 |
رواية علي ناصيه الحب الفصل الاول بقلم حبيبه محمد
•عايز بس اقولك إني بحبها وعُمري ما حبيت حد غيرها .
أكاد أجزْم إني بس وقتها سَمعت؛ صُوت حِطام قلبــي .
ولأول مره في حياتي كُنت أحس إن الحُروف قادره إنها تتشكل في هيئة رصاص وتصيب روحي بـشطارة أحسن قناص أنا عرفته.
أتوقف وقتها عقرب الساعه بيا عند النقطه دي ،واتوقف العالم بالنسبه ليا عند اخر حرف هو نطقه ،حسيت وقتها أن عقلي هو كمان أتوقف عن التفكير ،ودموعي وقفت على طرف رموشي ومقدرتش إنها تنزل .
حسيت لأول مره بس أن في شخص في الدُنيا دي قدر إنه يـكسرني ؛يكسر قلبي اللي عشت محافظه عليه طول العُمر من التعب..
وفي لحظه شوفت كل الحكايات اللي بنيتها ،والذكريات اللي عشتها ،بتتهد قصاد عيني ،وبعد ما كنت اشطر مقاول يبني احلام ،خسرت كُل حاجه بنيتها في ثواني.
خسرت كُل حاجه على إيد اكتر راجل حبيته في الدُنيا دي.
وهنا بصيت للموج العالي اللي كان بيضرب الصخر بقوه من حوالينا وقلبه وقتها كان أشد قسوه من إي صخر موجود في اللحظه ده.
لمحت طيف شعاع الشمس الهارب بعد ما مرت سحابه خبت نورها وراها واتعكس وقتها ضوئها فوق عيونه الزرقه برموشها الطويله اللي عشقتها من اول يوم شوفتها .
نسمات الهوا كانت شديده وكأنها بتشاركه في قوته لدرجة أنها كانت قادره تطير قميصه الازرق اللي كان سبب في حُبي لكل درجات اللون الأزرق عشان شوفته عليه هوا.
عيونه كانت في عيوني ،ودموعي ورجائي كانوا قُصاد قسوته وفراقه.
كان باين في عيونه إنه خلاص ناوي على الفراق لكن أنا ؛ انا كنت متمسكه بـطيفه لأخر لحظه.
كنت باقيه عليه لأخر ثانيه؛ كنت راضيه بوجوده اللي دايماً هو غايب فيه ،كنت راضيه بخصامي انا هو باليوم والشهر والسنه ،كنت راضيه بغضبه وعصبيته ،كنت راضيه بضحكته اللي بخطفها منه وتُرد الروح لقلبي ،كنت راضيه بس بنظرة رضا منه قادره تقنعني أن في قلبه ناحيتي احساس واحد حلو.
احساس إنه بيحبني ،احساس إنه عاوزني زي ما أنا عاوزاه.
بصيت للمكان من حواليا وانا بحاول اقنع نفسي إن ده حلم من واقع عقلي الباطني اتبني بسبب خوفي الكبير من إن اكتر حد بحبه ممكن يجي عليه اليوم ويفارقني!.
ضحكت بعدم تصديق وانا برجع بضهري خطوتين لورا وبقول لقلبي اللي اتكسر زي لوح الإزاز أن ده مجرد كابوس.
مستحيل إن ده يحصل ،مستحيل إن مكان اللقى يكون مكان فراق!.
اصل هنا كانت اول مره نتلاقى ،على الشط هنا كانت اول مره يعترف ليا فيها بحبه ،بالـقرب من الموج ده قعدنا سوا نحكي ونتكلم لحد ما تُغرب الشمس ،على الصخر هنا كان مكان هروبنا من العالم كله.
طب ده حتى حبات الرمل دي شهدت على كل ذرة حُب اتخلقت في قلبي ليه على إيده ،تشهد إني حطيته في كفه والعالم كله في كفه ،تشهد إن بالرغم من رفض أهلي للعلاقه اللي ما بينا إلا أني اتمسكت بيه وحاربتهم وخسرتهم عشانه ،تشهد إني عُمري ما هربت ما الدُنيا غير ليه ؛عُمري ما هربت من خوفي غير لآمان حُضنه .
معقول يكون مكان اول اتلاقينا فيه يكون ميعاد لفراق جديد!.
°انت...انت بتقول إي!.
