك التـدريس بس مستحيل هذا تعبي الدنيا الله اعلم شيصير بيها باجـر عگبة غيري يتمنـى مـكاني هواي مدرسات عدهن اطفال باقيات شدعوة علية

طلعت ملابس بدلت غسلت وجهي مشيت للمطبخ 

اسوي غدة فتحت الثلاجة لگيت صياني مسلفنة 

ما دام بداية الشهر صفوان يصير كريم بالطلبيات دخل يمر بعد يومين يگعدنة على الحديدة مُبذر

طلعتهن احميهن بالفرن مشيت للاستقبال لشوفهم

گاعدين صفوان عدة البوري يشد بي يسويلة عكس

و صفاء ماخذ راحتة مدد لازم الموبايل يگلب بيه

رفا:صفاء البيت ضل تايه

رد بدون اهتمام:شبي هو بس قنينة مال غاز

رفا:جا القنينة شوية صدك تحجي 

صفاء:أمان أمان انتِ بالعراق العظيم 

صفوان: عود من تنباگون روح توسل بالعراق العظيم خل يرجعلك اياهن

رفا:امي هسة تسوي بيك فلك 

اشرلي بيدة امشي ما يهمة عفتة العلية سويتة صبيت الغدة گعدنة تلاثتنة ناكل صفاء كل شوية مقلد علينة و يغني مثل صفوان و يعيب على صوتة

صح صوتة مو حلو بس اني عاجبني شلون يستقبلني

رفا: صفاء نرجع نخطبلك احس لازم تتزوج

صفوان:اتزوج الزواج كلش حلو

صفاء:اي حلو من شفتك بقاط العرس لليوم جيوبك فارغة و تغني للهوة مفلستك المرة

رفا:أنيييي غير عندي راتب لا تتبلة علية

رد يباوع لصفوان بشك:جا عليمن مخلص فلوسك

صفوان:على خالتي 

صفاء:نجببب الة أمي ماتجيبهة بالطاري

صفوان:ياهوو لينجب

رفا: أنيييي علية يقصد علية

حجة يأشر بأيدة:لا مو عليج عليه

رفا:اعوذ بالله استغفر الله الله اكبر 

صفاء:على رفا شوفهة شلون گامت تأذن 

رفا:احمم اكلو مايصير الاكل على الحجي 

دنگت اريد اخـذ الخبزة ماحـس غير الـماي نـرش بوجهي و صفاء يضحك لعب روحي طلع الماي من حلگة نكتت ايدي گمت زعلانة صاحو وراي ما قلدت

مشيت يم جود اسمعة يناغي گعدت يمة العب وياه

شوية گامو يصيحون يردون چاي ماگمت تعبانة راح

صفاء هو يسوي و جابلي كوب وياه اخذتة من ايدة

اباوع للكوب حجيت بشك:شنو خليت

رد مستغرب:كلشي ماخليت شبيج

رفا: عبالي خبثت

هز ايدة و مشة أول كمعة شربتها احتاريت بيه مالح

يشحط شحط نزلت جود رحت للمغسلة بديت الجاي اباوعلة بضوجة هو بالاستقبال يضحك شكد

سخيف حتى من تزوجت ما خلصت من خباثتة الغبي

اخذلة شوية اخذ ثارة لان فززتة و مشة لبيتنة خابرتة

أمي من بعيد اسمع صوتها تصيح عليه عايف البيت 

طـلع و سـديت الباب وراه هو يتـلفت خايـف اطگـة

حجيت اباوع لصفوان:ما طلع تأسيس صارلك من الصبح تسوي بي 

صفوان:مايصير شسويلة انفخ عليه 

رفا:جا شلون سواه صديقك نفخ عليه مو هو أسسهن

صفوان:اهووو امشي وخري منا 

                                            

                                              

                                                    

هزيت ليدي گعدت بالاستقبال اسمعة يخابر بدلهم

هو يشرحلة شلون يأسس مايعرف يجيبهة منا تطيح

منا اخر شي طگت روحة سداه بوجهة وطشر الغراض

ضحكت عليه مشيت وراه للغرفة راح بدل تراكة تمدد بصف جود اخذ لعايبة منة و شالة خلاه بحضنة گعدت بصفة العب بالمدالية مالت موبايلي