لكن الشئ الوحيد اللي خلاني اقتنع إن اللي انا عايشه فيه ده مش حلم هو وجوده قُدامي.
كان واقف زي العاده بيبص ليا بكل هدوء ،كُنت متعوده دايما إني بتكلم وهو بيسمع مني ،انا برخم عليه وهو بيضحك على شقاوتي ،كنت شقيه وهو هادي ،كنت بحب الضحك والجري وهو رزين وعاقل .
كُنا زي الأبيض والأسود بنكمل بعض ،كنت فاكره إن زينا زي الشمس والقمر بيكملوا العالم بنورهم ،لكن المفاجأه إن كان زينا زي اليل والنهار عُمر ما كان في ما بينهم لقاء يجمعهم.
ولأول مره كنت اتأمل فيها عيونه وميكونش فيها انعكاس عيوني اللي بتلمع بتفسير واحد بس منه ،كانت بتهرب مني ،كانت بتبص لكل حاجه حوالينا البحر والصخر والرمل والسما لكن إلا عيوني ،ووقتها هُروبه مني خوفني .
هروبه قدر يثبت لعقلي إن اللي بيحصل ده بداية وجع جديد.
مديت كف إيدي بسرعه ومسكت كف إيده كان بارد ،مفرود ورافض إنه يمسك فيا المره دي ،وقتها بس حسيت إنه مليان شوك جرحني ورفض إن ده يكون مكان كف إيدي للمره الأخيره.
°عُمران انت سامع بتقول إي؟ مين دي اللي حبيتها وعُمرك ما حبيت غيرها!.
أصعب حاجه ممكن تعدي على قلب الست إنها تتفاجئ في يوم إنها كانت ولا حاجه بالنسبه للراجل اللي حبيته ،تتفاجئ إنه عُمره ما شافها أو كانت في عيونه الست الكامله اللي هو عاوزها.
أصعب حاجه إن بعد ما تضحي بكل حاجه عشان اكتر شخص انت حبيته هو يضحي بيك انت .
وكان صعب على قلبي وقتها إنه يتقبل إن عُمران قلبه شاركني فيه واحده تانيه ،واحده جات وخطفت كل احلامي في ثانيه ،خطفت الفُستان الابيض اللي فصلته عشان البسه عشانه هو وتقعد في الكوشه جنبه وانا لا.
في واحده تانيه جات وهتقف مكاني وتكوي ليه عباية العيد البيضه اللي وعدته إني وقتها هقوله على اخطر سر في العالم.
في واحده تانيه هتقعد معاه وتسمع معاه حواديت الكرتون اللي عُمره ما حبها بس هو وعدني ،وعدني إني مش هسمعها غير وانا في حضنه.
في واحده غيري هتخطف مني البيت اللي اختارت مكانه انا وهو يكون هنا ،في اسكندريه ،شقه كبيره فيها بلكونه واسعه نمليها ورد ويكون فيها طربيزه صغيره نشرب عليها كوبيتين شاي بالنعناع واسئله حلو الشاي؟ يجاوب مش احلى من اليوم اللي شوفتك فيه!.
•زي ما سمعتي يا ياقوت أنا بحب رفيف وعايز اكمل معاها اللي جاي من عُمري إيه الصعب في إنك تفهمي كده!.
عُمري ما جربت أو عشت إحساس الزلزال اللي بيقسم قشرة الأرض إلى نصفين لكن دلوقت عشته ،عشت قسمة روحي لـمليون حته وعرفت وقتها إن يارتني عشت في يوم زلزال تاني غير اللي انا بعيش فيه دلوقت.
إيه الصعب في إني افهم أن الشخص اللي عشت احبه اربع سنين بيحب حد غيري!.
الشخص اللي ضحيت بحلمي عشانه بيهدم كل الاحلام اللي انا حلمت بيها في ثانيه!.
الشخص اللي دايما كان فارس احلامي واقف دلوقت قدامي ،في مكان ميلاد حبنا وبيقولي إنه بيحب واحده غيري!.
كهربه مسكت في قلبي كانت قادره إنها تخلي جسمي كُله يتنفض ،بصيت لملامحه وانا بحاول اقنع نفسي إن كُل ده هزار بايخ.
مش معقوله عُمران بعد كل السنين والأيام والشهور دي قلبه يكون مع واحده غيري!.
°قول إنك بتهزر يا عُمران ،هزارك بايخ اوي قولتلك مليون مره متهزرش.