رفا:صفصف 

رد يبوس جود:لا

رفا:هسة اني حجيت عرفت شأريد گبل رفضت

صفوان:گبل لا اعرف أكلج لا

رفا:اريد اسوي فلر

رفع عينة الي يباوع لوجهي حجة:تلعبين

رفا:اليوم زميلتي مسوية يخبل اسوي بسيط

صفوان:تسوين منا تولين لهلج مناك

رفا:ليشش حلگي لو حلگك

صفوان:دمشي منا لا الطمج على حلگج 

عبست بضوجة صار أسبوع الح مايرضى اسوي كلش

عاجبني مادري هيجداخل مخي معشعشة الفكرة

جريت ارادنة اريدة ينتبه علية حتى احجي وياه عدل

رفا:صفصف

صفوان:راح يجيج طراگ يعمي عينج

رفا:تجربة بس اني ادفع 

صفوان:هي على الفلوس لو على خلقتج الراح تخرب دوخري منا بطلي نكد و لحيح

عندت بالزايد دخل يجي الراتب الة اسوي ضل مركز

علية سويت روحي مامهتمة نزل جود بمكانة و گام

رجعت ليورة اتعثر:هااا ها شعدك

حجة يطكطك اصابعة:طبختيها براسج

رفا:لاا

صفوان:أحلفي

رفا:لهدرجة ماتصدگ بية 

حجة بتهديد:باعي رفيفة اذا اجتني البراطم طافرة يگول حلگ بعير ياويلج مني لا توصلين للبيت 

رفا:خوش ما أسوي شسالفة لو اريد سويت بدون ما أكلك بس احترمت رأيك يعني و سألتك

صفوان:ترة حذرتج لاتگولين بعدين ماگتلي

هزيت راسـي بفهم اخذت مخـدتي رحت تمـددت اراسـل بمامـا بلكي تقنع و تقـنعة طلـعت اعند منة شبعت رزايل و حـجي خلتني اطنگر سديت المحادثة 

رحت اگلب بالانـستا نوب على حضي كلة فلر يـطلع 

صفوان:وين شردتي ام الفلر

رفا:بعدني مامسوية حضر اللقابك من اسوي

صفوان:تصيرين وكتها طليقتي

رفا:الله يذكر ذيج الايام

صفوان:ياهي أيام زواجنة

التفت الة اضحك شلت المخدة شمرتها عليه لزمهة

گمت رايحة يمة امثل الزعل رغم هيج ما أهتم بية

حضن خدي حجة بهدوء: رفرف ما أمنعج عناد بيج لو بخل بس السالفة بنظري نشاز و أنتِ الحمدالله ماناقصج شي ليش تخربين خلقتج 

رفا:مادري بنفسي اسوي 

صفوان: نفسج دنية عوفي سوالف التجميل احمدي ربج عدج حلقة عدلة ينطلع بيها

رفا:هسة انتة تنصحني لو تتنمر علية 

صفوان:انصحج حبيبتي 

رفا:اي مبين غرگتني بالنصايح

لف أيـدة على رگبـتي خانگني عطـت متوجعـة من شـقاه شكد قاسـي ضليت اطگ بي بهذلنـي دفعـت ايـدة اخذت المخدة اريد اخنگة لزم أدية عضـاهن 

                                            

                                              

                                                    

دفعتة اضحك فحطانة تمددت بصفة جود صافن علينة حتى ساكت ما يطلع صوت تقربت يمة الاعبة

حجة صفوان يباوع لرگبتي:عورتج

رفا:اي غير شقاكك مدري شلونة عبالك زلمة 

و تتلاوة وياه

صفوان:ماحس على روحي انتِ تنجلبين هم ترفعين ايدج 

رفا: ولا مرة خليت الحگ على روحك لازم أني غلطانة

صفوان:الغلطان يعرف روحة

مديت أيدي گرصتة بزرة عاط متوجع ضحكت اشرد

مالزكني و جود گام يبجي من صوتنة طلعت من الغرفة اضحك خايفة يكتلني ما اطلع من ايدة بعد

رفا:راح اعزم اهلي على العشة

صفوان: اني اعلمج

رديت اضحك:ترة ماتوجع 

شمر موبايلي علية راحت روحي گوة لزمتة حجيت بضوجة:لو مكسور انتة تخسرة 

صفوان: انطيج موبايلي و آخذة 

رفا:ايع اخذ موبايلك الهواوي بس تنفخ عليه تنكسر الشاشة تحسة صانعينة بس حتى ينكسر

صفوان: ضلي هناك بالاستقبال 

رفا:اضل ليش لا 

صفوان:تعاي اخذي أبنج

رديت اتماوع:ما

عفتة مشيت للاستقبال نمت هناك منعسة وراسي دايخ ما گعدت بس على صوت أمي رفعت الغطة

لگيتهم كلهم بالاستقبال كاعدين ضليت فاكة حلگي

لميت شعري رحت غسلت رجعت سلمت عليهم كل ما ارفع عيني اخزر صفوان الي سوة روحة مايشوف

رزلتني امي لان نايمة للغروب و عافية أبني اليوم كلة

شوية و أذن صلينة و اني افتر منتظرة العشة لحد ما وصل طلع جاباه دخل للمطبخ لو ما أمي يمي الة اكتلة على هاي الدگة الناقصة السواهة شكد خبيث 

حجة صفاء اول ما كعد على السفرة :منيتي انعزم على أكل بيت من اجيكم

صفوان:هو انتة يومية يمنة شلك بهل الجذبة

رفا:مو تغدين هنا

صفاء: مانين علية هاكم الخبزة ماريدهة نطوني الصمونة

ضحكت انطيه الصمون سولفت لأمي عليه لان يطگ

و مايحترمني ولا ردت علية ملتهية بجود مخليتة بحضنهة شكد تحبة يجوز حتى اكثر من يمنة مدري على محبتي مدري على محبة صفوان تموت عليه 

خلصنة عشة ضلو يمنة متـعودين كل خمـيس لو نعزمهم لو يعـزمونة مرات بس نـروح نشـرب جـاي يمـهم بس طلعو رفعت رداني بديت انظف بالبيت

طگ ظهري تمنيت روحي عمة و عندي جناين ولا اجلف وحدي الله يمتة اصير هيج و اكعد و استريح

اخذت ملابسي فتت للحمام على ما طلعت ماينسمع

بس صوت جود يبجي استخطي اني مهملة وياه حيل

ماعرف اوازن وقتي و مسؤلياتي لو اهتم لو أهمل

شلتة ابوسة حاضنتة على گلبي و اكفة بالمطبخ اسوي بالممة فات مني صفوان طلع برة باوعتلة من الشباك ماعرف منو الي بالباب دكاه شوية رجع مستعجل مشيت للغرفة اسألة مستغربة هو يبدل 

                                            

                                              

                                                    

صفوان:جيرانة مرتة متعارضة يريد سيارة وين المحفظة 

رفا:هناك بالجرار شبيهة مرتة

صفوان:شدراني

اخذ محفظتة و طلع تأخر هواي نومت جود اتصلت بيه رفضة ضليت گاعدة بالحوش بيدي موبايلي اقرة 

روايات اگضي وكت بس شوية و اطفر ماحب الطوال

رفعت راسي من نفتح الباب دخل سداه وراه حجيت اول ما وصلني:ها بشر شبيهة المرة

التفت ليورة رجع حجة يهز بيدة:عدهة قلب و توفت نوب رجلها كض الدكتور و كتلة 

رفا:ياا الله يرحمها جا دكتور شعليه 

صفوان:اندري هو رجلها مطي مريضة ماخذهة للمضمد طاگينها بأبرة رجعت للمستشفى منتهية 

رفا:دتعال ادخل لانوب يكتلونك هم 

صفوان: عفتة هناك رجعت حتى كروتة ماريدها 

ضحكت احضن خصرة دخلنة للبيت قفلت الباب شوية طلع راح يدخل السيارة خاف عليهة ضليت اضحك عليه دخلهة للحوش و غطاهة قفل البيبان 

رفا:انتة شعليك فوك ما توصلهم

صفوان:أكلج مسودن ماخلة واحد ماكتلة 

رفا: الحمدلله و الشكر اذا همة ما مهتمين بصحتها الدكاترة شعليهم والله عقليات

همهم وگف يم الباب حاصرني بينة و بين جسمة دنگ لطولي حجة : مرات الورد ماينزرع ينولد

ضميت شفتي امنع روحي أبتسم حضن خصري بثنين أديه قربني الة:ومدري ليش اتمايزك وردة گرنفل اتيه روحي بريحتك واحتار من ياصفحه اشمك 

ماكدرت اضم ضحكتي من اخجل اضحك اريد احجي بس ماكدر ضميت راسي بحضنة بوسني برگبتي يشيلني رفعت راسي حضن خدي يبوسني و يتقرب 

ضلينة سهرانين الليل كلة بين غزل صفوان و سوالفة

الحلوة ماكدرت أنام متمددة بحضنة ومبتسمة رغم 

كلشي بي احساسي وياه حلو لان حب طفولتي الة طعم كل مرة استرجع كل الذكريات وياه من البداية

گعدت الصبح وحدي هو طالع يشتغل خلصت اليوم

كلة حاضنة جود ماعرف شلون اعوضة غيابي صح بعدة صغير بس مبين هو ما متعلق بية هواي شكد انقهر لان اعوفة امي اقترحت اخذة وياي بس ماگدر

لحد الظهر اجة أشرلي ادخل جوة دخلت اباوع من الشباك وياه دلهم عبست لان ما جايب غنوة كل مرة 

يسونهة يجون بدون ماندري بيهم حتى خاف نجلب

خو صفوان ماتحلى روحاتة الة واني بالدوام حتى ما اروح وياه يگلي جرجرة گوة تطلعين منهم و غنوة حجايتين رجلها يضحك عليها ما تجي الغبية ولا تلح

فتح الباب باوعتلة معبسة حجة يبرر:وداعتج تصادفنة بالسوك

رفا:يا سبحان الله

صفوان:بيش احلفلج و تصدگين

رفا:لا تعب روحك ما أصدك

صفوان:مسوية غدة صبيلنة وخلي الچاي على النار

نطيتة أبنة شالة اخذاه للاستقبال حجة يسد الباب:اجة نسيبك الوحيد گوم سلم عليه

وصلتني الفـشورة واني بالمطـبخ خلة أذني تـصفر رحت صبيتلهم الغدة بس خلصو المـواعين بعدهة يمهم و صاحو على جاي اصـب و اراسل بغنوة هي تـحجي على رجلـي و أني احجي على رجلهة 