•انا مبهزرش يا ياقوت أنا مش عارف إيه الصعب إنه تفهمي إني بحب واحده تانيه!.
°بتحب واحده تانيه! طب وانا يا عُمران!.
وقعت من الدور العاشر وانكسرت.
كان ده احسن وصف اقدر اوصف بيه نفسي في اللحظه دي ،بهتت ملامحي واختفت منها ملامح الفرحه لما عرفت إن عُمران طالب يقابلها.
دموعي اتحجرت جوايا ومقدرتش إنها تنزل وزودت من ده وجع وتعب فوق تعبي .
وسألت نفسي وقتها سؤال واحد: لـيـه كده؟.
•بصراحه يا ياقوت أنا مبقتش مرتاح معاكي ،وانا ملقتش راحتي في الأيام الاخيره دي غير مع رفيف ،هيا من نفس سني يعني عقليتنا شبه بعض ،هاديه مش شعنونه ،عاقله مش مجنونه ،فاهمه أنا عاوز إيه ومتطلعه لأحلامي الكبيره .
•شجعتني إني اسافر وأشوف حياتي ومستقبلي مش زي ما انتي رفضتي إني امشي واسيبك ،هيا قدرت تفهم حاجات كتير انتي كُنتي دايما شايفه إنها عقبه في علاقتنا وبصراحه كده أنا حسيت أني مش هلاقي نفسي غير معاها هيا واتمنى إنك تفهمي ده.
°أنا...أنا بس كنت رافضه سفرك عشان خاطر مامتك متسيبهاش لوحدها لكن عُمري ما اكون عائق لمستقبلك يا عُمران ومن امته اصلا كنت عائق! ده انا اللي شجعتك تكمل في كُليتك بعد ما باباك مات وانت رفضت تكمل فيها وقولت أن مبقاش عندك طاقه تكمل في حاجه !.
•شجعتك تفتح مشروع انت كنت خايف تخسر فيه ووقفت جنبك وسهرت انا وانت ليالي طويله نخطط ونرتب لحد ما المشروع وقف على رجله وبقى يدخل ليك دخل كويس ،شجعتك لما طلبت مني اتوسط ليك لبابا يساعد إنك تتقبل في شركه كبيره وتتعين فيها ورغم سوء العلاقه ما بينكم عملت كده عشانك انت واستحملت كم الكلام اللي اتقال ليا وقتها عشانك وبعد كل ده مكنش ليك فيها نصيب !.
•انا عُمري ما كنت سبب في تعبك يا عُمران أو عائق انك تحقق احلامك الكبيره اوي بالعكس أنا كنت اكبر داعم ليك في كل خطوه ،عُمري ما قصرت معاك في حاجه ولا خليتك تحس إنك انسان قليل عشان تقولي إنك ملقتش نفسك غير معاها هيا!.
•ياقوت انا مش بقولك كده دلوقت عشان تفكريني بكل مواقف الشهامه والجدعنه إلي انتي عملتيها معايا انا بقولك عشان تكوني عارفه ان انا بحب رفيف وخلاص قررت إني هخطبها.
طلقه من مسدس طلعت وصابت حمامه طايره في السما وقعتها.
اتجمدت ،رجلي اتثبتت مكانها ،روحي شوفتها واقفه قصاد عيني بتبصلي بعتاب واسف.
غمضت عيني وحسيت إن الدنيا كلها بدأت تلف بيا ،كنت زي غريق اللي وقع في نص البحر وبالرغم من إن حواليه ناس كتير إلا إنهم رفضوا ينقذوه.
بصيت ليه مره تانيه وانا بتمنى إن يكون طيفه ده خيال ،وقسوته دي كابوس ،لكن كل ده طلع أسوأ واقع ممكن اعيش فيه.
° تخطبها!
وانا يا عُمران! انا فين من كل حسبتك دي!.
•انا اسف يا ياقوت بس انا مش قادر اكمل اكتر من كده معاكي ،بعدين إنتي إي؟ إنتي والدك رافض علاقتك بيا اصلا ما بالك لو اتقدمت ليكي ؟ انا مش هقضي عمري كله خروج معاكي وخلاص يا ياقوت وهرب عشان نعرف نتقابل بعيد عن الناس عند البحر ،مش هقضي عمري كله بسمع احلامك التافهه عن إنك عاوزه تكوني كاتبه كبير وانتي اصلا محدش يعرف بوجودك غيري !.