                                            

                                              

                                                    

اجة صفوان اشرتلة على الميز اخذ الصينية وگف يمي ضميت الموبايل حجة :ليش تفشرين علية

رفا:يمة وين شفتها

صفوان:اني اعلمج

باوعتلة بدون اهتمـام ما خايفـة دخـل ودة الجاي 

و طـلع الصـينية غلسـت الـمواعين ابـاوع للبـاب مستغربة منو يجينة بالظهرية طلع صفوان يشوف 

رجع حجة يأشرلي:هاي جيرانة تريدج

رفا:أني تريدني

صفوان:جا اني امشي شوفيها 

لبست شالي على ما سد باب الاستقبال طلعت مستغربة فتحت الباب اعرفهة هاي جيرانة واكفة تعدل بعباتها لابستهة بدون شال و رگبتها طالعة 

رفا:تفضلي عيني 

ردت تطگ بعلجها:زاد فضلج حبيبتي اذا ماتصير زحمة القنينة خلصت وعندي عجين ممكن اخبز يمكم

رفا: لا ماكو زحمة بس تعذريني والله ماعندي تنور

:ياا جا شلون تخبزين 

رفا: نشتري 

ردت عاوجة حلگهة:اي صج انتِ موضفة يالله عيني عذرينة 

رفا:ماصار شي هلة بيج

دارت وجهة رجعت لبيتهم صحت وراهة گتلهة انطيج قنينة غاز على ما تشترون حتى ما ردت علية غلست الغسل كون مو صوجج صوجي صرت مؤدبة

رجعت للمطبخ ادردم عليهة نوب اجاني صفوان من صفحة جاب ابنة خلاه يصرخ عفت المواعين رحت شلتة اسكتة همة طلعو برة الحمدلله اجة دلهم أسس الـماي ضـالين على الماطور و التـانكي ماكو 

فوك ما هو سوة التأسيس هم جاب فلوس لصفوان يطلبة مال القضية و مايرضى يعوفهن الة يوفي ضلو يتعاركون بالحوش شلون لساناتهم نظيفة ثنينهم

دخلت للغرفة احتاريت شنو اودي لغنوة لو ادري بي يجي اشتريلها مشيت بيدي الموبايل خابرت على وحدة جيرانة تبيع كلشي ماتنعرف هي شنو حتى أدوية عدها صحتها من الحايط اخذت منها قماش 

اريدها تعوفني ماكو كل شوية مطلعة شي نوب لطشت الة تاخذين شامبوات هنة مو زينات تالي يطيح شعر المرة ابتلي بيهن اخر شي اشتريت حنة 

مالگيت شي دوختني اخذت منها حَمر ترست العلاكة نزلت اركض لزمت صفوان نطيها الة جان توة طالع راح يلحگة تذكرت عندي كليجة فرغت بعلاگة و لحگتة للباب گام يشتم رجع اخذهن راح 

ليشوفة يگول رايح مشي صعد سيارتة لحگ دلهم

خابرتها من لا جارة عود اريدهن مفاجئة وهيج

حجيت اول ما ردت:دزيتلج كليجة خاف يشمر العلاگة رجلج 

غنوة:صدك ياهو لمسويهة انتِ لو أمج

رفا:أمي مسويتهة اني بحال كليجة 

غنوة:اي بعد احسن كليجتج ماتنوكل 

رفا:مو صوجج لا والله 

حجت بضحكة: اشاقة مشكورة خية 

رفا:تدللين دادة

غنوة:ما خليتي وياهن بطل ببسي 

رفا:هنة گوة خليتهن اركض وراهم ركض 

غنوة:دلهم گالي رايح اوفي واحد يطلبني تفاجئت بي يمكم لو ادري جان دزيتلج شي شياتين

                                            

                                              

                                                    

رفا:اوكفي خل الزملي يوم عطلة حتى ابات يمج

غنوة:ها تباتيين

رفا:اي ابات يومين اضل يمكم انام بغرفتج

غنوة:جا و دلهم 

عضيت شفتي لا اضحك حجيت بجدية:يروح شو وين يجوز اخذ اجازة هم اخلصها يمج

غنوة:هلة بيج احطج بعيوني 

رفا:تسلم عيونج ما أكلفج لاغدة ولا عشة كلة اطلبة من المطعم بس اكلفج فراش

غنوة:لا شنو شگالولج علية ماعرف اطبخ

رفا:عادي كلشي أكل المهم عدكم سبلت يشتغل

غنوة:اي عدنة

ضحكت عليها ماتريدني الجلبة گعدت بالغرفة اهز برجلي اريد أبني ينام گبل لا يرجع صفوان مايخلينة نرتاح لو يشغل السستم لو يلعب بوبجي مدري منو 

معلمة عليها و ابتليت على روحي و روح أهلي 

سديت الباب على كيف ورة ما غفى سويت روحي نايمة كل ابالي صفوان يرجع نوب ماكو فزيت بالاربعة اتصلت عليه اشوفة وينة دزالي صورة يم أهلـي هو و صـفاء و أحمد يلعبـون بوبجي هناك 

حجيت اطلع جنطتي:لعد ضلت علية راح اجيكم

صفوان:لا تجين

حجاهة و سد الخط مايفتح الرسائل لان يلعب عبست رحت سويت عشة أجاني ورة الصلاة بيدة ماعون سمبوسة و كباب عروگ و بطل لبن تعشينة بيهم وراهة كعدت اسوي كبة حتى اجمدها لباجر

سمعتة يصيحني رحت للغرفة:ها لاتگلي تريد چاي

صفوان:لا مو چاي ترحين لكربلاء 

حجيت مستغربة:شنسوي

صفوان:نشارك بمعركة الطف ، نزور جا شنسوي 

ضحكت گعدت يمة:متفاجئة منك غير 

رد يقلد صوتي:متفاجئة غير فوك ما اطلعج 

رفا:هسة اني شگلت ءء أكلك صفصف

صفوان: يروح 

رفا:منو 

صفوان:دلهم هو و مرتة گبل لا تحجين 

ضحكت مكيفة اخذت موبايلي همزين ما توسلت بي

خابرت غنوة طلعت الملعونة هي مخططة مسوية زعـلة و قانعة رجلـها ولا عرفتـها خوش تخـطط 

ما رحنة بسرعة على ما حصلت أجازة يوم الخميس مشيت لأهلي وديت جود و اغراضة يم أمي حارة هو ما يتحمل و صغير عليمن ابهذلة وياي طريق بعيد

بوستة اشمة لازمتة و اعتذر وصفاء من برة يگلي:عود أنتِ أم حتى أبنج مايعرفج شامرتة علينة

رفا:أگلك هو اني ضميري معذبني اسكت عني 

خاتون:عوفها وين مخليتة يم اهلة احنة اخوالة

و اعمامة 

رفا:فدوة لگلبج خاتونة وين اكو مثلج الله يخليج الي ولا اضل بيد ذولاك الناس 

صفاء: كافي كبرناج و درسناج بعد شتردين 

رفا:واجبك حبيبي 

صفاء:اني شعلية مخلفج و ناسيج واجب لخلفوج

خاتون:أنة جايبتكم علمود اختكم 

رفا:أسمع طول عمرك تضل شايل مسؤوليتي 

صفاء:تگعدون الصبح تلگوني مهاجر

رفا:وهجرتهم لمن هاجرو ماردو

صفاء:تسمعينها يمة

رفا: يمعود لاتزعل وراي روحة و طريق 

صفاء:تعاي بوسي أيدي

رفا:فدوة لله لو تموت اخليك بذمتي ولا ابوس ايدك

                                            

                                              

                                                    

بوست أمي و طگيتة على راسة لزم ايدي لواهة گمت اصرخ نزل احمد مفزوع خفت صفاء گالة كتلتهة 

رزل صفاء صعدت سلمت عليه و طلعت متفشلة

صفوان برة منتظرني رزلني لان تأخرت هو سلم 

و طلع واني جنت ادگ سوالف ما راضي ليش اعوف جود يريد ياخذة حتى يتعرف على غمزة ويحبها

غلست عنة عبالة احنة أتراك وينة وين التعارف همة زعاطيطنة مطفين اكثر منة جاب الطريق كلة ساكت

خايف يحجي نوب يطب بالحرام يضل يتغزل لو يشتغل اغاني اني اصور و انشر ستوريات و ريلزات

وصلنة لكربلاء العصر كلش خابر دلهم حتى يعرفة وينة همة جاينن بسيارة علي ماخذهة دلهم منة

اني لو عدي سيارة لأخوي ما انطيها مدري شلون همة يتبادلونهن گلوبهم باردة مرات حتى تندعم 

صفيت ويـة غنـوة نمشي سوة شلـت غمزة ابوسهة احبهـا هاي البنية تضـحكني و اكزكز عليهة نوب ملبسـتهة تعلاگة بيـضة وياهة برمـودة وردية فاتحة

مخلية حنة لرجليهة صايرات حمر و هي كلهة حمرة

رفا:لو تشوفهة أمي تگلج رجعيهة للبيت

غنوة:ديري بالج اجينة نبطل من ورة دلهم يريد يلبسهة بلوزة خلاني اشعوط من القهر 

رفا:حقة اگلج اذا خطبناهة لاتنطونهة ابنة مايستاهل هيج صاكة

ردت بضحكة: عبالج انطيهة الج تخنگونها بالمباوس

رفا:اي اني و رجلي و أبني

غنوة:لا عمي شنو الدنيا بس زواج اني اريد بنتي تدرس و تكون روحها 

رفا: الله يحفظها و تشوفينهة مرت جود

باوعتلي بطرف عينهة ما عاجبهة حجيت ابوس غمزة:يالله عمي اجيبلها غير جود

غنوة:لا تجيبين و لاتعبين هي مكرشة علة علي 

رفا:علي متزوج غير مرتة تكتلكم

غنوة:لا ولج علي أبن اخوي ذاك اليوم اجانة لو تشوفينهة ذبت روحها ذب عليه

ضحكت أكرص خدهة طلعت زاحفة مشينة مسافة 

اخذهة دلهم راحو للتفتيش احنة دخلنة لوحدنة غنوة جايبة جنطة بگد راسي ماخلن شي ما دورنة 