•مش هفضل اسمع في كل مره اقابلك فيها مشاكلك مع صحابك والضغط اللي بتمري بيه في البيت ،انا مش عايز عيله يا ياقوت ،انا عاوز ست ناضجه ،ست تفكر معايا للمستقبل ،هنشتغل في إي ،هنأمن حياتنا ازاي ،الفلوس هنصرفها فين وليه وهنستفاد منها إي، مش عاوز واحده بتحلم ،مش عاوز واحده طول الوقت بتحلم ببيت وبلكونه وخروجة نص الليل ،انا عاوز واحده ست تكملني يا ياقوت وللأسف أنا كل ده ملقتهوش فيكي.
الأصعب من إنك تكتشفي إن عُمر الراجل اللي ملى قلبك مش بيحبك ؛ إنك تكتشفي إنك كُنتي بالنسبه ليه ولا حاجه.
قلبي وقتها بس كان عباره عن حبات من إزاز متحطم قدامي قاعده جنبه بقول ليه إني اسفه لكنه رافض يتصلح.
مكنتش قادره استوعب إن فعلا عُمران عمره ما شافني الست اللي كان بيحلم بيها!.
كنت بحاول اقنع نفسي إزاي عمران بعد كل ده مختارنيش!.
في حين أن انا اختارته في وقت ما الكل رفضه هو رفض يختارني.
ووقتها كان احسن مثل ينطبق عليه :علمتهُ الرَمايـه فَلما أشتدْ عوده آصابني.
°انت....انت إزاي بتقول كده! إزاي بتقول إنك بعد كل ده إنك مكنتش شايفني ،إزاي بعد كل حاجه حاولت اعملها عشانك انت مش شايفها وطلعت وكأني كنت بنفخ في قَربه مخرومه عُمرها ما اتملت! انا عُمري ما كنت عيله غير معاك انت يا عمران ،كنت انت الوحيد اللي قادره احكي ليه كل حاجه من غير خوف ،الوحيد اللي كنت لما بضعف بهرب ليه هو ،الوحيد اللي لما كنت بعمل أي إنجاز بشاركك انت الاول !.
•انا عمري ما كنت عيله أو طفله غير معاك انت عشان انت حسستني كده ،حسستني إني مسؤوله منك طول الوقت عشان كده كنت معاك حاجه تانيه ،كل حاجه كانت بتتغير معاك انت ،اول ما كنت بطلع من عتبة البيت كنت بخلع توب الست الناضجه والروتينيه الممله واتغير معاك انت ،انت ازاي شوفت إن كل اللي عملته ده كان هوا! كان فراغ! ازاي شوفت إن محاولاتي ده كلها كانت عادي!.
•ياقوت متصعبيش عليا الموضوع.
°مصعبش عليك الموضوع انت مش سامع انت بتقول إي! انت جاي تقول لواحده لو أتمنيت نجوم السما كانت هتمد إيدها وتجيبها ليك عشانك انت وتقولها بتحب واحده غيرها! انت جاي بتقولي بكل صراحه إني انهي حياتي معاك يا عُمران! جاي زي الونش بتزيل بيت خمس ادور اتبنى بشقى راجل طافح الكوته وتقوله امشي ابني بعيد وطالب مني امسح كل أحلامي معاك! .
•انت عملت اللي اصعب من سكينه أو رصاصه ممكن تعمله في قلبي أنت بتقولي إنك بتحب واحده غيري! عاشت إيه دي معاك عشان تحبها! عاشت معاك إي يا عمران عشان تحبها عليا! شافتك وقت تعبك وانت فاقد الشغف والحياه! شاركتك في حزنك وتعبك ومسحت دموعك اللي نزلت! شافت فرحتك وحضنتك يوم حفلة تخرجك! ضحكت معاك على ايام طفولتك اللي عمرك ما حكيتها لحد غيري! شافت عصبيتك واستحملتها! .
•شافت تحكماتك وغضبك على حاجات ملهاش لازمه! استحملت كل مره كنت بتوجعها بكلمه كده ولا كده وتسيبها تعيط باليوم والأتنين؟ عاشت إيه معاك يا عمران! حكيت ليها عن مشروع الشركه الي عاوز تعمله؟ حكيت ليها عن البيت اللي نفسك تشتريه وتحوله لتحفه معماريه تعيش فيه مع شريكة عمرك! قولتلها أسماء اولادك اللي بتطلبهم من ربنا من دلوقت! عاشت معاك إي ما تقولي!.
ضربته؛ وياريتني قدرت اضربه زي ما هو ضربني.
ضربته بكل قوتي وقهرتي فوق قلبه وانا بسأله لي! .
ليه هيا مش انا.
هيا احلى مني؟ مثقفه اكتر مني؟ فيها حاجات إي مش عندي؟.
ضربته ؛وهو كان واقف زي الصنم مبيتحركش ولا كأن كلامي حرك فيه ذره واحده.
ولا كأن كلامي اثر في قلبه ووجعه زي ما اتوجعت دلوقت.
•قولي يا عمران هيا احلى مني؟ فيها إي مش عندي عشان متحبنيش! بتسمعك زي ما انا بسمعك؟ بتفرحك زي ما انا بفرحك! بتسندك لما بتميل زي ما انا كتفي طول عمره ساندك! قولي فيها إي عشان تحبها يا عمران ومتحبنيش!.
°متعبتش معاها يا ياقوت وحسيت إن معاها انا مش محتاج استهلك لا طاقه ولا مشاعر كتير زي معاكي ،انتي طالبه مني طول الوقت إني أكون ليكي انتي بس ،احبك طول الوقت، اهتم بيكي طول الوقت، طالبه وجودي طول العمر ،طالبه مني مشاعر عمري ما اقدر اوفرها ليكي.
•لكن رفيف اعقل من كده ،الحياه معاها سهله ،مش محتاجه إني اطبطب عليها طول الوقت ،مش طالبه مني اني اطمنها عشان هيا خايفه طول الوقت ،انا حياتي معاها هتبقى اسهل من معاكي يا ياقوت ،انتي عايزه معافره وانا معنديش طاقه.
•انا عشت عُمري كله بعافر عشانك انت! وقفت قصاد بابا وقولتله يا هو يا لا ،وقفت قصاد ماما لما قالت ليا إنك مش هتنفع ليا وقولتلها إني راضيه بيك بعيوبك قبل مميزاتك، وقفت قدام كل صحابي لما كدبوا حبك ليا وقولتلهم إن كفايه عليا وجودك، انا عشت عمري كله بضيع في طاقات ومحاولات عشانك يا عمران ،انت كنت بتسحب مني كل الشحن عشان تقف وانا عمري ما رفضت !.
•انا مطلبتش منك إنك تهتم بيا أو تطبطب عليا طول الوقت ،انا طلبت وجودك زي ما انا موجوده ،طلبت إني مخافش وانت موجود ،طلبت بس إني محسش إني هامش في حياتك! ،انا بس طلبت أن قلبك ده يشيل ليا بذرة حب وانا هرويها بكل براح ،طاقة إيه اللي هتخلص معايا يا عمران ! .
•اربع سنين طاقتي فيها راحت على الأرض وعمري ما قولت ليك امشي! عمري ما قولت ليك انا تعبت يا عمران! دلوقت بتقولي إنك تعبت ،تعبت لي ؟ هو انت حاربت عشاني؟ خسرت عشاني إي ؟ عملت إي عشاني يا عمران! قولي خليني اعرف انت عملت اي عشاني تعبتك وخليتك تخسر طاقتك ومشاعرك ومتلاقيش نفسك معايا!.
°وجودك في حياتي بقى متعب يا ياقوت، وجودك معايا بقى محسسني بحمل انا شايله فوق طاقتي ،وبعدين انا من حقي وقت ما اعوز امشي اني امشي .
•من حقك؟ من حقك إي؟ من حقك إنك تدوس على قلبي وتمشي كده عادي؟ من حقك إنك تسيبني في نص الطريق وتمشي من غير حتى مبرر واحد ترضيني بيه؟ من حقك إنك توجعني يا عمران؟ من حقك إنك تحط قلبي تحت جزمتك وتدوس عليه بكل بجاحه وتقولي من حقي إني امشي! .
•طب ما انا كان من حقي إني امشي من زمان، امشي من اول مره تعبت فيها وحسيت اني شايله حمل فوق حملي ،امشي من اول مره جيت فيها على نفسي عشانك، امشي من اول مره اضربت فيها عشانك ،امشي من اول مره عيطت فيها بسببك، امشي من اول مره اتوجعت فيها بسببك، امشي من اول ما حسيت إني تعبت من المحاوله والمعافره ،مش ده برضه كان من حقي وقتها؟.