اول ما دخلنة بين الحرمين سوينالهم باي كل شوية يگلولنة لا تضيعن هو بس دلهم يوصي صفوان ولا يمي ولا جنة متعودة اجي لكربلاء ما اتيه بيها أبد

اخذت غنوة كل شوية تقرة اسم الباب خاف تضيع حجيت اسحبها:عوفي ولج مانضيع شمالنة

غنوة: اذا ضعت حتى ما ادور اگعد و ابجي

رفا:مشهودتلج 

غنوة: والله تيهت 

رفا:جا لو تجين بمحرم شلون حتى ما ندورج نزوج دلهم اسرع 

غنوة:بذمتكم

رفا:وياي كلهن مدرسات عزباوات اجيبلة وحدة

غنوة:حتى لو مايتزوج 

رفا:لعد شبيج راح تبجين

دفعتني بعبـسة لزمتهة خاف اتيهـة دخلـنة زرنة تفاجئت هاي اول مرة تدخل كربلاء حسيتها فصلت عني ولا تسمعني خليتها على راحتها زارت و صلت 

                                            

                                              

                                                    

فريتها الحضرة فر ماخليت مكان ما دخلتة الهة على ما اتصل علية صفوان طلعنة همة گاعدين بالصحن 

مشت هي لدلهم بنتها تبجي عليهة نعست وضاجت

حجيت اوگف يمة: نبات مو 

صفوان:امم كملتي لو ضليتي تحوسين بس هنا

رفا:لا والله بس هنا خلي نتعشة و نشوف فندق نستراح و وراهة نروح نزور أبو الفضل عليه السلام

صفوان:خوش تندلين انتِ احنة نروح للكهوة هنا

رفا:حتى هنا لاحگتني الكهوة روح عيني الله وياك

رد يگرص خدي:السباعية رفوفة

ابتسمت مشيت وياه گعدنة على جهة ناخذ صور فترة و گامو يدورون على فندق وصلنة من شفت غنوة شلون تعبت من بنتها حمدت الله ماجبت جود 

هي أحسن مني اني اتبهذل لا تضل عباة لايضل شي

خلينة اغراضنة وطلبنة اكل كل واحد لغرفتة احسن

گعدت صفوان يدور بالغرفة يگلي اكو كاميرات حتى سأل الولد ابو الفندق گالة ماكو هو بعدة مَصر 

كتلني الحر شغلت السبلت عليتة و شمرت الشال 

گوة قنعتة يجي يتعشة كملت گمت اغسل على ما خلص اخذ محفظتة نطاني فلوس و طلع رايح للگهوة اني اعرف المتزوجين يجون يگضون وكت 

قفلت الباب وراي مشيت يم غنوة گعدنة نطلع كل الكبت و السوالف لحد ما گعدت غمزة غسلتلها سحبت الجنطة طلعتلهة ملابس لبسنة عبينة طگينة الاحذية و طلعنة لازمة غنوة يگول بنتي مو صاحبتي

رحنة زرنة گعدنة شوية نصور بغمزة لو احنة سوة ننشر بموبايلاتنة رتبت الهة ستوري نشرتة اشوف منو عدهة بس دلهم و أبن اخوها و وتين شافوهن

وتين و شافت الستوري ابتلينة على روحنة تتصل على غنوة من موبايلهة و تتصل علية من جهاز امها

حجيت افتح خط عليها:شبيج ولج نجلبتي 

وتين:انتن جلبات ليش ماتگليلي وروح وياجن 

رفا:جا ماتدرين مو سيارة اخوج عد دلهم 

وتين: والله ما أدري شمالجن ما گلتلي 

رفا:متزوجين وين نحطج بيا غرفة

وتين:عمي انام بين الحرمين 

ضحكنة عليهة زعلانة فصلتة بوجهنة طفيت الجهاز

گومت غنوة طلعنة نتمشى راحة نفسية الشوارع تخبل يگول نهار مو ليل گعدنة يم المحلات ناكل 

بينة غمزة تلعب بدبدوب اشتريتة الهة تجعص بي

رفا:لو ما دوامي الة اضل بعد يومين

غنوة:اي والله تخبل اني شبية ما اجي هنا 

رفا: الله يكتبلج هواي زيارات لحد ما تشبعين

غنوة:أمين تدرين ولا تعبت مرتاحة كلش 

رفا:حلوة كربلاء حاولو تجون بين فترة و الثانية

غنوة:امم ان شاء الله

رفا:خل نروح بعد بيج حيل 

غنوة:اي بية بس خل اخابر دلهم اشو شمرني و مشة

رفا:دخليهم يمعودة ينكدون علينة خل نفتر نشوف الدنيا شبيها مابيها لاحگين على الزلم 

گومتهة ماخلينة مكان يعتب علينة همة يتصلون لان المفاتيح عدنة گعدنة يم العلقمي خابرت صفوان 