°وانا مطلبتش منك تفضلي يا ياقوت انتي اللي حاولتي وانا مطلبتش منك محاوله ،كل واحد يدفع نتيجة عمايله.
اهرب من قلبي اروح على فين، وانا في العادي كنت بجيلك!.
رجعت خطوتين لورا وانا بحاول افهم مين الشخص اللي واقف قدامي!.
معقوله ده عمران! ؛عمران اللي مسح دمعتي هو نفسه هيكون سبب في نزول دمعتي طول العمر!.
ده اللي حبيته وقولت حياتي معاه براح ومن غيره الدُنيا كفن اهرب منه!.
رفعت كف إيدي وطبطبت على قلبي اللي كان بيصرخ فيا الرحمه.
كنت بحاول افهم انا عملت إي غلط لأجل إني اتوجع كده؟.
عملت إي عشان اكون بالنسبه ليه شخص لقطه بيهون عليه حياته.
مجرد مرهم مخدر بيحطه على جرحه لحد ما يطيب وبعد كده ينكر إنه ساعده وأنه اتوجع لوحده؟.
•انت اكيد مش عمران! عمران عمره ما يوجعني بالشكل ده ابدا!.
°انا مش بوجعك يا ياقوت أنا بختار حياه احسن لينا إحنا الأتنين احنا مش هننفع مع بعض صدقيني.
•مننفعش مع بعض! اربع سنين من عمري معاك وتقولي مننفعش لبعض! اربع سنين بسقي حبك في قلبي كل يوم لحد ما بقى نخله عمري ما اعرف أخرجها من تربتها وتقولي مننفعش لبعض! اربع سنين وانا عايشه ليك وبس ،عايشه عشان بحبك !.
•عايشه عشان انت موجود في حياتي وانا مآمنه أن عُمر الغدر ما يجي منك انت ودلوقت وجعي منك لو عشت عمري كله اتعالج فيه هيكون زي الكانسر الكيماوي هيعلم في جسمي طول العُمر ،انت ازاي قادر توجعني كده بجد! إزاي انا هونت عليك!.
°انا مش بكرهك يا ياقوت عشان آذيكي انا بس ملقيتش راحتي معاكي ،منكرش انك عملتي كتير عشاني واستحملتي كتير عشان خاطري بس ده يمنعش إني مش عاوز اكمل معاكي يا يا ياقوت أنا بحب رفيف وده واقع لازم تتقبليه سواء دلوقت أو بعدين إني بحب رفيف وهخطبها.
مفيش احساس اسوء من ان يخيب ظنك فـ حاجه حطيت املك كله عليها.
وصدمتي في عمران كانت أكبر صدمه اخدتها على مر حياتي ولأول مره من عشرين سنه احس أن قلبي اتفرط.
رجعت خطوتين لـ ورا وانا بتأمل ملامح عُمران للمره الاخيره ،بتأمل عيونه الزرقه برموشها الطويله اللي لأول مره في حياتي احس إني بنفر منها وكارهه إني ابص فيها ،انعكس شعاع الغروب كامل على ملامح وجهه وهنا بصيت ليه بلحظة وداع اخيره وقد أيقنت أن كل الي زرعته ورد ورد ،جنيته مُر مُر.
وهنا رفعت كف إيدي ومسحت دموعي اللي كانت نزلت بكل آسف على كلامه وقسوته في جرح قلبي.
وهنا ضحكت بكل الوجع اللي خلقه جوايا وبصيت ليه وانا بتمنى إني بس اشوف منه رد فعل يرطب على قلبي .
•للأسف يا عُمران انت لا بتحبني ولا هتعرف تحبها لإنك مبتحبش غير نفسك وبس ،للأسف انا لما قدمت ليك كل حاجه عشان تبقى مرتاح وجنبي وفي امان إنت استكفيت وفاضت بيك راحتك مني ودلوقت بدور على حد تاني يريحك ويطبطب عليك .
•انت أناني يا عمران ،اناني وبدور على راحتك بس ،بدور على راحتك على حساب راحة الناس اللي حواليك ،وانا اوعدك يا عُمران ،بحق كسرت قلبي ووجعي ده ما هنسهالك وكل اللي شيلته ليك حُب حُب هحوله كُره كُره عشان انا مكنتش استحق منك كده ،مكنتش استحق أن مشاعري تتبهدل معاك بالشكل ده ،مكنتش استحق إن قلبي يدوق الوجع ده كله منك انت يا عُمران.
°هتكرهيني يا ياقوت؟.
•وافضل احبك لي وانت قلبك مع واحده غيري؟ افضل باقيه عليك لي وانت شهر ولا انت وهتعيش حياتك وهتقابلني في يوم وانت شايل عيالك على إيدك؟ اوقف حياتي لي! ايوا انا هتعب يوم اتنين شهر بس صدقني انا عارفه إني اقدر أتجاوزك كويس ،اقدر اخليك زي طيفك مبيأثرش فيا عارف لي يا عُمران؟
•عشان انا مقصرتش معاك في حاجه ،اديتك كُل الحب اللي انت كنت محتاجه، عوضتك عن كُل حاجه انت فقدتها بعد موت والدك ،انا مقصرتش معاك في حاجه يا عُمران ،وأن كان حُبي ليك حمل تقيل فأنا بخلي دلوقت مسؤوليتك من حُبي وبقولك روح لـ اللي قلبك حبها يا عُمران ربنا يزرع حبها في قلبك ويعوضك بيها خير عني ،اكيد ربنا مختار ليك الاحسن ومختار ليا الأحسن.
°بتدعيلي احب غيرك يا ياقوت قلبك طاوعك !.
•الانسان مننا ميتمناش للي يحبه غير كُل خير وحتى لو مفضلتش معايا ربنا اكيد مخبي ليك اللي احسن مني ومنك ،وصدقني انا هفضل مقتنعه فتره من الوقت إن دي نهاية العالم وهيا فُراقك لكن بعدين هكتشف إن ربنا كان مخبي ليا حاجه احسن .
•كان مخبي ليا حد يقدر مشاعري ،ويحافظ على طاقتي ،ويتقبلني سواء كنت طفله أو أنثى ناضجه ،هيجي الشخص اللي هيشوف محاولاتي كنز ،هيجي الشخص اللي هيعالج جروح قلبي اللي ملوش ذنب فيها .
قربت ووقفت قصاده من جديد ،عيني في عينه وهو المره دي مش بيهرب مني ،وعلى قد حُزني ده وتعبي كنت لابسه قناع القوه لأخر لحظه.
وبالرغم من دموعي اللي نزلت ،وبالرغم من قلبي الباهت ،وبالرغم من تعبي الظاهر ،إلا إني عرفت إن كان لازم امشي ،كان لازم امشي في الوقت اللي حسيت فيه إني لازم امشي.
وهنا مديت كف إيدي ومسكت كف إيده لأخر مره وحضنته لأخر مره وعيني راقبت الشمس اللي يدأت تختفي في موج البحر وتبان ملامح وجه عُمران بدون غروب لأخر مره.
لحيته الخفيفه ،بشرته البيضه، خصلات شعره ساعات تكون ملويه وساعات تانيه تكون ناعمه .
وكأني قررت في اللحظه دي إني احفظ ملامحه جوايا لأخر مره.
•ابقى عرفها يا عُمران إنك بتحب القهوه سُكر زياده ،عرفها إنك مبتحبش الصوت العالي والعناد ،ابقى عرفها إنك بتحب الأكل ملحه خفيف ،ومبتحبش الاكل اللي فيه زيت او سمنه وأنك بتحاول تاكل اكل خالي الدسم ،عرفها إنك لما بتصدع مش بترتاح غير على كوباية قرفه بـمعلقة سكر واحده .
•عرفها إنك بتحب الشغل وإنه اول حاجه عندك ،ابقى عرفها برضه إنك مبتحبش غير اللون الازرق في كل لبسك هو والأبيض ،عرفها إنك بتحب تلعب سباحه وطول عمرك تغلب الموج مره وهو يغلبك مره ،وعشان خاطري ابقى عرفها إني كنت موجوده في حياتك وعمري ما قصرت في حقك.
°ياقوت....
•ابقى عرفها يا عمران أن ياقوت حبتك بكل الطرق اللي تعرف بيها تحب ،ابقى عرفها أن ياقوت حاولت عشانك وعشان تقدر توصل لقلبك بكل الطرق وأن يبختها بقلبك لو حبها بجد ،ابقى بس عرفها إني مش عيله ولا حاجه انا بس حبيت لأول مره شعور إني أكون مسؤوله من حد لكن انا طول الوقت كنت أثنى ناضجه يا عمران بتساعدك بكل طاقتها وبتنصحك بكل معلوماتها ،عشان خاطري لو جات في يوم سيرتي قصادها قولها إنك عشت معايا اجمل اربع سنين في حياتك.