اجونة كل واحـد گالـب وجهة مـية گلبة طلـعو متعاركين وية جماعة هناك همزين ما ضلينة وياهم

                                            

                                              

                                                    

كل شوية اخابر أني على جود كل ما اشوف غمزة گلبي يگوم يرفرف عليه لو تدزلي صورتة لو تغلس 

ثاني يوم رحنة للنجف زرنة و بعد كل واحد راح وية عائلتة مشينة للمقبرة علمود ابوية و ابو صفوان 

لا احساس ولا ضمير بس قرينة سورة الفاتحة حتى ماكو بعيونة بجي لان جنة صغار من توفوا مانتذكر

رجعت امشي گدامة بالعكس وجهي عليه ظهري للشارع حجة يلزم ايدي : تدرين لو دفنتج هنا محد يلگاج بعد 

رفا: والله عبالي راح تگلي تدرين شكد احبج

صفوان: اختاري نگرة اذا تردين

رفا: والعباس خفت شجاك يمعود صدك جذب 

صفوان: كون واسعة و نفهة

لميت عباتي علية طگيتها ركضة الشارع فارغ دنيا الظهر حتى دفانة ماكو واني صريخي يفزز الموتة

اجة وراي يضحك دنگت اشمر عليه حجار ما گال باطل ركضني نص المگبرة فحطت السيارة ضلت ورانة عود رايحين ندور گبور عرف نشوفهم تالي هبطني گعدت على الرصيف اللهث بنص الترابة

حجة يدنگ علية:خوش حرية 

رفا:يمة گلبي وگف من الضحك 

گعد گبالي يضحك مسح وجهي بثنين أديه دموعي تارسة عيني من گد ما ضحكت و ركضت اول مرة اسوي هيج گومني راجعين مجلبة بيدة ماكدر امشي

رفا:تعبت گعدني هنا وروح جيب السيارة

صفوان:اخاف عليج 

رفا:اي صدگتك اشو بكربلاء حتى ما وصيتني

صفوان:مو ادري بيج سباعية هسة احنة وين

تلفتت حولي مضيعة: والله مادري غير اجينة مناك

صفوان: توبة اذا امشي وراج بعد

رفا:ترة ازعل و زعلي ثگيل

صفوان:يـــا عيـن الصگر بالزعـل من تحتد

رفا: ما تأثرت

صفوان:عيون الضوة عيونج لو تاه الگمر ليلة 

رديت ببتسامة:شگد تحبني

صفوان: مادري هواي 

رفا:تحبني لان مرتك لو لان اني رفا 

صفوان:احبج بالحلال و بالحرام 

ضحكت رفعت رجلية ابوس خدة حضن جتفي بيدة

هدوء صنتة و الشمس بنص روسنة تسمط سمط

رفا:بعد شگد تعبت شيلني 

صفوان:افضحينة عفية

رفا:ديالله جا المن مسوي عضلاتك 

صفوان: ادافع عنج ضد التحرش

رفا:منو ليتحرش بية عباتي تسحل وراي كلهة تراب

صفوان:اني اتحرش بيج خو ماتردين غيري ست 

رفا:يا عزة بعيني شمالني عمي تحرش اخذني فلاحة ملاجة الك عيوني الثنين

صفوان:هسة ابوسج بنص الگبور

رفا:تعال نلبد هناك 

صفوان:ها يمعودة سالمين

ضحكت اعدل عباتي ضليت اتحرش بي هو متحلف بية وصلنة للسيارة صعدت تعبانة اخذت ماي شربت حار يگول تيزاب گوة بلعتة طلعنة راجعين 

ضلينة هناك بالامام خابر دلهم گالة راجعين للبيت 

اجرنة فندق گعدت شامرة روحي على ظهر الجرباية گبال السبلت أبرد نزل هو اشترة العشة خفايف مقبلات و عصاير اكلت وطلعنة سوة افترينة بالسوك اشترينة شكم شغلة و هدايا أكثر شي ملابس لجود

                                            

                                              

                                                    

رجعت متكسرة غيرت ملابسي تلفلفت جوة الغطة 

اجة بصفي حجة يبوس خدي:أدري گمر خو ما گمر

رفا:مخلية مكياج

صفوان:لخدود موردة 

رفا:مخلية تنت عليهن 

صفوان:طاحظج و طاحظ ليتغزل بيج

رديت بضحكة:لا حشاك

صفوان: دمشي مو صوجج

لزمتة اضحك:صفصف اشاقة

رجع يبوسني حضنتة أبادلة مد ايدة رفع الغطة دخل وياي غطة روسنة بعدة لهسة مقتنع اكو كامرات 