°ياقوت..
•عمران لو إنت بتحبها بجد اوعى توجعها زي ما انت اتوجعت منك دلوقت ،كسر القلوب مش سهل ،ومتنسانيش في يوم من الايام ابقى اسأل عمي وافتكرني بذكره حلوه ،وانا ربنا يطبطب على قلبي من بعدك يا عمران .
•ربنا يطبطب على الجرح اللي فتحته جوا مني وهفضل اتعافي منه كتير ،انا مش انانيه عشان تجبرك تكمل معايا وانت مش عايز ،مش انانيه عشان اخليك تعيش معايا وتكون تعيس ،ولو سعادتك مع واحده غيري ربنا يجعلها خير ليك وانا ربنا يعوض عليا في قلبي.
سحبت كف إيدي من بين كف أيده بعد ما حضنته لأخر مره وهنا بس شوفت على وجهه ملامح التأثر من كلامي وكأني أخيرا لمست وتر حساس جوا قلبه.
وهنا وقفت على أطراف رجلي وحضنته لأخر مره.
كانت دي اول مره اتجرأ واعمل فيها كده ،كانت دي اول مره أقرب منه واحضنه ،وكأني قررت إن فراقنا المره دي يكون مختلف.
وكأني قررت إني اسيبه يفضل فاكر الحضن ده في كل مره يحاول يقرب فيها من واحده غيري ،ويفتكر إن في قلبه حبه بكل الحب اللي اتخلق في العالم.
قررت إني اسيب ليه ذكرى مني عُمره ما يقدر ينساها.
بعدت عنه أخيرا وقرأت ملامح الصدمه فوق وجهه وكأنه عمره ما كان متوقع إن ياقوت الطفله يطلع منها كل الجراءه دي.
لكنه مكنش قادر يفهم إن اللي حضنته دلوقت هيا ياقوت البنت الناضجة اللي حبيته بكل ما يملك قلبها من حب.
البنت الناضجة اللي دايما كانت شايفاه اكبر إنجازاتها ولكنه خيب ظنها.
البنت الناضجة اللي ضحت بكل حاجه عشانه.
بعدت عنه وانحنيت خلعت جزمتي أو عشان اكون اكثر دقه خلعت قلبي من مكانه وده مش امتثال بطقوس الوداع المقدسه بل عشان اقدر اجري من قدامه اخيرا من غير ما التفت وابص ليه مره تانيه.
جريت من قدامه وسيبته واقف يراقب طيفي الحزين وهو بيهرب من قدامه.
وكان كل تفكيري وقتها هواجه كُل الناس اللي وقفت ضدهم عشان عُمران إزاي!.
هقول لأهلي اللي كانوا عارفين من البدايه إن دي هتكون النهايه إي.
جريت وقلبي بيجري قدامي وانا بحاول اقتنع أن لأخر مره ده كابوس.
لحد ما وصلت لتقاطع الشارع وقفت ،لفيت، بصيت ليه أخر نظره ،اخر نظرت وداع وايقنت وقتها إن كل ده نتيجة محاولات ومُعافرات محدش طلبها مني.
وكان آخر حاجه اسمعها منه هو صوته وهو بينادي عليا بكل صوته وبيجري ناحيتي وعربيه سريعه من اخر الطريق جايه وما بين إني اتخطى أو إني افضل.
اخترت إني افضل .
وخبطة عربيه ؛كانت اهون من خبطة عمران لـ قلبي.
ومن قريب ومن داخل العربيه السريعه اللي قدرت تخبط قلب كان نصيبه بس إنه يحب وميتحبش طلع صوت موسيقى بتقول:
||وأنا غلطان عشان حبيت وبيِّنت إهتمامي بيك
عشان كده يعني بقيت ما انفعشِ
ومن نظرك نزلت ما بقيتش لايق ليك
وكان مفروض ما أحبكشِ
ولو حبيت ما أبينشِ||.
||ودي الوقت خلاص همشي
أنا وقلبي اللي ذايب فيك
وليه طيب عشان طيب
عشان يعني اللي في قلبي على لساني
بتكسرني وتخسرني
بتخسر حب مش سهل تلاقيه ثاني||