ريحت راسي على جتفة احس بيدة هو يفتح دگم القميص رفعت وجهي ابوسة مغمضة و مستسلمة

گعدنة متأخرين على ما لميت اغراضنة ورتبت الغرفة سحبت الغطة اشتريتة من كربلاء ماحب انام على دواشك الفندق حتى لو نظيفة اضل اجز روحي

دوم اخذ وياي شي خفيف افرشة فوگهن و ارتاح

خلينة الغراض بالسيارة تمشينة نزور صليت هناك طلعت وياه رجعنة للبيت ميتة تعب گبل رحنة لهلي

اخذت جود و رجعت لبيتنة حاضنتة على گلبي  

تمددت بالغرفة ورة ما بدلت و ارتاحيت معبسة كل شوية الوم روحي ليش ما اخذتة گبت الهرمونات اجة صفوان ينشف بشعرة باوعلي مستغرب يسأل شكو

حجيت امسح عيوني:احس روحي أم مهملة 

صفوان:نامي رفا هاي اثار التعب

رفا: والله كلش نقهرت

تثاوب وخر الغطة تمدد يمي حجة يمسح على خدي 

:مابيج شي كل وحدة موظفة هيج ما مخليتة عد غربة يم أمج و دايرة بالهة عليه بعد شكو 

رفا:لو ماخذتة وياي احسة خطية

صفوان:حارة و شفتي شكد تعب گعدة السيارة عليمن لاهو يرتاح ولا أنتي 

رفا:هيج تگول

صفوان:امم لاتفكرين 

رفا:أحبـــك

بوستي براسي حجة يمسح على شعري: تدرين بية شگد احبج رفرف 

رفا:ادري تموت علية 

ابتسم مسحت على خدة احجي بهمس:هاي شكد حلو 

صفوان:كلي الج

رفا:انتة الي 

صفوان:اي عيني 

رفا:هنيالك وين لاگي وحدة مثلي تأمن روحك يمها 

صفوان: أيا كلاوجية 

رفا: والله غير حظ عدك

صفوان:راح اكتلج

رفا: استريح ابوجود تدري بية اخزيك

رفع وجهة عضاني بشفتي لا اگدر اصرخ ولا اتحرك

دفعتة بضوجة ضحك يبوس خدي يراضيني طنگرت

رفعني على صدرة حجة:تتزعل البغدادية

رفا:غير تعضعض بية

صفوان:من المحبة أبوية نحتار شنسوي بيك 

رفا:دخل اعضك شسوي

مد ايدة گرصتة يكره الگرصة خلة أيدة ببطني يعصر بيها و يدغدغني خلاني احوس عبرت للجهة الثانية 

اخذ جود حضنة رفعلي ايدة تقربت يمهم حاضنة ثنينة يمسح على شعري يبوس راسي كل شوية ابتسمت فرحانة امشي ايدة على زندة اكتب اسمي

صفوان: گلب بصف گلب

رفا:منو أني لو جود 

صفوان:ثنينكم حبيبتي رفرفتي 

عبرت ايدي امسح على شعر جود غمضت عيوني 

اتذكر كل لحظة مرت علية بكل سنوات دراستي جان صفوان الة ذكرى اول ما وعيت لهسة هو حبيبي

شكد عزيز حب الطفولة الحمدلله نكتب النة حياة سوة و تكللت الحياة بسعادة ثانية جود ثمرة حبنا

و جسر المودة بينة اكتملت حياتنة بوجودة و بيه

ريحت راسي على صدرة العب بأدين جود الصغيرة 

صح الطـريق جان موجع بس النـهاية تستحق گدر صفوان يخليني احبة من جديد و اكمل وياه راضية

بعض القصص الحب ما ينتهي حتى لو تكسر وتبعثر بين الخيانة و الدموع و هجر سنيين يبقى موجود ينتظر فرصة ثانيةو گلب شجاع يقرر يسامح وروح تقرر تعيش و شخص يغتم الفرصة و يقدرها 

رفا وصفوان مو بس حكاية حب همة درب طويل من وجع ونضوج حتى وصلوا للنهاية اللي حلموا بيها

الخاتمــــة .

أنتهت روايــة نقش بارد

وتنتهي وياها رحلة طويلة عشتها وياكم 

كلمة كلمة، وصفحة صفحة

أعرف إن هالقرار مو سهل،بس مرات الإنسان يحتاج يبتعد حتى يراجع نفسه ويهتم بحياته وأحلامه بعيد عن ضجة السطور

يمكن أرجع يوم، ويمكن تبقى هاي آخر رواياتي 

ما أعرف بس اللي أعرفه إنكم تركتوا أثر بگلبي

ما راح يختفي.

شكرًا لكل شخص قرأ، و شجع، صبر وياي، وشارك هالقصة.

إنتو مو بس قرّاء… إنتو جزء من هالرحلة.

إذا كان هالفراق طويل… تذكروني بخير، مثل ما راح أذكركم❤️❤️❤️ 

                                            

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم

شكرا لزيارتكم عالم روايات سكيرهوم